روايه بنت السيل

الساعه 10 مساءاً
هند تفرك يديها بتوتر : بنات والله خلاص امزح مابي اتزوج
ضحكوا البنات بقوه.
هند امتلت عيونها دموع وتمسكت بدلال : لا تروحون وتخلوني
امل : هيي خيييير تراه ما بياكلك!
دلال : سيبي يدي يابنت! عيب عليك
هند : انتي انتي رسيل خليك معانا بليز
رسيل بضحكة : والله ان يمسكني ياسر من شعري ويشوتني برا الغرفه
هند : امانه امانه لا تخلوني
سيلين : يلا يابنات ياسر عند الباب
زادت رجفة هند وخنقتها العبره وعيونها مليانه دموع.
باستها دلال بسرعه : لا تخافين بس يلبسك الشبكة والدبله وخلاص
كتمة هند شهقتها ونزلة عيونها ورجفة يديها لازالت مستمره.
ثواني ثم دخل ياسر وتنحنح.
رسيل وبيدها الطقم واقفه بجنب ام مناف.
تقدم ياسر لام مناف وباس راسها
ام مناف : مبروك عليك نور عيني
ياسر ناظر هند وابتسم ورجع ناظر امها : الله يبارك فيك
رسيل : مبروك حبيبي
ياسر : الله يبارك فيك ياعمري
رسيل : يلا لبسها الشبكه “مدة يدها لهند” قومي هنوده.
برجفه بلعت ريقها هند وقامت وعيونها بالارض.
تقدم ياسر لها واخذ من رسيل السلسال ووقف ورى هند المرتبكه بشده ,ابعد شعرها وحطه على جنب ولبسها السلسال وهمس لها بدون محد يحس : محلُوه.
بلعت ريقها واكتسى جسدها بالحمره دلاله على خجلها.
مدت له رسيل السواره “الذهب” واخذها منها وبيده الثانيه سحب يد هند وركبها لها وبحركة جريئه رفع يدها لشفايفه وباسها.
رمشت هند بصدمه وتوتر وحيا بنفس اللحضه.
رسيل بضحكة مدت له الدبله : يلا لبسها الخاتم
اخذه منها وهو مبتسم نص ابتسامه ونظراته تلفح هند باعجاب مُعلن.
سحب يدها ولبسها وبحركة سريعه من هند سحبت يدها قبل يبوسها.
توسعت ابتسامه ياسر على حركتها.
ام مناف : يالله يابنتي يارسيل.
طلعت رسيل مع ام مناف وظلّوا هند وياسر لوحدهم.
هند اللي كانت منزله راسها ومستحيه ومرتبكه وقلبها يدق بقوه
على عكس ياسر اللي كان يناظرها بتأمل مرّت الدقايق بهدوء وياسر يتاملها بدون ملل وعلى وجهه ابتسامه خفيفه.
قطع صمته وتنحنح ونطق : مبروك ياهند
حست فجأه انها تشنجت وقلبها المها بقوه وفعلا ندمت ندم شديد على موافقتها.
استغرب انها ماردت عليه بس حط احتمال انها مستحيه وطلع جواله وهو يقول : عاد انا ماعرف اصور بالكام مثل طلال بس بنتصور بالجوال بعدين نطبعها
ردت عليه هند ب : لا
ناظرها بدهشه ورفع حاجبه.
هند لقطت انفاسها بصعوبه وقالت : مارح اصور بالجوال
عقد حواجبه وابتسم بغيض : يعني خايفه على صورك؟
بسرعه هند قالت : شدراك ممكن ينسرق الجوال او يضيع!!
تناهد بصبر : اوك بجيب الكاميرا
هند همست : مايحتاج!
رفع حاجبه وفعلا ماعاد قادر يتحمل يحسها متعمده تستفزه.
هند ارتبكت ودق قلبها لما شافته عصب : يمدينا بالزواج “همست” لاتزعل.
وكان كلمتها خففت حدته وعصبيته.
تنحنح وقال : اوك بكيفك
تاملها من جديد بحب وطاحت عينه على الورد اللي بيدها وقال : انتي وش سويتي فيني؟؟؟
رفعت عيونها لعيونه بتردد ودق قلبها بقوه.
ياسر : ضيعتيني “تناهد” اخذتيني سرقتيني سلبتيني قلبي!
لا ارادي قامت هند وهي تتنفس بسرعه وباحراج : ااا انا اسف بطلع
ماتركت له فرصه يرد عليها طلعت وتركته رفع ياسر حاجبه على تصرفاتها الغريبه بنظره لكن سرعان ماعذرها بحكم انها زي اي بنت مستحيه بيوم ملكتها.
تناهد وقام طلع من المجلس.
.
.
الساعه 12 منتصف الليل بمنزل رعد وبعد ماراحوا الضيوف جميعهم عدى مناف واهله طبعا.
رعد مد ل طلال مفتاح الشقه : ياويلك وياسواد ليلك لو احصل فيها شيء خربان ولا مكسور
طلال : لا تمن علي!
رعد : يالله اذلف
طلال : دقيقه رعد
لف له رعد وناظره بدون مايقول شيء
طلال دخل يده بشعره باحراج : تذكر لما بالشمال قلت لي ماتضحك الدنيا على رجال؟
رعد وهو معقد حواجبه : ايه؟لش؟
طلال : شكرا ماتعرف قد ايش كانت جملتك هذي بمثابة الجبر لكسوري.
قرب منه رعد وحط يده على كتفه : ماتضحك على رجال ياطلال لكن اذا شافتك رجال تضحك لك
ضمه طلال بقوه وهو يناظر ريما الواقفه بعيد عنهم : ضحكت لي وانا اخوك
ضحك رعد وشد عليه : جعلها تضحك لك دايم
ابتعد عنه طلال وهو مبتسم.
رعد : يلا انقلع ل الشقه وزي ماحذرتك
طلال اشر لريما تروح السياره : خلاص تبشر
افترقوا رعد وطلال اللي دخل للبيت واللي راح ل السياره.
ركب طلال السياره وهو مبتسم : ها انبسطتي؟
ريما بحيا : اي
طلال : اكلتي؟؟
ريما : ايه؟
طلال : ياويلك لو تكذبي علي ترى ادق على رسيل ولا اسيل واسالهم
همست باحراج : والله اكلت
طلال ضحك : بعمري والله جعله بالعافيه ياقلبي.
نزلة راسها بحيا ونظرات طلال المُغرم معلقه فيها.
همست : انتبه لطريقك
ضحك بقوه : شسوي عيونك حلوه!
سحبت الغطى على عيونها وهنا طلال انفجر ضحك وهمس : ياحبي لك بس.
.
.
عند مناف جلس ع الكنب وهو يناظر ايشيء قدامه بس مايناظر ابوه.
قام ابوه وهو يحاول يخفي ابتسامته على حركات مناف وناظر لرعد : يالله ياولدي استودعتكم الله
رعد : وين ياعم لسى؟
ابومناف : والله يابوك صاحي من الصبح وتعبان وماصدقت يروحون الناس.
رعد تناهد : اجل انا داخل عند خالتي بسلم عليها
ابومناف : قل لها تلحقني!
رعد : ابشر
طلع رعد وماظل بالمجلس غير مناف وابوه.
ابومناف : الا يامناف
استعدل مناف بجلسته وتنحنح بدون مايناظر ابوه.
ابوه : اللحقني انت بعد!حسابك معي عسير
قال جملته وخرج اما مناف بكل تبلد بمشاعره نطق : عسير ولا بطاطس هههههههههههههههههه
على دخلت رعد اللي عقد حواجبه وقال : مجنون انت؟
مناف بشعور غريب نطق : انجنيت بحبها؟قتلتني؟هبلت بقلبي
بدون شعور نقز عليه رعد بغيض ومسكه من رقبته وشعره
مناف : اخخخ بعد عني يادب كسرتني
رعد : يااا### انا رعد بن مشعل تفشلني قدام الناس وتحطني بموقف زي ال#### ذا ها يابن الكلب ياحيوان
مناف : اخخ رعد بعد عني كسرتني
ابتعد عنه رعد بعد ما شاته ببطنه ثلاث شوتات
مسك مناف على بطنه وهو يتالم بقوه : الله ياخذك اخخخ بطني
رعد : قليل فيك وتستاهله.
ظل مناف دقايق وهو عاض على شفايفه ومسكر عيونه بقوه ويديه على بطنه ورعد امامه جالس ع الكنب وانفاسه متسارعه ويناظر مناف بقهر.
ثواني ثم قطع الصمت صوت مناف يتخللخ ضحكه : مافي شوفه؟
بدون شعور رعد سحب علبة المويه ورماها عليه : ولك وجهه بعد! اصلا زواج مافي غير بعد سنه! قبل ما تتم سنه لا اشوفك حتى تعدي من قدام باب بيتنا.
ضحك مناف بقوه وبصوت عالي.
رعد عض شفايفه وقام : الشرهه اصلا ع اللي يقابل وجهك الودر
وقبل يطلع رعد نقز له مناف وهو ميت ضحك ووقف بوجهه : دقيقه دقيقه رعد.
ناظره رعد من فوق لين تحت بدون مايرد عليه.
ظل ثواني مناف وهو يحاول يسترد انفاسه من كثر الضحك ويتوازن عشان يعرف يكلم رعد.
رعد : خلاص يافله
مناف تناهد : اوك اوك “تناهد من جديد” رعد انت “سكت شوي”
رعد رفع حاجبه : انا وش فيني؟
مناف بلع ريقه ونطق : انت اخوي اللي م جاء من امي وابوي والله!!
رعد : قاعد تحاول تضبط علاقتك معاي عشان الشوفه؟انسى
مناف : لاوالله لا “ضم رعد بقوه وبسرعه” انت فعلا اخوي اللي تمنيته “ضحك” وظليت اتمناه لين عرفتك ولما عرفتك ماعاد تمنيت اخوان لانك تكفي وتوفي وتزيد.
ضحك رعد بعدم حيله وبادله الحضن : وانت الصاحب اللي دورت عليه باوروبا كل سنيني اللي قضيتها هناك وانت الصديق اللي ماكتب ربي الا اني اقابلك بالجنوب! ديره اهلي وخوالي.
بعد عنه مناف شوي: يعني فيه شوفه؟
ضحك رعد بقوه : تعقب والله
.

عصر اليوم التالي وبغرفة امل.
فزّت على صوت دق خفيف ع الشباك وبسرعه قامت للمرايه عدلت شكلها ورتبت شعرها وتوجهة ل الشباك وفتحته وبمجرد مافتحته كان بوجهها مهند الواضح من ملامحه الغضب.
بلعت ريقها بتوتر وحاولت تبين انه ماهمها كونه زعلان : وشفيك؟
مهند بحّده : خير كل الناس يعرفون انك وافقتي الا انا؟
اخفت امل ضحكتها وقالت : مين قالك اني وافقت اصلا!
مهند رفع حاجبه : امي قالت يعني كذابه؟
ضحكت امل : لا ماتكذب خالتي طبعا.
مهند : مو موضوعنا! ليه ماقلتي لي انك وافقتي قبل يومين! حرام تزيدين حرقة قلبي يومين بعد!!!
امل : اص لا تخليني اكنسل
مهند بنبره مستعطفه : يهون عليك؟
امل : اي مو انا نزوه؟
مهند ضحك وبانة اسنانه العلويه : لا انتي مو نزوه انتي ورطة قلبي “ضحك” كنت شزيني قبل اعرفك من عرفتك لا ليل انامه ولا نهار ارتاح فيه!
ابتسمت امل بحيا وعيونها تعانق عيونه.
مهند : ايه ومتى ان شاء الله الملكة؟
امل مدة شفايفها بتوتر خوفا من زعله : ما قالو لك؟
مهند بحده : الا قالو بس ودي اسمعها منك!
امل بصوت هامس : بالاجازه الصيفيه الملكة والزواج سوا
رمقها مهند بنظرة حاده : وهند اختك متى زواجها؟
امل استغربت وعقدت حواجبها : بعد شهرين ليش؟؟
مهند : اجل خلاص ملكتنا مع زواجهم ولا تناقشيني
امل فتحت فمها بصدمه : سلامات مهند؟؟خير؟
مهند : انا الرجال ولا انتي؟وبعدين خلاص الزواج بالاجازه والملكة مع زواج هند وياسر انتهينا
قبل تفتح امل فمها بترد عليه سمعت صوت مناف وهو ينادي عليها من الصاله وقفلت الشباك بسرعه وعدلت شكلها في محاولة لتهدأت ارتباكها وقامت طلعت له.
مناف حاوط كتفها بيده : كيفها حلوتي؟؟
امل بلعت ريقها : تمام وانت؟
مناف : عال العال المهم
امل ضحكت : وش المهم؟؟
مناف غمز لها : شكرا ع الفيديو كحلت عيوني!
امل : افا عليك حاظرين للحلوين
مناف : المهم ترى اليوم الصبح كلمني مهند بيجي هو واهله بعد يومين بيخطبون خطبة رسيمه وبعد قال يبي الملكة مع زواج ياسر او اذا جو اهله بيسوون ملكة صغيره وعائليه وقالي اخيرك لان ماعندك غير هالخيارين!
امل : سلامات؟وانت ليش ماعلمته اني ابي الملكة بالاجازه مع الزواج مره واحده!
مناف : معليش انا مع مهند واختاري ياحلوتي
ضربته على كتفه بقهر وقالت : وابوي؟
مناف بابتسامه تقهرها : حتى ابوي معانا
بياس نطقت : اوك موافقه مع زواج هند.
باس جبينها بقوه وضحك : وه يازينها بزرتي العروس!!
.
.
بعد يومين بمنزل مناف وتحديداً بغرفة امل المتوتره والمنشده اعصابها.
هند وهي ترتب فستان امل : يلا مناف يقولي اللحين جاي
امل تحاول تهدي دقات قلبها وتتنفس طبيعي وقبل تتكلم دخلت اسيل بسرعه : يلا امل مناف جاي
قامت امل بتوتر ويدها ترجف وبهاللحضه دخل مناف وابتسم لها بهداوه وقرب منها : لا تخافين ياعمري “رفع نظراته لاسيل اللي واقفه وراها وابتسم ابتسامه جانبيه” يلا تعالي معاي
طلعت امل مع مناف وهي مرتبكة بقوه وقلبها طبول من الخوف وكانها اول مره بتشوف مهند وبتتكلم معاه.
دخلت مع مناف للمجلس وعيونها بالارض ولمحت بطرف عينها مهند لما قام وتنحنح.
مناف اللي ماسك ضحكته عشان مايحرج امل جلس وجلسها بجنبه.
ثواني من السكوت ونطق مناف : عندك شروط انت وياها؟ودكمم تتفاهمون مع بعض؟اطلع؟
بمجرد مانطق اطلع تمسكت بيده امل بقوه وشدت عليها تحت انظار مهند المنصدم منها وبباله يقول “وين لسانها الطويل”
ضحك مهند بخفيف وقام : انا اللي بطلع واضح ان اختك ميته احراج.
لمحت امل السخريه بكلمته الاخيره لكن ما أبدت اي ردة فعل.
اما مهند فطلع وبمجرد ماطلع تناهدت امل بقوه.
مناف بضحكة : شفيك حتى انفاسك كنتي كاتمتها
امل بهمس : يخوف!
ضحك مناف!
امل : هالشعور يخوف اعوذ بالله مدري كيف تتمالكون نفوسكم انتو يالرجال
مناف : مادري صراحه ماعمري جربت هالشعور
امل ابتسمت بخبث : ودك تجرب؟
مناف تذكر رعد : لسنه قدام ماقدر!
ضحكت امل : اللحين اخليها تجيك المجلس ولا يهمك!
مناف : منجدك؟؟
امل : والله
ابتسم مناف ورجع بظهره ع الكنب وعشان يحفزها اكثر قال : يلا اتحداك!
امل قامت : ثواني بس!
ابتسم مناف وهو يتخيلها تجيه وبمجرد ماتخيل ان رعد يشوفها معاه مات ضحك ,انتظر حول الخمس دقايق ثم فقد الامل وقام وهو يتناهد وتوجهة للباب وقبل يفتحه ويطلع انفتح ودخلت اسيل اللي انصدمت من وجود مناف.
ظلوا يناظرون بعض بلهفة وعيونهم تحكي اللي ماقدروا يحكونه ,استمروا يناظرون بعض وعيون كل واحد تحكي عن شوقه ولهفته والاهم عن حبه.
قطع سيّل النظرات الولهانه صوت امل : يلا خلاص انتهى الوقت
بمجرد ماصحت اسيل على صوت امل رجعت على ورى بانسحاب
مناف بسرعه همس : نغم
ماتركت له مجال يتكلم طلعت بسرعه من المجلس.
اما مناف تناهد بقهر وهو الي كان وده يوقف الدنيا على هالموقف وده لو يظل طول عمره يناظر عيونها ويرمي كلشيء ورى ظهره ويكون المهم عنده والاهم “نغم”
.
.
عند رعد اللي جالس يناظر ابومناف اللي يسولف لهم بسالفه قديمه ومتحمس معاه ومركز بقوه.
دق جواله ورفعه بخفه وشاف انه رقم بدون اسم “عقد حواجبه” وطنش ورجع يستمع لعمه ابومناف.
انتهت المكالمه الاولى وماهي الا ثواني ورجع دق جواله من جديد وقبل يطنش مثل المره الاولى جاه صوت عمه ابومناف : رد يارعد مو طايره السالفه.
بقهر قام رعد وهو يرفع جواله لاذنه : ابشر ياعم “تنحنح وقال بحده بعد ماطلع من المجلس للحوش” هلا
عقد حواجبه لما ما جاه رد واعاد : الوووو
مثل المره الاولى ما جاه رد ،رعد وبحده قال : طالما انك بتظل ساكت كذا ليش مزعج اهلي وتدق لك ساعه! قلة ادب
وقبل يقفل جاه صوتها الهامس الباكي : رعد
وكأن الزمن وقف فيه حتى انفاسه انحبست وكأنه انكب عليه مويه بارده من سمع صوتها.
اعادت بذات الهمس : الرعد
سكر عيونه بقوه وهو يحاول يتمالك دقات قلبه الثائره وقال بثبات : نعم
بكت بمجرد ما لمحت الحده بصوته وهمست : وحشتني
بلع ريقه ومارد
ببكاء قالت : رعد انا اسفه رعد ارجع لي انا احبك “بنحيب” تكفى رعد
رفع حاجبه وقال : غرام انتي اللحين على ذمة رجال عيب اللي قاعده تقولينه
بأعتراض قالت : مابيه مابيه ابيك انت تكفى يالرعد ابيك
لف رعد لصوت باب البيت اللي انفتح ولمح دلال الواقفه ع الباب والمصدومه من وجود رعد بالحوش.
همست غرام ببكاء : رعد!!
رعد وعيونه على دلال قال : معاك
غرام : تعال رعد ابيك تكفى تعال مابيه ابيك انت مابي احد ابيك!
رعد رجع عطى دلال ظهره : غرام انتي انهبلتي ولا ايش سالفتك يابنت الناس!! بعدين مو انا رعد اللي اعتديت على بنت الجيران؟ واللي قذر وماعاد تبينه؟والي طنشتيه بعز احتياجه لك؟مو انا الي حاولت اخذك وانتي الي طفشتي من الانتظار! تستاهلين كلشي صار فيك وماني اسف لك!
غرام وقلبها يتقطع من حكيه تبكي بنحيب.
سكر منها رعد وهو معقد حواجبه بعصبيه ورجع لف بيدخل المجلس لكن طاحت عيونه على دلال اللي لازالت واقفه عند الباب وتناظره.
رعد رفع حاجبه وهو يناظرها.
دلال تنحنحت وقالت بابتسامه وهي تشّد الشال على شعرها وتتلثم فيه
رعد لا ارادي تذكر بالمزرعه لما سحب شالها وابتسم لما بانة صفت اسنانه العلويه.
دلال : خير ؟ايش فيه؟
رعد : لا ابد بعدين ترى عيب تتنصتين على مكالمات الناس!
عقدت حواجبها وبأنكار : ومين قالك اني اتنصت عليك
رعد : شمعنى واقفه عند الباب وانا اكلم!!!
دلال : طالعه اشم هوا انكتمت من جو البيت بعدين تراه حوشنا على فكره!!
ضحك رعد بصوت عالي وبحركة سريعه سحب الورده الي كانت بيدين دلال وجلس يشمها.
انحرجت دلال وماتكلمت!
ناظرها رعد وهو معقد حواجبه من ريحه العطر الي بالورده : عطرك؟؟
ماردت دلال من الحيا اما رعد فهمس : رهييب!
لفت دلال وكانت بترجع تدخل لولا ان رعد استوقفها لما قال : دلال
ناظرته بحيا وبدون شعور قال رعد : ليش ماوافقتي على عمار؟
دلال بلعت ريقها بتوتر : انا ابي شخص يبيني مو شخص يبي قرب اهلي!
لا ارادي همس رعد ومشاعره غالبته : انا ابيك!
توسعت عيون دلال بصدمه وتسارعت دقات قلبها اما رعد فندم لتسرعه لكن مافي مجال يتراجع لذالك همس : انا ابيك لانك دلال مو لانك بنت عمي ولابنت خالتي!
بلعت ريقها وبصعوبه نطقت : وتبي عبير بعد؟وغرام هذي اللي كلمتها قبل شوي؟
عقد حواجبه رعد باستغراب ومارد عليها.
دلال : شايفتك بعيني اكثر من مره بالمزرعه مع عبير وكمان بملكة هند وياسر شفتك معاها وجدتي تقول انك تبيها وبتخطبها لك واللحين سامعتك بنفسي تكلم غرام وبكل بساطه تنهي مكالمتك معاها وتجي تقولي ابيك؟لو اني هبله عشان اصدقك!!
توسعت عيون رعد بدهشه من حكيها.
اما هي ماتركت له مجال يتكلم دخلت للبيت وسكرة الباب بقوه لدرجه رعد ابتعد خطوتين على ورى وهمس : والله هبله!!