مسلسل سعاده كاذبه التكملة

مسلسل سعاده كاذبه

الحلقه 46

وطلع سراج وهو متعصب

ورجاء معش عفت تضحك علي شكل سراج وهو ايقلد في محمد في اسم ارجيوه ولاه تبكي من خوافها من غيرت سراج اللي بعد الفراق

وخشت اميره
اميره ؛؛ سراج شن الورقه اللي شرطها
رجاء ؛؛ تقريب ورقة الخروج شكلها فيها قعده اخري في المستشفي

اميره ؛؛ هههههههه والله حالته حاله تو وهو طالع
رجاء ؛؛ مجنون عارفته

اميره ؛؛ رديلها راه ايحبك موت

رجاء ؛؛ والله حتي نا بس سراج واعر واجد وعصبي ومن تو ايهزب وايخبط تو ونحن علي علاقه بس يابال نزوجو شن ايدير فيا ولاه تبيني نطلع من عادل نلقي قدامي سراج ساد ايه معيشتها سوده

اميره ؛؛ بس ايه متريحه واتحبه

رجاء ؛؛ ايه بالها واسع وطيبه واتحمل تي والله كان نا ايديري فيا راجلي نص اللي ادير فيه مراد راه مطلقه من اول يوم نا طبعي واعر وعارفته ومانعرفش نسكت كيفكن

اميره ؛؛ يعني طبعك الشين هو اللي ايفرق بينك وبين سراج

رجاء ؛؛ نا خاسرته خاسرته نخسره تو ومازل بدري خير ما نخسره بعدين

اميره ؛؛ لدرجه هذه فاقده الامل

رجاء ؛؛ عارفه المشكله هذه اكدتلي ان نا مش سراج بكل
سراج يبي وحده كيفك كيف ايه تزمطن وسكتن مش نا يبي وحجه ايتحكم فيها لا ماتطلعيش لا ماتخشيش ﻻﻻ اقعدي ونا طبعي ماانحبش حد ايتحكم فيا

اميره ؛؛ بس اللي ايعيش يا رجاء يصبر ويزمط

رحاء ؛؛ نا نعرفش نزمط وانتي عارفه
اميره ؛؛ شن ايصير تو ما فيش اطلعو
رجاء ؛؛ هههه مش عارفه شكلي هكي قعدتي امطوله
اميره ؛؛ ياريتك تستفيدي من وجودك جنبه وراضيه وردو والله شكله ايحبك والله حسيته يبي يزقب علي محمد

رجاء ؛ خطرها محمد هذا من وين طلع

اميره ؛؛ هههه اطروح جاي بس والله شاب محترم واكويس
رجاء ؛؛ ههههه تذكري ديمه مدخل في حياتنا من يوميه
اميره ؛؛ هههه اها ديمه الكشايف جيات في وجه
رجاء ؛؛ زمان هو اللي هرب دبش نجاح وشاله لها

اميره ؛؛ ماقالتلك ديمه الكشايف جيات في وجه
رجاء ؛؛ هههه يالله جا وقال ارجيوه قول دايرها بالعني وحرق دم سراج وكان ايجي اخر ويحرق دمه

اميره ؛؛ هههه طيح سعدك هذا سراج تبيه يقتله

رجاء ؛؛ ماشفتيش كيف كان شكله وهو ايقلد في محمد مسكت ضحكتي بالغصب
اميره ؛؛ ههههه حتي نا شفته من بره تي والله ايحبك يا همي

رجاء ؛؛ خلاص لعند امتي الموضوع هذا بعدك حتي فرصه ما القيت بيش نعطيه الفون والسلسله

اميره ؛؛؛مش ح تقدري
رحاء ؛؛ والله تعليت صوته وتهزيبته ليا قدام الناس
مش ح نمشيها لها بسهوله حتي لو ردينا مش ح انمشيها له وطول ما نا قاعده هنا ونا نحرق دمه نين يطلعني

اميره ؛؛ تقدري كلا انتي

ومشت ساعه وراء ساعه
وجا مراد
مراد؛؛؛ها بنات شن صار نطلعو
اميره ؛؛ مادروش خروج
مراد ؛؛ كيف
اميره ؛؛ والله جا دكتور هنا اخر وطلع وماقالش ان في خروج

مراد ؛ غريبه تو انعدي نشوفه وينه
اميره ؛؛ باهي

ومشي مراد ومالقش سراج قاعد ومش داير ورقة خروج ل رجاء وتعقد وعرف ان سراج بلعني خلي رجاء قاعده في المستشفي ورد لبنات في الغرفه

مراد ؛؛؛مش قاعد الدكتور فيش خروج اليوم

اميره ؛؛ فيش الا هو ايديرلها خروج
مراد ؛؛ ما هو اللي مستلم حالتها ومش امخلي دكتور تاني يدخل

رجاء انحرجت وتمت امنزله راسه حست الموقف شين قدام مراد

مراد ؛؛ به خلاص تو انرد عليكن في الليل تبن حاجه

اميره ؛؛ سلامتك
مراد ؛؛ سلام

وطلع مراد ومشي لسياره وفي الطريق حس روحه امرايف علي العويل ومشي شورهم ودق الباب واطلعت جدتهم افتحت الباب

مراد ؛؛ خير ياعمتي
جدتهم ؛؛ خيرا يامراد كيف حالك
مراد ؛؛ تمام الحمدالله شن اخبارك انتي
جدتهم ؛؛ اكويسه الحمدالله خش خش عليش امصبي بره

مراد ؛؛ ﻻ جاي نبي ناخذ العويل بس ليا زمان عليهم

جدتهم ؛؛ به خش انت تو هم قاعدين ياكلو اتوكل فيهم سناء حتي هي مالها شيء مروحه

مراد ؛؛ به تو نرجهم في السياره

جدتهم :؛ والله ما صارت هيا خش بعدك اليوم دايره رز امبوخ وانت اتحبه عارفتك

مراد ؛؛ ﻻﻻ صحيتي يا عمتي
جدتهم ؛؛ والله ماصارت هيا خش راه والله نزعل ولاه معش تاكل من اوكالي

مراد ؛؛ انحرج
به هيا ياعمتي

وخشت جدتهم ووراها مراد وخش هو لمربوعه
وهو قعمز
جدتهم ؛؛ لمار حمادي تعالو
سناء ؛؛ انغدي فيهم يا امي
جدتهم ؛؛ تعالو ابسرعه في حاجه سمحه

لمار ؛؛ هييييي سمحه اكيده شكولاطه
سناء ؛؛ ماتصبيش الا لما تغسلي ايديك
لمار ؛؛ نبي ناكل نا

وخشت عليهم جدتهم
جدتهم؛ ؛ سناء مراد في المربوعه يرجا في العويل ونا نبي انحطله الغداء

سناء ؛؛ عليش
جدتهم ؛؛ اهو اذكرت ان الرز ايحبه قالتله خش اكيده له زمان عليه

سناء ؛؛ امي خلي العويل ما تخليهمش ايخشو عليه جو ونا تو انخش انشوفه

جدتهم ؛؛ فكينا من كلامك القاسي وكانك مراه صاح حنني قلبه عليك وبلا اهبال زياده

سناء ؛؛ باهي خليهم هنا بس

وصبت سناء وشافت روحها لابس روب شين خشت وغيرت لابستها والبست توته ضابطه والتيشرت امتعه اقصير ونص كم ولمت شعرها وبرمت علي وجها وطلعت

ولقت امها اموتيه السفره خذتها وخشت بها

خشت وشافت مراد امقعمز وايهز في اكراعه وامنزل راسه لوطه

مسكت السفره بيدا وحده واليد التانيه طقت بها الباب بيش يفطلنها

رفع مراد راسها وشافها وصب

سناء ؛؛ انستنا
مراد ؛؛ الله يانسك شن اخبارك

وحطت سناء السفره علي الطاوله ومدت يدها وسلمت عليه

سناء ؛ الحمدالله علي كل حال
مراد؛؛ وين العويل
سناء ؛؛ ايتغدو قاعدين هيا تغداء ماما قالت عزمتك

مراد ؛؛ تو لما فتحتلي الباب قالتي خش واحلفت

سناء ؛ شن يعني انت ما تبيش و ماما زرت عليك

مراد ؛؛ ﻻ مش هكي بس مش فاضي واكيده الحوش غادي داير غداء

سناء ؛؛ املاه مش خاطرك في غداء ماما مش زمان اتحبه رزها هيا تقدم وكول راه ماما تزعل

مراد ؛؛ به
وتقدم وصبت سناء كرت قدامه الطاوله وهو مقعمز علي الصالون
وهي تقربت منه وهو ارتبك ونزل اعيونه لوطه

سناء ؛؛ اللي ايشوفك هكي ايقول خجول بس لما يعرفك اكويس يعرف الجراء الا عندك مش عند ناس تانيه

مراد ؛؛:جرائي مع حلالي بس
سناء ؛؛ تنهدت تنهيده طويله طالعه من نص قلبها
شن اخبار ايه معاك
مراد ؛؛ تمام الحمدالله قاعده في الشقه
سناء ؛؛ متريح معها
مراد ؛؛ اللي ايريح فيا ادير فيه هي
سناء؛؛ لا تقرا ولا تخدم اكيده تبي تقعدلك انت بس

مراد ؛؛ والراجل هكي مايبي
سناء ؛؛ سبحان الله زمان لما قالتلك نبي انخش طب نساء شجعتني وخشيت معي وانت اكتر شخص شجعتني عليه وتو انت اكتر شخص ضدي في عملي بدرجه اتخليت عليا علشانه سبحان الله من غبر الاحوال

مراد ؛؛ سناء فكينا منها الدوه هذه

سناء ؛؛ ماكنتش نحساب مهنتي هي اللي اتخليني انشوف اوليد زوجي في رحمه مراه غيري

مراد ؛؛ رفع اعيونه وبحت في سناء وهو متعصب ولقها اتبحت فيه واعيونها ملينات ادموع

عدي طليعي العويل هيا

سناء ؛؛ كمل غداءك قبل
مراد ؛؛ ماعنديش نيه

وخشت جدتهم ومعها لمار وحمادي

لمار ؛؛ باباااا
وجته تجري واضبطاته
مراد ؛؛ خير يا بابا بشويه وانتي تزقبي
لمار؛ ؛ بابا شايب

مراد ؛؛ ههههه نا شايب
لمار ؛؛ بابا حبيبي
مراد ؛؛ تعال يا حمادي تعال حبيبي
وجاه حمادي يجري واضبطه

حمادي ؛؛ دوبه يحكي
بابا
مراد؛ هههه اتقول فيها تمام تو
سناء ؛؛ ايقول ماما اخر
مراد ؛؛ صاح
هي قولها هيا

جدتهم ؛؛ مراد كمل غداءك هذه مش وكله
مراد ؛؛ ﻻ ياعمتي خلاص
جدتهم ؛؛ مش هذا حده هيا زيد هبا ولاه مش عاجبك الغداء

مراد ؛؛ ﻻ والله ماشاءالله عليه
جدتهم ؛؛ به هيا كمل وتو انجيبلك طاسة شاي بالنعناع

سناء ؛؛ خلاص يامراد كول هيا و ماتردش ماما

مراد ؛؛ حاضر
وطلعت جدتهم
لمار ؛؛ بابا اعميمه ايه وين
مراد ؛؛ بحت في سناء واستغرب السؤال
في الشقه قاعده
لمار ؛؛ نبي انعدي رجاء
مراد ؛؛ رجاء مريضه في المستشفي
سناء ؛؛ خطرها من رجاء ديمه تذكر فيها لمار واتقلد فيها

مراد ؛؛؛اخت ايه
سناء ؛؛ شكلها البنت مش تمام بكل اتشلط علي الفون وتعطي في لمار تحكي وتقلد فيها وديمه اتقول حبيبي وماسكه فوني

مراد؛؛ انحرج ونزل راسه لوطه وتعقد

هي بنت اصغيره

سناء ؛؛ والله شكلها مش اصغيره اللي اتشلط علي الفون شوف انت راه حتي لمار تاخذ في الفون وتقعد ادس فيه كيف البنت وراه الجو هذا مش تمام يا مراد ايخربن عليا البنت

مراد ؛؛ ﻻﻻ اطمني وبعدين هي بنتي وانخاف عليه وعارف مصلحتها
هيا لمار صبي جيبي دبشك واطلعي

سناء ؛؛ كنها راقيلك نا نحكي في الحق البنت شكلها مش تمام وتدس في فونها قدام لمار ولمار اتقلد فيها حتي خوتي لاحظو الموضوع هذا مش نقعد نا انربي وانتعب واتجي هي اتخربهم ليا

مراد ؛؛ كانك تبي اتربيهم راه قعدتي في الحوش وسكرتي فمك وتنازلي علشان خاطرهم مش تطلعي واتسيبهم واتخلي في مرات اب اتجيهم
وبعدين نا واثق فيها وواثق في هلها

سناء ؛؛ اها واثق بدليل قصة نجاح اختهم وتبطيلتها من القرايه وقعدتها في الحوش خدامه
وهيثم ولد عمها اللي سيبها

مراد ؛؛ صب وخبط الطاوله بكراعه

احترمي نفسك يا سناء راه نبيش نغلط
سناء ؛؛ ﻻ اغلط اغلط اكيده الجاهله اثارت عليك تربيت الشوراع

مراد ؛؛ الجاهله اللي تحكي عليها احسن منك تحترم فيا وامقدرتني اكتر منك يكفي انحط في راسي جنبها ونا راضي عليها وهي تختم في قرانها
والجاهله اللي تحكي عليها هي مراتي وعرضي ومانبيش حد يغلط فيها

سناء ؛؛ صدق اللي قال امها اكبر سحاره اللي سحرتك

مراد ؛؛ خافي ربك اشويه ياخساره انك متعلمه

وشال حمادي وطلع في الجنان وبصوت عالي
لماااااااااااااار يا لماااااااااااااار

وطلعت لمار تجري وخايفه

مراد ؛؛ هيا قدامي اطلعي
وطلعت وراهم جدتهم

جدتهم ؛؛ اهي شنطتك يالمار خوذيها معاك

وبحتت لمار في مراد
مراد ؛؛ عدي حيبها وتعالي اركبي للسياره

ومشت لمار تجري وجابت الشنطه وجت لمراد في السياره

وايسوق مراد وهو متعصب وغمتله بكل

ونا قاعده نرجا فيه وانرن عليه ونلقي فيه خارج التغطيه انشغلت عليه وقعدت نحرق في الشقه لان اول مره مراد ايطول وماايقوليش وكنت انرن علي اميره وقالتلي انه طالع من قدامها امبدري

قعد عقلي كل مره ايجيب فكره ونستغفر في ربي
نين سمعت صوت سيارته وهي خاشه للجنان
مشيت نجري للروشن وبحتت والقيته نازل ونزل معه لمار وحمادي

فرحت لما شفته طيب وخفت لان كان باين عليه متعصب واجد

وهو رفع راسه وشافني فاتحه الروشن

ونا لما شفت نظرته خفت ووخرت من علي روشن

ومشيت للمطبخ ولعت علي الغداء وعديت شور باب الشقه وفتحت
وجو هم قدامي

نا ؛؛ مرحبتين ومرحبا
وفتحت ايديا واضبطت لمار
نجك ليا امرايفه عليكي يا شينتي

لمار ؛ هييييي نا شينه اعميمه
نا ؛؛ هههه ﻻﻻﻻ اتهبلي امغير انغير منك بس

مراد ؛؛:امطوله قعدتكن هنا ان شاءالله
نا ؛؛ هههه اسفه من الارياف بس وصبيت ومستك يد لمار ووخرتها وخش مراد وهو شايل حمادي وصكرت الباب

وجيت لمراد
نا ؛ عطيني حمادي نبيه

مراد ؛؛ مده ليا
وهو خش للدار طول
ونا خذيت حمادي ولمار وقعمزتهم في الصاله وتميت انلعب فيهم ولما شفت مراد طالع من الحمام

نا ؛؛ حبيبي انحط الغداء اكيده جيعان

مراد ؛؛ شن غداك
نا ؛؛ معكرون مبوخه
مراد ؛؛ ﻻﻻ نبيش عنديش نيه
نا ؛؛ استغربت رد مراد لان اول مره ايقولي ما نبيش غداء مع ان عارفته ماايحبش اوكال من بره

وخش مراد ايصلي
نا ؛؛ لمار تغديتو ولا انحطلك غداء

لمار ؛؛ ﻻﻻ كلنا تغدينا عند ماما امي دايره رز امبوخ
نا ؛؛ ههه انتي وحمادي
لمار ؛؛ و بابا

نا ؛؛ انصدمت وحسيت روحي ماسمعتش اكويس
من من اللي تغداء معاكم

لمار ؛؛ بابا
نا ؛؛ بابا تغداء غادي عندكم
لمار ؛؛ اها مع ماما في مربوعه
نا ؛؛ حسيت وكان في حاجه خشت في صدري بقوه وغمت عليه ومعش عرفت ما اندير

اذكرت اني امولعه علي الغداء
صبيت وطفيت النار
وخش عليا مراد

مراد ؛؛ كليتي حاجه انتي
نا ؛؛ خنقتني العبره
ﻻﻻ كنت نرجا فيك نحسابكش متغدي بره

مراد ؛؛ اهاا تو لما روحت اذكرت ان عنديش عياده قالت انجيب العيال ولما تكيت عليهم شفت عمتي وهي اللي خششتني وزرتني انتغداء معهم

نا ؛؛ عادي مافيش داعي اتبرر
ومشيت من قدامه وكانت العبره خنقتني والدمعه تحرق تبي تنزل ونا نبيش ايشوفني نبكي

ومسك مراد يدي
مراد ؛ نا نحكي معاك ليش تمشي واتسيبني

نا ؛؛ ما بيتش انعبره وحركت يدي بقوه وفكت يده ومشيت للصاله وقعمزت ومسكت حمادي في يدي

مراد ؛ مشا وراي وجا صبا قدامي

مش نحكي معاك انا ليش اتعدي واتسيبني

نا ؛؛ قعدت ساكته ومابيتش انرفع اعيوني وكأني ما نسمعش فيه بكل ولاهيه روحي في حمادي

مراد؛ ؛ ردي ياعن…..
ونا رفعت راسي وبحتت فيه
وهو غمض اعيونه وحط يده علي اعيونه

استغفر الله العظيم

صبي صبي من قدام خلقتي
نا ؛؛ تقعدت وصبيت وخشيت للدار وفي يدي حمادي
وجتني لمار

لمار ؛؛ اعميمه بابا كنه
نا ؛؛ ما كنه شيء تعالي احكيلي من كل معاكم اخر

لمار ؛؛ نا وامي وحمادي في دار جو وبابا و ماما في المربوعه

نا؛؛ كلو اوحدهم في المربوعه
لمار ؛ اها

مراد ؛؛ بصوت عالي
لماااااااااااااار صكري فمك

لمار ؛؛ حي عليا بابا قالي اس
نا ؛؛؛به عدي سكري الباب وتعالي هنا نبيك

وصبت لمار سكرت الباب وجتني وطول سمعت كرعين مراد جاي ابسرعه
وفتح الباب بقوه
ولمار شافته خشت فيا ابسرعه وانطمرت

مراد ؛؛ عليش صكرتي الباب
نا ؛؛ قعدت ساكته ومنقهره

مراد ؛؛ مانيش كلب نا نين ننبح ابروحي

نا ؛ بدون مانرفع اعيوني عليه بصوت واطي

حشاك

مراد ؛؛ نحكي نا ردي على

نا ؛؛ ليش تبيني انرد خليني ساكته لاني لو نحكي ح نسالك وانت ح نكذب عليا اخر

مراد ؛؛ ليش اتحقي فيا كذاب
نا ؛؛ انهرت ابكاء وحطيت حمادي علي السربر وصبيت

تو كذبت عليا لما قالتلي ماعنديش نيه وانت متغدي بره ومتريح ونا قاعده هنا نرجا فيك قاعده كيف الهبله
كنت تاكل ومتهني معها
مراد ؛؛ والله مانزلت علشانها والله الله والله عمتي هي اللي زرتنيووقالتلي ان العويل ايتغدو وقالتلي خش بدال ما كملو وهي حتي اني قالت نرجهم في السياره بس هي سكرت راسها وخششاني وانتي عرفتني
نا ؛؛ به ليش ما قالتها من اول

مراد ؛؛ به ليش ماتحكي اكويس معي

نا ؛؛ نا نحكي اكويس امغير انت جاي راقيلك من بره وجاي اتفش في غلك عليا

مراد ؛؛ به صارلي موضوع بره عقدني انتي تحمليني
نا ؛؛؛نحكي والعبره تخنق فيا وكلامي متقطع

نا لاحظت من نزلتك للسياره انك متعقد ومابيتش اندور وقعدت لاهيه في الاعيال و لما قالتلك انحط الغداء اتقولي لا نبيش وسكتت ورضيت بس لما نعرفك انك كنت متغدي بره ومتريح ماتبيهش ترقالي هذا واجد راه

مراد ؛ والله ما كنت متهني والله كنت غمتلي والله نزلت وخشيت ونا مش راضي علي روحي بس والله زرت عليا امها

نا ؛؛ به ليش اديري هكي

راه انسانه وعندي احساس وانغير عليك
انغير عليك عارف شن
لاني انحبك انحبك انحبك لاني انانيه في حبي لك ومانبيش حد ايشاركني فيك نا ديمه انخلي في الناس اتشاركني وماعمريش قعدت انانيه بس انت مستحيل انخلي حد ايشاركني فيك

وجاني مراد واضبطني ونا تميت اندف فيه
مراد ؛؛ بطلي ماادفيش راه خيرلك

نا ؛؛ خيرلي شن تبي اديرلي يعني
مراد ؛؛ به انتي ليش ماحكيتي معي من الاول ليش اطنشي عليا انتي عارفتني مانحبش التطنيش نا

نا ؛؛ لاني حسيت روحي مضحوك عليا
مراد ؛؛ مستحيل نضحك عليك انتي حبيبتي

وبحتنا في لمار وحمادي القينهم ايبحتو فينا

وقربت منا لمار واضبطتني وتمت تبكي
لمار ؛؛ اعميمه معش تبكي
نا ؛ اسسسس انتي عليش تبكي تو
لمار ؛؛ لان بابا ايهزب فينا وايخبط

نا ؛؛ بحتت في مراد
شفت اللي مانبيش اعيالك يوصلوله

مراد ؛؛ تعالي حبيبتي اسف خلاص نا جيبكم هنا نبي انغيرلكم جوكم

نا ؛؛ نكدت عليها
مراد ؛؛ والله صارلي موضوع تعقدت منه اسف عارف روحي اغلطت بس والله ضغوط
نا ؛؛ اتفش غلك فيا
مراد ؛؛ خلاص نا قالت اسف عاد ماتكثريش عليا
وكرني وحبني علي راسي

هه شن تبي اكتر من هكي
نا ؛؛ نبيك اتقولي كنك
مراد ؛؛ ويتي كبيدتي فوتي خلاص نا نبيش انعقد روحي اخري خلاص نا انحب انخش للشقه هذه علشان نبي انتريح مش علشان انرد في كلام اخر

نا ؛؛ بس انت حكيت معي باسلوب مش تمام
مراد ؛؛:علشان انتي عقدتيها ليا شايفتني جوي مش تمام اطنشي عليا اخري هذا بدار ماتهديني واتخليني ننسا الناس اناي اتذكريني اخري واتزيدي عليا
نا ؛ قعدت نبكي

مراد ؛؛ تعالي تعالي هنا

ووخر لاوره علي بداية السرير وخلي لمار فوق علي صدره وكرني شوره وحطني كتفه وحمادي رقده علي جنبه التاني

مراد ؛؛ ربي ما يحرمني منكم
نا ؛؛ ولا منك
مراد ؛؛ انحبك ياروحي
نا ؛؛ والله انموت فيك
مراد ؛؛ كل يوم نعرف روحي انحبك اخري
نا؛؛ نجك ليا
مراد
مراد ؛؛ بالاستغراب
نعم

نا ؛؛ معش تبكيني ومعش اتخوفني منك
مراد ؛؛ اسف حبيبي والله نا بروحي مش راضي علي بكيتك وننقهر لما انشوفك تبكي
نا ؛؛ والله حبيتك
مراد ؛؛؛ نجك ليا

وسكتنا نا ومراد وكل واحد فينا ايفكر
نا انفكر في اللي خلت مراد غمتله ويكذب عليا
معقوله سناء بدت اترد في مراد واهو اليوم مشي وتغداء عندها يعني مراد يبي ايردله وايسيبني
ونزلت دمعتي ومسحتها طول ما نبيش مراد يفطن
بس مراد ما فطنش بكل لان كان هو بروحه ايفكر في كلام سناء اللي قالته هل هو صح ولاه من غيرتها قالته

مراد ايفكر
ووو اسمط حاجه انك تاخذ بنت مش انت ماضيها يقعد كل مره ايجي حد يكذب عليها وايشوه صيته حتي ولو هي مش دايره شيء
ايه بنت محترم واكويسه وطيبه ونا متاكد انها محترمه من هي وشباب حتي وهي ايام مخطوبه تي هي اصل اصغيره وماتعرف شيء تي جتني قطوس مئه حاجه ماتعرفها كل شيء نا اللي انقول فيها لها تي تنعرف البنت المحترمه من اول لليله معها من بنت اللي ماضيها امعبي

استغفر الله العظيم
وبحت وشافني ولاقي لمار وحمادي راقدين
ونا سارحه

مراد ؛؛ ايه لمار راه نا انسان مش افراش وانتن رقدات عليا
نا ؛؛ هههه هذا مكاني دخلنيش بها لمار
مراد ؛؛ هههه به حوليها راه انحس في جسمي تكسر منكن

نا ؛؛ نطيت وبحتت فيه
قصدك نا دبه

مراد؛؛ هههه لا انتي لا بس هي شوفيها وين راقده مش مكانها بكل

نا ؛؛ ههههه تو انشيلها
مراد ؛؛ رفعيها من عليا وتو انشيلها لسريرها
نا ؛؛ وحمادي
مراد ؛؛ تو انشيل هالمندلش قاعد اوكال ونوم وخلاص

نا ؛؛ هههه حرام عليك طفل
هيا هيا صبي ابسرعه قبل ما توعي
مراد ؛؛ اصبري انشيل هذا قبل

وصبي مراد وشال حمادي للسريره وجا وخذا لمار وشالها وجاني ولقني نرجا فيه

مراد ؛؛ نا شن قالت علي شعرك
نا ؛؛ كنه
مراد ؛ حولي المساكه
وخش عليا في السرير
ومد يده وحول المساكه

نا ؛؛ حبيبي راه نضايق منه
مراد ؛؛ ﻻﻻ خليه هكي انتي عارفه انحبه هكي
نا ؛؛ متعب راه هكي نا متعوده انلفه وانديره كعكه وخلاص
مراد؛؛ ههههه ﻻ كعكه ولا بشماط معش اديريها لما انخش نا انتي عارفتني انحبه انشوفه وهو نازل عليك هكي

نا ؛؛ علي الحاله هذه انقصه خيرلي
مراد ؛؛ انقصلك ارقبتك بعدها
وكرني شوره واضبطني
انحبك انحبك
نا ؛؛ انموت فيك
مراد ؛؛ زعلانه مني
نا ؛؛ بدال ونا في حضنك هنا مستحيل انكون زعلانه انت عارف لما انكون زعلانه مستحيل انجيك ونقعد هنا

مراد ؛؛ زمان امغير مشيتها لكي مره تاني زعلانه ولاه مش زعلانه حقوقي وناخذهن مادخلنيش بحد

نا ؛؛ ههه احقوقك احقوق شن

مراد ؛؛ تو انوريك الحقوق شن هن
طيحني علي الفراش وجا هو فوقي

ها تو عرفتي حقوقي

نا ؛؛ ههههههه عارفه عارفه امغير كنت انبصر معاك

مراد ؛؛ ههههه والله ماعاد فيها ابصاره خلاص برسمي نبيك

ونزل عليا و………

اوعيت والقيت حمادي علي ظهري

نا ؛؛ هييييي

بصوت واطي خفته يوعي

مراد مراد

وجاني مراد يجري
مراد ؛؛ كنك
نا ؛؛ كنك فاتح عليا الدار وحمادي شن خششه عليا تو اتشوفني لمار

مراد ؛؛ ههههه لمار امبدري نازله ونا كنت لوطه حطيت حمادي احذك

نا ؛؛ هههه باهي رفعه نبي انخش ندوش
مراد ؛؛ هيا
وجا هو وشال حمادي
وناصبيت ولفيت الفوطه عليا

مراد ؛؛ ههههه هالحركه السامطه اللي اديري فيها
نا ؛؛ ههه انتحشم منك
مراد ؛؛ ياعيني جت علي هذه يعني

وخشيت ودرت دوش وطلعت ولابست اسرتش وبدي وصليت وطلعت والقيت مراد امقعمز لمار وحاط راسه علي كرعيها وايضحك فيها ومعهم حمادي

نا ؛؛ خيرات حبيبي
مراد ؛؛ نعيمه
نا ؛؛ الله ينعم عليك شن ماعندكش عياده
مراد ؛؛ ﻻﻻ اطياح هنا راحه اليوم ويتي سخني الغداء وحطيلنا حتي لمار اركبت تو جيعانه

نا ؛؛ حاضر اصلا حتي نا جيعانه
ومشيت وخشيت للمطبخ
وبديت انوتيله في السفره وسمعت فوني رن

وجتني لمار تجري وجايبه فوني
نا ؛؛ شكرا حبيبتي
لمار ؛؛ عفوا
نا ؛؛ الو اهلا اميره

اميره ؛؛ خيرات يا حنه شن اخبارك
نا ؛؛ تمام قاعده في الشقه وين قعدات انتن
اميره ؛؛ مازالنا في المستشفي سراج مابش ادير خروج ل رجاء وهي متعقده ومازالت امسكره راسها
نا ؛ ههههه تستاهل
اميره؛؛ ويه راه والله امكسده مراد قالي تو انجيك بعدين في الليل تعالي معه انتي وكسدي معانا اشويه راه والله ملل

نا ؛؛ متاكده مراد قالك هكي
اميره؛ اها كنك

وخش مراد عليا وقعد امصبي ومتكي علي الدولاب

نا ؛؛ لان اليوم عندش عياده وقال راحه وحتي السياره خششها شكله ناسيكم بكل

وبحتت في مراد
وهو خبط راسه بيده
وبصوت واطي
اوووووو انسيتهن بكل

نا ؛؛ ههههههه عارفه
اميره؛ ؛ قصدكم ماتبوش اتجو
نا ؛؛ مش عارفه علي مراد كنك
اميره ؛؛ به ابراحتكم

وبحتت في مراد وهو هزلي راسه معناها باهي تو نمشو

نا ؛؛ مرات انجو اهو قالي باهي
اميره ؛؛ نجكم ليا ياريت والله
ويه ويه
نا ؛؛ نعم
اميره ؛؛ جيبولي عشاء معاكم راه جيعانه

نا ؛ اهااا انتي امكلمه علي خاطر العشاء مش ع خاطرنا

اميره ؛؛ هههه نرحا فيكم سلام

رجاء ؛؛ شن جايه
اميره ؛؛ قالت باهي
رجاء ؛ لعند امتي ونحن هنا والله حسيت روحي مرضت اخر من قعدت المستشفي بدال ما نبرا مرضت اخر

اميره ؛؛ ههههههه تحملي نين يرضي عليك سراج

رحاء ؛؛ عارفه كل ماهو ايعقدني وايخلني هنا نا ح انعانده ونقهره اخري

اميره؛؛ كابري هنا عندك تو اتنكدي علي روحك

…..

نا ؛؛ تبينا نمشو
مراد ؛؛ تو ناكلو وانصلو المغرب ونطلعو
نا ؛؛ وعادي ايخشونا

مراد ؛؛ هههه تحشمي معاك مراد

نا ؛؛ ييييي انسيتك انك دكتور بكل
مراد ؛؛ حطي حطي ياعبيطه

نا ؛؛ فنصت وعليت صوتي
مراااااد
مراد ؛؛ ههههه وطي حسك راه نقطعه بكل
نا ؛ هههه تقدرش

مراد ؛؛ علشان انحبك

وحطيت الغداء وكملنا وشالت السفره
ولميتها
وخشت عليا لمار
لمار ؛؛ اعميمه بابا خش ايغير قالك هيا
نا ؛؛ به هيا عدي انتي طلعي لابسه بدال ماجيتك

لمار ؛؛ نطلع حتي نا
نا ؛ اها مش تبي اتشوفي رجاء

لمار ؛؛ اييييي رجاء
وخش علينا مراد
مراد ؛؛ شن تبي تاخديها معاك
نا ؛؛ اها اكيده تبي اتشوف رجاء صحابات هي ورجاء

مراد ؛؛ وهو متعقد

ﻻﻻ فكينا من الخولطه هذه
نا ؛؛ خولطه شن
مراد ؛؛ فكينا البنت مانبيش تمشي غادي
نا ؛؛ عليش
مراد ؛؛ هكي
نا ؛؛ به براحتك بس وين انخليهم
مراد ؛؛ تو انحطهم لوطه ونمشو ونجو

لمار ؛؛ ﻻﻻ يا بابا نبي نمشي معاكم
مراد ؛؛ ﻻﻻ خلاص ما قالت كلمه فيش
لمار ؛ اقعدت تبكي
مراد ؛؛ هيا خشي غيري دبشك بسرعه
نا ؛ حاضر

ومشيت وغيرت دبشي ودرت ميك اب ولابست وشاحي ومسكت حمادي والقيت لمار تبكي

نا ؛ هيا
لمار ؛؛ نبي نمشي لرجاء نا
نا ؛؛ يا ماما رجاء في المستشفي مش فاضيه
مراد ؛؛ لمار هيا انزلي قدامي لوطه

ونزلت لمار ودمعتها علي خدها
ونا شاكه في موضوع ماعرفتش شن هو بس حسيت في حاجه مش تمام اول مره مراد يسكر راسه هكي علي قلة مشيت لمار
ونزلن والقينا هدي

هدي ؛؛ العين قابله ياحنه
نا ؛ ههههه نجك والله عارفه روحي امقصره
هدي ؛؛ باهي اللي قلتيها وينك
نا ؛؛ رجاء في المستشفي مريضه مشيلنها زياره

هدي ؛ هيييييي كنها
نا ؛ اهو هبوط
هدي ؛؛ وليش ما قالتي راه مشي معاك
نا ؛ به هيا مازلنا فيها

وبحتت هدي في مراد
مراد ؛؛ كان تبي تمشي هيا بس غيري بسرعه بس
هدي ؛؛ ثواني بس
وخشت هدي تجري وجتنا هاجر
هاحر ؛؛ وين وين طالعين
مراد ؛؛ هههه اهي جت التانيه وين امي
هاجر ؛؛ في فرح بنت صحبتها تي قولو وين ماشين
نا ؛؛ للمستشفي فيها رجاء

هاجر ؛؛ ﻻﻻﻻﻻ كنها
مراد ؛؛ عليك قصه هيا حتي انتي وخلاص
نا ؛ والعويل
مراد ؛؛ طلعيهم تو نمسكهم نا
نا ؛؛ باهي
لمار ؛؛ نمشي نا يعني
نا ؛؛ اها هيا
هاجر ؛؛ تو انخش انغير

ومشن البنات وغيرن واطلعن بره ولاقنا نرجو فيهن في السياره

نا ؛؛ حبيبي نبو مطعم نشرو عشاء لبنات

هدي ؛؛ مراد جيبلنا حاجه انخشو عليه شينه خشتنا هكي ايدينا فضيات
مراد ؛؛ حاجه زي شن
هدي ؛؛شكولاطه عصير جو هكي اهن افلوس

مراد ؛؛ خلي افلوسك عندك تو انجيب

ومشينا لمطعم وجاب بيتزا و سندويشات
وللمحل وجاب عصير وشكولاطه
ومشينا للمستشفي

وكلنا نزلنا
مراد ؛؛ اصبرنا بشويه امشن
وبخ عطر مراد وهو نازل
ونا فطنت وجيته
نا ؛ حبيبي عليش العطر اللي حطيته تو هنا

مراد؛ انحول في بنت الوكال
نا ؛ به اديره هنا قبل ما تنزل
مراد ؛ هههه امشي امشي هيا قدامي

ومشينا وخشينا وهدي ماسكه لمار من يدها ومراد شايل حمادي ونا وهاجر الاكياس

اميره ؛؛ اوووووو اهلا اهلا
هاجر ؛؛ لاباس لاباس
رحاء ؛؛ الله لا يوريكن باس
هدي ؛؛ اعوينه وجاتك

مراد ؛؛ شن جو العزايز هذا
هدي ؛؛ ههههه والله اعوينه
وسلمنا كلنا وقعمزنا

اميره ؛؛ باهي اللي جيتنا كنت اقريب نطربق من الكساد

نا ؛؛ ههههه هذه المستشفي
مراد ؛؛ خليكن هنا ونا طالع انشوف الاجواء ولما تبن اتروحن رنن عليا

نا ؛ وين ماشي
مراد ؛؛ نمشي انكسد مع الدكاتره وانجي
نا ؛ به

ومشي مراد
هاجر ؛ كنك ياحنه من ايش الهبوط وانتي قاعده ماشاءالله

رجاء ؛ هههه من الحب
هدي ؛؛ ييييييي كان علي الحب يقهر قهر امغير عايشن ومتحملين وخلاص

رجاء ؛؛ ﻻﻻ يا حنه اللي ايتعبني انديرله اوت من قلبي

اميره ؛ كذابه واللي فيه تو شن هذا

هاجر ؛؛ هذا مش طالع الا لما ايكر القلب معه

هدي ،؛ هههه علي نهايتك يعني
لمار ؛ رجاء وين فونك

اميره ؛؛ ههههههههه طيح سعدك
نا ؛؛ فنصت فيها
لمار راه خيرلك

هدي ؛ كنها هذه
رجاء ؛ تبي اتشلط
هدي ؛؛ طيح سعدك يا لمار تو يقتلك بعدها مراد
رجاء ؛؛ زمان كنت نعطي فيها تحكي بس تو ماعاد عندها مع من تحكي خلاص بااااح

هاجر ؛؛ ل ه درجه
رجاء ؛ برسمي

وايخش علينا سراج

سراج ؛؛ السلام عليكم
لمار ؛؛ هيييييي عمو
هدي ؛؛ لمار عيب
نحن ؛؛ وعليك السلام
سراج ؛ لمار شن الاخبار
لمار ؛ انحرجت وكانها شافت حبيبها
اكويسه عمو

هاجر ؛؛ بنت خونا معروفه ونحن مانندرو

سراج ؛؛ ماشاءالله شن اليوم تهدريز اجدد هذين اول مره انشوفهن

رجاء ؛؛ سقمت قعميزتها

تفضل هدرز ماعندكش مشكله

سراج ؛؛ اكيده عنديش مشكله
شن اخبار يا ايه

نا ؛ رفعت راسي وانصدمت
وبحتت في البنات وحسيتها كيف ميه ساخنه انكبت عليا

هاجر ؛؛ ههههههه حتي انتي تي من هذا اللي خاش بقلب قوي هذا

سراج ؛؛ نا دكتور سراج
هدي ؛ وتعرف عائله خويا كلها
سراج ؛؛ كيف انتي اخت مراد
هدي ؛؛ ان شاءالله
رجاء ؛؛ تمت تغلي من جوا لان قعد يهدرز مع البنات
قعمز يا سراج عليش امصبي قعمز وهدرز اخر

سراج ؛؛ بحت في رجاء
نا جاي انشوف فيك
رجاء ؛؛ بعد شنو مش انت قالت فيش خروج
سراج ؛؛ جاي انشوف في ارجيوه جا ولاه لا

اميره ؛ ههههههههه

رجاء ؛؛ ههه ﻻﻻ اطمن قالتله ما اتجيش نبيش مشاكل نا

سراج ؛؛ يعني مازالتي امسكره راسك
رجاء ؛؛ دكتور تو انت اتشوف في الغرفه امعبيه
سراج ؛؛ به براحتك

وطلع وهو متعقد

هاجر ؛؛ من هذا لو سمحتن فهمني مانحبش نقعد عبيطه

اميره ؛؛ هذا اللي امتعب قلبها
هاجر ؛؛ بحتت في رجاء وهي منصدمه
واتعاملي فيه هكي

رجاء ؛؛ وهي العبره خنقتها
لان خلاص معش في شيء بينتنا

هاجر؛ ؛ معقوله هذا ما ايتعوضش
رجاء ؛؛ اهو فيش نصيب مش متريحه معه

اميره ؛ مش انتي مش متريحه معه هذا كبريائك اللي مش متريح معه وتو ايودرك

هدي ؛؛ يييييي كان علي الكبرياء نا اللي ودرني
زمان انقول لا اقرايتي مستحيل انتازل عليها واهو شن كملت خذيت الشهاده وقعدت نغفر في الحوش وهو قاعد عايش احلي معيشه في كندا

اميره ؛؛ كيف عندك موضوع حتي انتي

هدي ؛؛ نا كانت فاتحتي مقريه في ولد عمتي

نا ؛؛ اول مره نسمعها
هدي ؛ لاني نحكيش نا عليه
اميره ؛؛ به عليش سيبته

هجي ؛؛ هو قعد يبي يطلع ويقرا بره وقالي هيا معي نا رفضت وقالت مانمشيش علشان هو ايحضر ونا نقعد بلا شهاده قالته انت عدي ولما انكمل نا القرايه اتجي انت اطلع الفرح ونمشو مع بعضنا

نا ؛؛ وبه
هدي ؛ خلاص هو قال ياهيا معي تو يا بلاش
ونا قالت مستحيل نمشي من تو
خلاث تفارقنا وهو مشي وخطب وطلع فرحه علي بنت جيرانهم
وبكل صحة الوجه مشيت وحضرته الفرح وكان شيء لم يكن
هاجر ؛؛ ييييسس ياما صار في الايام هذاكين
هدي ؛؛ اهو مشن
اميره ؛؛ كلا انتي تقدري كيف قدرتي تحضري فرحه
هدي ؛؛ والعبره خنقتها والصوت دوبه طالع

اهو مشيت الدنيا كلاها استغربت تي حتي خوتي استغربو بيش نا مشيت بيش نثبت لروحي وللناس كلها نا الحياه مش واقفه عليه

وخلاص ونا قعدت هكي لاعاد حكيت بعده ولا شيء لان انقهرت حب طفوله في ثواني عدي بس علشان انانيته ما يبيش يطلع بلا مراه لان عارف روحه معش يبي ايرد هذا عليش خذا مراه وراح

ونزلت دمعتها وهاجر جتها طول واضبطتها

هدي ؛؛ سبحان الله علي حبنا زمان الناس كلها تحسد فينا عليه نين فرقونا اهو هو عايش حياته في كندا ونا قاعده هنا انكابر نين جت علي راسي

رجاء ؛ بس كرامتك يا هدي احسن من مئه راجل
يعني شفتيه طلع حقير حشاك تخلي عليك في اول اختبار بينكم
ونا ما احترمنيش شن نبو انكملو حياتنا بلا كرامة ولا شنو ولا كرامتنا خير من مئة راجل

نا ؛ بس الحب ما يعرفش كرامه حبيبك كان تبي اتعيشي معه ضروري اطلعيه موضوع الكرامه اشويه ضروري اتفوتي حاجه واثنين بيش تقدري اتعيشي معه

اهو شوفني نا قاعده مع مراد وايصيرن عرم مشاكل وساكته علشان نبيش انسيبه وعلشان هو حبيبي وراجلي واب اوليدي ونبي اوليدي ايعيش متهني في وسطنا

اميره ؛ انتي ماكيفك حد يا ويه
رجاء ؛؛ انتي علشان راجلك هذا عليش اتمشيله بس كان حبيبك مش ح اتمشيها بالساهل

نا سراج اغلط فيا ومستحيل انكمل مع حد يغلط فيا ولو انموت ميه موته مستحيل انمشيها له

اميره ؛؛ حتي انتي اغلطتي في حقه مش كان معاك معناتها انتي معك الحق

رحاء ؛؛ ممكن اتفوتنا الموضوع
باهي يا هاجر امتي فرحك

هاجر ؛؛ خلاص مازال شهرين قبل عيد الاضحي ان شاءالله

نا ؛ بديتي تطلعي تشري
هاجر ؛؛ اها ايطلع فينا طارق امغير اليوم متريحه علشان ماما عندها فرح
نا ؛ وكنك ما كلمتيني
هاجر ؛؛ هذاك اليوم سالت عليك قالي مراد مريضه

نا ؛؛ اهااا المده هذه نتعب واجد وكان نلقي ما انتحركش من الفراش

هدي ؛ هذا حال الحمل عقبالكن

وقعدنا انهدرزو وكانت الهدرزه اكثر شيء علي حب وعلي قسمه ونصيب وعلي المتاعب الحياه

نا ؛؛ هيا نطلعو مراد رن

وطلعنا نا والبنات
وخلينا رجاء دمعتها علي خدها
رجاء ؛؛ فيش حد ماعندش اهموم
شفتي هدي اللي ايشوفها ايقول هذه ماعمرهش جربت الحب بكل وهي منحرقه حرق منه

اميره ؛؛ نا بروحي انصدمت لما اعرفت قصتها حرام والله الواحد يحمد ربه علي اللي فيه معقوله بعد الحقاره هذه ولد عمتها وحب طفوله ينتهي هكي لا وهذا كله احضرت فرحه والله نا انموت ولا نحضر الفرح

رجاء ؛؛ بس عندها شخصيه خيالية مش بالساهل الوحده اتحق حبيبها اسنين علي المسرح مع غيرها

اميره ؛؛ ربي ما يكتبها لنا
رجاء ؛؛ ان شاءالله

ورن فون اميره
وطلعت اميره واقعدت تحكي مع وليد وهو جاها وقعدو ايهدرزو

ورجاء تبكي وياما صاير فيها من الحب والنار القويه ماكنتش تحساب روحها اتحبه لدرجه هذه كانت تحسابها حب عادي ماتحسابش هكي عذاب لقته و واعر ومعش اقدرت عليه
تمت تبكي وتشهق واتحس في نار راكبه فيها
وقعد وضعها هكي يومبن ما تحكيش مع سراج وكان خش عليها اطنش كانت اتبين ان هي قويه ومش اماثر فيها
وهو كذلك لما شافها مش امعدله مابش ايدور واجد
رجاء كانت طوال النهار تهدرز وتضحك من وراء قلبها
بس كانت الليل ايمر عليها وكان سنه مش ليله واتمر
كانت طول الليل وهي تبكي ومضايقه

وهي برامه وجها وتبكي جت يد وحولت المخده
وهي افتحت اعيونها و………….

يتبع