قصة روابط للكاتبة |جوهرة السلطان
الفصل الثامن عشر
بقلمي : جوهرة السلطان
لعيونكم احلااااا بارت
انا عيوني تسولف عالغرام وياك
ومن عيوني اعرفك تفتهم قصدي
ماحب الوكت لو خلص بلياك
بالقرأن محد حبك بكدي
*****
يشوفها خايفة وتبجي كلبه رجف عليها سبحان الله
من اول مرة شافها انزرعت بنص كلبه يدحك على شفايفها التتراجف من تكول..حماده مات شوفه ميتحرك .
_ولج خلن اشيله الولد صار عنده اغماء من الوكعة
متقبل تخلي يتقرب تدفع بايد امير الي تسودن
من شافها تهسترت وكامت تعيط .
ندى من سمعت حجي لينا خدرن رجليها وكعدت
كبالهم ولزمت صدرهاتفرك بي تريد اجرالنفس مابيها
التفتت لحكيم وهو يركض على ابنه جرا بقوة من
لينا الجانت فاقدة لاول مرة هيج يصير كدامها
وانوب تحبه لحماده كعدت تضرب على رجليها
ولكم طمنوني عنه حبيبي الدم اخذه التفتت
وشافت يزن خاتل بصف امه الجانت تساعد ندى
حتى تكوم خزرته بعين غضب واشرت عليه..اليوم
اموتك والله ادبسز انت الدفعت حماده
ريمة من سمعتها جرت يزن ودفعته الها وحجت بحركة ..اخذي اصلخي جلده ولك تعبتني
هلكدوتك وسوالفك وعمايلك شكبرها
خطية يزوني كعد يصرخ من الخوف عباله
لينا حتضربه انوب من شافته هيج زاد بجيها
واشرتله يجيها بالبداية خاف بس بعدين ركض
عليها لينا حست بخوفه حظنته وبجت عاتبته
ليش يزوني دفعته مو خطية صديقك
دحك بوجها بكل براءة..والله ليونة اني اليد
اصعد قبله ودتتله ولك اودف سلاي هادا
جليته وتعول سار اووا
حبابة لا تذلبيني .(والله ليونة اني اريد اصعد قبله وكتلة ولك اوكف سراي هذا جريته وتعور صار اوا)
امير اخذ حكيم بسيارته لمضمد بالقرية فاتح
صيدلية مو بعيد من بيت الشيخ.. حكيم جان كوة كاض روحه وحماده بحظنه بدا يصحه شاف الشماغ
انترس دم ..ولك امير استعجل .روحة لابت وماضل عنده عقل من يدحك على ابنه الغركان دم.
دقايق وصلو للصيدلية .
خيط المضد الجرح جان غميج اخذ ثلاث خياطات
ساله حكيم ..ليش اتخربط وفقد الوعي
المضمد طمنه ..بعده صغير والضربه براسة راح يبقى راسه يوجعه بس افضل تاخذوله اشعة للاطمئنان
واحسن شي من كدرتوا تضغطون الجرح ..رد عليه امير اي الحمدلله عالسريع نزعته وشديت راسه.
_مشافى ان شاء الله.
شكروه ومن راد امير يدفع الحساب الكشفية مقبل
المضمد رغم اصرار امير .
بالسيارة من رجعوا..عفية عليك امير من سعفته
انوب دمرلك الشماغ.
ابتسم امير وهو يسوق ..فدوه يمعود اهم شي
محمد بخير سكت شوي ورد كمل ..خطيه بنت
اختك حاطته بحظنها وتعيط انوب متقبل اشيله
تهسترت .
_اي هي حيل تحبه .
نزل حكيم شايل حماده بحظنه ودخل للمضيف
تلكوه الزلم كلها باصوات متفاوتة تتحمدله السلامة
نيمه علقنفة بعد ماشربة العلاج مهدىء .
حجي راشد بقى كاعد يمه يدحك عليه ومقهور
دنك باس ايده.. ياحبيبي ياجدو يومية متعور.
حجى ويه حكيم ..شلونها وكعته.
تنهد حكيم الجان كاعد قريب على حماده..٣ خياطات
براسه شبع بجي لما كمل المضمد .
_خابر ندى هاي تخبلت موبايلك صرعنا ناسي تاخذه
وكلساع داكين عليه.
هنده تكول بس تبجي وترجف .
من سمع بندى طار عقله هاي تتخبل على محمد
وانوب شافته غركان بدمه .طلع برا يخابر رنه
وحدة وانفتح الخط..
سمعها تشاهك وتبجي..فدوه حكيم شلونه حماده
كلبه انعصر من سمع شهكتها وبجيها..الحمدلله
احسن اخذله ٣ خياطات وهسة نايم اكلج جايبتله
ملابس .
ردتله بصوت تعبان ..اي جيبه هنا خل اشوفه هسة
كلبي راح يطك عليه.
سد الموبايل واشر لحسان ..
_كول ابو محمد
_شيخ اريدك تاخذ محمد لبيتكم ودي للنسوان
هناك يغسلوله ويبدل ملابسه.
_تدلل هسة اودي ..دنك وشاله حماده جان بين الغافي وبين الصاحي .
دخل للمطبخ تلكنه هند وامال خزر هند التقربت
واخذت محمد ودته لامه الكاعدة بالاستقبال
ويمها النسوان طبعا النسوان البقن بس العائلة
ومرة عمهم ام جعفر.
انطته لندى البقت تبجي من شافته هي ولينا تكابلن
يم راسه زمخت بيهن ام جعفر..لا تفاولن عالصبي
مابي غير العافية ..ام لينا بقت صافنة عليه ومقهورة
ردت على ام جعفر ..والله هالولد عليه نفس من وكعه الوكعه.
الشيخة كالتلها..امر الله الحمدلله اللطف بحاله وحال امه .
ام علاء بوسته من بدى يصحى ..اوف يابيبي
ليش هيج لعبكم يأذي.
تعال بيبي يزن بوس حمادة وتحمدله بالسلامة.
حجت هيج لان شافته خايف ويدحك من شاف
راس حماده ملفلف بالشاش الابيض.
اتقرب وباسة من خده .
حماده دفعه .امشي زاعلتك
رفع راسة لبيبيته..بيبي دولي لا دولي لا
قصده كولي لا لاتزاعله ههههه
يزن عمره ٤ سنوات بس ماشاء الله ذكي ولسان
وخاتمها وكح.
لينا معافت محمد بقت لازمه ايده وصافنه
ورا ساعة كعد دايخ ندى طلعت كلينس مرطب وبدت تمسح ايديه وجسمه وبدلتله جانت جايبه وياها
ملابس احتياط حسبت خاف يباتون.
بس بعد الصار روحها انسحنت وتريد ترجع
للبيت واتصلت على حكيم كاللها تحضروا
راح نطلع كلنا يقصد بيت الحجي هم
الشيخ سالم وحسان جلبوا بيهم يباتون بس حكيم
رفض وتشكر منهم وتعذر بأبنه .
الكل تحمدو لسلامة حمادة والنسوان وصن ندى تخف شوي من خوفا لان من تنهر زايد راسا يبين عليها وضعها يتخربط.
من طلعوا ام جعفر وصت ام لينا تفكر بحجيها.
وعدتها خير .
******
الحمدلله ورى مرجعوا ودوا للطبيب اشعة وفحص
طلع سليم طبعا حكيم مافوتها الهن رزلهن وتحلف بيهن كاللهن هذا اهمال كضيتنها سوالف وعفتنه.
لينا فهمته الصار فكعد يستغفر ميدري شيحجي
يدري يزن شكد وكح .
بقى صافن على ندى الجانت دمعتها بعينها ورغم
شكد حجه عليهن ما ردت عليه بحرف وهي الماتسكت على حقها .
من رجعوا صار اربع ايام ويشوفها تعبانه يسألها
تكله ماكو شي .
سلمى انتبهت عليهم ..ندى عيني روحي ارتاحي
بعدج تعبانه .
وانتي لينا اخذي محمد ينام بغرفته يرتاح احسن
الساعة بال١١
_صار ماما يلا حبيبي كادته على كيفها وصعدت ندى وياهم تمشي بخمول.
حكيم بقى صافن عليهم .
حجت اخته ويا ..والله لوشايفها لندى رادت تموت
النفس كوة يطلع منها خطية بعدها مهبوطة
على كيفك وياها والحمدلله ابنك بخير.
تنهد بقوة ..اااه مدري شصار بيه من شفته غركان بدمه ولينا تعيط انوب متقبل تنطي لامير والله سبع
مابقى صافن مثل العوبات جر شماغة وشد حيل على راس محمد .
_الحمدلله على كل حال ..
_هسة عندي حجي وياك انه كلت خل يفوتن جم يوم
لان بعدنه مهبوطين.
_كولي سلمى شعندج.
ابتسمتله..كل خير ان شاء الله..ام جعفر وامير
حاجتني على لينا تريدها لامير.
_اي وشكتيلها.
_كلتلها بكيف البنية وخالها
_والله ام لينا امير خوش امير
حاجي لينا اخذي رأيها اني ماريد اجبرها هاي
امانه بركبتي .
_سألتها كالت اصلي استخارة واشوف
وصار يومين ساكته .
_ان شاء الله خير.
_حكيم عفية اذا صارت القسمة استرط عليهم بيت
ابغداد لان لينا متكدر تعيش يمهم.
خزرها حكيم ..شلج بهالحجي هاي مو حجي راشد زوج بنته الهم وانت شفتي شلون عايشين بديرتهم
وكياعينهم عبالك امراء .
_اي صدك بس ندى من شافتني مااكدر على بعد لينا
كالت اشترطي عليهم بيت هنا.
حكيم عصب وكام من القنفة وخله ايده بشعره
_شلون بيج انتي يعني تاخذين حجاية ندى راس
مال ندى تريد مثل دلالها واتكيتها عوفج من سالفتها
_الولد ميتعيب اني اعرف الناس بي اعتبره
اخوية قنعي بنتج عليه بس لاتجبريها.
*****