مسلسل سعاده كاذبه التكملة
مسلسل سعاده كاذبه
الحلقه 39
عمتي ؛؛ عدي اركبي اكيده تعبان حتي
نا ؛؛ سلام تصبحو علي الخير
وركبت الشقه والقيته امسيب الباب مفتوح ليا وطول خشيت بدون صوت وخشيت ووصلت للممر وسمعت صوت مراد يحكي
مراد ؛؛ اوكي نا معاك انحبك بس …………….
وقفت مكاني وكأن في حاجه خشت في قلبي بدون ما انحس بروحي طحت دخت ومراد سمع صوت طيحتي وجاني يجري
مراد ؛؛ خاف ان انكون سمعته
وشالني وحطني علي السرير ووعاني وكان حابس دمعته ﻻن كان خايف قعد مرتبك
واول ما فتحت اعيوني جت في اعيونه خنقتني العبره
انبحت فيه واعيونه ملينات كلام وشفت فيهن ارتباك اول مره انشوفهن طول برمت وجي وقعدت نبكي يااااااااااا واعره واعره يا مراد واعره يا حبيبي واعره ونا انشوف فيك تطعن فيا نا نبيش نخسرك وانت قاعد اتهد فيا هد
مراد ؛؛ويه من امتي جيتي ما حسيتش بيك نا
نا ؛؛ غمضت اعيوني واذكرت الموقف وخنقتني العبره وحسيته وكأنه في حاجه تعصر في قلبي جو
بصوت واطي ومخنوق ومليان حزن
نا ركبت دخت طول اساس حسيت راسي عرفتي روحي من نا علي ادروج ركبت ابسرعه وبمجرد ماخشيت طحت
مراد ؛؛ قعد ايبحت فيا من لاوره وعرفني نكذب عليه وانقهر اكتر مني لان عرفني انحبه ومانبيش نخسره واكبرت في عينه اخر
صبا عد جابلي ميه ودواء
وجا قعمز جنبي ونا عطيته بظهري
مراد؛؛ ويه صبي اشربي ميه
نا ؛ قاعده نبكي بلا صوت حاطه راسي علي مخده وكأني قاعده علي نار ما بيتش انرد نبيش يعرفني نبكي
مسكني ورفعني واضبطني
غمضت اعيوني
واول مره انحس ان حضنه بارد مش دافي كيف كل مره انت حبيبي وامنت قلبي عندك ليش اتخون فيه انت حبيبي نبيش نخسرك انت حبيبي وروحي وامنتك علي روحي وقلبي وحياتي ودنيتي كلها بالله ماتكون يامراد خاين حتي ولو انت اتخون فيا اكذب عليا وقولي ماكنتش تحكي معها بالله عليك والله نار راكبه فيا طفيها يا مراد طفيها يا حبيبي طفيها ياسندي طفيها دنيتي طفيها راه واعره واعره واعره والله واعره وماعاد عندي جهد لها
مراد ؛؛ ويه كنك ساكته احكي قولي كلمه
نا ؛؛تعبانه نبي نرقد
مراد ؛؛ به اشربي ميه وخوذي دواءك قبل
نا ؛؛ به هات
وخذيت الدواء وحولت من حضنه وبرمت وجي وعطيته ظهري ورقدت
مراد تعقد وعرف اني نا عارفه وسامعه
صبا وطلع بره وخذا فونه واعزقه علي الساس بقوه نين طاح تكسر
ونا سمعت الخبطه انفجعت وقعدت نبكي اخر ونحكي في عقلي في قلبي المجروح
ﻻﻻﻻﻻ يا حبيبي ﻻﻻ ليش ليش شن درتلك نا والله حبيتك وصاينتك وحاطتك بين اعيوني وفوق راسي والله ماعمري فكرت انخونك والله حبيتك والله حبيتك
مراد قعد امقعمز في الصاله وايدخن ما قدرش اواجهني خايف يخسرني
وبعدها بوقت خش عليا في الدار ونا غمضت اعيوني ودرت روحي راقده بحت فيا نزل عليا وغطني وطلع
للصاله وقعد راقيه مني لاني ما واجهتش
وقعدت ساكته كان خاطره انصبي وانديرله مشكله وانفش غلي مش نقعد ساكته ومتحمله ونبكي هو ارتبك لان معش عرف نا سامعه شنو بالزبط
ونا نسمع فيه كل مره امولع سبسبي وايدخن حتي السحور وما اسحرش نين ما اذن الفجر صبا وتوضي وصلي وخش وشافني راقده
خش لسرير ونزل عليا وباسني علي خدي
ونا نزلت راسي لوطه مانبيش يعرفني اني نبكي وهو عرفني واعيه ونبكي وبعدته من عليا تعقد مني اكتر وبرم وجه ورقد
ونا خنقتني العبره ليش يا مراد ليش ياحبيبي اتبعيني وانا شاريتك ليش والله ماعندي غيرك ليش انت اجمل قلب شفته انت حب اللي خش لقلبي بدون استذان انت مش كيف الناس انت حبيبي وقلبي وروحي واعيوني اللي انشوف بيهن
اصعب حاجه اتحط راسك علي مخده وانت خنقتك العبره وقلبك ياما شايل من حبيبك والمشكله مش قادر اتواجه لانك خايف يحكي الحق وانت تخسره
خايفه والله خايفه انواجه والله خايفه هذا حبيبي مانبيش ينزل من عيني نبيه ايكون ليا نبيه
نبيه ليا نا بس ووووووووو ماوعرك يانار الخونه ماوعرك نين مش قادره انواجهك
اصعب ليله مشت عليا واليوم ما بش يكمل بكل ماصدقت جا وقت التسوي صبيت ابسرعه توضيت وصليت ودمعتي علي خدي ولابست ونزلت نجري خايفه من مراد يوعي ويحكلي ونا نبيش انواجه
نزلت ونا نمسح في ادموعي بيدي والعبره خنقتني
وخشيت والقيت عمتي في الصاله
نا ؛؛ السلام عليكم
عمتي ؛؛ وعليكم السلام
وين غريبه نازله بدري
نا ؛ امس رقدت بدري
عمتي ؛ وعي مراد علي الصلاه جمعه
نا ؛ مش عارفه نا نزلت طول
عمتي ؛؛ عدي وعيه الحاج قاعد يرجا فيه
نا ؛؛ به تو نمشي
صبيت ونا غمتلي لاني ح نحكي معه ونا نبيش انواجه نبيش نحكي معه نبيش انبحت في اعيونه وهو ايخون فيا
وكل درجه نركبها انحس باني انطيح اكتر في الوهم وفي الخيانه والغدر
وشفت منتصر امصبي
منتصر ؛؛ اووو ايه كنك تركبي بشويه هكي وين سارحه
نا ؛ رفعت اعيوني وشفت منتصر
ﻻ شيء بس تاعبه اشويه
منتصر ؛ ﻻباس ان شاءالله والله حتي غاده تاعبه قاعده ربي يحفظكن ان شاءالله
نا ؛ ان شاءالله وينها هي
منتصر ؛؛ قاعده اتوتي في روحها تبي تنزل عاد اليوم جمعه واكيده لوطه الفطور
نا ؛؛ اها صاح
منتصر ؛؛ وين مراد واعي هو
نا ؛؛ تو انشوفه تو
منتصر ؛؛ به راه نازل انولع السياره وقاعد نرجا فيه بيش نمشو مع بعضنا للجامع
نا ؛ به حاضر
وجيت علي باب الشقه وفتحته بشويه وكأني انصب في بنزينه علي النار اللي فيا جو
وخشيت وكل خطوه نمشيها انحس وكأني انزيد للنار حطب بيش تكبر
وشفت السرير والقيته فاضي
سمعت صوت الميه في الحمام عرفت جو في الحمام
صبيت عند الصاله وتميت انذكر في موقف امس خنقتني العبره
ياريتني ما ركبت عليك ياريتني مازالت غافله ياريتني خشيت ومالقيت تحكي ياريتني خشيت والقيتك في الحمام كيف تو
وسمعت صوت باب الحمام انفتح مشيت نجري وطلعت من الشقه
مراد طلع وحس ان كان في واحد كان هنا ولما سمع باب الشقه انطبق عرف ان نا اللي كنت هنا وقاعده انتهرب منه غمتله مني لاني انتهرب منه والمفروض جيته وواجهته ودرت يوم اسود
لان كان سكوتي اصعب من الخونه حد ذاتها
وخش ولابس دبشه ونزل
ونا خشيت للمطبخ وبديت نا وهدي وعمتي في الحوسه
هدي ؛؛ نقانه خاطرنا في بيتزا الملفوفه ياويه اعجنيها انتي
نا ؛؛ به حاضر
وبديت نعجن في البيتزا ونا انعجن نذكر في كلام والموقف وعيون مراد
مراد ؛؛ السلام عليكم
عمتي وهدي ؛؛ وعليكم السلام
نا ؛؛ نا وامنزله راسي واعيوني في العجينه وبصوت واطي
وعليكم السلام
مراد ؛؛ فطن ان نا رديت عليه من وراء قلبي تعقد مني
امي وين باتي
عمتي ؛؛ يرجا فيك بره مع منتصر في السياره
مراد ؛ اها به
وطلع
وهدي بحتت فيا واعرفت في حاجه
اسكتت وماقدرتش تحكي لان الهام خشت علينا
الهام ؛ اووووو بديات بدري اليوم
عمتي ؛؛ هههه اها ايه وهدي وعيات بدري اليوم
الهام ؛؛ هههههه ان شاءالله دوم
هدي ؛؛ ازي عليك علي اساس نحن بيرات يعني
الهام ؛؛ هههههه مش عارفه اهو اليوم جبت دورتين ونقانه نبو عصبان خاطرنا فيه
عمتي ؛؛ به هيا هاتي تو نبد نغسلهن وانتن ابدن قرضن هنا الخضره والكبده والرئه واليه
الهام ؛؛ خلاص به نسلح عبياتي بس
وخشت الهام وحولت عبايتها وجتنا في المطبخ وبدت اتقرض وعمتي خذت الدورتين وبدت تغسل فيهن بره
هدي ؛؛ تي باهي اللي عندنا مطبخ خارجي بيش نغسلو فيه افتكينا ياخيتي من العناء هنا
الهام ؛ اهاااا ويه مديلي الكسبر بيش انقرضه
نا ؛؛ تفضلي
الهام ؛؛ شن اخبار صحتك اليوم وجك مش حلو كنك
نا ؛؛ تعبانه اشويه
هدي ؛؛ هذا حال الحمل ياحنه انتي مره مره تمرضي واجد واياثر فيك ومرات انقولو ماشاءالله تبارك الله اتهبلي
الهام ؛ اهو عاد يوم هكي ويوم هكي
هدي؛ خطرها يا الهام وين العويل
الهام ؛؛ من امس وهم عند هلي ياحنه جيتنا اختي بايته ومسكتهم امرايفه عليهم ياخيتي حتي البعد سامط
هدي ؛؛ اها بعدها اختك هذه متعوده علي رتاج واجد قبل ماتزوج
الهام ؛؛ ماهي امرخبتها الا هي امخربتها ليا قعدتلي مضحكه اي حد يضربها
هدي ؛؛ ههههه من الدلع ياخيتي رتاج اتهبل من يقدر يضربها
الهام ؛ الفروخ الصغار يضربو فيها اهو اقرب مثل لمار اللي اصغر منها امورتيها النجوم في عز الظهر
نا ؛؛ هههههههه
هدي ؛؛ هههههههههههههه ازي عليها والله رايفت عليها المشاغبه هذه
الهام ؛ والله حتي نا صاح كني حسيتها طولت المره هذه عندها
هدي ؛؛ اصلا لمار ماشيه حرجانه من مراد انسيتي علشان ضربها
الهام ؛؛ اها صاح ياخيتي حتي الفرخات يعرفن الزعل والحرجان نا اللي كبيره ماعمري حرجت ومشيت لهلي ديمه نحرج في شقتي نبكي قدام خلقته بيش انبه ضميره وايراضني مش انعدي لحوش هلي وهو يقعد يصرح ويمرح ونا نقعد ناكل في الجيفه ونحرق في حوش هلي وانكد علي روحي وعلي هلي ﻻ ياحنه نقعد احذه وانكد علي روحي وعليه نين ايراضني
غاده ؛؛ هههههه نجك ليا وانتي ديمه تفكيرك عاجبني
الهام ؛ اهلا اهلا اهو ياحنه الرجاله جاله هكي مايبو
غاده ؛؛ ههههههه نسمع فيك من لما خشيت للحوش
هاجر ؛؛ اهلا ياصبايا خوتي
هدي ؛؛ اووووو هاجر اليوم جوها رايق
هاجر ؛؛ ديمه رايق جوي اساس
هدي ؛؛ دوم ان شاءالله
هاجر ؛ بكره اعربي جين يبو ايجبولي العيديه
هدي ؛؛ تي قالتها الابتسامه هذه مش من الفراغ اتجي
الهام ؛؛ المعني شن
هاجر ؛؛ المعني انكن اديرن الفطور وبكره بيش اتجن تحضرن جيتهن
الهام ؛؛ دايره موالح
هاجر ؛؛ اها كل يوم انديرو نوع وناخذ منه كم طرف واندسهن عندي اقريب 7 انواع موالح في الثلاجه
الهام ؛؛ شاطره والله
هاجر ؛ افكار ويه ياحنه قالتي ديري هكي بيش يوم اللي يجو ايكون حاجاتك كلها واتيه
غاده ؛؛ اتقول كنتي مخطوبه يا ايه شن عرفك انتي
نا ؛؛ اختي المتزوجه كانت مخطوبه وكانت ادير هكي وبعدها نحن ديمه اندسو في موالح بيش اللي اجينا انطلعو انسخنو طول
هاجر ؛؛ المهم ويه راه اليوم ضروري نطلعو نبي نشري شكولاطات وهديه ل اسامه وحلويات
هدي ؛؛ تي ماتفقنا من امس خلاص حتي مراد قال باهي
عمتي ؛؛ هيا هيا ابدن احشن كملت
غاده ؛؛ اووووو عصبان
هاجر ؛؛:نا نبي انظم الحوش ماعندي عليش انداعك فيكن
عمتي ؛؛ بيش اتظمي المربوعه راه امس جو اصحاب طارق
هاجر ؛؛ به
غاده؛ ؛ حسهم جو من الجامع
عمتي ؛ اها
منتصر ؛ شن الفطور
عمتي ؛؛ اليوم العصبان
منتصر ؛؛ والله احسن
غاده ؛؛؛ نصوري بيش اتجيب ببسي نقانه العصبان يبي غازي مش عصير
منتصر؛؛:ﻻﻻ ممنوع غازي
غاده ؛؛:حرام والله حرمتني منه
عمتي ؛؛ ماعندك ماتبي فيها امغير اتنفخ في البطن وخلاص
الهام ؛؛ ياخيتي تمسح الكبد من الدهان
مراد ؛؛ امي جارتك خديجه امها توفت تو شفتهم اطلعو يجارو
عمتي ؛؛ ﻻﻻﻻﻻ امتي
مراد ؛؛ تو شفتهم طالعين يجارو سالتهم
منتصر ؛؛ والله صاح فطنتلهم يجارو ماسالتهمش
مراد ؛؛ معقوله اتشوف جارك يجري ماتشوفه كنه
حاتم ؛؛ عظم الله اجرك ياامي في ام صاحبتك
عمتي ؛؛ تمت تغسل في ايديها ابسرعه هيا واحد فيكم ايشالني
حاتم ،؛ تو ياامي
عمتي؛؛ ها به شن ماتبنيش نلحق خديجه صاحبتي
ماعندي عليش قاعده اهن الصبايا تو ايكملن الفطور
منتصر ؛؛ باهي هيا
وخشت عمتي تجري ولابست عبايتها
عمتي ؛؛ هيا وحده فيكن اترن علي جهازي
هدي ؛؛ امي ديمه امدروه فونها
مراد ؛؛ عدن شوفنه وين تو انرن عليها نا
طبعا طول الوقت ومراد ايبحت فيا ونا لاهيه روحي في الحوسه وامنزله راسي
هاجر ؛؛ اهو الفون قاعد منعزق هنا
خطرها فون ايه مازال قاعد هنا
هاجر ؛؛ ايه امس انسيتي فونك عندنا
نا ؛؛ ييييي صاح ماحد رن عليا
هدي؛ ؛ نطت ابسرعه
ﻻﻻﻻ فيش حد رن
مراد؛ ؛ كيف ناسيه فونك لوطه مافقدتيش
نا ؛؛ نحكي بصوت واطي
ﻻﻻ نسيته بكل
وطلع مراد وطلع وراه حاتم
حاتم ؛؛ شن اخبارك
مراد ؛؛ اهو قاعد الحمدالله
حاتم ؛؛ فيش اخبار جديده
مراد ؛؛ سناء اترن بستمرار وماتبيش تعطي الاعيال مستغله فرصة ان لمار زعلانا مني
حاتم ؛؛ ﻻﻻﻻ وماتقوليش انت تحكي معها عادي
مراد ؛؛ اهو نحكو علي العويل وانسكرو
حاتم ؛؛ ماتقوليش انك …..
مراد ؛؛ تي لا يا راجل كنك انت راه نا تو متزوج وعندي زوجه وانحبها وانهاف عليها
حاتم ؛؛ رد بالك يا مراد البنت قزونه واصغيره وطيبه واتعامل فيك اكويس وماتبيش تخسرك
مراد ؛؛ ما هذا اللي قهرني انها طيبه طيبه طيبه نين امخربه علي روحها
حاتم؛ ؛ تي بدال ماتحمد ربك
مراد؛ ؛ الحمدالله علي كل حال
بس هي مشكلتها كتومه وماتحبش تحكي تزمط في الغصايص وساكته بدال ماتحكي واتواجه لا تقعد ساكته واتهرب
حاتم ؛؛ في موضوع صاير
مراد؛ ؛ ﻻ مافي شيء
حاتم ؛؛ خويا ونعرفك
مراد؛ ؛ نبيش نسبق الاحداث نبي نعرفها قبل
حاتم ؛؛ اها به ان شاءالله خير
هيا خلينا نمشو وراء جيرانا انعزوهم وانمشو هالنهار
مراد ؛؛ باتي تقريبا مشي مع امي ومنتصر
حاتم ؛؛ اها شفته طلع
ومشو حاتم ومراد للعزاء
ونحن كملنا الفطور
وخش علينا طارق
طارق ؛؛ اهلا ها شن ديرات الفطور
هدي ؛؛ كل الخير كنك
طارق ؛؛ ماشي للبحر حطولي كل حاجه نبي نفطر علي البحر نا وجماعتي
هدي ؛ به تو
طارق ؛؛ اها اللي طايب حطيلي منه امي دارت تنور
هدي ؛؛ﻻﻻﻻ امي عدت للعزاء ام عمتي خديجه توفت
طارق ؛؛ اها كنت في العزاء والقيتهم كلهم غادي
الهام ؛؛ حتي حاتم صاح
طارق ؛ اها كلهم هيا حطولي بسرعه ايرنو قاعدين
هدي ؛؛ هيا هيا اهو خوذ
طارق ؛ عصبان ديرات
هدي ؛؛ عيت حاتم جايبنه
طارق ؛؛ صحيتن هيا سلام
الهام ؛؛ بنات وتن السفر هيا خلاص وقت يالله انطقو
وبدينا انحطو في السفر وكملنا وهو ايخشو
والمغرب اذن
نا طول عديت للميه وتميت نشرب فيها ومراد ايبحت فيا ومستغرب
هدي ؛؛ عطشان املاه
نا ؛؛ بكل مش عارفه كيف كنت متحمله
مراد ؛؛ اشربي حليب سادك ميه
نا ؛؛ به
وشربت حليب وخذيت تمر وخشيت انصلي وطلعت وبدينا نفطرو
وصبت غاده تجري لحمام
وكلنا بحتنا فيها
منتصر ؛؛ عليك قصه كل فطره هكي
مراد ؛ وانت كنك متعقد عادي
منتصر ؛؛ صبلها منتصر وخش وشافها
غاده ؛؛ ماقدرتش انتحمل
منتصر ؛؛ اغسلي وجك وعادي بس اكيده في دواء ايوقف هالقصه هذه
غاده ؛؛ والله سناء عطتني ادواي
منتصر ؛؛ اساسا نا مش موافق اتكون سناء دكتورتك
خلاص يعني مالقيتي الا هيا
غاده ؛؛ هي اللي نعرفها وواثقه فيها وشاطره
منتصر ؛؛ باهي هيا اطلعي خلاص
واغسلت غاده واطلعت علينا
الهام ؛؛ تعالي اشربي عصير غيري ريقك
وجت وقعمزت وبصوت واطي
غاده ؛؛ مش عارفه امتي انوقف والله بطلت نا
عمتي ؛؛ بصوت واطي
قالو بو طبق امتع الحولي تطبيخه وتاكليها ايحول الوحم
مراد ؛؛ هههههههه
الهام ؛؛ بصوت واطي
مراد كاسر اوذنه هنا
مراد ؛؛ وانتي زدتيها طين تو
هدي ؛؛ ههههههه دقيق مراد
عمتي ؛؛ ياخيا الصبايا هكي ماايقولنا وانت تضحك علي كلمتي
مراد ؛؛ مانحبش طب العرب هذا لان غريب وعجيب ومش اي واحد يفهم فيه
عمي ؛؛ تي فكك هذين الصبايا قصتهن طويله ماتكمل بكل كل حاجه ديرتلها حل ماني عارف ليش الدكاتره يقرو وايدرو مستشفيات
حاتم؛ علي كلمة قالو
عمي ؛؛ صحه
عمتي ؛؛ كنك ماكليتش
عمي ؛؛ ﻻ وين واكل الحمدالله
وصبا عمي وخش
حاتم ؛؛ سلمكن سويات
عمتي ؛؛ سلمك صحه صحه
وكلهم صبو ونحن صبينا وخشينا للمطبخ
هدي ؛؛ غاده عدي تريحي انتي
غاده؛؛ ﻻ عادي متعوده
هدي ؛؛ اليوم راحه مني نا عدي قعمزي
غاده ؛؛ نجك ليا وشكرا
هدي ؛؛ عفوا
ولمينا الحوسه نحن
واخر وحدات في للمطبخ قعدنا نا وهدي
طبعا اليوم كله ونا انتهرب من مراد حتي في المطبخ طولت لاني نبيش انقعمز وايقابلني نبيش انشوف اعيونه وهو ايخون فيا
هدي ؛؛ كنك قعدتي معي
نا ؛؛ انشف في المطبخ
هدي ؛؛ تحسبيني مش فاطنه
نا ؛؛ شن
هدي ؛؛ تكيتها مع مراد صاح
نا ؛؛ استغربت وخفت يقعدو كلهم فاطنين الجو ونا نبيش انبينلهم ان في مشكله
هدي ؛؛ نا بس فطنت لاني لحظت مراد ايبحت فيك وماحولش اعيونه بكل من عليك وانتي ماتبحتيش فيه بكل
نا ؛؛ اهو سوء تفاهم
هدي ؛؛ امس لما انسيتي فونك جاتك رسال قبل الفجر والحق نا جاني تشويق نفتحها لاني من الاخير عرفتها من اللي دزتها
نا ؛؛ رسالة شوق اخر صاح
هدي ؛؛ كنك ساكته ليش سكتليها القيتها دازه عرم رسال ليش ساكته ليش مااديرلها حد معقوله هذين رسال ادزهن شن الحقاره هذه
حرام حتي عليها هذا تو طليقها مش راجلها نين اتقوله الكلام هذا وبعدين هو تو متزوج ليش ماتحكي معها
نا ؛؛ نبيش يا هدي مشاكل نا وبعدين هي بعاني ادز فيهن في رقم هذا لان شكلها عارفه انه قاعد عندي لان كان تبيه راه ادز فيهن له هو علي رقمه
هدي ؛؛ بس سكوتك هذا خطا ديرلها حد خلاص هذا تو راجلك لكي انتي
نا ؛؛ خليها ادز لان مراد مايمسكش فيه فوني وهي ادز فيهن في الليل ونا في الليل نقفل فيه او انديره صامت وح انغير شفرتي اساسا
هدي ؛؛ نا نصحتك كلميها وديرلها حد او خلي مراد ايدرلها حد خطا الشيء هذا
نا ؛؛ حسيت حاجه غمت علي صدري
ياريته مراد ايدرلها حد للاسف قاعد معها
هدي ؛؛ ويه كنك ساكته وين مشيتي ماما قاعده اتنادي
نا ؛؛ اها به انتي اطلعي بدال مانشفت وراك بالمطهر
هدي ؛؛ به ونا عارفتك مازالتي اتهربي منه بس خطا يا ويه خطا هذا راجلك ومفروض اتغيري عليه وماتخليش حد ايجي شوره سكوتك هذا خطا
نا ؛؛ حسيت كلام هدي واعر وما نقدرش انديره
اطلعت هدي ولقت مراد اعيونه علي المطبخ يرجا فيا نطلع بس نا للاسف ماطلعتش
عمتي ؛؛ وين ايه
هدي ؛؛ اتنشف تو تطلع
مراد ؛؛ امي صبيلي شاهي
عمتي ؛؛ خوذ
وجيت نا وشفت المسافه اللي بين مراد وعمتي وجيت وخذيت منها الطاسه ومديتها له
مراد بحت فيا ولمس يدي ونا انمدله ونا جتني رعش حولت ابسرعه ومشيت قعمزت مع البنات
الهام ؛؛ حاتم البنات اليوم طلعات للسوق نقاني نبي نطلع معهن بدال العويل عند هلي بيش ناخذ راحتي في السوق
حاتم ؛؛ من طالع بيهن
الهام ؛؛ مراد
حاتم ؛؛ به كان عندك مكان امشي معهم
الهام ؛؛ ﻻ ماعندي مكان انتي طلعني نطلعو مع بعضنا
حاتم؛ ؛ ليش من ومن ماشي
مراد ؛؛ البنات وايه وحنين حتي هي تبي تطلع
حاتم ؛ اها وانت يا منتصر
منتصر ؛؛ ﻻ مانيش طالع
غاده ؛؛ مانقدرش نطلع للسوق انحس روحي تعبانه وكان نلقي نرقد وتو نبي نركب نرقد
عمتي ؛؛ ان شاءالله لاباس
غاده ؛؛ الله لا يوريك باس
وركبت غاده ومشي وراها منتصر
هاجر ؛؛ حاتم وين اللي وعدتني بها
حاتم ؛؛:ههههه وانتي ماتنسي
هاجر ؛؛ نبي نطلع ونشريها اليوم
حاتم ؛؛ به تو انجيبلك الفلوس في الشقه غادي
هاجر ؛؛ راك تنساهن يا حاتم راه عابيه عليك
حاتم ؛؛ باهي
عمتي؛؛ شن شن طالبه منك
هاجر ؛؛ ماما هذين حاجات خاصه بيني وبين خويا
عمتي ؛؛ تي والله شكلهن افلوس
حاتم ؛؛ وهي شن تطلب غير الفلوس
هاجر ؛؛ نبي ساعه فضة وهو قالي تو نشريها لكي دخلنيش من قبل الرمضان اموعدني بها
الهام ؛؛ ههههه راه 250 الساعات
هاجر ؛؛ دخلنيش هو خبط صدره معناتها يشريها ليا ولو كان كم سعرها
حاتم ؛؛ باهي تو انجيبلك الفلوس ماتخفيش
هدي ؛ هابا علي بختي نا من يشرلي
عمتي ؛؛ اي والله انطقي انتي عاد واطلبي
هدي ؛؛ وكني مانحكي ونطلب ماعنديش خوت ولاه شنو بابا عطاني حق دبش العيد بس
مراد ؛؛ شوري نا ساعتك
هدي ؛؛ نجك ليا والله انك اخ ايهبل
عمتي ؛؛ عيب عليكن تطلبن من خوتك عندهم حواشين ويصرفو عليهن
مراد ؛؛ وكان عندي حوش ماهي اختي وحقه تطلب مني
عمتي ؛؛ كانكم راضين نا خلاص نسكت
الهام ؛ هيا حاتم خلينا نمشو للشقه انغيرو بيش نطلعو
حاتم ؛ خلاص هيا وتو انجيب معي حنين ماعندك عليش ماشي لعند غادي
مراد ؛؛ به خلاص تو بينتنا فون
وطلعو عيت حاتم وطلع مراد وراهم وقعمز في الجنان وقعد ايدخن
ونا طلعت وجيت نبي نركب الدروج شفت مراد امقعمز في الجنان وايدخن
ونا انشوف فيه وخنفتني العبره مش قادره انتخيل ان هو ايخون فيا وح ايسيبني مش قادر انتخيل ان في يوم من الايام اني انكون بدونه والله حبيته وتعودت علي وجوده فيه حياتي ودمعتي انزلت
ومراد حس في حد برم وجه وشافني ونا ركبت ابسرعه
وهو خبط راسه بيده وتعقد
خشيت نجري للحمام ادوشت ولابست الديشنبر امتعي وطلعت وخشيت للدار ولابست جينز وابلوزه وقعمزت بديت اندير في ميك اب
خش عليا مراد
مراد ؛؛ شن كملتي
نا ؛؛ انبحت في المرايه
اها اشويه بس
مراد ؛؛ طلعيلي دبش بدال ماصليت
نا ؛؛:به حاضر
وطلع مراد وصلي العشاء
ونا طلعتله الدبش
ولابست وشاحي بسرعه ومشيت نلابس في الكندره
مراد ؛؛ كنك مستعجلة
نا ؛؛ ﻻ بس انت قالت هيا
مراد ؛؛ تعالي خوذي افلوس مرات تبي تشري حاجات ونا مش معاك
نا ؛؛ ﻻ مانبيش ماعندي ما نشري
مراد ؛؛ خوذي افلوس خلي في شنطتك احتياط و لا ايهمك اي شيء اللي تبيهل ح اناخذها لكي
نا ؛ به شكرا
وجيته ونا خذ منه في الفلوس هو كرني شوره واضبطني
وحبني علي راسي
مراد ؛؛ مرايف عليك نا من اول امس مااضبطتكش
نا ؛؛ ماكانش خاطري انحول بس حاجه خلتني انحول وانتحجج بحاجه تانيه
عمتي اتنادي لوطه
وحولت ومشيت شور الباب ابسرعه
ومراد تعقد ولابس كندرته وطلع وراي
نا ؛؛ نعم عمتي
عمتي ؛؛ هيا خلاص وقت
نا ؛؛ هيا هيا اهو جا مراد
وقعدت عمتي امركزه في شكلي
عمتي ؛؛ ماشيه للسوق هكي
نا ؛اها
مراد ؛؛ كنها شن في
عمتي ؛؛ ﻻ شيء براحتها
واطلعنا كلنا ومشينا وحطينا عمتي في العزاء
والتفت مراد شورنا
مراد ؛؛ تعالي قعمزي قدام
نا ؛؛ به
ونزلت وركبت قدام
ومراد ايبحت فيا
مراد؛ ؛؛اووووو انسيت بكل الفون امتعي خرب عنديش فون كذا يا هدي رني علي حاتم شوفيه وين
هدي ؛؛ به
واتفقنا علي مكان ومشينا وبدينا انبحتو في الحاجات
حاتم ؛؛ هيا اشرن ابسرعه
هاجر ؛؛:حاتم هذاك محل فضه هيا نمشو نشرو ساعه
حاتم ؛؛ باهي هيا
هدي ؛؛ هيا يامراد
مراد؛ ؛ هيا امشن قدامي
ومشينا قدامهم والتفت هاجر وشافت مراد وحاتم يضحكو
هاجر ؛؛ طيح سعدكن انتن الاثنين راجلتكن قاعدين يضاحكو وانت تمشن بروحكن هيا كل وحده تمشي تمسك راجلها
وكلنا التفتن عليهم
مراد وحاتم استكو وتمو ايبحتو فينا
حنين ؛؛ احسن حاجه راجلي قاعد في الشقه
مراد ؛؛ كنك وقفتنا امشن
الهام ؛؛ حاتم تعال هنا امشي جنبي
حاتم ؛؛ ههههه
مراد ؛؛ اوووو بدينا في جو الغيره ولاه شنو
الهام ؛؛ ياامن الرجاله ياامن الميه في الغربال
هاجر ؛؛ صدقتي
ومشي حاتم جنب الهام
حاتم ؛؛ بيش اتفكينا من صداعك هيا
الهام ؛؛ ايوه هكي تمام
ومشينا
وقرب مني مراد ومسك يدي
نا ؛؛ بحتت فيه
مراد ؛؛ كيف انتي ماتغاريش عليا ولا شنو
نا ؛؛ بحتت فيه بالاستغراب
حاطه فيك ثقه
مراد؛؛ انصدم من كلمتي وعرف قصدي العكس مسك يدي بقوه ومشينا وخشينا للمحل وشرن البنات ساعات
مراد؛ ؛ خوذي حتي انتي
نا ؛؛ نا عنديش عليهن
مراد ؛؛ ﻻﻻ اشري مع الطاقم اللي عندك
هدي ؛؛ ويه تعالي شوفي هذه
مراد ؛؛ عدي اشري
واخترت حتي نا ساعه وشرها ليا
وطلعنا وخشينا للمحل ملابس
جتني هاجر وكرتني
هاجر ؛؛ ويه نبي نشري ساعه ماركه ل اسامه ودبله
نا ؛؛ هيييي قدامهم
هاجر ؛؛ تي وطي صوتك ياهبله الهام قالتلي تو نشغلك حاتم وانتي اشاغلي مراد بدلل ماخذيت الدبله و ساعه علي السريع
نا ؛؛ راه اديري لروحك مشكله يا هاجر
هاجر ؛؛ انتي شدي مراد بس نا اخترت دبله في محل الفضه والساعه حتي هي اخترتها امبدري امغير نبي ناخذها بس وندفع بس
حنين ؛؛ عدي خوذيه لمحل عرائس حتي الهام تبي ادير هكي
نا ؛؛ باهي تو انشوف
هدي ؛؛ شاركينا في الجريمه هذه
هاجر ؛؛ علشان نشري هديه لخاطيبي جريمه
نا ؛؛ ربك يستر
ومشيت شور مراد وهو ايبحت فيا وامرفع حاجبه
وشبه عرف الموضوع
وجيته ومسكت يده
نا ؛؛ مراد تعال انشوفو هنا في محل نبي ناخذ منه حاجات نبيش حاتم ايشوفني
مراد؛ حاجات شن
نا ؛؛ اهو محل العرائس هذا
مراد؛؛ اوووو تبي تشري ارواب
نا ؛؛ نبي اشوية حاجات بس
مراد ؛؛ به هيا
نا ؛؛ ﻻﻻ مشي حاتم خليه يمشي قدامنا بيش ماايشوفنش انخشو للمحل عيب
مراد؛؛ به
وشيري مراد للحاتم بيش يمشي قدام طبعا الهام افهمت في الجو وحتي هي خشت للمحل تاني للعرائس
مراد ؛؛ والبنات
نا؛؛ ﻻﻻ مانشريش حاجه قدامهن انتحشمن منهن نا
هن خليهن يختارن تعالي هنا للمحل
مراد ؛؛ استغرب جراءتي ومسكت يده ووافق ومشينا وخشينا للمحل
ونا قعدت نشغل فيه وانبحت بر المحل انشوف فيهن وهن مشن يجارن للمحل الفضه
مراد؛؛ نزلي راسك وهي اختاري اللي تبيها
نا ؛؛ شن تبي انت اختار انت
مراد؛؛ ايه يا عبيطه راه انتي فضحتي بيهن نا فهمت ان هن ماشيات يشرن في دبله رجاليه
نا ؛؛ انصدمت وقعدت مستكه وانبحت فيه
مراد ؛؛ تحسابني غافل ولاه شنو راه الحركات هذين ما يمشنش عليا
نا ؛؛ هاجر مخطوبه وتبي تشري حاجه لراجلها شن فيها هي متحشم تشريها قدامكم بس
مراد ؛؛ به هيا اشري حاجه خير مايعرفن البنات اني فطنت
نا ؛؛ ﻻﻻ خلاص معش نبي شيء
مراد؛؛ تو اختاري ارواب راه خيرلك
نا ؛؛ نبيش خلاص
مراد ؛؛ قعد ايبحت ويختار في وحدات اقصيرات بكل
نا ؛؛ مراد تحشم ايشوفو فينا
مراد ؛؛ وكان شن فيها وكان ايتحشمو راه مافتحوش محل هكي
نا ؛؛ به خلاص سادك
مراد ؛؛ اوووو وكان هذا انشوفه عليك نقانه سمح
نا ؛؛ نزل لوطه ايشوفو فيك الناس
ولحظت ان في مراه اتبحت فينا وتضحك وجت وقربت منا
المرأة ؛؛ خير يا دكتور مراد
مراد؛ ؛ انصدم وانحرج ووقف وعرف الصوت وبرم وجه وشافها
اهلا كيف حالك
المراه ؛؛ تمام الحمدالله صدفه حتي يوم العطله انشوفك
مراد ؛؛ اها المدام تشري علي العيد
ايه هذه الممرضه اللي معي
نا ؛؛ اها وانا انقول وين شايفتك
الممرضه ؛؛ ان شاءالله كل سنه وانتم طيبين
مراد؛ ؛ وانتي طيبه
ومشت المراه والضحكه علي وجها
مراد؛ ؛ ياعنجد الموقف محرج
نا ؛؛ مش قالتلك تحشم
مراد ؛؛ به هيا ندفع هذين ونطلعو
نا ؛؛ هذين اقريب 200 جنيه
مراد ؛؛ وكان شن فيهن اندلع في روحي نا
نا ؛؛ اتعرمنهن هكي عيب حتي قدام خواتك
مراد ؛؛ علي اساس هاجر مش ح تشريهن هيا هيا
نا ؛ برسمي انت خلاص
وخذين وطلعنا والقيت البنات امتامت المهمه وشريات
وكملنا وشرينا دبش ونحن وامروحين تكينا علي الحلوني ونزلنا وخذينا حلويات لهاجر وشكولاطه
وركبنا في السياره رن فون هدي
هدي؛؛ نعم باامي
عمتي ؛؛:كان كملتو تعالو خذوني وبيش اتقولي للصبايا خوتك وحنين ينزلن ايعزن خديجه بدال ملتمات
هدي ؛؛ حاضر
مراد ماما قالت تعالو خذوني وقالت بيش تنزلن بيش اتعزن بدال ملتمات
مراد ؛؛ ييييي تبن اطولنا
هدي ؛؛ ﻻﻻ علي السريع
مراد ؛؛ به اصبري انبيب ل حاتم
وبيب مراد ل حاتم وجا جنبه
مراد ؛؛ شور حوش العزاء
حاتم ؛؛ كنك عليش
مراد ؛؛ اوامر العليه
حاتم ؛؛ اها به هيا
حنين ؛؛ اها اكيده امي تبينا انعزو عمتي خديجه
الهام ؛؛ والله اصدقت احسن انعزو تو بدال مع بعضنا والله اتفكر عمتي
….
نا ؛؛ قصدكم تبوني ننزل للعزاء
هدي ؛ اها ماما قالت هكي
نا ؛؛ مش قايله شيء بس الميك اب ماشور شيء
هاجر ؛؛ امسحي علي خفيف
نا ؛؛ تي وين نمسح في الطريق هنا
ومد مراد يده ونزلني المرايه امتع السياره
ومدلي المناديل
هاجر؛ ؛ اهو حلها لكي مراد
مراد؛ ؛ بيش تعرفي هالبيز خطا
نا ؛؛ ها نطلع هكي نفجع
هاجر ؛؛ ههههههه وكنه اوجيهك ايهبل
نا ؛؛ اتسخني فيا
وقعدت نمسح علي الخفيف نين جينا للعزاء
مراد ؛؛ خلاص سادك انزلن هيا
ونزلنا
الهام ؛؛ حتي انتي مسحتي
نا ؛؛ عيب انخش للعزاء بالميك اب
الهام ؛؛ حتي نا تحشمت قعدن نا وحنين امغير انمسحو
نا ؛؛ هيا هيا
وخشينا وعزنيا وطلعن وروحت معنا عمتي
ومشينا كلنا للحوش
حاتم ؛؛ هيا حطولنا سحور راه جيعان بكل
مراد؛؛ ياريت والله اتحطو تو
هدي ؛؛ هيا خشو قعمزو وتو انحطو تو
وخشو حاتم ومراد وجا عمي وقعدو ايهدرزو
ونحن سخنا السحور
الهام ؛؛ هيا ياويه
نا ؛؛ ﻻ نبيش عنديش نيه نبي بيتزا وخلاص
هاجر ؛؛ ويه بكره فطورك عندنا ماعندك عليش اتسوي تريحي ساد اليوم تعبناك ولاني نبيك بكره
نا ؛: به حاضر
اكيده حتي تبيني اندير حاجه
هاحر ؛؛ اها
حنين ؛؛ هيا يالهام ناكلو راه الراجل يرجا فيا
الهام ؛؛ هيا هيا
وخذيت طرف بيتزا وركبت للشقه حطيت الاكياس ومن التعب يالله طقيت انغير دبشي
وطول طحت رقدت
وجا مراد وشافني راقده وتعقد
ورقد حتي هو
ووعيت تاني يوم ونزلت طول لوطه
وتعقد مراد لما عرفني نازله لوطه
وماقالش حاجه
هاجر ؛؛ نجك ليا نازله بدري
نا ؛؛ علي خاطرك
هاجر ؛؛؛هيا تعالي نبي اندير طاجين كيكه مثلجه
نا ؛؛ ل اسامه
هاجر ؛؛ اهاااا ايحبها وفكرت انعطيها له مع الساعه والدبله
هدي ؛؛:اختي رومانسيه ومانندري
هاجر ؛؛ ههههه ضروري نقعد هكي ياحنه
وتمين انديرو في الفطور ومراد ايخش ويطلع علينا وكل خشه ايبحت فيا يرجا فيا انرفع عيني عليه بس نا مابيتش انبحت فيه
ووتينا الحاجات وفطرنا
وبعد الفطور مراد ركب غير ادبشه وعد للعياده
ونا درت دوش ولابست ونزلت واستقبلت معهم العرب ودرنا كل الخير
هاجر ؛؛؛ايه اسامه تو قالي جاي نبي ناخذ هلي نبي نطلع وانسلم عليه ونعطيه صندوق الهديه والكيكه
نا ؛؛ وطارق
هدي ؛؛ عند جماعته
نا ؛؛ شوفي الاجواء قبل وبعدها اطلعي
الهام ؛؛ اطلعي تو خيرلك قبل ماايجي مراد ويكبسك الا حاتم مش جاي تو
هاجر ؛؛ ومنتصر
هدي ؛؛ تي منتصر طالع ياهمي ما غاده عندها عيادع واطول هي في العياده
هاحر ؛؛ به انتن خشن علي اعربي بيش ما يفقدونيش
نا ؛؛ تو انخش عليهم عدي انتي
وطلعت هاجر عليه وسلكت عليه في الجنان وكانت خايفه بكل عطاته الحاجات ابسرعه وخشت تجري
وطلعو عربها
هاجر ؛؛ عليك مغامره درتها
الهام ؛؛ الحمدالله علي السلامه
هاجر ؛؛ ههههههه الله ايسلمك
حنين ؛؛ نا امﻻوحه تبو حاجه
هدي ؛؛:سلامتك خوذي قرعت راجل قبل
حنبن ؛؛ نجك ليا به هيا حطيلي بدال ما لابست
وطلعت حنين وروحت
وخش علينا مراد ولما شافني امتانقه وطالعه حلوه
ابتسملي بس نا نزلت راسي
وركبت فوق ونا انغير في دبشي خش عليا
نا ؛؛ انحرجت منه ونزلت راسي وتميت انغير ابسرعه
مراد ؛؛ بشويه عليش مستعجله
نا ؛ ﻻ شيء بس تعبانه بكل
مراد ؛؛ اهااا واكيده تو ح ترقدي او ح اديري روحك تبي ترقدي بيش اتهربي مني
نا ؛؛ انصدمت من كلمته
مراد ؛؛ واضح يا ايه كل شيء واضح
نا ؛؛ شن اللي واضح
مراد ؛؛ ……………..
يتبع