الجوكر | للكاتبة Koka Saleh

#الـجـوكـر?

الـحـلـقـة (13)

(حقيقية ممزوجة بالخيال)

گـتـابـتـي #Koka_Saleh

::::::::::::::::::::::::::::::::::::::::::::::::::::::::

لايك قبل القراية وتعليق بعد القراية ?

::::::::::::::::::::::::::::::::::::::::::::::::::::

نا بنخش للفيلا وعبد المهيمن طلع وكان وجه ماايتفسرش

عبد المهمين بعصبية:انت كيف ادير هكي

نا وكل الي جا في بالي ان شاف اللي في داري وعرف حقيقيتي

نا ماعرفتش شن انرد وكل اللي في عقلي اني توا حنقتله لان مستحيل نسمحله يعرف حقيقتي وايدمرني حطيت يدي علي جنبي وبنطلع اسلاحي روحي بروحه

عبد المهيمن ومدلي التليفون:اصورها شنو ايديرن عندك مش عساس اختك ليش مصورها صور هكي شن فيه بينكم قولي

نا استك ادماغي في بالي شيئ وجاني شيئ
بس السوء الحظ تسنيم كانت مصبية عند الباب وسمعت الكلام كله

عبد المهيمن:انت داير علاقة امعاها مش عساس اختك يعني بينكم علاقة او شيئ اكبر من هكي فهمني

نا رقالي من عبد المهيمن ليش ايفتش في داري وليش ياخذ حاجة ليا واللي رقاها ليا بزيادة شن دخله بتسنيم وهو من عشان يحكي عليها كريت من يده التليفون

نا بعصبية:انت مادخلكش ومن قالك فتش في حاجتي

عبد المهيمن بعصبية:القيته بالصدفة

نا بصوت عالي ومسكته مع تيشرته:انت واحد

عبد المهيمن:مش داعي اتكمل ياصاحبي نا اللي كنت نحسابك أحسن من هكي بس طلعت مش امتاع عشرة ولانك عاد عيون شخص رباك وماحافظتش علي عياله زي ماحافظ عليك واحد خوان خان الشخص اللي رباه مايبيش ايخون صاحبه معش عندي فيك ثقة لانك ادير اي حاجة وفك ايديا منه ومشى للجناح خذا ادبشه وطلع ونا مازال مصبي في مكاني مستك من كلامه رغم انه عبد المهيمن مش عارف شيئ ماللي صارلي واللي داره فيا جابر ورغم ان ظلمني بقصة تسنيم بس ماقدرتش انبرر شيئ
مسكت التليفون وقعدت انبحت فيه ورفعت راسي القيت تسنيم قدامي وادموعها ينزلن وعيونها حمر مالبكى وقالتلي جملة وحدة

تسنيم تبكي:معش بنشوفك نهائي??
وخشت تجري وسيبتني

نا قعدت مصبي مش قادر انبرر الحد شيئ وبذات تسنيم لان بعد اللي سمعاته مستحيل اتصدق اي كلمة مني وبذات في الوقت الحالي
بعد الثقة اللي حطتها فيا يوم اللي عطتني التليفون مستحيل اتصدق انها نسوة مني وامعاها حق ماانلومهش في شيئ واي شيئ اديره امعاها فيه حق ?
وعبد المهيمن مانقدرش نحكيله قصة تسنيم واللي صار مهما كان نا انحبها وسمعتها أهم شيئ عندي ومش عشان انبرأ روحي قدام صاحبي نفضحها هي ?
فكرت ان أحسن شيئ اني انخلي كل واحد ايفكر زي مايبي لاني مانقدرش انبرر الحد منهم ?
في اللحظة هذي بذات كنت نا الظالم ونا المظلوم في نفس الوقت?
ماقدرتش اندير شيئ الا اني انلف وركبت في سيارتي وطلعت

/
/
برمت وااااجد بالسيارة ماكنتش عارف وين نمشي ماعنديش حد نمشيله ولا حد نشكيله قلبي متعبي عقلي مش مستوعب شيئ ماللي ايصير امعايا كله حاس ان كل شيئ وكل حد في الدنيا ضدي
نا الظالم ونا المضلوم نا السجان ونالمسحون نا القاتل ونا المقتول
لا قادر نحكم علي روحي بخير ولا بشر مسكت فوني ورنيت علي وحدة بس وحدة ماكنتش عارف شن نبيها ولا شن بنحكيلها اصلا وهي ردت

سمر:ايوا

نا قعدت ساكت

سمرا:الوووو

نا:ماانردش

سمر:الووو

نا ماقدرتش نحكي أي شي

نا:أسف رنيت بالغلط

سمر:لا عادي مش مشكلة

نا كنت نبيها تفتح اي موضوع تحكي امعايا في اي شيئ

سمر:تصبح علي خير وسكرت
وسكرتلي الدنيا في وجي بزيادة
ولعت السيارة وقعدت نجري بيها وطبقت العداد
نبي اي شيئ ايريحني اي حاجة اطلع اللي في قلبي بس حتى السرعة مادارتلي شيئ لا قتلتني ولا ريحتني درست قدام حوش حركات ورنيت عليه وهو رد

حركات:لا حالتك مطورة حتى في الليل لازم تسمع صوتي?

نا:كان مفتاح الشقة امعاك جيبه ليا

حركات من نبرة صوتي فهم ان مش وقت حناطته وسكت
حركات:اها امعايا مسافة الطريق وانجيبه لكي

نا:قاعد قدام حوشكم اطلع جيبه

حركات:تمام

اشوي وحركات طلع وجابلي المفتاح وعطاه ليا

نا:وين العنوان

حركات:منطقة ال— الشارع اللي جنب الشارع الرئيسي ثاني عمارة الدور الأول

نا:تمام

حركات:راهي مفروشة واثاث جديد كله يعني كان بتسكن فيها مش حتتعب وتشري اثاث

نا هزيت براسي وطلعت

وحركات خش الحوشهم

ام حركات;محمود تعال

حركات خش علي امه:نعم ياامي

ام حركات:وين طلعت

حركات:سمعت صوت برا طلعت انشوف شن فيه

ام حركات:يعني مافيش شيئ مش صاير امعاك شيئ

حركات:لا ياامي مش صاير امعاي شيئ اطمني

ام حركات مسكت يده:ردبالك ياحوده ادير شيئ غلط باتك مات وهو كل الناس تحكي علي طيابته وسيرته وسمعته الكويسة ولعند توا مازال يذكرو فيه بزين افاعله وديما خاطره ايربيك اكويس وتقعد كيفه

حركات تنهد:اطمني ياامي باذن الله كيفه

ام حركات:الله ايربحك وربي يعطيك علي قصاد نيتك ويبعد عليك اولاد الحرام

حركات ابتسم وباس راس امه
حركات:وقت الدوا توا

ام حركات:كبدي طابت ماهالادوية

حركات:معليش كله عشان اتحسن صحتك واتردي تمشي زي قبل

ام حركات:اي نمشي ياحودة ليا اسنين عالعلاج و درت ثلاث عماليات ومافيش اي نتيجة

حركات:املنا في الله كبير وبعدين وين كنا ووين قعدنا كان الشلل كامل توا قادرة اتحركي ايديك واشوي بشوي حتحركي كرعيك واتردي تمشي

ام حركات:ان شاءلله

حركات صبى وجاب الامه الدوا عطاه الها وطلع ومشى الداره

واول ماخش اذكر لحظة وحدة من لما كان عمره 6سنوات مش قادر ينساها ومافهمهش الا لما كبر

لما طلع قدام الحوش ولقى عمه تحت سياره باته

حركات:عمو كنها سيارتنا

عمه:خاربة ياعمو انصلح فيها لكم

حركات:تبي انساعدك

عمه:اها صبي عند الباب ولما ايجي باتك قولي عشان انفاجئه اني صلحتها

حركات بفرحة ان حيساعد عمه في تصليح سياره باته

مشى وصبى عند الباب ولما باته جا جا يجري العمه وقالها له

طلع بات حركات ولقى خوه مصبي عند السيارة

باته:خير ادروسه كنك قاعد هنا

عمه:كنت بنخش توا

حركات:عمو كان ايصلحلك في سيارتك

باته:كنها السيارة

عمه:الفنار حسيته هكي متحرك عدلته

باته:يومتها خبطتها بالك منها

عمه:اكيدة شن صار في باتي ماغيرش رأيه ومازال بيعطيك كل حاجة

باته:والله مازال انحاول امعاه بس انت تعال واحكيله وقوله بتغير عشان مايحرمكش من شيئ

عمه:توا انخشله توا

باته:خلاص نحن توا طالعين وانت اقعد امعاه براحتك لين تقنعه

عمه:تمام

مع طلعت ام حركات سلمت علي سلفها وطلعو في السيارة وكلها 10 دقايق وجت قدامهم سيارة حاول ايتفاداها فرينوات السيارة كانن عطلانات وخبطو وكان حادث فيه 4 سيارات حركات حصل كسور وكدمات وباته مات دغري وامه قعدت شهر في غيبوبه وبعدها وعيت كانت مشلولة وقعدت امه فترة طويلة في العلاج وهو كل مرة في حوش وبعد اشهرين مالحادث جده مات ولقو كل الأملاك مسجلات بإسم عمه وحتى الحوش اللي قاعدين فيه طلعهم منه وقعد هو وامه عند خواله وكل مرة عند حد ومتضايقين منه ومن امه لانها مااتحركش بكل وقعد علي هالحال ووضع مزري وكلام خواله له وان مايقدروش ايعانو امه وعلاجها غالي قعد يشتغل من هو اصغير بيوفر علاج امه سيب قرايته ونسى طفولته واعتمد علي روحه بس كل مايكبر ايتأكد ان عمه هو سبب اللي صار وحاول كم مرة يحكي امعاه مايرضش عمه ان يحكي امعاه لعند يوم خش حركات علي عمه بالغصب ولما حكى امعاه وواجهة بالحقيقة وعمه نكر وقعد يحكي علي امه وباته كلام مش كويس حركات ماتحملش كلام عمه وتهجم عليه وضربه بموس وحبسوه فترة طويلة وفي الحبس تعرف عالعيساوي وقعد صاحبه واقترح عليه يشتغل امعاه بس حركات رفض وبعد فترة من خروجه مالحبس امه تعبت وقعدت تبي عملية ضروري اذكر كلام العيساوي وشغله امعاه كلمه ووافق وقعد يشتغل امعاه في التهريب وفي السرقة وتعرفو بعدها عالصيني وقعدو شلة وحدة لعند مافي الاخير عرف الجوكر كيف ايجيبهم وقعدو امعاه

حركات:سامحيني ياست الكل اني ماكنت زي ماتبي انتي وباتي بس هذي الحياه ماتبيش واحد طيب زي باتي لازم انكون خبيث ومجرم عشان ايديرولي هيبة واحساب كان لازم نشتغل هكي عشان نقدر ناخذ حق باتي اللي خذوه منه وهو غافل ان شاءلله اتسامحوني

/
/

نا وصلت للعنوان وخشيت ودغري قمعزت في الصالة بدون لا انشوف للشقة لا شيئ قمعزت وحطيت راسي بين ايدي عاجز عاجز اني اندير اي شيئ وماعنديش حد حتى اللي كسبتهم خسرتهم في لحظات

(ما كان هذا القلب يوما قاسيا ولا ظالما ، إنما أرهقته معارك الدنيا وخذلته الوجوه)

قعدت الليل كله عالوضعيه هذي عاجز حتى اني انفكر في حل

وفي الأخير قررت اني ماانبرر الحد شيئ اللي فهموه خليهم فاهمينه وهكي أحسن بالنسبة ليا لان البعد عنهم أفضل الحياة الجوكر ?
تسنيم حتكون نقطة ضعف كبيرة ليا بحبي الها وخوفي عليها
وعبد المهيمن قربي منه حيخليه يكتشف حقيقتي والشيئ هذا اوقات يضطرني القتلته ونا مانبيش نقتله

/
/
/

تسنيم من طلعتها الدارها وهي تبكي وتذكر في كلام امها كله علي أحمد وعرفت ان امها امعاها حق في انها تكرههة بس مشكلة تسنيم حباته حب الاخ ومش قادرة تكرهه واللي داره فيها قهرها انسان كانت راسمتله في خيالها أحسن وأعظم شخصية طلع هكي
مافكرتش في حب عبد المهيمن وانها خسراته قد مافكرت في اللي داره فيها أحمد كان هذا أكثر شيئ كاسر قلبها?

/
/

جا الصبح ونا واعي صبيت وطلعت مشيت للكافي اللي جنب الشقة فطرت فيه وبعدين مشيت المحل دبش خذيت كم لبسة ورديت عالشقة دوشت ولبست وطلعت شور الشركة مع رنت فوني بحتت وانصدمت بعد القيت المكالمة من سمر ورديت

سمر:صباح الخير

نا:صباح النور

سمر:شن اخبارك

نا:تمام شن اخبارك انتي

سمر:تمام معليش عالرنة في الصبح بس استغربت مكالمة أمس حسيت صاير شيئ

نا:لا والله مش صاير شيئ بس نا بنرن علي صاحبي وكنت ناعس ورنيت عليك بالغلط

سمر:باهي تمام

نا:معليش عالازعاج في نص الليل

سمر:حصل خير

نا:عندك جامعة

سمر:اها قاعدة واتية نرجى في صاحبتي بتجي تاخذني

نا:عندك امتحان

سمر:لالا محاضرات بس

نا:بالتوفيق

سمر:ان شاءلله

نا:القراية اصعب شيئ واثقل فترة فترة الامتحانات

سمر:اكيدة اتكون عايش علي اعصابك

نا:قالك

سمر;انت تقرا

نا:لا مكمل اقرايتي من فترة

سمر:تريحت

نا:بكل

سمر:شن كنت تقرا

نا:قريت هندسة كمبيوتر

سمر:حلو التخصص بس في الجامعة هنا مافيش في اي جامعة قاريه انت

نا:قاريه في جامعة —- في امريكا

سمر:مشاءلله
سمر:معليش بنسكر صاحبتي اترن أكيدة برا

نا:تمام سلام وسكرت

طلعت سمر الهبة صاحبتها

سمر:صباحو هبوشة

هبة:صباحو حبي

ركبت سمر مع هبة وهبة طلعت
سمر:مش وقت جامعة بكل امس سهرت مع سالم علي فيلم رعب ماكمل الا في الصبح

هبة:ومن قالك اسهري وانتي عارفة عندك جامعة بدري

سمر:قالي تفرجي امعايا ولنا واجد معش قمعزما وتفرجنا مع بعضنا ماحبيتش انزعله

هبة تضحك:تستاهلي جت علي راسك

سمر:خزي متشمته?
مع جية رسالة الها وكانت من احمد(لو احتجتي اي مساعدة مني رنيلي في اي وقت)

سمر ابتسمت ?

هبة:اووووو وين عالابتسامات والجو شن فيها الرسالة

سمر:مش حاجة مهمة

هبة:متأكدة

سمر:متأكدة ولو فيه حاجة انتي اول وحدة نحكيلك يعني

هبة:باهي المهم لو صارت حاجة احكيلي

سمر:اكيدة هذي

وكملن طريقهن للجامعة

/
/

نا وصلت للشركة ورن عليا العيساوي ونا رديت
نا :ايوا

العيساوي:عرفت حوشها وين

نا:تمام يبقى مالفلوس اللي امعاك تمشي توا تعطيها نفس المبلغ اللي زمان ونا وياك انتحاسبو بعدين

العيساوي:تمام وسكر

/
/

عند تسنيم كانت حالتها مأساوية ومتأثرة ومارقدتش طول الليل ولا طلعت من دارها وفي بالها ألف فكرة وفكرة ومش مصدقة اللي داره فيها احمد ومش عارفة شنو غرضه ماللي داره والوين بيوصل وشنو اللي كان بيديره بصورها ?

/
/

مرن ثلاث ساعات ونا نشتغل ونزلت تحت وقعدت انشيك عالاجهزة وعلي اعطالهن ونستلم في بضاعة جديدة
وبعدها رقيت المكتبي ومسكت تليفوني فتحت النت القيت سمر فاتحة دزيتلها

نا:شكلك روحتي?

سمر:اها ?

نا:شن جو محاضرتك

سمر:تمام

نا:باهي اكويس

سمر:اسمحلي توا بنسكر نت وبندير غداء

نا:تمام خوذي راحتك بس لو ماعندك مانع بعدين اندزلك ونحكي امعاك

سمر:ماشي تمام سلام توا

نا:سلام وسكرت سمر النت ونا قعدت انكمل في شغلي

/
/

عند حنان جاها العيساوي وجابلها الفلوس وقاللها من فاعل خير
قعدت ماسكة الفلوس واتشوفلهن نادتها امها وحنان خشت عليها

حنان:نعم ياأمي

ام حنان بصوت تاعب;من اللي جا

حنان:هذا فاعل الخير اللي كان ايدز في الفلوس ايام الشقة لولة دزهن اخرى هنا

أم حنان:ربي يعطيه الخير وين مايمشي

حنان:يااارب والله فتحها في وجي كنت مش عارفة منين انجيب حق الجرعة هذي بس الحمدلله ربي كريم وماينسى حد

ام حنان:الحمدلله بس كان اتخليهن تصرفي بيهن عالحوش واتسلكي الاجار وفكينا منها الجرعة كل فترة ناخذ فيها وبلا تحسن

حنان:خلاص ياامي تحملي مازالن بس جرعتين وبعدين مااتفكريش في الاجار ولا في حاجات الحوش ربي ايزيده من نعيمه هالراجل داز فلوس بزيادة

ام حنان:ياارب ربي يعطيه لين يرضيه ويبعد عنه عيال وبنات الحرام

حنان:ياااااارب ?

/
/

مشى الوقت وجا الليل تكيت علي مطعم خذيت عشاء ومشيت للشقة واول ماخشيت شفت التليفون وكأن الموضوع كان بالقصد النهار كله مانبيش انفكر في الموضوع ولما انروح نلقاه في وجي مسكته وكسرته طرف طرف وبعدين لميته كله وخذيت سطل وطلعت للبلكوني وولعت فيه النار وسيبته برا وخشيت مسكت تليفوني وقررت انرن علي تسنيم لاني قلت أكيدة هدت بعد اللي صار ونقدر انفهمها
رنيت عليها المرة الاولى دارتلي مشغول وبعدها عاودت مرة اخرى القيتها مقفل ?
انقهرت قهرة لأني خسرتها وخسارة تسنيم بالنسبة ليا اخسارة كبيرة عشان فعلا كنت انحس انها اختي اللي جابتها ليا الدنيا كانت سبب اني انعيش وانكمل حياتي الوقت اللي كنت نقعد فيه امعاها هو من أحسن اوقات حياتي بس توا خسرتها وخسرت حبها وبرائتها في لحظة نسو وطريقة غبية مني ?
في اللحظة هذي اكثر شيئ ندمت عليه اني طلعت مالفيلا بدون ماانبررها اللي درته
بس في لحظتها ماكنت قادر لا انفكر ولا نصرف اي تصرف
معش جتني نية لا في العشاء ولا شيئ خشيت للدار وبنرقد وقعدت انتقلب عالسرير ايمين ايسار انحاول نرقد ماقدرتش قمعزت ومسكت فوني وفتحت نت القيت سمر فاتحة كلمة نشط الأن علي رقمها كانت بالنسبة ليا كأنها كلمة تقدر اتعيش توا
دزيتلها

نا:اهلا

سمر ردت دغري:اهلين

نا كنت متضايق بكل ونبي نحكي امعاها

نا;عادي انرن عليك

طولت اشوي وماردت وبعدها

سمر:رن

وماصدقت قالتها دغري رنيت وهي ردت وياسلااام علي جمال صوتها وكيف ردلي الروح

سمر:الو

نا ساكت وبنسمع صوتها وبس

سمر:الو

نا:ايوا شن جوك

سمر:تمام كنك طولت مارديت

نا:شكلها التغطية بس

سمر:اها شن جوك

نا:تمام ماشية شن جو قرايتك

سمر:تمام حتي هي ماشية انت شن جو شغلك

نا:تمام حال التعب

سمر:اصلا انت شن تشتغل

نا:نشتغل في شركة جابر ال– للألكترونيات انا مدير قسم الصيانة غادي

سمر:مشاءلله شركة معروفة هذي والراجل هذا ديما يحكو عليه

نا:شن يحكو عليه

سمر;ايقولو اكويس وديما غالي عليه عمل الخير

نا ابتسمت:اها بكل

سمر:انت عندك معرفة بيه خاطي ان مدير الشركة اللي تشغل فيها

نا:اها نا اولده (وكانت اول مرة انقول اني ولد جابر?)

سمر:صح باهي ربي ايخليه لكي

نا:ان شاءلله

سمر:عندك خوت وخوات

نا:اها اخين واخت وحدة

سمر:ربي ايخليهم لكي ويابختك عايش امعاهم

نا:ليش انتي مش عايشة مع هلك

سمر:لالا هلي في مدينة اخرى

نا:كيف صار

سمر:قصة طويلة

نا:احكيها ليا حاب نسمعها

سمر:مرات انوجعلك راسك نا دوتي واجد وبعد نبدى معش نعرف نسكت?

نا:ونا نبيك تحكي بنسمعك وبنعرف من هي سمر احكيلي عليها وبإيجاز

سمر تضحك:بإيجاز ?

نا ضحكت:اها يعني كل شيئ بنعرفه

سمر: سمر هي بنت من عيلة بسيطة اتكون من عيلين وبنتين وباتهم وامهم عايشين حياه هادية جدا باتها من احسن الابهات وكان ديما واقف مع اعيالة واي شيئ يبوه ايلبيه سمر كان فيه فرق واحد بينها وبين باقي خوتها ان هي كانت بنت طموحة جدا وعندها حلم من هي اصغيرة تحلم بيه انها اتكون مهندسة وبعد كبرت قعد حلمي يكبر امعايا وقعدت بنكون مهندسة نفطية بس كانن فيه عوائق واجد عندي اولهن ان هالتخصص مافيش في المدينة اللي نحن فيها وثانيها ان اغلب عائلة بابا وماما عارضو ان بنت تقرا في المجال هذا وقعد بابا بين نارين نا نبي حلمي والأغلبية امعارضين عليه وحتى لو وافقو كانت قصة كيف اتخلي بنت تمشي تقرا بروحها في مدينة ثانية بس بعد فترة من محاولة بابا الاقناعهم وهما مارضوش قرر ان ياخدني وجيت نا وهو هنا وسجلني في التخصص الي من انا واصغيرة نحلم بيه وبعد بدت القراية وعشان ظروف البلاد ماحطنيش داخلي وجا خذالي شقة هنا وقعد فترة 3 شهور امعايا بس بعدها معش قدر يقعد اكثر من هكي عشان غادي في الحوش مستحقيله وهكي قرر ان ينقل خويا وايحطه في جامعة امعايا هنا ويقعد ايشيل وايجيب فيا وسجل خويا هنا وهو اصغر مني وليا توا 3 اسنين هنا ومازال في كل سنة بابا واقف امعايا ومع حلمي رغم معارضة كل الاقارب ورغم كلامهم له الا هو واثق فيا بككل وهذي اخر كلمة قالها ليا لما خلاني هنا (سمر نا واثق فيك ونا مسيب راجل مش بنت هنا)وفعلا لحدت اليوم ونا هكي ومانبيش انزل راسه لو بغلطة هك صغرها

نا:ربي ايخليلك باتك انسان زي هذا حطيه فوق راسك وديما افتخري بيه

سمر:اكيدة بابا عندي بالدنيا كلها

نا:حتى انتي بنت طموحة وتوا مش واجد اللي هدفهن الأساسي القراية وانهن ايحققن حلم طفولة

سمر:هذا اكثر شيئ مانقبلش كلام واجد سمعته امتاع عليش هذا كله وماشية في مدينة بروحك وماتعرفي فيها حد واللي اتقولي نهاية البنت حوش راجلها واتقمعز اتربي اعيالها واللي اتقولي توا يهلبك القطار واتعنزي مش فاهمين ان يهلبني القطار ونقعد بشهادتي وكرامتي وفلوسي ولا نجوز ويوم اللي انجي بنحل مسألة رياضيات الولدي مانعرفش لاني جاهلة وجريت ورا الراجل والاطفال قبل كل شيئ

نا:صح صدقتي تفكريك سليم ونا امعاك واحسن شيئ فتي كلام الناس وحققتي الشيئ اللي تبيه بس كم مازالك سنة واتخرجي

سمر:خلاص سنة وحدة

نا:معناها هانت كلها سنة واتحققي حلمك واتردي اتعيشي بين هلك

سمر:ان شاءلله الغربة صعبة ومافيش اوعر من انك اتعيش في فتراتك الصعبة بعيد عن هلك وخوتك وامك وباتك وتلقى روحك في اوقات محتاجلهم اكثر من اي شيئ

نا تنهدت:مافيش ابيخ من هكي شعور

وقعدت نا وسمر نحكو وانهدرزو طول الليل مرة نضحكو ومرة جديات ومرة نحكو قصص لين نعسنا عالتليفون وماحدش فطن للاخر

/
/

صباح يوم جديد
وتحديدا في دار راشد وخش عليه جابر

جابر:راشد راشد نوض نبيك

راشد حول الورغان من علي وجه:شن فيه

جابر:السلاح اللي امس شاريه شن تبي فيه

راشد:اي سلاح

جابر بعصبية:راشد فكني مالعباطة الراجل اللي خذيت منه السلاح حكالي انت شن تبي فيه

راشد:نا ماخذيت شيئ من حد

جابر بعصبية وصوت عالي:راشد احكي شن تبي فيه والا والله اتبلغ فيك ان امعاك اسلاح

راشد:اها شريته ونبيه واكثر من هكي معش تسألني

جابر مسكه من ارقبته:من امتى اتشيل في السلاح و من امتى تفهم فيه اصلا

راشد وهو ايحول في ايدين باته;من يوم وغادي بنشيله امعاي وبنتعلم عليه

جابر بعد منه وبعصبية;وعليش بتشيل اسلاح شن صاير امعاك

راشد:فيه بيني وبين واحد ثار ولازم ناخذه منه

جابر بعصبية:من هذا قولي اسمه ونا توا نصرف امعاه وانت اطلع برا الموضوع

رلشد:لا ماتقدرش عليه

جابر بعصبية:قتلك من ?

راشد:واحد ماتعرفش

جابر زاد عصب:أحمد صح

راشد بعصبية:انت اللي جبته الحياتنا ونا اللي حنطلعه منها

جابر :راشد هنا كلمتين واسمعهن كويس أحمد انت مش قده وبعد من طريقه احسن لأن لو حطك في راسه حتى نا معش نقدر انوقفه

راشد:انت ليش خششته الحياتنا وليش اتخاف منه للدرجة هذي

جابر:نا مش خايف منه وخششته الحياتكم نحمي فيكم انتو وبعد من طريقه مش حيجي قدامك واوثق وتأكد ان لا حيقرب ناحية فلوسكم ولا حيشاركم فيهن

راشد:بس انت مشغله مدير في الشركة

جابر:مدير بالأسم اما كل شيئ تحت توقيعك وتوقيعي وكل شيئ نا نملكه لكم وهو عارف هكي اكويس ولو تبي الوضع يمشي هكي مااتجيش شوره وطلعه من راسك احسنلك ياراشد وطلع وسيبه

وراشد قعد سارح وايفكر في كلام باته مع خشت سناء

سناء:ردبالك اتصدق جابر هو كذاب وبيعطيه كل شيئ وبيطلعكم هكي

راشد شاف الامه:انتي شن عرفك

سناء:نا عارفة جابر اكويس ونعرفه بعد يقعد يكذب

راشد:يعني نقتل احمد

سناء:هو حيموت بس مش انت اللي حتقتله حد ثاني

راشد:من

سناء:اصبر اشوية واللي نبوه حنطولوه بس انت معش اتقرب منه عشان لما ايموت ماحدش ايحطها فيك والسلاح اللي جبته رده من وين ماجبته مانبيش حد ايجيب سيرتك

راشد:تمام اليوم حنرده

سناء ابتسمت:نجك ليا انت الوحيد في عيالي اللي فاهمني

راشد:نعجبك?

سناء:خلاص صبي صحصح عشان تفطر وتمشي للشركة وطلعت

/
/

نا وعيت واول مافتحت عيوني اذكرت سمر واني رقدت عالخط وفتتها شفت تليفوني القيته طافي حطيته في الشحن وصبيت بسرعة دوشت ولبست وجيت للتليفون فتحته ودغري رنيت علي سمر وردت

نا:صباح الخير

سمر:صباح النور

نا:اسمحيلي امس والله مافطنت الا ونا راقد واوعيت توا القيت تليفوني طافي شحن

سمر:لا عادي اصلا حتى نا مافطنتش ونعست عالخط

نا ضحكت:قصدك رقدنا في نفس الوقت

سمر ضحكت:شكله هكي

نا وكنت طاير مالفرحة من ضحكتها ومش في خاطري انسكر بس كان ورايا شغل

نا:توا بنمشي للشركة نوصل غادي انرن عليك

سمر:تمام انا بروحي بنجهز روحي للجامعة

نا:سلام

سمر:سلام وسكرت

نا من اول ما وعيت عالدنيا ونا هذا اول صبح نطلع ونا فرحان هكي طلعت ولو نلقى اي واحد ايخطم عليا نحظنه من كثر ماانا جوي سمح وفرحان وطول الطريق ونا امولع اغاني وعايش اللحظة وحاس روحي فوق السحاب من فوق

وصلت عالشركة واول شيئ درته كلمتها اول ماوصلت وكانت بتطلع مع خوها للجامعة هدرزت امعاها اشوي لين وتى خوها وبعدها سكرت وهي طلعت للجامعة

/
/

مر اسبوع كامل ونا سمر علي تواصل اصدقاء بس لا اكثر وكنت فرحان واجد بصداقتي امعاها وحكايتي اللي امعاها كل يوم
وقعدت كل يوم نكتشف فيها في حاجة جديدة وكل يوم انزيد انتعرف عليها وانزيد انتعلق بيها وبكلامها وهدرزتهاوضحكها كانت عفوية بشكل وكانت شخصيتها مختلفه عن كل بنت مرت في حياتي كيف كانت عندها هيبة وعزة نفس غريبة وكيف معتزة بروحها واتحب ذاتها انسانة معتمدة علي نفسها في كل شيئ انسانة طموحة وفوق من هذا كله ايمانها بربي كان قوي ومحافظة علي صلاتها واتحب ادير الخير بإختصار كل شيئ فيها كان مميز بكككل وكان كل حرف وكل كلمة تنطقها ايزيد ايقربني منها

/
/

مر هالاسبوع ونا منسجم عالاخر ومعش فكرت في حد غير في سمر وبس وكل وقتي كان امعاها عالتليفون يانت يامكالمات ونا وهي كنا منسجمين عالاخر?

اما تسنيم فردت نفس وضعها اللي قبل 24 ساعة حابسة روحها في الدار ومعش تطلع ولا تحكي مع حد ?

أما عبد المهيمن أجر شقة بروحه وقعد فيها بس اكثر شيئ كان قاهرة مش الصور ولا اللي داره احمد اكثر شيئ كان مأثر فيه هو حبه التسنيم لان فعلا حبها حب حقيقي الحب اللي كان من أول نظرة وبعد ما لقى البنت اللي ديما يحلم بيها فجأة راح كل شيئ?

/
/

كان يوم الخميس في الصبح ونا كنت في الشركة كالعادة زي كل يوم رن فوني ولما شفته القيته معز ورديت

نا:خير شن الجو

معز:تمام شن جوك انت

نا:تمام حال الشغل

معز:اليوم فرحي بيش اتفضل

نا:الف مبروك وحاضر توا انجيك

معز:الله ايبارك فيك خلاص نرجى فيك

نا:تم

معز:بنقولك حاجة

نا نعم

معز:انت شن صاير بينك وبين عبد المهيمن

نا:هو شن حكالك

معز:ماحكالي شيئ بس شكله متعقد منك بكككل

نا:هو فاهم غلط

معز:باهي اسمع هو اليوم جاي للفرح تعال وتوا انقمعزكم مع بعضكم وفهمه وحلو المشكلة راه نحن ماعندنا الا بعضنا

نا كلمة معز اثرت فيا ?

نا:تمام توا انجي وانتفاهم امعاه

معز:خلاص نرجى فيك وسكر

كملت شغلي بس كل تفكيري كان شنو بنحكي العبد المهيمن كيف بنقوله اكيدة مش حنقدر نحكي الحقيقة لان هكي حنظر تسنيم ونفضحها ونا مانبيش هكي
قعدت انفكر شنو الشيئ اللي انقوله له وشنو الشيئ اللي نقدر نحكيه لين نقنعه ان مش زي مافهم وان تسنيم بس اختي واني مش حقير للدرجة هذي ?

/
/

جا المغرب ووقت مشيتي للفرح مشيت للشقة دوشت ولبست وطلعت غادي ووصلت وقعدت مع ناس مانعرف منهم حد بس كلهم كانو يعرفو معز كانت زحمة وناس واجدة والكل يحكو علي معز وقديش طيب والكل ايحبوه بطريقة غريبة
رغم ان زيي زيه مالملجأ بس معز داير اصحاب ومعارف واجد والدنيا كلها تعرفه وجايه تحظرله في فرحه
رغم ان انسان بسيط مايملك شيئ الا سيرته الكويسة ومحبة الناس له وهذا الفرق اللي بينا نا درت فلوس وعندي قوة بس ماقدرتش نكسب محبة حد حتى اللي كسبت محبتهم خسرتهم ?

بعد اشوي جا معز والكل قعدو ايسلمو عليه وايباركوله وايهنو فيه ومن ضمن اللي جايين امعاه عبد المهيمن بس ماجاش لا سلم عليا ولا بحت فيا

اشوي وجاني معز وسلم عليا وباركتله

معز:سلمت علي عبد المهيمن

نا:شافني ولف وجه

معز:نا توا نمشي انجيبه هنا وانتو تفاهمو

نا:تمام
مشى معز من جنبي وبيجيب عبد المهيمن ونا مازلت مش عارف شنو انقوله

وفي اللحظة هذي جتني رسالة علي تليفوني ومن كثر مانكره الرسائل اللي مالنوع هذا هذي اول مرة انحبهن لانها كانت بتنقذني من موقف مش عارف كيف نصرف فيه الرسالة كان فحواها
(اخرج الان على المطار ستكون هناك رحلة الى ايطاليا بعد نصف ساعة وستجد التذاكر في سيارتك)

طلعت دغري ومن غير ماحد يفطنلي ومشيت للمطار وبعد ربع ساعة طلعت الرحلة ونا كنت فيها ووصلت الايطاليا في الصبح نزلت في المطار غادي القيت سيارة خذتني الاجتمام كان سري وكان فيه ناس واجد مالمنظمة ةاستمر الاجتماع 3 ساعات وبعدها كمل وطلعنا ونا طلعت بنمشي الفندق ونا طالع نادوني حراس في ايديهم اسلاح وركبوني في سيارة وكان فيها الاب الروحي في سيارته

الاب الروحي:لم القاك منذ مدة

نا:انا حاظر في كل اجتماع

الاب الروحي:اعلم هذا لكن انا لا استطيع المجيئ الى كل اجتماع

نا:اجل لم اراك

الاب الروحي:استعد الايام القادمة سنبدأ في المهمات الصعبة وعن قريب جدا ستكون قائدا تعطي الاوامر لا تاخذها فقط

نا بفرحة:حقا

الاب الروحي:نعم انت في مدة قصيرة استطعت كسب ثقتنا جميعا وبكل مهارتك وذكائك واتباعك للأوامر بدون تقديم اي سؤال جعل الكثير يرشيحونك لمنصب اكبر من ماانت عليه الان

نا:انا خ
حقا سعيد بهذا الكلام

الاب الروحي:ولانك انسان ومن الارجح انه يدور برأسك العديد من الأسئلة فمن اجل تمييزك عندنا قررنا انت تسأل سؤالا واحدا وسنجيب لك عليه لتريح ولو جزء بسيط من تفكيرك

نا:انت محق

الاب الروحي:اجل بإمكانك طرح سؤالك

نا ماكان في بالي الا سؤال واحد وهو اكثر شيئ كان امحيرني ومالقيتله اي تفسير

نا:ما سبب طلبكم مني لقتل ذلك الرجل المسن الذي ميلود ال–

الأب الروحي:

#يتبع

قولكن شن حتكون الاجابة وشن حيكون سبب قتلهم للحاج ميلود بات عبد المهيمن ?

وتقريبا بطلعته المفاجئة بدون مايحكي مع حد خرب اي لحظة صلح مع عبد المهيمن وبهكي العلاقة حتكون خربت نهائي لان ثبت علي روحه كل شيئ ?

واختفائه المفاجئ زمان ماكان ايأثر في حد قولكن توا حيأثر في سمر وشن حدير او اتقةل وهو شن حتكون اجابته الها ?

كله حنعرفوه في الحلقة الجاية?

صح تأخرت بس عوضتكن بحلقة طوييييييلة بكل ?

أسفة لو فيه لخبطة في الأسماء وأكيد رأيكن ايهمني?

گـتـابـتـي Koka Saleh