الجوكر | للكاتبة Koka Saleh

#الـجـوكـر ?

الـحـلـقـة (9)

(حقيقية ممزوجة بالخيال)

گـتـابـتـي #Koka_Saleh

::::::::::::::::::::::::::::::::::::::::::::::::::::::::

بسبس قبل مانبدو فيه تحدي لكن ?

كان وصلتن الحلقة هذي ل 2000 لايك نوعدكن بكرا في الليل اتكون فيه حلقة ?

::::::::::::::::::::::::::::::::::::::::::::::::::::::::::::::::::

نا مستغرب من مكالمة عبد المهيمن في الصبح وانفكر شن يبي مني وشن الشيئ اللي خلاه بيشوفني من صبح ربي وقعد قلبي قابضني ومش متريح بعد اشوي تفكير دسيت التليفون في جيبي ورفعت راسي وشفت البنت اللي جتنا في مكتبة التصوير سمر ايوا هي سمر كانت طالعة من محل وركبت في سيارة وطلعت
جاني شعور بنلحقها بنعرف مكانها بس ماقدرتش لان عبد المهيمن بيحيني ومانقدرش نطلع قبل ماايجي
قعدت انتبع في السيارة بعيوني لعند مااختفيت عليا وقعدت سارح فيها وفي شكلها مش عارف شنو الشيئ اللي خلاني انفكر فيها رغم اني متلاقي مع بنات واجد ومن خلال شغلي كانن متاحاتلي واجد بس ولا عمري فكرت في وحدة ونا سارح في تفكيري هذا

عبد المهيمن:شن الجو

رفعت راسي وشفته كيف متغير طالق لحيته وناقص بككل ووجه باين عليه الحزن

نا:تمام شن جوك انت

عبد المهيمن:اهو ماشية

نا:مافيش حال بيقعد هكي ديما الحياة ماشية مهما صار

عبد المهيمن:الحمدلله علي كل حال

نا:شن فيه شن صاير امعاك شغلتني عليك

عبد المهيمن:خلينا انخشو للكافي ناخذ قهوة لاني مازال مافطرت ونحكيلك جوا

نا:تمام

وخشينا جوا طلبت نا سبسيان وعبد المهيمن خذا مكياطة

عبد المهيمن:مانبيش اندير مقدمات طوال وحنخشلك في الموضوع دغري

نا:تمام

عبد المهيمن:القصة ومافيها إن نا قاعد عند معز وماكنت عارف ان بيطلع فرحه الأيام هذينا وهو شكله انحرج يحكيلي بعد قعدت عنده ومافتحش الموضوع بكل لعند اليوم سمعت نسيبه جايه وقاله بيجيبو دبش البنت وهو حكاله ان نا عنده وهكي بس كلام نسيبه ماعجبنيش وقال المعز ان هما مايبوش ايأجلو ولو تمى بيأجل يبقى يلغتى الفرح بكل ونا مانبيش انكون سبب ايخرب فرحته وهو اكثر واحد فينا بيحس بإستقرار في حياته وايدير حوش ووليه واعويله مانبيش نحرمه من فرحته انت عارف كيف فاقدين للحب وللحنان ونحن اصغار

نا:عارف ?

عبد المهيمن:حكيت امعاه وفي الاول رفض اني نطلع من عنده لان عارف ماعنديش وين نقعد عشان قالولي ماانجيش للحوش وامي رابط وبعد واجد قدرت نقنعه ان نا بنقعد عند واحد نعرفه بيش خلاني نطلع لكن بصدق نا ماعنديش حد نقعد عنده وماالقيتش الا انت اتحملني هاليومين لين اندور شقة اصغيرة ورخيصة انأجرها

نا مع ان كان صعب عليا اني انخششه في حوش اللي كانو سبب في اللي صايرله توا كله وفي ميتت باته بس كان هذا بالنسبة ليا شيئ بسيط انساعده بيه عشان انكفر عاللي درته فيه ?

نا:ولا ايهمك الفيلا كلها تحت امرك

عبد المهيمن:يومين بس لين نلقى شقة

نا:مااتقولش هكي الفيلا كبيرة ومش حتضايقنا حتى لو قعدت امعانا لعند لما امك اتفك

عبد المهيمن:بارك الله فيك والله ماننسالك هالمعروف نهائي

نا:مش بينا يا راجل ريت هالحاجة الكبيرة اللي درتها لكي

عبد المهيمن:تسلم وهذا ليش جيتك عارفك عمرك مااترد صاحبك نظرة باتي فيك ماخابتش قالي هذا راجل صاحب صاحبه وامتاع مواقف وعمرك مااتلاقي زيه ردبالك تخسره

ياربي كلام عبد المهيمن كان قاتل بالنسبة ليا كان يقهر وكأن قاصد يحكي هكي عشان ايزيد تأنيب ضميري ?

نا:الله يرحمه وهي خليني انوريك الفيلا واتعرف علي عمي جابر

عبد المهيمن:توا عندي شغل في المركز بعد انكمل انرن عليك اتوصفلي مكانها وانجيك غادي

نا:تم وحتلقاني موتيلك دار لكي

عبد المهيمن:تسلم ياخيي

نا بقهرة من وسط قلبي علي كلمة خيي:سلمك

عبد المهيمن صبى:انتلاقو بعدين

نا:تم

عبد المهين بيمشي

نا:ماعرفتوش شيئ عاللي دار هكي في المرحوم

عبد المهيمن بحزن:لعند توا لا بس وين بيريح مني مصيري لاقيه وربي اللي بيشوفه مني مش حيشوفه حتى في جهنم

وكان يحكي وكمية شر وحقد في عيونه علي قاتل باته مش طبيعية?

نا:ان شاءلله تلقاه

عبد المهيمن:ان شاءلله ومشى وطلع مالكافي

نا قعدت انفكر في كلام عبد المهيمن وبعد تفكير واجد رددت جملة وحدة كتعبير علي كل شيئ صار امعايا
نا : انا لست شخصاً سيئاً انا شخص طيب جداً حدثت له أمور سيئه .!

صبيت سلكت اللي خذيناه وطلعت مالكافي وتوجهت شور الشركة

/
/

أول ما وصلت للشركة مشيت المكتب جابر دقيت وخشيت

جابر;توا كيف جيت

نا:أها

جابر:دزيتلك اوراق علي ألات يبن صيانة شوفهن وانزل تحت للمشغل شوفهن وشيك علي اعطالهن

نا:تمام توا انشوفهن توا بس جاي بنقولك علي موضوع

جابر وهو مطبس وايقلب في اوراق:شنو

نا:فيه واحد صاحبي بيجي يقعد عندنا في الفيلا كم يوم

جابر رفع راسه:من صاحبك هذا علي حد علمي ماعندكش اصحاب

نا:هذا صاحبي اللي كان امعايافي الميتم

جابر:راك اتقولي اللي قتلت باته

نا:أها

جابر صبى:انت كيف بتجيب واحد انت قاتل باته في الفيلا عندنا

نا:هو صاحبي وطلب مني لان عنده ظروف وماعندش وين يقعد وهنا كم يوم يعني مش قصة

جابر;وافرض عرف ان انت قاتل باته مش كلنا انريحو فيها

نا:ماعندش منين يعرف نا مش عيل اصغير وعارف شغلي كويس ولو ماعندكمش فيا ثقة واني قادر علي اي شيئ ماكنتوش شغلتوني امعاكم

جابر:نا خايف عليك

نا كنت عارفة خايف علي روحه ?
نا:عارفك خايف عليا ?بس اطمن مش حيصير شيئ

جابر:تمام اموافق بس كان عرف حاجة حط في بالك ان حيموت وانت اللي حتقتله

نا:تمام

جابر:مااتخليش ايخش الدارك الاحتياط واجب

نا:تمام بس وين انحطه

جابر:جهزله الجناح اللي جنب الفيلا يقعد فيه

نا:تمام

جابر:دير بالك كويس وخلي اعيونك مفتوحات عشرة عالعشرة

نا:كون هاني وطلعت ونا راقيلي من جابر ومن كذبه اللي يكذب فيه واني هامه وهو كل همه في روحه وان ماينظرش ?

/
/

خشيت المكتبي وسكرت وبديت نشتغل وانشوف للاوراق اللي عندي
بس كان كل ورقة نقلبها انشوف فيها في صورة سمر ماعرفتش ليش صورتها وصوتها عالقات في مخيلتي وماحولنش
المشكلة اني انقابل في بنات اشكال والوان وجنسيات مختلفة لا عمري حاولت انقرب من وحدة ولا خشت وحدة البالي
فيه حتى اللي عرضت نفسها عليا ورفضت لان موضوع الصبابا ماعنديش عليه وخصوصا ان صارلي نفس الفوبيا منهن من بعد موضوع الملهى
بس البنت هذي غير رغم انها ماعطتنيش اي وجه بس صورتها وصوتها قاعدات عالقات في مخيلتي
لا هو اعجاب ولا حب حاجة ماعرفتهش شنو ?

في لحظات تفكيري هذينا قررت نمشي المكتبة التصوير اللي شفتها فيها شيئ في داخلي جبرني اندير هكي ونا حبيت نسمعه وانمشيه للأخر وانشوف شن بيصير
صبيت خذيت مفتاح سيارتي وتليفوني وطلعت وتوجهت شور المكتبة

/
/

وصلت للمكتبة وخشيت درت دورة عليها وشيكت عالألات وبعدين مشيت شور الشاب اللي يومتها تناقش امعاها عالبحث

نا:تذكر البنت اللي جت من حوالي اسبوعين يوم اللي نا كنت هنا

هو:اي بنت واجد ايجن هنا

نا:اللي ماكنت ماتبيش اديرلها البحث ونا قتلك ديره وساعدتك فيه

هو تغيرن ملامح وجه:اها نذكرها

نا:معش جت هنا

هو:جت امس جايبة بحث عشان نشتغلوه الها

نا:وماقالت امتى اتجي تاخذه

هو:قالت اليوم عالساعة 11:30 اتجي تاخذه

نا بحتت في ساعتي:وتوا الساعة 11 يعني نص ساعة واتجي

هو:اها

نا:تمام والبحث جاهز

هو:اها هذا هو ومده ليا مالطاولة اللي جنبه

نا خذيته:اسمع توا لما اتجي وتسأل عليه قوللها مادرتش عندنا شغل واجد

هو:بس نا اشتغلته الها

نا:دير نفس ماقتلك

هو:باهي ليش

نا بحدة:دير اللي قتلك عليه وبلا اسأله واجد وخلي الباقي شوري

هو:ماشي

خذيت الملف ولفيت وقمعزت جوا وقعدت انشوف للكمبيوتر إذا فيه فيروسات او وضعه تمام

مر الوقت ونا كل اشوي انشوف للوقت وانشوف للباب ونرجى فيها اتخش وبعد اكثر من نص ساعة خشت

سمر:صباح الخير

هو:صباح النور

سمر:امس جبتلك بحث درته ليا

هو:الحق مالحقتش انكمله لان كان عندنا شغل واجد امس

سمر :كيييييف بس نا اعبيت عليك وحكيتلك ان عندي امتحان ونص الدرجة عالبحث وفوق هكي بيجيب سؤال منه يعني مازال بنقراه

نا:ياابلة تعالي بكرا تلقيه جاهز

سمر:في شن نحكي توا قلتلكم لازم نقرا منه اليوم

نا:باهي ماعندكش نت في الحوش

سمر:لو عندي نت قوي واينزل بحث ماكنتش كملتها ماشية جاية علي محلات الطباعة?

نا:يعني انتي تبيه اليوم ضروري

سمر تنهدت:شن رايك انت ?

نا مسكت ضحكتي بالغصب عليها وعلي شكلها كيف معصبة?

نا:خلاص توا انديرلك راي انا حنشتغله لكي توا وعطيني ايميلك عالفيس اندزه لكي ملفpdf وانتي حمليه علي لاب اقري منه وبكرا قبل ماتمشي للامتحان اطبعيه اوراق وتمت القصه

سمر ماكان عندها حل الا انها اتوافق لان معش عندها وقت تمشي المكاتب اخرى امتحانها بكرا ولازم تقرا

سمر:تمام أسمي سمر يوسف

نا:بالانجليزي ولا العربي

سمر:بالانجليزي وحاطة صورة بنت مغطية وجهها بإيديها

نا ضحكت ?

سمر:قلت حاجة اتضحك?

نا:اسف بس القصة اكيدة حيطلعلي عرم أسماء هكي ماحتى قعدت اندور علي صورة بنت حاطة يدها علي وجها احسن حل نعطيك رقمي ودزيلي عالوتس صورة ايميلك ونا حندزلك الملف

سمر بقلة حيلة:ماشي اي حاجة بس انحل المشكلة هذي

نا:تمام سجليه عندك 092420—–

سمر:تمام خزنته حندزلك لما انروح وطلعت ونفس المرة اللي فاتت لا شكر ولا شيئ ?

بس نا كنت مستغرب من روحي ليش درت هكي شن صارلي ولقطة عطية الرقم ماكانت في بالي كل اللي كنت بنديره بنأخر البحث عشان اترد ثاني يوم بس ليش عطيتها رقمي شن القصة وشن اللي ايدور في عقلي مش فاهم واول مرة نقعد مش فاهم روحي كل اللي عرفته ان لما شفتها تلخبطت وهذي اول مرة اتصير امعايا واتلخبطني بنت?

فتت كل هالكلام وقلت انتبع الصوت اللي داخلي مرة وهي تجربة ومش خاسر شيئ ?

حملت ملف Pdf امتاع البحث مالكمبيوتر علي جهازي وطلعت

ونا في الطريق رنيت علي حركات وهو رد

حركات:صباح الحب جوكرنا شنجك

نا:تمام وران نبيك في موضوع

حركات:اكيدة يعني هو انت تعرف رقمي الا لما تبي حاجة ?

نا:وعليش منحط اانت هنا الا عشان هكي

حركات:انقنك صدقت امر ادلل يابعد نظر عيني ?

نا;من كثر معاشرتك للصبايا قعد كلامك هكي حتى مع الرجالة

حركات:ناعليا هو فيه احسن مالصبايا في الدنيا?

نا ضحكت:عموما نا ماشي شور المزرعة نبيك اتجي غادي عندي امعاك موضوع

حركات:تم حتلقاني قدامك ياروحي

نا ضحكت وسكرت

بعد اشوي وصلت للمزرعة وفعلا القيت حركات واصل قبلي

حركات:عندك تاخير دقيقية

نا:من امتى انت واصل

حركات:الدقيقة اللي تأخرت فيها ?

نا:حركات فكني من حركاتك وتعال نحكيلك اللي جايبك عشانه وخشيت وهو خش ورايا

نا:فكني من التسهويك والطروح واسمعني كويس

حركات:لا دبينك حكيت هكي معناها موضوع جدي ارجى انقمعز وانحط كراع علي كراع عشان نستوعبك

نا:حركات ?

حركات:بلا جو نسمع فيك

نا:نبيك ادورلي علي شقة

حركات بحت فيا زين ?
حركات:قصدك ران عليا مالصبح وجايبني لعند هنا عشان اندورلك علي شقة والله طريقة كلامك والجو اللي دايرة قلت قاتل واحد وتبيني ندفن امعاك جثته

نا:عنجد ثقالتك تي اسمعني لعند لاخر ازح

حركات:الحمدلله مازال فيه باقي كمل امعاك

نا:الشقة هي اول حاجة نبيها اتكون بعيدة اشوي ونبيها في منطقة تقعد هادية ومانبيش حد يعرف انها ليا

حركات:اعتبرني القيتها فيه شيئ اخرى مازال

نا:اها فيه وهذا الاهم ونبيك تسمعني بكل حواسك

حركات:كلي اذان صاغية

نا:نبيك ——–

نا:فهمت كل اللي قلته

حركات:فهمته وبالحرف حنفذه

نا:اهم شيئ السرية التامه

حركات:هون حفرنا وهو طمرنا كون هاني

نا:تمام وحقك محفووظ كله عارفها حاجة صعبة بس كله بثمنه

حركات:عارفك ياجوكر مش اول مرة نشتغلو مع بعضنا

نا:تمام يبقى متفقين

حركات:اكيدة وطلع من جنبي

ونا مسكت تليفوني وفتحت النت القيت رسالة عالوتس من رقم غريب مكتوب فيها

(نا سمر وهذي صورة ايميلي دزلي الملف قبل ماانسكر نت عشان بنقرا ومش حنقدر نفتح واجد )

رديت ودزيتلها

نا:اهلا بيك

سمر:اهلين

خش عليا حركات

حركات:نبي انجيب حاجة ناكلها نحسبك امعايا

نا:تمام تمام غير اطلع توا

حركات بحت فيا:شكله صباح الحب صح?

نا:اطلع وفكني من هرجتك

حركات:تم طالع وطلع من جنبي

نا رديت عليها:شن جوك

سمر:تمام وياريت ادزلي البحث

نا:حاظر حندزه لكي ليش مستعجله

سمر:عندي امتحان ونبي نقرا معش عندي وقت

نا:ان شاءلله بالنجاح وحندزلك البحث ولو قعدتي تبي مساعدة قوليلي

سمر في عقلها هذا كنه?

سمر:ان شاءلله بس دزلي البحث

نا:حاظر
فتحت الفيس ودزيتلها طلب صداقة وخشيت عالرسائل دزيتلها الملف ورديت عليها عالوتس

نا:دزيتلك راه

سمر:تمام وشكرا

نا:العفو واول مرة تشكريني ?

سمر:??

وقعدت نرجى في اي رسالة ثانية مادزتش شيئ

خشيت عالماسنجر القيتها مستلمة الملف وخشيت عالفيس القيتها مش قابلة طلب الصداقة

قعدت اشوي نرجى في رسالة اي شيئ ماجاني شيئ طلعت القيت حركات واصل وجايب امعاه سندوتشات
قمعزت وكليت نا وياه مع جو بصارة وضحك والحق كان جوه سمح وايغيرلي في جوي ?

بعد تغدينا طلعت ومشيت شور الشركة كملت شغلي ومشيت للمشغل وقعدت انشيك عالالات وعلي اعطالهن وطولت فيه واجد ومافطنتش للوقت الا لما رن تليفوني وكان عبد المهيمن ورديت عليه

نا:ايوا

عبد المهيمن:وين قاعد

نا;في الشركة وتوا ماشي للفيلا

عبد المهيمن:خلاص اشوية وانجيك غادي

نا:تم
وخطر عليا اني مازال ماوتيتله الجناح اللي بيقعد فيه طلعت بسرعة ومشيت شور لفيلا واول ماخشيت مشيت للخدامة وقلتلها اتجهز الجناح اللي جنب الفيلا مع خشت سناء

سناء:وشن تبي فيه الجناح اللي جنب الفيلا

نا:انوتي فيه الصاحبي بيقعد عندي كم يوم

سناء بعصبية:وبالك تحسابها فيلة بوك لين اتجيب في اصحابك هنا

نا طلعت بطاقتي ورفعتها فوق:هنا مكتوب أحمد جابر شاهين يبقى نا ولد جابر يبقى الفيلا هذي فيلة باتي وعندي فيها زيك واكثر حتى منك

سناء بصوت عالي:هذا اللي ناقص ولد الميتم ايداعكنا في رزقنا

نا قربت منها وبتحدي:ولد الميتم اللي هازية عليه يقدر يدفنك وانتي حية ?

سناء ضحكة ضحكة هزوة;هه? خفت منك

نا:ومن قالك نبيك اتخافي مني بالعكس نا انعزك معزة ربي بس عالم بيها ?

سناء بعصبية:صاحبك لو ايجي هنا انلزه

نا:الموضوع هذا تفاهمي فيه مع باتي جابر اللي هو راجلك اللي اجوز عليك وجيت بنمشي وبعدها رديت

نا:خطرها معقولة وحدة زيك وبقوتك تسكت علي شيئ زي هذا بجد بجد حنغير نظرتي عليك ? طلعت ورديت عليها اخرى?

نا:قبل انسيت حاولي اتقربي من صاحبي ولو بكلمة الرد مش حيكون عليك علي اعيالك وانتي ادرى وافهم نا شن نقدر اندير وطلعت وخليت الناااار والعة فيها? وقريب اتموت ?

/
/

سناء مسكت تليفونها ورنت علي جابر وجابر رد

سناء بعصبية:توا اديرلي حل مع الفرخ اللي اسمه احمد

جابر:كنه شن دار

سناء بعصبية:بيجيب صاحبه هنا شن يحسابه فيلة بوه

جابر:عارف وحكالي مالصبح ونا قتله باهي

سناء بعصبية:والله مالكيش الحق ادير هكي ليش ماخذيت اذني قبل

جابر:الفيلة فيلتي ونا مازال حي واللي انوافق انخششه انخششه نا بجوي

سناء بعصبية:انت هكي اتقوي فيه علينا ومش بعيدة حيقتل واحد من عيالك وتوا هددني بيها

جابر:ناعارفة ماايديرهش وكان هددك فاكيدة استفزيتيه

سناء:يعني الغلط طلع مني

جابر:اها ومااتقربيش منه ولا من صاحبه نا عطيته الاذن وسكر عليها

سناء بعصبية:ماشي ياجابر لو ماندمتك انت والفرخ اللي جايبه مانبقى سناء ?

/
/

وصل عبد المهيمن للفيلا وخششته للجناح وعجبه بكككل

عبد المهيمن:والله موقفك هذا ماننساه لكي بككل اقسم بالله لولاك مش عارف شن درت

نا:مااتقولش هكي مش بينا ياراجل

قعد عبد المهيمن ايتفرج عالجناح ونا امعاه وبعدها

نا:كسد هنا اشوية انجيب عشاء وانجيك

عبد المهيمن:مش داعي اتعب روحك

نا:مافيش تعب نا بروحي مازال ماتعشيت

عبد المهيمن:باهي

خليت عبد المهيمن وطلعت وركبت السيارتي بنجيب عشاء مالمطعم لان ماعنديش خلوق انتناقش مع سناء علي العشاء واديريلي موضوع اخرى ?

/
/

عند تسنيم في الدار
كانت تسمع في أغاني وبعدين جاعت ونزلت للمطبخ بتاكل حاجة

تسنيم:فيش حاجة ناكلها

الخدامة:ما اتأخر ماما نص ساعة وايكون العشاء جاهز

تسنيم:باهي من قاعد وبيتعشى امعايا ولا زي كل يوم بنتعشى بروحي

الخدامة:مدام كبير موجود وبابا أحمد موجود

تسنيم بفرحة:أحمد روح

الخدامة:نعم ماما

تسنيم;خلاص اسمعي رقيلي العشاء ليا انا وهو في داره ومااتقوليش الماما اني نا عنده

الخدامة:بابا احمد في الجناح جنب الفيلا موس في داره

تسنيم:غريبة ليش غادي عالمهم دزيلي عشايا مع احمد

الخدامة:حاظر ماما

طلعت تسنيم بشويش ومن غير ماامها تفطنلها ومشت شور الجناح

وخشت ومالقتش حد في الجناح بس سمعت صوت حد ايدوش في الحمام عرفاته أحمد قعدت عند الباب وترجى في احمد يطلع منه عشان تفجعه?

/
/

نا وصلت للمطعم وخذيت عشاء منه وركبت في سيارتي ورديت للفيلا

#يتبع

قولكن شن بيصير وكيف حيكون اللقاء بين عبد المهيمن وتسنيم وشن موقفهم لو أحمد خش عليهم?

وقولكن شنو الشيئ اللي كان بين أحمد وحركات وشنو اللي أحمد قاعد ايخططله ?

وقولكن سمر هذي شنو وراها وشنو خششها الحياة احمد وهل حتكون الها تأثير علي حياة احمد او الجوكر?

كله حنعرفوه في الحلقة الجاية ☺

وزي ماقلتلكت كان وصلتن الحلقة ل 2000 لايك نوعدكن بكرا في الليل اتكون فيه حلقة ?

أسفة لو فيه لخبطة في الاسماء وأكيد رأيكن ايهمني ?

گـتـابـتـي Koka Saleh