قصة روابط للكاتبة |جوهرة السلطان
الفصل الثامن والعشرون
بقلمي:جوهرة السلطان*
اعتذر لتأخري وهذا فصل طويل لعيونكم .? 1
********
ساعدها حسان ولبست دشداشتها وخلاها تستند
عليه داست على رجلها ومن الالم بجت محست الا
وحسان يشيلها بين ايديه لفت ايدها على ركبته وايدها الثانيه مجلبه بياخة دشداشته طلعها للغرفة
خلاها عالجربايه و راح جابلها منشفه من الكنتور ..هاج نشفي شعرج لما اشوفن رجلج الوجع من ركبتج مو كعد يمها خله رجلها بحظنه وبدا
يعاينها ..بالم واضح على وجها عفيه حسان توجعني.
طمنها وهو يمسد رجلها وركبتها بحنيه ..حبيبه لاتخافين
ان شاء الله مابيها شي .
عاتبته ..وين جنت اني مو صيحت عليك ومن جاي اتحرك زلكت وركبتي تأذت طخت بالارضيه .
_يابه رحت اشوف المولد ولكيت العامل مشغله.
_ااااي احسها مكسورة.
طمنها..لا تخافين مابيها الا العافية يمكن بس مرضوضه راح الفها وباجر الصبح اخذج للمستشفى .
لفها بغترته وتقربلها باسها بخدها..ارتاحي يرويحتي.
_اريد امشط عفيه انطيني المشط .
جاب المشط وكعد وراها وسرحلها شعرها تنهد ..ليش ادشين الحمام حافيه ليش هيج بويه . ردت وشمدريني اوكع . …..والله هذا غباء اكيد توكعين
ضاجت ..وكعت لان صارت ظلمه كهرباء طفت.
ابتسملها اخيرا ورى ماجان ضايج عليها..يابة الكهرباء
سبب كل المشاكل واذا بقينه نسولف راح نتعارك
من وراها.
يله حبيبة ارتاحي وانه بالهول كاعد عندي اوراق
اراجعهن وحسابات تردين شي موبايلج يمج دكي عليه.
خلت راسها عالمخده وعيونها بعيونه..تسلملي يروحي .
……
راد الطبيب يعاين رجلها بس حسان رفض ..اريد معاون طبي مرة ماهو رجال وهاي الاشاعه شوفها
كبل ما ندخل اخذناها .
الطبيب مااهتم يدري بهاي السوالف كلبه خلصان تجي هواي حالات ميقبل رجال مرته تتكشف للطبيب..عاين الاشاعه ..الحمدلله مجرد رضه راح نلفها اسبوع تشيلها وهذا مسكن وعلاج التهاب راح
اكتبلك
سلمه ورقه العلاج ..تكدر تصيحلي للمعاون الطبي بالغرفه الثانيه تلفها باندج .
خزرة حسان ورفع تك حاجب..جا موش هاذ شغلك
صيحها تساعدك.
هند كاعده عالكرسي ومدنكه راسها وبكلبها ..يربي
شنو هالغرور صيحها وخلصني يعني راح يقل من هيبتك.
انوب تخاف تحجي غير يكفر بيها شو هذا طكن عنده من شاف الدكتور شاب
داس دكمه شوي ودخلت ممرضه لابسه حجاب نص كذلتها طالعه ..ها عيني دكتور عقيل .
كعد الدكتور ورى ميزه واشرلها عالجي الاخت لفي ركبتها عدها رضه بس لا تضغطين زايد رخي ايدج من تلفيها.
اتقدمت على هند بعد ما اخذت باندج من الديلاب.
_اي عيني ادلل..ومن شافت حسان الدشداشه البيجي والغترة نفس اللون والساعه والسبحه يفر بيها وريحه العطر تفع تارسه الغرفه انسطرت بوسامته وهيبته
حسان معجبته كلش مبينه عينها صلفه شلون تعاين بوجهه كعدت يم هند وتريد ترفع عبايتها الاسلاميه.
هند استحت ودفعت ايدها ..هاي شنو شدسوين.
تقرب حسان وكف بصفها صار حاجز بينها وبين الدكتور الجان اصلا ممنتبه كاعد يراجع ملف بيده.
حسان كاللها..شوفي شغلج.
لفت ركبتها وكامت ..هند راسا جرت عباتها وسترت رجلها.
تقربلها وسندها ..مشكورين يابة .
_ادلل عيني عود جيبها اعاينها وحمدلله على سلامتها لاختك.
هند طككت عيونها عليها .
ومن طلع حسان ..يابه تعبناج بس مريتي تستاهل.
فكت حلكها ورجعت سدته..ههه اي مابيها غير العافية.
صعدها بالسيارة وراح يجيب علاجها من الصيدليه.
بعدها حرك سيارته راجعين للبيت.
هند كالبه خلقتها ..بعد ماريد ارجع لهاي المستشفى
شلون عين صلفه اكلتك اكل عوذا شكد كرهتها.
حمدلله على سلامه اختك عابت اي والله.
قلدت صوتها وحسان خرب ضحك ..مريتي تغار فدوه بعد كليبي.
_والنبي كرهتها وشلون لابسه وشعراتها كامزات برى
الحجاب .عيييع محبيتها تتميلق.
_ههههههه ولج كافي البنت مجاوزت .
_اي عيني لان عجبتها وبقت ادحك عليك.
التفت عليها ورجع يتابع الطريق..خل تولي ما انتبهتلها .
…..
صارلها ايام متحمله وجع ركبتها وبدا شوي يخف وحسان ميقبل تسوي اي شي يكللها لمصلحتج
تدري بي يخاف عليها وهذا الشي خلاها تتعلق بي
اكثر واكثر تموت عليه كلبها تزيد دكاته من تشوفه
وعيونها تلمع بحبه
واليوم قررت تسوي غدا لان كولش محرجة من سمر صار اسبوع مبتلشه وياها تنظف وتطبخ وكلما تسويلها شغله تتشكر منها وسمر ترزل بيها ليش تتشكرين واني شمسويه.
ام حسان من سمعت جتي شافتها وانطتها رزاله
شلون هيج فاهية لو مكسورة رجلج
صح حجت عليها بس نظراتها مبين خايفة عليها
هند تفاجأت مرادت تفكر وتخمن خاف ترجع تنصدم
….
دخل حسان للمطبخ لكاها كاعده تثرم زلاطه تقرب عليها ..شلونها مريتي .
ابتسمتله ..تمام يروحي.
باس خدها وكعد ..ليش متعبه روحج.
_سويتلك كفته لحم بالبتيته تخبل هسة اخلص الزلاطه
واصبلك الغدا.هههه بعدين خايف عليه والله صرت زينه الحمدلله واكدر كولشي اسوي.
_كفوو والله اروح اتوضى اصلي واجيج.
…..
_ياعيني ليش مستحيه والله عمي وعمتي كلساع
يسألون وينها بنيتنه .
لينا تستحي تنزل بعد ما زعلت على امير لح وياها مقبلت تركها ونزل
وصاح امال تصعدلها .
_معليه ماانزل يعوفني وحدي بعد مااخذ حاجته
وطفر عبالك مو زوجته بس كتله ماانزل عافني وراح.
_ههههههه خرب حظي على امير هذا الحجي والله
لو تشوفينه شلون نزل ضايج صاحني يكلي لخاطر
الحسين قنعيها ممتقصد والله ..اكلج لاتكولين عليه
فضوليه بس عليج العباس شسوالج ادري بي ميكعد راحه.ههههههه
طككت عيونها عززززا تريد انوب اسولف هاي العايزة
بررت.. ماكو شي عيني بس استحي انزل.
لينا متريد احد يعرف اليصير بيناتهم لان تستحي
بعدها متعرفهم .
بقت كاعدة عالجرباية ومدنكة راسها تلعب بحلقتها
محست الا وامال اجر ايدها وتضحك..دكومي حبيبة
ميصير عمي وعمتي ينتظرونج عبن عيبه بحقهم.
عاطت لينا متألمه ..ااااه عفية موجوعه لا اجريني.
كعدت بصفها تتأسف ..يعيوني اسفة غير تحجين
اكول امير نزل ضايج ويكول ممتقصد .
_عابتله عبالك وحش مشايف .
_ههههه يلا عيني ارتاحي وهسة احاجي عمتي خل
تصعدلج تشوفج.
_لا لا خطيه مرة جبيرة عود اني انزللها.
_زين ليش يكول قنعيها شراد منج.
_يربي يكولي اوديج للدكتورة واني مااقبل والله
استحي عفية امال دبري السالفة والعباس راح ابجي
من الفشلة والحرج شيكولون عليه.
_ولج شبيج عبن بعدج عروس تصير هاي عليش تستحين .
العصر اروح انه وياج للدكتورة اذا تحسين بوجع قوي ميصير تبقين هيج.
وهسة تعاي ننزل انتي على كيفج انزلي انه ادبر السالفه هههههه والله امير سبع مفلشج تفلش .
كشرت بوجه امال..والله سرسري بعد مااخلي يلزمني
هيج طخه مااخلي يطخني.
فرت ايدها باستهزاء وهي ميته ضحك..خل يسمع
اموري والله يذبحج على هالحجي
عيني زلمنه شكد يحبون المرة بس الشغلة من توصل
لكرامتهم ينكلبون طنطل اسمعي مني لاتكولين ابن عمها وحماها وادافعله امير شكد تشوفينه يتداهر
بس من اطخ براسه ابو مايعرفه لاتبقين تحجين
وتتشكين ..شافت لينا ممقتنعه يلا انه انزل وانتي اذا
شفتي روحج زينه انزلي .
بقت كاعدة ضايجه من وضعها خابرت امها وطمنتها
محبت تشغل بالها وحجت ويه ندى وخالها وحماده
وهي تحجي دخل امير متكشخ بدشداشه بيضه وشعرة ساحبه ورى وهو اصلا ناعم ومحلقه خفيف
حبت تلعب باعصابه شوي بقت تحجي اجاهلته..اي
حبيبي اني هم مشتاقتلك والله اوووي فديتك
هاي بوسه مني ههههههه.
امير يفتر بالغرفه يروح للكنتور يفتحه يرجع على المجرات بيميز التواليت اخر شي تقدم وجر الموبايل
منها شهكت ..هههئ شبيك .
خلا الجهاز على اذنه..ليونه ماريد بوسه .
_يلا عمو سلملي على بابا .
سد الموبايل وشمره عالطبله..اي حبيبي وفديتك
وهاك بوسه مني اشو تعاي خلن اطفي ناري شوي.
اعترضت لينا على اساس زعلانه بس وين تكدر لأمير
الي خرب عليها يبوس بيها .
دفعته ..الله عليك تعبانه عوفني.
انتبه لروحه وكعد بصفها وحاوط كتوفها بذراعه ورفع راسها اله..يرويحتي انتي صارت السالفه وعدت
على خير والحمدلله انتي مريتي وكطعه من كلبي
قبل ماتتأذين انه اتأذى والله.
حظنها لكلبه ودنك باس راسها ..العصر اوديج للدكتورة وهسه ننزل كلها تسأل وين العروس يلا حبيبة حظري روحج ننزل انه وياج.
نزلت لينا امير حاضنها ويمشي من وصلو الدرج نزل قبلها نزلت على مهل تلكتها ام جعفر طكتها بهلهوله
شاركتها عبير الضحكت ..ههههه عمه موش هلاهل
بيكيسي .
بوسوها واخذتها ام جعفر تسلم على عمها كاعد بالهول هو وولده وجهال جعفر ثلاثتهم العباس عمره ست سنوات والتوم حسن امير عمرهم اربع سنوات
الحجي من شافها كاملها يهلي ويرحب طاير بيها
خطيه لينا كولش استحت جانت مدنكه راسها
باست ايده ..شلونك عمو ان شاء الله بخير.
ردلها وهو يحاوطها بعيون فرحانه.
_ اللهم صلي على محمد وال محمد هلاا ببنيتي
شلونج بويه .
_الحمدلله وسلمت من بعيد على جعفر وعامر بعد ما ام جعفر عرفتها بيهم ..
الجهال نطوا عليها صاروا محاوطيها يردون يسلمون
عالعروس كوله العباس
حبوبتي اسلم عالعروس.
امير يدحك عليها مبينه تعبانه بس تكابر وذوله القرودة يجرجرون بالدراعه اللابستها صاح بيهم
_عباس اخذ اخوتك واطلع العب.
_خلهم يمه مكيفين بمريتك.
_يمه فدوه لعينج روحن للمطبخ وحظرن الغدا تراني
ميت جوع.
امير يريدها تطلع حتى لينا تاخذ راحتها.
_صار بعد امك نصبه ورى صلاه الظهر دقايق انتظر
يلا يمه ليونه تعاي وياي يم اخياتج.
طلعن وامير تنهد ورجع راسه عالتخم جعفر انتبه عليه وصجمه..هااا يخوي مبين تعبان
التفت عليه..هههههه منو انه يخسى التعب
تقدم بصفه وشاوره دير بالك عليها مبينه خوش بنيه
الله يسعدك وياها.
هزله راسه وعيونه تضحك
******
ام لينا كاعدة خاله ايدها على خدها وصافنه بالمطبخ
دخلت ندى ..يمه الحر راح اخرب فاتت للثلاجه طلعت بطل مي وكعدت عالكرسي تشرب اجى حماده
حظنها بقوة..ااخ ماما على كيفك شبيك لاتأذيني.
انتبهت ام لينا عليهم ..تعال وليدي عوف ماما خطيه
النونو يتعور.
حمادة بقى بحظن ندى الجانت تلعب بشعره مدنكه راسها وتشم بشعره ..اووي فدوه لوليدي شلون عطر
يجنن.
ضحك حماده ..بابا كال من يخلص اجيبلك .
رفع ايده وخلاها على خدها ..ماما وين بابا
صدك والله شو حكيم متاخر مو عوايده مكال اتأخر
التفتت لحماتها ..ام لينا هم كالج حكيم يتاخر
ردتلها مستغربه لان من ينزل بأجازة ميطلع هواي
من البيت ..ليش ماخابرتي .
هزت ندى راسها ب لااااا
حماده سمع هورن سيارة كمز من حظن ندى ..اجى بابا.
شوي ودخل حكيم شايل حماده الجان محاوط ركبته
بايديه فرحان لان ابو شايله سلم عليهن وحماده
خلاه عالكرسي ..
سلمى بقلق واضح عليها..ليش ياعيني هيج اتأخرت
والله بقى بالنا عليك.
طمنها لان ميحب يخلي سلمى تقلق ..ماكو شي يابه
صارت عندي شغله واخرتني.
يلا انه افوت اسبح ميت حر وحظرلي الغدا مامتغدي
صعد لغرفته يسبح وسلمى كامت تحمي الغدا حجت ويه ندى ..كومي حظري ملابسه شبيج فاهيه ياعيني.
_كمت عيني والله احس روحي ثكلانه بعدني ممكمله
الرابع لو دخلت شهري شلون.
_الله يسهلج ان شاء الله وتكومين بالسلامه.
حكيم كولش متوتر لان قبل شوي جا اتصال واحد من جماعته الثقه كلش خبره عميد رافع يفر بذيله
جاي يريد يوكعه حتى يحصل عالملف.
وهذا الشي خلاه يقابل جماعه يتعامل وياهم يريد
يراقب رافع.. ابد ما يأمن بي واكيد راح يغدره لان هاي الشغله مو بعيدة عن رافع ولازم يحذر منه.
كمل سبح وطلع من الحمام شاف ندى تحضر بهدومه
_نعيما يروحي.
ابتسملها..ربي ينعم عليج
اخذ كلابيته لونها رمادي لبسها بدون ميحجي لان باله مشغول سرح شعره وترس روحه عطر انتبه لندى
صافنه عليه وكاعده على الجربايه..شبيج.
_احسك مو على بعضك بيك شي.
تقرب عليها وجرها من زندها طخت بي رفع راسها
_لا تشغلين بالج ماكو شي يلا هسة اصلي وانزل .
……
رجعت لينا من الدكتورة بعد ما وداها امير والحمدلله
ماكو شي يخوف والطريق كله امير ناصب عليها
لان تكبر السالفه هي مهتمت تدري بي يريد يضوجها حتى تحجي لان كالبه وجها عليه.
تلكتها امال وطمنتها صعدت لغرفتها راحت سبحت
ولبست برمودا وتي شيرت ومددت عالجربايه
دخل امير شمر السويج على ميز التواليت وتقربلها
عدلت روحها وكعدت حاوطها وضمها بحظنه ورفع راسها بوسها بلهفة بادلته بعدين تركها وذب حصرة .
_اروحن اسبح من ابقى مكابلج اتهور .
_خل احضرلك ملابس .راحت طلعتله تراكسود رصاصي حلو بس اعترض ..لا طلعي دشداشه
لان ورى العشا يجون خطار .
دخل يسبح بالحمام صاير بنهايه الممشى قريب على غرفتهم.
الطابق الفوك لي تلث غرف وصاله وحمام وتواليت
غرفه امير والغرفه البصفها غرفه للكعدة امير سواها
بيها ديوان وشاشه بلازما جبيرة معلكة بالحايط هاي الغرفه قبل جانت لجعفر اول متزوج
والغرفه الثالثه مخزن مخليها للفراش والزوالي .
امال وعامر غرفتهم جوا من البدايه.
كملن العشا واجى عباس يصيحهم امير جان يشوف
الاخبار .
_عمو يصيحوك عالعشا .
_اي وليدي جاي انزل انته
راح عباس وامير راح للغرفة دخل شافها جاي تتمكيج لابسه كلبيه تفاحي والشعر سايح على ظهرها
تقربلها توج راح تنزلين .
هزت راسها وبعدها عالمرايه .
امير ضاج جرها من ايدها ..لاحظ اليوم كضيتي
بغرفتح انزلي جوا اختلطي بيهن مايصير هيج ابويه
انتي
لينا حست كلامه صحيح وخجلت منه ..اسفه بس
استحي والله.
امير فهمها بحنية..ميخالف احنه اهلج هسه واذا تعزلين روحج من البدايه مو خوش ياخذون عليج
نظرة وانه الاعرفه انتي طبيعتج حلوة تحبين جمعه
وسوالف.
ابتسمتله..صار من عيني بسك اتحجى عبن انه فاهمتك واعرفن شتريد .
امير طكها بضحكة..هههههههههههه
ولج هذا الحجي منين جبتي.
_جاااا اعجبنك انه
مد ايده ولاعب باصابيعه شفايفها ..وشلون شفايف
تتحجى اموت عليها.
تقربلها ومن شافها تتجاوب ويا ابتعد وهو يتنهد..ورانه عشا هسة يغيرون علينه خلها بعدين
وغمزلها بعينه وهو يضحك
يلا حبي استعجلي والبسي شالج لفي زين.
هههه هسة الحجي من يعرف تحجين مثلنه يكيف
عليح.
اتقربت وهي تلف شالها بترتيب..بس الحجي يكيف
انه اريدن ابن الحجي موش بس ابوه
جرها وحظنها ..ااااخ ابن الحجي يخرب عليج.
امير يحب يشوفها مرحة وتضحك لان كلبه يرتاح
ميريدها تحس بغربه يريدها مرتاحه حتى هو هم يرتاح .
تذكر امها خطيه بيوم العرس شكد وصته عليها
تكله من تلتحق جيبها وياك هو وعدها والله كريم.
مرالاسبوع وسوولها سبعه واهلها اجو وبيت حجي راشد بس ريمه مجتي دزت هديتها وي امها رحاب
لان علاء مقبل تروح
سلمى من شافت لينا تلكتها بالكراج شبكتها وبقت تبجي ومخليه لينا بحضنها ومجانت احسن من امها
بالبجي ام جعفر وخرتهن وحظنت ام لينا ..خيه
ليش البجي اسم الله هاي بنيتج بنيتنه وحاطيها
بعيونه .
مسحت دموعها وابتسمتلها ..الله يسلمج ويحفظكم
متقصرون ان شاء الله
التفتت على لينا..خالج مشتاقلج يريد يسلم عليج
يلا يدخل للمظيف هو وحماده
بعد ماسلم الكل عليها دخلو للاستقبال اجى خالها
وحماده وياهم امير حماده ركض وحظنها من رجليها
بوسته بلهفه
بعدين حظنت خالها ..حكيم من شاف لهفتها عليهم
دمعت عينه باس راسها وبحنيه حجى ..شلونج
بعد روحي مرتاحه.
هزت راسها مخنوكه بشهكه.
خزر امير الواكف على جهة ..والله ياامير اذا يوم
غثيت ليونه حسابك وياي.
امير ضحك..ههههه يابوية خلن ادير بالها عليه
انه هههه بروح ابوك وصيها عليه.
الكل ابتسم من حجايه امير .
رجعت كعدت يم النسوان بعد مراح خالها
ندى شاورتها ..شخبارج احجي الصدك.
طمنتها ..الحمدلله نداوي لو تشوفين كلها ادور رضاي
ابتسمتلها ندى..الحمدلله لعد شنريد احنه .
بهالاثناء دخلن بيت الشيخ وسلمن عالكل هند جانت
طالعه تخبل فخامه وجمال لابسه قفطان اخضر ومشغول بخيوط ذهبي وكرستال مغربي.
والشال كريمي وبي نقشه اخضر سلمت وكعدت بصف امها الجانت فرحانه بيها سالتها على بيت علاء
وحجتلها امها علاء مقبل.
انطوها الهدايه واجن هم نسوان كرايبهم وجبنها
كضى الوكت سوالف وام جعفراصرت لينا تلبس وتكعد شغلن دي جي والهلاهل والركص
وبعدها توادعدوا وراحوا ولينا روحها راحت وياهم
وامير من شافها هيج سحبها وصعد للغرفه
سد الباب وحظنها باسها بخدها ..بعد كليبي ليش البجي بعد يومين التحق واخذج وياي.
شهكت وعيونها بعيونه..صدك امير الله عليك.
_وداعت هالعيون الحلوة..
ديلا حبيبة تعاي هان ..واشرلها عالفراش وغمزلها
ضررته على صدره..اميررر
_هههههههههه جا غير اخذن حكي.
********
الشيخة طلبت من سمر تخبر هند تتكشخ تاخذها وياها لبيت سيد ناهض تزور زوجته ام هاشم .
بيناتهن علاقه كرابه يصيرن بنات عم والشيخ علاقته
قوية بسيد ناهض العلي رجال صاحب دين واله كلمته المسموعه بالولاية .
واليوم قررت الشيخه تزورهم وتاخذ مرة حسان
خبرتهم بهذا الشي الشيخ سالم وحسان ماعدهم اعتراض..حسان يحس امه جاي تلين شويه
بعلاقتها ويه هند.
عيونها على هند وشلون نظرات خبرة
هند لبست العباة جانت مرتبه عليها وبيها عرض
وشالها وياها لافته بطريقه مرتبه وحلوة
الشيخه بداخلها حمدت لبسها وجمالها صدك حلوة
وهي موش ظالمه لاتنكر هيج شي واليوم تريد ام هاشم تتعرف على جنتها تدري بنت عمها شلونها
مايعجبها العجب واضرب منها .
كعدت بالسيارة صلاح اليسوق لان حسان وخالد طلعوا عدهم شغل وصلاح وليدهم مأمنين بي وصديق حسان دومه عدهم بالمظيف وحسان كلفه
يوصلهن .
عدلت شالها الملفوف بترتيب وخلت عباتها النشر على راسها ..توكل وليدي.
_صار شيخة انتي تامريني
صلاح حجى وراسه مارفعه عينه عالطريق.
هند من جوا اهدابها تراقبها تشوفها شلون كاعده بثكل وشخصية ويه روحها حجت..والله عمي من يكلوللها الشيخة مايبالغون .
مغطيه روحها بالعباية الساترة جسمها اليشوفها هسة
ميصدك هاي نفسها بالبيت
بالبيت الشال ذابته على راسها لو تلف شيله
لبسها كلابيات مرتبه ايديها متروسه بتوت ذهب
وشعرها متوكع الحنه منه رغم عمرها خمسين بس بعدها حلوة وشباب .
عبالك انتبهتلها دحكت عليها بنظرة هاديه وحجت تريد تفهمها سبب روحتهن.
_انتي شفتي ام هاشم بالعرس جانت موجودة
وهسة اريدن اردلها فضلها اريدج تتصرفين مرة شيخ
تلوك بعايلتنه
هند بلعت ريكها ..ما يوم خذلتكم .
الشيخة دحكت بعيونها ومدت ايدها وطبطبت خدها بخفه..اعرف هذا ..بعدها ابتسمتلها خفيف.
هاي الابتسامه خلت هند متفاجئة وحسستها الشيخة
تثق بيها .
لاحظت هند ام هاشم متقل عن عمتها مرة كوية وراس يابس ههه ليش لا وهنه بنات عم حتى البياض الوجه يشابه لعمتها..
والله دايخه بهالعائله شلون عدهم عزة نفس وغرور والكبرياء
يمكن لان شيوخ ابا عن جد هاي جيناتهم وراثه..
ام هاشم نفس تصرفات الشيخة بس اكو دفو واضح
بعيونها وكلامها وهند حست براحه من تحجي وياها
عرفت عدها ولد واحد متزوج وعنده تلث ولد
وعدها اربع بنات متزوجات.
بس زوجه ابنها مشافتها فسألتها بصورة غير مباشرة
_مبين تحبيهم هواي.
ردت الحجية ام هاشم ..يمه فدوتن اروحلهم هذول
جمار كلبي صارلهم يومين راحت لاهلها والبيت اهيسه ياكلني.
ردتلها الشيخة ..والله يم هاشم انه هيج من ماشوف
وليداتي كبالي البيت يريد ياكلني.
هند ردتلها بصوت ناعم ..عمه صدك تحجين احنا كولنا يمج ونحبج.
ابتسمت الشيخه ..ادري بنيتي والله اليوم الماشوفن
بي حسان اهيس روحي ساحبيها مني وخالد بعد حبيب كليبي.
شكد حبتها من هيج حجت تعتبر حسان روحها وخالد كلبها حست بحنانها وشافت نظرة الحنيه
بعيونها.
ورى فترة طلعن سلمن على ام هاشم الاخذت الشيخة بجهة ورى ما صعدت هند ..خيه شلون عندج
جنه حلوة ومرتبه وحجاياتها يدشن للكلب ..اكلج عالية ديري بالج عليها ادريج راس يابس .
شفتيها شلون تسولف حجاياتها معدلات .
ردت عليها الشيخه..شيخ سالم وحسان يعرفون يختارون.
ام حسان داخلها فرحه لان هند اثرت على ام هاشم
مو اي وحده تعجبها مرة صعبه.بس هند برقتها وهدوئها دخلت كلبها
وهذا الشي خلاها للشيخة تبدل نظرتها لهند ولو هي
صار جم يوم تحس بيها وجاي تهتملها.
…..
علاء بمكتبه يراجع ملف دك موبايله الخاص ..ياهلااا
شلونج حبيبتي.
_بخير تمام انت شلونك ان شاء الله مرتاح.
_الحمدلله..ها طمنيني شلونه الجنوب .
_يخبل وين اكو احلى من الجنوب
كتم ضحكه يدريها تبالغ تريد تكسب رضا زوجها
_حسان كاعد يمج.
ابتسمت تدري علاء مايفوته شي..يسلم عليك
_سلميلي عليه .
_هاك احجي ويا ..انطت الموبايل لحسان الجان كاعد
وحاطها بحظنه
_السلام عليكم شلونك ابو يزن
_وعليكم السلام هلااا بالشيخ شخبارك .
_الحمدلله بخير الحجي شلونه سلمنه عليه
رد علاء ربي يسلمك ويحفظك ماوصيك على هندة
حطها بعيونك.
ضحك الشيخ..يابه حاطها بنص كليبي بعد شنهي .
ودعه وخلة الموبايل عالكومدي وجر هند الخربانه ضحك ..شبيج ولج
_هههههه حاطها بكلبي واني ضحكت لان هسة اني
بحظنك.
ههههههه ولج انه هم كلتها ويه نفسي اشو تعاي
خل اشبع منج……..
……
علاء من خلص اتصاله انتبه لسامي دخل وحط ملف
كدامه عالمكتب ..هذا تقرير عن احد المشتبه بيهم
بالتفجير الصار الاسبوع الفات بحي الجامعه.
فتح الملف وقرا شوي منه وخلاه على جهة
_خلينا مانعتمد عالمخبر السري اكو هواي طرق ذكيه
رد سامي..يمعود منظومتنه الامنية مخترقيها ومجاي
نعرف شلون نلزم المجرمين والارهابية خلينا نستفاد من اي معلومة نحصلها.
صفن عليه..شتنتظر لعد جهز العناصر خل نقتحم مكانه.
_السباع جاهزين ومنريد بس موافقتك.
علاء كام وخله مسدسه بحزامه ..يلا نصيده للجريدي.
……
دخل سامي وكعد يلهث ..الله يلعنه تعبني ومااعترف
ساله علاء بأهتمام واضح..عذبته.
كشر بسنونه..مايعترف اذا ميحصل جم بوكس على جم سطرة.
حذره علاء..سامي لا تتهور ليروح يموت بايدك
اكو هواي طرق واساليب نكدر نخلي يعترف.
ردله سامي ..سيدي انت تعرفني شلون احقق وراضي
على شغلي ودائما انجح بهيج شي.
رفع علاء ايديه وضحك..يابه شكول انت ابد متتغير.
……
الصبح دخل علاء للزنزانه ليشوف المتهم لكاه الوجه مورم تقرب عليه جان وحده ومدد على فراش قديم
_ليش ماتعترف وترحم حالك.
الرجال دحك عليه وماردله.
صاح علاء عالحارس ..جيبه لمكتبي .
حقق علاء وياه وي الظهرةاعترفله عالاشخاص الي
يشتغل وياهم امرهم علاء يلقون القبض عالاسماء
الموجودة بالورقه .
كمل واليوم نزوله تلكاه نقيب سامي ها رائد علاء
اهنيك والله انت تستحق الترفيعه الاجتك قبل شهرين .
ابتسمله علاء ..هاااا ولك طكني بعين دفوت يلاعندك شغل خلصه اني نازل تلث ساعات وراجع .
اخذله سامي تحيه ..سيدي كولشي تلكاه تمام
راح علاء وهو يضحك يدري بصديقه ميتغير.
*******
دك موبايله اخذه وطلع بره البيت ابوه استغرب طلعته الوكت متأخر وين رايح هذا.
وكف بسيارته جدام الحقل ونزل بعدما سوا اتصال ويه جاسم الطلع عالسريع من غرفه الحراسه تصير على جهة من حقل الدواجن.
_وحدك.
_اي شبيك صاير شي.
_اسكت لاتحجي حرف ..
اقتربت سياره وكفت بعد امتار منهم ونزل فلاح سلم
عليهم ..ها جاهزة فلوسك وتستلم طلبك
ردله عامر ..اي جاهزة .
سلمه اليريده واخذ الفلوس شاوره احذرك اجيب طاريي شمايصير بعدها صعد سيارته وراح.
عامر رجع لجاسم الجان متفاجىء بالجاي يصير
كلشي يتوقع من عويمر بس هاي الشغله مدش عقله.
ناوشه ظرف بي فلوس ..اخذهن وسوي الردته منك
جاسم تردد ياخذهن صح عامر صاحبه من زمان بس
اليريده صعب يسوي.
_مو تكول انه من زلمك واسوي التريده هاذ الاريده
وهاي الفلوس وانت محتاجهن حتى تكمل عرسك.
_عامر هو ابن عمك وشيخك لاتكسره .
_ولك لاتكول شيخك انه ماحبه والعباس على اعصابي اكعد يمه .
_ابن عمك ونسيبك شتكول لمرتك شلون ادحج بوجها وانت مأذي اخيها.
_ولك لا تبيع براسي هاي السوالف انه كل الاريده
ينكسر خشمه لاتخاف عليه يطلع منها .
_والله يعامر انه اخافن احنه النروح بيها.
_يلا اخذ الجنطه ظمها زين يمك بالغرفه ونشوف وكت زين لنخليهن .
راح عامر بعد ماامن حاجته .
عاف جاسم الوجه ينطي الوان شلون يبيع ضميره
بس هو محتاج الفلوس وعامر ممقصر وياه هو بحاجه الفلوس عيشته صعبه واذا ما نفذ عامر يطرده
يدري بي لو حتى صاحبه اهم شي مصلحته وهو ماعنده غير هاي الشغله والفقر ظالم بقى يدحك عالفلوس هواي تعيشه خوش عيشه هذا كله الصرف
حتى يأذي ابن عمه.
بس مثل ماكال يكدر يطلع منها معارفه هواي.
بقى صافن عالفلوس بعدها انتصر الطمع والنفس الضعيفة على حساب المبادىء والقيم الزينه.
……..
هند كملت لبس تريد تروح تزور لكربلا والنجف ويه الشيخه .
تذكرت من خبرت حسان كال ماعندي مانع بس اسمعي نصايح امي وراح اخلي خالد يوديجن انه مشغول
عدنه فصل بالحي.
استغربت كلامه ..قابل شراح تنصحني واني مااعرفه
حاول يوضحلها بدون مايحرجها
دحك بعيونها وحجى بهدوء..امي طبعهامن تزور الائمه سلام الله عليهم واليرحن وياها يغطن روحهن بالعبي ويكظنها صلاه وقرايه قران وادعيه .
_اي وشنو الغريب اني اروح ازور واتبارك بيهم ليش
تحاول تحسسني اني مختلفة .
عدل كعدته ..والله ماقصدي بس اريدن تعرفين طبعنا
من نزور وردتج تعرفينها.
ردت بنبرة زعل..لاعبالك مزايرة كول سنه بابا يجيبنا نزور ننزل بفندق تلاث تيام وعندي هواي ذكريات وصور بيها من جنت صغيرة لما كبرت واروح اتصرف
مثل مجنت اتصرف قبل.
شاف وجها احمر من العصبيه هاي شبيها دومها هادئه
شو كلبت الوجه عبالها استهزء بيها.
مد ايده واخذها بحظنه ..لاتكدرين خاطرج الحجيته
توضيح عبالي ماتدرين ههههههه طلعتي كلشي تعرفين.
رفعت راسها وصفنت بوجها الوسيم الحلو
_ههههه والله جاي تعاملني بذكاء لاروح ازعل
زاد من حظنتها وشم شعرها الناعم ترس ريته افيش
عالريحه الطيبه شكد يحبها لخاطر الله .
وصارح امه بهذا الشي كاللها يحبها ومايريد يخسرها
ولازم تخف شويه بمعاملتها وياها يدري بيها مطايقتها بس من اعترف لامه بحبه لهند وانو مايكدر بدونها كاللها هذا اعترافي مراح يقلل هيبتي ورجولتي واذا تردين خاطري وسعادتي ديرين بالج
عليها .الشيخه بوكتها من شافته مصر سكتت ماحجت يدري بيها متريد تبين هي راضيه بكلامه.
بس شاف بعيونها نظرة تفهم وحب واضحه يدري ويلمس حب امه مو بس وحده خوانه كلهم.
تريدهم محاوطينها كثر حبها الهم.
تهيأ خالد يوديهن للزيارة تقرب حسان عليه جان
كاعد ومخلي عمار بحظنه يلاعبه .سلم على خالد.
_شعنده عموري كاعد من الفجر
جره من حظن ابوه وبوسه ..ها عمو تروح وياهم
عفيه بالسبع ميعوف اهله حدهم.
ضحك خالد ولزم عمار بعد مارجعه حسان بحظنه
_والله مسوي زلمه وهو هاطوله شبر .
_خله يتعلم من صغير وانه اخوك.
تلحكون توصلون الصبح اربع ساعات الطريق لكريلا
_اي يخوي بس شوفهن ليش تأخرن.
شاف امه طلعت للكراج صاحت سمر..وينها هاي اخرتنه خلن نوصل من وكت ونرجع من وكت
راحت سمر تصيحها من البيت ..هاي مو خليتها جاهزه وين راحت حجى ويه روحه وتوجه لبيته
سمع عيطه سمر ودخل يركض..لكاها واكعه بالهول
وسمر تكلب بيها تريدها تصحى.
شالها وداها للغرفه خلاها عالجربايه يفرك براسها وايديها سمر جابتله عطر خلا بيده ومسح خشمها رجع وعيها جان تلعب نفسها تريد اذب من راسها
كامت على كيفها وحسان سندها دخلت الحمام وبقت
تتقيء يلا ارتاحت
غسلت وجها وفرشت اسنانها طلعت كوة تمشي.
رجعت للغرفه مددت خلت ذراعها على كصتها وبصوت ضعيف..خل يرحون اخرتهم عمري سمر اعتذريلي من عمه.
سمر ..حمدلله على سلامتج شبيج والله خوفتيني من شفتج واكعة .
_حسيت بدوخه والغرفه افترت بيه.
ضحكت سمر..عيني شيخنا راح يجي ولي العهد.
رفع حسان راسه الها وابتسم..صدك تحجين
ورجع التفت لهند مسح على راسها بحنيه ..ارتاحي
نتاكد الصبح اوديج للدكتورة.
سمع سمر تحجي وطلعت من الغرفة ..مبروك مقدما
خل اروح ابشر عمتي.
دنك باسها بشفتها ..مبروك يكليبي .
خفت من شفتج واكعه اثاري ابني لاعب جولة بيج.
ابتسمت بتعب..فرحان حبيبي امانه اتكولي.
_ولج طاير بهالخبر بس انه ماحب ابين خله بكلبي.
دخلت ام حسان والفرحه مبينه بوجها..اللهم صلي وسلم على محمد وال محمد هاي بشارة من الحسين سلام الله عليه عبن راح نزوره.
بالتمام يمه حسان الله يفرحك بي .
_بعد كلبي يمه ..كام وباس راسها وايديها.
دنكت على هند وباست راسها مبارك يمه
ردتلها بتعب لان بعدها دايخه..الله يسلمج.
ولج المايعه اكلي زين وداري روحج اريد وليدي يطلع
سبع على ابوه.
التفتت لحسان انه اروح ازورن واتبرك دير بالك عليها
طلعت هي وسمر اجى كعد يمها .حسان خل انزع العبا والشال.
كومها بدلت بدشداشه قصيرة ورجعت مددت خلاها بحظنه غفى وياها .
والصبح اخذها بعدما غصبه تتريك سوالها تحاليل وشافتها الدكتورة حملها شهرين ومبين تمام والاغماء لان عدها فقر دم لازم تتغذا وتهتم بروحها وباركتلهم .حسان راح للسوك واشترى شغلات لهند حلويات وكرزات يدريها تحب هاي السوالف.
من رجعوا هزد صاحت ..خطيه عمو خل اسويله غدا
_هههه يابه لا تفكرين امال اجت خابرتها وهسه
محظرتنه غدا تكول فرحانه بوليدي.
_ورده امال فدوه اروحلها.
_هاااا لاتتفدين .
_امال تستاهل
_هههههه اي والله هاي بعد اخت الشيخ.
وجود هاي الحياة الصغيرة بداخلها زاد ثقتها بنفسها
وزاد من تقرب الشيخه يوميه تجي تشوفها من جانت
تحس بدوخه وهالفترة ورى مصارت صحتها تمام
ام حسان ادز عليها يكعدن يسولفن الشيخ سالم مرتاح من يشوف مرته تعامل هند بحنيه وهذا شي الكل صار يشوفه وفرحانين هند مرتاحه لهذا الشي وبداخلها تحمد الله وتشكره جانت تريدها بس تحن شويه عليها وصار اكثر من التريده وجانت تتأمله.
خابرت اهلها الفرحوا من سمعوا وامها بس توصي بيها تهتم بروحها وبالي بطنها .
…
من جاي يدخل للمضيف سمع صلاح ..شيخ هذا رجال
يريدك .
دخله للمضيف ..هلا هلا تفضل.
سلم ودخل ..شيخ ابن عمك مايتركنا بحالنه هم رجع
كطع الماي عن كيعانه.
ورحت للحجي ابو جعفر تخبل كال انه اتصرف وهاي اسبوع وماكو حل.
كام حسان لا تخاف محلولة بأذن الله.
طلع بسيارته وياه صلاح راح لعامر بالحقل ..
_عامر ..عامر اطلع احاجيك.
طلع عامر وراه جاسم تقدم لحسان الخزرة ..ليش تكطع الماي عن الخلك تالي وياك ليش تحب الاذيه
_شنهي جاي تحاسبني انه النهر بكاعي واسوي الاريده .
حسان يدري بي كاعد يستفزه..هاي كاع عمي الله ينطي صحه وعافيه وعمي ماراضي على سوايتك
_معليك انت اطلع منها ويصير خير.
صلاح تقدم عليه يريد يضربه لان هان الشيخ.
_ولك احترم نفسك لا افلش وجهك والله.
حسان هدأ صلاح..عوفه صلاح.
عامر بنترة..تتشطر عليه بزلمتك.
ردله برفعه اصبع وهدده..تدري انه كادر اتعامل وياك
وحدي بس مخلي احترام لعمي ولاختي.
كلمه اخيرة اسمعها لاتتعرض لاي زلمة .عنده كاع.
عافه ومشى .
عامر الغضب والحقد ركبه التفت وعاط بجاسم روح لشغلك.
********
رجع الشيخ سالم وحسان جان عدهم كعدة فصل بالناصريه تفاجئوا سيارات عسكريه وعناصر من سال
حسان العامل الجا يركض عليهم خبره ذوله مكافحة الارهاب .
مطوقين البيت والمضيف ..تقدم حسان وشاف صلاح
شكو خالد وينه.
_مايدري طلع للزرع والحقل
مشى ويه ابوه شايل عباته مصفطه بيده التفت الشيخ..يبه حسان شيردون ذوله.
حسان مستغرب ..والله يابه مثلك هم دخت بيهم
خل اشوف شنهي سالفتهم.
تقرب عليهم ضابط الظاهر سال واحد من العمال
عالشيخ..سلم عليهم وهو يكول ..عدنه امر بتفتيش
البيت .
حسان الدنيا اسودت بعينه ..هذا يعني شاكين بينه
ردله الضابط..جانا اتصال عليكم وهسه راح نبدي تفتيش.
حسان راسا اتصل على جعفر ..
ورى ماسلم عليه..عندك معلومات ليش قوات مكافحه الارهاب تريد تفتش بيتنا
جعفر تفاجىء..صدك والله ماعندي علم انه طالع واجب بالاهوار صار يومين.بس راح اتصل بجماعتي.
غلق موبايله وتمشى على ابوه شاوره شحجى جعفر.
شاف مجموعه يردون يدخلون بيته صاح بعصبيه.
_نسوان تارسه البيت مايصير هيج.
رد الضابط ..والله عدنه معلومات بس نفتش المخزن.
استغرب حسان ورى دقايق رجعوا الجنود شايلين
جنطه سودة حجمها متوسط نادى الجندي..سيدي
لكينا العبوه ومتفجرات وياها.
دحك الضابط على الشيخ..شيخ هذا بيت المن.
الشيخ سالم وجهه اصفر وكلبه يدك الف لان درى اكو ملعوب راح ينهجم بيتهم من وراه.
حسان صاح..هاذ بيتي واللكيتو مكيدة مدبرينها النه
الضابط استهزء والنعم خوش ارهابية.
عاط بي حسان وتقدم عته من ياخته..تخسى تكول عنه ارهابيه
حاوطوا الجنود وتدافعوا وكوة جروا الضابط من جوة ايده .
عدل روحه وحجى ..الشفناه دليل واضح وخل اكلك
اجت الاخباريه باسمك مو انت الشيخ حسان العمران……… 1
*********
تحياتي للجميع انتظروني باحداث شيقه ?