قصة روابط للكاتبة |جوهرة السلطان

الفصل الرابع والعشرون

بقلمي : جوهرة السلطان

مبررروك لنا نحن العراقيين فوز اسودنا ..اسود الرافدين✌??

*****

اتصلت هند بالليل على حسان تدري بي ضاج من جابت طاري علاء لان من وصلها لبيت اهلها ورى ماخلصت الخطبة ابد ماحجى حتى مادحك عليها
تريد تساله اذا يقبل تبقى لتروح باجر لسوك امها
حجت عليها على ليش مادخل وليش ماظل وياها
كلبها فز من سمعت صوته البي خشونه ..هلا هند
_شلونك .
_من الله بخير ..سكت يريده تحجي ليش متصله
ماسمع بس انفاسها بأذنه .
جا متصله الساعة ١١ لتكولين شلونك .
حست بفشله ..ااا لا ااقصد اطمن عليك .
_تطمني انه زين وهسة امدد عالفراش بأستقبال بيت
عمي والزلم صوت شخيرهم لراس الشارع .
هند طكتها بضحكة نكز كلبه عليها هههههههههه
صدوك هههه على اساس انت ماتشخر ..اصلا انام
واني حاطة كطن بأذني ومتحمله شسوي.
_ولج هاذ انه ليش انتي تدرين بروحج من تنامين
لازكة بحظني متدرين وين ربج حاطج .
اعترضت ..انيييي لا متوهم نومتي خفيفة وما اشخر
_يا بويه اسكتي لاتخليني اتحجى
_شنووو احجي
_والحسين ولاتدرين بروحج قبل يومين منو الجانت
نايمه واني ……….ها اكمل لو تذكرتي من كعدتي
وثوبج مشمور ههههههههههههه
_عزززززززززا
حمرت خدودها وكلبها كام يدك سريع اي والله صدوك يبووووو على حظي شلون يعيرني .
هسة اني اجاني وحجيت بس الشي الحلو سمعت ضحكته يعني شوي فك روحه .
_وينج خربتي ههههه يله لاتخجلين قابل انتي شمسوية رجال ومرته شيسوون اكيد يلعبون جوله
مو جاي احجي وين رحتي .
_وياك
_جا مااتحجين
_حسان عفية خل ابقى باجر اريد اروح لسوك ويه
ماما وريمه واريد اروح لصالون هماتين .
ماحب يكسر بخاطرها لأن من يرجعون للناصرية
احتمال شهر شهرين متشوف اهلها لان اشغاله هواي
ما يكدر يعوفها وينزل لبغداد الا بوكت الحاجة.
_روحي بس تلبسين العبا مكياج ماكو مفهوم .
هند ضاجت يعني شلون هي ممتعودة انوب بالسوك
تلبس عبا واذا حجت يزعل عليها هي امها من تطلع
تلبس جبب قليل تلبس عبا اسلامية خو ريمه راح
تشبعني تصنيف .
ردتله بضوجه حسها بصوتها..خلاص مثل متريد
احنه الصبح نطلع مااتأخر ان شاء الله
_هاي هية امرلج قبل الظهر .

سلمت عليه وسدته وشوي ارتاحت لان حجت وياه
تحب تسولف ويا بس مرات تستحي لان عنده جرأة
بالحجي هذا الشي لاحظته وي اغلب العائلة يلا تتعود .

بالفعل ماتأخرت بالسوك امها ماقبلت تروح كالت
تسوي غدا لان الحجي ميقبل يرجعون للناصرية راسا
يتغدون يله.
عمتها رحاب وريمه نزلن وياها للسوك وصلهن علاء
بلغهن مايطولن علاء يتخبل من مرة تفتر بالسواكة
ولوما هند ميريد يكسر خاطرها ماخله ريمه تروح
لان قليل يخليها وهي متعودة ماتعترض تخاف منه
علاء اخذ يزن ويا يفرره بالمول يريد يلعب بالالعاب
ومن يكملن يتصلن عليه.
نزلن من السيارة علاء صاح هند البقت بمكانها ..اريد احاجيج ..
دحك على زوجته وعمته نزلن جان يكلها..هنودة مرتاحة ويه حسان حلفتج بالله احجي الصدك
ابتسمتله ..يعمري اخوية والله مرتاحة لايظل بالك
عليه.
_التفتلها ليورى وركز بعيونها..لاتكولين بعدت اني
سندج انتي بنتي مو اختي اذا يوم بس احد خبث
خاطرج امانة الله عليج لا تسكتين اتصلي عليه
واخذلج حقج.
هند انتي عايشة ويه ناس طبعهم غير صح اهل غيرة
ومرجلة وهذا شي اني بنفسي افتخر ناسبت هيح
عائلة اذا تردين الحقيقة ورفضي جان علمودج انتي
نازكة وهادئة وشفت صعبة تعيشين بقرية وانتي المدللة مال البيت يعني لبسج العبا انتي قابله لو غصب عنج.
هند تدري علاء شكد يحبها ومتعلق ببها متريده ينقهر
عليها ومتريده يضوج من حسان تريد علاقتهم تقوى حتى ترتاح.
_علاء .. هو سألني وفهمني على طبعهم واني قبلت
لان صعبة زوجة الشيخ واهل القرية ينظرولها نظرة
محلوة اني كولش مرتاحة عيوني انت لا يظل بالك
عليه.
_الحمدلله ديلا حبيبتي انزلي وياهن واني اخذ يزوني اونسه دحك على يزن الجان صافن بالشارع
عالسيارات وهزله راسه.

افترن بالمول واشترت التريده بعدها راحت صالون مالعبت بشعرها مصار هواي عالعرس من عدلته مقبلت تصبغه لونه حلو على شكار .بس عدلت شوي
بحواجبها .

رجعهن علاء قبل الظهر هند من شافت سيارة حسان
ارتبكت تخاف يزعل لان وصاها قبل الظهر ترجع وهن
شوي تأخرن .
دخلن للبيت شايلات العلاليك وياها يزن راح يركض
على جده بالهول كاعد يسولف هو وحسان .
دخل علاء وسلم على حسان
الحجي سأله ..شنو راح تلتحق توها امك كالتلي
مو على اساس مجاز.
ردله وهو يمسح بوجهة ..شوي الوضع بالوزارة مو تمام صايرة تغييرات بالمناصب على اساس راح
يغيرون وزيرالداخليه هماتين.
حسان حجى..برأيك التغيير يحل ازمة البلد والوضع يصفى.
_والله شيخ مااعتقد هذه سوالف الحكومة من تصير ازمة يلجأون لتغيير بالمناصب بس مرات تنجح لان يبدلون فاسد بوطني شريف.

يزن حرك هواي كل شوي طافر على قنفة اخر شي وكع على الطبله كدام حسان مخلي موبايله ويمه كلاص عصير وكع الكلاص وساح العصير عالموبايل
حسان عالسريع شاله ليزن ..الله الله عمو شبيك
سلامات .
علاء انتبه لحسان ماهتم لجهازة الاحدث نوعية أيفون بكثر ما اهتم ليزن خاف تعور يزن كام يبجي هم خوف لان سوه مكسورة ولأن تعور بشفته شوي.
_سلامات عمو غير دير بالك وطلع من جيبة كلينس
مسح شفته علاء كمز عليه بقى يراقب حسان يمسحله الدم بعدها شاله بحظنه عاتبه..ليش يابابا
حرك شوف سويت خربت موبايل عمو دنك شاورة
ويزن يشاهك..لاتبجي منو البطل المايخاف يله
روح اعتذر من عمو كله اسف .
حجي راشد دحك عليهم ..جدو شلون بوكاحتك
بس شكول انت طالع لابوك بس هو جان اضرب منك

الحجي صاح ام علاء اجت شالت الصينية والكلاصات ومسحت الطبلة ..يا عيني يزوني بيبي
خوما اتأذه .
يزن شايله علاء سكته جان الحجي يرداها..بعدلاتخلنه يطب يمنه خرب موبايل حسان.
حسان جان مفكك الجهاز وينشفه رفع راسه ..فدوه
يابة فدوه اله مابي شي الجهاز نشفته.
الحجي وصاها عالغدا..غداج حاضر صبي.
_ادلل عيوني دقايق يجهز .

هند رتبت العلاليك وحطتهم يم الباب مالت الصاله
وراحت تساعد امها وريمه رحاب فرشت السفرة
بالهول دخلت سلمت عليهم ..شلونك ابني ان شاء الله مرتاح
حسان كام سلم عليها بدون ميسالمها ..ربي يحفظج
يا هلا بخالتي .
هند راحت عالسريع من كملت صب الغدا ويه امها
سبحت لان الجو حار ولبست دشداشة ناعمه فانيله
سمائي رداناتها ربع اشترتها اليوم سرحت شعرها
ورفعته بقراصة دنفش مثل لون شعرها وطلعت خصل ناعمه وحطت بس كحل تعطرت ونزلت من غرفتها يربي شكد اشتاقيت لغرفتي .
سمعت امها تصيحها نزلت تلكتها ريمه تريد تصعد
وجها مغيم صحكت عليها ..ههههه شكو
_اروح اسبح احسلي يعني متعرفين علاء وسوالفه
يكلي لا دخلين للهول شنو مكابلة الشيخ وكاعدة
الله عليج هذا صاحي .
_ولج لاتحجين عليه تدرين بي يغار عليج .
_اصلا اني مراح ادخل كل عقلج… رجلج يخوف يمه
شلون يخزر بعينه شكد شايل وسامه بس نفس الوكت هيبته وشخصيته تخلي الواحد يرتعب وتردين اكعد يمة لا لا لا .
_هههههه .
_الله عليج هم تخافين منه .
_يوووو اصلا كلبي يكوم يرجف هههه بس والله هو
كلبه مليان حنية وهاي شخصيته ميكدر يغيرها شيخ
وابن ديوان يعني شي بداخلة هذا.
_دروحي عيني خل يشوف هالجمال والزنود الطالعة تلهث بياض اليوم من يفكج منه هههههههه
_اوووي شكد فطيرة توج الوجه مغيم شبسرعة
كمتي تغردين على زوجي .

حسان كاعد وسفرة الغدا جدامه ماشاء الله ام علاء
ممخليه ماطابخة وسفرتها حيل مرتبة لان هي ذواقة
بالطبخ .
الحجي كاعد بصفه وعلاء وابنه مقابيلهم ..

باله جان يم هند ماشافها للان ولا كالت اروح اسلم
على رجلي انتبه عليها دخلت سلمت عمتها رحاب
حجت وياها اكعدي يم رجلج اتقربت سلمت بصوت ناعم ..شلونك حسان .
خزرها بعينه ..لا يربي هاي شطالعة تريد تجلطني
اخذ نفس غميج وذبه وهو يشم عطرها .

كملو غدا حسان حمد الطبخ وتشكر من ام علاء
الجانت فرحانه بي لان شافت بنتها مرتاحة وحمدت
الله طلع زوجها ابن اصل ومبين يحبها لان طول
وكت الغدا تراقبهم بدون محد ينتبهلها
تشوف عيون حسان بيها حنية وحب واضح رغم هو يتعمد يخزر المقابل بنظرة حادة بس من تجي عينه
على هند تتحول نظرته لحب واهتمام.

ورا مالمن السفرة رحاب قدمت الجاي علاء صاح هند
وسحبها لحظنه عالقنفة وكعد يسولف وياها وهي
بحظنه يزن من يشوفهم هيج يجي يكمز عليهم
يريد يصير بحظن ابوه متعلم عالهسوالف .

يراقبها بدون محد ينتبهله حس بغيرة من شافها
بحظن علاء الجان يسولف وياها ويزن يفترعليهم
هاي شلون بيها الدشداشة لزك والزنود طالعات
بداخله تحلفلها بس خل يكظها ويعرف شغله وياها
دحك على ساعته ب٢ يلا يلحك يوصل للناصرية قبل
الليل
اشر لهند من التفتت عليه وكام ..يلا انه اترخص منكم دربنا طويل
الحجي وصاه..انتبه وليدي بالطريق ولو الجو حار
لو باقي شوي للعصر .
_يلا نصل والتفت لهند هايابة روحي جهزي حالج انه طالع للسيارة

ودعت هند اهلها وصعدت للسيارة امها صاحتها
_هنودة ماما نسيتي الحافضات
نزلت اخذتهن وخلتهن ليورى عالمقعد ودعتهم وصعدت ..حرك سيارته وطلع بيها للناصرية

حسان انتبه عليها..شبيها خالتي .
_مسويتلي كليجة مبروش وجوز تدريني احبها
وبعد كبه وباها
_اي مابيها شي اكل امج طيب
_ماما طباخة ماهرة ههههه
_جا شبيج انتي مكضيتها بتيته تكلاه
_يااا اني ليش منو يطبخ وانت تروح تاكل بالبيت
الجبير
_لاتزعلين بوية اكلج طيب .
بعدين تعاي احاجيجج شعندج كاعدة بحظن علاء
ماريد هذا الشي يتكرر
استغربت من كلامه..صدوك تحجي تمنعني من اخويه
مامانعج بس بهذا لبسج خليتيني اريد اموتج.
_دشداشة شبيها
_ايييه والذرعان طالعة والركبة ودلعةالصدر انه
ماريد مرتي فرجه افهميها لا ادخلها غصب بدماغج
لاشفتيني ساكت يعني راضي والبارحة بالحفلة لابسة
بدله والنسوان عيونهن عليج ولج ماكلفتي نفسج تتصلين عليه .
_جان نفنوف موديله مثل البدله واني متصلت كلت
مشغول ويه الرياجيل .
_خلاص سدي السالفة

سكتت هند متريد تدخل باي مشكله وياه تدري بي
مراح تحصل شي من تناقشة ..هيبة ورزانه ولسان
مينطيها مجال .لان فعلا تخاف منه بس مرات ضوج
وتنسى روحها وترده بحجاية

وصلوبالليل دخل سيارته للكراج ونزل وياها العلاليك
دخلهن جوة وراح لغرفته لحكته راحت طلعتلة
كلابية ومنشفة وداخليات خلتهن عالجرباية
حسان اخذ منشفته ودخل يسبح
بدلت دشداشتها بكلبيه حمرا كولش حلوة رتبت روحها لبست شالها وكعدت تنتظره طلع لاف المنشفة

انتبه كاعدة تراقبه من يلبس ..اتقربت وحطت ايدها
على صدره جبت شغلات للبنات تعال نروح لبيت عمو

_خل اصلي وانروح .
اني هم حصلي مدت سجادتها وكفت وراه وبدوا يصلون الصلاة الفاتتهم.

بيت الشيخ سالم وزعت هند هداية لسمر والشيخة
عالية اختارتلها هاشمي يلوك لعمرها جرجيت اسود وتطريزه ذهبي ويا شال لان الشيخة كلش حلو لبسها..
سمر شكرتها وخاصة من اذكرت عمار جايبتله قاط
حتى امال وليلى ذاكرتهن .
الشيخة عالية تشكرتها ..عليش مكلفة روحج .
_تلبسينه بالعافية

الشيخ وابنه مراقبيهن التفت الشيخ لابنه ..جا شمالهة الشيخة مطخية الراس جنها تريد تصادق
مرتك
طكها حسان بضحكة التفتن عليهم سمر شالت الغراض وخلتهن بالغرفة الشيخة راحت كعدت يمهم
الشيخ سالها شلونهن جناينج
ردتلة الشيخة …….

******