مسلسل سعاده كاذبه التكملة
مسلسل سعاده كاذبه
الحلقه 64
طارق ؛؛ كنك مافتحيش فونك
رجاء ؛؛ والله مازالت ماشفته بكل وقاعد فوق
طارق ؛ به خلي فون هدي عندك وردي عليا
رجاء ؛؛ ﻻﻻ نبيش
طارق ؛؛ ردي راه خيرلك راه راقيلي منك
رجاء ؛؛ هيييييييييييييييي
طارق ؛؛ اجمد في مكانه وعرف من عند اعيونها ان في واحد وراه وبرم ولقي
هدي امصبيه وحاطه ايديها علي اجنابها الاثنين وامرفعه حاجب وامنزله حاجب
طارق :؛بالاستغراب
كنك
هدي ؛؛؛ جيت نبي انقولك تبي هريسه او لا القيتك في داري شن تبي خاش هنا
طارق ؛؛ بخت في رجاء ولقها مبتسمه
ارتبك
اندور في شحن
هدي ؛؛ علي اساس نا وانت نفس الشحن يعني
رجاء ؛؛ ههههههههههههههههههه عادي عادي
هدي ؛؛ بحتت فيها واقعدت تضحك
طارق اتوزع فيا انت
طارق ؛؛ سكري فمك
هدي ؛؛ كان قالتلي عطيني رجاء راه عطيتها لك ليش الف والدوران هذا
طارق ؛؛ بحت في رجاء ومتعقد وماسك ضحكته
عاجبك هكي
رجاء ؛؛دخلنيش نا بيك جبتها لروحك
هدي ؛؛ ها قول من الاخير تبي عشاء او لا
طارق ؛ ﻻﻻ معش نبي طيرتي النيه
هدي ؛؛ به نا ماشيه للحمام
وبحتت في رجاء
فهمتي يا ارجيوه نا نبي الحمام واكيده ح نطول ارقدي ماترجينش انجي انهدرز معاك
واغمزت بعينها
وبرمت وجها تبي تطلع
رجاء ؛؛ صبت بسرعه وراها
ﻻﻻ اصبري نبي انخش معاك
طارق ؛ مسك يدها وكرها شوره
تو تبي اتخشي معها الحمام تحشمي ازح
هدي ؛؛ ههههههههههههه اقعدو فيها
وطلعت ومشت للصاله
رجاء ؛؛؛طيح سعدك انت فيش ادير هنا اطلع فكني من الجو الشين
طارق ؛؛ نبي نحكي معاك
رجاء ؛؛ وهدي
طارق ؛؛ هدي عارفه الموضوع
رجاء ؛ شن
طارق ؛؛ بيش تعرفي اني صادق معاك
رجاء ؛؛؛طارق اطلع نبي نرقد
طارق ؛؛ دفها جوه في الدار وخش وسكر الدار ودس المفتاح في جيبه
رجاء ؛ هيييييييي حي عليا كنك انت
طارق ؛؛ ماتخافيش نا نبي نحكي معاك
رجاء ؛ طارق الباب امسكر حتي كان نيتك بيضاء يفهمونا غلط وبعدين مش من حقك هكي اتخششني واتسكر عليا
حول وهات والفون
ودفاته وبعداته عنها
طارق ؛؛ من اللي يفهم مايهمنيش حد نا
رجاء ؛ طيح سعدك ناقصني نا انت
طارق ؛؛؛ جاها وقرب منها ومسك يدها وكرها وقعمزو علي السرير
رجاء ؛؛ تمت خايفه وترعش ودمعهتا علي خدها
طارق ؛ اسسسس عليش ابكاء هذا
رجاء ؛؛ وهي تبكي
خايفه
طارق ؛؛ رجاء نا بروحي نخاف عليك نا نبي نحكي معاك وانتي مش عطيتني فرصه به احكي معي حاليا ولاو حتي صديق تعرفي عليا
رجاء ؛؛ باهي مش هنا اطلع تو نحكي معاك فون
طارق ؛؛ لدرجه هذه مش واثقه فيا
رجاء ؛؛؛اها لاني نعرفكش
طارق ؛؛ به بس توعدني تحكي معي
رجاء ؛؛ باهي حاضر
طارق ؛؛ مسك يدها وباسها
رجاء ،؛ خافت وكرت يدها بسرعه
طارق ؛؛ رجاء نا نبي صفحه جديده معش نبي اي حاجه من الماضي
رجاء ؛؛ طارق نا خايفه ننكسر اخر لان نا طبعي واعر وسامطه
طارق ؛؛ من الاول نا قالت المهم عند الاحترام وبعدها الشكل وكلا الطبع ساهل نقدر عليه انطبه لطريق
رجاء ؛؛ به اطلع خلاص
طارق ؛؛ حاضر عارفه هالمره جيتك من الباب المره تانيه نزقب عليك من الروشن كان ما تحكي معي
رجاء ؛ تمت تمسح في ادموعها وتضحك
حاضر ياهبل
طارق ؛؛ واقسم بذات الله انتي اللي هبلتني من ضربتك ليا علي ظهري
رجاء ؛؛ ماانت قبل ضربتني
طارق ؛؛ جابت مفعول ضربتني
رجاء ؛؛ صبت قدامه وهي متعقد
اطلع اطلع راه خيرلك
طارق ؛؛ ههههه حاضر
وصبي ودفها علي الساس بقوه وجا قدامها
رجاء ؛؛ اهااااا ظهري
طارق ؛؛ انحبك يافرخه
رجاء ؛؛ انحرجت ونزلت راسها وتمت مبتسمه
طارق ؛؛ والله الوحيده اللي اثارت فيا وخلتني ننجن بيش انشوفك ونسمعك و فيا جو حاجه اتجاهك مستحيل انفرط فيه اندير المستحيل بيش انعيشها اكتر
رجاء ؛؛ طارق شوف منظرنا خلاص
طارق ؛؛ نا قالت نا بروحي انخاف عليك
رجاء ؛؛ به دير احدود
طارق؛؛ ههههه به
وابتعد
وطلع طارق
ورجاء تمت ترعش وقعمزت معش عرفت تفرح ولاه اتخاف من طارق اللي طالع لها والمشكله انها متقبلته صح كيف ماهو قال
وخشت هدي وهي تضحك
هدي ؛؛ ههههههه كنه وجك هكي
رجاء ؛ انتي كيف اتخلينا اوحدنا
هدي ؛؛ طارق يبيك يا رجاء
رجاء ؛؛ وانتي شن عرفك
هدي ؛؛ حكي عليك عند ماما امبدري
رجاء ؛؛ هييييييي تحكي جد انتي
هدي ؛؛ وقال لماما نبي انقولها لمراد
رجاء ؛؛ حي عليا عليك جو شين داره
هدي ؛؛ ﻻﻻ قال لماما انك عاجبتيه بس مافيش حاجه بينتكم ومايبيش ادير علي خاطر مراد وايه
رجاء ؛؛ حي عليا عليك تزليط
هدي ؛؛ ربي جبر بخاطرك يا ارجيوه
رجاء ؛؛ خايفه ياهدي خايفه ننجرح اخر
هدي ؛؛ سيورك راده اتحبي شوفي نا قفلت قلبي 5 سنين ورديت رديت حبيت وانتي لكي سنه خلاص
عطني لروحك فرصه وجربي ماتسكريهش علي روحك هو يقعد عايش حياته مع زوجته وانتي قاعده هنا امغير اتبكي وتذكري فيه عطي لروحك وطارق فرصه واحكي معه راه والله طارق اكويس امغير عصبي بس بس والله اكويس شوفي انتي ميزاته وعيوبع وبعدين قرري اهو نا لما حكيت مع محمد كرعت روحي اني ماحكيتش معه من ايام الجامعه تي كتن حكيت معه راه تو عندنا عويل مش قاعده هنا وهو قاعد يبكي علي باته ياريتني جنبه ياريتني
رجاء ؛ اقتنعت بكلام هدي اشويه لان حستها طالع من قلبها صاح
به امك شن قالت
هدي ؛؛ ماما قالت اني ماعنديش اي اعتراض قالت ايه غاليه عليا وماعمري شفت منها حاجه اتوجعني وهلها خشو لخاطري برغم ان ايه أكثر وحده خفنا منها وقعدنا معها شادين اشويه بس هي اعرفت تكسبنا واتحببنا فيها ايه كنا في بدايه رافضيهنا علشان اصغيره بس الحق لما جت اثبتلنا ان مش كل حاجه العمر المهم العقل اهي جت هي الصغيره وعرفت اتمشي مراد معها والله مراد ماشفنه فرحان ومتهني كيف مانشوفو فيه تو شوفي اقريب ايطير من الفرحه علشان كمل حوشه وايه حامل منه ربي يحفظهم ويرعهم
رجاء ؛؛ ان شاءالله
هههه اهو ايرن
هدي ؛؛ ردي بلا جو شين
رجاء ؛؛ ربك يستر فجاني طارق بكلامه وتصرفاته
هدي ؛؛ هههه وانتي فرحانه هذا علي دليل انك معجبه به وفي ميول له
رجاء ؛؛ وهذا اللي مستغربة
هدي ؛؛ ردي راه ايخش علينا هنا هبل واديرها
رجاء ؛؛ ههه باهي هدي ياريت اتخلي اللي صار بينتنا
هدي ؛؛ من اعيوني ارقدي وافطني راه محمد ايخش انتظار
رجاء ؛؛ كان خش تو انرد عليه
هدي ؛؛ به وعيني بس مع ان عارفته مش ح يكلمني
رجاء ؛؛ مابردك تبيه ايكلمك
وخشت رجاء تحت الفوطه وردت عليه
رجاء ؛؛ بصوت واطي لان كانت متحشمه من هدي
ايوه
طارق ؛؛ كنك مارديتي طول شوفي كم مكالمه
رجاء ؛؛ كنت نحكي مع هدي
طارق ؛؛ اهم مني
رجاء ؛؛ طارق انت كيف تحكي ل عمتي قبل ماتحكيلي
طارق ؛؛ انقيس في نبض عندي امي بيش ماتجيش بعدين واتصبي ضدي ونبيها تحكيلي اكثر علي عائلتكم
رجاء ؛؛ بس هكي معش يقعد عندي وجه قدامها
طارق ؛؛ ﻻﻻ خليكي عادي مادوري شيء
رجاء ؛؛باهي
طارق ؛؛ تي والله صوتك فيه جو
رجاء ؛؛ هههه طارق خيرلك
طارق ؛؛ شن قررتي اتخشي
رجاء ؛؛ مش عارفه بس نا خاطري في جامعه
طارق ؛؛ رجاء فوتي الجامعه لان لو ح تخشي فيها نا ح نتعب وانتي ح تتعبي واجد ونا متاكد
رجاء ؛؛ وليش انت شن دخلك
طارق ؛؛ دخلني اني نوعي في الصبح انجيك ونقعد معاك لعند ماتروحي بيش ماحد ايجي شورك
رجاء ؛؛ اووو يبدن القيود من تو
طارق ؛؛؛ مازالتي ماشفتي شيء بشويه بشويه
رجاء ؛؛ مانحبش القيود
طارق ؛؛ بس نا قيودي غير
رجاء ؛؛ طارق نسالك انت شن شهادتك
طارق ؛؛ انقولك ماتضحكيش
رجاء ؛؛ هههههههه ها شن
طارق ؛؛ ضحكتي من تو خلاص
رجاء ؛؛ ههههه ر احكي شن
طارق ؛؛ نا الشهاده مش مدورها واجد مع اني ساكن في حوش فيه دكتور ومهندش وحوشنا كله بشهاده
بس الحق مااندورش فيها لاني مانحبهش نا ميولي لحاجه غير ميولي للاعمال الحره بس خذيت شهادتي بس بيش انسكت باتي والناس بيش ايقولو بشهادة لان نحن عايشين في وسط المظاهر
رجاء ؛؛ حلو كلامك به شن هي شهادتك
طارق ؛؛ ههههه مش شوري راه بكل
رجاء ؛؛ هههه احكي راه حرقتي دمي
طارق ؛؛ اللغه العربيه
رجاء ؛؛ هههههههههههه استاذ اللغه العربيه
طارق ؛ هههههه اها
رجاء ؛؛:ههههههههههههههههههه مش ماشيه معاك بكل
طارق ؛؛ عارفه اصلا مش عارف ليش قريتها
رجاء ؛؛؛ فعل فاعل مفعول به كان وخواتها ان وخواتها
طارق ؛؛ ههههه اتشفطي عليا
رجاء ؛؛؛انتخيلي فيك وانت تشرح للبنات فاعل مفعول
طارق ؛؛ قريت العربي علشان كان حفظ مش فهم ونا ماكنتش انحب نحضر المحاضرات
رجاء ؛؛ اهاااا عاد انت تبي تحكي مع البنات
طارق ؛؛ هههه علي قد ماحكيت ماعمري عجبتني وحده كيفك ماتشوفيش روحك بس فيك حاجه حلوه فيك حاجه اتشد الناس لكي جذابه انتي وااااجد شكلك استايلك كلامك اعنادك طولة اللسانك جراءتك الحق نا اكتر وحده في صبايا خوتي عجبتني ايه لان احليوه وهاديه وجت علي مراد بزبط وقالت حتي نا تبيلي وحده هكي هاديه اتحمل غضبي عصبيتي غيرتي لان نا عصبي واااااجد بكل وواعر قالت الإنسانه اللي اتعيش معي نبيها هاديه وساكته بس لما شفتك انتي قلبتني الفكره بكل حبيت عنادك ليا غرت عليك من قبل مانعرفك كان تذكري يوم تفريشت شقة عاجر شوفي من امتي ونا متحمل وساكت
رجاء ؛؛ تسمع وساكته وقلبها ينبض بقوه
طارق؛؛ رجاء وين رحتي راه اتكوني راقده
رجاء ؛؛ ههه ﻻﻻ نسمع فيك
طارق ؛؛ شن تبي تعرفي اخر
رجاء ؛؛ مواليد كم انت
طارق ؛؛ ههههه شايب اكبر منك ب 8 سنين
رجاء ؛؛ كيف مواليد 84 انت
طارق ؛؛ اهاااا
رجاء ؛؛ كنت نحسابك اصغر
طارق ؛؛ ههههه اها ممكن علشان جوي
رجاء ؛؛ اهااا
طارق ؛؛ بكره اتنزلي فونك وتفتحيه ومانبيش رقم ايكون عند راجل غيري
رجاء ؛ ليش
طارق؛؛ ياعنجد ليش كيف تبي اتركبيلي اقرون من تو
رجاء ؛؛ ههههههه به اس وطي صوتك قاعده نسمع فيك من عند الساس
طارق ؛؛ هههههه مش حرام اتكوني في دار اللي جنبي ونحكي معاك بالفون
رجاء ؛؛ طارق راه انسكر لا فون ولا شيء
طارق ؛؛ انخش عليك بعدها
رجاء ؛؛ هههههه
وقعدو ايهدرزو وايتعرفو علي بعضهم لعند ساعه 7صبح
ووعينا نا ومراد ساعه 9
مراد ؛؛ ويتي كبيديتي هيا ساعه 9 العمال ح ايجو من تو
نا ؛؛ تو
مراد ؛؛ اها نا قالت نبي ننقل اليوم الدبش كله خلاص اليوم نرقدو في حوشنا غادي
نا ؛؛ اها به اصلا كل حاجه لميتها حتي دبشنا حطيته في الشناطي
مراد ؛؛ اهم ايرنو صبي دوشي وديري جوك وانزلي ديرلهم شاهي
نا ؛؛ به بس ضروري وحده اتعدي غادي بيش تشرف علي التفريش
مراد ؛؛ تو اندزو هدي ورجاء وطارق ونا وانتي نقعدو هنا نشرفو علي طلعت الدبش
نا ؛؛ به هيا
وصبيت ادوشت ولابست قفطان حوامل ولميت دبشي كله خلاص خليته دولابي امنفض ونزلت ووعيت رجاء
رجاء ؛؛ هييييي الرجاله جو
نا ؛؛ اها جو قاعدين ايفكو في داري
رجاء ؛؛ هييييييي تو انتي فرشتي فرش غادي
نا ؛؛ امس مراد شراء فرش ساده امتع اللي لوطه تو تمشن انتن وطارق بيش اتفرشو الفرش بيش ايحطو الديار و الصالونات عليهم
رجاء ؛؛ تو نا نقدرش انخش لشقتك
نا ؛؛ ﻻﻻ الرجاله فوق
رجاء ؛؛ هييييييييي وشنطتي
نا ؛؛ اهي جبتلك شنطتك
رجاء ؛؛ ﻻﻻﻻﻻﻻ حاطه حاجه في دولاب لمار
نا ؛؛ هيييييي طيح سعدك شن
رجاء ؛؛ حي عليا تو ياخذوها ولاه ايشوفها مراد
وصبت تجري وطلعت ومالقت حد في الممر مشت ودقت علي طارق
طارق ؛؛ رااااااقد نا رااااقد
افتحت الباب وخشت
رجاء ؛؛ طارق طارق
طارق ؛؛ مش وقتك
رجاء ؛؛ قربت منه وحطت يدها علي كتفه وحركة
طارق صبي اجري
طارق ؛؛ فتح اعيونه وامرفع حاجبه
كنك انتي شن تبي خاشه عليا
رجاء ؛؛ صبي ياهمي فوني قاعد فوق في دولاب لمار والعمال بدو ايفكو في الديار وتو ايشوفها مراد ونا معش نقدر نركب
طارق ؛؛ انصدم وصب بسرعه
شن وين
رجاء ؛؛ اجري عدي جيبه في دولاب لمار
طارق ؛؛ هيا وطلع طارق بسرعه وركب
ورجاء تبوعت الممر ولقتني نا امصبيه
وجتني
نا ؛ شن صار تو
رجاء ؛؛ ارتبكت
اتجي في وجه طارق ولا اتجي في وجه مراد
نا ؛؛ شن هي
رجاء ؛؛ حاجه قديمه مانبيش مراد ايشوفها عيب
نا ؛؛ به كيف اتخشي علي طارق هكي في الدار
وسمعتنا هدي وجتنا اتغير في الموضوع
هدي ؛؛ ويه هيا تعالي افطري بييش انوتو اروحنا ونمشو
نا ؛؛ اهاا به اني جايه
ومشينا شور المطبخ
هدي ؛؛ اليوم جمعه تو اتجي الهام وقالت تو انساعدكن
نا ؛؛ اهااا
عمتي ؛؛ اهو حليب اشربي تو تتعبي اليوم
نا ؛؛ شكرا اعميمه
وقعدت نفطر نا وعمتي وهدي ورجاء قاعده ترعش في الممر ترجا في طارق ايجي
وجاها طارق وهو متخزرط
طارق ؛؛ عليك فجايع علي الصبح اهو الكيس خوذيه هذا كله من اهمالك
رجاء ؛؛ هههه مراد شافك
طارق ؛؛ ﻻﻻ القيته لاهي في دار نومه ايفكو فيها وقالي خوذ البنات وعدو الحوش تلقو فرش فرشو وارجو العمال ايجبو الحاجات
رجاء ؛؛ به شكرا نا نبي انخش انوتي روحي
طارق ؛؛ ليا ساعتين بس راقد مش وقت جري بكل تو
رجاء ؛؛ نا اللي راقده من ساعه 10 لليل ما منك انت اللي امسهرنا
طارق ؛؛ قرب منها
وحط يده علي شعرها
احلي سهره والله
وسمعو صوت كرعين اقربن مشو يجارو
وخشت رجاء للحمام توضت وصلت وغيرت دبشها ودارت اشويه ميك اب وحطت وشاح وخذت شنطتها وطلعت ولقتنا في المطبخ وجايه حتي الهام
رجاء ؛؛ صباح الخير
عمتي ؛؛ صباح النور
هدي ؛؛ اووو ماما بدت ادلع في رجاء
وخش مراد علينا
مراد ؛؛؛وين طارق
طارق ؛؛ طلع من الدار
اني هنا اني جاي
مراد ؛؛ هيا خوذ البنات وعدي
طارق ؛ هيا نشرب قهوه بس
وخش طارق للمطبخ ولقي رجاء امقعمزه و تشرب في الحليب
هي نبي قهوه
هدي ؛؛ هيا اهو اندير
وخش حاتم
حاتم ؛؛ السلام عليكم
نحن ؛؛ عليكم السلام
الهام ؛؛ وين رتاج
حاتم ؛؛ اهي بره تاكل
الهام ؛؛ في شكولاطه صاح
حاتم ؛؛ اهاا مراد تنقل
مراد ؛؛ اهاا اليوم
خلاص طارق هيا
طارق ؛؛؛تي نشرب بس
الهام ؛؛ هيا ياعمتي عدي قعمزي في الصاله بيش نبدا في الغداء وانتي ياايه امشي شوفي حاجاتك
نا ؛؛ به
هدي ؛؛ اهي قهوتك ياطارق نا ماشيه انوتي روحي
طارق ؛؛ شكرا
وطلعنا كلنا ماعاد الهام ورجاء وطارق ايبحت في رجاء يرجا فيها اتصبي بيش ايشوف لبستها وبعدها صبت وحطت طاستها في الحوض وتغسل فيها
الهام ؛؛ خلي وعدي خير ماتاخري
رجاء ؛؛ ﻻ خلاص كملت لابستي يطلعو هم بس
طارق ؛؛ بحت في رجاء بالاستغراب وماحسش بروحه
انتي قصدك تبي تطلعي معي هكي
رجاء ؛؛ برمت وبحتت فيه
اها ان شاءالله
طارق ؛؛ ﻻﻻ ياابله ماتركبيش معي هكي
الهام ،؛ ههههه عيب ياطارق
طارق ؛؛ ﻻﻻ مش عيب مانيش بقروني نين تركب معي هكي
رجاء ؛؛ نا حره هذا لابسي
طارق ؛؛ فنص فيها وحط الفنجال بقوه وشيرلها وطلع
الهام ؛؛ فكينا من حسه وعدي غيري
رجاء ؛؛ ﻻﻻ نبيش
وخشت هدي
هدي ؛؛ تو رنيت علي محمد رد عليا
الهام ؛؛ قصدك ماحكيتوش بكل مع بعضكم
هدي ؛؛ اها قالي مانفضش انكلمك وقالتله ماشيه قالي باهي
هيا رجاء اطلعي طارق ايسخن في سياره في الجنان
رجاء ؛؛ هيا
خذت شنطتها وطلعت ولقت طارق قاعد في السياره جت واركبت من لاوره
طارق ؛؛غمتله وايدخن
رجاء بدون اي كلمه عدي غيري لابستك
رجاء ؛؛ ﻻﻻ نبيش هذا لابسي
طارق ؛؛ قالت كلمه مانيش طالع نين اتغيري لابستك راه اتصير مشكله
رجاء ؛؛ طارق مش من حقك
طارق؛ بر وجه وفنص
نا قالت كلمه وحده خلاص
رجاء ؛؛ دير اللي تبيه مانيش
طارق ؛؛ معناتها فيش مشي
ونزل وخبط الباب بقوه
ولقي حاتم ايبحت فيه
حاتم؛ كنك
طارق ؛ متعقد
شيء
هدي ؛؛ هيا ياطارق
طارق ؛؛ بحت في السياره وفتح الباب علي رجاء
انزلي غيري
رجاء ؛؛؛مانيش
هدي ؛؛ خلاص طارق خليها
طارق ؛؛ خبط الباب بقوه
هيا اركبي
حاتم ؛؛ ههههه هبل
وركب طارق وطلع بالسياره ورجاء ماسكه ضحكتها بالغصب وامنزله راسها واتقلبش في الفون وهدي اتبحت في طارق وهو كيف ايسوق ويجري
ووصلو للحوش ونزلو
طارق ؛؛ سرعي روحك
رجاء ؛؛ امغير افتح الباب
هدي ؛؛؛هي انتو الاثنين كنكم
وفتح طارق الباب وخشو
وفرشو الفرش وجو العمال وبدو ايحطو في الحاجات وبدن البنات اينضمن
رجاء ؛؛؛ﻻﻻ الصالون هذا هنا تعال هنا
طارق ؛؛ باهي خشي انتي جو
رجاء ؛؛ نا جايه بيش نشرف والصناديق هذين في المطبخ
هدي ؛؛؛ ياجماعه راه جعنا وين الغداء
رجاء ؛؛؛بكل خلاص ساعه 2 تو لنا كم نشتغلو
طارق ؛؛ تو رن علي مراد
خشنا انت جو للمطبخ ونظمن
هدي ؛؛؛هيا ارجيوه
وخشنا البنات للمطبخ وتمن اينضمن في المواعين
وعلي ساعه 3 جيت نا وعمتي والهام وحاتم
وجايبن الغداء معانا لطارق وهدي ورجاء
هدي ؛؛ كملتو خلاص
نا ؛؛ اها ماشاءالله واجدين و الكانتر كبيره
هدي ؛؛؛اها عارفه حتي لما ايخششو هنا ايخشو بشويه وايرتبو باول اول
عمتي ؛؛ هذين الفلوس ايريحن الواحد
رجاء ؛؛ راه حيعانه هيا
هدي ؛؛؛تعالي في الجنان احسن هنا الفرش مازال جديد
هيا طارق بره
طارق ؛؛ هيا
وطلعو هم بره
مراد ؛؛ غمزلي ومشيت شوره
ها شن رايك
نا ؛؛ ماشاءالله تبارك الله
مراد ؛؛؛خلاص اليوم نظمي الدبش بيش انباتو هنا خلاص
نا ؛؛ به
مراد ؛؛؛بكره نا واخذ اجازه نشرو دار النوم للاطفال والصالون الصاله واي حاجه ناقصه
نا ؛؛ حبيبي نبي مدخل اكبر حسيته اصغير هذا
مراد ؛؛؛به
نا ؛؛ نجك
خلاص خلني نطلع انضمن المطبخ ودبشي
مراد ؛؛ به
هدي ؛؛ صحه
رجاء ؛؛ زيدي
هدي ؛؛ دايت
رجاء ؛؛ هههههه ياعيني
وصبت هدي
طارق ؛؛ انتي كنك اتعاندي
رجاء ؛؛ رفعت اعيونها نعم
طارق ؛؛ نا مش قالت غيري لابستك
رحاء ؛؛ طارق نا قالته من الاول نا طبعي واعر ومانحبش حد ايتحكم فيا ولابسي ونا راضيه به
طارق ؛؛ يعني راضيه تطلعي بجينز ظابط واقصير من فوق
رجاء ؛؛ ﻻ مش اقصير
طارق ؛؛ نا امبدري سكتت علشان حاتم بس
رجاء ؛؛ هذا لابسي
طارق ؛؛ حط الكشيك بقوه
ايتغير لما اتكوني معي
رجاء ؛؛ اكره حاجه عندي الراجل اللي يتشرط لما انكون علي ذمتك في هذاك الساعه انغير
طارق؛ معناها وتي روحك
رجاء ؛؛ ههههه نبيش نزوج
طارق ؛؛ والله
وطلع عليهم مراد
مراد ؛؛ انتو اتغدو ولا اتعاركو
طارق ؛؛ هههه الاثنين
مراد ؛؛ غمز لطارق
شن القصه
طارق؛؛ جالطه ياراجل
رجاء ؛؛ هذه شخصيتي
مراد ؛؛ هههههه ماشفت شيء انت
رجاء ؛؛ مرااااد
مراد؛؛ ههههه
حاتم ؛؛ والله ماشاءالله الحوش لما كملته
مراد ؛؛ اها شفته
وصبت رجاء وشالت السفره وخشت
ومشو مراد وحاتم شور مطبخ الخارجي وطارق قعد امقعمز علي الدروج وطلع الدخان وايدخن
حاتم ؛؛ طارق امكبد شكله
مراد ؛؛ في شن
حاتم ؛؛ في اللي كانت تاكل معه
مراد ؛؛ ههههه معقوله
حاتم ؛؛ امبدري تعارك معها
مراد ؛؛ ليش
حاتم ؛؛ تي من حقه ياراجل البنت حاجه
مراد ؛؛ تي تحشم ياراجل
حاتم ؛؛ ههههههههه هذا الحق
مراد ؛؛ ها شن رايك في البني تمام
حاتم ؛؛؛احسن درت حاجات خارجيه بيش اتحط راسك اتصدق بعد بنيتك انت خششتها ليا في راسي
مراد ؛؛ بس رد بالك اتبيع شقتك
حاتم ؛؛ ﻻﻻ نبي نشري قطعة ارض ونبني بشويه بشويه نين انكمل
مراد ؛؛ ان شاءالله
حاتم ؛؛ خلينا نسقد انا وماتخليهمش ايدرو العشاء شوري تو انجيب جهاز الليل اول لليله في حوشك والصبايا مش فضيات اديرن
مراد ؛؛ صحيت حتي نا نبي نمشي خلي الصبايا ايضمن حاجتهن بروحهن
وخش مراد علينا ونحن نشربو في قهوه في الصاله
مراد ؛؛:هيا تبو حاجه
نا ؛؛ امروحه هنا ماه
مراد ؛؛ ان شاءالله خلاص هنا من يوما وغادي
رجاء ؛؛ مراد روح بيا
نا ؛؛ والله ﻻﻻ خليكي هنا معي الليله بيش انكملو وبكره طالعه للسوق نبيك معي
رجاء ؛؛ تعبت راه
نا ؛؛ كان اميره فاضيه راه جتني
رجاء ؛؛ باهي خلاص ياحنه
نا ؛؛ افطني لروحك يوميا اتعيطي علي التريوحه
رجاء ؛؛؛نبي انروح نبي نحكي مع عادل علي الجامعه
طارق ؛؛ اعيونه افتحن علي الاخر
هدي ؛؛ مازال مش تو بعد رمضان
رجاء ؛؛ ههه به
مراد ؛؛ خلاص طالع وماديروش عشاء خوذن راحتك حاتم قال تو انجيب عشاء جاهز
عمتي ؛؛ به خوذني معاك حطني في العزاء نﻻ مااندير في شيء هنا
مراد ؛؛ هيا
رجاء ؛؛ نمشي انرتب دبشك بيش انكمل بسرعه
الهام ؛؛ خلاص مازال امغير التحف بس وانكملو
هدي ؛؛ ويه انتي عدي للباقي الحوش ونحن خلينا المطبخ خلاص قريب انكملوه
الهام ؛؛ احسن حاجه دولاب المطبخ كبير وحطينا فيه كل حاجه
نا ؛؛ نبي انزيد مواعين اخر على المات والعشاء
رجاء ؛؛ اها احسن
ومشت رجاء للدار وتمت اتنضم في دبش في الدولاب
جا طارق وقعد امصبي علي الباب
طارق ؛؛ رجاء نا شن قالت علي جامعه
رجاء ؛؛ طارق نا نبي نقرا نبيش انكون ربت بيت نا نبي نقرا انتخرج ونشتغل نبي راتب شوف ماما لاوله شهادتها وعملها راه قعدن هكي بعد وفاة بابا
الواحد مش عارف حياته شن ح اتكون نا نبيش انكون مرات فلان نا نبي انكون رجاء
طارق ؛؛:اقري معهد باهي
رجاء ؛ ممكن ليش لا المهم انحصل شهاده اكويسه اتخلني نخدم وخاطري في حاجة مكاتب يعني نبي اداره
طارق ؛؛ اخر تشرطي انتي
رجاء ؛؛ ههههه اهو هكي مانبي
طارق ؛؛ نعرف معهد سنتين اداره اقري فيه في عشيه ساعتين بس
رجاء ؛؛ سنتين بعدها انتخرج
طارق ؛؛ اها وعلشان انتي عندك ثانوي ح تقري العالي مش المتوسط
رجاء ؛؛ انشوف عادل وساهله لان عادل حتي هو مش مقتنع بجامعه بالكي يقتنع بالمعهد
طارق ؛؛ به راه طالع بيش اتخلي فونك معاك
رجاء؛ بدون ماتحس بروحها طالعته من …. وبحتت فيه
طارق ؛؛ هههههههههه ياعنجد المكان هذا
رجاء ؛؛ هيييييي انسيتك بكل
طارق ؛؛ خطيره القطه
رجاء ؛؛ هههههههه خايفه من ايه نبيش اتشوفه وحاطته علي الصامت
طارق ؛؛ ان شاءالله مش ايطول موضوعنا هذا
رجاء ؛؛ نا نبيش اي خطوه تو نين انتعرف عليك وانت اتعرف عليا مش انت قالت خلينا اصدقاء تو
طارق ؛؛ اصدقاء وانقولك انحبك كيف اتحي هذه
رجاء ؛؛ ههههههه ﻻ اتجي لان ناعندي شروط وانت عندك اشروط انشوفو بعضنا بعدها ساهل وبعدين نا نبي نبدا نقرا قبل بعدها ساهل لان مستحيل نزوج بلا شهاده
طارق ؛؛ يعني تبني نرجاك سنتين
رجاء ؛؛؛كان تبيني صاح ارجاني لكن انك تبيني نزوج بدون الشهاده هذه مستحيل وبعدين انت بروحك تبي اتكون نفسك مازال ماعندك شي
طارق ؛؛ ﻻ عندي عملي وشهادتي وسيارتي وشقتي شن نبي اكتر من هكي ناقصني مراه بس
رجاء ؛؛ شقه وين
طارق ؛ مراد عطني الشقه هو اللي ماخلنيش نبني قالي نبي نطلع
رجاء ؛؛ اهااااا جت معاك معناها
طارق ؛؛ اهااا هيا سلام الجماعه ايرنو
رجاء ؛؛ سلام
وطلع طارق
ونحن قعدن انضمو نين ظلمت الدنيا وكملنا
وقعمزنا تعبنات علي الاخير
الهام ؛؛ انتي كان هذا شهرك راكي جبتي
نا ؛؛ هههه امس خشيت في السابع
رجاء ؛؛ ماشاءالله الايام يجارن
نا ؛؛ مراد عدلي ح انجيب في نهاية رمضان تقريبا
يعني جيبتي ان شاءالله في رمضان
الهام ؛؛ علي خير وسلامه
نا ؛؛ ان شاءالله
وتمينا انهدرزو ونا اقريب انطير من الفرحه
وجو الرجاله وتعشينا وروحو ومن التعب طول خشيت نا ومراد للدار و رجاء خشت للدار المعيشه وسكرت علي روحها وبدت تحكي مع طارق
مراد ؛؛ الليل اول لليله ليا في حوشنا
نا ؛؛ اها الحمدالله
مراد ؛؛ تعبتي
نا ؛؛ بكل شوف كرعيا متورمات
مراد ؛ خلاص ان شاءالله بكره مش ح تتعبي لان معارض معينه
نا؛؛ به حبيبي شن جنسهم بيش نختارو الدار
مراد ؛ تو نشروها فصدقي الدار
نا ؛؛ مكار
مراد ؛؛ تعالي هنا
وكرني شوره واضبطني بقوه
نا ؛؛ ههههههه عندكش افراش ترقد لوطه
مراد ؛؛ الحاجه الوحيده مابيتش انجيبه
نا ؛؛ ههههه صايع
مراد ؛؛ مع حلالي
ورقدنا وخشينا في نوم عميق ورجاء حكت مع طارق اشويه وسكرت لان كانو هم الاثنين تعبانين مش راقدين اليوم اللي قبله
وعينا تاني يوم فطرنا وطلعنا طول للسوق واخترنا دار الاطفال والستار وشرينا دبش للاطفال ولحظت ان مراد يتجه شور دبش اولاد ونا عرفت روحي اني حامل بعويل بس مش متاكده
روحنا تغدينا وقايلنا وفي العشيه طلعنا اخر واخترنا صالون وفرشه وطاولة وتحف زرينا علي اروحنا لان اليوم بس مراد فاضي
وحطينا رجاء في حوش هلي وروحنا نا ومراد
ومشت حياتنا عادي دون اي احداث نا ومراد مره مره نشرو حاجات مواعين واطفال
وتاجل فرح اميره وخالد للصيف الجاي
ورجاء وطارق يحكو مع بعضهم ويتعاركو ويصاخبو بس رجاء كانت مع طارق جديه وقالت اي حاجه تبيها وهو حاجه متقبله وحاجه لا وكان سامت لان هي اتقوله مجرد انكون من نصيبك اندير اللي تبيها بس تو لا
وبحكم ان رجاء ترقد وحدها في الدار ماحد فطن ان هي عندها فون وتحكي به وكل يوم تقنع في عادل علي القرايه
وجا الرمضان
ويوم 27 ليلة القدر من وعيتي ونا تعبانه وانحس في ليه اتجي واتعدي
مراد شافني اليومين اللي فاتن وقالي راه ح اتجيبي اقريب خلاص
علي المغرب ونا عند عيت عمي ملتمين في المطبخ
نا ؛؛ ووووووو عليا الهام حي عليا
الهام ؛؛ كنك
نا ؛؛ اهاااا بطني بطني
وووووو عليا نا اهاااااااااا ياربي ياربي ووووووووو
عمتي ؛؛ كلمنا مراد ابسرعه ابسرعه
هدي ؛؛ وينه وبنه
عمتي ؛؛ رني عليه ابسرعه
نا ؛؛ وووووو عليا حي عليا وتميت انتش في دبش الهام وانعيط
غاده ؛؛ موعدها صاح
الهام ؛؛ اهاااا
نا تميت انعيط وانحس في روحي خلاص تعبت وانشوف في الموت في اعيوني
وايخش حاتم وطارق يجارو
حاتم ؛؛ هيا انشيلوها هيا
هدي ؛؛ رنيت تو علي مراد قال جاي في طريق
عمتي ؛؛ لبسيها عبايه بسرعه
الهام ؛؛ من امتي ياويه
نا ،؛ من الفجر
وقعدت هكي اقريب ربع ساعه ايجني مراد ابسرعه لقني في دار معيشه انعيط ونبكي وانخبط في يدي علي الارض وعمتي قاعجه احذي وتبكي وتقرا في القران
مراد ؛ كذا خلونا اشويه
عمتي ؛؛ ﻻﻻ شيلها للمستشفي
مراد ؛؛ تو انشيلها انشوفها بس
وطلعنا عمتي وهدي والهام وغاده
وجاني مراد
نا ؛؛ حبيبي خلاص حبيبي انحس في روحي نبي انموت هيا
مراد ؛؛ هيا حبيبي هيا اشويه بس
نا ؛؛ طلعهم خلاص
مراد ؛؛ حاضر حاضر
اووووو خلاص ولادة انتي برسمي خلاص هيا
نا ؛؛ صبيتي حي عليا ظهري انكسر
صباني
وتميت نضبط فيه ونبكي وانعيط
مراد؛ اسسسسسسسس هيا هيا
وتما ايمشي فيا بشويه وشالني
عمتي ؛؛؛الهام ردي بالك من الحوش نا ماشيه معها
وطلعني للسياره واذن المغرب
مراد ؛؛ الله اكبر وتمه ايددوش فيا وركبني في السياره
نا ؛ الشنطه الشنطه في الحوش
مراد ؛؛ باهي
عمتي ؛؛ هيا ركبها الله اكبر ليلة القدر واذان المغرب
مراد ؛؛ طارق ياطارق
طارق ؛؛ كنك شن في
مراد ؛؛ هاك مفتاح شيل هدي وعدي جيب شنطه
حاتم ؛؛ تو انعدي نا والهام ماعليك
نا ؛؛ راه اموتيتها في دار الاطفال
حاتم ؛؛ حاضر حاضر ماعليكم
وركب مراد في السياره ويجري ومعي عمتي وتبكي وتدعي
ومراد مرتبك عين في طريق وعين عليا ونا انعيط ونبكي وانخبط في يدي علي كرسيه
عمتي ؛؛ معاك الله يا بنيتي معاك الله
نا ؛؛ اهااااااا ووووو عليا شن درت في روحي نا حي عليا كلمني ماما تو اتجيني
مراد ؛؛ هلك يفطور قاعدين
نا ؛؛ مراد حي عليا وووووو عليا
عمتي ؛ ادعي يا ايه ادعي دعائك مستجاب تو
ووصلنا للمستشفي وخشينا طول للغرفه ومعي مراد طبعا
وعمتي تبكي وتدعي وجتها الهام تجري بالشنطه
ويسمعنا فيا انعيط
عمتي ؛؛؛ اعياطه شين بكل يستر الله
الهام ؛؛ تؤام حتي هم
عمتي ؛؛ ربي معها حسيت مراد ارتبك واجد
الهام ؛؛ معها ماه
عمتي ؛؛ اها هو اللي ايجيب فيها شن درتو للعمك
الهام ؛؛ خليت غادع وهدي ايحطن في الفطور ونا وحاتم طلعنا طول قالت اكيده يبو دبش
عمتي ؛ ياناعليا تسمعي في اعياطها شينه بكل قهرتني حسيتها اصغيره
الهام ؛ الجياب واعر سوء علي الكبير ولاه الصغير
…….
طارق ؛؛ وينك
رجاء ؛؛ كنت نفطرم كنك
طارق ؛؛ ايه في حالة وضع
رجاء ؛؛ صااااح وينها
طارق ؛؛ تو ركبوها في السياره والمغرب اذن
رجاء ؛؛ تو المشكله كيف انقولها لهلي وصبايا خوتي قاعدين واختي ايمان قاعده
طارق ؛؛ ديري روحك مش عارفه وامشي وتي روحك بشويه بشويه
رجاء ؛؛ باهي سلام
طارق ؛؛ نتلاقو
رجاء ؛؛ انت هذا عليش امكلم
طارق ؛؛ هههههه والله من الفرحه حتي الفطور مافطرت
رجاء ؛؛ به سلام
طارق ؛؛ رجاء فكني من لابس الضابط
رجاء ؛؛:ماشي وانت خاشلي علي جو الديني الايام هذين خلاص قهرتني
طارق ؛؛ تو كان قعدت ديني اتعاركي وكان قعدت صايع اتعاركي
وفجاء ينفتح الباب علي رجاء
………..
يتبع