مسلسل سعاده كاذبه التكملة

مسلسل سعاده كاذبه

الحلقه 51

صبيت نا والهام انديرو نسكافي وحلويات 
صبت معانا رجاء وهدي

وبدينا انديرو
سمعنا نا ورجاء صوت وحده تبكي ومعها واحد وراء المطبخ

بحتنا في بعضنا وانصدمنا

رحاء ؛؛ من
نا ؛؛؛ماسمعتش الصوت
رجاء ؛؛ تعالي تعالي انشوفو
نا ؛؛ ﻻﻻ فكينا
رجاء ؛؛ تي تعالي
وكرت يدي ومشينا بشويه علي اصابع كرعين

وبحتنا والقينا حاتم وسناء
نا انصدمت
نا ؛؛ هيييي وجت يد رجاء علي فمي
بحتت فيها القيتها دايره اصبعها علي فمها معناها اسسسسسسسس

ردينا بحتنا

حاتم ؛؛ بس ياسناء نصيبكم تفارقتو خلاص وبعدين البنت والله اكويسه ومحترمه من يوم ازوجها مراد وهو متريح معها الحق خويا ونعرفه

سناء ؛؛ وهي تبكي
حاتم اكتر حد عارف ان مراد قديش ايحبني وايموت فيا وشن دار علي خاطري ونا شن درت علي خاطره مراد طبعه وعارفته لما ايتعقد مني طول يحكي مع بنت غيري وايردلي ايردلي بعدها
بس تو ياحاتم بينتنا اعيال ومانبيش انودرهم عند مرات اب اهو شوف لها كم يوم ماتندري عليهم عزقتهم عند هلها وكان تبيهم راه قاعدين معها

حاتم ؛؛ به يا سناء تو امسحي اموعك
وقولي شن المطوب مني

سناء ؛؛ اتكلمني مراد نبي انتفاهم معه نبي اندير حد للموضوع

حاتم ؛؛ كلمتيه
سناء ؛؛ مايردش عليا وكان رد يقعد ايهزب
حاتم ؛؛ اللي عليا ح انديره وانكلمه لكي هنا

وطلع حاتم الفون وكلم مراد
حاتم ؛؛ تعال نبيك اشويه في الجنان الخلفي
مراد ؛؛ كنك شن في
حاتم ؛؛ ﻻﻻ لشويه بس تعال
مراد ؛؛ به

ونادتنا هدي
رجاء ؛؛ تحكي بصوت واطي
انتي عدي شوفي هدي ونا هنا خليني نسمعهم

نا ؛؛ هو شوري ولاه شورك الموضوع نبي انشوف مراد وردت فعله

رجاء ؛؛ به وانتي ماتعرفي تطلقي اللسانك الا علينا

ومشت رجاء ونا قعدت امصبيه والرعشه في كرعيا مش قادره انتحرك خايفه ايجي مراد ويحكي معها ويجرحني نبي نسمع كلامهم وفي نفس وقت نبيش خايفه نفقد حبيبي وحب حياتي
حسيت بحاجه غمت عليا واسكتت وقعدت انبحت

وجا مراد
مراد ؛؛ نعم ياحاتم
وبحت ولقي حتي سناء معه
هذا عليش جايبني هنا

حاتم ؛؛ احكي معها شوفها كنها ماتسكرهش في وجها

مراد ؛؛ بس ياحاتم نحن خلاص كل حد ماشي في حاله

سناء ؛؛ وهي تبكي
ﻻﻻ فيش كل حد مشي في حاله نا مازالت نبيك ونحن مش علاقه ولا خطبه نين اتقول هكي نحن بينتنا عويل ونبو انحافظو عليهم وانربوهم احسن تربيه
مراد ؛؛ تو عرفتيها ان في عويل بينتنا

سناء ؛؛ مراد حبيبي خلينا انردو ونبدو صفحه جديده

حاتم ؛؛ انحرج ونزل راسه وجاي يبي يطلع

مراد ؛؛ امسكه
حاتم خليك قاعد هنا

حاتم ؛؛ احكو خذو راحتكم
مراد ؛؛ بالنسبه ليا نا ماعندي مانحكي نا متزوج و عندي مراه وانخاف عليها

سناء ؛؛ به ونا كنت مراتك ليش اتسكرها في وجي
مراد ؛؛ انتي قالتيها كنتي
سناء ؛؛ يامراد ايه ماتصلحش بيك ايه بنت جاهله واصغيره وجالطه وماتصلحش حتي بعويلي اتربيهم هي مش تمام وهلها مش تمام نا نعرفهم هلها

مراد ؛؛؛نا شن قالتلك عليه الموضوع هذا مش قالت معش نبيك تذكريها علي لسانك

حاتم ؛؛ سناء مش لهدرجه عاد

سناء ؛؛ ياحاتم لمار اخربت من اول ما بدت تمشيلهم انت عارف قصة أختها الكبيره اللي مسكوها في الشقه به انت عارف ان هي كانت مخطوبه وانفسخت

وقرب منها مراد وشدها من شعرها
سناء ؛؛ اهااا
حاتم ؛؛ ﻻ يا راجل اطلقها

مراد ؛؛ عارفه يا سناء واقسم بذات الله لو نلقك تحكي مره تانيه عليها انكسرك تكسير احترمي نفسك هذه مراتي وانحبها سوء تبي او لا

سناء ؛؛ وهي تعيط من شدت مراد شعرها
اتت اتحبني نا انت ليا نا من يومك وانت عليا ولاه انسيت شن درت علشاني

مراد ؛؛ ماننكرش اني كنت انحبك وياما درت علي خاطرك مانكذبش عليك بس خلاص حبك راح انتي اللي كرهتني فيه

سناء ؛ به العويل اللي بينتنا
مراد ؛؛ عايشين احسن معيشه معها ايحبوها

سناء ؛؛ ﻻﻻ لمار مره قالتلي تضرب قيا
مراد ؛؛ ماعمرها ايه مدت يدها عليها

سناء؛؛ تي راهي جالطه امبدري صار بيني وبينها نقاش ما في كلمه وماعقبتها عليا

اتصدق يا حاتم قاللتي انتي منتهيه واعيالك انربيهم لكي بطريقتي نا وانوعيهم علي ضرب وانرقدهم علي ضرب امغير تو انجيب العيل وانثبت مراد

مراد ؛؛ أستغفر الله العظيم

تي خافي ربك فيها كنك انتي دورتي ولا شنو

سناء ؛؛ مراد ايه ضروري اطلقها

نا ؛؛ انهرت وشديت روحي بالغصب

مراج ؛؛:مانيش البنت نبيها وامريحتني وانحبها ومستحيل انتخلي عنها

حاتم ؛؛ سناء انتي تو كنك غيرتي رايك نا قالت فكرة ان هو ايطلق ايه هذه لا لان البنت اكويسه وتستحق كل خير

سناء ؛؛:ونا يا حاتم ما نستحقش كل خير ولا شنو

مراد ؛؛ نا ماشي
وبرم وجه ومسكاته سناء وقربت منه واجد
حاتم انحرج ومشي هو بسرعه
مراد التفت وشاف حاتم مشي

سناء ؛؛ تحكي بصوت مخنوق وتبكي

انحبك انتي ماتحبنيش ولاه شنو مش ديمه غالي عليك قربي هذا مش انت اتحب اني اندلعك ونضبطك وانبوسك راه والله انحبك يا مراد والله انحبك نا عارفه روحي اغلطت يوم اللي اهملتك يوم اللي انشغلت عليك بس والله انحبك والله وكان اتردني اتشوف سناء اللي اتحبها ايام العلاقه والخطبه والله علي خاطرك انسيب العيادات كلهن ونقعدلك في الحوش ونخدم عامه بس امغير ردني يا مراد والله راه نا انرايف عليك وامرايفه علي قعدتي في حضنك وفي حوشك امرايفه علي لمتنا في الشقه

ومن كتر ما هي تبكي وتحكي بصوت مخنوق انسيت ان هي تحكي لراجلي اللي انحبه ووجعتني

حسيت روحي حقيره اللي خليت مراد هكي تبكي وتجدا في راجل بيش اتعيش هي واعيالها تحت سقف واحد
في اللحظه هذه كرهت روحي ودنيتي وحياتي كلها

مراد ؛؛ ايبحت فيهت ومنصدم القرب واجد
غمض اعيونه ورفع راسه فوق ودفها

سناء ؛؛ اهااا حبيبي
مراد ؛؛ والعبره خنقته ودموعه في اعيونه

انتي اللي ضيعتي كل حاجه بينتنا

سناء ؛؛انردو يا مراد نحن فيها

مراد ؛؛ بعد شنو بعد خليتني زوج وحده تانيه وانحبها بعد خليتني نعشقها بعد ما خليتها اتنسيني اي يوم حلوه بينتنا بعد شنو يا سناء بعد شنو
نا مهما انديرلها مانوفيش حقها

سناء ؛؛ كنك اتحبها راه مامديتش يدك عليها وحبستها واتخلي فيها تخدمك انت وعويلك وحتي النوم ماترقد معها
اصلا نا عارفه حملتها تو غلط وانت ماتبيهش تحمل منك بدرجة انها في يوم اجدتك وقالتلك خليلي العيل وطلقني عادي
ناعارفتك يا مراد انت تعودت عليها بس ماحبيتهش لاني اللي في قلبك ومازالت في قلبك نا يامراد اللي عشقتها مش هي

انا حبيتني بلا اي حاجه حبيتني لاني نا سناء مش حد تاني حبيتني كحبيبه وخطيبه وزوجه وعشرة عمر

وهي بس حبيتها كا زوجه لك وتعودت عليها وحبيت معاشرتها بس كجسم ووجه حلو تصبح عليه مش لان هي ايه وحبيبتك
انت حبيتها لانك شفتها راضيه بيك وبعيالك وساكته

مراد ؛؛ سناء صكري فمك
سناء ؛؛ ﻻﻻ مش امصكرته هذا الحق يا مراد

مراد ؛؛ تبي ولاه ما تبيش انا انحبها انحبها ومستعد اندير اي حاجه بيش اناكدلها اني انحبها تي والله حبيتها في كم يوم بس حبها جو في قلبي اكبر من كم سنه اللي حبيتك فيهم
هي اعرفت تملكني ملك خاص لها

سناء ؛؛:…..
مراد ؛؛ نبيش ولا كلمه وياريت يا سناء معش اتكلميني

وطلع مراد بسرعه
وسناء قعدت تبكي واتخبط
كلام مراد وااااعر حسيته كيف الموس لما ايخش في القلب ينهيه
معش عرفت مااندير نا بروحي قعدت نبكي حسيت بذنب لاني نا وافقت عليه ودمرت حياة اسره

برمت وجي والقيت اميره وراي وتبكي

طول عرفتها اسمعت كل حاجه اضبطتها وقعدت نبكي اخر
خششتني جو الحوش وركبنا فوق للشقه

نا مجرد ما
خشيت للشقه انهرت ابكاء وتميت انخبط في وجي
ومشيت وعزفت روحي علي السرير وتميت نبكي

نا شن درت يااميره نا شن درت في روحي حي عليا نا
اميره ؛؛ خلاص يا ويه اهدي
نا ؛؛ تي وين نهدي يااميره ونا سبب دمار اسره نا سبب ابتعاد لمار وحمادي من امهم
وين نهدي ونا سبب دمعت سناء كيف تبني نهدي ونرقد جنبه ونقعد عارفه في مراه اتالم بسببي

صبيت وقعدت نحكي ونشهق والعبره خنقتني

شن درت انا والله مادرت حاجه في دنيتي حتي علاقات وجيج مادرت كيف البنات قاعده ساكته وحامده ربي علي كل حاجه حتي لما ازوجت طولت ما قربت من راجلي اللي هو حلالي تحشمت منه قعدنا فوق من اسبوع ما تقربنا هذا كله من الحشم اللي انتحشم فيه ومن ادعها هي

نا شن درت في دنيتي بيش اتصيرلي هكي شن درت
نا وافقت عليه هذا الذنب اللي درته فكرتي في روحي وفي زواج وخلاص مافكرتش ان في مراه ح تبكي بسببي مافكرتش اني ح نحرم اعيال من امهم فكرة بانانيه

يا ريتني ما وفقت عليه ياريتني ما ازوجته ياريتني ماحبيته

تميت انخبط في بطني
يا ريتني ماحملت ياريتني ماحملت
وقعدت انخبط في بطني اكتر ونبكي وانعيط

اميره ؛؛ ﻻﻻﻻﻻ حرام عليك
وتمت اتمسك فيا واتكتف فيا

انتي تبي تقتلي جنينك علي خطرها حرام هذه روح تقتلي فيها

نا ؛؛ حي عليا نا شن درت في روحي شن درت والله ما كنت موافقه عليه من اولها والله ماكنت نبيه

وتميت نرعش وانحس في بطني توجع فيا انهرت وطحت لوطه علي الارض
و كرتني اميره ورقدتني علي السرير وجابتلي ميه
وجت رجاء ادق
افتحتلها اميره الباب وشافتها وجه مش تمام
رجاء ؛ وين ايه
اميره ؛؛ جو قاعده منهاره
رحاء ؛ شن منهاره
وخشت تجري عليا
وشافتني لمه كرعي وخش في روحي وانهز ونبكي بصوت عالي

رجاء ؛؛ هيييييييييييي في دم
نا ؛؛ شن
وبحتت في روحي وتميت انعيط

اميره ؛؛ اهدي اهدي تو انكلم مراد امغير اهدي بس
نا ؛ ماتقوليهش نزل صاح
وتميت تبكي اخر وانخبط في ايديا علي وجي

رجاء ؛؛ تو نمشي انكلمه نا اقعدي معها
اميره ؛؛ بسرعه
نا ؛؛ حي عليا حتي اللي يربطني بيه نبي نفقده حي عليا حي وتميت انخبط في وجي بقوه

اميره ؛؛؛اهدي وراس خيتي اهدي تو ايجيك مراد اهدي بس
وتمت تمسك في ايديا وتمسحلي في دموعي ونا نبكي ومنهاره وانحس في روحي انتهيت

رجاء نزلت تجري بدون ماتفكر شافت محرمه طويله حطتها علي اكتوفها واطلعت للشارع ولقت طارق قاعد مع جماعته

رجاء ؛؛ وهي تبكي بصوت عالي

طارق طارق
طارق ؛؛ التفت وشافها امصبيه جاها يجري

كنك شن في
رجاء ؛؛ ايه مريضه وين مراد
طارق ؛؛ شن كنها
رجاء :؛ تي وين مراد بس
طارق ؛؛ خشي خشي تو انكلمه

وخشت رجاء وطارق مشي وكلم مراد يجري
مراج خش يجري هو وطارق ومشي وشافهم حاتم خش معهم للحوش

الناس افطنت ان رجاله خشو يجارو للحوش
وصبت هدي والهام وغاده وعمتي يجارن وراهم

وخش مراد ولاقني نبكي وامخبشه وجي وننزف

مراد ؛؛ بحت في اميره ورجاء بالتفنيصه
كنها شن صارلها
اميره ؛ تمت تبكي ومنهاره
رجاء ؛؛ تمت تبكي ومنهاره
منك انت منك انت دمرت حياتها ظلمتها وكبرتها قبل وقتها

نا ؛؛ قعدت نبكي اخر
مراد ؛؛ انصدم وقعد ايبحت فيا وهو طبس عليا
وخشت سناء تجري
شافتها رجاء
رجاء ؛؛ انتي ياحقيره شن تبي جايه هنا اطلعي من هنا

طارق ؛؛ رجااااء اس
مراد ؛؛ بررررره كلكم بره

سناء ؛؛ تو انشوفها خليها
رحاء ؛ اتشوفيها عينك
وهي جايه شورها مسكها طارق وطلعها
وكلهم اطلعو

وقعدت نا ومراد واميره بس في الدار
مراد طول رفع دبشي

نا ؛؛ تميت نبكي وانعيط
مراد ؛؛ طلعلي عبايه
هيا يا اميره البسي ابسرعه
ولابسني مراد وشالني وطلع بيا يجري
وورنا اميره

رجاء ؛؛ وين شيلنها

طارق ؛؛ استري روحك انتي بعدها اطلعي

رجاء ؛؛ تي كذا خطني مش وقتك راه
ونزلت تجري ولقت ماما و ايمان مازالنا امقعمزات ومسكات حمادي ومش عارفات شن اللي صار

رجلء ؛؛ هيا يا ماما
ماما ؛؛ جا خالد
رجاء ؛؛؛هيا بس
وجتها هدي
هدي ؛؛ رجاء فكينا من المشاكل وتعالي امك مريضه وراعي ظرفها

صبت ماما وايمان وخشن جو
رجاء ؛؛ رني علي خالد بيش ايشيلنا للمستشفي ايه غادي
ماما ؛؛ هييييييي كنها

هدي ؛؛ اتعبت وانزفت اشويه وشالها تو مراد

طارق ؛؛ تو انشليكم نا هيا
الهام ؛؛ نبي نمشي نا معاكم هدي انتي خليكي مع العرب عيب ومع عمتي

وجو هلي كلهم غادي
ونا خش بيا مراد للعمليات

وماعاد حسيت بروحي الا تاني يوم اوعيت القيت روحي في المستشفي والممرضه اتركبلي في التغذيه

الممرضه؛؛ الحمدالله علي السلامه

نطت اميره وشافتني واعيه
اميره ؛؛ ويه الحمد لله على السلامة
نا ؛؛ صوتي دوبه طالع

فقدت الجنين

اميره ؛؛ المهم صحتك
نا ؛؛ ههههههه وفجاء قعدت نبكي
اخطلت عليا ضحك علي بكي
معش عرفت شعوري

هذا كله من دموع سناء

اميره ؛؛ ايتعوض ياويه انتي مازالتي اصغيره والعمر قدامك

نا ؛؛ وين مراد
اميره ؛؛ مراد في حاله قاعد امس الليل كله وهو ايبخط وايهزب لما عرف انك سمعتي كلامهم رجاء بكت اللي اهناك تعارك حتي مع خوه وقاله الكبير وقاله كلها منك داير ليله سوده في هله

نا ؛؛ وهاجر
اميره ؛ انفجعت المسكينه وتمت تبكي

وخش علينا مراد
مراد ؛؛ اول ماشافني امفتحه جاني طول

اميره والممرضه اسحبن اروحهن واطلعن

نا ؛؛اوليدك اللي خايف عليه راح

مراد ؛؛ المهم عندي نا صحتك
نا ؛؛ والعبره خنقتني
اهو هذا حاجز وانهد بينك وبين سناء

مراد ؛؛ شن اتقولي انتي
نا ؛؛ نبي انروح للحوش هلي
مراد؛؛ ليش انتي ماعندكش حوش ولاه شنو

وخشت هاجر ودمعتها علي خدها هي وهدي

نا ؛؛ هيييي كنك هنا
هاجر ؛؛ كيف تبيني نمشي لكوافير وانسيبك هنا
نا ؛؛؛امشي بلا اهبال للكوافير اليوم فرحك وضروري تفرحي
هاجر ؛؛ به شن اخبار تو
نا ؛؛ الحمدالله
جنين وفقده والحمد الله

مراد وجعته كلمتي برم وجه وطلع وجو هلي كلهم
خشت ماما وهي تبكي

نا ؛؛ امتي نطلع
اميره ؛؛ بعدين في العشيه
نا ؛؛ اهااا به هاجر خلاص وقت عليك روحي وعدي للكوافير اليوم يومك وسامحيني مش ح نقدر انكون معاك

هاجر ؛؛ المهم عندي اتكوني طيبه وبصحتك
ماما ؛؛ خلاص امشي ياابنيتي
هاجر ؛؛ مع سلامه تو انكلمك
نا ؛؛ ان شاءالله
وطلعنا هاجر وهدي
وقعدت نا وخواتي وماما

رجاء ؛؛ وحق ريي انسود معيشتها الكلبه هذاكي

نا ؛؛ عليش راعن شعورها اشويه هي اتحبه وكانت مراته يوم من ايام وعندها اعيال منه يعني من طبيعي اتحنله نا اللي ليا كم شهر بس وحبيته يابال هيا اللي اسنين

ماما ؛؛ المهم تو انك ابخير وماتفكريش في شيء روحي وتريحي وخليها علي الايام

نا ؛؛ ح نروح معاكم
ماما ؛؛ ﻻﻻ روحي لشقتك يا ايه
نا ؛؛ خلاص شقتي معش قعدت شقتي
وين لمار وحمادي

رحاء ؛؛ خذتهم الحقيره معها
اميره ؛؛ رجاء خلاص ماتحرقيش دم اختك ساد اللي هي فيه
ايمان ؛؛ اللي قهرتني ان نا وماما حسينا في حركه غريبه وقعدن امقعمزين تحشمنا انصبو

اميره ؛؛ راه كلامهم كله سمعته والله مراد ايحب ايه وشاريها والله انتن بروحكن امس شفتن شن دار

ماما ؛؛ خلاص اسكتنا وصكرنا الموضوع
وخش علينا خالد ومعه مراد

خالد ؛؛ الحمدالله علي السلامه
نا ؛؛ الله ايسلمك
مراد ؛؛ خلاص خلوها اتريح

ماما ؛؛ اعرفت قصد مراد انه يبني اوحدنا

هيا بنات اطلعن
وطلعن خواتي وخالد وقعد مراد
جا وقرب مني وقعمز علي السرير

مراد ؛؛ بصوت واطي
ايه في كدمات علي بطنك
نا ؛؛ عارفه
مراد ؛؛ انتي اللي ضربتي بطنك نين فقدتي الجنين
.نا ؛؛ غمضت اعيوني وخذيت نفس عميق

لاني معش نبيه

مراد؛؛ نزل عليا واجد
وكيف اتنزليه مش من حقك

نا ؛؛ ﻻني قررت ننسحب من حياتك ومانبيش اي اثر ايذكرك بيا

مراد ؛ وامتي قررتي الكلام هذا

نا ؛؛:لما سمعت كلامكم و شفت ادموع سناء اللي نا سببها
مراد ؛؛ انتي كيف فطتني الموضوع

نا ؛؛ سمعت كلامها كله من اول ماهي تحكي ل حاتم حسيت بروحي حاجز بينتكم
مراد ؛ نا مايهمنيش هي انا عندي انتي اهم
نا ؛؛ لانك حبيتني كزوجه مش كحبيبه
مراد ؛؛ انتي حبيبتي وحياتي ومراتي

نا ؛؛ مراد كان اتحبني صاح وتبيني انتريح خليني انروح لحوش هلي

مراد ؛؛ ﻻﻻ عنديش مراه اتبات بره للحوش

نا ؛؛علشان خاطري نبي انتريح اشويه وانفكر
وانت بروحك فكر في موضوعنا وموضوع سناء ولمار وحمادي سناء اتحبك وتبيك ولمار وحمادي يبو حوش وعائله ملتمه ماتفكرش في روحك بس نحن لو قعدن انفكرو في اروحنا ح اندمور حيات اسرة فكره في اعيالك اللي اقرب ناس لك وشوف مصلحتهم وين

جا يبي ايصبي مسكت يده

نا ؛ ونا نبكي
مراد نا انحبك وعلشان انحبك نا درت هكي

فك مراد يده
مراد ؛؛براحتك

وطلع وسيبني

وجتني اميره وقعدت نحكيلها

اميره ؛؛ بس حرام عليك اتسيبه هو ايحبك
نا ؛؛:مش قادره انشوف اعيونه قدامي ونقعد عارفه امسببه للوحده بكاء كيف تبيني انشوفه ونا انحس في روحي امدمره عائله

اميره ؛؛ باهي الحل
نا ؛؛؛حاليا نبي انروح معاكم
اميره ؛؛ هلي روحو تو قبل نحسابك تبي اتروحي مع مراد
نا ؛؛ ﻻﻻ مش ح انروح معاك وينه هو
اميره ؛؛ مش عارفه شفته طلع ابسرعه عرفته متعقد

ومشي الوقت وحتني ورقة خروج جابها ليا هو

مراد ؛؛؛ورقتك
نا ؛؛؛تو
مراد ؛؛ اها اتروحي اتريحي احسن
نا ؛؛ به خلاص يااميره رني علي خالد ايجي ياخذن

مراد ؛؛ وهو متعقد وامرفع حاجبه
من من خالد ياخذكن
نا ؛؛ اها
مراد ؛؛ ومن امتي تمشي مع غيري انتي
نا ؛؛ سكتت ونزلت راسي

مراد ؛؛ وهو متعقد هيا وتن اروحكن

وصبيت بشويه وساعدتني اميره ولابست عبايتي
وطلعنا

مراد ؛؛ يومين هذين تريحي وتو بعد بكره انروح بيك منها ايفضي الحوش

نا ؛؛بحتت فيه بالاستغراب

اميره ؛؛ ان شاءالله ان شاءالله
مراد ؛ وهو امرفع حاجبه
بالكي تبيش اتروحي لشقتك

نا ؛؛ نبي انتريح عند هلي كم يوم وبعدها ساهل
مراد ؛؛ يومين بس عندك

ونا سكتت ونزلت راسي وتميت نبكي
وهو نزل للمحل وجابلي مسلتزماتي

اميره ؛؛ وية ماتقسيش عارفتيه واعر تو ايديرلك شيء حاجه

نا ؛؛ بس نا خذيت قراري خلاص الوجع اللي حسيت به امس معش نبي انحس به

وركب مراد ومشينا للحوش ونزلت اميره ونا نبي ننزل مسك مراد يدي
التفت عليه
مراد ؛؛ فكري اكويس
نا ؛؛ ان شاءالله
وكر يدي شور فمه يبي ايبوسها كرتيها بقوه ونزلت بسرعه

وخشيت للحوش بسرعه وسمعت صوت تشيط سيارته

خشيت للحوش والقيت ماما امقعمزه وترجا فيا في الدار
خشيت عليها والقيتها تبكي اضبطتها وبكيت اشويه
ماما ؛؛:والله اعوينا الناس كلها عيطت معاك
نا ؛؛ الحمدالله
ماما ؛؛ المهم انك تو بصحتك وجاتك في الجنين قولي الحمد الله ربي ايعوضك ان شاءالله وانتي مرات دكتور شاطر مش ح ايسيبك ان شاءالله

ايمان ؛؛ باهي اللي هكي جت

نا؛؛ رحاء تعالي نبي دبش
رجاء ؛؛ عرفتني نهرب من ماما
به هيا تعالي

ماما ؛؛:مدريش حمام مش اكويس انتي نافس تعتبري تو
نا ؛؛ انحس في جسمي تالفنا تبي اندير دوش ساخن ونبي نرقد

ماما ؛؛ براحتك بس بعدها تغطي بالبطنيه
نا ؛؛ ان شاءالله
وخشيت للدار وخذيت دبش وخشيت للحمام

صبيت تحت الدش ونا انفكر في موقف امس طول ادموعي انزلن
معش عرفت علشان شن نبكي علشان شفت سناء متالمه هكي ولاه علشان نا انحب مراد وخايفه ايسيبني واللي بكتني غيرتي عليه

لابست دبشي وطلعت بحتت في الدار القيت سرير رجاء عليه فوطه خريفيه دافيه انحبها الفوطه هذه

خشيت وقعموت علي السرير وتميت انسرح في شعري اتخش ماما

ماما ؛؛ البسي دبش اخر صقع عليك وانتي نافس
نا ؛؛ ﻻ عادي تو انخش تو تحت الفوطه
ماما ؛؛ ﻻﻻ في بطنيه انتي غاليه عليك تو انطلعها

وصبت ماما وطلعتلي بطنيه نااااعمه انحبها موت البطنيه لانها هديه من عمي

مره مرضت في الشتاء وجونا عيت عمي اللي هم اهل هيثم
عمي لما شاف بطينيتي خفيفه رقيتله
عمي ؛؛ بطنيتها خفيفه راه
ماما ؛؛ ما تبيش اتغط الا بيها اتقول ان الاخرات حرش ماتحبهنش اتحب الناعم هي
عمي ؛؛ تو بكره انجيبلها بطنيه هذه قرعتي نا من المرحوم ماانتحمل فيها شيء

نا ؛؛ تسلم ياعمي
وطلع عمي
ومرات عمي ؛؛ ما نبيش انقولو ل هيثم ايه مريضه قالن مرات ينشغل عليها ومعش يقرا

ماما ؛؛ ماتقولها خليه يقرا وينجح بيش نفرحو بيهم

عمتي ؛؛ هذاك اليوم هيثم قال نبي نقرا الفاتحه في الصيف بيش يقعد يحكي معها عادي هنا
ومعش عادل وعلي اصيبوله

ماما ؛؛ البنت اصغيره تقرا اول ثانوي
عمتي ؛؛ حتي اوليدي اصغير مازال يقرا قي جامعه بس نحن نبو الفاتحه يا عيشه بيش العويل ياخذو راحتهم هم لبعضهم من اول ماجت ايه للدنيا ونحن نبوها
ماما ؛؛ معاك الحق هذه قرعتكم ماعندي مانحكي فيها
عمتي ؛؛ والله وكان نلقي انطلعو فرحها مع فرح نجاح بيش انتي تفتكي من السريب

ماما ؛؛ ياناعليا اصغيره ايه
عمتي ؛؛ ﻻ مااصغيره خلاص كبيره وتو تزوج وتفهم وتكبر عنده

ونا قعدت منحرجه وداكه راسي تحت البطنيه نين جا اليوم التاني ونا كنت غايبه بسبب المرض وراقده في دار المعيشه
ايجي هيثم واتخششه ماما عليا لان كان الحوش فاضي

هيثم ؛؛ اوو الكبيده مريضه
نا ؛؛ هههه شويه برد
هيثم ؛؛ تو روحت من الجامعه القيت باتي شاري البطنيه هذه قالته لمن قالي للكبيده مريضه

نا ؛؛ اها امس قالي تو انجيبلك

وفتح هيثم البطنيه وغطني بها وقعمز جنبي

نا ؛ كان عندك امتحان
هيثم ؛؛ اها حليت الحمد الله القيت نجاح غادي في الجامعه وغمتلي منها ومشيت وسيبتها
نا ؛؛ مع خطيبها
هيثم ؛؛ اها اتصبي وتحكي معه عيني عينك ونا جماعتي كلهم عارفينها بنت عمي واخت خطيبتي

وخشت ماما علينا بقهوه
ماما ؛؛ فطرت
هيثم ؛؛ اها الحمدالله
ماما ؛ اهي قهوتك معناها
هيثم ؛؛ وين خالد
ماما ؛؛ طالعه مش عارفه وين

هيثم شرب قهوته وطلع ونا انذكر في هذاك اليوم وكانه صارتلي امس اذكرت البطنيه وقصتها وكان هذك اليوم اخري مره انشوف هيثم كاخطيبي لان ماصارش اسبوع الا والمشكله امتعت نجاح صارت

….

ماما ؛؛ وين ياايه وين صرحتي
نا ؛؛ في يوم اللي جابلي هيثم البطنيه
ماما ؛؛ اها به خلاص سلم ابنيتي ردي بالك من روحك ومن صحتك

نا ؛؛ ان شاءالله
وطلعت ماما ونا خشيت تحت البطنيه

وبدون ماانحس بروحي القيت ادموعي نزلات انهرت ابكاء

انفكر في حياتي كيف كانت بريئه كنت فاقده الاب بس كنا عايشين علي حسه كنا نقعدو كلنا تحت البطنيه وحده وانهدرزو ونجاح كانت اديرلنا في السحلب
اذكرت اياما طفولتنا ايام هيثم كان يعسر في قشرة البرتقال في عيوني ونا نقعد نبكي بعدها عمي ايهزبه علشان زعلني وبكاني

نا كنت اكتر وحده محبوبه في العائله عند اعمامي وعماتي لان بابا كان اميزني من خواتي وخوتي وكان ايحب فيا علي الشوفه امتعي ديمه ونا الوحيده من خوتي وخواتي اللي سماني بابا

ومشي ليلتي ونا ادموع وانفكر في ايامنا من كثر من انفكر بطفولتي ونبكي نسيت الهم اللي نا فيه

رقدت ووعيت تاني يوم وكان يوم جمعه

رجاء ؛؛ رقدتي علي السريري ونا خليتني لوطه
نا ؛؛ اسفه بس امس سهفني خشيت فيه
رجاء ؛؛ تو شن خطرها البطنيه هذه
نا ؛؛ ماما طلعتها ليا ممكن علشان تبيني نذكرها ونشغل روحي بها بيش ننسي همي
رجاء ؛؛ وشكلك هكي اذكرتي
نا ؛ اذكرت ونسيت همي

تعالي تعالي خشي معي هنا
رجاء ؛؛ ووو ليا زمان علي خشه جنبك
وجتني رجاء وخشت جنبي وحطينا روسنا علي مخده وانفكرو

رجاء ؛؛ شكلها مهمت الدكاتره ايعالجو الناس ويجرحو الاحباب
نا ؛؛ تنهدت تنهيده طويييييله
رجاء ؛؛ منقهره قهر مش قادره انتحمل نقعد بلاه كل ماانفكر فيه انقول ﻻﻻ تو انرن عليه نذكر الخبر اللي دار فيا انفوت حطيت مستقبلي قدامي فكرت بعقلي ومافكرتش بقلبي

نا ؛؛ اهاااااا

وعت ايمان ولقتن نحكو وفي السرير واحد

ايمان ؛؛اتقول عزايز المناب يوعن من الصبح ويقعدن ايهدرزن

رجاء ؛؛ رقدات بدري مش كيفك انتي تشليط عند الفجر مع احمد

نا ؛؛ اخر ماصبتش صلت الفجر

ايمان ؛؛:كيف انتن تسمعنا فيا
رجاء ؛؛ ههههههههههه امس خميس ياحنه
ايمان ؛؛؛ويه سمعتني
نا ؛؛ شبه مش اكيده
رجاء ؛؛ هههههه اكيده امس رايفتي علي مراد ياويه
نا ؛؛ هههههه مش امغير
ايمان ؛؛ وحق ربي مسخات باهي
رجاء ؛؛ الحمدالله طاهرات عفيافات شريفات ومافينا حاجه

ايمان ؛؛ ياعيني ياامتعت سراج انتي وانتي يامتعت مراد صكرن افموكن نا نحكي مع راجلي وهو ايفهم فيا شن فيها

رجاء ؛؛ به قوليله شي يوم يشرحلنا في الحصه
نا ؛؛ ههههههههههههه تخيلي

ايمان بدون ماتحس من روحها اطربقت ضحك

رجاء ؛؛ بعدك نا نفهم طول في مواضيع هذين تو انجيب الدرجه النهائيه
ايمان ؛؛ والله ماتحشمنا
رجاء ؛؛ امتي فرحكم
ايمان ؛؛ سكنتيلي علي الفرح راه
رجاء ؛؛ مانبيك تطلعي بيش نقعد اوحدي في الدار وناخذ راحتي خيرلي من المحاضرات اللي نسمع فيهن في الليل

ايمان ؛؛ هههه ان شاءالله ياحنه بيش نمشي انطبقها

رجاء ؛؛ تي وحق ربي ماتحشمي باهي
صبي من هنا راه انصبيلك

ايمان ؛؛ امصبيه امصبيه نبي اندير دوش ونقراء سورة الكهف خير من وجهكن

رجاء ؛؛ حي عليا الجمعه اللي فاتت ماقريتهش
نا ؛؛ ليش
ايمان ؛؛ النفسيه زيرو
رجاء ؛؛ به عدي يا زيرو انتي

وطلعت ايمان ودارت دوش
ورجاء حتي هي اطلعت
ونا قعدت في السرير لان انحس قي ظهري

وجتني اميره وكانت ماسكه فونها
اميره ؛؛ ويه ويه فون
نا ؛ من
اميره ؛؛ ردي بس
نا ؛؛ الوو
مراد ؛؛ انحبك
نا ؛؛ به
مراد ؛؛ رايفت عليك امس ليلتي شينه بلاك
نا ؛؛ ح اتعاود
مراد ؛؛ كيف ح اتعاود
نا ؛؛ مراد نا هذا قراري
ساهله تقدر اترد تو سناء وح تنسني طول

مراد ؛؛ انتي من لعب بعقلك
نا ؛؛ ماحد بس نا معش نبي نسكن في حوش وفي ناس تدعي عليا

وصكر مراد في وجي ونا مديت الفون ل اميره

نا ؛؛ ونا انهرت ابكاء اخر

مره تانيه ايرن ماترديش او قوليله مش فاضيه

اميره ؛؛ هذا راجلك راه مش علاقه نين اديري هكي
نا ؛؛ ماهذه اللي قهراني انه راجلي
اميره ؛؛:اتحبيه انتي
نا ؛؛ مش ناكره انحبه وانحب المكان اللي فيه هو بس علشان انا انحبه وانحب عيلته ضروري ايطلقني وايعيش مع سناء اخري
شفتيها انتي اول امس سناء كيف دايره

اميره ؛؛ جابتها لروحها
نا ؛؛ حتي نا جبتها لروحي يوم اللي سمعت كلامكم ووافقت عليه

وطلعت اميره وكانت غمتلها بكل
ماما ؛؛اميره خليها معش اتناقشيه تو هو كان يبيها تو ايجي ياخذها غصبن عنها
اميره ؛؛ تو رن عليا وعطيتها تحكي معه حكت معه بجفاف

ماما ؛؛:ايه حنون وطيبه واتحبه وتو اتشوفي ح اتردله

ومشي جوي ونا في البكاء وجو شين اول مره انبات عند هلي 4 ايام بعد زواجي

اتصدقو حسيت روحي ضيفه مش ايه زمان حسيت روحي كاني ضيفه وح اتروح للحوشها وانتريح حسيت ان حوش هلي مش مكاني وانحس في مكان نومي بااااارد
مهما تغطيت انحسه باااااارد

رن مراد مرتين علي اميره ونا مابيتش نحكي معه معش رن هو عليها
اكتر مكان نقعد فيه هي الدار انشوف في البنات يقرن ومشيتا جوهن رجاء شبه كل لليله تبكي حاطه سلسله سراج ومعش حولتها

وفي يوم ساعه 4 ونص عشيه باب حوشنا طق
اطلعت ايمان افتحت والقاته مراد
خششاته جو لمربوعه وكلمت ماما
وخشت عليا تجري
ايمان ؛؛ ويه ويه
مراد بره يبيك

نا ؛ هيييييي امتي جا
ايمان ،؛ تو
رجاء ؛؛ صبي اطلعي عليه
نا ؛؛ ﻻﻻ مانبيش
رجاء ؛؛ تي يبيك
نا ؛؛ اطلعو مش طالعه عليه بس نبي انشوفه من بعيد

عدي ياايمان قولي القيتها راقده

وطلعت ايمان وقالتها
مراد ؛: راقده ولا ماتبيش تطلع عليا
ايمان ؛ اسكتت
مراد ؛؛ تو عندها 5 دقائق ماتطلعش عليا نا نطلع ومعش تلزمني
ماما ،؛ وسع بالك
مراد ؛؛ عمتي انا انجيها لعند هنا وماتطلعش عليا كيف نا مش راجلها ولا شنو

ماما ؛؛ ايمان عدي كلمي اختك
ايمان ؛؛ به

حي عليك حي قال عندك 5 دقائق ماتطلعيش يطلع ومعش تلزميه
نا ؛؛ انصدمت شن
اميره ؛؛ تي اطلعي للراجل
نا ؛؛ خنقتني العبره وتعقدت من مراد
ﻻﻻ نبيش نطلع

اميره ؛؛ تجني علي روحك انتي اطلعي شوفيه كنه
نا ؛؛ بس نا معش نبيه
اميره ؛؛ به ها شن تبي تبي المعيشه السمحه هنا تبي الدموع اللي يوميا اتنزلي فيهن

نا ؛؛ اهون عندي من انعيش في مكان يدمر في حياة اسره

مراد ؛؛ عمتي نا نبي نطلع
وصبا مراد
ماما ؛؛ ﻻﻻ اقعد اصبر انكلمها
مراد ؛؛ عارفها مش ح تطلع عليا

ايمان تسمع في دوتهم واتجيني تجري

ايمان ؛؛ قال يبي يطلع ياطيحت السعد
رجاء ؛؛ اطلعي
نا ؛؛ ﻻﻻﻻﻻﻻﻻ مانيش ومعش نبي حد يقولي اطلعي

ايمان ؛؛ تي وحق ربي وكان نا من مراد انخش انكرك من عند شعرك

وسمعت صوت مراد طلع
ونا قلبي حسيته وقف مره وحده

اميره ؛؛ هييييي حسه طلع

نا ؛؛ قعدت منصدمه وتجمده حسيت بان جسمي كله وقف

رجاء ؛؛ صبي اطلعي اجري
ايمان ؛؛ طلع
نا ؛؛………..

يتبع

error: