الجوكر | للكاتبة Koka Saleh
الـحـلـقـة (2)
(حقيقية ممزوجة بالخيال)
گـتـابـتـي #Koka_Saleh
::::::::::::::::::::::::::
لايك قبل القراية وتعليق بعد القراية والكلام للكل فكوني مالقراية بدون تفاعل راه والله التفاعل بالايكات والتعليقات هو أكثر شيئ ايحفزني للكتابة وبذات التعليقات الطويلة انحبهن?
“”””””””””””””””””””””””””
جابر ابتسملي:نا توا انشيلك بس مش للميتم حنشيلك المكان اخرى
نا:بس نا نبي الميتم
جابر:كان ماعجبك المكان اللي بنشيلك له انردك للميتم تم يابطل وضحكلي
نا ضحكتله:تم
جابر باسني:خلاص عدي ارقد الوقت تاخر
نا:تصبح علي خير ورقيت الداري ونا فرحان واخيرا بنفتك من سناء وخشيت سريري ورقدت ومافكرتش شنو المكان اللي بكرا بنمشيله بقد ماكنت انفكر ان واخيرا بنطلع من هنا
/
/
/
عند جابر وسناء في الصالون
سناء:قالك بنمشي من هنا
جابر:اها
سناء:وماقالكش ليش
جابر:لالا
سناء:يبقى هكي ايصير منه زي ماانت تبي صح
جابر:اهم شيئ حفظ السر ونجح فيه
سناء:بس هو حفظه لان خايف بس
جابر:عارف بس بعد نمشو بكرا ونبدو في التدريبات حنفهموه كل حاجة وحيحفظ السر من دون خوف بالنسبة ليا اهم شيئ قدرة التحمل عنده
سناء:من ناحية عنده قدرة تحمل فقدرته غريبة علي مادرت فيه مابكش بكل
جابر:انتي درتي كل اللي قتلك عليه
سناء:كله والعيل كان غريب عمري ما شفت طفل هكي
جابر:امالا ليش نا اخترت هذا بذات مالميتم
/
/
/
تعالو انردو اليوم اللي خذاني مالميتم
جابر خش للميتم كلنا شفناه بعد خش كان لبسته وشكله غريب واول مرة ايجي للميتم واحد هكي
واول ماخش المكتب المدير
المدير صبى:اهلا اهلا استاذ جابر نورت الميتم ليش ماقلت انك جاي كنا درنا الواجب
جابر ضحك:حبيت انديرها مفاجئة لكي
المدير:واحلى مفاجئة تعال تعال قمعز هنا
جابر:خليك في مكانك متريح
المدير:لا والله مااتصير العين عمرها ماتعلى عالحاجب ولولاك راه مااحلمت بالكرسي هذا
جابر قمعز علي كرسي المدير:انت شخص ناجح ودبينك امعاي حنوصلك الاعلى مالكرسي هذا
المدير ابتسم:ونا من يدك هذي اليدك هذ
جابر:يبقى اثبتلي حسن نيتك ولبيلي طلبي اللي بنطلبه توا
المدير:انت مش تطلب انت تأمر امر ونا انفذ
جابر;نبي انتبنى طفل
المدير:هذي بس احسن طفل في الميتم اعتبره ولدك لكن يااستاذ جابر ومعليش عالفضول بس تقريبا ربي رازقك بعيال
جابر:الحمدلله ربي رازقني ونبي انزيد عليهم واحد وناخذ اجر من ربي فيه مانع
المدير:ابدا مافيش مانع وتقدر اتفضل الديارهم وتختار اللي تبيه والعمره اللي ايناسبك
جابر اتكي عالمكتب وقعد ايسبح بالسبحه وبعدها بحت في المدير
جابر:انا نبي مواصفات خاصة ولو مالقيتهنش عندك نبيك اتشوفهن ليا في ميتم ثاني
المدير:شنو المواصفات المطلوبة
جابر:نبيه ايكون نبيه وذكي ويلقطها عالطاير واتكون شخصيته مختلفة عن باقي الاطفال يعني مميز في كل شيئ ونبيه ماايكونش مالاطفال اللي ديما يبكو يعني طبعه ايكون راجل بس صغير
المدير;انا عندي واحد بالمواصفات هذينا بس شكله يعني
جابر:ماايهمنيش الشكل نا ايهمني العقل ايكون نظيف
المدير:من ناحية عقله نظيف فهو نظيف ونفس المواصفات اللي طلبتهن بزبط بس انت ليش تبيه هكي
جابر شافله:انت نفذ وانت ساكت وطبعا حقك محفوظ
المدير ضحك:خيرك سابق
جابر طلع شيك من جيبه:شوف هنا حنكتبلك مبلغ هذا لكي خاص بيك انت لكن بشرط
المدير كان ايشوف للشيك وعيونه قلوب:تفضل ?
جابر:اجراءات التبني مانبيش ايكونن بأسمي لان نا نبي العيل بس بنحطه علي اسمي من دون تبني ولا شيئ
المدير:كيف هذي
جابر:والله لو تبي الفلوس حتلقالها حل مانبيش حد يعرف اني نا تبينته دير اسم اي حد ثاني بس اسمي لا والافضل انك مااديرش ان طلع مالميتم اصلا
المدير:حاظر حنصرف
جابر:معناها هكي المية الف هذينا حلال عليك ومدله الشيك
المدير:ماننحرموش من كرمك يااستاذ جابر
جابر:جيبه ليا
المدير:حاظر وصبى
/
/
/
انردو عندي
اليوم الثاني في الصبح
وعيت لكن اليوم علي غير العادة مااوعيتش علي امية راشد وعاني صوت جابر فتحت عيوني القيته عند راسي
جابر:صباح الخير
نا:صباح النور
جابر:هي نوض وصحصح واغسل وانزل عشان تفطر امعانا وبعدها بنمشي نا وانت
نا:حاظر
طلع جابر ونا صبيت غسلت وغيرت ادبشي عشان بنمشو ونزلت تحت القيتهم كلهم مقمعزين علي طاولة ويفطرو في المطبخ قمعزت امعاهم وكانت سناء اتشوفلي بحقد معش بحتت فيها وقعدت ناكل لين صبى جابر
جابر:بعد اتكمل جيب ادبشك والحقني
لفت حنان الجيهتنا ونظرتها ليا اليوم هذكي مستحيل ننساها لان كان معناها كبير كأنها اتقولي ماتمشيش خليك
نا:حاظر
نزلت مالكرسي ومشيت بنجيب ادبشي مالدار نا خشيت وحنان خشت ورايا
حنان:قصدك بتمشي
نا:اها
حنان والدموع في عيونها:بترد للميتم
نا:لالا عمي جابر قالي بناخذك المكان اخرى
حنان نزلو ادموعها:في خاطري انقولك خليك امعايا بس انشوف في معاملة سناء لكي ونا مش قادرة انديرلك شيئ بالك المكان الثاني ايكون أحسن من هنا
نا:اي مكان مافيش سناء سمح
حنان حظنتني حظن حسيت بيه بحنان الام اللي يحكو عليه اول مرة حد يحظني وانحس الاحساس هذا الدرجة نزلن ادموعي من غير ماانحس وهي كانت تبكي بعبرتها وبعد حظن طوييييل بعدتني منها ومسحتلي ادموعي
حنان:نا نكتبلك رقم حوشنا وخليه امعاك والمكان اللي اتجيه رن عليا منه ونا انجي انزورك فيه
نا فرحت:باهي
طلعت جابت ورقة وجتني وكتبت فيها الرقم ودستها في جيبي
حنان:حافظ عليها راك اتريحها
نا:لالا مش حنريحها
حنان باستني علي خدي:دير بالك علي روحك
نا:حاظر ياماما (وكانت اول مرة انقولها الها رغم انها طلبت مني من قبل انقولها الها)
حنان ماتحملتش وردت حظنتني وقعدت تبكي
نا بعدت منها:ماتبكيش توا لما نكبر واندير حوش انجي ناخذك اتعيشي امعايا(مانعرفش في وقتها ليش حكيت هكي بس ممكن عشان حنها عليا كنت نبي انحس بيه حتى ونا كبير)
حنان ابتسمت:خلاص نرجاك تكبر واتجي تاخذني
نا:خلاص خليني نمشي
باستني مرة اخرى وطلعت وتلاقيت نا وتنسيم عالدروج وكالعادة في يدها طرف شكولاطة مداته ليا
تنسيم:هذا مني
نا:شكرا?
تنسيم:ياريتك تقعد امعانا
نا بحزن:وسناء ?
تنسيم نزلت راسها وسكتت
نا رفعتلها راسها بيدي:ماتزعليش لما نكبر حنجي عشان انحقك
تنسيم ابتسمت ونا نزلت درجتين وتنسيم كانت اتبحتلي وقالتلي كلمتها اللي من اول ماجيت وهي اتقول فيها
تنسيم:ياريتك انت خويا بدال راشد
نا ابتسمتلها:حتى نا خوك?
تنسيم ضحكت:انتلاقو بعد نكبرو صح
نا:اكيدة
تنسيم شيرتلي بيدها:باااي?
نا شيرتلها:بااي? ونزلت
القيت جابر راكب في سيارته ركبت امعاه وطلعنا وللأمانة ماسألتش وين ماشيين بس الطريق كانت طويلة ومشينا واجد وبعدين وصلنا المكان قالي جابر انزل ونزلت كان مكان ايخشوله ناس واجد ويطلعو منه ناس وكلهم كانو ماسكين شناطي كبار في ايديهم
خشيت ونا انبحت اول مرة انشوف مكان زي هذا قمعزنا علي كراسي نا وجابر جنب بعضنا وكان صوت وهرجة الناس قوية وكنت انتفرج عالناس اللي ايهدرزو بشويش واللي صوتهم عالي واللي يخظنو في بعضهم واللي يضحكو واللي يبكو واللي قاعد ساكت وايتفرج زيي ومن كثر ماكنت مركز مع الناس ماانتبهتش الجابر لما عدى من جنبي وبعد اشوي جا جابر وجايب امعاه اشكارة فتحها كان فيها شيشة عصير وشكولاطات وامية وجايب في يده قهوة له هو مدلي شيشة العصير وامعاها الشكولاطة بس نا كانت شكولاطة تنسيم مازال في يدي سيبت شكولاطة جابر وفتحت امتاع تنسيم وقعدت ناكل فيها ونشرب في العصير لين جابر قالي هي صبيت امعاه ونا مش عارف وين ماشيين
وماسألتش لاني ماكنتش مالاطفال السكانين
طلعنا وجينا عند مكان فيه شرطة شافو شنطتي وشنطة جابر وبعدين جابر مدلهم اوراق وطلعنا المكان اخرى شفت طيارة كبييييرة وكانت هذي أول مرة انشوف طيارة بالحقيقة في اللحظة هذي سالته
نا:وين بنمشو
جابر:المكان حيعجبك
وطلع قدامي ونا قعدت امصبي وتبو الحق كنت خايف مالطيارة رد جابر عليا وشكله كان عارف اني خفت مسك يدي وركبت نا وياه وبعد اشوية حكو ان بنقلعو ربطلي جابر الحزام امتاعي وربط امتاعه وطارت بينا الطيارة
اول ما اقلعت كنت خايف بس بعدها القيته موضوع عادي مشى الجو ومعش ركزت علي شيئ ولا عرفت الوقت اللي قضيناه في الطيارة كم لأني كملت الوقت راقد?
وعيت علي صوت جابر وهو ايقولي وصلنا نزلت نا وياه وكان مكان احلى مالمكان اللي كنا فيه هو اللي بعدين عرفت ان هذا المطار
لكن الناس اللي سمعتهم يحكو لما نزلنا ماكانو يحكو زينا كانو يحكو اجنبي ?
طلعت انا وجابر مالمطار وكانت فيه سيارة ترجى فينا قدام المطار وركبنا وطول جابر وهو يحكي مع صاحبها ونا مافهمتش شن يحكو لانهم كانو يحكو أجنبي ?
طبعا كان الوقت ليل وصلنا صاحب السيارة لعند فندق وعدى وخشيت نا وجابر حجز غرفة وحدة وخشينا فيها
كانت كبيرة وفيها سريرين خش جابر ايدوش ونا غيرت ادبشي ولما طلع جابر دق الباب وفتح جابر الباب وكان واحد جايبلنا عشاء تعشينا وبعدها جو وخذو العشاء
وقالي جابر انرقدو وهو خش السريره ونا مشيت السريري انبحت في جابر نبيه يحكي ولا ايخرف امعايا بس هو كان مالناس اللي ماايحبوش يدوو واجد ودغري ماخذاه النوم ورقد ونا قعدت واعي بروحي قريب ساعة وكل مرة تفكيري واخذني المكان مرة للميتم والأصحابي ومرة الحنان وحنيتها ومرة التنسيم وبرائتها ومرة السناء واللي داراته فيا وقعدت هكي لين خذاني النوم ورقدت ?
/
/
/
وعيت في الصبح علي صوت جابر ايوعي فيا فتحت عيوني
جابر:صباح الخير هي نوض اغسل وافطر عشان نمشو
نا قمعزت وقعدت انحك في عيوني:وين بنمشو
جابر:اليوم بنسجلك في مدرسة جديدة
نا مالفرحة صبيت عالسرير:صح واخيرا بنرد القرايتي
جابر ضحك:للدرجة هذي اتحب القراية
نا:أها
جابر:خلاص يبقى صبي وصحصح وخلينا نمشو نفطرو وبعدين نطلعو للمدرسة
نا:باهي ونزلت وزي الطيارة طرت عالحمام غسلت وجي وفرشيت سنوني وطلعت لبست وطلعت مالدار القيت جابر يرجى فيا قدام الباب ونزلت نا وهو لوطى فطرنا وبعدين جتنا نفس السيارة ونفس الراجل اللي أمس وصلنا للفندق وخذانا بالسيارة ووصلنا لعند المدرسة
كانت مدرسة مش زي مدارسنا في ليبيا كانت كبيرة وشكلها من برا سمح
خشيت نا وجابر مع بعضنا وكانت المدرسة من جوا احلى من برا وكانت كبيرة واجد وسورها عاااااالي والمباني اللي جوا كبار والطبيعة اللي فيها سمحة زدنا خشينا كان مكان المكاتب بروحهن مكان سمح كل شيئ مرتب ومنظم خشينا المكتب شكله كان مكتب المدير استقبلنا استقبال حلو وقمعزت نا وجابر عالمقاعد قدام المكتب وقعد جابر والراجل يحكو اجنبي ونا مافهمت شيئ ?
وبعدها كمل جابر مع الراجل وسلم عليه وطلعنا وقدام المكتب جابر قالي
جابر:المدرسة هذي نظامها داخلي
نا بحتت فيه وكان واضح من نظرتي اني مافهمتش كلامه
جابر:يعني بنخليك فيها عشان فيها فرع مبيت زي الفندق وامعاك حتلقى عيال واجد من عمرك
نا:يعني هذا ميتم اخرى
جابر:لا مش ميتم هذي مدرسة بس لاني نا بنعلمك تعليم احسن من اللي في ليبيا هذي احسن مدرسة في روسيا في التعليم حتقعد فيها ونا نقعد كل فترة انزور فيك
نا:هنا كويسين ولا ايعاقبو
جابر:لا كويسين وحتشوف بروحك وحتلقى اطفال زيك واجد وحدير اصحاب اخرى
نا:باهي
الحق ماكان فارق امعاي يقعد او لا اصلا عادي مش متعود ان يقعد امعاي حد ناس جدد ناس اجدد مافيش مشكلة
جابر:سلم عليا وطلع ونا جاني واحد خذاني من يدي وشالني القسم المبيت كان ممر كبير بس سمح وفيه ديار واجد فتح باب الدار وخششني كان فيها 4 سراير 3 فيهن اطفال من عمري والرابع قعدت عليه نا
قعدو ايبحتو فيا مستغربين شكلي انا كنت زي ماتعرفو لوني اسود وشعري أسود ومجعد وهما كان شعرهم اصفر واللي لون عيونه ازرق واللي اخضر بس الحق جو سلمو عليا وحاولو ايتواصلو امعايا بس لا انا فهمتهم ولا هما فهموني ?
بعد حوالي ساعة من جيتي جابولنا الغداء وبعدها جو خذونا لكن كل واحد شالوه الفصل نا كنت نحساب ان هما اصغر او أكبر مني
خشيت للفصل وقمعزت وكان مافيش طلبة واجد ممكن كنا 10 بس وبدا أستاذ يعطيي فينا في حروف الانجليزي وقعدنا في الحصة هذي قريب 4 ساعات متواصلة رغم حبي للقراية بس ماتعودش علي هكي في المدرسة
طلعونا 5 دقايق المكان كله طاولات كلينا وردونا للفصل اخرى وقعد الاستاذ ايقري فينا من جديد
ماطلعونش مالفصل الا وقت النوم
جيت للسرير فاصل وراسي حاسة كبير من كثر ماقرونا مش متعود علي طريقة هكي?
رقدنا بس 3 ساعات وردو اخري وعونا فطرنا في دقيقتين وخششو كل واحد فينا الفصله اللي امس وبدو ايقرو فينا
وقعدنا كل يوم علي هالحال نرقدو ثلاث ساعات وباقي اليوم قراية
قعدت في الفصل هذا المدة شهر كامل وكنت نقرا بس في مادة الانجليزي
نا كنت ذكي ونبيه وتعلمت بسرعة اللغة وقدرت في نص الشهر انتواصل مع الطلبة وحكالي واحد منهم ان هما هنا ايتعلمو في اللغات وان كل شهر انتعلمو لغة وان نهاية الشهر فيه اختبار يندار واللي يغلط في الاختبار بيتعاقب ?
طبعا من بعد اللي شفته عند سناء قعدت كلمة عقاب بالنسبة ليا بمثابة الموت وقعدت مركز في الشرح وفي الدروس رغم النوم كان ساعات معينة بس كنت انحط في تركيزي كله لعند جا يوم الاختبار واجزته تمام وكنت فرحان اني ماتعاقبتش واللي غلطو في الاختبار اليوم هذكي ماشفناهمش شن دارولهم مانعرفش الحق بس نا تريحت اني ما كنت منهم
اليوم الثاني بعد الاختبار وعونا كالعادة في الصبح فطور سريع ماخذش دقيقتين وشالوني الفصل ثاني وكان التعليم اللغة الفرنسية ونفس الروتين الشهر اللي فات كان النوم ثلاث ساعات وباقي اليوم قراية كله لين اتحس روحك تاعب راسك مش قادر ايركز تستهلك كل تركيزك وكل طاقتك وماكنت فاهم هما ليش ايديرو هكي
المهم كمل الشهر بس هالمرة كانت اللغة الفرنسية صعبة بكل علي طفل زيي كيف قاري لغة انجليزية رغم ذكائي ونباهتي بس كان المضوع اكبر من طاقتي ويوم الاختبار اللي داروه اغلطت وانحكم عليا بالعقاب وكان اصعب عقاب ايمر عليا
نذكرها كان يوم صقع الدنيا بيضة برا من كثر التلج طلعوني في الساحة وسلحولي كل دبشي قعدت بالداخلي بس وربطوني في عمود وقعدو كل اشوية ايصبو عليا في امية امصقعة كان كل جسمي يرعش وصلت المرحلة مش حاس بجسمي من كثر الصقع قريب صبو عليا 5 اسطول امية مصقعة جسمي بالكامل تبنج وبعدين خذوني للدار كريني كر من كثر اني معش قادر انحرك ولا مكان من جسمي اصلا ماقعدتش حاس بيه بكل
جابوني وحطوني عالسرير والحق الأطفال اللي كانو امعايا كل واحد جاب بطانيته وحطها عليا ونا تحت نرتعد من الصقع حناكي مش متحكم فيه قعد ايهز وايتحرك بروحه
لما عدي اليوم هذكي من دون ماايصيرلي شيئ عرفت ان مش حيصيرلي شيئ مرة اخرى عشان كان هذا اشد عقاب انتعاقبه ?
ثاني يوم وبسبب اللي صارلي امس وعيت مريض كحة وزكمة وارقبتي توجع فيا وكان راسي مش قادر نرفعه من كثر الصداع
لكن هما ماخذوش بالشيئ هذا ولا همهم وشالوني للفصل من جديد قروني اسبوع اخرى في اللغة الفرنسية وبعدين دارولي اختبار وهالمرة نجحت فيه
وماليوم الثاني نقلوني الفصل ثاني وكانت هالمرة لغة إيطالية وقعدت نقرا شهر وبسبب اللي شفته في العقاب المرة اللي فاتت خفت مالعقاب من جديد وحاولت انكون مركز اكثر ونهاية الشهر كان الاختبار ونجحت فيه
واقعدن امعايا في ثلاث شهور ثلاث لغات
طبعا الوضع في المدرسه كان نفسه النوم مدة 3 ساعات بس وباقي اليوم قراية واستراحات الاكل كانن مايهلبنش 5 دقايق بس
مرت سنة في المدرسة وفي خلال السنة هذي قعدن عندي 10 لغات (اللغة الانجليزية والفرنسية والايطالية والصينية والصربية والالمانية والهندية والروسية والاسبانية والسويدية)
في السنة هذي ماشفتش جابر بكل لكن كان كل شهر ايكلم فيا وكان كل مكالمة ايحرص عليا اني نسمع كلام اللي في المدرسة
وفيه وحدة مالمكالمات اللي صارت بيني وبين جابر عمري ماانسيتها نذكر يومها سألته سؤال واحد قبل ماايسكر
نا:عمي جابر قبل مااتسكر بنسألك سؤال
جابر:تفضل
نا:انت ليش تبنيتني وانت عندك أطفال??
جابر ضحك:قالولي انك ذكي بس مانحسابكش للدرجة هذي ذكي
نا:باهي ليش تبنيتني ?
جابر;توا بعد تكبر تعرف
نا سكتت
جابر:خلاص توا عدي عشان ترقد بكرا وراك قراية تصبح علي خير وسكر
ونا مشيت الداري ونا انفكر في كلام جابر وشنو اللي بنعرفه بعد نكبر وقعدت انفكر لين نعست ورقدت
(المكالمة هذي مافهمتش معناها الا لما كبرت فعلا)
المهم بعد السنة هذي وبعد تعلمت 10 لغات ومش عارف ليش ايعلمو فيهن ليا
بدينا بعدها في القراية الأصلية واللي هي خشيت خامسة ابتدائي كنت فرحان زي اي طفل كل مايجتاز مرحلة وايخش للي بعدها ايحس بشعور سمح واللي هو احساسك انك كبرت ?
بذات طفل مر بنفس ظروفي نرجى في أمتى نكبر عشان انكون مسؤول عن نفسي معش يقدر حد ايعاقبني ?
كان نظام الدوام في المدرسة مالساعة 7 الصبح لعند الخمسة في العشية وبعد فترة الدوام فيه دروس ثانية انتعلمو فيهن واللي هنا جميع فنون القتال الكاراتيه والمصارعة الحرة وما ادراك من الفنون القتالية
وفوقها تعلمنا كيف نضربو بالاسلحة مالمسدس العادي لعند اي نوع أسلحة ماعادا الأسلحة الثقيلة طبعا ماعلمونش عليهن
وفوق هذا كله كنا ناخذو بعد دوام المدرسة وبعد دورة تعليم الفنون القتالية محاظرات في علم النفس وفي كيف اتعامل مع الناس ودروس مكثفة في عدم الثقة في اي شيئ حتى ضلك
بإختصار كنا جنود مصغرين الشنو ايجندو فينا ماكنش فاهمين
كل شيئ علموه لنا
خاصتا قدرة التحمل في اسوء الظروف وتحت اي ضغوط
وتعلمنا الاحساس باي شيئ وكانهم ضافلونا حاسة جديدة مهما كان صوت الشيئ ومهما كان بعده عليك كنا نقدرو نسمعوه وكله مالدروس اللي يعطو فيهن لنا
زرعو فينا قيم ومبادئ غريبة وجديدة علينا وعلي كل الناس
طبعا كانت الغلطة بورطة في اي شيئ مهما كان بسيط وكل ماكنا نكبرو كل ماكان الضغط علينا أكثر
فيه واجد حاولو الهروب وانا من ضمنهم حاولت مرتين بس كل مرة نفشلو وايكون العقاب وخيم كان ابسط عقاب عشان الهروب هو تنحبس في مكان مظلم ظلام تاااام المدة 3ايام وتسمع اصوات غريبة طول الوقت وهذا كله ايكون من دون لا اكل ولا شرب طبعا
باقي العقابات أشد بواجد كان أصعبها ايطيرولك اضافر ايديك وفيه اوقات ايحطولك عليهن ملح او محلول ملحي مانقدرش نوصفلكم كمية الالم اللي فيها ?
وخاطيهن من عقابات ممكن عقلكم مايقدرش ايتخيلهن?
كانو ايورو فينا صور وفيديوهات الطلبة حاولو يهربو فيه اللي ماتو مالعقابات وطبعا مافيش حد قدر اصلا يوصل برا باب المدرسة لان الاسوار كانن عالية بكككل وفوقهن اسلاك شائكة يعني لو نطيت حتموت يامالضي يا لما تزقب حتموت
كملت الابتدائية والاعدادية ومن نهاية الاعدادي وفي بداية الثانوي قعدو ايجوني ناس غريبة مانعرفهمش
ايطمنو فيا انهم ورايا واني نا امعاهم بس امعاهم في شنو مانعرفش وماحدش رضى يحكي وفي كلامهم ليا كل ماايجوني واضح التهديد ان لو حاولت نطلع من هنا حنموت ?
بديت في الثانوي
ونفس القصة في الصبح دوام قراية وفي العشية تعليم الكل نوع من الفنون القتالية وفي الليل محاظرات عن كل شيئ وكل مانكبرو في العمر كل ماايتكثفن المحاظرات اكثر خصوصا محاظرات عدم الثقة ?
لما بديت نكبر قعدت انحس ان نحن يبونا جنود سرية خصوصا ان كل الأطفال اللي امعايا كان أصلهم مالميتم زيي بزبط ?
لكن جنود الشنو وشن بيديرو فينا مش عارف
كنا مسيرين لا مخييرين في كل امور حياتنا حتى اختيارنا اللبسنا ماكان بإيدينا هما يشرولنا وايجيبولنا لعندنا اكلنا من اختيارهم كل شيئ تحت امر ناس نحن مانعرفوهمش
من اليوم اللي دخلت فيه للمدرسة لعند وصلت الاخر سنة في الثانوية معش طلعت منها بكل
كنت عارف اني انا قاعد في روسيا بس ماشفتش روسيا من برا بكل مانعرفش شيئ خاطي المدرسة هذي
جابر كان كل شهر ايكلمني وجاني مرة وحدة لما خشيت للثانوي بس
كملت الثانوي ونجحت فيها بإمتياز وكانت نسبتي98:67% كنت الترتيب الخامس عالدفعة اللي امعايا
يوم اللي نجحنا في الثانوي قررو ايكافئو العشرة الاوائل وكانت المكافئة انهم ايطلعونا مالمدرسة المدة يوم كامل
طلعنا وكان امعانا واحد مالمدرسة وقبل ماايطلعونا قالولنا اي حد ايحاول يهرب حيكون موته مافيش مهرب من هنا يااما اتعيش هنا يااما اتموت
وطبعا خاطي الموت والتهديد بيه كان عندنا سبب ثاني جدا كافي ان ماحد فينا ايحاول يهرب لان ببساطة ماحد فينا عنده اوراق يثبتن هو من مافيش اي شيئ ايدل علينا وعلي شخصياتنا كل اللي كانو في المدرسة كانو هكي ماعندهمش اي شيئ يثبتهم ?
الشيئ اللي كان محيرني لما كبرت هو كيف جابر جابني الروسيا ونا ماعنديش اي ورقة تثبتني ???
علامات تعجب استفهامات واسئلة بدون اجوبة كبرت وهنا كلهن في راسي ماعندي اي إجابة الهن من جابر وليش تبناني شنو غرضه مني وشنو المدرسة هذي وليش ايعلمو فينا كل هذا شن يبو منا ليش ماحدش حكالنا شيئ ?? ¡¡
نحن من وهل اللي قاعد ايصير فينا سببه ان أيتام من دون هل ??
شن ذنبي ايكون هذا مصيري بسبب غلطة اثنين في يوم غواهم شيطان ?
ماذنبي ياأمي …؟؟ هل كان ذنبي أنني استقررت في رحمك ..؟ أم كان ذنبي أن الحبل السري ربطني بك ..؟ أم كان ذنبي أن عودي استوى من عودك ..؟ أوربما كان ذنبي أن دمي من دمك !؟ لا يا أمي .. أقسم أنه ما كان ذنبي .. بل ذنبك !
ذنبك ياأمي …؟؟ ذنبك حين إلتقيتيه خلسة .. و خرجت بكذبة واهية من بيتك ! ذنبك حين سولت لك نفسك .. و اختليت به ليفعل ما قد فعل بك ! ذنبك حين أخطأت و إستمريت .. و سكتت و تماديت في خطئك ! و رحت أنا ضحية عشقك .. قبل أن أصبح كبش فدائك !!
و أكبر ذنوبك يا أمي .. أنك طردتني من عالمك .. قبل أن أتحسس دفئ راحتيك !! فلا أنت آويتني يا أمي .. و لا أنت تركت يدا حانية تحمل عبئي عنك !
ترى لماذا ياأمي …؟؟ ألم أكن جميل. أكنت أكثر بشاعة منك !؟ هل كانت هاوية القمامة أحن علي من كفيك .. أم أن بقايا الطعام فيها ألذ من حليبك !؟ أم هل كانت الأرض الصلبة أرق من حضنك .. أم للرصيف يا أمي حليبا من ثدييك !؟ أو ظننت أن للشارع لحافا أدفئ من صدرك !؟?
طلعنا اليوم هذكي فرحانين ان حنشوفو الدنيا حنشوفو الحياة ولو اليوم واحد من عمرنا
عمري كان وقتها 18 سنة اول مرة بنطلع من خشتي للمدرسة واخيرا بنشوف العالم بنشوف ناس اجدد
صح طلعتنا المدرسة مثقفين الأبعد الحدود في كل شيئ ممكن انتناقشو مع اي حد ونقنعوه بأي شيئ بخبرتنا وبذكائنا متأكد ان الثقافة والتعليم اللي كان عندنا ماكان عند اي طالب في مدرسة ثانية او حتى عند دكتور
بس ماكان عندنا خبرة عالناس خاطي اللي هما زرعوه فينا ماكانش عندنا اختلاط بأي حد خارج المدرسة يعني اليوم هذا حيكون اول يوم اختلاط لنا مع الناس اللي برا
طلعنا ماخلينا مكان فيك ياروسيا مامشيناله الدرجة كان شكلنا غريب 10 شباب يمشو مع بعضهم ومافيش مكان ماخطمنا عليه ماقعدنا انشوفوله بإستغراب واللي ايخطم علينا ايشوفلنا بدهشة بنظرة هذوما اول مرة ايشوفو الشيئ هذا ونحن فعلا اي شيئ خطمنا عليه كان اول مرة انشوفوه
أخر شيئ طلبوه الشباب ان يمشو الملهى ليلي
كنا شباب بالغين ومالأخر كنا بنعاشرو البنات بنجربو الشعور هذا ?
(مااتقولوش حلال وحرام لأن مبدأ الحلال والحرام ماتربيتش عليه
بعد أيام الميتم وكانو يعطو فينا في دروس في الدين بعدها معش عرفت شيئ عن ديني?)
طبعا في الأول الشخص اللي امعانا مالمدرسة رفض إن نمشو الملهى ليلي وبعد كلم المدرسة وافقوله ان نمشو ومشينا
يومها سكرنا وهيجنا وماخلينا مادرنا واخرتها كل واحد خذا وحدة ومشى بيها الدار لان الملهى كان تحت منه فندق بس مكانه كان زي القبو تحت الارض
في يومها خذيت البنت الشقرا ونزلت امعاها ومن كثر الشرب كانت هي اللي مسندتني وكنت اول مرة نشرب?
لان في المدرسة حتى الدخان ممنوع ماكان في شيئ هكي بكل
نزلت وخشيت انا وهي دار وسكرت الباب ومسكتها وماخليت مادرت نهايتها حطيتها عالسرير وانتو عارفين الباقي ?
وفي عز لحظات المعاشرة حد ايدف الباب بقوة لين انكسر صبيت في سرعة رهيبة ورفعت الداخلي وبحتت في اللي خش كان واحد طول في عرض وماسك في يده مسدس كان شكله غريب وامعصب وكان ايسب واللي فهمته من كلامه ان حبيبها
كان يحكيلها والعروق امتاع ارقبته بيطلعن من كثر عصبيته وهي تبكي وخلاص وبعدين لف شوري وهجم عليا بفضل كل اللي تعلمته مالمدرسة كان اسهل شيئ اني انصده ماقدرش يخدشني خدش واحد ?
والحق كان كل همي اني ننقذ البنت الشقرا وانكمل اللي كان ايصير?
سيبته طايح وفاقد وعيه وخذيت البنت من يدها وبنطلع بيها بس هي قعدت تلبس في دبشها ونا قعدت نرجى فيها
كان الشخص هذا طايح ورايا وزي ماقلتلكم كأنهم ضافولنا حاسة جديدة حسيت بأن تحرك ورايا لفيت شوره كان مصبي وفي يده موس ورد هجم عليا وقعدت نصارع امعاه وهو بيضربني بالموس نهايتها قدرت انبعده مني وكنت اقريب مالمسدس اللي كان امعاه مسكته وضربته بيه بس المسدس ماكان فيه اي صوت لان كان مركبله كاتم صوت?
طاح الراجل بس ماطاح الا ميت ?
#يتبع
قولكن شن حيصير مع أحمد وكيف حيصرف في اللحظة هذي وشن حيكون مصيره ومصير حياته اللي من اولها تعب وشقى ?
كله حنعرفوه في الحلقة الجاية ☺
عارفة ان الحلقة مافيهش حوارات واجد بس لأن مازال يحكي في قصته واللي صار امعاه قصته الحقيقية تبدى لما يكبر?
الصورة اللي توا الأحمد وهو عمره 18 سنة ?
خطرها كلكن علقن راه كل التعليقات نقرا فيهن?
تصميم الصورة اليوم من حبيبة قلبي الكاتبة Meroo Elshrief?
أسفة لو فيه لخطبة في الأسماء وأكيد رأيكن ايهمني?
گـتـابـتـي Koka Saleh