منحرف وأحببته

#مـنـحـرف_وأحـبـبـتـه
الـحـلـقـة (19)
گـتـابـتـي #Koka_Saleh
“”””””””””””””””””””””””””“”””””””
رانيا في دارها وقلبها نار علي رؤوف وخايفة ايكون صايرله حاجة مع رنت فون رانيا وكان رقم ردت رانيا علي أمل ايكون رؤوف ران من رقم اخرى
رانيا:الو
حنين:خيرات رانيا شن اخبارك
رانيا:الحمدلله بس من معاي
حنين:أنا حنين بنت خالة رويدة
رانيا:أها أهلا بيك بس تعرفي رنيتي في وقتك من أمس فون رؤوف مقفل ودودي مالصبح انرن عليها مااتردش طمنيني ان شاءلله مافيش حاجة صايرة عندهم
حنين:لا مافيش حاجة صايرة بس
رانيا بخوف:بس شنو احكي خوفتيني
حنين تبكي:حنحكي لكن نبيك تعرفي إن والله اللي صار غصبن عني وماعنديش اي ذنب فيه والله هو خذاني للذار غصبن عني
رانيا:شنو اللي صاير ومن خذاك غصبن عنك فهميني
حنين:أمس في الليل رؤوف حكى مع هله علي خطبتكم وكلهم فرحو وكانو اليوم بيجو يخطبوك وقعدو يحكو علي تفاصيل خطبتكم وفرحكم وبعدها كملنا الشوايات وانا ورويدة قعدنا انلمو في الحوسة والباقي كل واحد قعد ايدير في حاجة ورؤوف جا بيخش الداره وانا كنت بنخش للمطبخ مسكني من يدي وخششني بالقوة خفت انعيط يفهمو غلط قعدت انقوله شن تبي قعد ايقولي انحبك ونبيك وكلام هكي قعدت انقوله انت خاطب وبتجوز قريب خلاص انساني قالي مش ناسيك وحكيت عالخطبة بنقهرك بس انتي ماعدلتيش عليا وقعد ايقولي بناخذك عليها وقعد ايقرب مني بعد حاولت انبعده باسني مع خشت باته وهله علينا وصارت قصة كبيرة وقعدت تبكي
رانيا مصدومة مالكلام وقلبها ايدق بسرعة
رانيا ودموعها ينزلو:ورؤوف ليش دار هكي انتو بينكم حاجة
حنين تبكي:اها انا ورؤوف كانت بينا علاقة وكنا انحبو بعضنا بعدها في فترة تعاركنا وسيبنا بعضنا سمعت بعدها ان مقرر يجوزك وبعد قعد ايرن عليا معش رديت عليه بكل ولما جيت الحوشهم نحسابه قعد ايحبك ونسى الموضوع لكن طلع مش ناسيه وقعد ايضايق فيا بكلامه وحركاته لعند لما صار اللي صار واليوم وهله يحسابو بينا حاجة اكبر اليوم جو بيخطبوني بس انا نبيك تعرفي حاجة وحدة والله انا ماخنتك والله انا ضحية زيي زيك ساد سمعتي اللي شوها قدام عمتي وراجلها وعيالها وقعدت تبكي
رانيا كرعيها معش شالوها وقمعزت عالسرير ودموعها ينزلو ومصدومة
حنين:الو رانيا وين رحتي تسمعي فيا
رانيا سكرت الخط وعزقت الفون وقعدت تبكي ومازال مش مستوعبة الموضوع مع فتحت باب دارها وخشت رويدة وشافت حالتها وفهمت ان شكلها عرفت وتحساب رؤوف حكالها
رويدة تبكي:أسفة أسفة ياقلبي والله ماكنت نعرف اللي بينهم انا بروحي انصدمت
رانيا تبكي وبعصبية:يومتها نسأل فيك تحلفيلي ان مافيه بينهم حاجة وهما طلعو ايحبو بعضهم بس انتي شن هامك في رانيا ان شاءلله تنحرق أهم شي خوك يقعد متريح وبعدين هذي بنت خالك أكيدة احسنلك مني
رويدة تبكي:مستحيل اتكون احسن منك انتي اختي مش بس صاحبتي اول ماصارت القصة أول وحدة فكرت فيها انتي معش عرفت شن انقولك ومعش قدرت انرد عليك عشان مش عارفة شن نحكي قلت لازم انجيك للحوش عشان نحكيلك وتفهميني اما رؤوف ورانيا هذوما أخر همي انتي اهم من كل واحد
رانيا تبكي وبعصبية:خوك التافه الحقير الواطي ليش دار فيا هكي شن درتله غير اني عطيته قلبي ووثقت فيه كل حاجة انقوله عليها حاظر ونعم ليش يلعب بيا وايسيبني ويمشي يخطب وحدة اخرى
رويدة تبكي:معاك حق في كل كلمة قلتيها عليه رؤوف طلع مش راجل ومايستاهلش كل حاجة درتيها عشانه مايستاهلش حتى انك تبكي عليه
رانييا تبكي:نار في قلبي نار
رويدة تبكي:والله عارفه وحاسة بيك وبشعورك توا
رانيا بعصبية:بطلي كذب مافيش حد عارف شعوري توا مش انتي اللي حبيبك خانك مش انتي اللي حبييك مشى خطب غيرك بعد كل الأحلام اللي حلمتيهن معاه انني في الأخير خوكي وايهمك بس مصلحته وان ايكون متريح أما أنا وشن بيصير فيا هذا مش هامك ولا حتحسي بيا
رويدة:مااتقوليش هكي نحن طول عمرنا خوات واللي اتزعلك اتزعلني واللي اتبكيك اتبكيني واللي ايضرك ضرني رؤوف هذا اخر هكي وحامقة منه زي ماانتي حامقة منه توا بزبط
رانيا بعصبية وصوت عالي:خلااااص بطلي كذب وأطلعي من قدامي معش بنشوفك اطلعي
رويدة:مش طالعة مستحيل انخليك بروحك وانتي هكي انتي صاحبتي واختي
رانيا تبكي وبصوت عالي:قتلك اطلعي واعتبري ماليوم هذا مافيش صحبة بينا
رويدة تبكي:مش انتي اللي تنهي صحبتنا انتي غصبن عنك صاحبتي واختي عمرنا ماتعودنا انتعاركو ولا انقولو كلام زي هذا البعضنا
رانيا بعصبية:لو عندك كرامة اطلعي من حوشنا
رويدة بعصببة:ماعنديش كرامة ومش طالعة من هنا وبروحك مش حنخليك
رانيا تبكي وبصوت عالي:أطلعي معش بنشوفك لا انتي ولا خوك ولا هلك كلهم اطلعو من حياتب خلاااص
أم رانيا ورنا اختها سمعن الهرجة والصوت العالي وخشن يجرن وشافن حالة رويدة ورانيا وقعدن ايهدن فيهن بس رانيا كانت منهارة واتعيط وكل مااتحاول رويدة تحكيلها اتزيد اتعيط اخرى وماتبيش تسمعها أم رانيا خذت رويدة برا وقعدت اتهدي فيها وسيبن رنا مع رانيا عشان اتهديها
رويدة قعدت تحكي في اللي صار واللي داره رؤوف الرانيا وهي تبكي وتحكيلها في كلام رانيا اللي قالاته الها ومقهورة علي صاحبتها واجد أم رانيا قعدت اتهدي فيها واتقوللها ان رؤوف غلط بس انتي وهلك ماعندكمش ذنب وان في الاخير كل شيئ نصيب وقعدت حاظنتها واتقوللها ان بعد اشوي تهدى رانيا واتخششها عليها واتصالحهن علي بعضهن
“”
عند حنين خطبوها هل رؤوف وباتها وافق وخذو شروطهم واتفقو ان الفرح ايكون في أقرب وقت وبعدها هل رؤوف روحو وهي خشت الدارها وهي طايرة مالفرحة ومش مصدقة ان وأخيرا رؤوف قعد الها وقعدت اتفكر ان حتى لو ماايحبهش توا بس بعد الجواز حتقدر اتخليه ايحبها قاطع تفكيرها صوت فونها ايرن ولما شفاته لقاته عصام ردت
حنين:خيرات عصومي
عصام:دبينك قلتي عصومي معناها زاهيتلك وجوك تمام
حنين:وكنها ماتزهالي ورؤوف قعد ليا واخيرا حققت حلمي اللي طول عمري انحس فيه مستحيل
عصام:اسمعي دبينه في ارادة وتصميم وعدم استسلام مافيش حاجة اسمها مستحيل وانتي ربي ردلك حقك اللي قبل خذاته وحدة مش الها
حنين:صدقت والله انا حبيته قبلها وهي جت خذاته عالواتي بس خلاص كل هالكلام فات ورؤوف توا ليا
عصام:باهي ياستي الف مبروك بس توا المهم درتي زي ماقتلك
حنين:اها كلمتها وحكيتلها الكلام اللي قلته ليا كله بس انا مازال مافهمت ليش انت قتلي انا لازم انكلمها مع انها كانت اكيدة حتعرف من رويدة
عصام:مانبيهش تعرف من رويدة دغري نبي حد قبل رويدة يحكيلها عشان تخرب صحبتها برويدة ونفتكو منها بكل ومعش اتجينا مرة اخرى عشان رؤوف ماايشوفها وايحنلها بعد تجوزو
حنين;والله فكرة هذي انا مافكرتش فيها صح هكي نفتكو منها بكل وانحطو روسنا بس توا قولي شن دار رؤوف بعد هلك طلعو بيجو هنا ويخطبوني
عصام:رؤوف مش قاعد بكل من امس طلع وماحد يندري عليه وين
حنين بخوف:كيف ماحد يندري عليه تخيل ايكون صايرله شي
عصام:خايفة عليه لا ياحنة اطمني مافيه شي غير ايدير في طروح عشان باتي ايرد في كلامه بس لكن يحلم باتي عمره مارد في كلمه قالها
حنين:باهي طمنتني اهم شيئ اول ماايروح اتقولي راه حنقعد مشغولة عليه لين ايروح
عصام:مااتفكريش مصيره مروح وين بيهرب وحاظر اول ماايروح انقولك دغري وتوا انا بنسكر عندي شغل
حنين:تمام سلام توا وسكرت
“”
عند رويدة بعد هدت اشوية خذتها سمية ام رانيا وخششتها علي رانيا عساس بتصالحهن علي بعضهن بس رانيا أول ماشافت رويدة ناضت تبكي واتعيط اخرى اتقول حاقة جن قدامها ورويدة تبكي من تصرف صاحبتها ومعش قعد حل قدامها الا انها اتروح خوف علي رانيا ان مرات ايصيرلها حاجة طلعت مالدار ورنت علي عصام عشان ايروح بيها واول ماروحت للحوش وهي تبكي واتهزب ان خصرت صاحبتها بسببهم كانت منهارة باتها وجعاته حالة بنته بس مافيش في يده حل هو محطوط في امر واقع وماقدرش ايدير شيئ الا انا يطلع مالحوش عشان مايبيش ايحق بنته في الحالة هذي اما امها قعدت حاظنتها واتحاول اتهديها بس الوحيد اللي كان عاجبة اللي صاير هو عصام لان واخيرا وصل للي يبيه وحيفتك من رانيا ومعش ايشوفها بكل لان مفكر ان بالطريقة هذي معش ايفكر فيها
“‘
عند أبطالنا سندس طولت في الحمام بعد رعشتها من سراج وبعدها استجمعت قوتها وقررت تطلع وكأنه ماصار شيئ وطلعت ومابتش اتشوفله بكل وجت وقمعزت عالكنبة ومسكت الريموت ودارت روحها ادور في قناه بتفرج سراج كان ماسك فونه وفاتح اليوتيوب ومن اول ماطلعت وهو ايشوفلها من تحت التحت وبعدها ولع اغنية وقعد ايغني (عايزاه قلبي حتتعبي فيه أنا حد مايتحبش بعديه حطي فبالك وبقولهالك اللي في بالك انسيه)(الاغنية توا انديرلها مشاركة بعدين عشان تسمعنها)قعد ايغني مع الاغنية وايعلي في صوته سندس عرفاته اينابش ويقصد فيها بالاغنية
سندس شافتله بنظرة عالجنب:فيه اختراع اسمه سماعات حطهن واسمع بيهن
سراج دار روحه مصدوم:جديات فيه اختراع هكي ماكنش عندي علم بيه ترا قوليلي شن شكلهن
سندس لوت وجها ومعش ردت عليه سراج صبى مالسرير وجا جيهتها وسندس خافت منه لانه كل مرة ايدير حركة ايرعشها بيها سراج جا وقمعز عالطاولة اللي قدام الكنبة
سراج:وين تبي نطلعو اليوم
سندس بهزوة;نطلعو?انا نطلع معاك انت
سراج بغرور;الحاجة هذي اتزيدك شرف?
سندس:هه مغرور?
سراج:عارف روحي المهم بلا جلاطة وخلينا في الجد
سندس:وانت تعرف الجد
سراج:اها نعرفه وتوا قولي وين تبي تطلعي
سندس:مانبيش نطلع
سراج:بالجو مليت مالدار وأصلا نحن جايين ندهورو وبعدين مش يومتها قلتي ناقصاتك حاجات وتبي مول حنمشو مولات اسطنبول كلهن ندهورو فيهن وانهيجو شن رايك
سندس كانت عارفة ان قعدتها في تركيا مازالت مطولة وتبي حاجات طوال عشان الدبش اللي معاها ما تقدرش تلبسه وهما في دار وحدة
سندس:باهي تمام
سراج:خلاص البسي وجهزي روحك وحتى انا بنصبي انوتي روحي
سراج صبى شور الدولاب وقعد ايطلع في دبشه سندس ترجى فيه ايخش للحمام عشان اطلع دبشها وتلبس سراج خذا ادبشه وماشي شور الحمام مع رنت فون سندس صبى في مكانه
سندس:ايوا دودي شن صار معاكم
رويدة تبكي وبالعبرة لين كلامها مش مفهوم
سندس بخوف:رويدة بطلي بكى وفهميني بشويش شن صار
رويدة:تبكي:وقعدت تحكيلها في كلام رانيا وانها زاعلة منها وبتنهي صحبتهن
سندس:بشوية مش حيصير هكي بكل رنوشة زاعلة بس بعد تهدى حتقعد كويسة
رويدة تبكي:سندس نحن محتاجيلك توا انا ورانيا حالتنا صعبة انتي ماشفتيش حالتها خايفة ايصيرلها شي ولا ادير في روحها حاجة رنوشة منهارة بكل
سندس بخوف:لالا ان شاءلله لا قولي خير انتي
رويدة تبكي:انا مانبيش نخسر رنيا مانبيش صحبتنا اتاثر باللي صار انتي عارفة كويس انتي ورانيا شنو بالنسبة ليا انا ماعنديش خوات بس عمري ماحسيت بيها لان انتن خواتي تعرفي كرهت رؤوف وهلي هما السبب في اللي صاير الرانيا توا وقعدت تبكي
سندس:اس وبطلي بكى وانا حنروح في اقرب رحلة وحنحل القصة مستحيل نخسرو بعضنا نحن خوات مش بالساهل تنتهى صحبتنا الاي سبب
رويدة:ياريت اتجي يادوسة محتاجتلك بكل ورنوشة محتاجتلك توا اكثر مني
سندس:مااتفكريش بكل أول رحلة الليبيا حنروح فيها وانجيكن انتي بس توا اهدي وعدي توضي وصلي وادعي الرنوشة ربي ايريح قلبها وتقعد اكويسة عشان هذي اللي في يدك توا عشان اتساعديها
رويدة تبكي:حاظر توا حنمشي انصلي وندعيلها
سندس:وانا النت عندي مفتوح في اي وقت حسيتي روحك متضايقة كلميني تمام
رويدة:تمام وسكرت وعدت بدير زي ماقالتلها سندس
سراج مازال مصبي في مكانه وجا بيخش للحمام
سندس:شوف اول رحلة الليبيا امتى
سراج لف وشاف سندس وكيف باين انها زاعلة
سراج:ليش شن صار
سندس:خلاص لازم انروحو صحباتي في حاجتي توا ولازم انكون جنبهم
سراج:بس نحن جايين عساس اسبوعين وتوا حتى الاسبوع مازال ماكملناه كيف بنروحو شن بنقولولهم
سندس بعصبية:انا مادخلنيش انا بنروح مانقدرش نقعد هنا وصحباتي غادي وكل وحدة صايرة معاها حاجة
سراج:ماايصيرش منها توا اقل شي انكملو اسبوع لو انروحو توا حيحسو ان فيه حاجة مش تمام
سندس:عادي حنقولولهم روحنا عشان قرايتي بس اهم شيئ هنا معش نقدر نقعد مش حنتريح بكل
سراج بهزوة:ياساتر هذا كله علي صحباتك امالا كان خواتك شن درتي
سندس:انت مش عارف هذينا شنو بالنسبة ليا لو عندي خوات مستحيل انحبهن زي ماانحب رويدة ورانيا هذينا اكثر من خواتي واللي اتزعلهن اتزعلني
سراج كان ايشوفلها ومش مقتنع بكلامها
سندس:معليش بنسالك تخيل لو عندك صاحب مقرب وتعتبر فيه زي خوك وصارلتله حاجة وانت مسافر اتخليه بروحه ولا تاخذ اول طيارة وتمشيله
سراج قعد ايفكر لو فيصل صايرتله حاجة وكلمه وقاله روح نبيك اكيدة كان روح دغري واذكر ان من قبل دايرها لما عرف ان فيصل داير حادث وهو في المانيا روح دغري
سراج:خلاص حنطلع توا انشوف اول رحلة امتى
سندس:حاول تقعد قريبة
سراج:انا مش الطيار علي حسب الرحلة اللي طالعة وحنجز في اول رحلة تمام
سندس:تمام
طلع سراج ونزل لوطه للفندق وسأل علي أول رحلة وحجز فيها وجا السندس في الدار
سراج خش مالباب وسندس جاته تجري
سندس:ها طمني امتى أول رحلة
سراج:والله اول رحلة طالعة الليبيا بكرا في الليل
سندس:مافيش وقت اقرب من هذا
سراج:هذي أقرب رحلة
سندس:اوووف كيف بيمشي اليوم وبكرا بس
سراج:خش وقمعز عالكنبة وسندس قمعزت عالسرير وهي زاعلة ومتضايقة
سراج:شن رايك نطلعو زي مااتفقنا واتغيري جو اشوي
سندس:ماعنديش جو بكل اطلع انت وغير جوك
سراج:لا حتى انا مش طالع ومسك الريموت وقعد ايقلب في القنوات وسندس عالسرير سمعت صوت العشاء ايأذن صبت وتوضت وجت لبست ملاية الصلاة وقعدت اتصلي سراج كان ايشوفلها من تحت وهي اتصلي كان فيه حاجة تجذب فيه بعد ايشوفها اتصلي ويلقى روحه تلقائي ايبحت فيها كملت سندس صلاتها وقعدت رافعه ايديها وتدعي وسراج ايشوفلها مايسمعش في دعاها شنو بس باين من شكلها انها تدعي من كل قلبها سندس كانت تدعي ان ربي ايريح صحباتها وايهون عليهن اللي صاير وان ربي ماايفرقهن من بعضهن بكل
“”
عند رانيا كملت الوقت في دارها وهي تبكي ورنا اختها جنبها كانت تحكي الرنا في احلى مواقف مع رؤوف وانها كيف بتنساهن كانت تحكي وتبكي بكت بكت لين داخت ورقدت ورنا قعدت جنبها ماسيبتهش خايفة من اختها ادير في روحها حاجة
“”
أما في حوش هل رويدة كل واحد ساكت وماحد يحكي مع حد كلهم واجعهم اللي صار عشان كلهم ايحبو رانيا وكانو العيلة كلها متفقة عليها انها اتكون كنتهم بس اللي صار اكبر منهم كلهم بس أكثر شي واجع بات رويدة وامها هي ان رويدة خسرت صداقتها مع رانيا رويدة طبعا من خشتها الدارها معش طلعت منها بكل كملت وقتها اتصلي وتدعي الرانيا وتبكي وخايفة اتكون خسرتها جد اما رؤوف ماروحش ولا اتصل بحد وماحد عارف عليه شيئ
“”
كملت سندس صلاتها حولت الملاية ولمت الصلاية وقمعزت عالسرير وهي متضايقة سراج كان داير روحه ايتفرج عالتلفزيون بس عيونه كانن علي سندس حسها فعلا متضايقة ووجعاته لأول مرة صبى وجا قمعز جنبها عالسرير
سراج:هي ننزلو انتعشو لوطة وبدون كلمة لا انا جيعان بكل
سندس:انا ماعنديش نية انزل تعشى انت
سراج:قتلك مافيش كلمة لا بتنزلي غصبن عنك
سندس بحتت فيه:انا ماعمريش درت حاجة غصبن عني
سراج:بس انا نقدر انخليك اديري حاجة غصبن عنك
سندس شافتله وقلبت وجها
سراج قرب منها:تنزلي انتعشو ولا وبحت فيها بنظرة خبث
سندس بخوف:ولا شنو
سراج:ولا اندير حاجة ماتعجبكش ونخلف الاتفاق اللي بينا
سندس بعدت منه:بس هذا اتفاق ماتقدرش تخلفه وبعدها حتى انا نخلف اتفاقي
سراج قرب بزيادة منها:عادي اخلفيه مش مهم وبعدين انتي لو ماتبينش نخلف الاتفاق خلينا ننزلو انتعشو لوطة
سندس خافت من سراج خصوصا انها عارفته ايدير اي حاجة
سندس:خلاص باهي ححنزل معاك
سراج صبى:مش قتلك نقدر انخليك اتوافقي غصبن عنك
سندس:باهي خلاص اسكت احسن ماانغير رايي
سراج;ترا غيريه
سندس مابتش اترد عليه وصبت خذت دبش مالدولاب وخشت للحمام بتلبس ولبست(بلوزة قصيرة سودة وعليها جينز أسود وجاكة طويلة بيضة وكاويش ابيض ووشاح حريري ملون وطلعت)لقت سراج لابس(جينز اسود وعليه قميص أسود وجاكة ثقيلة بيضة وكاويش ابيض)وانصدمو لما لقو لابسن نفس الألوان
سراج بعصبية:انتي شفتي لبستي ولبستي زيي بلعاني
سندس:انا خذيت ادبشي قبل ماانت اطلع دبشك وبعدين ليش مش انت اللي شفتني شن طلعت ولبس زيي
سراج:انا اصلا ماشفتكش شن طلعتي وبعدين عمري ماكنت تافه هكي عشان بنلبس انا وبنت زي بعضنا والحركة هذي ايديروها اثنين ايحبو بعضهم مش نحن اللي نكرهو بعضنا
سندس بعصبية:خلاص مااديرلش قصة شكلها صدفة سودة زي الصدف اللي جمعنا في كل مرة اهو بنريحك وانغير لبستي بكل ومشت شور الدولاب
سراج بعصبية:أنا اللي حنغير ادبشي مش انتي
سندس:خلاص انا اللي بنغيره
سراج:انا قتلك بنغير ادبشي
سندس;وانا قتلك انا بنغير
سراج:مش بجوك انا بنغير
سندس;لا انا بنغير
سراج:انقولك حاجة مافيش حد حيغير ادبشه ومسكها من يدها وطلع بيها غصبن عنها سندس معصبة واتحاول اتفك يدها من سراج بس سراج كان ماسكها بقوة ووصل بيها للمطعم اللي تحت قمعزو وطلبو عشاء وقعدو يتعشو بدون ماحد يحكي مع حد وبعد العشاء رقو الدارهم وخشو دغري سندس خذت دبش مالدولاب وخشت للحمام غيرت دبشها واظطرت تلبس مالدبش اللي في الدولاب ولبست(شورت راب علي نص الركبة وردي منقط بنقط بيض وكت نفس لون الشورت ولبست عليه جاكة بيضة قصيرة)وطلعت لقت سراج مغير دبشه ولابس(سروال توته مالنوع الضابط رصاصي وعليه تيشرت ابيض)ومقمعز عالكنبة وايتفرج عالتلفزيون سندس جاته وجايبة في يدها مخدة وورغان
سندس:تقدر اتحول مالكنبة بنرقد
سراج:مش اتحقي فيا انتفرج
سندس:عارفتك اتفرج بس انا بنرقد
سراج:اهو السرير قدامك ارقدي
سندس:خلاص يبقى انت ارقد عالكنبة
سراج;نرقد عالكنبة شكلك طرشقتي مستحيل انديرها
سندس:يبقى حول خليني نرقد هنا
سراج بعصبية:قتلك انتفرج
سندس:باهي بلاش عياط وحركات ومشت قمعزت عالسرير وهي غامتلها واتهزب
سراج قعد ايشوفلها وهي اتهزب قعد ايتفرج وكل مرة ايشوفلها يلقاها مازال قالبة وجها
سراج;شن رايك تعزقي الكره والنكد اشوي علي جنب واتخلينا نختارو فيلم حلو مالأفلام هذينا وانتفرجو وانغيرو جو
سندس:ماعنديش جو بنرقد
سراج شافلها زين:توا انتي هكي النكد يجري في دمك
سندس:انا مش نكدية ومعش اتقولي هكي
سراج:كان مش نكدية تعالي انتفرجو وفكينا مالدراما اللي دايرتيها بكرا مروحين اقل شي ايمر علينا يوم اكويس نذكروه بعدين
سندس شافتله بنص عين:وعليش بنذكروه?
سراج:اهو بعد نطلقو انقولو هذك اليوم مشى علينا بضحك وجو سمح
سندس:باهي بشرط
سراج:عليك جو قديم كل حاجة انقولك عليها لازم تشرطي
سندس:ماتبيش بجوك
سراج:باهي قولي شرطك عجبني تمام ماعجبني انفوته واقعدي واعية لعند امتى ماايصحلي نرقد
سندس:انا اللي بنختار الفيلم
سراج:اممم باهي اختاريه انتي
سندس صبت وقعدت اتبحت للأفلام واختارت فيلم رعب وكان اسمه( Veronica)طبعا هذا فيلم رعب بكل ومن كثر ماايخوف منعوه مالعرض
سندس:انتفرجو علي هذا
سراج بإستغراب:متاكدة بتفرجي عليه هذا رعب بكككل مش حتقدري اتكمليه
سندس:اها عارفته وشايفته من قبل وبنتفرج عليه اخرى
سراج:أكيدة حتخافي فوتيه خير وشوفي حاجة اخرى
سندس:أنا مش خايفة وبنتفرج عليه بس ممكن انت اللي اتكون خايف
سراج ضحك بهزوة وخذا من يدها الفيلم
سراج:نطلبو حاجات الزوم السهرة وبعدها انشغلوه
سندس:تمام
كلم سراج وطلب شبش وعصير وفواكه وشكولاطة وبعد 10دقايق جاهم طلبهم حطتهن سندس عالطاولة وجهزت للسهرة وسراج شغل الفيلم وقمعزو ايتفرجو كان الفيلم ايخوف مالبداية
سراج كان ايفكر وفي عقله الخبيث ان سندس حتخاف وحدير زي الافلام اللي انشوفو فيهن واتغمض عيونها ومن كثر الخوف اتخبي راسها في صدره وكان طول الوقت مركز عليها وعلي حركاتها بس سندس كانت منسجمه عالاخر في الفيلم ومن كثر الاستمتاع حتى رمش ماترمشش سراج كان مصدوم منها وايشوفلها زين وبعد فترة كمل الفيلم
سندس وخرت وحطت راسها عالصالون:وااااو من أحلى الأفلام اللي حظرتهن
سراج بإستغراب:انتي بجد هكي مااتخافيش من شيئ
سندس:لا ماانخفش من شيئ
سراج:يعني معقولة فيه انسان ماعندش نقطة ضعف
سندس:اها أنا ماعنديش ولا نقطة ضعف
سراج:وشن رايك في اللي حيكتشف عندك نقطة ضعف
سندس;وكيف حتكتشفها وأنا اصلا ماعنديش نقطة ضعف
سراج;فيه قاعدة اتقول ان كل انسان لازم اتكون عندة نقطة ضعف معينة
سندس:وكل قاعدة ولها شواذ مش شرط اتكون شاملتني القاعدة هذي
سراج:باهي شن رايك نلعبو لعبة الصراحة وانشوفو
سندس:وكيف نلعبوها
سراج;حناخذو شيشة المية هذي ونقعدو نبرمو فيها واللي اتجي عليه الاخر يسأله بس اهم حاجة لازم اتكون فيه صراحة في الأجوبة
سندس:ماشي تمام
سراج:خلاص انزلي انقمعزو تحت عشان نقدرو نبرمو الشيشة
سندس:تمام ونزلو قمعزو تحت وبدا سراج يبرم في الشيشة واول مرة جت علي سندس وقعد سراج ايفكرلها في سؤال
سراج:بعيدا عن الكره اللي بينا ماحسيتيش عندي ميزة او صفحة عجباتك فيا
سندس:بصراحة مافيش اي ميزة فيك
سراج فنص عيونه فيها زين
سندس ضحكت:مش قلت جاوبي بصراحة وهذي الصراحة
سراج لف الشيشة مرة اخرى وجت عليه مرة اخرى وبيسأل سندس
سراج:شن الحاجة اللي اتخافي تفقديها في حياتك
سندس:بابا وماما انخاف اني انعيش حياة بدونهم
سراج ابتسم:ربي ايخليهم لكي
سندس:يارب
سراج لف الشيشة مرة اخرى وهالمرة جت علي سراج وسندس بتسأله
سندس:فيه سؤال محيرني بجد اللي انت ادير فيه وسهورك مع البنات مااتخفش ينتقلك مرض او تقعد مصاب بمرض معين
سراج:اكيدة انخاف وانا عالحاجة هذي بذات حريص بكل يعني اللي بنسهر معاها لازم اتكون ماالهش فترة مدايرة تحاليل وشهايد صحية انها سليمة وطبعا اللي تقعد هكي تاخذ فلوس اكثر اما اللي مش دايرة تحاليل وماعندهش شهايد صحية هذي طبعا اتكون ارخص وهذي انا سهرتي معاها بس رقص وشرب مش اكثر و
سندس:خلاص بالله عليك معش اتقززني اكثر من هكي انا الغالطة اني سألتك وخليني هالمرة انا انلفها ولفتها جت علي سراج وبتسأله هي مرة اخرى
سندس:شنو الانجاز اللي درته في حياتك
سراج فكر اشوي:بصدق وصراحة مافيش انجاز درته اتصدقي حتى قرايتي وصلت الاخر سنة في الجامعة وسيبتها
سندس:اصلا انت شن تخصصك
سراج:بزنز دولي التخصص هذا مافيش في ليبيا قريته في المانيا ايام وانا وهلي كلنا غادي بس باتي لما قرر ينقل كل شغله هنا انا كنت في اخر سنة عساس قعدت انرد بروحي وانكمل فيها لهيت في السهور والنوم وفتتها وباتي لما عرف اني مانمشيش للجامعة اصر عليا انرد هنا وردني بالقوة ولما رديت قالي نقرا اي قسم هنا انا كنت بنعاده وخلاص ومابيتش نقرا
سندس:بس القراية اهم شيئ
سراج:عارف بس اهو هذا اللي صار وخليني توا انلفها انا ولفها جت علي سندس وهو سألها
سراج:سؤال مهم ليش لما انقرب منك اتخافي وانتي عارفة ومتاكدة ان مستحيل اتصير بينا حاجة
سندس:ماانخفش بس انت اتفاجئ فيا وخايغة مرة ايوزك عقلك الشيطاني واتفكر ادير حاجة لازم ناخذ منك احتياطي
سراج ضحك بهزوة:مااتخافيش من سابع المستحيلات اتكون بينا حاجة
سندس:باهي تمام وحتى انا هذا اللي نبيه وتوا دوري انا انلفها ولفتها جت علي سراج وهي بتسأله
سندس:سؤال مهم زي سؤالك بما انك انت عارف ان من سابع المستحيلات ايصير بينا شيئ وعارف قديش نكرهو بعضنا ليش في كل فرصة عندك اتحاول اتقرب مني
سراج شافلها:ممكن لاني عاجبتني خوفك مني في اللحظة هذي عشان عمري ماشفتك خفتي ولنقني نعست بنرقد
سندس:حتى انا نعست
صبو سراج وسندس خذت سندس ورغانها ومخدتها وجت عند الكنبة بترقد
سراج جاها عند الكنبة:انتي ارقدي عالسرير وانا حنرقد هنا
سندس بصدمة:مش مستحيل ترقد هنا
سراج:والله اخر ليلة هنا قلت انخليك اتجربي الرقدة عالسرير
سندس:اها ومشت وهي تحكي بشويش (عليك حنية نزلت عليك)
سراج:راه سمعتك وارقدي وانتي ساكته احسن ماانغير رايي
سندس ردتش عليه ورقدت عالسرير وكانت ناعسة بكل ودغري خذاها النوم ورقدت اما سراج رقد عالكنبة بس كان سؤال سندس في عقله وهو ليش رغم كرهم البعضهم هو ايحاول ايقرب منها قعد ايفكر واجد مالقش إجابة مقنعة التقربه منها لان كان فيه حاجة مش فاهمها وهو ان اول فرصة للتقرب من سندس كان يستغل فيها ويلقى روحه تلقائي مقرب منها فكر واجد وبعدها خذاه النوم ورقد
“”
صباح ثاني يوم وعت سندس خشت الحمام خذت دوش ولبست(سروال جينز اسود وعليه بدي طويل بيج)ولعت التلفزيون وقعدت اتفرج مرت ساعة وسندس واعية بروحها وسراج ماوعش وهي كسدت بكل قعدت اتفكر كيف اتوعيه ولقت فكرة علت التلفزيون عالاخر
سراج زعجه الصوت ووعى;تي شنو هذا مافيش احترام للي راقد
سندس بإستعباط:صح وعيتك معليش
سراج:شن رايك واحد راقد وواحد ايعلي جنبه التلفزيون عالاخر عيني عينك يبيه يوعى
سندس;ماقصدتش انوعيك بس كان الصوت واطي عليت شكلي عليته زين
سراج صبى مالكنبة خذا دبشه مالدولاب وخش للحمام خذا دوش ولبس( جينز اسود وعليه تيشرت أبيض وجاكة ثقيلة رصاصية وموتي عليها كاويش أبيض)
طلع سراج وقعد ايمشط في شعره عالمراية
سراج:وتي روحك نطلعو نفطرو برا
سندس:خلينا نفطرو هنا احسن
سراج:اليوم اخر يوم بنطلعو نفطرو برا وندهورو لين ايجي وقت الرحلة
سندس:ماشي تمام انغير ادبشي بس
سراج:تمام وثقلي اشوي لان الجو برا مصقع بكل
سندس:تمام
سراج:انا طالع اشوي وانرد نلقاك واتية
سندس:تمام
طلعت دبشها ولبست(جينز اسود وبلوزة دمي وكاويش دمي وعليها وشاح حريري بيج وجاكة ثقيلة اشوي سودة وشنطة بيج)
بعد اشوي خش سراج وطلعو وكان سراج مأجر سيارة عشان تقعد معاه ومشو فطرو في مطعم حلو وادهورو في اسطنبول وعدو الكم مكان حلو وبعدها جا وقت الغداء تغدو في مطعم تركي وكلو أكل تركي وسندس عجبها وبعد الغداء طلعو وركبو في السيارة
سراج;حنشيلك المكان سمح صح مش وقته بس سمح حيعجبك
سندس:وين
سراج:توا تعرفي وولع السيارة ومشو
ووصلو عند شط البحر
سندس:بحر?
سراج:اتحبيه
سندس:مش غير انحبه
سراج:معناها انزلي خلينا انقمعزو عالشط اشوي
سندس:تمام
ونزلو وقمعزو عالشط وقعد كل واحد ايبحت في البحر وكأنه يحكيله في اللي في قلبه قعدو قريب ربع ساعة ساكتين
سراج:قعد يضحك
سندس استغربت:عليش تضحك
سراج يضحك:خطر عليا يوم اللي غرقتي في المصيف
سندس غمتلها:ماانحبش نذكره بكل اليوم هذا
سراج:عليش
سندس:هكي ماانحبش
سراج بخبث:عشان درتلك تنفس صناعي
سندس:لا مش عشان هكي انا كارهة الرحلة هذكي كلها
سراج شافلها:عشان اللي صار بينا في الشاليه صح
سندس صبت:لا هكي الرحلة مش عاجبتني وهي خلينا نمشو ومشت شور السيارة
سراج لحقها ومسكها من يدها:انا كرهتك في الرحلة
سندس شافت العيونه لأول مرة:اها انت كرهتني فيها
سراج ابتسم:تمام باهي شن رايك انعومو توا
سندس:انت مطرشق صقع شن انعومو توا
سراج:اها مطرشق وخذاها من يدها وخش بيها للبحر وسندس اتعيط تبيش اتخش كانت المية مصقعة قعدو حوالي 5دقايق وطلعو سندس طلعت ترعش مالصقع بكل سراج كان سالح جاكته في السيارة مشى يجري شور السيارة وجابها وحطها عليها ومسكها في حظنه لين وصلو للسيارة واول ماركبو سندس بدت اتعطس
سراج:شكلي نبي انتسبب في مرضتك
سندس كانت ترعش مالصقع وماردتش عليه
ولع سراج المكيف عالساخن وطلعو بالسيارة تكى عالصيدلية خذالها دوا للبرد وروحو للفندق ورقو الدارهم خشت سندس دغري للحمام دارت دوش ساخن ولبست دبش ثقيل اشوية وطلعت وهي اتنشف في شعرها طلعت لقت سراج طالبلها حاجة ساخنة تشربها وعطاها الدوا سندس حست الاول مرة بجانب الحنية اللي عنده
سندس:انا كويسة خش دوش بمية ساخنة مازال دبشك مبلول
سراج:تمام خش ودوش ولبس وطلع دغري تمدد عالسرير وتغطى بالورغان
سراج;في شنو اديري
سندس:انلم في دبشنا اشوي وايجي موعد الطيارة
سراج:تمام
سندس قعدت اتلم في الدبش واتحط فيه في الشناطي وسراج ايراقب في تحركاتها بعيونه من غير ماتفطنله
كملت سندس لم الدبش وبعدها لبسو وطلعو ومشو للمطار وجا موعد طيارتهم وركبو في الطيارة ووصلو الليبيا قريب الساعة 12 في الليل كان سراج حاط سيارته عند واحد صاحبه قريب مالمطار رن عليه وجابها له وركبو فيها وطلعو شور الفيلا وهو في الطريق رن علي فيصل
فيصل:اوووو نصي نورت ليبيا
سراج:منورة بيك يانصي
فيصل:امتي روحت
سراج:كيف طلعت مالمطار وتوا مروح للفيلا
فيصل:وعليش روحتو وانتو مازال ماطقيتو اسبوع
سراج:هذي ام السان تبيش المحاضرات ايفوتنها
سندس فنصت فيه زين
فيصل;حي شكله الجو تمام وبدت اتمشي في كلامها من توا
سراج يضحك:عيب يانصي المهم وين قاعد توا
فيصل:ماشي انا وكمال توا للشقة
سراج:فيها سهرة امالا والله رايفت عليكم وعلي سهراتكم
فيصل:كان مش تاعب انطب عليك وتمشي معانا
سراج:لالا مش تاعب عطيني حاجة نص ساعة هكي وطب عليا
فيصل:تامة يانصي وسكر
ووصلو للفيلا وكان الوقت متاخر ماقدروش ايتكو علي هل سراج لانهم مرقدين خشو سراج وسندس الفيلتهم خذت سندس شنطتها بتشيلها
سراج:خليها ثقيلة عليك حنشيلهن انا هنا الاثنين
سندس شافتله زين:تمام ريحتني وطلعت فوق وخشت الدارها وبعد اشوي خش وراها سراج جايب الشنطتين وحطهن في الدار وجا بيطلع مع رنت فونه وكانت هدى
#يتبع
الجو بين سراج وسندس بدا ايتعدل وبدا في شيئ غريب ايصير بينهم لكن حيستمر هالشي وقت طويل ولا حينتهى الأسباب اخرى?
وقولكم هدى شن تبي من سراج وكيف عرفت ان روح وشن حيكون رد سراج علي اتصالها ?
اما بالنسبة الرويدة ورانيا هل حيخسرن بعضهن وصداقتهن السمحة بسبب اللي صار ولا حتقدر سندس اتصالحهن مع بعضهن ☺
اما اختفاء رؤوف هذا شن سببه وهل حيجيب نتيجة أو لا كله حنعرفوه في الحلقة الجاية ?
اسفة عالتاخير النت رايح وقاعدة انحاول انزل بنت ليبيانا من بدري وان شاءلله تنزل
ركزتلكن علي سراج وسندس زي ماطلبتن?
أسفة لو فيه لخبطة في الأسماء وأكيد رأيكم ايهمني ?
گـتـابـتـي Koka Saleh