قصة روابط للكاتبة |جوهرة السلطان

الفصل الثلاثين

بقلمي : جوهرة السلطان*

يفنى الزمان ولا اخون عهدك..
ابدا ولو قاسيت كل الهوان..
اصبو اليك كلما برق سرى..
او ناح طير الأيك في الاغصان..

********

يمممممه وليدي انخطف ولكم شكل لأبوه دخيلك ربي دخيلك ربي .
دخلت سلمى ادك على وجها وتبجي ..
ندى نست حملها ونست تعبها وركضت عليها وجسمها
يرجف وبصوت كوة يطلع..لج شكووو شبيه حماده.
سلمى حجت والشهكه واضحه بصوتها..سيارة طابكه
اباب المدرسه خاطفته الحارس يكول هسة شفنه
كامرات المحل البصف المدرسة.
كعدت ندى بالكاع بعد متتحمل تضرب الى صدرها
وتبجي ..يروحي يحماده عمت عيني اي والله
كاعدة مرتاحة وثاريك مخطوف اوووف يمه اوووف
ولكم تعالو ريحوني ولكم جيبولي وليدي .
ندى خطيه فقدت تملخ بروحها وسلمى مو احسن منها مكابلتها وتون ساعه وهنه عالهكعدة بالكراج ماحسن الا الباب انلطخت وانسدت حيل ودخل حكيم عيونه حمرا وعرك ناط بكصته يريد يطك.
سلمى راحتله شبكته وتبجي واطيب خاطرة لان شافته فاقد وعصبي..الله يحفظه ويرجعه سالم
بحق الله ورسوله.
حظنها وشهك بخنكه خلت سلمى جسمها يجمد
لان عمرها ماشافت حكيم مخذول .

عافها وتقدم لندى الجانت تحجي بدون واعيه
من شافته كامت لحيلها وبكل قهر وحركة كلب..
رجعلي محمد اريد ابني بحظني كله من وراك
انت السبب لوما عدهم عداوة وياك جان منخطف.
بقت تبجي وتصرخ تخبلت.
حكيم فوك حركة كلبه على ابنه انوب تحط اللوم
عليه متحمل عتها من زندها بقوة ودخلها للمطبخ
شمرها عالقنفه .
ندى توجعت من هاي حركته ولزمت ظهرها..اااه

انتبهلها بس جان فاقد من العصبية رفعلها ايده..ما اسمع صوتج جاي تلوميني ندى تذبين خطف محمد
بركبتي ابني واعرف شلون ارجعه وانتي مااسمعلج
صوت.
سلمى هدأته..عيوني حركةكلبها هاي ومتدري شتحجي .
بقى يفتر بالمطبخ ويستغفر مسح وجها بايديه وذب حصرة التفت على ندى الجانت تبجي بخنكه وكاتمه
صوتها بأيدها زرف كلبه شكلها تقدم عليها وكعد يمها
واخذها بحظنه حاوطها بذراعه ان شاء الله الكاه
لا تبقين تبجين ..ندى فرفحت بجي خلت راسها
على صدره وتشاهك ..فدوه حكيم هسه الله يعلم
بحاله خاف يأذونه والله اموت والله.
شدد بحظنه الها وباس راسها ..
ان شاء الله ارجعه وعيونج والسواها لا اخلي يندم عاليوم النولد بي.

حكيم عرف بخطف حماده من حرس السيطرة لان سلمى وندى جانن فاقدات والتهن بالبجي محد اتصلت عليه.
من سمع حس كانما طلقه اخترقت كلبه الا حماده
هذا طفل يادوب عمره ست سنين شنو ذنبه توهم فرحانين بي داخل مدرسه وفجاة ينخطف يروح من بين ايديهم طلع من مكتبه عالسريع وجان يسوق بسرعه ليوصل من شاف منظرهن متحمل ومن حظنته اخته شهك وبجى على روحه ونبض كلبه
محمد نبض الكلب اليدك يسارة وكوة لازم روحه
لا ينهار لازم يقوي روحه ليكدر يرجع ابنه ومن ندى ذبت اللوم عليه جانت فاقدة وتريد اطلع قهرها بي
متحمل لومها ميريد يحس هو السبب جرها وشمرها
بالمطبخ رغم هي حامل وتعبانه محس على روحه
من العصبية بس من شاف منظرها شلون مخذوله
ومقهورة متحمل وراحلها حظنها ليستمد منها قوة
يريد يحس بشوية راحة لاعصابه الفايرة.

هاليومين كلب الدنيا كلاب قدم بلاغ بالخطف ضابط مركز منطقتهم سال اذا شاك باحد او متعرض لتهديد
حكيم نكر هذا الشي وحب ياخذ ثاره بايده .
عمامه اجو البغداد والبصرة كلها التمت حتى شيخهم
اجى من البصرة من سمع الكل كاعد على شعرايه ويثور ينتظرون اتصال اي شي من الخاطفين .
شيخ ضرغام كاله ..اي شي يطلبونه انه حاضر ولاتكول انه وحدي ابغداد ترى عمامك بني مالج يسدون عين الشمس شوفهم شلون كلها مستعدة
انه سمعت كلام انت شاك بواحد رتبة بالدولة انطيني
اسمه والله اخلي يندم عالساعه الفكر بيها يطخك.
حكيم ذب حصرة ..سالم راسك شيخنا انه راح
اتصرف وهاي وكفتك وياي ما انساها .
الشيخ دك على جتف حكيم ..شد حيلك ادريبك كدها
رجع الشيخ ضرغام كعد وهو يفكر بالولد النخطف
عليه يساعد ابو محمد زرف كلبه من شاف نظرة انكسار بعينه يعرفه زين ميطخي لأي كان بس هذا ابنه صعب صعب موقفه الله يرله لهفته ..
الشيخ ضرغام صباح العرمش المالكي عمره بالثلاثين
تسلم الشيخة من والده الله يرحمه لان جانت حالته
الصحيه مو تمام فالشيخ صباح الله يرحمه ويسكنه
عالي جناته جمع كبار القوم من بني مالك وفهمهم ان
ضرغام هو ينوب عنه والشيخ بمكانه وبعد وفاته
ابو الاشتر صار الشيخ واثبت ان فعلا يستحقها عينه
عالكل رجل موقف وكلمة حق وبني مالج يفتخرون
بي ويتفدونه ..
انتبه الشيخ لابو عادل شاوره ..حكيم يعرف الخطف
ابنه قبل شوي جا اتصال وسمعته يحجي بعصبية ويهدد هاذ مخبل هسه يرتكب جريمه وماكو غيرك
يعقله .
حك الشيخ لحيته وصفن على عم حكيم ..جا شتريد
يسوي وهاذ وحيده ..التفت لواحد من رجاله اشرله
اجى يمه همسله الشيخ..تروح تشوف ابو محمد وين
صار وتجي تكلي.

حكيم اجاه اتصال مره ثانيه بس هالمره خلاه يعصب ويهدد جان الاتصال
من عميد رافع هدده اذا ما يسلمله الملف بعد ميشوف
ابنه ..جان بالكراج واكف عاط برافع بحركة ..والحسين لا اخلي طلقه براسك اليوم
دخل يركض للبيت طلعوا على صوته شافو احمر من العصبية وعروكه راح اطك بركبته وكصته وصعد للطابق الثاني.
الكل وكف على حيله من سمعوا وشافوا حكيم هايج
حكيم نسى كولشي بس محمد كدام عينه يخاف لا اذاه الجلب نزل الدرج يتطافر والرشاشه بيده والمسدس بحزامه …..

النسوان من سمعن جانن كاعدات بالهول سلمى وندى
تخبلن يخافن صاير شي وميقبلون يكولون يسمعن
صياح حكيم واصوات الزلم الايد كلامه والمايقبل
على تصرفه..

حكيم من نزل للاستقبال ويريد يطلع صار شيخ ضرغام بوجها اشرله بايده ..اذكر الله ابو محمد والتريده يصير لا تستعجل وانت بحالة غضب وعصبيه .
حكيم وعيونه حمرا وسلاحه بيده..ابو الاشتر ابني
عنده هو الخاطفه يساومني عليه .
ابو الاشتر هدااه ..صلي على نبينا .
حكيم بصوت تعبان..اللهم صلي على محمد وال محمد
تعال اكعد هان وخل نفكر شلون نرجع الولد .
بدون عصبيه حتى لايضيع حكك .
حكيم على اعصابه كعد بصف الشيخ لان ميريد يكسر كلمة شيخهم .
ابو الاشتر حجى بصوت واضح وسمع الكل ..هسه
صرنا نعرف غريمنا منهو ماريد رجال يتهور ويتصرف
تصرف ما يعجب ويعم علينه عدنه حك يمه وراح ناخذه .
النفس يصعد وينزل بغضب وكوة مسيطر على اعصابه وكاض سلاحه بيده .
الشيخ ساله..هو من يا عشيرة .
ردله بحركه..انعل ابو لابو الع…. قاطعه الشيخ لا تسب
عشيرته شنهي قابل يدرون بسوالفه.
_من عشيرة ال…..
ابو الاشتر ..والنعم منهم …زين هو من اتصل ما كالك
وين تلتقي بي جا مايخاف على روحه وانت دريت
هو الخاطف ابنك.
متحمل وكام وعينه عالزلم التارسين الاستقبال الجبير..اسمعوني يااهلي وعمامي ومن رخصة ابو الاشتر ..الصار سببه ملف بي بلاوي ضد عميد رافع
وخطف ابني يساومني عالملف وهسه بعد مابيها رجعه عليه وعلى اعدائي ابني اروح اطلعه من نص
بيته واهجم بيته على راسه وماراح اقدم بي بلاغ
وبس راح اذبحه جدام اهله.
كمز الشيخ ومبينه عصبيته بعيونه..ابو محمد اذكر الله لاتتهور وتصير محكوك لواحد جبان راح ادز وياك
الزلم بس احلفك بالعباس ما تكتله تريد دم واحد جلب اجلكم الله يصير بركبتك وعشيرته تحسبه
علينه وتصير بيناتنه دكه هو مبين جبان والا ماخطف
طفل .
اشر الشيخ لربعه الجانو متحضرين واخذهم حكيم
وطلعوا خمس سيارات لبيت عميد رافع.

……

ندى فاقده تلوب وصوتها رايح كلبها مشتعله بي نار
وسلمى ولينا مو احسن منها .

التفتت لينا على امها الجانت مرتجيه عالتجوة القنفه
وحجت بصوت ناصي وتكزكز بسنونها..شفتي امير
لا جا لا اتصل حضرته ملتهي بالدوام بالجذب اخذ
اجازة وتعال اوكف ويه خالو والله ولا اتصل عليه
ميكول اجي اساندهم ومسوي روحه يحب خالو حكيم..
سلمى خزرتها ..ولج انه بياحال شو اسكتي .
_لج عيني ام علاء مجاي اصدك عبالك حلم شلون
هيج يصير بيه وهسه حماده عابت روحي اي والله
وسوده بوجهي شلون حاله اكيد جاي يبجي عليه
يا ناس راح اتخبل…شهكت بصوت تعبان صارلها يومين منايمه ومماكله بس شوي يشربنها مي كوة
ام علاء وعيونها مليانه دموع حاضنتها ..لا تبجين
حبيبه ان شاء الله ربي يردلج لهفتج ومتحسينه
الا بحظنج. الصبر الصبر عيوني انتي شفتي حكيم
شلون غادي الله يساعده موهينه عليه وانوب يشوف
هذا حالج يتسودن بالزايد.
رحاب الدخلت وبيدها صينيه اكدت حجي ام علاء ..حبيبتي هاي الروح البداخلج هم الها حق
تعالي اكلي لكمه فات الظهر وانتي مماكله بس شربتي كمع مي .خلت الصينيه عالطبلة ..شو يلا
استعدلي نداوي لا تعاندين .
هزت ندى راسها وخانكتها العبرة..ماااريد
ذبت رحاب حصرة وصفنت عليها جان تكللها..شتردين تخسرين البطنج تالي وياج.
مدت ندى ايدها لبطنها لا ارادي وكلبها رجف..اسم الله .
_ديلا عيوني انتي لاتكسرين خاطري .
ندى تحب رحاب ومتريد تكسر خاطرها مدت ايدها
واخذت لفه صغيرة مجامله لرحاب وكوة اكلتها وشربت شويه من عصير البرتقال.
_صدك نداوي خابرتج المديرة وتتاسف لان مجتي ويه المدرسات تكول ابنها متخربط وهسه ويا بالمستشفى وكولش مقهورة على حمادة.
ندى راسا حجت..خطية مكالت شبي ابنها.
_تكول شاكين بي زائدة ومخلينه تحت المراقبه.

……

رافع صارله يومين من خطف محمد واخذه لمكان
ثاني غير بيته ..الشكاوى زايده عليه وعباله عقيد حكيم المالكي السبب كال اخطف ابنه واهدده حتى يسلمه الملف وجان خطفه سهل دز اثنين من حمايته
كال للحارس انو من حمايه عقيد حكيم ومن طلع الولد ماعرفهم خاف وكام يعيط فسحبوه سريع
ودو لعميد رافع صارله يومين ابيت مو بعيد عن بيته
صدع راسه وهو يسمعه يبجي وخايف ..
تقرب عليه حماده جان خاتل ورا الميز بالغرفة ..اطلع
ولك تعال اكل لاتروح تموت ويحسبك ابوك رجال
حماده خايف ويبجي وخانك البجية سمعه يصيح
ويفتر بالغرفه جان يلكفه راح جره من ياخة قميصه
حمادة يعت بأيد رافع ..عوفننني كلب .
شمره حيل بالكاع ايا ابن الكلب ولك هاي عليمن
شلون عين صلفه تعال اتزقنب .
حماده خزرة بعينه ورجع ليورى ..ماريد
_ويطبك طب بس خل اخذ الملف وانت وابوك بجهنم .
بجى حماده من سمعه يحجي على ابوه ومن بين ادموعه وصوت البجي..والله ..باااباااا يضربك
_ههههههاااااي لا بله .

طلع رافع وسد الباب وراه طلع مبايله واتصل بالحرس البرا …انتبهوا زين هنا محد يدري بينا
الشغله مطول اكيد راح يسلمني الاريده لان ابنه عزيز
عليه .
……..

حكيم بنفس الوقت جان على اتصال بأمير وعلاء
الجانو مراقبين عميد رافع وباقي على اعصابه ينتظر
اتصال من واحد منهم ماكو.
وكفت السيارات كدام بيت عميد رافع ونزل حكيم
وياه جم ازلمه حجى ويه الحرس البنقطه وافتهم منهم صارله يومين ممتواجد .
واحد من زلم الشيخ كال..شنهي نرجع هيج واحنا
وصلنه لبيته والله نهجمه على راسهم .
حكيم جان ناوي يقتحم البيت وحظر روحه لهذا الشي جان يدك موبايله امير يتصل طكك عيونه
وفتح خط راسا..هااا بشر
_اطلع عالشارع العام وادخل ثاني فرع يم عياده الاسنان تلكاني اني وعلاء بسرعه لا تتماهل.
سده ورجع سريع بعد ما اشر للزلم ..شخط السيارة
بقوة بحيث الاطارات بصمن الشارع.
كلبه يدك سريع بس يريد يوصل وفعلا مثل مااحجى
امير سيارة علاء اثنينهم كاعدين بيها علاء لابس كاب

وامير لاف شماغه على راسه نزللهم وحجى وياهم
ورجع صعد سيارته حرك علاء السيارة والكل مشوا وراه .

ويم البيت الجان خاطفين محمد طوقن السيارات والزلم البيت كلمن شايل سلاحه حكيم ركض عالباب
يريد يفتحه ماانفتح جان يشوف واحد من زلم الشيخ صعد عالسريع وكمز عالباب ورا شوي انفتح الباب والكل دخلو بس بقى اثنين مسلحين خاف يصير شي .

الحرس المخليهم رافع انتبهوا جان واحد منهم يبدي يرمي .
عميد رافع من سمع صوت الطلق سحب مسدسه
وركض عالغرفه جر حماده االجان خايف ويرجف من سمع صوت الطلق.
تعال ابن الكلب والله اليوم احركم كلكلم واولهم ابوك
حماده يخرمش بي على ايده ودنك عليها عظها
كفخه على راسه يلا هدة وهو يبجي.
نزل بي الدرج يريد يشرد من الباب الخارجي مايحس الا حكيم يعته حيل من جتفه حماده وكع بالكاع
_ولك ناقص اليوم اخليك تندم عالساعه النولدت ببها
جان مثل الاسد الهايج لزم رافع دك بوكسيات ورافع
ماقصر يرجعله ضربه بضربه بس حكيم برد كلبه بي
التموا الزلم وجتفوا الحرس التلاثة طبعا من اول ما الحارس رمى عليهم واحد من زلم الشيخ ضرغام
صوبه برجله وكعه بالكاع والحرس الاثنين سلموا
روحهم من شافوا الزلم مسلحه وصاحبهم طايح ودمى يكت من رجله.
علاء راسا اتصل بجماعته وخلال ساعه اعتقلوا رافع
وحرسه والحارس المصاب اخذوا مستشفى.
حماده ركض على ابوه حظنه يبجي بحركة ..باباااااا
حكيم بتعب هلكد ما ضرب رافع كعد بالكاع وحظن حماده يبوس ويشم بي ودموعه تجري على خده
رفع وجه حماده بادين اثنين وبغصه ..يعيون ابوك وروحه خما اذاك الكلب.
ساله وكلبه يرجف رجيف .حماده هز راسه وهو يشهك..لاااا
مسح دموع ابنه وحظنه بقوة وجر نفس رفع راسه
لعلاء وامير ..متصورون شكد ممنونلكم ساعدتوني هواي.
ردله علاء..عيونه الك ابو محمد وحمدلله على سلامه
حماده
دنك على حماده وباس راسه..سبع سبع محمد
الكل تحمدوله بالسلامه وطلعوا راجعين
امير من طلع خابر لينا يبشرها حاجته بنترة بس من بشرها عاطت تحلفه وحلفلها يلا صدكت.
بشرتهن شكال امير
ندى راسا سجدت لرب العالمين وبجت فرحانه
ورحاب رادت تهلهل بس سلمى سبقتها وطكتها هلاهل الزلم بالاستقبال سمعوا حجي راشد صاح..خير يارب.
موبايل الشيخ رن ومن فتح خط وسمع البشارة
التفت عالزلم..البشارة ياجماعه الخير وليدنا رجعنا.
ساعه وكفن السيارات اباب البيت واشتغل الرمي
وجماعه الشيخ حركوا الجو حرك بالطلق والهوسات
والكولات وحماده لاول مرة يشوف هيج واكف بصف ابوه ويدحك فرحان ونسى الخطف والبجي والتهى يدحك عالهوسات والدبج الكل طلع بالشارع والرمي
بعده مشتغل .
الشيخ ضرغام تحمدللهم بسلامة ابنهم ودنك على حمادة باسه..ها يالسبع شوف هاي الهوسات والرمي
كلها الك.
حماده ضحكله الشيخ سأله ..هااا تريد ترمي بالسلاح.
دحك على ابوه خاف ميقبل جان حكيم يهزله راسه
يضحك.
ابو الاشتر صاح واحد من الجانو يرمون ..خل وليدنا
يرمي .
سحب الشيخ اقسام الرشاشة وثنه رجله يم حماده
_يلا السبع خل ايدك هان واضغط ..
محمد سوا الكال عليه الشيخ وضرب طلقه وكمز كن الصوت.
ههههههه خايف هاا لاتخاف انت سبع.
حماده اجرأ جان يكول..خفت من الصوت خل اضرب
بعد
عادها مرة ثانيه وضرب طلقه وهو فرحان.
الشيخ سوا هيج حتى يمتص خوفته ويلهي وماشاء الله حماده بقى يتمركص حاله حال الزلم ويدبج وياهم.
الحجي راشد جانت الدمعه بعينه وهو يحظن محمد
ويبوسه ..هلا بيك جدو حمدلله على سلامتك.

حكيم دخل وايده بايد حماده من شاف امه شمر روحه عليها شهكت ندى من شافته بوسته بكل مكان بجسمه واستلمن نسوان العائله الجانن فرحانات ويهلهلن .

رحاب ولينا اخذن حماده يسبحنه لينا تساله ..حماده
خوما احد ضربك لو اذاك
_ليونه محد ضربني بس اليوم هذا الرجال البابا فطسه كتل كفخني على راسي الشرطه حبسوه.
رحاب ردتله..انكسرت ايده ان شاء الله
سبحنه بدلوله وتعطر ونزل يم امه جابتله سلمى اكل
مسويتله لفات صاج يحبها وعصير.
جان ياكل ويسالن بي يردن يطمنن وهو ماخلى شي
ماسولفه.

اخر شي كال..اروح يم بابا والشيخ ..ماما خلاني اضرب طلق
لينا ضربت صدرها..عزززا شلون يخليك ترمي مخفت.
ضحكت سلمى ..اي هذا ابو الاشتر والنعم منه ماقصر هو ورجاله.

…….

حكيم وصى مطعم ذبايح واكل عزايم عالعشا …الشيخ راد يرجع للبصرة هو والزلم بس حكيم وعمه ابو عادل ماقبلوا كالوللهم ..يبقون الليله
لان المغرب اذن وعشاهم حاضر وباجر ان شاء الله يتسهلون راجعين بني مالج للبصرة.

********

تحية لبني مالك ?? ولشيخهم ابو الاشتر ?? 1

……

اريد تفاعلكم بالقصة ودوسوا النجمه صوتولي.