منحرف وأحببته

#مـنـحـرف_وأحـبـبـتـه
الحـلـقـة(50 والأخيرة?)(الجزء الثالث)
گـتـابـتـي #Koka_Saleh
“”””””””””””””””””””””””””“”‘”
#عند_سراج
سراج:تي هي ياراجل تأخرت
فيصل:وسعلي بالك عليش مستعجل بس
سراج بصوت عالي:مرايفلها ينعن شكلك
فيصل:اللي يسمعك في العرس الاول مستحيل ايصدق انك انت هذك العريس اللي كان قالب وجه ومتني الموت ولا يجوز
سراج ابتسم;أحببتها حتى أقنعتني أن ما مر من العمر قبل مجيئها كان انتظاراً لها?
فيصل ضحك:لا الحالة مطورة والحب خلاك شاعر
سراج:حبها خلاني شاعر وفنان ومجنون وكل حاجة تي هي جيبلي الجاكة بنمشيلها خلاص
فيصل:والله مازال بدري هكي الفرح يكمل بسرعة
سراج:انقولك حاجة طالع بلا جاكة خليها عندك وطلع
فيصل خذا الجاكة وطلع وراه:هاك البسها يامطرشق خلاص توا نطلعو
لبس سراج الجاكة وكانت البدلة بيضة وجاية عليه خيال ?وخصوصا مع اللحية السودة المرسومة ناعلي وخلاص??
وطلعو في زفة كبيرة فيها ضنى سيده وصالح ووحدين في الشركة وكم صاحب يعرفهم فيصل ووصلو للفيلة
فيصل:بنخش انوصلك يانصي
سراج شافله:انا خاش الفرحي مش ماشي للمطار عشان اتوصلني
فيصل:افهم الزح رانيا جوا ومن بعد اللي صار معش شفتها
سراج;قولي هكي يانصي تم خش معايا بس عيونك ايجن علي ام السان انطلعهن لكي
فيصل:عيب يانصي هذي اختي
سراج:تم هي انخشو
وخشو مع بعضهم وطبعا جوا كانو كلهم عارفين ان سراج بيخش فالصباية كلهن تغطن خشو سراج وفيصل ورانيا انصدمت بعد شافت فيصل خاش ماتوقعتهش منه وعجبها لما شافاته ببدله زي بدلة العريس واول ماخش هي كانت كيف نازلة مالمسرح ابتسملها ورانيا مشت وقمعزت جنب رويدة
سراج وصل في سندس اللي كانت منزله طرحتها ورفعها الها
سراج:انحبك ياملاكي وباس جبينها
سندس:انموت فيك
سراج ضحك:تذكري لما شفتك يوم الفرح شن صار
سندس ضحكت:وهذكي يوم ينتسى
سراج:تعرفي انك احسن حاجة صارت في حياتي
سندس ابتسمت:وعارف اني انا اسعد وحدة في الدنيا عشان خذيت راجل زيك
سراج قرب وحظنها:انحبك ياام السان
“””
فيصل طلع وعيونه علي رانيا ماشالهنش بكل
رويدة:عدي صالحيه لان اللي داره عشانك مافيش راجل ايديره
رانيا سكتت اشوي وبعدها طلعت ولقت فيصل قريب يطلع مالفيلة
رانيا:فيصل
فيصل:نعم
رانيا:شكرا عاللي درته انت خاطرت بروحك عشاني
فيصل:رنوشة انتي مكانك في قلبي كبير والروح ترخصلك
رانيا ابتسمت:اسفة اني زعلتك مني ورغم زعلنا لما صارت المشكلة انت الوحيد اللي كلمته لاني عارفة مش حتخلى عليا
فيصل قرب منها:لو انتخلى عالدنيا كلها انتي لا وانا اللي اسف اني درت شيئ مش موافقة عليه وحنكلم عمي ونلغي موعد الفرح زي ماتبي
رانيا:بس انا نبي الفرح يطلع في موعده
فيصل:تحكي جديات يارانيا
رانيا:اها ومازال اسبوعين بس يادوبك انلحقو
فيصل بفرحة:واخيرا حتكوني ليا
رانيا:والعمر كله حنكون لكي
فيصل كرها من يدها وحظنها زييين
رانيا:فيصل راه ايشوفنا حد
فيصل بعد:اسف بس من فرحتي
رانيا:خلاص اطلع ولا مازال بتشوف البنات اللي جوا
فيصل:هو انا اصلا انشوف في غيرك كل خشتي كانت عشانك
رانيا:عارفتك بس اطلع
فيصل:حاظر وطلع
“””
سراج وسندس مقمعزين وماسك يدها
سراج:مش مصدق ان نحن الاثنين توا مع بعضنا كأني كنت في كابوس
سندس:لا صدق خلاص توا نحن الثلاثة مع بعضنا ومعش يقدر حد ايفرقنا
سراج شافلها:ثلاثة
سندس ابتسمت:أنا حامل
سراج:شنو
سندس:ليا كم انحس باعراض غريبة واليوم الصبح قبل ماايصير كل اللي صار وقبل مانمشي للمشروع حللت وطلعت حامل وانت أول واحد تعرف
سراج صبي وبفرحة وصوت عالي:بنقعد اب
سندس صبت;اس بلا فضايح الناس تضحك علينا
سراج بفرحة:خليهم يضحكو انتي مراتي وحامل مني ام سندس وعفوفة وصحبات سندس بعد شافنهم كيف صبو فجاة وسراج ايعيط جن يجرن يحسابن نفس المرة اللي فاتت?
عفافة:بسم الله كنكم شن فيه
سراج;افرحي بتقعدي حن دوسة حامل
عفاف وسعاد ورانيا ورويدة قعدن ايزغرتن وعلموها المعازيم كلهم وعلموها فرج ومحمد وجد سراج وكلهم فرحو (وهذي اول مرة اتصير عروس يوم فرحها اتخبر عريسها انها حامل بس دائما من عيت سراج يأتي الجديد?)
بعد اشوي سراج خذا سندس وروح بيها الحوشهم
سراج:نورتي حوشك ياعروس وحق ربي كان مظلم بلاك
سندس:انحبك
سراج:انموت عليك وشالها ورقى بيها فوق وحطها عالسرير وهي تضحك
سراج:ربي مايحرمني من ضحكتك
سندس:ولا يحرمني منك
سراج:مرايفلك وااااجد
سندس انحرجت:وانا اكثر منك
سراج قرب بكل حنية وباسها بوسة طويييلة علي شفايفها
وبعد البوسة
سندس:حبيبي توعدني ان اللي صار معش يتكرر وان لو اي شيئ ايصير معاك تحكيه ليا دغري
سراج:نوعدك ياقلبي وحط يدها علي بطنها
سراج:ووليدنا اكيد يسمع فينا وحيكون شاهد علي كلامي
سندس:انت فرحان اني حامل
سراج:اكيدة فرحان
سندس:بس انت ديما اتقول ان مش مهم عندك اتكون اب يعني الموضوع مش ضروري
سراج:الكلام هذا كان قبل ماانحبك بس توا تفرق عشان حبيتك ونبي شيئ يربطنا ببعضنا شي انكونو مشتركين فيه وايكون طالع من جوا جسمك وحيكون هو ثمرة حبنا
سندس ابتسمت:عارف لما عرفت روحي حامل فرحت وااجد مع اني كنت مطلقني بس فرحت لان حتكون فيه حاجة مالشخص الوحيد اللي حبيته قاعدة جوا مني
سراج:ناعليا منك ومسك ايديها وباسهن
سندس:ومنك?
سراج قرب وقعد ايبوس فيها بكل رومانسية وحنية وبعدها حوللها الفيلو بالراحة وعزقه لوطه وكمل باقي بوساته والباقي طبعا #مششششفر?
“””
#صباح_يوم_جديد
سندس فتحت عيونها ولقت روحها في حظن سراج ابتسمت وحست براحة غريبة وقربت منه زين وباساته
سراج فتح عيونه وشافلها
سراج ابتسم:معقولة فيه قمر يطلع في النهار
سندس ابتسمت:ديما هكي تغلبني بكلامك
سراج قرب وباسها بوسه سريعة علي شفايفها
سراج:والله الكلام اللي نحكي فيه يطلع بروحه من كثر ماانحبك ياام السان
سندس:مازال اتقول هكي
سراج:عارفة ان هذي ميزة فيك اول مالفت نظري لكي السانك وحبيت جلاطتك وقوتك قبل ماانحب جمالك
سندس ابتسمت:وانا حبيتك لما شفت الجانب الكويس فيك لما عرفت ان ورا غرورك وعنادك وعصبيتك قلب مافيش اطيب واحن منه
سراج:الصفات هذينا انتي الوحيدة اللي اكتشفتيهن
سندس:لاني انا الوحيدة اللي حبيتك بصدق فيه جملة مرة قريتها كأنها مكتوبة لنا
سراج:شنو الجملة
سندس:كانت تلك الاختلافات سبب جمعنا لنكمل قلوب بعضنا?
(الجملة هذي من كتابة وحدة من فانزاتي دارتها خصيصا السراج ودوسها البنوته اسمها Mena_Wh# بصراحها كل مقولاتها حلوات بكلل?)
سراج:فعلا كأنها علينا بزبط كملنا بعضنا بالإختلاف اللي بينا وجدي ماغلطتش ولا لحظة لما اختارنا البعضنا
سندس:جدي راجل حكيم بكككل ومش حيجي الزمان بواحد زيه مرة اخرى ربي ايطول في عمره
سراج:ان شاءلله
سندس:هي انصبو انصلو عشان بعدها انجهزو الفطور ونفطرو مع بعضنا زي قبل
سراج شافلها بحنية:بنفطر عليك قبل وبعدها انصبو نفطرو
سندس ابتسمت وسراج قرب وقعد ايبوس فيها والباقي #مشششفر ?
“””””
مر اليوم عادي للكل سندس وسراج كملوه في حوشهم وماطلعوش بكككل وكمل اليوم عندهم رومانسية في رومانسية?
“””
ثاني يوم مشو للمركز كلهم وادلو بشهادتهم وحكو اللي صار للمحقق
“”””
#مر_اسبوع
دوسة وسيرجو منسجمين عالاخر وسراج خايف علي دوسة وحملها مالريح اللي اتهب وشر منه عفوفة اللي كل مااتحقها مصبية اتعصب وحال غايتها سندس ماادير شيئ لين ولي العهد ايجي وسندس كانت مالة مالجو هذا لانها مش متعودة هكي وبذات ان مازاللها فترة طويلة وكان تقعد عالحال هذا اطرشق ?
فيصل ورانيا لاهيين بتجهيزات فرحهم وفيصل كاين طاير مالفرحة اما رانيا فحتى هي كانت فرحانة لانها عارفة انها خذت #راجل
رنا كانت فرحانة الخيتها واتساعد فيها في التجهيزات بس كان فيه شيئ متغير فيها ومش فاهمة ليش كل ماتسرح ايجي في بالها صالح?اللي معش شافاته بعد اخر مرة في المدرسة
رؤوف وأسيل حطها في دورات وقعد ايساعد فيها زي ماتبي ومكالماتهم ولقائاتهم كاثرات والانسجام واضح بينهم
معاذ ورويدة معاذ وهله كانو طايرين مالفرحة بحمل رويدة ونفس اللي صاير مع سندس صاير مع رويدة وماحدش يبيها اتحرك لين ايجي ولي العهد?
صالح مختفي عالانظار بس انا متاكدة ان اختفائه مش حيطول?
تالين قبل حكم المحكمة بيوم انتحرت وطبعا انا شافقة عليها لان اللي صار معاها كله لانها ناقصها اهتمام وحنان من هلها فكانت بتعوضه من اي حد وباي طريقة وهذي نتيجة نقص الحب والاهتمام والحنان والأمان مالعائلة ?
“”””””
#يوم_فرح_رانيا_وفيصل
رانيا في الكوافير ومعاها سندس ورويدة
سندس:مرض كنك متوترة هكي
رانيا:يعني مش عارفة عليش
رويدة تضحك:خطرتي عليا يوم فرحي خايفة وماعندي من نسال سندس كانت مازال زيي?
رانيا بتبكي:باهي قوللي شنو واعرة
سندس تضحك:لا واعرة لا سو حاجة عادية بكل
رانيا:اكيدة
سندس:اكيدة مغير بلا اشورخ زايدات
رويدة:عليك صماطة فيك البنت متوترة بدل مااتهديها اتهزبي فيها
سندس:شن بنديرلها وهي ضاربة الكآبة في يوم فرحها
رانيا:اصلا انا الغلطانة اللي سألتك
رويدة:باتك ايرن اكيدة برا
ولبسنها صحباتها البرنوس ولبسن عباياتهن وطلعن معاها وركبنها في السيارة ووصلو للقاعة وخشت علي اغنية طلي بالأبيض وقعدت عالمسرح وطبعا امعاها رويدة وسندس ماسيبنهش ولا لحظة
“””
عند_فيصل
فيصل:هي كملولي ام اللبسة مستعجل ازح
صالح;الجاكة دسها سراج ومايبيش يعطيها
فيصل بعصبية:سراج بلا معيلة وعطيها ليا طولت ينعن شكلك
سراج:مازال مش عاطيها لين اتحس باللي درته فيا هذك اليوم وماتبيش تعطيني الجاكة
فيصل:خلاص يانصي والله حسيت بيك انت اللي توا حس بيا الساعة 10 تأخرت بكل
صالح:خلاص ياسراج بلا معيلة وعطيها العديلي وغمزله
فيصل شافله:كيف عديلك
سراج:صالح مكبد في اخت رانيا
فيصل:بس هذي مازال صغيرة
صالح:ينعن جد صغيرة البنت في ثالثة ثانوي راه
سراج:وصالح يبي ايخش معاك زي ماانت يومتها خشيت معايا بس مش حيكمل لعند جوا
فيصل:فكوني تخيلو هلها يفطنو الحاجة واتصير مشكلة واتخربولي الفرح?
سراج:ريتك انت ماتتحسش بالناس وعشان هكي والله مانك واخذها الجاكة عدي هكي
فيصل:خلاص توا ايخش غير عطيني الجاكة طولت
سراج:عدي ياصالح جيب الجاكة من سيارتي
فيصل:يعني متفقين عليا
سراج:ايوا?
فيصل;تم يانصي
صالح مشى جاب الجاكة ولبسوها الفيصل وطلعو في زفة سمحة بكل ووصلو للقاعة وخشو فيصل وصالح مع بعضهم للقاعة
سراج لما جو بيخشو كلم سندس عشان تطلع برنا برا باي حجة وسندس دغري جت الرنا
سندس:رنو هي معايا للحمام
رنا:بس توا فيصل بيخش بنحظر خشته
سندس:عارفة مش حنطولو بس خلاص مش قادرة انتحمل وهذا خطير عالبيبي
رنا:لالا كله الا البيبي هيا بنمشي معاك
سندس:اقعدي هنا في صالة الانتظار علي ماجيتك ومنها اتشوفي فيصل لما ايخش
رنا:تمام
سندس:مش حنطول وخشت
رنا قعدت مصبية في مكانها مع خشت فيصل ومعاه صالح انصدمت?
فيصل كمل وخش جوا للقاعة بروحه وصالح جا الرنا المصبية
صالح:طالعة اتهبلي?
رنا جت بتخش وصالح مسك يدها
صالح:شنو اندير عشان اتحسي بيا واتصدقي اني انحبك تبيني انخش توا وقدام اللي جوا كلهم انقول انحبك
رنا شافتله زين وهي مصدومة من جرائته
صالح:مش مصدقة اني انديرها صح حنخش توا وانوريك اني نقدر اندير اي حاجة وجا بيخش
رنا وقفت قدامه
رنا:والله مصدقتك بس لو سمحت معش اتفضح بيا اكثر من هكي
صالح:اسمعي انا انحبك ونبيك بالحلال وبكرا بنجيب هلي وحق الله لو مااتوافقي حتلقيني طالعلك في كل مكان وانقول الكل الناس اني انحبك وبعد هذا كله نخطفك ونزوجك
رنا:يعني هي بالغصب
صالح:اها بالغصب ولو مش موافقة بنخش توا وانقول للي جوا كلهم اني انحبك
رنا:لالا خلاص موافقة
صالح:احلفي
رنا محروجة وحالتها حاله:والله موافقة خلاص تعبت من ملاحقتك ليا
صالح بفرحة:شنو اندير توا انبوسك ولا شنو اندير
رنا شافتله زين?وراحت تجري?
صالح ابتسم وطالع وهو طاير مالفرحة واخير رنا بتريحه من عذابه وراها
“””””
كمل الفرح وروحو فيصل وسندس الحوشهم
خشو غيرو دبشهم وصلو مع بعضهم وبعدها
فيصل:اكيدة جيعانة تعالي انتعشو
رانيا كانت متوترة وخايفة بكل
رانيا:لالا عنديش نية
فيصل:بس انتي اكيدة ماتعشيتيش زيي كيف ماعندكش نية
رانيا:ماتعشيتش بس ماعنديش نية
فيصل يضحك بغير الجو:مااتخافيش انا اللي توا انجهز العشاء مش انتي
رانيا:لا مش هكي قصدي وانا اللي توا انوتيلك اتعشى بس انا مانبيش توا نشرب عصير وصبت وخشت للمطبخ وفيصل صبى وراها وخش لقاها بادية اتوتي
فيصل حظنها من الخلف:حبيبي كنك
رانيا زاد توترها:شيئ
فيصل:من اول ماجينا وحاس فيه حاجة وبعد ولفها شوره ولقاها تبكي
فيصل بخوف:كنك
رانيا قعدت تبكي وفيصل حظنها وقعد ايسكت فيها
فيصل:حبيبي كان خايفة مني وماللي يبي ايصير صدقيني مش حنغصبك علي شيئ ومش حنديرها الا لما تقعدي مستعدة انا اجورتك عشان انحبك مش عشان حاجة اخرى انتي بس اهدي ومعش تبكي
رانيا حست بحنان فيصل وهدت وتريحت من كلامه وسكتت وقعدو ايجهزو في العشاء مع بعضهم وبعدها تعشو ولمو الحوسة مع بعضهم
فيصل:شن رايك انشغلو فيلم حلو انتفرجو عليه مع بعضنا
رانيا:تمام وانا حنجيب عصير وشكولاطة انكسدو عليهن
فيصل:تمام طلع واختار فيلم كوميدي حلو وشغله وبعدها جت رانيا جايبة العصير والشكولاطة وقعدو ايتفرجو ومنسجمين ويضحكو وجوهم سمح وقعدو قريب ساعة ونص ايتفرجو وبعدها رانيا نعست ولما فيصل فطنلها شالها وخش للدار وحطها عالسرير وصبى رانيا وعيت ومسكت يده
رانيا:وين ماشي
فيصل;بنجي نرقد جنبك وجا وتمدد جنبها وقعد ايشوفلها واتشوفله
رانيا:فيصل
فيصل:عيونه
رانيا:انحبك
فيصل قعد مستك وايشوفلها
رانيا:سمعتني
فيصل:طالعة من قلبك
رانيا ابتسمت:من جوا قلبي
فيصل بفرحة:واخيرا قلتيها
رانيا ابتسمت
فيصل:وحق الله انحبك وانموت فيك وقرب منها وباسها علي خدها وبعد لقى رانيا مش معارضة قرب علي شفايفها والباقي #مشششششفر?
“””””
#مرن 8 شهور
صالح خطب رنا من ثاني يوم فرح رانيا وشرطو علي صالح ان مافيش فرح الا لما اتكمل قرايتها وصالح وافق ودارو بيان كبير وحلو وقعدت خطيبته رسمي وفوق من هذا طلعت رنا عاجبها صلوحة ومكبدة فيه من اول مااختفى?
#عند_أسيل
كيف طلعت من اخر امتحان وصبت مع صحباتها مع جية
رؤوف;عادي ناخذها منكن اشوي
البنات:اكيدة
رؤرف مسك اسيل من يدها وطلعو
رؤوف:ها شن صار في امتحانك
اسيل:باذن الله ممتياز
رؤوف:يعني نظمنو النجاح في اولى اعداد
أسيل:ومالتراتيب الاولى اخرى
رؤوف:نجيها الشاطرة
أسيل:كله بفضلك
رؤوف:بالعكس كله لانك شاطرة بس
أسيل ابتسمت
رؤوف:مااتحايليش عليا بضحكة واتنسيني عليش جاي
اسيل;عليش
رؤوف:اليوم لازم اتحددي موعد مع هلك عشان نخطبك
أسيل:ماتستعجلش لازم انتاكدو من مشاعرنا قبل
رؤوف:نحن توا قريب انطقو سنة وعن نفسي متأكد من مشاعري وعارف روحي انحبك بس انتي شكلك مش متاكدة من مشاعرك
أسيل:لا متأكدة منهن وانت عارف ان انا اللي اعترفتلك بالحب قبل مااتحبني وحنقعد انحبك ومتمسكة بحبك لين انموت
رؤوف:بعد عمر طويل المهم توا بتحددي موعد ولا انجيبلكم هلي فجأة
أسيل:لا اليوم حنحكي الماما وانحددلكم موعد معاها
رؤوف:نجيها اللي تسمع في الكلام
أسيل ابتسمت:شاطرة نعجبك وقعدو ايهدرزو وبعدها كل واحد روح الحوشهم
“””
#عند_رؤوف
روح لقى امه تبكي وقالتله ان عصام مشى للمطار وبيسافر ومعش بيرد هنا بكل رؤوف دغري ركب في سيارته ومشي للمطار ولما وصل شاف عصام خذا شنطته وبيمشي لان اينادو علي رحلته
رؤوف:عصام
عصام لف وشاف الرؤوف
رؤوف:وين ماشي
عصام:بنكمل قرايتي برا
رؤوف:وليش ماتقدرش اتكملها هنا
عصام:انا نبي نمشي من هنا بأي طريقة وهذي فرصة جتني ومش حنضيعها
رؤوف;وليش بتمشي من هنا
عصام:انا بعد اللي صار بينا معش عندي وجه انحط عيني في عينك وحاس بالذنب لاني كنت اناني باللي درته
رؤوف:اللي صار نصيب وبعدين انت درت هكي عشان انا وانت مانوقعش في غلط بس كانت طريقتك اللي اخترتها غلط
عصام نزلو دموعه:وهذا ليش بنمشي بالك السنين حينسنا اللي صار
رؤوف:بس انا مسامحك ونبيك تقعد معاي وجنبي انا ماعنديش غيرك في الدنيا وبعدين معقولة خوك الصغير قرر يخطب ويجوز وانت ماتقعدش جنبه
عصام بفرحة:تحكي جد
رؤوف ابتسم:اها جديات ولو انت ماقعدتش انا مش حنخطب
عصام جاه وحظنه:لا حتخطب وانا اللي حنمشي مع باتي ونخطبلك
وبعدها خذاه وروحو مع بعضهم الحوشهم وحكا رؤوف الهله ان بيخطب
“”””””
سراج طبعا مسك شغل باته كله وريحه في الحوش وسندس كانت في شهرها
وعالساعة 2روح للحوش لقى سندس مقمعزة وقالبه وجها
سراج:كنه الحلو زعلان
سندس بعصبية:انا مليت طول الوقت هنا وماتبونيش انتحرك ولا نشتغل عشان البيبي مليت ياسراج
سراج باس راسها:هذي بس لو بس صبرتي اليوم دايرلك مفاجئة وبنطلعك تطليعة اتهبل
سندس بفرحة:وين
سراج:خلينا بس انتغدو وبعدها نمشو
سندس:باهي
طبعا زي كل يوم جايب معاه غداء جاهز تغدو وطلعو وشالها للحوش اللي في الجبل اللي كان فيه فيصل لما زعل من رانيا
وقعدو في الحوش يومين وهما منسجمين وجوهم سمح بس اليوم الثاني في الليل سندس مرضت وشكلها هكي بتجيب
سراج كان راقد جنبها ووعاه صوت عياط سندس
سندس تبكي:اه اه سراج نوض
سراج نط:شن فيه
سندس تبكي:شكلي بنجيب
سراج بخوف;توا
سندس تبكي:لا توا انقوله اصبر اشوي اصلا باتك راقد
سراج:شنو اندير توا
سندس تبكي واتعيط:شيلني للمستشفى شن بدير يعني
سراج طلع بيولع السيارة وبعدها رد لقاها مازال تبكي واتعيط
سراج قعد ايلبس فيها عبايتها ووشاحها وهو خايف وعارف انهم قاعدين في مكان بعيد مالمدينة بس معش عرف شنو ايقوللها خايف يفجعها والكارثه لخرى ان السيارة كانت بعيد مالحوش لان الحوش كان في الجبل وماايخشنش السيارات لعند الحوش ولما طلعو
سندس تبكي:كيف بننزل مالطريق هذي
سراج:اهدي حبيبي توا انشيلك وشالها وقعد يمشي بيها
سندس تبكي واتعيط:سراج نزلني معش نقدر شكلي بنجيب توا
سراج:شن بندير توا
سندس:مش عارفة اصرف
سراج:انرد بيك للحوش ونصرف وشالها ورد بيها للحوش وطلع قعد ايبحت هكي وهكي شاف حوش بعيد منه وضيه والع دغري مشاله يجري ودق بس ماحدش فتح وقعد ايدق بالقوه اشوي هكي وطلع شايب
الحاجة خليفة بعصبية:جينا وقعدنا في اخر الدنيا عشان ماحد يزعجنا وانت جاي ادق علينا في عقاب الليل ياللي مااتحشم
سراج:اسف بس مراتي بتجيب والمستشفى بعيدة ومعش عرفت شنو اندير لو معاك اي وحدة اتساعدني كلمها ليا
الحاج خليفة:حاظر حاظر وخش علي مراته الحاجة خديجة وحكالها وطلعو مع بعضهم ومشو الحوش سراج وخشت الحاجة خديجة علي سندس وبعدها طلعت علي سراج
الحاجة خديجة:جيبلي مية ساخنة وفوطة نظيفة
سراج:حاظر ومشى يجري جاب مية ساخنة وطلعلها فوطة وعطاهن الها
وقعد برا وهو متوتر وبذات وهو يسمع في عياط سندس وبعدها معش تحمل وقعد يبكي
الحاج خاليفة:عيب راجل وتبكي هي اتجيب عادي كل الصبايا ايجيبن
سراج:هي اتوجع وكله بسببي المفروض سمعت كلام امي وماجبتهش في مكان مقطوع زي هذا كان هذا راه شلتها المستشفى وماتألمتش كل هذا
الحاج خليفة:حتى في المستشفى نفس الحاجة وبعدين مااتخافش عمتك خديجة مولدة كم مرة من قبل وان شاءلله مراتك توا اتجيب علي خير وسلامة
سراج:ان شاءلله
بعد 10 دقايق سمعو صوت بيبي
الحاجة خديجة:مبروك جاك وليد مشاءلله عليه
سراج فرح وقعد يضبط في الحاج خليفة
سراج:وسندس شن صارلها
الحاجة خديجة:كويسة بس لازم توا تاخذها وتمشو الاقرب مستشفى عشان ايخيطوها
سراج:حاظر
سراج خش علي سندس لقى وجها تاعب من ألم الولادة سراج باسها علي جبينها:الحمدلله علي سلامتك ياقلبي
سندس ابتسمت:الله ايسلمك
سراج:توجعتي
سندس:شفت الموت بعيوني بس عارف انسيت الالم كله اول ماشفته
سراج:وينه خليني انبوسه
سندس:اهو صغيرون بكل
سراج جاه ومسكه في يده وباسه
سندس:شن بتسميه
سراج:علي علي جدي
سندس ابتسمت:وانا كنت نبيه هكي بس قلت نسالك قبل
وبعدها خذاها وشالها للمستشفى وكلم هله وهلها وجوهم كلهم وكانو الكل فرحانين وبذات جد سراج لان سماه عليه برغم ان كان رافض ان اي حد ايسمي عليه وهو حي بس علي سراج مااعترضش بكل
رويدة جابت بعد سندس بيومين وحتى هي جابت وليد
“””””
#بعد_مرور_سبع_سنين
رؤوف وأسيل اجوزو وعندهم بنتين وصالح ورنا اجوزو وعندهم بنوته نسخة رنا?وعصام اجوز بعد رؤوف بفترة جواز تقليدي ومراته مازال كيف حامل جديد❣
وعيت سراج وعيت فيصل وعيت معاذ كلهم طالعين رحلة مع بعضهم ومصيفين في مصيف معاذ?
رويدة توا عندها 3عويلة مشاءلله(مؤيد 6سنين/مروان4سنين/مهند وهذا اصغر واحد وعمره شهرين)
رانيا عندها وليد واحد واسمه أيهم عمره 5 سنين وحامل للمرة الثانية وفي الشهر 7 بس هالمرة بنوته?
سندس عندها عليوة وعمره توا 6 سنين وحامل في الشهر الثاني وهي وسيرجو يبو بنوته?
قاعدين كلهم عالشط البنات والشباب علي طاولة وحدة وايخرفو
والعويلة يلعبو في البحر الا مهند راقد في الشاليه وكل مرة رويدة اتصبي اتشوفه الجو هدوء والكل ايخرفو خطمت وحدة سمحة بككككل طرف مالأخير ولابسة لبسه ضابطة ومرفعها السروال وطالقة شعرها وحاطة سماعات في ذانها
معاذ وفيصل عيونهم قريب طلعن في البنت ??
بس الغريب ان المنحرف ماشافلهش بكل لا وكان منزل راسه لوطى اخرى ?
رانيا بعصبية:فيصل كنك
رويدة بعصبية:معاذ تحشم
فيصل ومعاذ نزلو روسهم وسراج قعد يضحك عليهم?
سراج:تستاهلو هذي نهاية البصبصة
فيصل شافله وبصدمة:انا عارفك نسونجي كيف قدرت اتحمل ومااتشوفلهش بس
سراج ضحك:هذا زمان توا لو انشوف الف بنت قدامي ماتعجبنيش الا ام السان اللي عندي وغمزلها?وسندس ابتسمت☺
الحب هو الإقامة والثبات وامتلاء عين العاشق بالمعشوق وحده❤
#النـهـايـة
واخيرا وصلنا للحظة هذي بعد صبر واجد مني ومنكن وانتمنى بعد كل التعب هذا اتكونو استفدو من الرواية ومن كل العبر اللي فيها ?
أسفة لو فيه لخبطة في الأسماء ونبي رأيكن كلكن لو سمحتن لان ايهمني?
التصميم كان ل (أنين الصمت) شكرا حبيبتي وعجبني واجد?
واسفة للي ماحطيتش تصميماتهن بجد كانن كلهن حلوات الدرجة حرت معليش بنات?
وبإذن الله عندنا لقاء في #رواية_جديدة?

تحياتي للكل الـگـاتـبـة
Koka Saleh ?