منحرف وأحببته

#مـنـحـرف_وأحـبـبـتـه
الـحـلـقـة (40)
گـتـابـتـي #Koka_Saleh
“”””””””””””””””””””””””””“””””””””””””

#عند_رويدة
معاذ:دودي انا بنرقد امتى بترقدي
رويدة;مازال مش ناعسة بنراجع كم مسالة ونرقد
معاذ:باهي براحتك بس مااطوليش وانتي واعية عشان عندنا وعية بدري
رويدة:حاظر
معاذ تمدد عالسرير ولان كان ناعس بسرعة مارقد
أما رويدة قعدت تقرا وخذاها الوقت ومعش ركزت
وبعد شافت للساعة لقتها 2 لمت شيتاتها وجت بترقد
معاذ الباين يحلم وقعد يحكي في حلمه بس الصوت كان عالي اشوي وباين ان كابوس مش حلم
معاذ:لينا مااتسيبينيش انا انحبك خليك معايا
رويدة انصدمت ومالقتش روحها الا
رويدة تبكي:معااااااذ?
معاذ راقد
رويدة تبكي وبحرقة:معاذ نوض ?
معاذ نط مفجوع لان وعاه صوت بكى رويدة
معاذ بخوف:شن فيه شن صاير
رويدة تبكي وتحكي ومن كثر ماكانت تبكي كلامها مش واضح
معاذ:حبيبي اهدي وفهميني بشويش شن صاير
رويدة كانت العبرة اتشيل فيها واتحط
معاذ صبلها مية وشربها الها
معاذ:دودي اهدي وقوليلي كنك ليش تبكي هكي
رويدة سكتت بس دموعها مازال ينزلن علي خدودها زي الشلال وكانت اتشوف المعاذ وتبكي
معاذ:حبيبي كنك خوفتيني عليك
رويدة تبكي:انت مازال اتحب لينا
معاذ بصدمة:انت ليش تحكي هكي
رويدة تبكي:جاوبني انت مازال اتحبها
معاذ:لا وبعدين هيا ماتت وموضوعها انتهى
رويدة تبكي:انت كذاب
معاذ بصدمة:شنووو انتي كيف تحكي هكي
رويدة:لانك كذاب صح لو معش اتحبها ماكنتش توا اتقول في اسمها وقاعد تحلم بيها وانا معاك
معاذ ارتبك:أنا قلت أسم لينا
رويدة تبكي:اها وكنت تحلم بيها وانا جنبك يعني مازال ماانسيتها ليش تاخذني وانت مش قادر تنساها
معاذ:دودي حبيبي اني حلمت بيها مش معنى اني مازال انحبها وماانسيتهش بس هذا حلم ماحدش فينا ايتحكم في حلمه
رويدة تبكي:بس الواحد مايحلمش بحاجة الا وهو ايفكر فيها واجد
معاذ:مش شرط يارويدة
رويدة تبكي:عارف انت في شن كنت اتقوللها في حلمك كنت اتقول لينا مااتسيبينيش انا انحبك
معاذ:هذا حلم مش حقيقة
رويدة تبكي:حلم صح بس هذا تفكيرك خاطرك تقعد معاك وخاطرك متجوزها هي مش انا
معاذ:مافيش منها الدوة هذي انا انحبك ومش داعي انتعاركو عشان حلم استهدي بالله واسكتي
رويدة:مش ساكته سكتت الا واجد وانا متحمله وحاطة في قلبي وشايلة كل الهم بروحي
معاذ:اي هم شايلتيه بروحك
رويدة تبكي:تحسابني مش عارفة اللي صار يوم الفرح وانك كنت بتسيني عشانها لانك عرفت انك مش قادر تنساها
معاذ انصدم من كلام رويدة وانها عارفة اللي صار ومعش عرف كيف ايرد عليها
معاذ;انتي من حكالك الكلام هذا
رويدة:مش مهم من حكالي المهم اني عرفت وماكنتش حابة نحكي عشان قلت انها ميته وانا اللي قاعدة وحنسيها لكي بس طلعت غلطانة انت اتحبها ومستحيل تقدر تنساها مهما درت وقعدت تبكي بحرقة
معاذ وجعاته رويدة وقرب منها ومسك ايديها
معاذ:حبيبي معش تبكي راه والله اتقطعيلي في قلبي اهدي وخليني انفهمك
رويدة فكت ايديها من ايديه وبعدت منه:انا فاهمة كل حاجة ماعندكش مااتفهمني خلاص كل حاجة واضحة
معاذ قرب منها:خليني نحكيلك اللي صار
رويدة بعصبية وتبكي:لو سمحت خليني بروحي مانبيش نسمع شيئ منك توا
معاذ:انا مش حنخليك بروحك وانتي في الحالة هذي
رويدة صبت:يبقى انا اللي حنطلع
معاذ صبى قدامها:قتلك مش حنخليك بروحك اقعدي وانا حنفهمك كل حاجة
رويدة بعصبية وحطت ايديها علي وذانها; افهم مانبيش نسمع منك شيئ ومش داعي يعلى الصوت أكثر من هكي ويسمعونا تحت
معاذ:ماشي يارويدة براحتك وانتي تريحي توا وخليكي هنا وانا اللي حنطلع وبكرا بعد تهدي توا نحكو وطلع وسيبها
رويدة طاحت عالسرير وقعدت تبكي بكل حرقة
اما معاذ فنزل الداره القديمة وقعد فيها وهو ايفكر في رويدة وليش ماحكتش من اول ماعرفت حس ان غالط في حقها واجد صح هو ماحسسها بشئ طول الفترة اللي فاتت بس الحلم كان صاعق ماكانش خاطر في باله ايصير هكي وقعد طول الليل حاير بين الماضي والحاظر
“”””””””
#عند_سيرجو_ودوسة
سندس فتحت عيونها لقت روحها في حظن سراج ابتسمت وقعدت اتشوفله وهو راقد وقعدت اتحرك في اصابعها بشويس علي لحية سراج وقعدت تنزل لين وصلت علي شفايف سراج وحركت أصابعها بشويش عليهن وفي اللحظة هذي سراج باس أصابعها وفتح عيونه
سراج:في شنو كنتي اديري
سندس انحرجت:شيئ
سراج ابتسم:توا انوريك في شن كنتي اديري وقعد ايحرك في اصابعه علي خدها ونزل عليش شفايفها
سراج ايشوفلها:بنعرف هذينا شفايف ولا فراولة
سندس انحرجت:سراج بلا صماطة
سراج:اس ماتحكيش خليني انذوقهن عشان نعرف شن هنا وقعد ايقرب منها وحط شفايفه علي شفايفها وقعد ايبوس فيها بكل حنية سراج حاول ينزل وايكمل باقي بوساته بس حس بألم بسبب الحركة
سراج حاول ايكمل رغم الالم اللي حاس بيه لكن سندس كانت ملاحظة اللي ايحس بيه
سندس;سراج انت مازال مريض خليها اشوي لين تقعد كويس
سراج:لالا انا كويس ماانحسش في شيئ
سندس:انا انشوف في تعابير وجك انت قاعد تتجوع وبعدين انت عليش مستعجل نحن مش طايرين
سراج حظنها زيين: عارفة ليش مستعجل نبيك اتكوني ليا نبي انعيش اللحظة هذي معاك صح عشتها واجد من قبل بس متأكد طعمها معاك حيكون يفرق لانها حتكون بنكهة الحب
سندس قعدت اتشوفله ومبتسمة
سراج قعد ايشوفلها وايحرك في في اصابعه علي خدها
سراج تنهد:انحبك انحبك وخاطري انعيش زواج حقيقي معاك ونوعدك في كل يوم فيه حنثبتلك فيه اني انحبك اكثر ماليوم اللي قبله
سندس:ان شاءلله
سراج قعد حاظنها وايشوفلها بنظرات كلهن حب
سندس ابتسمت:تعرف كان قعدنا علي هالحالة مش حنتحركو اليوم كله
سراج:وعليش بتحركي واتسيبيني بروحي
سندس:لا مش حنسيبك بروحك حنساعدك توا عشان تغسل وجك واتغير دبشك وبعدين انصلو الصبح ونفطرو
سراج ابتسم:تمام بس فيه مشكلة كيف حنصلي هكي وانا وانا مش قادر انتحرك ولا انطبس
سندس:تقدر اتصلي وانت مقمعز
سراج;معقولة وكيف اتجي هذي الصلاة المفروض ونحن مصبين والا تقعد حرام
سندس:لا اتصير لان دينا دين يسر مش عسر وربي فرض علينا الصلاة الكل الناس الصح والمريض واللي يقعد مريض عطاه ربي كم طريقة للصلاة وكيف مايقدر هو اهم شيئ ماايسيهش لان هي الصلة بين العبد وربه وانت لانك تقدرش اتصبي فربي عطاك رخصة انك اتصلي وانت مقمعز لين تبرى شفت رحمه ربي كيف واسعة
سراج:سبحان الله خلاص حنصلي وانا مقمعز بس وريني كيف
سندس:حاظر بس توا لازم اتحاول اتصبي معايا تغسل واتغير ادبشك واتوضى عشان اتصلي
سراج:باهي هي
ساعداته سندس لين صبى وساعداته في غسلت وجه وساعداته في التوضاية للصلاة وساعداته في تغيير دبشه وقمعز عالسرير وحطتله مخدة عالية اشوي علي رجليه عشان ايحرك راسه بس لان ظهره كان يوجع فيه ووراته كيف ايصلي أما هي توضت ولبست ملاية الصلاة وقعدت اتصلي
سراج كمل الصلاة قبلها وقعد ايشوفلها وهي اتصلي وبعد كملت جت وساعداته يرقد علي جنبه
سراج ايشوفلها ومبتسم:تعرفي شن اكثر حاجة اثرت فيا من اول يوم لنا مع بعضنا
سندس:شنو
سراج:لما شفتك اول مرة بملاية الصلاة حسيت بشعور غريب حسيتك وانتي مغطية روحك هكي احلى بواجد من كل البنات اللي شفتهن رغم كل دبشهن الحلو والمغري والملفت للانتباه بس بسسبب كرهي لكي ماحبيت انبين وقعدت نقنع في روحي بعكس هكي بس كل مرة انشوفك بيها ايزيد اعجابي بيك اتصدقي ان الها سبب كبير في اني حبيتك
سندس ضحكت:هي شيئ عادي بس لانك مش متعود اتشوف بنت لابستها عشان كل اللي تعرفهن كانن
سراج حط صبعه علي شفايفها:والله ماعاد اتكملي مااتذكرينيش بيهن
سندس:حاظر وتوا خليك هنا 10 دقايق انجهز الفطور وانجيبه عشان نفطرو مع بعضنا هنا
سراج:اووو بتجيبيلي الفطور للسرير لا هكي دلع واجد وكان تعودت عليه معش انسيبه وبتقعدي ديما ادلعي فيا هكي
سندس:لا ياشاطر مااتعودش عليها ديما هذا بس عشان مريض
سراج:نجيها الحنونة
سندس ابتسمت:10دقايق وانجيك
سراج:باهي مااطوليش اكثر هذينا ومش عارف كيف يمشن بلاك
سندس:ياساتر
سراج;والله كان عليا نبيك كل ثانية قدامي وفي كل لحظة انشوفك لين انعبي عيوني ونشبع منك
سندس:وبعد تشبع مني معش تبيني
سراج:اصلا مش حنشبع منك بكل وقعد ايشوفلها
سندس ذابت في عيونه
سندس:كان قعدت اتشوفلي هكي واجد حنكمل اليوم هنا ومش حندير شيئ
سراج ضحك:باهي عدي وتعالي بسرعة
سندس:حاظر ومشت ووتت الفطور في 10 دقايق زي ماقالت وجاباته السراج وساعداته عشان ايقمعز وقعدتت تفطر هي وياه في أجواء كلهن حب وسراج مابطل سخافة ومغازله فيها وهي طبعا منسجمة وذايبة في كلامه
“”””'””””””
#عند_رويدة?
مازال واعية من بعد أمس وعيونها كانن منتفخات من كثر البكى صبت من سريرها وغسلت وجهها وتوضت وصلت وقعدت تلبس لان عندها امتحان جت صبت عالمراية وقعدت ادير في اشوي ميك اب عشان اتخبي اثر البكى والسهور مع خشت معاذ اللي حتى هو مازال واعي من امس
معاذ:صباح الخير
رويدة:صباح الخير وتيتلك دبشك وانا بننزل تحت عشان نفطر
معاذ:رويدة
رويدة:مااطولش واجد لان وقت عالامتحان وطلعت
معاذ تنهد وخش يغسل وطلع صلى ولبس ونزل فطر وطلع هو ورويدة ومشو للجامعة ورويدة اصرت ان ماتحكيش في الموضوع عشان تبيش تضايق وهي بتخش للامتحان لانها معش اتحل ومعاذ سكت واجلو الكلام بعد الامتحان
“”””””””
#عند_فيصل_ورانيا
رانيا تأخرت اشوي وماجت للمشروع وفيصل قعد يرجى فيها وقالق عليها لان كلمها وماردتش عليه قعد مصبي برا ومسيب مكتبه ويرجى فيها اشوي ورانيا جت مع السواق ونزلت
رانيا:صباح الخير
فيصل:صباح النور كنك طولتي
رانيا:بابا طالع قبلي مالصبح بدري وانا قعدت نرجى في السواق طول ماجا
فيصل:كان رنيتي راه جيت خذيتك
رانيا بصدمة:من جدك انت
فيصل فطن الروحه وضحك:والله من كثر ماانشغلت عليك قلت هكي لان مش من عادتك اتاخري وحتى رنيت عليك مارديتش زدت انشغلت اخرى
رانيا:معليش ماكنتش فاطنة للفون وشفت المكالمة ونحن قريب مالمشروع قلت مافي مارن قريب نوصل
فيصل:باهي حصل خير هي تعالي عشان نفطرو مع بعضنا
رانيا:بس انا فاطرة
فيصل:مع اني مافطرتش جبت فطور وقعدت نرجى فيك عشان نفطرو مع بعضنا بس مش مشكلة حنفطر بروحي وخلاص
رانيا:بس لو فيه قهوة نشرب
فيصل:فيه واذا مافيش عشانك تنخلق وتقعد فيه?
رانيا ابتسمت ومشو مع بعضهم وخشو المكتب فيصل وقعدو يفطرو
فيصل:بنسألك سؤال
رانيا:تفضل
فيصل:ليش مااديري سيارة
رانيا ضحكت:بابا ديما ساكنلي عليها وفيه فترة خلاص قرر نمشو للمعرض ونشروها بس انا رفضت
فيصل:وليش رفضتي
رانيا:ايام علاقتي برؤوف وهو كان رافض فكرة بنت اتسوق وتعارك معايا وانا قلت البابا مانببش عشان ماانتعاركش معاه
فيصل اضايق لما حكت علي رؤوف
فيصل:قصدك هو عقليته متاع البنت مااتسوقش وهكي
رانيا:اها
فيصل:الشباب اللي عقليتهم هكي مش عارف كيف ايفكرو
رانيا:ليش انت مش هكي فكرتك
فيصل:لا مش هكي تفكيري واللي ايفكر هكي انحسه متخلف يعني نحن في عصر قعدت فيه مساواه في الحقوق بين الراجل والبنت يعني البنت قعدت تشتغل في نفس اشغال الراجل قعدت اتسوق وتقدر تطلع بروحها وطبعا كل وحدة وعلي حسب تفكيرها والحرية مش الكل وحدة تنعطى يعني فيه اللي تقعد بنت ناس ومتربية وانك اتحط فيها ثقة وتعطيها كامل الحرية مش اخسارة فيها لانك اتكون متأكد لو قعدت بين الف راجل حتقعد في الشكل بنت اما التعامل زيهم ومافيش حد حيجيب عليها كلمة وفيه اللي مااديرش خير بالحرية هذي وتندم انك عطيتها حرية
رانيا:معاك حق في كلامك عالحرية بس انا عكسك بالنسبة التفكير الشاب اللي مش مقتنع ان حبيبته اتسوق انا انحسه مش تخلف انحسه غيرة
فيصل:الغيرة مش اني نحرمها من كل حاجة او انضيق عليها كل حاجة بالعكس الغيرة عندها اوقات واسباب يعني ممكن انغار لو حكت علي شخص قدامي وممكن انغار لو حسيت انها مهتمة بحد اكثر مني انغار لو حسيت ان فيه حد ايحاول ايقرب منها أو ايحاول ياخذها مني في اللحظة هذي نقلب الدنيا بس عشان تبي تقرا او تشتغل لا ماانغرش لان هذا مستقبلها يعني لو مثلا حسيت ان فيه حد في شغلها بيقرب منها ماانوقفهش عن شغلها ممكن انغير شغلي وانجي انا نشتغل معاها ونقعد قريب منها وقريبة مني وبهكي مايقدرش حد ايقرب منها بس مستحيل نمنعها من حاجة هي تبيها عشان انا انغار بس
رانيا بأخر كلام فهمت فيصل شن يقصد
رانيا:وجهة نظر معاك حق فيها
وسيم خش عليهم:صباح الخير
رانيا وفيصل:صباح النور
وسيم: وينك اليوم كنك طولتي انشغلت عليك
فيصل شافله زين
رانيا:السواق تأخر عليا
وسيم:باهي اهم حاجة انك بخير هيا تعالي فيه كم حاجة بنستشيرك فيها
فيصل:اول حاجة هي مازال تشرب في قهوتها ثاني حاجة مش شايفها قاعدة معايا يعني عندي معاها شغل ولما انكملو شغلنا حنجوكم غادي ونستشيرو بعضنا
وسيم:معليش كنت نحسابكم اتخرفو بس مانحسابش عندكم شغل خلاص بعد اتكملي شغل تعالي رنوشة وطلع
فيصل غامتله:العيل هذا مازرطتش بكل
رانيا:عليش كنه والله محترم وكويس
فيصل زاد غمتله:هكي اتحسيه يدحنس واجد وبعدين شن قصة رنوشة هذي شكله بينكم دلالة قوية
رانيا:لا مافيش دلالة بس من ايام دوسة معانا يسمع فيها اتقول فيها ليا شكله لقطها وقعد ايقول فيها
فيصل:عليك اللي ماايتحشم شوفي انا ليا كم نعرفك وعمري ماقلتها لكي
رانيا:وهذي اللي واجعتك
فيصل:اها واصلا كان اتجي للحق ماانحبش حد ايقول اسمك غيري
رانيا انحرجت وحبت اتغير الموضوع:شن رايك نطلعو انشوفو الشغل
فيصل:تمام هي وصبو بيطلعو
“””””””
وسيم:ياراجل الفرخ فيصل هذا زاقبلي زقبه شينة
هيثم:عليش كنه
وسيم:من اول ما جا وهو ماايسيبش فيها لحظة وشكله يبيها ازح
هيثم:توا انت شن هامك فيه
وسيم:كيف شن هامني مش عاطيني فرصة نحكي معاها بكل
هيثم:وانت شن تبي في الدوة مش البنت عاجبتك
وسيم:اها عاجبتني وبكل اخرى
هيثم:خلاص خش عالخطبة دغري يعني ماترجش لين تعترف بمشاعرك وترجاها اترد عليك وقصة خوذ معاها موعد ودز هلك وبعدها اتلحق عالاعتراف بمشاعرك
وسيم:قولك هكي
هيثم:ماتبقى الا هكي
مع جيت فيصل ورانيا
وسيم:سكر عالموضوع اهو جا
وجوهم وبدو في شغلهم
“”””””””””
#عند_معاذ_ورويدة
طلعو مالامتحان ودغري طلعو مالجامعة وركبو في السيارة
معاذ:شن درتي في الامتحان حليتي كويس
رويدة:اها الحمدلله
معاذ:حتى انا حليت
رويدة:باهي تمام
معاذ:دودي عارفة اللي صار يوم الفرح والله
رويدة قاطعاته;معاذ لو سمحت أنا مانبيش نحكي في الموضوع توا
معاذ:باهي امتى بتحكي فيه كل ماانجي نحكي اتقولي توا لا وانا نبي انفهمك
رويدة:بعد انروح من هلي نحكو
معاذ بخوف:كيف وعليش بتمشيلهم هلك
رويدة:انا نفسيتي تاعبة ومتضايقة ونبي نمشي نقعد كم يوم عند هلي
معاذ:لالا مش حنخليك تمشيلهم توا خلينا انحلو المشكلة قبل وبعدها حاظر من عيوني انشيلك
رويدة:معاذ المشكلة دبينا مع بعضنا مش حتنحل لذلك لازم نبعدو كم يوم علي بعضنا وكل واحد ايفكر بروحه بعيد عالاخر وايرتب افكاره
معاذ:وانا شن عرفني اذا لما بتمشي الهلك بتردي عليا
رويدة:اسمع لا انا صغيرة ولا انت صغير عشان نضحك عليك ولو بنمشي ومعش بنرد كنت قلتها لكي واكيدة مش حنكذب بس انا قتلك بنبعد فترة عشان نقدر انفكر اكويس ونعطيك وقتك للتفكير في كل شيئ وكل واحد فينا يعرف شن يبي
معاذ:مش توا قلتي ايام ليش توا قلتي فترة وراس رويدة مااطوليش مانقدرش نبعد عليك واجد
رويدة:خليني براحتي عشان الشيئ اللي نختاره نختاره بقناعه
معاذ:باهي موافق بس اوعديني اتردي
رويدة;نوعدك
معاذ:تمام وراك تنسي انك وعدتيني
رويدة:مش حننسى بس توا تكي بيا عالحوش عشان ناخذ معايا دبش
معاذ:حاظر
ومشو للحوش ورقت وتت دبشها ومعاذ ايشوف للدبش وكان خايف بكل انها تمشي ومعش اترد فاللضمان ماخلهش تاخذ دبش واجد وبعد كملت لم دبشها جو بيطلعو
معاذ:حبيبي بعد يومين عندنا اخر امتحان بتردي قبله عشان نمشو للجامعة مع بعضنا
رويدة:معاذ خليها عالجو لو كنت بنروح حنروح وكان ماهذا حيشيلني بابا من غادي
معاذ:باهي انجيك انا ناخذك من غادي
رويدة:معاذ افهمني انا بنبعد عليك انت بناخذ فترة بروحي ضني من حقي
معاذ:تمام براحتك ومش حنضايقك
رويدة:ياريت
طلعو ونزلو تحت وحكت العمتها انها بتمشي الحوش هلها كم يوم لانها مرايفة عليهم وماحكتش الحد عاللي صار بينها وبين معاذ وبعدها طلعو وشالها معاذ الهلها ونزلت هي ومعاذ وتغدى معاذ معاها عند هلها وبعدها روح وهي حكت الهلها عساس زيارة كم يوم لانها مرايفة عليهم و بتريح مالامتحانات وضغطهن
“””””””””
مر اليوم طبيعي
بالنسبة الرويدة حاولت تلهي روحها مع هلها وتنسى اللي صار
أما معاذ فكان حاس بالذنب تجاه رويدة واللي داره فيها وكان خايف انها تكرهة ومعش تقعد اتحبه وخايف من انها معش اترد عليه فكان كل بعد ساعة ايدز الرويدة رسالة فيها(أنحبك)
أما رانيا فأيامها قعدن شبه بعضهن في الصبح عمل وفي الليل في الحوش ياتفرج عالتلفزيون ياادير في حاجة في المطبخ يا اتخرف مع هلها مافيش شيئ جديد بس اليوم كان فيه اختلاف عندها لانها كانت كل ماتسرح بخيالها اشوي تلقاه ماشي عند فيصل واتفكر في تصرفاته معاها
أما فيصل من غير شيئ عقله كله قاعد عند رانيا ويبي ايصارحها بمشاعره بس خوفه انها ترفضه مسيطر عليه وكل مايقعد ايفكر في رانيا يخطر في باله وسيم اللي ايخلي فيه ايعصب كل مايذكره
“”””””””””””””””
في الليل وتحديدا الساعة 11
رؤوف راقد مالساعة 9 لان عنده محاضرة في الصبح بدري بس وبينما وهو راقد كان يحلم
ببنت قاعدة في زاوية في مكان مظلم وتبكي تبكي بحرقة ولما رؤوف خش عالمكان هذا البنت جاته تجري وحظناته وقعدت تبكي
رؤوف:من انتي وليش تبكي هكي
مجرد ماسألها السؤال هذا البنت قعدت اتشوفله واختفت
رؤوف ناض من نومه فجأة وهو مفجوع
رؤوف يمسح علي وجه:شن قصتها البنت هذي كل مرة جايتني في الحلم
خذا مية من جنبه شرب منها وعاود امتد عالسرير وحاول يرقد بس ماقدرش وطلع برا
للجنان وقعد مقمعز
رويدة كانت اتخرف مع امها في دار المعيشة وبعد امها خشت طلعت هي بترقد بس شافت الباب اللي يفتح عالجنان مفتوح ومشت بتسكره وشافت رؤوف برا طلعتله
رويدة:مازال ماجا الصبح شن وعاك
رؤوف:وعاني حلم
رويدة;قيسها قصة قصة الاحلام
رؤوف:شنو
رويدة;شيئ بس قولي بشنو حلمت
رؤوف:حلم هكي مش مفهوم ماادوريش
رويدة;باهي قولي شن جو قرايتك
رؤوف:تمام ماشية
رويدة;وشن جوك انت وعصام اصالحتو
رؤوف:مااصالحنش لاني مش قادر انسامحة ولا قادر ننساله اللي داره فيا
رويدة;معقولة يارؤوف عمره ماكان قلبك أسود هكي
رؤوف:أنا قلبي مش أسود أنا قلبي مجروح وسبب جرحه هو عصام
رويدة:لازم اتحاول تنسى عشان تقدر اتعيش حياتك
رؤوف:ياريت نقدر ننسى عشان نقدر انتريح المهم فكك مني وقوليلي انتي شن دايرة مع معاذ مريحك ولا لا من بدري بنسالك غير قعد عصام مقمعز وانا ماانحبش نقعد انا وهو في مكان واحد
رويدة;تمام كويس معايا
رؤوف:وهله شنو مش مضايقتك قعدتك معاهم
رويدة:اعميمة والبنات كويسات بكل وايحبني والحق ماايضاقوش فيا بكل
رؤوف:باهي الحمدلله طمنتيني
رويدة:ياريت زي ماانا طمنتك عليا اطمني عليك انت
رؤوف:ان شاءلله
وقعدو ايخرفو اشوية وبعدها كل واحد خش رقد
“”””””””””””””
#عند_أبطالنا?
وقاعدين في دار سراج سراج راقد علي جنبه وسندس في حظنه وايتفرجو علي فيلم
سراج طبعا طول الوقت وهو اينابش في سندس مرة ايبوسها مرة ايغمضلها عيونها ومرة يلعب علي شعرها
سندس:سراج بطل خليني انتفرج
سراج;تفرجي شن درتلك انا?
سندس:هذا كله وشن درت لا الحق مادرتش شيئ
سراج;الله غالب نقدرش انشوفك وماانابشكش وقعد ايشوفلها وايقرب بشوية عشان ايبوسها
سندس لفت وجهها:استنى سراج شكلها بدير حادث بالسيارة
سراج:ونحن شن دخلنا?
سندس:اسس?
سندس غنضت عيونها:حي خبطت
سراج انصدم:توا اكثر فيلم رعب تفرجتي عليه معايا وماخفتيش جاية خايفة من وحدة دارت حادث وحتى انهم ماوروه ورو بس السيارة
سندس:اكثر حاجة نكرهه سواقة السيارة والحادث بالسيارة مستعدة انموت باي شيئ الا الحادث
سراج:غريبة ليش هذا كله
سندس:السبب كان لما كنت اول سنة في الجامعة كان بابا ايعلم فيا في السواقة عشان بياخذلي سيارة وكنت انتعلم وجوي تمام وفي يوم كنا ماشيين ندهورو في الشرق ونحن مروحين في الليل بابا قالي تعالي سوقي عشان اتعلمي اكثر وطبعا انا كنت فرحانة وماصدقت بابا قالها ليا وخذيت السيارة وبديت انسوق كان ليل وكنت مش فاهمة واجد في السواقة وفجاة طلع قدامنا في الطريق كلب حاولت انتفاداه نبيش نخبطه بس للاسف لفت مني السيارة وخبطنا في الساس وخشينا كلنا للمستشفى وكلنا عندنا كسور ومن الحادث هذا وانا ماانحبش انسوق وانخاف مالحادث بككل
سراج:وانا ديما انفكر وانقول غريبة ليش مااتسوقيش وماعندكش سيارة رغم انك وحيدة هلك بس قلت ممكن باتها مالنوعية اللي عندش بنات ايسوقن
سندس:بالعكس بابا ديما يبيني اندير بس انا رافضة لاني انخاف مالسواقة
سراج حظنها:باهي ماليوم معش نبيك اتخافي من شيئ وانا معاك باهي
سندس:باهي
سراج قعد حاظن سندس وايتفرجو علي باقي الفيلم لين نعسو وروقدو
“”””””””””””””
#صباح_يوم_جديد
اليوم وعى سراج قبل سندس ولقاها في حظنه ابتسم وقعد اينابش فيها بحركات بسيطة وناعمه بأطراف أصابعه لين وعت واول حاجة دارها اول مافتحت عيونها
سندس ابتسمت:صباح الخير
سراج قرب وباسها علي شفايفها بوسة سريعة وفيها حنية
سراج:صباح الورد والحب وكل حاجة سمحة في الدنيا
سندس ابتسمت:شنو كويس ظهرك اليوم
سراج:الحمدلله حتى حاس اني قادر انتحرك
سندس:باهي الحمدلله معناها هي عشان نغسلو وانصلو
سراج:باهي بس بندوش قبل
سندس:باهي هي صبي بس
وصبى سراج وسندس سراج خش ايدوش وسندس طلعت ودوشت في دارها ولما ردت الدار سراج لقاته طالع مالحمام ولابس وبيبدى ايصلي خشت عليه وصلو مع بعضهم وبعد الصلاة نزلو مع بعضهم وفطرو وبعد الفطور مشو الهل سراج في الفيلا عشان بيشوف امه لان امس كله كانت بس اتكلم فيه بالفون وماشافهش وقعدو ايهدرزو معاها هي وباته ومسكوهم عشان ايتغدو معاهم
“”””””””””””””””””””
#عند_رانيا_وفيصل في الشغل
رانيا كانت مع فيصل في المكتب ولما جو العمال يحكو معاه طلعت ولما طلعت مالمكتب شافها وسيم وجاها
وسيم:رانيا معليش نبيك في موضوع
رانيا:تفضل وسيم ان شاءلله خير
وسيم:لا خير الحق مش عارف كيف نبداه لكي منحرج واول مرة نحكي موضوع زي هذا
رانيا:شغلتني شن فيه
وسيم:بصراحة ومن غير اي مقدمات انا عجبتيني ونبي انتقدملك ياريت لو تقدري اليوم تاخذي موعد مع هلك عشان هلي بيجوهم
رانيا انصدمت وارتبكت ومعش عرفت تحكي
وسيم:انا عارفة اكيدة انصدمتي واتقولي هذا كنه والدنيا توا اطورت ومعش ايصيرن الحاجات هكي يعني المفروض حكيتلك وهكي لكن انا فكرت وقلت عاجبتيني وانا عارفك وكويس وانتي عارفتيني يبقى مافيش داعي نحكيلك وانتعرفو علي بعضنا وبعدها نخطبك حبيت اتكون خطبة دغري واطباع بعضنا حنعرفوهن في الخطبة
رانيا:القصة مش قصة انا عارفتك او مش عارفتك القصة ان انا موضوع الخطبة والزواج توا شايلتهن من بالي بكل
وسيم:باهي ليش
رانيا:هكي لاني توا انفكر في شغلي بس
وسيم:وشغلك قاعد صدقيني مش حنحرمك من شغلك ولا حنقيدك في اي حاجة انا بس عاجبتيني وانتي فيك كل مواصفات البنت اللي نبيها مراتي
رانيا:مش عالتقييد بس انا رافضة مبدا الزواج كله والله
وسيم:عليش مع ان كل بنت اتمنى الزواج
فيصل:تهيالي قالتلك رافضة الزواج عليش السكنان هذا كله
وسيم:وانت شن خششك في الموضوع
فيصل:من بدري نسمع فيك تحكيلها وهي اتقولك رافضة الزواج وانت ساكنلها تي خلاص بالك البنت مش عاجبها ولا اتحب حد اخرى ومتحشمة اتقولك
وسيم:عموما انا نحكيلها هي مش انت وهي صاحبة الراي فكري رنوشة وردي عليا وعدى
فيصل غامتله:عمري ماشفت برادة كيف برادة العيل هذا
رانيا:بس انت حرجته حرام
فيصل:وجه بارد مش حينحرج اصلا كان بينحرج راه انحرج ومن انتي اتقوليله لا وهو مازال مصر ويحكي
رانيا:اصلا انت من امتى قاعد هنا وتسمع فينا
فيصل: شفتكم من اول مابدى يحكي معاكي بس ماحبيت انجي وانضايقكم لكن بعد كثر لنقني ادخلت
رانيا:اها خلاص خلينا انشوفو العمال شن دارو
فيصل:باهي ومشو وهما يمشو
فيصل:توا هو قالك فكري وعطيه رايك
رانيا:اها قالها
فيصل:وانتي بتوافقي عليه
رانيا:اكيدة لا مش حنوافق
فيصل ابتسم:باهي كان تقدمتلك انا اتوافقي
رانيا بصدمة:شنووو
فيصل ضحك:انيصر صدقتيها وقعد يحكي مع العمال ومشى الوضع كأنه ايبصر
“”””””””””””””””””
#عند_سندس_وسراج
تغدو في الفيلا مع هل سراج وبعد الغداء روحو الحوشهم واول ماخشو
سراج:حبيبي اتجي اتحطيلي مالمرهم حسيت ظهري قعد يحرق فيا
سندس:حاظر
ومشو الدار سراج وخشو حول سراج تيشرته وسندس جابت المرهم وبدت اتحطله فيه وهما في الوضع هذا رن فون سراج وكان الفون جنب سندس
سراج:من اللي ايرن
سندس:لولي?(اذكرتوها?)
سراج:ترا مديه
سندس مداته له:هاك وصبت بتطلع
سراج مسك يدها
سراج:شوفي ودار مشغول اللولي
سندس ضحكت ضحكة هزوة عساس بعد نقعد انا مش جنبك حتكلمها
سراج;على فكرة فهمت ضحكتك ولازم تعرفي كويس اني معش نبي اي وحدة غيرك مهما كانت وعشان اتصدقي اكثر فك الشفرة من تليفونه وكسرها
سراج:انا قتلك انحبك ومن قلبي والكلمة هذي عمري ماقلتها وعمري ماحسيتها من قبل مع اي وحدة الا انتي وقررت انكون معاك انتي وبس يبقى حنكون معاك وانسيب بنات العالم كلهن مهما كانن انتي بس اللي قدرتي تاخذي هذا وشير علي قلبه
سندس ابتسمت;انا عارفة بس مش عارفة جاني شعور غريب لما شفت الاسم وحبيت انسيبك براحتك معاها
سراج;انتي راحتي وكرها من يدها وحطها علي رجله وقعد ايحول في شعرها من علي خدها وايحط فيه ورا وذنها بكل حنية?وايشوفلها بحب وسندس ذايبة في عيونه وكلامه الها قعد ايقرب منها وباسها علي خدها بشويش ومن خدها الشفايفها وسندس كانت مشاركته في البوسة وبعدها نزلها عالسرير وجا عليها ومازال مستمر في بوساته الرومانسية ?بس قاطعهم صوت فون سندس اللي ايرن
سندس بشويش:الفون ايرن
سراج بشويش وجنب وذنها:اسسس مش وقته نبيش شيئ ياخذك مني توا وقعد ايبوس فيها وسندس مسلمة روحها تماما
فون سندس فصل ورد ايرن اخرى
سندس:سراج خليني انشوفه مرات حد مهم
سراج;مافيش اهم ماللي نحن فيه توا وكمل بوساته?
فصل الفون وعاود ايرن للمرة الثالثة ?
سندس:لا سراج جديات اكيدة شيئ مهم
سراج بعد من عليها ومسك الفون
سراج:هذي صاحبتك رانيا
سندس قمعزت: هات اكيدة شيئ مهم الها زمان مارنت وخذت فونها وردت بس مازال سراج ماسيبها هي ردت وهوا اينابش فيها
سندس:اهلا رنوشة
رانيا:باهي اللي رديتي مرض في شنو كنتي اديري
سندس ابتسمت:شيئ كنت مش جنب الفون بس
سراج يضحك وبشويش:كذابة كنتي في حظني وطبعا مازال اينابش فيها وايبوس فيها وهي تحكي وسندس كانت اتحاول اتوقفه
رانيا:باهي اسمعي اليوم بنجوك انا ودودي قاعدة
سندس:بفرحة قاعدة واخيرا بنلتمو رايفت عليكن
رانيا:ونحن رايفنا عليك وكل وحدة عندها عرم كلام بتحكيه
سندس:انا شر منكن
رانيا:خلاص بعد العصر دغري انكونو عندك
سندس:خلاص نرجا فيكن وسكرت
سراج قرب منها: خلاص اقفلي تليفونك عشان تقعدي ليا بروحي
سندس:لالا سراج ماايصيرش منها توا صحباتي بيجني ويادوبك انلحق انجهز الجيتهن
سراج فنص عيونه:كيييييف?لا مش وقتهن توا بكل ليش ماقلتيلهن مش قاعدة ولا مش فاضية
سندس:ليا زمان ماشفتهن عشاني مشيها توا انا مش طايرة والله مرايفة عليهن بكل
سراج:بس كان اجلتيها البكرا
سندس:كيف اناجلها وانا ماصدقت بيجني انقولك ليا زمان ماشفتهن ونحن عمرنا ماتعودنا هكي كنا كل يوم انتلاقو ماتصورش قد شنو توا مرايفتلهن
سراج:باهي حبيبي خلاص فهمت مرحبتين بيهن في اي وقت وكان لاوي وجه
سندس:زعلت
سراج:لا?
سندس:والله زعلت
سراج:اها زعلت
سندس:باهي اسفة شن انديرلك عشان ترضى
سراج:تبي اتراضيني
سندس:اها
سراج;بوسيني هنا واشر علي خده
سندس;حاظر وباساته
سراج بعد سندس باساته قرب منها وباسها بوسه سريعة علي شفايفها
سراج:هكي رضيت?
سندس ابتسمت وصبت وبعدها ردت
سندس:سيرجو هنا بيجن اووو
سراج:فاهم فاهم توا نمشي للفيلا
سندس ضحكت:احسن حاجة فيك تلقطها وهي طايرة
سراج;لا مش هكي فهمتها لما قلتي سيرجو عرفت وراها حاجة اصلا عمرك ماقلتيها ?
سندس انحرجت:ما اصلا
سراج:مااتبرريش عادي المهم قوليلي كان ناقصتك حاجة عشان انجيبها لكي
سندس:لالا توا اندز حد اخرى انت تاعب تقدرش اتسوق
سراج:ماعليك انتي بس قوليلي شن تبي وتوا انكلم فيصل ونمشي انا وياه
سندس:باهي
عدت سندس المطبخها وشافت شن ناقصها وبعدها كتبت كل اللي ناقصها السراج وكلم سراج فيصل بفون امه وجاه ومشو ايجيبو في الحاجات مع بعضهم وجابو كل الطلبات وبعدها فيصل وسراج مشو الحوش فيصل وكسدو فيه
“””‘”””””””””””””””””
#عند_رويدة
كانت هي صاحبة فكرة المشية لانها كانت مرايفة علي صحباتها وكانت محتاجتلهن بكل في الوقت هذا حكت الهلها انها بتمشي السندس ووافقو هلها واتفقت مع رانيا بس امها قالتلها لازم اتقولي الراجلك فدزت رسالة المعاذ مكتوب فيها(أنا بنمشي السندس صاحبتي مع بابا) معاذ دغري رد عليها((اللي اتريحك ديريها اهم شيئ ايكون جوك تمام))
“”””””””””””””””””””””
بعد العصر دغري جن البنات السندس وأول وحدة جت رانيا وبعدها جت رويدة واول ماتلاقن كملنها احظان وبكى وارياف وبعدها سندس شالتهن العمتها سلمن عليها وحمدللها عالسلامة وبعدها مشن الحوش سندس شربن القهوة والعصير مع بعضهم اما العصرية فقررن ايخشن مع سندس للمطبخ ايساعدنها فيها وايهدرزن مع بعضهن
وقعدن ايجهزن وايهدرزن واول وحدة بدت بهمومها هي رويدة لانها كانت متضايقة بكل وحكتلهن عشان اتريح
رويدة;حكت كل اللي صار معاها وسبب مشكلتها الاخيرة وانها مش عارفة شن ادير مع معاذ
رانيا:هو شن قالك مابررش موقفه بكل
رويدة:انا ماخليتش يحكي شيئ ومابيتش نسمع منه وقتله بنقعد عند هلي عشان نعرف انفكر
سندس:ولما جيتي الهلك معش كلمك
رويدة:من اول ماجيت غادي وهو ايدزلي انحبك كل ساعة وفي الليل رن كم مرة مارديتش عليه
سندس:بس يادودي حسيته متأثر وايحبك وبعدين هو حلم يعني معقولة بتحاسبيه علي حلم
رانيا:بس لما الواحد يحلم بحاجة معناها ايفكر فيها
رويدة:وهذا اللي قلته حتى انا والشيئ هذا قاهرني كيف ايفكر فيها وانا معاه
سندس:مش شرط نحلمو بحاجة انفكرو فيها مرات نحلمو بأشخاص ناسيينهم بكل الحلم عمره ماكان بيد الشخص
رويدة:يعني انا توا شنو اندير
سندس:انتي توا زاعلة ومتضايقة واحسن حل انك جيتي الهلك لان لو حكيتو وانتي بالحالة هذي حتنتهى بمشكلة وقصة لانك معصبة بس توا احسن حاجة اتخليك عند هلك كم يوم منها اتريحي اعصابك ومنها اتفكري كويس واترايفيله لان بعد اترايفيله حتعرفي شن تبي
رويدة تبكي:انا مرايفتله من توا يابنات من اول مانزلني عند هلي وانا مرايفتله بس زاعلة منه حاسة مش حنقدر انسامحه بكل
رانيا:دودي كم مرة حكيتلك ان البنت ميته يعني مافيش منها خوف ومصيره ناسيها لكن انتي حساسة بزيادة
رويدة:مش حساسة يارانيا بس مافيش بنت ترضى حبيبها وراجلها ايفكر في غيرها يعني توا اكثر حاجة مخوفتني ان لو توا سامحته وانسيت الموضوع اتصير اللي اكبر يعني امس حلم بيها خايفة بكرا ايناديلي بأسمها في اللحظة هذي شن يقعد موقفي
سندس:انتي توا شعفيه اشوية عاللي داره وطول الفترة اللي عند هلك ماتحكيش معاه بكل خليه ايرايف عليك ولو قررتي اتردي ردي بشروطك واول حاجة اديريها مااترديش الا اذا اعترف وحلف ان نساها من قلبه وعقله
رانيا:ايوا انا مع دوسة في كلامها
رويدة:ان شاءلله حندير زي ماقلتن لكن هي انا حكيت مشكلتي واللي عندي احكن انتن شن صار معاكن وشن ماصار
رانيا:انا مافيش جديد علي حطت ايديكن
سندس تضحك:الاكشن والأفلام الهندية عندي انا
رانيا ورويدة:شن صاير احكي
سندس بدت تحكي القصة من يوم فرح رويدة وحرجتها وردتها واللي صار كله وقصة هدى من بدايتها النهايتها
رويدة مصدومة:معقولة هذا مسلسل تركي
رانيا دارت روحها مصدومة:هذا كله ايصير وماتحكيش
سندس;شنو بنحكي مواضيع زي هذينا ماينحكنكش في الفون وبعدين كنت في حالة مايعلام بيها الا ربي
رانيا:وسراج شن كان رده ماللي صار كله
سندس:سراج من اول ماجت وهو ايقول تكذب وفعلا طلع كلامه صح
رويدة:وانتي عادي سامحتيه علي موضوع زي هذا
سندس:انا لما خذيت سراج خذيته وعارفته صايع ونحن اصلا ماانحبوش بعضنا واللي دايرة مع هدى قبل مانجوزو
رانيا;واهم حاجة وماتنسيهش ان توا تااااب وحب دوسة ومعش ايشوف في غيرها العقبة الدوسة تعرف قلبها شن يبي
رويدة;وانتي حبيتيه وبتكملي معاه وبتلغو اتفاق السنة اللي كان بينكم
سندس:لو قتلك ماانحبش نبقى نكذب
رانيا بفرحة;واخيرا اعترفتي
سندس:انا تاكدت لما صارت القصة كنت مقهورة مش مصدقة ان حياتي بتكمل بلاه حسيت روحي تعودت عليه ومش قادرة انعيش بلاه تخيلن يابنات سندس اتحب واحد منحرف زي سراج سبحان الله قبل 5شهور من توا كنت مش طايقة نسمع اسمه او انشوفه وتوا نفرح كل ماانشوفه وانتريح لما نسمع اسمه ونحكي معاه
رويدة:انا فرحانتلك يادوسة انك حبيتي وانك واخيرا اقتنعتي بالحب وجربتيه بس نصيحة مني ماتوثقيش في سراج واجد اصلا اللي زي سراج مستحيل ايتوب بالسهولة هذي ومستحيل ايحب بالسرعة هذي حاسه ان عنده غرض معين
رانيا:نوعية سراج صريحة يعني لو عندك غرض معين ياخذه وبذات انها مراته بس مستحيل ايلف وايدور في قصة حب وهمية
سندس:هو تاب وحتى ان تعاقب عاللي داره عشان بيتغير رغم اني كنت رافضة ان ايتعاقب بس سراج توا نادم علي كل حاجة دارها في حياته وايقولي ياريت عرفتك من زمان ومادرتش كل اللي درته
رويدة:انتي حرة بس بنعرف انتي اعترفتيله بحبك له
سندس:لا مازال
رويدة;باهي صار بينكم حاجة ولا لا
سندس:لعند توا مازال
رويدة:معناها كان تسمعي مني ارجي اشوي
رانيا:شنو بترجى يارويدة انتي كنك بس
رويدة:ترجى لين اتبان نيته كويس واتأكد ان فعلا ايحبها والطريقة الوحيدة اللي اتأكد بيها هي ان ماتعرفش بحبها له ولا تعطيه اللي يبيه لو صبر عليها وقعد ايحبها بالظروف هذينا معناها صح ايحبها بجديات بس لو حسيتيه بعد ورد جوه لولي لانك ماعطيتيش اللي يبيه يبقى يكذب وماحبكش وفي الحالتين انتي اللي حتكسبي
رانيا:مااتعدليش علي كلامها انتي حبيتي سراج وحاسة ان تغير صح يبقى خليك ورا قلبك مش حتندمي
رويدة:هي مجرد نصيحة انا مافرضتش عليها شيئ وهي حرة انا في الاخير نبي مصلحتها بس
سندس:وانا فاهمتك ياقلبي واللي فيها خير ايجيبها ربي
رويدة:يارب
سندس:خلاص هي كل حاجة جهزناها تعالن خلنا ناكلو
وطلعن البنات مالمطبخ وقعدن في الصالة وقعدن ايعصرن وايخرفن وجوهن سمح وعالمغرب كل وحدة جاها باتها روح بيها
“””””””””””””
أما سندس قعدت اتلم في حوشها وفي المطبخ وبعد اشوي سراج خش عليها في المطبخ
سراج حظنها مالخلف:خير ياسموحتي
سندس:خيرات
سراج:انسجمتي مع صحباتك
سندس:أها جو ايهبل
سراج:نجك ليا ان شاءلله ديما جوك ايهبل زيك
سندس ابتسمت:ان شاءلله
سراج قعد ايبوس فيها علي رقبتها ويحكيلها بشويش
سراج:اتصدقي اني رايفتلك واجد انا معش انحب نمشي من جنبك بكل
سندس كانت ساكتة وذايبة في حركات سراج وكلامه
سراج لفها شوره: توا معش عندك وين تهربي مني اليوم انتي ليا ? وشالها ورقى بيها للدار وحطها عالسرير وهو ايبوس فيها وبعد قعد يطورن البوسات وسندس كانت اتشارك فيه في بوساته وذايبه في لحظة اذكرت كلام رويدة وحست انها لازم تسمع نصيحتها وفي لحظة
سندس:سراج مانقدرش انكملو
سراج بشويش:قتلك اليوم انتي ليا مافيش هروب بكل
سندس:بس انا اليوم مريضة
سراج:بلاش اطروح اي مرض اهو مافيك شيئ
سندس:سراج افهم وخدودها انحمرو وطبست راسها
سراج:اوكي فهمتك بس تعرفي مش وقتها بكل توا
سندس:معليش
سراج:باهي كم يوم
سندس;5 أيام
سراج ابتسم:باهي مش مشكلة انتحملوهن وقرصها في خدها
سندس ابتسمت
سراج:دبينه مافيه شيئ معناها خليني نطلع انجيب عشاء جاهز وانجيب افلام انكسدو عليهن في الليل
سندس:خلاص باهي بس جيب افلام حلوة
سراج:شن رايك تمشي معايا
سندس:لا عنديش جو نطلع خليني انكمل شغلي في المطبخ علي ماروحت
سراج:خلاص براحتك وباسها علي خدها وطلع
سندس نزلت بعده وقعدت اتلم في المطبخ
سندس اتفكر:دبينه طلع نمشي انصلي العشاء بسرعة قبل ماايروح ويفطنلي ورقت دغري الدارها توضت ولبس ملاية الصلاة وبدت اتصلي
سراج ركب في سيارته وطلع بس وهو طالع اذكر ان مافيش معاه فلوس ورد بياخذهن مالحوش
وخش ورقى فوق بيمشي الداره بس وهو راقي كان الحوش هادي فسمع سندس وهي اتصلي وقف عند الداره وشافها وهي راكعة واتصلي
#يتبع
قولكن سراج شن حيكون تصرفه ورده علي سندس بعد اللي شافه وسندس شن حيكون ردها وشن حتقول السراج هي ليش دارت هكي وهل حيفهمها ولا حتصير مشكلة ?
أما رويدة شن حدير وكلامها مبدري مخيف وهي مش قادرة اتسامح معاذ قولكن حيصير شيئ عشان اتسامحه ولا خلاص حتكون هذي النهاية
أما معاذ زعمك هو ايحب رويدة جديات ومايبيش يخسرها ولا حاس بالذنب اتجاهها مش اكثر ?
أما فيصل امتى بيعترف بحبه الرانيا وهل لما يعترف حيتغير احساسها تجاهة وتتقبله اولا ?
اما رؤوف شن قصة البنت اللي اتكرر في الحلم او حيكون موضوع عادي ?
كله حنعرفوه في الحلقة الجاية
أسفة بنات عالتاخير بس بسبب الجو والمطر اليوم الضي طافي مالصبح والنت مافيش ?
أسفة لو في لخبطة في الاسماء وأكيد رايكم ايهمني?
گـتـابـتـي Koka Saleh
error: