منحرف وأحببته

#مـنـحـرف_وأحـبـبـتـه
الـحـلـقـة (37)
گـتـابـتـي #Koka_Saleh
“”””””””””””””””””””””””””“”””””””””””
إذا أردت أن تغير مسار حياتكلا ترسم الطريق قبل ان تمحي ماضيك(هذي مني السراج?)
“”””””””””””””””””””””””””“”””””””
وبعد الغداء وتحديدا الساعة 3 طلع سراج بيمشي ايجيب النتيجة ركب سراج في سيارته وجاه باته
محمد:سراج بنمشي معاك
سراج:عليش انا بنجيبها وانجي هنا
محمد:مانضمنكش ياسراج انا بنسمع نتيجة التحليل بروحي
سراج:باهي هي اركب وركب عمو محمد ومشو مع بعضهم للمعمل ونزلو
سراج:شن الجو عومي
معتصم:تمام
سراج:شن صار طلعت النتيجة
معتصم:اها طلعت اهي خوذها
سراج:وشنو النتيجة
معتصم:البنت صح حامل
محمد:والتحليل الثاني شن نتيجته
معتصم:مش عارف شن انقول
سراج:احكي شنو
معتصم:الابوة ثبتت عليك ياسراج
محمد بصدمة:يعني صح هو اب الطفل
معتصم:اها هو اب الطفل
سراج:مستحيل هذا كذب
معتصم;شنو اللي كذب ياسراج اهن التحاليل قدامك وعاودتهن مرتين عشان انتأكد مالنتيجة وامشي الاي دكتور وحيقولك النتيجة وبعدين انت عارفني كويس ياسراج مش اول مرة انديرلك تحليل ولا ناسي
سراج:مش ناسي لكن كيف اتجي وانا متأكد انها مش حامل مني انت عارفني مانغلطش غلط زي هذا بكل
معتصم:الصدفة اتصير ياسراج وهذا ماكتبلك ربي
محمد:هذا ماراد ربي ياسراج وخلاص كل شيئ بان والتحاليل مافيهن كذب
سراج:بس ياباتي انا عارف انها مش حامل مني انا متأكد انا عمري ماخليت بنت تحمل مني مش غبي ياهو
محمد:التحالي اهو قدامنا والنتيجة طلعت معقولة بنكذب تحاليل وطب وبنصدق كلامك انت خلاص البنت حامل منك وفضت
معتصم:عمي لو سراج مش مصدق نتيجة التحاليل خوذها المختبر اخرى عشان ايزيد ايتأكد
محمد:لا كيف هو اللي اختار ايدير التحليل عندك يعني واثق فيك مايلزمش الامر انشوفو مختبر اخرى النتيجة واضحة مافيهش شك
معتصم:سراج كان مش مصدق النتيجة نقدر انعاودها لكي او اختار معمل اخرى وشوفها والله مانزعل منك الموضوع حساس وانت لازم اتكون مصدق ومقتنع مية في المية
سراج كان يمسح في يده علي لحيته وساكت ومش قادر حتى ايفكر
محمد:خلاص يامعتصم الموضوع انتهى والنتيجة سليمة مالاول كنت حاس ان البنت ماتكذبش والمهم توا ان اللي دار غلط ايصلحه
سراج شاف الباته وعرفه شن يقصد وسكت لان ماعرفش شن بيقوله
محمد:هيا خلينا انروحو للفيلا وسراج طلع قدامه
محمد:شكرا يامعتصم وياريت اللي صار يقعد بينا لين انلمو الموضوع
معتصم:اكيدة ياعمي كون هاني ماكأنه صار شيئ
محمد:تسلم وطلع مالمختبر ولقى سراج في السيارة وركب معاه ومشو للفيلا وطول الطريق وسراج ساكت ومايبيش يحكي في الموضوع ووصلو للفيلا ومحمد نزل
محمد:ماتبيش تنزل اتقوللهم عالنتيجة
سراج:قوللهم انت انا عندي شغل (وسراج لا عنده شغل لا شيئ لكن مش قادر ايحط عينه في عين سندس بعد النتيجة اللي طلعت خايف من رد فعلها)
محمد:بس تهيالي تحكي انت أحسن عشان سندس
سراج:شن بنقوللها ياباتي ماعنديش جراءة حتى انخليها اتشوفني بعد تعرف النتيجة
محمد:خلاص حنحكي انا ولازم اتروح هنا عشان انقررو امتى نمشو الهل البنت ونقرو فاتحتها اشوي وبطن البنت اتبان
سراج سكت وطلع بسيارته
“”””‘
ومحمد خش عليهم وفي يده التحاليل ولقى هدى ترجى فيه واول ماخش جاته تجري
هدى;ها طمني ياعمي
محمد:وين سندس
هدى:مش عارفة بس قولي النتيجة بسرعه
محمد:لازم سندس اتكون قاعدة وتسمع
محمد كلم الخدامة عشان اتكلم سندس
سندس نزلت وكانت متوترة وخايفة مالنتيجة اللي طلعت
سندس:نعم ياعمو قالو تبيني
محمد:قمعزي سندس بنحكيلكن اللي صار
سندس قمعزت وكانت حتى هدى مقمعزة
هدى:هيا قوللنا شنو النتيجة
محمد:سندس يابنتي بعد الكلام اللي بنحكيه توا انتي حتكوني حرة في قرارك اللي بتاخذيه ونوعدك انا مافيش حد حيوقف قدام قرارك نهائي
سندس هزت براسها بمعنى تمام وهي قلبها كان نار وخايفة صح هي مقررة انها اتسيب سراج بس خوفها مالنتيجة تلقائي ماكانت لاقية الخوفها مبرر يمكن لانها كانت حاطة امل ان لو الطفل مش له حتكون معاه
محمد:مشينا توا للمعمل والقينا النتيجة طالعة والطفل طلع فعلا السراج وهدى كانت تحكي في الصدق
سندس وكأن حد صب عليها مية مسقعة كان عندها امل ان اتكون هدى تكذب
هدى:قلتلكم مالاول ماصدقتونيش
محمد:انا حنحكيلك ياسندس كلام واسمعيه وبعدها قرري قرارك
سندس شافتله وهي ساكتة وماردتش ولا كلمة كانت بس تسمع
محمد;سراج غلط وماننكرش ابدا غلطه ولازم الغلط يصلح في الاخير البنت بنت ناس وحتى هي غلطت بس لازم ينستر عليها واللي في بطنها هذا ولدنا ومن دمنا ولحمنا ومانقدروش انتخلو عليه
سندس كانت اتهز براسها بمعنى فاهمة
محمد:لكن اللي انا انتمناه منك انك ماتطلقيش واتخليك مع سراج لان حبك بصدق ودليل حبه لكي ان تغير عن زمان واجد وكلنا لاحظنا الشيئ هذا واللي بنوصله لكي ان حتى لو اجوز وحدة ثانية فهذا مش معناها ان ماايحبكش او خانك اللي صار مع سراج كان قبل مايعرفك انتمنى وبكل صدق ان اتخليك معاه عشان سراج وعشاني انا وعفاف لان مانبوكش اتسيبينا وطبعا في الاخير هذا قرارك انتي واللي بتقرريه نحن حنرضو بيه ولو حابة اتكملي وشايلة هم هلك مااتفكريش فيهم هلك انا حنحكي معاهم وانفهمهم كل حاجة
هدى كانت ترجى في رد سندس واتمناها انها تطلب الطلاق لانها كانت كارهتها وكانت عارفة لو سندس قعدت مع سراج وهو ايحبها هكي معناها سراج مش حيجي شورها نهائي ولا حيحبها
سندس:انت عارف ياعمو قديش انحبك انت واعميمة ويشهد ربي عليا اني حاسبتكم زي بابا وماما ومن اول ماجيتكم وانتو اتعاملو فيا بحب اكثر حتى من سراج ولو تطلب مني اي حاجة حنديرها لكي من غير ماانفكر بس اني انكمل مع سراج هذي مستحيل بعد اللي داره كله
محمد:باهي انتي عاودي فكري في الموضوع مرات تقليله عذر
سندس:مافيش عذر الواحد كان بيضرني وواحد مستهتر في حياته زي سراج
محمد:كنت انتمنى ايكون قرارك عكس هكي بس طبعا هذي حياتك وانتي حرة فيها
هدى:ممكن نعرف انا كيف حيصير معايا لان ليا فترة هنا وهلي مش عارفين وين مشيت واكيدة مشغولين وايدورو فيا
محمد:ان شاءلله مش حيصير الا كل خير انا حكيت مع سراج واليوم حيجي نتفقو علي يوم خلال الاسبوع هذا عشان نمشو الهلك وانتفاهمو معاهم ونقرو فاتحتك بس طبعا لا حيكون فيه فرح لا شيئ
سندس:واعميمة كي بتخبروها بالموضوع من اشوي سألتني وبتعرف شن صار بيني وبين سراج ومعش عرفت نحكي شيئ وطلعت روحي مالموضوع بالغصب
محمد:مااتشيليش في بالك انا حنحكيلها وانفهمها بشويش
سندس:باهي
محمد;نستاذن منكن بنمشي انشوفها
سندس:اذنك معاك عمو
عدى محمد من جنبهن وسندس جت بتمشي حتى هي
هدى:حسيتك زي المقهورة كيف صار شكلك حتى انتي حبيتي سراج
سندس:هدى ماتدخليش في شيئ مالكش فيه وياريت الايام اللي انا قاعدتهن هنا مانبيش اي كلمة تجمعنا يعني تخيليني مش قاعدة بكل
هدى:ومن قال انا شايفتك اصلا انا كل القصة مستغربة وحدة زيك كانت رافضة الحب بكل وتوا اتحب ومقهورة اني خذيت منها حبيبها ولا بس كنتي اتمثلي علينا في الشرف وياشريني انا شريفة ومش متاع علاقات وانتي كنتي راقدة في العسل مع سراج
سندس عصبت:اولا سراج انا ماانحبش ولو كنت انحبه صدقيني مستحيل انخليه الوحدة زيك وبذات انك شفتي بعيونك كيف متمسك بيا ولو انا نبيه صدقيني مش حنخليه حتى ياخذك بس انا عندي كرامة الشيئ اللي امثالك يفتقدوه وبعدين كلمة شرف انتي اخر وحدة تحكيها علي السانك مانبيش انذكرك ليش جيتي هنا وليش سراج بياخذك انتي ارخص بنت مرت عليا والعلمك انا مانبيش انكمل مع سراج لان كرامتي ماتسمحليش ان نشارك انا وانتي في راجل واحد انتي ارخص بواجد اني نساوو انا وانتي في شيئ واحد انتي عارفة كويس ان فرق السماء عالارض بيني وبينك هذا ليش قررت انسيبه لكي وياريت بعد الكلام اللي سمعتيه توا معش اتحاولي تحكي امعايا احسن ماتسمعي أكثر من هكي وعدت وسيبتها
هدى عصبت:مغرورة وحقيرة بس عندي اهم شيئ قهرتك وخذيت الشخص الوحيد اللي حبيتيه وحنكون ام عياله وانتي حتكوني برا من حياته كلها بمجرد ماايجي البيبي
“””””
سندس ركبت الدارها وقمعزت عالسرير وهي مقهورة ان حست وحدة زي هدى انتصرت عليها وخذت منها الشخص الوحيد اللي حباته واللي متاكدة مش حتقدر اتحب بعده في نفس الوقت كان جرحها من سراج كبير وكانت عارفة ان لو كملت معاه مش حتطلعلهم بس قصة هدى حيطلعن الف قصة اخرى لان ماضي سراج حيقعد ايلاحقه في مستقبله وفي نفس الوقت ماكانت ضامنة ان سراج حيستمر في تغيره هذا كانت خايفة ان لو رضت وكملت معاه وهدى في حياته وبعد ياخذ اللي يبيه واللي طلبه من اول يوم شافها فيه ان ايرد زي قبل ومعش اتجيها فرصة زي هذي انها اتسيبه لانها خايفة اتعلق فيه اكثر واتحبه اكثر واكثر فيقعد قرار الطلاق صعب بالنسبة الها حطت راسها علي مخدتها وهي كل هالافكار في راسها وأكثر شيئ كانت اتفكر فيه وخايفة منه فكرة حياتها اللي حتكون بلا سراج وكيف حترد اتقبلها
“”””’
#عند_سراج
لف بالسيارة واجد وهو ايفكر في سندس وهو كان عارف رد فعلها وان بتسيبه واكثر شيئ كان خايف منه هو حياته اللي حتكون بلا سندس بعد كل هالحب اللي حبه الها برغم انها مابينتلش اي حب كان يمشي بسيارته وايفكر ومافطنش الروحه الا وهو عند البحر نزل وقمعز وقعد ايشوف للبحر وكأن بيحكيله اللي في قلبه كان ايشوف للبحر ويذكر في كل لحظة كانت له مع سندس وكيف ان خسرها بسبب اللي داره في الماضي وبينما وهو ايفكر هكي رن فونه وكان فيصل سراج شاف للفون ومابش ايرد فصل فيصل ورد رن مرة ثانية بس هالمرة سراج رد
سراج:ها فيصل
فيصل:دبينك قلت فيصل يبقى الحكاية تأزمت والطفل طلع منك
سراج:هكي التحاليل قالن بس انا مش مصدقهن انا حاس ان فيه شيئ غلط
فيصل:كيف غلط ياسراج هذا تحليل مش لعبة ودايرة عند معتصم وانت عارف معتصم مش اول مرة انشيلوله حد ايديرله تحليل لبنات اللي انجيبو فيهن كلهن معتصم ايحللهن كنك انت
سراج:عارف لكن كيف بنشرحلك بس
فيصل:اسمع الدوة عالتليفون ماايصيرش منها تعالي وخلينا نحكو ونفهم منك بالك نلقو حل
سراج:انا قاعد عالبحر وماعنديش جو انسوق انت اللي تعالي
فيصل:خلاص اشوي وانكون عندك
سراج:تم وسكر
بعد حوالي ربع ساعة فيصل كان عنده
فيصل نزل من سيارته
فيصل:شن جوك توا يانصي
سراج:مش تمام بكل
فيصل:باهي فهمني القصة ليش انت متأكد انها مش حامل منك
سراج:يافيصل انا مش اصغير ومش هذي اول مرة نقضي ليلة مع بنت وعارف كويس شنو اللي ايخلي البنت تحمل
فيصل:يعني متأكد انك
سراج:فيصل مالأخر هكي انا عمري ماقضيت ليلة مع بنت بلا واقي
فيصل:اذكر ممكن اتكون سكران وانسيت او اي حاجة
سراج:انا اليوم هذكي بذات ماكنتش سكران واالي درته انا وهي كان في النهار وفي عز تركيزي وماشربنش بكل الحاجة الوحيدة اللي صدمتني لما كنت معاها انها كانت مازالت بنت وهذا عشان نثبتلك اني كنت مركز
فيصل:موضوع ايحير وغريب وحدة تاخذ فلوس مقابل ترقد معاها ولما ايصير اللي ايصير تلقاها بنت وفوق من هذا تحمل منك وانت اتقول متاكد ان واخذ احتياطك في انها ماتحملش منك ونتائج التحاليل ايطلعن ان الطفل منك ولو ان النتائج واخذينهن منها او هي جايبتهن انقولو مزورات بس انت درت التحليل عند معتصم وانا كنت معاك ومعتصم مستحيل يكذب وبذات علينا يعني شنو القصة
سراج;وانا هذا اللي محيرني ولو نحكي الباتي اللي حكيته هذا مش حيصدقني لان التحاليل قدامه والتحاليل مايكذبنش وحيقولي انت اللي كنت سكران وناسي
فيصل:باهي شن رد فعل سندس بعد عرفت النتيجة
سراج:انا ماخشيتش للفيلا بكل وقلت الباتي هو اللي يحكيلهم ماعنديش وجه انشوفها شن بنقوللها اصلا متأكد انها لما تسمع النتيجة حتصر علي قرارها أكثر
فيصل:باهي ليش مااتحاول تحكيلها اللي حكيته ليا توا وانك واثق انها مش حامل منك
سراج:بالله عليك كيف بنشرحلها كلام زي هذا كيف بنشرحلها اللي اندير فيه مع البنات مانقدرش انا كل ماانشوفها ونذكر اللي كنت اندير فيه نكره روحي بكل وبعدين اصلا هي قصتها ومشكلتها مش الحمل هي زادت كرهتني بعد عرفت ان سبب معرفتي بهدى كانت خطة عشان انظرها
فيصل:قصتكم تعقدت لكن باذن الله كل شيئ له حل
سراج:اي حل وباتي قالي بعد اتروح بيحدد يوم عشان نمشو الهل هدى وانفهموهم وانحلو المشكلة ونقرو الفاتحة تخيل بنجوز وحدة اخرى خاطيها يعني بينتهى زواجنا قبل مايبدى انا خلاص تعبت حاس روحي مش قادر انواجه شيئ تعرف مرات انقول ياريت ماعرفتها ولا اجوزتها كنت عايش حياتي بالطول والعرض ومقضيها وماعنديش ولا هم في راسي بس مجرد ماهي خشت حياتي قلبتها ليا ولما فرحت بيها وحبيتها واكتشفت ان هذي الحياة اللي لازم انعيشها انقلبت من جديد وماضيي قعد ايطارد فيا وقلبلي حياتي جحيم
فيصل:انت ليش اتفكر بالطريقة السلبية هذي ليش مااتشوف الموضوع بطريقة ايجابية ليش مااتقول اللي صار عشان ربي ايوعيك وايعرفك ان اللي كنت ادير فيه غلط وان ربي بيعلمك عشان اترد الطريقه قبل ماينتهى كل شيئ وتندم يوم معش ينفع الندم ليش بدل مااتفكر في خسارتك السندس ليش مااتفكر ان ربي عوضك بطفل ايشيل اسمك واسم عيلتك لان انت عارف لو قعدت ادير زي اللي كنت ادير فيه زمان عمرك مااتفرح هلك بطفل ايشيل اسمك واسمهم
سراج:انا معاك في ان ربي ايعاقب فيا في اللي درته بس حسيت العقاب اكبر من طاقتي ولو عالطفل انت عارف كويس ان اخر همي اني انكون اب وبذات لو جا بطريقة زي هذي ومن وحدة كارهها وماانحبهش ممكن لو كان من سندس كنت حنفرح بيه اكثر
فيصل:ماعندكش حل الا انك اتسلم امرك بيد ربي وهو اللي حيجيبلك الحل اللي ايريحك
سراج:الحل الوحيد اللي حيحل مشكلتي انا عارفة كويس شنو وحنديره وحنريح راسي بكل
فيصل:شن بدير ياسراج
سراج:كل شبئ في وقته حلو
فيصل:كان تحكيلي شن في عقلك لاني بعد تقعد تحكي هكي انخاف منك
سراج ماردش وقعد ساكت وايشوف للبحر وفيصل كان مش عارف شنو اللي ايدور في راس سراج بس كان خايف منه
(الحاجة اللي مش عارفينها في سراج كان صوته حلوو?وكان في بعض السهرات في الشقة ايغنيلهم بس ديما الاغاني اللي ايغني فيهن اجنبية وايميلن للفرح أكثر)
سراج ساكت وايشوف للبحر وبعدها قعد ايغني
#جيتك_يابحر_قلبي_عامر?
#حكايتي_حكاية_راني_مدمرر?
#سيدي_ربي_راني_صابر?
#مااالك_يازهري_كافر?
فيصل قعد يسمع فيه وحاس بكل كلمه قالها سراج وواجعه صاحبه اللي الحياة انقلبت عليه واسكرت في وجه
“””””
#عند_رانيا
قاعدة هي ورنا وامها وباتها في الجنان ويشربو في قهوة العشية مع رنت جرس الحوش وطلع باتها بيشوف من ولما فتح كاانت
رويدة بإبتسامه:أهلين عمو
بات رانيا بإستغراب:اهلا رويدة
رانيا شافتها وبفرحة جت تجري وحظنت رويدة
رانيا تبكي:رايفت عليك مش مصدقة انك قدامي
رويدة تبكي:وانا والله مرايفة عليك واجد
وبعد هالحظن السمح سلمت رويدة علي هل رانيا بس هل رانيا بانت علي وجوهم ان مش عاجبتهم جية رويدة الهم
رويدة:انا عارفة ان صدمتكم جيتي ومرات اتكون حتى مش عاجبتكم بس نبيكم تعرفو انا ورنوشة ودوسة مش بس صحبات نحن خوات يعني صعب اتفرقونا ومش حنرضو اتفرقونا مهما درتو بس اللي نبي نحكيه ان انا توا اجوزت ومش عند هلي زي زمان يعني لو جيت الرانيا او جتني هذا مش حيضر ولا وحدة فينا في شيئ
بات رانيا:بس نحن قلنا كلمة الهلك وان خلاص العلاقة حتنتهى
رويدة:انا زمان وانا عندهم درت زي مايبو بس توا انا عند راجل وهو اللي كلمته تمشي عليا وهو راضي ويبيني نمشي الصحباتي وايجني واطمنو هلي حنحكيلهم ومش حيعارضو طالما ان رانيا مش حتجي للحوش اللي فيه عصام ورؤوف وانا توا نسكن مع عيت عمي وهما مستحيل ايجوني غادي يعني حتى انتو تقدرو تطمنو ان رانيا مش حتلاقه معاهم بكل
رانيا:ارجوكم ماتحرمونش من بعضنا وانا اصلا الصفحة هذي كلها سكرتها ودرت كل اللي تبوه
بات رانيا:راجلك مازال برا
رويدة شافت الرانيا:اها برا بس عليش تبيني انرد معاه
رانيا:بابا رويدة وصلت لعند حوشنا مش حنخليها تطلع هكي
بات رانيا يضحك:كنكن مركبات علي روحكن بنطلع انخششه وانهدرز معاه
رويدة ابتسمت;اها ياعمو مازال برا قال خايف اتلزوني ?
سمية:انلزو عدوك ياهبلة هي هي خشن جوا بدل من قعدتكن قدام هالباب
وخشن رويدة ورانيا ورنا وسمية جوا وبات رويدة طلع وخشش معاذ عشان ايضيفه جوا ومعاذ خش معاه
“”””
سمية:شن اخبارك واخبار راجلك وعيت عمك معاك
رويد:الحمدلله لعند توا مشاءلله عليهم كلهم
سمية:يعني عمتك كويسة معاك
رويدة:اتهبل مش غير كويسة
سمية:باهي الحمدلله
سمية صبت من جنبهن عشان اتوتي الضيافة
رانيا:ها طمنيني شن جو الحياة الزوجية معاك سمحة ولا لا وشن جو معاذ كويس زي من قبل ولا تغير ولا شنو احكيلي
رويدة تنهدت:والله ماني عارفة شن انقولك
رانيا شافت الرنا:ترا صبي شوفي ماما في المطبخ بالك تبي حاجة
رنا تضحك:قولي انوزع فيك عشان نحكو
رانيا تضحك:ايوا بزبط اول مرة تفهمي حاجة بسرعه
رويدة:حرام عليك ياكلبة خليها
رنا:كان صبرت انا بروحي كنت بنصبي لان عندي امتحان بنمشي نقراه
رويدة:ان شاءلله بالنجاح
رنا:ان شاءلله وصبت
رانيا:تعالي نمشو الداري عشان نحكو براحتنا وصبن وخشن الدار رانيا وقمعزن عالسرير
رانيا:ها احكيلي شن صاير
رويدة:ياما صار وقعدت تحكيلها في اللي صار كله واللي حكاته الها أسيل
رانيا:وووه هالبنت مازالت ورا الموضوع ماابطلتش بكل عليك الباردة كان انا في مكانك راه قاتلتها
رويدة:انا لا بنقتلها لا شيئ انا كل اللي نبيه تطلع من حياتنا لان خلااااص تعبت مانحكيلكش غادي كيف عايشة
رانيا بخوف:ليش تاعبة قصدك انتي ملاحظة علي معاذ ان ايحبها
رويدة;معاذ لعند توا مازال ماحسسني بشي ولا حكى عليها ولا حتى حكى عاللي صار في الفرح وهذا اللي مخوفني
رانيا:من شنو خايفة انتي
رويدة:خايفة ايكون لعند توا ايدس في قلبه وخايفة ان ماحكش لان مازال فرحان بيا وبعد فترة تقعد كل حاجة تطلع قدامي وفي اللحظة هدكي حنفهم ان غلطت اني ماحكيتلش مالاول اني عارفة اللي صار مرات ايجيني وقت انقول نحكي بس بعدها انخاف يعرف اني عرفت وسكتت معش يقعد ايدس زي توا وبالعكس انسهل عليه وتقعد كل حاجة قدامي ويقعد ايفكر فيها قدامي او يبكي عليها قدامي انا هذا كله ماانتحملش
رانيا:دودي حسيتك مكبرة الموضوع ياحبي دبينه الراجل ماحكش شيئ ومادارش حاجة اتبين ان ماايحبكش او ايفكر في غيرك خلاص خليك معاه هكي وحبيه اكثر ودلعيه اكثر واهتمي بيه اكثر مااتخليلش فرصة وحدة ان ايفكر في غيرك
رويدة;من ناحية ماحسسني بشيئ فهو ماحسسني بشئ بس اكثر شيئ مخوفني منه ان يبيني كل اشوي يعني في كل يوم وفي كل ساعة قريب خايفة ايكون ايدس في حبه وايحاول ينساها بالطريقة هذي او اجوزني عشان يشبع رغبته بس
رانيا مصدومة:شن هالكلام يارويدة معقولة تحكي او اتفكري هكي تي عيب وبعدين اللي ايصير طبيعي وبين اي عرسان اجدد ايصير ولو زي مااتقولي كان خذا اي بنت اخرى وكان دارها من زمان مش توا ياهبلة يامطرشقة معاذ ايحبك وكلنا عارفين كيف الطريقة اللي اعترف بحبه لكي بيها وتهيالي تعرفيه اكثر مني وعارفة ان هو مش مالشباب اللي يكذبو في امور الحب وماقالها لكي الا لان ايحببك كان تبي نصيحتي وبتعيشي متريحة حولي كل هالافكار اللي عقلك عشان تقدري اتكملي معاه كويس واللي حكاته لكي صبيتك هو الحل السليم
رويدة:هذا رايك
رانيا:هذا راي اي انسان عاقل ويبي حياته تمشي بسعادة
رويدة:واسيل خايفة ادير حاجات اكبر او تقعد اتذكر فيه بيها اخرى
رانيا:دبينها معش دارت شيئ بعد هذك اليوم معناها مروة حاكية مع هلها زي ماقالت وبعدين لنفرض دارت هكي انتي بس ديري اللي قتلك عليه وخليه ايحبك وايتعلق بيك اكثر منها وبعدها هو مش حيعدل علي كلامها بكل
رويدة ابتسمت:نجك ليا وماتصوريش قديش تريحت لما حكيتلك الحمدلله علي نعمة الصحبات
رانيا ابتسمت:الحمدلله بكل
رويدة;خطرها وين دوسة شن اخر تطوراتها معش حكيت معاها بعد الفرح انا لهيت ومعش رنيت وهي معش رنت
رانيا:ييي علي دوسة قصتها قصة
رويدة:احكي خوفتيني عليها
رانيا:هذا ياحنة يوم اللي جاتك للفرح كانت متعاركة مع سراج
رويدة:وعليش وغريبة ماحكتليش
رانيا:توا نحكيلك وقعدت تحكيلها في العركة وسببها
رويدة:واااااو علي دوسة عليك جراءة معقولة تمشي الشقة زي هذي بس تعرفي شكله ايحبها صح اللي ردها بعد اللي صار
رانيا:مش غير قعد ايحبها تي انتي ماشفتيش كيف كان خايف عليها في المستشفى واصر انها اتروح معاه ولما روحو ودوسة معش رنت عليا قلت اكيدة قعد الجو تمام بينهم لان اللي عرفته من دوسة ان حتى هي حباته بس مش راضية تعترف لكن اللي عرفته ان يوم اللي روحو مالمستشفى عمتها قلبها تعب وطاحت عليهم ودارت عملية قلب مفتوح ودوسة قعدت معاها في المستشفى
رويدة:عليك بخت قيسه مش مكتوبلهم يقعدو مع بعضهم بكل بس لازم انكلموها عشان عمتها عيب
رانيا:انا كلمتها لكن عالسريع عشان كانت في المستشفى وقلت بعد تطلع عمتها نمشيلها اصلا قالتلي بيقعدو اسبوع في المستشفى
رويدة;وانتي من حكالك علي قصة عمتها
رانيا:حكالي فيصل
رويدة;فيصل??من فيصل هذا
رانيا:هذا صاحب سراج(للعلم فيصل حكالها يوم اللي عرف اللي صار مع عفاف بس طبعا كان مازال ماعرف قصة هدى)
رويدة:وانتي شن علاقتك بصاحب سراج
رانيا:ييي هذي قصة طويلة مع رنت فون رانيا
رانيا:ابن الحلال عند ذكره ايبان اهو ايرن وجت بترد
رويدة كرت الفون;مافيش رد لين تحكيلي شن قصته وكيف تعرفتي عليه
رانيا:معرفتي عليه قصة طويلة ومافيش حد عارفها لعند توا
رويدة:باهي احكيلي كيف عرفتيه
رانيا;مازال ماجا وقتها بعد ايجي وقتها انقولك
رويدة:كيف لغز هذا
رانيا:حاجة زي اللغز
رويدة:باهي احكيلي شن يبي منك وشن قصته
رانيا:مافيش هي صداقة وبس
رويدة;ومن امتى انتي عندك اصدقاء
رانيا;مافيش الا هو صديق والحق صبالي في مواقف واجدة وساعدني فيهن بس
رويدة:بس شنو
رانيا:نحكيلك والموضوع سر بينا
رويدة:اكيدة عن دا امتى عمرك حكيتيلي حاجة وقلتها
رانيا:مش عارفة حاسة بإهتمامة فيه حاجة غريبة ومرة مرة يحكي كلمات وبعدها يسحبهن انا اندير في روحي عبيطة ومش فاهمة وديما انحب انذكرة ان اصدقاء بس هو حاسة ان مش حاسبها صداقة
رويدة:وكيف حاسة هكي
رانيا:اهتمامة بيا وبقرايتي وبنفسيتي وبأصغر حاجات في حياتي مش طبيعي
رويدة;وانتي شن حاسة
رانيا:انتي عارفة كويس اللي صار معايا واني لعند اللحظة هذي مازال ماانسيت رؤوف مازال كل يوم في الليل نذكر في مكالماتنا ودوتنا مازال نقرا في رسائلنا وصوه اللي عندي كل يوم نبكي لين نبطل مش قادرة ننساه في النهار قوية وجوي سمح وضحك وحياة بس اللي نضحكها في النهار نبكيها في الليل وقعدت تبكي
رويدة;رنوشة مافيش حد فينا كان يبي اللي صار بينكم بس هذا حد نصيبكم في بعضكم يعني بعد اللي صار مش حتقدرو اتكونو البعضكم
رانيا تبكي;عارفة بس مقهورة نار حبه مازالت في قلبي
رويدة:حبي انتي ورؤوف هذا امر واقع انحطيتو فيه الله غالب عليكم صح انا اكثر وحدة كنت انتمناك تقعدي مرات خويا بس برضو انا اكثر وحدة نبيلك السعادة مع اي شخص تختاريه انتي اهم شيئ انشوفك فرحانة ورؤوف معش اتفكري فيه هو رد للحوش ورد الجامعته يقرا صح علاقته بعصام مازال نفس ماهي ورؤوف رافض ايسامحة او يحكي معاه بس رؤوف قاعد ايحاول ايرد حياته زي ماكانت فهو مش احسن منك حتى انتي رتبي حياتك ولو القيتي الشخص المناسب عطيه فرصة يمكن اتحبيه
رانيا:قصة الشخص المناسب هذي مازال عليها واجد لما انحس اني انسيت رؤوف مع اني متاكدة انها شيئ مستحيل في اللحظة هذكي بس انفكر في الارتباط
رويدة;ربي ايجيبلك اللي فيها الخير ياقلبي
رانيا:يارب
رويدة:هاكي فونك ورني عليه
رانيا:خلينا توا انخرفو وتوا انكلمه بعدين
وقعدن البنات ايخرفن
“”””
#عند_محمد_وعفاف
محمد:عفوفة بنحكيلك موضوع بس مانبيكش لا تزعلي ولا واتعبي قلبك
عفاف:سندس مازال مصرة عالطلاق صح
محمد بإستغراب:كيف عرفتي
عفاف:انا صح قاعدة في هالدار ومانندري برا شن ايصير بس نعرف فيكم من وجوهكم مع انك ماحكيتليش بس حاسة بيك وبالضغط اللي عليك ودوسة كل مااتخش عليا انشوف في الحزن في عيونها رغم انها اتحاول اتخبي بس قاعد واضح عليها وتاكدة لما سألتها امبدري وتهربت من سؤالي وسراج اللي من اول ماجيت هنا معش خش عليا بكل هو اكثر واحد مايقدرش يكذب عليا عشان دغري نكشف في كذبه
محمد:وانا اللي كنت اندس ومانبيك اتحسي وانتي عارفة كل حاجة
عفاف:هذا قلب الام ديما ايحس بكل حاجة وحاسة بسراج وعارفة ان توا مقهور عشان سراج حب سندس بصدق
محمد:سراج هو اللي غلط ولازم ايتحمل نتيجة غلطه ورغم هذا كله والله حكيت مع سندس وقلتلها تقعد وماتطلقش بس هي اصرت ومعاها حق يعني بذات بعد طلعت البنت حامل من سراج صح
عفاف:صح انا اكثر وحدة خاطري انشوف وليد السراج بس مش من هذي كنت متمنيتهم من دوسة بس هذي مش عارفة كيف حنقبلها كنتي ربي ايكون في عون سراج انا دوسة عمتها بس ومش متخيلة غيرها تقعد كنتي مبالك هو مراته وحبها كيف بيتقبل انا قلبي مقهور عليه
محمد:وراسي عندك تهدي واتهديلي قلبك كل هالمواضيع ايهونن مغير انتي تقعديلي كويسة مانبيش ننقهر فيك ياعفوفة
عفاف:ان شاءلله وسكتت
محمد:انا بنمشي للشركة اشوي كلموني قالو فيه اوراق مهمة لازم انوقعهن ماانطولش انجيب الاوراق وانرد
عفاف:باهي
محمد:ديريلي بالك علي روحك علي ماروحت
عفاف:ان شاءلله
محمد:مع السلامة وطلع
“”””””””
#عند_سراج
روح للحوش وخش دغري للخدامة حكا معاها وطلع ورقى الامه فوق فتح الباب بالشوية لقاها راقدة خش وجا عند السرير ومسك يدها وباسها بشويش
سراج يحكي بشويش:ياريت سمعت كلامك من اول ماقلتيلي خوذها من قبل لا نعرف هدى ولا اندير اي شيئ معاها لو نعرف اني حنحبها هكي كنت وافقت اول ماقلتيلي اخطبها ياريت نقدر نحكيلك اللي صار المشكلة بس خايف عليك ياريت نقدر انقولك قديش انحبها وهي بتسيبني ياأمي
عفاف ضغطت علي يد سراج وفتحت عيونها وشافتله والدموع في عيونها
عفاف:انت شن قتلي توا
سراج نزلو دموعه;أمي
عفاف تبكي:اول مرة اتقولها ليا
سراج:وبإذن الله مش أخر مرة
عفاف:عشانك وعشان هالكلمة والله ماانخليها اتسيبك
سراج:تقدري ياامي
عفاف:باذن الله نقدر انا بروحي حسيتها بنتي اللي ماجبتها مستحيل نرضى تطلع من هنا
سراج:ياريت ترضى تقعد انا مش قادر نطلب منها ولا قادر انحط عيني في عينها بعد النتيجة
عفاف:اللي درته قبل ماتعرفها ومافيش حد ايتحاسب علي ماضي داره والمهم مستقبلك توا
سواج:والله والله مستقبلي ماتقعد فيه بنت غيرها انا معش نبي الا هي
عفاف:وهذا اهم شيئ
“””””
#عند_سندس
خشت للمطبخ بدير قهوة ولما خشت لقت الخدامة ماسكة علبة دواء وخذت منه حبه حطتها في عصير برتقال وماانتبهت السندس اللي وراها
سندس بعصبية:شنو اللي حطيتيه في العصير والمن بتشيليه
الخدامة ارتبكت وخافت:هذا هذا
سندس بعصبية:هذا شنوو
الخدامة قعدت اتلكلك في الدوة وسندس كرت من يدها علبة الدواء وقعدت تقرا في اللي عليها
سندس بصدمة;هذينا حبوب تنزيل من عطاهن لكي والمن بتشيليهن احكي احسن ماانكلملك الشرطة
الخدامة خافت:لالا خلاص حنحكي
سندس:احكي بسرعة
الخدامة:هذينا عطاهن ليا استاذ سراج وقالي انشوف الانسة هدى شن تبي واللي تطلبها انحطلها فيها مالدواء هذا ولما شفتها قالت تبي عصير برتقال وجيت درت نفس ماقالي
سندس انصدمت;معقولة سراج وصلت بيه الحقارة يقتل روح وانتي كيف بتساعديه علي جريمة زي هذي
الخدامة تبكي:انا مادخلنيش انا مؤمورة مانقدرش انقول لا
سندس:انا توا مش فاضيتلك بنمشي للحيوان سراج اما انتي احسابك معايا بعدين وخذت كباية العصير كبتها وطلعت مالمطبخ بدور سراج وجت عند الدروج بترقى اتشوفه فوق ولقاته نازل
سندس بعصبية:لعند امتى بتقعد تصرف هكي لعند امتى بتقعد حقير وانسان مستهتر وماتقدرش اتحمل نتيجة اخطائك
سراج:كنك شن درت
سندس:لا مادرت شيئ غير انك بترتكب جريمة
سراج:جريمة شنو انتي في شنو تحكي
سندس بعصبية:دير روحك عبيط ومش فاهم
سراج:تي انتي كنك فهميني
محمد خش مفجوع مالهرجة:كنكم شن صاير عفاف صايرلها حاجة
سندس:اعميمة كويسة مافيها شيئ
محمد:امالا علش اصواتكم طالعات لعند برا
سراج:مافيش شيئ متعاركة معايا عشان نتيجة التحليل اللي طلعت
محمد;ماحكيتلك عليها من بدري وعارفة ان الطفل ولده شنو القصة اللي صارت وشنو اللي تغير ياسندس
سندس شافت السراج وكيف يكذب بكل برود وزادت تعصبت اخرى
سندس:كذاب ياعمو مش عشان هكي متعاركين
محمد:امالا شنو سبب العركة
سراج:كان عارف انها اكتشفت قصة الحبوب قعد يغمزلها بعينه وايحرك في راسه بمعنى ماتحكيش
سندس كانت مقهورة من تصرفات سراج وان مايبيش ايتحمل نتيجة اخطائه
سندس:توا خشيت للمطبخ القيت الخدامة ماسكة علبة دواء واتحط منها في العصير ولما شفت العلبة القيتها حبوب تنزيل حمل وبعد سألتها قالت ان سراج قايللها عاطيه الهدى تشربه
محمد بصدمة:معقولة ياسراج هذي روح ربك حياها وانت تبي تقتلها انت شن تحساب روحك انت انسان مالكش حق في حاجة زي هذي اديرها
سراج:مافيش منه الكلام هذا سندس تحكي من راسها
سندس بصدمة:مازال لكي عين تكذب اهي ياعمو هذي العلبة واقرى وشوفها
محمد خذاها منها وقعد يقرا فيها
محمد;اهو كلامها صح انت مستحيل تقعد انسان معقولة فيه واحد ايفكر يقتل ولده
سراج بعصبية:مش ولدي هذي وحدة كذابة
محمد بعصبية:كيف مش ولدك والتحاليل اللي درناهن حتى هنا يكذبن
سراج:بتصدقو ولا ماتبوش اتصدقو الطفل هذا مش ولدي ولا حنكتبه علي اسمي
محمد;اكيدة مش حنصدقوك والتحاليل طلعن ان هذا ولدك وغصبن عنك بتجوزها وغصبن عنك بتكتبه علي اسمك
سراج:لو انموت مش حنديرها
محمد:عناد فيك وفي كلامك من بكرا بنمشو الهل البنت وبنقرو فاتحتها
سراج بعصبية:انا قلت لا يعني لا
محمد بعصبية:اسمع ياسراج كان بكرا مادرت اللي قلته توا لانك ولدي ولاني باتك وبنتبرا منك قدام العيلة كلها والله لااتربحك اليوم الدين
سندس انصدمت وحطت يدها علي فمها
سراج انصدم من كلمة باته اللي عمره ماقالها له حتى لما كان يبيه ايسيب السهور والبنات قعد ايشوف الباته زين ومش مصدق اللي قاله وبعدها لف وشاف السندس بكل حقد وطلع مالفيلا وهو معصب
محمد حتى هو كان معصب ورقى فوق بس مجرد ما خش علي عفاف مشى الجو تمام وعساس مافيش شيئ
اما سندس رقت الدارها وقعدت فيها
اما هدى فلما سمعت صوت سندس وسراج عالي طلعت بتشوف شن فيه وطبعا سمعت الموضوع كله
“””””””
الساعة 2 في الليل
سندس في دارها وماقدرتش ترقد حاسة بتأنيب الضمير علي سراج ومتضايقة انها كانت سبب ان باته حكاله هكي
كانت اتفكر لو انها سكتت وماحكتش الباته اللي كان بيديره راه ماصارش اللي صار وراه باته ماغصبه ان بكرا يقرا فاتحة هدى او يغضب عليه كانت متضايقة بكل وخايفة ان سراج ماايجيش للفيلا بعد اللي صار او ان يكرهه ويحقد عليها
سندس كانت عارفة ان سراج غالط في كل حاجة دارها بس في نفس الوقت تمسكه بيها وخوفه ان يفقدها كان ايضعف فيها واجد كل ماتذكره
صبت سندس من سريرها وجت عند روشن الدار وفتحاته وقعدت اتشوف الحوشها هي وسراج وتذكر في ايامهم فيه وكيف كانو ايعاندو في بعضهم ويفتعلو في مشاكل كان سببهن الحب بس هما ماكانو منتبهين
“””””””
عند هدى في دارها كانت مجهزة روحها ومفتلكة روحها عالاخر وتستنى في سراج ايروح
هدى اتشوف الروحها في المراية
هدى:صار بتنزل ولدك ياسراج حنشوفو اذا قدرت اتقاومني وانا هكي او لا وحنشوفو بعدها ردة فعل الكل بعد ايشوفوني معاك وفي حوشك وفي اللحظة هذكي حتاخذني غصب عنك
“”””””
سندس سكرت الروشن وجت قمعزت علي سريرها وهي اتفكر شنو ادير وهي حاسة بالذنب تجاه سراج وتجاه نفسها لان هي كانت سبب في تسريع جوازهم
“””””””
الساعة 3 سراج روح للفيلا
وهدى شافاته اول ماروح لبست عبايتها ونزلت بشويش وطلعت ووصلت عند حوش سراج لقاته كيف بيسكر الباب مسكت الباب بيدها
سراج;كنك شن تبي
هدى:فيه موضوع مهم بنحكيه معاك
سراج:شن هو الموضوع
هدى:بنحكيلك عالطفل اللي في بطني
سراج:باهي خشي وخشت وسراج سكر الباب
“”””
سندس صبت ةشافت من عند الروشن وفرحت لما شافت سراج مروح قمعزت عالسرير وقعدت اتفكر وفي لحظة صبت وقررت تمشي تعتذر من سراج عاللي داراته وان هي ماكان قصدها وطلعت من دارها ونزلت تحت ووصلت عند حوشها
#يتبع
قولكن شن حيصير بعد سندس اتشوف سراج مع هدى في الحوش وكيف ممكن حتصرف وهل هذا هو الشيئ اللي حيخليها تمشي وتنسى موضوع الردة بكل ?
وقولكن شن رد سراج بعد ايشوف سندس وشن حيقوللها علي وجود هدى معاه في الحوش ?
وقولكن بعد كلام سراج الفيصل هل ممكن اتكون هدى حامل منه صح او فيه سر زي ماهو قال
كله حنعرفوه في حلقة بكرا ?
اسفة عالتاخير بس لاني في حاجات حذفتهن وحاجات ضفتهن ?
الاغنية اللي غناها سراج حنزلها في قروبي #روايات_كاتبة_مرجاوية في منشور بروحها
أسفة لو في لخبطة في الأسماء وأكيد وأيكن ايهمني ?
گـتـابـتـي Koka Saleh