مسلسل سعاده كاذبه التكملة

مسلسل سعاده كاذبه

الحلقه 60

ورنيت علي مراد وصبحت عليه وقالي تو انجيك وتيلي قهوتي 
قعمزت علي الكرسي في المطبخ
وحولت وشاحي وتميت نشرب في حليبي

سمعت صوت مع خالد
خالد ؛؛ ارجني انجيب دبشي وانجي

وفجاء سمعت صوت مخنوق نعرفه زيييييييين

…؛ اكبييييييده قاعده هنا
نا ؛ انصدمت وانكدمت والتفت والقيته هيثم
من الصدمه صبيت ابسرعه
هيثم ؛؛ قرب مني ومدلي يده
صباح الخير اكبيده

نا ؛؛ حسيت بقلبي ايدق بسرعه ومعش عرفت ماندير وحطيت طاسة الحليب علي الطاوله وحطيت الوشاح علي راسي وجيت نبي نطلع مسكني هيثم

هيثم ؛؛ اتحشم مني يعني تو
نا ؛؛ بصوت مخنوق
شوي لو سمحت

هيثم؛ مازالتي خجوله
نا ؛؛ دفيته بقوه نبي نطلع
وهو صبلي قدام الباب
هيثم ؛؛ خلينا انسلمو بس بعدها اطلعي كنك راه في النهايه نا ولد عمك
نا ؛؛ ……
هيثم ؛؛ كيف رضيتي علي روحك تاخذي واحد مطلق وبعياله يعني عندك عادي تشتغلي اعيال راجلك

وخشت ماما
ماما ؛؛ انصدمت لما شافت هيثم كيف امصبي علي الباب وامسكره عليا
خير ياهيثم
هيثم ؛؛ التفت وشاف ماما
خير ياعمتي
ماما ؛؛ كنك هنا امسكر عليها
هيثم ؛؛ نحكي معها وهي ماتبيش تحكي
ماما؛؛ ايه ازوجت ومرات راجل تو خلاص
نا ؛؛ ماما مراد جيني تو
ماما ؛؛ كنه بدري
نا ؛؛ يبي يفطر معي
وبحتت في هيثم والقيته ايبحت فيا

هيثم ؛؛ شفته امس مش لكي بكل كبير
ماما ؛؛؛نصيبها بس ماشاءالله عليه
هيثم ؛؛ كيف راضيتي علي روحك بس
ماما ؛؛ هيثم خلاص
نا ؛؛ طلعت بسرعه من المطبخ ومشيت
وشفت مراد كيف خاش للجنان

مراد ؛؛ صباح الخير حبيبي
نا ؛؛ جيته بسرعه واضبطته
مراد ؛؛ كنك
نا ؛؛؛بصوت مخنوق امرايفه عليك
مراد ؛؛ اهاااا خلاص اليوم اتروحي معي
نا ؛؛ ههههه نجك
مراد ؛؛ هيا وين قهوتي
نا ؛؛ هيا انديرها وانجيك عدي للمربوعه بس
مراد ؛؛ هيا
وطلع خالد
خالد ؛؛ اوووو مراد
مراد ؛؛ صباح الخير
خالد ؛؛ صباح النور
وبحت فيا بالاستغراب
ايه وين هيثم ما شفتيش
مراد بحت فيا ومنصدم
نا ؛؛؛حسيت وكان حاجه خشت في قلبي وطعناته

وطلع هيثم من المطبخ
هيثم ؛؛ اهو هنا نا
نا ؛؛ امنزله راسي وبحتت في مراد من تحت لتحت
خالد ؛؛ هيا ياراجل
هيثم ؛؛ هذا الدكتور
مراد ؛ برفعت حاجب
ان شاءالله
هيثم ؛؛ كيف حالك
مراد ؛؛ تمام
وبحت فيا بالتفنيصه ومسك يدي من عند المرفق بقوه وكرني شوره
تعالي نبيك
نا ؛؛ اعيوني تعبن ادموع وخفت منه واجد لان كان خانق يدي واقريب يكسرها ونا معش اقدرت نبكي واو انعيط
ومشي مراد وكرني وراه

مراد ؛؛ وهو متعقد
صار عدي للمربوعه صار

نا؛ ؛ تميت نبكي ونمسح في ادموعي
وخششني للمربوعه ودفني جوا بقوه

مراد ؛؛ تو تحكي الفرخ هذا شن جيبه هنا وليش قاعد في المطبخ الخارجي اللي كنتي فيه
نا ؛؛ قعدت نرعش وخايف والكلام معش طلع مني من الخوف
مراد ؛؛بصوت عالي ومتعصب

تي احكي ياعن شكلك بكل احكي

نا ؛؛ بخوف وبصوت متقطع
والله جا مع خالد وما حكيتش معه بكل والله ماحكيت معه
مراد ؛؛ هذا عليش لابسه وشاح كنتي معه يعني خفتي ايشوف شعرك وماخفتيش من ربي انك اتخوني فيا
نا ؛؛ وحق ربي مانكذب عليك والله ماحكيت معه والله ماكانا بروحنا كانت معنا ماما والله مانكذب وحتي كلمة خير ما قالتها له

مراد ؛؛ خشي البسي عبايتك واطلعي قدامي
نا ؛؛ شن
مراد ؛؛ نا قالت خشي راه ……

نا ؛؛ حاضر حاضر
وطلعت من المربوعه وخشيت للدار نجري نلابس في جينز وجاكه فطنتلي اميره
اميره ؛؛ كنك
نا ؛؛ونا نبكي
ردي بالك من العويل
اميره ؛؛ كنك وين ماشيه
نا ؛؛ مع مراد
اميره ؛ ليش شن في
نا ؛؛ شاف هيثم يحسابني كنت نحكي معه
اميره ؛؛ اخبطت خدها بقوه
حي عليك حي
نا ؛ تميت نبكي اخر وانخبط في وجي
اميره ؛؛ اسسسسس تو انحلوها تو انحلوها مااديريش في روحك هكي

ونطت امل مره وحده
امل ؛؛ وانتي حكيتي معه صاح
نا ؛ ﻻ والله ﻻ حتي ماما شاهده
امل ؛؛ عندك مااديري امغير احلفي علي المصحف وخلاص

وسمعنا صوت خالد ومراد عالي طلعنا نجارو

مراد ؛؛ انت سكر فمك
هيثم ؛؛ ماتعليش صوتك عليها البنت اصغيره
خالد ؛؛ هيثم اس مش شورك
هيثم ؛؛ ﻻ شوري ياخالد انسيت كلام عمي ولا شنو
مراد ؛؛ انت صكر فمك وماتحكيش ولا كلمه هذه مراتي ونا حر فيها
خالد ؛؛ هيثم خلاص اس فوت
هيثم ؛ اخساره تقعد عندك انت
مراد ؛؛ قرب منه يبي يضربه امسكه خالد
خالد ؛؛ خلاص يامراد علشانا

ونا طلعت عليهم
مراد ؛؛ فنص فيا
قدامي علي السياره
ومشيت ولما قربت منه مسكني وكرني بقوه وطلعنا وركبني في السياره وطبق الباب بقوه

وخالد وهيثم وماما لحقونا وشافونا
هيثم ؛؛ هذه الامانه يا خالد
مراد ؛؛ مازالت محترم الحوش اللي نا فيه

ماما ؛؛ هيثم خلاااص
مراد اوليدي وسع بالك راهي والله ماغلطت في حقك راه ماتكذبش عليك صادقه

مراد ؛؛ ان شاءالله خير
وركب في السياره وطبق الباب بقوه وقعد ايخبط في الدومان بقوه بيده

مراد ؛؛ تي كنك انتي كنك كل مره طلعتلي بحاجه كنك

نا ؛؛ والله ماكنت نحكي معه وتربة بابا ما كنت نحكي معه
مراد ؛؛ تي خلااااااص صكري فمك معش نبي نسمع صوتك

نا ؛؛ نزلت راسي وتميت نمسح في دموعي والعبره خنقتني وهو يجري ومش عارف وين يمشي يجري وخلاص ومتعقد
نين جينا قدام حوش مبني جديد وقف
وقعد ايبحت فيه وحط يده علي فمه

نا كني بس شن داير في دنيتي هذه كل ماانتريح تطلعلي حاجه شن اندير بس

نا ؛؛ انبحت فيه ونبكي
مديت يدي وحطيتها علي يده وهو بحت فيا وشد علي يدي اقريب كسرها من كتر ماهو ايحط في غله عليها
ونا توجع فيا ونبكي
نا ؛؛ اهاااااا يدي
مراد ؛ شن حكيتي معه
نا ؛ وحق ربي وحق ربي ماحكيت معه والله انحبك يامراد ومانخون فيك لو انخون فيك معقوله انقولك تعال افطر معي ولاه انخليك اتحملني اخري

مراد ؛؛ بصوت مخنوق ودوبه طالع
متاكده ياويتي
نا ؛؛ والله مانكذب شن ياحبييي انت مش حاط فيا ثقه ولاه شنو

مراد ؛؛ قعد ايبحت فيا زين وساكت
انزلي هيا
نا ؛؛ بحت بالاستغراب شور الحوش
مراد؛ ؛ انزلي هيا
ونزل مراد ونزلت نا وراه وفتح الباب بالمفتاح وخشينا
نا ؛ شن هذا
مراد ؛؛ بحت فيا
هذا حوشنا
نا ؛؛ شن تحكي جدا خلاص شريته
مراد ؛؛ اها تعالي شوفيه

نا ؛؛ مازال يبي
مراد ؛؛ سراميك وازواق ونبي نبني بره مطبخ ومخزن وحمام
نا ؛؛ صاح
ونا نمشي وانبحت في الحوش ومسكني مراد فجاء وكرني شوره واضبطني بقوه نين اقريب تكسر بين ايديه
مراد ؛؛ انحبك انحبك شن درتي فيا انتي
نا ؛؛ قعدت نبكي من كتر ماحسيت بمراد موجوع من طريقة تضبيطته ليا وكلمة انحبك اللي طالعه من الاعماق

وفجاء يحطني علي الساس وجت عيني في عينه وحول وشاحي وطلق شعري وحطه علي الجنب ونزل علي ارقبتي

وتم ايبوس فيا بقوه وكانه ايفش في غله
نا ؛؛ اهاااا حبيبي
مراد ؛؛ اسسسس
نا ؛؛ حبيبي الساس حرش
مراد ؛؛ بحت فيا
تو تحلفي واتقولي انحبك ومستحيل اتخنوني ولاه تغفلني
نا ؛؛ والله انحبك وانموت فيك موت وماعمري خنتك ولا عمري ح انخونك ولا ح نغفلك

مراد ؛؛ ويتي نبيش نخسرك نا ونبيكش تغلطي في حقي وحق ربي انحبك انحبك وياريت ماتسخدميش حبي لكي ضدي نا حاط فيك ثقه بس اللي درته غيره راه غرت لما شفته وعرفت ان شافك
نا ؛؛ وحق ربي انحبك انت وماعمﻻي حبيت انسان غيرك

وقربت منه وحبيته علي اللحيه وحول قرب مني اكتر ولصقني علي الساس اخر

وتم ايبوس في ويفتح في الجاكه امتعي
نا ؛؛ حبيبي بشويه عليا كنك انت
مراد ؛؛ اسسس وطي صوتك انتي راه يسمعنا حد
نا ؛؛ حبيبي الساس حرش اها اجنابي رفع ايديك
مراد ؛؛ تي اسسسسس
وحولي الجاكه وهو حول ……….

♥♥♥

مراد ؛ اسسسس الناس تسمع والله يمسكونا يحسايوني هارب بيك
نا ؛ وانت من جدك ادير فيا هكي نا مراتك حلالك عندنا شقه نمشولها
مراد ؛؛ ههههه ماقدرتش نمسك روحي
هيا البسي دبشك
نا؛ ؛ عطشانه
مراد ؛ ههههه تو نشريلك هيا البسي
ونا نلابس قررب مني مراد واضبطني وباسني علي خدي
انحبك
نا ؛؛ انموت فيك
مراد ؛ مهما اندير مانتحملش فيك حاجه
نا ؛ ولا فيك حبيبي والله انحبك
مراد ؛؛ شن اعجبك الحوش
نا ؛؛:اهاااا حلو كبير
مراد ؛؛ نجك ليا تو الايام الجايه انجيبلك الكتالوج بيش تختاري السرميكه
نا ؛؛ صاااح بعدك عندي الوان خاطري فيهن

مراد ؛؛ اللي تبيه انديره لكي بس بشرط اتكوني معي هكي طول عمرك نبيك هكي ببرائتك وطيبتك وحبك ليا واتصونيني هكي

نا؛؛ ونا من عندي غيرك وهذا طبعي من يومي ومستحيل انغيره

حبيبي والله ونا هنا في حضنك هنا انحس روحي مالكه الدنيا كلها ومانبيش حد يقطع علينا او انسمع صوت غير صوتك

مراد ؛؛ ربي مايحرمني منك هيا نطلعو
نا ؛؛؛هيا
وطلع مراد للشارع وتم ايبحت وناحطيت وشاحي وطلعت والقيته ايبحت ومشينا وركبنا في السياره بسرعه
مراد ؛؛ ههههه كنا نحن اتقول دايرن حاجه مش تمام
نا ؛؛ ههههه بعد جيبتك ليا هنا واللي صار هنا اتقولي مش داير شيء
مراد ؛؛ بحت فيا وضحك
مادرتش حاجه تغضب ربي مراتي وامرايف عليها وهذا حوشي وماحد عنده كلمه علينا

نا ؛؛ ههههه نجك ليا بس الساس كان حرش
مراد ؛؛ ههههه عادي مش ديمه افراش ناعم امتع 5 نجوم

نا ؛؛ ههههههه سخيف هذه اخر مره
مراد ؛ ههههههههه كل ماتحرقي دمي انجيبك هنا واندير اللي نبيه

نا ؛؛ هههه صايع
مراد ؛؛ مع حلالي
وبحتت في الساعه والقيتها ساعه 12 ونص
هييييييي مشي الوقت ونا مانحس

مراد ؛؛ وين تندري وانتي كنتي في عالم تاني
نا ؛؛ راه جيعانه نا
مراد ؛؛؛تو ناخذو حاجه من اي مطعم
نا ؛؛ روح بيا للحوش
مراد ؛؛ هلك ماعندهم مايبو فيك اليوم نبيك انا
نا ؛؛ حبيبي تو سيبت الايام كلهن وجيت علي اليوم هذا اهم يوم في حياة اختي
مراد ؛؛ باهي باهي خلاص
ويه نبي نحطك وماشي ندوش في الشقه وانتريح وبعدين انجيك بس نبيك اتريحلي بالي
نا ؛؛ حبيبي انحبك والله انحبك وانت اللي جوا في اعيوني وفوق راسي
مراد ؛؛ انحبك وربي مايحرمني منك
نا؛؛ اقريب انموت من العطش
مراد ؛؛ ههههههه باهي اهو محل

ونزل علي محل وجاب ميه وعصير وشكولاطات وكيكات
وركب وكلينا علي السريع وجينا للحوش هلي ونزلت والقيت شباب العائله كلهم قاعدين قدام الحوش وخشيت بسرعه للحوش ومشيت شور المطبخ الخارجي
والقيتهن امقعمزات وايحطن في الغداء

رجاء ؛؛ وين كنتي
نا ؛؛ شويه مشوار هنا
ماما ؛؛ شن صار
نا ؛؛ ﻻ شيء جو تمام كنا انتفرجو علي حوشنا الجديد
اميره ؛؛ صااااااح باهي مبارك
نا ؛؛:ايجنننن بكل وين ايمان

ماما ؛؛ تنهدت تنهيده طويييييييله والعبره خنقتها
عدت خلاص

رجاء ؛؛ خنقتها العبره من طريقة كلمت ماما صبت تجري وخشت للدار وتمت تبكي
وخشيت نا وراها

نا ؛؛ خلاص ارجيوه
رحاء ؛؛ وهي امقعمزه علي السرير وتبكي وصوته متقطعه

خلاص ياويه عدت ايمان واميره اقريب ونا ح نقعد اوحدي عدت اللي ماعمري رقدت بلاها عدت اللي ديمه انتعارك معها قبل مانرقد عدت اللي تمشي معي للمدرسه عدت خلاص عدت اللي كنت لما تسمعني نبكي اتخش معي في السرير عدت خلاص وسيبتني هنا

نا ؛؛ من كثر الكلام واعر القيت روحي نضبط فيها ونبكي ومنهاره
رجاء ؛؛ الحوش ح يقعد شين ياويه هو قعد شين من مشيت بابا بعدها نجاح وبعدها انتي وبعدها ايمان
ليش ليش اللي يقرب مني ايعدي وايسيبني ليش ياويه ليش حتي يوم اللي حبيت حب صاح قهرني وسيبته ليش كني نا عنديش حظ ولا شنو

نا ؛؛ وسعي بالك خلاص هذه سنة الحياه تي قولي الحمدالله تريحنا عليها مش انتي اللي تقولي طلعي الفرح وفكينا منك

رجاء ؛ ماكنتش نحسابها واعره هكي
وخشت علينا دعاء
دعاء ؛؛ بنات الغداء هيا
نا ؛؛ نا نبيش نبي انخش ندوش خطرها وين امل
دعاء ؛؛ عدت مع ايمان تمت تبكي ومنهاره مشت معها هي وخذت دبشها
نا ؛؛ باهي تمام

رجاء ؛؛ تمت تمسح في ادموعها واتبحت فيا
انتي وين كنتي بنتك دخان
نا؛؛ ههههه وحولت وشاحي
دعاء ؛؛ هييييي حي عليك شن هذا
نا ؛؛ بحتت بالاستغراب فيها
شن
رجاء ؛؛ كنتي مع مراد انتي ماه
نا ؛؛ ليش شن في
دعاء ؛؛ اشقي برقبتك وغطيها
نا ؛؛ هييييييي وحطيت ايديا علي ارقبتي
وصبيت نجري للحمام وبحتت في المرايه

ﻻﻻﻻﻻ يامراد تي مش وقته هذا

وولعت الدوش وجيت وقعدت تحته وتميت انفكر في مراد وفي قسوة وحنيته مهم يقس عليا ايحن ايحن ليا وحتي لما ايكون متعقد مني يوصلني غضبة بطريقه حلوه وهذا تغير جديد وحلو وعرفت روحي ان ايحبني صاح

وادوشت وطلعت و خشيت للدار وحولت المنشف ولابست دبشي وصليت وخليت محرمت الصلاه علي الراسي وطلعت للمطبخ الخارجي
والقيت ماما وخالتي سالمه ورجاء ودعاء
والقيت خالتي سالمه امقعمزه وحاطه حمادي علي كرعيها وراقد
نا ؛؛ نجيه راقد
خالتي سالمه؛؛؛اها غديته ورقدته
نا ؛؛ وين لمار
ماما ؛؛ اطلعت مع اميره
نا ؛؛ كنها
ماما ؛؛ مشت اميره شايله حاجات للصاله
نا ؛؛ وامتي امروحه
دعاء ؛؛ خلاص مش امروحه هي وخالتي فاطمه خذن دبش والميك اب والاستشوار يبش يلبسن غادي

نا ؛؛ ودبش لمار
ماما ؛؛ خذاته اميره خلاص ويه ورجاء ودعاء ابدن وتن اروحكن حتي مروه ونعيمه مشن للشققهن بيش ايوتن اروحهن
نا ؛؛ الحوش هادي
خالتي سالمه؛؛ الناس كلها روحت خلاص هيا نا نبي نرقد جو وبعد العصر نوعي اندير حمام وانغير
دعاء ؛؛ هيا ارجيوه خشي ديري دوش
رجاء ؛؛ هيا
وخشت رجاء ونا ودعاء كملن الحوس و خشينا للحوش جوا وماما وخالتي رقدن وجنبهن حمادي ونا خشيت وحطيت قدامي المرايه وبديت نستشور في شعري وخشت عليا رجاء

رجاء ؛؛ هي ديرلي دعاء خشي انتي تو للحمام
دعاء ؛؛ تحكي بالفون
حبييي نبي ندوش نا وبعدها انوتي روحي تو انكلمك بعدين
باسط ؛؛ ماشي سلام
دعاء ؛ سلام
وصكرت وخشت الحمام ونا بديت في رجاء في شعرها وحسيت روحي ساخنه خفت شعري يخرب حولت الفنينه وقعدت ببدي بلا اكمام وكملت للرجاء وصبت
رجاء ؛؛ هيييييي ظهرك امخبش كله تي وين كنتي انتي
نا ؛؛ هييييي وبرمت وتميت انبحت في ظهري
حي عليا

رجاء ؛؛ تي وين كنتي
نا ؛؛ مع مراد في الحوش الجديد هذا من الساس
رحاء ؛ طيح سعدك بيش تستري روحك
نا ؛؛ اس اهو ايرن
ها حبيبي
مراد ؛؛ وين قاعده
نا ؛ في الدار جو انوتي في روحي
مراد ؛؛ اها به نا في الشقه تو بعد العصر انجيك لا تطلعي هكي ولاه هكي
نا ؛؛ حاضر حبيبي
مراد ؛؛ خلاص تبي حاجه
نا ؛؛ سلامتك
مراد ؛؛ ويه راه عقلي عندك
نا ؛؛ حبيبي راه خيرلك هيا
مراد ؛؛ هههههه ماشفتيش شيء فيك

نا ؛ اهاااااا تو اتشوف مازال احسابك بعدين
مراد ؛ ههههههههه ماقالك حد تحرقي دمي
نا ؛؛ ان شاءالله ديمه دمك محروق
مراد ؛ ازي طلعتي صايعه وتبيها
نا ؛؛ هههههههه خلاص
مراد ؛؛ عادي عادي جو الجامعات مره مره انديروهن
نا ؛ كيف متعود عليهن املاه
مراد ؛؛ اوووو شن خطرها تو
نا ؛؛ احكي راه خيرلك
مراد ؛؛ نا قالتلك من زمان نا صايع مع حلالي بس
نا ؛؛ اهاااا به مراد ارقد تو
مراد ؛؛ ههههه غرتي
نا ؛؛ اهااا
مراد ؛؛ انحبك وانتي اتغيري وشايله عويلي في بطنك
نا ؛؛ ضمنت خلاص
مراد ؛؛ ان شاءالله اسمعي فكيني من الرقيص ايوه
نا ؛؛ اصلا اجنابي يوجعن فيا ماخلنيش نرقص
مراد ؛؛ ردي بالك من روحك
نا ؛ ان شاءالله سلام
مراد ؛؛ بصوت واطي
انحبك انحبك انحبك
نا ؛ ونا اكتر
مراد ؛؛ سلام

وصكر مراد ونا بديت اندير في ميك اب ورجاء حتي هي بدت في دعاء استشوار

ومشي الوقت عند ساعه 6 وكملنا وغيرت لحمادي ولابسته بدله جديده

نا ؛؛ هيا راه مراد بره
رجاء ؛ نركب معكم
دعاء ؛؛ حتي نا معكم وخلاص
ماما ؛؛ تو نمشو كلنا من تو خلاص رجاله ومش متعشين هنا كلهم غادي لان اليوم عزومت عشاء عند هل العريس وعازمين رجالتنا كلهم
نا ؛ به هيا

ومشينا كلنا للصاله والقينا اميره وخالتي فاطمه ولمار امقعمزات ويرجنا فينا ومعهم اهل احمد

ولمار دايره تسريحه اتجنن وديرتلها اميره روج وردي
وبدو ايجو الناس والصاله ازحمت ونا قعمزت في طاولة امتعت اعربي مع عمتي وهدي وهاجر والهام وغاده
وعلي ساعه 8 خشت ايمان وكانت طالعه مالكه حاجه من الاخير كانت طالعه وكنها مالكه صغيره في فيلو وكان الخوف باين عليها واجد ونا لما شفتها عطيت حمادي للهدي وصبيت وجيتها وساعدتها علي ركبتها للدوج عرفت اتربكت معش اعرفت ساعدتها وقعمزتها علي الكرسي

نا ؛؛ كنك تعرشي
ايمان ؛ صقعنا وخايفه
نا ؛؛ اقري المعوذات ووسعي بالك والله راه طالعه اتجنني
ايمان ؛؛ نجك ليا حتي انتي

وتمت تقرا وهدت اشويه وجتها اميره وتمت معها ونا نزلت وقعمزت وبدت الفرقه اتغني والجو ايهبل وبدنا بنات العيله يرقصن وايصفقن مع الفرقه ونا صبيت وجيت معهن

هاجر ؛؛ اتجننننن الفرخه طالعه
هدي ؛ من امس متت فيها الصبغ والميش قالبتها بكل
هاجر ؛؛ كنك ماتعدي مع عيت عمك اتقعمزي
هدي ؛؛ منحرج منهم
هاجر ؛؛ به هيا انصبو مع البنات علي المسرح
هدي ؛؛ هيا

والمصوراتي بدت اتصور فينا مع ايمان
وبعدها خش احمد وكلنا نزلنا ولبسنا العبايات وهو كان طالع حلوووو بكل وسلم عليها بالخد وحبها علي راسها وقعمزو
احمد ؛؛ متغيره بكل
ايمان ؛؛ بحتت فيه بالابتسامه خفيفه ونزلت راسها
احمد ؛؛ لعند تو خجوله
ايمان ؛؛ اسسس يبحتو فينا الناس
احمد ؛؛ والله الليله ليلتي وماحد دخل بينا

وجتهم المصوراتي وتمت اتصور فيهم في اصور رومانسيه ونا تمت نذكر في فرحي كيف كنت خايفه من مراد ومتحشمه وكانت اغلبيت اصورنا ونا وجي لوطه ومتحشمه
هدي ؛؛ راجل اختك شكله رومانسي بحتي كيف ايبحت فيها ومتقرب منها
نا ؛؛ هههههه
هدي ؛؛ وووووو عليك تضبطيه اتجنننننن اضبطها
هاجر ؛؛ شكله ماصدق العطيب
الهام ؛؛ حي قالك نحن

بحتت والقيت رجاء امصبي عند زاوية المسرح وتبكي وحالتها حاله صبيت ومشيتله وتميت انضبطها فيها وجتنا امل وحتي هي تمت تبكي

وشفنا احمد وايمان وهم نازلين من المسرح نزلنا وراهم تمينا نمشو والقينا اميره وماما في الريسبشن ويبكنا
ايمان انهارت وتمت تضبط في ماما وتبكي وجتها رجاء تجري وتمت تبكي

ايمان ؛؛ سامحيني سامحيني
ماما ؛؛وهي تبكي
الله ايربحك وين مامشيتي احمد هذه امانه يااحمد عندك
احمد ؛ في عيوني ياعمتي قاعده
وجيتها نا وتميت انحول في رجاء بالغصب منها واضبطتها وبعدها اميره تمت تضبط فيها
اميره ؛؛ هذا احمد اللي تبيه خلاص بلا ابكاء

خالتي فاطمه؛ طيح سعدكن هذا فرحها راه
وكرتها شورها ولبستها الكاب وطلعتها

ورجاء مره وحده انهرت وطحت وتمت تبكي وكانه جنازة مش زفه من كثر الموقف يقهر الاقارب كلهم تمو يبكو وايسكتو فينا وبذات رجاء

نين خش عليها خالد وطلعها وركبها في سيارته وهو خنقته العبره وركبت معها خالتي سالمه وامل ودعاء
ونا وماما واميره وخالتي فاطمه قعدنا نين روحو الناس كلها وروحنا
والقينا رجاء راقده في سرير ايمان وتبكي بلا صوت وامل معها
كل وحده فينا خشت غيرت دبشها وهي العبره خنقتها برمن علي الحوش ورقدنا

وتاني يوم برمنا علي الحوش وعلي الحوسه وفي العشيه روحن خالاتي
نا مرضت ومعش اقدرت انصبي بكل وقعدت عند هلي كم يوم

ومشي يوم وراء يوم ونا طلعت حامل بالتؤام وتعبت بحملتي واجد طول اليوم ونا راقده في داري وخلاص حتي العويل مشو ل سناء

مراد ؛؛ مش وضع هذا تو انتي في شهر سادس ومازالتي هكي
نا ؛؛ مراااااد اطلع وطفي الضيء
مراد ؛؛ معقوله للدرجه هذه
نا ؛؛ حبيبي تعبانه خلاص
مراد ؛؛ به نا نبي انقولك ابدي وتي روحك ولمي حاجاتك نبو انحولو
نا ؛؛ وين
مراد ؛؛ خلاص انا كملته الحوش نبيك اتلمي ديشك هنا ونبي نبدا انحول
نا ؛؛ ماعنديش جهد تو

مراد ؛؛ ﻻﻻ نبي اندير عشاء الحوش والجيبه مع بعضهم احسن نبي نطلع نشري دار نوم

نا ؛؛ تو انكلم خواتي ايجني
مراد ؛؛ باهي كلميهن وانتي قاعده كيف البطريق
نا ؛؛ ههههه ما منك انت
مراد ؛؛ انحبك وانموت فيك
نا ؛؛ مدلي فوني
مراد ؛؛ تفضلي يااحلي وحده في الدنيا
نا ؛؛ اهلا اميره
اميره ؛؛ مازالتي مريضه
نا ؛؛ اها نبيكن اتجني خلاص نبي انحول نبيكن اتجن وتبدا اتلمن الدبش
اميره ؛؛ به تو انجو بعد العصر
نا؛؛ حاولنا انكن اتجن تو وجيبن معاكن الغداء مش دايره حتي اليوم

اميره؛؛ باهي تو انقوللها لماما وانجيك ياباير

وصكرت اميره ومشت قالتها لماما
ماما ؛؛:خلاص انتن خوذن غداء وعدن تغدانا احذ اختكن ونا تو نمشي لخالتك سالمه
اميره ؛؛ باهي هيا

وجت اميره ورجاء وتغدنا معي وبدن اليمن في الشقه وجت هدي معهن اتساعد فيهن

اميره ؛؛ ويه الليل ليل نحن نبو انروحو

نا ؛؛ ﻻﻻ خليكن والله حتي غيرتلي جوي

هدي ؛؛خليكن والله غيرتلي جوي حتي نا
اميره ؛؛ نا نقدرش نبات
نا ؛؛ ارجيوه باتي معي انتي عادي
رجاء ؛؛ باهي خلاص اهو منها نفتك من تفكير في النتيجة
هدي ؛؛ نجك ليا ان شاءالله بالنجاح
رجاء ؛؛ ان شاءالله والله حليت حل سمح بس خايفه
نا ؛؛ وايمان
رجاء ؛؛:ايمان حتي هي اتحل ياحنه احمد مايخليش فيها ترقد الا لما اتكمل اقرايتها وايشجع فيها ورايحه سامنه ومنظرها ايجننننننن نايره في المدرسه ولانظار كلهن عليها وحتي احمد سامن

هدي ؛ ياعوينهم

رجاء ؛؛ سبحان الله زمان كنت في استراحة الفطور انلز فيها وانهدرز مع صحباتي تو في الاستراحه انلز في صحباتي وانقعمز معها وتقعد اتهدرزلي واغليبت تريواحتي معها هي لان اتروح وتاخذ الغداء من ماما واتروح تغداء زترقد وتوعي تقرا حتي دهوير ماحصلتش الا في اول اسبوع بس باقي احمد حبسها ياعندنا ياعند عربها والاكثر في شقتها وتقرا

اميره ؛؛ ماما عاجبها الوضع هذا قالت احسن هكي نضمن بنتي اتخرج الا الدهوير مافيش منه فايده
هدي ؛؛ اصدقت والله
اميره ؛ هيا نا نازاله خالد جا
رجاء ؛؛ مربوحه
وروحت اميره وهدي ورجاء اقعدن ايهدرزن في الصاله نين جا مراد وكان جايب معه عرم كتالوج للصالونات واديار نوم

مراد ؛؛ اهن شوفن واختارن دار للاطفال وصالون للصاله
نا ؛؛ به حبيبي
رجاء ؛؛ هاتو هاتو شوري دار الاطفال نختارها نا
هدي ؛؛ ههههه ﻻﻻ شوري اعيال خويا نا
رجاء ؛؛ والله اعيال اختي نا
مراد ؛؛ ههههه اهبال
تعالي ويه نبيك

وصبيت وخشيت وراء مراد للدار

هدي ؛؛ اوووووو كرت فرح جاي للمراد
رجاء ؛ فرح فرح من
هدي ؛؛ اس خلينا نفتوحه
وافتحت هدي الكرت وهي تقرا وماخلتش رجاء اتقراء معها وحطت يدها علي فمها وانصدمت

رجاء ؛؛ هيييييي كنه وجك هكي فرح من
هدي ؛؛ سكرت الكرت ﻻﻻ فرح عادي فرح عادي

رجاء ؛؛ ياعنجد فرح عادي احكي قولي فرح من
هدي ؛ اعيونها تعبن ادموع وخافت من ردت فعل رجاء
رجاء ؛؛خذت من يدها الكرت وافتحت وهي تقراء لقت اسم ………….

يتبع