قصة روابط للكاتبة |جوهرة السلطان
الفصل السادس عشر
بقلمي: جوهرة السلطان
مرة ترفعني للنعيم….
واخرى تنزلني للحجيم….
أآه لوكنت معتدلا يا لئيم..
****
الفصل طويل اسفة نت ماكو
ابقى اكتب من يجي النت انزل الفصل هههههه
تحياااااتي
ملف صفقة الاسلحة البعتها بالجنوب وملف هروب
السجناء قبل سنتين .
انخذل رافع وكعد عالقنفة ودنك راسه ..الخاطر الله
شلون حصلت هاي المعلومات.
تنهد حكيم ورفع راسه فوك ..تعرفني زين انه منو
واكدر اسوي الاريدة
اتقرب من رافع واشر بيده كوم اتصل خل يخلون سبيل اياد
دحك على حكيم بنظرة تهديد وصوت معصب..والله
بسماه اذا طلع هذا ملعوب منك واستغفلتني وقدمت
الملف لانتقم من كل اهلك وميكفيني وابدي بأبنك
ومرتك.
زمخ بي ..تخسا والله تخسا تمد ايدك والحسين
الشهيد اخل الذبان الازرك مايندل طريقك فوك
بلاويك كاعد تهددني
انه انطيك كلمة رجال ميخون العهد.
_خلاص التريده يصير بس الايام بينا
وراها اتصل وطلب يطلقون سراح اياد والسبب
اشتباه …
بالطريق اياد صافن عالشارع ميحجي كل الحجاه
تشكر من حكيم .
التفت حكيم لاياد ورجع ركز بسياقته وحجى بعصبية..بس اريد افتهم شلون محسيت على صديقك انت شلون تصادق هيج نماذج بعدك شاب ابداية حياتك اهتم
بدراستك اهلك محتاجينك مافكرت بأروى شلون
جان حالها وهي ادورعليك ولك بنية حلوة والعين عليها لكيتها اباب الفوج والجنود يتفرجون عليها
كل هذا من وراك اكعد واهجع .
حجى اياد بصوت مخنوك والدمعة بعينه..كلامك
صحيح بس والله مجنت اعرف صديقي يلتقي
بهيج جماعة
بعد هاي هية هالصداقة ماريدها اني حيل ممنون
منك وما انسى وكفتك هاي
تنهد حكيم ..الحمدلله عدت سلامات وهذا خلن يصير
درس وعبرة الك.
_عفية عليك انتبه لدراستك وكليتك هسة انت مرحلة اولى امتحنت مو
هز راسة بدون ميحجي .انتبه حكيم عليه يدري بي
مقهور فحب ينسي شوي .
_اكيد ناجح
_بعد النتائج مطالعة
_يا كلية تدرس ..حكيم يدري بي لان وصلته معلومات كافية عن اياد .
_هندسة معماري .
_ماشاء الله عفية بالسبع
*******
ليش تخافين يا ام لينا قسمة زينه جتها لاتوكفين
بطريقها .
حجت ندى وكامت تحضر بالعشا وام لينا صافنه
من حاجاها حكيم صار يومين مهمومة متريد
هاي القسمة متريد لينا تبتعد عنها .
ندى تكلي بالكبة وتسولف ..اقترح عليج تحطين شرط يسكن بغداد اشو الولد وظيفته هنا عود بالاجازة ياخذها لاهله ..بعدين انتي حجيتي
وياها اشو منطت رأيها ومكضيتها بغرفتها
_اااخ اااخ تكول استحي من خالو بله هاي ام
لسان شلون هيج انكلبت مدري منين جابت هالحيا
_ههههههه خطية شفتها شلون خدودها احمرن
من لمحت حكيم الصبح
_اي تكول هسة ينصبون عليه هو وندى.
_هههههه والله مال واحد من صدوك ينصب عليها
بس لا مااسويها هسة هي مرتبكة حسبة جيبها وحسبة توديها .
كامت سلمى ..خل اساعدج حبيبة
اعترضت ندى ..لا والله هسة يكمل العشا بس اكلي الفنكر اذا تردين سوي زلاطة .
دخل محمد يركض والموبايل يرن بأيده..ماما موبايل
بابا.
طفت الطباخ والتفتت عليه واخذت الموبايل
_ياااا ناسي ياخذه هسة شيخلصني منه ياكل
راسي
سلمى كالتلها ..يمعودة لو يريده جان اتصل لو دز
احد عليه .
ندى صافنه بالشاشة وعيونها مطككتها .
انتبهت سلمى واجت وكفت يمها ..ندى شبيج
لو تقفلي لو اجاوبين ترى صرعنا بس لااا ديري بالج
اجاوبين شيخلصنه من حكيم ميحب احد يلعب بموبايله .
حجت ندى وهي تفتح خط ..اشو الا اجاوب خل
اشوف منو هاي اروى…..
_الوو حكيم عيني اشسويت شو بعد متصلت بيه
ردت ندى والغيرة صعدت فووول
_منو حضرتج وشتردين من حكيم
_عفوا منو وياي هذا رقم حكيم مو
ندى بقت تضرب اخماس بأسداس الصوت مايع
وحلو ومبينه البنية شابة من صوتها ..شتردين
متصله
نترت ندى بيها وسمعت البنية تردها
_مارد عليج لأن اني متصلة على حكيم واريد احجي
وياه
اروى كولش ضاجت من اسلوب البنية الردت عليها
متعرفها منو معقولة زوجته ياربي شكد عيب
هسة شتكول عليه
بعدها كملت ..اسفة اختي بس فعلا اذا موجود خل
يخابرني
سدت الخط وندى شاطت بالزايد شمرت الموبايل
عالكاونتر وتخوصرت ..شلون عين صلفة خل يخابرني اي عيني ليش لا حكيم باشا منين يعرفها
تحجي بميانه جنابها
ردت سلمى وهي ملتهية ترتب الميز وتحط المواعين
للعشا وحماده يساعدها ..هاك حبيبي على كيفك
لاتكسر الكاسة ..تعالي تعشي وعوفي غيرتج على صفحة انتي تعرفينه لحكيم مابيها داعي لهاي السوالف.
كعدت ندى وعيونها لمعت من صدك حست بغيرة
بس فعلا هي تعرف زوجها يحبها يموت عليها
اااخ بس الميخافن الله هواي .
_حماده حبيبي صيح لينا تتعشى هاي هم مدري شبيها اااخ اااخ منجن
صفنت ندى عليها وردتلها..تدرين ام لينا
والله اموت اذا حكيم حب وحدة ثانية .
تنهدت سلمى ..يامثبت العقل يارب..اتعشي حبيبة
اتعشي ميفيد الحجي وياج صايرة طكة ونص
وين ندى ام عقل الجبير
_والله مو بيدي ضجت من سمعت صوت بنية
وتتموع تريد تحجي وياه متدرين شكد احبه واخاف عليه اوووف والله العظيم هو والنفس الاتنفسه
_ادري بيج والله بس لاتبقين تلحين وخاصة من يجي لاتعيدين السالفة
دنكت ندى واخذت خاشوكة تاكل زلاطة ..ان شاء الله
رفعت سلمى تك حاجب ..ايييه كلام الليل مدهون
بطاسة دهن.
كعدت لينا تتعشى وبالها مو يمهن انتبهت امها
عليها ..ليونة ماما مجاي تاكلين .
_ها لا كاعدة اكل
ندى ملتهية ويه حماده لان فاهي بالاكل واذا شاف الكجب يلتهي يغمس بي
رن موبايلها مسحت ايدها بالكلينس وابتسمت
من شافت الاسم..هلااااو حبيبتي شلونج .
_هلاو عمه نداوى مشتاقتلج
_ياعمري اني اكثر والله شلونه حسان وياج
_يووو متصورين شكد حباب ويهتم بيه
_هههههههه طبعا يهتم بيج هو وين يلكى مثلج
جمال ودلال ونزاكه
_حياتي نداوي
_صدوك شجاي تسوين هسة احنه كاعدين نتعشى
والتفتت على ام لينا من كلتلها سلميلنه عليها
بالمناسبه ام لينا ولينا وحماده يسلمون عليج
_حبايبي سلميلي عليهم امانه الكل يجون بسبعتي
حيل مشتاقتلكم هههه يلا اترخص حسان يأشرلي
جابولنه العشا
_والله مدلليج بعد شتردين يلا بعد عروس بس
لا تسويها فدنوب وياخذون عليج نظرة كولشي
متعرفين ادري بيج سباعية
_اي صحيح اني هم كلت لحسان اطبخ بس
ماقبل يكول بعدين
_اي عيني حقه هههه يريد يتونس بعروسته لاحكه
عالشغل ديلا سلميلي عليه
__مع السلامة
…
_تسلم عليكم وامنتني لازم ترحون لسبعتها
_الله يسلمها تستاهل كل خير وان شاء الله نزورها
شتكولين ماما ليونة حتى ترحين ويانه
صفنت لينا على امها وردت..ماادري خلها لوكتها
*******
طارت من الفرحة وهي تشوف اياد يدخل للبيت ويه
حكيم ركضت حظنته ..ياعمري يااخويه انت بخير
وبدت تتلمس جسمه ودحك بوجهه..الله لايوفقهم
شمسوين بيك والتفتت لحكيم الجان صافن عليها
شلون تعامل اخوها بحنية واهتمام ولهفة ..متصور شكد اني ممنونة للسويته وجميلك هذا طوك برقبتي
ربي يسعدك بحياتك وتوصل لاعلى المراتب فعلا
انت ابو الكلفات ربي يحميك
ابتسملها وحب يطمنها ويحذرها بنفس الوقت..مراح اقصر اي شي تحتاجونه انه حاضر بس ديري بالج
اياد يلتقي بجماعته الي عدهم صله بصديقه النحبس
لان تحت المراقبة مخليهم وانت اياد اعتبر هذا درس
الك ولاتنخدع بالناس يلا انه اترخص منكم.
اقتربت منه ..لا وين تروح لازم انظيفك وبابا حيزعل
والله هو راح للصيدلية هسة على جية
_سلميلي عليه جان بودي اشوفه وهسة اني طالع للبيت ساعتين وارجع للفوج لان نسيت جهازي
..حست اروى بالخجل ااا اني كولش اعتذر لان اتصلت عليك البارحة بالليل وطلعت زوجتك اعتقد
هي ارجوك اعتذرلي منها يمكن فهمتني خطأ.
ياحبيبي هسة الكى الخلقة مكلوبة ..حجى ويه
روحه لان يدري ندى عدها غيرة بس متظهرها
_ان شاء الله ماكو شي يلا في امان الله
..اياد اتشكر من حكيم ودخل ويه اخته للبيت
ينتظرون الوالد الي دخل متفاجىء ركض اياد لحضنه وبقى يبوس بي وهو من لهفته على اياد
بقى حاضنه ويبجي اروى بجت وياهم بعدها
انتبهت لحالت ابوها تدري مو زين عليه وحبت
تغير جوهم ..يلااا عاد صايرين عاطفيين زيادة
وانت اياد كوم حجهزلك الحمام اسبح وارتاح
وهسة اوصي على احلى غدا لعيونك من المطعم
..اعترض اياد يمعودة شطابخه اكل لاتزحمين روحج
_معليك انته هسة اخابر المطعم ويوصلوا شعندي
غيرك انت وبابا الله يخليكم الي
ابتسملها ابوها بحزن يدريها شكد مهتمه بيهم
_ويخليج ربي ويحفظج ويهنيج .
*******
دخل حكيم للبيت الساعة ٢ مدخل السيارة للكراج
لان راح يرجع للفوج البيت صنطة وهدوء فتح باب
المطبخ بمفتاحه الاحتياط
راح للطباخ وفتح الجداري
ميت جوع ااووو طابخين بامية بلحم رجع القبغ
وشمر السويج عالكاونتر وصعد الغرفته البيت بارد
وهادىء مال هسة يجرها بنومة للمغرب اكيد نايمين
دخل لغرفته وشاف ندى نايمة وحاطة حماده بحظنها
والاثنين غاطين بالنوم حب شكلهم همة ونايمين ندى
دشداشتها القصيرة مرفوعة وطالعة رجليها وبياضها يلهث جر نفس قوي
اتقرب دنك وباس حماده الفاتح حلكه شمه من شعره
اوووف حبيب ابوه شلون ريحته طيبة
انتبهت ندى نعسانه وتفاجأت حست من باسها بخدها
كعدت ومدت ايدها سحبت دشداشتها مستحية
_هلاااو حبيبي
_شلونج حبي ترى ميت جوع اتغدى وارجع للفوج
جيت اخذ جهازي ناسيه وبقى مركز بعيونها يريد يعرف شراح تكول بس يشوفها مغلسة
اتذكرت ندى البنية التصلت بس غلست هسة جاي تعبان وجوعان نزلت من الجرباية واتقدمت عليه
مدت ايدها وخلتها على صدره وحجت بدلع يموت
عليه..حبيبي يخسى الجوع هسة احلى غدا لسيادة
العقيد بقى يدحك بعيونها الذبلانه من النوم وعض
شفته وهو يحضنها حيل لصدره اموت علدلع حبيبها
دنك عليها واخذ شفايفها بقوة ارتخى جسمها وهي تبادله لهفته وشوكه رفع راسه والتفت للفراش وحجى بلهاث ..ليش منومته هنا هسة اريدج وميت
عليج وهذا الفصعون محتل الجرباية يلا دبريني
حظنته حيل وخلت راسها على صدره اليصعد وينزل
تدري بي واصل حده ههههه حشيله اودي بغرفته
…اعترض وهو يهمسلها من شافها راحت تريد تشيل
حماده .
_ولج عوفي هسة يكعد انه اودي شاله بهدوء ودخله
لغرفته الصايرة بصف غرفتهم حطة بفراشه وابتسم
من شافه طامس بالنوم باس راسه وطلع
رجع لندى الجانت تحضر بروحها قفل الباب وحجى بلهفة وعيونه تاكلها اكل ..شو تعاي بعد مااتحمل
جرها من ايدها وحضنها قوي اعترضت بصوت ناعم
_حكيييم انت مو تكول جوعان .
دنك عليها ورفع راسها بيدين اثنين ..ولج انه مشتعل
جدي لاحك عالغدا رجع باسها بقوة
ضحكت وهو يرفعها ويشمرها عالجرباية هههههههه
وغمزتله بعينها خلته يفقد عليها.
*********
باجر السبعة وبيت الشيخ مخلن شي مسونه حضرن جدر الدولمة والكبب ونكعن الدجاج بالخل حتى يشونه بالتنور والذبيحتين نظفنها بعدماقطعوها الولد وخلنها بالمجمدة طبعا هند ايدها وياهن رغم الشيخ
سالم نبه عليهن متشتغل من دخل هو وحسان وشافها تلف دولمة
صاح بيهن ..ياعيبة العيبة ولح سمر شلون تخلين
بنيتنه تشتغل وبعدها عروس .
هند حبت اهتمام الشيخ بيها وحست عيون الشيخة
عالية تاكلها حجت معترضه بصوت مايع ..لااا عمووو
احب اساعدهن
ضحكن سمر وامال على ميوعتها
هههههه بالعباس اليشوفج ويسمع صوتج يكول هاي
المايعة مدبر كلشي شوفة عينك يابة حشوة هذا الجدر هندة الثرمتها وماشالله شلون شغلها مرتب..
هند خزرت امال ومدت ايدها دفعتها علكيفها..لاتكولين مايعة
امال كرصتها بزندها الطالع لان مبرمه الكلابية عاطت
هند بصوت ناصي لان استحت من الشيخ..ااااي
يوجع
الشيخ مرتاح وهو يشوفها مرتاحة ومندمجة وياهن
وصاهن على كيفجن بويه لاتعبن روحجن خله وطلع..
حسان عيونه ماشالها من هند يشوفها شلون تشتغل
ومبرمه ايديها وشالها لافته بترتيب ومن كرصتها امال وسمع نعوصتها روحه ماعت عليها يدري بيها
شلون نازكة وترفه انتبه لصوت امه..تعال يمه
اكعد هان ليش واكف .
_لا بس اكول اذا عدجن نواقص خاطر اجيبها لان طالع للناصرية هسة
هند التفتت عليه وحبت توصي على كرزات وحلويات بس استحت
سمر وصته على جم حاجة ومن طلع صاح هند
الي مسحت ايدها وراحت شافته بالطرمه سألها
بصوت ناصي محتاجة شي .
ابتسمتله ..سلامتك بس اذا متصير زحمة جيبلي
كرزات واكثر شي احب فستق عظم
_ههههه ادللي بوية
مطت شفايفها معترضة ..ليش تضحك
بقى يدحك على شفايفها بعدين كال ..اااخ دشي داخل
دخلت وهو طلع الشيخة من شافتها صافنة ..يلا همن
راح يصير المغرب وانتن بجدر الدولمة .
_يييمه ترى خلصنه يلا نتعاون نشيله خلنه بالمجمدة
شالنه بالمجمدة وبعدها نظفن المطبخ ورتبنه
هند كالت اروح اسبح وارتاح احس انتهيت
_اي والله انه هم همزين عمار ويه ابوه جان ثولني
وحسوني ابن امال نايم الله شلون هدوء
_اي والله صدوك اني شكد احب الهدوء.
_ههههه اي باجر اذا صارلج جاهل تتحصرين عالهدوء
هسة عيشي اللحظة خية
التفتت على امال ..لا عيني بعدني اسم الله بيش
طالبتني
زمخت الشيخة بيها ..جااا احمدي ربج عليش البطر
هو خل يصير اول يله اتحجين
رمشت هند بعيونها عمة اني ممتبطرة
_بسج تنعوص وروحي سوي لكمة لرجلج رتبي روحج هسة يرجع
رجلج
طلعت هند مقهورة ودخلت للبيت فشلتها ام حسان
عبالك كوة متحملتها
من طلعت امال اعترضت ..يييمه حرام عليج ليش
هيج حاجيتيها
_ولج تحاسبيني
_بس البنية جانت تتشاقى اشو ايدها بايدنه ومتتكبر
واسلوبها حلو ويه الكل ليش تحسسيها انتي متريديها
_اسكتي حسج مااسمعه كملي البيدج وراج رجال وعيال
_استغفر الله هسة اروح بس والله لو يدري ابوي
وحسان مراح يسكتون.
راحت لبست عباتها واخذت ابنها بحظنها جان نايم
وطلعت تمشي لان بيت عمها بنفس الشارع قريبين
********
لليل يلا رجع حسان وبعد مدخل طلبات سمر راح لبيته دخل شايل علاكة حطها عالكاونتر واتقرب
من هند الجانت كاعدة عالميز تسوي زلاطة
شلونه الحلو اشوفه مبوز
رسمت ابتسامه على وجها متريد تحسسه هي ضايجة ..
_شلونج …كعد يمها ومد ايده اخذ خيارة كعد ياكل
بيها.
انتبهتله مبين جوعان ..هسة دقيقة واخليلك العشا
_حظري بين مااصلي العشا طلع من المطبخ وراح
توضى حتى يصلي
كامت وطلعت الصاج وتبسي معكرونة من الفرن
وحطت الببسي والزلاطة …
وراحت فتحت العلاكة وابتسمت جايبلها كرزات
وحلويات اخذت الحلويات حطتها على صفحه وخلت الكرزات بعلبه وظمتها بالملحق بعدين اطلع منها ورى العشا وبقت تنتظر حسان
الي دخل وعينه عليها شلون ترتب
دحك على ترتيبها ..عاشت ايديج الحلوة
كعدت واخذت ماعون حطتله معكرونة بالدجاج
..امانة حسان انطيني رايك صراحة ماريد مجاملة
كعدو ياكلون وبعد مخلص عشا ..والحسين طباخة
معدلة الج نفس طيب بالاكل
ابتسمتله الف عافية على كلبك.
بعدها سوتله جاي مهيل تدري يحب الجاي راسا
بعد الاكل اخذ الكوب وطلع للهول وهي غسلت المواعين ورتبت المطبخ .
لاحظها صار يومين تتهرب منه صاح عليها..هند
وينج
طلعت من الغرفة جانت تبدل لبست برمودا كريمي
بيها قلوب حمرا صغار وشعرها مسرسح على ظهرها
صفن عليها شكد شايله انوثه وجمال لخاطر الكعبة
_حسان تعبانه اريد انام
انتبه حسان ودحك بساعته ..يابة توها بالعشرة
تعاي نسهر شوي بعدين نروح انام.
حسها تضايقت كام راح عليها اتقربلها كولش
_شبيج هند احسج مضايقة احد غاثج
ارتبكت شتكله تبتعد عنه لان جاي يتعبها تخاف
تحاجي وتستحي منه فتفضل تروح تنام من وكت
لو تتحجج بأي شغلة تلهي روحها عنه.
_هاا لا بس تعبانه شوي مد
ايده ومسد حنجها وشفتها الجوه ..سلامتج
يكلبي تعاي ارتاحي بالغرفة اخذها ودخلو
كعدها عالجرباية وكعد بصفها حظنها وهمسلها
_نامي بحظني ترتاحين
كاعد يضغط عليها بأسلوبه يربي لطفه وياها
يوترها متريد تضوجه منها صارت تعرفه عدل
وتعرف شكد عنده عزة نفس عضت شفتها حيل
شلون اكله لاتتقربلي والله استحي منه
هو جاي يعاملها بحسن نية وهي تخطط تبعده
عنها لان هو كولش متطلب واذا تبقى ساكته
راح تتأذى ..حسان عفية لا تتقربلي
خزرها بعينه ورفع تك حاجب ..وليش بله جاي تتعززين حظرتج .
ياربي هذا شبي فهمني خطأ..والله جاي اتألم
ماريد عفية انت هواي تلح
يبووو على حظي انوب جفصت اكثر
بقت تفرك ايديها وتلوي بأصابعها
حسان منتبه عليها كلش وبأدق التفاصيل زمخ بيها
كافي اصابعج تكطعن ..ارتبكت متعرف تحجي
وياه
_شوفي هند لا عبالح انه همجي وبس اريد امتع نفسي على حسابج لا غلطانه اذا هذا تفكيرج
يابوية كولي من الاول انه تعبانه وانت ماجاي ترحم
حالي ليش هالحركات تسوينها صار يومين تتحججين بسوالف بايخة تراني رجلج ويهمني
راحتج وانه لوما اشوفج مرتاحه لكربي مااتكربلج
لو تصيرين الحور العين بس حسيتج رايدتني
ومرتاحة وياي
هند مدنكة راسها وعيونها غوركن من الخجل
والفشلة متكدرله لسان وقدرة بالحجي رهيبة
بداخلها غمت روحها ويامن حجت ويه واحد
اذا حجى بديوان يخلي الزلم صافنه عليه وهسه
تريد تلحكه بالحجي ديلا اكلني وشربني ومسح حلكه هماتين.
رفعت راسها وصوتها كوة طلع همس ..اسفه
لاتفهمني خطأ
كام ونزع دشداشته وشمرها عالقنفه ونتر بيها
كومي حظري ملابسي اريد اسبح وانخمد..
بدون صوت طلعتله تراكسود ومنشفة وداخليات
ودتلهيا بالحمام صادفته يم باب الحمام مكدرت تحط عينها بعينه تحس بفشله
دخلت للغرفة غمت روحها ..امداني على هالسالفة
شكد عيب صدك عوبة ااوووف بس والله من اشوفه
اوضاعي تتخربط يمه عيني شلون خزرني
راحت رفعت الغطا ومددت تريد تنام شوي
ودخل ينشف بشعره شمر المنشفة عالقنفة مشط شعره وغرك روحه بالعطر دحك عليها شافها مغمظة
خله وطلع
انتبهت ..هذا وين راح مو كال حنام بقت تنتظره
ماكو كمزت وطلعت وراه ماكو بالهول ولا الاستقبال
دخلت المطبخ شافت الباب مفتوح اتقربت ولمحته
كاعد بالمرجوحة بحديقتهم هو ماكو سياج بين البيتين مكتفين بسياج جبير يحيط بالمظيف والبيت
بس اكو حديقة جانبية حسان رتبها زرع
بيها اشجار ياس محاوطة الحديقة مثل السياج
وشكلها حلو وثيل اخضر يخبل وعلى جهة
ورد جوري وقديفة
مكدرت تطلع لان تخاف يرزلها مبين عليه عصبي
سندت جسمها على الباب وحظنت روحها حست
بغربة شلون اول يوم من دخلت للبيت لامت روحها
هاي بدل متكسبه جاي تبعده عنها شسويتي
هند مو جاي اشوفه شكد حنين ومداريني
وعيونه محاوطنتي بحب واهتمام ويحاول
يرضيني بهاي الايام السته مشفت منه تقصير
…من كد ما مقهورة دمعت عيونها ونزلت على خدودها وهي تشوفه كاعد وصافن حيل انقهرت
عليه بس هي جانت ممتقصدة رادت تفهمه
وضعها والظاهر فهمها خطأ.
حسان جان حيل مضايق شكد جانت لهفته عليها
حس بأهانه من كالتله لتتقربلي سمعها من حاولت
تبرر كلامها بس بقت غصة بكلبه مكدر يبقى بالغرفة
خاف من عصبيته لان من يعصب راح يغلط
بحقها فضل يطلع برا وانوب هاي لحكته شافها
شلون مسندة روحها وتباوعلة وعيونها تلمع بالدمع
سوا روحه ممهتم ورا ساعه التفت شافها نفس
وكفتها تفاجأ بيها هاي شبيها راح عليها ومن شافته
اتقرب يمها عدلت وكفتها ومسحت دموعها حجى بنبرة جامدة…
ادخلي جوا ليش واكفه هنا وعليش هالبجي
سحبها وراه وهي محجت تحس روحها تعبانه
قفل الباب وراح للغرفة اشرلها عالفراش ..نامي
مبين عليج تعبانه .
اتقربت كولش وهمستله والعبره خانكه صوتها ..
والله اسفة لان مكدرت افهمك كلامي صح
رفع ايده وحجى بهدوء..خلاص هند ارتاحي
مراح اضايقج.
وراح مدد عالفراش ..طفي الضوا اريد انام.
انهضمت حيل.. يعني شنو حيبتعد عني ياربي
اسويت بروحي نام مقهور مني
اووف استاهل اني مااعرف اسولف.
قبل الظهر وصلو اهل هند واستقبلهم الشيخ سالم
وولده وولد اخو رحبوا وهلوا بيهم الزلم دخلو للمظيف والنسوان دخلن للبيت
جان جاي حكيم وياهم لان حجي راشد عزمه حب يعرفه اكثر على نسابته ولان علاء مقبل يجي
وصار عصبي كال لابوه تريدني اروح عليهم واني
ماقابل اساسا بيهم انت انطيت هند على عمه
عيوني وراح تبقى حصرة بكلبي .
وراد ميخلي ريمه تروح بس الحجي زمخ بي
وهدده بعد لسانه ميطخ ويحجي وياه اذا مخلاها..
….
حيل جان تقدير واهتمام بضيوف الشيخ سالم
طبعا امير بقى لازك بصف حكيم يسولف ويا
وانوب ناصب على حماده البقى مبوز من سمع
يحجون على لينا
لان امير سال ..خاف انرفضت ومتريد تفشلني
ضحك حكيم وهو يمسد بشعر حماده ..يابة
لينا رايدها لحماده وراح ينهي عليها .
رفع راسه لابوه وكرص عينه بمعنى شنو
حكيم شاوره ..كول لينا عروستي ماانطيها
حماده خزر امير وصاح..ليونه عروستي ماانطيها
التفتوا الزلم عليه وامير راسا حط ايده على حلك حماده
وهو خربان ضحك ..دخيلك اسكت الشيخ راح
يكوملي بالعكال .
دفع ايده حيل ..مااحبك امشي منا ماانطي ليونة
حكيم هدئه اكعد بابا لاتحمى
والتفت على امير ..هذا متعلق بيها لان اربعه وعشرين ساعة ويا تلاعبه وشيريد تسويله
_الله يحفظه
حكيم كاعد ويفر بسبحته وعينه على حسان الجان ضارب صفنه
وسأل امير ..ابن عمك مبين شخصية قوية.
جاوبه امير بفخر..اصلا امور العشيرة تمشي
بشوره زلمة معدل وابو مضيف.
_وهذا اللابس دشداشة سودا ولاف شماغة
حمدانية .
_هذا ابو حسين عامر اخوي اكبر مني
حكيم راقبه وحس بي نظراته متفارك حسان
انتبه لابنه ..بابا اريد ماما
_عيب بابا ابقى يم الزلم
محمد ضاج يريد يروح يم امه
_هسة انه اوديك بعد شوي
حجى امير وهو يكرص بخد محمد الدفع ايده
شافه حكيم وابتسم..بعد شيخلصك منه يابة انصحك
اتصادقه.
_هههههه بالعباس صدك يمكن يخرب عليه السالفه
هند شكد جانت مقهورة الصبح من كعدت وشافت حسان ممهتملها وبدل وطلع بدون ميحاجيها
شكد هسة فرحانه بشوفة اهلها ابوها بعدها مشافته
حضنت امها وبقت تبجي مشتاقتلها وامها دمعت عيونها جانن مسويات لمه حلوة محاوطاتها
قدمولها هداياهم وامها طلعت سوار عريض من العلبه
كولش حلوة كالتلها هاي هدية علاء ويسلم عليج مشتاقلج حيل
لبسته وهي تحجي بفرحة ..يروحي فديته لاخوية
الغالي.جنت احب اشوفه وياكم.
ردت عمتها رحاب عند دوام ميكدر ينزل
محبت تحجي الصار متريد تقهرها
الهدايا جانت حيل راقية واغلبها ذهب وفلوس…
جانو عازمين جم مرية من جماعة الشيخ كامن
يتبسبسن بيناتهن على شلون نسايب مرتبين
وعينهم مليانه وحدة منهن نقدت لبسهن تحجي
ويه البصفها ..خية جاية لابسه بنيطير عود حاطة
وصله على راسها محجبة .
جتي امال عليهن وانطت ابنها لعمتها ودنكت شاورتها
وراحت .
ام جعفر ردت للمرة الجانت تحجي ..اكلج خية
ماتعوفين الوادم شوفيهن زين ترى مبينات مستورات
وبنيات اصل .
ام جعفر عينها بقت تراقب لينا لان امال حجتلها
عليها عجبتها حليوة ومرتبة ولو توهن النسوان
نقدن لبسها
وقررت تحجي ويه ام البنية اشو الامايه بعدها
شابه ماشاء الله وشلون مرتبة .
لينا جانت لابسة بنطرون اسود وفوكاه سترة طويلة
لون تفاحي وشال مشجر كريمي وتفاحي
طالعة حيل حلوة طبعا مكياج ممخلية لان حكيم
ميقبل فتحط بس مسكاره ومرطب شفه
الشيخة عالية رحبت وهلت بيهن جانت كاعده
تسولف ويه ام لينا بس عينها على هند تشوفها
شلون فرحانه بأهلها وشلون كاشخة طالعه
تضوي .
هند لبست فستان جويتي مشغول فصوص وكرستال
جان حيل راقي ومستر .
وشعرها رفعته فوك وطلعت خصل ناعمه ومكياجها
جان شي ذوق طلعها نازكة .
لينا تسألها عن عيالها وهي ترد كلمة كلمتين
_ولج ترى ضوجتيني احجيلي بالتفصيل اريد
اعرف طبعهم شلونه.
ضحكتلها ..ههههههه شنو تردين تناسبيهم.
لزمت ايدها …اييييه فدوة هنودة اريد الصدوك
انتي مرتاحة وياهم .
تنهدت هند ..والله للان مشفت منهم غير بس
الخير رجف كلبها من تذكرت حسان شلون
الصبح طلع بدون ميحاجيها وحسان حيل
مهتم بيه ويدور رضاي .
_زين اسألج عن واحد من ولد اخو الشيخ
ضابط ويه خالو حكيم شلونه.
عكدت حاجبها هااا يمكن اسمه امير سمعت
امال حجت عنه يردون يزوجوه يصير حماها
هسه اصيح امال تنطيج معلومات اكيدة.
_لا عفية استحي شتكول عني
_ههههه اصلا امال وردة وتعجبج
_جا وانه شبيه
اشرت هند لامال الي كعدت بيناتهن وهي تدفع هند
مرت الشيخ بعدي غاد خلن احاجي الصاكة
الكاعدة يمج.
_ههههه ديلا عيني اكوعدي
لينا استحت بالبداية بس من شافت امال شلون تتشاقى صارت عالخط .
_ام حسوني امانه شلونه امير تصرفاته اخلاقه
_ولج هندة هسة يسمع الشيخ حسان ويثبرنه
لاجيبين طاري زلمة جدامه
ردت لينا مطيرة عيونها..عليج الله يممممه
زلمكم تخوف لا عيوني انه ماناقصة مرجلة
خالو حكيم مطبق علينه انواع المراجل
متحسين الا وج عصبيته فوول
امال طمنتها..ولج امها داعيتلها لتصير مرة امير
جمال ورتبة وهيبة ولسانه وكلامه يدوخج
عليج الحسين اقبلي تدرين انه من شفتج
حبيتج وحجيت لعمتي وامير
احمرت خدود لينا ..لا عفية ما ريد ..عزززا هاي
عمتج الي ابنج بحظنها وانه اكول ليش عينها
عليه عبن تدري يبوووو على حظي اريدن اشرد.
_ههههه يممه يممه اشو حتى حجاياتج مثلنه.
رفعت راسها مفتخرة وهي تأشر بيدها..عيني
هذا العرك الجنوبي جاي يأثر ويدك براسي.
كامت امال ..حبايب اترخص انه اروح اشوف
ليلى وسمر خطية وحدهن بالمطبخ.
وكفت لينا اجي اساعدكم .
صفنت عليها وطخت براسها فكرة..هلا بيج
حبيبة بس انتي اليوم خطارنه ميصير عيب
اعترضت لينا ..يمعودة ترى عادي والله.
طلعن من الاستقبال وام لينا انتبهت لبنتها
وخزرتها لينا افتهمت نظرة امها تدري بيها
متحب تاخذ ميانه راسا .
دخلت للمطبخ انتبهت ماشاء الله جبير ومخلي
على جهة قنفة وكراسيها وبجهة ثانية ميز طعام
هلت بيها سمر وليلى الحجت على امال..يااا مو عيب
جايبة خطارتنا اتعينا .
اعترضت لينا ..لا عيني انه كلتلها يلا بيش
اساعدكم انه حاضرة .
سمر ضحكت وانطتها طاسة جبيرة بيها خيار وطماطة ..هاج سوي زلاطة .
اخذتها وكعدت عالميز ..السجين والمثرامة وين
ليلى خلتهن عالميز ..والعباس فشلنه
هسة تخرب كشختج.
رفعت راسها ..لا بوية عليش فشلانه يلا يبنيات
همن ورانه خطار.
ضحكن لسوالف لينا الي ندمجت وياهن.
امال دزت رسالة لامير فهمته لينا بالمطبخ.
كملت وكامت توزع بالكاسات مبرمه سترتها وشايلة
جمجة تغرف زلاطة وتحط بالكاسة سمعت صوت
حماده دخل للمطبخ ومن شافها ركض عليها
حظنها ليونه ليونه .
باسته بصوت قوي..يممممه فديته للسبع
ليش بقيت يم بابا وعفتنا صاير رجال كوله
يم الشيوخ تكعد اشششرد .
صفن عليها وبعدين كال..ليونه بابا كال ليونه عروستك.
التفتت من سمع ضحك وتقرب لزك يم لينا مستحي
حظنته لينا والتفتت عليهن تهدد..ولجن بالعباس
اجي بالجمجة اطكجن تغارن عبن حماده سبع
ولكى مرة .
لينا كتمت ضحكتها متريده يفشل .
كل الصار جدام عين امير الجان واكف يم باب
المطبخ وبقى مسطور ..بوية شنيهاي الصاكة
وشلون لسان يويلك ياامير اتخربطت احوالي
دك الجامه مالت الباب ودخل ..السلام عليكم
انتبهت لينا عالشاب الدخل شلون شايل جمال
يخبل وانوب لابس دشداشة ولاف حمدانية
انسطرت وخدودها جمرن رادت تطلع من المطبخ
صاحتها امال وين يمعودة كملي شغلج.
ارتبكت متعرف شتسوي وحماده مجلب بيها
من شاف امير صاح بنترة..ليونة مالتي مانطيها
امير عيونه طككهن بعدين ضحك من كل كلبه
التفت على بنات عمه ..يابة اعتذر اخذن راحتجن
امال اتقربت عليه ..ها امير
صفن بوجها و رفع ايده ?? افتهمت امال والباقيات
انو لينا عجبته لينا خطية متحملت جرت حماده
وطلعت عالسريع .
ليلى رزلت امال..شلون تحطيها بهيج موقف
بله مو انتي دزيتيله يجي.
_يااا غير يشوفها ترى عادي مابيها شي شوفه
شرعية.
ضحكت سمر هههههه شفتن امير شلون كصها
ترى طول الوكت جان واكف يم الباب وخطية
متدري بي ماخذة راحتها بالحجي.
رفعت امال ايديها للسما .. يارب تكون من نصيبه.
سألتها اختها..عمي وعمتي موافقين لو هاي سوالفج
تعلميني بيج.
ابتسمت امال..والله حجايه ذبيتها يم عمتي
وامير واقتنعوا وطلع يعرف خالها عبن يشتغل
ويا بنفس الفوج هو المسؤل عليهم وعلاقته قوية
بي ان شاء الله تصير قسمته
شفتنها شكد حبابة وتاخذ عالواحد متكش
سمر ردت ..الله يقدم البي خير بس تتوقعين
اهلها يزوجوها بعيد عنهم.
_شكو بيها هاي هند اتزوجت هنا واهلها فرحانين
بيها.
حجت ليلى ..والله خاف ورطتي الولد ومتصير قسمته..
******