منحرف وأحببته
#مـنـحـرف_وأحـبـبـتـه
الـحـلـقـة (6)
هدرزت سندس وامها مع باتها وخشن رقدن
“”
صباح يوم جديد وتحديدا في حوش هل سندس
ناضت سندس توضت وصلت الصبح ولبست(بلوزة دمية فيها لولي ابيض واسترتش كحلي ووشاح ليكرا كحلي وكاويش أبيض) وطلعت تفطر مع هلها
سندس:صباح الخير
سعاد وفرج:صباح النور
وقمعزت سندس معاهم وبدت تفطر
فرج:دوسة اليوم عندي شغل مهم وتوا ماشي الشحات ايشيلك السواق تمام
سندس:تمام بابا
فرج:كان وحدة منكن اتعلم السواقة عشان انتريح عليكن
سندس:انت عارف يابابا انا بعد اللي صار المرة اللي فاتت معش انحب السواقة بكل معقولة انسيت اللي صار
فرج:مش ناسي بس انتي كنتي اتعلمي ومافيش واحد ماغلط وهو ايتعلم حاولي مرة اخرى حتقدري
سندس:لالا يابابا مستحيل عاد انعاودها التجربة هذي انا كنت حنقتلكم معاي
فرج;بس اهو مامتتنش وربي نقذنا وكان حادث بسيط والحمدلله اهو توا قعد ذكرى
سندس:تي اي بسيط وماما بسببه قعدت 3ايام في العناية
سعاد:مااتعبش روحك معاها هذي معندة ومستحيل ادير حاجة مش مقتنعة بيها
فرج ابتسم: سلمها طالعة الباتها
سعاد:فعلا زي بعضكم روسكم مسكرات
فرج:وعساس انتي مش معاندية اهو حتى انتي نقنع فيك انعلمك اتسوقي ورافضة
سعاد:انت عارف اني مش مقتنعة بالمرا اتسوق هكي تربيت وعلي هكي عشت بويا واعر وعلمنا ان المرا مهنتها في الحياة ترضي زوجها واتربي عيالها واتقيم حوشها وبس
فرج:هذا تفكير ناس زمان الحياة توا تغيرت والمرا زيها زي الراجل بزبط اتسوق وتشتغل الدنيا اطورت
سعاد:انا مازلت ماشية علي عاداتنا وتقاليدنا وكيف مارباني بويا نمشي
سندس:بابا مااتعبش روحك معاها ماما تفكيرها زي العزايز
فرج:والله وحلت فيكن
كملو الفطور وبات سندس مشى الشغله وسندس شالها السواق للجامعة وخشت المحاظرتها ساعتين وكملت محاظرتها وطلعت هي ورانيا
“”
عند رويدة في القاعة كملت المحاظرة وجت بتطلع مالقاعة مع خشت معاذ للقاعة
معاذ:كملتو
رويدة:اها كنك تأخرت
معاذ:كان عندي شغل ماقدرتش انجي شن جو المحاضرة
رويدة:ساهلة مش واعرة توا نشرحها لكي
معاذ:تمام بعدين انرن عليك تشرحيها ليا
رويدة:تمام
معاذ:شنو انسجمتي انتي والبنات امس
رويدة:اها بكل جوهن سمح بكل
معاذ:حتى هنا انسجمن امعاك
رويدة:لاحظت ان اساميكم كلكم بحرف الميم
معاذ ضحك:امبراطورية الميم هكي سموني انا بحرف الميم مشو البنات كلهن بنفس الحرف
رويدة:اها
“”
طلعن سندس ورانيا مالمحاضرة وقعدن ايرنن علي رويدة مااتردش
سندس:مش عارفة كنها مااتردش
رانيا:بالك مازال في المحاضرة
سندس:عارفة مكان قاعتها
رانيا:اها
سندس:هي نمشولها
ومشن ولقنها اتخرف مع معاذ قدام القاعدة وسندس غمتلها رويدة شافتهن وخافت من هزيبة سندس
رويدة;خلاص اهن البنات جن اكيدة يبني نفطر معاهن
معاذ:تمام عدي
وجت رويدة شورهن
سندس:وين وين ياحنة معش فيه حشم قاعدة مصبية معاه واللي طالع واللي خاش ايحق فيكم
رويدة:اس اس واطي صوتك توا يسمعك
سندس:خايفة هو يسمعنا ومش خايفة ما الناس اللي ايشوفو فيك
رويدة: هو كان يسال فيا عالمحاضرة لان جا متأخر وبعدين الطلبة كلهم عارفين ان اصدقاء وبس وانتي عارفة معاذ يعتبر فيا اخته ومافيش اي حاجة اخرى
سندس:انا عليك بس مانبيش حد يفهم غلط
رويدة:عارفة بس والله الكل عارفين صداقتنا
رانيا غامتلها:خلاص خلنى نمشو نفطرو
رويدة:كنك رنوشة
رانيا:ماكني شيء
سندس بحتت في رويدة وابتسمت
رويدة:هيا نفطرو
رانيا بعصبية وطلعت قدامهن;هيا ورويدة وسندس قعدن يضحكن خذن فطور وعدن للحديقة في الكلية وقمعزن يفطرن
سندس:رنوشة كنك متضايقة
رانيا:شي هو انا حد معبرني اصلا
رويدة:شن فيه رنوشة عليش الكلام هذا
رانيا:يعني مش عارفات اليوم شنو
سندس:شنو اليوم
رويدة:اليوم سبت شن فيه
رانيا بحزن:ياحقيرات مش متذكرات اليوم
رؤوف:اليوم عيد ميلاد رنوشة معقولة مش متذكراته وكان جايب في يده علبتين وحدة فيها تورته وحدة فيها شكولاطات وجايب معاهن عصاير
قعدن سندس ورويدة يضحكن
سندس:كل سنة وانتي طيبة ياقلبي
رويدة:العمر كله ياسمحة
رانيا مازال مصدومة:قصدكم مش ناسيين عيد ميلادي
رؤوف:معقولة ننسوه رنوشة
رويدة:امس اتفقنا مع رؤوف وقال ديرن روحكن ناسياته لين بعد تكمل المحاضرة انجيكن
رانيا:هذا ليش امس دار روحه مش متذكر شي وانتن اليوم جيت غامتلي من رؤوف ان مش متذكر ونلقاكن حتى انتن ناسيات
سندس:هههه مطرشقة معقولة ننسو عيد ميلاد رنوشةرؤوف:هذا يوم جت فيه احلى ملاك عالدنيا معقولة ننسوه
رويدة:اوووو عالرومانسية
سندس:هي بلا كلام زايد وحطولنا التورته من بدري نرجى فيها
رانيا:ماهامك الا بطنك
سندس تضحك:توا انتي كسبتي عيد ميلاد من حبيبك وهدايا وانا مانكسب شيء الا ناكل تورته
رويدة:خطرها الهدايا هاكي هديتك وكانت جايبتلها ساعة حلوة
وسندس طلعت هديتها:هاكي ياسمحة وكل سنة وانتي طيبة وكانت جايبتلها عطر سمح
حط رؤوف التورته والحاجات واحتفلو مع بعضهم
رؤوف:اشوي وانجيكن ومشى
سندس:اتراهنن ان ماشي ايجيب في هدية
رانيا:لا معقولة حرام هكي
سندس:غير بلا اطروح زيطي توا بعد تجوزو تقعدو اتعانو في عيال وهم معش يذكره بكل
رانيا:لالا مستحيل ينسى وحنعيشو حياة اتهبل وحتقي
سندس:احلمي هنا عندك هذي نهاية كل زواج
رويدة:عليك فكرة واخذتها مالزواج
سندس:مش فكرة هذا واقع والكل عايشيين فيه
رانيا:خلاص نكدتي عليا عن مرض
مع جيت رؤوف جايب في يده علبة هدايا كبيرة وكان فيها لبسة(بلوزة حلوة بيج وعليها قونة حمال ليكرا خضرا وعليها وكاويش ابيض ووشاح بيج فيه فصوص خضر وشنطة حلوة بيج)
رانيا قبل ماتفتح العلبة وبخجل:شكرا اوفا
رؤوف;العفو كم عندي رنوشة انا
رويدة خذت العلبة:ترا ورينا هالرومانسي شن جاب وفتحتها هي وسندس
رويدة شهقت:حي حي هذا خبر حتى الاخته ماعمره جابه
رؤوف:انتي بذات ياما جايبلك يانكارة الجميل
رويدة:لا ماعمرك جبتلي هكي
رانيا نغزتها:حرام اوفا ماعمره قصر معاك
سندس: عن دا بنت واتعاتب في خوها انتي شن دخلك
رؤوف:خلنها عنكن ادافع عن حبيبها
رويدة تضحك:ياساتر خلاص يادوسة نحن اللي طلعنا برانيات
كملو الجو والاحتفال
رؤوف:تسمحلي ناخذها منكن اشوي
رويدة:مااتفكنا الا من هرجتها
وعدت رانيا مع رؤوف
رؤوف:كل سنة ونحن مع بعضنا
رانيا:ان شاءلله حبيبي وربي ايخليك ليا كلفتك واجد اليوم
رؤوف:مااتقوليش هكي حبي كم عندي رنوشة انا هي وحدة بس واللي درته كله اشوي في حقك
رانيا ابتسمت:نجك ليا حبيبي
رؤوف:وليا نجك ياحبي
وقعدو ايهدرزو مع بعضهم
“”
كملن الاحتفال وكل وحدة روحت الحوشها
رانيا جايبها باتها وخشت الحوشهم وشايلة العلبة والهدايا في يدها
سمية:مشاءلله منين هذا كله
رانيا:البنات دارلي احتفال في الجامعة مش زيكم
سمية;كان صبرتي راك حجيتي انا وباتك مجهزيلك عيد ميلاد
رانيا بفرحة:تحكي جد ماما
سمية:اها
رانيا:معناها انخش بسرعة نعزم البنات وجت بتخش وبعدها ردت
رانيا:انتو من عازمين
سمية:خالتك زهرة وعمامك الاثنين وجارتنا عزة
رانيا:باهي تمام وخشت اتكلم في رويدة وسندس بتعزمهن هنا وامهاتهن
“”
سعاد:دوسة دوسة تعالي تغدي
سندس:انكمل مكالمتي وجاية
سندس:خلاص توا انجو يااحمارة سكري
رانيا:ضروري مااتجن دايرين حفلة سمحة
سندس:مالنا شي محتفلين بيك واسمعي مافيش هدايا الصبح ونحن جايبينلك
رانيا:نفس كلمة رويدة عن مرض مانبيش هدايا نبي انهيجو مع بعضنا
سندس:وبالك تبي هدايا شن تحسابي قاعدين علي بنك
رانيا;مانبيش مانبيش توا نعطيكن هداياكن اللي في الصبح ياشريني قدام اللي جايين جبتنهن ليا توا هنا وهدية رؤوف عساس منكن اصلا قلت الماما منكن
سندس:باهي باهي ملينا ونحن انسترو عليكم امتى ياخذك ونفتكو
رانيا:ان شاءلله انتخرجو وتفتكو من وجوهنا خلاص هيا وجك بنمشي انشوف التجهيزات اسمعي تعالي بدري عشان اتوتي معايا انتي ورويدة
سندس:خلاص انتغدى وانجيكم
رانيا:تمام وسكرت
وسندس طلعت الهلها
سعاد:سنة عشان اتجي للغداء
سندس:كنت نحكي مع رانيا دايرة عيد ميلاد وتبينا انجوها
سعاد:اها مش عساس اليوم احتفلتن بيها
سندس:انا ورويدة احتفلنا معاها في الجامعة وهلها دايرينلها عيد ميلاد اليوم
فرج:امتى بتمشي يادوسة
سندس:انتغدي ونمشيلها قالت تبينا انوتو معاها
فرج:خلاص انا بعد الغدا طالع توا انحطك عندهم
سندس:وماما تمشي معايا لما يطلع بابا
سعاد:ياخيتي قايلة مرات نزعجو العرب بيقيلو ولا حاجة سندس:تي لا اي ازعاج عادي وبعدين اتساعدي اعميمة سمية واتجهزي معاها حتى اعميمة عالية بتجي
سعاد:خلاص حنمشي معاك
فرج;خلاص بعد الغداء دغري وتن ارواحكن انشيلكن بسرعة عشان عندي شغل مهم
سعاد:فرج انحق فيك الايام هذينا متعب روحك في الشغل واجد حتى الحوش معش تقعد فيه زي قبل واغلب وقتك مسافر
فرج:قصص في الشغل واجد وانحل فيهن مااتشيلي في بالك
سعاد:انا غير عليك مانبيك اتعب روحك واجد علي صحتك انت عارف الدكتور ديما ايقولك لازم تاخد راحة
فرج:انا كويس وماانحس في شي
سعاد:ان شاءلله ديما اكويس
فرج;خطرها تذكري صاحبي محمد اللي ديما نحكيلك عليه
سعاد:من مااذكرتش
فرج:اللي كنت نقرا معاه تذكري اللي حكيتلك عليه وعلي قصة وخذته البنت عمه والمشاكل اللي صارن مع هله مايبوهش وبعد خذاها وربي ماعطش عيال وطلع هو وياها الألمانيا وعاشو غادي
سعاد:اها اها اذكرته كنه
فرج:انا ماحكيتلكش اني من ثلاث شهور تلاقيت معاه
سعاد:لا ماحكيتلي هو روح لي ليبيا
فرج:اها روح تذكري في تغيريرتي للسيارة
سعاد:اها نذكرها
فرج:خلاص جيت للمعرض
(انردو الثلاث شهور فاتن)
محمد بات سراج في المعرض ايتفرج عالسيارات وبعدها خش علي صاحب المعرض في المكتب
محمد:السلام عليكم
صاحب المعرض صبى;خير خير ياحاج محمد شن اخبارك
محمد:بخير الحمدلله
صاحب المعرض:نورت المعرض ان شاءلله غير سيارتنا عجبنك
محمد:لا مشاءلله كويسات
صاحب المعرض: لو تبيها للشبوب اللي عندك ماانظني سيارتنا يعجبنه
محمد:لا والله مش له انا نبي منك 20سيارة نفس اللون ونفس النوع نبيهن الموظفين الشركة كمكافئة عالشغل
صاحب المعرض:خلاص بكرا ايكونن جاهزات بس انت قولي شنو الموديل اللي عجبك
محمد:وريته للشباب برا اللي عجبتني
مع خشت فرج بات سندس
فرج:السلام عليكم
صاحب المعرض ومحمد:وعليكم السلام
فرج:شن اخباركم
صاحب المعرض:بخير الحمدلله
فرج:شفت برا همر وبالمواصفات اللي نبيهن كلها بس اللون ابيض والحق مانبيش ابيض نبي سودة اتوفر معاك ولا لا
صاحب المعرض:باذن الله متوفرة في الفرع لاخر
محمد ايبحت زيين
فرج:وين الفرع لاخر نمشيله
صاحب المعرض:تريح نص ساعة وحتوصلنا لعند هنا وطلع
فرج:تمام
محمد:كان ذاكرتي ماخيبتني فرج محمود
فرج:انعم هو بروحه بس انت وقعد ايبحت فيه زين
فرج:محمد علي
محمد صبى:هو بروحه وصبو سلمو علي بعضهم تسليمة حارة وتسليمة معرفة قديمة وبعد كملو التسليمة
فرج:وينك ووين ايامك امتى روحت من المانيا وترويحة دائمة ولا زيارة
محمد:ليا 7سنين مروح ونقلت كل اعمالي وشغلي هنا
فرج:والله ماعندي علم بترويحتك بكل
محمد:دورتك واجد ومشيت الحوش العيلة قالو له سنين مبيوع ومعش عرفت كيف نوصلك
فرج:حوش العيلة من بعد ربي خذا امانته مالوالدة وقعد مسكر بعناه انا وخوتي وكل واحد خذا حقه فيه
محمد;وينك وشن تخدم توا وشن امورك
فرج:الحمدلله بخير عندي مصنع مواد بناء واموري ماشية تمام انت اللي شن اخبارك وشن اخبار المدام ان شاءلله هلك ريحوكم علي موضوع الاطفال
محمد:والله شن انقولك عشنا فترة صعبة وبعدها ربي رزقنا بوليد وباتي حبه وكان يبينا انردو بس انا ماقدرتش ننهي شغلي برا ومن 7اسنين معش قدرت عالغربة وقعدت نبي سراج ايعيش بين هله وناسه صفيت كل شغلي غادي ونقلته هنا والحمدلله اموري ماشية تمام
فرج:مشاءلله مشاءلله باهي ربي عطاكم وماحركم ربي رحمته واسعة وانتو ضحيتو واجد عشان بعضكم وصبرتو والحمدلله نلتو
محمد:الحمدلله ربي جبر بخاطرنا وماحرمنا مالخلفة المهم ها قولي انت شن صار فيك وشن عندك من عويلة
فرج:الحمدلله ربي عطاني بنية انحق بعيونها في الدنيا بنية مافيش زيها اثنين بكل
محمد:مشاءلله مشاءلله ربي يحفظها وايخليها لكي ان شاءلله
فرج:ان شاءلله
محمد:لازم انديرو زيارة البعضنا وايتعرفو عيلاتنا علي بعضنا انا وانت صحبة قديمة عليك ايام ماننساهن لازم انردوهن
فرج:ان شاءلله عطيني رقمك وعنوانك عشان انتواصلو
محمد:اكتب عندك (092———–)هذا رقمي الخاص عاطيه للعيلة بس وللغوالي وانت مالعيلة يافروجة
فرج:اهو رنيت عليك وهذا رقمي وان شاءلله حنتواصلو
محمد:نرجا فيك لازم انتغشو مع بعضنا وايتعرفو هلنا علي بعضهم لازم ايكون فيه مشي وجي علي بعضنا
فرج:هذي اكيدة ان شاءلله انحددو يوم عشان انتلاقو
مع خشت صاحب المعرض
صاحب المعرض:استاذ الهمر برا تقدر تطلع اتشوفها
فرج:تمام
فرج:ان شاءلله حيكونن فيه اتصالات وانحددو موعد انتلاقو فيه مرة اخرى
محمد:™ان شاءلله وانت طيب وطلع نهى اجراءات السيارة وخذاها وروح
ومحمد اتفق امعاه بكرا ايكونن 20 سيارة واتيات وروح حتي هو
“”
فرج;خلاص تلاقيت معاه كم مرة بعد يوم المعرض وكثرن الاتصالات بينا وردت صحبتنا وايامنا لولة واليوم اتصل بيا وقالي بكرا عازمنا عالعشاء عنده في الفيلا وقال ضروري ماانجو عشان ايتعرفو العيلات علي بعضهم
سعاد:اها وانت شن رايك بتمشي
فرج:اها بنمشي عاد عزمنا وقال ضروري مااتجو
سعاد:كيف بنمشي العرب ماعمري شفتهم
فرج:ماهذا الهدف ما العشاء عشان اتعرفو ومراته انا نعرفها كانت تقرا معانا وبنت عمه في نفس الوقت مرا مشاءلله عليها حتنسجمي معاها
سعاد:باهي خلاص اللي اتريحك توا نمشو
فرج;ها سمعتي يابابا بكرا بنمشو الصاحبي القديم اتعرفو علي هله وايتعرفو عليكم شن قولك
سندس:عادي بابا نمشو شنو المشكلة ماهو صاحبك واي حد من طرفك اكيده نمشوله
فرج:نجيها بنيتي العاقلة ياما حكيتله عليك وعلي شخصيتك وقالي عنده فضول كبير هو وهله ايتعرفو عليك
سندس ضحكت:ياساتر طبعا اكيدة قتله راسها مسكر
فرج:هدي اكيدة ودغري قالي طالعتلك
سندس وامها قعدن يضحكن وبعدها كملو غداهم
وهنا مشن ايوتن في ارواحهن ويلبسن عشان ايعدن الهل رانيا وبعد كملن شالهم فرج الرانيا وعدى الشغله
“”
عند رانيا
جنها صاحباتها وزينن معاها الحوش وولعن منظومة واغاني وهياجة ووتن التورته وانواع الحلو والموالح عالطاولة وولعن اشموع وضوايا في الحوش كله المهم كانن تجهيزات ايهبلن وعيد ميلاد ايجنن وبعدها خشن لبسن مع بعضهن والصبايا قاعدات حتي هنا مع بعضهن ومنسجمات وتخريف وجو سمح
بعد العصر قعدو المعازيم ايجو نفس اللي قالتهم ام رانيا بزبط خالتها زهرة وصبايا عمامها الاثنين وبناتهن كل وحدة عندها بنت وجارتهم عزة بس
كانن البنات سندس ورويدة ورانيا ورنا اخت رانيا وبنات عم رانيا الاثنين ضحك وهياجة وجو سمح ورقيص ومنسجمات عالاخر
عزة جارتهم:اللي في النص بنتك سندس صح ياسعاد
سعاد:اها هي
عزة:ليا زمان ماعاد شفتها مشاءلله قاعدة كابرة
سعاد:البنات بذات مسرع مايكبرن وايكبرنه معاهن
زهرة خالتهم:لا والله مازال مشاءلله عليك العقبة مااتشوفيها عروس يارب
سعاد:ان شاءلله
مرات عمهم:مشاءلله عليك من بدري وانا مركزة عليها مع البنات اتحسيها شخصيتها سمحة ومتاعت ضحك وبصارة وجو شخصيتها حلوة ومميزة عالبنات
سعاد ضحكت:ديما اتقول فيها اتقولي انا مش زي باقي البنات ياحنة معاندية وراسها مسكر طالعة الباتها
مرات عمهم;ربي يحفظها لكي ماعندك الا هي صح
سعاد:راس بنية ياحنة ربي مارزقني الا هي
مرات عمهم لاخر:محكي فيها بنتك ياسعاد
سعاد:كيف محكي فيها
مرات عمهم:يعني مخطوبة مقيول فيها كلمة هكي
سعاد:لا والله مازال تقرا
مرات عمهم:معناها ان شاءلله ربي يجعلها من نصيبه
سعاد:نصيب من
مرات عمهم لاخر:عندي وليدي الكبير م 85مهندس وكان ايحظر برا ومالش كم شهر مروح وقاعدين اندوروله في عروس الحق انا مستخصرته في كل بنت ومافيش بنت ماللي رودوها لي واللي حقيتهن عجبتني ماعادا بنيتك هذي بصراحة خشت خاطري وعجبتني ومتاكدة حتى هو تعجبه المواصفات اللي يبيهن كلهن فيها كان تشاورو واتحددولنا موعد انجو نطلبوها
سعاد:والله شن انقولك الموضوع هذا مانقدر نعطي فيه رأي بروحي لازم ماانشاور باتها وانشاورها وان شاءلله ايصير خير
مرات عمهم لاخر:ان شاءلله خلاص نعطيك رقمي واشاورورو وكلميني
سعاد:تمام ملي عليا رقمك
مرات عمهم لاخر:092—–
سعاد;اهو رنيت عليك وان شاءلله اللي فيها خير ايجيبها ربي
مرات عمهم لاخر:ان شاءلله/ وربي يجعلها نصيبه
دارو الاحتفال ورانيا طفت الشموع وعطت صاحباتها الهدايا زي ماقلت ومدنهن الها قدام العرب?
وجنها هدايا اخرى من بنات عمها وهلها ومشى جو سمح وهياجة وبعدها كل وحده جاها باتها وروحت
“”
عند سندس وبعد ماروحو للحوش وقمعزو ايخرفو
فرج:ها شن جو العيد الميلاد انسجمتو
سندس:عليك جو ايهبل يابابا?
سعاد;غابي فيها بنتك وصاحبتها لا قمعزن ولا تهنن ولا هنن واحد شالن الدنيا
فرج يضحك:هبل زي بعضهن مازالن نفس تصرفاتهن وهنا اصغار ماكبرنش بكل
سندس:مازلنا صغار شنو اتشوفو فينا
سعاد:لا مانكن صغار مدادكن بعيالهن
سندس:هذا كلام فاضي واللي توا مدادنا وبعيالها هذي متخلفة نحن مازال صغار ومازال نقرو
سندس:انا اجوزت وانا في عمرك توا وشن صارلي قاعدة عايشة حياتي سمحة ومتريحة وجبت بنية ومالية عليا دنيتي
سندس:اولا انتي خذيتي بابا اللي مافيش زيه في الدنيا كلها وثانيا انتي مقتنعة وكل حد حر في رايه وفي اللي يقتنع بيه انا مش مقتنعة زيك
سعاد;البنت لازم ماتجوز وتستقر حياتها وادير عيال علي حالها هذي سنة الحياة وضروري كل بنت اتكمل حياتها براجل
سندس:هذا تخلف مافيش راجل ايكمل بنت البنت تقدر اتكمل حياتها بنفسها مش شرط المستقبل هو زواج المستقبل تعليم اتكملي قرايتك اتحظري واتكوني حاجة مهمة في المجتمع بدل ماتقعدي تجري في جرة عيال ووجع راس وراجل يحكم عليك اطيبيله غداء وعشاء وتغسلي واتحددي ادبشه يعني نظام خدامة ومربية اطفال
سعاد;شنو كلام الهبال هذا اهو انا وباتك عايشين مع بعضنا ماعمره فرض عليا حاجة انديرها ولا عاملني علي اني خدامة علي قولتك
سندس;توا انتي اتقارني في بابا اللي ماحد كيفه برجالة لخرين قتلك بابا طرف واحد وانتي خذيتيه
فرج;توا هذا موضوع بينك وبين امك مش من حقي ندخل لكن كلمتك الاخيرة غلط انا فيه كيفي واجد وفيه احسن مني اخرى يعني فكرتك عالزواج راهي غلط مافيش راجل ياخذ وحدة وايعاملها علي انها خدامه هذي مش صح يابابا في الزواج فيه احترام وتقدير وتفاهم
سندس:ابدا مافيش واحد زيك ولا احسن منك انت بس اتفكر هكي الرجالة لخرين لا انا انشوف في بنات متجوزات واااجد وحياتهن انقلبت جحيم بعد ماكانن متفوقات في دراستهم وبعد ماكانن مهتمات بأنفسهن توا لا يحظرن في محاظرات ولا ينجحن وفيه اللي سيبت قرايتها ومعش يلبسن ولا يهتمن بأرواحهن زي قبل تغيرن واااجد بككل وهذا كله سبببه الراجل والزواج
سعاد:مش عارف كيف عقلك مركب انتي معقولة اتفكري هكي
سندس:هذي التركيبة الصح للعقل ولو البنات كلهن ايفكرن زيي راه عاشن عيشة سمحة
سعاد;لو كلهن فكرن زيك معناها كل البنات يقعدن معقدات
سندس بعصبية:انا مش معقدة انا كل القصة اني انفكر صح التفكير اللي المفروض كلهم فكروه قبل ماايدمرو حياتهم بالزواج والكلام الفاضي
فرج:خلاص دوسة بلا عصبية امك تحكيلك تبي مصلحتك
سعاد:اكيدة ماايهمني الا مصلحتها اليوم مرات عم رانيا عجبتيها وطلباتك الولدها وقالت نفس المواصفات اللي يبيهن ولدها فيك وولدها مشاءلله مهندس م 85 يعني راجل كبير مش طايش من عيال هالوقت
سندس بعصبية;شنو اتشوف فيا اتقول نفس المواصفات اللي يبيهن انا لبسة عشان انجي كيف ماهو مفصلها انا انسانة مش بضاعة للبيع ياريتني سمعتها راه هزبتها هزيبة سمحة شن تحساب روحها هي ولدهافرح:من قال انك بضاعة غير اكيدة عجبها اسلوبك وشخصيتك بس هذا المقصود وبعدين دبينه م 85هذا راجل كبير واكيده بعقله وزي ماقالت امك مش زي شباب توا
سعاد;وفوق هذا كله قالت امه كان ايحظر برا ومعاه كم شهادة هندسة يعني متعلم ومثقف وحتقعدي انتي وياه نفس التفكير
سندس:بعصبية لو معاه الف شهادة ماايهمنيش حتي انا نقدر انجيب اكثر منهن مافيش اسهل من انك تقرا وتاخذ شهاده وبعدين تحسابوه كان واخذ كم شهادة معناها مثقف تلقيه حاصل في روحه وتفكيره ان الولية ماالهش الا حوش راجل لا قراية لا شيء
سعاد:وهذا الصح ديما باتي ايقول الولية ماالها الا حوش راجلها كلام من يوم يومنا متعودين عليه
سندس بعصبية:انتو متعودين عليه بس انا لا وماحد ايمشي كلامه عليا انا حرة والموضوع هذا معش تفتحوه قدامي واقتنعو خلاص اني انا مستحيل انكون بضاعة تنباع وتشترى ونرضى باني اندمر نفسي ومستقبلي بالزواج والهم والحقيرة مرات عم رانيا والله ناخذ رقمها من رانيا وانهزبها هي ولدها الحقير ينعن جد تحسابني للبيع وصبت من تلاهم وعدت الدارها وهي غامتلها واتهزب وقعدت اترن علي رانيا بتهزبها عاللي داراته مرات عمها وتلقى فيها انتظار ودزتلها رسالة هزيبة سمحة الرانيا
”
سعاد:شفتها كيف اتفكر وكيف تعقدت وصبت
فرج:مازال صغيرة حيجي يوم واتغير رايها
سعاد:عارفه مازال صفيرة بس التفكير هذا من زمان معاها ومتغيرش وخايفة عليها اتسكر راسها عليه وانت عارف بنتك معندة وتقعد ماتجوزش نحن ربي ماعطانا غير هي نبي نفرح بيها وانشوف عيالها وكان قعدت بالعقلية هذي مستحيل تجوز
فرج:والله نفسك بزبط خاطري نفرح بيها وانشوف عيالها ربي حرمنا ماالاطفال بالك هي اتعوضنا عليهم
سعاد;والله خايفة كان قعدت مسكرة راسها هكي وتكبر معاها الفكرة ونوحلو فيها
فرج:لا ان شاءلله خير
سعاد:الراجل اللي جاي مواصفاته مشاءلله عليهن وانت عارف بات رانيا وعارف سمعته وسمعة هله وهذا ولد خوه يعني ناس مسقمة متضيعش فرصة زي هذا ساد اللي جو من قبل ورفضناهم وزي مااتقول امي البنت زي العصيدة بعد تبرد ماعاد حد ايجيها
فرج:والله صدقتي لكن شوفيها مسكره راسها
سعاد;بالك مديورتلها حاجة خلينا انشيلوها الشيخ ايشوفها حي عليا راه تقعد مسحورة
فرج:تي شنو هالكلام مافيش منه بنتك هذا تفكيرها من هي صغيرة لكن اكيدة حنلقو حل
سعاد:باهي كان رنت عليا الولية شن انقوللها
فرج:توا قوليلها مازال ماحكيت مع باتها مش فاضي لين انحاولو مع سندس مرة اخرى
سعاد:باهي تمام وان شاءلله اتغير رايها
فرج:ان شاءلله
“”
الساعة 11 في الليل في فيلا سراج وتحديدا في دار سراج بزبط
سراج كان ايدوش وطلع يلبس وايانق في نفسه بيمشي للشقة ولبس( جينس بيج وعليه قميص دمي وقولف بيج وكاويش دمي)ومسك عطره وبدا ايبخ مع خشت امه عليه
عفاف قمعزت عالسرير:تبي تطلع
سراج ايتحنط:لا بنخش هههه
عفاف:رايق شكلك
سراج:مافيش احلى من هكي روقان جوي سمح بكل
عفاف:ان شاءلله ديما
وقعدت اتبحت فيه وهو ايسقم في شعره وسراج ايشوف فيه في المراية وهي اتبحت فيه
سراج;عفوفة وين سارحة كنك
عفاف:مشاءلله عليك ياوليدي عليك عرض وطول ربي يحفظك
سراج بغرور:عارف روحي طرف?
عفاف:والله ياسروجة خاطري انحقك ببدلت عرسك وراقي للكوشة المراتك
سراج ضحك: مقدمك ياعفو بس لنقنها كوشة تعرفي عليش ايقولو كوشة
عفاف:عليش
سراج:لان الزواج طاجييين كبير وغليظ بككل
عفاف:بلا هبال وكلام زايد ياسراج توا عمرك فوق 30سنة اللي مدادك بعيالهم توا وعارف المشاكل اللي زمان صارن علي قلة الخلفة وبعدها فضل علينا ربي ورزقنا بيك انت ونحن مش ديما عايشيينلك وخاطرنا انشوفو عيالك ونفرحو بيهم انا وباتك كبرنا اجوز وجيبلنا عيويلة وفرحنا وخلينا انحقوك وانت تربي فيهم وكابرين معاك
سراج:واااو عالنكد قفلتي اليوم بكل وبعدين اي عيال انربيهم تي انا ماربيت روحي
سعاد:عشان قتلك ازوج نكدت عليك
سراج:اها الزواج نكد وتقييد انا هكي عايش حياتي بالطول وبالعرض ماحد مقيدني لا وين مشيت لا وين جيت لا هم لا وجع راس ولا شيء هكي طير حر وين مانمسى انبات نرقد ونوعى براحتي ماحد يدخل فيا
سعاد:بس ياسراج هذي سنة الحياة ولازم كل شاب يزوج وايدير عيلة وبعدين انت توا كبير وناضج مش مراهق المفروض راك اتساعد في باتك في الشركة وتجوز واتجيبلنا وليد ايشيل اسم العيلة
سراج:اسم العيلة قاعد مش متحرك ومشيول اهو انا شايلة لكم
عفاف:وانت تبي حد ايشيل اسمك
سراج يضحك:اسمي نقدر انشيله مش ثقيل مانبي حد ايساعدني
عفاف:انا ماانبصرش انا نحكي جد لازم اتساعد باتك في الشركة وكان عندك وحدة اتحبها قولي عليها من بكرا نمشي نخطبها ان شاءلله اتكون بنت من
سراج:اطمني مافيش وحدة انحبها والحب والكلام الفاضي هذا مش ليا بكل ولا انا متاع حب انا طياري حر ماحد ايقيدني في شي ياعفوفة
عفاف:خلاص معناها انا انقيلك ونختارلك احلى وحدة في ليبيا وانجوزها لكي ونفرحو بيك واتجيبلنا عيال ايشيلو اسم العيلة
سراج:كان عندك طاقة وبتفرحي وبتجوزي حد اهو باتي قدامك مشاءلله عليه مافيه شيء عدي اختاريلة احلى وحدة في ليبيا وجوزيها له وطلعوني انا من مشاريعكم هذينا انا هكي عايش ومتريح وجوي سمح بكل والبنت اللي انشاورلها اتجي لاعندي
عفاف:هذينا استغفر الله العظيم كان اتفكك منهن راه انا عارفه اللي ادير فيه كله خطاه الله ايربحك ياسروجة راه ايجيك يوم وتندم
سراج باس علي راسها:عفو اطلعي من راسي سكنتيلي راه خليني دبيني جوي سمح وخذا تليفونه ودخانه وجا بيطلع
عفاف:باهي قبل ماتطلع تكي علي باتك في المكتب قالي كلميه ليا يبيك قبل مااتعدي
سراج عقد حواجبه:يستر الله ماايجيش من وراه خير اكيدة بيسكنلي علي موضوع الشركة ولا موضوع الزواج نفتختو راسي بيهن ومازال مش مقتنعين اني انا مش داير ولا وحدة فيهن
عفاف:مغير انزل شوفه قبل شن يبي
سراج:تم توا انشوفه
ونزل سراج وصبى عند مكتب باته
سراج بينه وبين نفسه: اكيدة فيها محاظرة طويلة وخش
سراج: اوو حويج شنجك
محمد;لا حول ولا قوة الا بالله حتى سلامك مش كيف الناس
سراج:تي كني شن درت ياباتي
محمد:لا ماادير في شي بحت كلامك واسلوبك وشكلك راك معش اصغير راك راجل كبير غير من نفسك واعقل وفكك من هالسهور والشلل اللي اتبع فيهم واشقى بشركتك وشغلك وانشط علي حالك بالله عليك عمرك توا فوق 30 ترا قرلي امتى بنفرحو بيك
سراج:والله انا كل يوم فرحان بروحي شوفي انتو امتى فاضيين نفرحو مع بعضنا
باته طلق فيه التحفه اللي عالمكتب وسراج طبس ماخلاهش اطب فيه
محمد:تحشم علي وجك انا نحكيلك في كلام جديات وانت اتبصر امتي بتكبر وتعقل بس
سراج:شن قتلك ياباتي جديات انا ديما فرحان بروحي وهكي منسجم وجوي تمام متريح وحاط راسي لاهم شغل لا هم عيال وولية ووجع راس
محمد:باهي لعند امتى هكي انا كبرت مش زي زمان معش قادر انشيل شغل الشركة كله بروحي نبي حد ايساعدني
سراج:عندك قريب الف موظف ايساعدو فيك كيف اتقول بروحك
محمد:نبي حد نعتمد عليه نبيك انت ولدي تاخد مكاني وتستلم الشركة بعدي يعني انحط املاكي وشغلي في يد الغريب اللي مرات ينصب عليا وياخد مني كل حاجة وولدي قاعد غير مش لازمته يخدم ويبي ايصيع براحته
سراج:شغل قلتلكم مش مشتغل وزواج مش متجوز بتزيدو تسكنولي عالموضوع انسيبلكم الفيلا كلها ونمشي نقعد مع جدي لا ايقولي اشتغل لا اجوز ويبيني انعيش معاه
محمد:جدك بروحه وحل فيك اصلا
سراج;حكالي واجد وأيس مني ايس حتى انت وعفوفة راه مش داير اللي تبوه
محمد:حتى انا فاضي وكلامي زايد عليا اللي نحكي الواحد كيفك المهم اصلا انا مش مكلمك عشان الكلام هذا
سراج:وووه يعني محاظرة وحدة اخرى
محمد:سراج سكر فمك وخليني نحكي خير ماانصبيلك
سراج:باهي احكي شن فيه
محمد:بكرا عازم صاحبي وهله عالعشاء
سراج:وشن تبوني انديرلكم العشاء
محمد:بلا ثقالة ياسراج
سراج:شن بنديرلك مكلمني اتقولي عازم صاحبي يعني بنطيب العشاء الكلام هذا احكيه للخدم مش ليا
محمد:ماانت مركب ماخليتني انكمل كلام المهم وجاي جدك نبيك اتكون قاعد وقت العشاء عشان هذا صاحبي من زمان وكنت نقرا نا وياه وكانو هله جيران عيت جدي معرفة قديمة بكل يعني والراجل جاي عشان العيلات ايتعرفو علي بعضهم
سراج:هذي حدها بس
محمد:اها يعني وقت العشاء لازم اتكون قاعد والا ايكونلي معاك تصرف اخرى
سراج:لا تصرف اخرى لا شيء بكرا عند العشاء تلقاني مزروع في الفيلا مش متحرك لين صاحبك يمشي تم
محمد:تم وياويلك ياسراج ايصير كلام عكس هكي
سراج:لالا مش حيتغير الكلام المهم توا طالع تبي حاجة
محمد:سراج روح بدري فكني منها ترويحتك بعد الضي يطلع
سراج:حاظر حاظر وطلع
“”
عدى طبعا سراج للشقة وكمل الليل كله هياجة هو وفيصل وجو مالاخر وروحو طبعا عاالساعة 5 الصبح
“”
جا صباح ثاني يوم كان يوم هادي جدا مافيش اي جديد ممكن هذا اللي ايسمو فيه هدوء ماقبل العاصفة
“”
الساعة 3 القايلة سراج طبعا نووووووم مع رنت فونه رن كم مرة وبعدين سراج فطنله واول ماحل عيونه وشاف الرقم ابتسم
سراج:اووووووووو تولي عاش من سمع صوتك
تالين:شن جوك سيجو شن اخبارك رايفتلك ياحبي
سراج;وانا اكثر ياتولي وينك مختفية لا مكالمة لا شي
تالين;من اللي مسكر ايميله ومعش يفتح في نت وااجد ولا ايرن ويسال ولا عاد شفته في المانيا
سراج:تعرفي ياتولي في عقلي الجية غادي لكن معش جت فرصة مناسبة معش فضيت
تالين تضحك:عساس تشتغل عشان ماتفضش
سراج يضحك:ماهذي المشكلة ماندير في شيء لكن ديما مش فاضي
تالين:عارفتك زايط وهياجة مع البنات
سراج يضحك:هذا تخصص وهواية ياماما
تالين:تربيتي
سراج:عينك من تربية من تي انتي تربيتي راكي اصغر مني يابنتي بس قوليلي شن اخبار باتك ومرات باتك شن دايرة معاك وكيف معاملة خوتك معاك توا
تالين:زي ماخليتهم بزبط بابا مش لاهي الا بيها وبعيالها انا مايندري عليا شن صاير فيا ولا في شنو اندير
سراج:والله تعالي عيشي معانا هنا وفوتيهم بكل
تالين:ديما انفكر فيها
سراج:انتي عارفة عفو كيف اتحبك وتعتبر فيك زي بنتها
تالين:عارفتها وحتي انا انحبها واجد قاعدة انفكر في الموضوع
سراج:شنو الهرجة هذي شكلك قاعدة في ديسكو
تالين:اها مانحن عندنا ليل توا وانتو اكيدة توا قايلة ومازلت راقد ياخميرة
سراج:عساس انتي مش زيي بزبط اتكملي في الليل سهور والنهار نوم
تالين:وشن عندي مااندير اكثر من هكي تعرف فقدتكم وااجد بعد روحتو لليبيا وسيبتو المانيا اقل شيء كنت ديما عندكم ومرات حتى انبات باالكم يوم عندكم وانكملو فيها انا وانت هياجة وجو بجد فقدتك وفقدت عفو وعمو محمد تخيل بعد نطلع مالفيلا انغمض عيوني مانبيش انحق فيلتكم وانتو مش فيها
سراج:والله حتي انا فاقدهن الايام اللي معاك صحبتنا كانت اتهبل بس يافرخة نحن مازلنا اصحاب تعالي وعيشي معانا هنا وكان علي باتك انخلي باتي ايكلمه ومش حيتكلم انك اتعيشي معانا هنا
تالين:عساس بابا مدورني نقعد في المانيا ولا انسيبها مايندري عليا عايشة ولا ميته
سراج:تالين كان بتبدي في وصلة النكد متاعك انسكر انا قتلك احجزي اول طيارة وتعالي هنا
تالين:انا بس خايفة ماننسجم في ليبيا انت عارف العادات والتقاليد غادي مش حيتقبلو وحدة عايشة بحريتها زيي في مجتمعهم
سراج:تعالي وماعليك نفس الجو اللي في المانيا عمك سراج داير زيه في ليبيا
تالين:تحكي جد
سراج:جد الجد بس قوليلي راك تقعدي حبيتي هذا ليش مش قادرة اتجي
تالين:هههههه حب من جدك سراج مش شوري الكلام هذا راك انت تطلع حبيت بس
سراج:انتي عارفة كويس سراج في طريق والحب في طريق واحد اخرى بكل عارفه حاجة سراج والحب خطان متوازيان لا يلتقيان ابدااا ?
تالين تضحك:عارفتك ياسوجي
سراج:حلاص شوفي وضعك ونظمي امورك وتعالي هنا
تالين:خليني انقلب الموضوع في راسي قبل وكان قعدت بنجي انقولك وتوا سلام بدت الاغنية اللي انحبها بنعدي نرقص عليها
سراج;ناعلي احسبونا
تالين تضحك’:تعال ومكانك محفوظ ياسيجو
سراج يضحك:خلاص عدي هيجي وخليني انكمل نومي
تالين;اوكي وسكرت
“”
عالساعة6 سندس وامها ايوتن في ارواحهن
سندس لبست( جينس كحلي وعلي بلوزة وردي هادي قصيرة وعليها جاكة بيضا وكاويشة بيضة ووشاح كحلي)
وطلعو هي وامها وباتها وركبو في السيارة ماشيين الهل سراج وطبعا سندس ماكانت عارفتهم ان هما هل سراج
“”
بالنسبة الفيلا هل سراج
كانو قاعدين ايجهزو للعشاء وايجهز الاستقبال الضيوف
كان قاعد امه وباته وجده
محمد:عفاف كان ترقي للعريس اللي فوق اتشوفيه كمل لبس ولا لا العرب اقريب ايجو نبيه يستقبلهم معانا
عفاف:حاظر توا نرقاله توا ورقت
“”
سراج في داره كمل لبس وقاعد ايمشط في شعره ولبس(جينس بيج وتشيرت اخضر ولبس فوقه جاكة رسمية بيج وكاويش اخضر وطالع طررررررف ?)
خشت امه وهو ايبخ في عطره
عفاف:ها كملت العرب قريب ايجو
سراج يضحك:حسستوني يبو ايزفوني تي اهو كملت خلاص طالع معاك وطلعو
#يتبع
اسفة بنات علي تاخيري الايام اللي فاتن عارفات الموضوع والنت خارب واليوم درت محاولات واجد لين انحصل نت وانزل الحلقة المهم ماانخليكن متشوقات اكثر
فيه تعديل بسيط في طريقة التنزيل حيكون التنزيل يوم بعد يوم يعني يوم حنزل ويوم لا لان الحلقات زي ماانتن شايفات طوال وقعدت نتعب في الكتابة تاخذ في اكثر من 7 ساعات والله قعدت انقصر حتى في صلاتي يعني اعذرني بنات وحطن روحكن مكاني مافيش وحدة تقدر تكتب واتفكر الكل هذا في يوم واحد وزي ماقلتلكن التنزيل حيكون يوم فيه ويوم لا وطبعا اليوم اللي فيه حلقة حتكون في نفس الموعد الساعة 10 م يعني بكرا مش حتكون فيه حلقة ??
اسفة لو فيه لخبطة في الاسماء واكيد رايكم ايهمني?
گـتـابـتـي Koka Saleh
الـحـلـقـة (6)
هدرزت سندس وامها مع باتها وخشن رقدن
“”
صباح يوم جديد وتحديدا في حوش هل سندس
ناضت سندس توضت وصلت الصبح ولبست(بلوزة دمية فيها لولي ابيض واسترتش كحلي ووشاح ليكرا كحلي وكاويش أبيض) وطلعت تفطر مع هلها
سندس:صباح الخير
سعاد وفرج:صباح النور
وقمعزت سندس معاهم وبدت تفطر
فرج:دوسة اليوم عندي شغل مهم وتوا ماشي الشحات ايشيلك السواق تمام
سندس:تمام بابا
فرج:كان وحدة منكن اتعلم السواقة عشان انتريح عليكن
سندس:انت عارف يابابا انا بعد اللي صار المرة اللي فاتت معش انحب السواقة بكل معقولة انسيت اللي صار
فرج:مش ناسي بس انتي كنتي اتعلمي ومافيش واحد ماغلط وهو ايتعلم حاولي مرة اخرى حتقدري
سندس:لالا يابابا مستحيل عاد انعاودها التجربة هذي انا كنت حنقتلكم معاي
فرج;بس اهو مامتتنش وربي نقذنا وكان حادث بسيط والحمدلله اهو توا قعد ذكرى
سندس:تي اي بسيط وماما بسببه قعدت 3ايام في العناية
سعاد:مااتعبش روحك معاها هذي معندة ومستحيل ادير حاجة مش مقتنعة بيها
فرج ابتسم: سلمها طالعة الباتها
سعاد:فعلا زي بعضكم روسكم مسكرات
فرج:وعساس انتي مش معاندية اهو حتى انتي نقنع فيك انعلمك اتسوقي ورافضة
سعاد:انت عارف اني مش مقتنعة بالمرا اتسوق هكي تربيت وعلي هكي عشت بويا واعر وعلمنا ان المرا مهنتها في الحياة ترضي زوجها واتربي عيالها واتقيم حوشها وبس
فرج:هذا تفكير ناس زمان الحياة توا تغيرت والمرا زيها زي الراجل بزبط اتسوق وتشتغل الدنيا اطورت
سعاد:انا مازلت ماشية علي عاداتنا وتقاليدنا وكيف مارباني بويا نمشي
سندس:بابا مااتعبش روحك معاها ماما تفكيرها زي العزايز
فرج:والله وحلت فيكن
كملو الفطور وبات سندس مشى الشغله وسندس شالها السواق للجامعة وخشت المحاظرتها ساعتين وكملت محاظرتها وطلعت هي ورانيا
“”
عند رويدة في القاعة كملت المحاظرة وجت بتطلع مالقاعة مع خشت معاذ للقاعة
معاذ:كملتو
رويدة:اها كنك تأخرت
معاذ:كان عندي شغل ماقدرتش انجي شن جو المحاضرة
رويدة:ساهلة مش واعرة توا نشرحها لكي
معاذ:تمام بعدين انرن عليك تشرحيها ليا
رويدة:تمام
معاذ:شنو انسجمتي انتي والبنات امس
رويدة:اها بكل جوهن سمح بكل
معاذ:حتى هنا انسجمن امعاك
رويدة:لاحظت ان اساميكم كلكم بحرف الميم
معاذ ضحك:امبراطورية الميم هكي سموني انا بحرف الميم مشو البنات كلهن بنفس الحرف
رويدة:اها
“”
طلعن سندس ورانيا مالمحاضرة وقعدن ايرنن علي رويدة مااتردش
سندس:مش عارفة كنها مااتردش
رانيا:بالك مازال في المحاضرة
سندس:عارفة مكان قاعتها
رانيا:اها
سندس:هي نمشولها
ومشن ولقنها اتخرف مع معاذ قدام القاعدة وسندس غمتلها رويدة شافتهن وخافت من هزيبة سندس
رويدة;خلاص اهن البنات جن اكيدة يبني نفطر معاهن
معاذ:تمام عدي
وجت رويدة شورهن
سندس:وين وين ياحنة معش فيه حشم قاعدة مصبية معاه واللي طالع واللي خاش ايحق فيكم
رويدة:اس اس واطي صوتك توا يسمعك
سندس:خايفة هو يسمعنا ومش خايفة ما الناس اللي ايشوفو فيك
رويدة: هو كان يسال فيا عالمحاضرة لان جا متأخر وبعدين الطلبة كلهم عارفين ان اصدقاء وبس وانتي عارفة معاذ يعتبر فيا اخته ومافيش اي حاجة اخرى
سندس:انا عليك بس مانبيش حد يفهم غلط
رويدة:عارفة بس والله الكل عارفين صداقتنا
رانيا غامتلها:خلاص خلنى نمشو نفطرو
رويدة:كنك رنوشة
رانيا:ماكني شيء
سندس بحتت في رويدة وابتسمت
رويدة:هيا نفطرو
رانيا بعصبية وطلعت قدامهن;هيا ورويدة وسندس قعدن يضحكن خذن فطور وعدن للحديقة في الكلية وقمعزن يفطرن
سندس:رنوشة كنك متضايقة
رانيا:شي هو انا حد معبرني اصلا
رويدة:شن فيه رنوشة عليش الكلام هذا
رانيا:يعني مش عارفات اليوم شنو
سندس:شنو اليوم
رويدة:اليوم سبت شن فيه
رانيا بحزن:ياحقيرات مش متذكرات اليوم
رؤوف:اليوم عيد ميلاد رنوشة معقولة مش متذكراته وكان جايب في يده علبتين وحدة فيها تورته وحدة فيها شكولاطات وجايب معاهن عصاير
قعدن سندس ورويدة يضحكن
سندس:كل سنة وانتي طيبة ياقلبي
رويدة:العمر كله ياسمحة
رانيا مازال مصدومة:قصدكم مش ناسيين عيد ميلادي
رؤوف:معقولة ننسوه رنوشة
رويدة:امس اتفقنا مع رؤوف وقال ديرن روحكن ناسياته لين بعد تكمل المحاضرة انجيكن
رانيا:هذا ليش امس دار روحه مش متذكر شي وانتن اليوم جيت غامتلي من رؤوف ان مش متذكر ونلقاكن حتى انتن ناسيات
سندس:هههه مطرشقة معقولة ننسو عيد ميلاد رنوشةرؤوف:هذا يوم جت فيه احلى ملاك عالدنيا معقولة ننسوه
رويدة:اوووو عالرومانسية
سندس:هي بلا كلام زايد وحطولنا التورته من بدري نرجى فيها
رانيا:ماهامك الا بطنك
سندس تضحك:توا انتي كسبتي عيد ميلاد من حبيبك وهدايا وانا مانكسب شيء الا ناكل تورته
رويدة:خطرها الهدايا هاكي هديتك وكانت جايبتلها ساعة حلوة
وسندس طلعت هديتها:هاكي ياسمحة وكل سنة وانتي طيبة وكانت جايبتلها عطر سمح
حط رؤوف التورته والحاجات واحتفلو مع بعضهم
رؤوف:اشوي وانجيكن ومشى
سندس:اتراهنن ان ماشي ايجيب في هدية
رانيا:لا معقولة حرام هكي
سندس:غير بلا اطروح زيطي توا بعد تجوزو تقعدو اتعانو في عيال وهم معش يذكره بكل
رانيا:لالا مستحيل ينسى وحنعيشو حياة اتهبل وحتقي
سندس:احلمي هنا عندك هذي نهاية كل زواج
رويدة:عليك فكرة واخذتها مالزواج
سندس:مش فكرة هذا واقع والكل عايشيين فيه
رانيا:خلاص نكدتي عليا عن مرض
مع جيت رؤوف جايب في يده علبة هدايا كبيرة وكان فيها لبسة(بلوزة حلوة بيج وعليها قونة حمال ليكرا خضرا وعليها وكاويش ابيض ووشاح بيج فيه فصوص خضر وشنطة حلوة بيج)
رانيا قبل ماتفتح العلبة وبخجل:شكرا اوفا
رؤوف;العفو كم عندي رنوشة انا
رويدة خذت العلبة:ترا ورينا هالرومانسي شن جاب وفتحتها هي وسندس
رويدة شهقت:حي حي هذا خبر حتى الاخته ماعمره جابه
رؤوف:انتي بذات ياما جايبلك يانكارة الجميل
رويدة:لا ماعمرك جبتلي هكي
رانيا نغزتها:حرام اوفا ماعمره قصر معاك
سندس: عن دا بنت واتعاتب في خوها انتي شن دخلك
رؤوف:خلنها عنكن ادافع عن حبيبها
رويدة تضحك:ياساتر خلاص يادوسة نحن اللي طلعنا برانيات
كملو الجو والاحتفال
رؤوف:تسمحلي ناخذها منكن اشوي
رويدة:مااتفكنا الا من هرجتها
وعدت رانيا مع رؤوف
رؤوف:كل سنة ونحن مع بعضنا
رانيا:ان شاءلله حبيبي وربي ايخليك ليا كلفتك واجد اليوم
رؤوف:مااتقوليش هكي حبي كم عندي رنوشة انا هي وحدة بس واللي درته كله اشوي في حقك
رانيا ابتسمت:نجك ليا حبيبي
رؤوف:وليا نجك ياحبي
وقعدو ايهدرزو مع بعضهم
“”
كملن الاحتفال وكل وحدة روحت الحوشها
رانيا جايبها باتها وخشت الحوشهم وشايلة العلبة والهدايا في يدها
سمية:مشاءلله منين هذا كله
رانيا:البنات دارلي احتفال في الجامعة مش زيكم
سمية;كان صبرتي راك حجيتي انا وباتك مجهزيلك عيد ميلاد
رانيا بفرحة:تحكي جد ماما
سمية:اها
رانيا:معناها انخش بسرعة نعزم البنات وجت بتخش وبعدها ردت
رانيا:انتو من عازمين
سمية:خالتك زهرة وعمامك الاثنين وجارتنا عزة
رانيا:باهي تمام وخشت اتكلم في رويدة وسندس بتعزمهن هنا وامهاتهن
“”
سعاد:دوسة دوسة تعالي تغدي
سندس:انكمل مكالمتي وجاية
سندس:خلاص توا انجو يااحمارة سكري
رانيا:ضروري مااتجن دايرين حفلة سمحة
سندس:مالنا شي محتفلين بيك واسمعي مافيش هدايا الصبح ونحن جايبينلك
رانيا:نفس كلمة رويدة عن مرض مانبيش هدايا نبي انهيجو مع بعضنا
سندس:وبالك تبي هدايا شن تحسابي قاعدين علي بنك
رانيا;مانبيش مانبيش توا نعطيكن هداياكن اللي في الصبح ياشريني قدام اللي جايين جبتنهن ليا توا هنا وهدية رؤوف عساس منكن اصلا قلت الماما منكن
سندس:باهي باهي ملينا ونحن انسترو عليكم امتى ياخذك ونفتكو
رانيا:ان شاءلله انتخرجو وتفتكو من وجوهنا خلاص هيا وجك بنمشي انشوف التجهيزات اسمعي تعالي بدري عشان اتوتي معايا انتي ورويدة
سندس:خلاص انتغدى وانجيكم
رانيا:تمام وسكرت
وسندس طلعت الهلها
سعاد:سنة عشان اتجي للغداء
سندس:كنت نحكي مع رانيا دايرة عيد ميلاد وتبينا انجوها
سعاد:اها مش عساس اليوم احتفلتن بيها
سندس:انا ورويدة احتفلنا معاها في الجامعة وهلها دايرينلها عيد ميلاد اليوم
فرج:امتى بتمشي يادوسة
سندس:انتغدي ونمشيلها قالت تبينا انوتو معاها
فرج:خلاص انا بعد الغدا طالع توا انحطك عندهم
سندس:وماما تمشي معايا لما يطلع بابا
سعاد:ياخيتي قايلة مرات نزعجو العرب بيقيلو ولا حاجة سندس:تي لا اي ازعاج عادي وبعدين اتساعدي اعميمة سمية واتجهزي معاها حتى اعميمة عالية بتجي
سعاد:خلاص حنمشي معاك
فرج;خلاص بعد الغداء دغري وتن ارواحكن انشيلكن بسرعة عشان عندي شغل مهم
سعاد:فرج انحق فيك الايام هذينا متعب روحك في الشغل واجد حتى الحوش معش تقعد فيه زي قبل واغلب وقتك مسافر
فرج:قصص في الشغل واجد وانحل فيهن مااتشيلي في بالك
سعاد:انا غير عليك مانبيك اتعب روحك واجد علي صحتك انت عارف الدكتور ديما ايقولك لازم تاخد راحة
فرج:انا كويس وماانحس في شي
سعاد:ان شاءلله ديما اكويس
فرج;خطرها تذكري صاحبي محمد اللي ديما نحكيلك عليه
سعاد:من مااذكرتش
فرج:اللي كنت نقرا معاه تذكري اللي حكيتلك عليه وعلي قصة وخذته البنت عمه والمشاكل اللي صارن مع هله مايبوهش وبعد خذاها وربي ماعطش عيال وطلع هو وياها الألمانيا وعاشو غادي
سعاد:اها اها اذكرته كنه
فرج:انا ماحكيتلكش اني من ثلاث شهور تلاقيت معاه
سعاد:لا ماحكيتلي هو روح لي ليبيا
فرج:اها روح تذكري في تغيريرتي للسيارة
سعاد:اها نذكرها
فرج:خلاص جيت للمعرض
(انردو الثلاث شهور فاتن)
محمد بات سراج في المعرض ايتفرج عالسيارات وبعدها خش علي صاحب المعرض في المكتب
محمد:السلام عليكم
صاحب المعرض صبى;خير خير ياحاج محمد شن اخبارك
محمد:بخير الحمدلله
صاحب المعرض:نورت المعرض ان شاءلله غير سيارتنا عجبنك
محمد:لا مشاءلله كويسات
صاحب المعرض: لو تبيها للشبوب اللي عندك ماانظني سيارتنا يعجبنه
محمد:لا والله مش له انا نبي منك 20سيارة نفس اللون ونفس النوع نبيهن الموظفين الشركة كمكافئة عالشغل
صاحب المعرض:خلاص بكرا ايكونن جاهزات بس انت قولي شنو الموديل اللي عجبك
محمد:وريته للشباب برا اللي عجبتني
مع خشت فرج بات سندس
فرج:السلام عليكم
صاحب المعرض ومحمد:وعليكم السلام
فرج:شن اخباركم
صاحب المعرض:بخير الحمدلله
فرج:شفت برا همر وبالمواصفات اللي نبيهن كلها بس اللون ابيض والحق مانبيش ابيض نبي سودة اتوفر معاك ولا لا
صاحب المعرض:باذن الله متوفرة في الفرع لاخر
محمد ايبحت زيين
فرج:وين الفرع لاخر نمشيله
صاحب المعرض:تريح نص ساعة وحتوصلنا لعند هنا وطلع
فرج:تمام
محمد:كان ذاكرتي ماخيبتني فرج محمود
فرج:انعم هو بروحه بس انت وقعد ايبحت فيه زين
فرج:محمد علي
محمد صبى:هو بروحه وصبو سلمو علي بعضهم تسليمة حارة وتسليمة معرفة قديمة وبعد كملو التسليمة
فرج:وينك ووين ايامك امتى روحت من المانيا وترويحة دائمة ولا زيارة
محمد:ليا 7سنين مروح ونقلت كل اعمالي وشغلي هنا
فرج:والله ماعندي علم بترويحتك بكل
محمد:دورتك واجد ومشيت الحوش العيلة قالو له سنين مبيوع ومعش عرفت كيف نوصلك
فرج:حوش العيلة من بعد ربي خذا امانته مالوالدة وقعد مسكر بعناه انا وخوتي وكل واحد خذا حقه فيه
محمد;وينك وشن تخدم توا وشن امورك
فرج:الحمدلله بخير عندي مصنع مواد بناء واموري ماشية تمام انت اللي شن اخبارك وشن اخبار المدام ان شاءلله هلك ريحوكم علي موضوع الاطفال
محمد:والله شن انقولك عشنا فترة صعبة وبعدها ربي رزقنا بوليد وباتي حبه وكان يبينا انردو بس انا ماقدرتش ننهي شغلي برا ومن 7اسنين معش قدرت عالغربة وقعدت نبي سراج ايعيش بين هله وناسه صفيت كل شغلي غادي ونقلته هنا والحمدلله اموري ماشية تمام
فرج:مشاءلله مشاءلله باهي ربي عطاكم وماحركم ربي رحمته واسعة وانتو ضحيتو واجد عشان بعضكم وصبرتو والحمدلله نلتو
محمد:الحمدلله ربي جبر بخاطرنا وماحرمنا مالخلفة المهم ها قولي انت شن صار فيك وشن عندك من عويلة
فرج:الحمدلله ربي عطاني بنية انحق بعيونها في الدنيا بنية مافيش زيها اثنين بكل
محمد:مشاءلله مشاءلله ربي يحفظها وايخليها لكي ان شاءلله
فرج:ان شاءلله
محمد:لازم انديرو زيارة البعضنا وايتعرفو عيلاتنا علي بعضنا انا وانت صحبة قديمة عليك ايام ماننساهن لازم انردوهن
فرج:ان شاءلله عطيني رقمك وعنوانك عشان انتواصلو
محمد:اكتب عندك (092———–)هذا رقمي الخاص عاطيه للعيلة بس وللغوالي وانت مالعيلة يافروجة
فرج:اهو رنيت عليك وهذا رقمي وان شاءلله حنتواصلو
محمد:نرجا فيك لازم انتغشو مع بعضنا وايتعرفو هلنا علي بعضهم لازم ايكون فيه مشي وجي علي بعضنا
فرج:هذي اكيدة ان شاءلله انحددو يوم عشان انتلاقو
مع خشت صاحب المعرض
صاحب المعرض:استاذ الهمر برا تقدر تطلع اتشوفها
فرج:تمام
فرج:ان شاءلله حيكونن فيه اتصالات وانحددو موعد انتلاقو فيه مرة اخرى
محمد:™ان شاءلله وانت طيب وطلع نهى اجراءات السيارة وخذاها وروح
ومحمد اتفق امعاه بكرا ايكونن 20 سيارة واتيات وروح حتي هو
“”
فرج;خلاص تلاقيت معاه كم مرة بعد يوم المعرض وكثرن الاتصالات بينا وردت صحبتنا وايامنا لولة واليوم اتصل بيا وقالي بكرا عازمنا عالعشاء عنده في الفيلا وقال ضروري ماانجو عشان ايتعرفو العيلات علي بعضهم
سعاد:اها وانت شن رايك بتمشي
فرج:اها بنمشي عاد عزمنا وقال ضروري مااتجو
سعاد:كيف بنمشي العرب ماعمري شفتهم
فرج:ماهذا الهدف ما العشاء عشان اتعرفو ومراته انا نعرفها كانت تقرا معانا وبنت عمه في نفس الوقت مرا مشاءلله عليها حتنسجمي معاها
سعاد:باهي خلاص اللي اتريحك توا نمشو
فرج;ها سمعتي يابابا بكرا بنمشو الصاحبي القديم اتعرفو علي هله وايتعرفو عليكم شن قولك
سندس:عادي بابا نمشو شنو المشكلة ماهو صاحبك واي حد من طرفك اكيده نمشوله
فرج:نجيها بنيتي العاقلة ياما حكيتله عليك وعلي شخصيتك وقالي عنده فضول كبير هو وهله ايتعرفو عليك
سندس ضحكت:ياساتر طبعا اكيدة قتله راسها مسكر
فرج:هدي اكيدة ودغري قالي طالعتلك
سندس وامها قعدن يضحكن وبعدها كملو غداهم
وهنا مشن ايوتن في ارواحهن ويلبسن عشان ايعدن الهل رانيا وبعد كملن شالهم فرج الرانيا وعدى الشغله
“”
عند رانيا
جنها صاحباتها وزينن معاها الحوش وولعن منظومة واغاني وهياجة ووتن التورته وانواع الحلو والموالح عالطاولة وولعن اشموع وضوايا في الحوش كله المهم كانن تجهيزات ايهبلن وعيد ميلاد ايجنن وبعدها خشن لبسن مع بعضهن والصبايا قاعدات حتي هنا مع بعضهن ومنسجمات وتخريف وجو سمح
بعد العصر قعدو المعازيم ايجو نفس اللي قالتهم ام رانيا بزبط خالتها زهرة وصبايا عمامها الاثنين وبناتهن كل وحدة عندها بنت وجارتهم عزة بس
كانن البنات سندس ورويدة ورانيا ورنا اخت رانيا وبنات عم رانيا الاثنين ضحك وهياجة وجو سمح ورقيص ومنسجمات عالاخر
عزة جارتهم:اللي في النص بنتك سندس صح ياسعاد
سعاد:اها هي
عزة:ليا زمان ماعاد شفتها مشاءلله قاعدة كابرة
سعاد:البنات بذات مسرع مايكبرن وايكبرنه معاهن
زهرة خالتهم:لا والله مازال مشاءلله عليك العقبة مااتشوفيها عروس يارب
سعاد:ان شاءلله
مرات عمهم:مشاءلله عليك من بدري وانا مركزة عليها مع البنات اتحسيها شخصيتها سمحة ومتاعت ضحك وبصارة وجو شخصيتها حلوة ومميزة عالبنات
سعاد ضحكت:ديما اتقول فيها اتقولي انا مش زي باقي البنات ياحنة معاندية وراسها مسكر طالعة الباتها
مرات عمهم;ربي يحفظها لكي ماعندك الا هي صح
سعاد:راس بنية ياحنة ربي مارزقني الا هي
مرات عمهم لاخر:محكي فيها بنتك ياسعاد
سعاد:كيف محكي فيها
مرات عمهم:يعني مخطوبة مقيول فيها كلمة هكي
سعاد:لا والله مازال تقرا
مرات عمهم:معناها ان شاءلله ربي يجعلها من نصيبه
سعاد:نصيب من
مرات عمهم لاخر:عندي وليدي الكبير م 85مهندس وكان ايحظر برا ومالش كم شهر مروح وقاعدين اندوروله في عروس الحق انا مستخصرته في كل بنت ومافيش بنت ماللي رودوها لي واللي حقيتهن عجبتني ماعادا بنيتك هذي بصراحة خشت خاطري وعجبتني ومتاكدة حتى هو تعجبه المواصفات اللي يبيهن كلهن فيها كان تشاورو واتحددولنا موعد انجو نطلبوها
سعاد:والله شن انقولك الموضوع هذا مانقدر نعطي فيه رأي بروحي لازم ماانشاور باتها وانشاورها وان شاءلله ايصير خير
مرات عمهم لاخر:ان شاءلله خلاص نعطيك رقمي واشاورورو وكلميني
سعاد:تمام ملي عليا رقمك
مرات عمهم لاخر:092—–
سعاد;اهو رنيت عليك وان شاءلله اللي فيها خير ايجيبها ربي
مرات عمهم لاخر:ان شاءلله/ وربي يجعلها نصيبه
دارو الاحتفال ورانيا طفت الشموع وعطت صاحباتها الهدايا زي ماقلت ومدنهن الها قدام العرب?
وجنها هدايا اخرى من بنات عمها وهلها ومشى جو سمح وهياجة وبعدها كل وحده جاها باتها وروحت
“”
عند سندس وبعد ماروحو للحوش وقمعزو ايخرفو
فرج:ها شن جو العيد الميلاد انسجمتو
سندس:عليك جو ايهبل يابابا?
سعاد;غابي فيها بنتك وصاحبتها لا قمعزن ولا تهنن ولا هنن واحد شالن الدنيا
فرج يضحك:هبل زي بعضهن مازالن نفس تصرفاتهن وهنا اصغار ماكبرنش بكل
سندس:مازلنا صغار شنو اتشوفو فينا
سعاد:لا مانكن صغار مدادكن بعيالهن
سندس:هذا كلام فاضي واللي توا مدادنا وبعيالها هذي متخلفة نحن مازال صغار ومازال نقرو
سندس:انا اجوزت وانا في عمرك توا وشن صارلي قاعدة عايشة حياتي سمحة ومتريحة وجبت بنية ومالية عليا دنيتي
سندس:اولا انتي خذيتي بابا اللي مافيش زيه في الدنيا كلها وثانيا انتي مقتنعة وكل حد حر في رايه وفي اللي يقتنع بيه انا مش مقتنعة زيك
سعاد;البنت لازم ماتجوز وتستقر حياتها وادير عيال علي حالها هذي سنة الحياة وضروري كل بنت اتكمل حياتها براجل
سندس:هذا تخلف مافيش راجل ايكمل بنت البنت تقدر اتكمل حياتها بنفسها مش شرط المستقبل هو زواج المستقبل تعليم اتكملي قرايتك اتحظري واتكوني حاجة مهمة في المجتمع بدل ماتقعدي تجري في جرة عيال ووجع راس وراجل يحكم عليك اطيبيله غداء وعشاء وتغسلي واتحددي ادبشه يعني نظام خدامة ومربية اطفال
سعاد;شنو كلام الهبال هذا اهو انا وباتك عايشين مع بعضنا ماعمره فرض عليا حاجة انديرها ولا عاملني علي اني خدامة علي قولتك
سندس;توا انتي اتقارني في بابا اللي ماحد كيفه برجالة لخرين قتلك بابا طرف واحد وانتي خذيتيه
فرج;توا هذا موضوع بينك وبين امك مش من حقي ندخل لكن كلمتك الاخيرة غلط انا فيه كيفي واجد وفيه احسن مني اخرى يعني فكرتك عالزواج راهي غلط مافيش راجل ياخذ وحدة وايعاملها علي انها خدامه هذي مش صح يابابا في الزواج فيه احترام وتقدير وتفاهم
سندس:ابدا مافيش واحد زيك ولا احسن منك انت بس اتفكر هكي الرجالة لخرين لا انا انشوف في بنات متجوزات واااجد وحياتهن انقلبت جحيم بعد ماكانن متفوقات في دراستهم وبعد ماكانن مهتمات بأنفسهن توا لا يحظرن في محاظرات ولا ينجحن وفيه اللي سيبت قرايتها ومعش يلبسن ولا يهتمن بأرواحهن زي قبل تغيرن واااجد بككل وهذا كله سبببه الراجل والزواج
سعاد:مش عارف كيف عقلك مركب انتي معقولة اتفكري هكي
سندس:هذي التركيبة الصح للعقل ولو البنات كلهن ايفكرن زيي راه عاشن عيشة سمحة
سعاد;لو كلهن فكرن زيك معناها كل البنات يقعدن معقدات
سندس بعصبية:انا مش معقدة انا كل القصة اني انفكر صح التفكير اللي المفروض كلهم فكروه قبل ماايدمرو حياتهم بالزواج والكلام الفاضي
فرج:خلاص دوسة بلا عصبية امك تحكيلك تبي مصلحتك
سعاد:اكيدة ماايهمني الا مصلحتها اليوم مرات عم رانيا عجبتيها وطلباتك الولدها وقالت نفس المواصفات اللي يبيهن ولدها فيك وولدها مشاءلله مهندس م 85 يعني راجل كبير مش طايش من عيال هالوقت
سندس بعصبية;شنو اتشوف فيا اتقول نفس المواصفات اللي يبيهن انا لبسة عشان انجي كيف ماهو مفصلها انا انسانة مش بضاعة للبيع ياريتني سمعتها راه هزبتها هزيبة سمحة شن تحساب روحها هي ولدهافرح:من قال انك بضاعة غير اكيدة عجبها اسلوبك وشخصيتك بس هذا المقصود وبعدين دبينه م 85هذا راجل كبير واكيده بعقله وزي ماقالت امك مش زي شباب توا
سعاد;وفوق هذا كله قالت امه كان ايحظر برا ومعاه كم شهادة هندسة يعني متعلم ومثقف وحتقعدي انتي وياه نفس التفكير
سندس:بعصبية لو معاه الف شهادة ماايهمنيش حتي انا نقدر انجيب اكثر منهن مافيش اسهل من انك تقرا وتاخذ شهاده وبعدين تحسابوه كان واخذ كم شهادة معناها مثقف تلقيه حاصل في روحه وتفكيره ان الولية ماالهش الا حوش راجل لا قراية لا شيء
سعاد:وهذا الصح ديما باتي ايقول الولية ماالها الا حوش راجلها كلام من يوم يومنا متعودين عليه
سندس بعصبية:انتو متعودين عليه بس انا لا وماحد ايمشي كلامه عليا انا حرة والموضوع هذا معش تفتحوه قدامي واقتنعو خلاص اني انا مستحيل انكون بضاعة تنباع وتشترى ونرضى باني اندمر نفسي ومستقبلي بالزواج والهم والحقيرة مرات عم رانيا والله ناخذ رقمها من رانيا وانهزبها هي ولدها الحقير ينعن جد تحسابني للبيع وصبت من تلاهم وعدت الدارها وهي غامتلها واتهزب وقعدت اترن علي رانيا بتهزبها عاللي داراته مرات عمها وتلقى فيها انتظار ودزتلها رسالة هزيبة سمحة الرانيا
”
سعاد:شفتها كيف اتفكر وكيف تعقدت وصبت
فرج:مازال صغيرة حيجي يوم واتغير رايها
سعاد:عارفه مازال صفيرة بس التفكير هذا من زمان معاها ومتغيرش وخايفة عليها اتسكر راسها عليه وانت عارف بنتك معندة وتقعد ماتجوزش نحن ربي ماعطانا غير هي نبي نفرح بيها وانشوف عيالها وكان قعدت بالعقلية هذي مستحيل تجوز
فرج:والله نفسك بزبط خاطري نفرح بيها وانشوف عيالها ربي حرمنا ماالاطفال بالك هي اتعوضنا عليهم
سعاد;والله خايفة كان قعدت مسكرة راسها هكي وتكبر معاها الفكرة ونوحلو فيها
فرج:لا ان شاءلله خير
سعاد:الراجل اللي جاي مواصفاته مشاءلله عليهن وانت عارف بات رانيا وعارف سمعته وسمعة هله وهذا ولد خوه يعني ناس مسقمة متضيعش فرصة زي هذا ساد اللي جو من قبل ورفضناهم وزي مااتقول امي البنت زي العصيدة بعد تبرد ماعاد حد ايجيها
فرج:والله صدقتي لكن شوفيها مسكره راسها
سعاد;بالك مديورتلها حاجة خلينا انشيلوها الشيخ ايشوفها حي عليا راه تقعد مسحورة
فرج:تي شنو هالكلام مافيش منه بنتك هذا تفكيرها من هي صغيرة لكن اكيدة حنلقو حل
سعاد:باهي كان رنت عليا الولية شن انقوللها
فرج:توا قوليلها مازال ماحكيت مع باتها مش فاضي لين انحاولو مع سندس مرة اخرى
سعاد:باهي تمام وان شاءلله اتغير رايها
فرج:ان شاءلله
“”
الساعة 11 في الليل في فيلا سراج وتحديدا في دار سراج بزبط
سراج كان ايدوش وطلع يلبس وايانق في نفسه بيمشي للشقة ولبس( جينس بيج وعليه قميص دمي وقولف بيج وكاويش دمي)ومسك عطره وبدا ايبخ مع خشت امه عليه
عفاف قمعزت عالسرير:تبي تطلع
سراج ايتحنط:لا بنخش هههه
عفاف:رايق شكلك
سراج:مافيش احلى من هكي روقان جوي سمح بكل
عفاف:ان شاءلله ديما
وقعدت اتبحت فيه وهو ايسقم في شعره وسراج ايشوف فيه في المراية وهي اتبحت فيه
سراج;عفوفة وين سارحة كنك
عفاف:مشاءلله عليك ياوليدي عليك عرض وطول ربي يحفظك
سراج بغرور:عارف روحي طرف?
عفاف:والله ياسروجة خاطري انحقك ببدلت عرسك وراقي للكوشة المراتك
سراج ضحك: مقدمك ياعفو بس لنقنها كوشة تعرفي عليش ايقولو كوشة
عفاف:عليش
سراج:لان الزواج طاجييين كبير وغليظ بككل
عفاف:بلا هبال وكلام زايد ياسراج توا عمرك فوق 30سنة اللي مدادك بعيالهم توا وعارف المشاكل اللي زمان صارن علي قلة الخلفة وبعدها فضل علينا ربي ورزقنا بيك انت ونحن مش ديما عايشيينلك وخاطرنا انشوفو عيالك ونفرحو بيهم انا وباتك كبرنا اجوز وجيبلنا عيويلة وفرحنا وخلينا انحقوك وانت تربي فيهم وكابرين معاك
سراج:واااو عالنكد قفلتي اليوم بكل وبعدين اي عيال انربيهم تي انا ماربيت روحي
سعاد:عشان قتلك ازوج نكدت عليك
سراج:اها الزواج نكد وتقييد انا هكي عايش حياتي بالطول وبالعرض ماحد مقيدني لا وين مشيت لا وين جيت لا هم لا وجع راس ولا شيء هكي طير حر وين مانمسى انبات نرقد ونوعى براحتي ماحد يدخل فيا
سعاد:بس ياسراج هذي سنة الحياة ولازم كل شاب يزوج وايدير عيلة وبعدين انت توا كبير وناضج مش مراهق المفروض راك اتساعد في باتك في الشركة وتجوز واتجيبلنا وليد ايشيل اسم العيلة
سراج:اسم العيلة قاعد مش متحرك ومشيول اهو انا شايلة لكم
عفاف:وانت تبي حد ايشيل اسمك
سراج يضحك:اسمي نقدر انشيله مش ثقيل مانبي حد ايساعدني
عفاف:انا ماانبصرش انا نحكي جد لازم اتساعد باتك في الشركة وكان عندك وحدة اتحبها قولي عليها من بكرا نمشي نخطبها ان شاءلله اتكون بنت من
سراج:اطمني مافيش وحدة انحبها والحب والكلام الفاضي هذا مش ليا بكل ولا انا متاع حب انا طياري حر ماحد ايقيدني في شي ياعفوفة
عفاف:خلاص معناها انا انقيلك ونختارلك احلى وحدة في ليبيا وانجوزها لكي ونفرحو بيك واتجيبلنا عيال ايشيلو اسم العيلة
سراج:كان عندك طاقة وبتفرحي وبتجوزي حد اهو باتي قدامك مشاءلله عليه مافيه شيء عدي اختاريلة احلى وحدة في ليبيا وجوزيها له وطلعوني انا من مشاريعكم هذينا انا هكي عايش ومتريح وجوي سمح بكل والبنت اللي انشاورلها اتجي لاعندي
عفاف:هذينا استغفر الله العظيم كان اتفكك منهن راه انا عارفه اللي ادير فيه كله خطاه الله ايربحك ياسروجة راه ايجيك يوم وتندم
سراج باس علي راسها:عفو اطلعي من راسي سكنتيلي راه خليني دبيني جوي سمح وخذا تليفونه ودخانه وجا بيطلع
عفاف:باهي قبل ماتطلع تكي علي باتك في المكتب قالي كلميه ليا يبيك قبل مااتعدي
سراج عقد حواجبه:يستر الله ماايجيش من وراه خير اكيدة بيسكنلي علي موضوع الشركة ولا موضوع الزواج نفتختو راسي بيهن ومازال مش مقتنعين اني انا مش داير ولا وحدة فيهن
عفاف:مغير انزل شوفه قبل شن يبي
سراج:تم توا انشوفه
ونزل سراج وصبى عند مكتب باته
سراج بينه وبين نفسه: اكيدة فيها محاظرة طويلة وخش
سراج: اوو حويج شنجك
محمد;لا حول ولا قوة الا بالله حتى سلامك مش كيف الناس
سراج:تي كني شن درت ياباتي
محمد:لا ماادير في شي بحت كلامك واسلوبك وشكلك راك معش اصغير راك راجل كبير غير من نفسك واعقل وفكك من هالسهور والشلل اللي اتبع فيهم واشقى بشركتك وشغلك وانشط علي حالك بالله عليك عمرك توا فوق 30 ترا قرلي امتى بنفرحو بيك
سراج:والله انا كل يوم فرحان بروحي شوفي انتو امتى فاضيين نفرحو مع بعضنا
باته طلق فيه التحفه اللي عالمكتب وسراج طبس ماخلاهش اطب فيه
محمد:تحشم علي وجك انا نحكيلك في كلام جديات وانت اتبصر امتي بتكبر وتعقل بس
سراج:شن قتلك ياباتي جديات انا ديما فرحان بروحي وهكي منسجم وجوي تمام متريح وحاط راسي لاهم شغل لا هم عيال وولية ووجع راس
محمد:باهي لعند امتى هكي انا كبرت مش زي زمان معش قادر انشيل شغل الشركة كله بروحي نبي حد ايساعدني
سراج:عندك قريب الف موظف ايساعدو فيك كيف اتقول بروحك
محمد:نبي حد نعتمد عليه نبيك انت ولدي تاخد مكاني وتستلم الشركة بعدي يعني انحط املاكي وشغلي في يد الغريب اللي مرات ينصب عليا وياخد مني كل حاجة وولدي قاعد غير مش لازمته يخدم ويبي ايصيع براحته
سراج:شغل قلتلكم مش مشتغل وزواج مش متجوز بتزيدو تسكنولي عالموضوع انسيبلكم الفيلا كلها ونمشي نقعد مع جدي لا ايقولي اشتغل لا اجوز ويبيني انعيش معاه
محمد:جدك بروحه وحل فيك اصلا
سراج;حكالي واجد وأيس مني ايس حتى انت وعفوفة راه مش داير اللي تبوه
محمد:حتى انا فاضي وكلامي زايد عليا اللي نحكي الواحد كيفك المهم اصلا انا مش مكلمك عشان الكلام هذا
سراج:وووه يعني محاظرة وحدة اخرى
محمد:سراج سكر فمك وخليني نحكي خير ماانصبيلك
سراج:باهي احكي شن فيه
محمد:بكرا عازم صاحبي وهله عالعشاء
سراج:وشن تبوني انديرلكم العشاء
محمد:بلا ثقالة ياسراج
سراج:شن بنديرلك مكلمني اتقولي عازم صاحبي يعني بنطيب العشاء الكلام هذا احكيه للخدم مش ليا
محمد:ماانت مركب ماخليتني انكمل كلام المهم وجاي جدك نبيك اتكون قاعد وقت العشاء عشان هذا صاحبي من زمان وكنت نقرا نا وياه وكانو هله جيران عيت جدي معرفة قديمة بكل يعني والراجل جاي عشان العيلات ايتعرفو علي بعضهم
سراج:هذي حدها بس
محمد:اها يعني وقت العشاء لازم اتكون قاعد والا ايكونلي معاك تصرف اخرى
سراج:لا تصرف اخرى لا شيء بكرا عند العشاء تلقاني مزروع في الفيلا مش متحرك لين صاحبك يمشي تم
محمد:تم وياويلك ياسراج ايصير كلام عكس هكي
سراج:لالا مش حيتغير الكلام المهم توا طالع تبي حاجة
محمد:سراج روح بدري فكني منها ترويحتك بعد الضي يطلع
سراج:حاظر حاظر وطلع
“”
عدى طبعا سراج للشقة وكمل الليل كله هياجة هو وفيصل وجو مالاخر وروحو طبعا عاالساعة 5 الصبح
“”
جا صباح ثاني يوم كان يوم هادي جدا مافيش اي جديد ممكن هذا اللي ايسمو فيه هدوء ماقبل العاصفة
“”
الساعة 3 القايلة سراج طبعا نووووووم مع رنت فونه رن كم مرة وبعدين سراج فطنله واول ماحل عيونه وشاف الرقم ابتسم
سراج:اووووووووو تولي عاش من سمع صوتك
تالين:شن جوك سيجو شن اخبارك رايفتلك ياحبي
سراج;وانا اكثر ياتولي وينك مختفية لا مكالمة لا شي
تالين;من اللي مسكر ايميله ومعش يفتح في نت وااجد ولا ايرن ويسال ولا عاد شفته في المانيا
سراج:تعرفي ياتولي في عقلي الجية غادي لكن معش جت فرصة مناسبة معش فضيت
تالين تضحك:عساس تشتغل عشان ماتفضش
سراج يضحك:ماهذي المشكلة ماندير في شيء لكن ديما مش فاضي
تالين:عارفتك زايط وهياجة مع البنات
سراج يضحك:هذا تخصص وهواية ياماما
تالين:تربيتي
سراج:عينك من تربية من تي انتي تربيتي راكي اصغر مني يابنتي بس قوليلي شن اخبار باتك ومرات باتك شن دايرة معاك وكيف معاملة خوتك معاك توا
تالين:زي ماخليتهم بزبط بابا مش لاهي الا بيها وبعيالها انا مايندري عليا شن صاير فيا ولا في شنو اندير
سراج:والله تعالي عيشي معانا هنا وفوتيهم بكل
تالين:ديما انفكر فيها
سراج:انتي عارفة عفو كيف اتحبك وتعتبر فيك زي بنتها
تالين:عارفتها وحتي انا انحبها واجد قاعدة انفكر في الموضوع
سراج:شنو الهرجة هذي شكلك قاعدة في ديسكو
تالين:اها مانحن عندنا ليل توا وانتو اكيدة توا قايلة ومازلت راقد ياخميرة
سراج:عساس انتي مش زيي بزبط اتكملي في الليل سهور والنهار نوم
تالين:وشن عندي مااندير اكثر من هكي تعرف فقدتكم وااجد بعد روحتو لليبيا وسيبتو المانيا اقل شيء كنت ديما عندكم ومرات حتى انبات باالكم يوم عندكم وانكملو فيها انا وانت هياجة وجو بجد فقدتك وفقدت عفو وعمو محمد تخيل بعد نطلع مالفيلا انغمض عيوني مانبيش انحق فيلتكم وانتو مش فيها
سراج:والله حتي انا فاقدهن الايام اللي معاك صحبتنا كانت اتهبل بس يافرخة نحن مازلنا اصحاب تعالي وعيشي معانا هنا وكان علي باتك انخلي باتي ايكلمه ومش حيتكلم انك اتعيشي معانا هنا
تالين:عساس بابا مدورني نقعد في المانيا ولا انسيبها مايندري عليا عايشة ولا ميته
سراج:تالين كان بتبدي في وصلة النكد متاعك انسكر انا قتلك احجزي اول طيارة وتعالي هنا
تالين:انا بس خايفة ماننسجم في ليبيا انت عارف العادات والتقاليد غادي مش حيتقبلو وحدة عايشة بحريتها زيي في مجتمعهم
سراج:تعالي وماعليك نفس الجو اللي في المانيا عمك سراج داير زيه في ليبيا
تالين:تحكي جد
سراج:جد الجد بس قوليلي راك تقعدي حبيتي هذا ليش مش قادرة اتجي
تالين:هههههه حب من جدك سراج مش شوري الكلام هذا راك انت تطلع حبيت بس
سراج:انتي عارفة كويس سراج في طريق والحب في طريق واحد اخرى بكل عارفه حاجة سراج والحب خطان متوازيان لا يلتقيان ابدااا ?
تالين تضحك:عارفتك ياسوجي
سراج:حلاص شوفي وضعك ونظمي امورك وتعالي هنا
تالين:خليني انقلب الموضوع في راسي قبل وكان قعدت بنجي انقولك وتوا سلام بدت الاغنية اللي انحبها بنعدي نرقص عليها
سراج;ناعلي احسبونا
تالين تضحك’:تعال ومكانك محفوظ ياسيجو
سراج يضحك:خلاص عدي هيجي وخليني انكمل نومي
تالين;اوكي وسكرت
“”
عالساعة6 سندس وامها ايوتن في ارواحهن
سندس لبست( جينس كحلي وعلي بلوزة وردي هادي قصيرة وعليها جاكة بيضا وكاويشة بيضة ووشاح كحلي)
وطلعو هي وامها وباتها وركبو في السيارة ماشيين الهل سراج وطبعا سندس ماكانت عارفتهم ان هما هل سراج
“”
بالنسبة الفيلا هل سراج
كانو قاعدين ايجهزو للعشاء وايجهز الاستقبال الضيوف
كان قاعد امه وباته وجده
محمد:عفاف كان ترقي للعريس اللي فوق اتشوفيه كمل لبس ولا لا العرب اقريب ايجو نبيه يستقبلهم معانا
عفاف:حاظر توا نرقاله توا ورقت
“”
سراج في داره كمل لبس وقاعد ايمشط في شعره ولبس(جينس بيج وتشيرت اخضر ولبس فوقه جاكة رسمية بيج وكاويش اخضر وطالع طررررررف ?)
خشت امه وهو ايبخ في عطره
عفاف:ها كملت العرب قريب ايجو
سراج يضحك:حسستوني يبو ايزفوني تي اهو كملت خلاص طالع معاك وطلعو
#يتبع
اسفة بنات علي تاخيري الايام اللي فاتن عارفات الموضوع والنت خارب واليوم درت محاولات واجد لين انحصل نت وانزل الحلقة المهم ماانخليكن متشوقات اكثر
فيه تعديل بسيط في طريقة التنزيل حيكون التنزيل يوم بعد يوم يعني يوم حنزل ويوم لا لان الحلقات زي ماانتن شايفات طوال وقعدت نتعب في الكتابة تاخذ في اكثر من 7 ساعات والله قعدت انقصر حتى في صلاتي يعني اعذرني بنات وحطن روحكن مكاني مافيش وحدة تقدر تكتب واتفكر الكل هذا في يوم واحد وزي ماقلتلكن التنزيل حيكون يوم فيه ويوم لا وطبعا اليوم اللي فيه حلقة حتكون في نفس الموعد الساعة 10 م يعني بكرا مش حتكون فيه حلقة ??
اسفة لو فيه لخبطة في الاسماء واكيد رايكم ايهمني?
گـتـابـتـي Koka Saleh