قصة روابط للكاتبة |جوهرة السلطان

الفصل الرابع عشر

بقلمي: جوهرة السلطان

على قدر اهل العزم تأتي العزائم…
النصر ياالله والفرج القريب لعراقنا الحبيب.✌✌✌

سيدي اكو مرة تريد تقابلك خبصتنه ..
رفع عقيد حكيم راسه من الملف الجان جدامه عالمكتب وعكد حواجبه ..
_شتسوي مرة جاية للفوج وشلون تسمحولها تتدخل.
سلام صاير لعقلك شي .
_سيدي واكفة يم حرس بوابة الفوج واتصلوا عليه
قبل شوي

_لادخلونها انه رايح اشوفها .
ضرب تحية وانصرف وبقى العقيد يفكر بهاي المرة
شنو هالجراة تجي لفوج مكافحة الارهاب
اخذ سلاحه من فوك المكتب وطلع…..

يم البوابة واكفة بنت اية بالجمال لابسة جبة وحجاب مدنكة راسها والحرس اكلوها بعيونهم
متفاجئين بيها .شوي وابتعدوا من شافوا عقيد حكيم
طلع ويا سلام وجنود اثنين .
دحك عليها العقيد ومن رفعت راسها تفاجىء بيها
وبقى صافن بوجها وفكره راح لقبل عشر سنوات…………….

حس بشعور غريب كلبه خفك من تقدمت عليه وحجت..حكيم اني بشاربك ماعندي غير الله وانت.
بعدها شهكت وكامت تبجي .رفع راسه فوك وذب حصرة بعدها اشر للجنود يبتعدون.. ليش هسة
رفعت راسها ودموعها مغركة وجها ..حكيم اني..
_ليش هسة طلعتيلي اروى .
بدت تراجع نفسها وتقوي روحها ..ماعندي احد يوكفلي غيرك حكيم نخيتك مصيبة طاحت على راسي وبس انت جيت على بالي .
_شلون جيتي للمقر منو وصلج .
_اخذت تكسي ومقبل يبقى يخاف ذبني مسافة
بعيدة يكول ميصير يوكف يم المقر.
اشرلها بايده خلاص اروى خلاص انتظريني اجيب
سيارتي دقايق واجي .

تنفست اروى وذبت حصرة ..اااخ ياحكيم يمكن متساعدني واني ورطت روحي وجيت عليك
مسحت وجها وعدلت حجابها انتبهت من اشرلها
تصعد سيارته المظلله الاحدث موديل
طلع من الفوج وصعدت سيارته الشارع العام
محجه وياها انتظر يبتعد عن الفوج وكف سيارته
بجانب الشارع والتفت عليها جانت منكمشة على روحها وخايفة اشكال الافكار جت على بالها
_اروى احجي الصدك ليش جيتيني .
التفتتله وحجت بصوت مخنوك من البجي..اياد
اياد اخذوا مكافحة الارهاب وماادري وينه صار اربع
ايام وابويه خطية راح يموت وراه مخله واحد مراح عليه سألنا بالمراكز مالت الشرطة ومحد يعرف شي
بعدها عرفنه ماخذي المكافحة .
ابتسم حكيم بمرارة ..اياد العفتيني علموده .
صفنت بوجه حكيم متريد تحس بالندم عالصار لان سنين مضت وكلمن راح بطريق وهسة يريد يعاتبها
على شي مجان الها مخرج منه ..حكيم شلون تريدني
اتخلى عنه جان محتاجني متعلق بيه مكدرت اعوفه.
مسح على وجهه وعض بسنونه على شفته ..تخليتي
عن علاقتنه ولج اني كولشي قدمتلج وانتي درتي ظهرج الي ااااخ ااااخ عموما هذا مو موضوعنا مضت سنين واكيد استقريتي بحياتج جان يسولف وياها
وعيونه تراقب الشارع الكدامه ميريد يدحك بعيونها
ميريد يضعف هسة عايش حياته مرتاح ويحب زوجته حيل بس شوفة اروى هيجت عليه ذكرياته
وياها .
_وين زوجج ليش وحدج .
_حكيم اني متزوجت.
التفت حكيم وفتح عيونه الوسيعة وخزرها
لدرجة حست راح يخنكها بنظراته كثر مابينت
بيهن اللوم والعتب والغضب
_مو كلتي راح اتزوج ابن خالي .ولج تضحكين عليه
مو كلتي ابن خالي تقدملي وراح يعيش ويانة بالبيت
حتى متعوفين ابوج واخوج.
دنكت راسها خجلانه من جذبتها .بوكتها رادت تخلص
من لومه الها وعتبه لان متحاول تنطي علاقتهم فرصة وتحججت باخوها اياد جان عمره ٨ سنوات
كولش متعلق بيها لان هي ربته بعد وفاة امهم
مقبلت تتزوجه لان صعبه تعوف اياد وابوها
الجان ميكدر على فراك زوجته فهي جانت تهتم بيهم
رغم طلب منها اجيب اخوها وتعيش وياه بس رفضت تتخلى عنهم لان بعز حاجتهم الها جانت توهة مخلصة كلية واتعينت مدرسة عربي بوحدة من المدارس القريبة على بيتهم ..رفضت تتزوجه
وشرطت يعيش وياهم بس جان رافض هذا الشي
ومن حجى عليها صدمته بخبر زواجها من ابن خالها
القبل يعيش وياهم .
زمخ بيها ..احجي ولج
بجت بحركة..اااسفة اااسفة والله غصبا عني مجنت اريدك تتعلق بيه واني نذرت حياتي لعائلتي
جنت اريد اكبر اياد ويوصل بدراسته واساعد بابا
_ونعم التربية طلع ارهابي .حجاها بفورة دم ممتقصد
لان ميدري شنو سبب اعتقال اياد
متحملت اروى تسمع هيج اتهام من حكيم فزكحت
بحرقة ..لاتكول على اياد ارهابي والله مظلوم
ملتهي بدراسته والسنة تخرج .
_استغفر الله خلاص اهدي واحجيلي شسويتي
حتى اكدر اساعدكم
حجت وعيونها مليانه دمع وحزن..صدوك حكيم الله
عليك طمني والله صار اربع ايام حال الظيم حالنه اني وبابا

طمنها حكيم لان فعلا يريد يساعدها لان الجان بينهم
يخلي مرغم يساعدها
_هسة انطيني رقمج غيرتي لو نفسه وبعدها اوصلج للبيت وممنوع تخطين خطوة وحدج والحسين اكسرها لرجلج انتي شلون تجين وحدج للفوج
ابوج شلون سمحلج .
اتأثرت بأهتمامه وحرصه عليها ..بابا مريض صابته جلطة العام وقليل يطلع .
اخذ رقمها وانطاهة رقمة بعدها وصلها لبيتها وصاهة
متطلع ادور هو حيتكفل بكلشي

رجع للمقر وعقله يدور بس باروى شلون طلعتلي
هاي وتريدني اساعدها اااااه يااروى وتضحكين عليه
وتكليلي اتزوج
لازم اساعدها خطية حيل متأثرة على هالاغم الي مدري ويامن ضيع روحه.

دخل مكتبة وسوا اتصالاته وبقى قريب الساعة
يتصل بجماعات يعرفهم وعن طريقهم عرف
وين مسجون اياد وتهمته اربعة ارهاب .
فكر باروى هاي تموت اذا سمعت باخوها
خليني احاول اشوف الولد معقولة منتمي ويه الارهابيين

*****

تعال ماما البس انروح على يزوني بدلتله وراح يركض يخلي عطر ..شمي ماما طيب
اوووف يروحي راح اكللك هم هم هم
حماده كركر بالضحك نزلت وبيدها الموبايل اتصلت
على حكيم لتخبره بروحتها لبيت ابو علاء
_هلااو حبيبي حروح لبيت الحجي
_ندى البارحة جنتي يمهم
_خطية ام علاء كولش متأثرة على هند
صارلها يومين تبجي
_لا ترحين تكسيات راح اتصل بالحماية واحد منهم
يوصلكم
_يووو حكيم الولد البسيطرة ماارتاحلهم وانوب
كبال البيت مرابطين
_ولج احجي احد قلل ادبه وياج والحسين اسكطهم
خافت من عصبيته ..لا بس لان كبال البيت .
_ هي سيطرة معليج بيهم .اكول شلونه حماده
_يكمز بس يريد يطلع ..حبيبي شوكت تنزل والله اشتاقيتلك.
_ياويل حالك ياحكيم ..يومين ان شاء الله افتحي هسة كاميرا اريد اشوفج .
_حكيييم ادري بيك والله تريد تشوفني شلابسة
_يلا حبي
_مااا معليه حتى تعصب وتبقى تحجي .
_ولج افتحي .
_ماافتح
هههههههههههه خرب غيرتج هههههه شنو ماتفتحين ..
هنا ندى انصبغ وجها من الخجل من سمعته شيقصد.
_اااقصد كاميرا يوووو حكيم لاضوجني .
_تذكرين من طنكرتي مرة ههههه .
_ايييييه وانت ابد ماتنسى شكو عليك ماخذ حقك
وزيادة .
_اويلي يابة شلون جانت ليله تخبل هههههه
_اضحك اضحك شيهمك بس بوكتها صكطتني
_ندى لاترحين جايج هسة .
_عزززا حكيم شبيك متحضرة وراح اطلع ليش اضوجني بعدين انت بالدوام شلون تنزل هسة
_ساعة ويمج يلا ارجعي حضريلي نفسج.
_معلية اريد اروح لبيت اخوية .وخطية حماده مكيف
بالطلعة.
_والحسين اذا مترجعين تحضريلي نفسج من صدك اصكطج .
ندى ضاجت من اسلوبه لان من يريد شغلة الا يسويها
بقت اتأفأف ..يلا حرجع بس انت قنع ابنك
لاتأفين وحماده كوليله بابا يجي ويطلعنه يلا حبي سدي عاد
صاحت حماده وفهمته يجي بابا يطلع يونسه
بالبداية ضاج بعدين قنعته رجعت تصعد لغرفتها
وهي تنزع بشالها ..
_هامرت خالو شو كمتي تنزعين بالشال
انتبهت على لينا الطلعت من المطبخ ..
_حبي خالج حيجي وهو ياخذنا .
_ديلا لعد لما يوصل يكون الغدا جهز .

******

بيت الشيخ حسان صحت هند من نومها جسمها تعبان مدت ايديها وعدلت شعرها والنعاس بعده بعيونها شهكت ورجعت الغطا عليها وسترت جسمها
تلفتت ادور دشداشتها ..وين راحت هاي اخذتها تلبس بيها وكامت رتبت الجرباية بعد ماغيرت الجرجف والفرشة وخلت وحدة جديدة
طلعت ملابس ومنشفة لتسبح وتصلي مكعدت على صلاة الفجر دحكت عالساعة بالتسعة
وسالت نفسها هذا وين راح يمكن يكعد من وكت
دخلت الحمام وشافت ملابسه بالسلة اخذتهم وحطتهم بالغسالة وي ملابسها حتى تغسلهم
فتحت الدوش وبقت تسبح وتليف بجسمها
طلعت لافة راسها بمنشفة ولبست تراك برمودا احمر
مفصل جسمها دحكت بالممر مشافت حسان
طبت للغرفة وبدت تحضر روحها وبعد ما صلت
فتحت الكنتور وطلعت قفطان مغربي كولش اوف وايت ومشغول بخيوط ذهبي انتبهت لحسان
من دخل واتقرب عليها وحصرها يم الكنتور
شلونها مريتي اليوم .
حضنها حيل فاستحت ونزلت راسها.
خله ايده جوه حنجها ورفع وجها
_.لاتغمضين عيونج الحلوة شو فتحيهن
فتحت عيونها وشافته حيل قريب عليها كلبها كام يدك سريع من شاورها ..خاف اذيتج يكلبي
هزت راسها بلا
_هند لاتستحين مني انتي زوجتي وكلشي بيج يهمني هسة تكولين شبسرعة اهتميت بيه اول مرة صح جنت ممخلي فكرة زواج ابالي ومشيت بكلام ابوي وشفتيني فترة الخطوبة ممهتم بس من صرتي
البارحة بين اديه الله سبحانه زرع بكلبي حنية عليج
…..بقت ادحك بعيونه متفاجأه جانت تحسه ميريدها
لان تعامله فترة الخطوبة جان كولش بارد حتى ميتصل بيها بس فعلا البارحة عاملها بكل حب وجان حيييل حنين وياها شكد جانت خايفة منه وتخيلت
هواي اشياء راح يسوي بيها بس جانت غلطانة
بحظنه حست بالامان رغم ارتباكها وخجلها منه
……باسها بقوة وبعدها عنه ..مدت ايدها وتلمست
شفايفها معترضة ..حسااان توجع
دنك راسه وحط كصتة بكصتها ..ولج شنو هالترافة
والنزاكة .
عافهاوراح مدد عالجرباية يلا ابوية انتي بدلي
وخل نتريك قبل شوي جابو الريوك بالمطبخ
حجت بخجل ..يااا شكد عيب هسة يكلون
نايمة مااستقبلتنه.
ضحك حسان ..ههههه لايابة كتلهم خطية تعبانة
وصايرة خرجة خلن ترتاح البارحة كطعتها تكطع
…احمرت خدودها واستحت من كلامه ..لاعفية
شكد عيب منهم ليش هيجي حجيت والنبي
بعد مااطلع من الغرفة.
عدل كعدته ومسح على لحيته وعيونه اكلتها
اكل جسمها يجنن وبياضها يشع ويه البرموده
الحمرا عيونه غيمت وتنفسه صار قوي حس جسمه صار نار…..
اشرلها بيده هند تعاي جاي
تقربت عليه جان يجرها وكعت بحظنه حظنها
وكام يشم بركبتها قوي ويبوس بيها بكل مكان
رمشت بعيونها متفاجأة حاولت تدفعه بيديها
بس جان مسيطر عليها ..حسااان عوفني
لا عفية والله توني سبحت
مجان يسمعلها واخذ اليريده …….

ورى فترة ابتعد عنها وهو يلهث ..والحسين راح
تصكطيني ههههههههههه
التفتت عليه مبوزة ..انت تلح متشبع
_ههههههه يابوية ضوجت مريتي وزعلتها
_اي زعلت لان جاي اتحظر اجهز نفسي وخربتها عليه
راح اشكيك للشيخ .
ارتجى على ايده ومد ايده الثانية يلعب بشعرها الناعم .هههه اي شتكلليه رجلي ينام وياي
حيل استحت من سوالفه…يووووو حسااان
ليش هيج تحاجيني
_جاا مو تردين تشكيني يابوية شوف الخدود شلون جمرن
يله انه شيخج واسمعج
دحكت بعيونه السودا الوسيعة شكد حبت هالعيون
شلون ذبلانه بضحكة وجنه متونس عليها يريد يشاقيها ..
_والنعم منك تاج على راسي
شكد حبها بلحظتها جان يجرها ويحظنها وطبع بوسة على شفايفها
ابتعد شوي …فدوه للشفة التنكط عسل
ها مرت الشيخ رضيتي علينه لو بعدج يلا خلن ارضيج .
ابتعدت مبتسمة ..لااااا عفية اريد اجهز نفسي
شوف صارت بالعشرة
هسه اهلك يحجون علينه
دحك عليها وحجى بجدية..هند ماريد تكولين اهلك
صرنا اهلج هسة
انتبهت للهجة الحزم الي بصوته ..يمه شبي هذا راسا
يتغير توا شلون يتشاقى
_اكيد اهلي وعمو الشيخ اصلا كولش احبه

_يلا حبيبة كومي نسبح ونتريك واخذج للبيت الجبير.
_دقايق بس قبلها اريد اخابر ماما اطمنها
_ديلا اروح اسبح انه وانتي جهزيلي ملابسي
_ابتسمتله من عيني هسه احظرهم
_سالمة عينج ابويه انتي…
دحكت عليه وبكلبها انغرست بذرة حب لحسان
بذرة تحتاج دفو المشاعروحنان واهتمام لتنمو وتثبت جذورها بقلب هند .
طلع من الغرفة وهي اخذت موبايلها لتتصل على اهلها .

فتحت خط وجاها صوت امها خلاهاا تبجي
مشتاقه لكل اهلها….

?????