الجوكر | للكاتبة Koka Saleh

#الـجـوكـر ?

الـحـلـقـة (19)

(حقيقية ممزوجة بالخيال)

گـتـابـتـي #Koka_Saleh

::::::::::::::::::::::::::::::::::::::::::::::::::::::::

لايك قبل القراية وتعليق بعد القراية ?

:::::::::::::::::::::::::::::::::::::::::::::::::::::::::

نا مازال انبحت فيه ومستك بككل اول مرة بنخش في شيئ زي هذا
التجارة في النساء يعني هي نفسها التجارة في الاعراض ?

هو:هيا انهض سنذهب فورا الي هناك

صبيت امعاه ونا مش مستوعب الفكرة نا سرقت قتلت دمرت خطفت هربت بس ولا مرة تاجرت في الاعراض ولا مرة اغتصبت ولا مرة بعت بنت ولا مرة اذيت انثى اصلا

طلعت امعاه وركبنا في سيارة وورانا مجموعة سيارات والمكان ماكان بعيد كان في نفس المزرعة بس يبعد عن الحوش 3 كيلو هكي

نزلنا كان زي الهنقر كبيييير عليه حراس ومقفول بكم قفل فتحوه وخشينا كان فيه بنات واجد واضح انهن مخطوفات خطف وواضح عليهن الخوف واثار الضرب والتعذيب

قعدت انبحت فيهن بالوحدة كل وحدة في عيونها الف قصة وقصة مجتمعات في زاوية وحدة مالهنقر وابشوفلنا بنظرة رهبة
بغض النظر عن جنسياتهن بس اكيدة كل وحدة مسيبة وراها حد واجعه فراقها يا اب يا ام يا اخ يا زوج يا ابن

هو:اتعجبك احداهن

نا:لا

هو:اذا لنذهب
طلعنا وردينا للمكتب

هو:لا ياخذ الامر اكثر من اسبوع فإن الطلب عليهن كبير

نا هزيت براسي وفي قلبي غصة قد ماكنت حقير بس مش للدرجة هذي مش درجة انتاجر بنساء ضعاف هكي
مmنقتل اندمر نحرق اي شيئ عادي بس شيئ تجاه انثى مانقدرش وبذات بيعهن
حسيت كأن في ايام الجاهلية وسوق النخاسة لما كانو ايبيعو في الجواري
بزبط انا توا وكأني التاجر اللي في سوق النخاسة وهذينا الجواري مافيش فرق نهائي?

هو:مابك

نا في خاطري انقوله مانبيش شغلكم معش بنكون امعاكم بس عارف بعدها شن بيصير فيا بس قررت نقعد اذكى من هك

نا:لا استطيع القيام بهذه المهمة

هو:اذا انت ترفض مهمة

نا:لا لا ارفضها اطلب مني ان اذهب الان واقتلهن جميعا سأفعل اطلب مني ان احرق بهم المكان سأفعل اطلب مني احظار او قتل اي شخصية سأفعل اما العمل مع النساء وبيعهن لا استطيع هذه مهمة صغيرة بالنسبة لجوكر مثلي

هو:حسنا فهمت لكن مالذي سيحدث اذا علمو انك ترفض مهمة

نا:قلت لك لا ارفض ويمكنني ان اتحدث معهم بشأن هذا الموضوع

هو:حسنا بعد ساعات هناك اجتماع تحدث معهم عن هذه المهمة والقرار الذي سيتم اتاخذه هو الذي سينفذ

نا:حسنا موافق

هو:يمكنك الذهاب وشكرا لمجيئك

نا:حسنا الى اللقاء

طلعت من عنده ونا متوتر وانفكر اذا هذا اختبار زي كل اختبار ايديرو فيه ليا او فعلا مجرد مهمة عادية اذا كان اختبار فأكيد فشلت واذا كانت مهمة ونا رفضتها اكيدة وصللهم الخبر فمعنى هكي ياعالم انعيش لعند الاجتماع او لا
بس لو عشت لازم في الاجتماع اني نقنعهم بكلامي وانخليهم ايوافقو اني ماانديرش المهمة هذي لاني كنت عارف ومتأكد ان قراري بأني نرفضها قرار صح مية في المية عشان ماكنت قادر اني انخش في بيع الاعراض مهما كان كوني راجل وكوني شرقي اني انتاجر في النساء شيئ صعب عليا بذات نا احمد ?

ركبت في السيارة اللي جيت فيها وشالوني الفندق وصلت وحجزت فيه ورقيت الداري
ماقدرتش نرقد من كثر التفكير وللامانة كنت خايف خايف يقتلوني بس الخوف ماكان مالموت بصفة عامة لا كنت خايف انموت قبل مانوصل في سمر وانعيش امعاها اللي نحلم بيه انكون امعاها الاسرة اللي انحرمت منها انحس امعاها بالسعادة اللي فاقدها انجيب منها الاطفال اللي يملو حياتي ?
الي كنت نحلم بيهن كانن مجرد حقوق بسيطة عند اي انسان عادي بس جوكر زيي صعب ان ايحققهن رغم ان يقدر ايدير اي شيئ في الدنيا الا هذي?

بعد ساعتين من وصلتي للفندق جا وقت الاجتماع اتصلو بيا من رسبشن الفندق علي تليفون الغرفة وقالو ان فيه سيارة ترجى فيا تحت صبيت غسلت وجي عشان انصحصح وطلبت فنجال قهوة شربته قبل مانطلع وبعدين نزلت وركبت في السيارة وطلعنا للاجتماع

وصلنا للاجتماع وخشيت وتناقشو في البداية علي اكثر من شيئ ايخصن مواضيع عديدة كانن مواضيع عامة عن شخصيات مهمة وعن دول لحدت ماوصلو في مواضيع الاعضاء حكو في اكثر من قرار ايخص اعضاء المنظمة ووصلو اخر شيئ في موضوع رفضي للمهمة وطلبو مني اني نحكي سبب رفضي وكل الانظار التفتن عليا والكل كانو يرجو شن ردي

نا:‏Since I was a child I was recruited to you and always be loyal to the organization.
‏When I started working with you, I was doing all the tasks required from me ,and did not ask why ,I didn’t provide any question because I know that this is completely contrary to the laws of the organization
‏and never rejected any task from that required from me, but I used to carry out important and large tasks and did not do a simple task as a known to you and to everyone and also realize why i’m the chosen for all the difficult tasks because you realize that I will do any task without any mistakes because of your confidence Joker well, These reasons make me strongly reject any simple tasks that anyone can do them as a protection of women thes task is very simple, but I think it’s a mockery of my abilities ..
‏since i began with you I do not guard anyone that I only Carry important tasks This is my personal opinion if the members of organization have another opinion, I certainly will do it (منذ ان كنت طفل تم تجنيدي لكم وليكن ولائي دائما للمنظمة وعندما بدأت في عملي معكم كنت اقوم بكل المهام المطلوبة مني على اكمل وجه ولم اسأل عند سبب اي مهمة ولم اقدم اي اسألة لاني اعرف تماما ان هذا منافي لقوانين المنظمة ولم ارفض يوما اي مهمة من المهام المطلوبة مني لكن اعتدت على تنفيذ المهام المهمة والكبيرة ولم اقوم يوم بمهمة بسيطة كل اعمالي ومهامي التي قمت بها معروفة لديكم واظن ايضا اني معروف للجميع وايضا تدركون لماذا يتم اختياري لكل المهام الصعبة لانكم تدركون اني سأقوم بأي مهمة دون اي اخطاء بسبب ثقتكم بالجوكر جيدا وهذه الاسباب تجعلني ارفض وبشدة اي مهام بسيطة يستطيع اي شخص القيام بها كحماية نساء او بيعهن فهذه مهمة بسيطة جدا بل اظنها انها استهزاء بقدراتي منذ ان بدأت معكم لم اقوم بمهمة حارس لأي شخص انني فقط انفذ المهام المهمة هذا رأيي الشخصي اذا كان للأعظاء المنضمة رأي أخر فأنا حتما سأنفذه)

قعدو هكي بشاورو فيما بينهم وبعد حوالي 5 دقايق اصدرو قرار بأنهم موافقين علي كلامي واني ماانديرش العملية هذي وكمل الاجتماع علي هكي

وطلعنا كلنا مالاجتماع وجيت بنركب في السيارة اللي جيت فيها جاني واحد مالحراس اللي مع الاب الروحي وقالي ان يبيني في سيارته نزلت مالسيارة ومشيتله وركبت امعاه

نا:اهلا

الاب الروحي:كيف حالك

نا:بخير

الاب الروحي:انت متأكد انك بخير

نا:أجل متأكد

الأب الروحي:لا اظن ذلك

نا شفتله:لماذا???

الاب الروحي:لانك لم تعد تفكر بعقلك انت الان تفكر بقلبك ولهذا السبب رفضت مهمة حراسة النساء وبيعهن

نا:لا لم يكن كذلك كل مافي الامر ان تلك المهمة لا تليق بجوكر مثلي

الاب الروحي:انا اعلم بما يدور بعقلك جيدا لكن ماتفكر به لن يفيدك بل سيعود عليك بالضرر

نا:صدقني مايدور بعقلي هو ماقلته بالداخل

الاب الروحي:للمرة الثانية سأقول لك يجب ان يكون كل ولائك لنا ويجب ان تقتل مافي قلبك من احاسيس ومشاعر لكي تستطيع الاستمرار معنا وذلك من اجل الحفاظ على حياتك

نا:وانا هكذا فعلا ولائي لكم فقط

الأب الروحي:اتنمى ذلك تستطيع الذهاب الان

نا:حسنا الى اللقاء ونزلت

الأب الروحي:اظن انك بدأت تنحرف عن طريقنا أيها الحوكر وهذا الشيئ سيجعلك تدفع الكثير

/
/

ركبت في السيارة وطلعت بيا للفندق ونا طول الوقت انفكر في كلام الأب الروحي وكيف ان كاشفني وقدر يعرف اللي في راسي معناها نا هكي في خطر

وصلت عالفندق ونا خلاااص معبي هموم انحس في راسي قاعد اكبر من جسمي من كثر التفكير
ليش ماانعيش زي الناس اتفكر في يومها وبس ليش مفروض عليا انفكر ونحسب الكل خطوة في حياتي
ليش كل يوم مشكلة جديدة وهم جديد ليش حياتي مش ملكي مش قادر نختار او انحدد شيئ نبيه
رد عليا صوت في داخلي
الجوكر:منك منك انت تبي الخير ينتصر عالشر نحن مش في مسلسل هندي او فيلم كرتون دائما في الاخير البطل اللي شايل راية الخير بينتصر عيش الواقع اللي انت فيه نحن في عالم البقاء فيه للأقوى قانون داروه البشر زي قانون الغابة لو تبي اتخلص من كل الهموم والمشاكل امشي بس ورا مصلحتك فكر في نفسك وبس اقتل قلبك الحب حيضيعك والطيبة حتضيعك احمد حيدمرك اللي صار فيك وانت اصغير مش ساهل واحمد يبيك تنساه لا ماتنسش ولازم تاخذ حقك من كل حد اذاك وذنبك في اللي انت فيه هو ذنب الدنيا كلها لازم تاخذ حقك منها وتقعد اقوى منها وقوتك مش حتكون الا اذا كنت مع المنظمة وولائك الها وبس فكر بعقلك وامشي في طريق الجوكر وحتقعد كل هالمنظمة لك

نسمع في الصوتين اللي داخلي وقعدت حاير من انتبع صوت الخير او صوت الشر طريقين مرسومات قدامي ومش عارف اي طريق نمشي فيها
بس للأسف الطريقين نهايتهن مجهولة ?

/
/

عند سمر

وعت علي رنت فونها ومسكاتة بسرعة علي امل ايكون احمد بس اول ماشافت خاب املها لما لقتها هبة وردت

سمر:صباح الخير

هبة;صباح النور وتيتي

سمر:لالا بس تبيلي ربع ساعة ونوتى

هبة:باهي نا اشوي ونوصل فيك وتيلي قهوة لاني مالقيتش في الحوش

سمر:تمام وسكرت

مع دقت باب دارها

سمر:خش

سالم خش:صباح الخير

سمر:صباح النور

سالم:نا بنطلع توا جايني صاحبي بنمشو لعند اجدابيا وهذا مفتاح السيارة عشان تمشي للجامعة

سمر:لا بتجيني هبة تاخذني

سالم:خلاص معناها روحي امعاها علي حوشهم لين نا انروح ناخذك من عندها

سمر:باهي بس مااطولش في الترويحه

سالم:العشية انكون هنا

سمر;تمام

سلام:سلام

سمر:سلام وقعدت اتفكر ليش ماجابش سيرة صاحبه اللي رن عليها معناها ماحكالش يبقى نسكت خير مانحكي واندير مشكلة

سالم:سمر

سمر:نعم

سالم:بنقولك علي حاجة

سمر عرفت ان بيحكيلها عالرقم:شنو

سالم:لو امي رنت عليك مااتقوليلهش ماشي الجدابيا توا معش اتريح وتقعد كل اشوي اترن بتعرف وين وصلت

سمر:اطمن مش حنقوللها شيئ

سالم:تمام وطلع

سمر:غريبة ماحكش شيئ معقولة ايكون حد يكذب ولا يقعد صاحبه وماحكاله شيئ وبعدين نا شن دخلني علي اي حال مالاحوال نا مش راضية توا المفروض انفكر في المهم واللي هو احمد وين ?

/
/

بعد اشوي جتها هبة وقعدت امعاها لين وتت روحها وبعدين طلعن مع بعضهن وبيمشن للجامعة

وهنا في الطريق

هبة;شن قصة السيارة هذي

سمر:اي سيارة

هبة:من طلعتنا من عندك وهي ورانا

سمر لفت وجهها للقزاز الوراني وقعدت اتشوف

سمر:اول مرة انشوفها

هبة:غريبة
وكملن طريقهن وطول الطريق مركزات عالسيارة والسيارة كانت وراهن فعلا ولما وصلن عند الجامعة ونزلن

هو:سمر

هبة:هذا اللي كان ورانا شكله يعرفك

سمر:بس نا مانعرفش فوتيه وخلينا انخشو

هو هلبهن وصبى قدام سمر

هو:معليش بنحكي امعاك اشوي

سمر:وانت من عشان نحكي امعاك

هو:امس قتلك نا صاحب سالم خوك وعاجبتني وبندز هلي يخطبوك وبنعرف رايك قبل مااندزهم

سمر:اكيدة مش موافقة والافضل انك لا عاد اترن ولا تطلع قدامي احسن مانحكي عليك السالم

هو:عادي احكي السالم نا علي كل الاحوال بندز هلي ونخطبك

سمر:حتعب هلك هالفاضي لاني مش موافقة
وخشن هي وهبة للجامعة وسيبنه

/
/

عندي نا رقدت 3 ساعات ووعيت علي اتصال من رسبشن الفندق وقالو ان فيه سيارة ترجى فيا تحت غسلت وطلعت دغري ومن لحظة هذي بدن المهمات بس المهمات هالمرة ماكانن في روسيا كان التفيذ في امريكا وسافرت من روسيا الامريكا

/
/

مرن 4 ايام كان الضغط فيهن مش عادي ماكنتش نرقد ابدا اجتماعات علي تنفيذ مهام علي مواضيع واجد

ناس تستغرب فيهم في كل دولة الهم يد وفي كل دولة عندهم مخططات فيها
مهما كانت هالدولة راقية ومتعلمة هما متحكمين في جزء كبير منها وماشيين بقانون الغابة البقاء فيه للاقوى والقوة دائما عندهم وفي نفس الوقت الدولة بروحها مستفادة منهم
يعني في كل دولة هما تعاملهم مع ناس مهمة فيها والمصالح بينهم مشتركة

/
/

اليوم الخامس في الصبح روحت كان مازال علي فرح تسنيم 9 ايام

وصلت واول حاجة درتها اول ما وصلت للمطار فتحت تليفوني كم الرسائل والمكالمات الفائتة من سمر كان مش طبيعي
قريت كل الرسائل وكلهن كانت كاتبة انها مشغولة عليا وتبي تطمن عليا
ماتحملتش انشوف رقمها وماانكلمهش ضعفت من جديد واللي ضعفني حبها في اللحظة هذي مات الجوكر وانسيت كلامه وانسيت كل اللي صار في السفر انسيت المنظمة والمهمات انسيت الدم واللي قتلتهم انسيت كل شيئ واذكرتها هي بس لان هي الوحيدة اللي لما انشوفها او تخطر في بالي الجوكر يختفي تماما من حياتي ?
انسان زيي عاش كل اللي عاشه من قبل ماعرفش يوم طعم السعادة ماعرفش يوم شن معنى كلمة حب شخص كمل عمره محتار ومش فاهم شيؤ وفي كل شيئ كان مسير مش مخير فجأة لقى السعادة الي فاقدها لقى الحنان اللي عمره ماحسه لقى الحب اللي اول مرة ايذوق طعمته وحب ايعيشه ويعطيه كل قدرته وطاقته حبيتها حبيتها بجنون
مسكت تليفوني ورنيت عليها مرة ومرتين والثالثة ردت

سمر:اكيدة زي كل مرة جاك شغل وسافرت

نا:عارف انها لقطة بايخة بس هكي شغلي

سمر:انت شن تشتغل

نا:في الشركة انتي عارفة

سمر:والشركة اتخليك اتسافر فجأة وحتى مااتكلمنيش مالمكان اللي مسافرله حتى دقيقة اطمني ولا تمشي البلدان متفيهنش اتصالات يعني

نا:لا نمشي البلدان فيهن اتصالات بس نا اللي مانقعدش فاضي عشان انكلم وقتي كله يقعد شغل

سمر:مااقتنعتش وهذا مش عذر

نا:شنو اندير عشان تقتنعي

سمر:ماعندكش ماادير خلاص خليني انسكر

نا:سمر ماتزعليش ونوعدك المرة الجاية لما بنسافر انقولك

سمر سكتت ومعش ردت عليه

نا:قتلك وعد مش واثقة فيا ولا كيف

سمر:المشكلة اني معش فهمت شيئ ولا فهمتك

نا:ماتعودتش منك اتكوني قاسية عليا هكي

سمر:ونا تعبت مالاختفاء المفاجئ وياريته يوم او يومين يوصل الاسبوع ومرات اكثر

نا:امعاك حق بس صدقيني معش ايتكرر

سمر تنهدت:اكيدة

نا:اكيدة ووعدتك اخرى

سمر:باهي تمام

نا:يعني خلاص مش زاعلة

سمر:لا خلاص الجو تمام

نا:معناها بنشوفك

سمر:توا

نا:اها توا شنو المشكلة

سمر:خلاص قاعدة في الجامعة تعال

نا:اشوي وانكون عندك

سمر:نرجى فيك وسكرت

/
/

حسيت اني بناخذلها شيئ ايكون ذكرى مني تكيت علي محل خذيتلها ساعة حلوة ومتأكد انها حتقعد احلى علي يدها ?
ومشيتلها للجامعة واول ما وصلت جتني وشفتها علي قد قوتي وعلي قد قدرة تحملي وعلي قد ان البنات اخر همي بس كنت لما انشوفها نضعف وانحس روحي ملخبط ونبضات قلبي ايزيدن شايف بنات واجد واحلى منها بس هي بالنسبة ليا كانت اميرتهن
اول ماقربت مني ابتسمت ولما وصلت فيا كانت الشمس فوقنا عمودية وعكست علي عيونها العسلية وياويل قلبي واللي صار فيه في اللحظة هذي وقعدت امركز علي عيونها وخلاص الدرجة انسيت الهدية اللي في يدي لين هي سألتني عليها مديتها الها وفتحتها قدامي وعجبتها واجد ونا فرحت اكثر من فرحتها لانها عجبتها
قعدت نا وياها نص ساعة وبعدين خليتها اتخش للمحاضرة اللي عندها ونا طلعت واول ما طلعت رن فوني وكان الراجل اللي اتفقت امعاه علي عم حركات وقالي ان وصل توا الليبيا ويبي حركات عشان يعرف معلومات منه ويبده في شغله قتله يقعد في المطار ونا انجيه ناخذه وسكرت منه وتوجهت للمطار ووصلت للمطار وخذيته من غادي وطلعت بيه عالشقة ونا في الطريق رنيت علي حركات وقتله يسبقني عالشقة

وصلت للشقة القيت حركات قدامي وخشيت نا وهو والراجل للشقة وخذا منه الراجل معلومات علي عمه وفي شن يشتغل واتفق هو وحركات ان ياخذ ربع الفلوس اللي ايردهن له وحركات وافق واتفق امعاه ان من بكرا يبدا مع عمه وبعد اشوي جت للراجل سيارة وطلع فيها وقعدت نا وحركات

حركات:واخيرا بنرد حقي

نا:مافيش حق ايضيع

حركات:لولاك كان حيضيع مش حننسالك الموقف هذا بككل

نا:مااتقولش هكي مش بينا جمايل

حركات ابتسم:نا بنمشي تبي مني حاجة

نا:اها نبي

حركات:عيوني لك ياقلبي ?

نا ضحكت:خاطري اتفرق وتعرف ان الكلام هذا ينقال للبنات بس

حركات يضحك:تي عادي كلها واحد ?

نا:المهم الموضوع اللي بنحكيه لكي لعند توا يعرفوه اثنين وانت حتكون الثالث

حركات:شن هو

نا:واحد مالاثنين مات والثاني قاعد قدامك يعني بعد نحكيلك حيكونو اثنين بس يعرفو نا وانت

حركات:ومش حيطلع من بينا

نا:لاني عارف هك نبي نحكيلك

حركات:احكي

نا:انا وانت ماعمرنش درنا خير ممكن المرة هذي الوحيدة اللي حنديرو فيها خير

حركات شافلي ?

نا:الموضوع ايخص اطفال الميتم وتبنيهم

حركات:بس شنو الموضوع او القصة المهمة في تبني اطفال الميتم

نا:عارف الاوراق اللي جبتهن ليا من حوش صاحبي

حركات:اها

نا:الاوراق هذينا فيهن قوانين جديدة للتبني اولهن ان الطفل المتبني ممنوع منع تام ان ايطلعوه برا البلاد وثاني حاجة ان اللي ايتبنى حد حيقعد فيه لجنة اتجيه كل بعد فترة اتشوف اوضاع الطفل
والقوانين هذينا توقع عليهن من اكثر من مكان ومن اكثر من شخص لكن اللي دارهن توفى قبل ماايكمل اللي بداه

حركات:باهي تمام بس نا لعند توا مافهمتش ليش بيدير هذا كله

نا:فيه ناس ايتبنو فيهم وايجندو فيهم وبعدين ايشغلوهم في اشغال غير مشروعة

حركات;من الناس هذوما

نا:مافيش حد عارفهم بس واضح انها اجندة خارجية

حركات:هذا موضوع كبير

نا:اكبر ماتصور وصاير في اغلب البلدان

حركات:وقولك ليبيا تقدر ادير قانون زي هذا

نا:ليش لا وبالك تقعد ليبيا اول بلاد يصحى ضميرها وادير قانون هكي

حركات:ان شاءلله بس شنو المطلوب

نا:لعند توا مازلت ماعرفت كيف بنبدى بس كل اللي وصللتله ان لازم انكملو اللي بدا فيه الحاج ميلود بس مش بأسامينا

حركات:ليش

نا:الضمان حياتنا

حركات:الموضوع خطير للدرجة هذي

نا:اخطر ماتصور وهذا ليش انقولك يقعد بينا وماحدش يعلمه

حركات:باهي اسم من اللي نستعملوه

نا:مش عارف بس لازم شخص ماايكونلش وجود

حركات سكت اشوي
حركات:يعني شخص ايكون ميت ونحن نستخدمو اسمه

نا:تمام يعني حتى لو دورو عليه حيكون ميت ومعش يعرفو من ورا الموضوع لين ناخذو الموافقات ويطبق القانون

حركات:تمام معناها خلي الموضوع شوري نا حنجيب الشخص هذا

نا:تمام شوف وقولي

حركات:تمام

نا:مانبيش انس او جن يعلم بالموضوع

حركات:اطمن وكون هاني

نا:تمام

حركات:انا بنمشي توا تبي حاجة مني

نا:سلامتك

طلع حركات ونا بعده طلعت ومشيت للشركة

/
/

مرن يومين الوضع كان هادي بكل واموري مع سمر ماشيات تمام
وحركات مازال ايدور علي شخص ناخذو اسمه
والراجل اللي بيرد فلوس حركات بدا في صفقة مع عمه

وبالنسبة ليا خشينا في اسبوع فرح تسنيم وتسنيم كانت مصرة انها تطلع للسوق والكل مكان امعايا وكنت طول الوقت امعاها حتى الشركة معش مشيتلها وبسبب اني طول وقتي مع تسنيم قلن مكالماتي مع سمر

/
/

عند سمر
قاعدة عندها هبة يقرن مع بعضهن الامتحان بكرا

هبة:سمر شن قال عالمحاضرة هذي داخلة او لا

سمر مااتردش

هبة:سمر

سمر مااتردش

هبة بصوت عالي:سمممممرر

سمر:شنو ?

هبة:وين عقلك ليا ساعة اناديلك

سمر تنهدت:ماسمعتكش

هبة:كنك

سمر:كني

هبة:مستوهة ومش مركزة امعايا بكل ولا مركزة في القراية ووجك باين عليه كأنك شايلة اهموم الدنيا فوق راسك قوليلي في شن اتفكري

سمر:أحمد

هبة:كنه

سمر:مش عارف حاسة فيه شيئ غريب مش فاهمته

هبة:شيئ زي شنو

سمر:مش عارفة بزبط لكن فيه اكثر من قصة محيرتني اولها قصة السفريات فجأة وبدون ماايقول او يتصل بيا وهو امسافر وكل سفرية اسبوع او فوق من اسبوع ثاني حاجة علي كثر مانحكي امعاه ولا مرة سمعت صوت اخ او اب او ام او اخت خشو عليه حتى فجأة ديما في نفس الدار نحكو وديما بروحه الدرجة اوقات ونحن نحكو يقعد جايب امعاه عشاء جاهز وياكل فيه في الدار يعني معقولة عايش مع هله وياكل بروحه وفوقها ولا مرة قالي شايل امي للمكان الفلاني او جايب اختي ويحكيلي ان عنده اصحاب ولا مرة سمعت واحد منهم قاعد احذاه خاطي صفحته اللي عالفيس اللي مافيش فيها ولا صديق ولا اي معلومات عليه صفحة فاضية انا الوحيدة اللي فيها واخر شيئ فرح اخته اللي قاعد فيه ومايحكيش امعايا عشانه بس ولا مرة رنيت عليه وسمعت اخته او اي حد امعاه

هبة:ماعمرك سمعتي جنبه اي حد من عيلته

سمر:ابدا ولا مرة

هبة;حي راه يطلع متجوز وهذا سر الغموض في حياته

سمر:لا مستحيل القصة مش قصة زواج

هبة:امالا قصة شنو

سمر:مش عارفة هذا اللي محيرني ومنحرجة نحكي امعاه في الموضوع هذا

هبة:بالك مثلا يعرف وحدة اخرى

سمر:تي 24 ساعة يحكي امعايا امتى بيحكي امعاها وبعدين متأكدة القصة مافيهش بنت اخرى بكل

هبة:تي حيرتيني امالا شنو

سمر:زعمك فيه مشكلة بينه وبين هله وعايش بروحه مثلا

هبة:ممكن بس انتي لازم اتصارحيه وتسأليه لين تفهمي

سمر:انفكر فيها بس منحرجة مش عارفة كيف نبدى الموضوع

هبة:هو صح بايخ بس لازم تسألي عشان تفهمي

سمر:صح غير ايكمل فرح اخته وبعدين حنسأله وانصارحه بكل اللي حكيته لكي

مع رنت تليفون سمر

هبة:هو

سمر:لا هذا الرقم

هبة:قصدك صاحب سالم

سمر:القصة ان ايدز في نفس الكلام بنخطبك ووافقي بس لا اللي سالم حكالي حاجة ولا اللي هو بطل رنين

هبة:شفتيه عالكاشف

سمر:شفته طلعلي مكتوب صاحب السعادة ?

هبة تضحك:بالك يطلع هو صاحب النصيب ?

سمر:بلاش برادة عارفة اللي في القلب من

هبة:عارفة انبصر امعاك بس

سمر:خلينا انكملو قرايتنا خير

هبة:صدقتي هي معش مازاللنا واجد
وقعدن يقرن

/
/

مرن الأيام نفس الوضع مستمر مكالماتي مع سمر قالات بسبب انشغالي مع تسنيم
لعند جا يوم فرح تسنيم وعبد المهيمن
للامانة جابر دار التسنيم فرح سمح بكل ومااستخسر فيها شيئ فرح كان حلو ومميز وكل اللي طلباته داره الها
شلتها نا للكوافير زي ماكانت تبي وطلبت مني نا اللي انجيبها وانخششها للقاعة كان طلبها هذا بالنسبة ليا طلب غالي بكل وايدل قديش تسنيم اتحبني وكيف انها معتبرتني اخ حقيقي الها?

/
/

حطيت تسنيم في الكوافير ومشيت العبد المهيمن اللي كان يلبس في شقة معز وجايين اصحابه اللي امعاه في العمل واصحاب معز ودايريله الشباب جو سمح بكل
وهو كان فرحان والفرحة تقدر اتشوفها في عيونه اللي لمعتهن واضحه الدرجة تمنيت لو مكانه وحاس فرحته
قعدت امعاه لين حلق ولبس وبعدها رنت عليا تسنيم كملت مشيتلها للكوافير وخذيتها منه وخششتها نا للقاعة احساسي كان مش عادي ونا ماسكها من يدها ومخششها هذي اختي اللي عطتها ليا الدنيا البنوته الطيبة البريئة اللي زفيتها عروس
تسنين ماسكة في يدي وخاش بيها للقاعة وحاس برعشة يدها بين ايدي وصلتها لعند كرسيها وطلعت دغري
ومشيت شور عبد المهيمن وقعدت امعاه لعند جت لحظة بيمشي للقاعة ياخذ تسنيم
ودرناله زفة سمحة وكبيرة واصحابه الضباط مش مقصرين طلق رصاص وغنى وجو مش عادي
لين وصلنا للقاعة وخش جوا وبعد اشوي طلع وامعاه تسنيم ووصلو عند سيارة عبد المهيمن ونا كنت امصبي جنبها واول ما وصلو سلمت عليهم

نا:ردبالك منها راه اتزعلها انزعلك

عبد المهيمن:مااتخفش عليها هي في عيوني

نا:تسنيم عبد المهيمن مافيش زيه مااتزعليش

تسنيم تبكي:حاظر

ماتحملتش ابكاها حظنتها وقعدت انهدي فيها لين سكتت وبعدين بستها علي جبينها وركبت في السيارة مع عبد المهيمن وطلعو
وحسيت براحة لاني حطيتها في يد راجل متأكد ان حيخاف عليها وايصونها ❤

/
/

وصلو للفندق اللي حاجزين فيه ونزلو وخشو الدارهم واول ماخشو

عبد المهيمن:الف مبروك عليا انتي يااحلى ملاك في الدنيا

تسنيم:والف مبروك عليا انت يااحسن راجل في الدنيا

عبد المهيمن:انحبك وحبيتك من اول نظرة وطلبت من ربي تقعدي حلالي وكنت متأكد ان ربي مستحيل ايردني

تسنيم:انا عكسك بعد اللي صار ايست اني ناخذك وقلت القصة انتهت قبل ماتبدى

عبد المهيمن:حبينا بعضنا من اول لحظة وربي عرف اللي في قلوبنا قربنا من بعضنا

تسنيم:الحمدلله

عبد المهيمن:الحمدلله دائما وابدا

وقعدو هكي يحكو وبعدين صبو غيرو دبشهم وتوضو وصلو وقعدو ايهدرزو بكل حب ورومانسية لعند ماقعدو احلى زوجين مع بعضهم?

/
/

عندي نا بعد كمل الفرح روحت للشقة وكنت امرايف علي سمر وااااجد ليا كم يوم مانحكيش امعاها كويس
اول شيئ درته اول ما وصلت رنيت عليها وطلبت منها انكلمها فيديو عشان امرايف عليها وحتى هي شكلها كانت مرايفة عليا لانها وافقت دغري
فتحت اللاب ورنيت عليها وقعدنا نحكو وانهدرزو علي كل شيئ صار امعانا الايام اللي فاتن
ونحن انهدرزو ومنسجمين رن تليفوني وكانت مكالمة بلا رقم وعرفتهم هما قعدت انبحت في التليفون وسمر اتبحت فيا وترجى فيا انرد ونا معش عرفت كيف اندير

سمر:من اللي ايرن عليك

نا:اتصال مالشغل

سمر:باهي رد

نا معش عرفت انسكر عليها او انرد وهي امعايا
لو سكرت كنت متأكد انها حتفهم غلط ومانقدرش ماانردش عليهم قعد مافيش حل قدامي الا اني انرد وهي امعايا ورديت

نا:اهلا

هو:يوجد ضابط نريد منك تصفيته

نا:متى سيكون التنفيذ

هو:بعد نصف ساعة من الأن

نا:حسنا لكن اين مكان التنفيذ

هو:في ال —–

نا:حسنا وسكرت

سمر:من هذا وليش تحكي امعاه بالانجلش

نا:هذا امعاي في الشغل وتوا لازم انسكر لان عندي شغل مهم

سمر:شغل شنو اللي توا

نا:شغل في الشركة

سمر بعصبية:اي شركة في الوقت هذا واي شغل ايخليك تطلع الساعة 4 في الفجر ماتضحكش عليا

نا:بعد انروح نحكيلك

سمربعصبية:لالا احكيلي توا انت ليش هكي وليش تصرفاتك غريبة وليش قاعد في مكان بروحك وين هلك ليش ماوانا نحكي امعاك ماعمرش حد خش عليك من هلك ليش ماعمريش سمعت حد امعاك وليش تختفي فجأة واترد فجأة توا لازم اتقولي انت من وشن قصتك

نا:—

#يتبع

وااااااو لحظة احمد لا يحسد عليها قولكن كيف حيصرف مع سمر هل حيقدر اينفذ روحه مالموضوع او لا وشنو اللي ممكن يحكيه الها?

وقولكن من الضابط اللي يبوه يقتله وهل احمد حينفذ او لا ?

واهو طمنتكم علي عبد المهيمن وتسنيم بس قولكن حدوم هالسعادة ?

وزعمك الفكرة اللي دارها احمد وحركات علي مساعدة اطفال الايتام حتمشي عالمنظمة او لا ?

كله حنعرفوه في الحلقة الجاية ☺

أسفة لو فيه لخبطة في الأسماء وأكيد رأيكن ايهمني?

گـتـابـتـي Koka Saleh