منحرف وأحببته

#مـنـحـرف_وأحـبـبـتـه
الـحـلـقـة (41)
گـتـابـتـي #Koka_Saleh
“”””””””””””””””””””””””””“””””””””

سندس:سراج مانقدرش انكملو
سراج بشويش:قتلك اليوم انتي ليا مافيش هروب بكل
سندس:بس انا اليوم مريضة
سراج:بلاش اطروح اي مرض اهو مافيك شيئ
سندس:سراج افهم وخدودها انحمرو وطبست راسها
سراج:اوكي فهمتك بس تعرفي مش وقتها بكل توا
سندس:معليش☺
سراج:باهي كم يوم
سندس;5 أيام
سراج ابتسم:باهي مش مشكلة انتحملوهن وقرصها في خدها
سندس ابتسمت
سراج:دبينه مافيه شيئ معناها خليني نطلع انجيب عشاء جاهز وانجيب افلام انكسدو عليهن في الليل
سندس:خلاص باهي بس جيب افلام حلوة
سراج:شن رايك تمشي معايا
سندس:لا عنديش جو نطلع خليني انكمل شغلي في المطبخ علي ماروحت
سراج:خلاص براحتك وباسها علي خدها وطلع
سندس نزلت بعده وقعدت اتلم في المطبخ
سندس اتفكر:دبينه طلع نمشي انصلي العشاء بسرعة قبل ماايروح ويفطنلي ورقت دغري الدارها توضت ولبس ملاية الصلاة وبدت اتصلي
سراج ركب في سيارته وطلع بس وهو طالع اذكر ان مافيش معاه فلوس ورد بياخذهن مالحوش
وخش ورقى فوق بيمشي الداره بس وهو راقي كان الحوش هادي فسمع سندس وهي اتصلي وقف عند الداره وشافها وهي راكعة واتصلي انصدم وقدم كم خطوة وبيخش علي سندس بيعرف ليش كذبت عليه وبعدها وقف ومشى شور داره بشويش خذا الفلوس وطلع بهدوء ويسحب من دون ماسندس تفنطله وركب في سيارته وهو مصدوم ومش فاهم ليش سندس كذبت عليه رد بظهره عالكرسي وسند راسه عليه وهو مقهور?من فكرة ان سندس تبيش اتكون معاه زي ماهو يبي ايكون معاها والتفسير الوحيد اللي لقاه ان سندس مااتحبش ومافيش منها حتى إعجاب تجاههة (سراج كان عارف ان سندس مااعترفتش بحبها له ولا مرة بس هو كان حاس انها اتحبه من تصرفاتها معاه وان برغم المشكة اللي صارت هي سامحاته ولانها كانت بتقعد معاه حتى الهلها ماحكتش شيئ بس بعد اللي شافه عرف ان احساسه خطأ) ولع سيارته وطلع وهو متضايق ومش شايف شيئ قدامه
“””””””””
سندس كملت صلاتها وفرحانة انها صلت قبل ماسراج ايروح(مسكينة مش جايبة علم من شيئ?)
نزلت تحت وقعدت اتجهز للعشاء وتت سلاطة وحطت اجبان وهريسة وقلت بطاطا وحطت مايونيز وحطت العصير ووتاته كله علي طاولة الأكل ومشت خذت دوش سريع عشان ريحة القلي ولبست(استرتش أسود وعليه كت اسود في الأبيض نظام طبقتين الليت تحت بيضة واللي فوقها قماشة دانتيل شفافة اسود ومن لاورة نظامه طويل)وبعدها قعدت ترجا في سراج وحست ان تاخر ولان شفرته كسرها معش عرفت كيف اتكلمه
“”””””””””””
سراج لف واجد بالسيارة وهو ايفكر شنو ايدير السندس وكيف يصرف معاها وهل ايصارحها باللي شافه أو يسكت بعد تفكير طويييييل قرر
ان ايساير سندس عاللي ادير فيه ومايضغطش عليها في شيئ ومايحكيش اللي شافه ومعش ايحاول ايقرب منها بكل لين ايتأكد من حبها له وتعترف بيه وهي تطلب بروحها اتكون معاه (كان القرار صعب عليه لان كان ايحبها وكان يبي ايكون معاها ويبي زواجهم ايكون حقيقي بس لان حبه الها اكبر من الحاجات هذينا قرر ايدير اللي هي تبيه)
بعد القرار اللي خذاه مشى شور المطعم خذا عشاء وروح للحوش وصل عند الباب خذا نفس #عمييييق عشان ايبان طبيعي وخش عليها والإبتسامة علي وجه
سندس:كنك طولت
سراج:القيت واحد ليا زمان ماشفته قعدت انهدرز معاه ومعش ركزت عالوقت
سندس بنظره عالجنب?: اها واحد
سراج ضحك:والله واحد يامطرشقة امتى تفهمي وتستوعبي ان معش نبي اي وحدة غيرك قناعة شخصية ياحلوة وغمزلها?
سندس ابتسمت:عارفة بس حبيت انتأكد
سراج:وتأكدتي توا
سندس:اها وهات العشاء عشان انوتيه عالطاولة
سراج:بنجي انساعدك
سندس:لالا انت خليك هنا انكمل واناديك
سراج بلوية بوز:وعليش ماتبينيش انساعدك?
سندس:خليني انحس درت حاجة مش ساد عشاء جاهز واخرى بتساعدني عليه
سراج:الله غالب عشانك باير انجيبو في جاهز?
سندس بصدمة?باهي ياسراج شكرا وبعد مادرتها حتى عشاء جاهز معش فيه وبنعزقه ودور ما تاكل
سراج يضحك:وحق ربي انبصر بلااا عليك الجالطة ?
سندس تضحك:الخوف كويس ومشت اتجهز في العشاء
وتت العشاء ونادت سراج عشان ايتعشو وسراج جا
سراج:اوووو عالاجواء السمحة
سندس:ابتسمت:شن رايك
سراج:لا بجد تاعبة وعشان اتعبك هذا نعتبرو العشاء انتي اللي دايرتيه ومش جاهز
سندس بعصبية?:سراج عليش مصر كل مرة اتذكرني بان العشاء جاهز
سراج:نبيك اتعلمي علي حالك ياهبلة بكرا بعد بكرا تجوزي وراجلك يقعد يبيك اطيبيله
سندس ضحكت:توا ناحذ راجل ايجيبلي كل يوم جاهز
سراج:مافيش راجل هبل ايديرها
سندس:فيه انت?
سراج ضحك:لنقني انهبلت من اول يوم شفتك وطرشقت في جرتك وجرت حبك
سندس:يعني مش زاعل عشان نعرفش انطيب وكل يوم ناكلو جاهز وخفيف
سراج:مش زاعل وحتى لو نقعدو العمر كله هكي عادي
سندس:جديات سراج
سراج:والله جديات وهي خلينا ناكلو راه ميت من جوعي
وبدو ياكلو في جو وبصارة وضحك وسراج ماجابش سيرة شيئ ماللي شافه
“”””””””””””””””””
بعد كملو العشاء ساعدها سراج في لم الحوسة ولم المطبخ وبعدها شغلو فيلم اجنبي وقعدو يتفرجو وهما مقمعزين عالكنبة جنب بعضهم وحاطين فواكه ومكسرات وشبس مكسدين عليهن كانت سندس مقمعزة قريب من سراج وسراج متسند عالكنبة وحاط يده عالكنبة من فوق وجاية يده ورا سندس وقريب الفيلم ينتهي سندس نعست وكانت حاطة راسها علي يد سراج
سراج فطنلها بعد نعست قرب منها وحط راسها علي صدره وقعد يمسح بيده علي شعرها
سراج ايفكر;ليش درتي هكي ياسندس ليش مش حابة نقعدو زوجين حقيقين معقولة ماحبيتنيش بعد كل اللي درته ياريتك تقدري اتخشي قلبي عشان تعرفي قديش انحبك تنهد تنهيدة من وسط قلبه وبعدها صبى وشال سندس بين ايديه وخش الدارها وحطها علي سريرها وغير دبشه وجا تمدد جنبها ومسك يدها ورقد
“”””””””””””””
#صباح_يوم_جديد
#عند_رانيا_وفيصل في الشغل
رانيا كانت تحكي مع هيثم وعطاها التصاميم بعد التعديلات وخشت علي فيصل اتوري فيهن له
فيصل:هكي قعدن تمام
رانيا ابتسمت:بجد اول مرة ايمر عليا واحد بذكائك يعني الاخطاء اللي كانن فيه حتى المشرف اللي قبلك مالاحظهنش
فيصل:القصة مش قصة ذكاء هي خبرة بس لان هذا مش أول مشروع نشرف عليه
رانيا:اها تمام
فيصل:تطلعي معايا نشوفو العمال
رانيا:تمام
وطلعو وقعدت تمشي واتخرف هي وفيصل
رانيا:مش عارفة بعد يكمل المشروع شنو اندير اتحسني تعودت عالشغل
فيصل:مااتشيلش في بالك غير يكمل المشروع شغلك قاعد
رانيا:وكيف هذي
فيصل:مافيهش كيف حتى مكتبك واتي
رانيا بإستغراب:ووين هذا
فيصل:قصدك ماقتلكش انا
رانيا:لا ماقتليش
فيصل:مش حكيت مع عمي محمد عليك وعينك معانا
رانيا:أحلف
فيصل:عيب كلام راجل مش عيل راه
رانيا:مش قصدي بس مالفرحة ماصدقتش
فيصل:لا صدقي غير تطلع نتيجتك وتاخذي الإفادة تعيينك يقعد رسمي في الشركة
رانيا:اصلا النتيجة قالو هاليومين
فيصل:ان شاءلله ناجحة وبعدها حتبدي في شغلك دغري
رانيا:بجد مش عارفة شنو انقولك جمايلك عليا وااااجد بكل
فيصل:مش بينا الكلام هذا راكي اتعزي عليا واجد
رانيا:وحتى انت مالكي الا قرعتك
وهما ايهدرزو هكي ومنسجمين كانت في عين اتراقب فيهم وتنظرلهم بنظرات حقد
رانيا:عارف شنو بنمشي انجيب قهوة انجيبلك معايا
فيصل:لنقنه وقتها
رانيا:خلاص كمل لفتك علي ماجبتها
فيصل:تمام
مشت رانيا للكفي اللي ايديرو فيه في القهوة وكان داخل المقر اللي يشتغلو فيه رانيا مشت وكانن نظرات فيصل يلحقن فيها لين اختفت عليه بس في اللحظة هذي فطن ان وسيم لحقها فيصل تنرفز عالاخر ولحقه وصبى قدامه
فيصل:وين ماشي
وسيم:وانت شن دخلك
فيصل:جاوب مااتردش السؤال بسؤال
وسيم:مافيش مشكلة انجاوبك ماشي الرانيا بنعرف ردها
فيصل:ردها حنقوله لكي انا مااتعبش روحك مش موافقة
وسيم:الموضوع هذا مش شورك وانا بنسمع منها هي
فيصل مسكه من قميصه:رانيا اتخصني واي موضوع ايخصها هو شوري انا واحسنلك تطلع مالطريق كلها هذا كان بتحافظ علي برستيجك وماتببش تاخذ طريحة قدامها وكان بتحافظ علي شغلك هنا الزم حدودك ورانيا خط حمر ردبالك اتعداه وانتمنى ان رسالتي وصلاتك احسن مانصرف تصرف مايعجبكش وتوا تقدر تنتلف علي شغلك وطلقه
وسيم شاف الفيصل زين وماردش ولا كلمة ومشى الشغله
وفيصل رد المكانه اللي سيباته فيه رانيا وبعد اشوي جت رانيا جايبة القهوة وقعدو يشربو فيها مع بعضهم
“””””””””””””””””””
#عند_سيرجو_ودوسة
وعى سراج قبلها وخش دوش وطلع دبشه مالدولاب وبدا ايغير بشويش يبيش ايوعي سندس
سندس وعت:صباح الخير
سراج;صباح الورد معليش حبيبي كان زعجتك
سندس:لا وعيت بروحي بس انت وين بتمشي
سراج:بنمشي للشركة ولا انسيتي اني نشتغل
سندس شافتله زين:غريبة واعي بروحك وبتمشي للشركة والاغرب ان حتى عمو ماقالكش تعال
سراج:ماقلنا تغيرنا ياهمي
سندس:دوم هكي انشاءلله بس ليش ماوعيتني انديرلك فطور
سراج:مانبيش انتعبك
سندس تضحك:عساس يعني ماهو كنت كل يوم انديرلك في فطور توا خطرلك اتعب فيا
سراج;ووووه من السانك مايعرفش ايقول كلمة رومانسية بكل عالصبح
سندس:لالا يعرفش وهي البس علي مادرتلك فطور وصبت خشت للحمام غسلت وجت بتطلع وبعدها ردت
سندس:خطرها نبيك اتشيلني معاك
سراج;وين ان شاءلله
سندس:للمشروع تي قريب ايكملو وانا مامشيتش الا اول ايام بس
سراج شافلها;ضروري يعني
سندس حطت يدها في نصها:أها ضروري وهذا شغلي
سراج قرب منها وقرصها في خدها:حاظر مغير مااتعصبش عليا ياحلو?
سندس ابتسمت ومشت جهزت الفطور وفطرت هي وسراج وبعدها هو قعد يرجى فيها علي مالبست وطلع هو وياها ووداها للمشروع وماكان عارف ان فيصل يشتغل غادي واستغرب لما لقاه وفيصل قاله ان عمو محمد هو اللي نقله هنا لين يكمل المشروع وطبعا سراج صدق ونفس القصة حكتها رانيا السندس
سراج قعد حوالي ربع ساعة وبعدها مشى اول حاجة خذا شفرة جديدة وبعدها مشى للشركة
وفي الشركة كان جاي بقوة واندفاع وخش علي باته وقاله ان بيتعلم كل حاجة في الشغل (لان زي ماتعرفو كان ايجي ايسخن في كرسي المكتب وايروح?)
عمو محمد كان مصدوم ماللي طلبه سراج بس فرحته بيه اكثر من صدمته وقعد ايوري فيه في كل حاجة
“””””””””””””””””
#عالساعة1
سراج جا خذا سندس مالمشروع وهما في الطريق سندس قالتله ان تبي هلها ومشولهم وتغدو عندهم وبعد الغداء خرفو معاهم اشوي وعالساعة 4 صبت سعاد بدير قهوة وفرج مشى ايصلي في العصر
سراج:حبي بعد القهوة انروحو
سندس:سراج انا بنبات عندهم والله مرايفة عليهم
سراج:بالجو دوسة بيات لا بتكسدي لعند الليل وفي الليل انروح بيك اوكي غيرها لا
سندس:عشاني سراج
سراج:وحق الله عشانك اندير اي حاجة الا هذي بيات فوتيه
سندس بدلع:سراااج?
سراج:اه ياكبدي مااديريش هكي عارفة ماانتحملكش
سندس بفرحة:يعني وافقت
سراج:لالا بيات لا?
سندس:تي كنك صامط هكي
سراج:تي انتي اللي افهمي الحوش لما تقعدي مش فيه ماانحبش انخشله
سندس:يعني
سراج:يعني كسدي ان شاءلله لعند الفجر وانجيك انروح بيك بس بيات لا
سندس:لعند الفجر هي البيته
سراج:لا مش هي لعند الفجر عادي مانرقدش ونرجاك لاني عارف بتروحي لكن اتباتي يقعد جوي مش تمام راه
سندس:خلاص باهي مش بايته في الليل تعالي
سراج اشر علي عيونه;من عيوني ياعيوني
سندس ابتسمت ?
سراج:نجك ليا وخلاص
سراج:خطرها ماتحكيش شيئ الهلك ماللي صار باتي قالي نحكيلهم بطريقتي
سندس:حاظر
مع جيت سعاد جايبة القهوة وبعدها جا فرج وشربو القهوة مع بعضهم وبعدها سراج روح وسندس قعدت مع هلها
“””””””””””””
#عند_رويدة
كان بكرا امتحانها ووعت مالصبح عشان تقراه بس نفسيتها كانت تاعبة وحتى مش قادرة تستوعب اللي تقرا فيه امها كانت ملاحظة عليها الشيئ هذا بس كل ماتسالها رويدة اتقوللها مافيش شيئ
معاذ كان ايرن عليها مالصبح ومااتردش عليه وبعد كثر عليها قفلت فونها وحاولت اتركز في قرايتها ومعش اتفكر فيه وفي اللي صار
“”””””””””””””””””
مر اليوم عادي جدا بالنسبة للكل
في الليل سراج جا السندس وخذاها من هلها وروح بيها وهما في الطريق
سراج:حبيبي شن رايك نعطيك اترجبي اتسوقي
سندس:لالالا فكني مانبيش
سراج:كنت نحسابك قوية طلعتي خوافة بكل
سندس:انا قوية بكل الا لعند السواقة فكني نبيش انكرر اللي صار زمان
سراج وقف السيارة ولف عليها
سراج:حبيبي ياقلبي اللي صار فات وهذا غلط وكل واحد ايصير معاه انتي مش عارفة وانا انتعلم كم سيارة كسرتها فوق من 4سيارات وعادي اهو مازال انسوق
سندس:بالك انت كسرتهن وانت بروحك بس انا كان معايا بابا وماما يعني كان فيه احتمال لاقدر الله ان ايموت واحد منهم او هما الاثنين بسببي تخيل كان صار هكي راه متت بعدهم
سراج:والحمدلله هذا ماصارش واهم توا عايشين معاك والحادث اللي صار كان مكتوبلكم يعني حتى لو باتك كان هو اللي ايسوق راه صار معاكم
سندس:بس انا اللي كنت انسوق وانا اللي كنت بنقتلهم
سراج;كان كل واحد لما ساق ودار حادث قال معش بنسوق راه مافيش حد ايسوق توا
سندس سكتت
سراج;حبي الغلط ديما ايصير ويقدر الواحد ايصلحه بس اكبر غلط ان الواحد يغلط وماايحاولش ايصلح الغلط متاعه
سندس:بس
سراج:توا بنسألك أفرضي راك درتي امتحان وحليتي ونفس حلك عطيتيه الصحباتك وبعد طلعت النتيجة سقطتي انتي وصحباتك وصحباتك مشن الموضوع عادي اتقولي معش نمتحن مرة اخرى عشان انا اللي سقطت صحباتي
سندس;اكيدة لا
سراج:خلاص نفس الفكرة السواقة حتى هي امتحان ومرات نسقطو فيه وهلك مش معدلين عاللي صار وناسيينه اصلا وبعدين فكري في نص الكباية المليان مش الفاضي قولي الحمدلله هما معايا وربي ماحرمنيش منهم
سندس:اكيدة الحمدلله وربي مايحرمني منهم
سراج:ان شاءلله حبيبي ولا يحرمني منك انتي
سندس سكتت وقعدت اتفكر
سراج مسك ايديها:من اول ماعرفتك وانتي قوية صارن بينا مواقف واجدة قبل مانجوزو عمري ماشفت في عيونك نظرة ضعف او خوف وحتى بعد اجوزنا ماشفتكش ضعيفة ولا مرة وهذي من ضمن الحاجات اللي ايخلني انحبك قوة شخصيتك كل البنات ايميلن للدلع وللتصنع الا انتي وهذا ليش توا مش حاب انشوفك ضعيفة او خايفة من حاجة
سندس:خلاص توا انجرب بس مرة وحدة
سراج ابتسم:تمااام هي انزلي وتعالي في مكاني
نزلت سندس خذت مكان سراج وسراج خذا مكانها
سندس;سراج ذكرني كيف اندير اصلا ناسية وخليك مركز معايا راه ليا واجد عالسواقه
سراج:ماعليك مركز وجنبك وحتي لو درنا حادث روحي مسلم فيها ونفرح كان متت علي ايديك
سندس بعصبية;خلاص سراج معش بنسوق
سراج يضحك:انبصر مش حيصيرلنا شيئ غير ابدي هي وقعد ايذكر فيها باللي بديره
سندس بدت ادير في اللي ايقول عليه سراج وقعدت تذكر في اللي تعلماته كله وبدت اتسوق بالشوية بالشوية وهي خايفة بككككل بس بعد 5دقايق حول الخوف وسلك الجو معاها في السواقه وقعدت اتسوق وسراج جنبها وفرحان بأن سندس قدرت اتعدى خوفها مالسواقه
وصلت سندس بالسيارة لعند الفيلا وكانت فرحانة لانها قدرت اتخطى خوفها وكله كان بفضل سراج
خشو للحوش وغيرو دبشهم وطبعا لان الاثنين واعيين بدري ومش راقدين في القايلة كانو نعسانين بكل فدغري دارو هجوم عالسرير
سراج:اليوم بذلت مجهود في الشغل في حياتي كلها مابذلتش
سندس بإستغراب:شن درت
سراج:اليوم طلبت من باتي ايعلمني الشغل كله ووراني حاجات واجد بجد مسكين باتي الشركة شغلها صعب مش ساهل
سندس:وهذا ليش ديما يبيك اتعلم عشان اتساعده
سراج:باذن الله بس انتعلم كل حاجة ومعش انخليه يتعب اكثر من هكي حتى هو لازمة راحة وفترة نقاهة هو وعفوفة يمشو يدهورو وايعشو حياتهم زي الناس
سندس ابتسمت:ان شاءلله بس راه ياخذك انت الشغل زي ماخذا عمو
سراج غمزلها?كيف خايفة ياخذني منك
سندس:لا مش هكي يعني قصدي اتعب روحك فيه زي عمو
سراج:لا مااتخافيش انا نعرف انسق أموري كويس وتوا بطلي دوة وخلينا انرقدو بكرا ورانا يوم طويل
سندس:تصبح علي خير
سراج:وانتي بخير غمض سراج عيونه
سندس شافتله لقاته مغمض:
سندس:رقدت
سراج شخر?
سندس:بلا صماطة عارفتك واعي
سراج فتح عيونه:ها ياهمي كنك
سندس:شكرا وغطت وجها ورقدت
سراج قرب منها وشال الورغان من عليها
سراج:فيه واحد يشكر واحد بالطريقة هذي
سندس:مش وصلاتك خلاص
سراج:باهي بنعرف عليش تشكري فيا
سندس:عشان كنت سبب اني تجاوزت مخاوفي
سراج ابتسم:هذي ماتشكرينيش عليها لان من يومتها قتلك وانتي معايا مانبيكش اتخافي من شيئ نبيك ديما قوية زي ماعرفتك بزبط
سندس ابتسمت:حاظر
سراج باسها علي جبينها:تصبحي علي خير
سندس:وانت بخير
سراج:عادي انضمك ولا ماايصيرش منها عشان مريضة
سندس انحرجت وخدودها انحمرو:لا عادي
سراج قرب وضمها الحظنه ورقدو
“””””””””””””‘
عند رانيا ساهرة ومكسدة وفاتحة نت وتصفح والحياة ماشية
فيصل ايشوف فيها نشط ومش عارف يلقى سبب ايخش يحكي معاها فيه
قعد ايفكر وايفكر وقرر ان هالمرة مايسبلش وايخش يعترف الرويدة بحبه عن طريق أغنية خش ودزلها مقطع الاغنية كان أسم الأغنية( #يا_أول_حب) ودزلها بعد المقطع رسالة (أسمعي المقطع هذا وانتمنى تفهمي اللي فيه كويس)وسكر نت مع خشت امه عليه
أم فيصل:انت شنو اللي قلته الخالتك اليوم
فيصل:اللي كان لازم ايصير
ام فيصل:اتعلق بنت معاك كم سنة واتسيبها واتقولي اللي لازم ايصير
فيصل:انا ماعلقت حد البنت هي اللي علقتني من يوم اللي حكيتي الخالتي وهي قالتلك صغيرة اتخش للجامعة قبل
ام فيصل:والبنت مازاللها كم شهر واتخش للجامعة عليش سيبتها توا
فيصل:ماحبيتهش مافيش تجاهها اي شعور مش بالغصب هو
ام فيصل;وتوا كيف عرفت ان ماعندكش شعور تجاهها
فيصل:كان مش فارق عندي حب او غيرة بس توا بعد ذقت طعمة الحب فرقت معايا
ام فيصل:قولي انك مازال عالق علي موضوع البنت امتاع المصيف
فيصل:اها عالق عليها وهي اللي بناخذها وغيرها وحق ربي ماني واخذ
أم فيصل:احلم اني انزفها لكي وبرضاك ولا غصبن عنك بتاخذ بنت خالتك وتوا انشوفو كلام من بيمشي وطلعت وخبطت الباب وراها
فيصل بعصبية:بالطول بالعرض مش واخذ الا رانيا وتوا اتشوفو
“”””””””””
#عند_رانيا
انصدمت بعد سمعت المقطع او بالاحرى هي كانت حاسة لكن ماكانت متوقعة ان فيصل يعترف بحبه في الوقت هذا وبذات ان عارف انها قلبها مازال مجروح وانها مازال اتحب رؤوف لعند توا
فيصل في اللحظة هذي خرب كل حاجة وذكر رانيا بماضي كانت طول الوقت اتحاول تنساه وقعدت تذكر اول مرة اعترف فيها رؤوف ان ايحبها وكمل الليل عند رانيا بكى وحنين الذكريات قديمة مش قادرة تنساهن?
“””””””””””””””
#صباح_يوم_جديد
#عند_رويدة
وعت وغسلت وصلت الصبح وراجعت امتحانها وبعدها لبست وطلعت فطرت وشالها رؤوف للإمتحان وتعمدت تمشي متأخر قصدا عشان اتخش والإمتحان بادي وماايحاولش معاذ يحكي معاها بكل
“””””””””””””””””””
#عند_أبطالنا ❤
وعت سندس قبل سراج وخشت للحمام غسلت وتوضت وخذت ملاية الصلاة وسحبت بشويش بيها وطلعت مالدار عشان سراج يفطنلهش
سراج كان واعي وايراقب في تصرفاتها من غير ماتفطنله وبعد طلعت
سراج تنهد:مازلتي مصرة عاللي اديري فيه بس بنعرف ليش اديري هكي باهي اذا مااتحبنيش ليش ماتعترفي بيها واتريحي روحك واتريحيني وليش مااتسيبيني شنو الشيئ المهم اللي مخليك قاعدة معايا
وبعدها ردله عقله
سراج:عساس انا كان قالتلي بنسيبك انسيبها والله لو انموت ماانسيبها وبعدها صبى وخش للحمام ولمى طلع لقى سندس اتلم في السرير
سندس:صباح الخير
سراج:صباح الفل والورد والياسمين علي احلى بنوته في الدنيا
سندس ابتسمت:يالذيذ يارايق انت
سراج:توا فيه واحد يصبح في وجك اللي زي الملاك هذا ومايقعدش رايق
سندس انحرجت:باهي بلا صماطة وبطل عاد
سراج قرب:توا ليش انبطل وانتي مراتي ومن حقي انقولك كلام حلو
سندس:باهي قلته كله خلاص توا هي انزل عشان نفطرو ونمشو
سراج:بنصلي قبل وننزل
سندس:باهي تمام نرجى فيك تحت
سراج:صقع عليك انا نقدر انصلي وانتي لا?
سندس:لا حتى أنا
سراج بخبث:انتي شنو?
سندس:حتى انا توا انصليه بعد يكملن ال 5 أيام
سراج:اها صح
سندس:مااطولش باهي وطلعت
سندس تحكي بروحها:عليك الغبية كلا انا قريب فضحت روحي?
نزلت سندس تحت وبعد اشوي جا سراج وفطرو مع بعضهم وبعدين هما الاثنين رقو عشان يلبسو ويطلعو ويمشي كل واحد الشغله
سراج طلع هو وسندس وشالها للمشروع قبل وطبعا نزل امعاها زي امس
سراج:صباح الخير يانصي
فيصل:صباح النور يالحب
سندس شافتلهم زين?
سراج:ماتنصدميش متعودين هكي راه
سندس:رنوشة مازال ماجتش
فيصل:لا مازال ماجت وكلمتها رقمها مقفل ترا شوفي لو عندك رقم من هلها اصلا غريبة مااتجيش وهي عارفة عندنا شغل مهم اليوم
سندس:لا اكيدة بتجي غير ممكن مش محصلة حد ايجيبها
سراج:كلميها لو ماعندهش حد ايجيبها نمشو انا وياك انجيبوها قبل مانمشي للشركة
سندس:باهي حنكلم امها لان رنا اكيدة في المدرسة وطلعت سندس فونها ورنت علي سمية وسمية ردت
سمية:صباح الخير دوسة شن اخبارك
سندس:بخير اعميمة شن اخبارك انتي وشن اخبار صحتك
سمية:الحمدلله وينك ماعاد جيتينا
سندس:والله كنت لاهية اشوي وان شاءلله حنجيكم الايام الجاية
سمية:اهلا بيك في اي وقت
سندس:اعميمة وين رنوشة غير رنيت عليها فونها مقفل
سمية:وعيتها امبدري قالت مش ماشية
سندس:غريبة باهي تقدري تعطيها ليا انشوف كنها
سمية:لحظة بس ونعطيها لكي
سندس:باهي
خشت سمية علي رانيا وقالتلها تبيك سندس وعطتها الفون وطلعت
رانيا:صباح الخير دوسة
سندس:صباح الخير تي كنك ماتبيش اتجي
رانيا:مريضة اشوي
سندس:الف لاباس عليك في شنو اتحسي
رانيا:معدتي متعبتني اشوي
سندس:باهي حبي الف لاباس عليك وخودي امبرازول كويس وتوا انكلمك بعدين نطمن عليك
رانيا:باهي ياقلبي سلام وسكرت
فيصل:كيف صار مش جاية
سندس:اها قالت مريضة معدتها توجع فيها
فيصل:ان شاءلله سلامتها(وطبعا بينه وبين نفسه كان عارف انها مش مريضة وانها غايبة عشان المقطع اللي امس لانها فهمت قصد فيصل)
سراج:معناها انا بنمشي للشركة حبيبي
سندس:باهي ربي معاك
سراج:ان شاءلله
سراج اشر الفيصل بمعني تعال وراي ومشى شور سيارته وفيصل الحقه
فيصل:كنك
سراج:صحبتها مش جاية خليك معاها مااتسيبهش راه مش متريح للشباب اللي معاكم
فيصل;ولا انا متريحلهم عموما كون هاني
سراج:انا ماانطولش اشوي وانرد ناخذها مافيش داعي تقعد بين شباب بروحها
فيصل:تمام باهي
ركب سراج في سيارته وفيصل رد السندس وقعد قاعد معاها زي ماوصاه سراج بزبط
قعدو فيصل وسندس يشتغلو ومعاهم باقي الشباب وطبعا سندس كان في شغل واجد مش شايفته وتعديلات عالمشروع قعد فيصل ايوري فيهن الها
“””””
مرن ساعتين
رويدة طلعت مالامتحان قبل مامعاذ يطلع عشان تضمن ان يحكيش معاها ودغري رنت علي رؤوف وجاها وروحت ومعاذ لما طلع مالقهش انقهر بكل وحس ان النهاية قربت وان رويدة معش اتحبه ومستحيل حتسامحه وطلع مالجامعة وهو متضايق بكككل ?
“””””‘””””””””””””
سندس وفيصل كملو الشغل وقمعزو يشربو في قهوة هي وفيصل وقعدو ايهدرزو وقاطعهم فون سندس ايرن وكانت بنت تقرا معاها وسندس ردت
سندس:اهلين هبوش شن اخبارك
هبة:تمام دوسة شن اخبارك انتي
سندس:تمام شن خطرني عليك في هالوقت
هبة:نبي انقولك النتيجة طلعت وانتي طلعتي الاولى عالدفعة
سندس صبت وبفرحة:تحكي جد
هبة;وحق ربي جديات وفرحت اني اول من خبرك ان شاءلله ألف مبروووك
سندس:الله ايبارك فيك ورنوشة شن صار فيها
هبة:رانيا هي الخامسة
سندس:باهي فرحتيني وانتي شن صار فيك
هبة:الحمدلله نجحت انا التاسعة ياحنة
سندس:ألف مبرووووك
هبة:الله ايبارك فيك وسلام توا خليني انشوف باقي الدفعة شن صار فيها
سندس:سلام
فيصل:النتيجة صح شن صار فيكن
سندس بفرحة:نجحت الاولى عالدفعة
فيصل:مشاءلله ألف ألف مبروك
سندس:الله ايبارك فيك
فيصل:ورانيا شن صار فيها
سندس:خذتها الخامسة عالدفعة والله هذا مش نجاحها رنوشة ديما الثانية بعدي بس السنة صارنلها ظروف
فيصل:مش مشكلة اهم حاجة ماالعشرة الاوائل
سندس:والله جديات مش مصدقة الحمدلله ياربي تعبي عدش عالفاضي
فيصل:الحمدلله وان شاءلله الف مبرووووك
مع جية سراج
سراج:شن فيه عليش اتباركو
فيصل:افرح ياللي عمرك مافرحت بنجحة مسقمة مراتك نجحت الاولى عالدفعة
سراج بفرحة:تحكي جديات
سندس بفرحة:وحق الله جديات
سراج حظنها:ألف ألف مبروك ياقلبي نجيها ليا الشاطرة ياربي
سندس مالفرحة حظناته زين وبعدها اذكرت انهم في الشغل بعدت منه
سندس بصدمة:سراج نحن في مكان عمل
سراج:واذا يعني مراتي وناجة وفرحان بيها طز في الدنيا كلها وكرها شوره وحظنها
فيصل:سراج تحشم ينعن جد وجك كلهم قعدو ايبحتو فيكم
سندس بعدت منه:خلاص سراج منظرنا قعد بايخ
سراج:عليك تخلف في هالشعب راجل ويحظن في مراته شنو المشكلة بس
سندس:المشكلة ان مافيش عندنا حاجات هكي عيييب فهمت
سراج:خلاص فهمت هي نمشو عشان انفرحو هلي وهلك بنجاحك
سندس:باهي بس استنى انكلم رنوشة انفرحها قبل
سراج:باهي هي كلميها
رنت سندس علي سمية اخرى وردت
سندس:اعميمة مبروك نجاح رنوشة
سمية فرحت وقعدت اتزغرت رانيا سمعتها وطلعت بتشوف شن فيه
رانيا بإستغراب:ماما شن فيه
سمية:مبروووك النجاح واخير حلمك تحقق وقعدتي مهندسة
رانيا بفرحة:جديات ماما
سمية:اهي دوسة عالخط توا تحكيلك
رانيا خذت الفون:جديات نجحت
سندس:الف الف مبروووك ياقلبي
رانيا:الله ايبارك فيك وانتي شن صار فيك
سندس:الحمدلله نجحت
رانيا:الف الف مبروووك باهي شن نجحت
سندس;الخامسة عالدفعة
رانيا:كنت عارفة مش حننجح زي السنين اللي فاتن باهي مش مشكلة اهم شيئ نجحت مالاوائل وانتي شن صا فيك
سندس:خذيتها الأولى
رانيا بفرحة:نجك ليا ديما رافعة راسنا الف مبروك ياعمري
سندس:الله ايبارك فيك وسلام توا بنمشي انفرح بابا وماما
رانيا:سلام وسلميلي عليهم واجد
سندس:يوصل وسكرت
سراج:نمشو حبي
سندس:هي
سراج:سلام يانصي انتلاقو
فيصل:ان شاءلله
سراج وسندس ركبو في السيارة ومشو
فيصل مسك فونه وقعد ايرن علي رانيا بيباركلها بس فونها مازال مقفل ?
“”””””””””””””””””””
#عند_رويدة
روحت للحوش ودغري خشت الدارها وقعدت تبكي من قهرتها مش مصدقة انها شافت معاذ وماقدرتش تحكي معاه هي تبيه واتحبه بس مش قادرة اتسامحه ولا قادرة اتحدد شن تبي كانت طايحة علي سريرها وتبكي بكل حرقة??
امها شافتها بعد خشت بسرعة واستغربت ان حتى خير ماقالتلهش لان مش من عوايدها وخشت في جرتها وانفجعت لما لقتها تبكي هكي
عالية بخوف:كنك يادودي شن صاير معاك
رويدة تبكي ومااتردش
عالية:صارتلكم حاجة في الطريق ولا ماحليتيش في الامتحان
رويدة تبكي وتشهق??
عالية زاد خوفها:كنك يارويدة شن صاير والله رعشتيني احكي قلبي قريب ايوقف
رويدة تبكي:معاذ ياماما
عالية بخوف:كنه معاذ شن صايرله
رويدة تبكي:انا متعاركة معاه ياماما معاذ طلع ماايحبنيش
عالية:انا من اول ماجيتي وكنت عارفة ان صايرة معاك حاجة اهدي واحكيلي بشويش خليني نفهم
رويدة حاولت تهدى وتسكت وقعدت تحكي الامها في كل حاجة صارت مالبداية بكل
عالية:وهو شن قالك مازال ايحبها
رويدة:انا ماخليتش يحكي في الموضوع بكل وقتله نبعدو كم يوم علي بعضنا عشان انفكرو كويس
عالية:انا مانبيش انقولك الموضوع بسيط ومايستاهلش لاني عارفة انها واعرة لاي وحدة انها اتحس ان راجلها قلبه مع غيرها لكن في حالتك انتي البنت ميته يعني مالهش وجود ولو اذكرها شهرين ولا اربعة بعدين حينساها لان انتي اللي معاه وبكرا بعد اتجيبيله اوليد ولا ابنية بتقعدو انتو كل حياته والله ماعاد ايفكر فيها ولا اتجي في باله القصة تبي بس اشوي صبر
رويدة تبكي:اي صبر وانا نقعد نسمع فيه يحلم بيها وايقوللها انحبك ومش بعيد ايجي يوم ايناديلي بأسمها
عالية:توا بنحكيلك حاجة ماعمري حكيتها الواحد لكن قبل بنسألك شن اتشوفي في علاقتنا انا وباتك
رويدة تسمح في دموعها:مافيش احسن من هكي ياريت معاذ ايحبني بنص حب بابا لكي
عالية:باهي لكن عارفة ان اول مااجوزت باتك قعدنا قريب الشهرين ماصارش بينا شيئ والسبب كان وحدة وقاعدة عايشة
رويدة مستغربة;من هذي وشن قصتها
عالية:باتك قبل ماياخذني كان ايحب بنت خالته وكانت بينهم علاقة قوية بكل لكن جدك كان رافض فكرة الزواج مالاقارب ومابش يخطبها له باتك سيب الحوش ودار المستحيل بس جدك كان رافض بكل وبعدها قرر ان يخطبله عشان ينساها وخطبني انا لاني كنت بنت صاحبه وافقت علي باتك وانا مانندريش عاللي صاير وغصبو باتك عالجواز مني ودارو زي كل عيلة ماادير ياتاخد هذي ياانتبرو منك وخذيته وجيت معاه للحوش ومن اول ماخشينا ومازال ماحكى معايا بكل قعد يبكي وايقولي مش انتي البنت اللي نحلم انعيش معاها ومش انتي اللي انحبها انقهرت وانكسر قلبي لكن في نفس الوقت ماعنديش مااندير زيي زي اي بنت في مجتمعنا اللي مايرحمش لو انرد من اول ولا ثاني يوم ولا حتى من اول شهر بيطلع كلام واجد يعني اي حاجة انديرها من مخسوري فقررت نسمع منه حكالي قصته كلها وانا مازال لابسة الفيلو تخيلي الشيئ هذا قعدت انهدي فيه ونحكيله وانقوله كل شيئ نصيب وحكيتله كلام واجد قعدت اول اسبوع معاه هكي وهو كل يوم غير يحكيلي عليها ويبكي وبعد اول اسبوع جاني بروحه وقالي يابنت الناس اللي درتيه مافيش وحدة اديره طيبة قلبك وصبرك عليا واللي درتيه معايا كبير بكل قالي الراجل اللي ربي راضي عليه هو اللي ايطيح في وحدة زيك قالي تحمليني وعطيني فرصة وحاولي اتنسيها ليا قعدنا شهرين ونحن عايشين مع بعضنا زي الخوت ماصار بينا شيئ لكن كان ايعامل في احسن معاملة وصبرت عليه وبعد شهرين بدا الاعجاب بينا بروحه طلب ايصير بينا حاجة وفعلا صار وكل مرة قعدنا انقربو من بعضنا اكثر واكثر انا عرفت كيف انخليه ايحبني قعدت اندير بس في اللي يرضيه واللي نعرفه ايقربه مني قعد كل مرة ايزيد ايحبني ولما حملت بعصام كان طاير مالفرحة وجبت عصام وقعد ماايتحمل فيا شيئ وانا هي عيونه وحملت وجبتله رؤوف زاد حبني وحبهم اكثر وجبتله انتي كبد فيك وزاد حبني وقعد معش يقدر ايعيش بلايا وبنت خالته نساها رسمي اجوزت واطلقت ولما طلقت كان جدك متوفي عرفت انها كلماته عساس موافقة حتى ان تقعد الثانية بس هذك اللحظة باتك هو اللي رفض وقاللها عندي اللي ملت قلبي وعيني وماعاد انبدلها بحد وجاني وحكالي اللي صار كله وحتى اني لا كلمتها لا جيت شورها بعد اللي داراته لاني ضمنته هو خلاص هي معش اتهمني ولو انقولك هي من توا تعرفيها لانك انتي بذات ديما تسالي فيا ليش لما انتلاقو معاها اطنش عليا وانا انقولك مش عارفة
رويدة:قصدك زينب بنت خالتي مسعودة
عالية;اها هي شفتي كيف عرفتيها عمري ماعبرتها ولا انقهرت منها لاني عرفت كيف انطلعها من قلب باتك لو تقعد قدامه اسبوع خلاص مستحيل ايحنلها لان بدل حبها بحبي انا وحبه العياله معش تعنيله شيئ
رويدة:اول مرة نسمع بيها القصة هذي
عالية:لاني انا مادرتلهش سريب وماقعدتش كل مرة نفتح في موضوعها الباتك وانذكره بيها عاملته عساس مافيش ماضي وانسيناه انا وهو
رويدة:ياعوينك بصبرك ياماما
عالية;انا صبرت ونلت حب وعيلة سعيدة ومتريحة شن نبي اكثر من هكي ونبيك اديري زيي ماتقعديش غبية كل مرة اذكريه بيها وبذات انها ميته مش حيه كل مايمشي الخالته ايحقها زي باتك بداية زواجنا كان ايشوف فيها ولما ايروح انشوف في حالته شن تقعد انصبره ونحكيله كلام ايهديه مع اني كنت مقهورة زي اي وحدة لكن مادرتش معاه عركة وكبرت القصة وهذا ليش هو حبني لاني صبرت عليه من دون حتى مانشكي الاي حد قدام الناس كنت انوري ان حياتنا مافيش اسعد منها مابالك انتي ميته وخلاص معش بيشوفها بكل شن فيها كان حلم بيها خليه يحلم وبعد فترة حتى في باله ماعاد اتجي
رويدة:قولك ياماما ينساها
عالية:كان قعدتي شاطرة حينساها ومعش ايفكر الا فيك انتي بس اصبري عليه وحسسيه بحبك واهتمامك وعطفك الراجل كيف العيل الصغير ايحب اللي ايدلعه وايلعبه ويهتم بيه لما اديري هكي والله تاخذي قلبه وعيونه ودنيته كلها خليك عاقلة وماتنهيش زواجك بسبب وحدة ميته
رويدة سكتت وقعدت اتفكر وامها اتشوفلها
رويدة:تعرفي ياماما كلامك ريحني واجد وقنعني انا مكبرة الموضوع بكل وبذات ان معاذ مافاتنيش وايحاول يحكي معايا وانا اللي مانبيش وحتى جيتي هنا ماكانش يبيها قالي انحلو المشكلة قبل لكن انا سكرت راسي
عالية:شفتي ان الموضوع ساهل لو كنتي حكيتي من اول يوم راك ماقعدتيش هنا بكل لكن يالله منها هو ايتعلم
رويدة تنهدت:عارفة ياماما ان اليوم عيد ميلاد معاذ
عالية;وقاعدة هنا ياشاطرة صبي خلي رؤوف ايشيلك وديري حفلة الراجلك واحتفلي معاه وسامحيه عاللي صار وافتحو صفحة جديدة وصدقيني حتكبري في عينه واجد
رويدة ابتسمت وحظنت امها:ربي ايخليك ليا ياأحسن ام في الدنيا
عالية ابتسمت:وايخليك ليا?
رويدة:خلاص انصبي انلم ادبشي وانروح يادوبك انلحق نشري الحاجات عشان انديرله احتفال
عالية:والغداء
رويدة:مانبيش بنمشي انجهز انا والبنات للعيد ميلاد
عالية:باهي اللي اتريحك
صبت رويدة ولمت دبشها وقالت الرؤوف ايشيلها وجت للحوش لقت معاذ مازال ماجا وحكت للبنات وعمتها ان بديرله عيد ميلاده مفاجئة وطلبت مالبنات ايساعدنها في الحاجات واتفقت معاهن ان ماحد ايقوله انها روحت والبنات فرحن بالجو وبدن ايجهزن معاها
“”””””””””””
#عند_رانيا
كانت قايلة وهلها متغديين ورقدو قيلولة وهي مقمعزة في الصالة بروحها واتفرج عالتلفزيون رن جرس الحوش ولما فتحت لقاته ولد جيرانهم ماسك في يده علبة متوسطة الحجم
أنس:هاكي هذي لكي
رانيا:من من هذي ياانوسي
انس:من عمو هذكي
رانيا طلعت راسها وتباوعت وشافت فيصل ابتسم واشرلها بيده وركب في سيارته وعدى
رانيا خشت وسكرت الباب وخشت الدارها وفتحت العلبة لقتها مليانة شكولاطات وفيها علبة صغيرة فيها ساعة اتهبل? وعطر ريحته كانت خيال وكرت صغير مكتوب فيه (عارف عليش قافلة تليفونك وعليش ماجيتيش للشغل بس هذا كله مايمنعش اني انباركلك بنجاحك الف الف مبروك والله فرحتلك من وسط قلبي?)
رانيا تنهدت ونزلو دموعها ومش عارفة كيف تصرف مع فيصل اللي كل تصرفاته الهن سبب واحد وهو ان ايحبها ومش حب عادي
“”””””””””””””””””#عند_دوسة_وسيرجو?
سراج خذا معاها حلو وشالها الهلها عشان ايبشروهن بنجاحها قعدت عند هلها لانهم مسكوها للغداء وهو روح
لكن فيه حاجة دارها سراج وسندس مافطنتلهش سراج اتفق مع ام سندس ان اليوم بيديرلها عشاء كبير عشان نجحتها وحفلة بعد العشاء ومايبيش سندس تعرف شيئ عالموضوع وطلب من امها انها تعزم كل صحباتها واقاربهم كلهم بس من دون سندس ماتفطن واتفق معاها ان اتقول السندس عندها فرح وتغصبها عالمشية معاها عشان سندس تلبس واتجهز روحها وايجو بيها للعشاء من غير ماتفطن الشيئ وام سندس وافقت علي هذا كله واتفقت مع سراج
“””””””””
روح سراج للفيلا وبشر هله بنجاح سندس وفرحو بكل وحكالهم عاللي بيديره وهما وافقو وعفوفة طبعا ماصدقت اتصير حاجة سمحة مع سندس عشان تحتفل بيها واتباهة بيها وبدت تكتب السراج الكل حاجة تبيها
طبعا سراج في الحالات اللي زي هذينا فزعته الوحيدة فيصل دغري من غير اي تفكير كلمه وحكاله اللي بيديره وجاه فيصل ومشو مع بعضهم ايجيبو كل اللي مطلوب منهم
عفوفة عاد مسكت فونها وبدت تجري في اتصالتها وكلمت العيلة كلها فرحانة بكنتها عاد?
كانن تجهيزات العشاء ولا اروع من هكي كانو مقررين العشاء يقعد نظام بوفيه مفتوح للرجالة والصبايا ودارو للصبايا صالة متنقله في جنان الفيلا اما الرجالة فكان مكانهم من ورا الفيلا نظام مرابيع كبار يستخدمو فيهن للحفلات والحفلة اللي بعد العشاء كانت للصبايا وتجهيزاتها استلمتهن عفوفة كلهن وكانت مختارة ضيافة للحفلة اتجنن من انواع حلو االانواع العصائر والمكسرات والشكولاطات وللموالح والفواكه مش منقصة شيئ حتى المواعين اللي حطتهن عالطاولات وحاطة فيهن ضيافة الحفلة كانت من ارقى الأنواع كان نظام عرس الا شوي ناقصة مسرح وعريس وعروس بس
“”””””””””
انجو الدوسة اللي امها غصبتها عالفرح عساس فرح بنت صاحبة امها ولما امها سكنتلها رنت علي سيرجو عساس بتمشي للفيلا واتجيب دبشها من غادي بس سراج قاللها ان مش فاضي ياخذها وايردها وقاللها اتقوله شن تبي وايجبه الها وصاته عالفستان اللي تبيه والاكسسوارات والجو هذا وجابهن الها سراج لكن اصر وحايل عليها عساس كيف اول مناسبة لكي بعد فرحك وماتمشيش الكوافيرة طبعا سندس اقتنعت وبذات ان امها ادخلت وقالتها مااتصيرش لازم تمشي للكوافير وشالها عمكم سراج هي وامها للكوافير وقاللها لما اتكملي رنيلي انجي ناخذك انا للفرح
“”””””””””””
#عند_رويدة
كانت اتجهز للعيد ميلاد وفرحانة بكل وزينت جناحهم تزيينة اتجنن وجهزت تورته وموالح وعصائر ودارت جو حلو ولبست ومكيجت ووتت روحها علي جية معاذ حتى بعد كلمتها رانيا عشان اتجي للحفلة امتاع سندس اعتذرت وقالتلها ان بتحتفل بعيد ميلاد معاذ وتوا اتجيها ثاني يوم اتباركلها
رانيا طبعا جهزت روحها هي وامها ورنا عساس بيمشن يحظرن الحفلة
“”””””””””””””””
#الساعة 8
سندس رنت علي سراج وجا خذاها من الكوافير هي وامها وفي الطريق سندس لاحظت ان سراج ماشي في طريق الفيلا
سندس:سراج وين ماشي مش هذي طريق الفيلا
سراج:بناخذ حاجة مالحوش عالسريع ونطلعو
سندس:باهي مغير راه تاخرنا اكيدة القاعة فتحت توا
سراج:لا مش حنطول ووصلو للفيلا وخشو
سراج نزل وفتح الباب السندس
سندس:شن فيه
سراج ابتسم:انزلي يااحلى ملاك في الدنيا
سندس مصدومة ومش فاهمة شيئ
سعاد:الف مبروك النجاح واشكري سراج دايرلك حفلة النجاحك وكان يبيها مفاجئة
سندس:قصدكم مالصبح تضحكو عليا
عفوفة جت من غادي واتزغرت
عفاف:لووووللووولي الف مبروك ياقلبي وحظنت سندس
سندس:الله ايبارك في اعميمة
عفاف:الله واكبر علي كنتي جمال وذكاء والله سراج محظوظ
سندس ابتسمت:انا اللي محظوظة اللي عندي عمة زيك
سراج رفع حاجة?:وبالنسبة للي جهز كله حاجة وتاعب مالصعب حتي دبشه ماغيرش يطلع مصري ماحد ايقوله محظوظ فيك
سندس ضحكت:بالشوية علي روحك اكيدة محظوظة فيك حتى انت بجد شكرا سراج علي كل حاجة
سراج:مانبيكش تشكريني نبيك اتخشي وتنسجمي جوا انتي اميرة الحفلة اليوم ياأميرتي انا وقرب وباسها علي جبينها وبعدها حكالها بشويش
سراج:مالاخر طالعة طرف بكل قلبي الصغير لا يتحمل هذه الكائنات الجميلة?
سندس ابتسمت:والله مجنون
سراج:مجنون فيك تي والله انحبك
عفاف:إحم احم تحشمو راه نسمعو فيكم
سعاد:بكل كلا جيل توا معش ايتحشمو بكل
سراج:تي عليش بنتحشم مراتي وانحبها وحق ربي انحبها وقعد ايعلي في صوته
عفاف قعدت ادف فيه:اس اس تحشم الصبايا يسمعن فيك هي اركب في سيارتك بلا كشايف زايدة
سراج:بلا دف اني ماشي خلاص
وركب في سيارته وطلع
وسندس خشت مع امها وعمتها وبدت عفوفة من خشتها وهي اتزغرت اتقول خاشة عروس وقعدو الكل ايباركولها عالنجاح وبعدها قمعزت مع رانيا عالطاولة وقعدت اتهدرز معاها وكان جو واغاني كانه عرس وبعد اشوي فتحو البوفيه وقعدو المعازيم ايتعشو وجو كان خيالي بكككل
(دوسة كانت لابسة فستان طويل وردي درجة من الوان الجسم وكان نظامه ظابط وامبين تفاصيل جسمها الحلوة ودايرة مكياج هادي وطالقة شعرها وقصاته نظام جنب طويل وجنب قصير وكان منظرها فعلا زي الاميرة)
“””””””””””
بعد العشاء قعدت عفوفة اتجهز التطليعة تورته حجمها كبير خيالي وعليها صورة دوسة وبطلعها للحفلة
“”””””‘”””””
رنوشة لما جت للفرح فتحت فونها عشان سندس مااتشك في شيئ وكانت مقمعزة مع سندس وايهدرزن وبينما وهنا ايهدرزن جتها رسالة من فيصل(لو سمحتي بنطلب طلب ولو اتعزيني جديات اديريه ليا انا حاليا قاعد قدام حوش سراج نبيك 5دقايق انقولك كلمتين مش اكثر)
رانيا شافت الرسالة وقعدت حايرة ومش عارفة شنو ادير

طلعو الخدم التورته للمعازيم وحطوها ونادت عفاف علي سندس سندس صبت مصدومة ومعش عرفت شن بيصير هي وصلت عند الطاولة اللي عليها التورته وخش سراج (وكان لابس جينز اسود وعلي قميص اسود وجاكة واقفة كحلي داكن وكاويش كحلي وطالع طررررررف??)وكان ماسك في يده باقة ورد
سندس لما شافت سراج حطت يدها علي فمها وعيونها قعدن فيهن لمعة اتهبل مالفرحة سراج وصل فيها ورك ركبة ونص ومدلها الباقة اللي كان فيها هدية اخرى وهي مفتاح سيارة
سراج:ألف الف ألف مبرووووك ياسعادتي هدية متواضعة بكل الاحلى ملاك في الدنيا ومتاكد حتى لو جبت الدنيا كلها مش حتوفي اشوي ماللي درتيه ليا انتي سبب اكتشافي للحياة اللي كنت المفروض نعرفها من زمان
سندس الدموع قعدن في عيونها بس ماخلتهنش ينزلن سراج صبى وباسها علي جبينها وحظنها حظن زيين بان من عروق ايديه اللي كانن شادات وكان منزل راسه جنب وذنها ويحكيلها بشويش
سراج:وحق الله انحبك ومعش نقدر انعيش بلاك
“””””””””
#عند_رويدة
معاذ طبعا من طلعته في الصبح معش روح وقعدو كلهم يرجو فيه وقلقو لما طول لان مش من عوايده ولما رنو عليه لقوه مقفل
قعدو قالقين ومشغولين عالاخر ورنو علي ضنى عمه عساس بيشوفوه عند اصحابه ومن بين ضنا عمه كان خو لينا وجا حتى هو قالق ومشغول ومشى الاصحابه ايدورو فيه وفي اللحظة هذي خشت أسيل وشافت كيف الكل متوترين وخايفين علي معاذ اللي ماحد عارف عنه شيئ
خشت أسيل وبكل برود قمعزت عالصالون وحطت كراع علي كراع
اسيل:قصدكم انتو مشغولين علي معاذ
مروة بعصبية:شن رايك انتي
أسيل ضحكت:ماعندكم عليش قالقين عليه معاذ قاعد
رويدة:وين قاعد احكي
اسيل:معاذ مالصبح من لما روح مالجامعة وهو في حوشه هو ولينا انتو انسيتو ان اليوم عيد ميلاده وهو كل سنة يحتفل فيه مع لينا في الحوش
رويدة انصدمت ونزلو دموعها;وين حوشهم هذا
اسيل:كيف مش عارفتيه الحوش اللي مسكر جنب جنان الحوش
مروة:استني اسيل كذابة مش اول مرة تكذب
اسيل بعصبية:انا مانكذبش وكان مش مصدقين اطلعو شوفوه
رويدة طلعت تجري وهي وصلت عند الباب ومعاذ طلع من جوا الحوش
رويدة مصدومة وبعصبية وتبكي:انا جاية عشانك وسامحتك ودايرتلك حفلة عيد ميلادك وبنحتفل معاك وانت هنا تحتفل مع وحدة ميتة
معاذ:خليني انفهمك اشوية
رويدة بعصبية وصوت عالي:شنو اتفهمني كل حاجة واضحة انا الغلطانة اللي بنبدي صفحة جديدة مع واحد زيك انت ماتستاهلش شيئ انت واحد خوان وكذاب
معاذ قرب منها:حبيبي مااديرش هكي اسسس وانا انفهمك اللي صاير
رويدة دفاته:طلقني طلقني معش بنعيش مع واحد زيك
معاذ بصدمة:انتي شنو اتقولي مستحيل انطلقك
رويدة تبكي وبعصبية:طلقني انا نكرهك نكرهك وفجاة لفت الدنيا بيها وطاحت من طولها
“”””””””””””””””””””
رانيا كانت فرحانة باللي ايصير مع دوسة ومش مصدقة نقطة التغير اللي وصللها سراج وفي اللحظة هذي جتها رسالة من فيصل مكتوب فيها(راه مازال نرجى فيك)في اللحظة هذي رانيا قررت تمشيله وصبت ومشتله
‘”””””””””””””
دوسة وسيرجو كملو الحظن
سراج مسك ايديها وقرب منها
سراج:اتحبيني
سندس اتشوف العيونه وذايبة وقلبها كان هو المتحكم في عقلها وقررت اتقولها
سندس:
تالين جت من ورا سراج وغمضتله عيونه:سيرجووو حبيبي?
سندس فكت ايديها من سراج وقعدت مصدومة
#يتبع
اذكرتوها تالين صديقته اللي في ألمانيا?
قولكن شن سبب جيتها وهل حيكون ضار ولا نافع وشن رد سندس عاللي صار وشن حيدير سراج بعد اللي صار وشن احساسه اصلا تجاه تالين?
أما فيصل قولكن شن يبي من رانيا وشن حيكون موقف رانيا من كلامه الها?
أما معاذ كيف حيواجه المصيبة اللي حط نفسه فيها وهل رويدة حتقعد مصرة عالطلاق?
مقطع الاغنية امتاع فيصل حنزله في منشور بروحه❤
كله حنعرفوه في الحلقة الجاية ☺
حلقة #طوييييلة بكل ان شاءلله تعجبكن?

أسفة لو فيه لخبطة في الأسماء واكيد رأيكم ايهمني?
گـتـابـتـي @[100009