الجوكر | للكاتبة Koka Saleh

#الـجـوكـر ?

الـحـلـقـة (8)

(حقيقية ممزوجة بالخيال)

گـتـابـتـي #Koka_Saleh

::::::::::::::::::::::::::::::::::::::::::::::::::::::::

لايك قبل القراية وتعليق بعد القراية والكلام للكل فكوني مالقراية بدون تفاعل راه والله التفاعل بالايكات والتعليقات هو أكثر شيئ ايحفزني للكتابة وبذات التعليقات الطويلة انحبهن?
وللعلم بس نا نقرا في كل التعليقات ??

“”””””””””””””””””””””””””“””””””””””””””””””””””

وفي عز اللي نا فيه وكل صراعاتي الداخلية بين الخير والشر جتني رسالة مكتوب فيها ( Get out to your car You will find a ticket and passport in the name of someone else Take them and go to the airport tomorrow morning must be in Italy
اخرج إلى سيارتك سوف تجد تذكرة وجواز سفر بإسم شخص أخر خذها واذهب إلى المطار صباح الغد يجب أن تكون في إيطاليا)

/
/

قعدت انبحت في اللي جنبي وكيف نمشي وشنو العذر اللي حنقدمه الهم بعد نمشي قعدت اشوي وبعدها وعيت معز

نا:معز معز

معز فتح عيونه ويادوبك مركز امعاي:شن فيه

نا:بنطلع توا عندي شغل مهم

معز:الساعة كم توا

نا:اشوي والفجر يذن

معز:شغل شنو اللي توا

نا:مش عارف كلموني عالمخازن مش عارف شن صاير للألات

معز:باهي وبعد اتجي غادي طمني شنو ايصير امعاك وكان تميت تبي مساعدة كلمني

نا:تمام وطلعت وركبت في السيارة القيت جواز سفر جديد وتذكرة الإيطاليا قعدت انبحت فيهن وانشوف للأسم الجديد اللي مختارينه ليا كان أسم (علي) قعدت نضحك نضحك مش عارف شن صارلي بس لما شفت الأسم جتني هستيريا ضحك مش عادية??بس في نص الضحكة انقلبت البكية? علي كل الوجع اللي في قلبي علي كل اللي شفته وعشته علي كل اللي صار فيا صح في البداية ماكان عندي ذنب فيه بس بعد مااخترت انكون فيه قعدت نرتكب في الاغلاط وكل غلط اكبر ماللي قبله ?

بشاعة شكلي ومنظري واللي درته اليوم في عبدالمهيمن ونا اللي قتلت باته وفوق هكي قاعد وانصبر فيه عمري ماشفت نذاله قد هذي قديش طلعت انسان حقير لالا اكيدة نا مش انسان لان اجردت من كل الانسانية اللي عندي ?

بعد بكيت وطلعت كل اللي في داخلي وفعلا كنت محتاج للبكية هذي بككل حسيت بعدها ان ادموعي ريحن اشوي عاللي في قلبي?

ولعت السيارة وطلعت عالفيلا وخشيت الداري وخذيت دبش وطلعت كانو الكل مرقدين وماحد شافني ودغري طلعت عالمطار راجيت قريب ساعة لين نادو علي رحلتي وطلعت وركبت في الطيارة ونا ماكنتش عارف هل حنرد هنا مرة ثانية أو لا لأن للأسف حياتي وقراراتي ماكانن في يدي?

قلعت الطيارة كانت الساعة 7 الصبح وصلت الإيطاليا الساعة 1:30 مساءا والسبب ان الرحلة كانت طويله لانها ترانزيت يعني الطيارة نزلت في الاردن قبل خذينا ركاب من غادي وقلعت ووصلت بعد 8 ونص

اول مانزلت للمطار القيت شخص يرجى فيا طلعت امعاه وركبنا في سيارته وقعدنا نمشو ومشينا مسافة طويلة بككل ولا كنت عارف وين ماشي ولا قادر نسأل أي سؤال ?

وصلنا الفيلا كبيرة كانت عالجبل ولا كان قدامها حراسة ولا اي شيئ درست السيارة ونزلت استقبلتني بنت حلوة ولا خلوها بصراحة كانت فائقة الجمال بشعر احمر يبهر?

هي:You are happy we came (اهلا وسهلا اسعدنا مجيئك )

نا:Thanks (شكرا)

هي: nice to meet you too (سعدت برؤيتك)

نا: I also (انا أيضا)

هي: Prefer to this room is your clothes and rest until we prepare you lunc (تفضل لهذه الغرفة غير ثيابك وأستريح إلى ان نجهز لك الغداء)

نا:OK (حسنا)

خشيت امعاها ورتني الدار وبعدين طلعت غيرت ادبشي وتمددت عالسرير كنت تاعب بكككل يوم امس كان يوم كله تعب وزادني كرسي الطيارة اللي قعدت عليه 8 ساعات بديت ننعس هكي مع دقت الباب

نا:please enter (تفضل)

هي: please enter ( الغداء جاهز)

نا; Ok (حسنا)

صبيت وطلعت وراها وكانو مجهزين غداء سمح وكانت الطاولة طاولة وليمة مش غداء عادي وقمعزت امعايا البنت الحلوة وقعدنا ناكلو مع بعضنا ودار بينا حديث بسيط زي اذا تعبت مالرحلة او لا اخبار صحتي وهكي بس وبعد كملت صبيت ورديت للدار ماانشوفش في شيئ الا السرير

التعب والارهاق والنعاس كان احلى شعور انحس بيه لأن يمنعني مالتفكير في اللي ايصير امعايا
جيت للسرير طافي بنرقد بس ?

تمددت وبنرقد ويادوب بديت ننعس خشت عليا البنت وسكرت الباب وراها شفتلها كانت لابسة لبس مغري وقربت مني بكل هدوء

هي: Don’t you want to spend quality time with me? (لا تريد ان تقضي معي وقت ممتع?)

نا:Very sorry I’m tired now (أسف جدا انا متعب الان)

زادت قربها مني وحطت يدها على شفايفي
هي ; But I want you a young brown and very attractive ( لكن أنا اريد أنت شاب أسمر وجذاب جدا) وقربت بتبوسني

نا بعدتها مني وصبيت;I’m sorry, Miss. I don’t want to (أنا أسف يا انسة لا اريد ذلك)

صبت وبحتت فيا زيين ?

نا:Please get out of here (أرجوك اخرجي من هنا)

شافتلي بنظره كلها كره واستحقار وطلعت?

للحق وللامانة كنت حنضعف لان البنت كانت سمحة بس لحقت علي روحي في أخر فرصة ورفضتها السببين الأول نفسيتي ما كانت تسمح الشيئ زي هذا والسسب الثاني والاهم هو إن عمري ماانسيت اللي صار في الملهى ومانبيش ايتكرر لان مانعرفش شن حيكون المقابل المرة هذي ?

مشيت للباب وسكرته عشان انريح راسي بكل

تمددت عالسرير ورقدت زي رقدة الذيب علي قولتهم عين مغمضة وعين مفتوحة لأني ماكنت عارف شنو اللي بيصير بعد هذا

يادوبك رقدتي طقت ساعة سمعت تخبيط عالباب نطيت بسرعة وصبيت مالسرير

نا مشيت للباب وبنفتح وكنت مستعد ان لو حاول اي حد ايهاجمني انرد عليه دغري

بس لما فتحت كان شاب

هو: come with us (تفضل معنا)

نا: to where (إلى اين)

هو : Sir wants you (سيدي يريدك)

نا: A minute I change my clothes (دقيقة اغير ثيابي)

هو: Ok (حسنا)

خشيت للدار غيرت ادبشي وطلعت امعاه بس كان فيه تغيير افيلا اللي لما خشيتلها ماكان فيه حد الا البنت اللي استقبلتني والسواق اللي جابني القيتها مليانة حراس والكل في يدهم اسلاح استغربت الوضع ?
رقى هو قدامي للدروج ونا رقيت امعاه ووصلنا للدور الثاني كان ممر كبير وفيه مجموعة اديار وكان علي طول الممر حراس وصلنا الاخر دار في الممر فتحلي الباب خشيت وسكر ورايا الباب القيت شخص ماكان كبير واجد في العمر يعني 45 سنة هكي كان امقمعز علي كرسي جوا

هو: Please take a seat (تفضل بالجلوس)

نا قمعزت: Thank you (شكرا لك)

هو:I know you about myself I am the spiritual father of the organization this is my name here (أعرفك عن نفسي انا الأب الروحي للمنظمة هذا هو أسمي هنا)

نا:welcome (اهلا بك)

هو: In what language do you want us to talk? (باي لغة تريدنا نتحدث)

نا: That you prefer (الذي تفضله)

هو: So we will speak in your Arabic language (اذا سنتحدث بلغتك العربية)

نا: Ok (حسنا)

هو:ينتابك الفضول لتعرف لما انت هنا

نا:نعم

هو:أنا هنا لأبلغ لك جزيل الشكر من كل اعضاء المنظمة

نا ابتسمت:لماذا ??

هو:لانك شخص ذكي جدا ومنذ ان بدات معنا لا يوجد ولا غلطة واحدة في رصيدك

نا:انا في خدمتكم

هو:أيضا انا متأسف عما حدث منذ قليل

نا:ماهو ??

هو ابتسم:على ما فعلته تلك الأنسة ذات الشعر الاحمر

نا بحتت فيه وعلامات استفهام واااجد في وجي ???

هو:انه كان مجرد اختبار بسيط لنرو اذا تعلمت من ما حدث معك في الملهى او لا

نا:انا لست غبي لألدغ مالجحر مرتين ?

هو:وهذا مايعجبنا بك ذكائك وعدم ثقتك بأحد

نا:ايمكنني ان أسأل سؤال

هو:ماذا

نا:اذا قبلت بما طلبت تلك الانسه ما الذي كان سيحصل

هو:سنقوم بتصويرك فقط

نا:جيد انني لم أفعل ?

هو: بالتأكيد
هو:اتعرف أن لا يحظى بمقابلتي إلا المميزيين

نا:إذا على ذلم أنا مميز

هو:بالتأكيد واذا واصلت على هذا المنوال ستكون عضو مهم معنا حتى انك ستكون اهم من جابر بكثير ?

نا:بالتأكيد سوف أكون عند حسن ضنكم

هو:اذا كنت تريد السير للامام والصعود إلى اعلى عليك اتباع شيئ واحد فقط

نا:ماهو ???

هو:تنفيذ المطلوب بدون تقديم أي أسأله

نا:هذا شيئ اساسي بالنسبة لي

هو:اذا أبشرك انك ستكون من المهمين معنا لأن شخص بذكائك يستحق أكبر من هذا بكثير

نا:شكرا

هو: تفضل

نا:ماهذا

هو :انهما جوازان سفر احدهما ايطالي والاخر امريكي بشخصيتين مختلفتين سوف تحتاج اليهم الايام القادمة

نا خذيتهن:حسنا

هو:تستطيع أن تذهب ولكن ابتداءا من الغد سيكون لدينا عدة اجتماعات وستكون برفقتي وستتعرف على رجال مهمين معنا

نا صبيت:يسرني ذلك

هو:لا تريد ان تعرف اين الاجتماعات ومن هؤلاء المهمين

نا:اذا اردت السير إلى الامام والصعود لأعلى عليك تنفيذ المطلوب دون تقديم أسأله?

هو ابتسم:يالك من ذكي

نا:هذا من بعض ماعندكم ?

هو:اذا اردت متعة مع الانسة ذات الشعر الاحمر خوذها ولن نقم بأي اختبارات او خدع جديدة

نا ابتسمت:لا شكرا لا اريدها لكنها جميلة اخبرها بذلك ?

هو;حسنا?

نا طلعت من جنبه ونزلت الداري وبعد اشوي نزل هو وامعاه الحرس وطلعو وحتى البنت اللي شعرها احمر عدت امعاهم?

الحق كنت فرحان من كلامه واني كسبت ثقتهم فيا وفرحني لما قال ان حنقعد اهم من جابر وهذا هو اللي كنت نبيه بزبك?

بعد اللي صار هذا وبعد حسيت روحي تريحت من كلامه وان اللي درته جاب نتيجة وماعدش عالفاضي رقدت اليوم كله لان فعلا كنت تعبان تعبان من كل شيئ الارهاق والتعب العقلي والجسدي قلة النوم الصراعات اللي في داخلي السفر المفاجئ كل شيئ كان متعبني رقدت من غير ماانحس بشيئ بكل ?

/
/

وعيت ثاني يوم الصبح وتيت روحي والقيت سيارة قدام الفيلا طلعت وركبت فيها ومشينا للإجتماع وكان اجتماع سري بككل وفيه ناس معدودة وكان من ضمنهم الاب الروحي اللي تلاقيت امعاه

كانو يحكو علي حاجات واجد وكلهن مهمة وقعدت اشوي بشوي نكتشف في اشخاص وحاجات جديدة ماكنتش نعرفهن

/
/
/

مر أسبوع كامل ونا برا امكملها كلها من اجتماع الاجتماع ومن مهمة المهمة كان تعب وضغط بكل في الصبح امعاهم اما الليل حجزت في فندق انروح انبات فيه 3ساعات او 4 والباقي شغل كله
بس اللي كان مريحني وامطمني اني كسبت ثقة كبيرة منهم واني بديت نكتشف في عالمهم بزيادة صح هما زي البحر العميق بس اهو قاعد نغطس عشان نوصل للقاع ونعرف شن فيه وانتحكم فيه?

وقعدت ماشي في الاجتماعات اللي كل يوم لعند مافيه واحد في الاجتماعات اكتشفت شيئ مهم بالصدفة الشيئ هذا كان علي جابر هما كانو يحسابوني عارفة بس نا ماكان عندي العلم وطبعا مابينتش اني مش عارف مشيت الوضع عادي لعند لما طلعت مالاجتماع ورديت للفندق وأول ماوصلت للفندق دغري كلمت حركات وهو رد

نا:لو اي حد جنبك مااتبينش ان الجوكر يحكي امعاك

حركات:تمام بكل شن جوك انت

نا:أسمع كلامي اللي انقوله ونفذه بالحرف من دون ماجنس مخلوق يعلم

حركات:اكيدة اكيدة ياطيري اليوم انجيك

نا:حكيتله اللي نبيه كله

حركات:تم انت غير ابكي بس وسكر

/
/
/

ثاني يوم وعيت بدري ونفس الايام لخرات طلعت دغري لان كاين شغل واجد وكل يوم انزيد انتقرب منهم عاليوم اللي قبله

/
/
/

#في_ليبيا

وتحديدا في الفيلا عند سناء

سناء في دارها وصلنها رسائل عالوتس وكانن عبارة عن صور شافتهن وجن اجنونها ?
طبعا الصور كانن الجابر وهو مع وحدة في مطعم والثانية وهما نازلين مالسيارة والصورة لخرى وهما راقيين مع دروج عمارة ?

سناء جن اجنونها وقعدت اترن علي جابر تلقى فيه مقفل
وشاطت فيها النار ومعش قدامها حل إلا انها تصبر وترجى ترويحته

لكن جابر ماروحش الا في الليل واول ما وصل نزلت من دارها وتلقاته تحت

سناء:وين كنت

جابر:في الشغل وين بنكون يعني

سناء:وليش قافل تليفونك

جابر;شغل واجتماعات مانبيش حد يزعجني قفلته

سناء قربت منه وبصوت عاليووراته الصور:هذا هو شغلك

جابر ارتبك:هذينا منين جبتيهن

سناء بعصبية وصوت عالي:منين ماجبتهن جبتهن انت قولي هذي من ?

جابر:وحدة عندي امعاها شغل

سناء بعصبية وصوت عالي:يا سلام والشغل ايخليك تطلع امعاها الشقة

مع نزلت راشد وتسنيم من فوق بعد سمعو الهرجة

جابر شافهم: سناء اسكتي توا وخلينا نطلعو انتفاهمو في دارنا

سناء بعصبية:مش ساكته لين اتقولي شن قصتها اللي امعاك هذي

جابر:سناء قتلك ارقي وانفهمك فوق

سناء بعصبية:مش راقية توا بنعرف هذي من والا والله ياجابر ماتتشوف خير اليوم

جابر بعصبية:متجوزها تريحتي هكي

الكل انصدمو ?

جابر رقى وسيبهم في حيرتهم
سناء قعدت في حالة ذهول من كلمة جابر وبعد اشوي لحقاته في الدار

اما تسنيم وراشد قعدو مصبيين في مكانهم ومش فاهمين شنو القصة ?

/
/

#في_الدار

سناء:انا انا تجوز عليا بعد كل شيئ درته امعاك تجوز عليا

جابر:الجوازة هذي المصلحة معينة

سناء:علي من تكذب انت شنو المصلحة في وحدة زي هذي

جابر بعصبية:الطلب جاني من فوق وانتي عارفة مانقدرش نرفض

سناء بصدمة:ليش ماقتلي مش كل شيئ تحكي فيه ليا

جابر:لان انطلب مني مانحكيش الحد لانهم عارفين كويس عقول الصبايا ولو انايعرفتي شن حديري ومخططنا كله ايريح عالفاضي

سناء بعصبية:مش مصدقتك مش مصدقتك

جابر:براحتك ماااتصدقيش نا اللي عندي حكيته واللي اتريحك ديريها

سناء بعصبية:نا عندي كرامة ومستحيل نرضى بإهانة زي هذي طلقني ياجابر طلقني

جابر:ماعنديش مشكلة انطلقك بس مانضمنش عيشتك نا لما خذيتك كنتي تشتغلي امعاهم وكان قرار زواحنا من فوق ولما قررتي اتسيبهم وافقولك لانك مراتي وضامنين انك مش حتضريهم بس توا لو اطلقتي منهم وانتي عارفة جزء كبير من اعمالهم مش حيسمحولك اتعيشي

سناء:يعني شنو توا

جابر:يعني ترضي بالامر الواقع

سناء:معناها طلق اللي متجوزها

جابر:هذي مستحيل من دون ماايجيني قرار مانقدرش

سناء بعصبية:ونا شنو

جابر:انتي مراتي وقدام الناس كلها اما هي ماحدش عارف وانتي اللي كبرتي القصة ودرتي موضوع مشي الوضع عادي وماحدش حيعرف شيئ

سناء بعصبية:نا مش حنرضى بوضع زي هكي كرامتي ماتسمحليش دير حل توا

جابر:ماعنديش لكي حل

سناء:هي هكي يعني لو طلبت الطلاق انموت وانت ماتبيش اطلق اللي اجوزتها إلا بقرار من فوق يعني ماتبيش اديريلي حل

جابر:هذا اللي فيه ولو مستغنية عن روحك توا حنطلقك غير هكي مااتوجعيش راسي

سناء بعصبية:يبقى من يوم وغادي اعتبر جوازنا كله علي ورق عشان نحمي روحي وبس اما بيني وبينك مافيش شيئ ولا ليا سلطة عليك ولا ليك سلطة عليا

جابر:اللي تبيها ديريها

سناء:تمام بس حتندم ياجابر وطلعت وهي متضايقة وغامتلها بكل من جابر واللي داره فيها بعد عشرة كل هالسنين ?

/
/
/

ثاني يوم في الليل وتحديدا عالساعة 10 روحت للفيلا
كان الوضع في الفيلا فيه اشوي ارتباك يعني كانن فيه حاجة مش مفهومة مادورتش الموضوع وخشيت الداري كنت تاعب مالسفر ومالطريق وقلة النوم غادي قلت انتريح لان بكرا ضروري نمشي للشركة

خشيت دوشت وطلعت وجيت السريري بنرقد اندق الباب

نا:من
تسنيم خشت;ومن غيري يعني

نا ابتسمت:خشي تعالي

تسنيم:اول حاجة نا زعلانة منك معقولة اتروح ومااتجيش اتشوفني

نا:والله نحسابك راقدة

تسنيم:من يرقد في الوقت هذا ?

نا:أسف ياستي بس شنو ثاني حاجة?

تسنيم:انت وين كنت هذا كله

نا:كنت مسافر

تسنيم:وين مسافر وبعدين فيه حد ايسافر من غير ماايودعوه ولا يستقبلوه في المطار

نا:في انا ?

تسنيم:ماانبصرش نحكي جد كيف اتسافر فجاة هكي وعليش

نا:عندي شغل

تسنيم:شغل في الشركة

نا:اها

تسنيم:ماهو راشد يشتغل زيك في الشركة ليش ماايسافرش زيك

نا:شغلنا يفرق علي بعضنا

تسنيم:في شنو يفرق

نا ضحكت وخبطتها علي راسها:مكثر أسألتك ?

تسنيم;خويا وبنطمن عليه

نا:قصدك بتقصقصي عليه

تسنيم ضحكت:بزبط

نا:قمعزي واحكيلي شن جوك وشن دايرة في قرايتك

تسنيم:عادي نفس من قبل نمشي للجامعة وانرد وديما في الدار نحكيش مع حد ولا نختلط بحد إلا انت

نا:حتى بعد ترويحة حمزة

تسنيم:للامانة حمزة خير من راشد ايخش مرة مرة ويسألني علي جوي وقرايتي بس من اول مابدى يشتغل في المستشفى معش انشوف فيه بكل

نا:باهي وانتي اعقلتي ومعش درتي شيئ ماللي كنتي اديري فيه

تسنيم:وحق ربي شعفت خلاااص

نا:الحقير هذكي معش ضايقك

تسنيم:أبدا ابدا وكله بفضلك

نا:هذا مش فضل هذا حق وواجب علي تجاهك ياهبلة

تسنيم ضحكت وبعدها كشرت

نا:باهي ليش رديتي كشرتي عساس هكي شكلك احلى مثلا ?

تسنيم:مش هكي بس اللي صار امس مع بابا وماما امخلي جوي مش تمام

نا:وشن صار

تسنيم:اتخليها بينا وماتحكيش الحد

نا:أكيدة

تسنيم:بابا وماما امس تعاركو واللي فهمته ان بابا متجوز عليها بس بعدين بعد سألت ماما نكرت وقالت سوء تفاهم بس من امس بابا طالع مالفيلا ومعش جا لعند اليوم

نا:اكيدة مشكلة بسيطة وحيحلوها وتنتهى

تسنيم:وافرض صح متجوز عليها

نا:وانتي في شن يوجعك الموضوع

تسنيم:نا عشان ماما ديما شايفة روحها قدام الكل ببابا وحبه الها معقولة ايديرلها لقطة زي هذي

نا:توا وفي الوقت هذا توقعي اي حاجة تعرفي ليش

تسنيم :ليش

نا :لأننا نعيش في أسوأ عصر في التاريخ، نحن وسط أقذر مجموعة بشرية وجدت على الاطلاق ?
. .
تسنيم:امعاك حق بس انت كيف هكي انحس فيك فاهم كل شيئ وكل حد اوقات اتقولي الكلام اللي نقعد في خاطري انقوله

نا:اصبري توا نعطيك كم اكتاب كسدي عليهن حينفعنك واجد

تسنيم:لا ومثقف اخرى ?

نا:نعجبك?

مشيت الدولابي واخترت كتابين وعطيتهن الها ونا انمد فيهن الها انفتح الباب بقوة

سناء بعصبية:تسنيم في شنو اديري هنا

تسنيم:انهدرز مع احمد

سناء بعصبية:الف مرة قتلك معش اتخشي الداره

أحمد:وشن فيها كان خشت الداري هي اختي على فكرة?

سناء بعصبية وصوت عالي:ماتضحكش علي روحك واتصدق الكذبة كلنا عارفين انك مالملجى واسمك اللي فرحان بيه هذا لعبة ووهم عالكل

تسنيم بعصبية:بس احمد خويا وقدام الكل

سناء بعصبية:اطلعي من هنا راه خيرلك

نا:اطلعي تسنيم

تسنيم:زعلت صح ?

سناء بعصبية:تسنيم تعااااالي ?

تسنيم طلعت الامها وقعدت برا اتهزب فيها علي قعدتها مع أحمد وان هو مش خوها ولقيط ومالملجى

سناء بعصبية:انشوفك تحكي امعاه مرة اخرى اتشوفي شن انديرلك وربي انخلي راشد يقتلك فاهمة

تسنيم تبكي:بس أحمد خويا زي راشد?

سناء:خوك في عينك هذا واحد مانعرفوش ولا نعرفو هله ولا حتى هو يعرفهم لقيط عارفة شن معنى لقيط هذا ولد حرام شن نبو فيه وبعدين قعدته هنا مش مطولة اشوي وانطلعه من حياتنا كلها

تسنيم قعدت تبكي ومشت الدارها وسكرت علي روحها

/
/
/

نا كلام سناء قهرني ومعش خلاني نرقد وزاد كرهها في قلبي أكثر وأكثر وحلفت اني ننتقم وانرد كل حقي منها ?

وفي عز التفكير في انتقامي من سناء مر علي طيف سمر اللي شفتها في المكتبة ومش عارف ليش مر طيفها في مخيلتي وفي الوقت هذا بذات بس بصدق مجرد ماشفت طيفها بين عيوني هديت بروحي رغم ان كانت نااار والعة في قلبي من كلام سناء

بعد ماهديت اشوية جيت بنرقد بس سمعت صوت سيارة درست صبيت وفتحت الروشن بنشوف من
ولما شفت القيته حمزة لكن الغريب في الموضوع ان درس سيارته ونزل وقمعز علي دروج الفيلا وقعد حاط راسه بين ايديه وكأنه ايفكر في شيئ
بس مادورتش سكرت الروشن ورديت السريري وتمددت ورقدت ?

/
/
/

صباح يوم جديد

وعيت في الصبح غيرت ادبشي ونزلت بنمشي للشركة القيت جابر كيف خاش للفيلا

نا:صباح الخير

جابر:صباح النور امتى روحت

نا:أمس في الليل

جابر;تعال امعايا للمكتب نبيك

نا:تمام ولحقته

جابر:قمعز

نا قمعزت;شن فيه

جابر:شن جو السفر والشغل

نا:تمام

جابر:ماطلبوش منك شيئ جديد

نا:لااا

جابر :تمام
وكان متردد كأن بيحكي شيئ ومش قادر

نا:شن فيه حاس عندك كلام

جابر:فيه موضوع صار بنحكيه لكي لكن مايطلعش الجنس بني ادم

نا:اكيدة يعني وانت عارف

جابر;نا من كم شهر المنظمة كلفتني بمهة وكانت عبارة عن اني نجوز وحدة كانت مرات حد مهم علي أساس يبو معلوات علي حاجات هي بس عارفتهن وبصعوبة قدرت نقنعها بحبي ووافقت تجوزني

نا:باهي

جابر:فيه حد الباين شايفني او يحفر من ورايا وامصورني ونا امعاها ودازهن السناء وبيخرب اللي بينا وسناء طلبت الطلاق ونا مش قادر انطلقها لان المنظمة مش حتسمح بشيئ زي هذا بس سناء ماعنديش فيها ثقة وخايف ادير اي لقطة واتخرب كل شغلي وتنهي وجودي ولو بإتصال واحد الهم

نا:هي سناء عارفة شغلنا

جابر:اها لأن كانت تشتغل امعانا من قبل وجوازناركان بقرار منهم

نا:تمام بس بشنو نقدر انساعدك

جابر مدلي ورقة:اول حاجة الرقم هذا هو اللي داز الصور السناء لازم تعرفه من واتجيبه ليا نا ماعرفتش لان الشفرة مديورة علي اسم واحد ميت وفي موضوع زي هذا مانقدرش نوثق الا فيك انت وبس

نا:كون هاني واعتبره جاك

جابر: وحاول بأي طريقة اتبعد سناء من طريقنا الهيها في روحها

نا:تمام حنلقالها حل

جابر:خليت الموضوع في يدك لازم اتحله

نا صبيت:حنحله بس كل شيئ بثمنه?

جابر:اكيدة امغير فكني مالقصة مانبيهمش في المنظمة يعرفو اني ماحفظت السر وان الكلام وصل السناء وان نا ضعيف الدرجة حد يقدر يمسك شيئ عليا

نا:تمام تمام فاهم
نا:تبي شيئ اخرى

جابر:سلامتك حنتلاقو في الشركة

نا: تم وطلعت من عنده وطلعت للسيارة واول ما ركبت

نا بإبتسامة:عرفت كيف تلعبها صح ياحركات ?

/
/

تعالو انردو اليوم المكالمة مع حركات

نا:لو اي حد جنبك مااتبينش ان الجوكر يحكي امعاك

حركات:تمام بكل شن جوك انت

نا:أسمع كلامي اللي انقوله ونفذه بالحرف من دون ماجنس مخلوق يعلم

حركات:اكيدة اكيدة ياطيري اليوم انجيك

نا:توا عرفت ان جابر متجوز وحدة أسمها نوال ال— تسكن في عمارات ال—- كانت زوجة فتحي ال—- مانبيش منك اكثر من انك اتراقبلي جابر واتصوره وهو امعاها وبعدين اتجيب شفرة بإسم حد مش معروف والافضل ايكون ميت وادز الصور من رقم الشفرة علي رقم سناء اللي حندزه لكي توا وبس
وبعد ادير اللي قتلك عليه كله كسر الشفرة واحذف الصور امتاع جابر من عندك وراك تنسى تحذف المكالمة اللي بينا توا والرسالة اللي حتجيك مني توا

حركات:تم انت غير ابكي بس وسكر

/
/
/

طلعت مالفيلا ونا فرحان اني رديت جزء بسيط من حقي والباقي كله جاي في الطريق خصوصا سناء?

كنت طالع مش فاطر تكيت علي كافي ونزلت عشان ناخذ شيئ نفطر بيه بس ونا في الكافي رن تليفوني وكان رقم عبد المهيمن استغربت رنته مالصبح هكي وترددت واجد انرد بعيدن قررت انرد طلعت مالكافي أان كان دوشة وصبيت قدامه ورديت

نا:صباح الخير

عبد المهيمن:انت وين

نا:في كافي كاكتوس عارفه

عبد المهيمن:عرفته نا قريب منه اشوي وانجي

نا:شن فيه

عبد المهين:بعد انجيك توا تعرف وسكر

نا مستغرب من مكالمة عبد المهيمن في الصبح وانفكر شن يبي مني وشن الشيئ اللي خلاه بيشوفني من صبح ربي وقعد قلبي قابضني ومش متريح بعد اشوي تفكير دسيت التليفون في جيبي ورفعت راسي وشفت ?

#يتبع

قولكن شن يبي عبد المهيمن من أحمد وشن ممكن ايكون صاير من شيئ ايخليه ايجيه مالصبح هكي وقولكن شنو اللي شافه أحمد غير ملامحه هكي ??

كله حنعرفوه في الحلقة الجاية ☺

أسفة لو فيه لخبطة في الأسماء وأكيد رأيكن ايهمني ?

گـتـابـتـي Koka Saleh

 

error: