منحرف وأحببته

#مـنـحـرف_وأحـبـبـتـه
الـحـلـقـة (8)
الشاب:دورها في مكان اخرى لو عاجبتك صح حتعرف اما هنا ممنوع اني نعطي معلومات المرضى
سراج غمتله:تم ومشى
سراج جا الفيصل وهو غامتله
سراج بعصبية:مابش يعطي اي معلومة عليها
فيصل:عليش
سراج;قال ممنوع مش عارفة امتى قعد عندهم ضمير وايتبعو في القوانين
فيصل;وشن بدير توا
سراج:انا حاطها في راسي وحنعرف كيف انجيب معلومات عليها
فيصل:بنعرف عليش حطيتها في راسك
سراج:انا ماكنتش حاطها في راسي هي خلتني انحطها في راسي لو انها احترمتني ولا حتى حطت السانها في فمها وماطولتش عليا لكن هي عاندتني وكل مرة ادير حاجة اكبر ماللي قبلها شايفة روحها ورافعة خشمها وانا حنزله الها
فيصل:ربي ايعينها كان طاحت في يدك
سراج:مااتخفش حطيه انا بنمشي توا
فيصل;وين بتمشي
سراج:ماشي الوائل هو اللي حيجيبلي زبدتها
فيصل:اها ربي ايعينك علي عقلك والله عندي احساس لو درتلها حاجة حتندم
سراج:غير انديرلها اللي في راسي وعادي نندم سلام توا
فيصل:سلام وبيش اترد هنا
سراج:تمام وعدى
فيصل بعد عدى من جنبه سراج دغري كلم وائل وحكاله الموضوع وقاله يعطيه معلومات غلط علي سندس وقاله ايقوله انها بوها متوفي وعايشة مع خوالها وانها تقرا في الأحصاء ويعطيه اسم غلط الها والهلها
“”
عند سندس الساعة 10في الصبح روحت الحوشهم هي وامها وامعاها عمامها وخوالها
“”
في الجامعة رويدة في محاضرتها وفي العادة هي ومعاذ ايقمعزو جنب بعضهم لقت معاذ خاش قبلها
رويدة:صباح الخير وقمعزت جنبه
معاذ صبى من جنبها وماحكش ولا كلمة
رويدة استغربت تصرفه ومعش فهمت كنه ايدير هكي وبعدين اذكرت يوم اللي دارتله مشغول ومعش رنت عليه وتحسابه زاعل عشان هكي جت بتصبيله خش الأستاذ قمعزت في مكانها وفجأة قمعز جنبها حد
أنيس:صباح الخير
رويدة ارتبكت:صباح النور
أنيس:زعجتك بتقمعيزتي جنبك
رويدة:لا عادي شنو المشكلة
أنيس:القيت المكان فاضي استغليت الفرصة اصلا معاذ من قبل ديما جنبك ماعطش حد فرصة يقعد جنبك
رويدة:اها لان انا ومعاذ اصدقاء واجد وعشان انحبو انركزو انقمعزو قدام بس
أنيس:اها يعني انتو اصدقاء بس
رويدة بحتت فيه بالجنب:معليش الاستاذ بدى يشرح بنركز
انيس سكت وقعد ايشوف للأستاذ لكن فيه شخص كانت عينه عليهم وماشالها ابدا
سالم يضحك:انيس غارق في الحب لعند ذانه
معاذ:اها شكله ربي ايهنيه
سالم:رويدة بنية كويسة بكل
معاذ:اها بكل
“”
سراج عدى الوائل في حوشه (اللي مااذكرتش وائل هذا الشاب اللي حكى علي سندس في ثاني حلقة بعد تلاقو في الجامعة وتعاركت مع سراج)وطبعا وائل اصلا صاحب فيصل ودار اللي قاله عليها فيصل وعطاه معلومات غلط وقاله توا انزيد نسألك عليها ونعرفلك مكان سكنها وانجيبلك رقمها ورد سراج للمستشفى
“‘
كملت رويدة محاضرتها وطلع الدكتور والطلبة قعدو ايلمو في شيتاتهم بيطلعو
أنيس:محاضرة صعبة
رويدة:اها
أنيس:فيه حاجة مافهمتيها نشرحها لكي
رويدة في عقلها غير اشرح الروحك
رويدة:لالا تمام وخذت شنطتها وبتطلع وشافت معاذ مازال مقمعز فكرت كيف تحكيله علي انها ماردتش عليه فقالت ادير سبلة انها مش فاهمة مسالة عشان يشرحها الها وبعدها تحكيله
رويدة جاته:معاذ معليش فيه مسألة مش فاهمتها
معاذ:انا مش فاضي توا بنطلع عندي شغل مهم
رويدة:اها باهي امتي ماتفضى
مع جيت بنت اسمها أسماء تقرا معاهم
أسماء:معاذ عندي كم مسألة مش فاهمتهن لو فاضي تشرحهن ليا
معاذ:تمام مافيش مشكلة وريهن ليا وتعالي قمعزي وتوا نشرحهن لكي
رويدة انصدمت من تصرف معاذ وقعدت اتشوفله زين بس هو مابحتش فيها بكل وقمعز مع أسماء وقعد يشرحلها رويدة وجعتها اللقطة واضايقت بكل يعني حتى لو دارت مشغول بس مش من حقه ايعاملها هكي وطلعت ورنت علي رؤوف ايجيها
“”
عند سندس وتحديدا الساعة 4:30 في العشية كان حوشهم معبى ناس جاية اتحمد علي سلامت سندس مالحادث طبعا رويدة ورانيا جنها عشان ايساعدن ام سندس في الضيافة وهكي وعالمغرب عدو العرب وقعدت سندس وصاحباتها في الدار وامها مع الخدامة في المطبخ ادير في عشاء
سندس:رنوشة مشيتي للجامعة اليوم
رانيا:اها عديت بس الدكتور معتذر اليوم
سندس:باهي احسن ان شاءلله كلهم يعتذرو لين انجي مانبي شيء يهلبني
رويدة:مااتخافيش كان هلباتك حاجة تشرحلك رنوشة
رانيا تضحك:هذي مش عالشرح هذي عالحظور ماتبيش درجة تهلبها
سندس:كان عاجبك مرض
رانيا;وووه علينا حتى وهي مريضة السانها طويل
رويدة:حرام عليك خطيها دوستي مريضة
سندس:نجك ليا ياللي خايفة عليا
رويدة:ريت ريت طلعني انا مصرية باهي ياواطيات
سندس ورويدة قعدن يضحكن
رانيا:حي يادوسة هلباتك قصة انيس
سندس:من انيس هذا شور من
رانيا:شور دودي معجب جديد ياحنة
سندس: باهي يارويدة وانا اخر من يعلم
رويدة:والله مش هكي القصة صارت امس وجيتكن قدام القاعة عساس نلقاكن مع بعضكن القيت بس رنوشة وبعدها سمعنا عالحادث وخلاص بعدها معش فيه فرصة نحكيلك
سندس:باهي واحكي توا
رويدة:مافيش قصة عادي حكالي ان معجب بيا وهكي
سندس:قصدك جاك بروحه حكالك
رويدة:اها وعمرها ماصارت معايا انحرجتها حرجة وقعدت انعصد في الكلام
سندس:ووووه عليك جراءة فيه
رويدة:بككل
رانيا:بلعكس عجبتتي جرأته وانا نصحتها اتوافق اصلا ماطلبش علاقة لا شئ قاللها قولي باهي انجيب هلي دغري
سندس:جديات قال هكي
رويدة:اها
رانيا:والله خيرلها وانا شفته مشاءلله عليه
سندس:وانتي عليش رفضتي
رويدة:انتن عارفات قلبي متعلق بمعاذ مانقدرش بكل
رانيا:بس معاذ ماايحبكش ومعتبرك صديقته لعند امتى بتعلقي بحد مايندري عليك
رويدة طبست راسها:مش عارفة لعند امتى بس والله مش بيدي مرات انقول خلاص انطلعه من قلبي بس أول ماانشوفه دغري ننسى اللي قلته انحبه والله انحبه
سندس:باهي انيس هذا كويس
رانيا:اها كويس انا نعرفه
سندس:انتي شن تعرفيه
رانيا:صاحب معاذ وديما امعاه الشاب الطويل بكل اذكرتيه
سندس:اللي مطول شعره
رانيا:ايوا هذا والله كويس ومحترم اتحسيه ماعندش في جو المعاكسات والتبحيت
سندس:ماعمره خشلي راس بككل
رانيا:وانتي امتى عمره راجل خشلك راس
رويدة:اصلا حتى انا مش عاجبني صح صاحب معاذ بس مش نفسه هذا اتحسيه مستهتر بس معاذ شخصية بكل وديما واثق من نفسه وراااجل بمعنى الكلمة
رانيا:ييي علينا بدت اتمجد في سي معاذ خلاص قلنالك انسيه واشقي بغيره
رويدة بحزن:ياريت نقدر بذات بعد اللي صار اليوم
سندس ورانيا:وشن صار
رويدة:اليوم وقعدت تحكيلهن في موقف معاذ اللي داره الها
رانيا:طاح سعده وعليش ايدير هكي شن صار
سندس:راه يقعد عرف قصة انيس وان ايحبك
رانيا:صح بالك طلع ايحبك وغار عليك
رويدة:لالا مااعتقدش هو انيس صاحبه اكيدة عرف الموضوع بس في نفس الوقت اكيدة انيس قاله اني رفضت وبعدين لو علي قصة انيس راه مارنش عليا بكل لكن هنا القصة رن عليا ونحن في المستشفى وانا بنرن علي رؤوف درتله مشغول وبعد روحت للحوش قعدت نعسانة رقدت فته مارنيتش عليه اكيدة زاعل من هذي
رانيا:وزعلته تستحق ايدير هكي
رويدة:ماعمريش درتله مشغول وبعدين ماعمرنش ازاعلنا لين نعرفه لما يزعل كيف يصرف
رانيا:والله اسمعي كلامي وفوتيه ومكرا في اللي داره وافقي علي طلب انيس خيرلك وفوتيه بكل
سندس:لالا انيس فكك منه مايمشيش معاك وبعدين صاحب واحد انتي اتحببه موضوع فاشل
رويدة;حتى انا مش مفكرة فيه انيس خلاص قتله لا وفضت
سندس:بس مش معنى هكي ان قصدي تقعدي اتحبي معاذ وهو معتبرك صديقة انا ضدها لانك انتي اللي تعبتي وبكرا بعد بكرا يخطب ولا يجوز شن يبي ايصير فيكي
رويدة بخوف:حي عليا انموت
سندس:لا اتموتي لا سو انتي اتهبلي ومية واحد ايتمناك طلعيه يادودي من قلبك وابدي حياة جديدة مع حد ايكون ايحبك وشاريك وانتي عارفه كويس من نقصد
رويدة:قصدك سند
سندس:اها سند ولد عمك ويطلب فيك من نحن في الثانوي وقبل قصة معاذ بكل ومازال لعند توا ايدز في امه وشاريك بجد وفي الاخير ولد عمك ودمك والحمك
رانيا:صح يادودي سند اكويس بكل ويبيك طلعي معاذ من حياتك وحاولي اتحبيه خيرلك راه الحب من طرف واحد واعر
رويدة نزلو دموعها:مش غير واعر بس مش قادرة انحب غيره حسن بيا وقعدت تبكي ورانيا وسندس معش حبن ايكثرن عليها وغيرن الموضوع
رانيا:حي مش بابا قالي بكرا ناخذلك سيارة
سندس:حي حي معناها نقعد نمشي وانجي معاك
رويدة:حتى انا
“”
في المستشفى عند سراج وفيصل روان قعدت اكويسة وروحو بيها الحوشهم قعد معاهم فيصل اشوية وبعدها روح للفيلا واول ماخش لقاهم ايتعشو
سراج:خير ياهلنا
محمد:هلنا عليك اسلوب عندك
سراج;اسف السلام عليكم
محمد:وعليكم السلام مالاول قولها بلا فلسفتك الزايدة
سراج وشوش الامه:عليش اجوزتيه ياعفو هذا حاصل في روحه حصله مش زيك
محمد:بلا وشوشة وقمعز تعشى
سراج:صحة تعشيت عند فيصل
عفاف:شن حال روان توا كويسة
سراج:اها كويسة طلعت اليوم
عفاف:بكرا خوذني الهم عيب حتى في المستشفى مامشيت
محمد:بكرا توا نمشولهم انا وياك في العشية
عفاف:باهي
سراج جا بيرقى وبعدها رد:خطرها شن جو العرب اللي يومتها عزمتوهم ان شاءلله غير انسجمتو معاهم بعد السكنان عليهم هذا كله
محمد:انا صاحبي ومنسجم معاه اسأل امك
عفاف:مشاءلله عليك عرب البنت وامها كويسات بكل
سراج:قصدكم معاهم بنت
عفاف:اها عليك بنية كويسة بكل
سراج:سمحة?
محمد:تحشم ياسراج راه خيرلك
امه حكتله بينه وبينها:مش غير سمحة اتهبل ياريتك قاعد وشفتها
سراج:يااخسارة هلبتني
محمد:كان قعدت راك شفتها
سراج ضحك:سمعنا
عفاف:لازم نعزموهم مرة اخرى انا انسجمت امعاهن بكل
سراج:انتي اي واحد منسجمة معاه طيبة يافوفة
محمد:امتى تحترم نفسك واتقوللها امي هي مش صغيرة عشان ادلعها
سراج:عليش انكبر فيها اصلا فوفة مازال اصغيرة ماشي معاها الدلع وطبس عليها وشوشلها
سراج:ريتيه يبيني انكبرك عشان يجوز عليك
عفاف فنصت عيونها:صح تبيه ايكبرني عشان تجوز عليا
محمد:ضحك عليك بكلامه معقولة انا نجوز عليك بعد حاربت الدنيا عشانك
سراج ايصفق:اوووووو يارميو
محمد:باهي باهي صار تشعل في النار
سراج:عشان انخلي هالمسكينة تسمع كلام حلو بدل هالجفاف اللي عايشة فيه
محمد:تحشم مرض وصباله بيضربه
سراج رقى فوق يجري
وامه وباته قعدو يضحكو عليه
سراج خش دوش وطلع مالحمام وكان تاعب بكل خش الفراشة وامتد بيرقد وخطرت عليه سندس
سراج:وين بتريحي مني حنجيبك حنجيبك وحندمك عاللي درتيه كله وتغطى ورقد
“”
عند سندس وتحديدا الساعة 10 في الليل تعشت هي وصاحباتها مع بعضهن وبعدها رويدة رنت علي رؤوف وبتروح ورانيا بترن علي باتها واتروح
رويدة;رنوشة مااتعبيش عمو في هالليل توا انودوك نحن
رانيا:مش عارفه خليني انشوف ماما قبل ورنت علي امها وقالتلها عادي اتروح معاهم
وبعد اشوي جا رؤوف بيروح برويدة وطلعتله هي ورانيا مع بعضهن وركبن
رانيا ورويدة:خيرات
رؤوف:اهلا اهلا مشاءلله حظرتكن دايراتني الشوفير الخاص بيكن
رويدة:عادي عادي اوفي كان ماشلت خيتك وزوجتك المستقبلية من بتشيل
رانيا ابتسمت:معليش اوفا تحملنا هالمرة
رؤوف ضحك:لسنني عاد اوفا واوفي عارفات يمشن فيا الاباري
رويدة:خلاص اعتبرها اخر مرة اتشيلنا
رؤوف بفرحة:خلاص بتعتزلن المشي البعضكن
رويدة;عينك لكن خلاص رنوشة بدير سيارة وتقعد هي اتشيل واتجيب فينا ونفتكو من جميلك
رؤوف فنص عيونه ووقف السيارة مرة وحدة:شنو شنو من هذي بدير سيارة
رانيا يخوف:انا بابا بيديرلي سيارة عشان مش فاضي ديما للشيل والجيب
رؤوف:من جدك تحكي ولا اتبصري انتي
رويدة;من جدها انت اللي كنك باتها بيديرلها شن فيها
رؤوف:بس انا مش موافق عليها
رانيا:عليش مش موافق شن فيها كان درت سيارة عادي توا البنات كلهن ايسوقن
رويدة:بلا تخلف رؤوف شن فيها كان دارت سيارة
رؤوف:اها انا متخلف حبيبتي والبنت اللي بتقعد مراتي مااتسوقش
رانيا:بس يا رؤوف بابا مش فاضي ايشيلني وايجيبني كل يوم
رؤوف:انا ماليش دعوة وسكري عالموضوع توا نحكو فيه بعدين وقعد غامتله وطلع بسرعة بالسيارة ورويدة ورانيا معش حكن ولا كلمة
“”
في حوش رويدة
عالية:باهي تمام توا نحكي الباتها
فاطمة: خلاص نرجى في ردك
عالية:باهي ان شاءلله وسلميلي عالبنات
فاطمة:يوصل وسكرت
بات رويدة:مع من تحكي
عالية:هذي فاطمة سلفتي
بات رويدة:كنها
عالية:نفس الموضوع تحكيلي علي سند قالتلي رويدة توا في اخر سنة وبيجو يطلبو رسمي
بات رويدة:اها حتى امس جاني سند حكالي عالموضوع هذا
عالية:وانت شن رايك
بات رويدة:سند اكويس ماعندي ماانقول فيه لكن انتي شايفة مشاكله مع باته معش انحلن
عالية:بس المشاكل مش كبار الغلط عند خوك يبي يدخل في كل حاجة ضناه كلهم متضايقين منه
بات رويدة:خايف رويدة تتعب مالمشاكل هذينا وبعدين زي ماقلتي باته يدخل في كل حاجة يعني حيقعد يدخل في حياتهم
عالية:سند راجل ويعرف يصرف ومش حيخلي المشاكل مع باته ايأثرن عليه وبعدين فاطمة والبنات كويسات وكلهن يبنها
بات رويدة:انشوفها هي قبل وبعدها انقرر
عالية:باهي احكي معاها بعد اتجي عشان فاطمة تبي الرد بسرعه
مع خشت رويدة
رويدة:خيرات
امها وباتها:خير
عالية:وين رؤوف كنه ماخش
رويدة:مدرعنه حطني وطلع
عاليه:اها باهي قمعزي بنحكيلك موضوع
رويدة قمعزت:شنو انشاءلله خير
عالية:لا خير نبي نحكيلك توا كلمتني عمتك فاطمة وقالت تبي اتجي تخطبك رسمي شن رايك انتي
رويدة;انا عطيتكم رأيي قبل هالمرة سند زي خويا
عالية:بس سند ولد عمك وكويس وشاريك ويبيك وسمحة لما البنت ياخذها ولد عمها فيها قدر وهيبة الها
بات رويدة:انتي ليش رافضة سند حاقه منه عيب معين
رويدة:لا والله سند اكويس وعمره ماضايقني بكل لكن هكي انا ماانفكرش فيه الموضوع هذا توا
عالية:من انتي في الثانوي قلتي هكي وقلنا مازالتي صغيرة وسند قعد يرجى فيك لين اتكملي وتوا معش عندك عذر كلها كم شهر واتخرجي وعمتك فاطمة والبنات اتحقي فيهن كيف ايحبنك وكل العيلة عارفه ان سند طالبك وتوا قلتي ماعمره ضايقك شنو اللي مانعك لعند امتى بتقعدي اتقولي هكي خلاص كبيرة راه معش صغيرة انتي
رويدة:عارفة مش صغيرة بس انا توا عندي امتحانات ومش فاضية للمواضيع هذينا وصبت خشت الدارها
بات رويدة:اسمعي توا صح فترة امتحانات خليها اتكمل وبعدها انخلوهم ايجو رسمي ونحكو معاها
عالية:بس فاطمة وسند يبو الرد توا
بات رويدة:بنت عمه وقاعدة مش طايرة وسند مش طاير توا نحكيله انا وانقوله نرجوها اتكمل امتحاناتها ونحكو معاها وكان وافقت انطلعو الفرح دغري
عالية:باهي اللي اتشوفوه
خشت رويدة الدارها وقعدت اتفكر في كلام امها وصاحباتها
رويدة قمعزت قدام المراية:انا لعند امتى بنقعد هكي لعند امتى بنرفض كل حد ايجيني عشان واحد مش قادرة نعترفله بحبي ولاني قادرة انطلعه من قلبي ولا هو حاس بيا وفوق هذا كله قاعد يتجاهل فيا من دون سبب مقنع فكرت شوي وبعدين قررت اترن علي معاذ ممكن تعرف كنه رنت بس هو ماردش عليها زعلت شوي وبعدها رقدت
“”
عند رانيا
رانيا اترن علي رؤوف وماايردش وبعد قريب 7 مكالمات رد
رانيا:عليش مااتردش
رؤوف:كنك شن تبي
رانيا:كيف شن نبي كنك تحكي معايا هكي
رؤوف:عارفة روحك شن دايرة
رانيا:مادرتش شيء
رؤوف:لا عارفة كويس اتعاندي وماتسمعي في الكلام
رانيا:قصدك عالسيارة
رؤوف:اها انا مش موافق عليها
رانيا:بس بابا بياخذلي سيارة شنو انقوله لا
رؤوف:اها
رانيا:مانقدرش بابا بياخذلي سيارة لان معش قعد يفضى ومايقدرش ايشلنا وين مانبو ديما ولاني انا نعرف انسوق قالي ايديرها ليا عشان مشاويري ومشاوير ماما ورنا
رؤوف:عادي اتعلم امك او رنا مش شرط انتي
رانيا:انت عارف ماما مااتشوفش كويس ورنا مازال صغيرة
رؤوف:مش شوري بيك انتي مااديريش سيارة
رانيا:توا شن صحلك مانك عارف اني ناخذ في سيارة بابا ونمشي بيها ومااتكلمش
رؤوف:اولا بعد كم وكم تاخذيها وبعدين ديما بعد تاخذيها انتعارك معاك انتي عارفة فكرتي انا مانبيش مراتي ادير سيارة واتسوق ويقعد كل اللي مخطم اينابش فيها وبعدين اديري سيارة ومعش انتحكم فيك تقعدي كل مرة في مكان
رانيا:كيف كل مرة في مكان شن اتحق فيا وبعدين انت عارف مكاناتي اللي نمشيلهن ياصحباتي ياالجامعة او مدرسة رنا وماما ماتمشيش الا الخوالي او عمامي هذينا حد مشاويرنا وبعدها معقولة انت متخلف هكي مراتي مااتسوقش
رؤوف:كان تحسبي اللي ايغار علي حبيبته متخلف يبقى انا متخلف
رانيا:بس الغيرة مش هكي وبعدين انت مش واثق فيا
رؤوف:واثق فيك وامعاها انحبك وانغار عليك ومانبيكش اتسوقي
رانيا:باهي انا شن اندير بابا مش فاضي ديما والله مرات نقعدو نبو مكان نظطرو نرجو امتى مابابا يفضى
رؤوف:لما تبو مكان انا مستعد انشيلكم الوين ماتبو انتي وامك ورنا
رانيا:بصفتك من تقدر اتقول نحن مازال علاقة بس
رؤوف:خلاص ارجي باقي السنة هذي بس انكمل ودغري انجي نخطبك
رانيا:باهي شن بنقول البابا اللي قالي بكرا ناخذلك سيارة
رؤوف:اصرفي رنوشة تعذري بأي عذر
رانيا:توا انشوف مع خشت امها
سمية;رنوشة تعالي باتك يبيك
رانيا:هي جاية توا
امها طلعت
رؤوف:رنوشة زي مااتفقنا مافيش سيارة تم
رانيا:حاظر مع اني مش عارفة شن انقول البابا
رؤوف:اصرفي المهم انتي عارفة موقغي واني رافض
رانيا;تمام خلاص بنمشي البابا توا وسكرت
“‘
رانيا:نعم بابا
بات رانيا:ها بابا ماقلتيلي شنو نوع السيارة اللي تبيها
رانيا بإرتباك:خلاص بابا غيرت رايي معش نبي سيارة
امها ورنا انصدمن من قرارها
سمية:عليش كنك مش كنتي موافقة عليش غيرتي رايك
رانيا:فكرت وخفت من فكرة سيارة ليا البنات اليوم في الجامعة حكلي قصص واجد صايرات مع بنات اخرى عندهن سيارات وحالات خطف ومضايقات خفت منهن
بات رانيا:صح ايصيرن الحاجات هذينا بس انتن مشاويركن معروفات يعني مش حتمشي المكان بعيد وبروحك لين ايصير معاك هكي
رانيا:مش عارفة خفت يابابا
سمية:ماكنتي ميتة واديري سيارة
رانيا;وتوا خفت بعد الكلام اللي سمعته
بات رانيا:خلاص خليها براحتها فيه حل اخرى حنجيبلكم سواق وخلاص
رانيا:حتى سواق حل
امها كانت اتفنص فيها
رانيا:انا بنمشي نرقد بكرا عندي محاضرة بدري وخشت وامها لحقتها وخشت وراها للدار
سمية;تحسابي ماشية عليا قصة خفتي انا عارفة رؤوف قالك مااديريش سيارة
رانيا:لا مش هو انا بس خفت
سمية:هو قالك لا وانتي سمعتي كلامه لكن بنقولك كلمتين وحطيهن في راسك لازم ايكون عندك شخصية معاه ومش كل حاجة نعم وحاظر راه ايتعود عليها وبعدين توحلي فيه توا عشان مايبيكش اتسوقي بكرا يدخل في قرايتك وشغلك واحتمال يمنعهن عليك وراسك في عقلك وفكري كويس وطلعت
رانيا قعدت اتفكر في كلام امها وعارفة ان معاها حق بس في نفس الوقت هي اتحبه وماتبيش اتزعله واصلا ماتعودتش اتقوله علي حاجة لا فكرت واجد وبعدها رقدت
“”
صباح ثاني يوم وتحديدا في الجامعة رويدة ورانيا عندهن محاظرة الساعة 8 تلاقن مع بعضهن قدام قاعة رويدة
رويدة:صباح الخير رنوشة
رانيا جوها مش تمام:صباح النور
رويدة بإستغراب:كنك قالبة وجك عالصبح
رانيا:من خوك وحكتلها اللي صار
رويدة:قصدك قلتي الباتك مانبيش سيارة علي خاطره
رانيا:اها وحتى ماما هزبتني
رويدة:تستاهليها هذا يشوخ عليك من توا ياهبلة مش هكي الحب هذي عدم ثقة
رانيا:شن بنديرله لو وافقت راه زعل
رويدة:اصلا انتي مالاول عودتيه كل حاجة نعم وحاظر شيلي توا مالاول انقول فيها لكي انقولك رؤوف ايحب ايتحكم مش كل حاجة اتقولي عليها باهي
رانيا:خلاص هذا اللي صار مع تخطيمة معاذ عليهم وخش للقاعة
رويدة:شفتيه دار روحه ماحقني بكل
رانيا:معقولة هذا كله عشان درتيله مشغول
رويدة:تخيلي المشكلة السبب تافه
رانيا:موضوع هذا
رويدة:انا حنحكي معاه توا ونفهم منه ليش ايدير هكي
رانيا:باهي تمام وانا بنخش للمحاضرة توا سلام وخشت رانيا القاعتها ورويدة جت بتخش للقاعة وكان فيه زحمه شباب قدام بابا القاعة رويدة قعدت مصبية بتقوللهم معليش
انيس شافها وجا قدامها ووخر الشباب كلهم ماعالباب وفتح ايديه الاثنين وخلي الشباب وراه عشان يفتح الطريق الرويدة
انيس:تفضلي
رويدة انحرجت:شكرا وخشت
طبعا معاذ حق اللقة اضايق بكل وفتح الشيت ودار روحه يقرا
رويدة جاته:صباح الخير
معاذ ماردش بكل
رويدة:انا مش عارفة عليش تصرف هكي وبحكم ان اصدقاء جاية بنعرف كنك شن فيه
معاذ بحت فيها وبعصبية:اسمعي بنقولك كلمتين زي ماانا اجاهلتك اجاهلني واعتبري ان مافيش صداقة لا شيء بينا
رويدة:وعليش هذا كله شن صار
معاذ:كيف شن صار اهو انا بندير اللي انتي تبيه
رويدة بصدمة:اللي انا نبيه مافهمتش فهمني
معاذ صبى:اسمعي جو الاستعباط هذا فكيني منه خلاص انتي ماتبيش صداقتي حتى انا مانبيهش وجا بيمشي وبعدها لف عليها
معاذ:وخطرها ياريت معش اترني عليا وطلع مالقاعة
رويدة قعدت مصدومة من تصرف معاذ ومافهمتش ليش هو يحكي هكي قمعزت عالمقعد وهي متضايقة بكل جتها اسماء وقمعزت جنبها
أسماء:صباح النور
رويدة زعلانة:صباح الخير
أسماء:انتي ومعاذ تعاركتو ولا كيف
رويدة بحتت فيها زين;وانتي ليش هامك الموضوع
أسماء:لا بس ليا كم يوم فاطنتلكم معش تقعدو جنب بعضكم ومعش تحكو مع بعضكم زي قبل
رويدة:لا عادي ماجتش فرصة بس
اسماء:اها اصلا انا سمعت انك توا دايرة علاقة مع انيس
رويدة بصدمة:من قال هكي
أسماء:سمعتها يحكو فيها كلهم في القسم وتوقعت ان معاذ متضايق عشان هكي
رويدة:لا انا انيس حكالي بيتقدم وهكي بس انا رفضت وبعدين معاذ عليش بيتعقعد من موضوع زي هذا نحن اصدقاء
أسماء:يعني انتو مافيش بينكم شيء بكل
رويدة:لا مافيش وقعدت سارحة وبعدها صبت وخذت شنطتها وطلعت مالقاعة وعدت طلعت رانيا من قاعتها
رانيا:تي كنك خوفتيني شن فيه
رويدة بفرحة:شكله ايحبني يارنوشة
رانيا:تي من فهميني
رويدة:معاذ معاذ وقعدت تحكيلها في القصة
رانيا بفرحة;زعمك ايكون سامعها واضايق حي معناها ايحبك
رويدة:حتى انا قلت هكي
رانيا:لازم تحكي معاه وتسأليه
رويدة:دورته شكله روح زعمك انرن عليه
رانيا:لا بالفون ماايصيرش منها لازم فيستو فيس امتى مااتلاقي معاه هنا احكيله واسأليه
رويدة:تمام بعدين عندنا محاضرة اخرى اكيدة حيجي ونسأله
رانيا:تمام خلاص توا المحاضرة معش ايصير منها تعالي نفطرو وانرنو علي دوسة نطمنو عليها
رويدة:تمام
وعدن فطرن ورنن علي سندس وهدرزن معاها وبعدها رانيا روحت ورويدة قعدت عشان عندها محاضرة اخرى وراجت معاذ ايجي بس ماجش
“”
عند سندس روح باتها وياما صار فيه لما شافها هكي وماكلموه
فرج:بس المفروض كلمتوني راه دبرت وروحت معقولة بنتي ايصير معاها كل هذا وانا اخر من يعلم
سعاد;والله كنت بنكلمك بس خوك واسماعيل خويا قالولي سندس قعدت اكويسة ماتشغليش
فرج بعصبية:كان ماانشغلت علي بنتي علي من بننشغل غلط اللي درتوه غلط
سندس:خلاص يابابا اصلا انا كويسة وانا بروحي ماكنت نبيك اترد هنا يومين كملت شغلك واهو روحت وانا اصلا ماصارلي شيء واهو قاعدة كويسة
فرج:الحمدلله اللي ماصارلك شيء والله يابابا لما شفت وجك خفت معش عرفت شن صايرلك
سندس:الحمدلله والله جتني ساهلة
فرج:باهي الحمدلله
سعاد:شن صار في سفرتك بعت الاراضي
فرج:اها بعتهن
سعاد:باهي تمام خلاص خرفو مع بعضكم وانا انصبي انحطلكم الغداء
فرج:باهي
وصبت امها اتوتي في الغداء وتغدو مع بعضهم
“”
في العشية سراج وعى علي فونه ايرن
سراج:اوو نصي
فيصل;نوم امالا
سراج:اها راقد ليا كم يوم معاك مارقدتش بكل
فيصل:باهي صبي خلينا نطلعو الاي مكان
سراج:ماعنديش جو انت خش وخلينا انكسدو هنا
فيصلي:تمام
فيصل خش للجناح اللي لوطة يستقبل فيه سراج في ضيوفة ?بعد اشوي جاه سراج
سراج;ولع ولع خلينا نلعبو
فيصل:باهي تمام وولعو الاكس بوكس وقعدو يلعبو
سراج:كلمت وائل
فيصل:علي شنو كلمته
سراج:علي ام السان
فيصل ضحك:وشن تبي منها
سراج:انت عارف شن نبي منها
فيصل:شكلك حبيتها
سراج ضحك:ينعن جد حبيتها قتلك شن نبي منها صح
فيصل:والله انا مش راضي عاللي بديره
سراج:عنك مارضيت اهم حاجة انا راضي
فيصل:باهي ووائل شن قالك
سراج:قالي عايشة مع خوالها وعطاني اسم هلها بس مش عارف سكنها بزبط وقالي الايام الجاية انجيبلك رقمها
فيصل:مش عارف ليش عندي احساس البنت هذي بتغير حياتك
سراج:شن قصدك
فيصل:قصدي بتخليك شخص ثاني واتلوعك بحبها
سراج:شكلك انهبلت تي انا نكرها كان انطول نقتلها وبعدبن مافيش بنت قدرت تاخذ قلبي اصلا يانصي مافيش حاجة اسمها حب
فيصل:تمام يانصي الايام بينا
سراج:الحاجة الوحيدة اللي بنديرها بنخليها هي اللي تجري في جرتي بعد ناخذ اللي نبيها والايام بينا وحتحق
فيصل:تم خلينا نلعبو
سراج:تم
“”
عند سندس في العشية جنها رويدة ورانيا
رانيا:يعني عالمحاضرة الثانية ماجش
رويدة:لا
رانيا:دوسة شن قولك تصرفه شن يعني انا قلت شكله ايحبها
سندس:لو ان سامعها واضايق معناها صح فيه حاجة ناحيتك
رويدة:اسماء قالتلي ان القسم كله يحكي فيها
سندس:خلاص اكيدة سامعها بس ليش ماايجي ويسألك اكيدة هو سامع حاجة اخرى
رانيا:حاجة اخرى زي شنو
سندس:مش عارفة انيس هذا مش متريحتله يعني كيف ترفضيه وايقول انك وافقتي
رويدة:زعمك هو قال اني وافقت
سندس:دبينها قالتلك القسم كله يحكي فيها معناها هو حاكي لانك انتي ماحكيتيش الحد
رويدة:وشن غرضه من هكي
سندس:الله وأعلم بس لازم تعرفي واكيدة معاذ سامع منه حاجة هذا ليش يصرف هكي
رويدة:وكيف نعرف
رانيا:لازم تحكي مع معاذ اكيدة عنده جواب للأسئلة هذيا كلهن
رويدة:قولكن هكي
سندس:وانا مع رانيا بكرا اكيدة حيجي للجامعة باي طريقة احكي معاه واول مااتجي خشي في الموضوع دغري قوليله انيس شن قالك هو حيحكي بروحه لان حيفهم ان فيه حاجة وبعدين فهميه الموضوع
رويدة:تمام حندير زي ماقلتن
رانيا;موضوع رويدة وانحل توا في موضوع المعجب اللي عندك انتي
سندس:اي معجب هذا
رانيا:الطرف اللي نقذك في المصيف ويومتها تبرعلك بدم معقولة الصدف هذينا اكيدة وراهن حاجة مستحيل اتكون صدفة
رويدة;حتى انا انفكر فيها وراس دوسة احكي ماقالك شيئ
سندس بعصبية:هالبارد الحقير التافه الحيوان معش تحكلي عليه راه مدره كبدي
رانيا بحتت في رويدة وضحكت
رانيا:معقولة هذا كله كره ولا غير طروح قدامنا عشان ادسي حبك
سندس ضربتها:ياكل الا حب عن كلب انتي وهي انتن عارفات الكلام هذا بالنسبة ليا وفاضي ومافيش حاجة اسمها حب كله كذب وبعدين كان صارت معجزة وحبيت مانبي انحب الا هالتافه لو يقعد اخر راجل في الدنيا ماانحبه تي هذا صايع فاشل خزي معش تحكن عليه راه والله وحدة تحكيلي عليه نزعل منها ومعش نحكي معاعا بكل
رويدة;لا لا خلاص كله الا زعل دوسة معش انجيبو سيرته وبحتت في رانيا
رانيا:خلاص اسفة معش نحكي عليه وقعدن ايخرفن وبعدها تعشن مع بعضهن وروحن
#يتبع
الكره عند سراج وسندس متبادل هل يمكن ان ايتحول حب رغم انهم مش نفس بعضهم بكل واذا تحول حب كيف حتصير هالمعجزة
ورويدة شن حيصير معاها لما تحكي مع معاذ هل حيسمحلها تحكي معاه وهل حيعترف بحبه او اصلا يطلع ماايحبهش كله حنعرفوه الحلقة الجاية ?
أسفة امس ماقدرتش انزل الحلقة لاني روحت متاخر وكنت تاعبة مالفرح ?
اسفة لو فيه لخبطة في الأسمأء وأكيد رأيكم ايهمني ?
گـتـابـتـي Koka Saleh