رواية صدفه جعلتني أدمنك
#الحلقةالحاديهوالعشرون
.
.
.
.
.
لا اسمح بنشرها بدون ما تكتب اسمي عليها الكاتب:Arhima Alagory قراءة ممتعه لجميع
.
.
.
.
.
بعد اسبوع
انا:في جامعه نرن ع بابا مقفل
نحكي بروحي ياربي كانه طول بابا عليا
جيت نبي نرن ع علي شوي نسمع في هرجه صوت عمر فيها
محمد:مش قتلك مردود
عمر:صقع عليك
محمد:توا نشوفو وبدا ضرب في بعضهم
والعرب تحز وانا نبحت وخايفه ع عمر فاجئه سمعنا صوت مسدس طاف طاف و وناس قعدو يعيطو لاحول الله
عند علي
علي:رن فونه الو يا باتي
راجل:………..
علي:شن تحكي انت اين مستشفى
راجل:…….
علي:سكر وزاد سرعه ماشي للمستشفى
عندي في جامعه
انا:معش شفت شي وناس لتمت وانا نقرب بشويه شفت محمد ركب في سياره وطلع ويجري قريب لقيت عمر طايح ودبشه كل دم مضروب برصصتين في صدره انا حسيت دنيا ظلمت وقعدت نبكي ونعيط
انا:اسعفو ديرو حاجه عليش تفرجو عليه ونزلت ع عمر مسكت من راس ونحكيله عمر حبيبي ما تسيبنش انا نحبك ونبيك عمر رد عليا عمر رد رد وقعدت نبكي ونهرت
شاب:حولي يا رهف
انا:نبي عمر
جو شباب شالو عمر وحطوه في سياره وطلعو يجرو بيه
انا:نبكي ولتمن عليا بنات ويسكت فيا شوي جت ندي
ندي:رهف كنك هكي
انا:يا ندي عمر عمر خلاص يبي يموت ويسيبني يا ندى انا نحب يا ندى مانقدرش نعيش بلاه ياربي ليش بعد نبي نردو خذيته مني ياربي احفظلي عمر يارب
ندي:خلاص حبيبتي العرب تبحت فيك هيا توا نروحو توا تطمني عليه عمر
انا:نبكي باه
ركبت في سياره ندى ونبكي
ندي:خلاص حبيبتي شوفي حالتك كيف تمت
انا:تخيلي دنيا بلا عمر انا من قبل ادمنته توا زدت اخره ليش هكي حظي
ندي:خلاص حبيبتي ادعيله بس
انا:ياربي احفظه
ندي:تمشي معايا للحوش خيرلك
انا:لالا روحي بيا
ندي:باه
ومشينا للحوش وكانت صدمة الكبيرة
خشينا للشارع ليقت ناس تبني في خيمة قدام حوشنا وشارع مليان رجاله وصوت عياط انا معش استوعبت شي
ندي:ياستر ياربي
انا:ساكته
درست ندي وانا معش قدرت نتحرك عرفت حاجه صارت لهلي من خبطت عمر توا هذي معش نقدر ياربي
ندي:نزلت وتبكي
انا:نزلت وخشيت للحوش
لقيت صبايا يبكو ومش عارف من مات
تجي ماما تضبطني وتعيط
انا:دفيتها كنكم تعيطو اسكتو
ماما:باتك مات يارهف ضي الحوش طفي يارهف وتعيط
انا:شن تقولي انتي بابا في صبح اكويس وفطرت معاه حطني في جامعه وقال توا نجيك
جت ريهام:حنضتني وتبكي
انا:دفيتها حتي ريهام شن تخرطو انتو معش تعيطو بابا توا يجي وطلعت نجري في شارع مسكني احمد وكان يبكي
انا:يا احمد بابا وين نبي بابا يا احمد
احمد:الله يرحمه يا رهف باتنا عدى معش يجي
انا:لالا ما تقولش هكي توا يجي
احمد:قعد يهز فيا يا رهف اوعي باتي مات يارهف افطني روحك
انا:هضك الوقت فطنت روحي طحت قعدت نبكي ونهرت بكل
احمد:حضني وقعد يبكي معايا
انا:يا بابا سيبتنا ليش من يحن عليا بعدك يا بابا مزلت نبيك مزلت بحاجتك ياربي مزال ماشبعت منه ياربي ليش
احمد:يارهف ادعيله الله يرحمه
انا:يا احمد بابا خلاص سيبنا يا احمد معش في بابا يا احمد حوشنا خلاص سكر وضي راح
احمد:تعالو امسكوها
جت ريهام و ندي
مسكوني قعدت ع كرسي ونبكي
الكاتب:Arhima Alagory
نرجع بيكم شوي
علي بعد كلم راجل وعدي للمستشفي هو في طريق رن ع عمه ناصر
ناصر:ايوه يا علي
علي:يا عمي باتي دار حادث وقالي راجل حالته خطيره وقاعد في العنايه
ناصر:لاحول ولاقوة الا بالله يستر الله جايكم غادي
علي خش للمستشفي لقاه راجل
علي:توا في واحد داير حادث جابو هنا
راجل:شاف علي انصدم شن يقربلك
علي:باتي وين هو
راجل:في عنايه ادعيله
علي:يارب الطف بيه
رن احمد ع علي
احمد:وينك يا راجل نرن ع باتي امبدري مقفل رهف من يبي يجيبها
علي:يبكي انا في مستشفى
احمد:شن في كنك
علي:باتي دار حادث وقاعد في عنايه ويستر الله خلاص
احمد:شن تقول انت جايكم توا
علي:راك تقولها لامي
احمد:باه
الكاتب:Arhima Alagory
طلع دكتور
علي:شن يا دكتور شن حاله باتي
دكتور:ان لله وان اليه راجعون باتك عطاك عمره
علي:قعد يعيط لا لا يا باتي كسرت ظهري ينعلي
راجل:جا مسك علي ادعيله برحمه ربي يصبركم
علي:الله يرحمك ياباتي
علي رن ع احمد
احمد:نعم يا علي
علي: يا احمد خليك في حوش باتي توفى يا خوي
احمد:كان في سياره قاعد يخبط في دمان ويعيط
علي رن ع ناصر وقاله له شوي ناصر جاب هله وماقللهم شي قاللهم داير حادث بس
عمي فوزي سمعها من ناصر حتي هو جاب هله وما قللهم شي
وجا فوزي للمستشفي
فوزي:خش لقاه علي وناصر يبكو ومعاهم راجل
فوزي عز عمي ناصر وعلي وبكاء معهم وجا لراجل
راجل:خير عمي فوزي عظم الله اجركم
فوزي: اجرنا واجرك ع الله
ناصر:من انت يا خويا
راجل:انا لي سعفت المرحوم دار الحادث ضايق واحد طلع من طريق في بطاح مدرس خش في بطاح
فوزي:الله يرحمه
راجل:شن يقربلك يا عمي فوزي
فوزي:نسيبي
طبعا اكيد مش عارفين راجل من خلوها مفاجئه
المهم رن علي ع احمد وقال دير خيم وخبرهم وخش احمد خبرهم وصار عياط وجو هضا ونين جيت انا وباقي تعرفوه
عند عمر
عمر فاقد الوعي جابوه مستشفي دخلوه العنايه طول سالم رن ع عمر قالو ان انضرب وقاعد في مستشفي جا سالم
سالم:يا دكتور المريض مضروب شن حاله
دكتور:يستر الله رصاصه قريب من قلب وضروري عمليه توا
سالم:توكل ع الله
دكتور:تمام وقع عليه انت
سالم:وقع وخش عمر للعمليه
سندس رنت ع سالم
سالم: نعم يا سندس
سندس:نرن ع عمر مايردش طول علينا
سالم:اكيده عند شغل توا نشوف ونقولك
سندس:باه ماطولش عليا
الكاتب:Arhima Alagory
عندنا في حوش انا هديت شوي وقاعده جنبي ندي وكل مره جايه وحده تعزي فيا
جت ريهام
ريهام:رهف صبي غيري دبشك وتعالي
انا:باه
خشيت خشت معايا ندي
انا خشيت اذكرت بابا مشيت دار وقعدت نبكي
ندي:خلاص حبيبتي ارحمي روحك
انا:هضا بابا يا ندي اول انسان حنون عرفت دنيا بلاه شينه شوفي حوش كيف مضلم هو غاب عليا بعد عد تونس قبل متت من رياف عليه توا غاب بكل معش نشوفه بكل
ندي:ادعيله هضا حد يوم وكلنا لها هيا تعالي غيري دبشك
انا:باه صبيت نغير فتحت دلاب شفت ساعه لي من عمر خطر عليا قعدت نبكي
ندي:خلاص حبيبتي عشان خاطري
انا:عمر وبابا في يوم واحد واعره يا ندي
ندي:مزال عمر مش متاكدين
انا:لبست وطلعت
ندي:رنت ع سندس
سندس:شنجوك غلاي
ندي:الحمدلله
سندس:شن هرجه جنبك
ندي:كلمتك نبي نقولك عمو مصطفى بات رهف توفى اليوم
سندس:لا الله يرحمه مشكله ماعندي من يجيبني
ندي:عمر وين
سندس:مش عارفه نرن عليه مايردش
ندي:تمام المهم عندك علم
سندس:تمام بعد يجي عمر توا نقول جيبني
في المستشفي
علي:ناخذ نشيله للحوش
ناصر:باهي تمام
فوزي:خلاص يا وليدي براك الله فيك واسمحلنا في تعب
راجل:هضا واجبي يا عمي فوزي والله يرحمه ويسامحه
خذو بابا وطلعو من مستشفي جايين للحوش
عند عمر
طلع دكتور
سالم: شن صار يا دكتور
دكتور:الحمدلله العمليه نجحت بس ح يقاعد في عنايه نين يوعى
سالم:تمام مشكور
دكتور:وجبنا هضا والحمدلله ع سلامته
رن سالم ع محمد
محمد:خير يا سالم
سالم:يا عمي نبي نقولك حاجه
محمد:انشالله خير
سالم:عمر قاعد في مستشفي
محمد:كانه شن فيه
سالم:ساهله انشالله نرجا فيك
محمد:مسافه طريق بس
الكاتب:Arhima Alagory
عندنا في حوش
قاعده انا وندي وريهام فاجئه خشت ريم
ريم:خير عظم الله اجرك يا رهف ربي يصبرك
انا:اجرنا واجرك ع الله براك الله فيك
ريهام:تعقدت وصبت
ريم:قعدت معايا انا وندي
ريم:امتي توفى
انا:اليوم
ريم:الله يرحمه ويسامحه وين اعميمه فريحه
انا:بلكي جو في حوش
ريم:توا نجي نعزيها بس
ندي:من هذي
انا:خطيبته علي القديم
ريهام:تحكي لدعاء لو مش عزاء راه وريتها الحيوانه
دعاء:فوتيها انتي
ريهام:شن تبي جايه لو ما تحشم ع وجها
بعدها صوت بكاء وعياط براه
انا:صبيت طلعت نشوف لقيت سياره وفيها صندوق قعدت نعيط شفت علي واحمد يبكو مع بعضهم بعدها علي جاني وحضني
علي:كبيرنا راح يا رهوفه كسر ظهورنا يا رهوفه
انا:معش في بابا يا علي لمن نبي نقول بابا من يقولي يا بنيتي بعده من يحن عليا بعد ياريت انا ولا انت يا بابي ياريت ما شفتك في صندوق
خش عمي
ناصر:وحدو الله يا رهف وحدي الله
انا:خوك يا عمي راه من سند لك بعده خلك وخلنا وحدنا بابا ي عمي خيك مات
ناصر:قعد يبكي وطلع
احمد:خلاص يا رهف خشي جو تعالو خوذوها
جت ريهام ودعاء مسكوني
انا:اطلقي نبي بابا مسكت في يد علي عليوه ما تدفنوش اليوم نبي بابا يا عليوه نبي نشبع من قبل لا تدفنو عليوه جيبلي بابا نبي نشوفه
علي:يبكي حاضر خشي بس
ونزلو بابا وحطوه في مربوعه
انا:شفتهم هم شيلينه ع كتوفهم طحت وفقدت الوعي ركبوني في سيارته احمد وطلع بيا احمد
مشيت مستشفي علقولي تغذيه ونضت تميت نبكي احمد نبي نروح توا
احمد:باهي يا رهف تكمل تغذيه بس
انا:نبي نمشي يا احمد نبي نشوف بابا مانبش نضيع دقيقه اليوم نبي نشوفه اخره يوم ليا معاه
احمد:حاضر وكلم ممرضه فكتلي تغذيه وطلعنا
نحنا طلعين تلقيت مع سالم شافني وعرفني
عند عمر
محمد:كانه شن فيه عمر وين
سالم:يا عمي عمر انضرب برصاص
محمد:شن تقول انت وين هو شن حاله
سالم:دار عمليه توا اكويس قال دكتور
محمد:امتي هذي وليش ماقتلي
سالم:مانبش نفجعكم
محمد:وين قاعد هو توا
سالم: عنايه توا يطلع
محمد:انشالله خير
رن فون محمد
محمد:نعم يا سندس
سندس:بابا كنك ما قتلي طابع
محمد:كنك شن فيه
سندس:رهف صحبتي باتها متوفي
محمد:قصدك مصطفي خو ناصر
سندس:اها
محمد:لا اله الا الله توا نجي
سالم:انشالله خير يا عمي
محمد:ناصر جارنا عند خوه توفى وبنت تقاعد صحبته سندس
سالم: عرف ان بات رهف هو لي مات تمام اربح انت انا قاعد
الكاتب:Arhima Alagory
انا واحمد روحنا للحوش
انا:خشيت للمربوعه طول لقيت بابا في صندوق ومولعين عليه مكيف وقران بسته في راسه تميت نبكي ونشهد وندعيله الله يرحمك يا بابا الله يرحمك بكل دقيقه عشتها معاك يارب صبرني يارب صبرني ع فرقه ونبكي بعدها خشت عليا ماما
انا:ماما شوفي بابا يا ماما اشبعي منه شوفي حبيبك يا ماما خلاص معش تشوفي بعد هكي
ماما:حضنتني وتبكي يانعلي يارهف يا كسرتنا في اه يا غالي
خش علينا علي:يا امي مش هكي يارهف ادعوله حرام عليكم
ماما:يا علي باتك راح ونكسرنا يا عليوه
علي:طلع يبكي
خشت عمتي فتحيه وعزيزة وبنات وقعدنا نبكو
بعدها خش احمد
احمد:هيا برا لي يخش هنا يدعيله بس
طلعو كلهم قعدت انا واحمد
عند عيت عمر
محمد:يا سعاد
سعاد:نعم
محمد:قتلك عمر انضرب بمسدس
سعاد:ينعلي وليدي وقعدت تبكي
محمد:والله اكويس دار عمليه واكويس
سندس: كنك ياماما
سعاد:خو مضروب بمسدس وداروله عمليه
سندس:قعدت تبكي
محمد:والله مافي حاجه اكويس
سندس:نبي نمشيله
محمد:وتي روحك نمشو للعزاء بعدها مستشفي
سندس:باه
سعاد:حتي انا نمشي
محمد:باهي بسرعه
جونا عيت عمر خشت سعاد وسندس وعزن ماما وعزيزة وعمتي فتحيه
انا كنت في مربوعه مع بابا واحمد
احمد:الله الله خزي ع دنيا يا رهف
انا:نبكي تذكر لما كن نلعبو كنت انا وعلي ديما جيين ضدك يجي بابا يقول انا مع احمد ولا لما نلعبو كوره هو يصبي حارس وانت تلعب
احمد:حتي هو يبكي ولا لما نقولك طشه كان يتعقد ويهزب هو ماشي تونس وصاني عليك ما يتحمل فيك شي
انا:باهي توا من يحن عليا بعده بابا سيب فراغ كبير يا احمد
احمد:الله يرحمه ويسامحه
شوي دق باب وفتحت
ريهام:رهف تعالي جات سندس تبي تعزيك
انا:مانبش نطلع توا
احمد:عيب رهوفه عرب جايينك اطلعي توا تجي
انا:مانبش نسيب بابا
احمد:توا تردي
ريهام:هيا رهف صبي عيب بنت ترجا فيك
انا صبيت وطلعت لسندس
سندس:حضنتني وبكت معايا عظم الله اجرك رهف ربي يصبرك
انا:انشالله يارب
سندس:اسفه بس ماحصلتش من يجيبني عمر طالع من صبح
انا:قطعتها عمر شن حاله
سندس:كيف سمعتي انتي
انا:حظرتها بروحي
سندس:نضرب في جامعه قصدك امتي
انا:بعد طلعتك بشوي
سندس:من ضربه وعليش
انا:محمد قتلك يبي يضربه ضربه مسدس طلقتين
سندس:ياربي من وين جتنا المشكله هذي
انا:شن حال عمر توا
سندس:اكويس دار عمليه بس قالو اكويس توا
انا:باهي الحمدلله
بعدها روحت سندس وانا خشيت للمربوعه
الكاتب:Arhima Alagory
عند عمر
عمر:ناض اي اه
جا دكتور خش عليه الحمدلله ع سلامتك
عمر:الله يسلمك بصوت دوب طالع
دكتور:انشالله هضا حد سو
وطلع جا سالم
سالم: شن حاله يا دكتور
دكتور:لا اكويس
سالم: نقدر نخش عليه
دكتور:تفضل ماطولش بس
سالم:تمام
خش سالم ع عمر وهل عمر وصلول للمستشفي
سالم:قبل خوفتنا عليك
عمر:قبل يعني ماخفتش
سالم:يعني المهم الحمدلله ع سلامتك
خشو هل عمر
محمد:سلام عليكم
سالم:عليكم سلام
وخشو
محمد :شن المشاكل لي ديرهن
عمر: مش شوري يا حاج
محمد:شور من باهي
عمر:
سعاد:وقت اسال يا راجل
سندس:الحمدلله ع سلامتك عموري شن تحس روحك
عمر:الله يسلمك الحمدلله ع كل حال
قعدو شوي وروحو وسالم قعد مع عمر
عندنا
جا ليل وكل واحد رقد الا انا وعلي قعدنا في مربوعه وبعدها خش علينا احمد وقعدنا نردو في ذكريت وندعو ونودعو في بابا
ثاني يوم
عندنا
انا:جا وقت لي نبي نطلع بست بابا ع راسه سامحني كان يوم قصرت في حقك يا غالي سامحني الله غالب لو بيدي ماخليتهم يخذوك يا بابي انشالله مثوك جنه وطلعت نبكي
عند عمر
عمر:وين يا سالم
سالم:كنت برا
عمر:فكنا من لعب يا ليد راه خيرلك
سالم:عقلك موسوس مش شوري انا
عمر:كيف عارفك
سالم:خطرها
عمر:شنو
سالم:رهف
عمر: كنها
سالم:باتها توفي
عمر:امتي هذي
سالم:امس دار حادث
عمر:الله يرحمه
عند عيت عمر
سندس:بابا نبو نمشو معاك للعزاء
محمد:تمام وتو اروحكم
سندس:باه
الكاتب:Arhima Alagory
عندنا جت ندي وامها
ندي:خير رهف كيف حالك اليوم
انا:الحمدلله
ندي:جاتك سندس
انا:اها جت
ندي:شن صار في عمر
انا:لا اكويس الحمدلله
ندي باهي الحمدلله
بعدها خشت سندس وامها
ريهام:رهف تعالي كولي حاجه
انا:ماعندش نيه
سندس:لا رهوفه صبي كولي شوفي وجك اصفر
ندي:هيا قدامي صبي
انا:باهي وصبيت
وخشت ريم
ريهام: هذي شن تبي جايه
انا:فوتيها
خشينا للمطبخ ناكل
علي كان طالع
ريم:علي
علي:بحت لقاها ريم
ريم:عظم الله اجرك
علي:اجرنا واجرك ع الله وروحي من هنا مانبش نشوف وجك
ريم:بدال ما تشكرني
علي: عندك وجه تجي انتي اصلا وطلع سيبها
ريهام:شفتهم عدت لريم
ريهام:انتي ماتحشم ع وجك شن تبي جايه
ريم:شن دخلك انتي
جت اسماء:ريهام بلا فضايح عزاء مش وقته كلام هضا
ريهام:باه
انا: ناكل سمعنا عياط طلعت نجري لقيتهم خذو بابا وطلعو بيه من مربوعه انا نبحت ونبكي بابا سامحني يا بابا وطلعو بيه خلاص اخره مره نشوف بابا في حوش طلع من حوش ومعش يرد ونبكي بعدها صبرت وهديت
قعدت مع بنات روحو من دفن
خش احمد جيته
انا:خلاص حطيتو وجيتو خليتو بروحه
احمد:يبكي الله يرحمه
انا:احمد انا من توا ريفت عليه وخش علي
انا:عليوه بابا تحت تراب توا
علي:ادعيله يا رهف الله يرحمه
انا:خشيت داري ونبكي
شوي لقيت فوني يرن مسكته فون و ……
.
.
.
.