رواية صدفه جعلتني أدمنك

#الحلقة_الثامنه
.
.
.
.
.
لا اسمح بنشرها بدون ماتكتب اسمي عليها
الكاتب:Arhima Alagory قراءة ممتع للجميع
.
.
.
.
.
وطلعنا انا و ندى
ندى:شن صار في عمر
انا:حكينا امس
ندى:شنجوه
انا:عادي كيف اي شاب
ندى:ع اساس تحكي مع شباب انتي
انا:يعني اكويس
وصلنا لحوشنا
ندى:شن تعرفي هضا
انا:من
ندى:لي قاعد قدام حوشكم
انا:هضا أحمد خويا كنك
ندى:تحكي جديات
انا:عليش نبي نكذب عليك شن تعرفيه انتي
ندى:مره نفلقت عجلة سياره جا يبي يسعدني شوي قتله لا بابا جايني في طريق
انا:احمد طلع طيب واللهي هههههه
ندى:كانه متعبك
انا:بكل ديما ينابش فيا
ندي:تستاهلي
انا:حيوانه خلاص تبي شي
ندى: سلامتك حبي
انا:باي
ندي:باي

جيت لاحمد
انا:خيرات حمودي كنك قاعد هنا
احمد:خير يا طشه مليت من حوش
انا:باهي ليش طشه توا
احمد:اكثر حاجه ماشيه معاك
انا:بارد
احمد:اسمعي من بنت هذي
انا:شن تبي فيها
احمد:لا بس شيفها مره
انا:اها صاحبتي ندى
احمد:هيا هذي ندى
انا:هذي هيا
احمد:باه خشي خلاص

خشيت
انا:ماما وينك
ماما:هنا كنك تعيطي
انا:شي شن اديري
ماما:نلعب
انا:نلعب معاك
ماما:كنك يا فرخه نهبلتي
انا:منهبله من يومي هضا وين عرفتيها انتي
ماما:امشي غيري وتعالي
انا:باه

تسريع الاحداث لان تغدينا وجت العشيه وانا قريت في العشيه شويه وكسدت مع ماما وعلي شال احمد للمستشفي فكوله الجبس وجا ليل
بابا:شن ناقص يا فريحه
ماما:لا كل تمام ما في شي ناقص
علي:فحم توا ناخذو بكرى ونحنا طلعين
احمد:لا توا نجيبه توا وخلاص
علي:تمام
انا:بابا وين ماشين
بابا:سوسه
(سوسه) هذي منطقه في شرق بين جبل وبحر موقع صاح جوها سمح ،،حسيت روحي استاذ جغرافيا ?? المهم نردو للقصه
انا:نعلي عليك جو
ماما:امتى طلعين يا حاج
بابا:ساعه8ونص نطلعو
ماما:تمام
بابا:الو يا ناصر (عم رهف) تعرفوه اكيده
ناصر:……..
بابا:تمام كلم فوزي قوله له
ناصر:……….
بابا:خلاص 8وربع نطلع من حوش
ناصر:…
بابا:اوكي
انا:شن قالك
بابا:قال كلمت فوزي وقتله 8ونص نتلاقو عند*** قتله تمام
انا:نبي نخش نرقد بيش نوض بدري
ماماوبابا:تصبحي ع خير
انا:وانتو من اهلو

خشيت دار جيت نبي نرقد اذكرت عمر حاجه قلتلي افتحي واحكي معاه فتحت لقيت فاتح بس ما نبش نخش عليه يقول هذي ما صدقت فتحت معاها قعدت نرجا فيه ما جاني شي طبعا نهدرز مع بنات بعدها جاني مسج كان من عمر مكتوب فيه?
تعرفي بعد شفتك تميتي ديمة قدام ونفكر فيك شفت فيك حاجه ما شفتهش في غيرك ولما حكيت معاك امس حسيت بحاجه غريبه عمري ما حسيتها مع اني حكي مع بنات واجد بس انتي فيك حاجه تختلف عليهن كلهن
انا نقرا وفرحانه وحسيت وقلبي فرحان اكثر مني مش عارفه حاجه اول مره نحسها المهم قريتها رديت عليه
انا:مشاءلله يعني ياما مهدرز مع غيري
عمر:انتي سيبتي كلام كله ومسكتي هذي
انا:ههههه اها نبي نعرف
عمر:شن تغاري
انا:لالا بس ما نحبش حد يشركني في حاجه
عمر:لانك دلوعه
انا:لا مش دلوعه
عمر:باه توا انا ندلعك
انا:نبش حد يدلعني انا ندلع روحي
عمر:سلم روحك
انا:سلمك
عمر:باهي احكيلي ع حياتك
انا:حكيتله ع حياتي وانت احكيلي
عمر:حكالي ع حياته
عمر:عارفه
انا:شنو
عمر:لي يشوفك يعطيك اصغر من عمرك
انا:كلهم يقولو فيها ليا
عمر:لانك طشه
انا:تعقدت وسكرت بدون ما ندزله حاجه

الكاتب:Arhima Alagory

جيت نبي نرقد اذكرت كلام عمر وتميت نفكر فيه بعدها اذكرت طشه رقتلي منه قلت عليش نفكر فيه اصلا ورقدت

في صبح وكان يوم خميس
ماما:هيا نوضي واتي روحك
انا:هي وصبيت دوشت وصليت وطلعت لقيتهم يحطو في دبش في سيارات
انا:مشالله انا الوحيده المتاخره
احمد:طول عمرك متاخره
انا:انت مش شورك
بابا:خلاص انت ويها
انا:هو لي بدا
ماما:باهي صبح خلاص
وطلعنا انا وماما وبابا في سياره بابا
واحمد وعلي في سياره علي
وعيت عمي ناصر في سيارتهم
وعيت عمي فوزي في سيارتهم
تلقينا في مكان لي اتفقنا عليه بعدها طلعنا وتكينا في مرج نفطرو كانت ساعه 10الا ربع
نزلنا طبعا كيف اي عائله ليبية سلمنا ع بعضنا وتقول عيد ولا اول مره نشوفو بعضنا
رنت عليا ندى
ندي:الو وينك
انا:في المرج قاعده توا
ندي:كنك انشالله خير
انا:لا خير ماشين زراده
ندي:باهي تغيرت جو باي
انا:باي

في جامعه
سندس:كنها
ندي:ماشيه زارده مع هلها
سندس:باهي تمام

عند عمر ناض في صبح وفتح نت لقاه رهف مسكره تعقد وطلع يبرم في اسطنبول ويبي يشري بضاعه رن عليه فونه
عمر:غالي
سالم:شنجوك
عمر:تمام وانت
سالم:تمام
عمر:شنجو شباب
سالم:يسلمو عليك
عمر:سلملي عليهم
سالم:يوصل
عمر:شنجو بنغازي
سالم:مكسده بلاك
عمر:خلاص انشاءلله الاحد ولا الاثنين مروح
سالم:كملت بضاعتك
عمر:انشالله كملت خلاص غير ما فيش طيارن
سالم:تمام تروح طيب

عندنا فطرنا وطلعنا وصلنا سوسه ساعه 12 وربع طبعا طولنا في طريق لان كل مره نتكو ع مكان ونصورو وجو الليبيين كلكم عرفينه ?
وجينا سوسه خذينا مصيفين رجاله واحدهم وصبايا وحدهن ونزلنا دبش وكل حاجه وماما وعمتي فتحيه وعزيزه قاعدن يديرن في الغداء
بابا وعمي ناصر وفوزي تمو يهدرزو
وعلي واحمد طلعو يذوحو?
وانا وبنات مع بعضنا
انا:عليك جو يهبل
ريهام: بكل يعوين لي يسكنو هنا
اسماء:راحه نفسيه
دعاء:حتي بنغازي تهبل
المهم تمينا نهدرزو بعدها تغدينا جو يهبل بكل جا ليل درنا شويات ورجاله كسدو كارطه وصبايا قرمة قصدي يهدرزن ?
نحنا مكسدين مع بعضنا
اسماء:يا بنات نبيكن تطلع معايا للسوق
انا:توا
اسماء:بعد نروحو يا هبله
انا:نحسابك توا قبل قتلك هي
ريهام:تبي تشري دبشك
اسماء:اها
دعاء:ساكته
انا:كنك ساكته يا دعاء
دعاء:هذي اخره زراده مع الفرخه اسماء بعدها ياخذها راجلها
اسماء:يا روحي انتي حتي كان خذاني نجيكم ونزردو وحضنتها تمت تبكي
ريهام:يا نكد خلاص
دعاء:خلاص شن رايكن نلعبو
انا:شن نلعبو
دعاء:صراحه او حكم
جا علي:هي وهذي شيشه
نحكيلكم ع لعبه صراحه او حكم مرات في حد ما يعرفهش يديرو دايره ويبرمو شيشه شيشه مياه ولا اي شيشه ولي تجي عليه المغطه يسال الاخر لي مقابله يقول صراحه ولا حكم كان قال صراحه يساله سوال وكان قال حكم يقول حاجه يديرها فيها جو بس
انا وضحتها ولي عليا درتها ?? نردو قصتنا
انا:لالا فكونا منها صامطه
جا احمد:هيا والله كساد كساد

الكاتب:Arhima Alagory

وبدينا نلعبو برمها علي جت احمد يسالني انا
احمد:طحتي حي عليك حكم ولا صراحه
انا:حكم
احمد:نبيك تاكلي فلفل
انا:عينك
احمد:هضا حكم
انا:باه وكليت فلفل وتحملته
برمها علي مره اخره جت اسماء تسال ريهام
اسماء:حكم ولا صراحه
ريهام :حكم
اسماء:جيبلي فوني من شحن
ريهام:هذي بس جباته وجت
برمها علي وجت انا نسال احمد
انا:حكم ولا صراحه
احمد:صراحه
انا:كم مره حبيت
احمد:مش مذكر
انا:مشالله
المهم برمها وبرمها كم مره نين جت دعاء تسال ريهام
دعاء:حكم ولا صراحه
ريهام:صراحه
دعاء:من في قلبك
ريهام:بحتت في علي لقت علي يبحت فيها
انا:نبي نلم الموضوع لا يا دعاء مش هكي
ريهام:انا معش بنلعب وصبت
دعاء:لحقتها حبيبتي والله ما نحسابك تزعلي
ريهام:لا مازعلتش والله
دعاء:كنك صبيتي
ريهام:هك مليت
وجيتهم انا:خلاص هيا نخشو نرقدو وخشينا
انا :نفكر في عمر ونبي نهدرز معاه مش عارف ليش تميت نفكر نين خذاني نوم

عمر: طبعا يرجا فيا نفتح ويفكر فيا
علي: يفكر في ريهام وفي موقفها لي امبدري
ريهام:تقول حي عليا كان علي يعرف من موقفي امبدري

ثاني يوم صبح تسريع الاحداث
فطرنا وكسدنا وادهورنا وتغدينا
انا جيت ريهام
انا:ريهام نبيك
ريهام:نعم
انا:انتي تحبي علي
ريهام:نموت فيه
انا:خلاص قربي منه هذي فرصتك
ريهام:هضا رايك
انا:اها هضا راي
ريهام:انشالله

علي كان قاعد بروحه ويفكر جاته ريهام وكانت لبسه ودايره روحها جو
ريهام:عليوه كنك قاعد بروحك
علي:اوو ريهام والله كساد توا مش بروحي انتي جيتي قمعزي
ريهام:جو سمح صاح
علي:بكل وطبيعه اسمح
ريهام:شنجو ريم
علي:نفصلنا
ريهام:عليش
علي:مش متفهمين
ريهام:انا نقول عليش قاعد بروحك
علي:هههه لا والله
ريهام:وجعتك
علي:لا هكي اريحلي
ريهام:ربي يعوضك خير منها
علي:انشالله
ريهام:تبي شي
علي:اها خليك هدرزي
ريهام:لا نبي نعدي للبنات
علي:براحتك
ريهام:في سرها انت راحتي
علي:ريهام
ريهام:نعم
علي:عجبتني طرحه (طرحه)يعني لبسه سمحه
ريهام:هههه ما تغلش عليك
علي:هههه درتيني بنت
ريهام:حشاك راجل وسيد رجاله
علي:تسلمي

وجتنا ريهام فرحانه
دعاء:كنك تضحكي
انا:شن دخلك بيها

جا علي: هيا تمشو
نحنا:وين
علي:اندهوركم
انا:اممباهي
علي:خلاص انا في سياره
ريهام:واتيه ولبسه جت وركبت
علي:ريهام تعالي قدام
ريهام:لا حتي هنا تمت
علي:قتلك تعالي
ريهام:باه وقلبها يرقص من الفرحه
انا:اوي دلاله لقدام طول
علي:اركبي وانتي ساكته

وركبنا ودهورنا جو سمح بكل وعلي يهتم بريهام اكثر واكثر وريهام تقرب من علي وروحنا للمصيف وتعشينا ورقدنا ثاني يوم روحنا للحوش

انا:روحت دوشت ورقدت شوي وعيت رنيت ع ندى
انا:الو حبي
ندي:شنجوك غلاي
انا:تمام
ندي:شنجو رحله
انا:تهبل
ندى:مشالله
انا:شنجو سندس
ندي:تمام
وبعدها سالتها ع محاظرات الخميس وقريت شويه وجا ليل خشيت نبي نرقد كنت نعسانه ونبي نحكي مع عمر بس قلت نرقد خير انا حطيت راسي نبي نرقد
رن فوني
انا:الوو…….
.
.
.
.