قصة روابط للكاتبة |جوهرة السلطان

الفصل الحادي عشر

فضلاااااا وليس امراا دوسو نجمة???

علاء رفض اخته يعقدولها عالمذهب الجعفري واصر العقد يكون عالمذهب الحنفي طبعا ماكو فرق غير شي قليل بين المذهبين والي هو بصالح الزوجة بالاخير مرجعنا لكتاب الله القرأن الكريم وسنة النبي محمد صلى الله عليه واله وسلم ..بس علاء جان ضايج ويتعمد يستفزهم واتصرف من يمة اتفق ويه شيخ المسجد وعزمه رغم الشيخ فهمة ماكو فرق
بس وين ينفع ويه علاء الجان كلبه مجمر .
السيد بقى صافن بوجه علاء وحس اكو شي فحب يطمنه..ماكو فرق ان شاء الله …ورد شيخ المسجد يأيد كلام السيد ..لا والله كلنه اخوة على حب الله ورسوله
الكل انتبهوا لعلاء شلون معصب ..وحسان وجها انكلب وعيونه طكن رفع حاجبة وهو يحاول يكتم
ضوجته ..اختك راح تصير زوجتي وانه مسوؤل عنها
احافظ عليها واحميها .
رد علاء بنترة ..ماكو زواج الا على مذهبنا .
حجي راشد عيونه صارت بكصته تخبل هذا شلون هيج يفشله صخم الله وجهك علاء عالهدكة شلون جدام الشيوخ والسادة يريد يفشله يحاجي نفسه
ويدحك على الشيخ سالم الجان ساكت بس يباوعلهم
علاء النافش روحه مثل الطاووس واكفلهم بنص الاستقبال وحسان الكاعد بهيبة بس مبين ضايج

فحجى بصوت قوي حتى يلفت الضيوف ويغطي على دكة ابنه الي يريد يبينلهم هو رافض هالزواج ويدور حجه..كمل سيدنا توكل عالله ماكو فرق
تقدم علاء لابوه وحجى بصوت سمع الكاعدين
_حجي خل العقد على مذهبنا
قاطعه حسان الي شوي ويكوم يكفخ علاء ..وانه مااعقد الا على مذهبي والتفت على حجي راشد
_العفو منك عمي ماريد اضايكك مبين ابو يزن ميريد يناسبنا .
رد ابو علاء ..يابة شنو هالكلام انتو تاج على راسي
والتفت على الشيخ سالم وكمل ابوك يدري بمعزتكم عندي…. بعدها دحك لابنه وتنهد وحاجا بصوت ناصي..بعدين اتفاهم وياك ..
رفع صوته ..توكل سيد واعقدلهم خل نفرح بيهم.. ليش هسة نريد نختلف واحنه تجمعنا صداقة واخوة
روابطها ماتنفصم الكل مدحو وتشكروا منه .
وعلاء تخبل جان يرد على ابوه..يااابة ترى هواي تنازلت .
حكيم كاعد يراقب علاء شلون ضايج ويدور حجج
هو يدري بي ميريد يزوج اخته لابن شيخ سالم رغم يعرف علاء مايهتم هواي لامور المذاهب بس كاعد يفهم الحاضرين انو مايريد يناسبهم وخطية الحجي كلش مقهور لان علاء حطه باحراج كدام الشيوخ
وتوقع يرزله لان راشد عصبي ميتحمل بس حظه بالشيوخ والسادة ولة علاء جان تكفخ على ايد الحجي.

_يابة علاء انه مو ناسبتكم وبوكت جانت الدنيا عالكة وانته مادورت هاي السوالف والعقدجان على مذهبي ادري بيك مدور ورى هاي الشغلات بس انته
معتز بيها الله يحفظها وممتقبل تبعد عنك .
دحك علاء لحكيم انطا اشارة بعينه يسكت.

حسان فهم نغزة علاء فالتفت لعلاء وحجى بصوت قوي واضح للكل لان متعلم عالدوواوين ويعرف شلون يتحجى ويخلي المقابل ينتبهلة
_ اسمعني زين انه شيخ ابن شيخ وقبيلتنه
جذورها مغروسه بكل شبر بالعراق انه افتخر بنسبي
ومذهبي وراسي مرفوع فلاتحاول تقلل مني لان ماتكدر .
وهنا يلا تدخل الشيخ سالم العمران من شاف ابنه معصب درى راح يخربها ويفشله ويه الحجي
وشاف علاء المبين عليه اعصاب جنه راشد من جان شاب راسا يوج
حب يلاطفهم ويمتص غضبهم ..انه كاعد انتضركم شوكت تخلصون سوالف جااا هالوادم تريد تفرح لفرحنه وانتم متعاندين يابة الله بالخير عليكم
الكل ردوله الله بالخير
سيدنا العقد عالمذهبين وزيادة الخير خيرين والله يسهل للجميع ان شاء الله

الكل رحبوا بحجاية الشيخ لان شافوا شلون علاء وحسان متعاندين وحمدوا للشيخ تصرفه الحكيم الرزن.
ابتسم السيد للشيخ لان فضها على خير.
خالد كاعد ويتكرضم وشاور امير الجان فاك حلكه هذا علاء شيخربط شلون هيج يحجي كدام عمي الشيخ وشلون حسان ساكتلة . سمع خالد يحجي
وهو صاك على سنونه ..بالعباس اروح افلش جهرته
هالمغرور هذا اشايف روحه.
هدأه امير …اسكت يمعود موجاي تشوف عمي ميرد
عليه خل نشوف تاليها.

يم النسوان الدنيا عالكة الشيخة من سمعت علاء هيج يحجي انكلبت خلقتها وبقت كاعدة على اعصابها وادردم ..جااا هو يحلم بهالنسب.. كله من الشيخ ذبح روحه عليهم .
_يمممه مو وكت الحجي هذا راح يسمعن عيب
شوفي شلون مقهورات خطية .
بهالاثناء ام ريمة كعدت يم الشيخة ..عيني ام حسان
علاء عصبي وترى موقصده كل السالفة ميريد ايزوج
هند لأن حيل يحبها ومعتز بيها
دحكت عليها جن ماعاجبها ..جاا يخمرها اول وتالي تتزوج ..ضحكت رحاب وهي تريد تغير الجو عليهن
_ياااا والله يشيخة حجايتج صحيحة غير من كثر المعزة ههههه

ام علاء تفتر فوك راس هند وندى وكل شوي تحجي
ولازمة راسها بيدها..يمه عزا العزاني ولك علاء شلون هيج حجيت والله اليوم راشد يسويها كربلا ..ربي
حلها من يمك يارب يارب.
ندى ساكتة ومن سمعت صوت حكيم وكلامه حست شوي بالراحة والتفتت لهند الجانت منزلة راسها
وساكتة والدموع مغركة وجها
_شوفي شصار بيج مدت ايدها بالكلينس وبدت ترتب وجها همستلها ..كافي يعمري ان شاء الله خير .

هند بداخلها ميتة خوف وقهر تحاجي نفسها ..هاي من اولها هيج اكيد علاء يزعل عليه وبعد ميشوفني
لان مبين حيل زعلان …وهذا ابن الشيخ شلون عصبي يخوف شدعوه شايف روحه ..انه شيخ ابن شيخ… متكبر على شنو ماادري.
صار هدوء من السيد بدا يعقد هو وشيخ المسجد
انفتح الباب وحجي راشد وكف يحجي ويه هندة
شاورها بنتي ردد ورى السيد بعدها الشيخ .
فض العقد على خير وضج البيت بصوت الهلاهل خوات الشيخ وزوجة اخو ورحاب وريمه
ام علاء كامت تبجي وحضنت بنتها باركتلها وهي تبوس بيها .
ندى بوستها وباركتلها ..صيري سباعية. كومتها وراحن كعدن يم النسوان.
اجن خوات الشيخ وباركن والفرحة مبينه بوجوهن
والشيخة كامت تبارك بثكل باستها بخدها ..مبارك
الزواج.
ردت هند بصوت ناصي ..ربي يبارك بيج ..ام لينا وبنتها كاعدات يسولفن ويه الشيخة الي درت من ام لينا انو اصلهم من الجنوب من البصرة وبقت تسولف
وياها .ومن صار العقد باركن لهند ولينا ناصبة عليها ..اي عيني بعد شيحاجيج مرة الشيخ ااااخ هنيالج
ابتسمن خوات حسان وردت امال ..يااا صدك تحجين
ميكون خاطرج الا طيب عدنه بعد شيخ اخطبج اله
بس مو شيخ ابن اخو الشيخ هههه عائلة شيوخ
..استحت لينا وخدودها صارت حمرا..
تدخلت ندى وهي تحظنها ..عوفن بتنا خجلتنها
ناصبات عليها …حجت امال..لا والله عبن دخلت مزاجي وحبيتها اريدها تصير قسمة حمايه
هو ضابط بمكافحة الارهاب حلو مرتب بالعباس
يلوك لبتكم .
ندى تفاجأت هاي صدك تحجي اشو صكع وكع تريد تخطب معقولة اكو هيج ناس ..دحكت على لينا
الخنست وكعدت على جهة هههههههه يااا هاي شبيها
عود لسانها يلعلع علينه هسة انكص ههههه والله لكيت اليسكتج انصب عليها بموضوع الخطبة .

يم الرياجيل الكل بارك لحسان تقرب علاء وسالمه
_مبروك عليك اختي دير بالك عليها .
حسان بداخله حيل مغثوث منه ولو بيده يكفخة تكفخ مو حسان اليرضى بالصار لان يعتبرها اهانة
رغم بينت السالفة للزلم انو علاء ميكدر يفارك اخته ومن هالسوالف الماصخة بطارف شفايفه بينت بسمته وعصر ايد علاء وهو يسالمه …ان شاء الله.
رد عليه علاء من سحبه من ايده بقوة وحظنه جدام
الزلم الي باركولهم وبقوا يمدحون بعلاء لان بينلهم
السبب الخلا هيج يتصرف هو خوفه على اخته
شاورة بأذنه ..والله اذبحك اذا اذيت هند.
حسان خزره وعض شفته حيييل ..مراح ارد عليك احترام لحجي راشد

صاح الحجي من الباب ..يابة العريس يريد يدخل

هند من سمعت صابتها الرجفة ودكات كلبها تضرب
حيل .
دخل حجي راشد ويا الشيخ سالم وحسان سلمو
واتقدم الحجي وجر بنته وحضنها باس راسها..مبروك
يعيون ابوج .
حجى الشيخ ..انطينه مجال البنت بنتنة صارت
وخر ليغاد خل اشوف بنيتي ..هند استحت من الشيخ اول مرة اتشوفه بس مبين عليه حنين من صوته باس راسها وهي دنكت على ايده وباستها
ضحكلهاوحب يمازحها ..يابوووي هاي شلونها جنها
كمر يضوي
ارتفعت التعليقات بين النسوان والحجي ضحك
كل هذا وحسان واكف ينتظر الشيخ يحن وينطي درب يسلم على عروسته
سمع ابوه ..تعال يشيخ كرب هان مشى حسان برزانة
جان حيل هيبة او وسامة بالزي العربي دشداشة والغترة بيضا والعكال والعباه السودة الخفيفة المذهبة طالع يجنن ..
تقرب على هند الجانت تعصر بايديها وانصدم من شافها وبقت عيونه محاوطتها قرب وباس كصتها..بلع ريكه وباركلها.
مبرووك .
حجت بصوت يادوب سمعه..الله يبارك بيك
الشيخ كال ..يابة بعد انتوا لبسوها الذهب واحنه رايحين يم الزلم شوي ونطلع للناصرية …
الحجي كاله يبقى وثاني يوم يرحون بس ماقبل لان شيوخ وياهم واتفق يرجعون سوا

هند انسطرت من رفعت عينها ممتقصدة وشافت هالحسان هذا شنو غضب يبوووو شلون صاك وانوب اللبس شكد لايك عليه
نصت راسها وصفنت على ايده سماره حلو اكثرشي حنطاوي والساعة المبينة بذاك السعر والمحبس شكبرة فصة ازرك .تنهدت واتمنت تكون بحلم وتفز
انتبهت لندى وياها وحدة من خوات حسان فتحن علب الذهب حسان بس لبسها الحلقة وهي لبستة بالكوة جانت ايدها ترجف وهي تلزم اصبعة بطارف
ايدها .
مقبل يلبسها باقي الذهب صاح ليلى اخته الجبيرة
..لبسيها انه اروحن …
كام وخلاها وحدها انتبه للشيخة الي تقربت وباسته بخدودة ..مبارك يمة الله يهنيك
نزل على راسها وباسها وابتسملها
ويبارك بيج يبعد روحي ييمة
ام علاء ورحاب باركن والبقية هنن بزواجه

ليلى وندى لبسن هند الذهب الجان شي فخم تخم واساور من الثكال ومحبسين

اتفقت ام حسان ويه ام علاء تحضر هند باجر يرحون يحللون حتى بعدها يعقدون محكمة وطلبت يجهزن البنية لان راح يرجعون بس يبقى حسان ابيت عمه عدنان الساكن بغداد .
_ان شاء الله عيني لاديرين بال والله يتمم على خير..
سكتت الشيخة بداخلها ضايجة بس شتسوي لخاطر ابنها تدري بي كاعد يماشي ابوه ..بس البنية مبينه زينة شكلها حلو بس الجمال مو كلشي ايييه الايام
والعشرة تبين معدنها.

ورى العقد بقوا يسولفون كلمن يطلعله سالفة اترخص
الشيخ وطلعوا التفتت امير لحكيم ..اكول سيدي
انه راجع للفوج بس ارد اسأل على امر النقل

_لاتهتم انتظر مكالمة من سكرتير الوزير بعدها اخابرك

_الله يحفظك سيدي .

طلعوا يتشكرون من حجي راشد وملكاه الحلو وضيافته وتقديره الهم .

بالسيارة صاعد حسان ويا ابو وامه والبنات وخالد راح بسيارته هو وزوجته وابنه
حسان ساكت بس ايدة تعصر بستيرن السيارة محد حجى حتى الشيخة تعرفه ضايج ومن يضوج يصير نار.
ومن طلعو خارج بغداد صاح بحركة انه انحط بهيج
موقف وجدام الشيوخ والسادة والحسين محدن وكف بعيني غيرك يابة والله جان عرفت شلون اندمة على كل حجاية حجاها مدري على شنو شايف نفسة
من طز برتبتة وبمنصبة لا ويهدد اذبحك اذا أذيت
اختي انعل ابوك لابو اختك ابن ال..زمخ بي الشيخ …حسااان بسك حجي وانتبه للطريق ..بعدين احنه مو اتفقنه تبقى ابغداد تحللون وتعقد محكمة
_مالي نفس غير وكت اريد ارجع للبيت .
الشيخ مالح وياه يعذره لأن السواه علاء بيهم شي جبير بنظرهم وبعدين تلافى غلطته وبررلهم بس بقت تخبيثة الخاطر تحز بنفسهم .

_يلا كلها تساهيل من الله يوليدي
امال وليلى يتبسبسن خاف يسمعوهن ..خطية حسان
حتى من ضوجته ما كعد وي عروسته
ردت ليلى ..شفتيها شلون حلوة
_اييي وشكد مايعة كولة الشيخة
_هههه الله يستر من امي من ميعجبها احد .

ابيت راشد بعد مصفى البيت حتى ندى راحت بعد ما نظفن المطبخ وغسلن المواعين وساعدتهن لينا
وامها ..دخل الحجي وعاط بعلاء الجان كاعد بالصالة ويزن بحظنه يلعب بموبايله ..ولك شلون هيج تتصرف طيح الله حظك هذا العلمته الك والله كل شوي اكول راح حسان يكوم يمدك بالكاع ولك انته ماتعرفه شكد نفسه عزيزة وشكد عصبي….الشيوخ والسادة مو بعينك ..عبالك صرت نقيب بالاستخبارات تاكل العالم
شنو هالغرور والله صدمتني ولك شجاااك
علاء حط ابنه عالقنفة وكف ورد على ابوه اني من البداية مقابل والله على اعصابي ياناس افهموها.
بعدين اني مو مغرور ..
زمخ بي ..امشي من يمي ترى كلبي مشتعل عليك.
هدأتة ام علاء ..ياعيني هسة ضغطك يعلك بعدين الحمدلله مشت الامور على خير .
كعد عالقنفة ونزع رباطه وسترتة ..وينه هند
_صعدت لغرفتها شو تبين ساكته .
والله خلفتج يصعدون الضغط شفتي عافني وصعد لغرفته..
ياعيني مايريد يعصبك وصعد
_والله خلفتج يصعدون ضغطي
_من الدلال الشافو ميعجبهم العجب
_انتي دللتيهم
_ياااا شوف الرجال شيكول هو منو الدللهم غير انته.
ايييه شسوي بعد يلا الحمدلله.
التفتت على يزن المندمج بالموبايل وسحبه ..ولك
جدو نظرك راح يقل من ورى الموبايل هذا وين راح وعايف موبايلة بيد يزن جم مرة كتله لاتعلمة عليه.
يزن كعد يبجي يريد يكمل اللعبة والحجي كاعد ينطي محاضرة ههههه
_جدووو اريده
دخلت ريمه شافته يبجي ويرافس عالتخم ..تعال حبيبي نسوي سبح وانام يلا يزوني
يزن طنكر الا الموبايل وبقى يبجي زكح بي الحجي
_انجب ولك ..شو تعاي ريمة اخذي يلا
اخذت ابنها وصعدت لغرفتها
من دخلت سالها علاء من شاف ابنه يبجي ..ليش تبجي بابا
يشاهك ويبجي ..جدوو الموبايل جدوووو
اخذه وسكته تعال حبيبي شوف شنو عندي فتحله البلازما وطلعة طيور الجنة ..التفت على ريمة ..بعد ابويه معصب
_لا هدأ شوي ..يلا حبيبي محتاج شي اريد اسبح يزوني وافوت اني هم للحمام
بقى صافن عليها دنكت والتهت اطلع ملابس يزن
من تكملين تعاي يمي وغمزلها
ابتسمتلة وشالت يزن تسبحه.

بغرفة هند بعد ما بدلت بتراكسود وردى ربع ردن
كعدت متربعة على الفراش وتعيد بعقلها الصار
تفاجأت بالعريس متوقعت كشخة وجمال ..بس بعدها خايفة ومرتبكة ..زين شلون راح اشوفه باجر يربي والله انحرج انوب هو مدري ليش هلكد شخصية وشايف روحه يوووو هسة يجينا من الصبح

هند تحجي ويه روحها متدري بحسان رجع للناصرية
وقرر يماطل بعقد المحكمة عناد بعلاء .