منحرف وأحببته

#مـنـحـرف_وأحـبـبـتـه
الـحـلـقـة (21)
گـتـابـتـي #Koka_Saleh
“”””””””””””””””””””””””””“”””””””””
مشن الايام وجا يوم الفرح?
هل رويدة وهل حنين اتفقو ان ايكون الفرح يوم واحد مشترك مع بعضهم في القاعة وفي الحوش ماكان عندهم شي ولاعازمين حد المهم رؤوف كان متضايق وقلبه محروق ومش عارف شن ايدير عشان لقى روحه مظلوم ومحطوط في أمر واقع كان اليوم فرحه وهو حاس ان يوم موته قاعد في داره وماطلعش منها بكل وايشوف للدار ومش مصدق ان بتجمعه بوحدة اخرى غير رانيا كان طالق لحيته والحزن معبي عيونه وقلبه لاجاب بدلة عرسه ولاكان ناوي يلبس اصلا
عالساعة 1الظهر
روح عصام للحوش وخش ولقى باته قاعد في الصالة
بات رريدة:هاقولي شريت البدلة وشلتها الشقة سعيد
عصام:اها وكلمت اصحاب رؤوف عشان في العشية ايجو غادي ايدروله جو
بات رويدة:باهي خش عليه واحكي معاه راه مالصبح مسكر عليه الدار وقال لايبي ايحلق ولا يبي يلبس بيمشي للقاعة هكي شن ايقولو علينا الناس
عصام:مااتفكرش ياباتي توا نحكي معاه وخش شور دار رؤوف ودق
رؤوف:قلتلكم فوتوني وقت المشية توا نطلع
عصام:انا عصام افتح نبيك
رؤوف:شن تبي
عصام:نبي نحكي معاك
رؤوف صبى وفتح الباب وخش قمعز وعصام خش وراه وقمعز
عصام:تي كنك قاعد ومسكر علي روحك راك عريس اليوم
رؤوف شافله وبهزوة; هه عريس قول تعيس
عصام:وعليش تعيس مش هذي اللي القيناك قاعد معاها وكانت في بينكم علاقة يعني تبيها
رؤوف:اي نبيها ياراجل والله مانبيها والله كذبت عليكم وانتو كلكم صدقتوها
عصام:كيف تكذب مافيش بنت ترضى النفسها اتشوه سمعتها عشان راجل
رؤوف:هذي عشان توصل للي تبيه واهي وصلاته وللأسف مافيش حد وقف معايا
عصام:وافرض انها تكذب بس قول نحن كيف بنصبو معاك بعد اللي شفناه ياراجل القيناك اتبوس فيها شن معناها هذي
رؤوف:هي قربت مني وضعفت ومش عارف كيف ضعفت
عصام:وضعفك معناها ان فيه حاجة تجاها الا لو هذا راك ماضعفتش
رؤوف بعصبية:تي والله ماانحبها والله مانبيها نكرهها للموت كان انحقها حنقتلها انا متأكد
عصام:باهي وافرض مااتحبهش بس خلاص اللي صار صار وتوا هي مراتك واليوم بتجوزها يبقى لازم اتقبل الحاجة هذي واتاقلم معاها وكان علي رانيا حتى لو مااجوزتش حنين وحتي لو مااتحبش حنين مستحيل اتردلك بعد اللي صار وبعد اللي درته الهلها وحشمتهم قدام الناس بعد جيتك سكران عشان هكي اسمع نصيحة خيك وابدى حياتك طبيعي مع حنين ولو مااتحبهش حتحبها مع الوقت
رؤوف:كيف بنحبها وقلبي مع غيرها تي انا روحي في في رانيا
عصام:اي حب واي طروح تي اهو انا قدامك خطبت بسمة بلا حب ولا شي واهو توا نبيها ونرجى في اللحظة اللي اتكمل قرايتها ونجوزو
رؤوف معش رد عليه لان حس ان كلامه مع عصام عالفاضي وهو اصلا معتبر ان الحب مش مهم
عصام:سكوتك ايدل انك اقتنعت بكلامي
رؤوف:اها اقتنعت
عصام:معناها توا عدي دوش وهي نمشو الشقة سعيد شلت بدلتك وكلمت الحلاق وأصحابك ايجو غادي
رؤوف:باهي لكن عطيني تليفونك بندير اتصال قبل عشان تليفون كسرته من يوم القصة اللي صارت
عصام مدله الفون:دير اتصالك ودوش والحقني
رؤوف:تمام باهي
طلع عصام ورؤوف مسك الفون وكتب رقم رنا لان كان حافظه في راسه هو ورقم أمها رن عليها مرتين ماردتش وهو كان لازم وبأي طريقة يوصل في رانيا ماكنش مقرر شن بيحكي بس كان خاطره تسمعه مرة وحدة حتى لو كانت أخر مكالمة بينهم دز الرنا رسالة مكتوب فيها(انا رؤوف حلفتك بربك اتوصليني في رانيا دقيتين بنحكيلها كلام مهم)رنا ماعرفتش شن ادير وهي عارفة ان اختها ماتبيش تسمع حتى اسمه ماكانش قدامها حل الا انها تقفل فونها بعد ماردتش عالرسالة رن عليها لقاها مقفل كان بيحكي مع رانيا ضروري مالقش قدامه حل الا ان ايرن علي رقم امها وفعلا كتب الرقم ورن وسمية ردت
سمية::الو
رؤوف:ايوا عمتي سمية شن اخبارك
سمية:الحمدلله بخير من معاي
رؤوف:انا رؤوف ونبي
سمية بعصبية:انت عندك وجه اترن بعد اللي درته في رانيا وبعد ماحشمتنا قدام الناس انت مااتحشمش علي وجك
رؤوف:عطيني فرصة انفهمك ياعمتي والله ظالميني والله فاهميني غلط
سمية بعصبية:اي فاهمينك غلط واي ظلم اللي درته باين وكلنا عارفينك وانا مانبيش لا انلومك لا انعاتبك واصلا ماعنديش حق اندير هكي لكن انقولك كلمة وحدة بعد عن رانيا ومعش تطلع في طريقها ولا اترن عليها ولا اتكلمها انت راجل اليوم فرحك وانا بنتي الف من ايتمناها وهذا حد النصيب وعشان انا نحترم في امك وهلك توا حكيتلك هكي بس مرة اخرى اترن عليا ولا علي رانيا او اتعرضلها حنخللي التفاهم ايكون مع باتها واعمامها وهما يصرفو معاك هذا انذار لكي وياريت تبعد علي طريقنا معش بنعرفوك ولا تعرفنا من يوم وغادي ورقمي ورقم رانيا احسنلك تنساهن وسكرت في وجه من غير ماتعطيه اي فرصة ايدافع عن نفسه بعد سكرت رؤوف معش قدر ايرن عليها وبعدها قعد يمسح في المكالمات وهو يمسح فيهن جت رسالة من رقم رؤوف حس ان الرقم مار عليه وجاه فضول يفتح الرسالة وفتحها وكان مكتوب فيها(طمني علي رؤوف مازال حابس روحه في الدار وراس عصام حاول باي طريقة اطلعه راه خايفة ايدير في روحه شي او ماايجيش للقاعة وكل تعبنا يمشي عالفاضي)رؤوف معش فهم شيئ وبذات ان الرقم مافيش له اي مكالمات او رسائل علي فون عصام يعني شكلهن ممسوحات معش عرف كيف يصرف شك او تاكد ان فيه خطة من وراه بس معش عرف مع من وكيف رن علي فون رويدة وقاللها اتجيه في الدار وجاته رويدة وخشت عليه
رويدة قالبة وجها عليه:ها كنك شن تبي
رؤوف:عطيني تليفونك
رويدة:كان بترن علي رانيا مااتعبش روحك سكرت رقمها بكل ومعش تبي منك اي اتصال
رؤوف بعصبية:مانبيش رانيا نبي انشوف رقم افتحي الخارب ومديه ليا
رويدة خافت منه لان باين عليه معصب بكل وفتحت فونها ومداته له رؤوف كتب الرقم اللي داز الرسالة في الكاشف عند رويدة بس طلع مسجل عندها من دون كاشف طلعت مسجلته حنين وفي لحظة اذكر كيف لما خشو عليهم هله فجأة وان شكله حد حاكيلهم وكيف عصام هو الي قال انها متضايقة من رؤوف اذكر ان عصام كان واقف مع حنين ومافكرش لحظة يوقف مع رؤوف واخر شيئ كلامه امبدري
رؤوف:معقولة انا غبي ومغفل للدرجة هذي
رويدة:كنك شن صار
رؤوف صبى:انا توا طالع نص ساعة وانجي مااتخليش حد يفطنلي اني طالع بذات عصام
رويدة:كنك شن ساير
رؤوف:كان خوك واتعزيني صبي معايا في هذي بس وحنثبتلك توا كيف اني بريئ
رويدة:بريئ وكيف بتثبتها ان شاءلله
رؤوف:انتي مااتقولي الحد اني طلعت وحتشوفي بس نبي تليفونك ناخذة معايا نص ساعة وانجي
رويدة:ماشي اهو خوذه
خذا رؤوف فون رويدة وطلع من غير ماحد يفطنله ركب في سيارته وطلع وهو في الطريق مسك فون رويدة ورن علي حنين
حنين ردت:دودي باهي اللي رنيتي عليا
رؤوف:انا رؤوف مش رويدة
حنين مصدومة:خير شن فيه
رؤوف:ان شاءلله خير بس توا بنشوفك ضروري انتي في حوشكم
حنين:كيف اتشوفني وعليش
رؤوف:انتي ناسية اني قاري فاتحتك وتوا راجلك يعني انشوفك امتى مانبي
حنين فرحت:يعني انت توا اقتنعت انكون مراتك
رؤوف:خلاص هذا اللي صار ولازم نقتنع المهم انا بنحكي معاك كلام ضروري قبل الليل عشان انكونو متفاهمين علي كل حاجة
حنين:باهي انا في الكوافيرة توا كيف بنشوفك
رؤوف:وصفيلي المكان وانجيك انزليلي عالسريع نحكو ومش حناخذ منك واجد
حنين:ماشي تمام ووصفتله المكان بعد حوالي 5دقايق رؤوف كان عندها ورن عليها عشان تنزله ونزلت وركبت معاه في السيارة
حنين:خير رؤوف شن اخبارك
رؤوف:بخير الحمدلله شن اخبارك انتي
حنين:شوفت عينك حاليا مافيش اسعد مني في الدنيا
رؤوف:للدرجة هذي اتحبيني
حنين:وأكثر من هكي
رؤوف:وحبك هذا هو اللي خلاك تتفقي مع عصام عشان ايشوفونا مع بعضنا
حنين انصدمت:انت شن تحكي
رؤوف:مااتحاوليش اتخبي عصام حكالي كل حاجة اليوم
حنين بصدمة:عصام اكيدة يكذب
رؤوف:عصام مايكذبش عشان كان بيوصلي قديش انتي اتحبيني عشان انا كنت حابس روحي وبصراحة ماكنتش عابي انجي للفرح بكل بس بعد كلام عصام تغيرن فيا حاجات واجد حسيت بحبك الكبير ليا وانك متخليه علي كل حاجة اهم شيئ اتكوني معايا
حنين دموعها نزلو:والله لاني انحبك درت هكي ماكنتش متحملة فكرة اتكون الغيري
رؤوف ابتسم:واهو قعدت لكي واليوم فرحنا بس نبي منك تحكيلي اللي درتيه صح انا سمعت من عصام بس حاب نسمع منك
حنين:شن بتسمع
رؤوف:كل حاجة درتيها عشان اتحبيني
حنين:قعدت تحكيله من يوم بيان رويدة واللي حكا الها عصام لعند يوم القصة اللي صارت ورؤوف كان يسمع فيها بكل روح رياضية ومتقبل كلامها كله ومبتسم
حنين:خلاص هذا كل اللي صار حكيته لكي اكيدة زعلت مني
رؤوف:لو انا زاعل منك ماكنتيش شفتيني قدامك راه خذيت موقف من اول ماحكالي عصام بس أنا مادرتش هكي وجيت نسمع منك بزيادة عشان انتأكد من حبك
حنين:وتأكدت
رؤوف:أها تأكدت
حنين:يعني بتعطيني فرصة عشان انخليك اتحبني
رؤوف:اكيدة حنعطيك وتوا انزلي عشان اتكملي شغلك مع الكوافيرة
حنين:بتجي للقاعة في الليل
رؤوف:بنمشي دغري عالشقة اللي بنلبس فيها وانجهز روحي وفي الليل انجي للقاعة
حنين ابتسمت:تمام ونزلت
رؤوف ولع سيارته ومشى دغري الحوشهم وخش واول ماخش لقى باته مقمعز في الجنان
بات رويده:تي وين كنت عصام ايدور فيك عشان تمشو الشقة سعيد مع بعضكم
رؤوف;كنت انطلع في الحقيقة
بات رويدة:اي حقيقة في شنو تحكي انت
مع طلعت عصام
عصام:تي انا اندق عاالدار نحسابك ادوش وانت كاين برا وبعدين معقولة حتى دوش مادرت تي هيا ياراجل تاخرنا الحلاق اشوي ويوصل للشقة
رؤوف:وعليش مستعجل بشويش
عصام:لازم نستعجلو بايخة انتاخرو عالرجالة وبعدين لازم نمشو للقاعة في الموعد
رؤوف بعصبية:عليش درت في خوك هكي شن درتلك انا عليش اتفقت معاها عليا
عصام:انت كنك تحكي هكي طرشقت ولا شنو
بات رويدة:بسم الله كنك يارؤوف خوك شن دارلك هذا كله عشان قالك بسرعة
رؤوف:خويا ياما دارلي خوي حرمني من حلم حياتي بس اللي قهرتني مش عارفة ليش دار هكي ليش ضرني وانا عمري ماضريته
عصام:تي هيا خش دوش وفكنا مالدوة الزايدة تأخرنا
رؤوف بصوت عالي وعصبية:مش خاش لين كلهم يعرفو حقيقتك
بات رويدة بعصبية:اي حقيقة انت متعاطي حاجة يافرخ
ام رويدة ورويدة بعد سمعن الصوت علا طلعن مفجوعات بيشوفن شن صاير
رؤوف:ايوا تعالو كلكم عشان اتشوفو حقيقة عصام
عصام بعصبية:انت شكلك تبي ترباية من اول وجديد
رؤوف:توا انشوفو من اللي يبي ترباية من جديد وطلع فون عصام من جيبه
رؤوف:هذا تليفونه خذيته بندير منه مكالمة وبالصدفة وكانه ربي بيوعيني جت رسالة من رقم ومكتوب فيها(طمني علي رؤوف مازال حابس روحه في الدار وراس عصام حاول باي طريقة اطلعه راه خايفة ايدير
في روحه شي او ماايجيش للقاعة وكل تعبنا يمشي عالفاضي)ولما شفت الرقم القيته رقم حرمنا المصون حنين يعني هي والاخ هذا متفقين عليا وكل اللي صار كانت لعبة منهم
عصام بعصبية:بلاش كذب وتخيلات فاضية انا عليش بنتفق معاها كل القصة انها اترن تطمن عليك مني
رؤوف بعصبية:وشن قصدها بتعبنا يمشي عالفاضي
عصام:انا مش عارف علي اي تعب تحكي ممكن تحكي علي حبها لكي
رؤوف ضحك:ياسلام طول عمرك تعرف اطلع روحك من اي قصة
بات رويدة:رؤوف انت شكلك طرشقت وتتهم في خوك الكبير في كلام فاضي شن فيها لو حنين دزت رسالة العصام بتطمن عليك في الاخير هي بنت خاله راه
رؤوف:انا مادخلنيش اتكلمه تنحرق هي وياه
عصام بعصبية وصوت عالي:تعرف تحترم نفسك ولا انربيك من جديد
رؤوف:قتلك انت اللي تبي ترباية من جديد عصام هجم علي رؤوف ورؤوف دفه وباتهم جا بينهم وبعدهم عن بعضهم
بات رويدة بعصبية:معقولة معش اتحشمو تضاربو قدامي
عصام بعصبية:مااتشوفيش فيه ياباتي كيف مش محترمني انا خوه الكبير المفروض مش هكي كلامه معايا هذا يبي ترباية من اول وجديد
رؤوف طلع فون رويدة وبعصبية:بعد تسمعو التسجيل هذا حنعرفو من يبي ترباية من اول وجديد وولع التسجيل وكان فيه صوت حنين وهي تحكيله في القصة كلها وكيف اتفقت مع عصام علي رؤوف
الكل انصدمو مالكلام اما عصام كان مصبي ووجه تغير ومعش عرف يصرف بعد كل الحقيقة بانت
بات رويدة بعصبية:معقولة ادير في خوك هذا كله
عصام بعصبية;هذي وحدة كذابة انا مااتفقت معاها علي شيئ اتبلى عليا
بات رويدة:عليش بتبلى عليك البنت ماعندهش مصلحة وبعدين لما اتفكر انت اللي جيت قلتلنا رؤوف مع حنين في الدار وانت اللي كنت ادافع عليها واتقول انها قايلتلك رؤوف ايضايق فيها وانت اللي قعدت كل ماتلقاني اتقولي ضروري مارؤوف يجوز حنين مرات تقعد صايرة بينهم حاجة كبيرة
ام رويدة تبكي:معقولة ياعصام انت يطلع منك هذا كله باهي ليش
رويدة تبكي:حرام عليك رؤوف شن دارلك عشان اديرله هذا كله رؤوف طول عمره يحترم وايقدر فيك ليش هكي
عصام بعصبية:عشان كلكم اتحبوه اكثر مني عشان شايفينه الابن المثالي والطالب المثالي عشان كلكم فرحانين وترجو في اللحظة اللي بيتخرج فيها ويقعد دكتور مع اني تخرجت قبله وقعدت محامي بس ماحد فرحلي زي مافارحيله هو ماتذكروش العشاء الكبير اللي درتوه عشان رؤوف خش كلية طب مش عارفين كيف باتي ديما يحكي عليه قدام اصحابه وكأنه اولده الوحيد وانتي ياامي مش شايفة كيف اتحبيه واتعاملي فيه واتربحيله وتدعيله اكثر مني وماتشوفيش في روحك كم مرة في الليل اتخشي علي داره عشان اتغطيه وانا ولا مرة خشيتلي وانتي يارويدة مش عارفة كيف اتعاملي فيه كأنه خوك الوحيد وطول وقتك معاه حتى الجامعة مااتحبيش تمشي ولا اتجي الا معاه يوم اللي يقعد رؤوف مش فاضي اتغيبي حتي بعد انقولك انشيلك انا ماتبيش حتى لما قال بنجوز وماعندش حوش باتي قال في خلال 3شهور اتكون شقته واتية وانا ليا كم سنة نبني عمره ماباتي قالي تبي مساعدة ياعصام كل تفكيركم في رؤوف وكل حبكم له الفرق بينا واضح لين كرهتوني فيه كل حاجة نبيها وناقصتني كانت عند رؤوف وبزيادة حتى البنت الوحيدة اللي حبيتها حباته هو ليش شن فيه بزيادة عني بعد فكرت عرفت اني مستحيل نقدر انخلي هلي يكرهوك بس نقدر انخلي البنت اللي اتحبه تكرهه ونقدر انشوه صورته قدامكم والقيت حنين واتية قدامي تبي بس من ايوجهها وفعلا اللي خططتله كله صار وكيف مانبي بس الغبية خربت كل حاجة باعترافها لكي غبية ماكانش لازم نوثق فيها
بات رويدة بصدمة:معقولة شايل في قلبك كل هالكره وتجاه من تجاه خوك
ام رويدة:نحن عمرنا مافرقنا بينكم منين جايب كل هالكلام
رؤوف:عمري ماجرحتك بكلمة ليش تكسر بخاطري واتضرني هكي ليش بعدتني عالانسانة اللي اخترتها ليش خليتها تكرهني
عصام بحقد:عشان عمري ماقدرت انتخليها لكي طول عمري نحلم بيها ماقدرتش نعتبرها زوجة خويا ماعرفتش انحطها في مكانة الا انها حبيبتي وزوجتي كان لازم وباي طريقة انبعدها عنك لانها كان جت للحوش هنا حتصير كارثة عشان رغم كل السنين اللي فاتن ماقدرتش ننساها ولا انحب غيرها مبالك نقعد كل يوم انشوفها قدامي تي انا كل يوم قبل مانرقد انفكر فيها وكل احلامي هي فيهن كيف بنتخيلها معاك وفي حظنك تي مستعد نقتلك ولا تاخذها تي هذي حب حياتي
رؤوف عصب وهجم عليه وقعدو يضاربو باتهم حاول ايبعدهم عن بعضهم معش قدر وام رويدة ورويدة يبكن وايعيطن وهما كانو يضاربو زي الوحوش وكأنهم مش خوت كأنهم اعداء ويرجو في اللحظة هذي من زمان قعدو يضاربو كان فيه طاولة في الجنان وعليها فواكه وجنبهن موس عصام كر الموس وهجم علي رؤوف بيضربه بيه بس رؤوف اضربه علي يده لين طاح منه الموس كان باتهم ايحاول ايبعدهم بس كانو اقوى منه عصام ضرب رؤوف بوكس علي خشمه لين طاح وهجم عليه وقعد يخنق فيه رؤوف كان روحه تبي تطلع وكان يضرب في عصام بإيديه ورويدة وامها وباتها كانو ايحاولو ايفكو رؤوف من عصام ماقدروش رؤوف في اللحظات الاخيرة وفطن للموس جنبه كره لان كان بينقذ روحه وخلاص وفي لحظة ضرب بيه عصام بس الضربة كانت في القلب وعصام طاح الكل انصدمو حتى رؤوف انصدم ان دار هكي قعدن رويدة وامها ايعيطن وبات رويدة مفجوع ماللقطة وقعد ايحاول ايشيل عصام عشان يسعفه بس ماقدرش عليه
بات رويدة بعصبية:شيل معايا خوك انلحقو بيه عالمستشفى وشال رؤوف عصام مع باته وحطوه في السيارة وطلعو بيه عالمستشفى واول ماجابوه خشو بيه للعمليات دغري عشان الضربة كانت في القلب وطبعا لان حالة طعن بالموس فلازم المستشفى اتبلغ الشرطة وفعلا الشرطة جت وبدت في استجواب هله ورؤوف دغري اعترف ان هو اللي دار هكي وباته شهد بنفس كلامه وخذو رؤوف للحبس عمام رويدة سمعو الموضوع والرجالة جو للمستشفى والصبايا مشن العالية في الحوش اللي كان حالتها حالة وتبكي وزادت اخرى لما سمعت بحبس رؤوف وانقلب اليوم من فرح الحزن ووصل الخبر الهل حنين ووقفو كل حاجة ومشو جابو حنين مالكوافير واول ماسمعت اللي صار دغري عرفت وفهمت ان رؤوف ضحك عليها وكان يبي يفهم القصة وان هي سبب كل اللي صار حبست روحها في دارها وكملتها بكى
“”
عند رانيا طبعا ماسمعت شي ماللي صار وكانت تحساب اليوم الفرح كانت مكتئبة وكملتها بكى وخلاص
كانت معاها سندس مالصبح عندها اول ماطلعت من محاضرتها جتها وقعدت معاها ماسيبتهش بكل قعدت تحكيلها واجد واتحاول اتهديها وتقنعها ان نصيب بس رانيا كانت منهارة وادموعها مانشفوش بكل
“”
سراج وعى في العشية وكان عارف ان سندس عندها محاضرات كل يوم ماعادا يوم السبت وكان كل مايوعى يفتح باب دارها يلقاها مقيلة اول ماوعى جا للدار مالقهش والسرير مضموم دورها في الحوش كله مالقهش مشى الفيلة هله عساس ايشوفها غادي بس من دون مايسأل او ايبين الامه ان مش عارف وينها ودار روحه بيسلم علي امه وماسألهش علي سندس بكل ولا هي حكتله عليها وروح للحوش وقعد يحرق في دمه ومش عارفها وين فكر ايرن علي هلها وفرض ان مرات اتكون مش عندهم شن بيكون منظره قدامهم وهو مش عارفها وين رن علي فونها لقاها مقفل طلع بيشوف السواق متاعها مالقش قاعد ومافيش حد ماللي عندهم عنده رقمه قعد يحرق ومعصب عشان مش عارفها وين ماشية وقعد في الحوش يرجى فيها اتروح
“”
عالساعة 10 في الليل
سندس:رنوشة اهو العشاء نوضي انتعشو مع بعضنا
رانيا:الساعة كم توا
سندس:الساعة 10
رانيا تبكي:اكيدة خش للقاعة توا وبياخذها صح ياما حلمنا باللحظة هذي مع بعضنا
سندس:ماتقعديش اتفكري في الكلام هذا حتتعبي والله رانيا تبكي:عارفة والله بس مش بيدي ماقدرتش ننسى ايامي معاه ولا كلامه ليا مازال كل كلمة منه نسمع فيها في وذني مش مستوعبة فكرة ان بيقعد الغيري
سندس:لازم تستوعبي هذا امر واقع وانفرض عليك وبعدين هو اللي باع مش انتي المفروض معش اتفكري فيه بكل
رانيا تبكي:حاولت بس ماقدرتش حبي له اكبر من النسيان وقعدت تبكي سندس حظنتها وقعدت اتهدي فيها
رانيا تبكي:دوسة نطلب منك طلب واديريه
سندس:اكيدة عيوني لكي
رانيا:رني علي رويدة وأسأليها خذاها ولا مازال وادموعها وهي تحكي كانن ينزلن علي خدودها زي المطر
سندس وجعتها:حاظر
طلعت فونها من شنطتها لقاته طافي شحن حطاته في الشحن وولعاته ورنت علي رويدة وماردتش
سندس:اكيدة لاهية ومش فاضية
رانيا تبكي:رني مرة اخرى كان ماردتش خلاص
سندس:حاظر ورنت اخرى علي رويدة بس هالمرة رويدة ردت
سندس:ايوا دودي شن اخبارك
رويدة:كويسة
سندس:دودي بنسالك خوك الحقير خش خذا الحيوانة حنين ولا مازال
رويدة تبكي:صارت قصة طويلة وماصارش مالفرح
رانيا بخوف:شن فيه دودي شن صاير رؤوف صارتله حاجة
رويدة;رؤوف مافيه شيئ عصام في المستشفى وحالته خطيرة
سندس:لاباس عليه شن فيه كنه
رويدة تبكي:كله مالكلبة حنين طلعت مدايرة خطة بس توا مش فاضية نحكي شيئ حوشنا مليان وكلنا خايفين ايصير العصام حاجة بعد يقعد الجو كويس انكلمكن ونحكيلكن كل حاجة بس ادعن ان عصام اينوض بخير
رانيا وسندس:ان شاءلله يارب
سندس:خلاص توا سكري وبكرا حنرن نطمن عليه وان شاءلله يقعد اكويس
رويدة:ان شاءلله وسكرت
رانيا تبكي:شفتي شكله رؤوف طلع مظلوم وحنين ورا القصة بس هو ليش كان ايبوس فيها
سندس:رنوشة بشوية علي روحك بكرا حنفهمو كل حاجة وحتى لو كان مظلوم لازم تاخذي منه موقف مش اتسامحيه هكي وخلاص
رانيا:ومن قالك بنسامحه انا لازم نعرف كل حاجة ولو عنده يد في الموضوع او عنده اي علاقة بيها من بعيد او قريب مستحيل انكون له حتى لو تعذبت من حبه عمري كله بس انا لازم نعرف شن الخطة وشن صاير بزبط
سندس:شكله الموضوع كبير ان شاءلله بكرا يقعد عصام كويس ونفهمو كل حاجة من دودي
رانيا:ان شاءلله
مع رنت فون سندس وكان سراج
سندس ردت:ايوا سراج
سراج:وين قاعدة يامدام
سندس:قاعدة عند رانيا
سراج بعصبية:اي رانيا لعند توا
سندس:رانيا صاحبتي انت كنك
سراج بعصبية:انا اللي كني بحتي الروحك انتي فيه وحدة محترمة قاعدة برا حوشها لعند توا
سندس:انا مش قاعدة نلعب وبعدين الكلام هذا ماينحكش عالفون حنرن علي عمو عدنان توا وانتفاهمو في الحوش
سراج بعصبية:انتي مطرشقة بتروحي مع سواق في نص الليل
سندس:اي نص ليل توا الساعة 10 وبعدين هذا من عمر بابا
سراج:لا باتك لا جدك وتي روحك اشوي وانكون عندك
سندس:بس انا مازال مانبيش انروح توا رنوشة تاعبة وبنقعد معاها
سراج بعصبية وصوت عالي:قتلك وتي روحك وبنجيك وسكر في وجها
سندس معصبة;ريت التافه الحقير ايهزب وايسكر في وجي
رانيا:حي عليا شكلي درتلك مشكلة
سندس معصبة:لا مشكلة لا شيئ نعرف كيف انوقفه عند حده
رانيا:بس انتي شكلك مش قايلتيله انك جايتيني
سندس:وعليش بنقوله عساس انا اصلا انحق فيه
رانيا:مهما كان في الاخير اسمه راجلك يعني اقل حق عنده ان يعرف وين مراته مش مالصبح طالعة ومايندريش عليك وين
سندس:اي راجل يارانيا انتي عارفة ان زواجنا هكي وخلاص بنرضو هلنا مش اكثر الا نحن نكرهو بعضنا وكل واحد فينا يرجى في السنة تكمل بفارغ الصبر
رانيا;مهما كان بس اسمكم متجوزين افرضي سألوه هله عليك وهو مايندريش عليك وين شن موقفه قدامهم
سندس;خلاص فكيني منه هالبارد خليني نلبس وشاحي علي ماجا صبت وقعدت تلبس في وشاحها هي كملت وسراج رن وقاللها تطلع
سندس سلمت علي رانيا:ياقلبي سامحيني سيبتك بروحك
رانيا:اي سيبتيني بروحي مالصبح وانتي معايا مش عارفة لولاكي شن درت انتي اللي سامحيني سببتلك مشكلة
سندس ضحكت:مافيش مشكلة نعرف انسكته المهم توا تريحي وارقدي ومااتفكري في شيئ وبكرا حنعرفو اللي صاير
رانيا:حاظر
طلعت سندس السراج وركبت ولاحظت عليه العصبية اول ماركبت سندس طلع بالسيارة بسرعة غريبة وعلا المسجل عالآخر عشان سندس ماتحكيش شيئ وصلو للحوش ونزلو خشت سندس للدار وسكرت سراج خش وراها وفتح الباب بالقوة لين خبط
سندس بعصبية:بالشوية كسرت الباب
سراج بعصبية:انا حر انكسر الباب وانكسر حتى راسك
سندس بعصبية:لا هذي بعيدة عليك احلم اديرها
سراج بعصبية وصوت عالي:لا انديرها بعد مراتي تطلع مالصبح لعند نص الليل وانا مش عارف وين ماشية
سندس بهزوة:مراتك اي مراتك هذي راه نحن متجوزين جواز كذب مااتصدقش الدور اللي انمثلو فيه قدام هلي وهلك
سراج بعصبية:تمثيل مش تمثيل اسمك مراتي وشايلة اسمي ولما تقعدي ماشية علي حل اشعرك ومش محترمه ومش امعبرتني ولا معبره وحودي انتكلم
سندس بعصبية:احترم نفسك واعرف علي من اتكلم انا انا محترمة وغصبن عنك وبعدين لما بتلعب دور الزوج اللي اتهمه زوجته اقل شيئ خلينا عايشين حياه طبيعية قبل تقدر اتقول امتى اخر مرة حكينا فيها مع بعضنا او حتى شفنا بعضنا انت انسان مستهتر مكمل نهارك نوم وفي الليل سهر وشرب وبنات هذي حياتك توا قول من اللي مش محترم اقل شيئ انا طالعة وماشية الصاحبتي لان عندها ضرف ونفسيتها تاعبة ومالصبح حكيت العميمة اني بنمشيلها لو سألتها كانت قالتلك انا هلي مربيين ونعرف في شنو اندير اكويس الدور والباقي علي حظرتك صايع افندي ولما اتجي بتحكي عالاحترام بحت الروحك قبل وبعدها حتسكت عشان اخر واحد تحكي عليه انت
سراج بعصبية:تعرفي انك قليلة ادب وكل يوم انزيد نكرهك عاليوم اللي قبله ولو مش محترم باتك كنت قطعتلك السانك توا وجا بيطلع وبعدها لف عليها
سراج:حقيقة اني راجلك لازم اتقبليها لين تكمل السنة وغصبن عنك بتحترميني وبتحترمي وجودي وغصبن عنك بنعرف تحركاتك كلهن وين ماشية ومن وين جاية عاجبك باهي مش عاجبك حنقول الباتك انك مش محترمتيني وتطلع مالصبح مااتروحيش الا في الليل وهذا كله من دون اذني ومن دون علمي وطلع وخبط الباب وراه
سندس قمعزت عالسرير وهي مصدومة من سراج اللي اول مرة اتحسه معصب بجد ويحكي في دوة عاقلة او ـول مرة اتحس ان راجلها وانها اتهمه
أما سراج طلع وهو معصب بكل ومشى شور الشقة عشان ايغير جوه خش وقمعز ولقى فيصل واصحابه جوا ولقى بنات وكانن طرووف بكل حول ايهيج معاهن بس كاين معصب الدرجة مش عادية ولا البنات ولا اصحابه غيروله جوه سيبهم وقعد مقمعز بروحه ويشرب
فيصل جاه وخذا من يده الشيشة
فيصل;بالك ساد
سراج بياخذ الشيشة من فيصل وفيصل ماخلش ياخذها
سراج بعصبية:فكني مالجو وعطيها ليا
فيصل:توا نعطيها لكي لكن قولي كنك قبل
سراج:ماكني شيئ معصب بروحي
فيصل:انت عمرك ماعصبت بروحك اكيدة فيه حاجة صايرة وانا شاك ان ام السان عندها يد في الموضوع
سراج:مادخلهش انت عارف اني ماانتلاقش بيها بكل
فيصل:يعني بتقنعني معصب بروحك وعصبيتك اللي من روحك اتخليك حتى البنات الطروف هذينا ماعندكش الهن جو
سراج:انقولك حاجة اقعد فيها وحتى الشيشة اشربها معش نبيها وطلع مالشقة طلع في جرته فيصل وناداه بس هو ماردش وطلع بسيارته ومالقش روحه الا مروح للفيلا خش جو وخش الداره دغري
لما روح سندس كانت راقدة لانها كانت واعية مالصبح وكانت تاعبة
“”
صباح ثاني يوم وكان يوم جمعة وعطلة عند سندس ناضت بدري وصلت الصبح وفطرت كالعادة بروحها وبعدها برمت عالحوش ولماته وخشت تلبس عشان بتمشي للفيلا واتغدى مع عمها وعمتها لبست(بلوزة طويلة بيضة وجينز ازرق وكاويش ابيض ووشاح ليكرا كحلي) وجت بتطلع سمعت صوت جاي من دار سراج وعرفاته يحكي بالفون
#يتبع
زعما سراج مع من يحكي ومن الشخص المهم اللي سراج وعى علي اتصاله وهل هالشخص بيكون اتصاله مفرح ولا محزن السندس ?
وقولكن شن بيصير في عصام هل حيعيش ولا ايموت وشن بيكون مصير رؤوف في الحالتين سوا عيش أو موت عصام وحنين شن حيكون مصيرها بعد الكل يسمعو القصة ?
وزعما رانيا لما تسمع بالقصة شن حيكون موقفها هل حبها الرؤوف حيخليها معاه واتسامحه ولا حب عصام الها بيغير كل الموضوع كله حنعرفوه في الحلقة الجاية ?
أسفة عالتأخير بنات بس والله زي ماقلتلكن الرواية لاطة معايا
عارفة الحلقة قصيرة بس والله هذا اللي قدرت نكتبه اليوم كنت في الجامعة وناعسة وانحاول مش اكيدة بكرا نكتب حلقة حتى لو قصيرة انحاول بقصارى جهدي لان والله انا نبي تكميلة الرواية أكثر منكن لان جايتني قراية واكيدة الفترة الجاية بيكون ضغط هذا عليش خاطري انكملها أكثر منكن انتن لكن الظروف ايعاندن فيا مش أنا اندير فيها بلعاني ?
أسفة لو فيه لخبطة في الأسماء وأكيد رأيكم ايهمني?
گـتـابـتـبـي Koka Saleh
error: