قصة روابط للكاتبة |جوهرة السلطان

الفصل التاسع والعشرون

بقلمي : جوهرة السلطان*

تابى الرجولة ان تدنس سيفها..
قد يغلب المقدام ساعة يغلب ..
في الفجر تحتضن القفار رواحلي..
والحر حين يرى الملاله يهرب..

المتنبي*

************

ردله حسان بعصبيه..ما اسمحلك تتهمني هيج اتهام
احنا شيوخ ومعروفين شلون تشوه سمعتي.
الضابط اشر للجنود يجتفونه حسان طكك عيونه
دافع عن نفسه..انه محامي لا عبالك مراح ادافع
عن نفسي والجاي تسوونه ما اسكت عنه.
ردله الضابط بأستهزاء ويفر بأيده..الدليل لكيناه وهسة انت متهم .

الشيخ سالم من شاف حسان متهمينه وراح يسجنوه
خله ايده على كلبه من الالم وحس راح يوكع للكاع.
حسان دفع الجندي مخلاه يتقربله بس اثنين من الجنود تقدموا وحسان تعارك وياهم ويصيح بحركة
_جلاب والله لدفعكم ثمن هاي الاهانه .
صلاح من شافهم ركض على حسان يدافعله اخر شي
مد ايده وشال عكاله من راد يوكع وخطيه حصله ضربه بجتفه من اخمص الرشاشه ضربه واحد من الجنود.
جتفوا حسان بهذلوا شماغه وكع ودشداشته الدكم
تكطعت .عاط بيهم انه ماهو مجرم حتى تربطني
ردله الضابط..راح نعاملك هيج.
_انه شيخ معروف وبعيد عن الشبهة والله لخليكم
تندمون.
الشيخ سالم لزم ايد صلاح وكوة تطلع الحجايه منه
_دكلي على الشيخ عارف

…..
الشيخة عالية ادك على راسها من شافت حسان اخذوا تريد تطلع عليهم وسمر مجلبه بيها ..عمه فدوه اروحنلج ماتشوفين الجنود والهوسة شيخلصنا من عمي.
ام حسان تلوب وروحها مفرفحه ..يمه وليدي اشلون
هيج يسوون بي دخيلك يبو فاضل اريدن وليدي منك
يمه يم البنين احظرينيه داخله على الله وعليكم
كل شوي تروح للباب مال المطبخ تشوف الجنود تارسين الساحة جدام المضيف بعدين اخذوا حسان
وحركوا سياراتهم راحو

ركضت على الشيخ وتلطم خدودها دم وصوتها رايح بالبجي ..سالم اريد وليدي ليش خليتهم ياخذونه
شنهي السالفه جرها من زندها ودخلها للبيت واشر لصلاح والعمال يبقون بالمضيف خاف احد يجي لان الناس من شافت السيارات والهوسه بدت تجي للمضيف يردون يطمنون.
دخلها للبيت وكامت تصيح..شلون تخلونهم ياخذونه
وين زلمك يالشيخ ليش هيج خليت وليدي ينهان.
كعد عالقنفه بالمطبخ راحت سمر جابت علاجه وكلاص مي شربه وذب حصرة..ولج انه شريد اسوي
والعسكر محاوطينه ولكو عبوة ومتفجرات بالمخزن.
شهكت وضربت صدرها ..عززا العزاج عالية
يايمه راح وليدي راح الشيخ راح المعدل المهيوب
بقت تولول وكاعده بالكاع.
دخلت امال تبجي ممصدكة ودخل وراها ابو جعفر ومرته
_يخوي شنهي السالفه صدك السمعته اعتقلوا حسان
هزله راسه وطلع وياه للمضيف.
وبقن النسوان ام جعفر تهدي بام حسان الجانت
فاقدة وتبجي وتنخي بالائمه

…….

هند متدري نايمة حملها هذا مخليها تحب النوم
وين كعدت شافت الساعه ممصليه الظهر راحت توضت وصلت يو هسه يجي حسان خل احمي
للغدا دخلت للمطبخ دحكت من الشباك
وتشوف زلم وهوسه كلبها انخمش ليش يتراكضون
لبست حجابها وطلعت للبيت الجبير فاتت من ورى
البيت لان الزلم تارسين الساحه دكت الباب الخارجي
شوي وفتحته سمر جان وجها مكلوب .
دخلت وراحت وراها للهول..شكو سمر ترى خفت
كامت امال وليلى الجانت جايه توها ..ولج داهمونا واعتقلوا حسان. بعدها شهكت امال بالبجي.

هند من سمعت خلت ايدها على حلكها وعاطت
كلبها يدك سريع وعقلها مجاي يستوعب السمعته
ممعقوله كله الا حسان لاااااا يربي
طفرن دموعها وحست روحها ماعت ورجليها صارن
خيوط لزمت امال وعيونها غوشت ساعدنها تكعد
صاحت امال..ولج هاي خربت
تفرك بايديها وبكصتها ..سودة عليه متحملت الخبر
انوب لتيصير بيها شي.
هند بس تسمع صوت البجي صوت عمتها وصياح
امال وليلى يردون يكعدوها تحس روحها بغير عالم
مجاي تستوعب حسان يروح منها .
سمر وليلى كوة اخذنها لغرفة الشيخه حطنها عالجربايه وهي لاتحرك ايد ولا رجل
حجت ليلى بخوف..يمعودة خاف يصير بيها شي
شوفيها وجها اصفر وشفايفها ابيضت.
سمر اكدتلها ..هي عدها فقر دم وانوب انصدمت
هسه راح اسويلها اكل ابقي يمها خطية.
سمر راحت عالسريع سوتلها زلاطة كرفس وطماطه
وحمتلها الغدا صبتلها كاسه تشريب وخلتلها قطعه لحم وصبت ماعون صغير تمن وعصرتلها برتقال
سوته كلاص حتى ماخففته.
شالت الصينية خطيه ابنها يمشي وراها مجلب بثوبها
كعدنها كوة وشربتها ليلى العصير مقبلت تاكل
كوة عليها اكلت لكمتين.
ورجعت انسدحت والدمع يجري .
…..

للمغرب والشيخ يلوب ماخلى شيخ ولا رتبه بالمحافظه مااتصل عليه وعدوه يشوفون شنو السالفه وان شاء الله يساعدونه.
هو وخالد وصلاح… جان خالد شايط وحجى عليهم
_بالعباس لو انه اسويها دمايه وماخليهم يعتقلونه
جا شنهي ماعده زلم شلون هيج يهينونه
عامر الجان منسدح على جها بالمضيف..لكو عنده
عبوات شتريدهم يبوسونه.
التفت خالد وعيونه تجدح غضب..لاتكول عنده عبوات اخوي ماهو ارهابي يالاغم.
عامر عدل كعدته..جا مو لكوهن وامر القبض باسمه
ليش اطمطمله .
خالد تقدمله يريد يشحطه جره صلاح
جان يزمخ بي الحجي ابو جعفر..طيح الله حظك
يالاغم تشمت باخوك .كوم انكلع لابارك الله بيك

عامر كام ونكت روحه..خل اروح احسنلي عليش
كاعد ومامحترميني.
صلاح من بين سنونه ..روحه بلا رده شكد غثيث.
التفتت لخالد اسمع خل نتصل بعقيد حكيم هو مو
بمكافحه الارهاب شلون نسيناه .
خالد حجى وروحه بخشمه..اتصلت بامير
مبايله مغلق يجوز طالعين مهمه.

لليل دخل الشيخ يجر بروحه كعد عالقنفه بالهول
ارتجى عالعوجيه بايديه وعيونه على هند كاعده
وصافنه بغير عالم بس الدمع يجري.
سالها ..شلون صرتي بنيتي.
شهكت بالبجي ..عمو فدوه ماكو خبر عن حسان
هسه اكيد حيعذبونه
جر حصرة وذبها يسال بروحه منهو عنده مصلحه
يشوه سمعة حسان منهو يتجرأ يدوس كاعهم وبيتهم
ويضم متفجرات بالمخزن شلون يعبر والسياج محاوط من فوك اسلاك شائكه وموجود حارس
هاذ واحد حاقد يريد يأذي وليدي ااااه يحسان
يبو نفس العزيزة شلون تتحمل هاي الاهانة

انتبه لهند تشاهك وتبجي ام حسان راحت حظنتها
ومن لزمت كصتها جمرة صاحت ليلى..ولج مصخنه
جيبلها طاسه مي بارد خلن انكمدلها .
_عمه خلن نودبها لغرفتج ترتاح خطيه.
مشنها للغرفة نومتها الشيخه عالجربايه..يمه ديري
بالج على صحتج وليد حسان ماتخافين عليه
يلا بنيتي ارتاحي..
هند من سمعت حجيها بجت اكثر متدري شتسوي
وين تروح منو يجيبلها حسان.

ورى ساعة شوي نزلت حرارتها ليلى مسويتلها معلاك
وغصبتها تاكل اكلت لخاطر الروح البداخلها شنو ذنبه

وراها بفترة انتبهت كاعدات يمها يسولفن شلون اخذوا وشحجى وياهم ليلى بفخر..فديت اخوي السبع ماطخالهم راسه.

كعدت ام حسان يم الشيخ وحطت ايدها على حلكها
تمنع شهكة شكت صدرها .. شلونك هسه انت بخير … ردلها ..منين يجيني الخير وحسان ماهو . القوة الداهمتنه ماخذينه لبغداد ساجنينه بمكافحه الارهاب .
..سالم عندك علاقات ومعارف سوي شي لابد واحد بيهم يساعدنه
الشيخ ردلها مقهور..المدولبني وفار عكلي منهو الحطلنه العبوة والمتفجرات ولج هاي دليل ضد حسان عبن الاخبار جاي باسمه شيطلعه من السالفه
ااخ يانار كلبي اااااخ.
شلونها هند صارت زينه.
_خطيه مرعوبه وحرارتها توها نزلت خايفة عليها
هاي مايعه وانوب حامل خاف يصير شي بجاهلها.
اذا بقت هيج اخذها باجر للدكتورة.
وصاها الشيخ..ديري بالج عليها خاف يصير لها شي
لا سامح الله وانتي تدرين حسان شلون يحبها ويدور
رضاها.

انه اتصلت بحجي راشد وفهمته الصار وراح يسوي اليكدر عليه همزين علاء يداوم نفس المقر .
رفعت ايديها تدعي لأبنها بلوعة.

……

شوي صحت لروحها جان تصيح امال..عفيه امال
موبايلي نسيته بالبيت جيبي اذا متصير زحمه.
_ادللي عيني هسة اروح اجيبة.

وراها اخذت موبايلها بعد مجابته امال فتحته كومة
مكالمات من اهلها راسا اتصلت على علاء
جانت الشيخة والبنات كاعدات يمها بغرفة الشيخة

رن شوي جان يرد علاء…

هند بحركة كلب وصوت مبحوح من البجي ..دخيلك علاء
الحكني كولشي ولا حسان اوكف لاختك بشدتها.
_بعد روحي لاتبجين قبل شوي عرفت ابويه اتصل عليه صيري قويه لاتبجين دموعج يزرفن كلبي.
هند شهكت وهي تتوسل..اروحلك فدوه تساعده
والله العظيم بريء وهاي مدري منو داسهن ليوكع
حسان .
_اني هسة راح اوصل للمقر جنت طالع بواجب
وان شاء الله اسوي الاكدر عليه.
عاطت بلوعة ..لاتخذلني علاء رجعلي حسان وبعد
كولشي مااريد من الدنيا.
طمنها ووصاها على روحها.
سدت الموبايل شمرته عالفراش ودنكت تبجي
ام حسان والبنات بجوا وهمه يسمعوها تتوسل باخوها يساعد حسان.
_شكال اخيج .
رفعت راسها لعمتها وبصوت مخنوك..ان شاء الله
يساعده.

…..
الشيخ سالم تشكر من معارفه واصدقائه الحضروا من سمعوا الصار اجوا من كل مكان ليساندون الشيخ بمحنته اغلبهم مسلحين ومستعدين اشارة من الشيخ
الكال انتظر جية ابو العباس .
واحد من الشيوخ ..وحق الحسين بس ارخصني
لا اكلب عاليها واطيها وانه بن خيون .
الشيخ سالم باس راسه ..كفوو منك كفوو ادريك
كدها .
التفت لجعفر توا وصل ومبين عليه الانكسار والهم
_هاي جيتي من بغداد واطمنك حسان بخير.
مد ايده لجتف جعفر وعصره..كول الصدك وليدي
انت شفته.
_شفته وحجيت وياه يدزلك سلام ويكول لاتخاف عليه.
الشيخ سالم غمض عيونه وداخله مليان قهر واحساس مهانة مو هينه عليهم الذله وهمه شيوخ معروفين والكل تحسبلهم الف حساب وخاصة حسان
الصار ماينسكت عنه كرامته وكرامة ولده بالذات حسان خط احمر وراح يحاسب السواهه ويدفعه الثمن غالي .
جعفر طلع برا المضيف وجر نفس قوي وذبه.شرد
من نظرات عمه ميريده يعرف شلون شاف حسان
مكسور ومقهور ميريده يعرف شلون متعرض للاهانه
من القوة الداهمتهم وشلون معذبينه حتى يعترف
ولوما رائد علاء يتدخل جان الله اعلم بحاله.
انتبه لصلاح وهو يسأله بقلق واضح..ابو عباس بداعة
عزيز كلبك حسان شلونه.
ذب حصرة واتقرب عليه لاتحجي لاحد حسان معذبينه حتى يعترف وعلاء نسيبه متلاحكله
عض اصبعه بقهر ..ااااخ اااخ لو بس اعرفه السوة
هاي الدكة والحسين الشهيد لا خلي يزوع العافيه.
صلاح قبل ميكون صديقهم اخوهم من صغار علاقتهم قويه وتقريبا رابي ابيت الشيخ جديته
ام ابوه تصير بنت عم ابو الشيخ سالم يعني يصير
من العمام.مخلص معهد ادارة ويشتغل ويه حسان
زوجته متوفيه عالولادة وعنده احمد عمره اربع سنين وما يقبل يتزوج مكضيها شغل وونسه ومضيف
يم ببت الشيخ.
انتبه على عامر الطلع من المضيف راح لبيته من يشوفه تجي غمته مايرتاحله ومن سمعه يتشمت
بحسان جان وده يفرك حلكه لوما الشيخ سالم.

……

تلكاه يرحب ويهلي وشوي كلبه ارتاح من شاف صديقه.. الي يطمنه ..لاتخاف ان شاء الله
يفرجون عنه.
هز الشيخ راسه وهو يدخل وياه للمضيف المتروس زلم ..الله كريم.

بالمطبخ النسوان مخبوصات يحضرن الغدا والجايات
الكهوة مسؤل عنها الكهوجي يسويها بالمضيف.
الجدورة الكبار خلنهن ورى البيت عدهم ترك مساحته
وسيعه ونصبن عالبريمزات اللحم والتمن وخالد كل شوي جاي يستعجلهن ..الزلم تارسه المضيف اريد غدا يبيض الوجه .
امال جانت روحها مفرفحه وتحس ظهرها راح ينكسر
كاعده تحرك بالتمن..يعني فوك مصيبتنه نبيض وجه
بالطبخ .
خزرها خالد..ولج امال شنهي هالحجي احنه شوكت
تعاجزنه هذا مضيف العمران دومه مفتوح للناس.
سمر ردتله..عيوني انته مكايله شي خطية هي من قهرها ولاتنسى حامل ومن الفجر واكفه على حيلها.
مشى عنهن مارد عليهن.
امال انقهرت مو لان خالد نتر بيها انقهرت على حسان
الله يعلم هو بيا حال وهمه جاي يطبخون يوكلون العالم.
كملن الغدا وصبنه للزلم وجان صدك يبيض الوجه
تساعدن بيناتهن حتى لينا جانت وياهن معافتهن ودومها يم هند تواسيها.
……
هند كاعده بالاستقبال يم النسوان ومن شافت امها وعمتها رحاب رفعت ايديها الهن وبجت سلمن عالنسوان وام علاء حظنت هند البجت بحركة
رحاب بعد ماسلمت بوست هند وطمنتها
ام علاء سلمت عالنسوان وعلى الشيخة الكاعدة بصف هند ورجعت كعدت يم بتها..ماما صيري سباعيه وخافي عالروح البطنج الحمدلله على كل حال وعلاء طمنه قبل منجي كال راح يسوي المستحيل ليطلعه.
وتدرين باخوج من يكول حجايه.
بقوا اهلها يومين ورجعوا ابوها حظنها وبوسها وصاها تهتم لروحها وان شاء الله حسان يطلع .
ام علاء وصت الشيخة على هند وردتلها..بعيوني احطنها هاي مرة الغالي الله يرجعه سالم بجاه النبي
واهل البيت.

******

نرجع لعلاء من خابرته هند تبجي وراها اتصل ابوه
وحجاله الصار هو جان راجع للمقر دخل لمكتبه وعيونه ناطه من العصبية عاط بصوت رج المكتب رج
..سيييييف
دخل سيف للمكتب..نعم سيدي
_جابو متهم من الناصرية.
ردالمساعد..نعم سيدي .
_وين نقيب سامي .
_نزل لغرفة التحقيق .
عاط بسيف..وليش ماعندي علم .
_العفو سيدي كلنا نعرف المتهمين ينعرضون على نقيب سامي
هز راسه موافق .بس بداخله نار ساعرة على اخته
مجرد تفكيرة بحسان زوج اخته متهمينه بجريمه ارهاب خلاه يفقد اعصابه .
طلع من المكتب سريع ونزل الدرج درجتين درجتين
وصوت هند وشهكتها ترن باذنه وهي تكله..دخيلك علاء كولشي ولا حسان .
يدري بسامي وسوالف يطلع جلد للمتهم ميرحمه شكد يحذرة بس ميفيد..سمع صياح وانين تعذيب
دفر الباب النركع بقوة ودفع سامي لطخ ظهرةبالحايط ولك عوفه .
_اااخ خرب غيرتك علاء عود اني صديقك
دحك على حسان الجان واكع بالكاع وجهه مجرح مورم من ضرب الكيبلات والبوكسات

بعصبيه وبدون ميلتفت لسامي..روح لمكتبي جاي وراك.
سامي تفاجىء من تصرف علاء خله وطلع.

علاء تقرب لحسان وفك قيوده وحجى وياه وهو يساعده يكعد عالكرسي وعيونه محاوطه وجه حسان المغطى دم حسان ون بوجع من لزمه علاء بذراعه.
تنهد علاء ..اني حيل اتأسف عالصارلك قبل شوي دريت من خابرتني هندة وبعدها ابويه هماتين.
طيح الله حظك سامي هاي شمسوي بيك.
رد حسان بصوت مليان غضب ..اذاني الحقير
علاء جر كرسي جان مشمور على جهة وخله عينه بعين حسان الجانت مورمه ..احجيلي الصار بالضبط
اي كلمه اي سالفه خلال هالفترة ..
حسان مسح الدم النازل من كصته ابزمه الدشداشة

وكعد يحجي لعلاء الجان يساله كل شوي .
علاء انتبه اكو شخص يكيد لحسان لان ممعقولة
حسان وحياته المليانه مشاغل العشيرة والمضيف
واعماله وحبه للناس ومساعدته الهم يمشي بهيج
طريق ..قرر يساعده ليظهر برائته بداخله احساس
حسان بريء.

كاعدين بالمكتب حاجاه لسامي..مثل مكلت ماريد تستخدم العنف بالتحقيق.
انت بعد عرفت هويه المعتقل وكل الاريده تتبع الاتصال الوردلنه منين مصدرة .
ردله سامي..لا تهتم راح نتبع الاشارة ونعرف المصدر
وحجيت ويه رائد نائل وصار عنده علم وراح يساعدنه كتله مسأله حياة او موت.
علاء دحك عليه بأمتنان..والله كفوو منك دومك رجل المهمات وراح اسامحك عالسويته بالشيخ.
ضحك سامي ..هههههه ولك يهددني يكعدني للحك
هههه شكد راسه يابس ومتكبر اعذب بي ويصيح عليه ماكون حسان الما اخيلك عبرة واكعدك للحك.
ردله علاء يريد يخوفه..والله مااستغرب حسان الهوى
مايطخ خشمه وراه عشيرة اتشك الحلك .
سامي خنزر ..علاء مو اني صاحبك تراني ماخايف
تدري بيه بس مو تعوفني بحلك السبع ههههههه
_دكوم كوم مو خلصت اجازتك هسة مرتك وجهالك
ينتظروك.
كام سامي وغمزله..اي والله فدوه اروحلهم شكد مشتاقلهم.

…….

علاء خله حسان بزنزانه منفردة ورجع زارة مرة ثانيه
ودخل شايل جنطة بيها ملابس واكل سلم عليه..
الولد والوالدة يسلمون عليك وهاي امي حضرتلك
جنطة بدل دشداشتك واكعد اتغدا.
حسان تشكر منه ..مراح انسى معروفك ومساندتك
اليه.
ردله علاء..حسان احنه اهل وراح اسوي المستحيل
حتى اطلعك منا.
تنهد حسان وذب حصرة ..اريد منك معروف اتصل بأهلي هسة كلوبهم محتركه عليه وخصوص هند.
انطاه موبايله ..اتصل واطمن وطمنهم اني هنا بالممر
بس وصيهم لايحجون لان عدنه خطة فأحذر.
حسان سد الموبايل ورجعه لعلاء..انت صادك
الدنيا متتأمن والناس بيها هوايه غدارين.
ابو يزن اريدك تراقب عامر ابن عمي كلبي لاسبني
منه .
رفع علاء تك حاجب ..اخو امير .
_اي
_معقولة يكرهك لدرجة هيج يأذيك.
ردله حسان بضيق..متعرفه شكد متهور ويغار مني .
_زين حجيت هذا الشي يسهل تحقيقاتنا .

طلع علاء ورجع حسان كعد عالسرير مال حديد وعليه فراش قديم..فكر بأهله هسه شلون حالهم يالله
شكد مشتاقلهم مشتاق لهندة شلون حالها هسة .
حاول يمدد عالفراش ميكدر جسمه يون عليه
من التعذيب خلفله على ام علاء حاطه ويه الملابس عصارة دهن فادته دهن جسمه اليون ..شكد حقد على سامي لوما علاء يتدخل جان فقد وعيه من التعذيب .
وراها بيوم زاره جعفر الجان متخبل عليه وطمنه راح يسوي اي شي حتى يطلعه وبالفعل زار جم مسؤل
مهم واتصل بيهم واغلب اجاباتهم ابن عمك لزموه بالجريمه .

……

حسان مبطل تفكير ماعنده اعداء منو يكيدله علاقاته
ويه الكل زينه ودائما يصلح بين الناس بسبب مكانته
كشيخ ماعنده شي غير بس مرات يتواجه ويه عامر
معقولة ينتقم منه بهاي الطريقة ابن عمه هاذ معقولة
جان يفتر بالزنزانه وروحه طالعه من كثر التفكير

ردد ويه روحه..قسم برب العالمين يعويمر اءا طلعت انت ورى السالفة لخليك تندم طول عمرك.
صار عشر تيام هنا ويجوز يطول الله اليعلم بحاله
هواي يسمع عن المعتقلين سنين يبقون مسجونين
وبيهم مسجونين ظلم .
بهاي الفترة زارة امير الجان مصدوم وكعد يكسر عليه
ويشاقي وعقيد حكيم مر عليه مرتين واكدله مكاعدين من قضيته ان شاء الله افراج.

شهر مر وحسان بالسجن كدر يحجي ويه اهلة مرتين
وطمنهم عليه وصاهم ميحجون لاي كان واسى روحه
وصبرها بعد ماسمع صوت هند يربي شكد مشتاكلها
حد الموت ومن سمع بجيها عبالك انضرب سجينه
بنص كلبه حلفها ماتبجي وادير بالها على ابنهم
لان كالتله دخلت بالخامس وصورت بيها ولد
هذا الشي فرحه رغم غمته السجن وصاها تروح لاهلها خالد يوديها بس مقبلت تكله انتظرك انت توديني حجايتها بكد ما قهرته خلته يتأمل يطلع.
سالته على علاء اذا يساعده طمنها وحمد بعلاء لان فعلا اثبت انه رجل موقف ومراح ينسى فضله عليه.

********

دخلت ندى للبيت راجعه من الدوام تعبانه صار شهر من بدت المدارس وتحس روحها ضايجه من الدوام
بطنها كبرانه داخله السابع سالت ام لينا بعد ماسلمت
عليها ..شلونج حبيبة .
_هلا عيني روحي بدلي وارتاحي يجي حماده واصب الغدا .
_تسلمين يعمري انتي ارتاحي اني اصبه بعدين حماده ليش اتأخر يجي قبلي شعجب السايق متأخر لو شنو.
ندى دخلت سبحت بدلت دشداشة حمل حمرا ربع ردن ونزلت على كيفها دخلت للمطبخ شافت سلمى من الشباك تروح وتجي بالكراج كلبها نغزها طلعت.
_سلمى شكو حماده ليش اتاخر.
التفتت سلمى وجها نوميه..ولج السايق يكول مريتله
وماكو وهسة صحت للجندي البسيطرة يروح يتأكد.
شهكت ندى وضربت صدرها بقوة..عززا العزاج ندى
ابنج راح .
صابتها الرجفة من تتوتر وتنهبط ركضتلها سلمى ودخلتها للمطبخ عالكرسي هدئتها ..ان شاء الله ماكو شي
اهدي شوي لاتخبصيني.
دك جرس الباب طلعت سلمى تركض حجت ويه
الجندي ندى تراقبها من الشباك جان تسمع عيطة
سلمى……..

********

تحياتي اتمنى ادوسون نجمه ……..حبيباتي انساتي سيداتي انتن جمع من النساء الراقيات
اتمنى عجبكم البارت.???