الجوكر | للكاتبة Koka Saleh
الـحـلـقـة (7)
(حقيقية ممزوجة بالخيال)
گـتـابـتـي #Koka_Saleh
::::::::::::::::::::::::::
لايك قبل القراية وتعليق بعد القراية والكلام للكل فكوني مالقراية بدون تفاعل راه والله التفاعل بالايكات والتعليقات هو أكثر شيئ ايحفزني للكتابة وبذات التعليقات الطويلة انحبهن?
وللعلم بس نا نقرا في كل التعليقات ??
“”””””””””””””””””””””””””
ركبت في سيارتي وطلعت شور الشركة جيت غادي بحت للشغل ووقعت كم ورقة وطلعت بندير لفة علي مكاتب الطباعة والبحوث اللي برا الشركة وانشوف الالات ولو فيه آله تبي صيانة وانشوف الشغل كيف ماشي وفي الحقيقة نا كنت نبي اي شيئ يلهيني عشان ماانفكرش في موضوع قتلت الحاج ميلود ?
طبعا كانن اكثر من 10 محلات وكل واحد في حي وفي منطقة معينة ولفيت علي ثلاثة كان الشغل ماشي تمام وجيت للرابع وهذا كان اكبر محل فيهن وفيه اكثر من موظف خشيت درت دورة عالموظفين وشغلهم وبعدين خشيت الغرفة جوا حاطين فيها آلات يبن صيانة شفتهن وشيكت عليهن وعرفت أعطالهن ووقعت علي طلب صيانتهن وعطيت الطلب للموظف اللي خش امعايا عشان ايدزه للقسم وطلعت بنروح بس وانا ماشي شور باب المكتب اللي يفتح برا لفت انتباهي صوت وحدة
والباين كانت معصبة واتهزب والاول مرة فضولي ايردني عشان بنت رديت وقعدت نسمع في نقاشها هي وشاب يشتغل عالطابعة
هي:انا قتلت مستعجلة ونبيه توا
هو:ونا قتلك بحثك واجد ويبي وقت خليه وردي بكرا خوذيه
هي بعصبية:بس نا مطلوب مني اليوم وبعدين مازال بدري ونا نبيه الساعة 12 عندك وقت اديره ليا
هو:أسف مانقدرش عدي شوفي محل اخرى
هي بعصبية:تي هذا اقرب مكتب للجامعة وين بنشحور اخرى
هو:اشتغليه في مكاتب الجامعة حتى هنا تبعنا
هي:الجامعة طافي عليها الضي لو ماهذا راك ماشفتش وجي قدامك
هو بعصبية;نا قتلك اللي عندي بتخليه واتجي تاخذيه بكرا تمام وكان ماهذا دوري مكان اخرى يشتغله لكي
حسيت روحي لازم ندخل
نا:شن فيه شن صاير هنا
هو:الابلة هذي جاية وجايبة بحث تبيني انطلعه الها والبحث واجد ويبي وقت عشان الترتيب والطباعة لان تبيه بطريقة معينة وتبيه الساعة 12 ايكون واتي ومستحيل في ساعتين انكمله
نا:لو كان جيتي بدري اشوي ولا جيتي الايام اللي فاتن
هي بعصبية:لو كنت نقدر مااستنيتكمش اتقولوها ليا وخذت الاوراق اللي جايبتهن في يدها وجت بتطلع
نا:اصبري ياابلة كنك عديتي
هي:ماعندي عليش قاعدة وانتو ماتبوش تشتغلو البحث
نا;لالا خليه وتوا نشتغلوه لكي
هو:تي كيف مافيش وقت مستحيل انلحق
نا:لا توا اتلحق ونا حنساعدك عليه
هو:بس
نا:مافيش بس نا قلت كلمة والمفروض انك اتنفذها
هو :تم وخذا منها الاوراق وبدينا نشتغلو علي بحثها وهي قمعزت علي كرسي وقعدت ترجى فينا انكملو
والحق كلامه كان صح كان بحث واجد ومطلوب بطريقة معينة وتبيه نسخة اسكنر وهكي يعني متعب
وقعدنا نشتغلو وجا موظف ثاني وقعد يطبعلنا
ونا كل اشوي انبحت فيها كان باين انها انسانة جدية بس اكثر شيئ لفت انتباهي هي طريقة دوتها وتحاورها وكيف انها ماتنازلتش وكيف كانت تحكي بأسلوب جدي وحازم وماالتجئت الأسلوب الضحك والدلع عشان تقضي مصلحتها زي اغلب البنات توا
كنت كل اشوي انشوفلها وهي ماكانتش اتشوف الجيهتنا بكل وماسكة تليفونها واتبعبش فيه وكل اشوي تطلع تحكي بالتليفون برا واترد
الشاب كان يشتغل وغامتله لاني غصبته علي شغل متعب زي هذا يبي وقت طويل
وبعد ساعتين كملنا الطباعة وقعدنا نطبعو في البيانات اللي هي تبيهن برا كانت كاتبتهن في ورقة بروحهن
نا اللي كنت نكتب في البيانات بس الخط المكتبوب في الورقة امتاعها ماكان واضح
نا:أسمك سمرة
هي :سمر سممممرر وين اتشوف فيها التاء المربوطة
نا رفعت راسي وبحتت فيها بنظرة للدرجة هذي عاجبك اسمك
نا:خطك مش واضح?
هي ;?
لفيت وجي ورديت طبعت الاسم وباقي البيانات ومديتلها البحث بالكامل جاهز وواتي
سمر:كم حقك
نا:التسليك عند مكتب الحسابات اللي غادي
هي:خذت بحثها ومشت دفعت الفلوس عند الحسابات وطلعت ?
كنت مصدوم من لقطتها كنت متوقع انها تشكرني علي اني كنت سبب انها اشتغلت بحثها بعد ماكانت متسكرة عندها ووقتها ضيق ولنقنها لقطتها غمتلي منها غمة ورقتها ليا للمليون?
طلعت مالمكتب مع رنت جابر وقالي نلحقهم عالمطار
مشيت للمطار القيتهم كلهم يرجو في جية حمزة اول ما سناء شافتني قلبت وجهها وكان جنبها راشد
سناء:هالبارد شن جابه هنا
راشد:اكيدة باتي كلمه
سناء:باتك ديما يصرف من راسه
راشد:واول تصرف من راسه جابه وحطه بينا
ونا كنت انبحت فيهم وهما يحكو وبعدها راشد بحت فيا وضحكلي من ضحكته عرفتهم كانو يحكو عليا بس عادي مايحكي عليك الا اللي قاهرة?
جت تسنيم قمعزت جنبي
تسنيم:كنت نحسابك ماتبيش اتجي
نا:كلمني جابر وجيت
تسنيم:ليش مااتقولش باتي ولا حتى عمي مش هو متبنيك
نا معش عرفت شن انرد علي سؤالها بس نا من قبل كنت انقول عمي جابر لكن لما حكالي عالشغل امتاعنا وعليش متبنيني نقممت عليه ومعش حبيت نسبق اسمه باي لقب
تسنيم:سمعت سؤالي ?
نا ضحكت:سمعته لكن القصة ان لما كنت نقرا برا ماكنتش انشوف فيه فمتعودتش عليه لين انقوله باتي او عمي
تسنيم:صح انت وين عشت الفترة هذي كلها
نا :اهو حمزة جا
تسنيم صبت بسرعة ونا صبيت وراها وقعدو كلهم ايسلمو علي حمزة ونا قعدت اخر واحد وحمزة بعد سلم عليهم كلهم جا لعندي ومن نظرته عرفته ماعرفنيش
جابر:هذا احمد خوك اكيدة اذكرته
حمزة :اكيدة وحظني وسلم عليا وماحسيتش من تجاهة غضب ولا حب عادي نفس شعوري زمان
طبعا كان متغير واجد وباين علي شخصيته ان انسان جدي وامتاع شغل وبس
طلعنا مالمطار وركب حمزة مع راشد وسناء مع جابر وتسنيم اصرت تمشي امعايا وطلعنا كلنا ورا بعضنا وتسنيم طول الطريق مصدعتلي راسي بأسلتها ونا سؤال انجاوب وسؤال نطلع منه بطريقة دبلوماسية وكملت الطريق تخريف وللامانة كانت دوتها واجدة?بس كنت منسجم امعاها واكثر شيئ فرحني إن بسببي طلعت مالحياة اللي كانت فيها والانعزال التام الي كانت عايشته وإنها خذت درس ماللي صار امعاها وقدرت اتغير نفسها من اول ماانحلت مشكلتها
حلو إن الإنسان ايكون قادر إن ايتعلم من اخطائه وايغير من نفسه
واحلى شيئ صار إن البراءة اللي دورتها في عيونها اول ما رديت عليهم ردت في عيونها من جديد لان هذا كان اكثر شيئ مميز في تسنيم من هي صغيرة
وصلنا للفيلا ونزلنا مع بعضنا وقمعزنا كلنا مع حمزة وقاعدين الكل ايهدرزو وحمزة يحكي علي قرايته وعالعيشة برا ونا كان جزء من عقلي امعاهم والجزء الثاني في موضوع قتل الحاج ميلود
مهما حاولت انتناسى الموضوع بس كان لازم انفكر فيه الوقت قاعد يمشي ونا مازال لعند توا ماقررتش شنو اندير كل اشوي انشوف للساعة في يدي وكل دقيقة تمشي انحس فيها تمشي من عمري نا مش من عمره هو
قاعد في صراع كبير أحمد مايبينيش نقتله
والجوكر ايحب الدم لان عارف هذا الشيئ الوحيد اللي ايزيد في قوته ?
الوقت يمشي بسرعة وكل 5 دقايق يمشن في دقيقة ونا مازال ماقررتش شنو اندير لو رضيت احمد وماقتلتش اكيد حنموت نا
ولو رضيت الجوكر هذا في صالحي وصالح شغلي بس حنخسر الدنيا إنسان كويس زي هذا
قاعد جنبهم بس كنت في عالم ثاني كنت في الحيرة الي طول وقتي عايش فيها ?
الساعة? الساعة ?الساعة? أكثر شيئ كرهته اليوم تمنيتها اتوقف بس للأسف كل ماكنت انشولها نلقاها تمشي اكثر من اللحظة اللي قبلها
الوقت بإختصار?
بطيء••عندما تنتظر
سريع••عندما تخاف
طويل••عندما تحزن
قصير••عندما تفرح
لاينتهي••عندما تتألم
لاتشعر به••عندما تسعد
قاتل••عندما تكون في حالة فراغ
يتوقف••عندما تحب••!!
الوقت:/*
لاتحدده عقارب الساعة بل يتغير حسب نبضاتك وحالتك النفسية ?
عيني كانت علي تليفوني عندي امل اتجيني مكالمة أو رسالة ان المهمة التغيت وانهم عفوني من قتلته بس للأسف ماجاني شيئ?
/
/
صبى جابر من جنبهم بيمشي المكتبه لان عنده شغل بعد اشوي وصلتني رسالة منه مكتوب فيها (خلاص اطلع جهز روحك واسلاحك اشوي وبتنفذ )
قلبي وقف مالرسالة مش أول مرة نقتل بس أول مرة بنقتل حد نعرفه وكليت وشربت امعاه اول مرة بنقتل حد عرفت قديش هو إنسان اكويس إنسان مستحيل حيتكرر او نا نلقى زيه
صبيت بنطلع وقبل مانطلع خشيت علي جابر في المكتب
جابر:انت مازلت هنا معش فيه وقت يادوب تلحق اتوتي روحك
نا:ينفع يعفوني مالمهمة هذي
جابر :انت عارف في شغلنا مافيش كلمة اعفوني
نا:بس الراجل هذا بذات مانقدرش نقتله
جابر بإستغراب :ليش
نا:لان شخص كويس نا بنعرف انتو ليش بتقتلوه
جابر تنهد:لو تبي اتعيش ياجوكر في عالمنا حاجتين لازم تستغني عنهن قلبك واسألتك
نا:بس نا مانقدرش نقتله هو بات صاحبي
جابر:بس علي حد علمي انت ماعندكش اصحاب
نا:هذا اوليد كان امعايا في الميتم والراجل هذا تبناه ورباه الدرجة ايقوله ياباتي كيف نا اندير هكي
جابر:بس هو مش باته وصدقني انت لو قعدت هكي وكل شيئ اتفمر فيه بمشاعرك مش حطول ووتي كفنك من توا أحسن
نا نزلت راسي:ليش هكي بس ليش تبوني وحش بلا قلب ومشاعر
جابر:لو بتعيش لازم تقعد هكي
نا:أنا مش حنقدر نقتله شوفو غيري ولفيت بنطلع
جابر:تمام حنكلمهم توا وانقوللهم كلامك بس مانضمنش أن يصبح عليك الصبح او لا
الروح غالية أغلى من أي شيئ في الدنيا حتى لو انت انسان عارف ومتأكد ماعنده من يزعل عليك
وعارف ومتأكد ان اكثر من انسان يدعي عليك انك قهرته في اعز شخص له
عارف انك مجرم او بالمعنى الأصح #سفااااح
بس نا مازلت بنعيش مش عارف شنو اللي امخليني متمسك بالحياة بس اللي نعرفه اني مانبيش انموت توا
بحتت في جابر وسكتت وكان مطلع تليفونه وبيرن عالمنظمة
جابر:شنو انرن ولا غيرت رايك
نا تنهدت:حندير اللي طلبتوه
جابر:خلاص عدي توا لان معش فيه وقت
نا :تمام
طلعت من جابر ونا مش راضي عاللي بنديره بس كان الخيار صعب روحي مقابل روحه?
كانت صورة الحاجة ميلود قدام عيوني وكلامه كله ايرن في وذني ركبت في سيارتي وطلعت وطول الطريق ونا عندي امل اتصير معجزة تمنع اللي بنديره
وصلت للمزرعة خذيت اسلاحي عبارة عند بندقة قناص وحطيتها في شنطة وحطيتها في سيارة غير سيارتي ولبست لبس عامل كهرباء وطلعت ومشيت للمكان المحدد وكان اصدار الجامع عمارة كبيرة رقيت للعمارة بالشنطة عساس بنصلح وماحد ركز عليا لان اللي ركب قدامهم عامل كهرباء رقيت علي سطوح العمارة وقعدت فوق نرجى في المصلين ايجو للجامع وكنت مركز بكل عشان انشوفه لما ايجي
وكا العادة في داخلي صوتين واحد لا مااديرش هكي وواحد دير هكي ودير اللي أكثر عشان توصل للي تبيه
كانت لحظة من اصعب اللحظات اللي عشتهن في حياتي لحظة تمنيت فيها إن لو كل شيئ صار امعايا ماصارش وعشت إنسان طبيعي زي كل الناس
(ويحدُثُ أن يُراودُك شعورٌ جارفٌ بالتخلي عن كل شيء وكلّ شخص ومعاودة الحياة فى مكان لا يعرفك فيه أحد . .)
كأني نرجى في موتي الوقت اللي من اشوي كان يمشي زي الصاروخ في اللحظات هذينا حسيت الدقيقة تمشي سنة فعلا تأكدت ان الوقت مايمشيش بعقارب الساعة يمشي بشعورك?
صورة الحاج ميلود وصورة عبد المهيمن قدام عيوني قاعدة مش قادر انتخيل لو بعد دقايق من توا يوصل الخبر العبد المهيمن بأن الشخص اللي رباه وعلمه وتعب عليه ماااات
الصوتين اللي في داخلي مستمرات وواحد ايحاول ايغطي عالاخر ونا اللي ضعت بينهن لا قادر انكمل ولا ننسحب جاي في النص
أحساسي في وقتها كان زي احساس شخص قاعد في قمة جبل مايقدرش ايرد لان اللي وراه كله نار وحتحرقه وايموت ولا يقدر ايكمل لان اللي قدامه هاوية ولو يزقب ايموت وفي الحالتين هو ماشي للموت ?
في لحظات صراعي الداخلي مع نفسي وصل الحاج ميلود وقنصت عليه وجت اللحظة الحاسمة ولازم انزر عالزناد قبل ماايخش للجامع
أحمد:ماتقتلش مااتحطش في ارقبتك دم شخص ثاني ساد دم ?
الجوكر:لو تبي القوة والسيطرة والهيبة والخوف مالكل لازم من دم اقتل قلبك اقتل احمد ياجوكر?
شهيق زفير قوي صوت انفاسي كان يقدر يسمعهن حد بيني وبينه متر عرقي ينزل من كثر الحيرة اللي نا فيها في لحظات اذكرت كلمة جابر
جابر:تمام حنكلمهم توا وانقوللهم كلامك بس مانضمنش أن يصبح عليك الصبح او لا
غمضت عيوني وخذيت نفس قوي وفضلت روحي علي روح الحاج ميلود وضغطت عالزناد وكان التصويب علي راسه مباشرتا ودغري الطلقة طبت في المكان المطلوب بدون اي صوت لان مركب للبندقة كاتم وفجأة طاح قدام الكل وما حد فهم شيئ او شن صار استغليت انشغال الناس باللي صار ونزلت بسرعة وركبت في السيارة وطلعت من دون ما حد ينتبهلي لان في وقتها مازال ماحد عرف شن صارله ولا ليش طاح
نا طلعت وجتني رسالة عالتليفون مكتوب فيها (You’ll find your money at Jaber Farm //ستجد نقودك في مزرعة جابر)
طلعت علي مزرعة جابر وخشيت القيت شنطة الفلوس جوا طبعا كيف خشو وكيف حطوها هذا شيئ مش معروف ولا حيقدر يعرفه حد لان اللي زيهم توقع تلقاهم امعاك في اي مكان حتى في الحمام?
فتحت الشنطة وقعدت انبحت في الفلوس معقولة هذا ثمن روح انسان للدرجة هذي الروح رخيصة عندهم
سرح عقلي وفكرت لو فيه يوم رفضت طلب الهم أكيدة حيكون ثمن روحي فلوس هكي وكلها طلقة وتنهي كل شيئ من دون ماحد يعرف ولا يفطن
خذيت الفلوس وحطيتهن في السيارة وطلعت ونا غامتلي بكككل وصلت عالفيلا وخشيت شور داري كنت داير خزنة اصغيرة في الدولاب امتاعي فتحتها وحطيت الفلوس وحسيت اني لازم انغير المكان مش أمن لان هذا اكثر مكان عندي فيه أعداء وفوقها الخزنة اصغيرة ومعش اتسد الفلوس اللي عندي
كانن كل هالفلوس ثمن الارواح ناس سوا بالقتل او بتهريب السلاح او المخدرات ولا حتى كتابة التقارير اللي كنت اندير فيهن ?
طلعت مالدار ونا انحاول نقنع روحي ان لو ماانديرش هكي مش حنعيش ومش حنقدر انرد ثاري ومش حنخلي كل حد ايخاف مني
سكرت باب الدا ولفيت جت عيني في عين راشد بحت فيا وضحكلي وخش وهو ساكت ولا كلمة لان كان خايف مني وهذي هي نتيجة اللي اندير فيه اني توا قادر انخلي كل واحد حقير زي راشد مايقدرش يرفع عينه في عيني لأني ربيته وخليته يحترمني غصبن عنه ورديت حقي ومازال الدور عالباقي
طلعت مالفيلا مش عارف وين بنمشي بس مش طايق نقعد في مكان انشم في بنة الدم فيه
ركبت في سيارتي رن تليفوني شفته القيته معز عرفت ان الخبر واصله ورديت
نا:اهلين معز شن جوك
معز:تمام بنقولك راه بات عبد المهيمن توفى من ساعة هكي
نا:لا ياراجل
معز:والله الله ونا قاعد امعاه توا تعال
نا:وشن سبب الوفاة امس ونا عنده مافيه شيئ
معز:للاسف مات مقتول من طلقة وماحد عارف من من ولا منين جاته
نا:يعني قصدك طلقة طايشة
معز:لالا شكلها بفعل فاعل بس لعند توا ماحد عرف من له مصلحة في قتله وليش
نا بحزن:وشن جو عبد المهيمن
معز:منهار بكل تعال توا اتشوفه وبالك تقدر اتصبره
نا:مسافة الطريق وجايكم
معز:رانا مازلنا قاعدين في المستشفى
نا:توا انجيكم غادي وسكرت منه وطلعت عالمستشفى ونا مش عارف كيف حنواجه عبد المهيمن كنت خايف ايشم دم باته فيا أو ايشوف في عيوني نظرة الغدر له
وصلت للمستشفى وعبد المهيمن اول ماشافني حظني وقعد يبكي وايقولي
عبد المهيمن:قتلوه يااحمد قتلو الحن والطيبة يااحمد طلع للجامع وهو ايوصي فيا عليك ايقولي خليك اقريب منه عاش عمره في بلاد غربة
نا كلام عبد المهين كان كأن أمواس تغرس فيا وايطلع فيها ماكنتش عارف شنو اندير وشنو انقوله كان يبكي بالعبرة تي اول مرة ايمر عليا راجل يبكي بالشكل هذا
قعدت امعاه نا ومعز وكان الشرطة امعبية المستشفى وكلهم يعرفو عبد المهين وكلهم يحكو عاللي صار وايصبرو فيه بأنهم حيلقو القاتل وهما مش عارفين ان القاتل قاعد في نصهم ?
قعدنا اليوم هذكي كله في المستشفى وجابو دكتور شرعي لان مقتول قتل بتنا في المستشفى مع عبد المهين اللي ماسكتش نهائي وكأن اللي يبكي علي باته اللي جايبه مش شخص متبنيه وامربيه
مافيش حد رقد كلنا قاعدين نرجو انهم يعطونا اذن الدفن
بالنسبة الحوشهم بدا فيه العزاء من اول ما جا الخبر الهم
/
/
/
في الصبح عطونا تصريح الدفن وقعدو ايغسلو فيه وطلبو من عبد المهيمن هو اللي ايخش يقعد ايصب عالغسال عبد المهيمن ماقدرش ايشوفه وهو ميت وقالي انخش بداله ماكنتش قادر كيف انخش عليه ونا اللي قاتله خفت انقول لا ايبان عليا اللي درته خشيت عليه وقعدت انصب عالغسال والأول مرة انخاف من جثة
من اول ماخشيت امعاهم للمنظمة قعد القتل والدم شيئ عادي جدا والجثث ديما انشوف فيهن ولا عمري خفت بس هذا غير كنت حاس في اي لحظة بينط وايقول هذا قتلني انتخيل في اللقطة وشن بيصير ماكملش الغسال الا ونا قريب روحي تطلع امعاه وطلعت عليه كنت منهار داخليا بس من برا كانن ملامحي عادية بس من جوا حرب وصراع بين شخصيتين دمرني بالكامل منهك وتاعب عقليا وروحيا ?
/
/
طلعنا مالمستشفى عالجامع دغري صلينا عليه الظهر وخذيناه للجبانة
بس اللي صار مع عبد المهيمن وعياطه وهما يدفنو في باته وكيف كان بيعزق روحه في القبر كله كان كفيل يقتلني بيه الف مرة كنت حاس بالندم عاللي درته
عبد المهيمن كان منهار خارجيا وقدام الناس اما نا كنت منهار داخليا وماحد شايفني ومن برا ملامحي هادية وانهدي في عبد المهيمن نا ومعز
كنت ضاغط علي روحي بطريقة غريبة عشان ماايبان الصراع اللي في داخلي علي حد
عبد المهيمن لما دفنو باته طاح عالقبر وقعد يبكي وطبعا خاطي عبد المهيمن كانو ناس واجدة تبكي والجنازة كانت كبيرة اتقول جنازة وزير او رئيس ناس واجدة حاظرينها
خذينا عبد المهيمن بالقوة وروحنا بيه الحوشهم واول ما وصلنا الحوشهم كان عليه اخيام وناس وسيارات والدنيا مليانة
عبد المهين قعد ايقول بنخش انشوف امي مش حنتريح لين نبكي امعاها وهنا كانت الكارثة
منعوه من الخشة عليها لان للأسف ماكان ولدها وكان محرم ان ايخش وايشوفها
عبد المهين قعد يبكي وايعيط في نص الشارع
عبد المهين :تي هذي امي امي ياناس والله امي حرام عليكم بنشوفها كيف تحرموني منها
الشيخ:حرام يااوليدي انت مش محرم الها عشان اتخش ماايجوز هي في العدة توا
عبد المهين:هذي الليد امربيتني من نا اصغير تي هذي امي امي والله امي ?
وسمعنا عياط جو شكله امه قعدت اتعيط لما قالولها ان مايقدر ايخش عليك
معز حظن عبد المهيمن وقعد يبكي امعاه ونا ماكان عليا الا اني انتفرج لان كل اللي قاعد ايصير قدامي بسببي ?
درت زي المثل ماايقول (نقتل القتيل ونمشي في الجنازة)
/
/
رغم كل اللي صاير جوا مني والانهيار والندم والالم والف شعور داخلي وصراع غريب بين الخير والشر ما قدرتش انسيب عبد المهين وقعدت امعاه وحتى لو شوفته بالوضع هذا كانت اتقطع فيا تقطيع لان نا سبب اللي هو فيه توا?
/
/
جا الليل وعبد المهين مازال نفس وضعه وماكلش ولا حاجة من بعد امس خذيناه نا ومعز ومشينا بيه الشقة معز عشان نقدرو نقنعوه ياكل اي شيئ وايتريح ويرقد اشوي
ومعز قعد طول الليل يحكيله ان هذا حال الدنيا وان كلنا نهايتنا موت
بس طبعا اكثر شيئ كان قاهر عبد المهيمن ان باته مقتول قتل وان مش عارف من اللي اقتله وليش قتلوه وهو مش داير في حد شر ?
بس كلام معز هداه اشوي واقتنع ان ياكل وايتريح قعدت نا امعاه ومعز صبى ايوتيله في حاجة ياكلها
وعبد المهيمن قعد يحكيلي علي باته وكيف كان إنسان كويس
ونا طبعا ماكنت محتاج إن يحكيلي عارف الكلام هذا خصوصا لما شفت كمية الناس اللي جت للعزاء وكيف يحكو عليه بكل خير وكيف كانن مفتوحات حواشين بسببه هو وكان كافل أيتام وكيف كانت يده ممدودة بالخير للكل
ماممرش عليا شخص في العزاء الا وهو يحكي ان دايرله موقف وعمل خير
جاب معز الوكال وقعدنا ناكلو ونا كنت انحس ان الوكال ماينزلش من رقبتي وان فيه شيئ واقف بس قعدت انحاول انبان طبيعي مانبيش حد ايحس بشيئ
بعد الوكال عبد المهيمن من كثر الارهاق والتعب اللي هو فيه رقد عالصالون ومعز جاب فراشين واحد ليا وواحد له فرشهن تحت عشان انرقدو جنب عبد المهيمن
في لحظتها اذكرت لما كنا انديرو فيها في الميتم لما واحد فينا يمرض الاثنين لخرين ايكملو الليل راقدين تحت عند سريره لين يوعه اكويس
قهرتني الاخوة والصحبة اللي نا بعتها بسرعة وحرقت قلب صاحبي هكي ?
رقدو معزو وعبد المهيمن ونا النوم جافاني وحلف ماايجيني والصراع الداخلي قاعد مستمر من جهة انأنب في ضميري ومن جهة انقول لو مادرتش هكي كان انا اللي حنكون مدفون بداله
قعدت واعي ومش جايني نوم لعند جا في بالي اني بنعبر عاللي في داخلي لو حتى بيني وبين نفسي لان لو قعدت هكي حننفجر مسكت تليفوني وكتبت اقتباس وكان مجرد تعبير عاللي في داخلي ?
أليس أمراً مريعاً أن تُجبَر على أن تصبح شيئاً لستَ عليه، أن تستوحش وتقسو، أن تتحول إلى حسابات ومعادلات بلا مشاعر ..
إنسان يطيح بالكثير من التفهم والمراعاة والحب في طريق بقائه أو حتى دفاعه عن النفس .. إنسان لا يضع حسباناً ولو قليلاً للتفاهم أو الرحمة أو لالتماس عذر واحد من السبعين .. ماذا يبقى بعد ذوبان الحب والثقة إلا مزيج من المرارة والحزن يدورُ في كأسٍ من عدم الاكتراث، فلا شيءَ يهم .. بعد أن تفقد آدميتك تصبح الأشياء متشابهة مختلطة، لا فارقَ بين الجيد والسيئ، الطيبة والشر، كله سواء… طالما كله يؤدي إلى طريق واحد، فلمَ العطاء والمقابل أخذ بلا شكر؟ ولمَ الوفاء والمقابل غدر بلا ندم؟ ولمَ الحب والمقابل الكثير من الغباء؟ … أضحى العالم مزدحماً بالتشاؤم واللامعقولية والخزي، وأضحينا نعيشه على علاّته. فإذا سبحنا عكس التيار نعيش في اجتهاد وكبد، وإذا سايرناه نعيش نظلم ونطغى، موتى أحياء ننقض على الآخر فإما نتغذى عليه أو نحوله ليصبح ميتاً حياً آخر كما حولنا من سبقونا … ومن ميت حي إلى آخر تقتات علينا الدنيا?
/
/
وفي عز اللي نا فيه وكل صراعاتي الداخلية بين الخير والشر جتني رسالة مكتوب فيها ( Get out to your car You will find a ticket and passport in the name of someone else Take them and go to the airport tomorrow morning must be in Italy
اخرج إلى سيارتك سوف تجد تذكرة وجواز سفر بإسم شخص أخر خذها واذهب إلى المطار صباح الغد يجب أن تكون في إيطاليا)
#يتبع
قولكن ليش الطلب الغريب هذا وليش يبوه ايسافر باسم غير أسمه وشن يبو منه المرة هذي ??
كله حنعرفوه في الحلقة الجاية ?
أسفة بنات عالتأخير كان عندنا ضيوف ?
أسفة لو فيه لخبطة في الأسماء وأكيد رأيكن ايهمني ?
گـتـابـتـي Koka Saleh