قصة روابط للكاتبة |جوهرة السلطان

الفصل الثالث عشر

التزمت الصمت لأن حيل خايفة ومرعوبة هسة يلا وعت انها راحت بنص ناس متعرفهم وحياة ممجربتها غريبة عليها وهذا الخوف زاد من وصلوا للقرية شافتها بساتين ومزارع وشارع تبليط وبقت عينها عالبيوت المتباعدة تفاجأت بيها مبنية عالحديث وبيها قديمة تصورتها قرية تعبانة سمعت ابوها مرة يكول القرية بأسم الشيخ عمران يعني جد حسان انتبهت لحسان كعد يحجي بموبايلة احدث موديل ..يلا وصلنا صلاح ما وصيك افتح البوابة كلها من اوصل اطبب السيارة
ذب جهازة وحاجاها..راسج مترفعي الزلم تارسه الشارع والمضيف وغطي روحج زين
كلبها كام يضرب بضلوعها من شافت الجوادر ناصبيهابالشارع وشافت بيت الشيخ بيت كلش جبير وبصفه بيت شوي اصغر منه توقعت هذا البيت الراح تعيش بي حسب كلام ابوها حاجت نفسها ..شنو هاي عازمين امة محمد كلها .والاغلبية شايلين سلاح ويرمون من شافو سيارات الزفة وصلت
حسان يريد يدخل بسيارته جوا ميريد عروسته تنزل
والزلم واكفين يم باب الجادر ويم البوابة الجبيرة

ميحب تصير فرجة رغم ممبين شي منها مغموته
بس بياضة مبينة هو الامرهم الجوادر تنصب بعيد شوي عن البوابة الجبيرة لان جان حاسب هيج شي
من شاف ابو الشيخ واكف بنص البوابة المفتوحة مثل مطلب من صلاح يفتحها درى بأبو شيريد يسوي
صاح وهند فزت ..لاااا ياشيخ هسة وكتها
وكف السيارة كدام البوابة همزين السيارة مظللة
هذا ابو يفاجأة بسوالفه ..ابقي لاتنزلين
نزل على ابو واشتغل الرمي هند خلت ايديها على اذانها وطخت راسها جوة خايفة وتحاجي روحها ..مخابيل شنو هاي ماما عيني الحكيني
عبالك حرب
انوب هذا وين راح وعافني
خطية رجفت رجيف جسمها كله يختظ

حسان رفع ايده للزلم يتشكر منهم وراح للشيخ الي حظنه حيل وباسه وجان يشمه من خده وحجا بفرحة ..مبارك يبوك مبارك
باس راس ابو ودنك على ايده وباسها ورفع راسه
وحجى بهمس يابة ادري بيك شراح تسوي بس خل ادخل السيارة للبيت
_لا يبوك مو كبل ما البس مريتك عباة الشيخ.
حسان نطت عيونه ..يابة ماريدها تنزل جدام الوادم
افهمني يبوي
تنهد الشيخ يدري بعصبية ابنه وغيرته على عرضة
_طبب السيارة بس لاتبعد اريد الوادم يعرفون قدر ومنزلة مرتك ويحسبولها حساب عبن صار احترامها
من احترامنا .
دخل حسان بسيارته وكف بالطرمة ونزل التف للباب ينزل العروس الجسمها يرجف من الرمي الشغال

مد ايده ولزمها حس رجفتها مو طبيعية وطمنها..لاتخافين يابة ليش الرجيف
وكف حاجز من جهة البوابة المفتوحة ميريد احد يلمحها همستلة من صار قريب حيل عليها ..عفية خل يبطلون رمي والله انثولت.
ضحك ههههه شني السالفة مسامعة صوت رصاص
تقدم الشيخ سالم ونزع عباته وحطها على كتوفها
وباس راسها ..هلاهلا ببنيتي بالمبارك بالمبارك
دنكت وجرت ايدة باستها وهي مبهورة من الحركة السواهة الشيخ لبسها عباتة دليل على احترامة ومعزتة الها هالشي رفع من قدرها جدام الكل
تسلملي عمو الشيخ ربي يبارك بيك
حست بقلب الشيخ الطيب واهتمامة بيها عكس ابنه طول الطريق بس حجه كم كلمة
صاح الشيخ ..جيبوا الذبيحة
ومددوا كبش جبير يم رجل حسان ومرته ونحروا
بعدها اخذ العروس ومشى بيها للبيت
تلكتهم الشيخة والنسوان بالهلاهل وطش الجكليت فشخنهم
الشيخة تفاجأت وهي تشوف عباة الشيخ على متون العروس باستها ..مبارك مبارك وحظنت ابنها مبارك يشيخ الله يسعدك ويهنيك باس راسها وايدها
وهمس بأذنها دير بالج عليها شوفيها شلون تتراجف
ابتسمتله ..تطمن يبعد رويحتي

هند من عافها حسان حست بغربة وبقت كاعدة على تخم بالاستقبال ومدنكة راسها النسوان محاوطاتها
وهي شوي روحها تطلع من الخوف والتعب جانت تريد وحدة من اهلها وياها اقلها متحس روحها غريبة
بس شلون بعلاء وعنادة سوالهم هوسة وحلف عليهن
ميرحن على اساس راحت عمة رحاب وماما ودو جنط الملابس قبل كم يوم وعمة رحاب وندى زعلوا عليه
بس موصلوها لبابا
حسان راح يتمشى بالممر اليوصل لبيته وطلع من جيب السترة مفتاح فتح باب الكليدور ودخل صعد عالسريع سبح ولبس الزي العربي دشداشة وشماغ ابيض ثبت العكال على راسة ولبس محبسة وساعتة وغرك روحه بالعطر بعدها راح للكنتور وطلع عباته
االسودالخفيفة لونها اسودعدل روحة عالمراية ومد ايده يمسد بلحيته وجت على بالة هند اكيد هسة طافرة روحها من التعب والخوف هههه يلا خلها تتعود

خطية هند ميته تعب وجوع مقبلت الصبح تتريك
ومن رجعت من الصالون قبل الظهر اجو يزفوها من وكت حتى يلحكون وراهم طريق للناصرية
وزين وصلوا الله سهللهم من الازدحامات قبل المغرب
تشوف الكل فرحان ويتراكص ليلى اخت حسان نزعتها الكاب وعباة الشيخ صفطتهن وخلتهن على جهة شاورتها وهي ترتبلها تسريحتها الي شوي ارتخت لان طريق ولابسة الغطا …ادريج تعبانة وجوعانة قبل ميصبون العشا اخذج لبيتكم ترتاحين
قبل ميزفون الشيخ والعشا اخلي بالغرفة تتعشوون سوا
رفعتلها عينها بقلق وهى تبالع بريكها ..شوكت يزفوه
_ههههه ارتاحي حبيبة فد شوي ورى العشا

الشيخة تحجي على امال بصوت ناصي..ولج انتي واختج مو رحتن وياهم اشو ماهو لا عمات العروس لا مرت اخوها جاا يتركن بنيتهم هيج يوم محدن
يجي وياها.
_مدري بس خطية هواي بجن وراها
عدلت كعدتها على كرسي التخم ورفعت حاجبها معاجبتها السالفة..ايييه خير ان شاء الله
_يمه عليج العباس شلونها جنتج مو تخبل شلون خلقة يربي .
خزرتها …كووومي ليغاد مني لا بالعباس افشلج جدام النساوين
تدري بامها كاتمة غضبها متريد تسوي سالفة جدام العالم تبين للكل فرحانة بس بداخلها مراضية عالزواجة كامت وهي تتبسم وراحت يم عروس اخوها حجت وياها تشاقيها ..اسمعي المهاويل والهوسات كلها فرحانة بعرسكم جا شمالج انتي
يلا حبيبة تبسمي وداعتج تصفى سوالف وادكومين
تتضحكين على نفسج من تذكرينها
هند رسمت بسمه جذابية على وجها لان تشوف الكل عينهم عليها
بس هي تعبانة ومطايقة روحها وتالي شوكت يحسون بيها ويودوها للبيت ترتاح تحس رجليها
تيبسوا من الكعدة
جتها ليلى الي قبل شوي خبرت امها حتى تودي العروس للبيت لان حسان خابرها قبل شوي كاللها خل ترتاح وراح يدز مفتاح البيت بيد ابنها ..يلا عيني كومي نوديج لبيتج تنورينة
تنفست الفرج ااااووووف اخيرا كامت وليلى ساعدتها
شالتلها البدلة من ورى وعدلتها صارت الشيخة بوجها
ولزمت ايدها يلا حتى ترتاحين بغرفتج
والتفتت عالنسوان من رخصة الحبايب بنيتنا تعبت تدرون الطريج طويل خلن تاخذ راحتها
ردولها جم مرة كبار بالعمر ..زينة العكل وحدة منهن ردت يشيخة مبينة
تعيبانة خلنها ترتاح كبل ميدخل رجلها عليها وياخذها
التفتت هند لامال وسألتها..وين ياخذني
??????
وهناك اطكها امال بضحكة خلت الكل ينتبه عليها
وجرتها من زندها ..امشينا امشينا يالفاهية شلون ادبريها بعد شوي .
استغربت هند حجيها هاي شبيها تضحك وادردم
ضاجت لان مردت عليها
امال اعتذرت من شافتها هيج شاورتها وبسمتها على وجها تشع ..العجوز قصدها ياخذ عذريتج
لطمت حلكها ..عزززا شكد عيب هيج تحجي كدام النسوان
_جاا الوادم كلها تدري الشيخ حسان راح ياخذج بعد شوي
خافت هند اكثر لا عفية والله مااخلي اني كولش تعبانة بس اريد انزع البدلة واسبح وانام.
صفنت بوجها هاي مبينة راح تشلع كليب اخوي
جنها متتحمل شكد نازكة
اخذنها بعد ما حطو الكاب على راسها ودخلو البيت حسان الي هو بصف بيت الشيخ لزك
دخلوها للبيت وكولش عجبها مرتب واثاثه حلو وكله جديد من دخلت للغرفة تفاجأت بضخامة الاخشاب والترتيب مجانت تتوقع تلكى شي مرتب وحلو بس التشوفه عكس توقعاتها كعدت عالجرباية المفروشة بفرشة بيضة تخبل تنفست بقوة وانسطرت من العطر التارس الغرفة .
انتبهت اليلى وهي تشيل قاط حسان وتعلكه بالكنتور..هاي جاي مبدل وطالع

الشيخة طلبت من ليلى تروح تجيب العشا وتحطة بالمطبخ فراحت ليلى وبقت وحدها
_هذا بيت شيخ حسان وبيتج كل الاريدنه تسعدين ابني الشيخ ومتخلين يلوحه تكصير
انتي صرتي بنتنا تتصرفين مثلنا
وتسمعين حجايتنه اطيعين شيخ حسان واتصونينه
هسة انتي مرة الشيخ وكل جلمة وتصرف ينحسبلج

هند متفاجئة بحجيها محبت تردلها مرة جبيرة وام زوجها هزت راسها خفيف
_ان شاء الله

طلعت الشيخة وسدت الباب وراها..
اوووف اووووف
مدتايدها ونزعت الغطا من راسها وشمرته عالقنفة الكبالها جانو مخلين نص تخم وطبلة

تفتر بالغرفة ودحك بالاثاث وهذا كله مو بعينها
روحها طكت ياربي شلون راح اكضيها وياهم
مبين الشيخ كولش حباب هو وبناتة بس ام حسان
متتحاجى ميعجبها شي حمدت ربها بيتها وحد لان تخاف منهم .
راحت وكفت كدام مراية ميز التواليت رتبت تسريحتها وعدلت مكياجها انخبصت من الطريق
رجعت تريد تكعد ولمحت سيت نوم ابيض عزا هاي
ليلى هسة طلعته يبووو شكد عيب انوب شلون فضيحة كله خفيف اااخ هاي سوالف ندى وريمة
بقن يلحن تشتري ملابس نوم فضيحة خرب ببسليهن
ولا البسه جرته وكعورته بيدها وشمرته عالقنفة

ورى فترة تسمع الهوسات بدت تتقرب انوب عافوها وحدها وهي اصلا خايفة وماحست الا الباب تنفتح
ويدخل حسان بهيبته كلبها وكع جرت نفس وذبته تقرب منها شكد لايكله العكال والغترة مد ايده وكومها بقى يدحك عليها عيونه محاوطتها ..نورتي
بيتج.
رفعتله عينها والخجل موتها لان وحدهم بالغرفة
وردت بادب وصوت هادىء ..نورك هذا
ابتسملها ..يابوية شنو هالصوت الحلو
ايده جانت تتلمس ايدها وصعد بيها لكتافها البارزة من البدلة حاجت روحها..ياربي ليش هلكد حلو
وانوب شلون كشخة
مد ايده ولامس شعرها وبدى ينزع الماشات نزل شعرها الناعم علىكتوفها وايديه تلعب بي مد ايده رفع حنجها وقرب راسه يريد يبوسها شهكت وبعدت عنه بس رجع سحبها وثبتها من زندها..ليش تخافين
انه مااذيج
ترددت تحجي تخاف منه
_شبيج ليش صافنة
_اني مااعرفك زين شمدريني شراح تسويلي
دحك بوجهاوعقله يوزن حجايتها هاي طلعت تخاف منه
طمنها..لاتخافين ادري عليش متوترة خيالج مصورلج
الليلة افترسج ورفع تك حاجب مو هذا تفكيرج.
نزلت راسها لان كدر يقرا داخلها

فكرت ويه نفسها تتكلم ويا ليتفهم خوفها
رفعت راسها وحجت برقة ذوبت قلبة..عفية ارحم بحالي واتركني الليلة لان كولش تعبانه وسبلت عيونها مستحية
تنهد حسان المرة خايفة وتعبانة ومتريدة يكضها
والناس البرة ينتظرون يظهر رجولتة شنهاي وانوب
انه شيخ امشي ويه التقاليد بس هاي خطية شنو ذنبها شوي وتنهار من الخوف والتعب ميريد يعاملها
بهمجيةليشبع غريزته يابوية شكد نازكة الخاطر الله
داعب خدودها البيضة الناعمة..زين بشرط
عيونها تتسائل شنو شرطه
_اريد بوسة وحدة من هالشفايف الدمار
استغربت معقولة وافق بسهولة وهي الجانت متهيأة
شلون تصده بس هو فاجأها يووو بعدين وين السهولة يربي شسوي شنون احراج
_هلكد صعب الشرط مالتي
غمضت عينهاوهمست ..موافقة
حظنها حيل وشفايفهم التقت جانت حيل مرتبكة وخجلانة بس باسلوبه الحلو خلاها تهدأ وسيطر عليها حس بيها تبادله البوسة ونست خوفها منه
فزاد ضغط جسمه عليها دوخته وحس روحه راح يفقد عليها بعد ميتحمل اكثر بعدها عنة فجأة حتى تتنفس شاف عيونها شلون تغير لونهم العسلي
لمس شفتها المنفوخة وهو يتنفس قوي …بعدج خايفة
استحت حيييل ومردت عليه
تركها وكام ينزع العباة وغتره والعكال..ارتاحي هسة
لاتفكرين
ممصدكة التسمعة معقولة هيج يعاملني بقى بالدشداشة التفت ..غيري ملابسج واسبحي
وتعاي للمطبخ نتعشا لان ميت جوع ممتعشي

حجت بهمس..اي بس اسبح وين الحمام
_من تطلعين من الغرفة بنهاية الممر موجودة الصحيات
مشت للكنتور وطلعت دشداشة سمائي فاتح وبيها ورد ابيض قصيرة وردانات نص
طلعت وهو يراقبها شلون تجر بالبدلة تنهد ..يابوي شيكضيها الليلة
ورى ماسبحت وحيل ارتاحت بالسبح طلعت حافية من الحمام نست اطلع تكرمون نعالها دخلت وشافت حسان كاعد عالقنفة دنكت راسها وخدودها جمرن
لان البوسة بعدها ابالها مدوختها خلت عطر وبدت تسرح شعرها وحسان صافن على جمالها ونزاكتها
مد ايده ورفع شعره ومسد لحيته الناعمة ينتظرها تخلص متحمل كام وكف وراها وحظنها جفلت وكع المشط من ايدها شاورها باذنها وانفاسه تحركها
..طعم شفايفج بعده مجاي يروح
رجفت ايديها وهي تحاول تسحب روحها من حظنه
_ااا عفية جوعانة
_اوف يخسى الجوع
امشي للمطبخ جرها من ايدها وراحوا يتعشون
جانو مخلين صينية عالميز ومغطيها
_اكعدي يابة ترى الجوع كافر
_ابتسمتله وكعدت بصفه صفنت عليه شلون رفع رداناته وجر الغطا وبدى بالمواعين يقدملها
_بالبداية استحت بس هو معافها كل شوي مسويلها لفة من المشاوي والخضرة والزلاطات
اكلي ليش بطلتي
_دايمة ان شاء الله هواي اكلت
_عافيات
_ربي يعافيك
_هند ملاحظة متكولين اسمي
استحت ..مو قصدي اسفة
_عليش الاسف ابوي انتي تعرفين اسمي لا
_حسان
_هههههه ايييي
استحت يووو شبي هذا
سويلي جاي تعرفين
صفنت عليه شنو هذا شسامع عليه
_يلا محاجة تتعلمين بعدين
كامت وراحت على رفوف الكاونتر تفتح بيهن ادور القوري
وعجبها الكاونتر حلو موديل تركي بيجي وصاجي
لكت القوري وعلبة الجاي
خلت شوي مي لان بس هو حيشرب وحطت خاشوكة جاي وخلته عالطباخ ليفور
رجعت عالمواعين وبدت تضم الاكل الزايد بالثلاجة
وحطت البقية بحوض السنك تجلفهم
بقى صافن عليها مبين تعرف هاي بس لازعلت
تقرب يم السنك ..مرتي مبينة معدلة
التفتت عليه..عبالك مااعرف مو
ضحك وهو يحجي ..تردين الصدك شفتج نازكة
كلت هاي المايعة متعرف كلشي
عضت شفتها ..راح افاجاك

بعد مشرب الجاي صاحها تعاي للغرفة لاتبقين هنا
مشت وراه شافتة راح للمغسلة بنهاية الممر كام يتوضى
يووو نست صلاة العشا اعوذ بالله من الشيطان الرجيم

راقبها شلون تفتر والدشداشة لايكتلها راحت طلعت
حجاب الصلاة والمصلاية شافتة مد سجادة الصلاة وبقى واكف ينتظر
لبست حجاب غطاها بس وجها طالع يضوي بقت صافنة مترددة التفت عليها ها يابة اشوفج صافنة
تعاي جاي يمي لنصلي ليش مترددة.
شبيها هاي …شني السالفة متردين تصلين وياي
عيونها حاوطته تريد تعرف رد فعلة ..اصلي بس مثل متعودت
رفع حاجبه ..اهااا وهذا المأخرج جنج كلتي ميقبل.
هزت راسها وبعدها عيونها ادور جواب
مدلها ايده تقربت ولزمها يطمنها بقى يدحك بوجها
شكد حلوة بالحجاب وجها منور ..هند تزوجتج وانه
ادري انتي سنية وانه شيعي وهسة انتي بحمايتي
ومسؤلة مني نعتبر شخص واحد الياذيج ياذيني
خطية هند متحملت كمية الحنيه والاهتمام بصوته
ومنا تحس بالغربة بس من سمعت كلامه وياها بجت
فحظنها ..ياا صدك تبجين
رفع راسها ومسح دموعها ..يلا يبوي خلن نصلي

بعد ماكمل صلاة التفت عليها شافها تسبح باصابيعها
حط ايده على راسها وبدا يدعي دعاء ليلة الزواج.

تصرف حسان لمس روحها وخط بقلبها اول سطر من
حياة تربطهم سوا..اثبتله كول وفعل رجال شهم يحترمها ويحترم مبادئها ابوها صدك من كال شيخ معدل صاحب نخوة
شافته طبك السجادة نزع دشداشته وعلكها بالزاوية واخذ كلبية بيت لونها رمادي لبسها وراح تمدد عالفراش نزعت حجاب الصلاة وتقربت مترددة وكولش مستحية
تريد تكرمه وتقدم نفسها لرجل يستحق يكون زوجها
رغم متعرف عنه الا شي قليل بس هو عاملها بشهامة
مو كل الرياجيل هيج يتصرفون بس شلون ياربي والله استحي اعرض روحي عليه عزززا شكاعدة اسوي اني لاااا استحي انتبه عليها ورفع الغطا تعاي نامي تعبانة انتي
مددت وخلت راسها عالمخدة تنهدت بصوت مسموع
وقربت جسمها عليه بدون قصد منها
دحك عليها بشك وحب يسألها وهو يسند جسمه على ايده..مرتاحة
هزت راسها..اممم
وابتسمتله ابتسامة حلوة
عضلها شفته وتقربلها شاورها وخلا خدودها تحمر
وصابتها رجفة
صار فوكاها وعيونه بعيونها اطمني لاتخافين

حسان جان كولش حنين وياها بينلها اهتمامه بيها وحسسها شكد تهمة رفع معنوياتها وانترس كلبها
راحة
جان صبور حيل بتعاملة عاملها برقة ممتوقعتها
وكدر يزيل حاجز الخوف والتوتر لمس احساسها
تجاهة وتصرفها هسة اكبر دليل انها تريده

???????