منحرف وأحببته

#مـنـحـرف_وأحـبـبـتـه
الـحـلـقـة (16)
اشرقت صباح يوم جديد علي حياة أبطالنا سندس وسراج
رن منبه فون سندس الساعة 8 وعت وطفاته صبت وخشت للحمام خذت دوش سريع وطلعت صلت الصبح ونزلت لوطة دارت نسكافيه وفتحت التلاجة خذت منها طرف شكولاطة(ماغباكن تلاجة العرسان ديما معبية شكولاطات وحق ربي خاطري نجوز عشانها?) المهم فطرت ورقت الدارها طلعت شنطة السفر وبدت اتوتي في دبشها بس لاحظت حاجة (لانها كانت تبيش تجوز ونفسيتها كانت تاعبة قبل الفرح ماااختارتش شي من دبشها ورانيا ورويدة هنا اللي اختارلها دبشها كله وطبعا لانهن ايتوتن العروس فكل الدبش امتاع النوم وامتاع الحوش كان حدث ولا حرج يعني كله حاجات قصيرة وضابطة وعريانه ?كانت بيجامة وحدة بس طويلة هي اللي لبستها توا)
سندس غمتلها:عطكن حبة في اختياركن توا شن بنلبس قدام هالمتخلف اووووف قعدت اتفكر
سندس:لازم نحجزو كل واحد في غرفة مانقدرش نلبس قدامه هكي لين اندير حل ونشري دبش مسقم اصلا هالصايع الواحد لازم ايتحجب قدامه مش يلبس هكي وقعدت اتحط في الشنطة
“”
في دار سراج رن المنبه وكان ناعس طفاه وبعدها نط كيف المفجوع وبحت للساعة دغري لقاها تسعة الا عشرة
سراج:حي علما حنتأخر هكي مزال بنوتي ادبشي واندوش ونفطر صبى يجري خش للحمام غسل وجه وطلع الدار سندس لانه ادبشه فيها عشان هي دار نومهم وماانتبهش شن لابس او ماعدلش لان ديما يلبس هكي(كان لابس شورت نص ازرق ومن فوق مش لابس شيئ)
سندس كانت مطبسة واتحط في دبش في شنطتها وهو خش بسرعة طلع الشنطة مالدولاب وحطها عالسرير جنب سندس هي لفت عليه بتهزبة عشان خش من غير ماايدق وانصدمت لما شافاته وغمضت عيونها ولفت وجها
سندس بعصبية:هذا شنو اللي لابسة وكيف تسمح النفسك اتخش عليا هكي
سراج:كيف تسمح النفسك شن اتحقي فيا عريان قدامك ماني لابس
سندس:اقطع لبسك هذي لبسة اتسمي فيها امشي البس حاجة عليك وتعال
سراج:مش طالع بنوتي ادبشي قبل
سندس:وأنا قتلك اطلع البس حاجة ورد وتيه ادبشك
سراج:اسمعي صبح وماعنديش جو انتعارك معاك قتلك انا متأخر معش فيه وقت يادوبك انلحق انوتي ادبشي واندوش ونطلعو عشان انطقو في المطار
سندس بعصبية:وانا اللي قتلك اوعى متأخر مادخلنبش بيك اطلع البس دبشك حتى انا بنوتي ادبشي ومانقدرش انبحت فيك وانت هكي
سراج بعصبية:دبشي ومش مغيرة لين انوتي الشنطة عاجبك هكي كملي توتاي دبشك مش عاجبك خليك لافة وجك لين نطلع
سندس بعصبية:انا حنطلع لين اتكمل واحسنلك مااطولش وجت بتطلع
سراج:عليك حركات ياشريني عمرك ما شفتي شاب هكي
سندس عصبت ونست ولفت وجها شوره وبعد شافاته ردت لفت وجها اخرى
سندس بعصبية:اكيدة عمري ماشفت شاب هكي وين بنشوفه ان شاءلله ولا تحسابني كيفك
سراج:اووووووف باهي اطلعي بنكمل ادبشي
سندس:انا بنطلع بجوي مش انت اتلزني وطلعت وسيباته
سراج:مريضة عليك حركات تحسابهن بيمشن عليا ياشريني انحرجت تي والله حافظ حركاتكن كلكن وبعدها قعد ايوتي في دبشه وبعد كمل سكر الشنطة وخذا ادبشه اللي بيلبسه وطلع مالدار وعدى الداره وخش ايدوش سندس جت الدارها وهي غامتلها من سراج وكملت توتاي دبشها وسكرت شنطتها وبدت تلبس وكانت لبستها(بلوزة علي نص الفخذ دمي و جينس دمي وفوقهن لبست جاكة طويلة سودة وكاويش بيج ووشاح بيج وشنطة يد صغيرونة فيها فونها ونضاراتها وعطرها سودة)
سراج دوش وطلع لبس(جينس ابيض وعليه قميص وردي هادي بكل وكاويش كحلي ارضيته مالجنب بيضة)كمل لبسه مشط شعره وبخ عطره وطلع نزل للمطبخ مالقش فطور وطبعا متعود بعد يوعى ايدوش ويلبس وينزل يلقى فطوره واتي رقى فوق السندس ودق عالدار سندس فتحت
سندس;كنك
سراج:وين الفطور
سندس:مش طامرته في جيبي الفطور لوطة في المطبخ
سراج:عليك حناطة كان القيت حاجة لوطه راه مارقيتش
سندس:كييف ماالقيت شي فيه نسكافيه خفقته لوطة وفيه حليب طايب صبه واشرب ولو ماتبيش فيه شاهي وحليب صب واشرب
سراج:قصدك تبيتي انوتي بروحي
سندس كانت غامتلها ماللقطة اللي دارها الها قبل شوي
سندس:وبالك تبيني انا انديرلك
سراج:مش المفروض انك مراتي
سندس بحت فيه من فوق اللوطة:لا مش مراتك وهذا الاتفاق اللي اتفقنا عليه وقلنا كل واحد حر في نفسه وايدير اللي اتريحه
سراج:مادخلش الحرية بالفطور ماشرطنهش هذي
سندس:لا دخلها وبعدين اعتبرها شرط من توا وكل واحد ايدير حاجته بروحه
سراج:صار هكي يعني ماتبيش اديريلي فطور
سندس:لا وكل حاجة لوطه واتية كول اللي اتريحك وخشت وسكرت الدار
سراج بصوت عالي:ماشي ياسندس والله تندمي عليها
نزل لوطه وهو غامتله وقعد ايلبز وماقبل حوته دار كباية نسكافيه شربها ورقي فوق وهو معصب فتح باب الدار من غير ماايدق وخش وخذا شنطته
سندس:الناس ادق قبل مااتخش
سراج:هذي داري وهذا حوشي وانخش للمكان اللي ايريحني
سندس:والله شن تحساب
سراج قاطعها;اسمعي وقت وتاخرنا كان بتطلعي الحقيني وطلع
سندس:والشنطة
سراج:شيليها بروحك كل واحد حر مش هذا الاتفاق
سندس;وعادي انشيلها شن تحسابني
سراج ماردش وطله وسيبها ونزل لوطى وطلع السيارته وفتح الشنطة حط شنطته وخلاها مفتوحه عشان تنزل بشنطتها واتحطها
سندس قعدت اتعاني في الشنطة واتنزل فيها مع الدروج وطبعا الشنطة كانت ثقيلة ماقبل حوتها نزلتها مالدروج وطلعت للسيارة وجت بتحطها في الشنطة وماحوتك رفعتها وحطتها في السيارة سراج كان راكب في السيارة وايشوف فيها في المراية وهي اتعاني فيها كان يضحك ومتشمت فيها ركبت سندس في السيارة وهي غامتلها بكل قمعزت وسكرت الباب بالقوة
سراج من دون ماايشوفلها:مازلت نبيه باب السيارة
سندس قلبت وجها للروشن ومابتش اترد عليه
وخر سراج السيارة وبيطلع
سندس:قبل مانطلعو مالفيلا بنعدو الهلك انسلمو عليهم
سراج شافلها زين وسكت ودرس قدام فيلة هله ونزلو لقوهم يفطرو
سراج:صباح الخير عفوفة بشويش عالفطور بحتي كيف باقية دبة
عفاف فنصت فيه ماتبيش اتبان دبة قدام راجلها
محمد يضحك:لاول مرة في حياتك اتقول كلمة صح
عفاف:حرام عليكم والله ماني دبة
سندس:بالعكس اعميمة والله جسمك حلو
عفاف ابتسمت:نجك ليا ياكنتي السمحة هذا الكلام اللي ينسمع عالصبح مش كلامكم
سراج:اصلا مش حاقتك زمان كيف كنتي كان هذا ماقالت هكي لنقنه حودة لازم يجوز
محمد:صح هي معش تمت كيف قبل وسمنت اشوي لكن والله ماانبدلها بمية بنت اصغيرة هذي عشرة عمري وحب حياتي
سندس ابتسمت وعجبوها كيف ايحبو بعضهم خطرو عليها باتها وامها
سراج:مية بنت مرة وحدة غير بلا طروح كان تلقى مية بنت احتمال حتى الفيلا معش اتجيها
محمد فنص فيه:سراج بلا تشعيل نيران
عفاف:خلاص سراج بلا دوة زايدة وقمعزو افطرو
سندس:صحة اعميمة فطرنا قبلكم
سراج بحت في سندس:فطرنا من بدري فطرتني مراتي الكويسة احلفت ماادير الفطور الا بروحها وجاباته ليا لعند السرير
عفاف فرحت:مشاءلله نجيها الشاطرة لكن ماادلعيش واجد راه سراج بعد يلقى دلع معش اتفض معاه
محمد:اسألينا نحن دلعناه ووحلنا فيه اي غلط بنيتي ايديره لكي قوليه ليا دغري
سراج يحكيلها بشويش:اي دلع هذا اللي مايندري ايقول اسبول
سندس لفت وجها:لا عمو مازال كويس وشافتله بالجنب
سراج:خلاص نحن جينا بنسلمو عليكم قبل مانمشو بس خلاص طيارتنا قريب
محمد:تمشو واتجو بالسلامة
عفاف تبكي:مع السلامة وحيفضى عليا الحوش والله
سراج:اي يفضى عفوفة عساس انا كنت نقعد معاك فكينا مالدراما الزايدة بس
عفاف:باهي ياسراج صار انا دراما
سراج باس علي راسها:معليش عفوفة لكن حتى انتي كثرتي علي كل حاجة تبكي
قعدو ايسلمو عليهم وبعدها طلعو ومشو للمطار قعدو قريب ساعة يستنو في المطار وهما مابين مرة ايتناقرو ومرة ماحد يحكي مع حد لين نادو علي طيرتهم وركبو فيها قمعزو طبعا في كراسي جنب بعضهم سندس من جوا جنب الروشن وهو من برا من حظهم النزيك كان جنبهم سياح اجانب من روسيا كانو سياحة في مصر وبعدها جو الليبيا وتوا ماشيين التركيا كانو بنت وشاب اصدقاء البنت اسمها #انجلا والشاب اسمه #مايكل طبعا سيرجو عجباته البنت الشقرا وقعد ايبحت فيها وطبعا انجلا عجبها الشاب الحلو اللي عنده لحية اتهبل?وقعدت اتشوفله قعد سراج يعزقلها في ابتسمات وجو وهي نفس الشي
سندوسة قاعدة جنب سراج عالقة سماعات في ذانها وعايشة في عالم اخرى ومش مركزة ابدا في سيرجو بعد اشوي بدا عمكم سراج يفتح في مواضيع مع انجلا ويسأل فيها شن اسمك وهكي انجلا ماصدقت طبعا وطلبت طلب غريب(اسمعن مانقدرش نكتب بالانقلش لان فيه واجد مرات مش حيفهمو وبلا طروح ومانبيش انتفلسف عليكن ومرات حتى انا نغلط في حاجات فخلني نكتبكم كلام انجلا ومايكل باللغة العربية الفصحى وانتن مشنها عساس دوتهم انقلش تمام??)نرجعو للحلقة
انجلا;هل يمكنني الجلوس بجانبك
سراج:نعم
سراج;هي انتي سندس طبعا تسمعش فيه
سراج فك السماعة من وذنها
سندس غمتلها;كنك شن تبي
سراج:امشي من هنا وعدي للكرسي لاخر
سندس بحتت فيه:وعليش ان شاءلله
سراج:شيئ بس انجلا بتقمعز جنبي
مع جيت انجلا وصبت جنب سراج كانت لابسة جينز ازرق ضابط بككل ونظام فيه تشريط من كل مكان وعليه كت حلو أبيض فيه كتيبة بالأزرق
سراج قعد ايبحت فيها وبعدها لف السندس
سراج:هي صبي البنت جت
سندس:لا اكيدة مش مصبية من مكاني
انجلا:ايمكنني ان اجلس بمقعدك وانتي تجلسي في مقعدي
سندس:بالتأكيد لا
انجلا بإستغراب:لماذا
سندس:هكذا لا اريد ان اترك مقعدي انا مرتاحة هنا
سراج:عليش ماتبيش اتصبي صبي وفكيني مالطروح مااتخربيش الجو
سندس:قتلك مش مصبية وقوللها اتعدي من قدامي احسن ماانصبيلها
سراج:اووو باهي ممكن نعرف سبب انك تبيش اتصبي
سندس:هكي ماانحبش توتخذ مني حاجة ليا
سراج قرب منها:شن قصدك بحاجة لكي
سندس بعدت روحها منه:قصدي الكرسي مانبيش نعطي كرسيي
سراج:اوكي تقصدي الكرسي نحسابك تقصديني
سندس ضحكت;??نقصدك من جدك انا بنعتبرك انت ليا فيه واحد يكره واحد ويعتبره له وبعدين انت انسيت الاتفاق اللي بينا ولا شنو
سراج:لا ماانستش الاتفاق نحسابك انتي انسيتيه حبيت انذكرك بيه بس
سندس:لا شكرا متذكرته كويس ومستحيل نتساه وانتمنى هالسنة تكمل اليوم قبل بكرا
سراج: اتصدقي انا أكثر منك
انجلا:من تكون هذه الفتاة ولما لا تريد اعطائي المقعد
سراج:انها صديقتي وتقول انها مرتاحة هنا ولا تريد التغيير
انجلا:اذا لنتركها على راحتها وسنستبدل مقعدك انت وصديقي مايكل
سراج:موافق
سراج:انا بنمشي انقمعز جنبها ومسيبها لكي
سندس:احسن مانفتك الا منك
سراج صبى وحكت انجلا مع مايكل ووافق وجا بيقمعز جنب سندس
مايكل:ايمكنيي الجلوس هنا
سندس:تفضل
مايكل:شكرا لكي
مايكل:مااسمك
سندس:اسمي سندس
مايكل بصعوبة انطقه:انه اسم جميل ماذا يعني
سندس:اسم ثياب في الجنة
مايكل:نعم فهمت انا اسمي مايكل
سندس:اهلا بك
مايكل:مظهرك يدل انكي صغيرة هل لازلتي تدرسين
سندس:نعم ادرس الجامعة قسم هندسة معمارية
مايكل ابتسم:يالها من صدفة جميلة انا ايضا مهندس وقعدو مايكل وسندس ايخرفو عالقراية والهندسة
انجلا:انظر الى صديقتك انها تتكلم مع مايكل وهي تبتسم اظن انهما سعداء سويا
سراج شافلهم:وعفوفة اتقولي محترمة والله كلهن كيف بعضهن
انجلا:ماذا قلت
سراج:قلت اظن كذلك انا ايضا وقعدو ايخرفو وطلعو حاجزين في نفس الفندق اللي حاجز فيه بات سراج الهم
وصلو التركيا والطيارة بتهبط فطلب كابتن الطيارة ان كل واحد يقعد في مكانه ويربط الحزام فرد سيرجو المكانه ومايكل رد المكانه هبطت الطيارة ونزلو الركاب خذا سراج تاكسي وركبو فيه من لاورة وعم السكوت بينهم
سراح:شكلك انسجمتي مع مايكل
سندس لفت وجها شوره وشافتله وبعدها لفت وجها ومابتش اترد عليه
سراح:وعفوفة اتقولي محترمة
سندس شافتله;نعم شن اللي قلته توا شن قصدك بيه
سراج;قصدي واضح كلكن زي بعضكن مااتصدقن راجل يضحكلكن اتهيمن معاه معناها عليش الحركات اللي درتيهن ليا في المطعم وانتي جوك تمام مع الشباب لخرين
سندس بعصبية:اسمع احترم نفسك واعرف روحك مع من تحكي انا مش زي حد وصقع علي اي وحدة قذرة تعرفها وحط في حسابك انا مامشيت الحد ولا جيت الحد انت اللي جبته لعندي والراجل ما حكش شيئ غلط كل اللي حكاه شن اسمي وشن نقرا وبالصدفة طلع مهندس وقعد يحكي علي قرايته وانا نسمع فيه وبس يعني مش زي القذارة اللي حظرتك حكيتها في المطعم وبعدين مش مظطرة انبررلك شيئ نحن مش اتفقنا كل واحد حر في نفسه
سراج;صح هكي اتفقنا بس حبيت انبينلك الصورة السمحة اللي خذيتها عنك
سندس ضحكت:الصورة اللي خذيتها عني باهي اسمع بالله كان الصورة مش واضحة عندك قولي عشان اندزلك فيديو بدالها وقلبت وجها في الروشن(قصفاته ام السان?)
وصلو للفندق وجو عند الرسبشن
سندس:اسمع خوذ دارين مانبيش نقعد معاك في نفس الدار
سراج:بالك انا اللي ميت عليك المشكلة باتي هو اللي حاجز واكيدة حاجز دار وحدة
سندس:اصرف غيرها بدارين
سراج:اكيدة لاني انا بروحي مانبيش وجك معايا وقعد يحكي مع الراجل بالتركي(انسيت انقوللكم ان سراج خاطي الانقلش عنده ثلاث لغات اخرى تركية واسبانية وألمانية طبعا متعلم الراجل ناعلي منه وخلاص?)
حكا مع الراجل واجد وطبعا يحكو تركي فسندس كانت زي الاطرش في الزفة مش فاهمة شيئ
سندس:فهمني في شن يحكي
سراج:اصبري وقعد يحكي مع الراحل وطولو وهما ايتناقشو
سندس:تي فهمني شن تحكو
سراج:الغرفة المحجوزة غرفة زوجية يعني الاثنين
سندس:عينك مانبيش نقعد معاك
سراج;وحتى انا مانبيش وجك لكن من بدري انحاول معاه قالي مافيش غرف فاضية بكل يعني مافيش الا ان نقعدو فيها مع بعضنا وانتحملو هالهم
سندس:لا مستحييييل اصرف
سراج:هذا اللي فيه بالك تبيني نبنيلك توا دار عشان البرنسس سندس ترقد فيها
سندس;انا حنحكي معاه اكيدة فيه دار فاضية
سراج:وريني شطارتك
وقعدت سندس تحكي معاه بس بالانقلش مش بالتركي حاولت واجد مع الراجل بس للاسف نفس الكلام اللي قاله السراج قاله الها سراج كان متسند عالفاصل الي بينهم وبين الراجل اللي زي المكتب اكيدة فهمتوني متسند عليه وحاط يده تحت خده وايبحت فيهم
سندس لفت وجها واسندت عالمكان بظهرها:اووووف
سراج لف واسند زيها:شنو الحل توا
سندس:مافيش فندق قريب من هذا
سراج:لا مافيش وبعدين مانقدرش انسيب الفندق اللي حجزه باتي واصلا هذا احسن فندق في تركيا
سندس قعدت ساكته وقلبت وجها
سراج:اسمعي انا بنرقا فوق تعبان مالسفر رقم الدار 30 كان اقتنعتي الحقيني وعدى
سندس قعدت اشوي مصبية وبعدها لحقاته وخشت للدار لقاته مغير دبشه ولابس شورت راب اخضر وعليه تيشرت سمائي هادي وفاتح شنطته واينظم في الدبش في الدولاب لقت سندس شنطتها جنب الدولاب( طبعا شالوها الهم اللي يشتغلو في الفندق)شالتها وحطتها عالسرير وطلعت منها البيجامة الطويلة اللي لبستها يومتها اصلا ماعندهش الا هي طويلة وباهي الي دايرة احتياطها وجايبتها معاها خذتها وخشت للحمام غسلت وجها ولفت شعرها ولبست البيجامة وطلعت لقت سراج مولع التلفزيون وايتفرج خذت دبشها مالشنطة ونظماته في الدولاب ورفعت شنطتها وشنطة سراج فوق الدولاب عشان ماايديرنش حوسة في الدار كانت نعسانة وتاعبة بكل مالطيارة جت شور السرير مع تطفاية سراج للتلفزيون وصبى وجا شور السرير وقعدو ايبحتو في بعضهم المدة دقيقتين ومش عارفين كيف يصرفو
سراج:عليش اتبحتي فيا هكي تبيني انديرلك زي ابطال الافلام المصرية وانقولك انتي ارقدي عالسرير وانا نرقد عالكنبة
سندس:تهيالي المفروض هكي
سراج:لا ياماما غلطانة انا مانعرفش نرقد الا عالسرير
سندس:وانا نفس الشي مانعرفش نرقد عالكنبة ومش انت الراجل علي قولتك المفروض انت اتحمل
سراج:لالا اسف مانقدرش انتحمل الرقدة عالكنبة
سندس:يعني شنو
سراج:يعني اهو السرير كبير وواسع لو حابة ترقدي عليه مش حنقولك ماترقديش عادي ارقدي وخلاص
سندس:وبالك تقدر اتقولي ماترقديش عليه بالك شاريه بفلوسك وانا مانندريش
سراج:لا مش شاريه بس ماجره بفلوسي
سندس ضحكت:فلوسك مازال بعد سنة يقعدن فلوسك توا مازال فلوس عمو محمد
سراج رقد عالسرير:هذينا امور عائلية مالكيش علاقة بيهن
سندس:يعني انت قصدك جديات بترقد هنا
سراج:اكيدة ماانبصرش رقدت وفضت
سندس:ماتقعدش ثقيل انا وين بنرقد
سراج:اها انا ثقيل وانتي ارقدي عالكنبة
سندس:مش بجوك
سراج:لا بجوي ارقدي عالكنبة
سندس:عناد فيك راقدة هنا ولو انت متضايق انت ارقد عالكنبة
سراج:انا مش متضايق جوي تمام ولف وجه وتغطى ورقد
وسندس رفعت الورغان وخشت ودارت وجها للجيهة الثانية قعدت مرتبكة وخايفة بس لانها كانت تاعبة سيطر عليها النعاس ورقدت اما سراج اول ماحط راسه عالمخدة دغري رقد من غير اي تفكير

في بلادنا الحبيبة وتحديدا في العشية وفي حوش هل رويدة خاصتا عالية مشت الجارتها عندها عزاء شالها راجلها ومشى ايكسد مع اصحابه في الحوش كانت قاعدة رويدة وعصام ورؤوف وكل واحد قاعد في داره لعند لما رن الجرس طلع عصام ايحل في الباب ولما فتحه تفاجئ بحنين وباتها
عصام:اهلا بنت الخال وسلم عليها وسلم علي باتها
بات حنين:شن اخباركم ووين عالية
عصام:الحمدلله كويسين وامي مشت اتعزي خش خش رؤوف رويدة جوا وامي اشوي واتجي
بات حنين:لا والله مش فاضي وينهم انخش انسلم عليهم وعندي شغل بنمشيله خش سلم علي رويدة ورؤوف وبعدها روح
رويدة وحنين وعصام قمعزو في الصالة
رويدة:شن اخبارك حنين شن دايرة
حنين:الحمدلله كويسة
عصام:شن خطرنا عليك
حنين:والله مكسدة في الحوش بروحي قلت نمشي انكسد مع دودي قبل ماتجوز وانرايف عليها
رويدة ابتسمت:نجك ليا حبيبتي بس قولولي شن اتحبو تشربو قهوة ولا نسكافيه
عصام:انا ماتحسبيش احسابي طالع
حنين:ديريلنا قهوة احسن
رويدة:تمام ومشت للمطبخ
عصام:شن سبب زيارتك شكلك فكرتي في كلامي
حنين;فكرت فيه واقتنعت بيه وقررت لازم مانستسلمش واندير اي حاجة عشان ناخذ حبي
عصام:وفي راسك خطط
حنين:اها وفيه حاجات نبي مساعدتك فيهن
عصام:تمام بس من غير ماحد يعلم
حنين:اكيدة
عصام:ابدي خطط ماليوم فرصتك قاعد في الحوش ويقرا
حنين:كلها كم يوم وتطلع رانيا من حياة رؤوف بكل
عصام صبى:هكي تعجبيني هيا سلام انتلاقو بعدين وطلع وحنين صبت وعدت للمطبخ الرويدة وقعدت اتخرف معاها وتسأل فيها علي فرح سندس والأجواء فيه جهزت القهوة ورويدة دارت صفرة الهن وصفرة الرؤوف
رويدة:توا انشيل صفرة رؤوف ونشربو نحن قهوتنا في الجنان
حنين:تمام حتى انا كنت بنقولها لكي
رويدة:باهي اللي فكرتي في الجية والله كنت مكسدة بروحي
حنين:حتى انا نفسك كساد هذا حال البنت الوحدة الشباب مايقعدوش بكل وانا ديما قاعدة في الحوش بروحي
رويدة:والله نفسك حتى انا ومسكت صفرة رؤوف بتشيلها له مع رنت فونها وكان معاذ
رويدة:هذا معاذ اشوي بنرد عليه
حنين:تمام ردي عليه وانا ناخذ صفرة رؤوف انشيلها له وبعدها صفرتنا علي ماكملتي
رويدة:تمام وردت وقعدت تحكي مع معاذ
حنين خذت صفرة رؤوف ومشت شور داره ودقت وفتحت الباب عليه
حنين:جبتلك القهوة عشان اتصحصح القرايتك
رؤوف:شكرا حطيها ليا عالطاولة توا نشربها
حنين حطتها:امتحانك ساهل ولا واعر
رؤوف:فيه صعوبة شوي
حنين:هانت خلاص مازالتلك سنة واتكمل
رؤوف:اها الحمدلله
حنين:وبعدها بتجوز رانيا
رؤوف شافلها زين:اها بنجوزها
حنين:انت واثق من حبك الها
رؤوف;واثق بكل اخرى ومافيش غيرها حتكون زوجتي
حنين ابتسمت:ربي يسعدكم مع بعضكم رانيا بنية كويسة وتستاهلك بجد
رؤوف;ومن امتى الكلام هذا
حنين;من زمان ماتاخذش عالكلام الهبل اللي قلته في البيان ممكن بس غرت اشوية بعد شفتك تحكي معاها
رؤوف:تمام باهي معليش نقدر انكمل قرايتي
حنين:اكيدة وجت بتطلع سمعو جرس الباب ايرن طلع رؤوف بيفتح الباب مع رنت فونه اللي سيبه في الدار حنين شافت لقتها رانيا ابتسمت بخبث وردت
رانيا:خيرات حبيبي
حنين:اهلين رانيا
رانيا تغيرو ملامحها:من انتي
حنين:انا حنين بنت خال رويدة
رانيا:انتي وين قاعدة اتردي علي فون اوفا
حنين:كنت انهدرز انا وهو في داره وهو طلع بيفتح الباب وانتي رنيتي قلت انسلم عليك
رانيا:صار قلتيلي في داره وسكرت في وجها
حنين:مازال ياحلوة ياما بتشوفي وطلعت مالدار
رانيا اول ماسكرت من حنين دغري رنت علي رويدة اللي كانت تحكي مع معاذ ولما خشتلها رانيا في الانتظار سكرت من معاذ وردت عليها
رانيا اتهزب:انتي يااحمارة ياممدودة الوجه انتي وين قاعدة لين حنين الحلوة قاعدة مع رؤوف في الدار
رويدة:مغير بالشوية عدت اتشيله في قهوة
حنين:وكنك ماشلتيها انتي ولا ايديك محنيات واصلا هي شن جاية تبي عندكم
رويدة:قالت بتكسد معايا قبل مانجوز وبعدين انا كنت بنشيله القهوة بس رن معاذ قلتلها شيليها له انتي ليش معصبة شن صاير
رانيا:ردت عليا علي فون معاذ واتقولي كنت انهدرز معاه
رويدة:مازالت ماطقت خمس دقايق ماشيتله واكيدة قصدها عالهدرزة سألته علي امتحانه انتي عارفة رؤوف كويس ماعنده جو هدرزة وحركات مع حد
رانيا معصبة:باهي كيف اترد عليا انتي عارفة كويس قديش الحاجة هذي واعرة
رويدة:عارفة ياقلبي اهدي وتوا نفهم منها ليش دارت هكي بس نبيك تطمني من ناحية حنين عمرها ماكانت بينها وبين رؤوف حاجة
رانيا:انا مش حنقدر انتريح ونهدى هكي نبي انجيكم غادي
رويدة:خلاص حبي تعالي قاعدة نرجا فيك
رانيا:اسمعي مااتقوليهش الهم بنطب عليهم فجاة
رويدة تضحك:مجنونة مافيش شي والله لكن وعد مش قايلة الحد بتجي تمام
رانيا;تمام مسافة الطريق وانكون عندكم سلام وسكرت
ومشت الباتها وخذت منه السيارة عساس تبي حاجات مالقرطاسية وبتجيبهن
حنين قبل مااتخش للمطبخ سمعت رويدة وهي تحكي وعرفتها تحكي مع رانيا وفهمت من كلامها ان رانيا بتجي وقعدت اتفكر شن ادير وبعدها خشت علي رويدة في المطبخ وخذن القهوة للجنان وقعدن ايخرفن ويشربن فيها
اما رؤوف طلع للباب لقاه واحد يسأل علي عصام قاله مش قاعد وخش الداره ايكمل في باقي قرايته
“”
عند عيت سراج?
وعت سندس قبل بحتت للساعة لقتها 8بعد المغرب صبت غسلت وجها وكانت جيعانة بكل فققرت تنزل اتعشى لوطى غيرت دبشها ولبست(جينز ابيض وعليه بلوزة طويلة سمائي هادي ووشاح ليكرا كحلي)جت بتطلع وبعدها قالت اتوعي سراج واتشوفه مرات يبي يسمسم?
سندس:سراج سراج
سراج:فوتيني عفوفة مانبيش نوعى
سندس:سراج انا مش امك?
سراج فتح عيونه:ييي هذي انتي انسيت اني اجوزتك
سندس:عساس انا اللي متذكره المهم بننزل انتعشى تبي تنزل معايا ولا لا
سراج:لا ماعنديش جو ننزل توا نطلب حاجة ناكلها هنا
سندس:ماشي وطلعت ونزلت للمطعم لوطى وطلبت عشاء وقعدت ترجى فيه قعدت قريب عشر دقايق وبعدها اذكرت انها نسيت فونها في الدار صبت عشان اتجيبه واتكلم هلها واطمنهم عليها مشت ووصلت للدار وفتحت وهوب انصدمت في الموقف اللي قدامها سراج مع انجلا في الدار ومرقدها عالسرير وايبوس فيها
سندس بعصبية:شنو هذا?
سراج نط وصبى مرة وحدة:انتي كنك وشن جابك توا
سندس بصوت عالي:جابني ربي عشان انوقف عالمهزلة اللي قاعدة اتصير هنا
سراج بعصبية:انتي مادخلكش بيا
سندس بعصبية:انا مش مدخلة فيك لكن دخلني في المكان اللي قاعدة معاك فيه المفروض ايكون محترم وماايصيرش فيه هكي
انجلا:ماذا يجري هنا ومابها صديقتك تصرخ هكذا
سراج:اهدئي لا شيئ يجري سوف تخرج الان ونكمل ماكنا نفعله
سندس غمتلها وبصوت عالي:انتي اخرجي الان من غرفتي
انجلا:غرفتك كيف هذا اليست غرفته هو وشافت السراج
سراج:اجل انها غرفة مشتركة لنا سويا لكنها سوف تخرج منها الان
سندس:اخرج انت وهي انا لن اتحرك من مكاني
انجلا شبه فهمت:انها ليست صدقتك انها زوجتك
سراج:لالا ليست زوجتي
انجلا:بلا زوجتك انظر لتلك الخواتم بأيدكما وايضا تشتركان في نفس الغرفة ارجوك لا تتحدث معي مرة اخرى وطلعت
سراج بعصبية:تريحتي توا انسجمتي هكي بعد خربتي عليا الجو نحن مش اتفقنا ماحد يدخل في حد
سندس بعصبية:انا ماادخلتش فيك حتى لو بتنحرق انت وهي بس قذارتك هذي مااديرهش في مكان انا فيه
سراج:الكارثة انك تطلعي بديريلي جو غيرة وانك غايرة عليا
سندس:من أمتى واحد يكره واحد ايغار عليه حط في راسك اني نكرهك للموت بس انا المكان اللي نقعد فيه لازم يقعد محترم ومانسمحش ان حاجات حرام زي هذينا ايصيرن فيه تركيا كلها قدامك ومليانة ديسكوات وملاهي ليل تقدر تنتلفلهن وادير اللي تبيها ماليش بيك اي علاقة بس هنا لا
سراج:انا ماحدش ايمشي عليا كلامه واندير اللي نبيها في المكان اللي يعجبني وانجلا حنجيبها واندير اللي نبيها معاها هنا وفي المكان هذا وجا بيطلع
سندس:جرب هكي وانا دغري انكلم عمو محمد نحكيله كل حاجة وهو اللي حيصرف ومن بعدها الصفقة اللي بنتحملو بعضنا عليها بتكون بح
سراج لف وبعصبية;قصدك اتهددي فيا
سندس:ايوا بزبط?
سراج:يعني جو تمسكي فيا مع يدي اللي توجعني عشان تبيني انسيب اللي اندير فيه
سندس:اتسيب مااتسيبش هذي مش مشكلتي انا كل اللي نبيه ان مكان انا فيه مااديرش فيه قذارتك هذي انت مش خايف من ربك
سراج بعصبية:خايف مش خايف حاجة ترجعلي وبعدين مااديريش روحك شريفة واجد انتي ماتفرقيش عنها في شيئ اقل شيئ هي اتبيع في روحها بمزاجها مش انتي هلك هما اللي باعوك
سندس بعصبية:احترم نفسك وعمرك ماتحكي علي هلي لاني انا عند بابا بالدنيا كلها كل القصة ان ولد اصل وماحبش ايرد ناس ساعدوه بس لما انا رفضت كان بيبيع مصنعه وايردلكم الفلوس وانا خفت اتصيرله حاجة عشان المصنع هذا روحه وبابا عمره ماتعود يشتغل عند حد هذا عليش وافقت خوف علي بابا بس العيب عليك اللي وافقت عشان تورث باتك بالحياة ركز كويس في سبب موافقتي وسبب موافقتك حتلقى فرق كبير ناس ضحت بسعادتها عشان غيرها وناس كانت انانية وفكرت في نفسها وبتورث باتها بالحياة وخذت فونها وطلعت مالدار سراج وجعه كلامها لان هو كان مش عشان بيورث باته بالحياة زي ماقالت لان باته مريض وهذي كانت امنيته بس مش قادر يحكي مرض باته الحد
سندس نزلت تحت وطلعت للحديقة برا وهي متضايقة وغامتلها قمعزت علي مقعد فتحت فونها وفتحت Wi_Fi لقت فيه نت مفتوح فتحت الوتس لقت امها فاتحة رنت عليها
سعاد:خيرات دوسة شن اخبارك وشن دايرة
سندس:الحمدلله ياماما كويسة شن اخباركم انتو
سعاد:الحمدلله كويسن
فرج جنبها وكان ايقوللها عطيها ليا
سندس:افتحي الاسبيكر خليني انهدرز معاكم امها فتحت الاسبيكر
فرج:كيف حالك يادوسة وشن دايرة
سندس:الحمدلله يابابا كويسة انت شن اخبارك واخبار صحتك
فرج:الحمدلله كويس ورديت نخدم في المصنع من جديد
سندس:الحمدلله ودير بالك علي صحتك يابابا
فرج:حاظر يابابا قوليلي شن اخبار سراج معاك
سندس:كويس مافيش زيه في الدنيا بكل(وهي تقصد مافيش منه في الحقارة)
فرج;باهي الحمدلله ردبالك من روحك ومن راجلك يادوسة
سندس:حاظر يابابا عطيني ماما خذت امها الفون وتباعدت من فرج
سعاد:ها بنيتي طمنيني كيف حياتك مع راجلك كويس معاك
سندس:اها كويس بس انا مرايفة عليكم بكل
سعاد تبكي:حتى انا والله الحوش فضى عليا بكل وطول اليوم قاعدة بروحي قعدت انقول ياريت مازوجناك
سندس تبكي:ياريتكم مازوجتوني
سعاد بخوف:كنك دوسة شن صاير معاك
سندس:مش صاير شيئ بس مرايفتلكم واجد
سعاد:ونحن مرايفلك بس ياماما كان فيه حاجة صايرة احكيلي
سندس:مافيش شيئ ياماما قتلك غير مرايفتلكم بس
سعاد:باهي وين راجلك
سندس:سيبته في الدار ايغير في دبشه بينزل عشان انتعشو وانا نزلت قبله عشان انكلمكم وانطمنكم اني وصلت
سعاد:باهي تمام انسجمي وغيري جوك وتوا اتروحي نحن مش طايرين واسمعي امسحي دموعك الراجل ماايحبش الولية النكدية
سندس:حاظر ياماما
سعاد:سلام وردبالك علي روحك ودفي روحك راه عندهم صقع
سندس:حاظر ياماما وسكرت
قعدت مقمعزة اشوي في مكانها وبعدها مشت للمطعم وطلبت عشاء وقعدت اتعشى
“”
#في ليبيا
حنين ورويدة مقمعزات في الجنان من جنب الحوش وحنين كانت عارفة ان رانيا قريب توصل وكانت في راسها فكرة بتنفذها
حنين:صح قالو رؤوف شاري كلب جديد
رويدة:اها من فترة كلب ايخوف اسود كله
حنين:انحبهن بكل الكلاب نقدر انشوفه
رويدة:عادي شوفيه قاعد من جنب الحوش من غادي بس اسمعي راه متعود علي رؤوف بس ولما ايشوف حد اخرى يهجم عليه
حنين:قصدك مش مربوط
رويدة:لا مربوط بس السلسة متاعه طويلة يعني ردبالك اتقربي منه
حنين:لا حنشوفه من بعيد بس
وصبت خطمت علي باب الحوش وفتحاته وخلاته مردود ومشت للكلب وكان راقد وشافت قريب منه قطعة قزاز خذتها وجرحت بيها يدها وقربت مالكلب وعزقت فيه حيطة قعد الكلب ينبح بصوت عالي وهجم عليها وهي طلعت تجري رؤوف في داره سمع الكلب صبى يجري بيشوفه وشاف حنين جايه من عنده تجري وتبكي ويدها دم
رؤوف انفجع:ان شاءلله عظك
حنين عزقت روحها في حظن رؤوف وقعدت تبكي(وطبعا كانو مصبيين مصادرين باب الحوش)
مع خشت رانيا مالباب وانصدمت لما شافت حنين في حظن رؤوف
رانيا بعصبية;شن قاعد ايصير هنا انتو في شنو اديرو
رؤوف بعد حنين من عليه;ماتفهميش غلط والله مافيه حاجة كل القصة
رانيا:كل القصة انك قاعد هنا واتخون فيا في الاول انرن عليك واترد عليا هي وانتو مع بعضكم في الدار والله واعلم في شن كنتو اديرو وتوا انخش نلقاك حاظنها وتبيني مانفهمش غلط انا فهمت وفهمت صح بكل
مع جيت رويدة
رويدة:رنوشة جيتي وحقت وجوه الكل متغيرة
رويدة:شن فيه شن صاير كنكم
رانيا:مافيش كل القصة القيت خوك ايخون فيا مع بنت خالك
رويدة:كيف لا رنوشة اكيدة فاهمة غلط شنو القصة رؤوف
رؤوف:والله ماانخون فيها لاشي كل القصة سمعت الكلب ينبح وطلعت بنشوفه وكانت حنين جاية من عنده تجري
رانيا:الكلام هذا اضحك بيه علي بنت صغيرة انا شفتها في حظنك معقولة عشان خايفة تحظنها
رويدة:احكي حاجة حنين بيتعاركو بسببك
حنين تبكي وساكتة وماردتش ولا كلمة
رانيا:الكلام واضح مايبيش حد يحكي خليك معاها واعتبر كل شيئ بينا انتهى
رؤوف:رانيا في شن تحكي انتي عارفة كويس مانقدرش انسيبك
رانيا:اللي درت هكي تقدر اتسيبني وطلعت وسيباته
رؤوف طلع وراها بس هي ركبت في سيارتها ومشت ومابتش تحكي معاه ولا كلمة وخش جوا
رويدة:احكيلي شن صار وليش كان رؤوف حاظنك
حنين تبكي:مافيش مشيت بنشوف الكلب هجم عليا خفت منه وطلعت نجري طحت وانجرحت يدي ولما صبيت نجري القيت رؤوف قدامي ماالقيتش روحي الا في حظنه ورانيا مانندريش عليها كيف خشت والله مانندري انها جاية
رويدة:صح ماحدش عالم بجيتها الا انا لانها كانت بديرها مفاجئة الرؤوف
رؤوف:بعصبية:باهي شن قصة ردتك عليها عالتليفون
حنين:لما جبتلك القهوة في الدار وبعدها انت طلعت بتحل الباب هي رنت وانا رديت عشان انسلم عليها
رؤوف بعصبية;وانتي شن دخلك اتردي عليها
رويدة:حنين رؤوف مش قصده بس رانيا مااتحبش حد ايرد علي فون رؤوف حتى انا اللي صحبتها لما اترن علي رؤوف ماانردش وانرن عليها من فوني يعني غلط اللي درتيه
حنين:تبكي والله ماقصدي ولو فيه اي حاجة انساعدكم بيها حنديرها لو حتى تبوني نمشيلها عند حوشهم وانفهمها
رويدة:لالا لا تمشيلها لا شي بس حاولي معش تدخلي بينهم انا عارفة نيتك وانك معتبره رؤوف خوك بس رانيا حساسة واتحب رؤوف واجد واتغار عليه
رؤوف كان معصب بكل وايشوف الحنين بكل حقد
رويدة:اوفي عدي اهدى اشوية وانا حنكلم رنوشة وانفهمها القصة وانهديها
رؤوف:ياريت انتي عارفة ماانتحملهش تزعل مني شفتي كلامها اللي قالاته بتسيبني
رويدة:مستحيل رنوشة اتحبك ومستحيل اتسيبك حنخش انكلمها جوا وانفهمها هي حنين الحقيني وخشت
حنين بتخش وراها مسكها رؤوف من يدها بالقوة
رؤوف:تحسابيني مش فاهم حركاتك في الاول اتردي عليها وتوا درتي اللقطة هذي في نيتك اتفرقينا بس احلمي انا مستحيل انسيب رنوشة هذي دنيتي كلها وحبنا اكبر ماتصوري يعني مش وحدة زيك حتفرقنا
حنين تبكي:انت شن تحكي انا عمري مافكرت انفرقكم والله اللي صار كله بالصدفة
رؤوف:كلامك هذا اضحكي بيه علي غيري بس تاكدي اللي في راسك مستحيل ايصير
حنين تبكي:انت اسمع كويس وشوف لكي انت ورانيا كم مع بعضكم لكم 4اسنين عمري مافكرت انفرقكم بنفرقكم توا وعليش بنفرقكم وانا متاكدة وواثفة انك مااتحبنيش ومستحيل اتحبني انا الخاسرة هكي وبعدين انا لاني انحبك انتمنالك بس السعادة وعارفة ان سعادتك مع رانيا فمستحيل انفرقك منها انا مش حقيرة ولو بندير هكي راه درته من بداية علاقتكم مش بعد حبكم قوا واكبر دليل علي كلامي اني تلاقيت مع رانيا كم مرة وعمري ماجبتلها سيرة اني انحبك او ان درنا علاقة مع بعضنا ماتاخذش علي كلامي يوم البيان كان بس بسبب الغيرة مش اكثر انا اكثر انسانة تبيك سعيد ومتريح في حياتك اسفة لو سببتلك مشكلة بس والله ماكان قصدي وخشت وسيباته
رؤوف حس بصدق كلامها وان فعلا لو تبي اتفرقهم راه فرقتهم من زمان بس عمرها ماحاولت اديرها وعمرها ماحاولت تحكي الرانيا او اي حد علي علاقتهم خش الداره وقعد ايرن علي رانيا يلقى فيها مقفل غمتله بكل وطلع مالحوش
“”
#في_تركيا
سندس تعشت وقعدت اشوي برا بروحها وبعدها رقت للدار لقت سراج مقمعز عالكنبة وايتفرج عالتلفزيون خشت وماحكتش ولا كلمة خذت بيجامتها مالدولاب وخشت للحمام غيرت دبشها وطلعت وجت بترقد عالسرير واذكرت اللي شافاته عليه تقرفت خذت مخدة وورغان مالدولاب وجت صبت جنب الكنبة
سراج شافلها وقعد ايتفرج
سندس:نبي نرقد
سراج من غير ماايشوفلها:السرير غادي مش هنا
سندس:مانبيش نرقد عالسرير بنرقد هنا
سراج سقم اتقمعيزته:وشن صحلك ماتبيش السرير
سندس:السرير قعد مقزز بعد القذارة اللي صارت عليه
سراج:اول حاجة كانن بوسات بس يعني ماصارتش عليه قذارة علي قولتك
سندس:مانضمنكش مرات جبت اي وحدة بعد نزلتي
سراج شافلها وبخبث:اها جبت وحدة شقرا ومانحكيلك عالجو اللي درناه عالسرير
سندس:مقزز قذر منحرف
سراج:تعرفي تحترمي نفسك
سندس:بعد تقعد محترم نحترمك وبعدين صبي ناعسة وبنرقد
سراج:مازال انتفرج ومانبيش نرقد توا
سندس:بس انا ناعسة وبنرقد
سراج:السرير قدامك لو بترقدي ولو متقزززة منه قمعزي عالكنبة لين انكمل ولو ماتبيش تقعدي جنبي تقدري اتقمعزي لوطة لين انكمل الفيلم
سندس:يعني هكي
سراج:ايوا هو هكي بزبط
سندس غمتلها وقمعزت من جيهة اليمين للسرير بس من تحت واسندت بظهرها عالسرير قعدت ترجى وترجى في سراج يرقد وكل اشوي اتقوله بنرقد ايقوللها الفيلم مازال ماكمل سراج معش رقد لين سندس خذاها النوم وهي مقمعزة كمل سراج الفيلم وصبى بيرقد
سراج:كمل الفيلم كان بترقدي
سندس ماردتش
سراج صبى وشافها راقدة وهي مقمعزة قعد يضحك عليها وجا صبى جنبها وقعد ايشوفلها صعبت عليه اللحظة طبس عليها وحط يده ورا ظهرها وبيشيلها وبعدها اذكر كلامها وجلاطتها واسلوبها معاه
سراج صبى:والله ماني شايلك ومكرا في السانك خليك راقدة هكي للصبح مشى للسرير ورقد من عند الجيهة اللي متسنده عليها سندس وقعد ايشوفلها
سراج:اللي ايشوفها وهي راقدة ايقول ملاك مايحسابش يطلع منها كل قلة هالادب والجلاطة هذي قعد ايشوفلها زين وبعدها ضحك وقعد ايفكر
سراج ايفكر:الاول مرة انكون مع بنت في نفس المكان وماايكونش عندي غرض معين ولا انحس بأي شعور شهوة تجاهها معقولة للدرجة هذي مش مغرية ولا لاني نكرها صاير معايا هكي وبعدها غمض عيونه ورقد
“”
عند رؤوف كمل الليل ايرن علي رانيا مقفل رنت رويدة علي امها وعلي رنا اختها قاللها من اول ماجت وهي مسكرة علي روحها في الدار وماتبيش تفتح ولا تحكي مع حد اتفقت رويدة مع رؤوف ان بكرا ايشلها الرانيا في حوشها واتفهمها القصة ومشت ترقد اما رؤوف كمل الليل وهو واعي ومتضايق خايف من رانيا ماتفهمش القصة واتسيبه وفي نفس الوقت ايفكر في حنين وهل هي صح غرضها اتفرقهم ولا ظلمها لان حنين عمرها ماكانت متاع الحركات هذينا وقعد حاير

صباح يوم جديد
وعت سندس ولقت روحها راقدة عالوطا وناضت وهي ايديها ووجها مطبعات مالفرشة ورقبتها توجع فيها مالرقدة ناضت وهي غامتلها من سراج وليش ماوعاها ترقد عالكنبة سندس مسكت المخدة وهوب خطبت بيها سراج وهو راقد
سراج نط وناض مفجوع:تي كنك يامطرشقة
سندس معصبة:ليش خليتني نرقد عالوطى
سراج:وعيتك ومانضتيش شن بنديرلك خفت انشيلك توعي اديريلي قصة
سندس:كذاب كان وعيتني راه وعيت انا نومي خفيف
سراج:والله وعيتك انتي مانضتيش غالطة راه نومك ثقيل مش خفيف
سندس:انا متاكدة نومي خفيف
سراج:وانا متاكد ياما وعيتك ماوعيتيش شن بنديرلك ولا كنتي تبيني انشيلك وغمزلها
سندس:في عينك تلمسني احسن ان خليتني عالوطى لانك كان شلتني راك شفت شي مايعجبك
سراج ابتسم وبخبث:بنشوفه الشي هذا مرات يعجبني انتي شن عرفك
سندس فنصت فيه وغمتلها وخشت للحمام بدوش ومن كثر ماكانت معصبة نست تاخذ معاها دبش مالدولاب ومااذكرتش الدبش الا لما دوشت وطلعت بتلبس
سندس خبطت علي وجها:حي انسيت ماجبتش ادبشي كيف بندير توا فكرت اترد الدبش اللي كان عليها بس ماكانتش اتحب الحركة هذي واتقزز منها وخافاته يضحك عليها ماكانش قدامها الا حل واحد
سندس فتحت بابا الحمام اشوي وحكت من عند الباب
سندس:سراج ممكن تطلع مالدار اشوي
سراج:وعليش ان شاءلله
سندس:انسيت ماخذيتش ادبشي وبنطلع نلبس
سراج;واطلعي من ماسكك
سندس بعصبية:مانطلعش وانت في الدار اطلع 5دقايق بس
سراج:مانقدرش نطلع ومازال ماغسلت وجي تخيلي اتشوفني بنت برا ويخرب برستيجي قدامها
سندس بعصبية:عليك تفكير تافه زيك اتفكر فيه
سراج:تفكير تافه وزيي تم وعناد فيك وبزيادة مش طالع وهذي اتقمعيزة
سندس:سراج بلا برادة واطلع اشوي
سراج:قتلك مش طالع واطلعي بسرعة نبي الحمام
سندس:مش طالعة مالحمام لين انت تطلع مالدار
سراج;خلاص معناها خليك في الحمام انا هنا جوي سمح
سندس قعدت قريب 5دقايق وهي في الحمام وبدت اتصقع لانها بس لافة منشف عليها فكرت اتقوله يعطيها الديشمبر متاعها وبعدين اذكرت ان دشنبرها نظام منشف ملفوف عالجسم وقصير مش لبس زي لخرات ومعش فيه حل قدامها الا انها اتقوله يعطيها دبش
سندس فتحت الباب:سراج باهي ممكن تعطيني ادبشي
سراج:باهي شن تبي
سندس:مدلي اي بلوزة طويلة وجينز ووو وسكتت
سراج:فهمت خلاص توا انجيبهن لكي ومشى شور الدولاب وفتحه واول حاجة خذاها الملابس الداخلية ولقاهن مجموعة اطقم وقعد ايطلع فيهن وايتفرج عليهن ويبتسم وبعدها رد وجاها عند الباب
سراج بخبث:الملابس الداخلية شن تبي لونهن ولا انجيبلك علي ذوقي
سندس انحرجت وبعصبية:سراج بلا وقاحة
سراج;وقاحة باهي تمام شوفي من ايجيبلك
سندس:خلاص خلاص جيب علي ذوقك وبسرعه بنموت مالصقع
سراج تمام ومشى واختار طاقم كحلي وبعدها جا بياخذ بلوزة وجينز وبعدها فكر في فكرة خبيثة وقعد ايتفرج علي باقي دبشها وطلعلها بيجامة نظام شورت نص وعليه كت كان الشورت رصاصي وفيه قلوب حمر والكت احمر خذاهن وجابهن الها عند الباب
سراج:هاكي واخترتلك الملابس الداخلية كحليات اكيدة ايجن عليك حلوات سندس كرت الدبش من يده وسكرت الباب بالقوة وبدت تلبس وانصدمت بعد شافت البيجامة اللي جابها الها
سندس بعصبية:انا قتلك جيبلي بلوزة وجينز شنو اللي جايبة هذا
سراج:هذا اللي القيته قدامي والبسي بسرعه واطلعي عشان فيه غيرك يبي الحمام
سندس:مش حنطلع هكي وقتلك جيبلي بلوزة وجينز
سراج:وانا معش بنتحرك من مكاني ومش جايب شي وسقديني اطلعي بسرعة
سندس:سراج سراج لو سمحت جيبلي بلوزة وجينز سراج معش رد عليها
سندس قعدت غامتلها في الحمام ومعش لقت قدامها الا انها تلبس اللي جابه الها وتطلع لانها صقعت بكل في الحمام لبساته وفتحت الباب
سندس:اسمع نطلع بس بشرط غمض عيونك
سراج:باهي اهو غمضتهن غير اطلعي بسرعه نبي الحمام
سندس:غمض عيونك سراج
سراج;والله غمضتهن هيا اطلعي
طلعت سندس وهي اتبحت فيه وفعلا كان مغمض عيونه بس بخبث مغمض وفاتح عيونه اشوي بس لما شافها معش تحمل وتلقائي فتح عيونه وقعد ايصفر
سندس انحرجت وخدودها قعدن حمر:مش قتلك غمض ليش تفتح
سراج قعد ايقرب منها وهي اتوخر
سندس اتوخر:بعد مني وردبالك اتحاول تلمسي راك مش عارف شن نقدر اندريلك
سراج كان عيونه عليها وبياكلها بيهن وايقرب منها وهي اتقوله في نفس الكلام واتوخر لعند لما خبطت في الدولاب وهو حااوطها بإيديه
سندس:ردبالك تلمسني والله اتشوف شي مايعحبك
سراج قعد ايقرب منها وهي غمضت عيونها
سندس خدودها حمر ومغمضة عيونها:حول حول ياحقير
سراج وبكل هدوء:انا بناخذ ادبشي انتي اللي حولي من عالدولاب عشان ناخذه
سندس فتحت عيونها ولقاته يضحك دفاته ورقدت عالسرير وتغطت بالورغان وهي قلبها ايدق وترعش
سراج ابتسم ابتسامة خبيثة وخذا ادبشه مالدولاب وخش للحمام
“”
في ليبيا وتحديدا في دار رويدة كان الصبح كيف طالع يعني فجر (ومااتكرزنش علي فرق التوقيت لان مش عارفة الفرق فمشنها)
وعت رويدة علي رنت فونها ولما ناضت فصل فونها شافت لقاته رقم جت بترقد دزلها رساله افتحي وتس ضروري وشوفي اللي جاك عليه وفتحت رويدة النت وخشت عالوتس
#يتبع
الاحداث والمواقف المضحكة مع سراج وسندس بدن من اول يوم زعما شن مستنيهم باقي الاسبوعين من اكشن ومحاولات سراج المنحرفة هل بحركاته هذينا حيتقرب من سندس واتحبه او بتبعد عنه واتزيد تكرهه?
اما رانيا ورؤوف هل حتنحل القصة بينهم وايردو البعضهم ولو ردو حيصدق رؤوف ان حنين ماتبيش اتضرهم ولا مش حيصدق ويقعد فاطنلها?
اما رانيا من اللي دزلها الرسالة وشنو اللي دازه عالوتس انا انقول اكيدة أسيل بس قولكم شن دازة وهل شي حيضر معاذ ورويدة او لا ?
كله حنعرفوه الحلقة الجاية واللي هي حلقة بعد بكرا ?
اسفة علي تأخيري بس الضي دارها فيا كمل اليوم طافي وتليفوني طفا شحن معش قدرت نكتب لين جا الضي ?
وتاخرت بس عوضتكن بحلقة طويلة بكل ان شاءلله تعجبكن ?
أسفة لو فيه لخبطة في الأسماء وأكيد رأيكم ايهمني?
گـتـابـتـي Koka Saleh

 

error: