الجوكر | للكاتبة Koka Saleh
الـحـلـقـة (16)
(حقيقية ممزوجة بالخيال)
گـتـابـتـي #Koka_Saleh
::::::::::::::::::::::::::
لايك قبل القراية وتعليق بعد القراية ?
::::::::::::::::::::::::::
ركبت في سيارتي ونا مستغرب اختفاء حركات المفاجئ وشن ممكن ايكون صاير امعاه
وللأمانة كنت خايف عليه ايكون صايرله شيئ لاني كنت عارف ان اللي في شغلنا حيكون عنده أعداء واجد وبذات لما ايكون شخص ناجح في عمله ويتقن فيه زي حركات ?
قاطع تفكيري صوت تليفوني اللي رن ولما بحتت القيتها سمر ودغري رديت
نا:وين كنتي رايحة مالصبح انرن عليك مااترديش
سمر:قاعدة
نا: اول مرة مااترديش عليا شغلتيني عليك
سمر:أسفة اني مارديت عليك واني شغلتك عليا
لاحظت ان طريقة دوتها غريبة كنت متأكد ان فيه شيئ صاير
نا:سمر شن صاير امعاك
سمر:مافيش شيئ بس ماليش واجد مروحة مالجامعة وتعبانة بس
نا:ممكن تضحكي علي اي حد بس نا لا واضح من صوتك فيه شيئ صاير احكيلي كنك
سمر تنهدت وكان واضح من تنهيدتها ان فيه شيئ كبير مزعلها
نا بصوت عالي اشوي وبحدة من كثر خوفي عليها
نا:شن صاير امعاك
سمر:البحث امتاع تخرجي عطوه البنت اخرى ونا خلاص قريب انكمله ليا سنة نشتغل عليه وكملت العملي اللي فيه كله عشان السنة انكون متريحة تعبت عليه واجد وخذا مني شغل واجد وفي الاخير بيعطوه الوحدة عالبارد?
نا:فهميني الموضوع بالشوية وكيف خذوه منك وعطوه البنت ثانية ليش دارو هكي اصلا
سمر:مافيش كيف وليش داروها بالواسطة زي ماكل البلاد ماشية توا
نا:باهي نا بنفهم شنو اللي صار بزبط
سمر;نا مختارة البحث من السنة اللي فاتت وحكيت مع الدكتور وعجبه موضوع بحثي بكل لان كان جديد ومديور عليه دراستين ونا حنكون اول دراسة له في ليبيا وقالي الدكتور لو كان اشتغلتي عليه صح وجربت القائك والقيتك تمام حنجيب الاعلام يوم مناقشتك عشان تثبت انك اول دراسة والكل يستفادو منك ويقعد مشروع وندوة في نفس الوقت وطبعا الشيئ هذا كان حيفيدني واجد في معدلي وتقديري واتفقت مع الدكتور نبدى نشتغل دغري وفعلا من لما طلعت منه رسخت كل السنة هذكي الشغل العملي وتعبت فيه واجد من معمل المعمل وبابا كم مرة جاني وكل مرة مسافرين المدينة في ليبيا وبصعوبة ماللي ماسكين يعطونا موافقات وقصة والدكتور تعب امعايا واجد المهم نا امعايا بنت عميد الكلية يقعد عمها ومن اول ماعرفت موضوع بحثي وهي اتقول للدكتور انا من فترة نبيه والدكتور ايقوللها سمر جت وحكت عليه قبلك واليوم كان الموعد ان رئيس القسم ايوقع للطلاب علي بحوثهم لما جبتله بحثي ارفضه وقالي موخوذ قتله كيف وكل الطلبة عارفين اني واخذته ومافيش حد غيري خذاه ودرت قصة طلعت هي البنت هذي واخذته وموقعلها عليه العميد بروحه وجت للدكتور بتشتغل امعاه رفض وحاول ايصبي امعايا بس الكل جو ضده عشان عمها شوف الظلم كيف والله انقهرت بكل?
نا:وسعي بالك لا تنقهري لا شيئ وكل حاجة وعندها حل
سمر:خلاص معش فيه حل وقعولها عليه وبتبدى فيه ونا المفروض ننسى كل اللي درته وكل اللي تعبت عليه للأسف كل تعبي عدى عالفاضي
نا:مافيش شيئ عدى عالفاضي ومشروعك ماحدش حيشتغله غيرك
سمر:لا خلاص هي واسطتها قوية وخذاته بكل عين قوية ونا بنمشي اندور اي مشروع نبدى فيه خير مااتضيع عليا السنة هك
نا:لا ادوري مشروع لا شيئ قتلك مشروعك مش حياخذه غيرك
سمر:وكيف هذي تي رئيس القسم وقعلها بالموافقة وفوقها قالي نا دوري مشروع خلال الاسبوع هذا لان بعدها مش حيقبل الحد
نا:ماعليك انتي خلي الموضوع عليا ونا انحله لك
سمر:لالا مش حتقدر هذوما ناس مصالحها في بعضها الله غالب علينا جينا في بلاد هكي كل واحد يخدم اللي مصلحته امعاه
نا:تمام عطيني يومين وكان مارديتلك مشروعك قوليلي انت مش راجل
سمر:حشاك مش قصدي
نا:عارف مش قصدك بس نا نبيك اتأكدي اني نقدر
سمر:باهي شن بدير
نا:حندير اي شيئ اهم حاجة انتي ترضي لاني مانبيش اي شيئ او اي حد ايزعلك
سمر استكت ومعش عرفت مااترد لان هذي اول مرة أحمد يحكيلها كلام هكي
نا:الو
سمر:امعاك
نا:وين رحتي
سمر:ماتحركتش بس ممكن التغطية
نا ابتسمت:التغطية قاعدة تقطع علي اهم كلام
سمر تستعبط:ليش انت شن قلت
نا:ماقلتش شيئ بس معش سمعت صوتك
سمر:اها تمام نا توا بنسكر يادوب انلحق انوتي روحي عندي معهد بعد اشوي بنمشيله
نا:تمام معناها سلام توا
سمر:سلام وسكرت
سمر:زعمك شن قصده مانبيش اي شيئ او اي حد ايزعلك معقولة ايكون حاس بشيئ تجاهي لالا مااعتقدش كان هذا حكى بس هو عنده كبرياء مايحكيش بسهولة بس فيه نفس الوقت مافيش مبرر الدوتنا الواجدة اوكي اصدقاء بس الأصدقاء عمرهم ماكانو هكي حيرتني امعاك يا أحمد
بعدها صبت غيرت دبشها وطلعت مع سالم للمعهد اللي تاخذ فيه في تقوية
/
/
نا سكرت مع سمر ومشيت شور حوش حركات ونزلت وقعدت اندق ماحدش فتح مع طلعت واحد من جيرانهم من حوشه
نا:خير
هو:خير
نا:محمود وهله قاعدين
هو:امه في المستشفى
نا:شن صايرلها
هو:من يومين تعبت وشالها محمود للمستشفى وكانت في العناية بس توا شلت هلي الها قالو كويسة وطلعت مالعناية
نا:باهي ومحمود وين
هو:محمود مش في المستشفى ومش عارف لو في الحوش او لا لكن سيارته مدرسها في القراج عندي
نا:تمام تسلم
هو :سلمك وركب في سيارته وطلع
ونا عرفت ان جوا وشكلك منطمر من حد
قررت انفاجئه مفاجئه زقبت من الصور ونزلت في حوشهم وقعدت نبرم عالرواشن امتاع الحوش ونفتح فيهن من برا لعند لما طبيت في روشن دار حركات وشفته راقد عالسرير
قعدت انخبطله من عند الروشن لين نط مصبي عالسرير?
وبعد ركز وفطنلي جا شور الروشن وفتحلي
حركات:كيف عرفت اني هنا
نا:نا الجوكر وانت عارف مافيش حاجة تغبى عليا ولا انسيت
حركات:شكلي انسيت?
نا:باهي افتحلي الباب
حركات:باهي وطلع مالدار
ونا مشيت للباب امتاع الحوش وهو فتحلي الباب وخشينا
نا:وينك وليش مختفي لكي يومين الشباب مشغولين عليك
حركات:امي في المستشفى
نا:لاباس عليها بس ليش ما كلمتنا راه جيناك اطمنا عليها واطمنا عليك ودرنا امعاك الواجب بدل ماتشغلني وتشغل الشباب عليك هكي
حركات قمعز عالكرسي وقعد يبكي
نا انصدمت اول مرة انشوفه هكي
نا قربت منه:كنك شن صاير امعاك
حركات قعد يبكي ونا معش عرفت كيف نصرف بصراحة موقف صعب لان مافيش اوعر من بكية الراجل قدامك
(عندما يبكي الرجال فأعلم أن الهموم تجاوزت قمم الجبال ?)
قعدت جنبه ونا مش عارف نصرف لعند لمى هدى وسكت
نا:شن فيه شنو اللي صاير امعاك عمري ماشفتك بالحالة هذي احكيلي كنك
حركات’:ديما اتشوفو في حركات البشوش الضحاك اللي يضحك علي اتفه الاسباب واللي يقدر ايضحك اي حد لكن ماحدش يعرف ان مجرد ماانخش هنا نذكر كل الايام السود اللي عشتهن نذكر شنو اللي صار فيا بيش وصلت بأمي هنا ونذكر كيف باتي مات قدام عيوني وكيف اللي اقتله عايش ومش قادر انديرله شيئ
نا قمعزت جنبه:فهمني علي شن تحكي بزبط ومن اللي قتل باتك
حركات يمسح في دموعه:عمي وخو باتي الوحيد اللي المفروض يعتبرني واحد من عياله قتل باتي وكله عشان الفلوس عشان جدي احرمه من حقه في الورث مشى قتل باتي وضحك علي جدي وخذا كل الفلوس وماسدش هكي بس لزنا من حوشنا اللي قاعدين فيه وذلنا وقعد يحكي علي امي في كلام مش كويس ومافيش حاجة امسخة مادارها وخلى امي تقعد مقعدة واخر شيئ كان بيقتلها زي ماقتل باتي
نا:حركات بالشوية واحكيلي قصة عمك مالبداية
حركات:قعد يحكيلي في قصته مالاول من هو اصغير لعند اللي صار من يومين
حركات:واخر شيئ داره امطلع فرح ضناه الاثنين مع بعضهم وداز كرت مع خالتي لنا يعزم فينا وعياله الاثنين اصغر مني بواجد وامي زي اي ام وجعتها لما شافت ان عياله بيجوزو ونا مازلت وتحساب اني ماعنديش قدرة نجوز وفكرت اتكلمه يعطيها ولو جزء من حقنا عشان اتجوزني ماعقب ماقاللها من سب وشتم ودوة عليها وعلي باتي وامي ماتحملتش كلامه وتعبت وشالتها خالتي للمستشفى ولما جيت غادي قالو انها جلطة خفيفة وبعدها حكتلي خالتي اللي صار مشيتله وتعاركت امعاه وكنت بنضربه بس ماطقيتش فيه بعدوني منه واكيدة توا امبلغ فيا لان كل اشوي نسمع في سيارة الشرطة في الشارع
نا:في وقت توا قعدنا انتوقعو في كل حاجة حتى الاخ يقتل خوه معش غريبه
حركات:ساعدني ياجوكر ساعدني نقتله وانرد حقي منه
نا:اكيدة حنساعدك بس مش تقتله لان القتل انت اول واحد حيتهموك بيه وانت اتهمني ومانبيلكش الحبس
حركات:امالا كيف بتساعدني
نا:انت مش بترد افلوسك وفلوس باتك اللي خذاهن منك
حركات:اها
نا:حنردهن لك بس بنفس الطريقة اللي خذاهن بيها من جدك
حركات:يعني كيف
نا:بالنصب والاحتيال نا نعرف واحد متخصص في الامور هذينا وينصب عالواحد وياخذ فلوسه وهو ايبحت وكله باوراق ومشاريع قانونية ورسمية مية في المية
حركات:وينه هذا
نا:قاعد بس غالي اشوي ياخذ في ربع المبلغ اللي بتاخذه انت
حركات:نعطيه حتى النص بس ناخذ افلوسنا واندير فيه اللي داره فينا
نا:لكن ردبالك اتفكر في القتل لان لو ينقتل وانت اول واحد حيتهموك
حركات:باهي كيف انرد قتلته الباتي
نا:صدقني بمجرد مايوتخذن منه كل افلوسه اللي دار عليهن هذا كله عشانهن مش حيعيش وكان عاش حيعيش يامشلول ياامطرشق لان مش حيتحمل ينتصب عليه وبهكي حيشرب من نفس الكباية اللي سقاك منه
حركات: كان وقفت امعايا في الموضوع هذا ورديتلي فلوسي حيقعد هذا دين ومعروف في ارقبتي لين انموت واللي تطلبها مني حاضر
نا:مانبي منك شيئ غير بس بعد ايجن فلوسك مااتسيبش الشغل امعاي انت عارف كيف نعتمد عليك في حاجات واجد
حركات:ديما انقولك نا اذراعك اليمين وعمري ماانسيبك وحتلقاني راجل من رجالتك وديما في ظهرك وحاميك
نا:عارفك مااتقصرش وخلاص هي صبي ودوش ونمشو للشباب يرجو فيك
حركات:والشرطة اللي ايدورو فيا
نا:موضوعهم ساهل اتصال واحد توا يسكر موضوعك بكل
حركات:تي لنقنك صققققع
نا:امغير كان جيتني مالاول وحكيت اللي صاير امعاك راه حليتها لكي دغري بدل جو الاكتئاب اللي دايرة مش ماشي امعاك بكل ?
حركات يضحك:حرمتكم من ضحكتي الجميلة
نا:والله حرمتنا حتى من ضحكتنا انت الوحيد في كل هاللي عايشين فيه قادر اتضحكنا
حركات:اوووووو لا واجد هكي الجوكر يشكر ويمدح فيا نا لا هكي معناها حننتفخ ومعش اتفض
نا ضحكت:انت انتفخ ونا توا انفشك عادي ?
حركات:شورك تحطيم المشاعر?
نا:ليا من غادي?
حركات:حقييير يامان
جوكر:بلا قلة ادب وامشي دوش وغير عشان نطلعو
حركات:تم ومشى ووصل عند باب الصالة ولف عليا
حركات:جوكر
ناكنت انبعبش في تليفوني:شنو
حركات:احبج?
نا :تي امشي ينعن شكلك وكنت بنطلق فيه المفتاح بس هو طلع بسرعة ?
خش هو ايدوش ونا درت اتصال مع واحد نعرفه يشتغل امعانا وهو يعرف ناس في الشرطة وطلبت منه ان يلغي محظر بأسم محمود وقالي حيشوف الموضوع وبعد 10 دقايق رن عليا وقالي ان تم ومعش فيه محظر بأسمه
بعد اشوي طلع حركات مدوش ولابس ورد زي مانعرفوه بالضحكة والجو السمح
نا:ايوا هكي مالاول
حركات:شن رايك فيا بلبول صح ?
نا صحكت:بلبول بككل ايصير منك
حركات:نمشو
نا:اها واطمن من عند موضوع الشرطة نهيته لكي
حركات:ماقتلك صقع ?
نا:هي نطلعو
وطلعت نا وهو ومشينا شور العيساوي والصيني كانو قاعدين في شقة للعيساوي ديما ايكسدو فيها قعدت امعاهم اشوي وبعدها خليتهم مع بعضهم وطلعت بحتت للساعة القيتها 6:30 فكرت بنرن علي سمر وبعدين اذكرت موضوعها امتاع البحث ودغري خطر في بالي جابر مسكت تليفوني ورنيت عليه وهو رد
جابر:ايوا
نا:وين قاعد
جابر:في الفيلا
نا:تمام بنجيك توا عندي امعاك موضوع
جابر:ان شاءلله خير بس
نا:لا خير مسافة الطريق وانكون عندك
جابر:تم وسكر
طلعت وتوجهت شور الفيلا ووصلت غادي واول ما نزلت تلاقيت مع راشد?
راشد:خير
نا:خير ومرحبا شن جوك
راشد:تمام
نا:دوم تبي حاجة
راشد:سلامتك
نا:?وخشيت وسيبته
وراشد دغري رقى فوق ومشى السناء في دارها دق وهي فتحتله وكان حالتها مش تمام ووجها تاعب
راشد طبعا ماركزش عاللي صاير مع امه لان كان عامي علي عيونه الحقد
راشد:شن صار مش قلتي بتقتليه
سناء:خلاص لاعاد صار من قتلته لا شيئ
راشد:مش قليتلي ان خلاص نهايته قربت واشوي ويطلع من حياتنا
سناء:باتك اكتشف كل مخططاتي وهددني ان يحبسني لو قربت شور أحمد
راشد بعصبية:شنووو لا باتي طرشق رسمي وانا لازم نصرف امعاه هو وسي احمد امتاعه
سناء:الله ايربحك ياراشد فوته ومااتعرضش روحك للمشاكل وعلي كل الاحوال باتك طمني ان مش حياخذ شيئ من فلوسكم
راشد:كيف وهو كاتبة علي اسمه يبقى من حقه ياخذ زيه زينا
سناء:باتك قالي ان كاتب كل حاجة بأسمكن انتو الثلاثة يعني ماايحقلش شيئ
راشد:القصة بيني وبين الفرخ هذا ماقعدتش فلوس وبس بيني وبينه ثار ولازم ناخذه
سناء:لو تسمع مني بلاش انت مش قده لان باين عليه واحد مجرم
راشد:مستعد انتعلم الاجرام عشانه
سناء:انت اللي خاسر ومش حتستفاد شيئ لو قلته الا انك اتعيش طول عمرك في الحبس
راشد:الحبس ?
سناء:اها شن تحسابه تقتل وتطلع منها مش سايبة هي والبلاد فيها قانون مازالو ايطبقو فيه فأحسن حاجة انك اطلعه من راسك وتلهى بشغلك زي حمزة
راشد معش عرف ماايرد من جهة من بينتقم من أحمد ومن جيهة خاف مالحبس لو دارله حاجة واكتشفوها وطلع ومشى الداره وهو حاير شنو ايدير بزبط
/
/
عندي نا خشيت علي جابر وقمعزت امعاه
جابر:شنو الموضوع المهم اللي جايني عشانه
نا:تعرف معيد الجامعة
جابر;نعرفه بس ليش
نا:عنده امعاك مصالح شخصية او حاجة هكي
جابر:فيه مايخلش الامر بس مازال ماعرفت ليش تسأل
نا:فيه حد بنساعده غادي ونبي منك تدخل عارف معارفك واجد وتقدر تنهي
جابر:منو اللي بتساعده وبشنو تبيني انساعده
نا:فيه بنية صديقتي السنة بتخرج وقعدت نحكيله في القصة اللي حكتها ليا سمر
جابر;بما ان الموضوع فيه بنت خوه يبقى الموضوع صعب اشوية
نا:كنت نقدر انتواصل بالمنظمة عشان ينهولي موضوع زي هذا لكن نا عارفك عندك معارف واجد وتقدر انت تنهيلي هذا ليش جيتك وبعدين هذا اول طلب نطلبه منك
جابر:خلاص حنصرف حنشوف حد اكبر منه في المنصب وانتواصل امعاه
نا:كم ياخذ من وقت الموضوع هذا لان خلال اليومين هذين لازم يقعد منهي
جابر:لا يومين لا شيئ عطيني ساعتين وانقولك شنو ايصير امعاي
نا:تمام بكككل وجيت بنمشي
جابر:متأكد انها صديقة بس
نا:متأكد ولفيت بنمشي وبعدها اذكرت موضوع عبد المهيمن وتسنيم
نا:شن صار في الخطبة ردو عليك ولا لا
جابر:لالا مازال ماردو
نا:تمام تبي حاجة مني
جابر:سلامتك وطلعت
كنت بنروح وبعدين اذكرت تسنيم اللي لو تعرف اني جيت لعند الفيلا وماجيتهش حيقعد موضوع وزعله كبيرة
رقيتلها في دارها ودقيت وهي فتحتلي
تسنيم بفرحة:احمد
نا:شن الجو
تسنيم:تمام حال القراية ليا فترة عالجامعة ولما مشيت الفيت هالبني واجد
نا:كان تبي مساعدة في اي مادة نا قاعد
تسنيم:اكيدة حنطلب منك
نا:كذا وريني في شنو تقري وقعدت انقلب في شيتاتها وكل شيت كنت نفتحه نلقى فيه في اسم عبد المهيمن ?
نا ضحكت:واضح انك تقري
تسنيم انحرجت ?
نا:خلاص انخليك اتكملي قرايتك?
تسنيم:خليك امعايا اشوية
نا:والله عندي شغل توا انجي الايام الجاية
تسنيم:باهي رد عيش امعانا هنا الفيلا كساد بلاك
نا:معش ايصير منها تريحت اكثر لما قعدت بروحي
تسنيم:باهي براحتك اهم شيئ انت اتكون منسجم
نا:قبل ماانعدي اكيدة تبي تعرفي راي باتك ومنحرجة
تسنيم ضحكت ?
نا: راه توا كنت عنده وسألته وقال مازال ايفكر في الموضوع
تسنيم:خليه ايفكر اهم شيئ مازال مارفضش
نا:اشقي بقرايتك توا والباقي كله ساهل
تسنيم:حاضر
نا:سلام وطلعت
وصلت برا الفيلا وبنركب في السيارة مع نزلت حمزة من سيارته وجاني
حمزة:شنو الجو
نا:تمام
حمزة:وينك مختفي معش انشوف فيك هنا
نا:شريت شقة وانتقلت فيها
حمزة:عليش من ضايقك هنا
نا:ماحد لكن بنستقل بروحي اشوي
حمزة:والله صدقت حتى نا انفكر فيه الموضوع هذا
نا:بس انت فيلة هلك هذي ليش بتطلع
حمزة:ماتأقلمتش امعاهم تعودت برا علي جو الاستقلالية بروحي والفيلا مافيهش الجو اللي كنت دايرة الروحي برا
نا:صح الواحد لما ايتعود علي جو معش ايتأقلم مع غيره
حمزة:وهذا اللي صايرلي
نا:اتوصيني بحاجة توا
حمزة:سلامتك
نا ركبت في سيارتي وهو خش للفيلا
طلعت مالفيلا ونا مستغرب في احوال الناس واحد ايكون متمني يقعد عنده هل عشان ايعيش الجو الأسري اللي انحرم منه وواحد بيسيبهم لان تعود عالوحدة
لكن هذا طبع الناس ان ماحدش راضي باللي هو فيه ?
لما طلعت مالفيلا دغري مشيت المطعم لاني كنت ميت جوع طلبت وجبة وتعشيت وطلعت مالمطعم ونا في الطريق شور الشقة جاني اتصال من جابر ونا رديت
نا:ايوا
جابر:راه الموضوع تم وصديقتك قوللها بكرا تمشي تاخذ الموافقة علي مشروعها
نا:كيف حليتها
جابر:خششتلك فيها الوزير شخصيا وكله بس عشان تعرف غلاوتك عندي
نا: عارفها من زمان?
جابر:المهم سلملي علي صديقتك ?
نا:يوصل وسكرت
بس برغم استفزاز جابر ليا الا اني كنت فرحان لاني قدرت انحل مشكلة سمر وبنحس فرحتها بعد نحكيلها حطيت علي رقمها ورنيت وهي ردت
سمر:خيرات احمد
نا:خير شن جوك
سمر:تمام وانت
نا:تمام بكل ونبي البشارة منك
سمر:علي شنو
نا:بكرا حتاخذي الموافقة علي مشروعك
سمر:اتبصر صح
نا:ونا عمري بصرت في مواضيع جدية هكي
سمر بفرحة:نجك ليا يعني تعبي ماعدش عالفاضي و انرد انكمل مشروعي
نا:شن قلتي توا
سمر:قتلك تعبي ماعدش عالفاضي وانرد انكمل مشروعي
نا:لالا مش هذي اللي قبلها
سمر انحرجت:شيئ?
نا:عالمهم وليا وراه نبي البشارة
سمر انحرجت:اللي تطلبه حاضر☺
نا:بكرا نبي انشوفك
سمر:خلاص تعال بكرا للجامعة
نا:لا ماانحبش الجامعة واجد بنشوفك في مكان برا الجامعة
سمر:وين يعني ?
نا:كافي مطعم اللي يعجبك
سمر:مش عارفة مااعتقدش نقدر
نا:بس انتي قلتي اللي تبيها انديرها خليك عند كلامك عاد
سمر:تمام فيه حاجة وحدة نا بكرا بنمشي الصاحبي وهما في شارعهم في كافي انتلاقو فيه
نا:تمام بكل بس عالساعة كم
سمر:عال5 العصر تمام
نا:تمام
سمر:انا بنسكر توا عندي قراية
نا:تمام بكرا الصبح انكلمك
سمر:تمام تصبح علي خير
ونا:وانتي بخيو وسكرت
سمر:نا شن قلت معقولة انقوله نجك ليا توا شن بيقول عليا ياربي والله قلتها من كثر الفرحة بس ?
/
/
عندي نا كنت فرحان بكل بكلمة سمر حتى ونا عارف انها قالتها من كثر الفرحة بس المهم قالتها?
والشعور السمح اني كنت اول مرة نسمعها ولما نسمعها نسمعها من سمر شعوري كان لا يوصف?
واللي احلى مالشعور هذا كله اني بكرا بنشوفها بحتت للساعة القيتها الساعة (11م) وكان في خاطري يمشي الوقت بسرعة واتجي الساعة 5 بسرعة وانشوفها?
بالنسبة ليا ماكنت عارف شعوري تجاه سمر شنو ماكنت قادر انحدده بزبط بس اللي كنت حاسة انها مختلفة مختلفة عن اي وحدة شفتها كان فيها شيئ مميز يجذب فيا الها بس مش عارفة شنو?
لماذا هي دونً عنْ غيرها ؟
– لأنَّ غيرها لم يكُن هي، وهي لم تكُن كَـ غيرها.
/
/
وصلت للشقة وخشيت الداري دغري ونا كل تفكيري في يوم بكرا وكل اللي نبيه ان ايجي بسرعة
غمضت عيوني وقعدت انشوف في صورتها قدامي لعند لما خذاني النوم ورقدت
/
/
صباح يوم جديد?
وعيت بدري دوشت ولبست ورنيت علي سمر صبحت عليها زي كل يوم وبعدها طلعت ودغري عالشركة وقعدت فيها لعند قبل الوقت بساعة وطلعت مشيت للشقة غيرت ادبشي وشفت للساعة القيتها 4:45 م رنيت علي سمر وهي ردت
سمر:اهلين
نا:شن جوك
سمر:تمام وانت
نا:تمام ها وين طبيتي
سمر:توا عند صاحبتي اشوي ونطلع
نا:تمام بس عطيني عنوان الكافي عشان انجي غادي
سمر:تمام تعرف شارع ال—– هو في نهايته عاليمين
نا;تمام عرفته اشوي وانكون غادي وسكرت
/
/
هبة;مع من تحكي
سمر:أحمد?
هبة:قصدك دايرة امعاه موعد
سمر:مش موعد بس ماهو قتلك هو اللي حل مشكلة البحث وطلب ايشوفني ماحبيتش نقعد بايخة وانقول لا
هبة:كان تسمعي نصيحيتي بلاش منها
سمر:عليش
هبة:يعني واحد مافيش بينك وبينه شيئ بأي صفة ماشية اتقابلي فيه ولا قعدت بينكم حاجة ونا ماعنديش علم
سمر:لا والله مافيه بينا شيئ
هبة:امالا علي اي اساس بتقابلي امعاه
سمر:علي اساس ان شخص اكويس وساعدني في اكبر مشكلة واجهتني ولولاه راه توا بادية من الصفر ونقعد قليلة ذوق لو قتله لا
هبة:مش عارفة نا مش مقتنعة باللي اديري فيه واصلا مش مقتنعة بيه هو بكل حاسة ان مش تمام
سمر:شن شفتي منه عشان اتقولي هكي الشاب كويس بككل ومحترم وماشفتش منه الا كل خير سادك غير اسلوبه وكلامه انسان راقي بكل
هبة:زيدي زيدي مالشكر له تي شكلك حبيتيه واتبرري في كل هذا بالصداقة اوعي راه مافيش صداقة هكي واضحة حظرتك طحتي وماحد سمى عليك
سمر:واذا حبيته شنو المشكلة راجل ولا كل الرجالة كل الصفات الحلوة فيه لعند توا ماشفتش فيه ولا عيب
هبة:الله الله اشوي ونقعدو انقولو في شعر عليه
سمر ابتسمت:ياريتني شاعرة مش اخسارة فيه ?
هبة:سمورة حبي ردي بالك ماتقعديش هكي هو لعند توا مازال مااعترفلك بشيئ يعني مااتعلقيش بيه وهو مرات يقعد مش حاس بشيئ تجاهك
سمر: لكن حاسة ان هو مهتم بيا واجد وبدا في جو مغازلات وحركات
هبة:انتي ادرى لكن نا حاسته ان نسونجي وكان درتي امعاه علاقة حيطلعن الف بنت تعرفه
سمر بترد جتها رساله علي فونها من احمد مكتوب فيها
(نا وصلت للكافي ونرجى فيك)
سمر:خلاص انا بنطلع ماانطولش اشوي وانجي
هبة تضحك:شوف نا في شن نحكي وهي في شن تحكي عدي عدي خذا عقلك خلاص
سمر ضحكت وصبت برمت علي روحها في مراية هبة وطلعت ومشت شور الكافي واول ماخشت لقت أحمد مقمعز يرجى فيها وجاته
/
/
نا اول ماشفتها قلبي قعد ايدق بسرعة حسيت روحي مراهق ويرجى في شوفة حبيبته قدام المدرسة ?
وصلت فيا وسلمت عليها وقمعزت مصادرتني ونا كانن عيوني بيطلعن عليها واول مرة انكون جريئ هكي بس مش قادر انبطل تبحيت فيها مشيتها طولها ابتسامتها عيونها كلامها كل حاجة تسحر فيا ?
قمعزت وقعدت تحكيلي عاللي صار امعاها في الجامعة وكيف رئيس القسم كان يحكي امعاها ونا نسمع في كلامها بس ماكنت نسمع في كلام وخلاص كنت حاس روحي نسمع في موسيقتي المفضلة وماكنت نبيها اتوقف عالدوة بكل ومش قادر انزل عيوني من عليها الدرجة هي قعدت محروجة قدامي وخدودها حمر واتهرب بعيونها مني وكنت انحاول ماانشوفلهش بس مش قادر كل اللي كنت نبيه بنحفظ كل تفاصيل وجهها
سمر:أحمد
نا:نعم
سمر:كنك ساكت ونا من بدري نحكي بروحي
نا:انحب نسمعك
سمر حبت اتغير الموضوع
سمر:انت مع من حكيت لين غيرت قرارهم بالسرعة هذي
نا:حكيت للشايب وهو اصرف
سمر;اها توا فهمت شكله باتك عنده معارف واجد
نا:اها عنده
سمر:ربي ايخليه لكي
نا:ان شاءلله
نا:خذيتيني بالكلام وماسألتك شن تشربي
سمر:نساكفيه واي شيئ حلو
كنت خاطري انقوللها مافيش احلى منك بس ماقدرتش خفت تفهمني غلط مشيتها بضحكة بس حسيتها فهمتني
طلبنا زي بعضنا نسكافيه وحلو
وقعدنا انهدرزو قعدت امقمعزة امعايا ساعة بس ماحسيتش بالوقت امعاها بكل حتى لو مرن 10 ساعات ماكنتش حسيت بيهن مامليتش بكل وطول الوقت نبيها تحكي
نظرة عيونها كلامها ضحكتها كل حاجة تسحر فيا كل حاجة زي مانا نبيها مميزة مميزة الابعد حد في الدنيا
مرن عليا بنات اشكال الوان بحكم شغلي كنت انتلاقه مع واجد بس كيفها عمري ماشفت ومتأكد اني معش انشوف
ونا امعاها انسيت كل حياتي وكل ماضيي ومافكرتش ابدا في حاظري
نسيت طفولتي واللي صار فيا ونا اصغير انسيت الجوكر وجابر وكل المنظمة وكأني فقدت الذاكرة في لحظتها كنت احمد أحمد وبس
رغم اني كل الوقت كنت انشوفلها بس حتى لون عيونها ماقدرتش نعرفه كان فيهن سحر ايخلي فيا نفقد الدرجة خطرت عليا سؤال انسأل مرة للشاعر محمود درويش
عندما سُئل “محمُود درويش” عن لون عينيها قال :
“لا أدري في كلّ مرّة أتأمّل عينيها أفقد الذّاكرة✋❤
في عز اتهدريزنا قعد تليفونها ايرن وهي كل مرة اتصمته بس التليفون مابطل رنين ونا حسيت روحي اضايقت لاني كنت نحكيلها
نا:حسيته اتصال مهم
سمر:لا مش مهم هذا صديق امعايا اكيدة بيسألني شن صار في قصة البحث امتاعي
شعوري في اللحظة هذي ماانتمنش حد ايحس بيه ناااار ولعت في قلبي ?❤
معش عرفت شن نحكي وقعدت بس مركز عالتليفون اللي مابطلش رنين وحتى هي لاحظت هالشيئ
عيوني قعدن عالتليفون وبمجرد مارن اخرى ماتحملتش خذيته من قدامها ودرت للي ايرن مشغول وقفلت التليفون ومديته الها
كانت لقطة غبية مني بس معش تحملت ان فيه شخص اخرى ايرن عليها?
سمر بعصبية:انت كيف ادير هكي
نا:من بدري وهو ايرن
سمر:ايرن علي فوني مش فونك وتقريبا اللقطة اللي درتها قلة ذوق منك وصبت خذت فونها وشنطتها ومشت وسيبتني
نا:سمر
ماردتش عليا وعدت عرفت اني لبزت بكل ومعش عندي حتى وجه انرن عليها ?
صبيت وطلعت مالكافي ونا متضايق بكل
متضايق من تصرفي ومن ردت فعلها
ومتضايق من اني مش قادر انحدد ليش درت هكي معقولة انحبها باهي كيف انتأكد ونا عمري مامريت بتجربة حب من قبل مش عارف حتى شن يقعد احساس الواحد
معقولة اللي حسيت بيه اتكون هذي الغيرة
وصلت للشقة وجوي مش تمام متعكر مزاجي وغامتلي من روحي ومالموقف اللي حطيت روحي فيه
فتحت تليفوني ودزيتها (أسف عاللقطة اللي درتها عارفها بايخة معليش)
قعدت نرجى في رد منها بس ماجاني شيئ ?
ونا هكي جاني اتصال من عبد المهيمن ورديت
عبد المهيمن:شنو الجو
نا:تمام وانت
عبد المهيمن:تمام التمام جاني معز توا ومكسد عندي شن رايك اتجي انكسدو مع بعضنا اشوية
نا:تمام اشوية وانكون عندكم وسكرت
طلعت مالشقة وفعلا كنت محتاج الحد نقعد امعاه مانبيش نقعد بروحي ونذكر اللقطة الغبية اللي درتها لاني كنت حاس اني خسرت سمر من وراها ?
وصلت غادي والقيت الشباب باديين ايديرو في اشوايات وجو
نا:مش عساس عريس ليش مش مع مراتك
معز:اليوم مشت الهلها قلت انجي انكسد امعاكم بدال مانقعد بروحي
عبد المهيمن يضحك:توا التكسيدة امعانا زي اللي مع المدام
معز يضحك:لا اكيدة مش زيها شن جاب اللحظات الرومانسية للداخان والشوايات اللي عندكم
نا:صدقت كان نا منك ماانسيبهش تمشي الهلها بكل
عبد المهيمن:وهي ورينا شطارتك وديرها واجوز
اول ماقالي اجوز دغري جت في بالي سمر تلقائي وابتسمتله وفت الموضوع
قعدنا هكي انهدرزو ومعز يحكي عالزواج وان راحة واستقرار الشيئ اللي نحن الثلاثة فاقدينه من زمان عمرنا ماعرفنا شن معنى الاستقرار ?
ونا هكي امعاهم رن تليفوني وتفاجئت لما شفتها سمر تي قريب طرت مالفرحة وماحبيتش نحكي امعاها قدامهم سيبتهم وطلعت برا ورديت
نا:والله عارفها لقطة بايخة بس زعجني التليفون واسف بجد
سمر:حصل خير حتى نا تصرفي ماكان حلو وبايخة اني عصبت عليك
نا:والله علي قلبي زي العسل ?
سمر انحرجت:المهم بنقولك ان الجو تمام وماادور شيئ
نا:باهي تمام بس عادي نسألك
سمر:اكيدة
نا:رديتي عليه صديقك اللي كان ايرن
سمر:اها رديت عليه وزي ماقتلك كان بيسأل شن صار في البحث لان امس القصة صارت قدامه
نا حسيت لو اني نعرفه الفرخ هذا راه خذيت روحه بإيديا وسكتت معش رديت بكككل
سمر:الو احمد
نا:نا قاعد مع جماعة بنسكر توا
سمر:ماشي
نا سكرت وحتى اوكي ماقلتلهش بس رقاها ليا الفرخ اللي تحكي عليه ?
وخشيت جوا عالشباب
نا:توا بنسألكم كيف الواحد يعرف روحه ان ايحب
معز وعبد المهيمن بحتو في بعضهم وقعدو يضحكو ?
نا:بالجو ماانبصرش نحكي جديات
معز:انت عمرك ماحبيت
نا;لا ولا مرة
عبد المهيمن;تحكي من جدك ولا اتبصر ?
نا:نحكي من جدي وبتقولولي كيف تعرفو روحكم اتحبو بنت ولا لا
معز:حنقولك وحاجة مش صعبة بمجرد مااتحس روحك تبي اتكلمها ديما وديما مرايفلها وديما تبي اتشوفها ومااتملش لما تحكي امعاها ومعش تعجب فيك بنت غيرها وبالتحديد لما تبدى اتغار عليها اعرف روحك ياثلب انك كبدت رسمي
عبد المهيمن : صارن امعاك اللي حكى عليهن معز
نا بحتت فيهم:وبالحرف ?
معز ضحك:معناها شيل روحك وابدى وتي للخطبة والفرح من توا
نا:لا مازال بدري انتأكد قبل
عبد المهيمن:من شنو اتأكد واضحة ياافندي مكبد ماتبيش اثنين يحكو فيها
نا:خلاص فوتو الموضوع وخلونا انتعشو
كملنا الشواية وتعشينا وكملنا الليل انهدرزو وكل مرة ايشفطو عليا علي سؤالي ?
وقعدت امعاهم لعند الساعة 1 وروحت واول ماخشيت ونا انفكر في كلام معز واللي صاير امعايا
معقولة انكون انحبها بس كيف بالسرعة هذي
مش سرعة تي ناحبيتها من اول ماشفتها
لالا اكيدة غالط مش حب
باهي شن تفسير اللي ايصير امعايا مالش اي تفسير الا الحب
اصوات واجد في داخلي اينادن فيا اصوات واجد حيرني ?
ماكنتش انفكر في عواقب حبي الها بس كل اللي كنت انفكر فيه اني صح انحبها او ايكون وهم
قعدت الليل كله واعي ماقدرتش نرقد بكل
كملت الليل انفكر فيها وفي كل شيئ صار امعانا انفكر في تصرفاتي وفي كلام معز لعند لما طلع الصبح بحتت القيتها الساعة 7 مالقيتش روحي الا ماسك تليفوني وران علي سمر واول ماردت
سمر:صباح الخير
نا:انحبك وسكرت الخط
#يتبع
قولكن شن رد سمر عالكلمة اللي جتها عالصبح نا انقول اكيدة تحساب روحها تحلم?
لكن هل هالحب في صالح احمد او ضده هل عواقب الحب حينفعنه او ايضرنه ?
وقولكن ليش المنظمة لعند توا ماردت علي طلب عبد المهيمن لا بموافقة ولا رفض شن فيه في بالهم ?
كله حنعرفوه في الحلقة الجاية☺
أسفة لو فيه لخبطة في الأسماء وأكيد رأيكن ايهمني?
گـتـابـتـي Koka Saleh