روايات ليبية
أخر الأخبار

منحرف وأحببته

جميع الحقوق محفوظة للكاتبة | Koka Saleh

#مـنـحـرف_وأحـبـبـتـه
الـحـلـقـة (1)
الاستاذ;خلاص ياطلبة لعند هنا حتكون محاظرتنا اليوم تقدروا اتفضلو
الطلبة لمو شيتاتهم وطلعو
سندس;اووف مثقل دمه معقولة يمسكنا 3ساعات من دون حتى رست?
رانيا:مبرده ديما ايدير فيها لكن خلاص هانت اخر سنة ونفتكو من هم القراية ونجوز حبيب قلبي?
سندس اتعايب عليها:حبيب قلبي?والله الا فاضيات القراية خير من الف راجل
رانيا:بالعكس جو ايهبل تاخذي اللي اتحبيه ?
سندس تضحك;قصدك مصدقه ان فيه حب انتم البنات مساكين بكل ?
رانيا:عاد انتي معقدة ومن يوم يومك هذا تفكيرك
سندس:بالله عليك شن الانجاز اللي بديريه لما اديري علاقة وبعدين تجوزي وتبدي في الهم وعيال ووجع راس وطياح سعد وووه كل ماانتخيل هكي قريب ننجلط?
رانيا;وشن بديري يافالحة كان مادرتي هكي هذا مستقبل كل بنت?
سندس:مش شرط مستقبلك مبني علي راجل وعيال اهو انا مستحيل انديرها توا انكمل وبعدين بنطلع انحظر وحتشوفي وانا عندي اكبر شركة بناء وحنكون اشطر مهندسة اندير مشاريع انساعد الناس نبي ايكون عندي دور كبير في المجتمع?
رانيا تضحك:احلمي هنا عندك بكرا تنخطبي واتغيري كلامك ?
سندس بعصبية:خطبة وجواز مستحيل لو انموت ماانديرها
رانيا:توا انشوفو كلام من الصاح
سندس: خلاص فكينا من الدراه وخلينا في المهم انا ميته جوع
رانيا:انا معايا سيارة بابا شن رايك نطلعو انتغدو انا وانتي في مطعم
سندس:فكرة بس خليني نتصل بماما انقولها الها احسن ماتقلق عليا
رانيا;تمام وانا انقولها الماما
واتصلن البنات بهلهن عشان ياخذن أذن وطلعن المطعم حلو وراقي بيتغدن فيه وجن للمطعم وحجزن طاولة وطلبن وجبات
“”
سراج راقد من بعد سهرة امس ووعى الساعة 2علي رنت تليفونه
سراج وعين مغمضة وعين مفتوحة:اهلا فيصل
فيصل:تي وين يابرو مازال راقد من بعد امس
سراج:امس مثقل العيار اشوي
فيصل;لنقنها سهرة سمحة والبنات اطلع طوول لازم انجهزو السهرة اخري معاهن?
سراج:لا ياباشا عارفني انحب التجديد ماانحبش نسهر مع نفس البنت مرتين?
فيصل:معناها كيف بنديرو اليوم مافيش وحدة جديدة
سراج:تي مااتخافش ياطري الجديد ديما موجود دبين سيرجو معاك ?
فيصل يضحك:من الناحية هذي مطمن المهم هيا صبي وصحصح راشقتلي في تغداية برا اليوم
سراج:تامة يابرو ربع ساعة وتلقاني واتي وسكرو
“”
بعد حوالي 10دقايق وصلن طلبات البنات وبدن ياكلن
سندس:ايهبل المطعم اول مرة انجيه
رانيا:انا جايته كم مرة بابا ايحبه وديما ايجيب فينا هنا حتي اكلهم سمح
سندس تاكل:اها مشاءلله عليه
“”
وصلو الشباب وخشو للمطعم وطلبو غداء
سراج ايبحلق في عيونه وطبت عينه علي سندس:اووووف يانعن جد الطرف اللي عالطاولة هذي
فيصل:يانا عليا وينها ?
سراج;غير بحت وراك
وكانت سندس مصادرة سراج لف فيصل وحقها
فيصل;لنقنها طررررف ?
سراج: تعرف معاها وحدة اخري شكلنا القينا عليش نسهرو اليوم ?
فيصل مازال لاف وجه جيهة سندس;بس شكلها صعبة مش زي اللي نعرفوهن ?
سراج يضحك وبثقة:صعبة عليك مش علي سيرجو ?
فيصل يضحك:عنجد الثقة وخلاص
سراج:اتراهن ان اليوم نسهرو معاهن ?
فيصل:تمام معناها كان كسبت نعطيك 2000د وكان خسرت انت تعطيني
سراج:البنت تستحق 3000د مش 2000د
فيصل:تم وانت قلتها ورينا شطارتك?
وقعد عمك سراج ايبحت فيها ويغمزلها?
سندس غمتلها:تي شن هالهم اللي صادرنا مبرد دمه
رانيا;تي كنك شن فيه
سندس:بحتي وراك وحقي الهم اللي فاتح القراج متاعه ويسهوك وايدير في حركات غريبة
رانيا لفت وشافاته:شكله معجب بيك ?
سندس:هه صار معجب وماهذا ليش نكره الرجالة ما هالاشكال المستفزة?
رانيا:خلاص فوتيه ومعش اتشوفيله
سندس غمتلها:اسمعي بنصبي نغسل ايديا وانهدي روحي اشوي خير مانرتكب جريمة وانتي اطلبي الحساب وخلينا انروحو فكينا من هالدراه ?
رانيا:تمام
سندس صبت ومشت للحمام وسراج استغل الفرصة وطلع وراها وصبي قدام الحمام يرجي فيها تطلع اشوي وسندس طلعت ولقاته في وجها قعدت تطلع ايمين يطلع ايمين تطلع ايسار يطلع ايسار
سندس:معليش عطيني الطريق
سراج بغمزة:انلا ?
سندس فنصت عيونها:نعم قتلك عطيني الطريق
سراج;وانا قتلك انلا ?
سندس غمتلها;مازال محترمة نفسي وانقولك لو سمحت عطيني الطريق ?
سراج قرب اشوي;وانا بإحترام اكثر من احترامك انقولك انلا ?
سندس تنرفزت عالاخر:حول احسن ماانعلي صوتي ونحرجك قدام الناس كلها ?
سراج:ومن قالك ياحلوة اني انا ننحرج اصلا?
سندس مبلمة عيونها ومصدومة من وقاحته ?
سندس:تي شنو قلة هالذوق شن تبي مني
سراج:عجبتني وحاب انتعرف عليك
سندس:شكلك مطرشق
سراج ابتسم;وانتي اتهبلي وحط يده في جيبه وطلع كرت
سراج:شوفي ياحلوة هذا كرتي وفيه كل ارقامي وانا حاب انتعرفو ونسهرو سهرة حلوة عندي وحتعجبك وغمزلها ?
سندس مصدومة:انت واحد ومازال ماكملت كلامها سراج قاطعها
سراج:قبل مااتقولي اي كلمة فوق انك حتنسجمي انتي والحلوة اللي امعاك الرقم اللي تطلبوه تاخذوه من الالف للعشرة الاف? سندس مصدومة من كلامه ووقاحته وهوب ترفع يدها وتعطيه كف ثلاثي الأبعاد(بصراحة يستاهل الوقح)
سراج حط يده علي خده
سندس بصوت عالي:انت واحد قليل ادب ووقح وتافه ومااتحشمش علي وجك ودفاته ومشت
والناس كلها قعدت اتشوف السراج وسراج قعد مصدوم من تصرفها ومشى شور فيصل
سندس جت للطاولة اللي عليها رانيا وهي غامتلها بكل واتهزب
سندس معصبة:هي خلينا نمشو من هنا
رانيا:تي كنك شن فيه
سندس بعصبية:غير هيا توا وطلعت ورانيا طلعت وراها
سراج سيب الطاولة اللي عليها فيصل وطلع بسرعه وفيصل الحقه
سراج بعصبية:افتح الخاربة
فيصل يفتح في السيارة;تي كنك ياراجل
سراج ركب:تي الكلبة شن تحساب روحها والله اندمها عليها
فيصل:تي علي من تحكي
سراج:الحيوانة اللي مشيت وراها
فيصل:شن دارت
سراج وحكاله اللي صار
فيصل بصدمة:من جدك ماقتلك ما الأول مش زي اللي نعرفوهن
سراج:هذينا اطروح تي كلهن ارخاص زي بعضهن وقعد ايهزب
“”
رانيا:بشوية يادوسة مافهمت منك شيء شن دار احكي بشويش عشان نفهم
سندس بعصبية:الكلب الحيوان الصايع معقولة انا ايقولي الفلوس اللي تبيهن تاخذيهن وحتنسجمي
رانيا:تي من يابنتي فهميني كنك اتعيطي هكي
سندس قعدت تحكيلها في اللي صار
رانيا بصدمة:معقولة تي هذا واحد مريض ماايتحشمش علي وجه شن يحسابك
سندس:هذا واحد مش متربي خزي عالاشكال اللي زيه وقعدت اتهزب واتسب
رانيا:خلاص فوتيه وهدي روحك
سندس معصبة واتهزب
رانيا:مانقدرش انروح بيك وانتي معصبة هكي اهدي يادوسة
سندس:انتي عارفتيني بعد انعصب معش نعرف نهدى والكل يعرفها فيا
رانيا:خلاص يبقى حنكلم اعميمة سعاد وانقوللها عندنا شغل علي مشروع وبنشتغلو مع بعضنا
سندس متعقدة عالاخر;ايكون أحسن
رانيا رنت علي ام سندس
سعاد:ايوا رنوشة
رانيا:خيرات اعميمة شن اخبارك
سعاد:كويسة الحمدلله شن اخبارك انتي وشن اخبار هلك
رانيا:الحمدلله بخير قتلك اعميمة بناخد دوسة معايا للحوش عندنا مشروع بنديروه مع بعضنا
سعاد:باهي تعالو اشتغلو علي مشروعكم هنا
رانيا:هنا ولا غادي كلا واحد بس عشان حتي رويدة متفقه معانا بتجي في حوشنا
سعاد:خلاص باهي غير خليها اترن علي بوها
رانيا;تمام اعميمة سلام وسكرت
رانيا:قالتلك رني علي عمو فرج
سندس:مانقدرش انكلمة وانا معصبة هكي حندزله رسالة ودزتلة رسالة مكتوب فيها(بابيتو انا ماشية مع رنوشة الحوشهم عندنا مشروع بنشتغلو عليه تمام)
اشوي وباتها دزلها(عدي يابابي واول ماتبي اتروحي رنيلي انجيك وردي بالك علي روحك)
رانيا;نوصلو وانرنو علي رويدة اتجينا وانغيرو جو
سندس معصبة:تمام
وعدن الحوش رانيا
(انتعرفو علي بطلتنا سندس م 95 في أخر سنة في كلية الهندسة بنت طويلة وجسم متناسق مع طولها عيونها عسلية شعرها قصير وبنفس لون عيونها بنت شخصيتها قوية بكل مااتحبش اتبان ضعيفة ابدا رافضة وكارهة فكرة الزواج نهائي اتحس في الراجل مش مهم الحياة المرأة والمراة تقدر اتكمل حياتها بدونه بدون اي نقص الفكرة هذي واخذتها من هي صغيرة وكبرت معاها هلها في البداية مخلينها بجوها بس توا الفكرة هذي قعدت مخوفتهم ,مستحيل ينزلو ادموعها قدام حد حتى اقرب الناس الها ,اتموت في باتها هو كل حياتها وهو ايحبها موت هي بنت وحيدة سبب انها بنت وحيدة ان باتها بعد زواجه بسنة وبعد جيت سندس تعرض الحادث عنيف نجى منه بأعجوبة بس سببله عقم وام سندس كانت اتحبه ورضت بسندس بس وماحكوش الشي هذا الاي حد سندس عندها صدقتين مقربات بكل رانيا بنت حساسة ودمها خفيف وصديقتها من الابتدائي
ورويدة بنت طيوبة وعسل بكل وصديقتهن ما الاعدادي بس ماتقرا معاهن في نفس القسم وكل وحدة عندها قصة حنعرفوها بعدين طبعا فيه طبع في سندس كلكم حتلاحظوه مع الحلقات اول ماتزعل تنفتح شهيتها وتقهد تاكل وبرضو لما تفرح تاكل? بس من حسن ظنها ماايبانش عليها بكل والكل مستغربين وين هالوكال يمشي?)
“”
فيصل وسراج
سراج:كنك درست عالمول شيلني للفيلا
فيصل:اصبر ياطيري وائل موصفلي محل هنا قال ايجيب في ملابس كل حاجة منها قطعة وحدة بس
سراج:من جدك بتشري من هنا كان تبي دبش اول طيارة التركيا ونطلعو انهيجو ونسوقو وانروحو
فيصل:نبي انشوفه عجبتني حاجة ناخذ ماعجبتني نطلعو سراج:تم هي ننزلو منها ناخذ خلطة حس راسي بيطربق فيصل:هي ونزلو
وهما في المحل ويتفرجو
فيصل:يابرو مش ناسي الرهان
سراج غمتله:يارا مااتخطرش عليا الحقيرة والله الا انردة الها الكف
فيصل;كبر عقلك ياراجل من جدك بترده البنت خلاص فوتها
سراج حامق:تي كلهم شافوها لما ضربتني
فيصل:انا مالاول قتلك مش زي البنات اللي نعرفوهن خلاص انت غلطت في حقها وخذيت جزاتك وانتهى الموضوع
سراج:تي شن غلطت في حقها شن تحساب روحها انت مش عارف البنات زيي والله الا كلهن رخاص ومتاعات فلوس
فيصل;تي البنت عرضت عليها وشفت ردت فعلها يعني مش رخيصة
سراج:تي النوعية هذي انا نعرفها شكلها تبي اكثر مالمبلغ اللي عرضته عليها
فيصل:قصدك بتعرض عليها اكبر من هكي
سراج:تي فكني منها هالتافهة لا نعرض عليها لا تعرض عليا كان نلقى بننسى اني تلاقيت بيها بكل تي كرهتني في البنات كلهن
فيصل وقف وبصدمة:قصدك معش فيه سهور وهياجة
سراج:عينك انا نقدر نقعد بلا الجو هذا تي انموت بعدها مااددققش في كلامي غير غمتلي بس
فيصل:خلاص شيلها من راسك
سراج:وتي هي من عشان انفكر فيها ولا انحطها في راسي راهي ماتسوش عفسة كاويشي تي والله حتى كاويشي ماركة صقع عليها?
فيصل قعد يضحك:اسمع عجبتني الجاكة هذي بناخذها
سراج:تمام خوذها وخلينا نطلعو للكافي
فيصل:انت ماعجبك شيئ
سراج بغرور;تي عيب يانصي معقولة انا نشري من ليبيا مش عارفني ولا شنو ?
فيصل;طول عمرك فشاك اسفين عرفينك وحيد وبوك مدلعك
سراج مع رفعة حاجب:باهي كان كملت هي نطلعو
شرا فيصل الجاكة وطلعو للكافي وطلبو خلطة وحاجة حلوة وقعدو ياكلو
فيصل:تي شوف المزز اللي عالطاولة اللي غادي
سراج:وين?لنقنهن اطلع طول شكلنا القينا عليش نسهرو اليوم وصبى بيمشيلهن
فيصل:ياراجل اصبر راه ايصير زي اللي مبدري
سراج:ماعليك بعد انشيرلك تعال بس
فيصل:تم وسراج صبى ومشا للبنات وكانن 3بنات واول ماجاهن قعدن ايهدرزن ويضحكن معاه وبعد اشوي شير الفيصل وجاه وكسدو معاههن وخذو ارقامهن واتفقو علي سهرة في الليل
(انتعرفو علي سراج شاب م 88 عمره توا 30سنة ابيض طويييل لحيته مرسومة سودة اتجنن?عيونه سود وشعره أسود وجسمه عضلات وايهبل وطبعا صاحبنا مغرور عالاخر ايحب السهر مع البنات والشرب البنات لعبته وهوايته يعشق جنس حوا بس ماايحبش يسهر مع البنت مرتين داير هو واصحابه شقه للهياجة وللسهر طبعا هو وحيد هله باته وامه اولاد عم خذو بعضهم بعلاقة حب طويلة وبعد مصاعب واجد وكانت جيناتهم قريب من بعضهم وطولو ماجابو عيال وكانو كل ماتحمل امه اتنزل عشان السبب هذا جده قال الباته يجوز بس باته لان ايحبها رفض ورفضه سببله مشاكل واجد مع بوه وهله خلاه ياخذ مراته وايسافر الالمانيا هما كانو عيلة غنية وبات سراج بعد طلع برا استثمر امواله وكان راجل اعمال ناجح ضاعف ثروته اضعاف اضعاف بعد سنين علاج واجد في المانيا ودول اخرى قدرو ايجيبو سراج بس بحكم شغل باته عاشو اغلب حياتهم في المانيا كانو ينزلو لليبيا كل بعد فترة جد سراج كان ايحبه موت وكان يبي ياخذه ايربيه هو بس لان خايف عليه من بلاد برا وان ياخذ اطباعهم بس باته رفض وعاش بيه في المانيا كبر سراج علي عادات غير عاداتنا وبيئة غير بيئتنا وقعد صايع ونسونجي فترة مراهقته كلها قضاها في المانيا بعد سراج وصل للمرحلة هذي انسان مستهتر مايعرفش شي علي شغل بوه كل همه في السهور والبنات باته خاف عليه وقرر ينقل كل شغله لليبيا ويرجع بس طبعا بعد فوات الاوان غصب علي سراج وردو لليبيا من 7سنين فاتو بس سراج كان يقعد فترة بسيطة في ليبيا وايرد الألمانيا لعند لما تعرف علي فيصل كان صاحبه المقرب والوحيد صح فيصل نفس جوه بس فيصل كان ناجح في شغله وكان يشتغل مع بات سراج في الشركة وكان بات سراج عاجبه لان موفق في عمله وشاطر وباقي شلة الانس اللي يعرفهم هذوما للكيف وبس مافيش فيهم حد صاحبة الا فيصل)
“”
عند سندس ورانيا وتحديدا الساعة 5العشية
رانيا:رويدة شكلها تبيش اتجي خلاص نمشي اندير قهوة
سندس:اصبري خليني انرن عليها قبل وخذت فونها واتصلت وعلت الاسبيكر
رويدة:ايوا دوسة
سندس:وينك لعند امتى بنرجوك
رويدة متضايقة:سامحني يابنات رؤوف طالع مالصبح وانرن عليه مقفل وعصام عارفاته ماايحب الشيل والجيب علي مااجديته مابا
رانيا:يعني مش جاية ياباردة
رويدة:اللي عندها زي خوتي تطلع ولا اتخش اخسارة مااختهم الوحيدة
رانيا تضحك:تبي اتعرفيني عليهم خوتك اسأليني انا علي اوفي معطب معيشتي خوك بيهبلني راه
رويدة:وبيهبلني حتى انا هالبارد
سندس:تستاهلي ياحنة انتي اللي عاطيتيه فوق من حجمه
رويدة:رنوشة شن دارلك حاجة اخرى
رانيا:والله ماعاد فهمته يبيني او لا كل مرة بشكل مرة انحسه ايحبني ومرة معش ايدورني وايفوتني بالاسبوعين
رويدة:هذا طبعه تحمليه
سندس بعصبية:مش مظطرة اتحمله سامحيني دودي خوك مبرده واصلا اي راجل بارد
رانيا تضحك:خليك منها المعقدة هذي المهم بكرا عندك محاظرة
رويدة:اها ما 8-10
رانيا:حتي نحنا زيك معناها ما 10-2مع بعضنا راه مرايفة علي لمتنا بكل
رويدة:خلاص تم
سندس تضحك;يبقي فيها فطور من عين عينه ?
رانيا تضحك:هالباردة ماهمها غير في بطنها
رويدة:ياريته غير باين عليها ?
سندس:استلمتني دا هي وجك وانتي يارانيا نهارك هو وسكرت وصبت تجري ورا رانيا بتضربها
وعند المغرب جا بات سندس وروح بيها تعشو وهدرزت مع هلها اشوي وعند 11خشو رقدو
“”
اما عند سراج وفيصل الساعة 11غير بدت سهرتهم مع المزز اللي تعرفو عليهم وماكملت السهرة الا الساعة 5الصبح وروح كل واحد الحوشه وهو ساطلها سطلة سمحة ?
سراج دغري رقى الداره ورقد باته كان واعي بيصلي الفجر وحقه وهو كيف جاي
محمد بات سراج:قهرني العيل هذا انا وحلت فيه خلاص عفاف امه بحزن:شن بنديروله بس
محمد:من بكرا حيكونلي معاه تصرف جديد
عفاف:شن بديرله
محمد: خلينا نرقدو توا والصباح رباح وحتشوفي ورقدو
اما سراج خش الفراشه ورقد دغري (مش منه هالك مسكين قايم بعمله علي اتم وجه ?)
“”
سندس وتحديدا الساعة 7 الصبح وعت وفطرت هي وهلها وحطها باتها في الجامعة وعدى للمصنع(طبعا باتها حالته متريحة وعنده مصنع حديد وصلب وماشي شغله تمام وعايشين في حوش من طابقين وفيه اجنان حلو وعندهم خدامه وسائق يعني حالتهم كويسة)
“”
سراج وتحديدا الساعة 7 راقد ومتريح في رقدته عالاخر ومتعود كل لما ايروح يرقد لعند العشية لكن اليوم يفرق وعاه صوت باته
محمد بصوت عالي:سراج نوض ليا ساعة انعيطلك
سراج يادوبك ايحل في عيونه:شن فيه ياباتي كنك عالصبح
محمد:نوض عندنا اجتماع في الشركة
سراج:وشن بنديرلك بنوصفلك الشركة يعني?
محمد بصوت عالي: احكي معاي كويس وتحشم علي وجك
سراج فطن الروحه:مش قصدي بس انت عندك اجتماع انا شن دخلني بيه
محمد:صبي الاجتماع الاعضاء الشركة كلهم وانت من ظمن اعضاء الشركة لازم تحظره
سراج:انا شن فهمني في الشغل مانعرف شيء فيه خلاص امشي انت
محمد:لازم تحظره الاجتماع وبعدين لازم اتعلم الشغل علي حالك مش ديما قاعدلك انا
سراج:ربي ايطوللنا في عمرك لاكن بالجو فوتني انا مانقبلش جو الشركة ممل بكل وبعدين انا ناعس
محمد:مش بجوك هي وبعدين كنك ماتقعد ناعس مروح الساعة 5 الفجر ياللي مااتحشم علي وجك
سراج:اوووف بتعطيني محاظرة عالصبح
محمد طلق فيه شيشة العطر اللي عالزيانه غير ماطبتش فيه:زعميتك تعلمت مالمحاظرات انت فاشل ومستهتر لكن حتشوف المعاملة الجديدة من يوم وغادي وتوا تلحقني عالشركة ونقسملك بالله ياسراج لو مااتجي لا حوشي ولا حوش جدك عاد اتخشله ولا اتحق مني ولا من جدك مليم حمر وتوا انوريك وطلع وخبط الباب
سراج فات الموضوع وتغطى ورقد?خشت عليه امه
عفاف:سراج سراج نوض سلم وليدي
سراج:اووووف تي فوتوني وانتو مااتهنو حد
عفاف:الله ايربحك الحق باته فكنا مالمشاكل باتك حلف وانت عارفه بعد يحلف
سراج:راجلك حاطني في راسه وايدور فيا راه
عفاف:تحشم علي وجك هذا باتك
سراج:فيه بات ايعامل ولده هكي كان مش ولدكم قولولي
عفاف:باتك يبي مصلحتك يبيك تقعد مكانه في الشركة
سراج:تي الف مرة قلتلكم الشركة مش جوي بككل دورو غيري
عفاف:من بندورو غيرك انت ولده الوحيد المفروض راك يده اليمين ومعتمد عليك في كل حاجة باتك يبيك اتعلم علي حالك عشان بعدين تقدر تمسكها
سراج بصوت عالي:مانبي نمسك شيء فوتوووني وخلوني نرقد بس
عفاف:غير صبي وفكنا مالمشكلة اليوم وبعدها ساهل وتو نحكي مع باتك
سراج:نمشي اليوم وتقنعيه ان معش بنمشي للشركة
عفاف:غير امشي اليوم ونقنعه راد الله عليا
سراج تغطى:تمام باهي
عفاف حولت الورغان:تي نوض عليش رديت رقدت
سراج:باهي وتولي الفطور وتوا نوعى
عفاف:نوض دوش والبس علي ماقلت للخدم ايجهزولك الفطور
سراج:جيبولي نفطر قبل وبعدها توا نلبس
عفاف بعصبية:فيه واحد يفطر قبل مايغسل هيا بسرعه صبي دوش والبس وانزل لوطه تلقى الفطور واتي وجت بتطلع وبعدها ردت
عفاف:خطرها البس بدله ماتلبسش لبسك العادي ماشي الشركة راه مااتخليش بوك ايتعقد منك
سراج:مش لابس بدلة انتي عارفه ماانحبش البدالي
عفاف:تحمل اليوم وخلاص وطلعت
سراج صبى وخش دوش وطلع يختار في حاجة يلبسها
(طلع جاكة رسمية كحلية وسروال كحلي وتحت تيشرت دمي وكاويش دمي وساعة ماركة اتهبل ودار جل وبخ عطر مش بخه عاديه دوش روحه بيه? وبحت في المراية
سراج;مالاخر لنقني طرف وخذا نظاراته وتليفونه وطلع عفاف اول مانزل سراج قعدت اتزغرت
عفاف:لووولووووووووولي
سراج;بسم الله كنك عالصبح
عفاف:فرحانة فرحانة مش مصدقة انك ماشي للشركة
سراج:راه غير اليوم بس ماتعبوش عليها ديما مانبيش مشاكل مع باتي
عفاف:وباهي ياوليدي شن فيها كان ريحتنا وقعدت اداوم وتعلمت الشغل من بوك
سراج:تبي تبدي في الموضوع انرد نرقد ومعش بنمشي بكل
عفاف:خلاص اهو سكتت قمعز افطر
قمعز سراج فطر وكمل فطوره وطلع وقعد ربع ساعة وهو ايفكر بأي سيارة يمشي وبعدها ولع الازيرا ومشى بيها
“”
عند سندس وصلت للجامعة وتلاقت مع رانيا ورويدة صبحن علي بعضهن وخشن المحاظراتهن واتفقن يلتقن بعد المحاظرة
“”
سراج وصل للشركة وطبعا اللي في الشركة كلهم استغربو جيته لان ماعمره جا للشركة بكل وتلاقه مع فيصل
فيصل:احمار من بيموت سراج جاي للشركة
سراج:ترا فوتني يارا مانبيها بكل الجية
فيصل يضحك:عمي محمد غاصبك
سراج قالب وجه:ومن غيره يعني ديما غاوي ايديرلي مشاكل
فيصل:هذا كله وغاوي ايدرلك مشاكل تي انت عايش امير مسكين باتك شايل الشغل كله علي راسه
سراج:بدت اسطوانة عفاف امتاع الصبح تعرف اتسكر فمك ولا انسكره بطريقتي
فيصل:خلاص ياراجل سكتت انا نحكيلك علي مصلحتك بس
سراج:شكرا مصلحتي عارفها بس قولي انت كيف قادر تسهر للصبح وبعدها اتجي للشغل عادي
فيصل غمزله:تي قدارات ياباشا هذينا
سراج:بس انقولك لنقنه البنت الشقرا امس في السهرة ناااااار
فيصل:تي اسكت ينعن شكلك في الشركة قاعدين
سراج:وشن فيها حتى اللي نحكو فيه شغل
فيصل يضحك:لا شغل بكل المهم اسكت خير مايسمعك واحد ما الموضفين
سراج:مادخلهمش انا المدير
فيصل:مدير بالاسم ?
مع تخطيمة وحدة مالموظفات وكانت سمحة
سراج نزل نظارته وبغمزه?:اموت انا واعيش السنة
فيصل ضربه علي كتفه:تحشم ينعن شكلك نحنا في الشركة مش في الشارع عندنا مكانه هنا وبعدين كان عمي محمد ايشفوك نهارك هو
سراج:تي سمحة البنت انت عارفني ماانتحمل بكل
فيصل:خلاص تعال نمشو للإجتماع يبي يبدى توا
ومشو للإجتماع وطول الاجتماع وسراج قاعد مال ومش فاهم شيء فيه وقعد ايبعبش في فونه وفيصل ايفنص فيه خايف من باته ايشوفه لكن شافه وبعد كملو الاجتماع عطاه هزيبة سمحة وقاله ايقمعز في مكتبة ومايطلعش منه بككل وقعد عمكم سراج في مكتبه وهو مال مالجو ماايحبش اجواء العمل بكل وقعد لعند الساعة 11 في الشركة وبعدها طلع الباته بعد جهد كبييير ومعاناه واجده قدر يقنع باته ان ياخذ فيصل وايروح وطلعو وركبو في سيارة سراج
فيصل:انموت ونعرف كيف قدرت تقنع باتك بس تي انا عارفه مايسمحش الحد ان يطلع قبل مايكمل الدوام
سراج يلبس في نظارته:تي قدرات علي قولتك يانصي
فيصل:وين بنمشو
سراج:اي مكان المهم نطلع من هالشركة المملة
فيصل:خلاص يانصي دبينا طلعنا بدري يبقى نمشو الجامعة الهندسة قبل
سراج:عليش شن عندك في الجامعة
فيصل:متعرف علي وحدة ليا كم يوم عانيت فيها واجد نبيها ادزلي صورتها مابتش وقالت ماتقدرش اتشوفني الا في الجامعة وانا عشان الشغل ماكنتش نقدر انشوفها في الجامعة لكن اليوم عندها محاظرة انرن عليها انشوفها كان في الجامعة انعدي نظربلها موعد
سراج:مشاءلله حركات من ورايا يانصي وانا كل حاجة انشاركك بيها ودايرك نصي
فيصل:تي عيب ياطيري غير انتم معاها وعندك نصيب زيي زيك بزبط
سراج:كان هكي نمشو وان شاءلله بس تطلع طرررف?
فيصل يضحك:ان شاءلله
وطلعو ماشيين للجامعة
“”
عند سندس ورانيا ورويدة كملن محاظراتهن والتمن وقاعدات يفطرن واتهدريز وجو مالاخر
#يتبع
زعما شن حيصير من تطورات مع ابطالنا وهل حيكون عندهم لقاء اخر ولا يكتفيوو بس بلقائهم في المطعم كله حنعرفوه في الحلقة الجاية ☺
گـتـابـتـي Koka Saleh

تقييم المستخدمون: 3.84 ( 15 أصوات)

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55الصفحة التالية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error:
إغلاق
إغلاق