قصة روابط للكاتبة |جوهرة السلطان

الفصل واحد وثلاثون

بقلمي : جوهرة السلطان *

حبايبي القصة بنهايتها واشكر من تابعني وقرا قصتي
وصوتلها بس عتبانه عليكم ليش التصويت قليل
اتمنى القصة نالت اعجابكم ان شاء الله انزل البارت
الاخير بس اريد تفاعلكم ودعمكم للقصة حتى انزله
للبارت الاخير …?
ان شاء الله بعد هذه القصة راح انزل (قصة الرجل الاخر ) احداثها حلوة وبيها اكشن ادور الاحداث
بين ديالى وبغداد …النقيب نشوان عادل سليمان
من ديالى والدكتورة ملاذ من بغداد .
اريد تفاعل وتصويت ومتابعه حتى انزل القصة
تحياتي للجميع تحياتي للنساء الراقيات .?????????????????

********

شلون يمه اخيك بالسجن وتريدني ارتاح ..
ردت بلوعة كلب مذبوح على خالد الكاعد بصفها
ومجان حاله احسن منها بس يشوف امه تعبانه
واكلها قليل وجاي يقنع بيها ..
_ بقوة الله طالع اااخ بس لو يوكع بيدي السواها اشرب من دمه.
ام حسان لافه راسها بشيله وايديها اثنين على راسها
وتلوب ..يمه وليدي شكال هسة ابو نفس العزيزة
شكال وهو محبوس ويهينون بي يممممه سودة بوجهج عالية اووف يمه دخيلج يالزهرة اوكفي لوليدي بشدته .
خالد مدنك راسه والدمعه بعينه مخنوك ينتظر فرج رب العالمين علاء طمنهم ان شاء الله خير بس يراد صبر وهاي صار شهرين وحسان بالسجن .
انتبه لامه..كوم يمه يم ابوك بالمضيف لا تعوفه وحده
_عمامنا هناك وصلاح ما عايفه تدرين بي دومه هان.
_ايييه اخي حسان هاذ المايوم خان بي الله يحفظه
بس يمه هم خطيه تارك اهله ووليده ومجابلنه.
_يمه مو تدرين هو ذراع حسان بالشغل انه هاي امور الادارة ماافهم بيها هو يعرف هاي شغلته من زمان
بعدين لاتخافين على ابنه يعرف ام صلاح امه
يلا يمه ديري بالج على رويحتج يبعد كليبي .
باس راسها وايدها وطلع للمضيف.

…..

هند من يوم الاعتقلوا حسان متبات بالبيت بس تروح
تنظفه كل جم يوم وتروح تسبح تبقى شوي وترجع وكاضيتها بغرفه الشيخ …وتساعد سمر بالشغل رغم متقبل تكلها حامل خاف مابيج حيل.
بس هند تحس حملها تمام وبعد ايام تدخل السابع
بطنها كبرانه والحمل زايدها حلاه .
كاعدات يلفن دولمه فارشات سفرة بالكاع وحاطات المواد وجدر جبير يردنه للغدا.
_ام عمار عفيه شوفي جدر التشريب مبيه انهض كل شويه.
كمزت سمر راحت للطباخ كشفت الجدر ضاكته بالخاشوكه ..ولج يخبل شلون طعم عاشت ايدج
رجعت سمر بعد ما نصت عليه النار ..
هند بغصة ..حبيبي الله يفك سجنه يحبه هيج يكول
احبه لان انتي طابخته.
سمر صفنت عليها وردت..هااا مو كلنه مانبجي لا تفاولين عالرجال ابو يزن مو كال عن قريب يطلع.
هزت هند راسها والتهت تلف بالدولمه.
سمر تريد تغير نفسيتها ..عيني هسه يطلع ويشوف
الحلا الكدامه والكرش والعباس يكضج بعد مايهدج
يطلع بيج قهر السجن.ههههههه
استحت هند..سمرررر عفيه لاتحجين هيج.
_دكومي.. استحي جا هي بيها مستحى عافج كرشج ممبين وهسه منفوخه ما شاء الله شوفيها شلون
تارسة الدشداشه.
_ولج سمرة صلي على نبيج شبيج عالبت .
ضحكت سمر لعمتها ..هههه عمه شبيه اشو جاي انصح بيها مو بله هنودة.
كعدت الشيخة وياهن حطت ايدها تساعدهن
_يمه هندة راح اوصي ليلى تشتريلج دشاديش عراض مناك من سوك الناصريه .
_تسلمين عمه بس خطيه تكلفيها جهالها والبيت خاف
متكدر عندي دشداشتين ماما قبل اسبوع من اجت جابتهم.
ردت سمر ..همه تلاثه بس شلون وكحين خطيه شوي
وقاسم ينجلط .
_شنهي ماتكدر جا هي بنص الولايه كاعدة ورجلها
ميكول يرجع من المدرسه يوديها..ولج سمر ليش تحجين على الفريخات.
ليلى متزوجه ابن خالها اخو سمر وكاعدين بالناصرية
وظيفته مدرس فيزيا .

_عمه يافريخات اشو الجبير شوي ويصل لطول ابوه الله يحفظه
_ديلا همن خاف يجون للشيخ خطار وشيخلصنه
يبقى يحجي على غداجن وين صار .
كملن وشالت سمر الجدر ذبته عالبريمز بالكاع ..ساعه
ويستوي
راحت ساعدت هند ولمن الغراض وكفت هند عالسنك
تغسلهن .
دخلت امال سلمت وكايده بيدها عمار ابن خالد وشايله حسين
باوستهن وكعدت عالقنفه بالمطبخ.
سمر اخذت عمار ..يمه وليدي ليش باجي.
_خالد طلعه من المضيف يكول خبصنه بس يكمز ويجرجر بالطبلات.
_اترخص منج حبيبة اروح اسبح واسبحه وابدله
بادع بروحه شوفي جاب الكهوة على فانيلته.

طلعت سمر وامال دحكت على هند الملتهيه بتنضيف
المواعين والسنك.
ام حسان كعدت يمها واخذت حسوني بوسته ودحكت بوجه امال ..شبيج يمه مبينه مامرتاحه.
_يمه تعاركت ويه عامر واجيت .
_ليش يمه هسه وكتها احنه بيا حال.
التفتت هند عليهن نشفت ايدها ورى مكملت واجت كعدت عالكرسي يم الميز خلت ايدها على خدها
وصفنت على امال المبينه باجيه ومقهورة.
_اي يمه وكتها العركة ويا هاذ واحد ميستحي ولا عبالي هيج يطلع ادري يغار من حسان بس مال يتشمت بي ويكول يستاهل ما اقبلها هاذ اخوي تاج راسه شلون ترديني اسكت قبل شوي يستهزا ويقشمر على حسان ماتحملت صيحت عليه جان يضربني
كفخني على راسي والله اثوليت وجبت حسوني واجيت .
ذبت ام حسان حصرة وهند فاكه حلكها ممصدكه هذا عود ابن عمه وزوج اخته شلون هيج يتشمت بحسان.
_عمتج وين هي وعمج.
_جانو كاعدين حتى امير ولينا امير تخبل من سمعه
وتعارك ويا راد يضربه بس عمي زمخ بامير كاله زعاطيط جدام نسوانكم تتذابحون.
ورزل عامر كسف احواله وهو خله وطلع واني اجيت
هان.. عمتي حلفتني مااجي بس انه بعد ما اتحمل.
والعباس يمه كمت اشوفه شيطان من يحجي على اخوي مااكدر اتحمله وانه روحي طالعه من الحباله
احس نفسي تعبانه وظهري جنه مقسوم يوجعني
_اسم الله يمه خل العصر خالد يوديج للدكتورة..

حسوني ضاج يريد ينزل راح على هند يمشي سريع
يحبها لان تضحكله وتنطي حلويات كولش تحبه ومتعلقع بي هو وعمار حسوني بعد ممكمل سنتين
بس يفتهم عبالك اكبر من عمره .
بوسته وتريد تشيله …لا يمه عوفي لاتلهدينه على بطنج خافن يدفرج.
_خطيه عمه يريد بحظني .
_تعال ولك لاتصير مشيطن .
صاحته امال مقبل يجيها وطلع يركض ويضحك بالكراج .
كمزت امال ولزمت ظهرها لان وجعها شوي وطلعت
ورى حسوني .
حسوني راح يركض للمضيف عثر وكع كام يبجي
شاله صلاح جان توا طالع يريد يروح لأهله شلداله
بحضنه باسه بخده وسكته..لا لاتبجي يبوي .
حسوني يبجي ويأشر عالبيت ما ما ..ماما

اخذه صلاح وصل للكراج وانطى ظهره للبيت خاف
وحدة من النسوان برى ولو يدري بيهن ميطلعن هيج وكت وصاح ..عماااار عماااار تعال اخذ حسوني
صلاح سوا هيج لان يدري يسمعنه وراح يدزن عمار
عليه .
بس تفاجأ بأمال عرفها من صوتها بدون ميلتفت
..مشكور يخوي .
صلاح نزل حسين الجان يبجي من الوكعه
مستهضم وكال وكع بالكاع ديري بالج عليه ..وطلع للبيت بدون ميلتفت عليها.

اخذته امال ودخلت للمطبخ .وهو من شافها سكت.
سالته امها..ليش يبجي .
_مدري شفت صلاح شايله يكول لكيته واكع. 1

…..

شهرين مرت على حسان كضاهن قهر وحصرة
ممتوقع الجاي يصير بي انتبه على واحد من المساجين الوياه بالزنزانه لان حولوا وياهم بس نفس المقر البي علاء السوا المستحيل هم وامير وحكيم حتى يبقى ميرحلونه ورفع بي كتاب على اساس جاري التحقيق بقضيته.
حجى السجين ..تعال يخوي مد ايدك اكل لكمه.
تنهد وذب حصرة ..تسلم يابه اكلوا بالعافية.
ماله نفس ياكل حتى جسمه ضعف ولحيته طالت
ومبين عليه التعب ..اهله على طول يحاجيهم
وهذا المصبرة وعلاء ممقصر ويا يدز عليه بحجه التحقيق ويكعد يسولف وياه حتى اكل وملابس
يجيبله.
هذا الشي خلاه يحترم علاء ويقدره لان وكفله وكفه
مجان متوقعها منه بعد الشافه بزواجه من هند.
علاء رجال معدل وكد كلمته بس طبعه كبريائه زايده
والمقابل يحسه غرور.بس هو شخصيه واثق من نفسه.

……..

العقيد حكيم المالكي بعدما سلم عميد رافع وانحبس
قدم الملف المليان بلاوي وعلى اثره تحاكم رافع على الملف وعلى قضيه الخطف هو وحراسه وانحكموا
جم سنه سجن .
الشيخ ضرغام اتصل على حكيم وحجى وياه اذا
يريد كعده فصل عشاير لان شيخ عشيرة رافع
جاي للشيخ ضرغام للقرنه وجايب وياه شيوخ عشاير
ووجهاء يردون حكيم يتنازل عن قضيه الخطف تبقى
بس سالفة ملف رافع .
حكيم طلب من الشيخ ..ابو الاشتر ترضاها عليه
بعد السواه هالكلب .
_لا والله ما ارضاها وانت عرفت شلون تاخذ حكك
بس انه كلت انطيك خبر لان يردون يفضونها بفلوس.
_والحسين لو يجمعون فلوس الدنيا كلها ما يرفلي
جفن هاذ هو حك ابني اخذته وهذاك هو بالسجن
يصوصي.
_انه راح افضها من يمي يلا سلم عالاهل بحفظ الله.

_على راسي شيخنا بارك الله بيك الله وياك.

التفت لندى دخلت للغرفه وبطنها تمشي كدامها ضحك من كل كلبه عليها جنها بطه من تمشي واجر النفس كوه…هههههه تعاي يابه تعاي كعدت يمه عالقنفه بغرفتهم حظنها ودنك باس خدها..وخر حكيم
بس تضحك عليه.
عصرها بحظنه ..اموووت عليج والله غير طالعه
تخبلين شلون خلقه فدوه لربج
_ايييي قنعني بسوالفك .
رفع وجها ودحك بعيونها وسبل عيونه وهجم عليها
يبوس بيها ويشم بركبتها ندى من هيج يسوي بيها
بعد تنسى نفسها وياه حظنته حيل وبادلته بوساته
….فزو على صوت حمادة دخل يركض وجيت على ابوه عباله ديلعبون هههههه
لان حكيم كلما يجفت محمد عليهم وهمه بهيج وضع
يكله جاي العب ويه امك.ههههههه
ندى متقبل على سوالفه تكله الولد ينحرف وانوب يروح يقلدهم .
حكيم من حماده جيت عليهم..ايا ابن ال…
خل اسكت احسن جا انت متواعد وياي شنهي سالفتك.
حماده يكمز على اجتاف حكيم جره خلاه بحظنه وبدا يدغدغه ومحمد خربان ضحك.

ندى ادحك عليهم ومبتسمه وبكلبها فرحه جبيرة وتدعي الله يحفظلها زوجها وابنها

حجت ويه محمد ..ماما كتبت الدرس .
حماده ممنتبه كاعد يلعب مصارعه ويه ابوه.
_حكيم عوفه خل احاجي ..حماااااده كملت درسك.
_كملت وجهتين.
_عفيه حبيبي السبع .
حكيم شخبار شيخ حسان مو كلت عن قريب يفرجون عنه.
_كافي بابا روح لعمه سلمى كلها بابا يريد جاي امك صاير بطه وكوة تمشي همزين اخذتلها اجازة من الدوام جان الطالبات صنفن عليها ههههه
_حكيييييم .
_جا مجذب ديلا حبي لا تعصب فدوه لهلوجه .
طلع حماده على عمته والتفت عليها ..ااااخ تدرين
شيخ حسان مدبريله مكيده بس منهو الله اليعلم
وان شاء الله عن قريب لان لكو شي يساعدهم
هذا علاء يعجبني ذكي وسبع لوتشوفينه شلون مهتم
بقضية حسان هو ونقيب سامي .
_زين انت مو مسؤل بواحد من الافواج متكدر تساعده .
_انه سويت الاكدر عليه سهلتلهم هواي امور ماتعرفيها وماريد ادوخج بيها.
_خطيه هندة يوميه اخابرها اطمن عليها والله لوما حملي المتعبني جان رحتلها ميته قهر على حسان
تكول ممصدكة يطلعوا.
_لا خطيه طمنيها واكيد علاء يطمنها.
بعدين تعاي جاي وين ترحين للناصريه الطريق مو زين عليج ان شاء الله من تولدين عود روحيلها.
_ان شاء الله اوووي حكيم شوكت اولد طكت روحي
دخلت بشهري وماكو شي .
تقربلها حكيم وغمزلها..شلون عندي طريقه تخبل
اشو تعاااي.
تريد تنهزم ..لااااا عليك الله مبيه …حكيييم.
حكيم كضها وخلاها بحضنه يضحك عليهااا..ههههههه
شبيج ولج اشو تعاي ننزل تفكيرج منحرف .
طككت عيونها ..ياااا اني.
_جااا انه دمشي امشي ام الاني .
دفعت ايده ومدت بوزها ..معليه وخر بس اصنف عليه.
حضنها ..اووف اموت عالزعلان يبوي ماصنف بس انتي حجاياتج مايعات .
_اي شبيهن لعد انت وسوالفك ابو الجا والشنهي هاي
ههههههه.
مد ايده ورفع راسها خزرها بس كاتم بداخله ضحكة
…ولج هاي اصنفين عليمن .
عبالها زعل شلون حياله مدت ايدها ورتبت شاربه
الاسود..فديته لرجلي تخبل الجا من تحجيها اخرب
عليها .
باس شفتها بقوة..اي عفية مريتي يلا امشي ننزل
وحطيلي كليجه كيك شعندج تراني جعت ويمكن راح اكلج ..دنك عض اذنها على كيفه دفعته وفركت اذنها ..اوووي .
هههههههه هاااا مو اكلج سوالفج مايعه ديلا امشينا.

……..

_امير ليش ابو حسين يختلف عنكم يعني ابو عباس
وعمو ..تقربت عليه تمسد بشعره ..وحبيبي اموري
احسنهم فديته.
جر ايدها وعضها …اااي امييير
كزكز سنونه وقربها حيل..انطيني شمه اوووف ميت
عليج ….ضحكتله بدلع وحضنت وجهه بايديها
_ انه احبنك اعشكنك اموتن عليك يبعد طوايفي
ههههههههههه حضنها وهو خربان ضحك ..فديت
مريتي المتأثرة بمسلسل بيت الطين جا جويه شلونها
لينا مرتاحه بحضنه كولش صارلهم شهرين متزوجين
بس تحس روحها تعرفه من زمان تعودت عليه وعلى
اهله تحس بحبهم الها رغم جانت هي وامها متخوفات بس الحمدلله مرتاحه امير يحبها وهي تبادله حبه بس تحسه هواي متعلق بيها ومن يلتحق
يكضيها اتصالات يكلها مشبعان منج.
رجعت لنفس سؤالها..مجاوبتني بخصوص عامر.
تنهد امير ..عامر شوي مغرور وهذا طبعه احنه متعودين عليه ليونه لا ادخلين نفسج بطاري عامر
عوفي هاي السالفه.
امير مايريد يحجي بسوالف عامر لان هو مراضي على تصرفات اخو يحسه متشمت بحسان وفرحان
بالصارله يدري يغار منه بس مو توصل بي يفرح لسجنته.
انتبه عليها ..وين رايحه.
_حبيبي اروح احضر العشا خطيه عمه وحدها وامال
صارلها يومين يم اهلها صدك احجي ويه اخوك يرجعها والله ضايجه بدونها سوالفها شكد حلوة.
تنهد امير..ايييه مو حجينا ولا اهتم جا شبيدي انه.
والله ام حسوني درة وعامر راح يضيعها .
شهكت ..لااا اسم الله ان شاء الله عمو يرجعها لان
متخبل عليها هو وعمتي .
_ماراح ترجع الصبح رحنالها عمي كال هي واعيه
بنتي واانه مربيها بس الخلل بعامر اليشمت باخو
عيب الوادم تسمع ويحجون علينه عائله خوان وعمام
يطلع واحد من ولدهم اعوج.
_يااااا خطيه من هذا عمو النهار كله ضايج
يلا حبي اني حنزل اسوي العشا .
_تعاي تعاي انطيني بوسه تصبيره .
تقربت عليه جرها من زندها لثمها بقوة ..دحك بوجها
وعيونه ذبلانه..روحي بسرعه ترى ماخليج تعتبين الباب .

*********

من خلال الاتصال الورد لشعبه مكافحة الارهاب بدت اجراءات تتبع للاتصال وكدروا بجهود علاء ونقيب سامي ورائد نائل الخدمهم من خلال وظيفته وكفلهم
خوش وكفه تم تحديد الاشارة من قريه الشيخ سالم
العمران وتحديدا الجهة الشرقية من القريه
علاء عرف الاتصال جاي من كاع الحجي ابو جعفر
لان عنده حقول دواجن بنفس المكان .
علاء من حجى لحسان واكدله ان هاي الجهة صحيح
موجوده اراضي عمه ابو جعفر ..طلب منه رقم الارسل الرساله من شافه مكدر يعرفه .
_حسان كل عقلك يستخدم رقمه الشخصي احنا تاكدنا هذا الرقم مرة وحدة استعمله .
حسان بخيبه امل..جنت متأمل تظهر الحقيقة.
_اعتمد عليه اعرف شلون اطلع الحقيقة هذا شغلي
ترى ما حصلت منصبي حي الله .
_تسلم علاء والله معروفك هذا طوك بركبتي طول العمر.
دقق بوجه حسان ورفع تك حاجب..مدام اختي مرتاحه ومداريها وتحبها وتخاف الله بيها هذا الشي يكفي .
تنهد حسان وذب حصرة..اااه ميت على شوفتها
علاء لا عبالك احجيها جدامك انه هند مزروعه بهالكلب واشر لكلبه .
ابتسمله علاء وخفف شوي عليه..ان شاء الله تنجمعون وقريب .
_ان شاء الله.

……

تم ارسال قوة من بغداد القوا القبض على عامر الحاول بكل طريقه ينقذ روحه وحس صدك انكشف
وجان يوكع بلسانه من صيح على جاسم يكللهم
هذا جويسم اعترف عليه مو.
جاسم جان واكف اباب الحقل وجهه مصوفر نكر وحلف ممبلغ عليه بس عامر شبعه غلط وفشار
وجروهم اثنينهم حطوهم بالسيارة العسكرية
حجي عبد الزهرة من سمع لحكهم للحقل وحجى ويه
الضابط..يبوي ليش هيج كبل شهرين اعتقلتوا شيخنا
وهسة جايين على وليدي شني هالظلم ماتخافون
الله …الضابط فهمه.
_عدنا امر بأعتقاله وعدنه ادله ابنك متورط بحبسة
شيخكم .
وطلعوا بيهم لبغداد ليحقق رائد علاء وياهم.
ابو جعفر من سمع الضابط هيج حجى كام يدك على راسه .
ورجع للبيت متلطم بشماغه وعكاله بيده تلكاه امير
الجان توا كاعد من النوم بالكراج ومن شاف هيج
حاله والعكال نازعه درى صايرة مصيبه لان مو هينه
نزعة العكال .
حضنه ..يابه بعد رويحتي ليش هيج شنهي الصاير.
خطيه ابو جعفر مدنك راسه ويدك بدين اثنين عليه
_ياكسرة وجهك يعبد يصخام الوجه شكل للوادم

شكل للشيخ سالم ولك عويمر كسر ظهري عويمر ضحك
الوادم عليه انه الكلها تحلف براسي الكلها تحمد بتربايتي لولدي رافع راسي بيكم يجي عويمر ينكس
راسي .
امير كلبه انخمش هاذ ابو فاقد راح ينجلط شمسوي
عامر الله اليستر…عيوني يابه اهدأ خل افتهم شنهي
السالفه.
عاط ابو جعفر بحركة كلب..ولك من جوه راسه حسان انسجن
وانه اكول شلون يتشمت باخو وابن عمه اثاري يحفر
جوا يريد يوكعه .
امير بقى مصدوم ميعرف شيرد على ابو
دخل ابو للبيت وراح كعد بالحديقه يريد يستوعب السمعه معقولة عامر هيج يسوي وسفه وسفه.

……
بيت الشيخ من سمعوا الصار من ابو جعفر الجان جاي منكس راسه مستحي وفشلان من اخو
دخل للمضيف الجان متروس زلم وخطار راح كبال
الشيخ وشمر عكاله خلا الزلم مصدومه ..العكال وكع
بحضن الشيخ سالم الي فز من تصرف الحجي.
_ابني خطا بحك ابنك يبو حسان وهذا عكالي ماحطه على راسي النزله عامر .
الشيخ سالم فهم شوي من كلام اخوه لان ممصدك
عامر يخطا بحك حسان وتصرف اخو قهره شلون
ينزل عكاله كمز من الكرسي ..ماعاش الينزل عكالك
وانه اخوك نصب عكال اخو على راسه وحظنه
باس خده وشاوره ..انت اخوي ولا تفكر سواية ابنك
تبعدنه .طبطب على جتفه وجره من ايده وكعده .
ابو جعفر حجى للشيخ وللزلم الصار.
الشيخ وجهه احمر وكوة لازم اعصابه لخاطر اخو
صاح بالزلم..يجماعه الخير اخوي ويه كطع النفس
بس حساب عامر اخذه ومن ببن عيونه.
الزلم ايدت كلام الشيخ البين ان علاقته باخو مراح
تتأثر بس راح ياخذ حكه من عامر.
خالد من سمع هو وصلاح تخبلوا صلاح بالاصل ميحب عامر وتحلف ينتقم منه.
بس الشيخ وصاهم ميسوون شي لان عامر اكيد راح
ينسجن .
…….
النسوان بيت الشيخ عرفن الصار من دخل خالد وحجى لامه البقت تتحسب على عامر.
امال من سمعت عاطت بحركة وبجت ممصدكه عامر
هيج يسوي ومن الشوطه صار عدها نزف خالد وسمر
ركضوا بيها للمستشفى جان تفقد الجنين العمره ٣ اشهر سمر خففت عنها جان تنتر بيها ..ولج طبه
طب مو اغلى من اخوي ماريده خله يوكع ابن الجلب
عليش مخلفته لأبو العار لابو لابو الخلفه.

رجعوها منهارة وخلوها بالغرفة البصف غرفه الشيخ
وكعدن يمها يواسنها .
ردتلهن بصوت رايح من البجي والتعب..لا تحجن
خلاص هاذ حتى يكون اخر رابط يربطني بالجلب
الله لايوفقه عالهلعمله .