قصة روابط للكاتبة |جوهرة السلطان

الفصل السابع

انا الخيال للمهرة
انا البشفافهة الحمرة
انا الماي اليبرد النار والجمرة
انا الضيغم ابوكت الضيج
ماينكاش زودي وحاروا أبأمره
انا الدست الظلام ومادست كمرة
انا الحيرت بيض هواي
اناالدوخت كل سمرة
انا الما صفكت بأثنين
ويميني يصافح اليسرة
انا الماشارت العربان بيه وطاحت العبرة
انا الكلش فقير وهدمي للمحتاج ماكصره
انا السر الثكيل الماكشف سره

انا الطيب اليمر بجروح ماتبره
انا بخنصر بنات بيوت
محبس لامع وشذرة
انا بصدر التودني اتعلك ابسكوت
ابوسنها بطرفهاوكل جرح يبرى
تعال وشوف لاتستنكف العبرة
خيال لمهرتي الجامحه الشكرة

منقول
**********

امتلى مضيف الشيخ سالم العمران بناسه واهله
واصحابه من سمعوا طلع بالسلامة
زلم الشيخ ذبحوا الذبايح وبلشو الطبابيخ
عامر ابن اخو الشيخ يشرف عليهم هو وجم زلمة
عافهم وراح للبيت لان الشيخة دزت عليه
بقى واكف برا لان المطبخ مليان نسوان كاعدات يحضرن
وكفت الشيخة اباب المطبخ..ها يمه عامر جهز الاكل
_اي يعمة بس شدن همتجن
_عفية بعد عمتك اكلك شيخ حسان ماهو
وصل ابوه واختفى
_ماهو هان خافن طلعتله شغيله
_شغيلتيش بعد عمتك وانه ماشوفنه بالبيت
يدش ويروح مستعجل
سالها عامر..تردين شي انه خادم
ابتسمتله..خادم ربك ييمه
روحن لعمك خافن يحتاجك

دخلت للمطبخ وصارت بوجها مرة خالد ..ها يعمه
اصبن الجاي
_اي صبي انه اروحن لحجرتي واذا رجع حسان
كليلة اريدنه عبن عندي سالفة وياه

رجعت سمر مرة خالد تصب الجاي من قوري جبير
وادردم..مسيكين حسان هسة تكعد تعد وتصف
عالبت الراح يتزوجها
انتبهت لصوت خالد دخل وسلم عالنسوان بنات عمامه وخواته ..شبيج بطيئة همي همي
رفعتله عينها وابتسمت عيوني الك ثواني
مد ايده واخذ قطعة كيك ..ايباااه طيبة
انتي سويتي
_عجبتك
_اي والله عشتي
_الف عافية يبعد روحي
_خفي علينه يسمر الرجال تدوهن ههههه
_شبيج امال غير رجلي وادلعه
_اكول جيبي صينية الجاي خلن اروح
ادري بامال تنصب عليج وتبقين اتبكبكين
مدت سمر بوزها ..شنهي شكالولك زعطوطة انه

امال تتبسم لخالد الغمزلها يريدها اجاكر سمر
يدري بمرته من احد يلح عليها تكعد تبجي
هههههه
حجت امال ..الجاي برد بعد اختك
لاحكين عالمداهر
_صدك عمتي تسال على حسان ومبينة شويه
عصبيه
ردلها وهو يلاعب ابنه عمار عمره سنة ونص
..ابد لتدخلين ادري بيها لاجل سالفة زواجه
ابوي قرر وحسان وافق خلاص
التسوي امي يخصها يجي يوم وتقبل .

وصل حسان وكت صبتهم للغدا
ودخل المضيف ويه حجي راشد وابنه علاء
جان ينتظر جيتهم حتى يجون ويا رغم حجي
راشد يندل البيت وزايرهم بس الشيخ سالم
مقبل الا يروح ينتظرهم بداية القرية
دخلوا وحسان هلا ورحب بالزلم الحضروا من هواي مدن
طبعا استقبل حجي راشد بلهفة وفرحة وبقى يهلي
ويرحب هو يعز راشد حيل .
ورى ماراحو الزلم بعد الغدا بس بقوا العمام اوولدهم
وحجي راشد وابنه علاء لان الشيخ سالم ماقبل
كاله ارتاح اليوم وباجر ارجع
بقوا يسولفون
حسان همس لابو ..يابة اوديك لفراشك ترتاح
_لا يبوك انه كلش مرتاح الحين عبن شفت رفيجي

عدل كعدته وحسان حط وراه كوشة تخم
حجى بصوت ونبرة واضحة..ابو علاء صديج
عزيز واعتبره وي النفس
الكل كعد يمدح بالحجي
التفت الشيخ سالم على خوانه تدرون وكت صداقتنه
بفترة الثمانينات
ردله ابو جعفر ..والنعم منه وخويك خوينا
_من صارت حرب العراق وايران وابتسم لحجي راشد
الي راح فكرة لذيج السنين
_تذكر جنت انه برتبة مقدم وانت نقيب بنفس كتيبتي
وبوكتها انصابيت بوحدة من المعارك واعتنيت بيه
حيل وعرضت روحك للخطر حتى تنجدني
جان هسة انه لو اسير حرب لو جوة التراب

الكل مدح بصحبتهم وكلمن ينطي برايه
كمل الشيخ كلامه..ومن انسحب جيشنا من الكويت
وصارت الثورة الشعبانية وحجي راشد وكع بيد الثوار المتعصبين وانه عرفت بالصدفة وسويت
المستحيل لا اطلعه من اديهم .
ابتسم ابو علاء ..والله ايام وسنين ماتنسي
بوكتها ظميتني ابيتك اسابيع لحد ما دبرتلي
طلعة لبغداد اوصلت بالسلامة .
علق تلاء الجان مندمج بالسالفة ..بس والله ياعمي الشيخ عندك افكار ذكية والوالد دومه يسولف بيها
ضحك راشد والشيخ والواحد التفت للثاني ورجعوا يضحكون خلو الكل متشوق يردون يعرفون شنهي
السالفة .
ابتسم عبد الزهرة ابو جعفر وعامر ..جا عبن صويحبه
بخطر ابو حسان يسوي المستحيل .
صاح جعفر هااا عمي الشيخ ترى شوقتنه
رد الشيخ ..يابة والله سالفة بسيطة بس ابو علاء
جان يحس روحه بخطر خله السويته ينذكر
..يريد يرجع لبغداد وهويته تقرا عسكري بوكتها
رتبتك جانت مقدم مو
هز راشد راسة وكمل ابو حسان رحت لواحد اعرفه
يزور جناسي ودفعتلة فلوس ويومين جهز هوية
باسم ..والتفت لراشد والله نسيت اجان اسمك
صادق شنو
_ اي صحيح
_المهم يومين كملها وحرنه وين انظم جنسية راشد الاصلية جان تكرمون لابس شحاطتي السودة
كتله انزعها وهو صفن ميدري شكو
عاد اخذتها وفتحت تكرمون الطركة وظميت
الهوية ورجعت خطتها بعدها لبسته دشداشة قديمه
حتى لايشكون بيه
وانطيته فلوس خرداوات خاف يفتشونه حتى مينتبهون عليه
والحمدلله هذا هو ابو علاء بيناتنه الله يطول بعمره
رد راشد يطول عمرك وربي يحفظك نعم الاخ انته

رد الشيخ..ايييه ذكريات حلوة رغم مرارتها
ودحج لحسان الجان صافن بحجيهم ..تدري يشيخ حسان اليجمعني براشد شي قوي رابط اقوى من رابطة الدم ومن طلبت المحروسة بنته وافق بدون تردد.
التفت راشد لحسان..اني اتشرف بنسبكم والنعم منكم
جاوبوا..ينعم حالك ..من طيب اصلك

حسان استغل انشغالهم بالسوالف وطلع من المضيف
دحك لساعتة بالاربعة عنده ساعة وحدة يسبح ويروح لسوق الشيوخ حتى يلتقي بواحد من التجار
يريد يشتري منه محصول الحنطة هالموسم
لان قرر يبيع نص والنص الثاني يورده لمخازن الحكومة.
لكى تاجر يريد يشتري حنطتهم لان من احسن الانواع التنزرع ابكيعانهم الجبيرة

طلع من الحمام ينشف شعره بالخاولي ودخل غرفته
انتبه لأمه دخلت وراه ..محدن كلك اريدن احاجيك.
تقدم وباس راسها وايديها وكعدها عالفراش
عيونها حاوطته بحنية واضحة تعتبره فخرها وعزوتها وشادة هامتها بي صبرت عليه لليوم القبل يتزوج جان رافض الزواج اخوته تزوجوا وهم اصغر منه خالد يصغره ٣ سنين حتى ليلى وامال
وهسة هي مصدومة من راح يتزوج بنت صديق ابوه
والله جان فرحت لون متزوج من بنيات القرية لو وحدة من كرابتهم الساكنات الناصرية الا هاي المدللة
جانت ملهوفة تريد تعرف شكال ابوه الزعلان عليها
عبن متريد الختارها ..بعد ابوك معاند
_يمه ابوي مريض لا تندكين بي الطبيب حذرنا
اهم شي راحته.
_بعد امك وطوايفها متحس انك تسرعت خافن تندم.

حسان يدري بأمه بيش تفكر حب يطمنها..حبيبة
كلشي بخير لاتقلقين حالج.

زمخت بحسان..ولك تتضحك عليه تراني اعرف
بابوك وسوالفه وهذا دماغي يشتغل واميز السوالف
انه ماكملت تعليمي بس اخذت المتوسطة .
كعد يمها وحظنها ..والله انتي شيخة الشيخات
التفتت ودحكت بعيونه ..يبعد روحي صحيح
ابوك يحب صدقانه ومرات يغض عن هواي سوالف
بس مافكرتوا انته وابوك بهاي البنت مانعرف عنها بس اسمها اخلاقها طبايعها شمدرينه عنها
يمه حبيبي هاي عايشة ابغداد وطبايعهم تختلف
احنه عشاير وهالبنت متوالمنه انته تكدر تعوفها
تمشي بالقرية جدام الوادم مكشفه
حسان يتفهم خوف امه رد عليها..انه اكدر اسيطر عليها واخليها تلوك تصير جنتج ومرة الشيخ حسان
كامت متضايقة تريدة يبطل عن هاي الزواجة
وهو كاعد يقنعها ترضى ..ولك شبيك هاي مو من مذهبنا اشو ماتفهم انته.
حسان انصدم ?هاي امه شكاعد تحجي رمش بعيونه يريد يستوعب هالعناد والعركات ويه ابوي
وتلح عليه ابطل وافركشها طلعت ضايجة لان البنت من غير مذهب ..استغفر بداخله شلون مالكط
هالشي هسة هاي شلون طلابة
_عليج العباس هذا تفكيرج
شهكت امه ودكت بأيدها متنها دخيلك يبو فاضل
جا شنهي تفكيري انه ححيت البخاطري والغاثني
_ومن شوكت والشيوخ ينزلون لهيج شي ويفكرون
مذهبنه ومذهبكم يمه قبيلتنه جذورها ضاربة بكل مدن العراق والمذهبين ينتمولها واحنه عدنه صلة
بيهم ورابطة متنفصم والله يايمه جنت اتمنى تحجين غير هاي الحجاية .
الشيخة مصرة بحجايتها..انه كلت العندي روح
اتزوجها وشوف شلون تندم .
طلعت من الغرفة وخلت حسان صاير نار حتى ما باركتله …استغفر الله ومد سجادته يصلي العصر حتى بعدها يروح يكضي شغله.