منحرف وأحببته
#مـنـحـرف_وأحـبـبـتـه
الحـلـقـة(50 والأخيرة?)(الجزء الأول)
گـتـابـتـي #Koka_Saleh
“”””””””””””””””””””””””””
رويدة صبت وهو قعد ماسك فونه وايبعبش فيه مع رنت فون رويدة اللي سيباته قعد اينادي الرويدة ماجتش شاف للفون ولقى اللي اترن رانيا قعد ايشوف للاسم زين وضعف وحب يفتح يسمع صوتها اللي مرايف عليه فتح وحط الفون علي وذنه
رانيا تبكي:قوليلي شنو اندير فيصل توا كلمني وقالي حدد موعد فرحنا مع بابا ولما اعترضت زعل مني وسكر وهو زاعل
رؤوف زادو دقات قلبه ونزلو دموعه:قصدك بتجوزي?
رانيا بصدمة:رؤوف
رؤوف:جاوبيني بتجوزي خلاص
رانيا معش عرفت اترد وسكرت
رؤوف لما رانيا سكرت عزق الفون من يده وقلب الطاوله اللي قدامه باللي عليها كله
رؤوف بعصبية:بالسرعة هذي نست كل شيئ نست رؤوف وحبه الها نست كل حاجة درتها عشانها
رويدة وامها سمعت التخبيط والصوت العالي جن يجرن
عالية بخوف:شن فيه رؤوف شن صاير
رؤوف:بتجوز ياامي رانيا نستني خلاص
رويدة قعدت تبكي:رؤوف هذا حال الدنيا واكيدة مش حتقعد علي ذكراك ديما
رؤوف يبكي:انتي كنتي عارفة ليش ماقلتيلي ليش دسيتي عليا انها حبت وانخطبت وتبي تجوز
رويدة;حكيتلك كم مرة ان مافيش نصيب بينكم لازم تقتنع خلاص
رؤوف قمعز عالارض وحط راسه بين ايديه وقعد يبكي:شنو بننسى بننسى حبي الها ولا اسنيني معاها ولا بننسى اصلا اني مش قادر ننساها معقولة توا انتهى كل شيئ وبتقعد الراجل اخرى بتقعد حلاله ومعاه معقولة قادرة اتخيل روحها مع غيري انا مش قادر انشوف غيرها معايا ليش دارت هكي ليش قهرتني وقعد يبكي زي العيل الصغير جاته رويدة وحظناته وقعدت تبكي معاه وبعد اشوي رؤوف فطن الروحه وصبى ومن غير ولا كلمة خش الداره وقغل علي روحه تمدد علي سريره وقعد يذكر في شريط حياته مع رانيا وكل كلامها اللي كانت تحكي فيه له وان مش حتكون الغيره صبى وفتح اللاب توب متاعه وحط علي صور رانيا اللي عنده وصوره وهو وياها في الجامعة وفي حوشهم بعد اتجيهم وقعد يذكر في كل لحظة وفي كل كلمة كانت في اللحظات هذينا
“””
#عند_سراج
وعالمغرب تحديدا كان في الشقة ودق الباب طلع وفتح واستغرب لما لقى جده جاية في الشقة
سراج بإستغراب:جدي
جد سراج:اها جدك شن حالك
سراج:تمام الحمدلله شن اخبارك انت
جد سراج:الحمدلله ماتبيش اتقولي خش ولا شنو
سراج:معليش مالصدمة بس تفضل ياجدي
خش جد سراج وسراج وقمعزو في الصالة
جد سراج:كنك معش جيت للفيلا ولا جيتني
سراج:انتو لزيتوني
جد سراج:وعارف عليش درنا هكي
سراج:باتي كل مرة ايهددني يمنعني من ثروته عشان انديرله اللي نبيها بس توا خلاص انا معش ايهمني شيئ ولا اتهمني كل ثروته وفلوسه واملاكه
جد سراج:باتك يبي مصلحتك
سراج:انا عارف مصلحتي وين كويس
جد سراج:ومعقولة مصلحتك اتكون انك تجوز البنت هذي
سراج:اها مصلحتي اني نجوزها
جد سراج:وليش بتجوزها
سراج:عشان انحبها
جد سراج:انت لو اتمثل وتكذب عالدنيا كلها انا ماتقدرش تكذب عليا انت البنت مااتحبهش بس فيه حاجة صايرة انا معش فهمتها احكيلي اللي صاير
سراج:مافيش شيئ صاير انا بس انحبها ونبي انكمل عمري امعاها
جد سراج:بس انا مش مقتنع بيه الكلام هذا
سراج جا بيحكي
مع طلعت تالين من دارها ولابسه بيجامه وشكلها كانت راقدة
تالين انحرجت بعد شافت جد سراج
تالين:أسفة وخشت الدارها
جد سراج بصدمة:البنت هذي شن جيبها معاك هنا
سراج:ماعندهش وين تمشي بنخليها في الشارع جبتها معايا للشقة
جد سراج:قريت فاتحتها ولا قاعدة معاك هكي وخلاص
سراج:لا قرينا فاتحة لا شيئ
جد سراج بعصبية:الكلام هذا حرام وماايصيرش منه وبذات ان البنت تبي تجوزها غلط عايش معاها هكي بالحرام
سراج;انا قلتلكم بنجوزها انتو رفضتو
جد سراج:انا موافق وانا اللي حنجوزك وانديرلك فرح كبير اخرى بس بشرط
سراج:وشنو الشرط
جد سراج:تمشو معايا توا للفيلا وتقعدو غادي وبعد انحددو موعد الفرح وتجوزو اتعيشو معايا في الفيبلا انت عارف عمك شرا فيلا وبيطلع وانا بنقعد بروحي ونبي حد ايونسني
سراح:تمام موافق
جد سراج:اسألها مرات ماتبيش تسكن مع شايب زيي
سراج:لا ماعليك هي موافقة علي اي حاجة انوافق عليها
جد سراج:معناها صبي وتو دبشكم وهي معايا بس ايكون في علمك في الفيلا حيقعد كل واحد في دار لين تجوزو
سراج:تمام موافق بس كيف بدير في باتي
جد سراج:باتك شوري ماعليك فيه انا حنعرف نقنعه
سراج:تمام وخش علي تالين وحكالها كلام جده وهي وافقت اتعيش معاه ولمو دبشهم وطلعو مع جد سراج ومشو الفيلته وغادي عطى الكل واحد دار وقعدو ايخططو التفاصيل الفرح
“”””
#مرن_أربع_أيام
دوسة مازال في مصر تحسنت اشوي عن اول ايام وقدرت تسوعب اشوي اللي صار بس طبعا الشيئ اللي صار دارلها خلل في نفسيتها وماخلاها اترد زي قبل وقعدت طول الوقت اتميل للسكوت والعزلة أكثر شيئ
رانيا وفيصل مازال متعاركين وفيصل معش حكى مع رانيا بكل حتى في المشروع قعد مايحكش معاها واشبه بأن يستكرد فيها ورانيا عارفة انها غلطانة بس ماقدرتش تحكي معاه شن بتقوله وهي رافضة فكرة الفرح توا وقعدو ايعاملو في بعضهم بالمثل
رنا مش قادرة اتحمل حركات صالح ولا نظرات ابلاتها ولا كلام البنات وقررت انها بس يكملن الامتحانات بتنقل مالمدرسة بكل
رؤوف بعد عرف جواز رانيا قريب صارله اكتئاب وردت بيه الحالة اللي قبل وقعد طول الوقت في داره ومايطلعش منها بكل حتى الوكال ياكل بروحه في داره وحتى للمستشفى معش مشى وفونه قافلة وطول هالايام واسيل تتصل ومااتحصلش فيه ومشت للمستشفى وعرفت ان معش جا ومافهمت شن صار معاه وفي نفس الوقت ماقدرتش تسأل رويدة عليه بسبب اللي صار بينهن من قبل وخايفة اتكون رويدة مازال شايلة منها ولو تعرف انها تحكي مع رؤوف تعترض واتقوللها شيئ ايزعلها
اما بالنسبة السراج فجده في اليوم الرابع قرا فاتحته سراج علي تالين وقعدو شرعا متجوزين وقعدو ايجهزو للفرح اللي حيكون بعد يومين اما عمو محمد وعفوفة فكانو واخذين موقف ومعترضين عالزواج
“””””
اليوم الخامس في الصبح وتحديدا الساعة 9ص وكانت عند رنا الحصة الثالثة وقريب تكمل وكانت الحصة حصة كيمياء وبعد الابلة كملت شرح
أبلة ليلى:بنات انا عندي موضوع مهم بنحكيه واعتبرني زي اختكن الكبيرة او امكن
الطالبات:شنو ياابلة
ابلة ليلى:فيه حاجات ايصيرن في المدرسة غلط ومع طالبات انا ماكنتش متوقعه منهن هكي بس انا نبيهن ايفكرن في سمعتهن وفي سمعة هلهن ومستقبلهن لان اللي ايصير بياثر عليهن
شيماء:من تقصدي بكلامك ياابلة وشافت الرانيا
ابلة ليلى:هي عارفة روحها بس انا عارفة هي مازال مراهقة واكيدة ضاحك عليها بكلام بس اللي هي مش عارفته ان الابلات والاساتذة قعدو كلهم ايلاحظو وفيه ابلة حاطتها في راسها انا بجد خايفة عليها ومانبيهش اتضرها
رانيا سكتت ونزلت راسها وماردتش ولا كلمة لان عمرها ماتعودت اترد في وجه أبلة كانت بنت هادية بككل
مع رنت الجرس ووقت استراحة الفطور
ابلة ليلى:انتمنى رسالتي وصلت وتقدرن تطلعن تفطرن توا
البنات طلعن ورنا قعدت هي وتنسيم في الفصل
تنسيم:رنو مااتعدلي علي حد انتي اهم حاجة عارفة روحك وعارفة ان هو اللي ايلاحق فيك
رنا تبكي:بس ماحد فاهم هكي كلهم يحسابوني انا دايرة معاه علاقة
تنسيم:معناها لازم اتوقفيه عند حده
رنا:حكيتله الف مرة مايفهمش بس انا احسن حل انديره ننقل مالمدرسة بكل
تنسيم:معقولة اتسيبيني رنو
رنا:انقلي معايا لو حابة بس انا معش نقدر نقعد هنا نرجى بس في الامتحانات يكملن
تنسيم:اذا هكي اتريحي ديريها بس هي نطلعو نفطرو
رنا:لالا خلينا نفطرو هنا انا ماعنديش جو نطلع
تنسيم:خلاص نطلع نشري عصير مالمقصف وانجيك
رنا:باهي وتنسيم طلعت
صالح مصبي في الساحة وكالعادة يرجى في رنا تطلع مع طلعت أبلة فيروز للساحة
فيروز:استاذ صالح واخيرا القيتك من بدري اندور فيك
صالح:ان شاءلله خير ليش ادوري فيا
فيروز:فيه موضوع بنحكيه لكي
صالح:تفضلي نسمع فيك
فيروز:لا مش هنا تعال في مكتبي اشوية
صالح:تمام تفضلي وخشو ومشو المكتب ابلة فيروز بس فيه عين شافتهم ولحقتهم?
فيروز:تفضل قمعز
صالح:تفضلي احكي كلامك عشان مستعجل
فيروز:انا سمعت انك مش خاطب ولا متجوز
صالح كيف اللي فهم عليها وعرف اللي بتحكيه لان مار عليه الكلام هذا واجد
صالح:واذا يعني شنو المشكلة
فيروز:بالعكس مش مشكلة هي حاجة كويسة بالنسبة ليا طبعا
صالح يستعبط:كيف يعني
فيروز:انا زيك لا مخطوبة ولا متجوزة والحق يااستاذ انا من اول ماجيت للمدرسة وانت عاجبني اكيدة اتقول غريبة بنت تجرا وتحكي الكلام هذا الشاب بس بجد انا من كثر ماسحرتني وخذيت قلبي وقعدت طول الوقت انفكر فيك قلت لازم انصارحك ونحكيلك
صالح:شنو بتحكيلي شنو المطلوب مني توا
فيروز:طالبة انتعرفو علي بعضنا فترة ونعرفو اطباع بعضنا وانا متاكدة انك حتحبني ومااتفكرش في فرق العمر اللي بينا حتى الرسول وهو افضل الناس خذا وحدة اكبر منه يعني الموضوع عادي
صالح:فرق العمر مش مهم ونفس ماقلتي حتي الرسول افضل الناس خذا اكبر منه بس القصة اني انا مش حنوافقك علي طلبك لان فيه بنت في حياتي وانحبها
فيروز:رنا صح
صالح:ايوا رنا وانحبها ونبي نخطبها اسف معليش وطلع وسيبها
شيماء كانت عند الباب وسمعت كل حاجة ودغري مشت تجري للفصل لقت نص البنات فيه وطبعا من ضمنهن رنا لانها ماطلعتش بكل
شيماء جت تجري وصبت عند الباب
شيماء بصوت عالي:اسمعن اخر خبر يابنات
البنات كانن ايهدرزن وفي لحظة كلهن سكتن
شيماء;ابلة فيروز توا خذت استاذ صالح في مكتبها واعترفتله انها اتحبه وانها تبي اتعرف عليه واتخليه ايحبها
البنات شهقن:طاح سعدها
شيماء:تخيلن اتقوله مااتفكرش في قصة العمر حتى الرسول اجوز وحدة اكبر منه
فاطمة:وهو شن قاللها
شيماء تضحك:قاللها انحب وحدة اخرى ونبي نخطبها
وكل البنات شافن الرنا وقعدن يضحكن
شيماء:يابختك يارنو دايرة علاقة مع واحد طرف وايحبك اخرى
رنا بعصبية:انا مش دايرة معاه علاقة ولا نبيه
مع خشت ابلة فيروز
فيروز بعصبية:رنا تعالي المكتبي نبيك
رنا بخوف:شن فيه
فيروز بعصبية;قتلك تعالي المكتبي وطلعت ورنا طلعت وراها ووصلن للمكتب
فيروز:امسكي ومدتلها الورقة
رنا:شنو هذي
فيروز بعصبية:هذا استدعاء الولي أمرك لازم ايجي ويعرف كل اللي اديري فيه
رنا:بس انا مش دايرة شيئ
فيروز بعصبية:كل اللي اديري فيه مع صالح ومش دايرة شيئ شن تحسابينا مغفلين ولا عمي انتي مش محترمة ولا متربية ولازم انكلمو باتك ونحكوله كل حاجة عشان ايربيك من اول وجديد
رنا تبكي:معليش ياابلة مانسمحلكش اتشككي في تربيتي وانا والله مادرت حاجة ولا دخلني بيه هو اللي يلحق فيا
فيروز بعصبية:علي شنو بيلحقك انتي شن تحسابي روحك وبعدين انا مش جاية اناقش فيك بكرا اتجيبيلي باتك وخليه يعرف بنته علي حقيقتها وتوا اطلعي برا ومعش بنشوف وجك الا مع باتك
رنا تبكي وطلعت
تنسيم لما ابلة فيروز جت معصبة وكلمت رنا دغري عدت الصالح وحكتله لانها عارفة انها حاطة رنا في راسها وبذات ان صالح رفضها ودغري صالح جا المكتب فيروز وهو وصل ورنا طالعة تبكي
صالح بعصبية;كنك وهذي شن دارتلك
رنا بعصبية:خطاني اطلع من طريقي كرهتني في المدرسة وفي حياتي وشوهتلي سمعتي
صالح:انا درتلك هذا كله
رنا تبكي:البنات والابلات والاساتذة كلهم يحسابوني دايرة معاك علاقة ويحكو عليا وماحد فاهم شيئ وبسببك هذا استدعاء البابا تقدر اتقولي شنو انقوله توا
صالح: لوكان عاللي فاهمينه انا توا حنفهمهم كل حاجة وحنقوللهم ان انا اللي انحبك ونلحق فيك وانتي مالكيش ذنب في شيئ
رنا بعصبية:مانبيكش تحكي مع حد اطلع من حياتي بس ولا انقولك انا اللي حنحول مالمدرسة كلها ونفتك منك وجت بتمشي
صالح:مافيش داعي انا اللي حنحول ومش حنزعجك مرة ثانية انا اسف اني سببتلك هذا كله انا درت هكي بس لاني حبيتك بس حنطلعك من قلبي عشان انريحك
رنا:يقعد احسن بكل ومشت وسيباته
صالح خش علي مكتب فيروز
صالح بعصبية:شنو اللي درتيه هذا
فيروز:لحقت وصلتلك الخبر?
صالح:ماوصللي حد شيئ انا جاي انقولك انك فاهمة غلط وانا رنا مااتحبنيش ولا عاطيتني اي وجه انا اللي جيت للمدرسة هذي عشانها وعشان نوصل القلبها لاني انموت فيها بس هي ماحبتنيش وباتها وهلها عارفين الشيئ هذا وعارفين اني انحبها ومش حديري شيئ بإستدعاء باتها لاني ماشيله وحكيله اني انحبها بس هي اللي رافضتني
فيروز بصدمة:وليش مقلل كرامتك للدرجة هذي
صالح:عشان انحبها انا مرن في حياتي بنات بعدد شعر راسي مافيش وحدة خذت قلبي الا هي حبي الها من هي صغيرة وكبر معايا بس حبي الها سببلها مشاكل واجد وانا عشان اللي سببته الها كله توا بنسيب المدرسة كلها لكن قبل مانطلع بتمشي توا تاخذي ورقة الاستدعاء اللي عطيتيها الها
فيروز;لا مش واخذتها وبكرا بتجيبلي باتها
صالح بعصبية وخطب بيده علي مكتبها:اسمعي انتي لعند توا اتشوفي في الوجه الكويس مني مازال ماشفتيش الوجه لاخر ولو مش حابه اتشوفيه تمشي تاخذي الاستدعاء والا ونقسملك بربي اندمك عاليوم اللي قعدتي فيه أبلة سمعتي كلامي صح وعقلك في راسك يأابلة وطلع وخبط الباب وراه بالقوة
(وطبعا اللي حكاه ان باتها وهلها عارفين كان كذبة بس عشان ايخوفها)
فيروز قمعزت وخافت منه لانها شافت الشر اللي في عيونه ودغري طلعت الفصل رنا وخذت ورقة الإستدعاء وطبعا هو كان مصبي بعيد مالفصل وشافها لما طلعت وفي يدها الورقة اطمن انها خذتها من رنا ودغري بعدها توجه للإدارة واعتذر ان معش يقدر ايكمل امعاهم وروح
“””””
الساعة 12م وتحديدا في حوش سندس كيف وصلو مالسفر وخشو الحوشهم وكانو تعبانين مالوعية بدري والطيارة فكل واحد دوش وخش رقد وبعدها وعيو قصاد الغداء تغدو وفرج مشى الشغله وسندس وامها قعدن ايلمن في الحوش وبعد كملن الحوسه خشت بتكلم رانيا عشان اطمنها انها روحت ورنت ورانيا ردت
رانيا:دوسة الحمدلله علي سلامتك ياقلبي وحق الله رايفتلك
سندس:الله ايسلمك رنوشة وانا رايفتلك
رانيا:شن جو السفرة انسجمتي فيها
سندس:اها تمام
رانيا:اسمعي كلام في الفون ماينفعش لازم انجيك ونحكو بنعرف اخبارك وعندي كلام واجد لكي وحتى دودي حكيتلها وترجى فيك اتروحي بتجيك
سندس:خلاص تعالن اليوم
رانيا:يعني ماعندكمش حد اليوم عادي انجو
سندس:مافيش حد وبعدين ماما بتمشي الخوالي وانا عنديش جو نمشي تعالن عشان اتخليني نقعد
رانيا:خلاص انشوف دودي وانجوك
سندس:نرجى فيكن وسكرت
عالساعة 4:30 م سعاد مشت الحوش هلها وسندس قعدت ترجى في صحباتها وعالساعة 5م جت رانيا وبعدها دغري رويدة وسلمن وشربن القهوة مع بعضهن وقعدن ايخرفن
رانيا:يعني السفرة قدرت اتغيرلك جوك
سندس:تمام أحسن مالأيام اللي فاتن
رويدة:انا عارفة انك قوية وحتقدري اتعدي المرحلة هذي
سندس:بالعكس يادودي اللي يقعد قوي وايصيرله هكي اتأثر فيه اكثر
رويدة:عليش اتأثري علي واحد طلع كذاب وباعك لان حقير وبيرد الصياعته اللي قبل
سندس:الباين هكي بس يابنات انا لما قعدت بروحي وفكرت حسيت ان فيه حاجة صايرة مع سراج
رانيا:حاجة زي شنو
رويدة:لا حاجة لا شيئ مالاول قتلك ماتعطيش اللي يبيه لين اتأكدي بس انتي ماسمعتيش كلامي
رانيا:دودي اصبري نسمعو وجهة نظر دوسة بلا تركيب
رويدة:دوسة تحكي هكي لانها حانتله ومرايفتله وهي خاطرها ان ايكون فيه عذر وسبب للي داره عشان تقدر اتسامحه
سندس:انا مانبيش انسامحه مهما كان السبب بس انتي ماعشتيش معاه ومش عارفة سراج كيف كان ايعامل فيا مستحيل واحد ايدير هكي يطلع يكذب وماايحبش
رويدة:حبي دوسة انتي لازم تعرفي ان هو واحد حقير وخوان ومعش تذكريله اللحظات الحلوة اذكري بس لما باعك وطلقك وطلع كذاب عشان تكرهيه ومعش اتحنيله بكل عشان انتي حرام اتكوني الواحد زيه انتي تستحقي أحسن من هكي وزي ماايقولو(لا تأسف❌ علي نجمة ? ضاعت منك فالسماء مليئة بالنجوم ? فان لم تكن من نصيبك احداهن❌ فمن يدري فربما من نصيبك القمر)
رانيا:ممكن كلامك صح بس لازم تاخذي في اعتبارك ان سراج اول حب الدوسة واول حب ماتقدريش تنسيه بسهولة
رويدة:انا عارفة انها توا متعذبة ومقهورة بس ضروري مااتفكر في كرامتها وان سراج هانها بلا سبب ومانبيهش تضعف واتسامحه لو حاول ايرجعها
سندس:صدقني سراج خلاص ماضي ومش حنردله لو مات قدامي انتن عارفات كويس كيف ان كرامتي عندي اهم شيئ انا بس فضفضتلكن باللي حاسة بيه
رانيا:يعني انتي توا كويسة وتقدري اتردي دوسة اللي قبل واتردي قوية زي مانعرفوك
سندس:اكيدة انا مقتنعة بحاجة دبين ماما وبابا معايا وانا مافيش شيئ حيكسرني صح اللي داره سراج قهرني بس مش انا اللي نكتئب وانسيب كل حياتي عشان راجل ومقررة من بكرا بنرد للمشروع وانكمله وانحقق حلمي وانفرح بابا وماما بيا
صحباتها فرحن وحظننها
رويدة:نجك ليا هذي دوسة اللي ديما كل مانضعفو تعطينا القوة وحتقعد طول عمرها هكي
رانيا:انتي أحسن وحدة فينا انتي الصديقة الصدوقة والله نحن محظوظات اللي عندنا صاحبة زيك
سندس:توا طمنني عليكن انتن كل وحدة تحكيلي اللي صاير معاها
رويدة:انا حياتي هادية وروتينية بس فيه مفاجأة لكن
رانيا وسندس;شنو
رويدة:أنا حامل?
رانيا وسندس قعدن ايعيطن مالفرحة
رانيا مالفرحة قعدت اتزغرت:لووولوولي واخيرا بنقعد خاله
سندس بفرحة:ناعليا مش مصدقة بيقعد فيه بيبي نلعبو وانكسدو عليه الف مبروك ياقلبي
رويدة:الله ايبارك فيكن
وقعدن يحكن اشوي عالبيبي
رويدة:توا خليكن مالبيبي واحكيلنا انتي ياحنة ليش مش راضية فرحك يطلع
سندس:كيف صار هو فيصل حكى عالفرح
رانيا:فيصل ماشي حاكي مع بابا ومحدد معاه موعد من غير ماايقولي ولما قتله ليش ادير هكي قالي عارفك حترفضي وانا بنقعد معاك في حوش واحد عشان تقدري اتحبيني
رويدة:ومشت الاخت قالتله لو ماتمشيش البابا وتلغي موعد الفرح انا حنلغي الخطبة بكل
سندس:معقولة اديري هكي رنوشة
رانيا:كيف بنطلع الفرح وانتي ظروفك هكي
سندس:بلاش كذب وانا مااتحجيش بيا انا اهو قدامك جوي سمح قولي انتي ليش ماتبيش الفرح يطلع
رويدة:هي جاوبيها
رانيا:انا صح فيصل عاجبني بس انا مازال ماانسيت رؤوف وخايفة لما ايكون راجلي وحلالي انخونه حتى لو في لحظة انفكر فيها في رؤوف وانا مانببش نقعد خاينه نبيه بس ايطول فترة الخطبة لين نقدر ننساه
رويدة:رانيا فيصل معاه حق لما اطولو في فترة الخطبة مش حتنسي رؤوف بس لما تقعدو في حوش واحد حتنسيه زي ماصار مع معاذ بزبط
سندس:انا مع كلام رويدة مش حتنسي رؤوف لين تجوزي فيصل
رانيا:والكارثة لخرى انا رؤوف يسمع بخطبتي وزواجي مني انا ونزلو دموعها
رويدة:وانا قتلك ان تأثر اشوية وبعدها فات الموضوع
رانيا:رؤوف نعرفه كويس مستحيل يعرف حاجة زي هذي وتمشي عادي
رويدة:وانا زيك كنت خايفة ماللحظة هذي واستغربت ان ماتاثرش بس شكله البنت اللي متعرف عليها مهونة عليه او ايكون حبها
رانيا:قصدك رؤوف فيه بنت متعرف عليها
رويدة:اها وحاكي عليها الماما وشكله هكي ناوي يخطبها
سندس:راك هبلتني فهمني شن صار وكيف رؤوف علم من رانيا
وقعدت رويدة تحكيلها في القصة اللي صارت
رويدة:هذا اللي صار كله ورنوشة توا مزعله فيصل وماتحكيش معاه عشان رؤوف اللي قاعد لاهي في حياته ومنسجم
رانيا:مش انا بس مانحكيش مع فيصل حتى هو يستكرد فيا ومايحكيش معايا
سندس:لانك انتي غلطانة الراجل ايحبك وشاريك وفي الوقت هذا صعب تلقي حد ايحبك بجد وراضي بأي حاجة عشان اتكوني معاه
رانيا:انا ماغلطتش هو اللي كان المفروض ايشاورني في حاجة زي هذي
رويدة:هو دار هكي عشان ايحبك ويبيك معاه
سندس:رويدة فوتيها ضاع حب رؤوف غصبن عنها وتوا بتضيع حب فيصل بإرادتها خليها توا لما فيصل ايمل وايسبها الله واعلم بعدها حتلقى حد ايحبها جديات ولا حيصير فيها زي ماصار فيا فكري في كلامنا وعقلك في راسك تعرفي خلاصك يارانيا
(اكيدة كلكن مستغربات ليش رويدة كذبت وحكت هكي لان عارفة كويس لو حكت وضع رؤوف الحقيقي حتخلي رانيا تضعف اخرى واتخرب حياتها بلا فائدة لانها عارفة ان رؤوف ورانيا مش حيكونو البعضهم مرة اخرى)
وقعدن البنات ايخرفن لعند المغرب وعالمغرب جت سعاد من هلها ورويدة كلمت معاذ وروحت ورانيا كلمت باتها وروحت
مشى اليوم هادي ومافيش أحداث تذكر
“””
#صباح_يوم_جديد
ناضت سندس في الصبح وهي مقررة تمشي للمشروع صح قرار زي هذا ماكان ساهل بس هي طول فترة السفر وهي اتحاول اتأقلم نفسها مع وضعها الجديد ولازم اترد قوية زي قبل عشان باتها وامها اللي شايفة حالتهم عشان اللي صاير فيها وخوفها علي باتها وامها كان هو سبب انها ادس حزنها داخلها واترد طبيعية عشان ماايصيرلهم شيئ وهذا هو الانكسار عندها انها تفقد حد منهم لان كانو هما مصدر قوتها
وعت توضت وصلت ودعت دعاء واحد واللي من اول ماصار معاها هكي وهي تدعي فيه
سندس رافعة ايديها الربي?يارب قويني من عندك يارب ماليش غيرك وانت بس اللي عارف اللي في قلبي يارب قويني ونزلو دموعها زي كل مرة وصبت مسحت ادموعها وغيرت دبشها وطلعت لقت باتها وأمها يفطرو
سندس;صباح الخير
فرج وسعاد والفرحة علي وجوهم:صباح النور
سندس قمعزت بتفطر
فرج:خير يابابا وين بتمشي
سندس:بنمشي للمشروع مازال ماكمل وليا فترة مخلية الشغل علي رانيا
فرج:احسن مااديري دوسة ومستقبلك اهم من كل حاجة
سندس:وهذا ليش بنكمل اللي بديته
سعاد:ربي ايكملك بعقلك ويبعد عنك كل اولاد وبنات الحرام
فرج:اللهم امين
فرج:خلاص نفطرو وانشيلك ولما اتكملي رنيلي انجيك
سندس:لا بابا مش داعي انتعبك انا حنمشي في سيارتي
فرج:يعني تقدري اتسوقي ومااتخافيش
سندس:لا خلاص معش انخاف مالسواقة وحنمشي بروحي (وفي عقلها هذي الحاجة الوحيدة اللي دارها سراج كويسة)
كملو فطورهم وبعدها سندس وباتها طلعو وكل واحد ركب في سيارته ومشى الشغله وسعاد قعدت اتلم في حوشها
وصلت سندس للمشروع واول واحد قابلاته فيصل اللي انصدم بعد شافها
سندس:صباح الخير
فيصل ايشوفلها زين:صباح النور
سندس ابتسمت:مش متوقع انجي بعد اللي صار
فيصل:ديما نسمع فيهم يحكو علي شخصيتك وقوتك وشفت اشوي منها بس ماكنتش نحسابك قوية للدرجة هذي وحدة اخرى مكانك ممكن خشت الحالة اكتئاب او اي ازمة نفسية
سندس:اللي ايكون قلبه قريب من ربي ربي مش حيخليه بروحه وحيقويه واللي ايقويه ربي مش حيضعفه اي حد واي مشاكل ايصيرن معاه حيكونن دروس له وحيستفاد منهن وسراج عطاني درس تعلمت منه واجد ومستحيل ننساه
فيصل;انا سراج حرت فيه اول مرة انشوفه هكي
سندس:لو سمحت فيصل مانبيش نحكي عليه وعاللي صار
فيصل:حاظر وهذا من حقك
سندس:رانيا مازال ماجت
فيصل:لا جت وقاعدة جوا
سندس:مازلتو متعاركين
فيصل:لو حكتلك اللي صار اكيدة عارفة من الغلطان
سندس:انا عارفة بس انت يوم اللي هي وافقت اتكون معاك وعدتتها حتكون جنبها ومش حتخلى عليها مهما صار ووعدتها انك اتحمل اي شيئ
فيصل:صح انا وعدتها هكي ومازال عند وعدي وهذا ليش طلبت انطلع الفرح
سندس:حنرد نحكي معاها وحنخليها اتحل المشكلة معاك
فيصل:لا ياسندس انا نبيها اتوافق بقاناعتها ولو ماوافقتش حنلغي مع باتها تحديد الفرح وحنقعدو فترة الخطبة اللي تبيها هي ان شاءلله حتى 10سنين
سندس:للدرجة هذي اتحبها
سراج:ومش حنقدر انحب غيرها بس هي اللي مازال عالقة في ماضي ومش راضية تعطي الروحها فرصة عشان اتحبني
سندس:هي مازال في صراع مابين ماضي وحاظر وهذا اللي مخليها هكي
فيصل:وانا معاها وجنبها لين حبي هو اللي ينتصر علي ماضيها
سندس:ان شاءلله خلاص انا بنخش انشوفها
فيصل:تمام
وخشت سندس علي رانيا وكانت رانيا مقمعزة عالكرسي وماسكة فونها
سندس:سمعتي كلامه
رانيا:سمعته
سندس:اول مابدى يحكي قلت لازم تسمعيه ورنيت عليك عشان تعرفي كيف متمسك بيك
رانيا:والله عارفة ان ايحبني ومتمسك بيا
سندس:يبقى ماتخسريش احسن ماتندمي بعدين
رانيا:خلينا نطلعو وانشوفو الشغل
سندس:هي وطلعن
“””””
الساعة 2 م وتحديدا في حوش هل سندس روح فرج للحوش وخش من غير مايحكي ولا كلمة
سعاد:خير فروجة
فرج:خير
سعاد: الغداء واتي خش اغسل وغير علي ماجت دوسة وانتغدو مع بعضنا
فرج ساكت وماردش
سعاد بخوف:بسم الله كنك وجك ماايتفسرش يافرج اتقول فيه حد ميت
فرج طلع ورقة من جيبه ومدها الها
فرج بعصبية;من هذي وجي ماايتفسرش
سعاد:شنو هذي
فرج بعصبية:هذي ورقة طلاق سندس جتني مالمحكمة
سعاد نزلو دموعها:معقولة وصلها للمحاكم
فرج:وكنه ماايوصلها وهو طلقها عشان ياخذ البنت اللي جت من المانيا
سعاد بصدمة:كيف
فرج بعصبية:سراج الكلب طلع يبي البنت هذي وهذا ليش طلقها وبكرا فرحهم
سعاد;وانت من حكالك الكلام هذا
فرج:قبل ماانسافرو حكيت معاهم وقلتلهم بنرفع قضية ويطلقو رسمي قالولي اصبر ونفهمو من سراج قبل وننصدم اليوم بالورقة اللي جتني في الشغل رقتلي ووجعتني كيف ضحكو عليا لين هو اللي طلق ورنيت علي محمد وقالي انا مانندري علي شيئ وان هو لزه واحرمه من كل حاجة عشان يبي يجوز البنت هذي وقالي الموضوع كله عند باتي ودغري كلمت عمي علي وهو اللي قالي ان حكى مع سراج وطلع سراج يبي البنت هذي وان قرا فاتحتها وبكرا فرحهم
سعاد تبكي:حي عليا شن بيصير في بنتي بعد تعلم
فرج:الفترة هذي مش حنحكولها شيئ نحن ماصدقناها ردت كويسة وبعد مااتعدى المرحلة هذي كلها نحكولها
سعاد تبكي:مانقدرش اندس عليها حاجة هكي
فرج بعصبية:كان هامتك سندس يبقى ادسيها والورقة اللي في يدك تمشي توا تخفيها لين سندس اترد زي ماكانت وبعدها نحكولها
سعاد تبكي:حاظر وخذت الورقة وخشت جوا بدسها
بس طبعا بعد شنو سندس كانت سامعة كل حاجة ووصلت من اول ماباتها قال هذي ورقة طلاق سندس وقعدت مصبية في الباب من غير ماايشوفوها وسمعت كل الكلام وطلعت دغري السيارتها وركبت وهي مصدومة
سندس:سراج وتالين مستحيل اكيدة في حاجة غلط انا متأكدة سراج ماايحبهش فيه شيئ مش مفهوم ولازم نفهمه ومسكت فونها واتصلت بتالين وتالين ردت
تالين:خيرات سندس
سندس:تالين انتي وين
تالين:في فيلة جدو
سندس:لو فاضية بنجيك توا
تالين;فاضية ونرجى فيك
سندس:خلاص جايتك توا وسكرت ودغري طلعت بسيارتها وتوجهت شور فيلة جد سراج ووصلت ونزلت لقت تالين ترجى فيها في الجنان وجتها تالين وسلمت عليها
تالين:تفضلي جوا
سندس:انا مش جاية انتفضل انا جاية بس بنعرف صح اللي سمعته
تالين;قصدك ان انا وسراج بنزوجو
سندس:لا قصدي انكم اتحبو بعضكم
تالين:اها انحبو بعضنا وهذا ليش بنجوزو
سندس:مستحيل سراج ايكون ايحبك سراج يعتبر فيك زي اخته وماعمره قالي كلام غير هكي بس انا متأكدة ان فيه حاجة صايرة وهي اللي خلاته ينكر ان ايحبني وايقرر يجوزك
تالين:والله مافيه حاجة صايرة كل القصة ان انا وسراج انحبو بعضنا من قبل ولان هو كان رافض فكرة الزواج انا سيبته وبعدها ردو الليبيا وحاولت نقطع تواصلي معاه وقعدنا فترة نحكوش مع بعضنا ونحسابو ان انسينا بعضنا لعند لما جيت والقيته متجوز ومن اللحظة هذكي انا وهو اكتشفنا ان حبنا مازال قاعد بس انا معش تحملت انشوفه معاك وقررت نمشي وماانخربش حياته بس بعدها هو كلمني وقالي انرد لان ايحبني وقرر ان نجوزو
سندس:مستحيل سراج يطلع ايحبك كيف ايحبك وهو اللي كلمك عشان اتجي اتساعديه في ان يعرف اني انحبه او لا
تالين:صح هو اللي كلمني وفاجئني باتصاله بعد فترة طويلة ونحن مانحكوش فيها وحكالي ان اجوز وان ايحبك وان يبيني انجي انساعده في ان يعرف لو اتحبيه او لا جيت وكنت مكذبة ومش مصدقة اصلا ان هو اجوز وانصدمت بعد القيته متجوز صح وكان ايمارس في حياته معاك طبيعي وانا بروحي حسيت ان ايحبك صح كنت ننقهر لما انشوفه امعاك بس كان يكفيني ان هو سعيد في حياته ومتريح ولما قررت نمشي جا وحكالي ان مازال ايحبني وان جابني من غادي عشان ايتأكد اذا مازلت انحبه او لا ماقدرتش اندس حبي وقتله اني مازال انحبه بس ماانقدرش انخرب حياتك وقتله بنسافر وهذا السبب اللي خلاكم كلكم تحكو معايا الا هو ماحكش معايا وماطلبش مني نقعد لعند لما مشيت حاول ايوقفني بس انا رفضت وسافرت وبعدها بكم يوم كلمني وقالي ان طلقك وان يبيني انرد عشان نجوزو
سندس تسمع في الكلام ومصدومة وقلبها كان ايدق بسرعة وحاسه ان بيوقف من كثر ماقاعد ايدق بسرعة بس كالعادة رغم المها من جوا الا من برا كانت قوية وتحكمت في دموعها وماخلتهنش ينزلن
سندس بكل قوه:ربي ايهنيكي معاه مع اني مش مصدقة كل اللي حكيته
تالين:انتي مش قادرة اتصدقي لانك اتحبي سراج وكنتي تحسابي ان ايحبك زي مااتحبيه بس الدنيا مش ديما تعطينا كل شيئ نبوه وانتي بنية كويسة وشخصيتك حلوة والف من ايتمناك وصدقيني حتلقي الحب الحقيقي اللي حينسيك سراج وكل حاجة كانت معاه
سندس قعدت اتشوفلها وبعدها لفت ومشت اشوي مع خشت سراج وشافها وطبعا تالين مازال اتشوف فيهم
سندس ماحكتش ولا كلمة ولا ضعفت اكتفت بس بنظره السراج هو فهم شن تقصد من نظرتها اللي كان واضح فيها كيف انها كرهاته وكيف ان انسان خاين وخيب ظنها فيه وبعد نظرتها له مانزلتش راسها زي اي وحدة بالعكس رفعت راسها بكل عزة وشموخ وطلعت من غير مااتحسسه بأي ضعف
سراج نزل راسه:هكي احسن ليا ولكي ولما رفع راسه لقى تالين قدامه وجاته
تالين ودموعها علي خدها:سراج انا انحبك
سراج شافلها زين ومن دون مايحكي ولا كلمة لف وطلع مالفيلا كلها
تالين مسحت دموعها وخشت للفيلا
بس كان فيه حد مصبي في روشن داره وشاف كل اللي صار
جد سراج:كنت متأكد ان فيه حاجة صايرة وفضحاتك نظرتك ياسراج مع خشت الخدامه عليه
الخدامه:دولقتي جت سندس طليقة الاستاذ سراج وقعدت تسأل في الانسة تالين اذا هي وسراج بيحبو بعض
جد سراج:وتالين شن حكتلهاقعدت الخدامة تحكيله في الكلام كله لانها كانت مصبية وتصنت فيهن
الخدامة: وبعدها الاستاذ سراج وصل عالفيلا وراح وماحكش ولا كلمة ودا بقى كل اللي حصل
جد سراج:اسمعي اتفتحيلي عيونك ووذانك كويس وخليك ورى تالين في كل خطوة ولو حكت هي وسراج لازم تسمعي اللي حكوه
الخدامة:حاظر وطلعت
“””
عند سندس طلعت وركبت في سيارتها وطلعت بيها وتباعدت من الفيلا وبعدها معش قدرت اتحمل وقفت سيارتها وقعدت تبكي وتبكي بكل حسرة وقهرة بكت لين طلعت اللي في قلبها من ألم ووجع وبعد حست روحها هدت اشوي دغري مشت للحوش ولما خشت
سندس:خير
سعاد:خيرات دوسة
فرج:ليش تاخرتي وليش قافلة تليفونك
سندس:تاخرنا في المشروع وفوني كان طافي شحن
فرج:خوفتينا عليك
سندس:مااتخافوش انا كويسة واسفة اني ماكلمتش من فون حد عشان انطمنكم
سعاد:خشي غيري واغسلي وتعالي عشان انتغدو مع بعضنا
سندس:تغدو انتو انا سبتقكم في المشروع وتغديت غادي
فرج:بس من بدري نرجو فيك
سندس:شابعة يابابا نقدرش ناكل بنرقد بس لاني تاعبة بكل مالشغل
سعاد:خلاص خشي تريحي مالصبح واعية واكيدة مصبية طول الوقت
سندس:اها تعب بكل وخشت الدارها
سعاد:انصبي انوتي وانتغدى انا وياك
فرج صبى:حتى انا ماعنديش نية بنرقد اشوي ومشى الداره
سعاد:بالك انا عندي نية عطك ادعوة ياسراج انت سبب كل حاجة صايرة
“”””
مر اليوم عادي وسندس غير هي خشتها الدارها كملتها متغطية ودايرة روحها راقدة وهي ماقدرتش ترقد ولا لحظة وكان كلام تالين كله في وذنها وتذكر في كل لحظة مع سراج وكل مااتخش امها بتوعيها اتقوللها تاعبة وبنرقد كانت في سريرها ومتغطية ومكملتها بكى اتصبي بس كل وقت صلاة اتصلي واترد للوضع اللي كانت فيه لعند الساعة 10 هلها خشو رقدو وهي حست روحها متضايقة بكل ومش قادرة حتى اتنفس صبت لبست ملاية الصلاة وخذت المصحف وقعدت تقرا في قرآن
“””
#عند_سراج
الساعة 11روح للفيلا وكان الجو هدوء ومافيش حد واعي دغري رقى الداره وتمدد علي سريره وهو ايفكر وايخمم اشوي وخشت عليه تالين وهي لابسة الفيلو متاع بكرا
تالين;من بدري نرجى فيك اتروح
سراج:شن تبي عليش ترجي فيا
تالين سكرت باب الدار وخشت
تالين بفرحة:شوف الفيلو من بدري لابسته ونرجى فيك اتروح عشان اتشوفه
سراج:تمام شفته
تالين:انا فرحانة سراج ليش انت مش فرحان زيي
سراج:ساد انتي فرحانة انا مش ضروري نفرح
تالين جت وقمعزت جنبه:انت مازال زاعل مني
سراج شافلها بالجنب?وسكت
تالين قربت منه:سراج اللي درته لاني انحبك ولاني عارفة ان الطريقة هذي بس اتخليك تاحذني
سراج:ودرتي اللي تبيها واهو خذيتيني
تالين زادت قربت منه:وفرحانه عشان خذيتك اصلا مش مصدقة ان حلمي تحقق وقعدت مراتك وقربت منه بتبوسه علي شفايفه بس سراج بعدها وصبى
تالين:ليش ادير هكي انا توا مراتك وبكرا فرحنا
سراج:بكرا مش اليوم وتوا اطلعي مالدار
تالين تبكي:لما كنا في الشقة وانحاول انقرب منك اتقولي ماتبيش اترد للحرام وان مازال ماقريت فاتحتك ومازال ماقعدت حلالك بس توا انا حلالك والفاتحة انقرت ليش ماتبينيش انقرب منك
سراج:معقولة مازال ماعرفتي ليش بكل ببساطة عشان مازال انحب سندس ومازال نبيها ومش حنرضى انكون مع غيرها انتي درتي كل حاجة غصبن عني الا حاجتين ماتقدريش تاخذيهن غصبن عني القلب هذا❤واشر علي قلبه واني انقرب منك
تالين صبت وبتحدي:معناها انا هكي حنكمل اللي بديته
سراج قرب ومسك يدها بقوة:اسمعي انا طاوعتك علي كل حاجة ودرت كل اللي تبيه واهو طلقتها وبنجوزك زي ماتبي كله عشان عيون سندس وعشان ماتنظرش بسببك بس والله ياتالين لو اديري اللي حكيتيه وقسما بالله قتلتك علي يدي أنا خلاص بعد خسرتها خسرت كل حاجة ومعش عندي شيئ انخاف عليه وصدقيني مستعد نقتلك وناخذ إعدام بس سندس ماايصيرلها شيئ وطلع و الشر في عيونه وماايشوفش في شيئ قدامه
تالين:ماشي ياسراج زي ماخليتك اطلقها حنخليك تكرهها وطلعت من دار سراج ومشت الدارها
(بس ماداروش حساب ان فيه حد سمعهم
الخدامه كانت تراقب في تالين اللي كانت كل شوي تطلع تسألها سراج جا او لا ولما جا سراج خشتلها وقالتلها ان سراج جا وطلعت تالين ومشت الدار سراج والخدامة كانت اتراقب فيها وجت وراها وصبت عند الباب وقعدت تصنت وسمعت كل حاجة ولما حست ان سراج بيطلع دغري جرت وانطمرت)
“”””
#عند_جد_سراج
قاعد في سريره ويقرا في كتاب وخشت عليه الخدامه تجري
جد سراج:كنك بسم الله
الخدامه:سمعتهم ياحج
جد سراج:شن سمعتي
الخدامة قعدت تحكيله في الكلام اللي سمعاته كله
جد سراج:والله كنت عارف ان تالين وحدة حقيرة ودايرة حاجة بس انا توا لازم نعرف شنو اللي دايرته قبل ماايتم الفرح
الخدامة:انا حعمل ايه دلوقتي
جد سراج:انتي عدي وكملي مراقبتك الها
الخدامة:حاظر وطلعت
جد سراج قمعز علي سريره وقعد ايفكر شنو ايدير وكيف يعرف شنو اللي دايرته تالين
“”
#عند_تالين
حولت الفيلو ولبست بيجامتها ومسكت فونها واتصلت بصديق تعرفه من قبل هو من ليبيا بس كان ايجي هياجة الألمانيا
زياد:اهلا بالعسل كله
تالين;اهلين زياد
زياد:شن جوك تولي
تالين:تمام بكل
زياد:درتي اللي قتلك عليها
تالين:بالحرف الواحد
زياد:وشنو جابتلك نتيجة
تالين:اكيدة ومن كثر ماجابت نتيجة بكرا فرحي اصلا انت فيه حاجة اتقولها ومااتجيبش نتيجة
زياد:مبروك فرحتيني تولي
تالين:بس مازال شيئ واحد انديرو اللي قتلي عليه عشان مراته
زياد:اقتنعتي توا
تالين:مش ناسيها وايحبها وانا لازم انخليه يكرها
زياد:وامتى تبي التنفيذ
تالين:بكرا الصبح عشان ماايجيش الليل الا وهو كارهه ومقتنع بزواجنا مية في المية
زياد:تم بكرا زي ماتبي ايصير بس انتي وفلوسك عشان الشباب
تالين:فلوسي واتيات أهم حاجة سراج ماايحسش بشيئ
زياد:عيب زياد الجن معاكي مش واحد هكي وخلاص
تالين;وانا واثقة فيك
زياد:بكرا الصبح بينا تليفون
تالين:تمام وسكرت
“”””
#عند_جد_سراج
بعد تفكير واجد مسك فونه ورن علي فيصل
فيصل كان كيف بيرقد واستغرب لما لقى اللي ايرن جد سراج ورد
فيصل:خير ياجدي
جد سراج:خير يافيصل شن اخبارك
فيصل:تمام الحمدلله شن اخبارك انت
جد سراج:الحمدلله فيه موضوع بنحكيه لكي
فيصل:خير ان شاءلله
جد سراج:انتو كلكم مستغربين كيف وافقت سراج علي زواجه مالبنت هذي وجبته وقريتله فاتحتها
فيصل:الحق لما حكالي عمي محمد استغربت وقلت مممكن سراج قانعك بحاجة
جد سراج:سراج ماقنعني بشيئ انا اللي مشيتله لعند الشقة والقيتها معاه وماعجبنيش الوضع وقتله مستعد انجوزها لكي بس بشرط تقعدو معايا في الفيلا وهو وافق وعارف انا ليش شرطت الشرط هذا
فيصل:ليش
جد سراج:لاني عارف ان البنت هذي وراها حاجة كبيرة وهي اللي خلاته ايطلق سندس يعني مش ايحبها زي ماقال وكنت لازم انخليهم قدام عيوني عشان انتأكد واليوم تأكدت ان فيه حاجة
فيصل:وانا حاسس هكي بس شنو الحاجة
جد سراج:انا مش عارف شنو الحاجة بزبط بس حنقولك اللي عرفته وقعد يحكيله في اللي صار اليوم كله واللي حكاته له الخدامة
فيصل بصدمة:زعمك شنو اللي الحاجة اللي دايرتها وخلت سراج ايبيع سندس هكي
جد سراج:مش عارف وتوا هذا ايجي دورك
فيصل:شنو المطلوب مني
جد سراج:سراج طلع مالفيلة انت لازم ادوره وتلقاه ومااتسيبش الا لما يحكيلك كل حاجة تقدر ادير هكي
فيصل:كون هاني وانا مش حنطلقه الا لما يحكي كل حاجة
جد سراج:هو شكله متكتم عالموضوع ومتحرص ان ماحد يعرف تقدر اتخليه يحكي
فيصل:لو كلفني عمري حنعرف شنو اللي صاير معاه
جد سراج:تمام ولازم ايتم كل شيئ قبل موعد الزفة
فيصل:حاظر وسكر ومارقدش
ورن علي سراج لقاه مقفل صبى غير دبشه وطلع
يدور عليه واول مكان مشاله الشقة ولان كان معاه نسخة مالمفتاح فتح وخش بس ماكان فيها حد ولان عارف ان سراج ماعندش وين يمشي الا هنا قعد يرجى فيه ايجي
“”””
#عند_سندس
طولت وهي تقرا في قرآن وبعدها حست روحها تريحت صلت ركعتين وجت السريرها وتمددت وهي اتحاول مااتفكرش في شيئ طبعا كانت واعية بدري ومارقدتش بكل ولانها حست براحة بعد القرآن قدرت تهدى وترقد
“””
اذن الفجر وفيصل مازال في الشقة ويرجى في سراج ايروح
“”””
#صباح_يوم_العرس
وتحديدا الساعة 7فيصل نط زي المفجوع
فيصل:شكلي نعست وشاف للساعة لقاها 7وسراج ماجش
فيصل:هذا شكله مش جاي هنا بس وين بيمشي وهو معصب وقعد ساكت وايفكر
فيصل:انا اللي غبي واحد في حالة سراج ومازال ايحب سندس وسيبها غصبن عنه اكيدة بيكون في المكان الوحيد اللي كان شاهد علي حبهم وعاشو فيه كل تفاصيل حياتهم اكيدة توا في حوشك انت وياها ودغري خذا مفاتيح سيارته وفونه وطلع
“”””
#عند_سندس
وعت سندس غسلت وصلت ودعت نفس الدعاء ولبست وطلعت ولقت هلها يفطرو وقمعزت تفطر معاهم وبدون اي كلمة وماحاولش اي حد من هلها يحكي بعد صباح الخير اصلا مش عارفين مايحكو وخافين يحكو اي حاجة ويزرقو باللي عرفوه واللي يحسابو دوسة مش عارفته وبعد الفطور سندس مشت للمشروع وباتها طلع الشغله وامها قعدت اتلم في الحوسه
“””
#عند_فيصل
وصل للفيلا ودرس سيارته ونزل ولقى عمو محمد برا
محمد:صباح الخير
فيصل:صباح النور
محمد:شن صاير ان شاءلله خير جاي من عند الصبح
فيصل:لا خير جاي نبي سراج
محمد:انت عارف سراج عند جده
فيصل:من امس طلع مالفيلا وانا انقول ان جا الحوشه
محمد بعصبية:وعنده وجه ايجي هنا والله انوريه انا قتله يطلع ومعش بنشوف وجه وجا بيمشي للحوش
فيصل وقفه:اصبر ياعمي مااتخربش اللي جاي عشانه جدي علي طلب مني اندير هكي وخليني ماشي زي مااتفقت معاه
محمد:وباتي ليش طلب منك اتجيه
فيصل:عديله وحيقولك كل حاجة بس ماتحكيش شيئ قدام تالين والافضل تحكو برا مالفيلا
محمد:ياساتر باهي تمام حنكلمه في الشركة
فيصل:تمام
محمد:انا ماشي توا سلام
فيصل:سلام ومشى الحوش سراج وقعد ايدق
سراج كان قاعد في داره هو ودوسة ومتمدد علي سريرهم واستغرب الباب اللي دق لان عارف ان ماحدش شافه لما جا للحوش اذا حتى سيارته درسها بعيد مالفيلا عشان ماحدش ايشوفه
صبى وطلع من عند الروشن بيشوف من بس فيصل كان اغضب منه وكان وهو ايدق مركز عالرواشن لان حافظ سراج بصم ولما طلع مالروشن فيصل شافه
فيصل:شفتك افتحلي نبيك احسن ماانعلي صوتي وعمي محمد يعرف انك قاعد هنا
سراج خبط الروشن ونزل فتحله الباب
سراج بعصبية:انت شن جاي تبي هنا
فيصل دفه وخش جوا
سراج سكر الباب:مش قتلك معش فيه صحبه شن جاي تبي عندي
فيصل قمعز:نبيك تحكيلي اللي صار بينك وبين تالين وشنو اللي قالاته لكي الدرجة طلقت سندس وتبي تجوزها
سراج شافله?تالين مادرتش شيئ انا بنجوزها لاني انحبها
فيصل:هه اكذب علي واحد غيري انا لا حافظك صم
سراج بعصبية:سندس طلقتها عشان ماانحبهش
فيصل:كذاااااب
سراج بعصبية:فيصل احترم نفسك احسن مااتشوف شيئ مايعجبكش
فيصل صبى:تبي تضربني ماعندكش مشكلة تعال هنا وانديروها حلبة مصارعة وحتصير حاجة من ثلاثة ياتقتلني يانقتلك ياتحكي اللي صار
سراج:مااتعصبنيش
فيصل:احكي ياسراج
سراج بعصبية:مش حاكي شيئ والحوش خليك فيه انا طالع
فيصل بعصبية سراج وهجم عليه وعطاه بوكس وسراج رده له وقعدو يضاربو الاول مرة في حياتهم
“”””””
#عند_سندس
وتاخرت اشوية عالمشروع وبعدها وصلت ونزلت وتلقتها رانيا
رانيا:صباحو عالحلوين
سندس بحزن والدموع في عيونها:صباح الخير
رانيا بخوف:شن فيه ياقلبي شن صاير معاك
سندس تبكي:بيجوز اليوم مش قادرة حاسة روحي بنموت وظمت رانيا وقعدت تبكي
رانيا خذتها للمكتب وخشت وسكرت الباب وعطت سندس مية وقعدت اتهدي فيها لين هدت
رانيا:احكيلي شن صار ومن بيجوز الحقير هذا
سندس قعدت تحكيلها في الللي سمعاته من هلها والمشيتها التالين حكاته كله
رانيا بعصبية;شن يحساب روحه الحقير هذا بنات الناس لعبة في ايديه واطي اجعنه ايموت ان شاءلله مااتهنى بيه
سندس تبكي:نار يارنوشة في قلبي ومش مصدقة اللي قاعد ايصير حاسة ان فيه حاجة صايرة وان قصة حبه الها كذبة انا متأكدة سراج مستحيل ايحبها انا عارفة كيف كان ايعامل فيها
رانيا:صدقي ياقلبي هذا واحد منحرف تافه شاطر في التمثيل ومثل عليك الحب وانها زي اخته وانتي طيبة صدقتيه بس بعد وصلل للي يبيه سيبك عشان ايرد الحبه القديم اللي ماحد عالم بيه توا هكي صح وضحت القصة وعرفنا ليش طلقك
سندس:المشكلة ماحدش عارف سراج زي ماعرفته ياهو والله سراج مش هكي صح هو كان صايع ومنحرف بس والله تغير مش بس لان حبني تغير لاني قدرت انطلع الانسان اللي جوا توا مرات شاطر ان كذب عليا ومثل الحب بس علي ربي لا هو تقرب من ربي واهتم بصلاته هذا مستحيل ايكون كذب
رانيا:انتي عشان مازال مصدومة تحكي هكي بس بعدين حتعرفي بروحك ان واحد حقير
سندس سكتت
رانيا:شن رايك نطلعو انشوفو الشغل بالك اتغيري جوك اشوي
سندس:هي وصبت مع جيت رساله الفونها ولما شافتها
#يتبع
قولكن شنو فيها الرسالة ومن من وشنو بيصير بعدها كله حنعرفوه في الجزء الثاني مالحلقة ?
بنات الجزء الثاني مالحلقة كتبت منه واجد ومازالي كم حدث ومعش نقدر انكمل نعست بكل انكمله بعدين وانزله لكن بس معش قدرت انركز وخايفة انسرع الاحداث وايجن مش حلوات خلني نرقد وانتريح وبعدين انزله وربي شاهد اني كتبت منه واجد عشان اتكونن مطمنات
اسفة لو فيه لخبطة في الأسماء وأكيد رأيكن ايهمني?
گـتـابـتـي Koka Saleh
الحـلـقـة(50 والأخيرة?)(الجزء الأول)
گـتـابـتـي #Koka_Saleh
“”””””””””””””””””””””””””
رويدة صبت وهو قعد ماسك فونه وايبعبش فيه مع رنت فون رويدة اللي سيباته قعد اينادي الرويدة ماجتش شاف للفون ولقى اللي اترن رانيا قعد ايشوف للاسم زين وضعف وحب يفتح يسمع صوتها اللي مرايف عليه فتح وحط الفون علي وذنه
رانيا تبكي:قوليلي شنو اندير فيصل توا كلمني وقالي حدد موعد فرحنا مع بابا ولما اعترضت زعل مني وسكر وهو زاعل
رؤوف زادو دقات قلبه ونزلو دموعه:قصدك بتجوزي?
رانيا بصدمة:رؤوف
رؤوف:جاوبيني بتجوزي خلاص
رانيا معش عرفت اترد وسكرت
رؤوف لما رانيا سكرت عزق الفون من يده وقلب الطاوله اللي قدامه باللي عليها كله
رؤوف بعصبية:بالسرعة هذي نست كل شيئ نست رؤوف وحبه الها نست كل حاجة درتها عشانها
رويدة وامها سمعت التخبيط والصوت العالي جن يجرن
عالية بخوف:شن فيه رؤوف شن صاير
رؤوف:بتجوز ياامي رانيا نستني خلاص
رويدة قعدت تبكي:رؤوف هذا حال الدنيا واكيدة مش حتقعد علي ذكراك ديما
رؤوف يبكي:انتي كنتي عارفة ليش ماقلتيلي ليش دسيتي عليا انها حبت وانخطبت وتبي تجوز
رويدة;حكيتلك كم مرة ان مافيش نصيب بينكم لازم تقتنع خلاص
رؤوف قمعز عالارض وحط راسه بين ايديه وقعد يبكي:شنو بننسى بننسى حبي الها ولا اسنيني معاها ولا بننسى اصلا اني مش قادر ننساها معقولة توا انتهى كل شيئ وبتقعد الراجل اخرى بتقعد حلاله ومعاه معقولة قادرة اتخيل روحها مع غيري انا مش قادر انشوف غيرها معايا ليش دارت هكي ليش قهرتني وقعد يبكي زي العيل الصغير جاته رويدة وحظناته وقعدت تبكي معاه وبعد اشوي رؤوف فطن الروحه وصبى ومن غير ولا كلمة خش الداره وقغل علي روحه تمدد علي سريره وقعد يذكر في شريط حياته مع رانيا وكل كلامها اللي كانت تحكي فيه له وان مش حتكون الغيره صبى وفتح اللاب توب متاعه وحط علي صور رانيا اللي عنده وصوره وهو وياها في الجامعة وفي حوشهم بعد اتجيهم وقعد يذكر في كل لحظة وفي كل كلمة كانت في اللحظات هذينا
“””
#عند_سراج
وعالمغرب تحديدا كان في الشقة ودق الباب طلع وفتح واستغرب لما لقى جده جاية في الشقة
سراج بإستغراب:جدي
جد سراج:اها جدك شن حالك
سراج:تمام الحمدلله شن اخبارك انت
جد سراج:الحمدلله ماتبيش اتقولي خش ولا شنو
سراج:معليش مالصدمة بس تفضل ياجدي
خش جد سراج وسراج وقمعزو في الصالة
جد سراج:كنك معش جيت للفيلا ولا جيتني
سراج:انتو لزيتوني
جد سراج:وعارف عليش درنا هكي
سراج:باتي كل مرة ايهددني يمنعني من ثروته عشان انديرله اللي نبيها بس توا خلاص انا معش ايهمني شيئ ولا اتهمني كل ثروته وفلوسه واملاكه
جد سراج:باتك يبي مصلحتك
سراج:انا عارف مصلحتي وين كويس
جد سراج:ومعقولة مصلحتك اتكون انك تجوز البنت هذي
سراج:اها مصلحتي اني نجوزها
جد سراج:وليش بتجوزها
سراج:عشان انحبها
جد سراج:انت لو اتمثل وتكذب عالدنيا كلها انا ماتقدرش تكذب عليا انت البنت مااتحبهش بس فيه حاجة صايرة انا معش فهمتها احكيلي اللي صاير
سراج:مافيش شيئ صاير انا بس انحبها ونبي انكمل عمري امعاها
جد سراج:بس انا مش مقتنع بيه الكلام هذا
سراج جا بيحكي
مع طلعت تالين من دارها ولابسه بيجامه وشكلها كانت راقدة
تالين انحرجت بعد شافت جد سراج
تالين:أسفة وخشت الدارها
جد سراج بصدمة:البنت هذي شن جيبها معاك هنا
سراج:ماعندهش وين تمشي بنخليها في الشارع جبتها معايا للشقة
جد سراج:قريت فاتحتها ولا قاعدة معاك هكي وخلاص
سراج:لا قرينا فاتحة لا شيئ
جد سراج بعصبية:الكلام هذا حرام وماايصيرش منه وبذات ان البنت تبي تجوزها غلط عايش معاها هكي بالحرام
سراج;انا قلتلكم بنجوزها انتو رفضتو
جد سراج:انا موافق وانا اللي حنجوزك وانديرلك فرح كبير اخرى بس بشرط
سراج:وشنو الشرط
جد سراج:تمشو معايا توا للفيلا وتقعدو غادي وبعد انحددو موعد الفرح وتجوزو اتعيشو معايا في الفيبلا انت عارف عمك شرا فيلا وبيطلع وانا بنقعد بروحي ونبي حد ايونسني
سراح:تمام موافق
جد سراج:اسألها مرات ماتبيش تسكن مع شايب زيي
سراج:لا ماعليك هي موافقة علي اي حاجة انوافق عليها
جد سراج:معناها صبي وتو دبشكم وهي معايا بس ايكون في علمك في الفيلا حيقعد كل واحد في دار لين تجوزو
سراج:تمام موافق بس كيف بدير في باتي
جد سراج:باتك شوري ماعليك فيه انا حنعرف نقنعه
سراج:تمام وخش علي تالين وحكالها كلام جده وهي وافقت اتعيش معاه ولمو دبشهم وطلعو مع جد سراج ومشو الفيلته وغادي عطى الكل واحد دار وقعدو ايخططو التفاصيل الفرح
“”””
#مرن_أربع_أيام
دوسة مازال في مصر تحسنت اشوي عن اول ايام وقدرت تسوعب اشوي اللي صار بس طبعا الشيئ اللي صار دارلها خلل في نفسيتها وماخلاها اترد زي قبل وقعدت طول الوقت اتميل للسكوت والعزلة أكثر شيئ
رانيا وفيصل مازال متعاركين وفيصل معش حكى مع رانيا بكل حتى في المشروع قعد مايحكش معاها واشبه بأن يستكرد فيها ورانيا عارفة انها غلطانة بس ماقدرتش تحكي معاه شن بتقوله وهي رافضة فكرة الفرح توا وقعدو ايعاملو في بعضهم بالمثل
رنا مش قادرة اتحمل حركات صالح ولا نظرات ابلاتها ولا كلام البنات وقررت انها بس يكملن الامتحانات بتنقل مالمدرسة بكل
رؤوف بعد عرف جواز رانيا قريب صارله اكتئاب وردت بيه الحالة اللي قبل وقعد طول الوقت في داره ومايطلعش منها بكل حتى الوكال ياكل بروحه في داره وحتى للمستشفى معش مشى وفونه قافلة وطول هالايام واسيل تتصل ومااتحصلش فيه ومشت للمستشفى وعرفت ان معش جا ومافهمت شن صار معاه وفي نفس الوقت ماقدرتش تسأل رويدة عليه بسبب اللي صار بينهن من قبل وخايفة اتكون رويدة مازال شايلة منها ولو تعرف انها تحكي مع رؤوف تعترض واتقوللها شيئ ايزعلها
اما بالنسبة السراج فجده في اليوم الرابع قرا فاتحته سراج علي تالين وقعدو شرعا متجوزين وقعدو ايجهزو للفرح اللي حيكون بعد يومين اما عمو محمد وعفوفة فكانو واخذين موقف ومعترضين عالزواج
“””””
اليوم الخامس في الصبح وتحديدا الساعة 9ص وكانت عند رنا الحصة الثالثة وقريب تكمل وكانت الحصة حصة كيمياء وبعد الابلة كملت شرح
أبلة ليلى:بنات انا عندي موضوع مهم بنحكيه واعتبرني زي اختكن الكبيرة او امكن
الطالبات:شنو ياابلة
ابلة ليلى:فيه حاجات ايصيرن في المدرسة غلط ومع طالبات انا ماكنتش متوقعه منهن هكي بس انا نبيهن ايفكرن في سمعتهن وفي سمعة هلهن ومستقبلهن لان اللي ايصير بياثر عليهن
شيماء:من تقصدي بكلامك ياابلة وشافت الرانيا
ابلة ليلى:هي عارفة روحها بس انا عارفة هي مازال مراهقة واكيدة ضاحك عليها بكلام بس اللي هي مش عارفته ان الابلات والاساتذة قعدو كلهم ايلاحظو وفيه ابلة حاطتها في راسها انا بجد خايفة عليها ومانبيهش اتضرها
رانيا سكتت ونزلت راسها وماردتش ولا كلمة لان عمرها ماتعودت اترد في وجه أبلة كانت بنت هادية بككل
مع رنت الجرس ووقت استراحة الفطور
ابلة ليلى:انتمنى رسالتي وصلت وتقدرن تطلعن تفطرن توا
البنات طلعن ورنا قعدت هي وتنسيم في الفصل
تنسيم:رنو مااتعدلي علي حد انتي اهم حاجة عارفة روحك وعارفة ان هو اللي ايلاحق فيك
رنا تبكي:بس ماحد فاهم هكي كلهم يحسابوني انا دايرة معاه علاقة
تنسيم:معناها لازم اتوقفيه عند حده
رنا:حكيتله الف مرة مايفهمش بس انا احسن حل انديره ننقل مالمدرسة بكل
تنسيم:معقولة اتسيبيني رنو
رنا:انقلي معايا لو حابة بس انا معش نقدر نقعد هنا نرجى بس في الامتحانات يكملن
تنسيم:اذا هكي اتريحي ديريها بس هي نطلعو نفطرو
رنا:لالا خلينا نفطرو هنا انا ماعنديش جو نطلع
تنسيم:خلاص نطلع نشري عصير مالمقصف وانجيك
رنا:باهي وتنسيم طلعت
صالح مصبي في الساحة وكالعادة يرجى في رنا تطلع مع طلعت أبلة فيروز للساحة
فيروز:استاذ صالح واخيرا القيتك من بدري اندور فيك
صالح:ان شاءلله خير ليش ادوري فيا
فيروز:فيه موضوع بنحكيه لكي
صالح:تفضلي نسمع فيك
فيروز:لا مش هنا تعال في مكتبي اشوية
صالح:تمام تفضلي وخشو ومشو المكتب ابلة فيروز بس فيه عين شافتهم ولحقتهم?
فيروز:تفضل قمعز
صالح:تفضلي احكي كلامك عشان مستعجل
فيروز:انا سمعت انك مش خاطب ولا متجوز
صالح كيف اللي فهم عليها وعرف اللي بتحكيه لان مار عليه الكلام هذا واجد
صالح:واذا يعني شنو المشكلة
فيروز:بالعكس مش مشكلة هي حاجة كويسة بالنسبة ليا طبعا
صالح يستعبط:كيف يعني
فيروز:انا زيك لا مخطوبة ولا متجوزة والحق يااستاذ انا من اول ماجيت للمدرسة وانت عاجبني اكيدة اتقول غريبة بنت تجرا وتحكي الكلام هذا الشاب بس بجد انا من كثر ماسحرتني وخذيت قلبي وقعدت طول الوقت انفكر فيك قلت لازم انصارحك ونحكيلك
صالح:شنو بتحكيلي شنو المطلوب مني توا
فيروز:طالبة انتعرفو علي بعضنا فترة ونعرفو اطباع بعضنا وانا متاكدة انك حتحبني ومااتفكرش في فرق العمر اللي بينا حتى الرسول وهو افضل الناس خذا وحدة اكبر منه يعني الموضوع عادي
صالح:فرق العمر مش مهم ونفس ماقلتي حتي الرسول افضل الناس خذا اكبر منه بس القصة اني انا مش حنوافقك علي طلبك لان فيه بنت في حياتي وانحبها
فيروز:رنا صح
صالح:ايوا رنا وانحبها ونبي نخطبها اسف معليش وطلع وسيبها
شيماء كانت عند الباب وسمعت كل حاجة ودغري مشت تجري للفصل لقت نص البنات فيه وطبعا من ضمنهن رنا لانها ماطلعتش بكل
شيماء جت تجري وصبت عند الباب
شيماء بصوت عالي:اسمعن اخر خبر يابنات
البنات كانن ايهدرزن وفي لحظة كلهن سكتن
شيماء;ابلة فيروز توا خذت استاذ صالح في مكتبها واعترفتله انها اتحبه وانها تبي اتعرف عليه واتخليه ايحبها
البنات شهقن:طاح سعدها
شيماء:تخيلن اتقوله مااتفكرش في قصة العمر حتى الرسول اجوز وحدة اكبر منه
فاطمة:وهو شن قاللها
شيماء تضحك:قاللها انحب وحدة اخرى ونبي نخطبها
وكل البنات شافن الرنا وقعدن يضحكن
شيماء:يابختك يارنو دايرة علاقة مع واحد طرف وايحبك اخرى
رنا بعصبية:انا مش دايرة معاه علاقة ولا نبيه
مع خشت ابلة فيروز
فيروز بعصبية:رنا تعالي المكتبي نبيك
رنا بخوف:شن فيه
فيروز بعصبية;قتلك تعالي المكتبي وطلعت ورنا طلعت وراها ووصلن للمكتب
فيروز:امسكي ومدتلها الورقة
رنا:شنو هذي
فيروز بعصبية:هذا استدعاء الولي أمرك لازم ايجي ويعرف كل اللي اديري فيه
رنا:بس انا مش دايرة شيئ
فيروز بعصبية:كل اللي اديري فيه مع صالح ومش دايرة شيئ شن تحسابينا مغفلين ولا عمي انتي مش محترمة ولا متربية ولازم انكلمو باتك ونحكوله كل حاجة عشان ايربيك من اول وجديد
رنا تبكي:معليش ياابلة مانسمحلكش اتشككي في تربيتي وانا والله مادرت حاجة ولا دخلني بيه هو اللي يلحق فيا
فيروز بعصبية:علي شنو بيلحقك انتي شن تحسابي روحك وبعدين انا مش جاية اناقش فيك بكرا اتجيبيلي باتك وخليه يعرف بنته علي حقيقتها وتوا اطلعي برا ومعش بنشوف وجك الا مع باتك
رنا تبكي وطلعت
تنسيم لما ابلة فيروز جت معصبة وكلمت رنا دغري عدت الصالح وحكتله لانها عارفة انها حاطة رنا في راسها وبذات ان صالح رفضها ودغري صالح جا المكتب فيروز وهو وصل ورنا طالعة تبكي
صالح بعصبية;كنك وهذي شن دارتلك
رنا بعصبية:خطاني اطلع من طريقي كرهتني في المدرسة وفي حياتي وشوهتلي سمعتي
صالح:انا درتلك هذا كله
رنا تبكي:البنات والابلات والاساتذة كلهم يحسابوني دايرة معاك علاقة ويحكو عليا وماحد فاهم شيئ وبسببك هذا استدعاء البابا تقدر اتقولي شنو انقوله توا
صالح: لوكان عاللي فاهمينه انا توا حنفهمهم كل حاجة وحنقوللهم ان انا اللي انحبك ونلحق فيك وانتي مالكيش ذنب في شيئ
رنا بعصبية:مانبيكش تحكي مع حد اطلع من حياتي بس ولا انقولك انا اللي حنحول مالمدرسة كلها ونفتك منك وجت بتمشي
صالح:مافيش داعي انا اللي حنحول ومش حنزعجك مرة ثانية انا اسف اني سببتلك هذا كله انا درت هكي بس لاني حبيتك بس حنطلعك من قلبي عشان انريحك
رنا:يقعد احسن بكل ومشت وسيباته
صالح خش علي مكتب فيروز
صالح بعصبية:شنو اللي درتيه هذا
فيروز:لحقت وصلتلك الخبر?
صالح:ماوصللي حد شيئ انا جاي انقولك انك فاهمة غلط وانا رنا مااتحبنيش ولا عاطيتني اي وجه انا اللي جيت للمدرسة هذي عشانها وعشان نوصل القلبها لاني انموت فيها بس هي ماحبتنيش وباتها وهلها عارفين الشيئ هذا وعارفين اني انحبها ومش حديري شيئ بإستدعاء باتها لاني ماشيله وحكيله اني انحبها بس هي اللي رافضتني
فيروز بصدمة:وليش مقلل كرامتك للدرجة هذي
صالح:عشان انحبها انا مرن في حياتي بنات بعدد شعر راسي مافيش وحدة خذت قلبي الا هي حبي الها من هي صغيرة وكبر معايا بس حبي الها سببلها مشاكل واجد وانا عشان اللي سببته الها كله توا بنسيب المدرسة كلها لكن قبل مانطلع بتمشي توا تاخذي ورقة الاستدعاء اللي عطيتيها الها
فيروز;لا مش واخذتها وبكرا بتجيبلي باتها
صالح بعصبية وخطب بيده علي مكتبها:اسمعي انتي لعند توا اتشوفي في الوجه الكويس مني مازال ماشفتيش الوجه لاخر ولو مش حابه اتشوفيه تمشي تاخذي الاستدعاء والا ونقسملك بربي اندمك عاليوم اللي قعدتي فيه أبلة سمعتي كلامي صح وعقلك في راسك يأابلة وطلع وخبط الباب وراه بالقوة
(وطبعا اللي حكاه ان باتها وهلها عارفين كان كذبة بس عشان ايخوفها)
فيروز قمعزت وخافت منه لانها شافت الشر اللي في عيونه ودغري طلعت الفصل رنا وخذت ورقة الإستدعاء وطبعا هو كان مصبي بعيد مالفصل وشافها لما طلعت وفي يدها الورقة اطمن انها خذتها من رنا ودغري بعدها توجه للإدارة واعتذر ان معش يقدر ايكمل امعاهم وروح
“””””
الساعة 12م وتحديدا في حوش سندس كيف وصلو مالسفر وخشو الحوشهم وكانو تعبانين مالوعية بدري والطيارة فكل واحد دوش وخش رقد وبعدها وعيو قصاد الغداء تغدو وفرج مشى الشغله وسندس وامها قعدن ايلمن في الحوش وبعد كملن الحوسه خشت بتكلم رانيا عشان اطمنها انها روحت ورنت ورانيا ردت
رانيا:دوسة الحمدلله علي سلامتك ياقلبي وحق الله رايفتلك
سندس:الله ايسلمك رنوشة وانا رايفتلك
رانيا:شن جو السفرة انسجمتي فيها
سندس:اها تمام
رانيا:اسمعي كلام في الفون ماينفعش لازم انجيك ونحكو بنعرف اخبارك وعندي كلام واجد لكي وحتى دودي حكيتلها وترجى فيك اتروحي بتجيك
سندس:خلاص تعالن اليوم
رانيا:يعني ماعندكمش حد اليوم عادي انجو
سندس:مافيش حد وبعدين ماما بتمشي الخوالي وانا عنديش جو نمشي تعالن عشان اتخليني نقعد
رانيا:خلاص انشوف دودي وانجوك
سندس:نرجى فيكن وسكرت
عالساعة 4:30 م سعاد مشت الحوش هلها وسندس قعدت ترجى في صحباتها وعالساعة 5م جت رانيا وبعدها دغري رويدة وسلمن وشربن القهوة مع بعضهن وقعدن ايخرفن
رانيا:يعني السفرة قدرت اتغيرلك جوك
سندس:تمام أحسن مالأيام اللي فاتن
رويدة:انا عارفة انك قوية وحتقدري اتعدي المرحلة هذي
سندس:بالعكس يادودي اللي يقعد قوي وايصيرله هكي اتأثر فيه اكثر
رويدة:عليش اتأثري علي واحد طلع كذاب وباعك لان حقير وبيرد الصياعته اللي قبل
سندس:الباين هكي بس يابنات انا لما قعدت بروحي وفكرت حسيت ان فيه حاجة صايرة مع سراج
رانيا:حاجة زي شنو
رويدة:لا حاجة لا شيئ مالاول قتلك ماتعطيش اللي يبيه لين اتأكدي بس انتي ماسمعتيش كلامي
رانيا:دودي اصبري نسمعو وجهة نظر دوسة بلا تركيب
رويدة:دوسة تحكي هكي لانها حانتله ومرايفتله وهي خاطرها ان ايكون فيه عذر وسبب للي داره عشان تقدر اتسامحه
سندس:انا مانبيش انسامحه مهما كان السبب بس انتي ماعشتيش معاه ومش عارفة سراج كيف كان ايعامل فيا مستحيل واحد ايدير هكي يطلع يكذب وماايحبش
رويدة:حبي دوسة انتي لازم تعرفي ان هو واحد حقير وخوان ومعش تذكريله اللحظات الحلوة اذكري بس لما باعك وطلقك وطلع كذاب عشان تكرهيه ومعش اتحنيله بكل عشان انتي حرام اتكوني الواحد زيه انتي تستحقي أحسن من هكي وزي ماايقولو(لا تأسف❌ علي نجمة ? ضاعت منك فالسماء مليئة بالنجوم ? فان لم تكن من نصيبك احداهن❌ فمن يدري فربما من نصيبك القمر)
رانيا:ممكن كلامك صح بس لازم تاخذي في اعتبارك ان سراج اول حب الدوسة واول حب ماتقدريش تنسيه بسهولة
رويدة:انا عارفة انها توا متعذبة ومقهورة بس ضروري مااتفكر في كرامتها وان سراج هانها بلا سبب ومانبيهش تضعف واتسامحه لو حاول ايرجعها
سندس:صدقني سراج خلاص ماضي ومش حنردله لو مات قدامي انتن عارفات كويس كيف ان كرامتي عندي اهم شيئ انا بس فضفضتلكن باللي حاسة بيه
رانيا:يعني انتي توا كويسة وتقدري اتردي دوسة اللي قبل واتردي قوية زي مانعرفوك
سندس:اكيدة انا مقتنعة بحاجة دبين ماما وبابا معايا وانا مافيش شيئ حيكسرني صح اللي داره سراج قهرني بس مش انا اللي نكتئب وانسيب كل حياتي عشان راجل ومقررة من بكرا بنرد للمشروع وانكمله وانحقق حلمي وانفرح بابا وماما بيا
صحباتها فرحن وحظننها
رويدة:نجك ليا هذي دوسة اللي ديما كل مانضعفو تعطينا القوة وحتقعد طول عمرها هكي
رانيا:انتي أحسن وحدة فينا انتي الصديقة الصدوقة والله نحن محظوظات اللي عندنا صاحبة زيك
سندس:توا طمنني عليكن انتن كل وحدة تحكيلي اللي صاير معاها
رويدة:انا حياتي هادية وروتينية بس فيه مفاجأة لكن
رانيا وسندس;شنو
رويدة:أنا حامل?
رانيا وسندس قعدن ايعيطن مالفرحة
رانيا مالفرحة قعدت اتزغرت:لووولوولي واخيرا بنقعد خاله
سندس بفرحة:ناعليا مش مصدقة بيقعد فيه بيبي نلعبو وانكسدو عليه الف مبروك ياقلبي
رويدة:الله ايبارك فيكن
وقعدن يحكن اشوي عالبيبي
رويدة:توا خليكن مالبيبي واحكيلنا انتي ياحنة ليش مش راضية فرحك يطلع
سندس:كيف صار هو فيصل حكى عالفرح
رانيا:فيصل ماشي حاكي مع بابا ومحدد معاه موعد من غير ماايقولي ولما قتله ليش ادير هكي قالي عارفك حترفضي وانا بنقعد معاك في حوش واحد عشان تقدري اتحبيني
رويدة:ومشت الاخت قالتله لو ماتمشيش البابا وتلغي موعد الفرح انا حنلغي الخطبة بكل
سندس:معقولة اديري هكي رنوشة
رانيا:كيف بنطلع الفرح وانتي ظروفك هكي
سندس:بلاش كذب وانا مااتحجيش بيا انا اهو قدامك جوي سمح قولي انتي ليش ماتبيش الفرح يطلع
رويدة:هي جاوبيها
رانيا:انا صح فيصل عاجبني بس انا مازال ماانسيت رؤوف وخايفة لما ايكون راجلي وحلالي انخونه حتى لو في لحظة انفكر فيها في رؤوف وانا مانببش نقعد خاينه نبيه بس ايطول فترة الخطبة لين نقدر ننساه
رويدة:رانيا فيصل معاه حق لما اطولو في فترة الخطبة مش حتنسي رؤوف بس لما تقعدو في حوش واحد حتنسيه زي ماصار مع معاذ بزبط
سندس:انا مع كلام رويدة مش حتنسي رؤوف لين تجوزي فيصل
رانيا:والكارثة لخرى انا رؤوف يسمع بخطبتي وزواجي مني انا ونزلو دموعها
رويدة:وانا قتلك ان تأثر اشوية وبعدها فات الموضوع
رانيا:رؤوف نعرفه كويس مستحيل يعرف حاجة زي هذي وتمشي عادي
رويدة:وانا زيك كنت خايفة ماللحظة هذي واستغربت ان ماتاثرش بس شكله البنت اللي متعرف عليها مهونة عليه او ايكون حبها
رانيا:قصدك رؤوف فيه بنت متعرف عليها
رويدة:اها وحاكي عليها الماما وشكله هكي ناوي يخطبها
سندس:راك هبلتني فهمني شن صار وكيف رؤوف علم من رانيا
وقعدت رويدة تحكيلها في القصة اللي صارت
رويدة:هذا اللي صار كله ورنوشة توا مزعله فيصل وماتحكيش معاه عشان رؤوف اللي قاعد لاهي في حياته ومنسجم
رانيا:مش انا بس مانحكيش مع فيصل حتى هو يستكرد فيا ومايحكيش معايا
سندس:لانك انتي غلطانة الراجل ايحبك وشاريك وفي الوقت هذا صعب تلقي حد ايحبك بجد وراضي بأي حاجة عشان اتكوني معاه
رانيا:انا ماغلطتش هو اللي كان المفروض ايشاورني في حاجة زي هذي
رويدة:هو دار هكي عشان ايحبك ويبيك معاه
سندس:رويدة فوتيها ضاع حب رؤوف غصبن عنها وتوا بتضيع حب فيصل بإرادتها خليها توا لما فيصل ايمل وايسبها الله واعلم بعدها حتلقى حد ايحبها جديات ولا حيصير فيها زي ماصار فيا فكري في كلامنا وعقلك في راسك تعرفي خلاصك يارانيا
(اكيدة كلكن مستغربات ليش رويدة كذبت وحكت هكي لان عارفة كويس لو حكت وضع رؤوف الحقيقي حتخلي رانيا تضعف اخرى واتخرب حياتها بلا فائدة لانها عارفة ان رؤوف ورانيا مش حيكونو البعضهم مرة اخرى)
وقعدن البنات ايخرفن لعند المغرب وعالمغرب جت سعاد من هلها ورويدة كلمت معاذ وروحت ورانيا كلمت باتها وروحت
مشى اليوم هادي ومافيش أحداث تذكر
“””
#صباح_يوم_جديد
ناضت سندس في الصبح وهي مقررة تمشي للمشروع صح قرار زي هذا ماكان ساهل بس هي طول فترة السفر وهي اتحاول اتأقلم نفسها مع وضعها الجديد ولازم اترد قوية زي قبل عشان باتها وامها اللي شايفة حالتهم عشان اللي صاير فيها وخوفها علي باتها وامها كان هو سبب انها ادس حزنها داخلها واترد طبيعية عشان ماايصيرلهم شيئ وهذا هو الانكسار عندها انها تفقد حد منهم لان كانو هما مصدر قوتها
وعت توضت وصلت ودعت دعاء واحد واللي من اول ماصار معاها هكي وهي تدعي فيه
سندس رافعة ايديها الربي?يارب قويني من عندك يارب ماليش غيرك وانت بس اللي عارف اللي في قلبي يارب قويني ونزلو دموعها زي كل مرة وصبت مسحت ادموعها وغيرت دبشها وطلعت لقت باتها وأمها يفطرو
سندس;صباح الخير
فرج وسعاد والفرحة علي وجوهم:صباح النور
سندس قمعزت بتفطر
فرج:خير يابابا وين بتمشي
سندس:بنمشي للمشروع مازال ماكمل وليا فترة مخلية الشغل علي رانيا
فرج:احسن مااديري دوسة ومستقبلك اهم من كل حاجة
سندس:وهذا ليش بنكمل اللي بديته
سعاد:ربي ايكملك بعقلك ويبعد عنك كل اولاد وبنات الحرام
فرج:اللهم امين
فرج:خلاص نفطرو وانشيلك ولما اتكملي رنيلي انجيك
سندس:لا بابا مش داعي انتعبك انا حنمشي في سيارتي
فرج:يعني تقدري اتسوقي ومااتخافيش
سندس:لا خلاص معش انخاف مالسواقة وحنمشي بروحي (وفي عقلها هذي الحاجة الوحيدة اللي دارها سراج كويسة)
كملو فطورهم وبعدها سندس وباتها طلعو وكل واحد ركب في سيارته ومشى الشغله وسعاد قعدت اتلم في حوشها
وصلت سندس للمشروع واول واحد قابلاته فيصل اللي انصدم بعد شافها
سندس:صباح الخير
فيصل ايشوفلها زين:صباح النور
سندس ابتسمت:مش متوقع انجي بعد اللي صار
فيصل:ديما نسمع فيهم يحكو علي شخصيتك وقوتك وشفت اشوي منها بس ماكنتش نحسابك قوية للدرجة هذي وحدة اخرى مكانك ممكن خشت الحالة اكتئاب او اي ازمة نفسية
سندس:اللي ايكون قلبه قريب من ربي ربي مش حيخليه بروحه وحيقويه واللي ايقويه ربي مش حيضعفه اي حد واي مشاكل ايصيرن معاه حيكونن دروس له وحيستفاد منهن وسراج عطاني درس تعلمت منه واجد ومستحيل ننساه
فيصل;انا سراج حرت فيه اول مرة انشوفه هكي
سندس:لو سمحت فيصل مانبيش نحكي عليه وعاللي صار
فيصل:حاظر وهذا من حقك
سندس:رانيا مازال ماجت
فيصل:لا جت وقاعدة جوا
سندس:مازلتو متعاركين
فيصل:لو حكتلك اللي صار اكيدة عارفة من الغلطان
سندس:انا عارفة بس انت يوم اللي هي وافقت اتكون معاك وعدتتها حتكون جنبها ومش حتخلى عليها مهما صار ووعدتها انك اتحمل اي شيئ
فيصل:صح انا وعدتها هكي ومازال عند وعدي وهذا ليش طلبت انطلع الفرح
سندس:حنرد نحكي معاها وحنخليها اتحل المشكلة معاك
فيصل:لا ياسندس انا نبيها اتوافق بقاناعتها ولو ماوافقتش حنلغي مع باتها تحديد الفرح وحنقعدو فترة الخطبة اللي تبيها هي ان شاءلله حتى 10سنين
سندس:للدرجة هذي اتحبها
سراج:ومش حنقدر انحب غيرها بس هي اللي مازال عالقة في ماضي ومش راضية تعطي الروحها فرصة عشان اتحبني
سندس:هي مازال في صراع مابين ماضي وحاظر وهذا اللي مخليها هكي
فيصل:وانا معاها وجنبها لين حبي هو اللي ينتصر علي ماضيها
سندس:ان شاءلله خلاص انا بنخش انشوفها
فيصل:تمام
وخشت سندس علي رانيا وكانت رانيا مقمعزة عالكرسي وماسكة فونها
سندس:سمعتي كلامه
رانيا:سمعته
سندس:اول مابدى يحكي قلت لازم تسمعيه ورنيت عليك عشان تعرفي كيف متمسك بيك
رانيا:والله عارفة ان ايحبني ومتمسك بيا
سندس:يبقى ماتخسريش احسن ماتندمي بعدين
رانيا:خلينا نطلعو وانشوفو الشغل
سندس:هي وطلعن
“””””
الساعة 2 م وتحديدا في حوش هل سندس روح فرج للحوش وخش من غير مايحكي ولا كلمة
سعاد:خير فروجة
فرج:خير
سعاد: الغداء واتي خش اغسل وغير علي ماجت دوسة وانتغدو مع بعضنا
فرج ساكت وماردش
سعاد بخوف:بسم الله كنك وجك ماايتفسرش يافرج اتقول فيه حد ميت
فرج طلع ورقة من جيبه ومدها الها
فرج بعصبية;من هذي وجي ماايتفسرش
سعاد:شنو هذي
فرج بعصبية:هذي ورقة طلاق سندس جتني مالمحكمة
سعاد نزلو دموعها:معقولة وصلها للمحاكم
فرج:وكنه ماايوصلها وهو طلقها عشان ياخذ البنت اللي جت من المانيا
سعاد بصدمة:كيف
فرج بعصبية:سراج الكلب طلع يبي البنت هذي وهذا ليش طلقها وبكرا فرحهم
سعاد;وانت من حكالك الكلام هذا
فرج:قبل ماانسافرو حكيت معاهم وقلتلهم بنرفع قضية ويطلقو رسمي قالولي اصبر ونفهمو من سراج قبل وننصدم اليوم بالورقة اللي جتني في الشغل رقتلي ووجعتني كيف ضحكو عليا لين هو اللي طلق ورنيت علي محمد وقالي انا مانندري علي شيئ وان هو لزه واحرمه من كل حاجة عشان يبي يجوز البنت هذي وقالي الموضوع كله عند باتي ودغري كلمت عمي علي وهو اللي قالي ان حكى مع سراج وطلع سراج يبي البنت هذي وان قرا فاتحتها وبكرا فرحهم
سعاد تبكي:حي عليا شن بيصير في بنتي بعد تعلم
فرج:الفترة هذي مش حنحكولها شيئ نحن ماصدقناها ردت كويسة وبعد مااتعدى المرحلة هذي كلها نحكولها
سعاد تبكي:مانقدرش اندس عليها حاجة هكي
فرج بعصبية:كان هامتك سندس يبقى ادسيها والورقة اللي في يدك تمشي توا تخفيها لين سندس اترد زي ماكانت وبعدها نحكولها
سعاد تبكي:حاظر وخذت الورقة وخشت جوا بدسها
بس طبعا بعد شنو سندس كانت سامعة كل حاجة ووصلت من اول ماباتها قال هذي ورقة طلاق سندس وقعدت مصبية في الباب من غير ماايشوفوها وسمعت كل الكلام وطلعت دغري السيارتها وركبت وهي مصدومة
سندس:سراج وتالين مستحيل اكيدة في حاجة غلط انا متأكدة سراج ماايحبهش فيه شيئ مش مفهوم ولازم نفهمه ومسكت فونها واتصلت بتالين وتالين ردت
تالين:خيرات سندس
سندس:تالين انتي وين
تالين:في فيلة جدو
سندس:لو فاضية بنجيك توا
تالين;فاضية ونرجى فيك
سندس:خلاص جايتك توا وسكرت ودغري طلعت بسيارتها وتوجهت شور فيلة جد سراج ووصلت ونزلت لقت تالين ترجى فيها في الجنان وجتها تالين وسلمت عليها
تالين:تفضلي جوا
سندس:انا مش جاية انتفضل انا جاية بس بنعرف صح اللي سمعته
تالين;قصدك ان انا وسراج بنزوجو
سندس:لا قصدي انكم اتحبو بعضكم
تالين:اها انحبو بعضنا وهذا ليش بنجوزو
سندس:مستحيل سراج ايكون ايحبك سراج يعتبر فيك زي اخته وماعمره قالي كلام غير هكي بس انا متأكدة ان فيه حاجة صايرة وهي اللي خلاته ينكر ان ايحبني وايقرر يجوزك
تالين:والله مافيه حاجة صايرة كل القصة ان انا وسراج انحبو بعضنا من قبل ولان هو كان رافض فكرة الزواج انا سيبته وبعدها ردو الليبيا وحاولت نقطع تواصلي معاه وقعدنا فترة نحكوش مع بعضنا ونحسابو ان انسينا بعضنا لعند لما جيت والقيته متجوز ومن اللحظة هذكي انا وهو اكتشفنا ان حبنا مازال قاعد بس انا معش تحملت انشوفه معاك وقررت نمشي وماانخربش حياته بس بعدها هو كلمني وقالي انرد لان ايحبني وقرر ان نجوزو
سندس:مستحيل سراج يطلع ايحبك كيف ايحبك وهو اللي كلمك عشان اتجي اتساعديه في ان يعرف اني انحبه او لا
تالين:صح هو اللي كلمني وفاجئني باتصاله بعد فترة طويلة ونحن مانحكوش فيها وحكالي ان اجوز وان ايحبك وان يبيني انجي انساعده في ان يعرف لو اتحبيه او لا جيت وكنت مكذبة ومش مصدقة اصلا ان هو اجوز وانصدمت بعد القيته متجوز صح وكان ايمارس في حياته معاك طبيعي وانا بروحي حسيت ان ايحبك صح كنت ننقهر لما انشوفه امعاك بس كان يكفيني ان هو سعيد في حياته ومتريح ولما قررت نمشي جا وحكالي ان مازال ايحبني وان جابني من غادي عشان ايتأكد اذا مازلت انحبه او لا ماقدرتش اندس حبي وقتله اني مازال انحبه بس ماانقدرش انخرب حياتك وقتله بنسافر وهذا السبب اللي خلاكم كلكم تحكو معايا الا هو ماحكش معايا وماطلبش مني نقعد لعند لما مشيت حاول ايوقفني بس انا رفضت وسافرت وبعدها بكم يوم كلمني وقالي ان طلقك وان يبيني انرد عشان نجوزو
سندس تسمع في الكلام ومصدومة وقلبها كان ايدق بسرعة وحاسه ان بيوقف من كثر ماقاعد ايدق بسرعة بس كالعادة رغم المها من جوا الا من برا كانت قوية وتحكمت في دموعها وماخلتهنش ينزلن
سندس بكل قوه:ربي ايهنيكي معاه مع اني مش مصدقة كل اللي حكيته
تالين:انتي مش قادرة اتصدقي لانك اتحبي سراج وكنتي تحسابي ان ايحبك زي مااتحبيه بس الدنيا مش ديما تعطينا كل شيئ نبوه وانتي بنية كويسة وشخصيتك حلوة والف من ايتمناك وصدقيني حتلقي الحب الحقيقي اللي حينسيك سراج وكل حاجة كانت معاه
سندس قعدت اتشوفلها وبعدها لفت ومشت اشوي مع خشت سراج وشافها وطبعا تالين مازال اتشوف فيهم
سندس ماحكتش ولا كلمة ولا ضعفت اكتفت بس بنظره السراج هو فهم شن تقصد من نظرتها اللي كان واضح فيها كيف انها كرهاته وكيف ان انسان خاين وخيب ظنها فيه وبعد نظرتها له مانزلتش راسها زي اي وحدة بالعكس رفعت راسها بكل عزة وشموخ وطلعت من غير مااتحسسه بأي ضعف
سراج نزل راسه:هكي احسن ليا ولكي ولما رفع راسه لقى تالين قدامه وجاته
تالين ودموعها علي خدها:سراج انا انحبك
سراج شافلها زين ومن دون مايحكي ولا كلمة لف وطلع مالفيلا كلها
تالين مسحت دموعها وخشت للفيلا
بس كان فيه حد مصبي في روشن داره وشاف كل اللي صار
جد سراج:كنت متأكد ان فيه حاجة صايرة وفضحاتك نظرتك ياسراج مع خشت الخدامه عليه
الخدامه:دولقتي جت سندس طليقة الاستاذ سراج وقعدت تسأل في الانسة تالين اذا هي وسراج بيحبو بعض
جد سراج:وتالين شن حكتلهاقعدت الخدامة تحكيله في الكلام كله لانها كانت مصبية وتصنت فيهن
الخدامة: وبعدها الاستاذ سراج وصل عالفيلا وراح وماحكش ولا كلمة ودا بقى كل اللي حصل
جد سراج:اسمعي اتفتحيلي عيونك ووذانك كويس وخليك ورى تالين في كل خطوة ولو حكت هي وسراج لازم تسمعي اللي حكوه
الخدامة:حاظر وطلعت
“””
عند سندس طلعت وركبت في سيارتها وطلعت بيها وتباعدت من الفيلا وبعدها معش قدرت اتحمل وقفت سيارتها وقعدت تبكي وتبكي بكل حسرة وقهرة بكت لين طلعت اللي في قلبها من ألم ووجع وبعد حست روحها هدت اشوي دغري مشت للحوش ولما خشت
سندس:خير
سعاد:خيرات دوسة
فرج:ليش تاخرتي وليش قافلة تليفونك
سندس:تاخرنا في المشروع وفوني كان طافي شحن
فرج:خوفتينا عليك
سندس:مااتخافوش انا كويسة واسفة اني ماكلمتش من فون حد عشان انطمنكم
سعاد:خشي غيري واغسلي وتعالي عشان انتغدو مع بعضنا
سندس:تغدو انتو انا سبتقكم في المشروع وتغديت غادي
فرج:بس من بدري نرجو فيك
سندس:شابعة يابابا نقدرش ناكل بنرقد بس لاني تاعبة بكل مالشغل
سعاد:خلاص خشي تريحي مالصبح واعية واكيدة مصبية طول الوقت
سندس:اها تعب بكل وخشت الدارها
سعاد:انصبي انوتي وانتغدى انا وياك
فرج صبى:حتى انا ماعنديش نية بنرقد اشوي ومشى الداره
سعاد:بالك انا عندي نية عطك ادعوة ياسراج انت سبب كل حاجة صايرة
“”””
مر اليوم عادي وسندس غير هي خشتها الدارها كملتها متغطية ودايرة روحها راقدة وهي ماقدرتش ترقد ولا لحظة وكان كلام تالين كله في وذنها وتذكر في كل لحظة مع سراج وكل مااتخش امها بتوعيها اتقوللها تاعبة وبنرقد كانت في سريرها ومتغطية ومكملتها بكى اتصبي بس كل وقت صلاة اتصلي واترد للوضع اللي كانت فيه لعند الساعة 10 هلها خشو رقدو وهي حست روحها متضايقة بكل ومش قادرة حتى اتنفس صبت لبست ملاية الصلاة وخذت المصحف وقعدت تقرا في قرآن
“””
#عند_سراج
الساعة 11روح للفيلا وكان الجو هدوء ومافيش حد واعي دغري رقى الداره وتمدد علي سريره وهو ايفكر وايخمم اشوي وخشت عليه تالين وهي لابسة الفيلو متاع بكرا
تالين;من بدري نرجى فيك اتروح
سراج:شن تبي عليش ترجي فيا
تالين سكرت باب الدار وخشت
تالين بفرحة:شوف الفيلو من بدري لابسته ونرجى فيك اتروح عشان اتشوفه
سراج:تمام شفته
تالين:انا فرحانة سراج ليش انت مش فرحان زيي
سراج:ساد انتي فرحانة انا مش ضروري نفرح
تالين جت وقمعزت جنبه:انت مازال زاعل مني
سراج شافلها بالجنب?وسكت
تالين قربت منه:سراج اللي درته لاني انحبك ولاني عارفة ان الطريقة هذي بس اتخليك تاحذني
سراج:ودرتي اللي تبيها واهو خذيتيني
تالين زادت قربت منه:وفرحانه عشان خذيتك اصلا مش مصدقة ان حلمي تحقق وقعدت مراتك وقربت منه بتبوسه علي شفايفه بس سراج بعدها وصبى
تالين:ليش ادير هكي انا توا مراتك وبكرا فرحنا
سراج:بكرا مش اليوم وتوا اطلعي مالدار
تالين تبكي:لما كنا في الشقة وانحاول انقرب منك اتقولي ماتبيش اترد للحرام وان مازال ماقريت فاتحتك ومازال ماقعدت حلالك بس توا انا حلالك والفاتحة انقرت ليش ماتبينيش انقرب منك
سراج:معقولة مازال ماعرفتي ليش بكل ببساطة عشان مازال انحب سندس ومازال نبيها ومش حنرضى انكون مع غيرها انتي درتي كل حاجة غصبن عني الا حاجتين ماتقدريش تاخذيهن غصبن عني القلب هذا❤واشر علي قلبه واني انقرب منك
تالين صبت وبتحدي:معناها انا هكي حنكمل اللي بديته
سراج قرب ومسك يدها بقوة:اسمعي انا طاوعتك علي كل حاجة ودرت كل اللي تبيه واهو طلقتها وبنجوزك زي ماتبي كله عشان عيون سندس وعشان ماتنظرش بسببك بس والله ياتالين لو اديري اللي حكيتيه وقسما بالله قتلتك علي يدي أنا خلاص بعد خسرتها خسرت كل حاجة ومعش عندي شيئ انخاف عليه وصدقيني مستعد نقتلك وناخذ إعدام بس سندس ماايصيرلها شيئ وطلع و الشر في عيونه وماايشوفش في شيئ قدامه
تالين:ماشي ياسراج زي ماخليتك اطلقها حنخليك تكرهها وطلعت من دار سراج ومشت الدارها
(بس ماداروش حساب ان فيه حد سمعهم
الخدامه كانت تراقب في تالين اللي كانت كل شوي تطلع تسألها سراج جا او لا ولما جا سراج خشتلها وقالتلها ان سراج جا وطلعت تالين ومشت الدار سراج والخدامة كانت اتراقب فيها وجت وراها وصبت عند الباب وقعدت تصنت وسمعت كل حاجة ولما حست ان سراج بيطلع دغري جرت وانطمرت)
“”””
#عند_جد_سراج
قاعد في سريره ويقرا في كتاب وخشت عليه الخدامه تجري
جد سراج:كنك بسم الله
الخدامه:سمعتهم ياحج
جد سراج:شن سمعتي
الخدامة قعدت تحكيله في الكلام اللي سمعاته كله
جد سراج:والله كنت عارف ان تالين وحدة حقيرة ودايرة حاجة بس انا توا لازم نعرف شنو اللي دايرته قبل ماايتم الفرح
الخدامة:انا حعمل ايه دلوقتي
جد سراج:انتي عدي وكملي مراقبتك الها
الخدامة:حاظر وطلعت
جد سراج قمعز علي سريره وقعد ايفكر شنو ايدير وكيف يعرف شنو اللي دايرته تالين
“”
#عند_تالين
حولت الفيلو ولبست بيجامتها ومسكت فونها واتصلت بصديق تعرفه من قبل هو من ليبيا بس كان ايجي هياجة الألمانيا
زياد:اهلا بالعسل كله
تالين;اهلين زياد
زياد:شن جوك تولي
تالين:تمام بكل
زياد:درتي اللي قتلك عليها
تالين:بالحرف الواحد
زياد:وشنو جابتلك نتيجة
تالين:اكيدة ومن كثر ماجابت نتيجة بكرا فرحي اصلا انت فيه حاجة اتقولها ومااتجيبش نتيجة
زياد:مبروك فرحتيني تولي
تالين:بس مازال شيئ واحد انديرو اللي قتلي عليه عشان مراته
زياد:اقتنعتي توا
تالين:مش ناسيها وايحبها وانا لازم انخليه يكرها
زياد:وامتى تبي التنفيذ
تالين:بكرا الصبح عشان ماايجيش الليل الا وهو كارهه ومقتنع بزواجنا مية في المية
زياد:تم بكرا زي ماتبي ايصير بس انتي وفلوسك عشان الشباب
تالين:فلوسي واتيات أهم حاجة سراج ماايحسش بشيئ
زياد:عيب زياد الجن معاكي مش واحد هكي وخلاص
تالين;وانا واثقة فيك
زياد:بكرا الصبح بينا تليفون
تالين:تمام وسكرت
“”””
#عند_جد_سراج
بعد تفكير واجد مسك فونه ورن علي فيصل
فيصل كان كيف بيرقد واستغرب لما لقى اللي ايرن جد سراج ورد
فيصل:خير ياجدي
جد سراج:خير يافيصل شن اخبارك
فيصل:تمام الحمدلله شن اخبارك انت
جد سراج:الحمدلله فيه موضوع بنحكيه لكي
فيصل:خير ان شاءلله
جد سراج:انتو كلكم مستغربين كيف وافقت سراج علي زواجه مالبنت هذي وجبته وقريتله فاتحتها
فيصل:الحق لما حكالي عمي محمد استغربت وقلت مممكن سراج قانعك بحاجة
جد سراج:سراج ماقنعني بشيئ انا اللي مشيتله لعند الشقة والقيتها معاه وماعجبنيش الوضع وقتله مستعد انجوزها لكي بس بشرط تقعدو معايا في الفيلا وهو وافق وعارف انا ليش شرطت الشرط هذا
فيصل:ليش
جد سراج:لاني عارف ان البنت هذي وراها حاجة كبيرة وهي اللي خلاته ايطلق سندس يعني مش ايحبها زي ماقال وكنت لازم انخليهم قدام عيوني عشان انتأكد واليوم تأكدت ان فيه حاجة
فيصل:وانا حاسس هكي بس شنو الحاجة
جد سراج:انا مش عارف شنو الحاجة بزبط بس حنقولك اللي عرفته وقعد يحكيله في اللي صار اليوم كله واللي حكاته له الخدامة
فيصل بصدمة:زعمك شنو اللي الحاجة اللي دايرتها وخلت سراج ايبيع سندس هكي
جد سراج:مش عارف وتوا هذا ايجي دورك
فيصل:شنو المطلوب مني
جد سراج:سراج طلع مالفيلة انت لازم ادوره وتلقاه ومااتسيبش الا لما يحكيلك كل حاجة تقدر ادير هكي
فيصل:كون هاني وانا مش حنطلقه الا لما يحكي كل حاجة
جد سراج:هو شكله متكتم عالموضوع ومتحرص ان ماحد يعرف تقدر اتخليه يحكي
فيصل:لو كلفني عمري حنعرف شنو اللي صاير معاه
جد سراج:تمام ولازم ايتم كل شيئ قبل موعد الزفة
فيصل:حاظر وسكر ومارقدش
ورن علي سراج لقاه مقفل صبى غير دبشه وطلع
يدور عليه واول مكان مشاله الشقة ولان كان معاه نسخة مالمفتاح فتح وخش بس ماكان فيها حد ولان عارف ان سراج ماعندش وين يمشي الا هنا قعد يرجى فيه ايجي
“”””
#عند_سندس
طولت وهي تقرا في قرآن وبعدها حست روحها تريحت صلت ركعتين وجت السريرها وتمددت وهي اتحاول مااتفكرش في شيئ طبعا كانت واعية بدري ومارقدتش بكل ولانها حست براحة بعد القرآن قدرت تهدى وترقد
“””
اذن الفجر وفيصل مازال في الشقة ويرجى في سراج ايروح
“”””
#صباح_يوم_العرس
وتحديدا الساعة 7فيصل نط زي المفجوع
فيصل:شكلي نعست وشاف للساعة لقاها 7وسراج ماجش
فيصل:هذا شكله مش جاي هنا بس وين بيمشي وهو معصب وقعد ساكت وايفكر
فيصل:انا اللي غبي واحد في حالة سراج ومازال ايحب سندس وسيبها غصبن عنه اكيدة بيكون في المكان الوحيد اللي كان شاهد علي حبهم وعاشو فيه كل تفاصيل حياتهم اكيدة توا في حوشك انت وياها ودغري خذا مفاتيح سيارته وفونه وطلع
“”””
#عند_سندس
وعت سندس غسلت وصلت ودعت نفس الدعاء ولبست وطلعت ولقت هلها يفطرو وقمعزت تفطر معاهم وبدون اي كلمة وماحاولش اي حد من هلها يحكي بعد صباح الخير اصلا مش عارفين مايحكو وخافين يحكو اي حاجة ويزرقو باللي عرفوه واللي يحسابو دوسة مش عارفته وبعد الفطور سندس مشت للمشروع وباتها طلع الشغله وامها قعدت اتلم في الحوسه
“””
#عند_فيصل
وصل للفيلا ودرس سيارته ونزل ولقى عمو محمد برا
محمد:صباح الخير
فيصل:صباح النور
محمد:شن صاير ان شاءلله خير جاي من عند الصبح
فيصل:لا خير جاي نبي سراج
محمد:انت عارف سراج عند جده
فيصل:من امس طلع مالفيلا وانا انقول ان جا الحوشه
محمد بعصبية:وعنده وجه ايجي هنا والله انوريه انا قتله يطلع ومعش بنشوف وجه وجا بيمشي للحوش
فيصل وقفه:اصبر ياعمي مااتخربش اللي جاي عشانه جدي علي طلب مني اندير هكي وخليني ماشي زي مااتفقت معاه
محمد:وباتي ليش طلب منك اتجيه
فيصل:عديله وحيقولك كل حاجة بس ماتحكيش شيئ قدام تالين والافضل تحكو برا مالفيلا
محمد:ياساتر باهي تمام حنكلمه في الشركة
فيصل:تمام
محمد:انا ماشي توا سلام
فيصل:سلام ومشى الحوش سراج وقعد ايدق
سراج كان قاعد في داره هو ودوسة ومتمدد علي سريرهم واستغرب الباب اللي دق لان عارف ان ماحدش شافه لما جا للحوش اذا حتى سيارته درسها بعيد مالفيلا عشان ماحدش ايشوفه
صبى وطلع من عند الروشن بيشوف من بس فيصل كان اغضب منه وكان وهو ايدق مركز عالرواشن لان حافظ سراج بصم ولما طلع مالروشن فيصل شافه
فيصل:شفتك افتحلي نبيك احسن ماانعلي صوتي وعمي محمد يعرف انك قاعد هنا
سراج خبط الروشن ونزل فتحله الباب
سراج بعصبية:انت شن جاي تبي هنا
فيصل دفه وخش جوا
سراج سكر الباب:مش قتلك معش فيه صحبه شن جاي تبي عندي
فيصل قمعز:نبيك تحكيلي اللي صار بينك وبين تالين وشنو اللي قالاته لكي الدرجة طلقت سندس وتبي تجوزها
سراج شافله?تالين مادرتش شيئ انا بنجوزها لاني انحبها
فيصل:هه اكذب علي واحد غيري انا لا حافظك صم
سراج بعصبية:سندس طلقتها عشان ماانحبهش
فيصل:كذاااااب
سراج بعصبية:فيصل احترم نفسك احسن مااتشوف شيئ مايعجبكش
فيصل صبى:تبي تضربني ماعندكش مشكلة تعال هنا وانديروها حلبة مصارعة وحتصير حاجة من ثلاثة ياتقتلني يانقتلك ياتحكي اللي صار
سراج:مااتعصبنيش
فيصل:احكي ياسراج
سراج بعصبية:مش حاكي شيئ والحوش خليك فيه انا طالع
فيصل بعصبية سراج وهجم عليه وعطاه بوكس وسراج رده له وقعدو يضاربو الاول مرة في حياتهم
“”””””
#عند_سندس
وتاخرت اشوية عالمشروع وبعدها وصلت ونزلت وتلقتها رانيا
رانيا:صباحو عالحلوين
سندس بحزن والدموع في عيونها:صباح الخير
رانيا بخوف:شن فيه ياقلبي شن صاير معاك
سندس تبكي:بيجوز اليوم مش قادرة حاسة روحي بنموت وظمت رانيا وقعدت تبكي
رانيا خذتها للمكتب وخشت وسكرت الباب وعطت سندس مية وقعدت اتهدي فيها لين هدت
رانيا:احكيلي شن صار ومن بيجوز الحقير هذا
سندس قعدت تحكيلها في الللي سمعاته من هلها والمشيتها التالين حكاته كله
رانيا بعصبية;شن يحساب روحه الحقير هذا بنات الناس لعبة في ايديه واطي اجعنه ايموت ان شاءلله مااتهنى بيه
سندس تبكي:نار يارنوشة في قلبي ومش مصدقة اللي قاعد ايصير حاسة ان فيه حاجة صايرة وان قصة حبه الها كذبة انا متأكدة سراج مستحيل ايحبها انا عارفة كيف كان ايعامل فيها
رانيا:صدقي ياقلبي هذا واحد منحرف تافه شاطر في التمثيل ومثل عليك الحب وانها زي اخته وانتي طيبة صدقتيه بس بعد وصلل للي يبيه سيبك عشان ايرد الحبه القديم اللي ماحد عالم بيه توا هكي صح وضحت القصة وعرفنا ليش طلقك
سندس:المشكلة ماحدش عارف سراج زي ماعرفته ياهو والله سراج مش هكي صح هو كان صايع ومنحرف بس والله تغير مش بس لان حبني تغير لاني قدرت انطلع الانسان اللي جوا توا مرات شاطر ان كذب عليا ومثل الحب بس علي ربي لا هو تقرب من ربي واهتم بصلاته هذا مستحيل ايكون كذب
رانيا:انتي عشان مازال مصدومة تحكي هكي بس بعدين حتعرفي بروحك ان واحد حقير
سندس سكتت
رانيا:شن رايك نطلعو انشوفو الشغل بالك اتغيري جوك اشوي
سندس:هي وصبت مع جيت رساله الفونها ولما شافتها
#يتبع
قولكن شنو فيها الرسالة ومن من وشنو بيصير بعدها كله حنعرفوه في الجزء الثاني مالحلقة ?
بنات الجزء الثاني مالحلقة كتبت منه واجد ومازالي كم حدث ومعش نقدر انكمل نعست بكل انكمله بعدين وانزله لكن بس معش قدرت انركز وخايفة انسرع الاحداث وايجن مش حلوات خلني نرقد وانتريح وبعدين انزله وربي شاهد اني كتبت منه واجد عشان اتكونن مطمنات
اسفة لو فيه لخبطة في الأسماء وأكيد رأيكن ايهمني?
گـتـابـتـي Koka Saleh