الجوكر | للكاتبة Koka Saleh
الـحـلـقـة ( 5)
(حقيقية ممزوجة بالخيال)
گـتـابـتـي #Koka_Saleh
::::::::::::::::::::::::::
لايك قبل القراية وتعليق بعد القراية والكلام للكل فكوني مالقراية بدون تفاعل راه والله التفاعل بالايكات والتعليقات هو أكثر شيئ ايحفزني للكتابة وبذات التعليقات الطويلة انحبهن?
وللعلم بس نا نقرا في كل التعليقات ??
“”””””””””””””””””””””””””
قبل مانبدو بنقوللكن اليوم تصميم الصورة مني وهذي أول مرة انصمم صورة الحلقة بروحي عطني رأيكن فيها??
“”””””””””””””””””””””””””
الوضع كان عادي وكنت ديما امسافر ومش واجد نقعد في ليبيا لعند يوم اللي روحت من إيطاليا كنت تاعب مالسفر وباطل وهالك لان غادي كان النوم اشوية واغلبه الوقت كان شغل اجتماعات في الصبح وفي الليل مهمات للمنظمة
جيت هالك وماصدقت وصلت للسرير وبنرقد
سمعت صوت حاجة خبطت وبعدها خطوات عالدروج صبيت بنشوف شن فيه مسكت مسدسي وطلعت بنشوف من نزلت مالدروج بشويش ماكان فيه شيئ لاحظت ضل كرعين حد قدام الفيلا طلعت بنشوفه من فطنت الحد لف وماشي شور الباب الخلفي للفيلا لفيت مالجيهة الثانية عشان نعرف من كانت الدنيا ضلام وماكنت قادر انحدد وكنت منطمر لين يوصل فيا ونمسكه وفعلا اول ما وصل طلعت عليه وحطيت المسدس علي راسه والصدمة ليا انها كانت تسنيم اللي طالعة
نا بصدمة:وين طالعة في هالليل
تسنيم :ااااا
نا :شنو اااا هذي احكي وين طالعة توا
تسنيم:انت مادخلكش بيا
نا بعصبية:لا دخلني بيك وتوا بتقولي وين بتمشي
وبحتت فيها وكان في يدها شنطة
نا زدت عصبت:وليش طالعة بشنطة تبي تهربي صح
تسنيم ارتبكت:انا مانبيش نهرب وبعدين انت لانك بابا ولانك خويا عشان تدخل فيا
نا بعصبية:صح لكن نقدر توا انوعيهم وهما ايتفاهمو امعاك وجيت بنسيبها
تسنيم مسكت في يدي وقعدت تبكي:ارجوك ارجوك ماتحكيلهم شيئ حيقتلوني ?
نا ماكنتش بنتأثر بدموعها ولفيت وكنت مقرر انوعي جابر وراشد عشان ايشوفوها
تسنيم:انا بندير هكي غصبن عني والله لو قعدت لعند بكرا راشد حيقتلني
مش عارف وقتها الشخصيات تخلطن عندي من جهة الجوكر يبيني انسيبها وانكلم باتها وراشد ايشوفها ومنها نضرب عصفورين في حجر واحد نكسب الثقة اكثر واني ماسمحتش انها تطلع والثانية اني انواطي روسهم لاني كنت متأكد انها دايرة كارثة
بس شخصية احمد ماكان يبيني اندير هكي وبذات الطفل احمد اللي كان في داخلي كان ايقولي ماتنسش برائتها وكيف كانت اتعامل فيك واذكر اخر لحظة امعاها يوم طلعتك وكيف تمنت انك تقعد خوها
وفي صراع كان داخل عقلي والشخصيتين اللي داخلي وعيوني كانن عليها وهي تبكي واتوسل ليا عشان ماانكلمش حد
في اللحظة هذي شخصية احمد انتصرت عالجوكر ?
نا:تمام مش حنوعيهم بس تحكيلي عليش بتهربي
تسنيم تبكي:نحكيلك بس اوعدني ماتحكيش شيئ لا البابا ولا الراشد
نا:تمام نوعدك بس هي انخشو عشان تحكيلي كل حاجة
تسنيم:باهي خذيت منها الشنطة ومسكتها من يدها وخشينا مالباب الخلفي للفيلا ورقيت بيها فوق وكانت اقرب دار هي داري خششتها فيها وسكرت الباب وتباوعت من عند الروشن عشان انتأكد مافيش حد وسكرته كويس
نا:هي توا احكي
تسنيم تبكي:اوعدني اخرى انك ماتحكي الحد
نا تنهدت:مش قصة هي قتلك وعد ولازم تعرفي ان عمري ماوعدت وخالفت
تسنيم كانت حاطة ايديها في بعضهن واتحرك فيهن مالتوتر
نا:هي أحكي
تسنيم: من انا واصغيرة فاقدة للحب والاهتمام بابا وماما ديما مش فاضيين وديما عندهم شغل حمزة ديما لاهي في قرايته وحتى دوته اشوية ومايختطلش بينا واجد أما راشد انسان حقير وماايهمش الا نفسه ومايعرفش شيئ الا الضرب وبس الشخص الوحيد اللي كان يسمعلي هو انت بعد جيت هنا وهذا ليش كنت انقولك ياريتك خويا بس من حظي ماطولتش امعانا وعديت وخليتني هنا حاسة بوحدة غريبة كبرت عالشيئ هذا ووصلت في سن المراهقة وزيي زيي اي بنت كان المفروض عندي حد يسمعني او ام تنصحني او حتى تعرف شن ايصير امعايا بس ماما كانت ديما مش فاضية اما بابا ماانشوفش فيه الا في الشهر مرة فبنت في وضعي فاقدة للحب والحنان والاهتمام كان لازم اندورهن في مكان ثاني ومن هنا خشيت في العلاقات وقعدت كل فترة انكلم شاب وكل مرة حب شكل كان المهم نسمع كلام حب وانحس اني انهم شخص واستمريت علي هكي كان الوضع عادي ومكالمات ورسائل زي اي بنت وهذا ليش كنت طول وقتي في داري وماانتعاملش امعاهم بكل لان لما انخش الداري انحس روحي في عالمي الخاص كم شاب نحكي امعاهم وكلهم ايحبوني ويهتمو بيا وبكل شيئ خاصني القيت ناس تسمعني وتفهم شن نبي وتعرف مواهبي وشنو مستواية في قرايتي اللي هلي مش عارفينه وقعدت هكي لين تعرفت علي شاب كان محترم وخلوق وايحبني واجد ومهتم بيا بكل وبكل شيئ ايخصني ونا حبيته بككل لان حبني واهتم بيا اعتبرته كل حاجة في حياتي واي شيئ يطلبه مني كنت اندير فيه له دزيتله صوري وفيديوهات ليا وكنت كل يوم مكالمات فيديو امعاه للصبح وماكنتش عارفة ان كل شيئ محتفظ بيه ومخزنة وتوا قعد ايهدد فيا بيه وياانجيه للحوش وايدير اللي يبيه فيا وفوقه انجيبله فلوس من بابا يا ينشر كل حاجة عنده وايدزهن الباب وراشد ??
نا:بلا بكى وتوا قوليلي شن نوع الصور والفيديوهات اللي عنده
تسنيم تبكي:كل شيئ لان كان يطلب مني صور وفيديوهات معينة وكان ايقولي ان نا مراته وان بيجوزني بس ايكمل قرايته ونا كنت واثقة فيه ومصدقته ولاني كنت محرمة مالحب والقيته امعاه درتله كل شيئ يبيه?
نا:شن اسمه العيل هذا
تسنيم تبكي:ارجوك ارجوك مااتكبرش القصة واتوصلها البابا وراشد وتوا بعد عرفت كل حاجة خليني نطلع لان بكرا بيدزلهم كل حاجة عنده لو ماجيتش اليوم وجبتله امعايا الفلوس
نا:وانتي واخذتله فلوس
تسنيم:خذيت ذهبي وخذيت ذهب ماما والقيت فلوس في درج بابا وفي دار راشد بناخذهن له
نا بعصبية:من جدك درتي هكي كنتي جيتي وحكيتيلي ونا حليتلك كل حاجة
تسنيم تبكي:مانبيش انعلق حد امعاه هذا واحد حقير انت ماتعرفش
نا في عقلي:ونا احقر منه انتي اللي ماتعرفينيش
نا:تسنيم عطيني اسمه وانا حنحل كل شيئ وانجيبلك كل صورك وفيديوهاتك اللي عنده ومن غير ما جابر وراشد ايحسو بشيئ
تسنيم شافتلي بنظرة عدم الثقة في كلامي والخوف مني
نا قربت منها:اوثقي فيا وقوليلي اسمه ولو ماقدرتش انحلك الموضوع نا حنهربك من هنا
تسنيم تبكي:اسمه هيثم مسعود ال——
نا:تمام ردي الدارك وردي اللي خذيتيه من هلك قبل مايفطنلك حد
تسنيم تمسح في ادموعها:وانت شن تبي ادير
نا:مش تبي صورك ومقاطعك ايردلك وان معش ايقرب منك ولا ايهددك
تسنيم:اها
نا:يبقى خلاص اطمني واللي تبيه حنديره لكي كله
تسنيم ماكان عندها اي حل الا انها اتسلملي امرها وتوثق فيا
تسنيم:تمام وصبت بتطلع
نا:ردي كل حاجة خذيتيها قبل مايفطنولك
تسنيم:باهي وصبت خذت شنطتها وطلعت ونا صبيت وطلعت وراها لين اطمنت ان ماحد شافنا وانها خشت الدارها وماحد شافها
خشيت للدار ونا انفكر ليش درت هكي وليش قررت انساعدها وكيف قدر احمد ايفوز عالجوكر اللي في داخلي وكيف وجعتني وتعاطفت امعاها ونا كل مشاعر العطف والحب كلهن دفنتهن قبل ماانرد الليبيا
قعدت الليل كله واعي رغم تعبي مالسفر وتعبي في الشغل في إيطاليا إلا ان ماجانيش نوم من كثر التفكير وخفت من الطيبة اللي في احمد من هو اصغير اتودرني لان شخصية الجوكر اللي عندي تطلب مني انكون مجرد من كل الطيبة والاحاسيس واني لازم ايكون قلبي ميت عشان نقدر انعيش في زمن زي اللي نا عايش فيه توا تحكمه بس القوة لازم انكون قوي عشان نقعد القاتل و
مش المقتول لان الضعيف في وقت توا ياكلوه وهو حي
فيه كتاب كنت انحبه وديما نقرا فيه فيه نص ماانسيتش ومن كثر ماعاودته مرات واجد حفظته لان كان شبه ان يحكي عليا كان مكتوب فيه ?
كن قوياً لأجلك
…
كن قوياً؛ لأجلك فحين ينطفىء نور الأمل في روحك، وتعيش أكثر الأيام ظلاماً لن يشعر بك حتى أكثر الناس قرباً لك.. لن ينتشلك أحد، إلا نفسك..!
لا أحد يعرف اللحظات الصغيره التي ماتت فيها روحك ولا أحد يعرف متى عادت أو كيف عادت ولا أحد يعرف لماذا تبتسم وأنت وحدك
كن قوياً لأجلك انت، واجهة مصاعب الحياه بمفردك، كن كما تحب دائمًا، كن صعب الانكسار، رائع، مختلف، لاتثق باحد ،إسعى لتتطوير ذاتك إسعى دائمًا نحو الايجابيه
لا أحد يعلم ما أصابك أو كيف هي معركتك مع الحياة
كم حاربت وكم خذِلت ،كم من المرارة و السعاده قد ذقت ما الذي زعزع أمانك من قتلَ عفويتك كم كافحت وكم خسرت ، لا أحد يعلم حقًا من أنت فخفف عن نفسك ولا تحمّلها فوق طاقتها وحاول أن تسعدها فأنت أولى بها
انتبه لنفسك جيدا الى الحد الذي لا يسمح بكسرك ..
انتبه لمزاجك، لفكرك، والى هدؤك ..
لا تسمح لضجيج من حولك أن يفتت ثباتك ..
ولا لخيبه أن تعيق صلابتك ..
كن واثقا من نفسك وتقدم ..
لأجلك ولأجل نفسك كن قويا ..
فلا مكان في هذا العالم للضعفاء
قعدت طول الليل واعي وكل مرة في راسي فكرة وكلام تسنيم كان في بالي طاعت ان مش نا بس فاقد للحنان والاهتمام لان ماعندي هل عرفت ان فيه غيري امثال تسنيم رغم انها عايشة وسط هلها الا انها فاقدتهم
معقولة شعور النقص في الحب والحنان ايخليك اتودر روحك هكي زعمك كم بنت زي تسنيم وكم شخص غيري فاقد للشعور هذا
طلع شعورها اصعب من شعوري اقل شيئ نا ماعنديش هل وراضي بالشيئ هذا وتعودت عليه لكن هي فاقدة للحاجات هذينا وهي وسط هلها
أنانية جابر وحقارةسناء ضيعت طفولتي مني بس برضو ضيعة بنتهم اللي دارو هذا كله عشان يحموها ويحمو خوتها
الاهل اللي زي جابر وسناء انك تقعد بلاهم افضل بألف مرة انك تقعد ولدهم
الامومة والابوة مش بتوفير الفلوس واللبس والمستوى الراقي للمعيشة هي بتوفير الحب والعطف والحنان
حاجات ماكنتش عارفهن بس عرفتهن من قصة تسنيم اللي أكيدة فيه واجد زيها ?
قعدت انفكر لعند لما طلع الصبح صبيت دوشت ولبست ونزلت وطلعت للسيارة ركبت وطلعت مالفيلا واول شيئ درته مسكت التليفون وبنرن عالصيني وهذا كان واحد من ارجالي اللي نا جبتهم وخليتهم امعايا كانو ثلاثة وكانو ديما امعايا وماكنتش نوثق فيهم لاني تعودت مانوثقش في حد لكن كانو مطيعين واللي نطلبه منهم ايديرو فيه ليا مهما كان وطبعا كل شيئ بثمنه
كان الصيني وهذا لقبه لان شبه الصينيين لكن هو اسمه إبراهيم
والثاني اسمه محمود حركات واسمه هكي لان امتاع طروح بكل وجو سمح?
والثالث العيساوي وهذا اسمه ومش لقب وكان شخص جدي وحازم وهذا اللي يعجبني فيه
رنيت عالصيني ورد
نا:بنقولك علي اسم واحد ادوروه ليا
الصيني:تم ياجوكر عطيني الاسم وما عليك
نا:اسمه هيثم مسعود ال–
الصيني:ساعة وحدة وانجيبوه لكي
نا:لما تلقوه خوذوه علي مزرعة جابر
الصيني:تم وسكر
ونا اتجهت شور الشركة لان كنت في ايطاليا وليا أيام عليها واكيدة في شغل يرجى فيا غادي ونا في الطريق درس قدامي واحد فجأة وخبطت فيه ورقتلي بكل ونزلت عليه وهو نزلي وكان شاب في عمري ولابس لبسة شرطي
هو:معليش اسمحيلي ياخويا والله السيارة ماعرفتش كنها فجأة وقفت
نا رغم اني كنت معصب بس بعد تأسف سكتت
نا:عادي اتصير
هو:اسمحلي والله وقفت فجأة وسيارتك خبطت شوفها وتصليحتها علي احسابي
نا:لا لا تمام ماصارلها شيئ بسيطة وديما اتصير
هو:بارك الله فيك خيي
نا:فيك تبارك الله ولفيت بنرد السيارتي
هو:خويا معليش سؤال
نا بحتت فيه;تفضل
هو ضحك:سؤال بايخ وماتزعلش مني بس فضول لاني مشبه عليك
نا:شنو
هو:انت كنت في ميتم ال—
نا بحتت فيه زين:عبد المهيمن صح
هو ضحك وقرب مني:وانت احمد
نا ضحكت:أها
حظني حظن الاخ رغم اني ماعمري عرفته بس توا حسيته
عبد المهيمن بعد مني وكانن الدموع في عيونه والسيارات قعدن ايبيبن يبنه انحولو
عبد المهيمن:خلينا انحولو سياراتنا وانكملو كلامنا والله مرايف عليك
نا:حتي نا والله
ركبت في سيارتي وهو ركب في سيارته وهو درس سيارته عاليمين وسكرها وجا ركب امعايا
عبد المهيمن:سبحان الله عالصدف من قال انتلاقو هكي
نا:انت بس كيف عرفتني
عبد المهيمن:من غير اني شبهت اشوي علي ملامحك بس حسيت كأني نعرفك من زمان وينك ووين ايامك وشن صار فيك ومن خذاك
نا:تبناني راجل اسمه جابر وحطني علي اسمه وسفرني قريت اقرايتي كلها برا وليا سنة بس مروح وانت شن صار فيك
عبدالمهيمن:نا تبناني راجل ومراته اكبار في العمر والحق كانو كويسين وعلموني وقروني وزي مااتشوف توا طلعت شرطي ?
نا ضحكت ضحكة من وسط قلبي لان خطر عليا كلامه وهو اصغير وكيف ادوارنا انعكسن ونا اللي قعدت المجرم وهو الشرطي
عبدالمهيمن:كنك تضحك شن خطر عليك
نا;اذكرت لما كنت تبي تطلع مجرم واتبيع اسلاح
عبد المهيمن يضحك:عليك أيام تعرف لما انت مشيت مالميتم قعدت يومين ونا غير نبكي ولا ناكل ولا نشرب نبيك
نا ضحكت:لا ياراجل
عبد المهين:والله نحكيلك جد ومعز حتى هو قعد يبكي لكن ماسيبش الوكال ?
نا ضحكت:ديما همه في بطنه?
عبد المهيمن يضحك:ومن كثر ماهمه في بطنه توا دار مطعم بروحه ?
نا ضحكت:وكيف داره ولا تبناه صاحب مطعم
عبدالمهيمن:لا معز ماتبنش حد وقعد في الميتم لعند لما قعد عمره 18 سنة وبعدها طلع مالميتم وماقدرش ايكمل قرايته اشتغل عند راجل في مطعم ولان كان شاطر وحب موضوع التجارة وهكي من سنة دار مطعم بروحه وعنده شقة وخاطب اخرى
نا:يعني احسن واحد فينا لعند توا معز
عبد المهيمن:وانت شن صار فيك وشن قريت ولا شن اشتغلت
نا:قولك شنو
عبد المهيمن:بذكائك وشطارتك اللي زمان اكيدة قعدت دكتور او عالم ?
نا ضحكت:لا والله بس قريت في روسيا الاعدادي والثانوي وقريت في امريكا الجامعة قسم هندسة كمبيوتر وتوا نشتغل في شركة عمي جابر مدير القسم صيانة الالكترونيات وعايش امعاهم في الفيلا
نا :مشاءلله علي هكي انت احسن واحد فينا ووضعك مشاءلله متريح وكل حياتك برا لا تعب لا شيئ وجو سمح وناس راقية ومثقفة
نا ضحكت:اها بكككل كل شيئ زي ما اي انسان ايتمناه
عبدالمهيمن:ربي ايزيدك عز وراحة وشن رايك توا بعد هالصدفة السمحة نمشو المعز في المطعم وانفاجئوه
نا:عادي مافيش مشكلة مرايف عليه بو بطن هذا ?
عبد المهيمن يضحك:والله حتى هو وفي كل مرة انتلاقو لازم انجيبو سيرتك وحاولنا اندوروك واجد بس ماعرفنا اسم الراجل اللي تبناك
نا:اهي الصدفة جمعتنا
عبد المهيمن:الحمدلله هذا فضل من ربي
طلعت بالسيارة ووصفلي عبد المهيمن المطعم وجيناه ودرسنا ونزلنا علي معز
معز لما شاف عبد المهيمن خش للمطعم جاه
معز:اهلا اهلا بأفندي عبد المهيمن وينك ليا زمان عليك
عبد المهيمن:ماغباك شغل والدنيا تلاهي بس شوف جايبلك امعايا مفاجئة
معز:شنو
عبد المهيمن:كذا كان شاطر قولي هذا من
معز ضحك:الشطارة ايجيبها ربي
نا ضحكت:من يومك مااتحبش القراية
معز بفرحة:أحمد وسلم عليا وحظني وبعد سلام وترحيب واجد من معز قمعزنا علي طاولة في المطعم وقعدنا انهدرزو
معز:من كان ايقول ان بعد تفرقنا انردو نجتمعو اخرى
عبد المهيمن:هذا كله مقدر ومكتوب من عند الله
معز:ونعمة بالله قولي شن صار فيك ووين كنت كل هالفترة دورناك واجد وماعرفنش كيف نلقوك
نا قعدت نحكيله في نفس الكلام اللي حكيته العبد المهيمن
معز:مشاءلله الدنيا زهيتلك وقريت برا وجوك سمح
نا ضحكت:اها ?
وقعدنا هكي انهدرزو علي ايام الميتم وحكينا علي حياتنا توا وموضوع ايجيب موضوع لعند
عبد المهيمن:ماتصدقوش ياشباب كيف الزمان قعد ايخوف والله انشوف في قصص وجرائم في المركز حاجات ايشيبن الراس
معز:زي شنو
عبد المهيمن:اب يقتل ولده وام تقتل بنتها وراجل يغتصب اخته ووحدة دارت علاقة مع عمها وحملت منه خاطي جرائم القتل اللي بطريقة بشعة والاغلبية ايتأيدن ضد مجهول طبعا هذينا بإستثناء الجرائم اللي ينحلن بالعرف وميعاد قبايل
معز:معقولة اتقول قاعدين في شيكاغو
عبد المهيمن:واكثر انا لين ننصدم ياراجل انقول الناس قلوبها ماتت ولا معش فيه رحمة وخوف من ربي
نا:وقت توا معش تستغربو شيئ كل شيئ حطوه في الحسبان
معز:المجرمين كاثرين والدنيا كلها في يدها سلاح البلاد ضاعت خلاص
نا سكتت وفي عقلي واحد مالمجرمين قاعد امعاك ?
عبد المهيمن:البلاد ماضاعتش ودبين فيها ارجال شريفين مش حتضيع وارواحنا كلنا فداها
نا :على فكرة الموضوع اكبر من هكي بواجد اللي صار واللي قاعد ايصير وراه ناس وبلدنان كبيرة وكل شيئ مخططله
عبد المهيمن:بس مش اكبر من ربي قادر بقدرته ان ايحلها
معز:ان شاءلله والله تعبنا
عبد المهيمن;كله كوم والناس اللي اتأجر في الارواح مش سادنا الهم اللي نحن فيه والسلاح المنشتر فيه عصابات ايجبن في سلاح من برا وايبوعو فيه عساس البلاد ناقصها هم
نا:وكنكم ماتمسكوهم
عبد المهيمن:هو نحن قدرنا نمسكوهم ومامسكنهمش كل مرة واحد جديد مستلم واخر واحد قالو اسمه الجوكر هذا تعبنا تتعيبه مش عارف كيف ايدير وكيف ايخشش في السلاح اتقول امعاه جنون ياراجل
معز:الجوكر اسمه غريب من قاللكم علي اسمه
عبد المهيمن:واحد مسكناه من فترة وبعد تعذيب واجد هذا حد اللي حكاه وقال ان مايعرفش شكله وان يلبس في قناع الجوكر
معز:بالله كان مسكتوه لازم تسألوه ليش اختار اسم الجوكر ?
عبد المهيمن:عليش مختاره اكيدة واحد صايع وحصل فلوس وايدير في جو رعب واكشن شكله متأثر ب mbc اكشن اصلا واجد الصياع هذوما هما اللي توا عاشو لقو اسلاح وناس تدفعلهم مستعد يقتل حتى خوه عشان الف اجنيه
معز:والله صدقت وانت يااحمد شارك في الموضوع
نا ضحكت:الحق مستغرب هالقصص لاني حسيت البلاد وضعها عادي لكن مع راي عبد المهيمن اكيدة واحد فاشل وحصل فلوس وايدير في جو تخويف وحركات ومش فاهم حتي شنو الجوكر هذا
معز:اكيدة هكي
وقعدنا انهدرزو وبعدها نا صبيت
نا:نستأذن منكم تأخرت عالشركة واجد وان شاءلله حنقعدو انتلاقو ديما
عبد المهيمن:ارجي خوذني امعاك حتي نا عندي شغل وتأخرت
معز:تي باهي قبل مااتعدي عطينا رقمك
نا ضحكت;باهي اللي ذكرتني قبل انسيت هذا رقمي 092—-
معز:توا انرن عليك وخزن رقمي
عبد المهين:حتى نا انرن عليك وخزن رقمي ورنو عليا الشباب بارقامهم وبعدها سلمنا علي معز وطلعت نا وعبد المهيمن وحطيته عند سيارته وطلعت شور الشركة
وقعدت كل الطريق انفكر في الصدفة اللي جمعتني بيهم من جديد وشن الغرض منها بالنسبة ليا والانسان زيي وعاش اللي عشته مستحيل يامن بشيئ اسمه صدفة لان بقناعتي كل شيئ مدبر ماعنديش حاجة اسمها صدفة في قاموسي
ومن خلال اتهدريزنا والمفروض كنت نفرح اني كيف قادر انلخبط الشرطة بشخصية الجوكر وكيف مدوخهم وكيف امبعدين كل البعد ان ممكن اتكون حقيقة الجوكر ان حد مسنود وحد مدرب ومتخصص في الشيئ هذا زيي وان يحسابوه حد صايع وفاشل وحصل فلوس
بس اللي حسيته في كلام عبد المهيمن واللي لاحظته في عيونه كمية حب البلاده مش عادية وكمية وطنية كبيرة ومش عارف ليش هالحب رغم ان كان عايش في ميتم يعني شن قدمتله ليبيا عشان ايحبها هكي
بصراحة نا كنت عكسه مش حاس بأي حب تجاهها لاني نا حاط عليها لوم كبير عشان هي الها دور كبير في اللي نا فيه توا ماقدرتش تحميني مالبداية
قاطع تفكيري صوت تليفوني ولما شفته القيته محمود حركات
نا :ايوا حركات
حركات:جبتلك المطلوب وقاعد في مزرعة جابر
نا:باهي وين الصيني
حركات:طلع ماينفعش ورديته للمحل ??
نا:حركات مش جو ثقالتك عالصبح وينه مش هو كلمته وقتله جيبه
حركات:تي ماهو نا اللي جبته وهو ماعرفش مكانه ونا بحركاتي وتكاتي عرفته فقتله انكلمك نا عشان نا اللي جبته يعني الفلوس حينعطلي?
نا:ماغلطش اللي سماك حركات
حركات:نعجبك وانت غير ابكي بس ونحن مساحين ادموعك ?
نا:انقنك فاضي المهم نا اشوي وجاي غادي ديروله الازم علي ماجيت
حركات:تم وسكر
غيرت طريقي وتوجهة شور المزرعة وجيت غادي كانو الشباب دايرين اللازم الهيثم ومش مقصرين لبست قناع الجوكر وخشيت عليه لاني ماكنت نبيه يعرف شخصيتي ونا من
القيته مربط ومضروب طريحة سمحة وبديت نسأل فيه
نا:تعرفني ولا سامع بيا من قبل
هيثم وهو ميت مالخوف وهالك مالضرب:لااااا
نا:نا الجوكر ماتعرفنيش صح
هيثم:لااااا
نا عطيته بوني علي قوتي كلها:هذا حيخليك ماتنسانيش في حياتك كلها
هيثم طاح عالوطى وجيت وحطيت كراعي علي وجه وقعدت انزر فيها وهو ايعيط اشرت للي امعاي يطلعو وطلعو وخلوني امعاه بروحي
نا:صور ومقاطع تسنيم وينهم
هيثم:مانعرفش وحدة بالأسم هذا
نا:توا انخليك تعرفها وقعد نضرب فيه بكرعيا علي وجه وبطنه
هيثم وودنيته دم:قاعدات تليفوني
نا زدت ضربته:ووين اخرى
هيثم:وفي الشقة اللي خذوني منها كل شيئ قاعد عاللاب توب اللي غادي
نا:ياويلك تطلع تكذب
ناديت علي العيساوي وخليته ايرد الشقة هيثم وايجيب اللاب توب وايدور لو لقى اي تليفون غادي او فلاش او مموري ايجيبه امعاه
سيبته في الدار سايح في دمه وطلعت قعدت برا لين جا العيساوي وحركات جايبين اللاب توب وتليفون ومموريين لاقينهن غادي
خذيتهن منهم وخشيت للمزرعة جوا قعدت انفتش القيت صور ومقاطع تسنيم وللأسف ماكانن صورها بروحها القيت صور ومقاطع البنات اخرى والتليفون كله صور بنات والمومريات نفس الشيئ الواضح انها كانت هذي شغلته عصبني الموضوع واجد رغم ان عمره ماكان عندي اخت او عرض بس تسنيم لما شفت صورها حسيته انها فعلا اختي وكان خاطري انخش نقتله عاللي ايدير فيه في بنات الناس بس حسيت ان القتل مريح للي زيه فقررت اني انعاقبه وانعرفه كيف ايكون اللعب باعراض الناس وبالبنات الضعاف
خذيت كل اللي جابوهن ليا وخليتهم ايولعو نار وحطيتهن فيها كلها وقعدت جنبهن لين ضمنت انهن ذابن مالنار وحسيت بشعور سمح اني نقذت اكثر من بنت باللي درته بس غلي علي هيثم مازال مابرد ورديت خشيت عليه ومسكته من شعره
نا بعصبية:داير روحك راجل وتلعب بالبنات باهي صبي وخليك راجل وواجهني نا ترا وفكيته وصبيته
هيثم رغم اللي هو فيه حاول يهجم عليا بس ماقدرش عليا وعطيته طريحة لين خلاص وبعدها مسكته من ارقبته
نا :نا مش حنقتلك بس حنخليك اتمنى الموت لانك لعبت بنار انت مش قدها واللي يلعب بالنار تحرقه ياشاطر
هيثم يبكي:سماح معش انديره والله حرمت
نا:حنخليك اتحرم غصبن عنك وتسنيم نعرف بس انك خطمت عليها مجرد التخطيم انوكل الحمك المعفن هذا للكلاب ودفيته وكلمت الصيني
الصيني:نعم
نا:هذا تقطعوله ايديه عشان ايحرم مرة ثانية يمسك تليفون او لابتوب
هيثم قعد ايعيط :لااااا لااااا لااااااااا
نا:دير زي ماقتلك وبعدها اعزقه عند اول مستشفى وهو وحظه ياايعيش ياايموت وسيبتهم وطلعت وخذيت امعايا تليفون هيثم لان كان فيه كل صور تسنيم وطلعت مالمزرعة بكل
طلعت بالسيارة ونا مش عارف اللي درته صح او غلط بس اللي عارفة اني لازم انخلي هيثم عبره للي زيه وللي ايدير هكي عشان الأشكال هذوما اكيدة يعرفو بعضهم وبعد يسمعو اللي صار الهيثم اكيدة حيخافو وحيعتبرو منه وايبطلو لعب بالبنات هذا اللي كنت بنوصله عن طريق اللي بنديره في هيثم
/
/
/
رديت عالفيلا عشان بنطمن تسنيم اني حليت المشكلة نزلت مالسيارة وخشيت للفيلا القيت الخدامة
نا:تسنيم وعت ولا مازال راقدة
الخدامة:ماما تسنيم صاحي وقاعد في غرفته
نا:تمام ورقيت عالدروج مع نزلت راشد من فوق
راشد بعصبية:شن تبي في تسنيم عليش تسأل عليها
نا:وانت شن دخلك?
راشد بعصبية:كيف شن دخلني اللي تسأل عليها اختي
نا:واختي حتى نا انوريك البطاقة ?(وكنت نحرق في دمه بلعاني?)
راشد زاد عصب:البطاقة اللي عندك نقعها وأشرب اميتها لان في الحقيقة انت مش خونا
نا:تمام بكل الكلام هذا تحكيه الباتك مش ليا اما نا الاوراق الي عندي ايقولن اني ولد جابر وتسنيم هذي اختي وجيت بنرقى وراشد كرني من يدي ومسكني من تيشرتي
في اللحظة هذي ماتمالكتش اعصابي وفكيت يد راشد بقوه ولفيتها وفصعتها له وخليتها وراه وضغطت بقوة عليها
نا بعصبية:انت يافرخ احسنلك اتحول من طريقي لان نا اي حد ايجي في طريقي اتكون نهايته
راشد بعصبية وألم:اطلق يدي
نا:اسمع كلامي وحطه في راسك كويس مااتخلينيش انحطك في راسي لاني حنعتبك ياراشد ومش حنخليك اتريح في حياتك فأحسنلك بعد من طريقي وبعدها فكيت يده ودفيته ورقيت فوق وسيبته النار شايطة فيه ومش عارف كيف ايبردها ?
طلعت الدار تسنيم دقيت
تسنيم:مش قلتلكم ماحد ايخش عليا
نا فتحت الدار:حتى نا
تسنيم نطت من مكانها:قولي شن درت
نا:شن تعطيني كان حليتلك مشكلتك
تسنيم:اللي تبيها بس حلها ليا
نا:تنسي اللي فات كله واتردي تسنيم الطفلة البريئة اللي عرفتها وتفتحي صفحة جديدة مع الدنيا بس هالمرة بدون اخطاء وبدون ماتوقعي في المشاكل واذا عالحب حيجيك لعندك من غير ماادوريه
تسنيم نزلو ادموعها:لا عاد نبي حب لا اهتمام من حد بس تنحل مشكلتي
نا طلعتلها التليفون:وهذا تليفونه اللي عليه صورك وخذيت منه اللاب وحرقته
تسنيم مالفرحة قريب طارت:تحكي جد
نا:جد الجد والتليفون عندك افتحيه وشوفي
خذت تسنيم التليفون وقعدت اتفتش ولقت كل صورها وكل شيئ ايخصها هي بس لان حاجات البنات لخرات كانن في اللاب بس وشكله داير كل مرة الدور علي وحدة والي يقعد دورها ينقل صورها في اللتليفون
نا:ها تمام
تسنيم:تمام كل صوري وفيديوهاتي هنا
نا:خلاص انتي حرة التصرف بتحتفظي بيه احتفظي بتمسحيهن امسحيهن بس ناانفضل انك تحرقي التليفون بكل شيئ فيه افضل وأمن
تسنيم مداته ليا:انت أحرقه بكل شيئ فيه
اللقطة اللي دارتها تسنيم حسستني بمدى ثقتها فيا وكيف امأمنتني علي اكثر شيئ كانت خايفة منه
نا خذيته:انا حنحرقه وانريحك منه بس زي مااتفقنا تفتحي صفحة جديدة وبلا جو الاكتئاب والغموض اللي انتي دايرته
تسنيم ابتسمت:حاظر يا احسن اخ في الدنيا
نا شفت التسنيم وضحكت ماعرفتش شنو انرد عليها وطلعت مالدار ونا نازل رن تليفوني لما بحتت كان مافيش رقم يعني الرقم مخفي مااستغربتش لان ديما المكالمات مالناس اللي نشتغل امعاهم ايجني هكي عرفت ان شغل مالمنظمة رديت بس الاتصال هالمرة كان غير لان الصوت اللي رد عليا اول مرة ايكلمني ومن كلامه حسيته شخص مهم في المنظمة
نا:Hi (مرحبا)
الرقم: There you have a task (يوجد لديك مهمة)
نا:what is it (ماهي )
الرقم: ——You will kill (ستقوم بقتل ——وقالي اسم )
نا: OK (حسنا)
نا:but when (لكن متى)
الرقم; Tomorrow evening ( مساء الغد)
نا:OK ( حسنا)
وسكر الخط ونا طلعت السيارتي ومشيت شور الشركة واول ماخشيت مكتبي طلبت القهوة وقعدت انشوف في الاوراق والشغل المتراكم لان ليا فترة غايب عالشركة ومن بين الأوراق القيت جريدة وبالصدفة كان اول صفحة فيها أسم اسم وصورة الراجل اللي طلبو مني نقتله
#يتبع
قولكن من الراجل وهل احمد يعرفه او لا وقولكن شن يلقى مكتوب عليه وهل شيئ ايخص احمد او ايخص الجوكر ?
كله حنعرفوه في الحلقة الجاية ☺
تفاعلن بنات التصفية شغالة راه?
أسفة لو فيه لخبطة في الأسماء وأكيد رأيكن ايهمني ?
گـتـابـتـي Koka Saleh