منحرف وأحببته

#مـنـحـرف_وأحـبـبـتـه
الـحـلـقـة (7)
طلع سراج هو وامه ونزلو مالدروج مع رنت فون سراج
سراج رد:اوووو نصي شن جوك
فيصل:سراج روان خبطتها سيارة وتوا في العمليات تعال بسرعه
سراج:هيا هيا جايك توا وسكر ونزل بسرعة
عفاف:سراج سراج شن فيه وين ماشي العرب قريب ايجو
سراج:روان اخت فيصل ضاربتها سيارة وتوا في المستشفى وطلع يجري
عفاف:ياناري مازال صغيرة ان شاءلله ربي يشفيها ونزلت عليهم
محمد:سراج كنه طلع يجري واناديله مابش ايرد
عفاف:رن عليه فيصل قاله روان ضاربتها سيارة وتوا في العمليات
محمد:ياساتر ياساتر توا انرن علي فيصل نعرف شن حالتها توا
علي جد سراج:اكيدة توا مشغول مع هله واخته في العملية اترن تربكه وخلاص خليه اشوية اخرى اتكون طلعت مالعملية وتطمن عليها
عفاف:صح اكيدة توا مش فاضيين
محمد:باهي اشوي اخرى وانكلمه لكن شن بنقول للعرب توا لما يسألو علي سراج
جد سراج:قوللهم عاللي صارت
محمد:هذا سراج ديما محشمني قدام العرب وانا انتعذر عليه
عفاف:عاد مسكين كان يلبس وبيقعد معانا لكن شوف اللي صار مش بيده
“”
سراج طلع بسيارته من باب الفيلا وهل سندس خشو بسيارتهم للفيلا بس مافيهم حد فطن للاخر ونزلو وخشو ولقو هل سراج في استقبالهم سلمو عليهم وقمعزو
محمد ايعرف فيهم علي عيلته:هذا باتي الحاج علي وهذي عفاف زوجتي
فرج:كيف حالكم
الحاج علي وعفاف:بخير الحمدلله
فرج:وين الشبوب
محمد:والله شن انقولك عساس قاعد ويرجى فيكم معانا لكن اتصل بيه صاحبه اخته ضاربتها سيارة ومشاله دغري
فرج:ان شاءلله سلامتها كان خاطري انتعرف علي ولدك اكيدة منضبط وشاطر في قرايته وشغله زيك
محمد في عقله:ماجايب مني حتى حاجة
محمد:مش زيي بزبط ان شاءلله حتعرف عليه مرة اخرى الجايات اكثر مالرايحات
فرج:ان شاءلله وانا هذي سعاد زوجتي وهذي بنيتي الوحيدة سندس
محمد:صار هذي سندس باتك ياما حكالي عليك وعلي انك معاندية بس راك طالعتله في العناد حتى باتك مافيش ايبس من راسه
سندس ابتسمت:حتى ماما ديما اتقول فيها ليا
عفاف:ياناري عليك ياسعاد كيف دايرة مع اثنين معانديين انا سراج وبعناده قريب يقتلني مبالك اثنين
سعاد;والله اهو انساير فيهم بيش مانقدر
سندس كانت اتشوف الجد سراج زين وهو ايشوفلها
جد سراج:كيف اللي شايفك من قبل
كلهم بحتو في سندس
سندس:اها انا تقريبا شايفتك في مكتب الدكتور ماهر من قبل
جد سراج:اها اذكرت انتي من مجموعة الطلبة اللي دايرين بحثهم مع دكتور ماهر شفتك في المكتب من شهر تقريبا
سندس:اها هي انا وانت وريتني خطأ في البحث ونبهتني عليه قبل مايفطنله دكتور ماهر
محمد:فهمونا شنو القصة
جد سراج: الدكتور ماهر هذا من طلبتي زمان وانا مقترح عليه فكرة قطعة الارض اللي يشتغلو عليها طلبة الهندسة ويوم تسليم البحوث اللي بيشتغلو عليهن في قطعة الارض كلمني عشان نختار معاه البحوث المميزة وكنت نستقبل انا وياه في البحوث بحث سندس لفت انتباهي كان بحث مميز وفكرته ذكية بس كان فيه خطأ بسيط الدكتور ماهر ماانتبهش للخطأ بس انا انتبهتله ونبهتها عليه لان كان بحث ذكي وتصميمه ذكي ولو الدكتور شاف الخطأ حيستبعده وبالصدفة هو جاه اتصال وطلع وانا قلتلها عالخطأ وخليتها اتصلحه قبل ماايخش الدكتور وقررت انا والدكتور ان ايكون مالبحوث اللي حتنفذ فكرتهن
سندس بفرحة:صح
جد سراج:كيف هما مازال ماعطوكم النتيجة
سندس:لا مازال ماعطوها وديما انفكر قبلوه ولا لا
جد سراج:مشروعك كان حلو وذكي ومافيش حد يقدر يرفضه بنتك شكلها شاطرة
فرج:اها شاطرة واتحب تخصصها واجد وعندها طموح
جد سراج:انا انحب الطالب ايكون هكي انا كنت دكتور في الجامعة وعندي نظرة للطالب ومشاءلله بنتك من اول ماشفتها عند الدكتور ماهر حسيت انها مالطلبة المتفوقين والمميزين
محمد:مشاءلله ربي يحفظها لكي يافرج
فرج:ان شاءلله ياخيي محمد تسلم
عفاف:شن رايك ياسعاد انخشو انفرجكن عالفيلة وانخلو الرجالة براحتهم ونقعدو جوا براحتنا
سعاد:اها هيا
وخشن جوا ايتفرجن عالفيلا وقمعزن في دار الضيوف وقعدن ايخرفن
“”
عند سراج وفيصل قاعدين قدام غرفة العمليات
سراج بعصبية وايخبط:من اللي خبطها بس كان انحقه نقتله
فيصل:اللي خبطها راجل كبير في العمر وقال هي طلعت قدامه ومافطنلها
سراج بعصبية:بلغ فيه وخليه ينحبس الحقير
فيصل:انقولك راجل كبير وروان هي اللي طلعت قدامه
سراج:يعني قصدك تنازلت
فيصل:اها تنازلت الراجل ماغلطتش وهو اللي سعفها
سراج:تي شكلك طرشقت كان شفته انا راه عرفت كيف نصرف امعاه اختك في العناية وانت ماشي اتنازل
فيصل:راجل كبير وزرقت قدامه ودار اللي عليه وسعفها
سراج بعصبية:غصب عنه يسعفها المهم الدكتور شن قال علي حالتها
فيصل:مش عارف انا جيت القيتها في العمليات الممرضة قالتلي لما ضربتها السيارة شالتها فوق ولما طاحت طاحت علي حديدة وخشت في كراعها
سراج خبط علي راسه:البنت صغيرة مااتحملش هذا كله
فيصل:ربي يستر
سراج:قلت الامك عاللي صار
فيصل:كلمت عماد خويا ومشى بيجيبها
سراج:تمام
مع طلعت الدكتور وسراج وفيصل جوه يجرو
فيصل:ها دكتور طمنا
الدكتور:لا الحمدلله عمليتها نجحت وحولنا الحديدة من رجلها وتوا كويسة بس لازم تقعد في المستشفى 3ايام تحت الملاحظة
سراج:دكتور لو حالتها مازال ماتحسنت وتبي سفرة برا انا انسفرها توا اهم شيء تقعد بخير
الدكتور:لا اطمنو حالتها كويسة وتوا حنطلعوها للعناية
فيصل:نقدرو انشوفوها
الدكتور:هي مازال تحت تأثير البنج بعد تقعد كويسة حنخليكم اتشوفوها
فيصل:شكرا بارك الله فيك يادكتور
عدى الدكتور وفيصل اضبط سراج وقعد يبكي
سراج:خلاص وسع بالك الدكتور طمنا
فيصل:كان صارلها شيء راه متت روحي معلقة فيهن هنا الاثنين انا اللي مربيهن
سراج;الحمدلله طلعت كويسة كلم خوتك وامك طمنهم
مع جيت ام فيصل وخوته وحكالهم فيصل علي حالتها وطمنها
واليوم هذكي قعد فيصل وسراج وام فيصل مرافقين هما كلهم مع روان ويرجو فيها توعى وماوعتش الا في الليل وكانت مازال تاعبة مالبنج ومالعملية
“”
في فيلا هل سراج تعشو هل سندس وهل سراج مع بعضهم وانسجمو عالاخر كانو متوقعين من سراج ايجي يس سراج كلم امه وطمنها علي روان وقاللها ان اليوم بايت في المستشفى مع فيصل
عند قريب الساعة 12وبعد سهرة سمحة وتعرفو فيها العيلتين وانسجمو عالاخر سندس وامها حبن ام سراج وهي نفس الشيء روحو هل سندس الحوشهم
جد سراج:مشاءلله عليه فرج مازال نفس ماهو زمان نفس بصارته وضحكة ماتغيرش بكل
محمد:اها والله ردلنا ذكريات الشباب كلهن
عفاف:حتى بنته ومراته اكويسات وجوهن سمح
جد سراج:بنته مشاءلله عليها شخصيتها قوية وعاقلة مش زي بنات توا طايشات
محمد:لاحظت من كلامها انها معتمدة علي نفسها وطريقتها تعطيها اكبر من عمرها
عفاف:وفوق هذا كله سمحة ياريته سراج قاعد راه حقها بالك عجباته
محمد:ولدك كان حقها راه كرها في معيشتها غابية فيه انا بعد شفت بنته كبيرة هكي حمدت ربي ان مش قاعد
جد سراج:بس تعرفو شخصيتها عكس شخصية سراج وعكس البنات اللي يعرفهن سراج يبي وحدة هكي زيها
عفاف:صح ولدي وغالي عليا بس اللي زي هذي خسارة فيه مش حيقدر ايحافظ عليها
محمد:والله صدقتي
جد سراج:سراج هذا حالة نادرة انا عجزت ووحلت فيه خلاص معش فيه قدامكم الا اتسايروه واتخلوه ايدير اللي يبيه واكيدة حيجيه يوم وايسيب هذا كله ويندم عاللي داره
محمد:ان شاءلله
”
عند سندس
اول ماخشو للحوش سندس كانت ناعسة بكل وخشت غيرت دبشها ولبست بيجامتها ورقدت
وباتها وامها خشو الدارهم بيرقدو
فرج:وعيني الساعة 6
سعاد:حاظر بس عليش الساعة 6
فرج:عندي طيارة مسافر الطرابلس
سعاد:وعليش شن صاير
فرج:نبي انعدي انبيع قطع الاراضي اللي عندي غادي
سعاد:الستر شن فيه ليش تبي اتبيعهن
فرج:ناقصتني سيولة ولازماتني فلوس بنخش في صفقة جديدة
سعاد:باهي ان شاءلله فيها خير غير انت عارف القطع الاراضي هذينا داسينهن للزمان وكان ضاق الحال
فرج:صدقيني هذا وقت عازتهن وان شاءلله انعوضكن بخير منهن
سعاد:ان شاءلله وانت طيب
فرج;طفيلنا الضي خلينا نرقدو ورقدو
”
جا صباح ثاني يوم سندس ناضت الساعة 8 خذت دوش وصلت الصبح ولبست(بلوزة سودة وعليها استرتش اسود ووشاح عنابي وكاويش نفس لون الوشاح وشنطة بيج)وطلعت
سندس:صباح الخير ماميتو
سعاد:صباح النور سندوسة قمعزي انجيبلك فطور
سندس:وين بابا
سعاد:اليوم سافر الطرابلس
سندس بصدمة:عليش وكيف ايسافر من غير ماايودعني
سعاد:مش عارف قال ببيبيع قطع الاراضي اللي غادي لان خاش في صفقة جديدة
سندس:بس غريبة يمشي من غير ماايسلم عليا
سعاد:مشى بدري بكل ماحبش ايوعيك وبعدين مش مطول يومين قال بس
سندس:باهي يمشي وايجي بسلامة
سعاد:ان شاءلله نحن مش حنقعدو هنا بعد اتروحي مالجامعة نمشو الحوش جدك نقعدو غادي
سندس:باهي تمام
سندس كملت فطورها وطلعت مع السواق للجامعة
”
في الجامعة رويدة في المحاظرة والاستاذ ياخذ في الحظور وطلعت
أنيس:البنت هذي تبي تقتلني
سالم:تي باهي عدي احكيلها معقولة من اول سنة وانت شايل حبها في قلبك وماتبيش تحكي
أنيس:خايف ترفضني
معاذ;صباح الخير من اللي بترفضك عالصبح
أنيس:ماحد
سالم:بلا طروح احكي
انيس:تي فوت ياراجل فكنا مالجو عليش بتشهدر بيا
سالم:لا شهدرة لاشئ هذا معاذ مش غريب
معاذ:فهموني شن فيه
سالم:هذا ياسيدي أنيس من اول سنة وهو معجب برويدة تي معش تمى اعجاب انيس غاوي فيها مكبد عالاخر
معاذ بإستغراب:رويدة اللي تقرا معانا
سالم:تي اها هي مامعنش الا رويدة وحدة
معاذ;وهي اتحبه
سالم:تي لالا هو مازال ماحكالها بكل لكن انيس من حبها متشقلب حاله والفترة هذي هله ساكنيله عالخطبة وهو ميت فيها علي ماهله رودوله بنات مايبيش المهم قتله عدي احكيلها كان قالت باهي تقدملها
أنيس:شن قولك يامعاذ انديرها
معاذ:مش عارف بس مرات راه البنت اتحب واحد اخرى
سالم;انت اكثر واحد عندك بيها دلالة في القسم وبينكم صداقة قوية ومكالمات البنت دايرة علاقة ولا تعرف حد
معاذ:مش عارف ماعمريش فاتحتها في موضوع زي هذا بس رويدة بنت عاقلة وهادية وماأعتقدش عندها في الاجواء هذينا
سالم:ها سمعت خلاص عدي احكيلها توا
معاذ:وعليش مستعجل معقولة بيحكيلها عالصبح
أنيس بحت فيه زين:محاضراتنا ديما في الصبح مانقروش في الليل عشان نحكيلها في الليل
معاذ:مش هكي قصدي امدرعنك دير اللي اتريحك
أنيس:خلاص انا قررت بنحكيلها توا وجا بيمشي معاذ مسكه
معاذ:انيس لو في عقلك لعب رويدة مش مالبنات اللي هكي رويدة بنت محترمة وماعندها في العلاقات والجو لاخر
انيس:وانا البنت انحبها وشاريها ولو ماناوي الحلال مانمشيش نحكيلها
معاذ:معناها تمام واللي فيها خير ايجيبها لكي ربي
أنيس:ان شاءلله ومشى شور رويدة
“”
رويدة كانت مصبية مع مجموعة بنات قدام القاعة
أنيس:رويدة رويدة ممكن كلمة
رويدة بإستغراب:أنا
أنيس:اها انتي نبيك في كلمة
رويدة جاته;نعم تفضل
أنيس:بصراحة مش عارف كيف نحكي ولا منين نبدى
رويدة:لو علي حاجة مش فاهمها عادي نشرحها لكي
أنيس:لالا مش هكي القصة طبعا نحن من سنة اولى ونحن نفس الدفعة وانا من سنة أولى وانا فيه بنت عاجبتني واطور الاعجاب هذا قعد مع الايام والسنين حب خبيته واجد بس معش قدرت أكثر من هكي وانا بصراحة ناوي الحلال يعني كان طلع مافي قلبها حد ومش حاطه حد في بالها بنتقدم دغري وانجيب هلي وبنخطبها رسمي
رويدة:باهي مشاءلله بس مازال مافهمتش تبيني نحكيلها مثلا
أنيس:اها نبي نعرف لو هي ماتبيش حد وهكي ونبيها تعطيني فرصة واكيدة حتحبني
رويدة:ان شاءلله وانت شاب كويس ومشاءلله عليك خلاص دبينها معانا في القسم انا نعرف البنات كلهن وعندي معاهن دلالة قولي من وانا نحكيلها
أنيس طبس راسة;انتي يارويدة
رويدة:اها تمام حنحكيلها ها شنو من انا
أنيس ضحك:بشوية علي روحك كنك انفجعتي
رويدة ارتبكت:لا مش انفجعت نفاجئت بس
انيس:ليش تفاجئتي انا بجد عاجبتيني ومالاخر مكبد فيك وكان مافيش حد في بالك اتفقي مع هلك وحددي يوم وايجوكم هلي فيه
رويدة محروجة ومرتبكة وحالتها حالة:لا شنو هلك وخطبة يعني انت شاب كويس بس انا ماانفكرش في المواضيع هذينا توا
أنيس:يعني انتي في عقلك حد
رويدة مرتبكة;لالا مش هكي بس لالا لالا
انيس:احكي بشوية يارويدة مافهمتش عليك شيئ كنك انتي
رويدة:انا ماعمريش انحطيت في موقف زي هكي اااااسفة بجد انا ماانفكرش في الموضوع هذا وبعدين انا مازال نقرا
أنيس:وانا زيك مازال نقرا وانا قتلك بس خطبة توا وتقعد فترة الخطبة فترة تعارف واكيدة حتحبيني
رويدة:أسفة أنيس الموضوع هذا ماانفكرش فيه توا ومش حاطته في بالي بكل
أنيس:بس بجد انا والله حبيتك ياريت تعطيني فرصة
رويدة;انت شاب كويس وحتلقى احسن مني لاني والله مش حاطة الموضوع هذا في بالي
أنيس:هذا كلام نهائي
رويدة:اها وان شاءلله حتلقى وحدة احسن مني واسفة توا نبي انعدي
أنيس:تمام براحتك
وعدت رويدة من جنبه وهي مرتبكة ومنحرجة مالموقف اللي صار امعاها واول مرة تنحط في موقف هكي قبل لما يعجب بيها حد ايدزلها بنت تحكيلها لكن ماعمرش شاب جا حكالها هكي ودغري قعدت اترن علي رانيا لان عارفه محاضرتها توا بتحكيلها اللي صار قبل مااتخش عالمحاضرة
“”
أنيس جا السالم ومعاذ مزال مصبي معاه
معاذ:ها شن صار معاك
انيس ضحك:شكله هامك الموضوع
معاذ:لا غير عشان حسيتك اتحبها جد نبي نعرف كان وافقت نفرحولك وانصبولك بعد تخطبها
انيس:متأكد تبي تفرحلي
معاذ:اكيدة نفرحلك انت صاحبي واتعز عليا ورويدة صديقتي وانعزها
انيس:اها تمام
سالم:تي قوللنا شن صار معاك بلا ثقالة
أنيس:وافقت وقالتلي نحكو مع بعضنا الفترة هذي عشان انتعرفو وبعدها تقدم وايبحت في معاذ
معاذ انصدم:جديات تحكي
انيس:اها امالا نكذب عليك اهو افرحلي وصبيلي في خطبتي وخبطه علي كتفه
معاذ ابتسم:باهي الف مبروك ان شاءلله لما تخطبها انصبيلك تصباية سمحة واللي تستحقها مني ادلل نحن خوت
أنيس:تسلم عارفك اصلي
سالم:الف الف الف مبرووك والله فرحتلك ربي ايقدملك اللي فيها خير
انيس:ان شاءلله
معاذ:اسمحولي عندي شغل بنمشي وطلع معاذ مالجامعة وهو متضايق ومافهمش ليش هو اضايق وهو معتبر رويدة بس صديقته
“”
سندس مع السواق
سندس:لو سمحت اسرع تأخرت علي محاظرتي
السواق;حاظر وسرع السيارة
وقعد فون السواق ايرن مسكه بيرد طاح منه طبس بياخذه
سندس اتعيط:افطن افطن
وفجأااااة السيارة بوووم لفت خشت في الساس
سندس:لااااااااااا وأخر حاجة سمعتها سيارة الأسعاف
“”
جت سيارة الأسعاف للمستشفى واستقبلوها الممرضين وبيخششوها جوا
“”
سراج:قتلك يانصي انا ماشي لعند الفيلا انغير ادبشي وانجيك
فيصل:تم وقعدو يسمعو في الهرجة
سراج:شن فيه
فيصل بحت من عند الروشن:هذا شكله حادث
سراج:اها باهي انا نازل
فيصل:بننزل معاك انشوف الحادث
سراج:مبردك حادث ياواحد ميت يامتكسر شن بتشوف
فيصل:روان راقدة وامي راقدة ننزل انا مكسد مكسد ونزلو مع بعضهم
”
اول ما وصلت الاسعاف وسعفو سندس كانت معاها شنطتها خذوها معاهم في السيارة عساس يعرفو هويتها وهما في السيارة رن الفون وكانت رانيا
رانيا:دوسة بسرعة المحاضرة بدت
الممرض:معليش صاحبة الرقم دارت حادث واخذينها للمستشفى لو انتي من عيلتها او تعرفي حد من هلها رجاءا كلميهم
رانيا قعدت تبكي وسكرت:حي عليا سندس
رويدة بخوف:كنها سندس
رانيا:دايرة حادث وتوا ساعفينها للمستشفى وقالي كلمي هلها
رويدة:حي كيف انديرو كيف انكلمو اعميمة سعاد
رانيا:حنكلم بابا وهو يصرف
رانيا كلمت باتها وحكتله وهو قاللها حياخذ امها ويمشو الهل سندس ايخبروهم
ورويدة رنت علي رؤوف وجا خذاها هي ورانيا للمستشفى
“”
سراج وفيصل نزلو فيصل قعد ايتفرج وسراج طلع وهو طالع خطمت عليه وحدة تبكي واتعيط
سعاد تبكي:حي عليا بنتي حي عليا دوسة
سمية حاظنتها:ان شاءلله مافيها شيئ ماتتفاولي عالبنت
سراج انتبهلها ولف عليها ولما شافها عرفها
سراج:مش هذي ام الجالطة
سراج ضحك ضحكة خبث ولحقها وخش في جرتهم
السواق اول ماجا للمستشفي كان فاقد الوعي وبعدها وعى وكان عنده كسور في يده وكراعه
اما سندس كانت جايتها ضربة علي راسها وتنزف وكانن ايديها ووجها فيهن خبطات وكانت فاقدة للوعي خشو بيها دغري للعناية وقعدو يفحصو فيها
سراج رد للمستشفى وشافه فيصل
فيصل:كنك رديت
سراج:الحادث اللي توا جا وين شالوه
فيصل:السواق مافيه شيئ شالوه للقسم لاخر ايجبسو فيه وكانت معاه بنت قالو عندها نزيف وخذوها فوق للعناية عليش تسأل انت تعرفهم ولا شنو
سراج ضحك:عز المعرفة ينعن جد ام الصدفة
فيصل:تي من احكي
سراج:البنت هذكي امتاع المطعم
فيصل:قصدك الجالطة
سراج:هي بروحها وجت لعندي هي خلينا انشوفو شن صار فيها
فيصل:هي وروقو شور العناية وقعدو مصبينن من بعيد
كانن صاحباتها وهلهن وامها وخوالها وعمامها كلهم قدام العناية امها مسكينة كانت في حالة وتبكي واتعيط وخلاص وصاحباتها نفس الشيئ
”
بعد ربع ساعة طلعت الممرضة وجوها كلهم
سعاد تبكي:وراسك يابنيتي طمنيني علي بنتي
الممرضة:اهدو اشوية المريضة حالتها كويسة ومش خطيرة وقفنا النزيف
سعاد: يعني بنتي واعية وكويسة
الممرضة:اها بس الدكتورة عطتها منوم مدته ربع ساعة تبيها اتريح لانها كانت خايفة وتبكي
سعاد:الحمدلله
الممرضة:المريضة نزفت واجد وتوا بنركبولها دم بس فصيلة دمها( —O) ومش متوفرة في المستشفى لو فيه حد منكم نفس فصيلتها ايتبرعلها
كلهم قعدو يسألو ومافيش حد نفس الفصيلة
سعاد:هي نفس فصيلة باتها ومافيش حد زيها مالعيلة
خال سندس:لو تعطيني ربع ساعة انجيبلك
الممرضة:نبوه توا
سراج:انا فصيلتي زيها
الممرضة:تقدر اتبرعلها
سراج:اها حنتبرعلها وفيصل كان ايبحت فيه زيين
سعاد:شكرا شكرا ياوليدي في ميزان حسناتك
رانيا ورويدة بحتن في بعضهن:هذا اللي يومتها
“”
خش سراج للدار وكانت سندس راقدة لانها واخذة منوم وكانو ينقلو في الدم من سراج السندس وكان النقل بطيء اشوي
سراج كان ينقل في الدم وايهدرز مع الدكتورة والممرضات اللي جوا
بعد ربع ساعة سندس وعيت
سندس:اه راسي
الممرضة:دكتورة المريضة وعت
سراج مازال ينقللها في دم ولف شور سندس
سندس كانو لافين يدها حاولت ترفعها بتحطها علي راسها وجعتها
سندس:انا وين وشن صار
الدكتورة:الحمدلله علي سلامتك انتي درتي حادث ونجيتي منه وتوا في المستشفى
سندس بخوف:عمو ميلود شن صارله
الدكتورة:الشخص اللي معاك حالته كويسة شوي كسور وبس
سندس تبكي;وين ماما وبابا بنشوفهم
الدكتورة:حنطلع انطمنهم برا انك كويسة وانك حتقعدي اليوم هنا وانتي اتكملي باقي نقل الدم وتطلعي للغرفة لخرى وحتشوفيهم واشكري الشاب اللي قاعد ايتبرعلك بالدم وطلعت الدكتورة بطمنهم
سندس لفت جيهة سراج وبتشكره
سندس لفت بصعوبة وانصدمت لما لقاته سراج
سراج ابتسم:الحمدلله عالسلامة شوفي الدنيا كيف صغيرة تلاقينا من جديد ونقذت حياتك من جديد
سندس مبلمة عيونها وساكتة ومصدومة
سندس:معقولة لحقتني حتى هنا
سراج ضحك:وانا كيف بنعرف انك بديري حادث مازال ماوحيت راه بالصدفة شفتك
سندس:رغم اني نكرهك بس للاسف مظطرة نشكرك لان هذي ثاني مرة تنقذ حياتي
سراج ابتسم ابتسامة خبيثة:ورغم اني نكرهك وانتي تكرهيني الا اني ننقذ في حياتك كل مرة وحاليا دمي يجري في عروقك
سندس بحتت في توبوات الدم وحست بقهرة لان فعلا كانت تكرهة
سندس بقهرة وشعور بكسرة:شكرا?
سراج:كلمة شكرا بروحها ماتكفيش
سندس بنظرة عالجنب:وشن تبيني انديرلك?
سراج بخبث وبصوت واطي:تذكري اول طلب طلبته منك هو هذا تقدري تشكريني بيه
سندس بصدمة:انت واحد حقير
سراج:وانتي وحدة قليلة ادب
سندس بعصبية:خطاني شن تبي منك كل مرة طالع في حياتي
سراج بإبتسامة:نبيك مش حبا فيك لا ابدا بس لان عمره مابنت قالتلي لا الا انا نكرهك
سندس بعصبية:وانا نكرهك اكثر قد مامرو عليا ناس في حقارتك مامرو عليا
سراج:اسمعي احترمي نفسك وبلا طولة السان واللي نبيه فهمتيه انا نقذت حياتك مرتين وهذا دين ولازم اترديه لانك لو مارديتيه برضاك بترديه غصب عنك واكيدة فهمتيني نبي الجواب اليوم في الليل وافضل انك اتوافقي لان زي ماجيتك اليوم نقدر انجيك في اي مكان اخرى انا عارف عنك كل حاجة ونقدر انجيبك وناخذ اللي نبيه غصبن عنك الجواب بنلقاه عندك اليوم واحسنلك اتكون موافقة واكيد رسالتي وصلاتك
سندس تعصبت وقعدت اتعيط واتكر في توبات الدم من يدها:انت انسان تافه حقير وواطي وانجوم السما اقربلك ماللي اتفكر فيه وبابا برا وحنحكيله كل حاجة وهو يصرف امعاك ياتافه
جت الممرضة وقعدت اتهدي فيها وفكت منها توبوات الدم وطلعتها وسراج طلع
سندس حطوها في غرفة اخري في القسم وخلوها تحت الملاحظة لما طلعت لقت امها في حالة وصاحبتها وقعدن يضبطن فيها ويبكن وقعدو معاها كلهم
“”
سراج نزل لوطى ولقى فيصل مقمعز تحت في المستشفى جا قمعز تالاه
فيصل:كيف صار كيف جت منك الحنية شكلك هكي حبيتها
فيصل بحت فيه بنص عين:حبيتها من جدك انا انحب هذي عقلك خضر
فيصل:امالا عليش تبرعتلها بدمك
سراج:هذي الوحيدة اللي عاندتني وتحسابني مانقدر نوصلها انا نكرها بس حناخذ منها اللي نبيه
فيصل:سراج فكنا مالجو وفوت البنت راك اديرلها حاجة وتقعد قصة
سراج:ومن قالك بنديرلها حاجة هي بتعطيني اللي نبيه برضاها وحتشوف
فيصل:البنت اللي شفتها انا مش حطول منها شيء
سراج:اتراهن عليها
فيصل:انا طلعني برا الموضوع ماانراهن لا شئ وحتى انت اسمع نصيحتي وفوتها البنت مش نفسنا خليها في حالها
سراج:ايصير خير وقعد ايفكر
سراج صبى:اسمع انا ماشي للفيلا بندوش وانغير دبشي وانرد
فيصل:تمام
“”
عند سندس
قاعدين معاها كلهم في الدار وكانت حالتها كويسة
خال سندس:رنيتي علي باتها
ام سندس:لالا توا انكلمه توا
عم سندس:سندس توا اكويسة وكلنا جنبها وفرج اكيدة وصل الطرابلس لو كلمتبه مرات مايلقى رحلة اليوم ومرات حتي بكرا مافيش رحلة غير تشغليه وخلاص هو يومين وايروح وتوا نحكوله بعد ايروح
خال سندس:تعرفي معاه حق مافيش داعي تشغليه وسندس كويسة
سعاد:بس خايفته ايتعقد وايقول ليش ماقلتولي عارفينه ماايتحمل فيها شئ
عم سندس:ماعليك انا اللي نحكيله
سعاد:باهي براحتكم كيف ماتبو
سندس ورانيا وامهاتهن كانن جنب سندس وايخرفن معاها وايغيرلها في جو
عالية:رني علي رؤوف خليه ايجينا
رويدة:حاظر
طلعت فونها مع رنت معاذ عليها دارتله مشغول ورنت علي رؤوف ورؤوف قاللهن نص ساعة وانجيكم وقعدت مع صاحباتها
بعد ساعة هكي الكل روحو وقعدت امها معاها في المستشفى وخالها وعمها قاعدين تحت لان ممنوع الرجالة يقعدو
“”
رويدة روحت باطلة وتاعبة الحوشهم دارت مع امها العشاء وبعدها خشت بترقد اذكرت مكالمة معاذ جت بتكلمه لقت فونها طافي شحن حطاته تبيه يشحن عشان اتكلمه غلبها النوم ورقدت
“”
عند الساعة 10
سراج مقمعز مع فيصل لوطى وسارح وفجاة صبى
فيصل:وين ماشي
سراج:ماشي للسيارة بنجيب حاجة وانجي
فيصل:تمام
“”
رقى سراج فوق الغرفة الممرضين واتفق مع واحد منهم ودفعله فلوس وعطاه بالطو وسماعات دكتور عشان يقدر ايخش للقسم براحته بس لما جا للدار وتباوعهن شاف سندس راقدة وامها مقمعزة جنبها
سراج:اوووف كيف بنطلع امها بس وقعد ايفكر
سراج:القيتها
رن علي ام فيصل
ام فيصل:ايوا سراج فيه حاجة
سراج:لالا بس بنقولك حاجة تذكريها البنت اللي غرقت في البحر وتعرفتي علي امها
ام فيصل:اها نذكرها كنها
سراج;البنت اليوم جابوها دايرة حادث و توا كويسة ومعاها امها نبيك اديري الواجب وتمشي اتشوفيهن
ام فيصل:ياناري باهي قولي في اي قسم وتوا نمشيلها
سراج:لا يا سمورة مانبكش تقعدي معاها في الدار خوذيها للكفيتيريا واعزميها علي حاجة
ام فيصل:ياساتر ياسمورة مرة وحدة قولي شن وراك بسرعة
سراج:داير علاقة مع البنت وتبي اتشوفني وامها معش طلعت عدي وزعيها لنا علي ماشفتها
ام فيصل بفرحة:مشاءلله مشاءلله ان شاءلله تعقل واتحب وانشوفك عريس وامك فرحانة بيك
سراج:باهي مغير توا عدي وهي في القسم اللي فوق غرفة رقم( 13)
ام فيصل;خلاص نمشي وانجي دبين روان راقدة
سراج;تمام
وعدت ام فيصل وخشت علي ام سندس و سندس كانت راقدة قاللتها ان ولدها حكالها وان وجعتها وجاية تطمن علي سندس وبعدها قاللتها ننزلو نشربو قهوة لوطى وانخلوها متريحة وام سندس وافقت لانها فعلا كان راسها مصدع وتبي قهوة
“”
سراج شافهن لما نزلن وطبعا استغل الفرصة وجا للدار وخش وسكر وقمعز جنب سندس علي حاشية السرير
سراج قعد ايشوفلها وقعد ايحرك في روس صاوبعه علي شفايفها
سندس نطت وانفجعت لما لقاته سراج
سندس:انت شن جابك هنا
سراج;انا قتلك انجيك في اي مكان
سندس;وين ماما اطلع من هنا
سراج:مامتك مش فاضية تشرب في قهوة وانا وانتي هنا بروحنا
سندس:اطلع برا وخطاني
سراج:مش حنخطاط ولا نطلع من طريقك لين ناخذ اللي نبيه
سندس بعصبية:انجوم السماء اقربلك مني مش حطول مني شعره وحدة
سراج:نقدر انطول اي حاجة وتوا لو نبي
سندس كانت خايفة منه بكل وصبت من سريرها بسرعه رغم الالم والوجع مالحادث ومشت شور الباب ولقاته مقفول والمفتاح مش فيه
سراج يضحك:تبي هذا وطلع المفتاح
سندس:عطيه ليا واطلع بهدوء وبلا فضايح
سراج;وكان ماطلعتش شن بديري مثلا بتضربيني زي يومتها
سندس:اها نضربط وانعيط وانلم عليك الدنيا
سراج:يعني مش خايفة مني
سندس:لا مش خايفة واطلع بلا فضايح
سراج:مش طالع لين اتوافقي علي طلبي وراه انا مافيش بنت عمرها قالتلي لا علي شيء
سندس:احلم مستحيل تقدر تلمس مني شعرة برضاية ولا غصب عني
سراج قرب منها:مااتحدنيش ولا اتعانديني لانك مش قدي ونقدر ناخذ اي حاجة نبيها مافيش حاجة عمرها صعبت عليا
سندس خافت وبصوت عالي:ياماما يادكاترة الحقوني جاي بيتهجم عليا
سراج هجم عليها ومسكها من لاورة وحط يده علي فمها
سراج:يعني بعد هذا كله ومازال مش خايفة
سندس ترعش ومش قادرة اتنفس لان مسكر فمها وخشمها
سراج:اسمعي اللي نبيه نقدر ناخذه غصبن عنك بس انا نبيه برضاك قولي موافقة وانحددو موعد ومافيش حد حيعرف بيني وبينك وياستي لو تبي فلوس حنعطيك اللي تطلبيها
سندس ضرباته بكراعه في المكان الحساس وسراج طبس وقعد ايتالم
سندس وهي اتنفس بقوة وخايفة:احلم انك تاخذ مني حاجة ومشت للباب وقعدت ادق
“”
فيصل بعد نزلت ام سندس وامه للكفتيريا وحقهن شك في الموضوع ورن علي امه وقاللها كيف شافت ام سندس قالتله ان سراج قاللها دغري عرف سراج وين مشى ومشاله
“”
سندس ادق وكان ليل واغلب الغرف اللي جنبهم فاضيات
فيصل جا للغرفة وقعد ايدق
فيصل:سراج عارفك جوا افتح الباب وماادير شيئ للبنت
سندس ادق:افتحلي افتحلي جاي بيتهجم عليا
سراج مسك سندس وسندس قعدت اتعيط:فيصل اطلع منها انت
فيصل:سراج الدكتور شفته راقي هنا ولو لقاك حتقعد مشكلة كبيرة اطلع وفكنا من هالليلة
سراج:هالمرة انقذوك مني بس حنتلاقو مرة اخرى وحتشوفي وفتح الباب وطلع ونزل لوطه وفيصل في جرته
“”
سندس طاحت عالسرير وقعدت تبكي
سندس:ياربي هذا شن يبي مني كيف نصرف والمن نحكي هذا شكله مش خايف من حد
بعدها سندس مسحت ادموعها:انا مش خايفة منها والله اول ماايجي بابا نحكيله عليه وهو حيصرف امعاه عشان سكتت عالمرة اللي فاتت يحسابني ماعندي حد والله انوريه واندمه علي كل حاجة دارها
“”
فيصل:انت واحد مااتحشمش علي وجك شن تحساب روحك كم مرة قتلك فوتها البنت
سراج بعصبية:مش فايتها شن تحساب روحها عشان اتقولي لا انا مافيش بنت عمرها قالتلي لا واللي نبيه كنت بناخذه برضاها لكن والله ناخذه غصبن عنها وانخليها تجري في جرتي زي الكلبة
فيصل:خلاص انت طلبت منها حاجة وطلعت مش زي اللي نعرفوهن البنت محترمة وماعندها في سكتنا
سراج:هذي كذابة تضرب في الشرف مافيش بنت محترمة كلهن زي بعضهن كل وحدة تعطي بطريقة وحدة بفلوس ووحدة تحت مسمى الحب ووحدة بعد توعدها بالزواج كلهن ارخاص وكذابات
فيصل بعصبية وصوت عالي:البنت هذي فوتها وطلعها من راسك خلااااص انت شن تحساب روحك راه الدنيا فيها ناس اخرى مش عايش فيها بروحك
سراج:لا عايش فيها بروحي والحقيرة هذي والله اندمها عاللي داراته فيا انا اتمد يدها عليا اربع مرات توا ايبانلها حندمها عليها وحتشوف
فيصل:جرب قرب منها وانا نحكيها العمي محمد
سراج:احكيها له وحط في عقلك مش خايف من حد وطلع وسيبه“”
فيصل طول الليل وهو ايفكر في سندس وهو عارف صاحبه كويس وعارفه لما ايحط حاجة في راسه حيديرها ومالقش الا حل واحد وقرر ايديره في الصبح
“”
جا صباح ثاني يوم
فيصل كلم ولد خاله دكتور في المستشفى وحكاله القصة وقاله يكتب خروج السندس وايطلعها وومايعطوش بياناتها السراج ولما يسال سراج عليها ايقولوله انها سافرت
“”
في الجامعة معاذ خش للقاعة وقمعز يرجى في الأستاذ جاه انيس وسالم قمعزو جنبه
انبس وسالم:صباح الخير معاذ
معاذ:صباح النور
أنيس:امس حكيت مع رويدة
معاذ لف عليه:نعم
انيس:قتلك امس حكيت مع رويدة عليك بنت اتهبل ولا صوتها
معاذ بعصبية:باهي احترم نفسك مهما كان هذي بنت ناس والمفروض ماتحكي عليها هكي ومش داير روحك بتاخذها كيف تحكي هكي
انيس:اصحابي ونحكيلكم شن فيها قتلكم اتهبل وكويسة
سالم:معاذ معاه حق المفروض ماتحكيش انك حكيت معاها اصلا
انيس:عارف بس انا حكيتلكم لان فيه حاجة حكتلي عليها وقالتلي متحشمة اتقولها
سالم;شنو هذي
معاذ صبى
سالم:وين ماشي
معاذ:بنغير مكاني ماانشوفش من هنا
انيس:اسمع اللي بنقوله وعدي امس حكيتلها قلتلها مانبيش صداقة بينك وبين حد قالتلي انها ماعندهش صداقة الا مع معاذ وماتقدرش اتقوله معش اتكلمني قالتلي قولها له انت
سالم سكت ومعش حكى وقعد ايبحت في معاذ
معاذ:رويدة قالتلك قوله معش ايكلمني
أنيس:اها وبالجو رانا اصحاب وعندي معاك دلاله والبنت لنقني انحبها وانغار عليها فوتها الصداقة اللي بينكم
معاذ غمتله:تم ياصاحبي اعتبر مافيش صداقة بينا بكل وكأني مانعرفهش وطلع مالقاعة ورويدة كانت خاشة
رويدة ابتسمت:صباح الخير معاذ
معاذ شافلها بنظرة كلها حقد وعدى وسيبها من غير ماايرد ولا كلمة
رويدة انصدمت من تصرفه ومافهمت ليش طالع مالقاعة ومسيب المحاضرة وبعدها خش الاستاذ وقمزت تحظر في محاضرتها
“”
سراج جا للمستشفى وفعلا زي ماتوقع فيصل دغري مشى الدارها مالقاها ودغري نزل الفيصل
سراج بعصبية:وين البنت
فيصل ببرود:اي بنت
سراج;ماتستعبطش انت عارفني من نقصد
فيصل:شوفها في دارها
سراج:كان القيتها ماسالتك انت اكيدة عارف
فيصل:وانا شن عرفني من بعد ماجبتك امس من غادي معش رقيت ولا فكرت في الموضوع بالك درولها خروج
سراج:معقولة وحدة دايرة حادث ايطلعوها ثاني يوم
فيصل: اتحق في دكتور هنا انا شن عرفني انا في مكاني هذا ماتحركتش من امس
سراج:باهي كيف بنعرف وين عدت ومن هي
فيصل:مدرعنك شوف روحك كيف بتعرف انا طلعني برا منه موضوعك هذا
سراج;تم يانصي توا نعرف ونسأل وعدى للرسبشن بيسأل
دغري فيصل رن علي ولد خاله وخلاه يتفق مع الرسبشن
سراج جا للرسبشن وكان عليه شاب
سراج:صباح الخير
الشاب:صباح النور بشنو نقدر انساعدك
سراج:بنسأل علي وحدة كانت في الغرفة 13 في قسم الحوادث رقيت توا ومالقيتها
الشاب:اليوم كانت طيارتها وسافرت برا قالو هلها بيطمنو عليها
سراج:اها باهي مانقدرش نعرف اسمها ومن هلها
الشاب:بصفتك من نعطيك المعلومات هذينا
سراج:البنت عجبتني وبنقدملها
الشاب’:اسف جدا مانقدرش هذينا معلومات وممنوع انطلعهن
سراج غمزله وطلع فلوس بيرشيه:هكي هكي اي معلومة انقولك عاجبتني وشباب زي بعضنا
الشاب عقد حواجبه:اسمع ياشاب لم فلوسك وعدي من هنا بهدوء احسن ماانكلم امن المستشفى وتقعد قصة كبيرة بذات انك بترشي موظف في مكان عمله
سراج:بس الموضوع انك بتوفق راسين بالحلال
الشاب:دورها في مكان اخرى لو عاجبتك صح حتعرف اما هنا ممنوع اني نعطي معلومات المرضى
سراج غمتله:تم ومشى
#يتبع
سراج هالمرة حطها في راسه صح زعمك حب ولا انتقام وباهي ليش فيصل دار هكي زعمك غرضه حماية سندس او حاجة اخرى
وباهي رويدة ومعاذ شن حيصير فيهم وليش معاذ اصرف هكي هل هذا هو الحب واذا حب صح كيف حيكتشفه كله حنعرفوه الحلقة الجاية ?
أسفة عالتأخير توا غير كملت الحلقة واسفة لو فيه لخبطة في الاسماء ?
گـتـابـتـي Koka Saleh