منحرف وأحببته

#مـنـحـرف_وأحـبـبـتـه
الحـلـقـة(50 والأخيرة?)(الجزء الثاني)
گـتـابـتـي #Koka_Saleh
“”””””””””””””””””””””””””“”‘”
رانيا:شن رايك نطلعو انشوفو الشغل بالك اتغيري جوك اشوي
سندس:هي وصبت مع جيت رساله الفونها ولما شافتها كانت من تالين ومكتوب فيها(سندس انا اسفة وانا نادمة علي كل اللي درته لاني صح زي مافكرتي سراج عمره ماحبني بس بعد اللي درته له معش قدامه خيار الا ان ايوافق عاللي نبيه انا اسفة وانا توا بنسافر ونرجى فيك توا قدام كفي وحطتلها اسمه بنحكيلك اللي صار قبل مانمشي)
سندس تغيرو ملامح وجها
رانيا;شن فيه من ذزلك رساله
سندس خذت شطنتها:شكلي بنعرف الحقيقة توا اشوي وانرد عليك
رانيا:اي حقيقة احكيلي قبل
سندس:باي بعد انروح نحكيلك وطلعت
رانيا اتناديلها:سندس سندس فهميني وين ماشية قبل
سندس ولعت سيارتها وطلعت
ورانيا شكت في الموضوع وطلعت
رانيا:هيثم نبي سيارتك اشوي
هيثم:ليش
رانيا:اشوي وانجيبها لكي
هيثم مدلها المفتاح:خوذيها
رانيا طلعت بسرعة وركبت في سيارة هيثم ولحقت سندس ولقتها مازال مصبية علي اشارة المرور وقررت تلحقها وتعرف وين ماشية قبل مااتوقفها
مشت سندس ووصلت عند الكفي وكان الشارع اللي فيه الكفي هادي واصلا الكفي مسكر وشافت تالين راكبة في سيارة واشرتلها بمعنى تعالي نزلت سندس من سيارتها وركبت مع تالين وهي ركبت وسكرت الباب وتالين قفلت الباب من عند التحكم وطبعا السيارة كانت مظلمة
سندس:ليش قفلتي الباب
وواحد كان منطمر في الكرسي الخلفي وقمعز وحط مسدس علي راس سندس
صبي زياد سالم:اتكلمي انفرغ هذا في راسك وهيتي تليفونك هنا
سندس بخوف:شن تبي فيه
سالم بعصبية:قتلك هيتيه
سندس مداته له وغمضلها وربطلها عيونها وتالين طلعت بالسيارة
رانيا شافت تالين وشافت كيف سندس ركبت في السيارة وكيف السيارة مشت بس ماعرفتش شنو اللي صار جوا السيارة لانها كانت مظلمة بس قعدت لاحقتهم
لعند لما وصلو الشارع كان غريب وايخوف والاشكال اللي فيه مخيفة ودرسو قدام حوش كان كبير وقدامه شابين
رانيا طول ماهي في الطريق وهي اترن علي فيصل بتحكيله اللي صار وهو ماايردش لان كان هو وسراج مازال يضاربو
سالم نزل وكلم الشابين وجو ونزلو سندس اللي كانن مغمضات عيونها وماسكينها ومكتفين ايديها وخشت معاها تالين
رانيا درست بعيد منهم شوي ولما شافت هكي انصدمت بس سالم فطنلها وجا جيهة سيارتها وهي طلعت تجري بالسيارة ركب هو ومجموعة في سيارته ولحقها
“””””
#عند_سندس
خششوها للحوش وربطوها في كرسي وفتحولها عيونها ولما شافت لقاته حوش غريب وكله شيش سكير وفيه وحدين مدورخين وفيه اللي ايبز في ابره شكلها مخدرات ومليان شباب
سندس:انا وين ومن انتو
تالين خشت:اهلا بالحلوة
سندس بعصبية:انتي ليش درتي هكي
تالين:اعصابك ياحلوة اهدي وحتفهمي كل حاجة
سندس:انتي شن تبي مني
تالين قمعزت ومدت رجليها عالطاولة اللي قدامها
سندس:نبيك تطلعي من حياتي انا وسراج
سندس;انا طلعت منها وماجيتش شوركم
تالين بعصبية:لا انتي ماطلعتيش ومازلتي في قلب سراج بعد كل اللي درته عشانه مازال ايحبك وزاد ايحبك اخرى بس انا حنخليه يكرهك ويكره اليوم اللي عرفك فيه بعد ايشوفك ميته في وسط كل هالشباب بسسب جرعة مخدر زيادة وطبعا عشان تكمل الخطة فلازم بعد يعطوك الجرعة ايتمتعو بجسمك الحلو عشان لما يعرضوك علي طبيب شرعي يعرفوك انك كنتي اتمارسي في الرذيلة معاهم مش هكي اتقولو رذيله ولا زنى
سندس:انتي كيف اتفكري هكي انتي حقيرة انتي شيطانة مش انسانه
تالين بعصبية قربت منها وعطتها كف وبعدها بعدت منهاو ابتسمت
سندس بعصبية:انت قده اللي درته
تالين:قده ونص السانك الطويل هذا انا اللي حنريح الناس منه اتصدقي متشوقه انشوف ردت فعل سراج بعد يعرف حبيبة قلبه في شنو كانت ادير
سندس:سراج مستحيل ايصدق عليا اي حاجة
تالين:واثقة منه للدرجة هذي
سندس:اكثر ماواثقة في روحي
تالين:ومش خايفة مالموت
سندس:عمري ماخفت منه عشان اقل حاجة بنعيش في مكان مافيش ناس زيك
تالين عصبت:قولي اللي اتقوليه الابرة ايجهزو فيها لكي كلها 5دقايق واتكوني فيه الماكن هذا وانا في الليل بننزف الحبيبك عروسة
سندس رغم كل الخوف اللي فيها مابينتش وقعدت قوية الشيئ اللي استفز تالين بكل
سندس:ممكن قبل ماانموت نعرف كيف خليتي سراج ايطلقني
تالين:مش لازم نحكيلك بس حندير زي مالشرطة لما بتعدم حد تسأله علي اخر امنية في حياته وحنقعد عادلة زيهم وقمعزت عالكرسي وحطت كراع علي كراع وبدت تحكي
(انردو اشوي لليوم اللي عده فيه سراج التالين
سراج بعصبية;وليش اتجي اصلا وانتي عارفة اني حبيت وليش اتوافقي اتساعديني وانتي قلبك معبى هكي
تالين:انا جيت لاني قلت نزوة واتعدي وبذات لما قتلي مازال ماصار بينكم شيئ قلت في عقلك شيئ معين وبتاخذه لاني عارفة هذا تفكيرك بس لما جيت وشفتك كيف اتحبها وكيف متعلق فيها ماقدرتش نسكت وقلت لازم تعرف مشاعري وانا احق منها بيك انا اللي حبيتك الاولى انا اللي مستعدة انحارب العالم عشانك انا ماعنديش الا انت لا ام ولا أب ولا خوت انت ياسراج بس وجت هي وخذاتك مني ومش بس انت عمتو وعمو اللي كانو ايحبوني زي بنتهم جت هي وشاركتني فيهم وخذت حبهم وقعدو ايحبوها حتى اكثر مني وايعاملو فيها انها بنتهم وانها وحدة مالعيلة وطلعتني من قلبكم كلكم ورديت بروحي وماعندي حد وتبيني ماننتحرش انا اكثر وحدة تستحق اتموت لان ماعندهش حد ايدورها وقعدت تبكي?
سراج ضحك:تحسابي روحك بكلامك هذا بتخليني نضعف ونشفق عليك وانسيب سندس عشانك لا ياتالين انا سندس انحبها وهي روحي ومستحيل انتخلى عنها عشان اي حد وانتي ماقالك حد حبيني ولو تبي اتسافري وتنسيني احسن ولو تبي تنتحري ماعنديش مشكلة انتحري بس دوسة مش حنسيبها وجا بيطلع
تالين:وباهي لو نشرت المقطع امتاعكم اللي عندي شنو حدير
سراج لف:اي مقطع
تالين طلعت فونها وحطت عالمقطع ومداته له
سراج قعد ايشوف ومصدوم وماقدرش ايكمل وطلع ومسح المقطع وهجم علي تالين وقعد يخنق فيها
تالين:تحساب بعد مسحته المقطع وتقتلني خلاص حينتهى كل شيئ انا عندي منه اكثر من نسخة ومش عندي عند حد نوثق فيه اكثر من روحي ولو صارلي شيئ حينشره
سراج بعد منها وهو مصدوم;انتي كيف اديري هكي انتي مستحيل اتكوني انسانة انتي شيطان كان في وسطنا
تالين صبت:انا مش شيطان انا حبيتك للموت ومستعدة اندير اي حاجة عشان تقعد ليا وجيتك واعترفتك بحبي وانتي ماخسرت عليا شيئ الا لزيتني مالفيلا وقتلي معش بنشوفك وفي يومها اصلا كنت مخططة نعترفلك بحبي بس لو رفضت حنفذ اللي في راسي وتوا القرار في يدك ياادير كل اللي انقولك عليه بالحرف واطلقها وتجوزني ياننشر المقطع وايكون العالم كله عنده مقطع مراتك مش بس في ليبيا وبعدها لايمها مع هلك وهلها وقول مش انت اللي درت هكي اصلا مش حيصدقك حد لان ماحدش ايخش الحوشك
سراج حط راسه بين ايديه وقعد ساكت
تالين:انا حنخليك اتفكر براحتك وبعد توصل القرار حتلقاني تحت نرجى فيك وطلعت
سراج قعد ايكسر في الدار وايخبط لان حس روحه عاجز ومش قادر ياخذ قرار لان الخيارين كانن زي الموت بالنسبة له
سراج قعد في الدار قريب 5 ساعات وهو ايفكر وتالين برا وبعدها معش قدرت اتحمل وخشت عليه
تالين:لكي 5ساعات اتفكر للدرجة هذي القرار صعب
سراج:مانقدرش انطلقها لو انطلقها انموت
تالين:يبقى اخترت ننشر المقطع
سراج:مش حنخليك تنشريه ولا حنسمح الحد ايشوفه
تالين:خايف عليها ولا خايف علي روحك
سراج:انا اجعني ماانرد بس هي لا سندس اطهر بنت انشوفها في حياتي مش حنخلي شرفها ايتوسخ من وحدة حقيرة زيك سندس عرضي وشرفي اللي مستعد انموت ولا ينداس
تالين:حيرتني شن قررت
سراج قعد يبكي
تالين:قولي شن قررت
سراج يبكي:حندير اللي تبيه
تالين:يعني حطلقها
سراج وقلبه محروق:اها
تالين:قولها قول حنطلقها
سراج بعصبية:مش حتطلع مانقدرش انقولها
تالين:عادي مااتقولهش توا الاهم اتقولها بكرا
سراج بصدمة:شنو
تالين:حنفهمك توا شنو ادير وقعدت اتقوله كيف يصرف وامتى ايطلقها وشنو ايقول الهله وامتى ايقرر يجوزها)
تالين:عرفتي توا ليش طلقك
سندس مصدومة:كيف وصلتي للدار وصورتينا
تالين بسيطة:انا حطيت في راسي الفكرة من يوم اللي مشيتو العشاء ولد عم سراج وخصوصا لما اعتبروك مالعيلة وانا ماحدش عبرني ونفذت ثاني يوم لما كنتو كلكم مش قاعدين وبديت مالصبح من لما كانت الفيلا فاضية عمتو مشت الاختها وانتي في شغلك وعمو وسراج في الشركة وعند عمتو طبع ان اي فيلة او حوش قريب منهم لازم تاخذ نسخة مالمفتاح والطبع هذا قعد فيها من لما انحرقت فيلتنا اللي جنب فيلتهم في المانيا وقلت اكيدة عندها نسخة من مفتاح حوشكم دورت في دارها ماالقيتش ومشيت المكتب عمو القيته خذيته ومشيت الحوشكم وحطيت كاميرا في داركم وكنت عارفة انكم حديرو حاجة لانكم محسوبين كيف اجوزتو وعارفة ان سراج صايع مابالك مع وحدة ايحبها فأكيدة حديرو حاجة ولما روح عالمغرب اعترفتله بحبي وهو لزني وثاني يوم الصبح وقبل مانطلع مالفيلا وانتو كلكم في الشغل رديت خشيت للمكتب وخذيت المفتاح وخشيت للحوش وخذيت الكاميرا والقيت اللي نبيه كله ونقلته علي ديسكات وحطيته عاللابتوب وطلعت وعساس بنسافر وبعدها دزيت رسالة السراج وصار اللي حكيتلك عليه
سندس نزلو دموعها ومش مصدقة كل اللي قاعد ايصير ومش مصدقة ان فيه ناس هكي
تالين:وهكي عرفتي كل حاجة وتوا جهزي روحك للموت
زياد خش:تولي هذي الابرة جاهزة بس فيه مفاجئة لكي وحتخلي الخطة متاعنا تمشي مية في المية
تالين:شنو
زياد:خششوها
وخشو شابين وهما ماسكين رانيا
سندس بصدمة:رانيا شن جابك هنا
تالين:هذي شن جابها
زياد:قضاها وحظنا السمح لانها كانت تلحق في صاحبتها بس بهكي حيكون الموضوع محبوك مية في المية هي وصحبتها جايات الحوش زي هذا وكله شباب ومارسن الجنس معاهم وبعدها خذن جرعة زيادة مالمخدارات وماتن والشباب كلهم حيحكو نفس الكلام هذا
تالين ضحكت:وين سياراتهن
زياد:قدام باب الحوش عشان كل شيئ ايبان طبيعي
تالين:فيه شنطتين فيهن فلوس في سيارتي ووحدة لكي ووحدة وزعها عالشباب اللي بينحبسو عشان مايعترفوش بشيئ
زياد;تأمر ياجميل 5دقايق والابرة لخرى تجهز
تالين:كلها 5 دقايق وتمشن للمكان اللي ايريحكن
بس فيه حاجة صارت وهما مش عالمينها
(تعالو انردو اشوية لعند الوقت اللي قعدو يجرو في جرت رانيا
رانيا كانت اترن علي فيصل ماايردش وبعد عرفت انها وراها وماعندهش وين تهرب منهم كتبت رسالة الفيصل(فيصل تالين خطفت سندس كلم سراج وتعال علي وكتبتله العنوان كله وافطن معاها ناس واجدة ) وقفلت التليفون ودساته تحت كراسي السيارة وبعدها السيارة وقفت قدامها ونزلوها وشالوها للحوش وخذو السيارة وحطوها قدام الحوش
“””
#عند_فيصل_وسراج
بعد اضاربو واجد سراج قرر ينهي المعركة ويحكي اللي صار الفيصل وحكاه له كله
فيصل بصدمة:قصدك مصورتكم
سراج:اها وانا معش قعد اي حل قدامي الا انوافق عاللي تبيه اهم حاجة ان مااتضرش سندس بس
فيصل:وشن عرفك بعد ماتجوزها بتوفي بوعدها وماتنشرش المقطع هذي وحدة حقيرة وتكره سندس مش بعيد ادير هكي عشان تنتقم منها
سراج:معقولة اديرها
فيصل صبى:اديرها وادير اللي اكبر منها صبي نحكو الجدي وعمي محمد وهما حيديرو حل
سراج صبى:هي
فيصل خذا فونه ومفاتيحه اللي كان عازقهن عالكنبة وطلعو وقبل مايركبو شاف الفونه ولقى كل المكالمات من رانيا ولقى الرسالة
فيصل:الحق ياسراج تالين خطفت سندس
سراج:شنووو
فيصل:اهو العنوان توا نمشوله
سراج كر مفاتيح السيارة من فيصل وركب وركب معاه فيصل ووولع وطلع بسرعة جنونية وفيصل مل عليه العنوان وكلم جد سراج وعمو محمد وقاللهم اللي صار وعطاهم عنوان الحوش ولما وصلو للعنوان وشافو سيارة سندس وشافو الشباب اللي قدام الباب
فيصل:كيف بنخشو هذوما اكيدة بسلاحهم ونحن ماامعانا شيئ
سراج:سندس جوا انا لازم انخش وبأي طريقة
فيصل:باهي كيف مش شايف اللي قدام الباب اقل شيئ اصبر اشوية جدي حيصرف وحيجيب معاه الشرطة وايجو هنا
سراج:انا مش حنقدر نستنى الشرطة خايف ايديرولها حاجة هذا اذا مادرولهش اصلا
فيصل:وشنو الراي
سراج:اللي قدام الحوش 2انت انزل واقعد احكي معاهم عساس تسأل علي حد هنا وانا انجي من وراهم ونظرب واحد وانت دغري تمسك لاخر ولو معاهم سلاح ناخذوه
فيصل:تم يانصي معاك عالموت
سراج:عارفك يانصي
فيصل نزل وسراج نزل بعده وقعد ايدور في حاجة يضرب بيها ولقى حديدة خذاها ومشى
فيصل خطم من جنب الشباب
فيصل:السلام عليكم
الشاب;وعليكم السلام
الشاب لاخر:فيه حاجة ياأخ
فيصل:سيارتي عطلت بيا هنا ومعش عرفت شن فيها نبي اي ميكانيكي هنا لو تعرفو
الشاب:مافيش هنا لاميكانيكي لاشيئ
فيصل;وانتو ماتفهموش عالسيارت شيئ
الشاب;لالا
سراج جا من ورا واحد فيهم وظربه بالحديدة علي رسه لين طاح واللاخر طلع مسدس فيصل ضربه علي يده لين طاح منه المسدس وبعدها سراج ضربه بالحديدة وخذو المسدسات اللي معاهم وخشو للحوش ومعش قدر حد ماللي جوا ايتحرك لان سراج وفيصل كانو معاهم المسدسات وخششو اللي لقوهم كلهم قدامهم وخشو للصالة اللي فيها سندس ورانيا وتالين وزياد اللي كان ماسك الابرة ويبي ايبزها السندس
فيصل قعد مصوب عليهم كلهم بالمسدس وسراج ضرب زياد في كراعه بالمسدس لين طاح وجا السندس
سراج بخوف:شن كان بيديرلك
سندس تبكي:كان بيبزلي ابرة مخدرات بس انت لحقتني في اخر لحظة قبل ماايبزها
سراج يبكي:أسف كله بسببي
فيصل:سراج فكهن وتوا تحكو بعدين
سراج;تمام وقعد ايفك في سندس وبعدها فك رانيا
وجا التالين وحط المسدس علي راسها
سراج:قبل كل حاجة انتي طالق بالثلاثة وتوا حنقتلك عشان انتي سبب كل حاجة صارت وانتي اللي فرقتيني منها
فيصل:سراج مااتهورش خليها وتوا اتجي الشرطة وتاخذ جزاتها
سراج:مش حنتريح لين نقتلها
سندس تبكي:لا ياسراج مااتضيعش روحك عشان وحدة زيها
تالين تبكي:احلى ميته انموتها علي يدك
سندس:هذي تبيك تقتلها عشان تنحبس وتنهي حياتك
سراج:انا مش مسامح روحي عاللي درته فيك ومش حنخليها اتعيش بعد كل الايام السود اللي عيشتني وعيشاتك فيهن وجا بيزر عالزناد
سندس جت تجري وبعدت يده وحظناته
سندس تبكي:انا عرفت كل حاجة ومسامحتك بس ماتحرمنيش منك
سراج حظنها زين:انحبك انحبك وعمره ماكان حبي لكي كذبه هذا اللي كان خاطري انقوله بدل كلمة طلاق وقعد يبكي
وفي نفس الوقت خشو الشرطة ومعاهم جد سراج وباته ولمو كل اللي قاعدين ومن ظمنهم تالين وطلعوهم السيارات الشرطة وطلعو معاهم الباقي وقعدو جوا سراج وسندس بس
سراج قرب من سندس وهي كانت منزلة راسها
سراج:أسف عاللي صار كله واسف ان بسببي توجعتي وانقهرتي
سندس:انت ليش درت هكي ليش ماحكيتلي اللي صار كنت فهمتك
سراج:الحقيرة هذي قالتلي لو يعرف حد ننشر المقطع وانا كنت مستعد انموت ولا حاجة زي هذي اتصير
سندس:وليش عاملتني بالطريقة هذي كنت كأنك شخص اخرى
سراج:والله لما كنت نحكي هكي ولما طلقتك كنت انتقطع من جوا بس كنت نبيك تكرهيني عشان تقدري تنسيني بسرعه ومااتألميش
سندس تبكي:بس انا انقهرت وكنت متمنية الموت وكنت مش مصدقة انت اديرلي هكي وكنت حاسة فيه حاجة غلط بس ماحدش فهمني
سراج يبكي:انا اسف ياقلبي بس وحق ربي حتى انا عشت ايام ماحدش عالم باللي بيا مش قادر حتى نشكي الحد وكنت طول الوقت انقول اكيدة كرهتني بس كان خوفي عليك منها اكبر من كل حاجة صارت بس اكثر حاجة كسرتني نظرتك ليا امس تمنيت الموت وقتها ولا انشوف نظرة هكي من عيونك
سراج قرب ومسك ايديها:انتي سامحتيني من قلبك ولا بس قلتي هكي عشان مانقتلهش
سندس تبكي:انا كنت مانبيش انسامحك بكل بس لما عرفت الموضوع وعرفت كيف انت عانيت عشاني وعشان ماننظرش فهمتك والله سامحتك من قلبي
سراج:انحبك انحبك انحبك وكرها شورها وحظنها زيين وبعد حظن طويل بعدها ومسحلها دموعها
سراج:من يوم وغادي معش فيه ادموع معش بنشوف الا الضحكة علي وجك
سندس سكتت
سراج:قولي حاظر
سندس:حاظر
سراج قرب وباسها علي جبينها:ان شاءلله معش انتفرقو بكل
سندس:ان شاءلله وهي خلينا نطلعولهم برا
سراج:هي وطلعو مع بعضهم ولقو المحقق يحكي مع جدهم
المحقق:شكرا واجد لان بفضلكم قدرنا نقبضو علي اكبر عصابة تهريب مخدرات زياد الجن هذا كان مدوخنا وماعندش مكان اساسي كل مكان يقعد فيه يومين ويطلع بس واخيرا مسكناه
جد سراج:الحمدلله الاشكال هذوما اللي بيضيعو البلاد بس دبين فيه ناس شرفاء زيكم مش حينخاف عليها
المحقق:الفضل لكم وياريت اتشرفونا في المركز عشان انكملو التحقيق
جد سراج:حاظر
وطلعو الشرطة كلهم وقعدو قدام الحوش سراج وسندس وفيصل ورانيا وجد سراج وباته
جد سراج ومحمد:الحمدلله علي سلامتكن
رانيا وسندس:الله ايسلمكم
جد سراج:فيصل وسراج لنقنكم رجالة ويقدر الواحد يعبى عليكم
سراج:طالعلك ياجدي
محمد:وفيصل الرجولة مش غريبة عليه من يوم يومه هكي
فيصل:هذا رفيقي ولو ماصبيت معاه مع من بنصبي وبعدين رانيا خطيبتي ونفديها بروحي
محمد:من قال تالين يطلع منها هذا كله
جد سراج:خلاص يامحمد سكرولنا الموضوع هذا وانسوه وهي انروحو مازال ورانا فرح
محمد:فرح من
جد سراج:انت ناسي ان سراج طلق سندس واليوم بنردو انجوزوهم من جديد هذا في حال العروسة كانت موافقة
سراج شافلها:موافقة تجوزيني
سندس نزلت راسها:موافقة بس علي بابا مرات ماايوافقش
جد سراج:فرج شوري كيف ماخليته ايوافق وايخش معانا في الخطة حنخليه ايوافق ايجوزكم توا
فيصل ورانيا:جدي
سراج وسندس:اي خطة
جد سراج ضحك:هيا وتوا نحكيلكم كل حاجة في حوش فرج
ومشو كلهم الحوش فرج وكلموه وروح مالشغل وحكوله كل حاجة صارت مالبداية للنهاية وحكو السراج وسندس الخطة اللي داروها بس لانهم كانو ايحبو بعضهم الموضوع مافرقش معاهم لان هذي بالنسبة الهم احسن خطة اندارت وبعدها طلبو سندس من باتها من جديد بس هالمرة بدون اي خطط وفرج وافق وجابو شيخ قرا فاتحتهم من جديد وقررو ان الفرح ايكون في موعده اليوم في الليل ودغري سراج وفيصل مشو الحوش فيصل عشان ايجهزوه ورانيا وسندس حجزن في كوافير ومشنله وعفوفة علمت الخبر وطارت مالفرحة وقعدو الكل ايجهزو للفرح اللي كان في فيلة جدهم
“”””
#عند_رويدة
كانت تحكي مع امها وحكتلها حالة رؤوف وان مازال قاعد في الدار وماطلعش منها بكل سكرت من امها وهي متضايقة وفكرت في حاجة وحدة وصبت
“””
#عند_أسيل
دق الباب وامها فتحت
ام اسيل:خيرات رويدة شن اخبارك وأخبار معاذ
رويدة:تمام الحمدلله شن اخبارك انتي
أم أسيل:بخير تفضلي خشي
رويدة:معليش مستعجلة بس نبي أسيل عالسريع
ام أسيل;حاظر توا انكلمها لكي وخشت نادتها واسيل استغربت وطلعت
أسيل:اهلين رويدة شن اخبارك
رويدة:بخير ومعليش جيتك من غير اي موعد بس نبيك في موضوع ضروري
أسيل:خير ان شاءلله
رويدة:انتي تحكي مع رؤوف صح
أسيل طبست راسها:لو الموضوع زاعجك انا حنقطع علاقتي معاه واصلا هو له كم يوم قافل فونه
رويدة;رؤوف توا في حاجتك بكل وانتي الوحيدة حتقدري اطلعيه ماللي فيه
أسيل بخوف;كنه
رويدة:رؤوف عرف ان رانيا بتجوز ومن يومها وهو مايحكيش مع حد وحابس روحه في الدار ولو تقدري اتساعديه عديله وطلعيه من حالته
أسيل:وين انعديله
رويدة:في الحوش وانا حنقول الماما ترجاك
أسيل سكتت
رويدة:رؤوف معجب بيك وانتي قريبة منه بكل برغم الفترة القصيرة اللي حكيتوها وفوق هذا كله القدر هو اللي اختارك وحطك في طريقه واكيدة صار هكي عشان سبب معين
أسيل:حاظر انا حنمشيله وحنعرف كيف انطلعه من حالته
رويدة بفرحة:وانا حنكلم ماما توا ترجاك
أسيل:تمام
رويدة مشت وأسيل خشت تلبس
“””
#عند_رؤوف
طبعا مازال حابس روحه في الدار ومايحكيش مع حد بكل
أسيل عطتها رويدة عنوان الحوش ومشت ولما وصلت ودقت الباب فتحلها ام رؤوف
عالية:انتي اسيل صح
اسيل:صح
عالية سلمت عليها:تفضلي جوا بنيتي
وخشت أسيل وقمعزت مع عالية اشوي وحكتلها كيف تعرفو هي ورؤوف علي بعضهم وبعدها ورتها عالية داره وقالتلها اتخش عليه لان هو مايطلعش منها
صبت اسيل ووصلت لعند الدار وفتحتها لقت الدار مظلمة كلها ورؤوف راقد مشت عند الروشن وفتحاته
اسيل:هي رؤوف نوض عندك مستشفى اليوم
رؤوف غطى وجه بالورغان:امي سكري الروشن وخليني نرقد
اسيل جت وحولت الورغان من عليه
أسيل:انا مش امك افتح عيونك وشوفني من
رؤوف فتح عيونه وبصدمة:أسيل انتي شن جابك هنا
اسيل:طلعت من الحلم وجيتك
رؤوف:شايفة ان هذا وقت حناطة
اسيل قمعزت عالسرير:امالا امتى وقت الحناطة وانت لكي كم يوم قافل فونك ومانندريش عليك ومشيت للمستشفى وقالولي لكي كم يوم ماجيت توا معقولة اديرلي هكي
رؤوف:اصلا انتي مش عارفة اللي صار
أسيل:عارفته رانيا بتجوز واذا يعني ربي يسعدها انتو أصلا مافيش امل اتردو البعضكم وطبيعي انها تجوز
رؤوف طبس راسه:بس انا مازال انحبها
أسيل طبست راسها:وانا انحبك
رؤوف شافلها زين وهو مصدوم مالكلمة
أسيل شافتله:ماتستغربش اني فضحت روحي واعترفت ومادسيتش زي اي بنت انا وضعي يفرق كل اللي مريت بيه في حياتي واللي تعرضتله انت الوحيد اللي قدرت اطلعني منه انا اعترفتلك باسوا ما فيا وشفتني في اصعب حالاتي فأكيد مش صعب نعترفلك باللي حاسته تجاهك ممكن حسيته بسرعه بس غيبتك عليا الفترة هذي خلتني انتأكد من مشاعري لانك قعدت جزء مهم في حياتي انا تحسنت بفضلك بس لو انت قعدت هكي حنرد أسوء من قبل انا عارفة انا مش قوية كفاية عشان انتحمل اي شيئ ايصير معايا
رؤوف:أسيل
أسيل:انا جيت اليوم خاطي اني بنقولك اني انحبك كنت بنقولك اني قررت انكمل قرايتي ونبيك اتساعدني انحقق حلمي تقدر اتساعدني عالشيئ هذا ولا نلغي قراري كله وانرد زي ماكنت
رؤوف نزل راسه وسكت
أسيل صبت:انا هكي عرفت الجواب واسفة اني زعجتك وجت بتطلع ورؤوف مسك يدها
رؤوف:امتى بتبدي
أسيل:بتساعدني
رؤوف:اكيدة
اسيل:السنة الجديدة بعد شهرين تبدى
رؤوف:يبقى من توا لازم اتخشي في دورات عشان ايساعدنك
أسيل:بس انا مانعرفش وين هذينا تمشي معايا انشوفوفهن
رؤوف:خلاص استنيني برا اشوية نغسل ونلبس ونطلعو مع بعضنا
أسيل:حاظر وطلعت
رؤوف:قدرتي تقنعيني ياأسيل شكلك انتي قدري وصبى غسل ولبس دبشه وطلع عليها وطلعو مع بعضهم في سيارة اسيل ومشى بيسجلها في دورات
“””””
الساعة 8 م المعازيم كلهم وصلو الفيلة جد سراج اللي كانن التجهيزات فيها ولا اروع من هكي وكانو حتى هل سندس عازمين اقاربهم وطبعا كل الناس مستغربة اللي صار وكيف ايديرو فرح ثاني وماحدش فاهم شيئ بكل
بعد نص ساعة سندس وصلت للفيلا هي ورانيا
كانت سندس زي الملاك بفيلو حلو بكككل وميك اب خيالي واللي كان محليها الابتسامه اللي طالعة من وسط قلبها بعكس فرحها الأول خشت علي موسيقى ملكية لانها فعلا كانت طالعة زي الملكة وقمعزت في المسرح وجنبها صحباتها وقعدو كل مرة جاي حد مالمعازيم ايسلم عليها وايباركلها
“””
#عند_سراج
“””
#يتبع
قولكن شن حيصير في الفرح كله حتلقنه في الجزء الثالث والاخير ماالحلقة الاخيرة ?
الحلقة قسمتها عشان طويلة ومابتش تنزل كلها عالفيس?

گـتـابـتـي Koka Saleh