قصة روابط للكاتبة |جوهرة السلطان

الفصل السابع والعشرون

بقلمي : جوهرة السلطان*

*******

التهت لينا هي وامها يجهزن للعرس ندى طلعت وياهن مرة وحدة لأن حملها متعبها متكدر بس رحاب
ماقصرت وياهن ساعدتهن بكلشي وهي ذوقها حلو
نصحت لينا تشتري نفانيف وتنورات بس
لينا اعترضت بالبدايه لان هي تحب تلبس بناطير
وقليل فساتين بس ام ريمه نصحتها تاخذ ثياب
وتنورات واكثر شي كلبيات لان فهمتها حسب كلام
هند ميقبلون طبعهم نحس .
امير زارها مرة وحدة بالبيت ومكدر ياخذ راحته
لان حمادة بقى كاعد يمهم رغم شكد حاول يدعبله
بس لزك على كولة امير .
بوكتها سألها اذا محتاجه فلوس فهمته النطاهيا تكفي
بس مقبل طلع من جيبة ونطاها كللها ماريدج محتاجه شي.

قرب موعد العرس وام جعفر تحضر هي وعبير جابها جعفر من الناصريه تبقى ويه امه تساعدها هي وامال

لان بوكتها من راحت لاهلها ابو جعفر هو ومرته من الصبح دخلوا بيت الشيخ يرضون امال كلهم كعدو
بالاستقبال الشيخ سالم وحسان كالو بكيفها منريد
نغصبها ابو جعفر طيب خاطرها خو ام جعفر تتخبل
عليها .
الشيخة عالية ردتلهم..هو حلف متصيرله مرة يعني
بحساب طلكها .
ام جعفر ماعجبها الحجي ..بسج يم حسان بنيتي واريدنها لاتكدرين خاطرنا.
_جا من ابنج كدر خاطرها ماتردونه نحجي .
امال درت امها ماتخليها ترجع والشيخ كال بكيفها
بنيتي مااغصبها .
طلعو من بيت الشيخ خاطرهم متكدر ويحجون على
عامر الجان متندم على حجايته الي بسببها راح
يخسر حبيبة كلبه .

…..
حسان ما حجى الصار يم اهله هو بي طبع ما يحجي
وميحب اللغوة .هند كملت شغلها وراحت للبيت الجبير مثل متسمي سلمت على امال الجانت كاعده عالميز بالمطبخ توكل حسوني.
دنكت وباست حسين ..فدوه للحلو اليوم منورنا
كعدت يم امال الحجت..جا غير بيت جده .
هند والابتسامه بوجها..طبعا عيني شعدنه غير عموري وحسوني.ربي يحفظهم لو تشوفين حسان
شكد يحبهم .
ابتسمت امال بحب..بعد كلبي اخوي .
التفتتن لام حسان..زين شوفتينه وجهج
ردتلها بكل تهذيب..هلو عمه شلونج .
كزت على سنونها ..زينه
متريد تنصدم بالشيخة لخاطر حسان وعدته تحترم
امه وراح تسوي اي شي في سبيل ترضيه
رجعت تحجي ويه امال تسالها عن احوالها ..
امالةحجتلها السالفة .
زكحت بيها الشيخة..ولج منين جايبه هالطبع متضمين سالفة .
امال تفاجأت ..يمه هند سألت على احوالي وجاوبتها
ردتلها..مالها داعي كلها تعرف سالفتج.

هند تحس الشيخة تعاملها غريبه فعلا هيج تعاملها
بس لازم تتعود وتقوي روحها لاتضعف .

كعدت الشيخه عالقنفه ..صارلج شهر ونص متزوجه
تعلمتي طبخ صار تتعلمين الخبز.
هند تفاجات..حسان شكى مني اشو يحمد طبخي دائما.
خزرتها..جاا تعلمي الخبز
رمشت هند مستغربه..اني مااعرف ابيت اهلي نشتري
من الافران .
ردت الشيخة..هنا تتعلمين كلشي تتعلمين عوايدنه
لا عبالج تكعدين مسعده وتردين يخدمنج شو الحلال
الفلح كايمه بمداراته اللبن والخاثر يجي ليم حلوكجن
بس عليجن شغل البيت وما فالحات بي.
وسمر وراها شغل جثير مو تكعد تخبزلج.
اعتمدي على روحج.
امال من شافت هند مقهورة من حجي امها ومرتبكه
لان تعرف امها من تريد تهين واحد…يمه ترى سمر
موش بخاطرها هاي السالفة هنه كرصتين ثلاث من تخبز تناوشها يعني الا هند تتعلم تخبز يله تصير معدله.وخطيه البنت ماتعرف .
زمخت بيها..انجبي ولج انه اريدنها تتعلم كلشي
وهنا مو خدم الها .
هند كامت وكوة لازمة روحها..محشومين مقامكم
عالي واذا ضايجه لان مااعرف اخبز اوعدج اتعلم.
طلعت لبيتها والدمعه بعينها .
يعني شسوي حتى ترضى بكلشي ورزلتني شنو تريد
اتهججني بس والله لا اشوفها هند منو.
بقت تفتر بالمطبخ ..شلون اخبز هسه اتصل على ماما
يربي ماريدها تعرف بمشاكلي
اتصلت ورى شوي جاها صوته..هلااا والله
_هلاو حبيبي انت وين.
_فدوه للشفايف التحجي .انه بالسيارة نازل للسوك
شرايده كولي.
_حسان تعرف شلون اسوي الخبز .
استغرب من حجيها..شنوو شجاي اتحجين.
_السمعته اريد اخبز ومااعرف.
ردلها..اسالي الشيخة لو سمر هن يعلمنج.
_عفية حسان ماريد اترزل من الشيخة .
حسان عرف صاير شي ..سمر مو دومها تخبز ومايوم
حجت.
_اذا تعرف احجيلي .
_ههههههههه يابة انه ذني السوالف شعرفني بيهن.
حجت بضوجه ..واني عبالي تعرف كولشي.
_هذا شغلجن انه رجال شدخلني بسوالف النسوان.
_عبالي تعرف اشو المخابز ابغداد كولها رياجيل.
حسان كعد يفهمها هاي شتلح عليه انوب تعال علمني
شلون اخبز والله يربي…ابويه انتي اهنا قريه اغلب
الشغل للنسوان حتى بالزرع يطلعن يعاونن زلمهن
لاتشوفين نسوانه ما تطلع عبن الشغل الفلح يكضونه
يابه انتن مدللات ابيت الشيخ بعد شتردن .
_لعد شاسوي هسة.
واساها وكوة كاتم ضحتكه..لا ضوجين انه راح انزل
وصلت شتردين اجيبلج كولي.
صفنت بعدها ردتله..جيب وياك كميه من الطحين وخمرة.
_ادللي وبعد محتاجه غيرهن.
_لا حبيبي تسلملي.

ودعته وبقت تفكر شلون تتصرف طلعت للحديقة جان تشوف سمر اتقربت وحجت وياها..زين شفتج
اجيت عليج من سمعت عمتي شحاجيه وياج
عيني لاديرين بال والله ماعندي اي اعتراض اشو انه
بين يوم ويوم اخبز من قبل خطار المضيف مايخلص
هند لزمتها من ايدها..تعالي للبيت نسولف.
دخلن للمطبخ وبقت هند تسألها شغلات تربد تعرفها
وسمر توضحلها فرحانه لان تحب هند وعلاقتها
حلوة وياها.
……
حسان واكف على راسها يراقبها جاي تسوي بالطحين
خلته بنجانه صغيرة بلاستك اخذت كميه منىالطحين هو اشترى خمس كيلوات مو اكثر
يشوفها مندمجه تعجن بعدها كملت وغسلت ايديها
لفت العجين بخاولي وراحت كعدت عالكرسي.
كعد كبالها ..احجيلي شنهي السالفة .
_ماكو شي بس اريد اعتمد على روحي واتعلم اخبز.
ابتسملها..حلو هذا الشي بس صعب عليج وانتي ماتعرفين هاي الشغلات عجين وخبز.
حست بوخزة من حجايته بين حزن بعيونها وهي تكله..الشيخة هيج تحجي تكول ما اعرف وما بيه
فايده واني اريد اثبتلها العكس .
_صدك تحجين امي شلها غرض هي تحجي بهواي
امور ومرات تكون قاسيه تريد المرة تكون كايمه بواجب بيتها لاتخلين هذا الشي يأثر عليج انتي هيج
عاجبتني ..غمزلها بعينه وهي حيل استحت منه
ردتله..عفية حسان اني اهتم تدري ليش لانها امك
والكل يحترمها يحسبلها الف حساب وكلمتها تقدسوها واني لازم احسن صورتي كدامها اعتبرها شخصية قوية واحترمها بس هي تكرهني و..
قاطعها ومد ايده لامس خدها ..اشششش حبي لاتكملين هو زين هيج موقفج من امي بس هي ما تكرهج ما ادافعلها امي كوية ماتحب انسان ضعيف
تحب المرة المعدله بكلشي ويا رويحتي انتي لا تعبين روحج انه هيج اريدج .
هدئها كلامه وريحها..حبيبي كولش ارتاح لكلامك
واني اريد اثبت للكل اني المرة والزوجة التستحقها.
كام واتقرب عليها دنك وباس راسها وايديه على متونها شجعها بنبرة مليانه حنية ..انه راضي بأي شي
منج انتي اثبتي انج الزوجه والمرة الاستحقها.

….
العصر هند راقبت العجينه انتفخت وتريد تخبزها
تدري مكان التنور بالمخزن ورى البيت سمر كالتلها
عود صيحيني اساعدج وفعلا ساعدتها شعلت تنور الغاز وعلمتها عليه راحت للنجانه كشفت الغطا
وتفاجأت..ماشاء الله ولج هندة تخبل العجينه شلون
مختمرة حلو تعاونن بتكطيع الشنك سمر تعلمها
وهي تحب تفهم عالسريع وشغلهن ما يخلا من الضحك.
كملن تكطيع سمر حجت ..هذا الطحين خوش نوعيه
_مو بالله اني هم حسيت بي هيج من عجنته هاي
حسان جابه الظهر كم كيلو يكفي مو .
_اي اكيد انتو نفرين يكفيكم اسبوع ..بس المخزن
مليان كواني يمعودة ليش وصيتي .
التفتت هند وشافت كم كيس طحين على جهة مصفوطه .
_يلا شمدريني وانتي مكلتي هماتين.
_هههههههه ولج انه ممصدكة سويتيها والله عمي
بيج بلا كوية وعنودية تدرين عمتي هسة تتفاجىء.
ابتسمت هند وبداخلها حجت هذا الاريده .

ورى شوي دخل حسان لان الفضول كتله يريد يشوف
هند شلون تخبز ممصدك هالنزاكه واكفه عالتنور
شافها مخبوصه اطلع كرصه الخبز من التنور وخدودها حمرا .
التفتت سمر ..عيني شيخنا عندك مرة اجنن مدري منين هالعناد جايبته بس ماشاء الله شلون خبز وهاي
اول مرة بعد مرتين ثلاث تصير مضبوطه.
والله هذني الكرص شغلها ..اشرت على الكرص الخبز مخلياتهن على جهة يبردن.
التفتتله هند وابتسمت شجعها وهو يمد ايده وياخذ
كرصة اكل منها لكمه وهز راسه..عاشت ايدج طيب والله.
تحس روحها طايرة من الفرحه لان حسان شجعها
اشرت لكرصتين محتركات ..هههه هاي بس بالبداية .
ردتلها سمر هي تجمع الخبز..والله سباعية عود هاي
اول مرة وهيج.
شجعها حسان..طبعا هاي مرة الشيخ لزمن تصير معدله.
طفن التنور ويمر اخذت كرصتين ..راح اشوفها لعمتي خلن اتشوف خبزج شلونه.
هند حيل اتشكرت منها..فدوه لسمورة الحلوة مشكورة يكلبي انتي.

راحت سمر وبقت هند وحسان الي تقربلها والبسمه
تشع بوجها وكرص خدها..امووت عليج
فرحت لفرحته وهي تحجي..اريدك تفتخر بيه.
ردلها بضحكه..وانه اكلج مفتخر بيج.

مرت ايام وعامر على موقفه رغم ابوه شبعه رزايل
وجعفر نصحه لايتهور بس ماقنع.

يفتر بغرفته والشوك كتله على امال وحسوني حيل
مشتاك لأمال طلعت صدك راس يابس تدري بيه احبنها بس صوجي ذليتها من طردتها يربي انوب حلفت متبقى على ذمتي اااخ اهلي مقاطعيني مايحجون وياي بسيطه حسان انه افشل وانت تربح
وصايرلي الذكي موش انه الصغرني .

….

خيرك جاي اطلكني ..حجتها وبقت واكفه اباب المطبخ.
تريد تعرف ليش جاي يجوز اشتاق لحسوني
_اجيت اشوفن حسوني اشتاقيتله .دفعها ودخل للمطبخ.
مشت وراه..نايم مو تدري هذا وكت نومته.
كعد عالقنفة بالمطبخ..وين عمي
_طلع هو وخالد لحقل العجول
سكت وبقى صافن عليها يشوفها خازرته بعين حادة
جنها عيون اخوها .
امال مقهورة منه طردها وجاي مكابلها شنهي مايفكر
يكول مرتي شلون هيج اسوي بيها
وانوب يكللها جاي الى حسوني
ماسوالها اعتبار هاي ويحبها جا لو ميحبها شيسوي
من يومه وهو متكبر وعنيد .يهددها يطلكها بس الحلفان ما يمشي عليها سألت امها اليوم الصبح
لان شكت بروحها حامل ..الشيخة فهمتها مايمشي
عليها الحلفان بداخلها فرحانه بس متكدر خاطرها
من عامر .

عيونه حاوطتها يدحك عليها بشوك واضح ..ما اشتاكيتي .
فكت عينها ..شنهي هاي انت طردتني وجاي تسألني
مشتاكة لو لا
_امشي جيبي حسين وخلن نرجع لبيتنا.
تخوصرت ما ارجع عبن ابوي مامش
هسة اخابره لخاطر الحسين الوضع بالبيت جهنم
محد يحجي وياي حتى امير جاي يومين راح وما حاجاني.
_يجي الشيخ حسان ويصير خير
وكف واتقربلها ..لاتخبليني امشي وياي جرها من ايدها بقوة.
_هد البنية يعامر.
تقدمت ام حسان وكفت جدامه..شنهي جاي تريد تاخذها وابوها واخوها مامش
امال الحين حبله الها شهرين ماريد خاطرها يتكدر
والله لوما حبالتها جان مارجعتها عبن انت ما تصون
الامانه.
ابتسم عامر من عرف بحملها ..هاي هية حجايتج
قانون اروحن من يجي عمي ارجع غمز بعينه لامال
الجانت واكفة تراقبه شيكول.

دخلت سمر وشافت امال صافنه ..لاتكدرين خاطرج
عرف غلطه صدكيني.

…

اتصل على صاحبه يعرفه من زمان واتفق يشوفه بعد يومين ثلاث وراها راح للمزرعه يشوف الفلح سمدو الزرع لا كمل شغله يمهم وراح لحقل الدواجن يشوف
الافراخ الشتراهن قبل جم يوم صاح جاسم صاحبه
ويشتغل عنده بالحقل ..اسمعني زين انه اريدن منك
شغله كون جاهز بأي وكت.
ردله جاسم..صار تامر امر.
_خوش وراح اجازيك بس احذرك لاكون تحجي
الشغلة بينا وبس
حجى جاسم ..انه بخدمتك.

…..

امال رجعها عامر واهلها قبلوا خاصة بعد ما طلعت حامل.
وبيتةابو جعفر كملو تجهيز للعرس وامير اشترى الغرفة ونصبوها واثثها احلى مايكون طبعا بمساعدة عبير وامال .
وقرروا العرس بالقريه مثل ماسوى حسان .
امير جان عازم اصدقائه وجماعته الضباط

ولينا جانت اجنن بالعرس والكل فرحان بيها وندى حذرته من البجي لان خربتها بيوم الحنه شبعت بجي..

هند جانت رايحه لاهلها ومن تقرب عرس لينا توسلت
بحسان تبقى بس ماقبل ورجعت مابقت بس يومين
وجان حسان وياها هالمرة بقى ابيت الحجي مراح لبيت عمه.

بالحنه محد اجى من اهل امير لان الطريق وجانو مسوين حنه بالقرية..حكيم وصاهن سكو شي زين يسونه لخاطر لينا وفعلا الحنه حجزولها بقاعه
وجماعتهم احتفلن بلينا
امير جان يعد الدقايق والساعات لتكون لينا يمه
وماصدك خلصت هوسة العرس وزفوا اخيرا….
واخيرا صارت لينا بحظنه مثل ماجان يريد ….
…………

سلمى شبعت بجي ورى مازفوا لينا حكيم ماتحمل يشوفها تبجي بحركه تقرب تليها وحظنها باس راسها
وهداها بقى يحجي وياها لحد ماشوي فكت.
الكل جان مقهور على فراك لينا حتى حماده كعد كبال ام لينا مجتف ايديه ومدنك راسه.
ومن شاف ابوه حظنها وباسها هجم عليهم وكعد بحظن سلمى الاخذته بحظنه وباست راسه..يمه فدوة
لوليدي السبع.

……….

لينا جانت خايفة لان صارت تعرف امير متحلفلها
وبقت تتخيل شراح يسوي بيها .
بس امير من شافها شلون تتراجف طمنها وهو يضحك يكللها ..جا مصدك انتي يمي وبحظني راح
اخليج.اشو تعاي جاي خل اشبع منج شوف يرويحتي
وعمرى .
لينا جامت كاعدة عالكرسي التخم ومن حجى رفعت راسها وشافته شلون صافن عليها يربي شكد شايل
وسامه والنوب القاط الاسود شلون لايك عليه .
تقربلها امير وجرها من ايدها وبقى صافن عليها
بداخله فرحه لان لينا صارن مرته بقى يسولف وياها
لحد ماشافها ارتاحتله وكدر يسيطر على خوفها ويخليها ترتاح وصار زواجهم حقيقي وجانت مطيعه ما تعبته …………..

……

صرخة هند خلت حسان يفز من مكانه جان كاعد بالهول وطفت الكهرباء الحمام اظلم تتلمس بالحايط
وتحجي على روحها ليش ماجابت اللايت وياها
بعدت شعرها المبلل عن وجها ورجعت تصيح حسان
توها تتحرك زلكت رجلها وكعت بالحمام صرخت من الالم ودموعها طفرت ورجلها كامت تون عليها.
رمشت بعدما رجع الضوا اكيد حسان شغل المولدة
لو واحد من عمال المضيف .
حاولت تكوم وتلبس بس الالم موتها اااخ لو لابسه نعال جان متزحلكت.
وكفت على رجلها والالم واضح بوجها .
حسان فتح باب الحمام عالسريع يريد يعرف شبيها
_شبيج ليش تصرخين.
جان تنتر بي وهي تلبس دشداشتها البرمودا..
_عااااا اطلع شبيك متشوفني ملابسة شي.

*******

اتمنى من يقرا ينظر الى النجمه في الاسفل اضغطوا عليها للتصويت ….

احترامي للجميع.