الجوكر | للكاتبة Koka Saleh
الـحـلـقـة (3)
(حقيقية ممزوجة بالخيال)
گـتـابـتـي #Koka_Saleh
::::::::::::::::::::::::::
لايك قبل القراية وتعليق بعد القراية والكلام للكل فكوني مالقراية بدون تفاعل راه والله التفاعل بالايكات والتعليقات هو أكثر شيئ ايحفزني للكتابة وبذات التعليقات الطويلة انحبهن?
“”””””””””””””””””””””””””
سيبته طايح وفاقد وعيه وخذيت البنت من يدها وبنطلع بيها بس هي قعدت تلبس في دبشها ونا قعدت نرجى فيها
كان الشخص هذا طايح ورايا وزي ماقلتلكم كأنهم ضافولنا حاسة جديدة حسيت بأن تحرك ورايا لفيت شوره كان مصبي وفي يده موس ورد هجم عليا وقعدت نصارع امعاه وهو بيضربني بالموس نهايتها قدرت انبعده مني وكنت اقريب مالمسدس اللي كان امعاه مسكته وضربته بيه بس المسدس ماكان فيه اي صوت لان كان مركبله كاتم صوت?
طاح الراجل بس ماطاح الا ميت ?
معش عرفت كيف نصرف شنو اندير انحطيت في موقف صعب شاب عمره 18 سنة اول مرة يطلع للعالم الخارجي واول شيئ ايديره يقتل
اصلا فكرة اني قتلت شخص بإيديا فكرة اتخوف في حد ذاتها في اللحظة هذي خفت من نفسي وكمية الشر اللي في داخلي
خليت البنت جوا مرعوبة وخايفة وتبكي وطلعت كان واحد مالشباب اللي امعايا طالع مالدار اللي جنبي مسكته وحكيتله اللي صار وقالي إن مش حيقدر يصرف وإن لازم نحكو للشخص اللي امعانا تحت
في وقتها كنت انفكر لو المدرسة علمو شن حيديرو فيا اكيدة حيعاقبوني اصعب عقاب لا مش عقاب بس كنت متأكد انهم حيقتلوني ونزلت تحت انا واللي امعايا والقينا الراجل اللي مكلفته المدرسة يقعد امعانا قاعد في مكانه جينا وحكيناله اللي صار ودغري كلم مدير المدرسة وقاله اللي صار امعانا وكانت اجابته جملة وحدة
ان انا نرقى فوق وانرد للدار وانسكر ونقعد مع البنت ماانخليهش تطلع وفعلا درت زي ماطلب وبعد اشوي خشو عليا نائب المدير وامعاه أشخاص عمري ماشفتهم في المدرسة كان اشكالهم زي أشكال مافيات الأفلام
في اللحظة هذي ماننكرش اني كنت متوتر وخايف مش عارف بعد هاللحظات شن حيكون مصير حياتي ?
خشو حكو امعايا وسألوني عاللي صار وكيف صار ونا حكيتلهم كل حاجة صارت امعايا
وبعدين سألو البنت شن تعرف الشاب وهو من
والصدمة كانت في إجابتها لما قالت ان هو يشتغل مع مافيا معروفة في روسيا
وفي لحظات والبنت كانت تحكي في القصة ومن المافيا وهو شن شغله فيها ولما حكت كل المعلومات اللي عندها فطنت الحركة نائب المدير لما همس الواحد مالرجالة اللي امعاه والراجل طلع المسدس وقتلها
كانت صدمة كبيرة ليا وقعدت انعيط ليش قتلتوها شن ذنبها هي شن دارت
لحظتها بحت فيا نائب المدير بنظرة غريبة اول مرة انشوفها في عيونه وقالي
(لو البنت هذي قعدت عايشة انت حتموت)
لما سمعت الجملة هذي نا سكتت
طلع نائب المدير وخذاني امعاه ونا كنت مصدوم مش مقادر نستوعب شيئ ماللي صار
ركبت امعاه في السيارة وسألته شن بيديرو للي ماتو
قالي ارتاح واطمن خلاص الموضوع انتهى وسكر عالموضوع وانساه
مااقدرتش ننساه اللي صار كله قدام عيوني هجمة الراجل عليا موت البنت بلا اي ذنب
ليش دارو هكي مش فاهم شيئ
ومية سؤال وسؤال قعدن في راسي
كيف قدرو ايحلو الموضوع كيف طلعوني من دون ماايصيرلي شيئ ومن دون ماحد يفطن حتى الطلبة اللي امعايا ماعرفو شيئ
من هذوما وشن قصتهم وليش ايهمهم نقعد حي من وراهم وشن غرضهم مني طول الطريق ونا انفكر الف علامة استفاهم مش لاقيلها اجابة ??
وصلنا للمدرسة نزلت واول ماخشيت خششوني المكتب المدير كنت نحسابه بيحكي امعايا او ايعاقبني لما خشيت مدلي التليفون وطلع رديت عالتليفون
نا:الو
جابر:طمني عليك انت كويس
نا بخوف:عمي جابر نا قتلت
جابر:عارف ومااتخفش كل شيئ انحل خلاص
نا:كيف حلوه ونا شن بيصير فيا توا
جابر:مش حيصيرلك شيئ خلاص انت توا في امان
نا:والبنت اللي قتلوها بدون سبب
جابر:موتها في مصلحتك لو عاشت كنت انت حتموت الراجل يشتغل مع مافيا ولو مسكوها حتعترف بكل شيئ عليك ويقتلوك
نا مسحت يدي علي راسي:كل شيئ صار بسببي ياريت ماطلعت مالمدرسة
جابر:كل شيئ صار مقدر ومكتوب من ربي ودبين نا وراك مااتخاف من شيئ وفكر بس في مستقبلك
نا:اي مستقبل هذا
جابر:لازم اتكمل جامعتك عشان اترد الليبيا
نا:قصدك نقدر انرد الليبيا
جابر:ان شاءلله حترد بس قبل حتاخذ الشهادة الجامعية
نا:منين وكيف ووين بنقرا المدرسة مافيهش جامعة
جابر: خلال الأسبوع هذا حنجيك في روسيا وحنفهمك عاللي بيصير
نا:باهي
جابر:توا اهم شيئ تنسى اللي صار واتفكر في مستقبلك وجامعتك
نا:ات ليش ادير امعايا هكي شن تبي مني
جابر:قريب حتعرف توا عدي تريح وارقد وارجى جيتي لكي
نا:تمام
جابر:تصبح علي خير وسكر
ونا مكالمة جابر زادت من علامات الاستفهام في راسي اسئلة واجد عندي من دون اجوبة ??
قعدت 3 ايام في المدرسة ماكنت نحكي مع حد بكل كنت طول الوقت سارح وساكت او بالأحرى كنت مصدوم في اللي صار امعايا فكرت اني نا قعدت قاتل فجأة وكيف انقتلت البنت قدامي وبدون سبب وكيف اني اظطريت نسكت عشان نحمي روحي
كل شيئ صار بسببي نا كنت حاس ان فيه كمية شر في داخلي امخزنة وبدت تطلع
واللي محيرني ليش ماحد عاقبني ليش ماحد عاود حكى في القصة وكيف قدرو ايدسو جرمتين مش جريمة وحدة
تأكدت ان المدرسة هذي مش مدرسة عادية فيه وراها ناس كبار بس من هما مش عارف ??
أصعب شعور انك تقعد عايش في حيرة من صغرك ومش لاقي تفسير الاي شيئ ايصير امعاك
ولا حتى اللي امعاك فاهمين اللي صاير
صح ماننكرش اني تعلمت احسن علم وان اللغات اللي امعايا ناس واجدة اتمنى ايتعلموهن وصح اني قعدت مثقف الابعد الحدود كل شيئ نعرفه مافيش شيئ في المدرسة ماقريت عليه وماعرفته وصح ان عندي كمية وعي ودراية علي جميع اصناف البشر ونقدر نعرف شخصية كل شخص من نظرة عيونه
بس هذا ماايجي شيئ جنب الحيرة اللي عايشها من انا صغير وليش نا انتعلم في هذا كله ليش ماايقولو شن يبو منه ويبو ايخدمونا الصالح من ??
كنت عارف ان فيه شيئ حينطلب مني وشيئ كبير وان الناس اللي ورانا ناس كبار بس شن هو الشيئ ومن هما الناس هذوما هذا اللي عشت طول عمري انفكر فيه ونبي نعرفه
متمني لو يحكولي وايحلولي هاللغز اللي عايشه مهما كان هو أهم شيئ عندي نعرفه
/
/
/
بعد 3 أيام بزبط وصل جابر للمدرسة ونا خشو عليا وطلبو مني انلم ادبشي ونطلع ولميت ادبشي وحاجاتي و كل اللي عندي حطيته في الشنطة وطلعت وخذوني المكتب المدير القيت جابر سلم عليا وقالي هي وطلعنا
نفس اللحظة يوم اللي خشيت خشيت يومها مع جابر ومشينا المكتب المدير ومنه نا خشيت جوا ومعش طلعت واليوم برضو طلعت مالمكتب المدير البرا واكيد مش حنرد هنا مرة أخرى
ركبت مع جابر في السيارة
نا:وين واخذني هالمرة
جابر:بتسافر الأمريكا
نا:ليش وشن بندير غادي هل في مدرسة زي هذي غادي
جابر:فيه جامعة وانت لازم تقرى فيها هندسة كمبيوتر
نا:يعني مختارلي حتى تخصصي
جابر:أكيد
نا:انت من وشن تبي مني والناس اللي كانو ايجوني هذوما من وكيف قتلت وماحد جا شوري وكيف قدرتو تخفو جرمتين
جابر:أحمد لو تبي حياتك تستمر ماتسألش علي شيئ
نا:بس نا لازم نعرف اللي ايصير امعايا
جابر:توا ايجي وقته وتعرف
نا:باهي امتى
جابر:لما ايجي وقته وايجي قرار بالشيئ هذا انقولك
نا:قرار من من
جابر:أحمد خلاص ماتسألش واجد مش في صالحك الشيئ هذا
نا:بس هذي حياتي نا ولازم نعرف كل شيئ فيها
جابر شافلي:غلطان حياتك من يوم اللي طلعت مالميتم مش ملكك ملك ناس ثانية وانت المفروض تسمع واطيع بس عشان اتحافظ عليها وحط في بالك انت بفضل الناس هذوما عايش لعند توا وتعلمت احسن علم وحيقعد عندك احسن مستقبل واحسنلك انك معش تسأل ودير كل المطلوب وبس لأنك لو قعدت هكي حتى نا مش حنقدر نحميك منهم
نا سكتت وجابر طلع بالسيارة ووصلنا للمطار ونزل امعايا وسافرنا مع بعضنا
بس الفرق بين سفرتي ونا اصغير وسفرتي توا اني عرفت كيف قدر جابر ايطلعني من ليبيا ونا اصغير عرفت ان عندي اوراق وان جابر مسجلني علي اسمه بس طبعا كل اوراقي وثبوتاتي عنده هو
وصلنا الأمريكا وكان ليل وحجزلنا جابر في فندق بتنا فيه وثاني يوم مالصبح مشينا للجامعة اللي بيسجلني فيها وكانت جامعة داخلية اسجلت فيها باسم أحمد جابر وطبعا جابر اختارلي قسمي واللي هو هندسة كمبيوتر
بس تبو الصدق ماكنتش امخطط شن نبي انخش في الجامعة اصلا ماكنتش انخطط الشيئ للمستقبل لاني عارف ان حياتي مش ملكي انعيش في اليوم زي ماهو وبس اما بكرا فهو مش ليا شن بيصيرلي فيه وشن بندير فيه كله في يد ناس نا مانعرفهمش
/
/
طبعا جابر سجلني وعدى وكالعادة عدى بكل اوراقي يعني نا في الجامعة بس احمد جابر اما برا فأنا نكرة وماحدش يعرفني
الشيئ اللي خلاني انخلي حياتي في الجامعة وبس
جابر قبل مايمشي عطاني تليفون وقالي حنكونو امعاك بتواصل هنا
اول اتصال جاني انطلب مني ان لازم انزل مواد واجد وان في ظرف سنتين ونص لازم انكون امكمل الجامعة
كان الوضع في الجامعة اهدى ناس عادية نقرا امعاهم مافيش اي شيئ مريب في الجامعة بس نا كنت حافظ القواعد اكويس وكنت قادر اني نقرا ونعرف شخصية اي حد وكنت قادر انحدد معاملتي مع الناس واول القواعد عدم الثقة في اي حد وتضييق مساحة معارفي ومافيش اصدقاء وان في لحظة حتي ضلك ممكن ان ايبيعك كلام من طفولتي مرتسخ بذاكرتي هذينا المبادئ اللي تعلمتهن ونشأت عليهن
مهما حاولت اندير شيئ عكس هذا مااقدرتش لان اللي غرسوه فينا صعب ان انحولوه بسهولة وكان لازم اني نتبع قواعدهم لو اني بنعيش وانحافظ علي حياتي
كان كل فترة ايجيني شخص يطلب مني مهمة
كان أغلبها مراقبة اشخاص وكتابة تقارير علي تحركاتهم
وكان في بعض منها حظور اجتماعات وانكون نا مترجم خاص الشخص معين
حاجات بسيطة وماكان منهن الخوف وكنت اندير فيهن علي اكمل وجه وطبعا من دون توجيه اي سؤال زي ماقالي جابر ممنوع الأسئلة ✋
ماكنتش عارف شنو الغرض مالمهمات هذينا بس ممكن لإختباري اذا كنت اهل للثقة او لا
قريت نفس ماطلبو مني بزبط وكنت انزل في مواد واجد وكان الموضوع مش صعب عليا وعلي ذكائي وكان التخصص مش صعب وقدرت في خلال سنتين ونص انكمل الجامعة وتخرجت وخذيت شهادتي وكان تخرجي في سنة 2012
ويوم التخرج كان جابر حاظر بصفته باتي الكلمة اللي عمري ماعرفت معناها ولا شن هي الابوة او شن وظيفته في الحياه
وطبعا بإستثناء ان كان يوم تخرجي هو كان يوم ثاني بالنسبة ليا هو نفسه اليوم اللي تغيرت فيه حياتي 180 درجة وهو نفسه اللي عرفت شنو المطلوب مني وهو نفسه اليوم اللي قدرت انحل فيه اكثر من علامة استفهام ادور في راسي
لحظة استلامي للشهادة ولحظة استكمال حفل التخرج بالكامل في وقتها جاني جابر وسلم عليا
جابر:مبروووك
نا:الله ايبارك فيك
جابر:هي نمشو
نا:وين
جابر:حتعرف كل حاجة بعد نمشو
مشيت امعاه وركبنا في السيارة ومشينا المكان بعيد اشوية وكانت زي المزرعة او الاستراحة وكان قدامها عدد كبير مالحراس ونزلنا وخشينا وخش بيا المكان زي الدار وقمعزت نا وهو
نا:شنو المكان والمن جايين
جابر ضحك وطلع دخان وولعه وبعدها بحت فيا جابر:امتى اتبطل أسأله
نا:لعند لما نعرف شن تبو مني
جابر;توا حتعرف كل حاجة
نا قعدت ساكت ونبيه يحكي اي شيئ بس نعرف حياتي وين ماشية
جابر:فيه سؤال سألته ليا وانت اصغير
نا قاطعته:ليش تنبنيتني وانت عندك عيال
جابر: من انت طفل كنت ذكي وتوا حاليا قدامي شاب فائق الذكاء نبيه الابعد حدود ومتعلم احسن علم قادر إن ايحاور اي شخصية ويثبت ثقافته قدامها شخص فيه جميع المواصفات المناسبة
نا:مناسبة الشنو بزبط
جابر:الأوامر جن إني نحكيلك شن نبو منك لأن توا انت أهل للثقة عشان تقعد امعانا
نا:انتو من
جابر:نحن منظمة كبيرة عالمية صعب انك تعرفنا كلنا من اذا انا بروحي ليا فوق من 40 سنة امعاهم مانعرفهمش كلهم وعرفت جزء بسيط منهم
نا:باهي تبع شنو
جابر:تبع اي شيئ وفي كل شيئ هما فيه
نا:استخبارات مافيا شنو بزبط
جابر:كلمة مافيا صغير بالنسبة الهم لان تحت منهم اكبر أسامي المافيات وياخذو في الأوامر منهم
نا:باهي شنو المطلوب مني
جابر:مش مطلوب منك مفروض عليك
نا:اللي هو
جابر:انت تهيئت بكل حواسك وبكل اللي قريته وبقدرتك وذكائك انك اتكون عضو مهم الهم
نا بحتت فيه ومافهمتش المقصود
جابر:في كل دولة عندهم شخص او اكثر من شخص انا مانعرفش بس اللي نعرفه إن حتقعد امعايا لان نا قاعد نكبر ومازالي كم سنة ومعش نقدر اندير شغلهم كله
نا:وشنو شغلهم
جابر:تجارة
نا:تجارة شنو
جابر:سلاح مخدرات وتهريب وتنظيم هجرات وأمور ثانية مش مطلوب توا تعرفهن
نا:والتجارة هذي مطلوب فيها كل اللي علمتوه ليا
جابر صبى وجا قمعز جنبي:علي حد علمي انك ذكي وتلقطها عالطاير لازم تفهم انك تبي اتعامل مع ناس واجد وناس مهمة اكثر ماتصور واغلبهم مالدول اللي برا فلازم اتكون انسان واعي ومثقف وقادر انك اتفاهم وتحكي وتقنع اي شخص قدامك ولازم اتكون قادر تقرا الناس وتعرف شخصيات اللي بتعامل امعاهم ولازم اتكون قادر انك ادافع عن نفسك وهذا ليش تعلمت كل الفنون القتالية واجهزت نفسي كويس بحيث ايكون عندك دراية بأي شيئ ايصير وقدرت تركيزك وانتباهك اتكون عالية انت تعلمت وادربت نفس اي جندي سري بحيث انك اتكون قادر انك تكسب ثقة الشخص اللي قدامك بعلمك وثقافتك وتدريبك
نا:واذا ماوافقتش
جابر:حتموت صدقني بعد كل شيئ وصلوك له مش حيسبوك هكي
نا:يعني يانشتغل امعاهم يايقتلوني
جابر:أحمد انت عشت من صغرك حياه كلها غموض وحيرة وتوا وضح قدامك كل شيئ وعرفت علينا كل شيئ فأكيدة مش حيخلوك اتعيش لو رفضت يبقى الأحسن اتوافق وتضمن مستقبلك وانك اتكون إنسان مهم
نا:بس اكيدة شغلكم فيه دم
جابر:إذا انتاجرو في سبب الدم والموت اكيدة فيه دم وفيه ناس اتخون لازم تصفى
نا:بس نا مانقدرش علي شيئ زي هذا
جابر:بس انت قتلت من قبل ولا انسيت
نا بحتت فيه:انت قتلي انسى
جابر:نا قتلك انسى لأنك تحت حمايتنا بس لو رفضت حمايتنا مش حتعيش ويايمسكوك المافيا ياشرطة روسيا وانت مطلوب عند الاثنين
نا معش عرفت انرد وفهمت اللي صاير وشكله كان كله ملعوب ومشى عليا
جابر:شن قلت امعانا ولا علينا
نا:وافرض نمتسك وافرض الشرطة تعلم ويحبسوني
جابر ضحك:اي شرطة كل شيئ امعانا وتحت أمرنا وكل شخص ومفتاحه عندنا وبعدين عشان اتزيد تطمن انت حتقعد قدام كل الناس العادية ولدي واوراقك الرسمية كلهن موجودة وتشتغل في شركتي اما في عالمنا نحن حيكون عندك أسم مستعار وهو حيكون اسم شغلك واسمك بينا نحن
نا معش قعد عندي خيار ياانوافق وانمارس حياه عادية زي الناس وفوقها اتكون عندي سلطة وممكن نقدر انرد جزء من حقي وبهدلتي ونا اصغير وننتقم الطفولتي الكل من دمرها او انموت وحتقعد ميتي زي ميتت اي كلب ماحد يندري عليه حتى من يزعل عليه ماعندش
مش عارف ليش في اللحظة هذكي اذكرت كلام عبدالمهيمن ونحن صغار لما قالي انبيع مسدسات يعني كان بيقعد في مكاني توا في وقتها قالي بنقعد هكي عشان الكل ايخافو مني ونا فعلا في اللحظة هذكي اكثر شيئ فكرت فيه هو ان انكون انسان ليا كيان وشخصية وبقوتي نقدر انخلي اي حد ايخاف مني وقوتي مش حتكون إلا امعاهم مهما كان الثمن اللي نا بندفعه الهم
جابر:شن قررت
نا:امعاكم
جابر فرح:كنت عارفك ذكي وحترف ان مصلحتك امعانا
نا:بس توا شن المطلوب مني
جابر :حتخش عالزعيم عشان ايتعرف عليك ويعرف انك امعانا وهو حيقولك منين تبدى شغلك
نا:تمام
صبيت وخشيت نا وجابر جوا وخشينا عالزعيم كان سوري الجنسية وطبعا ماكان هو أكبر واحد في هالمنظمة (هذا الاسم الوحيد اللي القيته ايليق بيهم)
كان فيه ناس واجد أكبر منه
المهم جوا حكالي نفس كلام جابر وان مصلحتي امعاهم وان لو رفضتهم حنموت ولو حاولت انخونهم او نلعب اي لعبة عليهم حنحكم علي روحي بالإعدام
وطلب مني اني نختار أسم ايكون اسمي في عالمهم هما وعشان ايبلغو بيه اللي اكبر منه
في وقتها خطرت في بالي شخصية وحدة #الجوكر
الجوكر هذا ورقة في الكارطة لو خش للعبة لازم ايكون الزعيم ولو ماكان في اللعبة ايكون مركون علي جنب
ودخوله وخروجة ايكون علي حسب اللاعبين واختيارهم للعبة يعني نفسي مسير مش مخير ومش فرض انهم يلعبو بيه بس لو دخل للعبة حيكون هو اساسها وحيكون قادر ان ايحل محل اي ورقة في الكارطة واحسن شيئ فيه قناعه اللي لابسة وان ماحد عارف شخصيته الحقيقة او شن ايخبي من مشاعر تحت منه حسيت روحي زيه ودغري اخترته هو وقعد اسمي في شغلهم #الجوكر
(تعالو تعرفو عالجوكر نا شاب من مواليد 93 عمري توا 20 سنة وزي مافهمتو تخرجت في 2012 وهي نفسها السنة اللي بنرد فيها الليبيا
مواصفاتي بغد كبرت اسمر وطويل وشعري اسود مجعد وملامحي فيهن حده)
/
/
/
طلعنا مالزعيم ومشينا الفندق بتنا اليوم هذكي فيه ومالصبح كان جابر حاجز الليبيا وكأن كان متأكد اني حنوافق انخش العالمهم وأول ما وعينا فطرنا وطلعنا عالمطار وتوجهنا الليبيا
#يتبع
قولكن كيف حتكون حياته في البلاد اللي من طلعته وهو طفل معش ردلها الا وهو راجل
وكيف حيكون لقائه مع اكثر انسانة ظلماته (سناء)
وكيف حيكون لقائه مع عيال جابر هل حيكون نفس اللقاء وهو صغير او حيتغير كل شيئ
وقولكن كيف حتكون حياته مع العالم الجديد اللي اختاره ومع شخصية الجوكر ?
كله حنعرفو في الحلقة الجاية ☺
اسفة لو فيه لخبطة في الأسماء وأكيد رأيكن ايهمني ?
گـتـابـتـي Koka Saleh