منحرف وأحببته

#مـنـحـرف_وأحـبـبـتـه
الـحـلـقـة (5)
ومشت سندس للشاليه بتجيب فونها عشان كسدت وتبي اتولع اغاني
فطنلها سراج ولحقها
خشت سندس للشاليه وخشت للدار وفكت وشاحها عشان اتسقم شعرها وسراج خش وراها وسكر باب الشاليه
سندس سمعت الباب:جيتن ياباردات توا وجت بتطلعلهن وسراج خش ودفها جوا الدار وسكر الباب
سندس انصدمت:هو انت شن تبي جاي هنا
سراج بخبث;صار اتمدي في يدك واتقولي لقاق عشان نقذتك
سندس بعصبية:أطلع من هنا احسنلك
سراج قرب منها:وكان ماطلعتش شن بديري
سندس:بنعيط وانلم عليك الناس كلها
سراج بعصبية:عيطي كان سمعك واحد ولو تبي انعيط معاك حتى انا كلها لاهية ماحد يندري عليك توا نقدر ننتقم منك عاللي درتيه كله ومن غير ماحد يفطن
سندس كانت ميتة خوف بس ماحبت اتبان ضعيفة:اطلع من هنا احسنلك
سراج بتحدي:تبني نطلع اعتذري عاللي درتيه كله
سندس بتحدي:انجوم السماء اقرب من اني نعتذرلك
سراج قرب منها:معناها انا حنخليك تعتذري غصبن عنك
سندس اتوخر:اسمع لو اتقرب مني حتشوف شيء مايعجبك
سراج قرب اخرى:بنشوفه الشيء اللي مايعجبني ومسكها
سندس دفاته:ماتلمسنيش ياحقير ومشت تجري للباب
سراج سبقها عالباب وهي ردت ومسكها من شعرها
سراج ماسكها من شعرها:لعند امتى بتقعدي اتعاندي وتطلقي في السانك انا ماعمرش بنت دارتلي هكي بكل
سندس اتألم:اطلقني ياحيوان
سراج فصع يدها:مازال اتسبي صح والله اندمك علي كل كلمة قلتيها وانخليك اتجي اتحبي علي كرعي عشان نرضى عليك
سندس كانت اتوجع بكل:احلم
سراج:توا انوريك الحلم شن شكله ودفها عالسرير وجا عليها ومسك ايديها لثنين بيده فوق وباقي جسمها معش قدرت اتحرك لان كان عليها وكان اثقل منها حوللها بيده لخرى جاكة الفستان
سندس كانت اتعيط واتعظ فيه بس مابكتش نهائي لانها من هي صغيرة تعودت ماتبكي قدام حد
سندس اتعيط:ياماما ياماما/ حول ياتافه يامنحط حول من عليا ياحقير يامقرف واتعظ فيه واتحاول اتفك روحها
سراج:مازال اتسبي وتشتمي توا ايبانلك
سندس بصوت عالي:حول حول ياواطي نكرهك نكرهك
سراج:تي سكريه فمك هذا وقرب وقعد ايبوس فيها علي شفايفها وهي اتحرك في راسها ايمين وايسار ماتبيش ايبوسها
سراج بعد البوسه سيبها
سراج وموجه صبعة في وجه سندس وبتهديد: حطي في بالك اني نكرهك وماانطيقش بككل وحطي في راسك اكويس اني مستحيل نلحق وحدة زيك وردبالك اتفكري اتعانديني عشان في اي لحظة نقدر ناخذ منك اغلى حاجة تملكيها وانخليك زي الكلبة تجري في جرتي وطلع وخبط باب الدار زيين وطلع مالشاليه بكل
سندس قعدت تبكي وحست الأول مرة في حياتها انها ضعيفة ومش قادرة ادافع عن نفسها قعدة تبكي وتبكي وقعدت اترن علي رقم باتها تلقى فيه مقفل صبت بتحكي اللي صار معاها الامها والباقي وبعدين فكرت شن بيديرولها وباتها اللي ايخاف عليها صح مش فيهم وخافت اترعش امها وادير مشكلة مع واحد باين عليه مش خايف من حد ولا داير احساب الحد اسكرت الدنيا في وجها وحست بشعور أول مرة اتحسه حست انها في اللحظة هذي محتاجة الاخ السند يحميها وايدافع عليها وقعدت تبكي
“”
سراج طلع مالشاليه وكان فرحان حس ان رد اعتباره وانتقم منها عاللي داراته فيه كله وقدر ينتصر عليها ومشى شور فيصل وهو فرحان ولقى فيصل مقمعز مع بات رانيا وبات رويدة جا قمعز معاهم
سراج:شن جوكم
بات رويدة وبات رانيا:تمام الحمدلله كيف حالك انت
سراج:مية المية مافيش احسن من هكي وقعد ايخرف معاهم
فيصل مستغرب وايبحت فيه زين كيف جا وقعد ايخرف وهو اصلا ماايحبش الجو هذا بكل ولان صاحبه عرف ان فيه حاجة
“”
سعاد فقدت بنتها ورنت عليها سندس قالتلها ناعسة وبترقد وماحبت تطلع وهي متضايقة هكي لان عارفة امها حتفطنلها
“”
الساعة 12:30الكل خشو عشان يرقدو
رانيا ورويدة خشن للدار ولقن سندس متغطية ماحبن يزعجنها وخلنها اتريح ورقدن حتى هنا بس في الحقيقة سندس ماكانت راقدة وكملت الليل تبكي وتكمد في بكيتها تبيش حد يسمعها
“”
ام فيصل وروان وريان رقدن في دار
وفيصل وسراج خشو للدار لخرى بيرقدو
فيصل:كني حسيت فيك حاجة غريبة
سراج:كني نفس ماانا ماتغير شيء
فيصل:لا متغير كنت مقمعز بروحك ومتضايق وعديت من جنبنا وفجأة جيت تضحك واتبصر وقعدت اتخرف مع الرجالة وانا عارفهم مش نفس جوك
سراج:حاسدني علي هالفرحة
فيصل;عمري مانحسدك لكن بنعرف سبب الفرحة هذي وانا متأكد فرحتك انت لازم وراها حزن الشخص اخرى
سراج:تعرف عليش انقولك نصي لانك اكثر واحد فاهمني ياطيري
فيصل عقد حواجبه وفهم عليه:شن درت للبنت ياسراج
سراج:انتقمت عاللي داراته فيا كله اه عالراحة هكي قعد جوي تمام
فيصل بعصبية:شن درت للبنت ردبالك تقعد درت اللي في راسي
سراج:مادرتلها شيء بس خوفتها مني وخليتها تعرف من انا
فيصل:البنت شكلها محترمة راك تقعد درتلها حاجة مش كويسة راه تاخذ ذنبها لعند مااتموت
سراج:قتلك مادرتلها شيء خوفتها بس
“”
سندس بعد الكل رقدو حست روحها متضايقة وبتشم هواء وطلعت قمعزت علي كرسي قدام الشاليه وقعدت تبكي
“”
فيصل:مش مطمنلك كان داير حاجة قولها قبل مالبنت تحكي وتكبر القصة وهالمرة باتك مش حيسامحك هذي مش زي الشغالة اجنبية واسكتت بفلوس هذي هلها ليبيين زينا ومش حيبيعو شرفهم ويسكتو بفلوس
سراج:تي قتلك الشغالة والله مادرتلها حاجة ولا هذي جيت شورها انت عارفني عمري مالمست وحدة غصبن عنها مش للدرجة هذي حقير انا صح انحب البنات والهياجة بس برضاهن كلهن وبعدين هذي بذات لو تقعد اخر بنت في الدنيا ماانقرب منها لاني مش طايقها بكل
فيصل:انا عليا ننصحك وانت حر مانبيك ادير حاجة وتاخذ ذنبها
سراج:اتقول نحكي للساس قتلك ماقربتهش انقولك حاجة اقعد فيها وطلع
“”
سندس وهي تبكي رن فونها ولقاته باتها وردت بسرعه
سندس:ايوا بابا شن اخبارك
فرج:كويس دوسة شن اخبارك انتي
مع طلعت سراج وشافها برا ماسكة فونها وتحكي انطمر وقعد يصنت فيها بيعرف مع من تحكي
سندس:مرايفة عليك امتى اتروح
فرج:ان شاءلله بكرا كنك فيه حاجة صايرة معاك حاجة
سندس بتحكي وبعدها سكتت:لالا مافيش شيء غير رايفت عليك وااجد خلاص بكرا لما اتروح اتجي هنا دغري
فرج;حاظر يابابا تبي شيء اتوصيني علي شيئ
سندس:سلامتك نبي انشوفك بس
فرج:خلاص عدي ارقدي مش كويس السهور
سندس:حاظر وسكرت وحست روحها بعد حكت مع باتها تريحت اشوي
سراج صبى قدام الشاليه امتاعهم وابتسم;كنك ماقلتي الحبيبك عاللي صار بينا
سندس وكانت حاقدة عليه بكل:مافيش حاجة صارت بينا
سراج قعد يمشي شورها;لا صارن حاجات ولا انسيتيهن
سندس:اها انسيتهن ومانبيش نذكرهن ولا نذكرك وياريت معش تطلع قدامي ولا تلحقني
سراج صبى قدامها وحاط ايديه في جيوبه:مازال حاطه في عقلك اني نلحق فيك
سندس وخرت منه:فسر ليش كل مرة نلقاك في طريقي
سراج:صدفة
سندس:الصدفة اتصيرة مرة وحدة مش ثلاث مرات
سراج ابتسم وقرب منها;وتحسبي فيهن اخرى يعني انا في عقلك امالا ليش اتقولي انسيت الحاجات اللي صارن بينا
سندس وخرت منه:مانحسبش فيهن لانك في عقلي حسبتهن لانهن اسوأ حاجات صارن معايا وبعدين قتلك مافيش حاجة صارت بينا كان انت متذكر انا انسيت وفقدت الذاكرة
سراج دفها عالساس وحط يده علي فمها ولصق فيها وهي ااتحاول اتبعده
سراج وفمه قريب من وذنها:شن رايك انذكرك باللي صار وقرب يبي ايبوسها
سندس ضرباته بفونها علي وجه وجت الضربة تحت عينه سراج طلقها وحط يده علي عينه وقعد ايتألم وهي خشت تجري وترعش جوا وسكرت الباب وخشت السريرها وهي خايفة واتحاول اتسيطر علي انفاسها واتهدي روحها
“”
اما سراج الخبطة كانت واعرة واتوجع فيه مشى للتلاجة وخذا تلج عشان ايخفف الالم وماتنتفخ عينه وجا عند المراية وشاف وجه ولقى تحت عينه حمر وهو طبعا مايحمل في وجه شيء وسندس خربت جماله
سراج ايحط في التلج علي عينه وايهزب:الحقيرة الكلبة خلتها اتعلم الفرخة هذي لا اتحرم ولا اتخاف وقحة وقعد ايهزب وبعد خف الالم اشوي خش للسرير تقلب واجد لين خذاه النوم
“”
اما سندس كانت حاسة بالخوف الاول مرة وحست انها ضعيفة صح هي توا ردت اعتبارها اشوي بضربته لكن كانت خايفة من ردت فعله عليها بكرا لانها فهمت ان حاطها في راسه
“”
صباح يوم جديد
وعو الكل بدري بكل وخذو فطورهم وبيفطرو عالشط
سندس وعت وغيرت دبشها خذت لبسة من رويدة لان معاها بس لبستبن وعامت بيهن اما فستانها كرهاته ومابتش تلبسه بعد اللي صار لبست(بلوزة بيج قصيرة واسترتش اخضر ووشاح بيج مالاجناب في قماشته دانتيل لونها اخضر)
سندس اتسقم في وشاحها عالمراية
رانيا تمسح في وجها:كنك ياباردة امس رقدتي بدري
سندس:شيء كنت تعبانة ونعسانة رقدت
رويدة استغربت رد سندس الهادي اللي مافيش اي شتيمة ومش عادتها قبل ديما اتناقر معاهن وبحتت في رانيا وهزت براسها بمعنى كنها
رانيا قمعزت علي حاشية السرير:دوسة انتي زاعلة منا عشان امس ماهدرزنا معاك والله ياقلبي رؤوف قعد ايقولي تمشي نزعل والله سيبته يزعل وصبيت بنشوفك اعميمة سعاد قالتلي خليها ترقد
رويدة:وحتى انا رنيت عليك مارديتي عليا وقلت اكيدة رقدت عارفتك تاعبة مانبيش نزعجك والله ماتزعلي منا
سندس:مش زاعلة جوي تمام والله
رانيا:باهي كنك تحكي هكي
سندس:نحكي عادي كني
رويدة:لا مش عادي كان تحكي عادي راه اتهزبي فينا
سندس ضحكت:يامهزبات حتي بعد نحكي معاكن بإحترام توجعكن دا ان شاءلله
رويدة ورانيا جن اضبطنها ويضحكن:ايوا هذي دوسة اللي نعرفوها
اشوي ولبسن كلهن وطلعن يفطرن معاهم وقعدو ايخرفو ويضحكو وسندس نست اشوي اللي صار في الليل
“”
سراج طبعا خميرة نوم وطايح راقد مايندري عالدنيا كلها
فيصل حل روشن الدار:سراج سراج تي نوض مبرد والله دمك مثقل نومك ازح
سراج غطى وجه بالورغان:تي سكرا الخارب وريحني خليني نرقد
فيصل:نوض بنفطرو عالشط ?
سراج:عليك انجاز بديره تي افطر من ماسكك
فيصل:لنقنك خميرة نوم تي عيش اللحظة في الليل مروحين يابارد
سراج عزق فيه المخدة:حل حل خليني نرقد
فيصل:يعني ماتبيش توعى
سراج:باهي اللي فهمتها
فيصل:انا عارف من ايوعيك
ومشى الروان(بنات صار تعديل في عمر روان وريان عمرهن 7سنين وطبعا فيصل عنده اخين اخرى اكبر منه وكل واحد لاهي في حياته وفي دنيته وماعندش خوات الا روان وريان وماايتحمل فيهن شيء)
عدى الروان وقاللها اتخش اتوعي سراج خشت روان وهو قعد مصبي قدام الباب
روان:سراج سراج هيا نوض بنفطرو عالشط
سراج:ريونه بنرقد بعد نوعى انجيكم
روان حولت الورغان:لالا نوض توا
سراج:روان بنرقد
روان قعدت تقرص فيه في يده:نوض نوض ياتنبال
سراج تغطى:ياقراصة خطيني
فيصل همسلها ومدلها شيشة امية وروان خذتها وحولت الورغان وصبتها عليه
سراج نط مفجوع:ينعن شكلك ياروان وصبى روان راحت تجري وفيصل قعد يضحك
سراج صبى:عارفك انت قلتلها والله انوريك وجاه بيضربه وفيصل مالضحك مش قادر ايتحرك سراج مسكه بيضربه وفيصل انتبه للخبطة
فيصل بصدمة:تي كنها عينك
سراج ارتبك:خبطت في الباب
فيصل:معقولة هذي مالباب
سراج:امالا نكذب عليك انا توا
فيصل:تي عينك كلها سودة
سراج غمتله:خربت جمالي
فيصل:من هذي
سراج:ماتفهمش انت ماقلنا مالباب وخش للحمام بيغسل وجه
سراج يغسل في وجه وبحت عالمراية:الله يلعنك ياكلبة خربتي وجي لكن ساهل والله انوريك وطلع مالحمام وغير ادبشه(ولبس شورت راب اسود وعليه تيشرت احمر وبخ عطر ولبس نظاراته وطاقيه سودة)وطلع
“”
جو للشط ولقى سندس واللي معاها مقمعزين علي طاولتين عالشط
سراج اختار طاولة بعيد منهم:تعالو انقمعزو هنا
ام فيصل:عليش تبعادت منهم خلينا جنبهم
سراج:لالا ماعنديش الهم جو فكونا منهم
فيصل:ياامي تعالي وين ماقال سراج متاعرك مع بنتهم
ام فيصل:باهي خليني انصبح عليهم وانجيكم
فيصل:باهي وعدى هو وسراج قمعزو عالطاولة بعيد منهم
روان:انا بنعوم
فيصل:اصبري نفطرو وبعدها اتعومي
روان:قوله سراج ايخليني انعوم انا كليت شكولاطة مش جيعانة بنعوم
سراج:معش تحكي معايا
روان ببراءة:عليش
سراج:هكي تسمعي كلام فيصل واتعاديني خلاص مش اصحاب انا بنصاحب ريان
ريان:انا مانبيش انصاحبك انا صاحبة فيصل
فيصل يضحك:نجيها كبيدتي
روان زعلت وطبست راسها
ام فيصل جت وقعدو يفطرو وروان طول الوقت دايرة روحها زاعلة
“”
عند سندس كملو الفطور وبات رانيا وبات رويدة صبو بياخذو دورة عالمصيف وايتفرجو عليه لان كان سمح بكل وعدن الصبايا معاهم
وقعدن مقمعزات عالطاولة سندس ورانيا ورويدة
رويدة:وين رؤوف
رانيا:شكله مازال راقد انرن عليه ماايردش
رويدة:بعده نومه ثقيييل لازم حد يسكن تالاه عشان يوعى شن رايك نمشو انوعوه
رانيا بحتت في سندس وبنظرة طيابة:نمشي انوعيه
سندس كانت جوها مش تمام:عدي عساس كان قتلك ماتمشيش بتسمعي كلامي
رويدة:هي امعانا حتى انتي
سندس:انتي بتوعي خوك وهذي حبيبها انا شن دخلني انا لا عندي حبيب لا عندي خو وطبست راسها
رويدة بخوف:سندوسة كنك شن فيه
سندس:ياعوينك دودي عندك خوت يحموك
رانيا بخوف:كنك ياقلبي شن صاير معاك
سندس:شيء بس خاطري يقعد عندي اخ
رويدة اتبصر بتغير جوها:ماافتكيتي الا منهم يقعد عندك واحد معقد زي عصام ولا بارد زي رؤوف شن بديري بيهم
رانيا ضربتها:معش اتقولي بارد
رويدة;اي ياكلبة شن دخلك خويا ينعن مرض
رانيا:وانا حبيبي
رويدة:اشبعي بيه خوذيه بكل مااتفكيني الا منه
سندس قعدت تضحك عشان مااتبينلهن انها زاعلة او ضعيفة وخافت تحكي اكثر تبكي ويعرفن اللي صار امس
سندس تضحك:خلاص عدن وعن رؤوف وتعالن بسرعه مااتخلنيش بروحي
رويدة ورانيا:5دقايق وانجو وعدن وجن للشاليه وكان فاضي
رويدة:اسمعي انا نرجاك هنا وانتي خشي وعيه
رانيا:مش قلتي بنوعوه مع بعضنا
رويدة تضحك:قدام سندس خشي وعيه بروحك وعيشي لحظة ان راجلك ادربي من توا علي ماخذيناك
رانيا تضحك:ياباردة بس تفهمي في الجو
رويدة بغمزة:نعجبك
رانيا:اسمعي مااتباعديش تسمعي اي حاجة خشي اجري خوك وعارفتيه
رويدة:كوني هانية مش متحركة من هنا
خشت رانيا علي رؤوف
رانيا من عند الباب:اوف اوفا نوض هيا الساعة 10:30
رؤوف فتح عيونه:عيون وقلب اوفا انتي
رانيا ابتسمت:هيا حبيبي نوض خلينا نستغلو اليوم في الليل بنروحو
رؤوف:خلاص وعيت ياسمحة
رانيا:خلاص انا بنطلع اغسل والحقنا علي ماوتيتلك فطور
رؤوف ابتسم:عايشة لحظة انك مراتي
رانيا:اها ولا عندك مانع
رؤوف:ابدا ماعندي مانع بالعكس امتى ناخذك وكل يوم نصبح في وجك السمح هذا نقعد اسعد واحد في الدنيا
رانيا انحرجت:خلاص بلا دوة واجد ونوض
رؤوف:باهي مافيش اي بوسة طياري
رانيا من بعيد:اموووااااه خلاص اهي بوسة طياري
رؤوف:طول عمرك غضيبة وتعرفي تنقضي روحك مني رانيا:هيا خلاص انا طولت نوض
رؤوف:حاظر وديريلي قهوة جديدة ماانحبش وحدة مسخنة
رانيا شاورت علي عيونها:من عيوني وطلعت
رؤوف ابتسم وصبى وخش ايدوش
”
رانيا طلعت مبتسمة من جوا
رويدة:اشي اشي شن صاير لين الضحكة مغطية وجك
رانيا:شعور سمح وانتي اتوعي في حبيبك اتحسي روحك مراته
رويدة:ان شاءلله ياحنة عن قريب ناخذوك وتقعدي مراته رانيا:ان شاءلله يارب
وقعد فون رويدة ايرن
رانيا:من عالصبح
رويدة وعيونها قلوب:هذا معاذ?
رانيا:حي حي شكلها السنارة غمزت تعالي انتباعدو مالشاليه واحكي امعاه
وتبعادن وقمعزن علي مقعد بعيد مالشاليه ورويدة ردت
رويدة:الو
معاذ:صباح الخير
رويدة:صباح النور
معاذ:ان شاءلله غير واعية ماوعيتك
رويدة:لا واعية من بدري بكل وكنا نفطرو عالشط
معاذ:صار انتو اللي مالصبح دايرين هرجة
رويدة ضحكت:اها نحن زعجناكم ولا كيف
معاذ:لا والله بس شفتكم من بعيد وحسدكنم عالجو شكله جوكم سمح
رويدة:مانحكيلك جو ايهبل
معاذ:شن اخبار سندس اليوم كويسة
رويدة:الحمدلله كويسة
معاذ:الحمدلله امس حكيت الامي وخواتي عاللي صار ووجعتهن واجد
رويدة:ليش هنا يعرفنها
معاذ:لالا بس يعرفنك انتي
رويدة باستغراب:وانا وين يعرفني
معاذ:ديما نحكيلهم عليك
رويدة بفرحة:شن تحكيلهم عليا
معاذ:ديما انقوللهم صديقتي وبنت شاطرة واغلب الوقت اتساعد فيا في اللي مش فاهمها
رويدة بخيبة امل:اها حتى انت ديما اتساعد فيا
معاذ:انا عندي صديقات واجد وانتي عارفة نامن بالصداقة واجد بس انتي صداقتي معاك اقوى منهن ديما انحس فيك اختي
رويدة بحزن:وانا نفس الشي واضايقت
معاذ:امي والبنات حابات ايتعرفن عليك عادي بعدين اتجي انعرفهن عليك
رويدة:بصفتي من
معاذ:ماقتلك صديقتي وزي اختي وديما نحكيلهن عليك
رويدة:مش عارفة نسأل ماما مرات مااتوافقش
معاذ:صح معاك حق خلاص مش مشكلة بعدين انجيبهم عندكم ايتعرفو عليكم وتعرفو عليهن ومنها ايشوفن سندس لان زعلن عليها واجد
رويدة:تمام نرجو فيكم
رانيا سمعت كلمة نرجو فيكم وقعدن اعيونها قلوب وفرحت?
رويدة:سلام وسكرت
رانيا بفرحة:مش قتلك السنارة غمزت بيجيب هله ويخطبك صح
رويدة بحزن:اي خطبة وهو ايقولي زي اختي
رانيا:امالا شن قصة نرجو فيكم
رويدة قعدت تحكيلها اللي صار
“”
عند سندس وسراج
ام فيصل شالت صفرة الفطور ومعاها فيصل شايل باقي الحاجات ومشو للشاليه
اما سندس علقت سماعاتها وقعدت تسمع في اغاني ومابحتتش فيهم بكل واتبحت في البحر
سراج ايحق فيها وناقم عليها وفي خاطرة ايرد الضربة وخطرة في باله فكرة
روان وريان كانن يلعبن عالرملة
سراج صبى ومشالهن
روان:سراج ديرلي قلعة ماعرفتش
سراج:مش قتلك زاعل منك معش تحكي معايا
روان:خلاص اسفة سراج معش انديرها
سراج بخبث:تبيني انسامحك
روان:اها
سراج:نطلب منك طلب شرير واديريه
روان بفرحة غالي عليها الشر:اها ?
سراج:اتحقي فيها البنت اللي لابسة البيج هذكي
روان:اها
سراج:نعطيك حيط واضربيها بيه بس مااتخليها تفطنلك
روان عجبتها الفكرة:باهي ?
وعطاها الحيط وقعدت تطلق فيها وسندس مقمعزة كل مرة اطب فيها حيطة اتوجعها ولما تلتفت مااتشوفش حد اتشوف البنات يلعبن بس روان بعد سندس اترد اتبحت للبحر تطلق فيها حيطة وبعد سندس اتبحت ادير روحها تلعب وسراج ميت ضحك علي منظر سندس وهي اتبحت من يضرب في الحيط
سندس لان مافيش حد عالشط شكت فيهن ولعبتها الها دارت روحها مركزة في البحر وهي مركزة فيهن وهووب تفطن الروان لما تعزق فيها الحيطة وطبت علي راسها ووجعتها
سندس غمتلها وصبت وهي معصبة الروان
سندس:انتي يافرخة عليش تعزقي في الحيط
روان بحتت ايمين ايسار;انتي تحكيلي
سندس:لا نحكي العفريتك
روان:انا ماعنديش عفريته
سندس:وووه عالبرادة عالصبح اسمعي اطب في حاجة مرة اخرى انغرقك في البحر
سراج ميت ضحك عليهن
روان:مافيش بارد وانتي حيه
سندس:سكري فمك راه نضربك
سراج جاها:هي انتي كنك مع البنت
سندس;وانت شن دخلك بيها
سراج:بنتي
سندس:سبحان الله حسيتها انت وهي نفس البرادة
سراج مسك يدها زين:مازال تطلقي في السانك ومازال ماشعفتي ماللي صار امس
سندس فكت يدها منه:اسمع كان تبيني معش نطلق الساني معش تطلع في طريقي
سراج:وانا وين طلعت في طريقك انا قاعد عالشط انتي اللي جيتينا من يلحق في من توا
سندس:انا عارفة ان انت اللي قلتلها تضربني
سراج ابتسم:وجعاتك الضربة
سندس حطت يدها علي راسها:شن رايك يعني حيطة هي مش وردة
سراج:تستاهليها ماايجيك الا من السانك وعملك تعرفي ياريت في يدي موت مش حيط راه طلقتها عليك وافتكيت منك
سندس:الموت في يد ربي وبعدين حتى انت بحت وجك شكلك مازال ماشعفت
سراج غمتله وقرب منها:انتي شكلك تبيني اندير اللي امس بس هالمرة بجد مش بس تهديد عشان انواطي خشمك هذا اللي رافعتيه عالفاضي
سندس:خشمي ماحد يقدر ايواطيه انت اصلا ماتعرفنيش
مع جيت فيصل وعرفهم متعاركين
فيصل:شن فيه كنكم
سندس:اسأل صاحبك ال
سراج:ال شنو كمليها وبحتي شن انديرلك
فيصل:وسع بالك سراج قولولي شن صار
ريان:روان ضربتها بالحيط
فيصل بعصبية:روان ياحقيرة والله انوريك
سراح:انت راجل اقربها
فيصل فنص فيه ولف علي سندس
فيصل:معليش اسمحيلي وامسحيها في وجي وانا والله انوريها عليها
سراج:هه كان قدرت تقربها
سندس:لا عادي حصل خير ومش داعي اتكلمها عادي صغيرة وغلطت العتب عالكبار اللي ايعلمو فيها في حاجات خطأ
سراج:اصلا روان كبيدتي مايقدرش حد ايديرلها شي وانا حر انعلمها اللي نبيها مش وحدة زيك اتورينا الصح مالخطأ
سندس بترد عليه قاطعها فيصل
فيصل:خلاص هالمرة امسحيها في وجي
سندس:ماشي مافيش مشكلة وعدت للشاليه بس عدت وهي غامتلها عالاخر من سراج
فيصل;معقولة ياراجل اتخليها تضرب بالحيط افرض صارلها حاجة ولا انفجغت
سراج:ياريتها اقل شيئ رديت اللي داراته في وجي (ونسى ان قال مالباب? معروفة احبال الكذب قصيرات?)
فيصل يضحك:اها يعني اللي في وجك منها كيف صار وامتى ضرباتك
سراج;تسهوك مادخلكش امتى لكن حتى توا ضربتها روان ضربة مسحت كبدي
فيصل:خزي عليك اتخشش في روان في اعمالك الشريرة
سراج:عساس روان طيبة تي روان تربيتي يانصي
فيصل يضحك:لنقنها تربيتك تربية وسخة زيك
سراج:هيا انخشو انعومو
فيصل:هيا
وخشو ايعومو
“”
سندس وصلت للشاليه ولقتهن مقمعزات عالمقعد وكانت غمتلها
سندس بعصبية;كنكن خذيتن وجوهكن وقمعزت جنبهن
رانيا:مارن معاذ وقعدت رويدة تحكي معاه
سندس:وكنه حتى هو لاخر شن يبي
رانيا:قعدت تحكيلها في الموضوع
رانيا:ورويدة قاعدة زاعلة عشان قاللها اصدقاء وزي الخوت
سندس:عليك حالة عليش تزعل مامالبداية عارفين ان معتبرك صديقته ومعاملته لكي دائما ادل عالصداقة يعني ماعمره صدر منه اي موقف ايدل علي شي اخرى غير الصداقة دائما معاملته لكي بإحترام وضمن حدود معينة
رويدة بحزن:والله عارفه بس اضايقت لما قالي هكي يعني شوفي الحب الكبير اللي في قلبي له وهو قهرني بكلامه يعني انا من امس حسيت بإهتمام منه وايرن عليا ويسأل عشت في وهم ان ايكون في شيء اخرى
سندس:اسمعي دودي كان عالرن عليك فهو بس لان محترم وذوق شاف اللي صار معانا ودار واجبه تجاه صديقته واتصل واطمن عليها
رانيا:وباهي وعليش بيعرفها علي هله تقدري اتفسري
سندس:ماهو قاللها زي اختي ونحكي عليك ديما الهلي ممكن عاجبته صداقتهم وعارف رويدة كيف محترمة وحاكي عليها الهله لان هو مأمن بالصداقة واجد واكيدة قايلاتله دبينها هنا بنشوفوها
رويدة:صح يادوسة معاك حق انا اللي مشيت بأحلامي واجد وبعيد بكل
سندس:يادودي معش اتفكري واجد يبيني ولا لا انتي اللي تتعبي هكي انتي قولي كلمة وحدة لو عندي فيه خير وربي كاتبلي فيه نصيب حيجيبه لكي من غير ماتتعبي ولو ماعندك فيه نصيب لو درتي شنو مش حتاخذيه
رويدة:صح حتى انا بنخليها علي ربي
سندس:هي صبن خلنا انديرو قهوة حس راسي مصدع بكل
رانيا:حي قهوة رؤوف انسيتها بكل
رويدة تضحك:اسملا عليه اللي عابي عليك
سندس:خلاص صبي ديريله وديريلنا نحن معاك وجيبيلنا نشربو هنا
رانيا:تمام مع جيت رؤوف شورهن
رؤوف:صباح الخير
البنات:صباح النور
رؤوف:رنوشة وين قهوتي
رانيا:اهي واتية غير نرجا فيك تطلع
رويدة وسندس قعدن يضحك ورانيا اتفنص فيهن
رؤوف:كنكن شن فيه
رانيا:مافيه شي غير هذينا باردات غابي فيهن
رؤوف يضحك:لا عارفهن
رانيا;خلوكم هنا انجيبها ونشربو كلنا
كلهم:تمام وخشت رانيا ادير في القهوة وبعد 5دقايق وتتها وطلعت بيها وشربو كلهم مع بعضهم
“”
بعد اشوي جن امهاتهن وخشو قعدو ايوتو في الغدا وتغدو وبعدها كلهم خشو ياخذو في قيلولة
سندس ورانيا ورويدة خشن للدار بيرقدن سندس راقدة هي ورانيا عالسرير وريدة مفرشة لوطة
رانيا اول ماحطت راسها عالمخدة دغري رقدت اما سندس حاولت ترقد وتقلبت ايمين ايسار ماجاها نوم
سندس:رانيا
ورانيا مااتردش
سندس:رويدة
رويدة:نعم
سندس:جاك نوم
رويدة;لا حاولت نرقد بس مش ناعسة
سندس:ولا انا جاني نوم شن رايك نمشو انعومو
رويدة:هيا
سندس:استني انوعو رانيا بالك تمشي معانا
سندس:رانيا رانيا بنمشو للبحر تمشي معانا
رانيا بصوت يادوبك طالع:لا بنرقد
سندس ورويدة سيبن تليفوناتهن ومشن للبحر بيعومن
“”
عند سراج وفيصل وكانو بيقيلو
سراج:بترقد يانصي
فيصل:لنقني ناعس بنغفي اشوي
سراج:تي باهي انا مش جايني نوم شن اندير
فيصل:عدي كسد عالشط اشوية وانا انغفي نص ساعة ونلحقك
سراج:ماتبقى الا هك وصبى
“”
سندس ورويدة ايعومن وجوهن سمح
رويدة:حي حي صاحبك جا
سندس:وووه عالبرادة مااتبحتيش فيه فكينا منه
سراج شافها في البحر:تي شنو هالهم وين مانمشي نلقاها قدامي عليك حالة وخلاص
قمعز علي كرسي وقعد ايتفرج عالناس اللي اتعوم وطبعا اينابش في كل وحدة مخطمة?
سندس ورويدة مازال ايعومن ومنسجمات
سراج حس انها جو غطسة كان لابس شورت امتاع بحر ازرق وعليه تيشرت ابيض سلح تيشرته وخش للبحر
رويدة:حي عليه عليك جسم فيه
سندس:من هذا
رويدة:اللي تعاركتي معاه
سندس:اوووف ماقتلك معش اتبحتي فيه هالبارد
رويدة:والله بحتت فيه بالصدفة بس اتصدقي لنقنه طرررف
سندس:شكلها عداتك رانيا في قلة الادب وبعدين وين اتحقي فيها السماحة قليل هالادب والاسلوب ودمه ثقيييل اخرى
رويدة:وسعي بالك والله الشاب حليوة
سندس:مني انا عدي خوذيه بكل وتمت بتطلع
رويدة:وين ماشية
سندس:خلاص مليت بنطلع
رويدة:حتى انا نطلع معاك مافيا ماقعد بروحي وطلعن وماشيات للمصيف
وهنا في الطريق وقريب مالشاليه جتهن رانيا اتهزب
رانيا:هذي اسمها خيانة
سندس:وعيناك مابيتش توعي
رانيا:كذابات وبعدين انتي يافرخة ياللي اسمك رويدة لما تطلعي واتخلي فونك جنب حد راقد حطيه صامت سكن وهو ايرن
رويدة:من
رانيا:هاكيه وين نندري عليه
رويدة فتحت فونها:حي هذا معاذ ومازال ماكملت فونها رن عليها
رويدة:ايوا معليش كنت في البحر وفوني في الشاليه
معاذ:لا مافيش مشكلة كنت بنقولك جايب امي وخواتي بيتعرفن عليك
رويدة:توا
معاذ:اها قريب من شاليكم توا اهو قاعد انشوف فيكن
انتي والبنات
رويدة تبلع في ريقها:تمام تفضلو وسكرت
رويدة:حي عليا جاي هنا حقن منظري كيف ايضحك
سندس تضحك:لنقنه ايضحك بكل
رانيا تضحك:وانتي شر منها
رويدة:حي عليا شن اندير ادبشي مبلول وقاعدة ضحكة ?
رانيا:بلا طروح عادي عاد كنتي اتعومي سلمي عليهم عالسريع وخشن بدلن وانا توا انخش بسرعة انوعيهم جوا
رويدة وسندس;تمام
ووصلو فيهم هل معاذ
سلمت رويدة عليهم وهي محروجة
معاذ شافها ومبتسم وماسك ضحكته علي شكلها
معاذ:هذي رويدة يابنات
معاذ:انعرفك عليهن بالنسبة الهذي طبعا ست الحبايب وهذي مروة اصغر مني طول وهذي مودة اللي بعدها وهذي مرام وهذي مهى وهذي ميس اخر العنقود
رويدة:اهلين بيكن تشرفت بمعرفتكن
مروة:ونحن اكثر واخيرا تعرفنا عليك
ام معاذ:ديما يحكيلنا معاذ عليك وعلي صداقتكم ولما قال قاعدة في المصيف قلناله نبو انشوفوها
مودة:واخيرا شفتنا اختنا السادسة
مرام:معاذ ديما يشكر فيك وايقول زي اختي
رويدة زعلت بس ماحبت اتبين:حتى هو مشاءلله عليه ونعتبر فيه زي خوتي بزبط
سندس:تعالو قمعزو تفضلو وقمعزو عالطاولة برا
وطلعو كلهم من جوا وسلمو عليهم بس معاذ كان متفق مع امه وخواته ان ايقولو سبب الزيارة انهم بيطمنو عا البنت اللي غرقت وايتأسفو بما انهم اصحاب المصيف عشان ماايحط رويدة في موقف بايخ وبعدها معاذ استأذن بيعدي يبرم عالمصيف وسيب خواته وامه معاهم
خشت رويدة غيرت دبشها وطلعت وقعدت هي وصحباتها ايخرفن معاهم وانسجمن هنا والبنات عالاخر
“”
عدى اليوم بدون احداث تذكر وفي الليل عند الساعة 11سيبو المصيف وروحو هل رويدة روحو الحوشهم وهل رانيا وصلو سندس وامها الحوشهن وعدو الحوشهم
“”
عند سندس باتها كلمهن وقاللهن مروح في الطريق وقعدن يرجن فيه
“”
اما عند سراج حتى هما روحو مالمصيف ونزل فيصل سراج علي فيلتهم
سراج:اندوش وانجيك نمشو العدي (وطبعا يقصد الشقة?)
فيصل;لنقني تاعب وباطل يانصي خليها بكرا
سراج:تامة يانصي سلام
فيصل:سلام
وعدى فيصل الحوشهم وخش سراج الفيلتهم ودغري دوش وكان تاعب وناعس امتد في سريره ورقد دغري
“”
اما عند سندس عالساعة 1:30روح باتها وخذاته بالحظن وقعدت طول الليل هي وامها ايخرفله عالمصيف والأجواء اللي صارن فيه وانهن انسجمن
وطبعا سندس ماحكتش اللي صار الباتها لانها قررت تنساه ومعش اتفكر فيه وقالت ان اللي جمعها بسراج اكيدة صدفة ومش حتكرر مرة اخرى
#يتبع
زعما شن فيه في قلوبهم توا كره او حب وزعما حيجمعهم القدر مرة ثانية ولو جمعهم وين بيجمعهم مرة اخرى كله حنعرفوه في الحلقات الجاية ?
أسفة عالتأخير بس النت خرب ومش عارفه امتى حيصلح نزلت الحلقة هذي بنت جيرانا عشان عارفة تستنو فيها بس حنوقف الرواية يومين ثلاثة مش عارفه بزبط لين يصلح النت بس طبعا مش حنوقف الكتابة حنقعد انجهزلكم في الحلقات عشان بعد يصلح انزللكم دغري معليش بنات والله الظروف اقوى مني كان عليا مانبيش انوقف بكل ادعنلي يصلح بسرعه
گـتـابـتـي Koka Saleh