الجوكر | للكاتبة Koka Saleh

#الـجـوكـر ?

الـحـلـقـة (15)

(حقيقية ممزوجة بالخيال)

گـتـابـتـي #Koka_Saleh

::::::::::::::::::::::::::::::::::::::::::::::::::::::::

لايك قبل القراية وتعليق بعد القراية ?

::::::::::::::::::::::::::::::::::::::::::::::::::::

نا طلعت مالجامعة وماشي للشركة ونا جوي سمح وفرحان ومافيش الا صورة سمر قدام عيوني وبنت عطرها انشم فيها في كل مكان وقطع عليا الجو هذا تليفوني لما رن حركات

نا:ايوا ياسي زفت شن تبي

حركات:قلت ماصبحتش عليا لكي واجد انصبح نا

نا ضحكت:شن عندك عالصبح

حركات:الراجل جا وقال تم في كل شيئ ويبي باقي فلوسه

نا:تمام خوذه للشقة ونا توا انجيكم غادي

حركات:تمام وسكر

غيرت طريقي مالشركة وتوجهت للشقة ومشيت القيت حركات وامعاه الراجل

نا:درت كل اللي طلبته

هو:كله وبالحرف وحتى فوق اللي طلبته

نا:وريني

هو::::?

/
/

عطيت باقي فلوس الراجل له وطلع هو وحركات ونا طلعت بعدهم ومشيت شور الفيلا وكان عندي غرضين
اول حاجة نبي نحكي مع تسنيم وانفهمها اللي صار كله
والثاني كان عندي كلام مهم مع سناء عالمخططات اللي اتخطط فيهن ليا وانها ادبر القتلي لكن الشيئ اللي بنقوله الها بيخليها معش تطلع في طريقي نهائي واتحولني من بالها بكل

/
/

وصلت للفيلا وخشيت ورقيت دغري الدار تسنيم
وصلت وفتحت الباب كان مقفول قعدت اندق واندق مافيش حد فتح نزلت تحت سألت الخدامة علي تسنيم قالتلي انها ماطلعتش من دارها رديت وقعدت اندق اخرى بس مابيتش نحكي بكل لاني عارف لو سمعت صوتي مش حتفتح بعد فترة مالدق فتحتلي الباب واول ماشفت شكلها انصدمت كانت ناقصة بكككل ومرهقة وباين عليها التعب والارهاق مالسواد اللي تحت عيونها واول ماشافتني ادموعها نزلو تلقائي وقالتلي كلمة وحدة
تسنيم:مش قتلك معش بنشوفك هنا?

نا قدمت خطوتين:عندي كلمتين اسمعيهن مني وماشي

تسنيم بصوت عالي:اطلع برا مانبيش نسمع منك شيئ

نا بصوت اعلى:لا لازم تسمعيني

تسنيم قعدت تبكي واتعيط بهستريا:قتلك اطلع اطللللللع

نا قربت منها ومسكتها بقوة وهي قعدت اتعيط وتبكي
قعدت ماسكها وخشيت للدار وسكرت الباب بالقفل وسكرتلها فمها وهي قعدت تضرب فيا بكرعيها

نا:تسنيم اهدي اهدي واسمعيني وصدقيني بعد تسمعي كلامي حتفهميني وتعذريني

تسنيم كانت تبكي واتهز براسها بمعنى ماتبيش تسمعني

نا:انتي اغلى حد علي قلبي انتي اكثر انسانة حبيتها من صغري وحسيت روحي عايش عشانها

تسنيم تبكي ومازال تضرب فيا بكرعيها

نا:تسنيم نا في الدنيا هذي ماعنديش اي شيئ عايش عشانه لا اب ولا ام ولا اخ ولا اخت ولا حبيبة ولا زوجة ماعنديش شيئ كل اللي عندي ناس واجد تكرهني ومافيش اي انسان قابلني بحب الا انتي انتي الوحيدة اللي حبيتيني وحسستيني اني انسان وعندي شيئ عايش عشانه صدقيني لو انظر روحي انتي مستحيل انظرك ولا انخلي اي حد ايضرك

تسنيم وقفت ظرب وقعدت تسمع فيا

نا:واقسملك بالله وعمري ماحلفت ان التليفون انسيته نسيه يوم اللي عطيتيه ليا فرحت واجد انك واثقة فيا للدرجة هذي بس حطيته في الدار بنرد عليه ونحرقه زي ماقتلك وبعدها سافرت ومعش اذكرته نهائي ومافيش انسان ماينسى ومافيش انسان ومايغلط ونا غلطي اني انسيت ومانبيش بالغلط هذا نخسرك وفكيت ايديا من عليها

نا:لفي وشوفيني ولو حسيتيني نكذب نوعدك ماعاد اتشوفي وجي عمرك كله

قعدت اشوي عاطيتني بظهرها وبعدها لفت شوري وانصدمت لما شافت ادموعي نازلات وهي اكثر وحدة عارفة ان حتى ونا اصغير ماكنتش نبكي رغم كل تعذيب سناء ليا

تسنيم قلبها حنون وكانت اتحبني محبة اخ حقيقي الها ماتحملتش اتشوف ادموعي ودغري حظنتني وقعدت تبكي

نا حظنتها:أسف أسف والله كانت غلطة

تسنيم تبكي وخلاص وقعدت حاظنها اشوية لين هدت وبعد هدت قمعزت عالسرير ومديتلها كباية المية اللي كانت جنب سريرها وجيت قمعزت جنبها

نا:سامحتيني

تسنيم:نا اصلا ماعرفتش نزعل منك وهذا اكثر شيئ قهرني لا قدرت نزعل منك ولا نكرهك وماقدرتش نستوعب انك درت هكي عشان شيئ في راسك بتضرني بيه

نا:تعرفي انا مستعد انظر اي انسان في الدنيا حتى روحي مستعد انظرها الا انتي تسنيم انتي اختي اللي عطتها ليا الدنيا انتي الوحيدة اللي مدتلي يدها في وقت كان الكل ضدي

تسنيم اتشوفلي وادموعها ينزلن وخلاص

نا:انا اكثر شخص حياته متلخبطة في الدنيا كلها اكثر شخص مش قادر يختار شيئ في حياته واكثر شخص مستقبله قاعد مجهول طول الوقت حاير بين عرم قرارات طول الوقت عندي صراعات في داخلي ماحدش عالم بيهن بس الشيئ الوحيد اللي في حياتي قررته بروحي ومتأكد منه وبنواصل فيه لعند ماانموت هو حبي لكي انتي يعني لو صار شنو في الدنيا تسنيم في قلبي حتقعد هي تسنيم حتى لو كرهتيني وضربتيني ولزيتيني حنقعد انحبك وحنقعد ديما امعاك ووراك وسندك في الدنيا مش حنسمح الاي حد ايضايقك او ايزعلك او يوصل فيك

تسنيم جت بتحكي

نا:اس لين انكمل كلامي كله

تسنيم هزت براسها بمعنى باهي

نا:نا عرفت اللي بينك وبين عبد المهيمن

تسنيم انحرجت وواطت راسها?

نا رفعتلها راسها:مااتواطيش راسك هذي اول مرة ايكون اختيارك صح عبد المهيمن راجل مش لان صاحبي بالعكس عبد المهيمن عكسي في كل شيئ ولو خذيتيه هذا اكثر شخص انكون مطمن عليك امعاه لاني عارفه كويس عبد المهيمن راجل راجل تقدري تعتمدي عليه في كل حياتك واول دليل عالشيئ هذا ان اول ماحس بشئ تجاهك قرر ان يخطبك مني وامس لما حكيتله قصة الصور طلبك مني اخرى

تسنيم بصدمة:بس قصة الصور انت وعدتني ماتحكيهش الحد

نا:ونا عند وعدي ماخالفتش نا حكيت القصة بس بشوي تغييرات مني لاني مانبيش نخلف وعدي امعاك ومانبيش عبد المهيمن ايفكر فيك تفكير غلط

تسنيم:شن حكيتله

نا:حكيتلها شن حكيت العبد المهيمن بزبط
نا:هكي تمام

تسنيم:مع ان حنبدى حياتي امعاه بكذبة بس هي كانت غلطة ونا انسيتها ومانبيهش اترد اتواجهني في حياتي

نا:ونا وراك مش حترد اتواجهك بس فيه حاجة لازم تعرفيها

تسنيم:شنو

نا:عبد المهيمن وضعه نفسي وهو مالميتم يعني ماعندش هل انتي راضية تجوزي واحد لقيط

تسنيم نزلن ادموعها:ردبالك عاد اتقول كلمة زي هذي انتو مالكمش ذنب في انكم هكي الذنب عاللي غلط مالاول وقعدتو انتو الضحية وعارف يمكن انتو احسن من واجد اقل شيئ مش عارفين هلكم الكلمة هذي ماتعني شيئ لكم بس فيه اللي عارف هله وعايش امعاهم وكأنه عايش بلاهم الشعور هذا أصعب بواجد?

نا تنهدت:عارف احساسك بس كل واحد مقدرله حياه بيعيشها وبما انك راضية بعبد المهيمن وهو هكي معش فيه الا انشوفو هلك يرضو او لا

تسنيم بخوف:قصدك مرات مايرضوش

نا:احتمال كبير انهم يرفضو او بالاصح متأكد انهم حيرفضو

تسنيم مسكت في يدي:لو اتحبني خليهم يرضو نا عارفة انك تقدر ادير اي شيئ

نا:انحاول

تسنيم:مش اتحاول اقنعهم عشاني

نا ابتسمت:حاضر حندير كل اللي نقدر عليه

تسنيم ابتسمت:نجك ليا

نا:يعني توا امسامحتني عاللي صار

تسنيم:اها ومش زعلانة منك بككل

نا:حتى التليفون

تسنيم قاطعتني:عارفة انك اكيدة نهيت موضوعه لان مافيش واحد ايدير هذا كله ويبكي عشان اخته الا وهو مايبيش ايضرها

نا تنهدت:توا بس تريحت

تسنيم:بس دير في بالك معش اتزعلني لان مرة اخرى معش نرضى ?

نا ضحكت:شعفه وتوبه ?

تسنيم:?

نا صبيت:توا بنمشي عندي شغل في الشركة ومنها انشوف جابر علي موضوع عبد المهيمن

تسنيم:يارب ايوافق?

نا:باهي تحشمي واحترمي خوك?

تسنيم نزلت راسها:أسفة?

نا مشيت شور الباب وابتسمت علي حركات تسنيم الطفولية وفي عقلي توا هذي كيف بتجوز وتقعد مسؤولة من حوش وراجل تي ماايصيرش منها بكل ?

سكرت ورايا الباب ومشيت شور داري بناخذ ادبشي والفلوس امتاعي اللي هنا عشان انشيلهن للشقة
وصلت عند الباب وبنخش

سناء:انت شن تبي من تسنيم

نا لفيت وبحتت فيها:انحبها ?

سناء بعصبية:انت واحد وقح ومااتحشمش علي وجك تضحك علي بنية اصغيرة عشان اتعلقها فيك واتنفذ مخططاتك في انتقامك منا

نا ضحكت:قاعدة تحكي في قصة فيلم هندي صح ?

سناء بعصبية:انا لا نضحك لا انبصر البنت ودرتها في جرتك لكي فوق من اسبوعين مختفي وهي حالتها حالة شن رايك اتخلي اللعب عالمكشوف واتقولي وين تبي توصل بزبط

نا:للي تبي انتي توصليله امعايا

سناء:نا نبيك تطلع من حياتنا

نا قربت منها:ومانطلعش من حياتكم الا لما تقتليني صح

سناء ارتبكت:اي قتل

نا:مش توا قلتي خلي اللعب عالمكشوف هذا المكشوف ياسيدة المجتمع الراقي اللي ماحدش عارف حقيقتك

سناء:صح بنقتلك ونهايتك خلاص قربت والف مرة قبل هالمرة قتلك انت مش قدي بس ماانت ماكنتش تسمع فيا

نا:صح مش قدك لاني اقوى منك واللي بيلعب امعايا معناها لعب في عداد عمره

سناء ضحكت ضحكة هزوة:مشكلتك واثق واجد في روحك ماتحساب ان البحر اللي انت فيه توا نا عايمته من زمان ?

نا:انتي عمتيه صح بس عمتيه بغباء اما نا لما عمته عمته بذكاء لحد ماوصلت المكانات اللي في عمري توا ماحدش وصلهن

سناء:تمام معناها الشاطر هو اللي يضحك في الاخر وحنشوفوه من فينا الشاطر ?

نا :صح توا انشوفو بس قبل ماانشوفو نبيك تعرفي ان نا ولا لحظة في حياتي انسيت فيها اللي درتيه فيا ونا اصغير حتى لما عرفت انك توا بتقتليني مااثرش فيا نفس اللي اثر فيا اللي درتيه زمان ونا اصغير تذكري هذي( ورفعت تيشرتي وكان أثر اللذعة اللي لذعتها ليا ونا اصغير)

نا:هذا اكثر يوم تألمت فيه كل ماانحول تيشرتي نذكر اللي درتيه ويكبر كرهك في قلبي اكثر كل ماانشوف خيط ضي نذكر عقاب الضي اللي عاقبتيني بيه ونحقد عليك كان بإمكاني اني نقتلك في اي لحظة وماحدش يعلم بشيئ بس الموت ايريحك ونا مانبيش انريحك نا نبي اللي ايعذبك زي ماعذبتيني بس مش تعذيب جسدي نبي تعذيبك ايكون روحي وعقلي شيئ ايخوفك وايذلك وماالقيتش أحسن من هذا وطلعت من جيب جاكتي ظرف دائري كانت فيه دسكة

سناء:شن هذا

نا:تفرجي عليه وتوا تعرفي

سناء كانن نظراتها نظرات خوف وكأنها اكتشفت غبائها وعرفت شن فيه

نا جيت بنمشي وبعدين رديت عليها

نا:انسيت انقولك ان كل اللي فيه بعلم المنظمة والتخطيط كله منهم نا مني التنفيذ بس لكن حبو ايوصلو رسالة بسيطة من عنده انك اتبعدي من طريقي والا المرة الجاية حيزعلو منك ومش حيسامحوك وانتي عارفة زعلهم شن نهايته واشرتلها بصبعي علي ارقبتي بمعنى الذبح ?

سناء بلعت ريقها ومشت من جنبي ونا خشيت الداري ونا حاس اني رديت كل اللي داراته فيا ونا اصغير واني انتصرت عليها ومعش تقدر حتى ترفع عينها في عيني ?

لا شئ في الحياة أعظم من لحظات الإنتصار و لا شعور في العالم يضاهي هذا الشعور.
لحظة يقف بك الوقت و تنظر لألمك و حزنك و إنكساراتك و هزائمك و أيامك الصعبة و حرمانك وكل ما واجهت من أشياء و تبتسم فضلاً عن أن تبكي .
-أن تسمع صوتاً وحيداً داخلك يُردد :- “لقد كان يستحق ..لم يكن سهلاً و لكنه كان يستحق .”

هذا بزبط كان شعوري في لحظتها ?

/
/

سناء حطت الدسكة في اللاب وشافت اللي فعلا خافت منه ليلة امس اللي قضتها مع الشخص اللي كانت تبيه يقتل أحمد

قعدت اتعيط واتخبط واتكسر في اللاب

سناء تبكي:ليش ياحقراء عطيتكم اسنين عمري وفي الاخير هذا جزاتي بعد كل اللي درته لكم اتكون نهايتي هك عشان واحد زي هذا
سناء تبكي واتخبط:غبية نا غبية كيف مشت عليا خطتهم كييييف ??

نا كنت طالع بدبشي وفلوسي من داري وخطمت علي دار سناء وسمعتها وهي تبكي واتعيط جوا
حسيت بالقوة وبالفوز حسيت بالراحة وكأن ثار ورديته خذيت شهيق وزفير بكل راحة ونزلت وركبت في سيارتي ورديت بذاكرتي لعند يوم اللي مشيت فيه المكتبة التصوير وللتحديد بزبط يوم اللي عطيت سمر رقمي اليوم هذكي مستحيل ننساه السبب الاول عشان اني اجرأت وعطيت رقمي السمر وماكنت عارف ليش درترهكي والسبب الثاني الاتصال اللي جاني مالمنظمة ونا طالع مالمكتبة كالعادة رن تليفوني وكان اتصال بدون رقم وكنت نحساب انها مهمة وبنسافر بس اكتشفت شيئ ثاني لما رديت

نا:مرحبا

هو:احذر من سناء زوجة جابر

نا:نعم?

هو:هي تدبر لقتلك وتبحث عن شخص يقوم بهذه المهمة

نا:ماذا عليا ان أفعل

هو:يجب ازاحتها من طريقك

نا:كيف

هو:اليك الأتي وستنفذه بالحرف

المنظمة كانت عارفة نسبة ذكاء كل شخص يشتغل امعاها وكانو عارفين تفكير كل شخص لعند وين بيوديه وبسبب معرفتهم السناء كويس وكيف اتفكر طلبو مني اني اندزلها شخص برا من شغلهم شخص انا نختاره وايجيها عن طريق الشخص اللي هي ادز فيه عشان ايدورلها حد يقتلني وماايكون تابع لا الجابر ولا للجوكر وطبعا اللي كانت ادز فيه ماكان يتبع للمنظمة وهذا ليش هي دزاته بس اللي هي ماكانت عارفته ان كان يتبع الأشخاص يتبعو للمنظمة زي مابزبط حركات والصيني والعيساوي مايتبعوش للمنظمة بس يتبعو الشخص يتبع المنظمة ومايقدروش ايديرو شيئ الا بأمره وبهكي وصل الموضوع للمنظمة وعرفو تخطيطات سناء
فكانو اللي يبوه مني اني نختار شخص واندزه عن طريق الشخص هذا وهو ايقوللها ان لا يتبع جابر ولا الجوكر وبهكي تطلب منه يقتلني وهالشخص جابه ليا حركات من معارف حركات يعني مالش اي علاقة بالمنظمة
ولما الشخص هذا عدالها وعرفت ان مالش اي علاقة بيا ولا بجابر و تأكدت ان يشتغل الحساب روحه بس وعرفت مدى قوته وكيف يقدر يقتلني زادت تمسكت بيه وعرضت عليه مبلغ كبير مقابل القتل بس هو رفض وقاللها إن كل شغله في الخطف وفي التهريب والنصب بس
زادت هي المبالغ المعروضة اكثر وكان يرفض لان شغله مافيش دم نهائي قعدت كم اسبوع اتحاول تقنعه وهو يرفض واخر شيئ طلب منها طلب ثاني
وهالطلب بزبط كانت خطة المنظمة واللي هو
يطلب منها ان اينفذ اللي تبيه بس بمقابل واحد وهو النوم امعاها في الأول سناء رفضت
وحاولت ادور علي غيره بس مالقتش اي شخص لان
المنظمة سكرت كل الطرق قدامها
واظطرت اترد عليه من جديد بس هالمرة حاولت اتزيد مبالغ الفلوس عشان تغريه اكثر وهو كان يرفض ومصر علي طلبه وبذكاء سناء المحدود وبحقدها عليا اللي كان عامي عيونها وتبي اتخلص مني في اي وقت وافقت علي طلبه مقابل ان ثاني يوم واللي المفروض هو اليوم هذا بزبط اينفذ خطتها ويقتلني كانت الضربة القاضية الها وبدل ماانا انموت جتها الصاعقة وانقلب السحر عالساحر ووقعت هي في شر اعمالها?

نا:هذي نهايتك ياسناء?

ولعت سيارتي وطلعت شور الشركة واول ماخشيت دغري عديت المكتب جابر قالتلي السكرتيرة ان عنده اجتماع قعدت نستنى اشوية وبعدين طلعو الرجالة اللي عنده ونا خشيت عليه

نا:صباح الخير

جابر:صباح النور امتى روحت

نا:امس عالفجر

جابر:اها مازال ماتبيش اترد للفيلا

نا:لالا خلاص بنستقل بروحي

جابر:بس هكي ماايصيرش انت قدام كل الناس ولدي كيف اتسيب الفيلا

نا:في الفيلا مش متريح وكملتها كلها مشاكل طلوعي منها اريح ليا والهم

جابر:سناء ورااشد حكيت امعاهم كم مرة بس مابوش يفهموني وفاهمين اللي هما يبوه بس

نا:ونا ريحتهم مني لاني مش فاضي للمشاكل امعاهم

جابر:علي راحتك بس نا كنت نطمن لما تقعد في الفيلا

نا في عقلي عشان تقعد عارف كل تصرفاتي ?

نا:حتى هكي بخير اطمن

جابر:باهي تمام

نا:جايك علي موضوع اخرى

جابر:شنو هو

نا:عبد المهيمن

جابر:هذا ولد ميلود اللي انت قتلته

نا:اها هو

جابر:كنه

نا:امس طلب مني تسنيم

جابر بحت فيا زين:كيف طلبها

نا:طلبها بيجوزها يعني

جابر بعصبية:انت شنو اتقول مستوعب اللي تحكي فيه تي هذا نحن عندنا يد في قتلت باته وانت بذات اللي قتلته وفوقها هو شرطي يعني في اي وقت يكشفنا

نا:بس هو مش عارف شيئ ماللي صاير ولا عارفنا ولا عارف اصلا من اللي قتل باته

جابر:مصيره حيعرف

نا:ماعندش كيف يعرف اللي قتل باته الجوكر ونا احمد وهو اصلا مش عارف من اللي قتل باته لا جوكر لا غيره

جابر:بس لو قعد ورا القصة حيعرف وشن عرفك مرات بيدير هكي وبياخذ تسنيم لان شاك فينا وبيتأكد بعد ايتقرب منه

نا:الكلام هذا مافيش بكل نا مش غبي عشان يمشي عليا موضوع زي هذا هو ماعندش اي معلومة علي شيئ وانت عارف حطو قتلته في من يعني توا نحن برا الموضوع بكل

جابر:مش عارف لكن الاحسن ان اتقوله مافيش نصيب خليه يبعد علي حياتنا بكل احسن

نا:وليش ماانديرو العكس انخلوه اقريب عشان نعرفو كل تصرفاته

جابر:خليني انفكر قبل واندير اتصالاتي مع المنظمة ونعرف رأيهم في الموضوع

نا:تمام باهي والقرار اللي ايقولولك عليه قوله ليا عشان نعرف شنو انرد علي طلبه

جابر:تمام

نا:انتلاقو بنمشي شور مكتبي توا

جابر:تمام

طلعت وخليته حاير في افكاره وشفت الخوف اللي كان من عيونه ومافهمت السبب رغم ان نا ماقعدش عندي شك في عبد المهيمن ان يعرف شيئ بس هو كان خايف

وماللي صار مع جابر قدامي شفت وعرفت شيئ ثاني ان المنظمة متحكمة في جابر زي مامتحكمة فيا بالزبط يعني حتى قرار تجويز بنته ضروري من رأي المنظمة شيئ محزن ان مااتكونلك علي قراراتك اي سلطة ?

/
/

خشيت المكتبي وبديت نشتغل وكان عندي شغل واجد

/
/

مرن يومين كان الوضع فيهن هادي وكل واحد لاهي في حياته

تسنيم فرحانة وترجى في رد باتها بعد ماقلتلها قالي ان بيفكر قبل ?

سناء معش طلعت من دارها بكل وافتكيت من وجهها?

جابر مازال يرجى في رد مالمنظمة ?

واما نا فزادن مكالماتي أكثر مع سمر والجو بينا لطيف وحلو وباين ان كان فيه إعجاب متبادل بينا بس لا انا ولا هي حابين انبينو شيئ البعضنا

/
/

اليوم الثالث وتحديدا عالساعة 4 العصر

نا مازلت في الشركة ومن بعد مكالمة الساعة 7:30 الصبح اللي كانت بيني وبين سمر ومن بعدها ونا انرن عليها مااتردش ومعش فهمت كنها لان مش من عوايدها مااتردش عليا
دزيت رسالتين اني مشغول عليها وهكي وهي كانت مااتردش استغربت بكل وقعد عقلي ايودي وايجيب ?

كملت شغلي في الشركة وطلعت ونا ماشي شور سيارتي رن تليفوني ولما شفت القيته العيساوي وفي العادة ماايرنش الا عالحاجة الكبيرة ودغري رديت عليه

نا:ايوا

العيساوي:جوكر ماشفتش حركات

نا:لا ليا ثلاث ايام عليه

العيساوي:نفس الجو له ثلاث ايام مختفي وتليفونه مقفل ومشينا الحوشه كم مرة علي مااندقو ماحدش يفتح ودورناه في كل مكان ماحدش لقاه

نا:تمام خلاص خلو الموضوع عليا حنلقاه

العيساوي:تم وطمنا عليه لو القيته

نا:تم وسكرت

ركبت في سيارتي ونا مستغرب اختفاء حركات المفاجئ وشن ممكن ايكون صاير امعاه
وللأمانة كنت خايف عليه ايكون صايرله شيئ لاني كنت عارف ان اللي في شغلنا حيكون عنده أعداء واجد وبذات لما ايكون شخص ناجح في عمله ويتقن فيه زي حركات ?

قاطع تفكيري صوت تليفوني اللي رن ولما بحتت القيتها سمر ودغري رديت

نا:وين كنتي رايحة مالصبح انرن عليك مااترديش

سمر:قاعدة

نا: اول مرة مااترديش عليا شغلتيني عليك

سمر:أسفة اني مارديت عليك واني شغلتك عليا

لاحظت ان طريقة دوتها غريبة كنت متأكد ان فيه شيئ صاير

نا:سمر شن صاير امعاك

سمر:مافيش شيئ بس ماليش واجد مروحة مالجامعة وتعبانة بس

نا:ممكن تضحكي علي اي حد بس نا لا واضح من صوتك فيه شيئ صاير احكيلي كنك

سمر تنهدت وكان واضح من تنهيدتها ان فيه شيئ كبير مزعلها

#يتبع

قولكن شنو اللي ممكن ايكون صاير مع سمر لين مزعلها بالدرجة هذي ?

وقولكن شن سر اختفاء حركات وهل هو بيخير ولا ايكون صايرلع شيئ?

وقولكن شن حيكون رد المنظمة علي طلب عبد المهيمن ان يجوز تسنيم هل حيوافقو او لا ?

كله حنعرفوه في الحلقة الجاية ?

أسفة لو فيه لخبطة في الأسماء وأكيد رأيكن ايهمني?

گـتـابـتـي Koka Saleh