قصة روابط للكاتبة |جوهرة السلطان

الفصل الثاني والعشرون

بقلمي : جوهرة السلطان *

كلنا العراااااق??✌??

*******
وصلو الجماعة لبيت ابو علي عدنان اخو الشيخ سالم
اصغرهم وساكن بنفس منطقة حجي راشد
نزلو يرتاحون من الطريق ويتغدون لان ابو علي جان
محظر روحه ومرتبين غدا حتى العصر يمشون
لبيت ابو محمد.

حسان جان منطيهم خبر معزوم يم نسابته والعصر
يلاكيهم من وصلو بغداد التفت لهند جانت ساندة راسها يم الجامه غافية هاي كضتها نوم ههههه
همزين السيارة جاماتها مظلل حجى وياها بس مردت عليه دغها بجتفها ..يابة وصلنه وانتي نايمه
انتبهت وعدلت روحها ..ههه اي والله ولا حسيت
من نمت.
_الله شكد اشتاقيت لبغداد ولأهلي هسة اكيد علاء
موجود كولش مشتاقتلة
_ علاء ابو خشم اليابس
صفنت عليه تدري بموقفه ويه اخوها بس متحب
اي كان يحجي عليه ..فديته لأبو يزن الصاكرهم.
طبعا حجتها كلمتها الاخيرة كشقى بس حسان
عيونه صارت بكصته وكف السيارة على جهة الرصيف التفت عليها عيونه مطككهن ..
حسان ميروح من باله موقف علاء شلون راد يقلل
من هيبة حسان من رفض ينطي اخته وكعد يتحجج
بأعذار مو صحيحة بقى ماخذ على خاطرة
وبقت كلمة علاء ترن بأذنه من كاله اذبحك اذا
زعلت اختي جان كادر يرد عليه ورد ثكيل يكسر بي
خشمه الرافعه بس بوكتها الشيخ سالم تدخل .

زمخ بيها ولج ياهو هاذ اخوج المغرور والله بعالي
سماه لوما الشيخ سالم يوكف بوجهي ياعلاء
لخليك تنسى حليب امك
خافت من عصبيته وصوته الحاد بس متقبل يحجي
عليه علاء يحبها ومتعلق بيها وهي نفس الشي
ليش من تذكره يضوج ويعصب ..حسان شبيك انت كاعد تحجي على اخوية وهو ممأذيك .
ضحك مستهزء ..ههههه شني تردين انتظره يطخني
والحسين الشهيد اخلي يزوع العافية
ترى سكتتله بخاطري ماهو خوف لو جبن
_خلاص حسان اسفة والله حجاية بدون قصد كلتها
_بسج لا تبررين رجع حرك سيارته وايديه تعصر
بالستيرن كاتم عصبيته .

سكتت هند صارت تعرفه من يعصب ميحب يحجي

وصلو لبيت حجي راشد الجان واكف باب الشارع
نزلت هند وراحت حظنته تبوس بي ضحك عليها
بابا تعالي داخل وخليني اسم عالشيخ حظنه بلهفة
شلونك وليدي اهلك الوالد صحته شلونها ردله حسان
بخير ويسلم عليك راد يجي بس خطبة امير والكل راح لبيت عمي ابو علي والعصر نلتقي ان شاء الله
ردله ابو علاء ..خير يارب لعد نروح سوا ابو محمد
وصاني لازم احضر .
دخلت للبيت ملهوفةةعلى امها ومن شافتها بالكراج
شمرت روحها بحضن امها الضحكت ههههه ماما
يعمري شكد فاقدينج بالبيت
تحظن بيها وتبوس ضحكت ام علاء ..حبيبتي ماما
هنودة شخبارج
ابتسمتلها الحمدلله اوووف شكد مشتاقتلكم
سلمت على ريمه وعمتها رحاب اجاها يزن يركض
وشمر روحه عليها ..عمه هندة
حظنته باست خدوده المتفحة ..اوووف حبيب عمتو
دخل حسان وشاف يزن حاضنها سلم على ام علاء
وريمة وام ريمه رحاب
استقبلنه بضحكة وفرحة على وجوهن سلم عليهن
بصوت رزن ودخلوا للبيت سمعهن يحجن وحدة منهن تصنف على هند تكلها ليش لابسة عباه وحجاب
شعجب لبستي
هند ردتلها تضحك صرت زوجة الشيخ عيني
بدخلته لاكى علاء الطلع من الهول وتفاجأ من سلم
عليه ورحب بي .
هند عاطت وهي تشوف علاء التقدم وجرها بحظنه
شبكها حيل باسها بخدها وحجى بحنية واضحة
للكل ..شلونج يقلب اخوج ونبضه
هند متحملت جانت مشتاقة لأخوها بجت وهي
تكول..كولش مشتاقتلك
طبطب على ظهرها ..يعمري اني اكثر مشتاقلج

كعدوا بالاستقبال ريمه تتشاقى ويه هند لان لابسة
عبا وشال الشيخ حسان يسمعها وبداخله ابتسم
من ردت لزوجه اخوها..حبيتها مطلعتني حلوة ومرتبة.
علاء خزر ريمه لان تحجي فأم علاء استأذنت وصاحت لريمه لتساعدها
وبالمطبخ حجت بحدة ..لاتحجين وعلاء موجود
وانتي تدرين بي كلمة ويوج
_عمه والله الكلام عادي
_بكلامج جاي تلمحيله زوجها غصبها وانتي ادرى
بعلاء وكوة جارعه
_اسفة والله مجان قصدي شي موزين
_ادي ماما ديلا هاج العصير خلي بالكلاصات ودي
واني حجيب الكيك.

تغدى حسان بيت حجي راشد وكضوهاسوالف حتى علاء كعد يسولف ويبتسم
وقرروا العصر يطلعون لبيت ابو محمد

النسوان كاعدات بالمطبخ حاطات هند ويسألن بيها
على عيشتها منطتهن حجي مو زين لان متريد تزعل
حسان منها .

*****

للعصر والساحة المفتوحة عالشارع يم بيت ابو محمد
انترست سيارات جانو جايين عمام حكيم من البصرة
عمام ابو وبيت عمه الساكنين بغداد وصارت فرجة
من وصلو جماعة الشيخ سالم

خطبوا لينا رسمي والسيد الجاي ويه الشيخ سالم عقدلهم
لينا جانت كولش مستحية وام امير كل شوي كالت
اللهم صلي وسلم على محمد وال محم

حيل حلوة بالبدلة اختارتها وردي فاتح امها خلتها
على راحتها بالسوك بعدها راحن صالون اتفقت تطلعلها للبيت لخاطر ندى لان تعبانه مقبلت تروح لاي
مكان
جان جاي بيت عم حكيم ابو عادل ام عادل وبنتها
تغريد (تغريد عرفتوها هههههه على كولة لينا تغريد الزركة)
بيت حجي راشد اول الحاضرين لان بس كملوا الغدا
ترخصت ام علاء من حسان تاخذ هند وياهمةلبيت
عمتها ندى
ساعدن ام لينا بكولشي كأنما البيت واحد

باركو لندى عالحمل هي شوي بالعلاج صارت احسن

حظرن الضيافة واخذوها الولد ولد عم حكيم شباب
صغار سلمى وصتهم اي شي نقص يحجون
لينا مرتبكة وكلبها يدك لان سمعت ام جعفر تحاجي هند ..يمه امير وصاني يدخل يشوف مريته .
ردتلها..حقه خالة ومبروك عليكم الله يتممها على خير

هند التفتت لندى كاعدة روحها طافرة ورحاب جاي
تهدي بيها راحت كعدت بصف ندى ..عمة حبيبتي
شبيج.
بلعت غصة بعدين حجت بصوت ناعم ..مااكدر انسى
عملتها وياي صار ٣ سنوات مشايفتها وهسة انعاد .
رحاب حجت عليها ..لاطلعين خبالاتج عالرجال عندج ضيوف معليج بيها اشو من جتي لحد هسة مكابلة لينا وكاعده

حكيم اتصل على سلمى تحظر لينا راح يعقد السيد
ورى شوي عقدلهم وانطت موافتها ورجعت عالسريع

يم الزلم جان امير فرحان الكل باركله وصاه حكيم على لينا..عالخير يابة واوصيك على بنيتي لا تجيني
يوم مغثوثة منك .
_سيدي انه اغث افاا تدريني شلون اريحي ولاتوصي
بالعباس اخلنها بنص كلبي بس خل تصير يمي وشوف شسوي بيها
طككك حكيم عيونه ..ولك اثكل لاتستخف بعدين هسة احنا حسب نسايب لاتكلي سيدي صرت خالك
مادام انه خال المرة .
امير من شافه عصب حظنه وهو يضحك .ااخ شكد احبك والله ممحلفني جنت كاعد على نار وهسة
سيدي اسمحلي اشوف مريتي والبسها الذهب .
حكيم ميكدر لازم يبتسم على سوالف امير الحلوة
بس خربها امير من كعد ينصب على محمد جر خده
وحماده دفع ايده بسرعة ..اخذتها ليونة الى كولتك
خوش مطلعلها اسم دلوعة .

حمادة ضاج من كلامه ودحك على ابوه الجان مركز وياهم..عوفه امير شبيك وياه.
_سيدي ادري بي يحب مرتي وانه ماقابل ومادام الكعدة كلها شيوخ راح اكعدك انت وابنك للحك
حكيم متحمل هنا وطكها بضحكة خلت الكل يركز وياهم .
رفع ايده الهم ..يابة شيوخنه ابني معترض على زواج
بنت عمته .
حمادة سمع الكل يجيب اسمه خجل وكعد بصف ابوه
_هااا حمادة تعال جاي عندي سالوفة صغيرة ..راح عليه شاورة وطلع يركض
_شبيك ويه ابني ضحك امير …كتله روح مرتي تصيحك
_كض روحك لاتبقى مرتي ومرتي
يلا كوم لبس مرتك النيشان

دخل حكيم وامير وياهم ابو جعفر الي سلم على لينا
وباسها من راسها ..لاتكولين بعدت عن اهلي احنه
اهلج انتي صرتي بنيتي .مبارك يبوج مبارك
لينا ترجف من تقدم امير وسلم كعد بصفها عالقنفة
انطته امال العلبة وبدا يلبسهاولبسته الحلقة ام جعفر
طكتها بهلهوله فرحانه ابو جعفر باركلهم وطلع هو وحكيم.
امير صافن بيها لا يربي هاي طلعت اتكتل وانه جنت
مكيف اتخيلها..
عمي جنت ضالمها مامنطيج حقج ليونة هههههه ضحك بداخلة جلبت بليونة.
قرب راسه وباسها بخدها وشاورها شلونج يبعد روحي .
لينا داخت وتفاجأت يمه شكد جريء
همستلة ..الحمدلله.
رقمي يم امال كتلها تنطي الج خابريني بالليل
بعدها رفع ايده للنسوان وطلع

لينا بكلبها مرتاحة شافت امير كولش اجتماعي ومرح
كلبها يضرب سريع .
شافت حمادة يدحك عليها صاحته جاها وكعد بصفها
باسته من خده ..يمه حبيبي السبع
دحك بوجها..طالعة حلوة
جرت خشمه تشاقى فديته لليعرف يسولف.

ندى بعد مباركت لهند كعدت قريب عليها وانتبهت
تغريد صافنه عليها جانت قريبة ..سمعت حامل
اااي ابن عمي رجعج حتى تخلفين تدرين بينا نموت
على الجهال يلا هو كال لابوي خطية رجعتا علمود
ابنها .
ندى متحملت الجاي تسمعة 1

*******
تحياتي لكم تابعوني ???