الجوكر | للكاتبة Koka Saleh

#الـجـوكـر ?

الـحـلـقـة (20)

(حقيقية ممزوجة بالخيال)

گـتـابـتـي #Koka_Saleh

::::::::::::::::::::::::::::::::::::::::::::::::::::::::

لايك قبل القراية وتعليق بعد القراية ?

:::::::::::::::::::::::::::::::::::::::::::::::::::::::::

سمر:من هذا وليش تحكي امعاه بالانجلش

نا:هذا امعاي في الشغل وتوا لازم انسكر لان عندي شغل مهم

سمر:شغل شنو اللي توا

نا:شغل في الشركة

سمر بعصبية:اي شركة في الوقت هذا واي شغل ايخليك تطلع الساعة 4 في الفجر ماتضحكش عليا

نا:بعد انروح نحكيلك

سمربعصبية:لالا احكيلي توا انت ليش هكي وليش تصرفاتك غريبة وليش قاعد في مكان بروحك وين هلك ليش وانا نحكي امعاك ماعمرش حد خش عليك من هلك ليش ماعمريش سمعت حد امعاك وليش تختفي فجأة واترد فجأة توا لازم اتقولي انت من وشن قصتك

نا:سمر قتلك مافيش شيئ وعندي شغل وبعد انروح نحكو

سمر بعصبية:اذا ماحكيتليش توا مش حتكون فيه مكالمة اخرى

نا:يعني شنو

سمر:يعني كل شيئ ينتهي

نا ماكنت قادر نحكيلها اللي عندي ولا قادر نحكيلها شنو قصة الاتصال وحتى لو حكيتلها مش حتفهمني واكيدة حتسيبني علي كل الاحوال

نا:سمر انتي توا معصبة بعد تهدي حنحكو وحنفهمك

سمر بعصبية;نا قتلك ياتحكي توا انت من وشن قصتك وشن قصة الاتصال والشغل اللي توا واتجاوبلي علي كل الاسئلة اللي عندي ولا كل شيئ ينتهي توا وبنطلع من حياتك ولو درت شنو مش حنرد فيها

نا:سمر نا مانبيش انسيبك ولا بنخسرك ياريت تفهمي ولما انروح من شغلي حنحكو وانفهمك

سمر:تمام اعتبر كل شيئ بينا انتهى وردبالك تطلع في حياتي او في طريقي مرة اخرى

نا’سمر اسمعيني

سمر سكرت وعاودت رنيت القيتها قافلة تليفونها ?

وصلتني رسالة مكتوب فيها(التفيذ في مدخل المدينة بعد قليل سيصل الشخص في سيارة سوناتا سوداء)

طلعت مالشقة وخذيت اسلاحي امعايا ووصلت للمكان المطلوب واول ماوصل الضابط نفذت المهمة في دقيقتين ومن غير ماحد ايشوف وعلي اكمل وجه ورديت ونا في ارقبتي ذنب روح ثانية الشخص اكيدة احسن مني وخذيت روحه بإيديا ?
قمعزت عالصالون ونا انشم في بنة الدم وحاس ان دمه عالق فيا مع اني قتلته من بعيد من بعد امتار مني صبيت وخشيت للحمام بندوش عشان انتريح وانحس ان الدم حول مني ومعش انشم بنته فيا خشيت تحت الدوش وقعدت انحط في شامبو علي شعري وجسمي كملت الشيشة عليا بس مازال انشم في بنة الدم مازال انشوف فيه علي جسمي
ماحسيتش الا بدموعي علي خدي زي النار وانهرت تماما وقعدت نبكي بهتسيريا واول مرة نبكي هكي
بس ضاقت عليا والحمل زاد التمن من كل جهه تأنيب الضمير مع ذنوب انلم فيهن ومش حاسب احساب الاخرتي حياتي مش ملكي فقدت الشيئ الوحيد اللي اخترته سمر وحبي الها ?
انسان تايه في عالم بروحه لا قادر يمشي في طريق الشر للاخر ولا قادر يختار طريق الخير
لا قادر ايحب ولا قادر ايكمل بدون حبه
انسان عنده كل شيئ ايخليه قوي بس ضميره ومشاعره وقلبه حيات ومخلياته اضعف انسان ?
قعدت نبكي ونبكي وطلعت كل طاقتي في البكى عشان انتريح اشوي ?

(كم يكلفك ان تصر علي ان تبقي انت ….انت…في حين ان كل الاشياء تجبرك ان تكون شخصا اخر لاتحبه ولا ترضي ان تكونه ?)

/
/

عند سمر

كملت ليلتها بكى بس برضو مش قادرة اتكمل مع شخص غامض هكي شخص حاسة انه داس عليها شيئ كبير رغم كل حبها له بس الحب ابروحه مش كافي انها اتغاضى علي كل تصرفاته المش مفهومة
قعدت نذكر في كلامه الها والمواعيد اللي بينهم حطت علي صوره وقعدت اتفرج وكل اللي في بالها كيف بتكمل بلاه بعد حباته وتعودت عليه
لازم اترد اترتب حياتها من جديد عشان اطلعه منها لان معش له وجود في حياتها وهو اللي اختار هكي بإرادته لان لو اللي داسة مش شيئ كبير راه حكى عادي بس باين ان وراه سر وكل اللي فكرت فيه ان ممكن ايكون كلام هبة صح ويطلع متجوز ?

/
/

عندي نا طلعت مالحمام كانت نفسيتي محطمة تماما هذي أصعب ليلة اتمر عليا شعوري فيها كان خليط من عدة مشاعر
شعور بالذنب علي حزن علي تحطيم علي كسرة وقهرة علي وجع قلب علي حرمان علي فقد علي يأس علي شعور بأني لعبة ممتلكة الناس ثانية علي شعور الحيرة والاحباط علي شعور بالضعف ?

كملت الليل واعي وعلي اخر ساعه منه رقدت ومش عارف كيف رقدت

/
/

صباح يوم جديد ?

وعيت زي المفجوع وكل اللي في بالي سمر مسكت تليفوني ورنيت عليها القيتها مقفل ?
انقهرت بكككل صبيت وغسلت ولبست وطلعت ووركبت في سيارتي ومشيت للجامعة وكل اللي في بالي بنوصل في سمر وبس بس لما جيت بننزل فكرت شنو بنحكيلها شن بنقوللها اكيدة بتقولي احكيلي اللي صار وشنو الغموض اللي في حياتك ونا مش حنقدر نحكي الحقيقة وحتى ولو حكيت الحقيقة حتسيبني اكيدة
لكن نا علي كل الاحوال مش حنقدر نحكيلها شيئ لاني لو حكيتلها حنكون حكمت عليها بالموت ونا مش حنسمح انها اتموت بسببي هي بذات مستعد نا انموت بس هي لا ?

غيرت رأيي في نزلتي وفي اني انحاول نحكيلها قررت اني انطلعها من حياتي عشان وجودها امعايا خطير عليها بذات بعد شكت في تصرفاتي تمنيتلها في قلبي انها اتعيش حياه سمحة وتعهدت بيني وبين نفسي اني مستحيل انحب غيرها وحيحرمن البنات بعدها وولعت سيارتي وطلعت عالشركة وفي قلبي شعور بوجع والم وكسرة وقهرة وقلة حيلة ماينوصفنش ?

/
/

عند سمر

وعت علي دقة باب دارها وكان سالم وخش

سالم:صباح الخير

سمر:صباح النور

سالم:مش عندك جامعة كنك مازال مااوعيتي لعند توا

سمر:حاسة روحي مريضة ومش قادرة نمشي

سالم:شن اتحسي كنك

سمر:هكي تعبانة وجسمي مكسر وراسي صداع

سالم:صبي خليني ناخذك للمستشفى

سمر:لالا خليني نرقد وتوا نقعد اكويسة

سالم:اكيدة

سمر:اكيدة

سالم:نمشي للمعهد نحضر محاضرتي وكان جيت ومازلتي تعبانة انشيلك للمستشفى

سمر:باهي

سالم:انا اشوي وبنطلع وتوا انسكر الباب ورايا

سمر:باهي

سالم طلع وسكر الباب وراه وسمر تغطت بورغانها وقعدت تبكي تحته قبل متعودة كل يوم ايوعيها أحمد ومن اليوم معش فيه الشيئ هذا خلاص لاعاد فيه احمد ولا حبه ?

/
/

عند عبد المهيمن وتسنيم

تسنيم:حبيبي هيموني هيا نوض

عبد المهيمن فتح عيونه وابتسم:صباح الخير حبيبي

تسنيم:صباح النور هي نوض عشان تفطر

عبد المهيمن قمعز:والله كنت امخطط نا اللي انوتيلك الفطور اليوم مانحسابش تسبقيني

تسنيم:بس مش نا جهزت الفطور ?

عبد المهيمن:امالا من

تسنيم:طلعت بنمشي للمطبخ انوتيه القيت الصفرة مغطية قدام الباب

عبد المهيمن ابتسم:هذي امي

تسنيم ابتسمت:ربي ايخليها لك

عبد المهيمن:تسنيم انتي اتحبيني صح

تسنيم:اكيدة

عبد المهيمن:اكيدة شنو

تسنيم بخجل:اكيدة انحبك☺

عبد المهيمن ابتسم:نبيك اتحبي امي زي مااتحبيني

تسنيم:هذي اكيدة حبيبي

عبد المهيمن;اللي داروه عشاني امي وباتي ميلود حتى الهل ماايديروش الولدهم الحقيقي من انا واصغير ربوني احسن تربية وعلموني ووقفو جنبي لين كبرت وعمرهم ماحسسوني اني مش ولدهم

تسنيم:كون مطمن امي حنحطها في عيوني زي ماحنحطك انت

عبد المهيمن ابتسم:نجك ليا

تسنيم;وليا وهي خلينا نفطرو

عبد المهيمن عظ علي شفايفه:هذي الفطرة الاولى والثانية عليك

تسنيم اخدودها انحمرو وابتسمت وجابت صفرة الفطور حطتها وبدو يفطرو

/
/

عندي نا وصلت وقعدت نشتغل بلا عقل كل تفكيري كان في سمر
كان والع تلفزيون جنبي في المكتب وجابو الاخبار وماكنت امركز عليهن لعند لما حكو علي مقتل الضابط قربت من التلفزيون وقعدت نسمع
وانقهرت اكثر لما حكو علي سيرته الذاتية وكيف ان كان كويس بككل واللي زاد قسم قلبي نصين ان طلع عنده 3 اطفال ونا حرمتهم من باتهم حرمتهم من سندهم في الحياه الله عالم شن بيصير فيهم بعد ميتت باتهم?

كل هذا زاد الضغط عليا وزادلي الوجع في قلبي معش قدرت انكمل شغلي طلعت مالشركة ونا مش عارف وين نمشي قعدت نبرم في الشوارع ونا ماعنديش اي حد او اي مكان نمشيله وعرفت اني فعلا انسان وحيد ماعنديش اي حد في الدنيا نمشيله في لحظة زي هذي

أقل شيئ الاي انسان عادي ان لما ايكون حامل في قلبه كل هالوجع ايكون قادر يمشي الحد ايفضفضله اما نا اللي في داخلي اصلا ماينحكش الحد ?

/
/

عند سمر كملت اليوم في في دارها وطلعتش بكل لعند الساعة 7 المغرب رن جرس الحوش وماكان سالم قاعد طلعت من دارها ولما فتحت الباب كانت هبة

هبة وقبل مااتسلم

هبة:وينك ياحنة اليوم لا جيتي للجامعة ولا للمعهد

سمر تنهدت:مش قادرة

هبة بخوف:كنك شن صار

سمر:خشي نحكيلك جوا
وخشن مع بعضهن للدار

هبة:شنو احكي شن صاير

سمر قعدت تحكي الهبة اللي صار وتبكي وحالتها حالة

هبة;معقولة اللي دايرتيه هذا كله علي راجل

سمر تبكي:مش اي راجل هذا احمد هذا الوحيد اللي صدقته وحبيته ووثقت فيه

هبة:الف مرة قتلك خففي من حبك مااتصدقيش وتوثقي فيه للدرجة هذي اغلب الشباب كذابين ويضحكو عالبنات مابيتش اتصدقيني

سمر تبكي:شكله فيه حاجة داسها عليا?

هبة:قاعدة واضحة فيه في حياته وحدة اخرى ومش بعيد يقعد متجوزها

سمر:والمكالمة شنو شن يقصد بي وين التنفيد

هبة;تلقيه يشتغل مع شيئ شلة ماللي معبيات البلاد توا تهريب مخدرات ولا سرقة ولا سلاح يعني شنو جديد الموضوع هذا

سمر تبكي:معقولة احمد يطلع هكي

هبة:وكنه مايطلع هكي مش نبي مالساعة هو ومالاول قتلك مش متريحتله حاسة وراه شيئ واهو كلامي طلع صح

سمر زادت في البكى:باهي نا شنو اندير توا انحبه ياهبة انحبه وااجد غير اليوم ماحكيتش امعاه فيه حاسة روحي رايحة مني وناقصتني حاجة كبيرة

هبة:عارفة ان شعورك صعب ولما اتحبي واحد واتعودي عليه وبذات ايكون شخص زي احمد اهتمامه كان كبير بيك لكن صدقيني الوقت كفيل ان اينسيك او حتى ايعودك عالتكمله بلاه اهم شيئ ردبالك تضعفي واترني عليه او اتردي اذا رن

سمر:مستحييييل نا خلاص خذيت قرار مستحيل انرد انكلمه بس قلبي هو اللي موجعني وحبي له كاسرني ?

هبة ضمتها:ماعاش من يكسرك ياقلبي ونا امعاك وجنبك لين تجاوزي هالمرحلة

سمر قعدت تبكي وخلاص? وهبة قعدت امعاها وماسيبتهش وباتت امعاها وكملت الليل وهي اتصبر واتهدي فيها

/
/

اما نا ماكان عندي من ايطبطب عليا او حتى اي حد يحكيلي كلمة اطفي البركان اللي والع جوا مني ?

روحت للشقة ونا انفكر اللي زيي ليش عايش ليش متمسك بالحياه وهو عايش وحيد مافيش حتى شخص واحد ايحبه او شخص واحد مستثنيه ودايرة شيئ خاص شنو الشيئ المهم اللي عايش عشانه والشنو حياتي بزبط شنو الشيئ الوحيد المفيد فيها اللي زيي ضرر عالمجتمع وبس ودائما منبوذ وهو نابذ روحه بروحه بسبب عقدة النقص اللي عنده اللي هو حاسها في روحه ?

تمددت علي سريري ونا نذكر في كل واحد قتلته وكل واحد صفيته وكل واحد عذبته
كلامهم اعياطهم في اوذاني فيه اللي ترجاني عشان مانقتله وفيه اللي بكى قدامي خايف مالموت وفيه اللي مالعذاب عياطه كان معبي المكان من كثر الالم ونا في اللحظات هذينا لا قلب ولا ضمير ايحس كنت انقوم بكل مهمة بقلب بارد وضمير ميت
بس في اللحظة هذي اجتمع عليا كل شيئ درته
كل اللي قتلتهم وعذبتهم قاعد انشوف في صور قدامهم ونسمع في صوتهم في وذاني
في اللحظة هذي عرفت ليش تلاقيت مع سمر بالصدفة وليش حبيتها كل هالحب وليش صار اللي صار بيني وبينها عشان هذي الطريقة الوحيدة اللي اتخليني انحس بوجع الناس اهو نا توا موجوع زيهم بس مش جسديا نا موجوع روحيا ونفسيا ?

في اللحظة هذي ايقنت ان الغلط مالاول ماكان بس من جابر والمنظمة وكل الناس اللي ساهمو في تجنيدي نا بروحي كنت غلطان في حق نفسي كنت نقدر نرفض انكون امعاهم حتى ولو قتلوني يمكن موتي كان احسن من هالعيشة اللي عايشها
مش مسيطر علي شيئ الة اتنفذ في كل المطلوب منها وخلاص وكل يوم قاتل شخص مالش اي ذنب ?
بس في وقتها كنت اناني وفكرت في روحي لان الروح غالية الأي شخص وكنت شاب في بداية عمره نبي انعيش حياتي واكثر شيئ خلاني انوافق شعور الانتقام اللي في داخلي واني انرد حقي من كل شخص ضلمني وايكون عندي كلمة والكل ايخاف مني ومن قوتي
بس هذا شيئ غلط لان الحق اللي ماياخذه الله باطل
بس شكلي عرفت الكلام هذا متأخر بعد فقدت الشيئ الوحيد اللي تمنيته بكل صدق البنت الوحيدة اللي كنت لما نقعد امعاها ننسى اي شيئ اللي كنت مانبيش غيرها مالدنيا كلها الهدية الوحيدة اللي جتني وعوضتني علي كل شيئ صار امعايا عدت مني ومش قادر حتى انردها لان وجودها امعايا اكبر خطر الها ?

/
/

مر اسبوع وحالتي وحالة سمر زي بعضهن
الفرق اللي كان بينا ان هي كان عندها من ايهون عليها وايكون جنبها عشان تجاوز المرحلة هذي واترد القرايتها
اما نا كنت بروحي وداس كل هالوجع في قلبي
ومااجاوزتش المرحلة هذي بكل الاسبوع هذا كله كملته في الشقة وماطلعتش منها من اخر مرة خشيتلها من اسبوع كلمني جابر وقتله اني مريض ونبي فترة راحة
بس تليفوني ماقدرتش نقفله عشان المنظمة ومهماتها ?
حتى ابسط حقوقي في اني انكون بروحي وبعيد علي كل الناس كانت مش من حقي ?

/
/

سمر بعد الاسبوع قدرت اترد القرايتها وتستمر في حياتها بدون احمد بس كانت من جوا تاعبة وواجعتها روحها وكيف انضحك عليها هكي ?
وفوق هكي حب أحمد اللي ماطلعش من قلبها وعارفة انها مش حتقدر اطلعه والف سؤال في راسها اجابتهن بس عند احمد اللي هي قررت انها تنهي كل شيئ بيه مالبداية احسن
واللي زاد كسر قلبها وخاطرها انها الها ايام فاتحة فونها واحمد ماعبرهش لا برسالة ولا مكالمة هي صح كانت واخذة قرار انها تنهي امعاه وتنساه بس محاولة ان ايكلمها اتخليها اتحس ان حبها بس غيابه هكي وان مادورهش هذا مالش الا تفسير واحد ان أحمد ماحبهش بكل وكل اللي كان امعاها كان للتسلية بس ?

/
/

نا ماكنتش قادر انرن عليها اصلا شن بنقول وشنو بنحكيلها بنقوللها راك انتي حبيتي مجرم سفاح قاتل اكيدة مش حنقدر نحكي هذا كله ويعني اذا عرفت اكيدة بتسيبني علي كل الاحوال مافيش وحدة ترضى تربط روحها بإنسان زيي لا هل ولا ماضي ولا مستقبل حتى حياته مش متحكم فيها ?

/
/

طول هالاسبوع تليفوني مارنش بكل

اليوم هذا بس رن وصبيت بسرعة بنشوفه مش عارف جاني احساس ان اللي ايرن سمر ولما وصلت في تليفوني القيته حركات ترددت واجد في الردة وبعدين قلت ممكن ايكون شيئ ايخص موضوع الايتام ورديت

نا:ايوا

حركات:حبي وينك مختفي

نا:قاعد

حركات:باركلي فلوسي ردلي

نا:الف مبروك كيف صار بالسرعة هذي

حركات:اها عمي طلع مغفل ومسرع ماصدقه وفي اسبوعين بس قدر ايخليه ايخش الصفقة وهمية وايحط كل فلوسه فيها

نا:يعني خذيت فلوسك

حركات:اها خذيتهن وعطيته حقه وطلع توا من عندي

نا:ردبالك اتحطهن في المصرف

حركات:لا مستحيل وحتى في الحوش مانقدرش انحطهن بنجيبهن عندك تمام

نا:تمام جيبهن

حركات:اشوي وانكون عندك

نا:تمام بس قولي مادرتش شيئ في الموضوع اللي حكينا فيه

حركات:اشوي وانجيك وانقولك اللي صار امعايا

نا:تمام وسكرت

بعد اشوي وصل حركات وجايب امعاه الفلوس وكانن شننطتين وكلهن دولارات عطاهن ليا ودسيتهن له جوا لين يهدى الوضع من عند عمه

حركات:كنك شن صاير امعاك

نا:كني

حركات:من امتى ماشفتش للمراية?

نا:ليا ايام

حركات:طالق اللحية ووجك حزين وكئيب اتقول عندك حد ميتلك

نا:ماادورش شيئ الجو تمام

حركات:لا واضح ان الجو تمام قولي شن صاير امعاك

نا:ماصاير شيئ

حركات:مافيش حاجة اتخلي الراجل هكي الا الحب

نا بحتت في وتنهدت ونزلت راسي ?
وحركات عرف ان اللي صاير كبير واني مانبيش نحكي

حركات:معقولة اتخوني واتحب غيري ?

نا رغم كل اللي جوا بس حركات خلاني نبتسم

نا:قولي شن صار في موضوع دار الايتام

حركات طلع اوراق من جيب جاكته:شوف هذينا جواز سفر وبطاقة الواحد ميت من سنتين

نا:تمام بكل

حركات:بس لازم انديرو حاجة

نا:شنو

حركات:لازم انشغلو حد في وحدة من ديار الايتام يقعد ايجبلنا الاخبار من جوا يعني كل شيئ ايصير عشان يقعد عندنا شاهد

نا:تمام بس بما ان الموضوع مانبوش يطلع من بينا نحن الاثنين معناها اللي حيشتغل جوا لازم يقعد يا نا يا انت

حركات:معناها نا لان انت معروف فماايصيرش

نا:تمام وقولك اتحصل شغل جوا

حركات:باذن الله حنحصل وحندير كل شيئ عشان انحصل هذا اول عمل خير بنديره

نا:تمام وقولي اي شيئ ايصير امعاك

حركات:تمام وتوا بنمشي تبي مني حاجة

نا:سلامتك

حركات:قبل مانمشي بنقولك ان مهما اسكرن الابواب في وجك دائما حيكون فيه امل وباب ربي ديما مفتوح وعمره مااسكر انت بس قرب منه وصلي وادعيله

نا بحتت فيه زين استغربت كيف واحد زي حركات ينصح نصائح هكي

حركات:اكيدة مستغرب كيف واحد زيي يحكي هكي بس انا برغم كل شيئ اندير فيه لكن عمري ماانسيت ربي وعمري ماسيبتله فرض وعمري ماوقفت مالدعى له وهو اعلم بحالي وليش نا قعدت هكي حاولت واجد اني انكون انسان اكويس بس ماقدرتش الدنيا اللي نحن فيها ماتبيش انسان طيب واكويس وتجبرك جبر انك اتكون شخص انت ماتبيش

نا كلام حركات وصل القلبي والمسه من جوا ?

حركات بعد الكلام اللي قاله طلع ونا قعدت بروحي واذكرت لما صليت مع الحاج ميلود وشعور الراحة اللي حسيته وقتها قررت انصبي وانجرب يمكن نقدر نهدى واكيدة ربي حيطبطب عليا وايهديني وايريحني احسن من طبطبة البشر وراحتهم

صبيت توضيت وفتحت النت شفت كيف كيفية الصلاة لاني كنت مش متذكرها كويس وحفظت كم صورة مالقرآن خذا الوقت مني ساعة وبديت انصلي

اول ما كملت صلاة بحتت فوق ونا مش عارف شنو انقول حتى مش عارف شن ندعي بس كنت عارف ان ربي فاهم اللي في داخلي وعارفة كويس وحتى ونا مش قادر انقوله
تعبيري الوحيد كان ونا انبحت فوق هو انها نزلت دمعه ساخنة علي خدي بس هالدمعة حسيتها بردت النار اللي الها اسبوع والعه في قلبي

صبيت وقررت اندير شيئ واحد وهو اللي جا في بالي ونا انصلي وهو اني نمشي انزور الميتم اللي كنت فيه

/
/

طلعت مالشقة وتكيت علي محل خذيت العاب وهدايا وبعدين مشيت المحل ثاني خذيت شكولاطات وشبس وعصائر ومشيت شور دار الايتام واول ما وصلت طلبت انشوفهم ونعطيهم اللي جايبة

طبعا كان المدير متغير واغلبية الطاقم اللي فيه متغير فمحدش عرفني ولا قلت الحد ان نا كنت هنا

خذوني وخششوني للساحة اللي هما فيها
واول ماخشيت وهما ايشوفولي بنظرة غريبة نظرة خوف ورهبة نظرة ضعف وكسرة هي نفس النظرة اللي نحن كنا انشوفو بيها الاي شخص كان ايخش علينا زمان

كل شيئ في الميتم كان متغير الا احساسي اول ماخشيتلها هو نفس احساسي لما كنت فيها احساس شخص رد الحوشه بعد فترة غياب طويلة

طولو ماقربو مني عشان ياخذو الهدايا لان ماكانو عارفين الغرض شنو مالهدايا
قعدت انقسم عليهن وهما فرحو بيهن شعوري في وقتها ماينوصفش اول مرة انحسه حسيت روحي درت انجاز عظيم لاني فرحتهم وضحكتهم هالضحكة خلتني انحس ان كل الدنيا ضحكتلي بعد ماكانت مسكرة كلها

قعدت نلعب امعاهم اشوي ورديت طفل زيهم كنت انشوف روحي ونا اصغير في عيونهم تمنيت ولو اني مازلت في هالمكان وماطلعتش منه بكل ?

بعد اشوي بعدت منهم وقعدت امقمعز بروحي وكان فيه اوليد اصغير مصبي بعيد وايشوفلي زييييين استغربت نظراته ليا وكيف هو قاعد ومسيبهم يلعبو وياكلو بروحهم ومش ماسك لا لعبة ولا شكولاطة ولا شبس زيهم

نا:تعال

قعد ايبحت فيا زيين

نا:تعال يابابا

مابش ايجيتي صبيت وجيته والوليد كان اقصير نزلت علي ركبيا ومديتله يدي ومدلي يده وسلم عليا

نا:شن اخبارك

هو:كويس

نا:شن اسمك

هو:علي

نا:ليش ماتلعبش مع اصحابك ياعلي

علي:انت جاي بتاخذ واحد من اصحابي

نا عرفت ليش خايف مني وايشوفلي هكي
اطفال الميتم عندهم نفس الشعور وان كل واحد غريب ايجيهم لازم ينقص واحد منهم وبحكم انهم عايشين مع بعضهم اسنين قاعدين كأنهم خوت ولما ايعدي واحد منهم يحزنو الكل عليه ?

نا:لا مش واخذ حد منكم

علي:عليش جبتلنا هدايا

نا:عشان نبيكم تفرحو وتضحكو

علي:نحن نفرحو لما اتخلونا مع بعضنا ومعش تاخذو منا حد

نا:ان شاءلله معش حد ياخذكم وحتى لو واحد خذاكم حنقولوله ان كل اسبوع ايجبوه ايشوف اصحابه اللي هنا
علي:بس كل اللي يطلعو من هنا معش انشوفوهم

نا:اكيدة حيندار قانون جديد يمنع الشيئ هذا

علي ابتسملي? ونا مديتله طرف شكولاطة

نا:تقرا

علي:اها

نا:سنة كم

علي:سنة سادسة

نا:مشاءلله اشوي وتكبر بس شن بتقعد لما تكبر

علي:شرطي?

نا تنهدت وفي عقلي ردبالك تحلم لان الواقع حيكون عكس اللي حلمت بيه ببساطة لانك مالميتم وماايحقلكش تحلم بالشيئ اللي تبيه لان حيكون توجهك كيف مايبي الميتم او اللي ايتبنوك مش شن تبي انت ?

علي:انت عندك اوليد

نا:لالا

علي:وليش ماعندكش

نا:لاني مش متجوز

علي:وليش ماتجوز

نا تنهدت:لان اللي نبيها عدت بعيد

علي:وليش مااتعديلها وتجوزها

نا:انعديلها

علي:اها انت كبير وتقدر تمشي الاي مكان

نا ابتسمت:صح نقدر نمشيلها

علي:خليك هنا انجيبلك حاجة

نا:باهي

مشى يجري وخلاني وقعدت نرجى فيه وبعد اشوي جاني جايبلي لعبة وكانت سيارة شرطة

علي:بعد اتعديلها وتجوزها وايجيك اوليد عطيها له

نا ابتسمت:حاضر
نا:توا بنمشي تبي مني حاجة

علي:لا بس خليك ديما اتجينا

نا:حاضر وبسته وطلعت

/
/

ركبت في السيارة وحطيت سيارة الشرطة عالطبلوني قدامي وقعدت انبحت فيها وفرحان بيها وكأني فعلا ينشيلها الوليدي اوليدي اللي مش عارف ايجي عالدنيا ونفرح بيه او لا
بس اذا قعد عندي اوليد وشعرت بالشعور هذا نبي سمر اتكون امه عشان اتزيد فرحتي بيه لان من غيرها مستحيل ايكونلي طفل ?

قعدت انفكر في كلام علي اللي قاله وكلام حركات واللي صار بيني وبين سمر وقعدت انشوف للسيارة اللي قدامي ونحلم في لحظة اني نعطيها الوليدي وسمر اتكون جنبنا?
في اللحظة هذي قررت اني انرن علي سمر من غير ماانفكر شنو بنحكيلها بس كنت نبي نحكي امعاها وهذي هي لحظة الضعف اللي كنت خايف منها مسكت تليفوني وقعدت انرن عليها بس هي ماردتش رنيت قريب 10 مكالمات ماردتش عليا ?

عرفت ان سمر فعلا نهت كل شيئ من عندها بس نا كنت نبيها ومش قادر انكمل بلاها وكان لازم انوضحلها اني انحبها وماتاخذ اي فكرة غلط عني كنت نبي صورتي ماتهتزش قدامها بس في نفس الوقت مش قادر نحكيلها شيئ علي حياتي قعدت حاير شن اللي نقدر انديره نبي سمر ومانبيش نخسرها وفي نفس الوقت مش قادر نعترف بحقيقتي اللي داسها عليها
بعد تفكير واجد مسكت تليفوني وحطيت علي اغنية كنت انحبها واجد ومن لما عرفت سمر ونا نسمع فيها وخاطري انسمعها الها بس مش قادر قررت اني اندزها الها لان توا جا وقتها ممكن بعد تسمعها اتحس بشيئ تجاهي او تفهم اللي نا فيه واترد عليا

حطيت عالاغنية ودزيتها الها عالوتس قعدت نرجى في ردها بعد تفتح وتسمع الاغنية

/
/

عند سمر

لما كان احمد ايرن عليها كانت هبة قاعدة عندها

هبة:من

سمر:احمد ?

هبة مسكت التليفون:مااترديش عليه

سمر:حتى نا مش رادة ?

هبة:التافه توا غير خطرله ايرن بعد كسد حيوان كلهم هكي وبيضحك عليك بكلمتين واتصدقي

سمر:قتلك مش رادة لا يضحك عليا لا نضحك عليه

هبة;صاحب سالم اللي كان ايدزلك بيخطبك مازال ايدز

سمر:اها كل يوم ايدز في رسائل ان ايحبني وكلام واجد

هبة:مارنش عليك بكل

سمر:لا ايرن بس نا حاطته في الحظر

هبة:وعليش حاطتيه في الحظر حوليه واحكي امعاه وصدقيني مااينسيك راجل الا راجل اخرى وبعدين هذا لا يبي علاقة لا شيئ وبيجي من عند الباب

سمر:فكيني نا مش طايقة نحكي مع اي راجل اخرى بعد احمد

هبة:ماهذا الغباء بعينه دبينك هكي مستحيل تنسيه وبعدين الرجالة واجد وكلهم كيف بعضهم غير وافقي علي هذا وحينسيك احمد

سمر:مش زي بعضهم احمد مش زي حد بكل ?

هبة:لا واضح انك ناوية تنسيه اللي بدلك بدليه ياماما تقعدي هكي ماايصيرش منك بككل

سمر تنهدت:خلاص هبة بالله سكريلي عالموضوع

هبة:باهي سكرته وخلاص توا مغرب بنمشي وردبالك اتردي عليه ولو امفكرة اتردي عليه ناخذ تليفونك امعايا

سمر:قتلك والله ماني رادة عليه نا بروحي خلاص عرفت انه كذاب ومعش نقدر انصدقه مرة اخرى

هبة:ايوا شاطرة خليك هكي

سمر:ان شاءلله

هبة سلمت علي سمر وطلعت وسمر لمت اشوي في الحوش وجت بترقد بس قبل ماترقد مسكت فونها وفتحت النت اشوية وجتها الاغنية من أحمد وبدت تسمع فيها وكان اسمها #كل_واحد_عندو_سر_جوا_منه_وامداريه
(حنزل الفيديو عشان تسمعنها كلكن وضروري تسمعنها عشان تعرفن احساس سمر)

#يتبع

قولكن سمر شن ردها بعد تسمع الاغنية هل حتكلمه او تستمر في مبدأها ?

وقولكن شنو حيدير احمد لو ماردتش عليه هل ممكن حيحاول مرة ثانية او ايخليها النصيبها ?

وقولكن شنو حيصير في قصة اطفال الميتم هل حينجحو فيها او لا ?

وصاحب سالم هل حيكونله دور في رجوعهم البعضهم او في تفريقهم?

واصلا شنو بيصير في احمد علي كل الاحوال بما ان الحلقة الجاية هي الحلقة الاخيرة هل حيكمل في المنظمة او ايسيبها ولو كمل شن مصيره ولو سيب شن مصيره
ومن اللي حيفوز في النهاية الجوكر او احمد ?

كله حنعرفو في الحلقة الجاية والاخيرة من رواية #الجوكر?

أسفة لو فيه لخبطة في الأسماء أكيد رأيكن ايمهني ?

گـتـابـتـي Koka Saleh