منحرف وأحببته
#مـنـحـرف_وأحـبـبـتـه
الـحـلـقـة (26)
گـتـابـتـي #Koka_Saleh
“”””””””””””””””””””””””
خشت رانيا السندس وقالتلها ان فيه واحد فجعها وقال يبي سراج وسندس طلعتله وقالتله ان قاعد في الفيلا وخشت علي صحباتها
“”
فيصل مشى للفيلا وسلم علي عفاف وقاللها يبي سراج وخش للجناح امتاع سراج اللي تحت وبعد 10 دقايق سراج خش عليه
سراج:اووو نصي شن الجو
فيصل:تمام يانصي شن جوك انت
سراج:تمام التمام
فيصل:شنو امالا شكلك ملزوز من غادي
سراج;لا والله غير ام السان جياتها صحباتها وانا سيبتهن براحتهن
فيصل يضحك:ومن أمتى الذوق هذا كله ولا الا ملزوز
سراج بغرور:والله طلعت بجوي انت عارف عمري ماالتزيت من مكان بس قولي من قالك اني مش غادي
فيصل:جيت غادي القيت في الجنان وحدة من صاحبات ام السان اللي كانت معاها في المصيف ولما سألت عليك كلمتلي ام السان
سراج:قصدك سندس طلعتلك برا
فيصل:اها وهي قالتلي انك هنا
سراج:اهااا
فيصل:كيف صار الغيرة بدت تشتغل ولا شنو
سراج:اي غيرة تحكي عليها انت عارف كويس ان الكلمة هذي عمري مااعترفت بيها كيف واحد يقعد ايغار علي وحدة ومايبيش حد ايكلمها ولا ايقرب منها هذا كلام فاضي
فيصل:يعني انت مااتغارش علي ام السان
سراج يضحك:من جدك تحكي معقولة انا انغار وعلي من علي اكثر وحدة كرهتها في حياتي
فيصل:معناها هكي سهلت عليا الموضوع
سراج:اي موضوع
فيصل;مالاخر هكي ام السان عاجبتني وكان ماتبيهش من توا بنحكي معاها عشان اول مااطلقها بناخذها
سراج مسكه من قميصه:انت في شن تحكي
فيصل:مش انت قلت ماتبيهش
سراج زاد مسك قميصه وبقوة وقربه منه وكان معصب بكل
سراج:فيصل سكر فمك مااتخلينش انديرها وانمد يدي عليك
فيصل:عارف انا لانبيها ولا عمري نظرتلها نظرة خاطي انها مرات خويا لكن شفت كيف طلعتك اتغار عليها
سراج طلقه:القصة مش قصة غيره القصة عشان البنت توا علي ذمتي بعد انطلقها انت حر دير اللي اتريحك مااتهمنيش
فيصل:لا اتهمك واتهمك واجد اخرى طول عمرنا انتعرفو علي نفس البنت وانهيجو مع نفس البنت في حياتك كلها مافيش مرة هجمت عليا هكي عشان خاطر وحدة
سراج بعصبية:قتلك عشان علي ذمتي البنت توا شايلة اسمي
فيصل:سراج ماتضحكش علي روحك البنت عاجبتك وبعد اللي صار توا تاكدت ان المرحلة اللي انت فيها مش بس اعجاب
سراج:شن قصدك
فيصل:قصدي واضح انت اتحبها
سراج بعصبية:تي شن هالكلام الفاضي اللي تحكي فيه اي حب ياراجل كل الموضوع البنت علي ذمتي اكيدة حتقعد تفرق عالبنات اللي نعرفوهن اللي نقعدو معاهن ليلة وخلاص
فيصل:تمام ماقلنا شي تفرق عالبنات صح بس مش عشان علي ذمتك عشان حبيتها كان اتشوف روحك كيف كنت تصرف قبل ماتاخذها وكيف تصرف توا سندس غيراتك واجد
سراج:لا تغيرت لاشيئ انا مازلت نفس ماانا تغير بس الشغل وانت عارف اني نشتغل عشان الاتفاق أما السهور والبنات وطبعي مازال نفس قبل
فيصل:سراج انا صاحبك وعشرة عمر يعني لما اتغير انا اول واحد نفطنلك قبل ماحتى انت تفطن الروحك
سراج عصب عالاخر وبصوت عالي:فيصل قتلك مازلت نفس ماانا مافيش شيئ تغير وغير الموضوع الفاضي اللي تحكي فيه أحسنلك
فيصل:تمام توا انغيره غير وسع بالك ومااتعصبش
سراج:خلينا نطلعو انغيرو جو بدل هالنكد اللي درته ليا
فيصل:هيا وطلعو
“”
عند سندس وصحباتها مقمعزات ويشربن في النسكافيه في الجنان برا
رويدة:دوسة شن جو عمتك معاك بما ان عيل واحد اكيدة دايرتلك جو الغيرة والحركات
سندس:بالعكس والله اتعامل فيا زي بنتها بزبط واتهزب حتى في سراج كان حستنا متزاعلين
رانيا:انا اللي شفتها توا استقبلتني ومن اول ماقمعزت وهي تحكي علي دوسة من كلامها باين اتحبها وااجد
رويدة:مشاءلله ربي ايدوم عليك
سندس:عارفة حتى عمو كويس وايعامل في زي بنته اتصدقي انا من كثر ماهما كويسين نستغرب كيف طالع منهم واحد صايع زي سراج
رويدة:باهي هو ليش طبعه هكي اتحسيه كأنه مش من هنا
سندس:من هو صغير عايش برا ومالقش من ايوريه الطريق الصح فقعد هكي
رانيا تضحك:حي حي بدينا انتعذرو عليه
سندس:بلا برادة اي عذر سألتني وجاوبتها اللي عارفته
رانيا:والله حاسة هكي انك بديتي اتميلي السراج
سندس بهزوة:وشن خلاك حاسة هكي ياحنة
رانيا:عشان معش تحكي عليه زي قبل يعني من قبل كنتي حتى اسمه مااتحبيش حد ينطقه بس توا تحكي عليه وبكل ارياحية لا معصبة لا شيئ
سندس:بس الوضع هذا عادي عشان خلاص رضيت بالأمر الواقع ولازم انتعايش معاه فالعصبية وحرق الدم حيضرني انا مش هو عشان هكي حتى هو قعدت انتعامل معاه بكل برود
رويدة:باهي توا قوليلي شن نظام عيشتكم مع بعضكم في حوش واحد يعني مكملينها مشاكل وعياط ولا الجو عادي فهمينا
سندس:حياتنا عايشينها عادي يعني فيه مشاكل بس عشان نحن عارفين بنعيشو مع بعضنا سنة كاملة فكل واحد ايحاول ايتغاضى علي اخطاء لاخر عشان نقدرو انتأقلمو
رانيا:باهي هو شن نظامه معاكي مثلا ماحسيتيش بدى يعجب بيك ولا حاجة
سندس:لالا مافيش حاجة زي هكي تصرفاته عادية عشان انتن عارفاته هو صايع مش مقتنع بفكرة اعجاب وجو هكي
رويدة:اهم حاجة مايقعدنش فيه مشاكل وحياتكم هادية عشان انتو هكي هكي مش مكملين مع بعضكم
سندس:هي هذي حتى نحن انحاولو هكي
رانيا:باهي دودي انتي طمنينا شن جوك مع معاذ والفرخة بنت عمه سيبتكم في حالكم
سندس:اي بنت عمه شنو القصة
رانيا:هذا معاذ كان خاطب بنت عمه من قبل وماتت في حادث اسبوع الفرح ومن يومها معاذ اكتئب ومعش حب ولا بنت وكان مقرر لا يجوز لا شيئ لين اكتشف ان ايحب دودي بس اسيل هذي تقعد اخت خطيبته اللي ماتت وماتبيش معاذ يجوز خاطي اختها والفترة اللي فاتت ادز في رسائل الرويدة عساس اتقوللها معاذ ماايحبكش مغير خطبك عشان ينسى اختي
سندس:طيح سعدها شن دخلها بيه هي الراجل حب وقرر يجوز عن مرض الأنانية
رويدة بحزن:بس شكله يابنات كلامها صح ومعاذ خطبني عشان ينساها
رانيا:عليك قصة شكلها كلماتك اخرى
رويدة:لالا ماكلمتنيش بس اليوم في الجامعة معاذ حكى كلمة صدمني بكل ومنها تأكدت ان مازال مانساها وخطبني بس عشان ينساها بيا
سندس:شن قالك
رويدة:تخيلن يابنات ايعاتب فيا عشان الايام اللي فاتن هملته ومعش رنيت عليه وكنت قافلة فوني قعدت انتعذرله وانقوله نفسيتي تاعبة وماكنتش بنكد عليك قالي انا مش متعود علي هكي لينا زمان كل حاجة اتقول فيها ليا انا اول واحد ونزلو دموعها
سندس:صح هي كلمة واعرة يادودي بس مش معنى هكي ان ماايحبكش مرات بس ايكون زاعل منك عشان معش كلمتيه يعني الراجل ديما يبي اهتمام وبذات معاذ مش مالشباب اللي يكذبو وبعدين حطي في راسك ان جا بروحه وقالك انحبك يعني ماكان عارف بحبك له بالعكس وين ماعرف اتحبي غيره ياما صار فيه ولا انسيتي كيف بدت قصة حبكم
رويدة:مش ناسية بس الكلمة قهرتني سألته كم مرة عليها ايقولي هذا ماضي بس شكله مازال ايفكر فيها
سندس:توا ياعبيطة ايفكر فيها ولا ناسيها البنت خلاص ميته وانتي توا اللي ايحبك وهو مافيش شيئ زاره ان يكذب عليك في حبه وهو له كم سنة مسكر علي موضوع الحب
رويدة:انا خايفة يابنات خايفة انعيش معاه وحبها وشبحها يقعد ديما معانا وماانتريحش معاه هذا عليش انقول ننهي كل حاجة معاه من توا وننقهر فترة وبعدها ننسى احسن ماناخذه ونقعد كل يوم مقهورة ان ايحب غيري
سندس:لا بجد شكلك انهبلتي معقولة اتفكري هكي علي موضوع بسيط زي هذا اكيدة حكى هكي عشان معصب منك انك هاملتيه ومش حاس بأهميته عندك
رانيا:دودي الراجل ديما ايحب اللي تهتم بيه وانتي زودتيها قعدتي قريب 3ايام مقفل مايندري عليك حية ولا ميته انا رؤوف كان قعدت ساعة وحدة مقفل ايديرلي عركة كبيرة طبعا الكلام هذا زمان ونزلو دموعها وقعدت تبكي
سندس:توا ليش هكي اتذكري في روحك بيه مش عساس بتنسيه خلاص
رانيا تبكي:بننساه بس مش قادرة ننسى ايامي معاه هذينا حلى ايام حياتي
رويدة تبكي:يانا عليا ياقلبي مش عارفة شن بنحكيلك ماعنديش وجه نحكي اي كلمة
سندس بعصبية:بلا صماطة انتن لثنين ماتقلبنهش مناحة جايات عشان انغيرو جو وننسو كل الهم اللي صار معانا وبعدين مشاكلكن مفتوحة انتي يارنوشة انسيه وربي حيجيبلك اللي احسن منه وانتي يادودي كان رن عليك وعرف غلطه عاتبيه اشوية وازعلي وبعدين صالحيه بس بشرط معش ايكرر الكلمة هذي مرة اخرى
رويدة:من اول ماطلعت مالجامعة وهو ايرن عليا وايدزلي في رسائل وانا مارديتش عليه
سندس:خلاص اقرصي وذنه اليوم ومااترديش عليه بكل خليه يعرف انك زاعلة وبكرا لما ايرن ردي عليه وعاتبيه وهو بروحه معش يجرأ ايقولها
رويدة:انتن قولكن هكي
سندس ورانيا:اها
رويدة:خلاص حندير زي ماقلتن
سندس:توا معش مازال الا حاجة وحدة الفرخة رانيا اترد اتجي للجامعة خلاص الامتحانات قريب وعندنا مشروع مازال ماكملنا الشغل عليه
رانيا:يي خطرتي عليا المشروع انتي معش درتي شيئ فيه
سندس:لا درت فيه كم حاجة بس القصة نبي مكان نفس اللي بنديرو عليه المشروع حيقعد شغلنا اسهل
رانيا:خلاص حنحكي البابا ايشوفلنا اي ارض ناخذو منها مقاسات ونشتغلو عليها
سندس:بس لازم اتكون مقاربة للمكان اللي بنشتغلو عليه انتي عارفة تصميم الشركة اللي بيعجب الكلية بيعتمدوه وهو اللي بيشتغلو عليه في قطعة الارض
رانيا:خلاص حنحكي البابا المهم انا توا خايفة مالامتحانات انتي عارفة هلبني واجد
سندس:مش واجد هلبك وبعدين اللي مش فاهمتيه انا نشرحة لكي والامتحانات موضوعهن ساهل توا تفكيري كله في المشروع نبيه ايكون مشروعنا مميز
رانيا:ان شاءلله
سندس:هي صبن انخشو انعصرو جوا
رويدة ورانيا:هي وصبن وخشن جوا عصرن وكملنها اتهدريز ومرة يضحكن ومرة يبكن وعالمغرب روحت رانيا اول وحدة وبعدها رويدة جاها باتها وروحت وصلت لعند الحوش ولما نزلت هي وباتها لقو معاذ قدام الباب بات رويدة سلم علي معاذ:كيف حالك وشن اخبار هلك
معاذ:الحمدلله بخير كيف حال صحتك انت
بات رويدة:كويس الحمدلله تفضل جوا كنك قاعد برا
معاذ:كنت جوا سلمت علي عمتي وقالتلي ان رويدة عند صاحبتها وانت ماشي اتجيب فيها قعدت هنا نرجا فيكم
بات رويدة فنص فيها:قصدك هي مش واخذه اذنك
معاذ:لا ياعمي هي حكتلي غير انا انسيت بس
بات رويدة بعصبية:كان مش واخذة اذنك قول وانا نصرف معاها توا كيف ولية تطلع من غير اذن راجلها كان ماعندك العلم يارويدة راهي حرام اتحقي في امك عمرها ماخشت حتى علي جارتها اللي جنبها لين تاخذ اذني قبل
معاذ:لا ياعمي قتلك حكتلي مبدري في الجامعة غير انا اللي انسيت وبعدين اصلا جاي بنشوف عصام غير ماالقيتش وجوا مع عمتي كانن فيه صبايا فقعدت هنا نرجا فيكم
بات رويدة:خش خش تفضل وخشو ومعاذ صبى في الجنان
معاذ:معليش ياعمي نبي هلي في كلمتين وبعدها نلحقك جوا
بات رويدة:خوذ راحتك وخش
رويدة جت بتخش ورا باتها
معاذ:اصبري وين خاشة مش سمعتي قلت العمي نبيك
رويدة:ماعندك ماتبي فيا
معاذ:لا عندي مانبي فيك انا عارف انك زاعلة ومايرضينيش تزعلي مني
رويدة:ماتضحكش علي روحك انا ابدا مش هامتك انت كل اللي هامك اني نقعد انحبك عشان نقدر انسيك لينا
معاذ:انتي عارفة كويس اني انا انحبك وماخطبتكش عشان ننسى بيك حد بالعكس خطبتك عشان انا انحبك واكبر دليل اني انا اللي اعترفتك قبل ماانتي تعترفي بحبك ليا ولما جيت وحكيتلك ماكنتش متاكد مية في المية انك اتحبيني وشفتي لما باتك رفض انا شن درت عشان ناخذك وكنت مستعد اندير اكثر ماللي درته المهم اتكوني ليا وهذا كله درته بس عشان انحبك وعشان انتي البنت الوحيدة اللي قدرت اتخليني انحبها بعد ماباب الحب سكرته من كل الجيهات
رويدة:والكلام اللي قلته ليا شن اتفسره حظرتك لو ماانك مازال اتحبها
معاذ:وليش مااتقولي قلت هكي لاني معصب منك عشان لكي كم يوم ماحكيتي معايا ولا دورتيني انا اللي حسيت انك مااتحبينيش عشان اللي ايحب واحد ايشاركه في فرحه وفي حزنه بس انتي قررتي اتشيلك حزنك بروحك مع ان حزنك هو حزني وكنت حنوقف معاك في اي حاجة بس انتي بعدتيني منك شن رايك في الحاجة هذي مش توجع واتخليك تنقهر واتقول اي كلمة
رويدة:بس مش الدرجة كلمة زي اللي قلتها انت مش عارف شن دارت فيا قهرتني من جوا جرحت قلبي وحسيت كلامك ليا كله كذب وانت في الاصل مااتحبنيش ونزلو دموعها
معاذ تغيرو ملامح وجه وقرب منها:حرام عليكي ليش تقهري فيا بدموعك توا انتي عارفة انك هكي تقتلي فيا الف مرة قايلك ماانحبكش تبكي بكل وبذات بسببي انا
رويدة تبكي:لو مااتحبش دموعي ماكنتش حكيت هكي ولا قارنتني مع حد
معاذ:ياريتني متت ولا بكيتك ان شاءلله انموت عشان خليتك تبكي بسببي
رويدة:بعيد السو عليك
معاذ قرب منها ومسحلها دموعها:أسف حبيبي سامحيني والله ماعاد انزعلك ولا انقارنك بحد انتي مكانك في قلبي محفوظ وماحد زيك والله
رويدة:معاذ اتحبني?
معاذ:مش بس انحبك انا انموت فيك يافرحتي انتي الفرحة اللي جتني بعد سنين حزن واجد ومسك يدها وقربها منه وحطها علي صدره
معاذ حاظنها:والله والله انحبك وااااجد رويدة بعد حكالها هكي زادت تبكي
معاذ زاد حظنها:كان اتحبيني بطلي بكى والله قلبي يوجعني بعد تبكي رويدة زادت حظناته بس مازال تبكي
معاذ:حبيبتي خلاص بكى عبيتي تيشرتي دموع
رويدة بعدت منه:ماشي ياصامط وجعك تيشرتك
معاذ:انبصر معاك يامهبولتي افداك الف تيشرت بس نبيك تضحكي عشان عندي لكي خبر سمح
رويدة:شنو
معاذ:توا مشاكلكم انتهن وانا قلت الهلي الفرح بعد 3اسابيع
رويدة:تحكي من جدك
معاذ:اها من جدي خلاص طولنا واجد بالفرح وانا معش انتحمل بعد عليك اكثر من هكي بنحطك جنبي وانتريح
رويدة:بس انا مازال مش مجهزة شيئ
معاذ;3اسابيع مكفياتكم ومجهزات كل حاجة تبوها وانا اتفقت مع امي بكرا اتجي اتقول الهلك علي موعد الفرح
رويدة:باهي اللي اتشوفه حبيبي
معاذ:حبيبي ناعلي اتهبل طالعة من فمك
رويدة ابتسمت وانحرجت وسكتت
معاذ:نجيها الخجولة خطرها خذيت الجناح اللي فوق كله عشان نسكنو فيه يبي اشوي تشطيبات ان شاءلله الاسبوع هذا ننهيهن
رويدة:الي اتشوفه حبيبي
معاذ:يعني انتي ماعندكش مشكلة تقعدي مع هلي في نفس الحوش يعني انتي جناحك زي الحوش وبروحه بس عاد ايضمنا حوش واحد
رويدة:لا عادي حبيبي شن المشكلة بالعكس خواتك ايهبلن وحسيتهن زي خواتي
معاذ:باهي طمنتيني
رويدة:خلاص انا بنخش طولنا بكل
معاذ:خطرها اخرلك مرة تطلعي من غير مااتقوليلي راه اليوم مشيتها عشان عارفك زاعلة مني
رويدة:قلتها بروحك عشان زاعلة انت عارف من قبل كنت انقولك
معاذ:عارف ومقدر بس مرة اخرى تطلعي من غير علمي حي عليك وحي
رويدة:ياساتر وشن بديرلي
معاذ كرها من يدها وقربها منه وباسها علي شفايفها وبقوة وبعدها بعدها
معاذ ايشوفلها:هكي انعاقبك
رويدة خدودها حمر:انت شن درت تخيل حد شافنا
معاذ:انتي مراتي ولا انسيتي نقدر توا ناخذك وماحدش ايتكلم
رويدة كانت منحرجة عالاخر ومعش قدرت حتى اتبحت فيه وخشت تجري
معاذ ابتسم وبحت ايمين وايسار ماشاف حد وخش للمربوعة جوا وقعد ايخرف مع باتها
“”
الساعة 10 سندس كملت لم حوشها وخشت للدار مسكت اللاب وقعدت اتشوف للمشروع امتاعها هي ورانيا واتعدل فيه في حاجات
سراج روح للحوش وخش لقى الجو هادي بكل رقى فوق وخطم علي دار سندس ولقاها مسكرة وقف عند الدار ودق وخش
سراج:خير
سندس بلا نية:خيرات
سراج:عادي انخش
سندس:مانك خشيت وفضت
سراج خش وقمعز عالسرير جنبها:انسجمتي مع صحباتك
سندس تشتغل عاللاب ومااتشوفلش:اكيدة
سراج:في شنو اديري كنك لاهية عاللاب هكي
سندس:انعدل في حاجات في المشروع متاع التخرج
سراج:خطرها شن صار في تخرجك كنك لاعاد امتحنتي ولا تخرجتي
سندس:خلاص قريب الامتحانات والشغل عالمشروع قبلهن
سراج:باهي ان شاءلله غير تنجحي عاد
سندس:اكيدة ننجح اصلا الامتحانات ماعندي فيهن مشكلة مشكلتي بس في المشروع
سراج:وشن المشكلة في المشروع
سندس: المشروع السنة مش بس عشان تاخذ A وتنجح وخلاص
سراج:امالا شنو مش عساس هكي مشاريع التخرج
سندس:السنة المجموعة مش كبيرة وطلبو منه كل اثنين ايديرو تصميم الشركة والمشروع اللي ايكون مميز وأحسن واحد حيعتمدوه وهو اللي حياخذو تصميمه واينفذوه وطبعا الاثنين اللي ينجحو وياخذو مشروعهم حيكون أول شغل الهم يطبق علي ارض الواقع وبالنسبة ليا هذا حلم عشان انجاز عظيم اني اندير تصميم الشركة كبيرة
سراج:باهي الشركة المن وشن قصتها
سندس:اول ماتعرفنا علي هلك تلاقيت مع جدك بس طبعا جدك ماكانش هذا اول لقاء بينا تلاقينا من قبل في الكلية وطلع هو صاحب الشركة وصاحب الفكرة وصاحب الارض الي بينفذو عليها المشروع
سراج:معناها مااتعبيش روحك وتضغطي نفسك واعتبري من توا انتي اللي خذيتي المشروع جدي شوري وانا حنحكي معاه ويعطيه لكي
سندس بعصبية;ومن قالك انا بننجح بالواسطة انا نبي نشتغل وانحط كل خبرتي ومهاراتي في المشروع عشان ناخذه بمجهودي
سراج:باهي وسعي بالك انا بس حبيت انساعدك
سندس:المساعدة مش هكي هذا اسمه غش
سراج:ياستي أسف ديري اللي اتريحك واشتغلي علي مشروعك وانا مش حندخل فيك بكل غير انا حسيتك شايلة همه وعندك فيه مشكله حبيت انريحك
سندس:لالا عنديش مشكلة كل القصة نبي قطعة ارض مقاربة للمكان اللي بنشتغلو فيه عشان انشوفو وانحاولو نشتغلو عملي عشان يسهل علينا التصميم بس ورنوشة قالتلي حتشوف باتها ايشوفلنا عشان هو يشتغل في العقارات
سراج:باهي تمام
سراج:باهي تبي حاجة من برا انا طالع
سندس:لالا نبيش شيئ
سراج:انحاول ماانطولش
سندس:براحتك
سراج صبى:ماشي وطلع ومشى خذا فيصل وطلعو للشقة
“”
عالساعة 3 في الليل روح سراج بعد سهرة سمحة مع البنات بس طبعا خذا استراتيجية ان معش يشرب واجد عشان الشغل ثاني يوم
رقى سراج شور داره بس قبل ماايخشلها تكى علي دار سندس وفتحها وخش لقاها راقدة جا وقرب منها ونزل علي ركبيه وقعد ايشوفلها وهي راقدة حط يده علي خدها وقعد ايمشي فيها بشويش لين وصل علي شفايفها وقعد ايحرك في صبعه عليهن حاول ايقرب منهن بس بعدها صبى دغري وطلع مالدار
سندس فتحت عيونها وتنهدت:يارب ان شاءلله اللي في بالي ماايكون صح ياربي هذا بذات لا مااتعلقنيش بيه لا انا له ولا هو ليا وقعدت اشوي واعية وبعدها رقدت
“”
سراج خش دوش عالسريع وطلع وتمدد في سريره ورقد
“”
صباح ثاني يوم وعت سندس بدري وصبت غسلت وصلت الصبح ونزلت وتت فطورها وبعدين وعت سراج وخشت لبست ونزلت وقمعزت بتفطر ونزل سراج
سراج:صباح الخير
سندس:صباح النور
سراج قمعز وبدى يفطر
سندس:لما انكمل محاضرتي بنمشي الهلي وبنتغدى عندهم
سراج:من بيشيلك
سندس:عمو عدنان
سراج:مشاءلله عمك عدنان هذا ماايقولك لا علي ولا مشوار مع انه محطوط بس عشان الجامعة
سندس:قتلك من قبل انا غالية عليه وماايقوليش لا علي شيئ
سراج:ربي ايدوم غلاكم
سندس:ان شاءلله
سندس:شن رايك اتجي انت تاخذني وانتغدو عند هلي مع بعضنا
سراج:قصدك انا انجي ناخذك مالجامعة
سندس:اها انت عليش مستغرب
سراج:الجامعة مكان عام ونعرف فيها ناس واجدة
سندس:واذا يعني شنو المشكلة
سراج:لا مشكلة ومشكلة كبيرة اخرى توا بعد ايشوفني البنات اللي نعرفهن غادي شن بيقولن عليا
سندس:البنااات اوكي فهمتك معليش ماكنتش عارفة بنضيع شهرتك وبريستيجك
سراج:اهو عرفتي معش تطلبي مني طلب زي هذا مرة اخرى
سندس ماردتش عليه وصبت وهي غامتلها منه وطلعت وركبت مع عمو عدنان ومشت للجامعة
وسراج كمل فطوره وطلع ومشى للشركة
“”
خذت سندس محاضراتها وعالساعة 12 شالها عمو عدنان الهلها جت الامها لقتها اتوتي في الغداء قعدت اتوتي معاها وبعدها روح باتها مالعمل وفرح لما لقى سندس عندهم واجتمعو جمعة عائلية زي ايام زمان
“””
عالساعة 2 روح سراج للحوش وجايب معاه غداء جاهز خش للمطبخ وحطه عالطاولة وقعد ياكل وبعد كمل غداه قعد ايلم في الزايد بيعزقه صبى وقعد ايشوف للمطبخ ويذكر في اليوم اللي سندس دارت فيه الغداء وشكل الغداء اللي دراته ابتسم وهو ايتخيل في شكلها وهي في المطبخ واتوتي
كمل اللي في يده وطلع مالمطبخ ورقى فوق وخش الدار سندس وشاف كيف عازقة البيجامة اللي كانت لابستها عالسرير قعد يضحك
سراج يضحك:مجنونة البنت هذي
قمعز علي سريرها ومسك مخدتها وشمها كانت فيها بنت عطرها اللي سراج كان ايحبها?
سراج تنهد وهو ايشم في عطرها وتمدد علي سريرها وهو حاظن مخدتها
“”
عند هل رويدة
بات رويدة كان يحكي بالفون وسكر وخش ايهزب
بات رويدة:خلاص الواحد حتى علي عياله ماعاد عنده كلمة
عالية:شن فيه ياراجل كنك
بات رويدة:هذا رؤوف اليوم جاي الخاله في الصبح وواخذه للمحكمة ومطلق حنين
عالية;ماهو عارفينه حيدير هكي بعد اللي صار واللي داراته حنين
بات رويدة:عارف لكن اقل حاجة ايجي ايقولي ياخذني معاه ونحكو مع خاله يعني الواحد لازم يحترم كباره مش هكي وخلاص قاعد يصرف اتقول انا ميت
عالية:بعيد السو عليك لكن رؤوف قلبه محروق ويبي حاجة اتبرد عليه بالك بعد ايطلقها ايتريح وايروح للحوش
بات رويدة:والله مش عارف شن صار في هالحوش قلبه هكي
عالية:ان شاءلله ايرد زي ماكان لكن عشان خاطري خلو رؤوف في حاله ومااتزعلوش مسكين ساد اللي صارله
بات رويدة:ربي يصلح حاله
عالية:ان شاءلله يارب
عصام:خير
بات رويدة وامها:خير
عصام قمعز:سمعتكم تحكو علي رؤوف وان طلق حنين
عالية:اها خالك كلم باتك توا قالها له
عصام:بما انكم فتحتو موضوع الطلاق حتى بسمة طالبة الطلاق
عالية بصدمة:شنوووو
بات رويدة:عليش تنصدمي معروفة مافيش بنت ترضى باللي داره ولدك وكثر خيرها اخرى جت وقعدت هي وهلها معانا وراجاته لين طلع مالمستشفى وقعد كويس
عالية:احكي معاها ياعصام بالك اتغير رايها والله بسمة كويسة وهادية ومش حتلقى كيفها
عصام:انا حكيت معاها وهي واخذة قرارها وقالت هكي اتريح
بات رويدة:كل شيئ نصيب خلاص اليوم العشية نمشو العمك ونحكوله وبكرا نمشو للمحكة واطلق
عالية:في العشية جايين هل معاذ ومرات ايجي معاهم بايخة اتسيبوه
بات رويدة:خلاص حنمشو في الليل ونتفقو معاه
عصام:باهي حتى في الليل تمام
بات رويدة:وين الغداء ولا مش دايرين
عالية:لا واتي غير خذتني الدوة توا انحطلكم توا وصبت
“”
الساعة 5 العشية سراج وعى ولقى روحه راقد في سرير سندس ومازال حاظن مخدتها
سراج ابتسم:انتي شن درتي فيا يامطرشقة معقولة خليتيني هكي حاس بفراغ كبير وانتي مش هنا زعمك كلام فيصل صح وانكون لالا مستحيل هي كل القصة انها عاجبتني او تعودت عليها وعالمناقرة معاها
سراج:بس عمره ماكان التعود علي حد يوصل الدرجة ان ايخليك ترقد في سريره عشان اتشم بنت عطره في مخدته وادبشه الا اذا كان زي ماقال فيصل
سراج:انا عارف اني معجب بيها بس اني انحبها هذي مستحيل اتصير
سراج:انا عليش امتعب روحي في التفكير خليني انكد عليها اشوي ومسك فونه ورن عليها
سندس كانت مقمعزة هي وامها يشربن في قهوة وبعد رن فونها ردت
سندس:ايوا سراج
سراج:قتلك وتي روحك اشوي وبنجيك
سندس:شنو بس انا نبيش انروح انا بايته عند هلي اليوم
سراج:لالا مافيش بيات
سندس;وشن دخلك انا ماخذيتش اذنك انا بنبات
امها كانت اتفنص فيها تبيها تسكت
سراج:كلمة وحدة ربع ساعة وجايك وسكر
سندس بعصبية:هالواطي والله ماني مروحة معاه
سعاد بعصبية:هذا شنو انتي كنك مااتحشميش علي وجك معقولة فيه وحدة محترمة تحكي مع راجلها هكي
سندس:شفتيه شن قالي مااتباتيش
سعاد:قبل مااتجي قلتيله انك بايته
سندس:لا اصلا مادخلش بيا يكفي اني قتله ان جايتكم
سعاد:كيف مادخلش بيك هذا راجلك والمفروض تاخذي اذنه في كل حاجة
سندس بعصبية:لالا انا ماانحبش حد ايتحكم فيا وهذا صامط عشان قعدت انقوله وين ماشية لقاها سمحة وقعد ايتحكم فيا
باتها كان ايصلي في العصر وجاهن
فرج:كنها دوسة معصبة
سعاد:عشان هي تبي اتبات وسراج توا رن عليها قاللها وتي روحك جايك
فرج:وهذي حاجة تستحق اتعصبي اكيدة صايرة معاه حاجة دبينكم متفقين وقالك بنجي ناخذك
سعاد:لا مش متفقة معاه قايلتله بس ماشية الهلي وتوا قررت تبي اتبات وهو رفض
فرج:معقولة هكي يادوسة مش هكي ربيناك نحن الحاجات هذينا لازم من اتفاق مع راجل مااتجيش اتحطيه في امر واقع هكي مرات هو ماايحبش مراته اتبات برا من حوشها
سندس;مادخلش هو انبات ولا لا اهم حاجة اني قتله ماشية
فرج:عيب يادوسة كيف مادخلش هذا راجلك وبعدين عادي فيه رجالة ماايحبش هلهم ايباتو برا حوشهم وانا اولهم تذكري ماعمريش خليتكن اتباتن في حوش جدك وامك عمرها ماعارضتني ولا قالت نبي انبات
سندس:بس انا مش بايته عند حد براني انا بايته عند هلي يعني ماعندش حق ايقولي لا وبذات اني من اول مااجوزت مابتش هنا بكل
فرج:عارف وهذا حوشك وحتى نحن نبوك اتباتي بس بموافقة راجلك يعني اتفقي معاه وتعالي وباتي لعند مااتملي
سندس بعصبية:لا ماايمشيش كلامه عليا انا نبيش نمشي معاه وبعدين خلاص انا بنقعد حرجانه
فرج يضحك:عليش بتحرجي ياهبلة والراجل مادارش حاجة غلط اصلا حتى لو قعدتي هنا وزعلتي ماعنديش كيف انصبي معاك انتي الغلطانة
سندس:يعني معقولة يابابا انقولك حرجانة وماتاخذليش حقي
فرج:عشان تحرجي لازم ايكون سبب مقنع يعني قوليلي غلط فيا على صوته عليا مد يده عليا هذك الساعة اتحقي شن انديرلك فيه لكن اتقوليلي مايبينيش انبات هذي ماعندكش حق فيها بكل
سعاد:الله ايربحك روحي مع راجلك بعد ايجي وبلا مشاكل
فرج:عدي روحي مع راجلك ولما بتجي اتباتي اتفقي معاه وهو مش حيتكلم وانا توا حنقوله ايجيبك بكرا اتباتي باهي هكي
سندس ماكانش عاجبها الكلام بس حست هلها مش حاسين بيها وان هي ماكانتش بتروح عشان تبيش اتشوف سراج
بعد اشوي جاها سراج وخش سلم عليهم وقاللها هي وطلعت معاه وهي قالبة وجهها وغامتلها منه
سراج:كنك قالبة وجك
سندس:شي
سراج:عشان ماخليتكش اتباتي
سندس:شن رايك
سراج:عادي راجل وماايحبش مراته اتبات برا مالحوش
سندس شافتله زين:سراج شكلك استحليت اللعبة وقعدت تستعمل في الكلمة واجد
سراج:وشن فيها كان قلتها
سندس:ياما فيها عشان زواجنا تمثيل وكذب كله
سراج:عارف بس انا ماخليتكش اتباتي مش عشان انتي مراتي ومانبيكش اتباتي برا مالحوش
سندس:امالا شنو
سراج:عشان الحوش مافيش جو بلاك
سندس سمعت الكلمة واستكت
سراج ضحك:كنك سكتي ياام السان تعودت علي طولة السانك ومناقرتك ليا هذا عليش كسدت بروحي
سندس:معش اتقول ام السان
سراج:عادي زي ماانتي اتقولي صايع ومنحرف انا انقول ام السان
سندس:هذا لقبك وماشي معاك
سراج:وانتي هذا لقبك وماشي معاك بكل
سندس:ههههه حانط
سراج:ناقصة حاجة في الحوش ناخذوها قبل ماانروحو
سندس:لالا بس انا نبي السوق ناقصاتني حاجات
سراج:قصدك تبيني انشيلك للسوق
سندس:اها عليش مستغرب
سراج:مكان عام ماايصير شيئ
سندس:عشان معجباتك
سراج:اها
سندس:بس انا ناقصاتني حاجات مهمة ونبيهن اليوم
سراج:بكرا اندزلك اي حد ايجيبهن لكي
سندس:انا انحب نشري حاجتي بروحي
سراج:وانا مش ماشي بيكي للسوق
سندس:يبقى انرن علي عمو عدنان ايشيلني
سراج:انتي عارفة الساعة كم توا واكيدة بطولي في السوق يعني مش حتروحي الا بعد المغرب
سندس:وشن فيها
سراج:تبي اتروحي في الليل مع راجل غريب واتقوليلي شن فيها
سندس:عمو عدنان مش راجل غريب
سراج:لا راجل غريب
سندس:يبقى شيلني انت
سراج:الحاجات مايرجنش البكرا يعني
سندس:لا واصلا لما جيت خذيتني من هلي كنت متفقة مع بابا بيشيلني
سراج:وبتطلعي من غير اذني
سندس:عادي ماشية مع بابا شن فيها
سراج:بس نحن شن اتفقنا
سندس:خلاص ماطلعتش وبعدين اهو توا عندك العلم شيلني انت وكان ماهذا انكلم عمو عدنان عشان الدبش اللي بناخذه مهم بكككل
سراج:عليك قصة قصة عندنا هذي باهي خلاص انشيلك لكن اول واخر مرة نمشو المكان عام
سندس:باهي اصلا عساس انا ميته عالمشية معاك
سراج:المهم قتلك
ومشى بيها الارقى وأحلى مول ونزلو وقعدو ايتمشو في المول وسراج ايتلفت ايمين وايسار خايف وحدة من معجباته اتحقه مع سندس وتعرف ان اجوز لان ناكر قصة جوازه عالناس
سندس:بنخش المحل هذا(كان محل مستلزمات ومكياج كبير بكل)وخشوله مع بعضهم
سندس سيبت جيهة المكياج وجت للمكان اللي فيه المساسيك والفيونكات وحاجات البنات السماح هذينا?
سراج;مش هنا جيهة المكياج
سندس;ومن قالك بنشري مكياج
سراج:وعليش خاشة هنا
سندس:نبي هذينا?
سراج:انا ماشي مع بنية صغيرة تشري
سندس:ومن قالك هذينا متاع بنات صغار
سراج:والله انا ديما انشوف في ريونة تلبس فيهن
سندس:من ريونة
سراج يضحك:البنوته الصغيرة اللي ضرباتك في المصيف
سندس:واللي قرصتني في الفرح
سراج يضحك:ايوا هي
سندس:شن تعرفها البنت هذي
سراج:هذي كبيدتي ماانتحمل فيها شي هذي ريان اخت فيصل
سندس:مغير انحقها الفرخة هذي توا انوريك شن اندير فيها
سراج:اقربيها وشوفي شن ايصيرلك
سندس بهزوة:وشن بديرلي
سراج قرب منها وحط يده ورا خصرها وقربها منه زين
سراج:انوريك شن نقدر اندير
سندس:سراج نحن في محل شوف الناس كيف اتشوفلنا
سراج بعد منها:انقضك مني ان في محل بس وكان ماهذا وريتك شن انديرلك
سندس:خلاص هيا نطلعو الناس اتشوفلنا
سراج:باهي هيا
خذا سراج من يدها الحاجات اللي تبيهن ودفع حقهن وطلعو وعند الباب تلاقو مع مع وحدة طرف(لابسة جينز ازرق ضااااابط وعليه كت وجاكة ولابسة كعب عالي ومكياج وااضح وقاصة شعرها قصة قصيرة بس اتهبل ولون شعرها بلاتيني اسمها لولي)
لولي:وااو سيجو شن اخبارك وسلمت عليه بالخد
سراج:تمام شن اخبارك انتي لولي
لولي:تمام التمام معقولة هكي لا اترن ولا تسأل
سراج:والله ماعندي علم انك في ليبيا بكل
لولي:وانا في فرنسا ليش ماكلمتني ولا انسيتني ياشرير
سراج:معقولة ننساك بس اخر مرة حكينا كنتي مسافرة وقلتيلي انرد انكلمك ومعش رنيتي
لولي:وعاد انت كبريائك معش يسمحلك اتعاود تتصل مرة اخرى
سراج:اكيدة بس قوليلي شن جابك الليبيا زيارة ولا اقامة
لولي:لا هدي ولا هذي جاية شغل بنفتح مركز تجميل هنا
سراج:سراج ماسدكش اللي في فرنسا
لولي:حابة انوسع مشروعي
سراج:حلو التوسيع
لولي:لازم ماانتلاقو اتوحشت سهراتك
سراج شاف السندس:اكيدة حنتلاقو
لولي فطنت السندس:معليش توا غير شفتها من هذي عرفني عليها ومدت يدها السندس
سراج:هذي هذي
سندس مدتلها يدها وابتسمت:أنا زوجته
سراج فنص عيونه في سندس زيين
لولي بصدمة:معقولة سيجو اجوز امتى وكيف بجد انا زاعلة منك هكي انا اخر من يعلم
سراج:جت بسرعة مافيش واجد عالمين
لولي:بس كيف جت منك انت ياسيجو اللي مدوخ بنات المانيا كلهن تجوز مستحيييل
سراج يضحك:اهو تورطنا وصارت
لولي:بس بنعرف شن حاق فيها بزيادة عالبنات اللي عرفتهن لين خلاتك تجوزها
سندس غمتلها مالكلمة:اكيدة الاحترام والادب ومشت وسيبتها
سراج:معليش يالولي ماتاخذيش علي كلامها اصلا السانها طويل اشوي
لولي:لا عادي مافيش مشكلة المهم لازم انتلاقو قبل ماانسافر
سراج:اكيدة وسلام توا ومشى في جرت سندس
سراج:سندس سندس وقفي اشوية
سندس:ها كنك
سراج:شنو اللي قلتيله للبنت توا
سندس:قلت الصدق انت ماحقيتش منظرها
سراج:مادخلكش بمنظرها وبعدين انتي من سمحلك اتقولي زوجتي
سندس:بالك قلت حاجة كذبة وانا ماعنديش العلم مش بحكم الشرع والقانون متجوزين
سراج:بس بينا نحن مش متجوزين ومالاول كان الاتفاق لا تدخلي فيا ولا ندخل فيك
سندس:وانا ماادخلتش فيك
سراج:واللي درتيه توا شن اسمه بعد اتقولي البنت نعرفها ان متجوزين وانا ناكر الموضوع هذا عاللي نعرفهم كلهم
سندس:وانا شن عرفني انك ناكره انا قلتها هكي وخلاص
سراج:سندس انتي درتي هكي عشان غرتي عليا
سندس ضحكت:ههه انا انغار عليك انت ومن من من هذي شكلك طرشقت
سراج;وكنها هذي تي طرف اطلع طول ماشفتيش شكلها ولا جسمها ناعلي وخلاص
سندس:مش حلوة جسمها كله نفخ ووجهها كله مكياج
سراج:يعني انتي مااتحطيش في مكياج
سندس:لا انا جمالي طبيعي صقع عليها
سراج:مااتحطيش في مكياج بكل حتى بعد تمشي للجامعة
سندس:ابدا عمري مادرته في الجامعة اندير في مرطب للوجه عشان الشمس ومرطب للشفايف
سراج قرب وقعد ايشوف الشفايفها وايعض علي شفايفه
سراج ايعظ علي شفايفه:حرام عليك الشفايف اللي زي الفراولة هذينا يبن مرطب
سندس انحرجت ومشت وسيباته وسراج لحقها
سراج يضحك:كنك اتقول عمرك ماسمعتي كلام هكي
سندس بعصبية:ماعمريش تعرفت علي واحد صايع زيك عشان نسمع هكي
سراج:تي انتي امك داعيتلك عشان حصلتيه الصايع هذا
سندس:قصدك داعية عليا
سراج:المهم كان كملتي خلينا انروحو
سندس:لالا بنتعشو في مطعم قبل
سراج:شنوووووو
سندس:زي ماسمعت
سراج;وانا قتلك مكان عام مع بعضنا لا ساد اللي صار توا
سندس:خلاص براحتك انت روح وانا بنتعشى في مطعم وبعدها انروح
سراج:كيف كيف ومن بيروح بيك ان شاءلله عمو عندنا
سندس:اها
سراج:في عينك وفي عينه اتروحي معاه في الليل
سندس:خلاص خليك في السيارة انا ننزل للمطعم انتعشى وبعدها نطلعلك
سراج:باهي شن رايك ناخذو عشاء مالمطعم وانتعشو في الحوش
سندس:لالا بنعشى في المطعم
سراج:خلاص زي ماقلتي مش حننزل معاك وحنرجاك برا سندس:براحتك
وطلعو مالمول ومشو للمطعم وسندس نزلت وزي ماقالت بتعشى في المطعم وهو يرجاها برا
نزلت سندس مالسيارة وكان فيه شباب قدام المطعم ولما شافو سندس من بعيد قعدو ايبحتو فيها سراج ماتحملش اللقطة ونزل وراها
سراج:وقفي اشوية
سندس:كيف صار عليش نزلت
سراج:القيت روحي جيعان انتعشو مع بعضنا ونطلعو
سندس:ومعجباتك
سراج:توا نصرف غير انتي كان القيتي وحدة تعرفني مااتقوليش انك مراتي
سندس:باهي وخشت وهي مبتسمة حست انها انتصرت علي سراج ودارت اللي في راسها
خشو للمطعم وطلبو العشاء
“”
طبعا عند رويدة جو هل معاذ وحددو موعد الفرح وهلها وافقو
اما عصام وباته مشو الهل بسمة واتفقو معاهم ان بكرا ايتم الطلاق
“””
#في_المطعم
سراج وسندس يرجو في العشاء وقاعدين ايتناقرو مع بعضهم مع تخطيمة راجل عمر في 45سنة دكتور في الجامعة كان ايقري علي سندس
دكتور زياد;اهلين بسندس شن اخبارك
سندس صبت ومدت يدها وسلمت عالدكتور
سندس:بخير الحمدلله شن اخبارك انت دكتور زياذ
دكتور زياد:كويس نورتينا في المطعم
سندس;تسلم هو المطعم لكي دكتور
دكتور زياد:اها ماليش واجد فاتحة بس قوليلي وينك ووين وصلتي في القراية
سندس:خلاص السنة سنة التخرج
دكتور زياد:مشاءلله انا عطيتك في اول سنة سبحان الله السنين كيف يجرن كنتي افضل طالبة عندي
سندس:والله وانت لعند توا احسن دكتور مر عليا
دكتور زياد:شن اخبار باتك شن داير
سندس:كويس الحمدلله
دكتور زياد فطن السراج;ماعرفتينش ياسندس بالشاب
سندس بتحكي قاطعها سراج
سراج ابتسم:المدام
دكتور زياد:نعم
سندس انحرجت:هذا زوجي بس ايحب البصارة واجد
الدكتور زياد مد يده السراج:تشرفت بمعرفتك
سراج شافله زين ومابش ايمد يده
سندس غمتلها من سراج:معليش دكتور انا اسفة بس الاخ قليل ذوق
الدكتور زياد:حصل خير وسلميلي علي باتك واجد وعدى
سندس بعصبية:انت شنو اللي درته هذا
سراج بعصبية;وانتي كيف اتهدرزي وجوك سمح ومش معبرة ان معاك راجل
سندس:وشن اتحق فيا هدرزت هذا دكتور وكان يعطي عليا في سنة اولى وسلم عليا ماانسلمش عليه يعني
سراج:مشاءلله من سنة اولى ومازال متذكرك شكله ايعزك واااجد
سندس:سمعته بروحك عشان كنت شاطرة عنده
سراج:عشان شاطرة ولا فيه حاجة اخرى بينكم
سندس:شن تقصد
سراج:يعني بينكم علاقة حب او حاجة هكي
سندس بعصبية:انت شن اتقول شكلك طرشقت عشان تحكي عليا انا هكي
سراج:اصلا بالعقل فيه استاذ له 4اسنين مقري علي طالبة وكل سنة ما4 هذينا مارين عليه مئات الطلبة ومازال متذكرها الا اتكون بينهم حاجة
سندس: انت ماعندكش تفكير الا في الحاجة هذي معقولة يعني مافيش حاجة اسمها استاذ وايعز طالبة بكل
سراج:لا مافيش واحد يذكر وحدة الا وبينهم حاجة
سندس:وااااو عليك عقل عندك اخسارة ماكنت عايش برا
سراج:عايش برا ومتخلف ومرة اخرى معش اتسلمي علي حد وانا معاك
سندس:وعليش ان شاءلله
سراج:هكي فوق جو
سندس:وماانت اتسلم عادي ولا حلال عليك وحرام عليا
سراج بعصبية:انقولك حاجة ومالاخر اماكن عامة معش بنطلعولهن مع بعصنا مرة اخرى
سندس:أحسن وهي صبي بنروح
سراج:اصبري انتعشو
سندس صبت:معش بنتعشى بنروح ناعسة
سراج صبى:براحتك وطلعو ومشو للحوش وماحد يحكي مع حد وكل واحد كاين معصب مالاخر واول ماروحو كل واحد خش الداره دوش وغير دبشه ورقد في سريره وهو ايفكر في اللي صار ومش عارف ليش دار هكي
“”
صباح ثاني يوم وطبعا كالعادة ناضت سندس صلت ووتت الفطور ووعت سراج وبعدها خشت تلبس وفطرو مع بعضهم وسندس مشت الجامعتها وسراج مشى الشغله
“””
عند عصام مشى هو وباته وعمه للمحكمة وطلق بسمة وروح
“”
عالساعة 10 سراج في مكتبه خش عليه فيصل
فيصل:معقولة يانصي اتجي للشركة ومااتخطم عليا ولا عقلك معش معانا ومع ناس اخرى
سراج:ترا خليني في حالي مش رايقلك راه
فيصل:خير يانصي كنك كيف اللي شايل هم الدنيا علي راسك
سراج:والله حاير ومعش فهمت روحي شن نبي
فيصل:اتحبها
سراج:كيف
فيصل:واضحة يانصي تصرفاتك كلهن ايقولن انك اتحبها
سراج:انا وهي مش زي بعصنا بكل قولي بس كيف بنحبها
فيصل:الاختلاف هذا هو اللي خلاك اتحبها
سراج:بس البنت هدي بذات ماينفعش انحبها
فيصل:وعليش ماينفعش اتحبها
سراج:عشان تختلف علي كل بنت عرفتها ولو حبيتها اول حاجة حتقولي سيب السهور والبنات وانا الحاجة هذي بذات مانقدرش انديرها
سراج:وليش ماتقدرش اديرها شن فيها خلاص انت حبيت والمفروض تقعدلها بروحها
سراج:انت عارف كويس ماانحبش فكرة نقعد مع نفس البنت
فيصل:بس هذي مش اي بنت هذي انت حبيتها
سراج:انا متاكد ان مش حب ممكن ايكون اعجاب بس حب لا عشان انا عمري مااقتنعت بالحب
فيصل:بس الاعجاب بداية حب ولازم تعترف انك بديت اتحبها عشان اتعيش حياتك طبيعي
سراج:بس مانقدرش انقول ان حب لين نعرف هي شن حاسة تجاهي
فيصل;وانت اتقول هي شن حاسة تجاهك
سراج:مش عارف مرة تصرف تصرفات انها كارهتني ومرة انحس اني عاجبها ومرة انحس انها مش رافضة قربي ومرة مش طايقة تسمع حتى صوتي ومرة نلقاها ادير في حركات مالهنش تفسير الا انها اتغار عليا
فيصل:والغيرة دليل عالحب
سراج:معقولة اتكون اتحبني
فيصل:وليش لا حتي هي اكيد حبت الاختلاف اللي بينكم
سراج:انا لازم نعرف شن احساسها تجاهي
فيصل:وكيف بتعرف
سراج:مانقدرش نعرف الا من حد قريب منها وتحكيله في كل حاجة زي صحباتها هكي هي اتحبهن واكيد تحكيلهن في كل حاجة
فيصل:وكيف بتعرف منهن اكيدة مش حيحكلك
سراج:لازم ايكون عندي اتصال بوحدة منهن
فيصل بصدمة:من جدك بدير علاقة مع صحبتها
سراج:تي اي علاقة انا قصدي لازم ايكون عندي وسيط بيني وبين وحدة من صحباتها
فيصل:كيف وسيط مازال مافهمتك
سراج:يعني لازم حد نعرفه كويس ايتعرف علي صحبتها وايدير معاها علاقة عساس حب وهكي ويقعد يسحب منها في الكلام وايقوله ليا
فيصل:ووين بنلقوه الشخص اللي هكي
سراج;مش حندوروه عشان قاعد قدامي
فيصل:قصدك انا
سراج:اها
فيصل:لالا انا طلعني مالموضوع هذا
سراج:معقولة يانصي انت عمرك ماتخليت عليا في موقف جاي توا وتحكيلي هكي وبتخلي علي في اكثر وقت محتاجلك فيه
فيصل:بس انت عارف عمري مامثلت دور حب علي وحدة مانقدرش ياراجل
سراج:بس عشان صاحبك هالمرة اديرها
فيصل:لنقني مانقدر
سراج:منور يانصي هذا كلامك ليا ديما ومعاك عالموت طلع كله كلام
فيصل:بالجو ماتزعلش طلبك واعر
سراج:مافيش وعاره هنا كم يوم وبعدها خلاص مافيش بنت اتعلق في واحد كم يوم لكن براحتك ماانزرش عليك فيصل:يعني بتزعل توا
سراج:لا مش زاعل كل واحد وحر في اللي بيديره لكن مرة اخري لاعاد اتقولي نصي ولا معاك عالموت
فيصل:ماتزعلش يانصي انا ديما انقولك معاك عالموت وماانردش في كلمتي واللي تبيها انديرها
سراج بفرحة:تحكي جد
فيصل:جد الجد بس من صاحبتها ووين بنتعرف عليها
سراج:رانيا صحبتها ماالهش شيئ مسيبه حبيبها يعني جاهزة انها اتخشش اي حد في حياتها عشان تنسي اللي فات
فيصل بعد قاله رانيا انصدم بس سكت وماحبش ايبين
سراج:اما وين اتعرف عليها هذي خليها شوري البنات عندهن مشروع تخرج وبيديرنه مع بعضهن ويبن ارض عشان ايشوفنها عملي ويسهل عليهن المشروع انا بنحكي مع باتي وبناخذهن عالمزرعة هنا وهلهن وهلي تغيرة جو يومين وهنا يشتغلن براحتهن
فيصل:وانا شن دخلني في الوضع العائلي هذا
سراج:كيف يانصي انت مالعيلة وانا غادي حنرن عليك انقولك تعال ولما اتجي انت وشطارتك وكيف اتخليها اتوافق عليك
فيصل سكت
سراج:ها شن قلت بنمشي توا نحكي الباتي
فيصل:والله شنو انقولك اللي اتشوفه انا معاك فيه
سراج صبى:خلاص نمشي نحكي الباتي توا وكان قال باهي بكرا نمشو
فيصل: تمام وصبى وطلع
وسراج طلع الباته وحكاله الموضوع وباته وااافق
#يتبع
قولكن سندس حتوافق وهل رانيا حيوافقو وكان صار مالمشية شن حيصير من تطورات بين سندس وسراج فيها وهل حنعرفو فيها صلة المعرفة اللي بين رانيا وفيصل ولا لا ?
وهل فيصل حيقنع رانيا بالعلاقة او المعرفة اللي بينهم ماتسمحش اتكون بينهم علاقة ?
وباهي قولكن سراج كيف بيعرف اذا سندس معجبة بيه او لا ?
كله حنعرفوه في حلقة بكرا لان باذن الله انحاول انزل حلقة بكرا حتى لو قصيرة كترضية لكن عالتاخير?
واهو اليوم عوضتكن بحلقة طويلة وان شاءلله اتنال اعجابكن ?
أسفة لو فيه لخبطة في الأسماء وأكيد رأيكم ايهمني ?
گـتـابـتـي Koka Saleh
الـحـلـقـة (26)
گـتـابـتـي #Koka_Saleh
“”””””””””””””””””””””””
خشت رانيا السندس وقالتلها ان فيه واحد فجعها وقال يبي سراج وسندس طلعتله وقالتله ان قاعد في الفيلا وخشت علي صحباتها
“”
فيصل مشى للفيلا وسلم علي عفاف وقاللها يبي سراج وخش للجناح امتاع سراج اللي تحت وبعد 10 دقايق سراج خش عليه
سراج:اووو نصي شن الجو
فيصل:تمام يانصي شن جوك انت
سراج:تمام التمام
فيصل:شنو امالا شكلك ملزوز من غادي
سراج;لا والله غير ام السان جياتها صحباتها وانا سيبتهن براحتهن
فيصل يضحك:ومن أمتى الذوق هذا كله ولا الا ملزوز
سراج بغرور:والله طلعت بجوي انت عارف عمري ماالتزيت من مكان بس قولي من قالك اني مش غادي
فيصل:جيت غادي القيت في الجنان وحدة من صاحبات ام السان اللي كانت معاها في المصيف ولما سألت عليك كلمتلي ام السان
سراج:قصدك سندس طلعتلك برا
فيصل:اها وهي قالتلي انك هنا
سراج:اهااا
فيصل:كيف صار الغيرة بدت تشتغل ولا شنو
سراج:اي غيرة تحكي عليها انت عارف كويس ان الكلمة هذي عمري مااعترفت بيها كيف واحد يقعد ايغار علي وحدة ومايبيش حد ايكلمها ولا ايقرب منها هذا كلام فاضي
فيصل:يعني انت مااتغارش علي ام السان
سراج يضحك:من جدك تحكي معقولة انا انغار وعلي من علي اكثر وحدة كرهتها في حياتي
فيصل:معناها هكي سهلت عليا الموضوع
سراج:اي موضوع
فيصل;مالاخر هكي ام السان عاجبتني وكان ماتبيهش من توا بنحكي معاها عشان اول مااطلقها بناخذها
سراج مسكه من قميصه:انت في شن تحكي
فيصل:مش انت قلت ماتبيهش
سراج زاد مسك قميصه وبقوة وقربه منه وكان معصب بكل
سراج:فيصل سكر فمك مااتخلينش انديرها وانمد يدي عليك
فيصل:عارف انا لانبيها ولا عمري نظرتلها نظرة خاطي انها مرات خويا لكن شفت كيف طلعتك اتغار عليها
سراج طلقه:القصة مش قصة غيره القصة عشان البنت توا علي ذمتي بعد انطلقها انت حر دير اللي اتريحك مااتهمنيش
فيصل:لا اتهمك واتهمك واجد اخرى طول عمرنا انتعرفو علي نفس البنت وانهيجو مع نفس البنت في حياتك كلها مافيش مرة هجمت عليا هكي عشان خاطر وحدة
سراج بعصبية:قتلك عشان علي ذمتي البنت توا شايلة اسمي
فيصل:سراج ماتضحكش علي روحك البنت عاجبتك وبعد اللي صار توا تاكدت ان المرحلة اللي انت فيها مش بس اعجاب
سراج:شن قصدك
فيصل:قصدي واضح انت اتحبها
سراج بعصبية:تي شن هالكلام الفاضي اللي تحكي فيه اي حب ياراجل كل الموضوع البنت علي ذمتي اكيدة حتقعد تفرق عالبنات اللي نعرفوهن اللي نقعدو معاهن ليلة وخلاص
فيصل:تمام ماقلنا شي تفرق عالبنات صح بس مش عشان علي ذمتك عشان حبيتها كان اتشوف روحك كيف كنت تصرف قبل ماتاخذها وكيف تصرف توا سندس غيراتك واجد
سراج:لا تغيرت لاشيئ انا مازلت نفس ماانا تغير بس الشغل وانت عارف اني نشتغل عشان الاتفاق أما السهور والبنات وطبعي مازال نفس قبل
فيصل:سراج انا صاحبك وعشرة عمر يعني لما اتغير انا اول واحد نفطنلك قبل ماحتى انت تفطن الروحك
سراج عصب عالاخر وبصوت عالي:فيصل قتلك مازلت نفس ماانا مافيش شيئ تغير وغير الموضوع الفاضي اللي تحكي فيه أحسنلك
فيصل:تمام توا انغيره غير وسع بالك ومااتعصبش
سراج:خلينا نطلعو انغيرو جو بدل هالنكد اللي درته ليا
فيصل:هيا وطلعو
“”
عند سندس وصحباتها مقمعزات ويشربن في النسكافيه في الجنان برا
رويدة:دوسة شن جو عمتك معاك بما ان عيل واحد اكيدة دايرتلك جو الغيرة والحركات
سندس:بالعكس والله اتعامل فيا زي بنتها بزبط واتهزب حتى في سراج كان حستنا متزاعلين
رانيا:انا اللي شفتها توا استقبلتني ومن اول ماقمعزت وهي تحكي علي دوسة من كلامها باين اتحبها وااجد
رويدة:مشاءلله ربي ايدوم عليك
سندس:عارفة حتى عمو كويس وايعامل في زي بنته اتصدقي انا من كثر ماهما كويسين نستغرب كيف طالع منهم واحد صايع زي سراج
رويدة:باهي هو ليش طبعه هكي اتحسيه كأنه مش من هنا
سندس:من هو صغير عايش برا ومالقش من ايوريه الطريق الصح فقعد هكي
رانيا تضحك:حي حي بدينا انتعذرو عليه
سندس:بلا برادة اي عذر سألتني وجاوبتها اللي عارفته
رانيا:والله حاسة هكي انك بديتي اتميلي السراج
سندس بهزوة:وشن خلاك حاسة هكي ياحنة
رانيا:عشان معش تحكي عليه زي قبل يعني من قبل كنتي حتى اسمه مااتحبيش حد ينطقه بس توا تحكي عليه وبكل ارياحية لا معصبة لا شيئ
سندس:بس الوضع هذا عادي عشان خلاص رضيت بالأمر الواقع ولازم انتعايش معاه فالعصبية وحرق الدم حيضرني انا مش هو عشان هكي حتى هو قعدت انتعامل معاه بكل برود
رويدة:باهي توا قوليلي شن نظام عيشتكم مع بعضكم في حوش واحد يعني مكملينها مشاكل وعياط ولا الجو عادي فهمينا
سندس:حياتنا عايشينها عادي يعني فيه مشاكل بس عشان نحن عارفين بنعيشو مع بعضنا سنة كاملة فكل واحد ايحاول ايتغاضى علي اخطاء لاخر عشان نقدرو انتأقلمو
رانيا:باهي هو شن نظامه معاكي مثلا ماحسيتيش بدى يعجب بيك ولا حاجة
سندس:لالا مافيش حاجة زي هكي تصرفاته عادية عشان انتن عارفاته هو صايع مش مقتنع بفكرة اعجاب وجو هكي
رويدة:اهم حاجة مايقعدنش فيه مشاكل وحياتكم هادية عشان انتو هكي هكي مش مكملين مع بعضكم
سندس:هي هذي حتى نحن انحاولو هكي
رانيا:باهي دودي انتي طمنينا شن جوك مع معاذ والفرخة بنت عمه سيبتكم في حالكم
سندس:اي بنت عمه شنو القصة
رانيا:هذا معاذ كان خاطب بنت عمه من قبل وماتت في حادث اسبوع الفرح ومن يومها معاذ اكتئب ومعش حب ولا بنت وكان مقرر لا يجوز لا شيئ لين اكتشف ان ايحب دودي بس اسيل هذي تقعد اخت خطيبته اللي ماتت وماتبيش معاذ يجوز خاطي اختها والفترة اللي فاتت ادز في رسائل الرويدة عساس اتقوللها معاذ ماايحبكش مغير خطبك عشان ينسى اختي
سندس:طيح سعدها شن دخلها بيه هي الراجل حب وقرر يجوز عن مرض الأنانية
رويدة بحزن:بس شكله يابنات كلامها صح ومعاذ خطبني عشان ينساها
رانيا:عليك قصة شكلها كلماتك اخرى
رويدة:لالا ماكلمتنيش بس اليوم في الجامعة معاذ حكى كلمة صدمني بكل ومنها تأكدت ان مازال مانساها وخطبني بس عشان ينساها بيا
سندس:شن قالك
رويدة:تخيلن يابنات ايعاتب فيا عشان الايام اللي فاتن هملته ومعش رنيت عليه وكنت قافلة فوني قعدت انتعذرله وانقوله نفسيتي تاعبة وماكنتش بنكد عليك قالي انا مش متعود علي هكي لينا زمان كل حاجة اتقول فيها ليا انا اول واحد ونزلو دموعها
سندس:صح هي كلمة واعرة يادودي بس مش معنى هكي ان ماايحبكش مرات بس ايكون زاعل منك عشان معش كلمتيه يعني الراجل ديما يبي اهتمام وبذات معاذ مش مالشباب اللي يكذبو وبعدين حطي في راسك ان جا بروحه وقالك انحبك يعني ماكان عارف بحبك له بالعكس وين ماعرف اتحبي غيره ياما صار فيه ولا انسيتي كيف بدت قصة حبكم
رويدة:مش ناسية بس الكلمة قهرتني سألته كم مرة عليها ايقولي هذا ماضي بس شكله مازال ايفكر فيها
سندس:توا ياعبيطة ايفكر فيها ولا ناسيها البنت خلاص ميته وانتي توا اللي ايحبك وهو مافيش شيئ زاره ان يكذب عليك في حبه وهو له كم سنة مسكر علي موضوع الحب
رويدة:انا خايفة يابنات خايفة انعيش معاه وحبها وشبحها يقعد ديما معانا وماانتريحش معاه هذا عليش انقول ننهي كل حاجة معاه من توا وننقهر فترة وبعدها ننسى احسن ماناخذه ونقعد كل يوم مقهورة ان ايحب غيري
سندس:لا بجد شكلك انهبلتي معقولة اتفكري هكي علي موضوع بسيط زي هذا اكيدة حكى هكي عشان معصب منك انك هاملتيه ومش حاس بأهميته عندك
رانيا:دودي الراجل ديما ايحب اللي تهتم بيه وانتي زودتيها قعدتي قريب 3ايام مقفل مايندري عليك حية ولا ميته انا رؤوف كان قعدت ساعة وحدة مقفل ايديرلي عركة كبيرة طبعا الكلام هذا زمان ونزلو دموعها وقعدت تبكي
سندس:توا ليش هكي اتذكري في روحك بيه مش عساس بتنسيه خلاص
رانيا تبكي:بننساه بس مش قادرة ننسى ايامي معاه هذينا حلى ايام حياتي
رويدة تبكي:يانا عليا ياقلبي مش عارفة شن بنحكيلك ماعنديش وجه نحكي اي كلمة
سندس بعصبية:بلا صماطة انتن لثنين ماتقلبنهش مناحة جايات عشان انغيرو جو وننسو كل الهم اللي صار معانا وبعدين مشاكلكن مفتوحة انتي يارنوشة انسيه وربي حيجيبلك اللي احسن منه وانتي يادودي كان رن عليك وعرف غلطه عاتبيه اشوية وازعلي وبعدين صالحيه بس بشرط معش ايكرر الكلمة هذي مرة اخرى
رويدة:من اول ماطلعت مالجامعة وهو ايرن عليا وايدزلي في رسائل وانا مارديتش عليه
سندس:خلاص اقرصي وذنه اليوم ومااترديش عليه بكل خليه يعرف انك زاعلة وبكرا لما ايرن ردي عليه وعاتبيه وهو بروحه معش يجرأ ايقولها
رويدة:انتن قولكن هكي
سندس ورانيا:اها
رويدة:خلاص حندير زي ماقلتن
سندس:توا معش مازال الا حاجة وحدة الفرخة رانيا اترد اتجي للجامعة خلاص الامتحانات قريب وعندنا مشروع مازال ماكملنا الشغل عليه
رانيا:يي خطرتي عليا المشروع انتي معش درتي شيئ فيه
سندس:لا درت فيه كم حاجة بس القصة نبي مكان نفس اللي بنديرو عليه المشروع حيقعد شغلنا اسهل
رانيا:خلاص حنحكي البابا ايشوفلنا اي ارض ناخذو منها مقاسات ونشتغلو عليها
سندس:بس لازم اتكون مقاربة للمكان اللي بنشتغلو عليه انتي عارفة تصميم الشركة اللي بيعجب الكلية بيعتمدوه وهو اللي بيشتغلو عليه في قطعة الارض
رانيا:خلاص حنحكي البابا المهم انا توا خايفة مالامتحانات انتي عارفة هلبني واجد
سندس:مش واجد هلبك وبعدين اللي مش فاهمتيه انا نشرحة لكي والامتحانات موضوعهن ساهل توا تفكيري كله في المشروع نبيه ايكون مشروعنا مميز
رانيا:ان شاءلله
سندس:هي صبن انخشو انعصرو جوا
رويدة ورانيا:هي وصبن وخشن جوا عصرن وكملنها اتهدريز ومرة يضحكن ومرة يبكن وعالمغرب روحت رانيا اول وحدة وبعدها رويدة جاها باتها وروحت وصلت لعند الحوش ولما نزلت هي وباتها لقو معاذ قدام الباب بات رويدة سلم علي معاذ:كيف حالك وشن اخبار هلك
معاذ:الحمدلله بخير كيف حال صحتك انت
بات رويدة:كويس الحمدلله تفضل جوا كنك قاعد برا
معاذ:كنت جوا سلمت علي عمتي وقالتلي ان رويدة عند صاحبتها وانت ماشي اتجيب فيها قعدت هنا نرجا فيكم
بات رويدة فنص فيها:قصدك هي مش واخذه اذنك
معاذ:لا ياعمي هي حكتلي غير انا انسيت بس
بات رويدة بعصبية:كان مش واخذة اذنك قول وانا نصرف معاها توا كيف ولية تطلع من غير اذن راجلها كان ماعندك العلم يارويدة راهي حرام اتحقي في امك عمرها ماخشت حتى علي جارتها اللي جنبها لين تاخذ اذني قبل
معاذ:لا ياعمي قتلك حكتلي مبدري في الجامعة غير انا اللي انسيت وبعدين اصلا جاي بنشوف عصام غير ماالقيتش وجوا مع عمتي كانن فيه صبايا فقعدت هنا نرجا فيكم
بات رويدة:خش خش تفضل وخشو ومعاذ صبى في الجنان
معاذ:معليش ياعمي نبي هلي في كلمتين وبعدها نلحقك جوا
بات رويدة:خوذ راحتك وخش
رويدة جت بتخش ورا باتها
معاذ:اصبري وين خاشة مش سمعتي قلت العمي نبيك
رويدة:ماعندك ماتبي فيا
معاذ:لا عندي مانبي فيك انا عارف انك زاعلة ومايرضينيش تزعلي مني
رويدة:ماتضحكش علي روحك انا ابدا مش هامتك انت كل اللي هامك اني نقعد انحبك عشان نقدر انسيك لينا
معاذ:انتي عارفة كويس اني انا انحبك وماخطبتكش عشان ننسى بيك حد بالعكس خطبتك عشان انا انحبك واكبر دليل اني انا اللي اعترفتك قبل ماانتي تعترفي بحبك ليا ولما جيت وحكيتلك ماكنتش متاكد مية في المية انك اتحبيني وشفتي لما باتك رفض انا شن درت عشان ناخذك وكنت مستعد اندير اكثر ماللي درته المهم اتكوني ليا وهذا كله درته بس عشان انحبك وعشان انتي البنت الوحيدة اللي قدرت اتخليني انحبها بعد ماباب الحب سكرته من كل الجيهات
رويدة:والكلام اللي قلته ليا شن اتفسره حظرتك لو ماانك مازال اتحبها
معاذ:وليش مااتقولي قلت هكي لاني معصب منك عشان لكي كم يوم ماحكيتي معايا ولا دورتيني انا اللي حسيت انك مااتحبينيش عشان اللي ايحب واحد ايشاركه في فرحه وفي حزنه بس انتي قررتي اتشيلك حزنك بروحك مع ان حزنك هو حزني وكنت حنوقف معاك في اي حاجة بس انتي بعدتيني منك شن رايك في الحاجة هذي مش توجع واتخليك تنقهر واتقول اي كلمة
رويدة:بس مش الدرجة كلمة زي اللي قلتها انت مش عارف شن دارت فيا قهرتني من جوا جرحت قلبي وحسيت كلامك ليا كله كذب وانت في الاصل مااتحبنيش ونزلو دموعها
معاذ تغيرو ملامح وجه وقرب منها:حرام عليكي ليش تقهري فيا بدموعك توا انتي عارفة انك هكي تقتلي فيا الف مرة قايلك ماانحبكش تبكي بكل وبذات بسببي انا
رويدة تبكي:لو مااتحبش دموعي ماكنتش حكيت هكي ولا قارنتني مع حد
معاذ:ياريتني متت ولا بكيتك ان شاءلله انموت عشان خليتك تبكي بسببي
رويدة:بعيد السو عليك
معاذ قرب منها ومسحلها دموعها:أسف حبيبي سامحيني والله ماعاد انزعلك ولا انقارنك بحد انتي مكانك في قلبي محفوظ وماحد زيك والله
رويدة:معاذ اتحبني?
معاذ:مش بس انحبك انا انموت فيك يافرحتي انتي الفرحة اللي جتني بعد سنين حزن واجد ومسك يدها وقربها منه وحطها علي صدره
معاذ حاظنها:والله والله انحبك وااااجد رويدة بعد حكالها هكي زادت تبكي
معاذ زاد حظنها:كان اتحبيني بطلي بكى والله قلبي يوجعني بعد تبكي رويدة زادت حظناته بس مازال تبكي
معاذ:حبيبتي خلاص بكى عبيتي تيشرتي دموع
رويدة بعدت منه:ماشي ياصامط وجعك تيشرتك
معاذ:انبصر معاك يامهبولتي افداك الف تيشرت بس نبيك تضحكي عشان عندي لكي خبر سمح
رويدة:شنو
معاذ:توا مشاكلكم انتهن وانا قلت الهلي الفرح بعد 3اسابيع
رويدة:تحكي من جدك
معاذ:اها من جدي خلاص طولنا واجد بالفرح وانا معش انتحمل بعد عليك اكثر من هكي بنحطك جنبي وانتريح
رويدة:بس انا مازال مش مجهزة شيئ
معاذ;3اسابيع مكفياتكم ومجهزات كل حاجة تبوها وانا اتفقت مع امي بكرا اتجي اتقول الهلك علي موعد الفرح
رويدة:باهي اللي اتشوفه حبيبي
معاذ:حبيبي ناعلي اتهبل طالعة من فمك
رويدة ابتسمت وانحرجت وسكتت
معاذ:نجيها الخجولة خطرها خذيت الجناح اللي فوق كله عشان نسكنو فيه يبي اشوي تشطيبات ان شاءلله الاسبوع هذا ننهيهن
رويدة:الي اتشوفه حبيبي
معاذ:يعني انتي ماعندكش مشكلة تقعدي مع هلي في نفس الحوش يعني انتي جناحك زي الحوش وبروحه بس عاد ايضمنا حوش واحد
رويدة:لا عادي حبيبي شن المشكلة بالعكس خواتك ايهبلن وحسيتهن زي خواتي
معاذ:باهي طمنتيني
رويدة:خلاص انا بنخش طولنا بكل
معاذ:خطرها اخرلك مرة تطلعي من غير مااتقوليلي راه اليوم مشيتها عشان عارفك زاعلة مني
رويدة:قلتها بروحك عشان زاعلة انت عارف من قبل كنت انقولك
معاذ:عارف ومقدر بس مرة اخرى تطلعي من غير علمي حي عليك وحي
رويدة:ياساتر وشن بديرلي
معاذ كرها من يدها وقربها منه وباسها علي شفايفها وبقوة وبعدها بعدها
معاذ ايشوفلها:هكي انعاقبك
رويدة خدودها حمر:انت شن درت تخيل حد شافنا
معاذ:انتي مراتي ولا انسيتي نقدر توا ناخذك وماحدش ايتكلم
رويدة كانت منحرجة عالاخر ومعش قدرت حتى اتبحت فيه وخشت تجري
معاذ ابتسم وبحت ايمين وايسار ماشاف حد وخش للمربوعة جوا وقعد ايخرف مع باتها
“”
الساعة 10 سندس كملت لم حوشها وخشت للدار مسكت اللاب وقعدت اتشوف للمشروع امتاعها هي ورانيا واتعدل فيه في حاجات
سراج روح للحوش وخش لقى الجو هادي بكل رقى فوق وخطم علي دار سندس ولقاها مسكرة وقف عند الدار ودق وخش
سراج:خير
سندس بلا نية:خيرات
سراج:عادي انخش
سندس:مانك خشيت وفضت
سراج خش وقمعز عالسرير جنبها:انسجمتي مع صحباتك
سندس تشتغل عاللاب ومااتشوفلش:اكيدة
سراج:في شنو اديري كنك لاهية عاللاب هكي
سندس:انعدل في حاجات في المشروع متاع التخرج
سراج:خطرها شن صار في تخرجك كنك لاعاد امتحنتي ولا تخرجتي
سندس:خلاص قريب الامتحانات والشغل عالمشروع قبلهن
سراج:باهي ان شاءلله غير تنجحي عاد
سندس:اكيدة ننجح اصلا الامتحانات ماعندي فيهن مشكلة مشكلتي بس في المشروع
سراج:وشن المشكلة في المشروع
سندس: المشروع السنة مش بس عشان تاخذ A وتنجح وخلاص
سراج:امالا شنو مش عساس هكي مشاريع التخرج
سندس:السنة المجموعة مش كبيرة وطلبو منه كل اثنين ايديرو تصميم الشركة والمشروع اللي ايكون مميز وأحسن واحد حيعتمدوه وهو اللي حياخذو تصميمه واينفذوه وطبعا الاثنين اللي ينجحو وياخذو مشروعهم حيكون أول شغل الهم يطبق علي ارض الواقع وبالنسبة ليا هذا حلم عشان انجاز عظيم اني اندير تصميم الشركة كبيرة
سراج:باهي الشركة المن وشن قصتها
سندس:اول ماتعرفنا علي هلك تلاقيت مع جدك بس طبعا جدك ماكانش هذا اول لقاء بينا تلاقينا من قبل في الكلية وطلع هو صاحب الشركة وصاحب الفكرة وصاحب الارض الي بينفذو عليها المشروع
سراج:معناها مااتعبيش روحك وتضغطي نفسك واعتبري من توا انتي اللي خذيتي المشروع جدي شوري وانا حنحكي معاه ويعطيه لكي
سندس بعصبية;ومن قالك انا بننجح بالواسطة انا نبي نشتغل وانحط كل خبرتي ومهاراتي في المشروع عشان ناخذه بمجهودي
سراج:باهي وسعي بالك انا بس حبيت انساعدك
سندس:المساعدة مش هكي هذا اسمه غش
سراج:ياستي أسف ديري اللي اتريحك واشتغلي علي مشروعك وانا مش حندخل فيك بكل غير انا حسيتك شايلة همه وعندك فيه مشكله حبيت انريحك
سندس:لالا عنديش مشكلة كل القصة نبي قطعة ارض مقاربة للمكان اللي بنشتغلو فيه عشان انشوفو وانحاولو نشتغلو عملي عشان يسهل علينا التصميم بس ورنوشة قالتلي حتشوف باتها ايشوفلنا عشان هو يشتغل في العقارات
سراج:باهي تمام
سراج:باهي تبي حاجة من برا انا طالع
سندس:لالا نبيش شيئ
سراج:انحاول ماانطولش
سندس:براحتك
سراج صبى:ماشي وطلع ومشى خذا فيصل وطلعو للشقة
“”
عالساعة 3 في الليل روح سراج بعد سهرة سمحة مع البنات بس طبعا خذا استراتيجية ان معش يشرب واجد عشان الشغل ثاني يوم
رقى سراج شور داره بس قبل ماايخشلها تكى علي دار سندس وفتحها وخش لقاها راقدة جا وقرب منها ونزل علي ركبيه وقعد ايشوفلها وهي راقدة حط يده علي خدها وقعد ايمشي فيها بشويش لين وصل علي شفايفها وقعد ايحرك في صبعه عليهن حاول ايقرب منهن بس بعدها صبى دغري وطلع مالدار
سندس فتحت عيونها وتنهدت:يارب ان شاءلله اللي في بالي ماايكون صح ياربي هذا بذات لا مااتعلقنيش بيه لا انا له ولا هو ليا وقعدت اشوي واعية وبعدها رقدت
“”
سراج خش دوش عالسريع وطلع وتمدد في سريره ورقد
“”
صباح ثاني يوم وعت سندس بدري وصبت غسلت وصلت الصبح ونزلت وتت فطورها وبعدين وعت سراج وخشت لبست ونزلت وقمعزت بتفطر ونزل سراج
سراج:صباح الخير
سندس:صباح النور
سراج قمعز وبدى يفطر
سندس:لما انكمل محاضرتي بنمشي الهلي وبنتغدى عندهم
سراج:من بيشيلك
سندس:عمو عدنان
سراج:مشاءلله عمك عدنان هذا ماايقولك لا علي ولا مشوار مع انه محطوط بس عشان الجامعة
سندس:قتلك من قبل انا غالية عليه وماايقوليش لا علي شيئ
سراج:ربي ايدوم غلاكم
سندس:ان شاءلله
سندس:شن رايك اتجي انت تاخذني وانتغدو عند هلي مع بعضنا
سراج:قصدك انا انجي ناخذك مالجامعة
سندس:اها انت عليش مستغرب
سراج:الجامعة مكان عام ونعرف فيها ناس واجدة
سندس:واذا يعني شنو المشكلة
سراج:لا مشكلة ومشكلة كبيرة اخرى توا بعد ايشوفني البنات اللي نعرفهن غادي شن بيقولن عليا
سندس:البنااات اوكي فهمتك معليش ماكنتش عارفة بنضيع شهرتك وبريستيجك
سراج:اهو عرفتي معش تطلبي مني طلب زي هذا مرة اخرى
سندس ماردتش عليه وصبت وهي غامتلها منه وطلعت وركبت مع عمو عدنان ومشت للجامعة
وسراج كمل فطوره وطلع ومشى للشركة
“”
خذت سندس محاضراتها وعالساعة 12 شالها عمو عدنان الهلها جت الامها لقتها اتوتي في الغداء قعدت اتوتي معاها وبعدها روح باتها مالعمل وفرح لما لقى سندس عندهم واجتمعو جمعة عائلية زي ايام زمان
“””
عالساعة 2 روح سراج للحوش وجايب معاه غداء جاهز خش للمطبخ وحطه عالطاولة وقعد ياكل وبعد كمل غداه قعد ايلم في الزايد بيعزقه صبى وقعد ايشوف للمطبخ ويذكر في اليوم اللي سندس دارت فيه الغداء وشكل الغداء اللي دراته ابتسم وهو ايتخيل في شكلها وهي في المطبخ واتوتي
كمل اللي في يده وطلع مالمطبخ ورقى فوق وخش الدار سندس وشاف كيف عازقة البيجامة اللي كانت لابستها عالسرير قعد يضحك
سراج يضحك:مجنونة البنت هذي
قمعز علي سريرها ومسك مخدتها وشمها كانت فيها بنت عطرها اللي سراج كان ايحبها?
سراج تنهد وهو ايشم في عطرها وتمدد علي سريرها وهو حاظن مخدتها
“”
عند هل رويدة
بات رويدة كان يحكي بالفون وسكر وخش ايهزب
بات رويدة:خلاص الواحد حتى علي عياله ماعاد عنده كلمة
عالية:شن فيه ياراجل كنك
بات رويدة:هذا رؤوف اليوم جاي الخاله في الصبح وواخذه للمحكمة ومطلق حنين
عالية;ماهو عارفينه حيدير هكي بعد اللي صار واللي داراته حنين
بات رويدة:عارف لكن اقل حاجة ايجي ايقولي ياخذني معاه ونحكو مع خاله يعني الواحد لازم يحترم كباره مش هكي وخلاص قاعد يصرف اتقول انا ميت
عالية:بعيد السو عليك لكن رؤوف قلبه محروق ويبي حاجة اتبرد عليه بالك بعد ايطلقها ايتريح وايروح للحوش
بات رويدة:والله مش عارف شن صار في هالحوش قلبه هكي
عالية:ان شاءلله ايرد زي ماكان لكن عشان خاطري خلو رؤوف في حاله ومااتزعلوش مسكين ساد اللي صارله
بات رويدة:ربي يصلح حاله
عالية:ان شاءلله يارب
عصام:خير
بات رويدة وامها:خير
عصام قمعز:سمعتكم تحكو علي رؤوف وان طلق حنين
عالية:اها خالك كلم باتك توا قالها له
عصام:بما انكم فتحتو موضوع الطلاق حتى بسمة طالبة الطلاق
عالية بصدمة:شنوووو
بات رويدة:عليش تنصدمي معروفة مافيش بنت ترضى باللي داره ولدك وكثر خيرها اخرى جت وقعدت هي وهلها معانا وراجاته لين طلع مالمستشفى وقعد كويس
عالية:احكي معاها ياعصام بالك اتغير رايها والله بسمة كويسة وهادية ومش حتلقى كيفها
عصام:انا حكيت معاها وهي واخذة قرارها وقالت هكي اتريح
بات رويدة:كل شيئ نصيب خلاص اليوم العشية نمشو العمك ونحكوله وبكرا نمشو للمحكة واطلق
عالية:في العشية جايين هل معاذ ومرات ايجي معاهم بايخة اتسيبوه
بات رويدة:خلاص حنمشو في الليل ونتفقو معاه
عصام:باهي حتى في الليل تمام
بات رويدة:وين الغداء ولا مش دايرين
عالية:لا واتي غير خذتني الدوة توا انحطلكم توا وصبت
“”
الساعة 5 العشية سراج وعى ولقى روحه راقد في سرير سندس ومازال حاظن مخدتها
سراج ابتسم:انتي شن درتي فيا يامطرشقة معقولة خليتيني هكي حاس بفراغ كبير وانتي مش هنا زعمك كلام فيصل صح وانكون لالا مستحيل هي كل القصة انها عاجبتني او تعودت عليها وعالمناقرة معاها
سراج:بس عمره ماكان التعود علي حد يوصل الدرجة ان ايخليك ترقد في سريره عشان اتشم بنت عطره في مخدته وادبشه الا اذا كان زي ماقال فيصل
سراج:انا عارف اني معجب بيها بس اني انحبها هذي مستحيل اتصير
سراج:انا عليش امتعب روحي في التفكير خليني انكد عليها اشوي ومسك فونه ورن عليها
سندس كانت مقمعزة هي وامها يشربن في قهوة وبعد رن فونها ردت
سندس:ايوا سراج
سراج:قتلك وتي روحك اشوي وبنجيك
سندس:شنو بس انا نبيش انروح انا بايته عند هلي اليوم
سراج:لالا مافيش بيات
سندس;وشن دخلك انا ماخذيتش اذنك انا بنبات
امها كانت اتفنص فيها تبيها تسكت
سراج:كلمة وحدة ربع ساعة وجايك وسكر
سندس بعصبية:هالواطي والله ماني مروحة معاه
سعاد بعصبية:هذا شنو انتي كنك مااتحشميش علي وجك معقولة فيه وحدة محترمة تحكي مع راجلها هكي
سندس:شفتيه شن قالي مااتباتيش
سعاد:قبل مااتجي قلتيله انك بايته
سندس:لا اصلا مادخلش بيا يكفي اني قتله ان جايتكم
سعاد:كيف مادخلش بيك هذا راجلك والمفروض تاخذي اذنه في كل حاجة
سندس بعصبية:لالا انا ماانحبش حد ايتحكم فيا وهذا صامط عشان قعدت انقوله وين ماشية لقاها سمحة وقعد ايتحكم فيا
باتها كان ايصلي في العصر وجاهن
فرج:كنها دوسة معصبة
سعاد:عشان هي تبي اتبات وسراج توا رن عليها قاللها وتي روحك جايك
فرج:وهذي حاجة تستحق اتعصبي اكيدة صايرة معاه حاجة دبينكم متفقين وقالك بنجي ناخذك
سعاد:لا مش متفقة معاه قايلتله بس ماشية الهلي وتوا قررت تبي اتبات وهو رفض
فرج:معقولة هكي يادوسة مش هكي ربيناك نحن الحاجات هذينا لازم من اتفاق مع راجل مااتجيش اتحطيه في امر واقع هكي مرات هو ماايحبش مراته اتبات برا من حوشها
سندس;مادخلش هو انبات ولا لا اهم حاجة اني قتله ماشية
فرج:عيب يادوسة كيف مادخلش هذا راجلك وبعدين عادي فيه رجالة ماايحبش هلهم ايباتو برا حوشهم وانا اولهم تذكري ماعمريش خليتكن اتباتن في حوش جدك وامك عمرها ماعارضتني ولا قالت نبي انبات
سندس:بس انا مش بايته عند حد براني انا بايته عند هلي يعني ماعندش حق ايقولي لا وبذات اني من اول مااجوزت مابتش هنا بكل
فرج:عارف وهذا حوشك وحتى نحن نبوك اتباتي بس بموافقة راجلك يعني اتفقي معاه وتعالي وباتي لعند مااتملي
سندس بعصبية:لا ماايمشيش كلامه عليا انا نبيش نمشي معاه وبعدين خلاص انا بنقعد حرجانه
فرج يضحك:عليش بتحرجي ياهبلة والراجل مادارش حاجة غلط اصلا حتى لو قعدتي هنا وزعلتي ماعنديش كيف انصبي معاك انتي الغلطانة
سندس:يعني معقولة يابابا انقولك حرجانة وماتاخذليش حقي
فرج:عشان تحرجي لازم ايكون سبب مقنع يعني قوليلي غلط فيا على صوته عليا مد يده عليا هذك الساعة اتحقي شن انديرلك فيه لكن اتقوليلي مايبينيش انبات هذي ماعندكش حق فيها بكل
سعاد:الله ايربحك روحي مع راجلك بعد ايجي وبلا مشاكل
فرج:عدي روحي مع راجلك ولما بتجي اتباتي اتفقي معاه وهو مش حيتكلم وانا توا حنقوله ايجيبك بكرا اتباتي باهي هكي
سندس ماكانش عاجبها الكلام بس حست هلها مش حاسين بيها وان هي ماكانتش بتروح عشان تبيش اتشوف سراج
بعد اشوي جاها سراج وخش سلم عليهم وقاللها هي وطلعت معاه وهي قالبة وجهها وغامتلها منه
سراج:كنك قالبة وجك
سندس:شي
سراج:عشان ماخليتكش اتباتي
سندس:شن رايك
سراج:عادي راجل وماايحبش مراته اتبات برا مالحوش
سندس شافتله زين:سراج شكلك استحليت اللعبة وقعدت تستعمل في الكلمة واجد
سراج:وشن فيها كان قلتها
سندس:ياما فيها عشان زواجنا تمثيل وكذب كله
سراج:عارف بس انا ماخليتكش اتباتي مش عشان انتي مراتي ومانبيكش اتباتي برا مالحوش
سندس:امالا شنو
سراج:عشان الحوش مافيش جو بلاك
سندس سمعت الكلمة واستكت
سراج ضحك:كنك سكتي ياام السان تعودت علي طولة السانك ومناقرتك ليا هذا عليش كسدت بروحي
سندس:معش اتقول ام السان
سراج:عادي زي ماانتي اتقولي صايع ومنحرف انا انقول ام السان
سندس:هذا لقبك وماشي معاك
سراج:وانتي هذا لقبك وماشي معاك بكل
سندس:ههههه حانط
سراج:ناقصة حاجة في الحوش ناخذوها قبل ماانروحو
سندس:لالا بس انا نبي السوق ناقصاتني حاجات
سراج:قصدك تبيني انشيلك للسوق
سندس:اها عليش مستغرب
سراج:مكان عام ماايصير شيئ
سندس:عشان معجباتك
سراج:اها
سندس:بس انا ناقصاتني حاجات مهمة ونبيهن اليوم
سراج:بكرا اندزلك اي حد ايجيبهن لكي
سندس:انا انحب نشري حاجتي بروحي
سراج:وانا مش ماشي بيكي للسوق
سندس:يبقى انرن علي عمو عدنان ايشيلني
سراج:انتي عارفة الساعة كم توا واكيدة بطولي في السوق يعني مش حتروحي الا بعد المغرب
سندس:وشن فيها
سراج:تبي اتروحي في الليل مع راجل غريب واتقوليلي شن فيها
سندس:عمو عدنان مش راجل غريب
سراج:لا راجل غريب
سندس:يبقى شيلني انت
سراج:الحاجات مايرجنش البكرا يعني
سندس:لا واصلا لما جيت خذيتني من هلي كنت متفقة مع بابا بيشيلني
سراج:وبتطلعي من غير اذني
سندس:عادي ماشية مع بابا شن فيها
سراج:بس نحن شن اتفقنا
سندس:خلاص ماطلعتش وبعدين اهو توا عندك العلم شيلني انت وكان ماهذا انكلم عمو عدنان عشان الدبش اللي بناخذه مهم بكككل
سراج:عليك قصة قصة عندنا هذي باهي خلاص انشيلك لكن اول واخر مرة نمشو المكان عام
سندس:باهي اصلا عساس انا ميته عالمشية معاك
سراج:المهم قتلك
ومشى بيها الارقى وأحلى مول ونزلو وقعدو ايتمشو في المول وسراج ايتلفت ايمين وايسار خايف وحدة من معجباته اتحقه مع سندس وتعرف ان اجوز لان ناكر قصة جوازه عالناس
سندس:بنخش المحل هذا(كان محل مستلزمات ومكياج كبير بكل)وخشوله مع بعضهم
سندس سيبت جيهة المكياج وجت للمكان اللي فيه المساسيك والفيونكات وحاجات البنات السماح هذينا?
سراج;مش هنا جيهة المكياج
سندس;ومن قالك بنشري مكياج
سراج:وعليش خاشة هنا
سندس:نبي هذينا?
سراج:انا ماشي مع بنية صغيرة تشري
سندس:ومن قالك هذينا متاع بنات صغار
سراج:والله انا ديما انشوف في ريونة تلبس فيهن
سندس:من ريونة
سراج يضحك:البنوته الصغيرة اللي ضرباتك في المصيف
سندس:واللي قرصتني في الفرح
سراج يضحك:ايوا هي
سندس:شن تعرفها البنت هذي
سراج:هذي كبيدتي ماانتحمل فيها شي هذي ريان اخت فيصل
سندس:مغير انحقها الفرخة هذي توا انوريك شن اندير فيها
سراج:اقربيها وشوفي شن ايصيرلك
سندس بهزوة:وشن بديرلي
سراج قرب منها وحط يده ورا خصرها وقربها منه زين
سراج:انوريك شن نقدر اندير
سندس:سراج نحن في محل شوف الناس كيف اتشوفلنا
سراج بعد منها:انقضك مني ان في محل بس وكان ماهذا وريتك شن انديرلك
سندس:خلاص هيا نطلعو الناس اتشوفلنا
سراج:باهي هيا
خذا سراج من يدها الحاجات اللي تبيهن ودفع حقهن وطلعو وعند الباب تلاقو مع مع وحدة طرف(لابسة جينز ازرق ضااااابط وعليه كت وجاكة ولابسة كعب عالي ومكياج وااضح وقاصة شعرها قصة قصيرة بس اتهبل ولون شعرها بلاتيني اسمها لولي)
لولي:وااو سيجو شن اخبارك وسلمت عليه بالخد
سراج:تمام شن اخبارك انتي لولي
لولي:تمام التمام معقولة هكي لا اترن ولا تسأل
سراج:والله ماعندي علم انك في ليبيا بكل
لولي:وانا في فرنسا ليش ماكلمتني ولا انسيتني ياشرير
سراج:معقولة ننساك بس اخر مرة حكينا كنتي مسافرة وقلتيلي انرد انكلمك ومعش رنيتي
لولي:وعاد انت كبريائك معش يسمحلك اتعاود تتصل مرة اخرى
سراج:اكيدة بس قوليلي شن جابك الليبيا زيارة ولا اقامة
لولي:لا هدي ولا هذي جاية شغل بنفتح مركز تجميل هنا
سراج:سراج ماسدكش اللي في فرنسا
لولي:حابة انوسع مشروعي
سراج:حلو التوسيع
لولي:لازم ماانتلاقو اتوحشت سهراتك
سراج شاف السندس:اكيدة حنتلاقو
لولي فطنت السندس:معليش توا غير شفتها من هذي عرفني عليها ومدت يدها السندس
سراج:هذي هذي
سندس مدتلها يدها وابتسمت:أنا زوجته
سراج فنص عيونه في سندس زيين
لولي بصدمة:معقولة سيجو اجوز امتى وكيف بجد انا زاعلة منك هكي انا اخر من يعلم
سراج:جت بسرعة مافيش واجد عالمين
لولي:بس كيف جت منك انت ياسيجو اللي مدوخ بنات المانيا كلهن تجوز مستحيييل
سراج يضحك:اهو تورطنا وصارت
لولي:بس بنعرف شن حاق فيها بزيادة عالبنات اللي عرفتهن لين خلاتك تجوزها
سندس غمتلها مالكلمة:اكيدة الاحترام والادب ومشت وسيبتها
سراج:معليش يالولي ماتاخذيش علي كلامها اصلا السانها طويل اشوي
لولي:لا عادي مافيش مشكلة المهم لازم انتلاقو قبل ماانسافر
سراج:اكيدة وسلام توا ومشى في جرت سندس
سراج:سندس سندس وقفي اشوية
سندس:ها كنك
سراج:شنو اللي قلتيله للبنت توا
سندس:قلت الصدق انت ماحقيتش منظرها
سراج:مادخلكش بمنظرها وبعدين انتي من سمحلك اتقولي زوجتي
سندس:بالك قلت حاجة كذبة وانا ماعنديش العلم مش بحكم الشرع والقانون متجوزين
سراج:بس بينا نحن مش متجوزين ومالاول كان الاتفاق لا تدخلي فيا ولا ندخل فيك
سندس:وانا ماادخلتش فيك
سراج:واللي درتيه توا شن اسمه بعد اتقولي البنت نعرفها ان متجوزين وانا ناكر الموضوع هذا عاللي نعرفهم كلهم
سندس:وانا شن عرفني انك ناكره انا قلتها هكي وخلاص
سراج:سندس انتي درتي هكي عشان غرتي عليا
سندس ضحكت:ههه انا انغار عليك انت ومن من من هذي شكلك طرشقت
سراج;وكنها هذي تي طرف اطلع طول ماشفتيش شكلها ولا جسمها ناعلي وخلاص
سندس:مش حلوة جسمها كله نفخ ووجهها كله مكياج
سراج:يعني انتي مااتحطيش في مكياج
سندس:لا انا جمالي طبيعي صقع عليها
سراج:مااتحطيش في مكياج بكل حتى بعد تمشي للجامعة
سندس:ابدا عمري مادرته في الجامعة اندير في مرطب للوجه عشان الشمس ومرطب للشفايف
سراج قرب وقعد ايشوف الشفايفها وايعض علي شفايفه
سراج ايعظ علي شفايفه:حرام عليك الشفايف اللي زي الفراولة هذينا يبن مرطب
سندس انحرجت ومشت وسيباته وسراج لحقها
سراج يضحك:كنك اتقول عمرك ماسمعتي كلام هكي
سندس بعصبية:ماعمريش تعرفت علي واحد صايع زيك عشان نسمع هكي
سراج:تي انتي امك داعيتلك عشان حصلتيه الصايع هذا
سندس:قصدك داعية عليا
سراج:المهم كان كملتي خلينا انروحو
سندس:لالا بنتعشو في مطعم قبل
سراج:شنوووووو
سندس:زي ماسمعت
سراج;وانا قتلك مكان عام مع بعضنا لا ساد اللي صار توا
سندس:خلاص براحتك انت روح وانا بنتعشى في مطعم وبعدها انروح
سراج:كيف كيف ومن بيروح بيك ان شاءلله عمو عندنا
سندس:اها
سراج:في عينك وفي عينه اتروحي معاه في الليل
سندس:خلاص خليك في السيارة انا ننزل للمطعم انتعشى وبعدها نطلعلك
سراج:باهي شن رايك ناخذو عشاء مالمطعم وانتعشو في الحوش
سندس:لالا بنعشى في المطعم
سراج:خلاص زي ماقلتي مش حننزل معاك وحنرجاك برا سندس:براحتك
وطلعو مالمول ومشو للمطعم وسندس نزلت وزي ماقالت بتعشى في المطعم وهو يرجاها برا
نزلت سندس مالسيارة وكان فيه شباب قدام المطعم ولما شافو سندس من بعيد قعدو ايبحتو فيها سراج ماتحملش اللقطة ونزل وراها
سراج:وقفي اشوية
سندس:كيف صار عليش نزلت
سراج:القيت روحي جيعان انتعشو مع بعضنا ونطلعو
سندس:ومعجباتك
سراج:توا نصرف غير انتي كان القيتي وحدة تعرفني مااتقوليش انك مراتي
سندس:باهي وخشت وهي مبتسمة حست انها انتصرت علي سراج ودارت اللي في راسها
خشو للمطعم وطلبو العشاء
“”
طبعا عند رويدة جو هل معاذ وحددو موعد الفرح وهلها وافقو
اما عصام وباته مشو الهل بسمة واتفقو معاهم ان بكرا ايتم الطلاق
“””
#في_المطعم
سراج وسندس يرجو في العشاء وقاعدين ايتناقرو مع بعضهم مع تخطيمة راجل عمر في 45سنة دكتور في الجامعة كان ايقري علي سندس
دكتور زياد;اهلين بسندس شن اخبارك
سندس صبت ومدت يدها وسلمت عالدكتور
سندس:بخير الحمدلله شن اخبارك انت دكتور زياذ
دكتور زياد:كويس نورتينا في المطعم
سندس;تسلم هو المطعم لكي دكتور
دكتور زياد:اها ماليش واجد فاتحة بس قوليلي وينك ووين وصلتي في القراية
سندس:خلاص السنة سنة التخرج
دكتور زياد:مشاءلله انا عطيتك في اول سنة سبحان الله السنين كيف يجرن كنتي افضل طالبة عندي
سندس:والله وانت لعند توا احسن دكتور مر عليا
دكتور زياد:شن اخبار باتك شن داير
سندس:كويس الحمدلله
دكتور زياد فطن السراج;ماعرفتينش ياسندس بالشاب
سندس بتحكي قاطعها سراج
سراج ابتسم:المدام
دكتور زياد:نعم
سندس انحرجت:هذا زوجي بس ايحب البصارة واجد
الدكتور زياد مد يده السراج:تشرفت بمعرفتك
سراج شافله زين ومابش ايمد يده
سندس غمتلها من سراج:معليش دكتور انا اسفة بس الاخ قليل ذوق
الدكتور زياد:حصل خير وسلميلي علي باتك واجد وعدى
سندس بعصبية:انت شنو اللي درته هذا
سراج بعصبية;وانتي كيف اتهدرزي وجوك سمح ومش معبرة ان معاك راجل
سندس:وشن اتحق فيا هدرزت هذا دكتور وكان يعطي عليا في سنة اولى وسلم عليا ماانسلمش عليه يعني
سراج:مشاءلله من سنة اولى ومازال متذكرك شكله ايعزك واااجد
سندس:سمعته بروحك عشان كنت شاطرة عنده
سراج:عشان شاطرة ولا فيه حاجة اخرى بينكم
سندس:شن تقصد
سراج:يعني بينكم علاقة حب او حاجة هكي
سندس بعصبية:انت شن اتقول شكلك طرشقت عشان تحكي عليا انا هكي
سراج:اصلا بالعقل فيه استاذ له 4اسنين مقري علي طالبة وكل سنة ما4 هذينا مارين عليه مئات الطلبة ومازال متذكرها الا اتكون بينهم حاجة
سندس: انت ماعندكش تفكير الا في الحاجة هذي معقولة يعني مافيش حاجة اسمها استاذ وايعز طالبة بكل
سراج:لا مافيش واحد يذكر وحدة الا وبينهم حاجة
سندس:وااااو عليك عقل عندك اخسارة ماكنت عايش برا
سراج:عايش برا ومتخلف ومرة اخرى معش اتسلمي علي حد وانا معاك
سندس:وعليش ان شاءلله
سراج:هكي فوق جو
سندس:وماانت اتسلم عادي ولا حلال عليك وحرام عليا
سراج بعصبية:انقولك حاجة ومالاخر اماكن عامة معش بنطلعولهن مع بعصنا مرة اخرى
سندس:أحسن وهي صبي بنروح
سراج:اصبري انتعشو
سندس صبت:معش بنتعشى بنروح ناعسة
سراج صبى:براحتك وطلعو ومشو للحوش وماحد يحكي مع حد وكل واحد كاين معصب مالاخر واول ماروحو كل واحد خش الداره دوش وغير دبشه ورقد في سريره وهو ايفكر في اللي صار ومش عارف ليش دار هكي
“”
صباح ثاني يوم وطبعا كالعادة ناضت سندس صلت ووتت الفطور ووعت سراج وبعدها خشت تلبس وفطرو مع بعضهم وسندس مشت الجامعتها وسراج مشى الشغله
“””
عند عصام مشى هو وباته وعمه للمحكمة وطلق بسمة وروح
“”
عالساعة 10 سراج في مكتبه خش عليه فيصل
فيصل:معقولة يانصي اتجي للشركة ومااتخطم عليا ولا عقلك معش معانا ومع ناس اخرى
سراج:ترا خليني في حالي مش رايقلك راه
فيصل:خير يانصي كنك كيف اللي شايل هم الدنيا علي راسك
سراج:والله حاير ومعش فهمت روحي شن نبي
فيصل:اتحبها
سراج:كيف
فيصل:واضحة يانصي تصرفاتك كلهن ايقولن انك اتحبها
سراج:انا وهي مش زي بعصنا بكل قولي بس كيف بنحبها
فيصل:الاختلاف هذا هو اللي خلاك اتحبها
سراج:بس البنت هدي بذات ماينفعش انحبها
فيصل:وعليش ماينفعش اتحبها
سراج:عشان تختلف علي كل بنت عرفتها ولو حبيتها اول حاجة حتقولي سيب السهور والبنات وانا الحاجة هذي بذات مانقدرش انديرها
سراج:وليش ماتقدرش اديرها شن فيها خلاص انت حبيت والمفروض تقعدلها بروحها
سراج:انت عارف كويس ماانحبش فكرة نقعد مع نفس البنت
فيصل:بس هذي مش اي بنت هذي انت حبيتها
سراج:انا متاكد ان مش حب ممكن ايكون اعجاب بس حب لا عشان انا عمري مااقتنعت بالحب
فيصل:بس الاعجاب بداية حب ولازم تعترف انك بديت اتحبها عشان اتعيش حياتك طبيعي
سراج:بس مانقدرش انقول ان حب لين نعرف هي شن حاسة تجاهي
فيصل;وانت اتقول هي شن حاسة تجاهك
سراج:مش عارف مرة تصرف تصرفات انها كارهتني ومرة انحس اني عاجبها ومرة انحس انها مش رافضة قربي ومرة مش طايقة تسمع حتى صوتي ومرة نلقاها ادير في حركات مالهنش تفسير الا انها اتغار عليا
فيصل:والغيرة دليل عالحب
سراج:معقولة اتكون اتحبني
فيصل:وليش لا حتي هي اكيد حبت الاختلاف اللي بينكم
سراج:انا لازم نعرف شن احساسها تجاهي
فيصل:وكيف بتعرف
سراج:مانقدرش نعرف الا من حد قريب منها وتحكيله في كل حاجة زي صحباتها هكي هي اتحبهن واكيد تحكيلهن في كل حاجة
فيصل:وكيف بتعرف منهن اكيدة مش حيحكلك
سراج:لازم ايكون عندي اتصال بوحدة منهن
فيصل بصدمة:من جدك بدير علاقة مع صحبتها
سراج:تي اي علاقة انا قصدي لازم ايكون عندي وسيط بيني وبين وحدة من صحباتها
فيصل:كيف وسيط مازال مافهمتك
سراج:يعني لازم حد نعرفه كويس ايتعرف علي صحبتها وايدير معاها علاقة عساس حب وهكي ويقعد يسحب منها في الكلام وايقوله ليا
فيصل:ووين بنلقوه الشخص اللي هكي
سراج;مش حندوروه عشان قاعد قدامي
فيصل:قصدك انا
سراج:اها
فيصل:لالا انا طلعني مالموضوع هذا
سراج:معقولة يانصي انت عمرك ماتخليت عليا في موقف جاي توا وتحكيلي هكي وبتخلي علي في اكثر وقت محتاجلك فيه
فيصل:بس انت عارف عمري مامثلت دور حب علي وحدة مانقدرش ياراجل
سراج:بس عشان صاحبك هالمرة اديرها
فيصل:لنقني مانقدر
سراج:منور يانصي هذا كلامك ليا ديما ومعاك عالموت طلع كله كلام
فيصل:بالجو ماتزعلش طلبك واعر
سراج:مافيش وعاره هنا كم يوم وبعدها خلاص مافيش بنت اتعلق في واحد كم يوم لكن براحتك ماانزرش عليك فيصل:يعني بتزعل توا
سراج:لا مش زاعل كل واحد وحر في اللي بيديره لكن مرة اخري لاعاد اتقولي نصي ولا معاك عالموت
فيصل:ماتزعلش يانصي انا ديما انقولك معاك عالموت وماانردش في كلمتي واللي تبيها انديرها
سراج بفرحة:تحكي جد
فيصل:جد الجد بس من صاحبتها ووين بنتعرف عليها
سراج:رانيا صحبتها ماالهش شيئ مسيبه حبيبها يعني جاهزة انها اتخشش اي حد في حياتها عشان تنسي اللي فات
فيصل بعد قاله رانيا انصدم بس سكت وماحبش ايبين
سراج:اما وين اتعرف عليها هذي خليها شوري البنات عندهن مشروع تخرج وبيديرنه مع بعضهن ويبن ارض عشان ايشوفنها عملي ويسهل عليهن المشروع انا بنحكي مع باتي وبناخذهن عالمزرعة هنا وهلهن وهلي تغيرة جو يومين وهنا يشتغلن براحتهن
فيصل:وانا شن دخلني في الوضع العائلي هذا
سراج:كيف يانصي انت مالعيلة وانا غادي حنرن عليك انقولك تعال ولما اتجي انت وشطارتك وكيف اتخليها اتوافق عليك
فيصل سكت
سراج:ها شن قلت بنمشي توا نحكي الباتي
فيصل:والله شنو انقولك اللي اتشوفه انا معاك فيه
سراج صبى:خلاص نمشي نحكي الباتي توا وكان قال باهي بكرا نمشو
فيصل: تمام وصبى وطلع
وسراج طلع الباته وحكاله الموضوع وباته وااافق
#يتبع
قولكن سندس حتوافق وهل رانيا حيوافقو وكان صار مالمشية شن حيصير من تطورات بين سندس وسراج فيها وهل حنعرفو فيها صلة المعرفة اللي بين رانيا وفيصل ولا لا ?
وهل فيصل حيقنع رانيا بالعلاقة او المعرفة اللي بينهم ماتسمحش اتكون بينهم علاقة ?
وباهي قولكن سراج كيف بيعرف اذا سندس معجبة بيه او لا ?
كله حنعرفوه في حلقة بكرا لان باذن الله انحاول انزل حلقة بكرا حتى لو قصيرة كترضية لكن عالتاخير?
واهو اليوم عوضتكن بحلقة طويلة وان شاءلله اتنال اعجابكن ?
أسفة لو فيه لخبطة في الأسماء وأكيد رأيكم ايهمني ?
گـتـابـتـي Koka Saleh