مسلسل سعاده كاذبه التكملة

مسلسل سعاده كاذبه

الحلقه 31

وطلعنا والبنات دارن العصريه

وجاء خالد

وخش وجوه شين بكل
واول ما شافته امل انفجعت

خالد ؛؛ شير ل امل وهي جاته

خالد ؛؛ نا مش قالتلك فيش اطلعو ليش طالعه كنك تكسري في كلامي يا فرخه

امل ؛؛ خالد تعال جو تو تسمعنا ماما

ومسك في يدها وخش بها للدار ودفها جو وسكر الباب بالقوه

خالتي سالمه ؛؛ طيح سعدنا هذوم كنهم

دعاء ؛؛ تكينها من اول امس
ماما ؛؛ كنهم
دعاء ؛؛ انتو عارفين امل ماتحكيش

خالتي فاطمه :؛:خلوهم براحتهم تو ايتناقشو ويصالحو

خالد ؛ ها يا ابله كنك جايه مش قالتلك مانبيش انشوف خلقتك

امل ؛؛ بس نا مش جايتك يا خالد نا جايه للخالتي ونا من اول ما درنا علاقه شرطت عليك ان مهم ايصير بينتنا الاهل ما دخلهمش

خالد ؛؛ بصوت عالي ومتعقد بكل

باهي ليش تطلعي ليش تطلعي اتكسري في كلمتي ولا شنو

امل خافت ووخرت منه واقعدت تبكي

خالد ؛؛ احكي كنك اتبكي ولاه عارفه روحك غالطه

امل ؛؛ خالد مش انت قالت معش نبيك خلاص اللي بينتنا انتهاء خلاص كل حده في حاله وانت مادخلكش بيا

وصبت وجت عند الباب تبي تفتحه جاها خالد وحول يدها
خالد ؛؛ فيش اطلعو وجيبي فونك هنا

امل ؛؛ هذا فوني انت ما دخلكش به
خالد ؛؛ امل ما اتعقديهش ليا اخر
امل ؛؛ تمت تبكي انت قالت اللي بينا انتهاء خلاص يا خالد مش من حقك اتحكم فيا او تاخذ فوني نا لما صبيتلك احترام لك بس

خالد ؛؛ امل راه مازالت مادرت شيء نا قالت هاتي فونك
امل ؛؛ مش امعي فوني

خالد ؛؛ فتح الباب وطلع قدامه
ايمان ايمااااااااااان

صبت ايمان خايفه وجاته تجري
ايمان ؛؛ نعم يا خالد
خالد ؛؛ مديلي شنطة امل
ايمان ؛؛ به حاضر
امل ؛؛ ﻻﻻ يا ايمان ما اتجبيهش

خالد ؛؛ برم وجه لوراه شور امل وفنص
ايمان قالت جيبي معناها جيبي

ايمان ؛؛ باهي به

وجت ايمان تجري وخذت الشنطه

خالتي سالمه؛ تي شن دايره الفرخه
ماما ؛؛؛ربك يستر معهم
اميره ؛؛ امل اتعاند فيه واجد كان اتحط يدها علي فمها وتسكت

ايمان ؛؛ خالد الشنطه
خالد ؛ خذ منها الشنطه وخش للدار وسكرها في وجه ايمان

وجاته امل تجري تبي تاخذ شنطتها خالد رفع يده وماخلش امل تاخذها

خالد ؛؛ امل عدي قعمزي غادي وريحي اعظامك
امل ؛؛ نبيش نبي شنطتي ما اتفتهش
خالد؛ ؛ ليش شن فيها ولاه فيها حاجه خايفه انشوفها

امل ؛ انت هكي شكاك ومش حاط فيا ثقه
خالد ؛؛ والله قدري موقفي نا قالتلك بعد العشره مانلقش فونك مشغول وانتي اتهدرزي و واخذه راحتك

امل ؛؛ خالد كان انهدرز مش مع واحد يعني

نا عندي صحبات وطبيعي نبي انكلمهن وايكلمني

خالد ؛؛ عندك النهار كله جت يعني بعد العشره

واسكتت امل وقعمزت علي السرير وتمت تبكي
وخالد فتح شنطة امل وطلع فونها واول ما فتح الشاش لقها حاطه صورته علي الشاشه وكاتبه عليه حبيبي

خالد انحرج بس ماعدلش وخش طول علي المكالمات وفعلا لقي صحبتها هي اللي رانه عليها ساعه 11 بس قعد شاك واتصل بالرقم
وفتح السماعه الخارجيه

وردت البنت
خالد لما تاكد انها بنت سكر في وجها ولا كلمه

امل ؛؛ ها تو تاكدت خالد ان صاح جوي جو وحده طايشه وضحك ولعب

بس لما حبيتك صنتك وماعمريش فكرة اني انخونك انت الانسان الوحيد اللي حبيته وفوني معش نبيه يا خالد وخليه عندك

وصبت وجت تبي تطلع كرها خالد شوره

امل ؛؛ خالد خلاص حول

خالد؛ ؛ انحبك يافرخه انحبك اقريب طلعتني من عقلي لما القيتك مشغول

امل ؛؛؛قعدت تبكي اخر
والله حتي نا انحبك

خالد؛؛ اسسسس خلاص ابكاء
وقربها شوره اخر ولافها بين ايديه

وامل علشان اول مره تقعد اقريبه من خالد هكي اضعفت بين ايديه

خالد ؛؛ تعالي قعمزي هنا
وقعمزو علي السرير
خالد ؛؛ اسف حبيبي والله نا انحبك والله اقريب طلعت من عقلي
نا انغار عليك من النسمه اللي اتخطم عليك
وحسي بيا اشويه راجل ولقي حبيبته مشغول في الليل ماتبيش نار تركب فيه

امل ؛؛:نا معاك انك اتغار عليا بس انتي عطيني فرصه نحكي معاك انفهمك مش اتخليني هكي نحرق وانت تحرق واتقولي معش نبيك واللي بينا انتهاء راه مش حل هذا

خالد ؛؛ تي ننهي روحي ولا نقدر ننهي اللي بيتنا
امل ؛؛ مره تانيه عطيني فرصه
خالد ؛؛ حاضر واسف

امل ؛؛ خلاص نبي نطلع تو ماما اتهزب علشان خشيت عليك في دارك
خالد ؛؛ هههه لا خلاص اطلعي هيا

وصبت امل تبي تطلع ومسك خالد يدها
امل ؛؛ حبيبي حول يدك
خالد ؛؛ تعالي عطيني بوسه قبل
امل ؛؛ ﻻﻻﻻﻻ عيب حول
خالد ؛؛ هههه واخذها واخذها تو هنا ابسرعه
امل ؛؛ والله كان مانحبكش وتو انت خطيبب ويالله كم يوم واتكون راجلي مستحيل نعطيها لك

وقربت منه وباسته علي خده
خالد؛؛ بحبك يا رايق
امل ؛؛ ههههه تو يضحكو علينا تو ايقولو خشو متعقدين واطلعو يضحكو

خالد؛ ؛ بعدك الفرخات تفكريهن امسوس
امل ؛؛ ههههه هيا سلام
خالد ؛؛ خوذي فونك وانا قالت هذه اخر مره نلقاك في الليل مشغول

امل ؛؛ ان شاءالله

وطلعت امل والبسمه علي وجها

رجاء ؛؛ لووووووووووووووووووووووووووووووووووليا لووووووووووووووووووووووووووووووووووليا
نحن اقريب انقولو صباحيه امبركه

امل ؛؛عظت فمها التحت وحطت يدها علي خدها وتمت تندب علي كلمة رجاء

رجاء ؛؛ ههههههه خوافه
مش قعدات اطمني بره في الجنان ايهدرزن

امل ؛؛ وووو خوفتني طيح سعدك
رجاء ؛؛ تي كيف صار شكله كلامي صح

وطلع خالد وتما ايبحت في رجاء
رجاء انحرجت وخشت للمطبخ ولمت الحوسه علي السريع واطلعت

واطلعو امل وخالد للجنان علينا
خالتي فاطمه ؛؛ تصالحتو
خالد ؛؛ شن اخباركم
خالتي سالمه؛؛ بالله عليك يا خالد شن ديرلتلك الفرخه هذه ونا تو ناخذ حقك
خالد ؛؛ ﻻ خلاص خذيت حقي
امل ؛؛ يعني انت مصر ان انا مازالت الغطانه
خالد ؛؛ ههههههههه اها املاه شنو
امل ؛؛ باهي يا خالد مرودوه
خالد ؛ ههه هيا تبو حاجه
نخن ؛؛ ﻻﻻ سلامتك
خالتي سالمه؛؛ مره تانيه احكينا شن دارتلك يا خالد
خالد؛ ؛ المره التانيه انقطعها تقطيع

خالتي فاطمه؛؛ ههههههه هذا الصح
ماما ؛؛ ﻻ يا باتي كنكن بعيد السوء عليها
خالتي سالمه؛؛ هي بنتي ونا عرفتها تفصع في الرقبه

امل ؛؛ ماما كنك بايهتني بيعه شينه حزي عليا كنك انتي
خالتي سالمه:؛ ﻻني عارفه اخورقك
خالد ؛؛ تستاهلي ما ايجيك يا امل
واطلع خالد

خالتي سالمه ؛؛ ويه قولي مراد يمسك في المستشفي
نا ؛؛ عنده يوم في الاسبوع يمسك لعند الصبح
انتي تبيه ل دعاء خالتي
خالتي سالمه ؛؛ اها نبيش انلبز عند دكاتره واجد وانتي راجلك تخصصه المشاكل هذين
نا ؛؛ خالتي الحق نا مره سالته علي دعاء زمان وقالي ضروري تحاليل اديرهن
خالتي سالمه ؛؛ والله درتلها تحاليل
نا ؛؛ معاك يا خالتي
خالتي سالمه ؛؛ جبتهن معي نبيك انوريهن للمراد
نا ؛ خلاص تو ناخذهن وتو انوريهن له

دعاء ؛؛ عليك منظر منظري وانا انتعالج عند راجل ايه نقانه موقف محرج

خالتي سالمه ؛؛ شن فيها انتي احمدي ربك انه راجل بنت خالتك

شوفي من امتي ونا ادور فيه عنده زحمه بكل

نا ؛ والله يا خالتي نا تو اندير اللي عليا ونعطيه له وراه زمان قالي كان دبه اشويه خليها تنقص

خالتي سالمه ؛؛ اهو حتي مراد قالها لكي نا انقولك انقصي
دعاء ؛؛ماما نا مش دبه واجد نين اتقولي انقصي

ماما ؛؛ وسعي بالك يا سالمه خليها براحتها راه حتي النفسيه اتاثر فيها بشويه احكي معها

خالتي فاطمه؛؛ صاح يا سالمه ما اتركبيش عليها واجد

لمار ؛ اعميمه
نا ؛؛ نعم
لمار ؛؛ جتني وشوشتلي في وذني
نبي حمام
نا ؛؛ هيا هيا تعالي ابسرعه

وخشيت وشلتها لحمام
لمار ؛؛ اعميمه بابا يبي ايجي
نا ؛؛ اها ليش
لمار ؛ نبي نقعد نا هنا
نا ؛ هههه تو انجو اخر
لمار ؛؛ به

وطلعت وقعمزنا في الجنان وقعدنا انهدرزو

خالتي فاطمه ؛؛ امتي البيان يا ايه امتع هاجر

نا ؛ والله ماني عارفه بس امس سمعت ان مش دايرن بيان تلبيسه خفيفه كيفي وخلاص لان فرحها اقريب

خالتي فاطمه؛؛ اها به ربي ايتمم عليها ان شاءالله
نا ؛؛ ان شاءالله هاجر وهدي يستاهلن كل الخير

ماما ؛؛ اكويسات هن
نا ؛؛ ايهبلن بكل بذات هدي اتجننن بكل وطبعها ايجننن

اميره ؛؛ خالتي وليد شكله جاي بره
رن عليا
نا ؛؛ اصبري نلابس وشاحي

لمار اجري جيبه ليا
لمار ؛؛ هيا اعميمه وخشت لمار تجري وجابته ليا

وصبت اميره تجري وافتحت الباب

وليد ؛؛ السلام عليكم
نحن ؛؛ وعليك السلام

وليد ؛؛ اوووووو العروس قاعده هنا
نا ؛؛ اهلا بالعريس حتي انت خلاص
وليد ؛ اهلا باابنيت خالتي
وسلم عليا
نا ؛؛ مبروك ان شاءالله
وليد ؛؛ يبارك فيك
ماشاءالله هذوم….
انا ؛؛ اها هم
وليد ؛ ماشاءالله تبارك الله
شن اسمك ياسمحه

لمار ؛؛ بحتت فيا
نا ؛؛ احكي هيا قولي اسمك
لمار ؛؛ لمار

وليد ؛؛ نجيها اسمها حلو
وشالها فوق
لمار ؛؛ وانت
وليد ؛؛ وليد اسمي وخوك شن اسمه
لمار ؛؛ حمادي

خالتي سالمه ؛؛ حانطه صح يا وليد
وليد ؛ الحق ماشاءالله عليها

وقعد وليد ماسكها وايلعب فيها

نا ؛؛ وليد افتح الباب مراد بره رن عليا
وطلع وليد وفتح الباب وشاف قدامه سيارة مراد

مراد استغرب وليد ولما شافه شايل لمار نزل من السياره وجا

وليد ؛؛ خير يا مراد تفضل تفضل
مراد؛ استغرب وليد اشويه بس سلام عليه
لمار ؛: بابا هذا وليد
وليد ؛؛ نا ولد خالت ايه وان شاء الله عديلك قريبا

مراد ؛؛ اها به مبروك
وليد ؛؛: يبارك فيك هيا تفضل

وخشو مراد و وليد لقونا في الجنان مراد لما شاف الجنان امعبي تحشم ونزل راسه

خالتي فاطمه:: خش يا مراد تعالي سلم
نا ؛؛ حبيب… مراد تعالي سلم هذه خالتي

طبعا خواتي لما سمعنا الكلمه فنصن فيا ومراد انحرج علي الاخير

ماما ؛؛ شن اخبارك يا مراد
مراد ؛؛ اكويس الحمدالله شن اخبار انتي
ماما؛؛ الحمدالله
نا ؛؛:مراد هذه خالتي وسلم عليها مراد
وهذه امل وهذه دعاء
وغمزتله بيش ايركز فيها

مراد ؛؛ سلم عليهم

خالتي فاطمه؛؛ نا غنبه عن التعريف طبعا
مراد؛؛ ههههه
وسلم علي خواتي

وليد ؛ قعمز يا مراد كنك متحشم
ويه اعزمي راجلك

مراد لما سمع كلمة ويه انصدم وبحت فيا ما كانش يحساب ان علاقتنا قويه هكي

نا ؛؛ عرفتها في وجه وغيرت الموضوع

خالتي سالمه وين الاوراق

خالتي ؛؛عدي يا دعاء جبيهن في الشنطه
دعاء ؛؛ حاضر يا ماما
مراد ؛؛ ايه هيا وتي روحك
ماما ؛؛خلوكم اتعشو معنا
مراد ؛؛ لا والله شكرا يا عمتي

وشيرلي مراد اخر
نا خشيت وجبت شنطتي وشنطة العويل وطلعت القيت دعاء ماسكه الورقه
نا ؛؛ مراد اشويه نبيك

صبا مراد وجاني في المربوعه

مراد ؛؛ كنك شن في
نا ؛؛ شوف تحاليل دعاء وشفت جسمها هي تبيك اتعالجها
مراد ؛ اها باهي هاتي التحاليل

مراد ؛؛ في تحليل مهم مش دايرته تو نكتبه لها وتو نعطيها دواء تو للتنقيص ودواء تاخذا كمنظم تاخذه حاليا نين ادير التحاليل واتجني

نا ؛؛ حبيبي خالتي تبي اتجيك في العياده ما حصلتكش بكل
مراد ؛؛ به تو ادير التحاليل هذين واتكلمك ونا تو نتفق معها واتجني وانخششه بلا موعد

نا :؛ به هيا اكتبلها التحليل
مراد؛؛ رفع حاجبه
بيدي نكتبه جيبلي حاجه
نا ؛؛ اها
وطلعت لجنان

نا؛؛ بنات نبي ورقه وقلم
خالتي سالمه؛ شن صار يا ويه
نا ؛؛:تو ح يعطيها الدواء للتنقيص ومنظم ويبها ادير تحليل وقالك لما اديري تو هو ايخششك عليه واتفاهمو بعدها

خالتي سالمه ؛؛ الله ايربحه
ايمان ؛؛ اهي ورقه وقلم

وخشيت لمراد والقيت امقعمز وايهز في اكراعه
نا ؛؛ حبيبي الورقه اهي
مراد ؛؛:هاتي

وكتبلها مراد
مراد ؛؛ ضروري تقعد منظمه مع الدواء كل يوم حبه وساعه معينه
نا ؛؛ به
مراد ؛؛ هيا اطلعي نا طالع للسياره
نا ؛؛ به خوذ معاك حمادي

وطلعنا وعطيت للخالتي الورقه
نا ؛؛:خلاص يا خالتي بينتنا اتصال
خالتي سالمه؛؛ ان شاءالله ربي يفتحها في وجك زي ما فتحتيها في وجي

نا ؛؛ ان شاءالله يارب
هيا لمار اطلعي
لمار ؛؛ نبي وليد نا

وليد ؛؛ ههههههههههه
اميره ؛؛ وووووووو عليك الجأذبيه يا وليد فيك
وليد ؛؛ بيش تعرفي قيمتي
نا؛ ؛ هيا لمار اطلعي

وطلعنا وركبنا في السياره

لمار ؛؛ بابا حصلت عرم افلوس
مراد ؛؛ افلوس شن
لمار ؛؛ افلوس من امي ومن خالتي ومن وليد
مراد ؛؛ امي امي من
لمار ؛؛ امي اللي امقعمزه جو
نا ؛؛ قصدها ماما
مراد ؛؛ اها وليش تو هكي جو هذا
نا ؛؛ اهو علشان اول مره اتخش علينا وماما ماعندهش لعب اعيال اصغار عطتها افلوس

لمار ؛؛”نبي انجي هنا ديمه وليد سمح يا بابا لعبني

مراد ؛؛ رفع حاجبه وبحت فيا
وليد هذا شكله واخذ علي الحوش واجد هو اللي يفتح و يا ويه

نا ؛؛ ما بيتش انرد عليه لان عارفته متعقد وهو فهم عليا

مراد؛ ؛ ساهله لما انروحو

وروحنا وخشينا للحوش ولمار وحمادي مسكتهم عمتي ونا ومراد ركبنا

خشيت للدار وتميت انحول في الوشاح
وخش عليا مراد
وصبا علي الباب وايبحت فيا ومتعقد

مراد ؛؛ باهي شن قصة ويه يا ويه
نا ؛؛ زمطت ريقي
شن حبيبي
مراد ؛؛ الاستعباط ما انحبش شن من امتي هدرزه انتي مع الاقارب
نا ؛؛ ﻻ ما انهدرزش نا
مراد ؛؛ والله واحد ايقولك ويه ماايهدرزش معاك شن دلاله هذه برسمي
نا ؛ حبيبي راه هذا وليد كنك انت خطيب اختي
مراد ؛: خطيب اختك ولا شنو نا ما انحبش حد يحكي معاك مش ايدلعك ولا امعبرني ولا شيء

نا ؛؛ حبيبي والله هو متعود بس من هلي و وليد من يومها هو ل اميره واميره له

مراد ؛؛ نا ما دخلنيش مره تانيه نلقه ايقولك ويه اتحملي العواقب انتي هذا ما ناقص عليا انشوف مراتي ايدلعو فيها الرجاله
وخبط الدولاب من التحت وعد قعمز علي الصالون

نا غيرت دبشي ولابست روب نمري اقصير كنوع مساعده للارضا حبيبي

وطلعت والقيته ايدخن ومتعقد
مراد ؛؛:ايه ماتحوليش تحكي معي خشي للدار
نا ؛؛ حبيبي بلا جو شين خلاص حاجه بسيطه
مراد ؛؛ حاجه بسيطه انشوفي مراتي تدلع قدامي
نا ؛؛ قربت منه وقعمزت علي اكراعه وحطيت راسي علي صدره

ايدلعو ما ايدلعو والله مافي كيفك انت لما ادلعني
مراد ؛؛ حولي صبي من هنا
نا ؛؛ نبيش نبي انقعمز هنا
وحبيته علي خده وهو التفت وجه
نا ؛؛ امحبك خلاص اسفه والله ما كنتش نحسابك اتغير عليا هكي
مراد ؛؛ ايه انتي مراتي افهمي يعني عرضي وماانتحملش حد ايجي شورك.
نا ؛؛ والله اسفه خلاص حبيبي
وحبيته اخر علي خده

مراد ؛؛ صبي ديرلي حاجه ناكلها وغيره روبك تو اتجي لمار اتشوفك
نا ؛؛ اهاااا انسيت تو انغير

وصبيت ومراد مسك يدي وكرني نين طيحني عليه اخر
مراد ؛؛ انحبك وماانتحملش حد ايجي شورك والله نار اركبت فيا لما قالك يا ويه
نا ؛ حبيبي حط فيا ثقه كان هو قالي يا ويه من جو البصاره بس مش قصد هو ان نا اقريبه منه

مراد ؛؛ تحملي غيرتي عليك نا لما انشوفك تحكي مع حد تاني نار تركب فيا

نا ؛؛ ونا انطفيها النار
وهو قرب مني ونا قربت
مراد ؛؛ انحبك
نا ؛؛ انحبك
مراد ؛؛ انحبك
نا ؛؛ انحبك
مراد ؛؛ اعناد
نا ؛؛ انحبك
مراد ؛؛ لمار ادق صبي غيري
نا ؛؛ هههه انحبك
وصبيت ابسرعه ولابست روب طويل اشويه

ودرت عشاء خفيف ولمار كانت فرحانه بجو حوش هلي
من اخر فم طاحت ارقدت هي وحمادي

وبرمت علي المطبخ ودرت شاهي ومكسرات

والقيت مراد مازال في الصاله وايتفرج جيته وقعمزت جنبه وقعدنا انهدرزو
وسهرنا
مراد ؛ هيا خشي قدامي للدار
نا ؛؛ حبيبي انتفرج اشويه
مراد ؛؛ نا نبي انخش نرقد
نا ؛؛ به حبيبي خش
مراد؛؛ ايه كنك تو صبي طفي التي في وصبي
نا ؛؛ حبيبي انكمل الفيلم ايهبل رومانسي
مراد ؛ هههههه تو انوريك الرومانسيه شن شكلها
وشالني وحطني علي السرير
مراد؛ صار رومانسي صار
نا ؛؛ هههههههه
مراد ؛؛ ايه لما نقعدو مع بعضنا شعرك هذا نييه مطلوق
نا ؛؛ هههه ايضايق فيا اساس انفكر اني انقصه
مراد ؛؛ انقصلك راسك بعدها
نا ؛؛ انهون عليك
مراد ؛؛ هههه ما هذه المشكله
واضبطني بقوه
انحبك انحبك
نا ؛؛ ونا انموت فيك
مراد ؛؛ خلكي هكي ماتحركيش بكل
نا ؛؛ ليش وين ماشي
مراد ؛؛ انولع منظومه واطفي الضيء مش تبي رومانسيه انتي
تو انوريك

نا ؛؛ ههه به

واصبحنا في خبر كان

ووعيت تاني يوم
مراد ؛؛ ويه صبي تبيك هدي بره
نا ؛؛هيييي هدي علي الصبح شن تبي
مراد ؛؛ اطلعي شوفيها قالت كلمني ايه
نا ؛؛ به
وصبيت
مراد ؛؛ هي انتي استري روحك قبل
نا ؛؛ به
ولابست حاجات الصلاه

نا ؛؛ هدي صباح الخير
هدي ؛؛ صباح النور سامحينا امغير جيتك قالت بدال مراد مازال ما نزل

نا ؛؛ كنك شن في
هدي؛؛ ………….

يتبع