قصة روابط للكاتبة |جوهرة السلطان

الفصل الخامس عشر

بقلمي:جوهرة السلطان

نصر من الله وفتح قريب✌✌✌??

كاعدين يتغدون بالمطبخ ندى مادة بوزها ولازمة الخاشوكة تحرك بحبايات التمن متشتهي تاكل
ضايجة من سوالف حكيم واوامره كل اليحجي
لازم يتنفذ يريدها حسب رغبته خرب عليها
طلعتها وعدها يوديها بس من شافها مطنكرة
عاندها وخبلها بالزايد من كال راح يونس حماده
وعلى غير وقت تروح لبيت اخوها.
_عيني مرة خالو بس لا معجبج البرياني والله
تعبت لما سويته
……عمة ندى

انتبهت على لينا ..هاا حبيبتي .
ابتسمت لينا يووووو الشاغل بالج يتهنى والله
هنيالك خالو حتى انت وكاعد يمها تفكر بيك.
استحت ندى ومردت عليها
خزرها حكيم بعينه..درينه البرياني انتي طبختي
صايرة مرة معدلة
_هههه الف عافية شعندي غيركم اطبخ وانفخ
ردت امها ..ام لسان خبصتينا همزين مو يومية اطبخين.
_الله عليج ماما شنو رأيج.
_يمة والله يخبل طعمه دخلينه ناكل
صاحها حماده ليونة حطيلي كاجب حار
_يمه فدوه لحبيبي هذا الكاجب ها حماده طيب..
هزلها راسه هو وياكل..
ياكل وعينه على ندى يدريها زعلت مد رجله جوا
الميز وكعد يلعب برجلها ابتسم من شافها فكت عيونها متفاجأة سحبت رجلها والتفتت على ابنها
حاجته بعصبية..كافي تحط كاجب
التفت حكيم وشاف حماده برطم وعينه عالكاجب
_بابا خلي شوي لاتكثر
رفع عينه على امه ندى جانت خازرته
زمخ بيها حكيم..عوفي الولد براحته
مطت شفتها معاجبها كلامه..حيخرب والله
من كثر الدلال.
دفعت الكرسي وكامت تخدر الجاي
ام لينا حست بيها ضايجة ..عيني نداوي متغديتي
..حاجتها وهي مطيتهم ظهرها تحظر اكوابه الجاي
_الحمد لله عاشت ايدج ليونة
_عافيات يروحي
حاولت متلتفت على حكيم تدري جاي يراقبها
وحبت اضوجه اكثر من راحت وسحبت علبة الكجب
ورجعتها بالثلاجة .
حماده حجى ..ماما عفية .
خزرته ..كمل غدا وتعال وراي غسل ايديك
_استغفر الله ندى تالي وياج
التفتت عليه ورفعت تك حاجب ..تالي وياي
اي هم صدوك اسفة كولش لان هذا ابنك وانت
تعرف مصلحته.
تدخلت سلمى من شافت اخوها بدا يعصب
تدري بي نار وهاي ندى مدري شبيها كاعدة اجاكر بي
…..صلوا عالنبي عيني
ردو اللهم صلي وسلم عليه
ندى عافتهم وطلعت .
_عيني ابو محمد شبيك هي تريد مصلحته وحريصة عليه.
حكيم يدري بيها ضاجت لان وعدها يوديها لبيت اخوها ورجع بكلامه هو حب يشاقيها بالبداية
بس هي طنكرت عليه وعناد بيها راح يطلع حماده يونسه .راقبها شلون تتعمد استفزازه ومسوية روحها ممهتمة وهو كلشي الا واحد يعانده .
_استغفر الله العظيم.
استغفر ربه والتفت لابنه بابا اذا كملت روح غسل
وتعال للصالة .
حماده سأل بلهفة ..بابا شوكت نروح .
جاوبه ابوه وهو يمسح على راسه بحنية..العصر من شوي الجو يغير هسة حارة

ام لينا وصت بنتها ..كملي غسل المواعين اني رايحة امدد شوي بغرفتي .
دخلت ندى للمطبخ..حصب الجاي متشربين
_لا حبيبة من اكعد يلا ماما لينا سوي الكلت عليه
_ادللي ماما هسة اغسلهن.
ندى صبت جاي واخذت الكوب لحكيم الكاعد بالصالة
وحماده مدد بالكاع وجوة راسه كوشة ويدحك عالكارتون.
خلت الكوب عالطبلة ورادت تروح جرها من ايدها
وكعدها بصفه عالقنفة..
اعترضت بصوت خفيف..حكيم عوفني.
اتقرب عليها وشاورها ..ولج شبيج كلبتي الخلقة
يابة العصر جهزي نفسج .
مدت ايدها ودفعته ..وخر انت تعصبني وبعدين
حضري نفسج اشو مااطلع .
دارت وجها للجهة الثانية وهي مضايقة .
مد ايده وخلاها على وركها وبدا يمسدلها ..جسمها كزبر التفتت محتجة ..
_يمعود ابنك كاعد ولينا بالمطبخ
عيونه ذبلت وقرب راسه من وجها وطبع بوسة على خدها ..شعندي غيرج ولج والحسين ميهلي زعلج
ههههههه غير ينكطع علينه العسل ويصيبنا جفاف
طككت عيونها ..حكيم شنو هالحجي .
_جاا اجذب انه عمي انتي كوية وماعندج تفاهم
راسا اطنكرين وانه وين انطي وجهي .
ندى حست بي يريد يرضيها محبت تلح عليه
ابتسمتله وهو من شافها ضحك ..اااخ شلون شفايف
حلوات من يبتسمن .
شاورها ..تعاي فوك اشتاقيتلج .
همستله ..قبل شوي مو جنه فوك وارتاحيت يعني مااكتفيت.
دحك بعيونها العسلية ..والحسين ولا اشبع منج
…كمل شرب جايه وكام اشرلها امشي فوك
_ووووين لا عفيه متشوف حماده كاعد هسة يكوم يدور عليك.
دحك على حماده ..لااا هذا ابن ابوه كلبه عليه..
_بابا حماده انه اصعد لغرفتي لاتلحكني شوي وانزلك….

حماده ماالتفتت ..بس العصر نطلع
هههههههه خرب غيرتك هههه تخرب عالطلعة يلا العصر نطلع.
صعد حكيم واشر لندى الوجها ورد من الخجل
وبقت ادردم يربي شبيه ابد ميشبع .

*******
خابرت امها وطمنتها ومخلت المكالمة من دموع الطرفين ..بعدها طلعت للمطبخ بعد ماحضرت ملابس
لحسان ..انتظرته لما خلص واجى كعد والكشخة والعطر سطروها ابتسملها ..يلا بوية اتريكي .

بعد مكملوا الريوك وغسلت هند المواعين ورتبت المطبخ شوي لان مجان يحتاج ترتيب دخلت للغرفة
فتحت الكنتور وطلعت قفطان مغربي اوف وايت ومطرز بخيوط ذهبي بدلت ورتبت شعرها وخلت
مكياج بسيط لان متحب الطوخ وهي شكلها حلوة حيل عيونها وسيعة عسلية ومجرورة وبالكحل
تطلع تجنن
انتبهت على حسان دخل واتقرب عليها ..داخ بيها
شكد حلوة ونازكة من البارحة لليوم يحس روحه
مفرفحة عليها وهو الجان ممتقبل هالزواجة بس لخاطر الشيخ سالم قبل بيها وهسة دايخ بيها
متعجب بروحه شبسرعة حبها اي اي احبها
يابوية كلبي يدورها دواره والفكر كله يمها مد ايده
وعدل شعرها ومسح عليه وذب تنهيده..حبيبة
حطي شال على راسج من نطلع .
دحكت بوجهه المعكوس بالمراية.. حسان عفية
اني ماالبس حجاب .
ركزت عليه تريد تعرف رده..
حظنها من ورى ودفن راسة بركبتها وشمها حيل
..ارتعش جسمها وحست بخدر
_هسة انتي مرة الشيخ حسان وهنا كل النسوان
لابسات الحجاب رفع راسة ودارها عليه ..شنو
ماعندج شال اي غطا للراس
_لا والله
عافها واخذ موبايله ..هسة اخلي ام عمار اجيبلج
من يمها .
اعترضت لان متريده يفرض عليها شي ممتقبلته.
_لا حسان لاتتصل ماريد البسه ماحبه .
استغرب منها ..شنو المتحبينه اكو وحدة متحب
الستر والحشمه .
_اعتقد ملابسي محتشمة فماكو داعي البس حجاب.
_هند لاتشوفيني عبرتلج عن شوكي وحبي تردين تمشين حجايتج لااااا بعدج متعرفيني عندي كلشي
بحدود وكلمتي متصير اثنين فاهمة وهسة
تلبسين حجاب ومااسمع اي اعتراض
_يووووو ماريد البسه شنو هو جبر .
ضاج من نرفزتها وطكك عيونه بيها ..هنددد
ماريد كلام زايد الكلت عليه يصير
عافها وطلع ورى شوي دخلت سمر بعد مادكت الباب
وطبت شايلة علاكة بوست هند وباركتلها ..هاج
حبيبة هاي شالات اثنين بعدهن بجيسهن مملبوسات
..اخذته منها وشكرتها حطته على راسها وهمزين طلع لونه كريمي موالم ويه القفطان ذبتة على راسها
مالفته
_يلا عيني اكيد حسان ينتظرني .
_اي كاعد بالصالة يلا حبيبة اللهم صلي على محمد وال محمد شنو هالجمال ههههه الله يساعد الشيخ
هسة كليبه مفرفح عليج.
استحت هند من حجي سمر حستها حبابة وتحب
تتشاقى.
ابتسمتلها وطلعن من شافها حسان كام وتقربلها ..لفي حجابج زين ماريد شعراية طالعة ..درت بي ضايج محبت تعانده فرت الشال بعد ما لمت شعرها ..طلع كدامهن قفلت هند الباب وطلعت تمشي وسمر بصفها
البيت كولش قريب بيناتهم ممر مكشى وداير مداير البيت اشجار وزرع
دنل حسان وهي وسمر وراه ..السلام عليكم
_ياهلا ياهلا رحب تلشيخ سالم بيهم حسان باس راس ابوه وامه وقدم هند الجانت واكفة وراه ومستحية .
_كل الهلا بعروستنه الحلوة هلا ببنيتي
سلمت عالشيخ وباست ايده وراسه ..شلونك عمو
….باسها بكصتها هلا ببنيتي نور البيت بيج.

تقدمت وباست الشيخة الجانت واكفة رافعة راسها
ودحك بعين ضيكة ..هلا بيج ..
ردت من كفى خشمها انتبه الشيخ سالم ورد لهند
تعالي هنا اكعدي بصفي ارد اسولف وياج .
كعدت هند بصفه عالقنفة بالهول وبدا يسولف وياها
يسألها على اهلها .
حسان يراقب شلون هند اندمجت بالحجي ويه ابوه
وحب هذا التقارب بس الضايقه من شاف امه عاملت
هند بتكبر ميلوك بيها يدري امه متواضعة ويه الكل
ليش هيج تتصرف يعني مصرة على موقفها
شافها تراقب هند فحب يشاقيها ..ها يمه شلونها
مرتي .
التفتت وخزرته وحجت بصوت سمع الكل ..جا انه شفت منها غير بس التكشخ .
_يلا الايام جاية وتعرفينها زين
_ايييه الله كريم
الشيخ مااهتم للحجي السمعه وكعد يسولف ويه هند
الي احمر وجها من كلام الشيخة .
ويه روحها حجت هاي شبيها عبالك معاجبتها
وتخزر بعينها .اوي شعليه بيها همزين ماساكنه وياها

*******

رن الموبايل وانقطع ورجع رن وحكيم نايم دخلت ندى كعدته ..حبيبي موبايلك مبطل
مدد ايديه وتثاوب وهو يمط بجسمه ..ايباااه شلون
نومة حلوة والله جنت محتاجها
رجع رن الموبايل فتحه..وعليكم السلام
اها ليش مجابوه بالفوج يمنا
اي ديلا ان شاء الله باجر من الصبح اني بالمقر
امير معرفت اذا كانوا معذبينه .
استغفر الله ديلا يابة الله وياك..هاا يمعود شبيك
اي اي همزين ذكرتني والله راح عن بالي هههههه
هاي هية بيها الخير الله وياك .
التفت على ندى الجانت مركزة وياه وسألته..خير
خوما اكو شي .
اتنهد وفرك راسه ..لااا ماكو شي.
يلا اني اسبح حتى نطلع نونس حماده بعدين اوصلج
لبيت الحجي .

من شاف ندى طلعت اتصل على اروى وخبرها عن اخوها الجان محبوس بمقر ثاني تابع لفوجهم
وراح يحاول يطلعه ان شاء الله.
بس اهم شي يكون ممتورط بأي شي

شمر الموبايل ودخل للحمام

جانت الطلعه حلوة بحيث الكل تونس ذب ندى وحماده ابيت ابو علاء على اساس يرجعلها بالليل

ندى بقت تقنع ام علاء الجانت كاعدة وتبجي على هند واخذتهن السوالف بعد ماانجمعن ريمة وامها
ويه العشا اجى الحجي وعلاء جانت لمة حلوة ناقصها هند مثل محجت رحاب فمن سمعها
ابو علاء ..يابة البنية راحت يم ناس والنعم منهم
لاتبقن تتبجبجن عليها .
ام علاء ردت..والله الصبح خابرتني وتكول مرتاحة
_الحمد لله لعد شكو بعد اهم شي راحتها.
_والله ياندى احسها شالت البيت
_حبيبتي البركة بالموجودين وان شاء الله ربي يسعدها.
_اامين يارب.

بهالاثناء جان حكيم يتعشى بالبيت من كمل دحك على لينا..بابا ليونة جاي من ايدج الحلوة .
_يدلل خالو الحلو.
هههههه الله يحفظج
التفت على سلمى ..تعالي للصالة عندي حجي وياج.
بقت لينا تعزل المطبخ وخلت القوري عالنار.
ورى ماكملت ودت الجاي لامها وخالها وسمعت
امها تحجي..مجاي اقتنع بعدها صغيرة.
_يابة الولد اني ضامنه والنعم منه ابن شيوخ واصل
_ابو محمد مااكدر افاركها لو بغداد عادي بس الناصرية بعيدة هو اني من تزوجت هندة كلت الله يساعد امها شلون فاركتها .
_هسة عليش مستعجلة فكروا انتي وليونة وانطوني خبر

من شافوها جابت الجاي سكتوا بس لينا درت على شنو جانو يحجون كلبها جان يدك حيل وتخربط وضعها ويه روحها تحجي..عززا بس لا صدك يمه
عيني شلون ابتعد عن ماما ..
خلت الجاي عالطبلة وراحت عالسريع لغرفتها
كعدت عالجرباية وبقت تفكر منو هذا الخطبها
اكيد يعرف خالو من هذا يمدح بي .

*******

رايح جاي يتمشى جدام الحقل المربين بي عجول

ويدردم ويه روحه انه شلون ابقى اتفرج هيج
طكت روحي منه بس خلن يصبرلي والله لخلي الوادم تسولف بي .
_ها يرجال جا شمالك دوختني اركد هان وسولف

….اتقرب وكعد على واحد من الكراسي المخلينها
اباب الحقل ..ولك هذا ما بعد يتحمل واشر على كلبه
كلبي طك منه ليش عود معتبرينه الكل بالكل
وانه محدن مهتملي .
_لاااا عامر ترى يحبونك بس انت عقدتك الشيخ
حسان .
_جويسم بسك عاد لا كل حجاية وكلت عقدتك
ابتسم جاسم ..جا موش الحجي صدك عامر لاتنسى
هو ابن عمك ونسيبك.
عظ اصبعه..اااخ والله محدن واكف بعيني غير ام
حسين بس بعد ما حط اعتبار لحد كافي كلبي
موجر انت ماشفته قبل جم يوم شلون دخل روحه
بسالفة الطاحونة
_ياخوي الله كريم بعد ما بايعها صاحبها
_ايييه وانه انتظر لما حظرت جنابه يبيعها لحسان
…سكت جاسم لان يدري يغار من حسان ويريد يصير احسن منه .
دحك على كشخته يتكشخ دوم ويبرز بروحه صح هو
زلمة سبع ومعدل بس هاي الغيرة والحقد على حسان
مخربته.
بعدها كام ..انه رايح للبيت وانت دير بالك هنا ماريدك تهمل الشغل .
_لا تطمن
ودعه وراح وبقى جاسم صافن عليه لحد ما صعد سيارته الاحر موديل دك هورن ورفع ايده جاسم الي تنهد ورجع
كعد يفكر بحجي عامر .
الاثنين اصدقاء الروح بالروح بس جاسم دائما من يشوف عامر يدك خباثة يحب ينصحة بس مايلح
عليه يدري بي خبل وكلشي يطلع منه فيسكت مرات يتجفى شره .

وصل عامر للبيت ومن دخل شاف حسوني يخطي
بالمطبخ دنك عليه شاله وبقى يبوس بي..ها بعد ابوك
ليش وحدك وصاح على مرته..امااال امااال
دخلت للمطبخ مستعجلة ..هلا بعامر جاي من وكت
.
دحك عليها ..وين رايحة بهالكشخة
_اروح لبيت اهلي اشوف مرت حسان .
ضاج وراسا حجى ..البارحة جنتي يمهم اركدي ابيتج
انه جاي ارتاح اريد اتغدى وانتي تردين ترحين لاخوج.
ضيقت عينها وتقدمت اخذت حسوني ..الغدا حاضر وملابسك وحمامك جاهزين .
خزرها ..انه اريدج كدامي يلا فوتي للغرفة بعدين
روحي .
طككت عيونها عليه عافها وطلع من المطبخ ويه روحه حجى ااخ من هالعيون التذبح شراح يفظها
ويه اخت حسان الراسها يابس جنها اخوها اااخ
لوما احبنها واموتن بيها .
اماااال وينج شو تعاي

راحت وراه للغرفة تدري بي من يدك عناد وياها
وهي تعرف شلون تسيطر عليه وتقنعه ههههههه

*******

من رجع للفوج وقرر يروح يشوف اياد دخل لمكتب
العميد رافع الي رحب بي ..حكيم جان على اعصابه
لان يدري رافع وحقارته بس شيسوي وعد اروى يساعدها ولازم يتحمل حقارة رافع .

بعدما كعد سأل رافع بصوت هاىء لان ميريد يأزم
الوضع ويه رافع خل يستفاد منه .
_جابولكم هالاسبوع ولد متهمينه بالارهاب
ارتجى رافع بظهره على الكرسي..منو تقصد
_اياد العلي
حجى رافع باستهزاء ..ايه هذا ارهابي جريدي.
..عظ على شفته بقهر ااخ لوما شغلتي يمك
والله لو تتعلك ماالتفت عليك .ويه روحه جان يحجي وكاتم عصبيته .
_اريد التقي بي واكون ممنون منك.
_اي هسة اخل يجيبوا
دقايق بعد ما اتصل على واحد من الضباط ودخل
اياد من شافه حكيم كمز من الكرسي وتقدم عليه
وبقى صافن على وجهه المورم من الكتل ..التفت على رافع انت تأكدت من التهمة حتى اتعذبه
_عقيد حكيم شغلتنه هاي وانت اعرف
التفت حكيم على اياد المبين عليه المذلة خطية متبهذل هلكد ممعذبينه شافه طويل وضعيف
ومبين عليه الخوف .
رجع حكيم كعد ومحجى ويه اياد ميريد يبين
معرفته بي.
_خل ياخذوا
_شنو سالفتك
ورا شوي فضى المكتب حكيم التفت على رافع
_اياد بريء والعرفته صديقه عند علاقه بواحد
من الارهابيين ليش تعتقلون اياد.
_حكيم من الاخير شنو علاقتك باياد
_وانه من الاخير اكلكياها تطلق سراح اياد لان بريء
_هههههههه لا ااا ماعرفتك منو الموت ولا يشوف ارهابي واذا وكع بيده نترحم عليه.
_عميد رافع كلامك صحيح بس الولد بريء
_اعتذر منك وراح احوله محكمه
كمز حكيم وضرب الميز بايده واشر باصبعه ..
_لاتخليني اوكف ضدك وتعرفني زين فأتكفى شري
واطلق سراحه وتكدر تكول مجرد اشتباه.
_عقيد حكيم لاتهددني
عصب رافع وبقى خازر حكيم بعيون حاده
_والحسين اذا ميطلع اياد وهسة اخذه وياي
لاقدم ملفك لرئيس الوزراء مو للوزير واخليك
تعض اصابعك ندم .
كام من مكتبه واتقرب على حكيم الجان الغضب
يجدح بعيونه.
_ماعندي ملف واحترم روحك تراني اعلى منك
رتبه

حجى باستهزاء وهو يخزر بعيونه رافع الجان
ممصدك الكلام السمعه .
_والله انت اعرف بروحك بس خل اذكرك
زين بملف…..

*******
التقيكم بالفصل السادس عشر

ان شاء الله النصر لعراقنا وعراقييننا والرحمة والخلود لشهدائنا✌✌✌