الجوكر | للكاتبة Koka Saleh
(حقيقية ممزوجة بالخيال)
گـتـابـتـي #Koka_Saleh
::::::::::::::::::::::::::
لايك قبل القراية وتعليق بعد القراية ?
::::::::::::::::::::::::::
وقعدت امعاهم لعند الساعة 1 وروحت واول ماخشيت ونا انفكر في كلام معز واللي صاير امعايا
معقولة انكون انحبها بس كيف بالسرعة هذي
مش سرعة تي ناحبيتها من اول ماشفتها
لالا اكيدة غالط مش حب
باهي شن تفسير اللي ايصير امعايا مالش اي تفسير الا الحب
اصوات واجد في داخلي اينادن فيا اصوات واجد حيرني ?
ماكنتش انفكر في عواقب حبي الها بس كل اللي كنت انفكر فيه اني صح انحبها او ايكون وهم
قعدت الليل كله واعي ماقدرتش نرقد بكل
كملت الليل انفكر فيها وفي كل شيئ صار امعانا انفكر في تصرفاتي وفي كلام معز لعند لما طلع الصبح بحتت القيتها الساعة 7 مالقيتش روحي الا ماسك تليفوني وران علي سمر واول ماردت
سمر:صباح الخير
نا:انحبك وسكرت الخط
/
/
نا ماعرفتش ليش درت هكي بس ممكن كنت خايف من ردت فعلها او مرتبك لانها اول مرة مش عارف شعوري ملخبط وعارف انها لقطة بايخة بس هذا اللي طلع امعايا ?
معش عرفت قعدت حاير وغير انفكر في اللقطة اللي درتها وشن سمر بتقول عليها
وكنت كالعادة بنهرب من تفكيري صبيت مالسرير ومشيت اندوش علي امل ان الدوش ايريحني وايصحصحني اشوي
/
/
عند سمر
سمر:انا في حلم ولا حقيقة احمد قالي انحبك صح لالا اكيدة نحلم
مسكت فونها وشافت المكالمة
سمر:اهي المكالمة يعني حقيقة حي حقيقية حي قالها ليا
وصبت اتنطر عالسرير واتغني اخيرا قالها قال أحبك قالها ??
من عند الباب
سالم:سمر شن فيه كنك دايرة دوشة
سمر بخوف:شيئ بس حسيت في فار في الدار
سالم:فار?
سمر:اها?
سالم:افتحيلي انخش انشوفه
سمر:باهي ونزلت مالسرير وفتحت الباب
وخش سالم وقعد ايدور في الفار ومالقش شيئ وسمر وراه في عالم اخرى تفكيرها كله في أحمد والكلمة اللي قالها?
سالم:مافيش شيئ
سمر:بالك طلع ?
سالم:وين بيطلع الدار كانت مسكرة انتي بس شكلك كنتي راقدة واحلمتي بيه ?
سمر:شكلي?
سالم:وتي روحك عشان بنطلع عندي محاضرة بدري انحطك في جامعتك قبل مانمشي للمعهد
سمر:لا وين مازال بدري ونا محاضرتي الساعة 10
سالم:انخاف انتأخر عليك زي يومتها وتطلقي عليا السانك?
سمر:لالا مااتخفش مش طالقته وتوا انقول الهبة اتكي عليا
سالم:ماشي تمام معناها نا بنفطر ونطلع
سمر;انوتيلك فطور ?
سالم:لالا عاودي ارقدي هو فنجال قهوة توا انديرة ونطلع (ربي ايكثر من امثال الاخ اللي زي هذا ?)
سمر:باهي ريحتني
سالم;لا توا ايصير منك بعد تجوزي ?
سمر:غير نجوز ساهل?
سالم:الله الله في الغداء بس
سمر:علي حسب ترويحتي كان روحت بدري تلقى غداء واتي وكان ماهذا اشقى بجاهز
سالم:ماتبقى الا جاهز?
سمر:باهي هوينا بنرقد?
سالم:حتى نا طالع امغير ماادفيش ?
سالم طلع وسمر ردت السريرها بس ماجاهش نوم وهي اتفكر في كلمة أحمد ومش سايعتها الدنيا مالفرحة لان هي بروحها تأكدت ان اللي بينها وبين احمد ماكان بس اعجاب كانت اتحبه ?
بس طبعا ماحبت اتعاود الاتصال وقالت حيعاود ايرن بروحه وحترجى مكالمته الثانية لان اللقطة اللي دارها كانت بايخة كيف ايقول انحبك وايسكر في وجهها ??
/
/
عندي نا طلعت مالدوش ولبست ومشيت للشركة وطول الطريق انشوف التليفوني نرجى في مكالمة او رسالة منها اي شيئ ايفهمني شن ردها علي حبي الها
بس ماجاني منها شيئ ?
وصلت للشركة وخشيت مكتبي وسكرت وحاولت نشتغل ونلهي روحي في الشغل ماقدرتش كل تفكيري فيها وشن ردها وشن رايها وهل اتبادلني نفس مشاعري او حترفضني الف فكرة وفكرة في راسي
قعدت غير ماشي جاي في المكتب كيلته وحفظت كل شبر فيه?
بعد ساعة الا ربع بزبط من خشتي المكتبي معش قدرت انتحمل قلت مافيهش لازم نعرف رأيها
مسكت تليفوني ودزيتلها رسالة
(سمر شن رايك في الموضوع)
/
/
عند سمر
سمر:صار شن رايك في الموضوع كان ماخليتك اتعاودها ياحودة استنى بس ودزت رسالة ?
/
/
عندي نا
بعد رسالتي دغري وصلتني رسالة منها مكتوب فيها
(اي موضوع???)
نا بعصبية:تستعبطي عليا ياسمر تمام ورنيت عليها وهي ردت
سمر:ايوا
نا:عليش الاستعباط
سمر:اي استعباط
نا:شن رايك في الموضوع
سمر:اي موضوع?
نا:اللي قلته لك في الصبح
سمر:مش عارفة علي شن تحكي انت لما رنيت نا كنت راقدة وماسمعتكش ومافطنتش الا لما سكرت نحسابه فونك طفى شحن كنت نبي
نا قاطعتها:باهي نا انحبك
سمر استكت رسمي ?
نا:شن قلتي شن رايك
سمر تنهدت وسكتت
نا;سمر نا مانبيش نضغط عليك في الأخير هو قرارك وانتي من حقك تختاري الشخص اللي ايناسبك بس بجد نا اكثر شخص محتاجلك تقعدي امعايا وبجد اني حبيتك بصدق وان نا عمري ماحبيت حد بالطريقة هذي وحنكون أسعد انسان في الدنيا لو وافقتي عليا
سمر سكنتت اشوي وبعدين
سمر:أحمد انت شاب مثالي بكل وكل بنت في الدنيا اتمنى واحد زيك بس انت فاجئتني بحبك ونا مش جاهزة الشيئ زي هذا
نا:نا عارف اني فاجئتك واتقولي مالنش واجد نعرفو بعضنا وكيف قال هكي بس والله ليا فترة حاس بشيئ غريب تجاهك ولما تأكدت من حبك قلت انقولك مشاعري ونا مانبيكش اتردي عليا توا فكري علي مهلك وخوذي وقتك بس ونا امعاك يعني عطيني فرصة وانتي عارفة مشاعري وحاولي اتحبيني ونا حنرجاك لين اتحبيني حتى لو استمرت اسنين عادي اهم شيئ اتحبيني
سمر سكتت
نا:ها شن قلتي
سمر كان كلام احمد بيطريها مالفرحة وهي بروحها كانت اتحبه بس ماكانت حابة اتقولها دغري كانت زي اي بنت بتثقل روحها
سمر:تمام موافقة نعطيك فرصة
نا فرحت الدرجة مانقدرش نوصفها
نا:تعرفي لو ماني في الشركة راه وريتك فرحتي بكلمتك توا
سمر ضحكت:عهدي بيك عاقل
نا:انتي ماخليتيش فيا عقل بكل
سمر ضحكت:لا حرام عليك نا شن دخلني
نا:خذيتي عقلي وقلبي مني وهذا كله اتقولي شن دخلك
سمر:احمد نا ننحرج ومش متعودة عالكلام هذا منك?
نا:لا تعودي ياعيون احمد لانك حتسمعيه ديما
سمر:باهي عادي انسكر لاني كيف واعية وبنصبي نفطر وانوتي روحي عشان الجامعة
نا تنهدت:باهي سكري وبعد اتوتي روحك كلميني قبل ماتطلعي
سمر:حاضر
نا:انحبك
سمر ضحكت وسكرت
ونا دغري خطرت في بالي اغنية #ضحكت_يعني_البها_مال_وخلاص
رغم ان سمر مابادلتني نفس الشعور بس كنت فرحان لانها عطتني فرصة وبما انها عطتني فرصة يبقى فيه امل اتحبني واكيدة حاسة بشيئ تجاهي ولو حتى اعجاب والا راه ماعطتنيش هالفرصة
هذا تفكيري بس مش عارف اذا صح او بس انطمن في روحي بيه لكن اهم شيئ عندي انها مارفضتنيش تماما
للامانة مافكرتش في شيئ لا الماضي امتاعي ولا حاظري ولا حقيقة اني مالميتم ولا المنظمة مافكرتش في اللحظة هذي الا في حبها وكيف بنخليها اتحبني بس ?
/
/
عند سمر جهزت روحها للجامعة وهي كلها نشاط وحيوية وفرح كان يومها حلو والاحلى ان بداته باحلى اعتراف واكثر اعتراف عفوي في حياتها ماحستش فيه بأي تصنع ?
كلام احمد وكيف واضح وصريح وصادق في حبه عماها عالتفكير في اي شيئ بالنسبة الها هذا الشخص المثالي اللي طول عمرها تحلم بيه
اول ماوتت روحها فكرت اترن علي أحمد
سمر:لالا مش رانة توا ايقول ماصدقت الثقل اكويس يابنت
بس وهي حايرة في تفكيرها هذا رن فونها وكان احمد ومافيش احلى من لحظة اتكوني اتفكري في حد وايرن عليك اتحسي ان فعلا القلوب عند بعضها ?
سمر عيونها كانن قلوب قلوب وبعدين ردت
سمر:اهلين
نا:اهلين شن الجو
سمر:تمام وانت
نا:تمام وتيتي روحك
سمر:اها
نا:امتى بتطلعي
سمر:نرجى في هبة اتكي عليا
نا:شكلها صحبتك بهبة قوية
سمر:اها هي انتيمتي من اول ماجيت هنا تعرفت عليها بنية كويسة بكل
نا:صاحبتك شن بتقعد اكيدة كويسة زيك
سمر ابتسمت:من ذوقك
نا:عارف ذوقي سمح عشان حبيت وحدة زيك
سمر:أحمد ?
نا:خلاص سكتت بس اتحسيه كلام ليا واجد داسة وحاس اني بنقوله كله
سمر:يعني مش قايلة من قبل
نا ضحكت:اتصدقيني لو قتلك عمري ماقلته البنت
سمر:اكيدة انصدقك
نا:ليش مصدقتيني
سمر:مش عارف بس ديما انحس فيك صادق مافيش مرة حسيتك تكذب
نا:وهذي نقطة في صالحي صح
سمر:اكيدة
نا تنهدت براحة:تمااام
سمر:هبة في الانتظار اكيدة برا
نا:ديري بالك علي روحك ولما توصلي للجامعة رنيلي
سمر:حاضر وسكرت
/
/
نا فرحان حاس الدنيا مش سايعتني مالفرحة ?
/
/
سمر طلعت الهبة وهي فرحانة واول ما ركبت في السيارة
سمر:اخيرا قالها قال احبك قالها
هبة:مااتقوليش احمد اعترفلك
سمر:اها?
هبة:كذااابة
سمر:وحق ربي هي
هبة:راك تقعدي دغري قلتيله حتى نا انحبك راه نهارك
سمر:اتحقي فيا مطرشقة عشان انديرها قتله نبي وقت
هبة ضحكت:ايوا شاطرة لكن هابا مايعلم صاحبنا انك طايحة فيه بكبدك?
سمر:ايهبل ياهبوشة ايهبل كلامه اسلوبه صوته ضحكته كل شيئ فيه يسحر ?
هبة:لا اي وقت تبيه هذا مش بعيد توا نلقاك دازته رسالة وكاتبلة معش نقدر انعيش بلاك ?
سمر:ووووه من برادتك?
هبة:تسمعي في روحك شن اتقولي
سمر;باهي نحكيلك انتي انعبر الصاحبتي وين يندري علينا هو
هبة:عبري عبري ياحنة
سمر تنهدت:شن بنقول ولا شن بنقول ياخيتي بإختصار مثال للشخص المثالي مثال للراجل اللي فعلا بنرتبط بيه وانكمل حياتي امعاه
هبة تضحك :غير بالشوية علي روحك دغري فكرتي في الارتباط
سمر:ماهو لو حاكية امعاه كنتي فكرتي هكي
هبة:عليا نا ماعجبنيش لا شكله ولا حتى من دوتك عليه
سمر:بالله شن عرفك انتي ديما تعرفي البلابل والشباب المتلوسونين اللي زي البريوش اما هذا اتحسيه هكي راااااجل بمعنى الكلمة ?
هبة:اوووو ريت توم كروز اللي تحكيلي عليه
سمر تضحك:اها توم كروزي انا ?
هبة:تتهني فيه ياحنة ?
وطلعن علي جامعتهن
/
/
مر أسبوع كان احلى واهدى اسبوع ايمر في حياتي
مكمل يومي مع سمر نحكي امعاها اول مانوعى ولما انجي بنطلع للشركة ولما نوصل غادي وفي الشركة كل ساعة انكلمها وانروح بدري للشقة وانكملو فيها نحكو وصلت بيا الدرجة يقعد عندها قراية نقعد امعاها عالخط وهي تقرا نسمع فيها كيف تقرا وكيف تشرح الروحها
مستمتع بكل لحظة امعاها شفتها مرتين في نفس الكافي اللي تلاقينا فيه اول مرة ننسى روحي بكل ونا امعاها ننسى كل شيئ وكل حد نقعد امعاها هي وبس كل عقلي وكل شيئ امعاها ?
الوقت ونا امعاها ماانحسش بيه نرقد وهي عالخط نوعى يانلقى الرصيد فاصل ياتليفوني طافي المهم كان احلى اسبوع ماحسيتش بيه بأي ملل بس اني كنت فرحان بيها وبحبها ونرات حياتي اللي كانت مظلمة❤
/
/
احساس سمر
احمد ماكان ايسيب فيا لحظة نا انحبه وزدت حبيته من كثر اهتمامه بيا ماحسيتش بملل من كثر المكالمات حتى بعد ايقولي اقري ونا امعاك عالخط انحس روحي نفرح بكل يعني قليل وين تلقي شخص هكي بالعادة الرجالة ايملو بسرعة بس احمد كان غير غير عن كل الرجالة فيه شيئ مميز يعني كان خليط من كل شيئ هداوة علي حدة اشوية ومشاغب اوقات بس عاقل ورزين في اوقات واجد وحنووون بكل الدرجة انحسه طفل مش عارف من خبث الناس والدنيا شيئ واهم ميزة ان اول مانصبي قدامه انحس روحي فعلا مصبية قدام راجل عنده هيبة وشخصية وكاريزما مش عاديات يفرض احترامه علي اي حد ونا امعاه انحس روحي في امان وان في اللحظة هذي مافيش شيئ ولا حد يقدر يقربني ومش عارفة ليش الاحساس هذا بذات بس طلته وتصبايته فيها هيبة تقتل ?
/
/
اليوم الثامن في الصبح وعيت زي كل يوم اول شيئ درته صبحت علي سمر وصبيت دوشت ولبست وطالع للشركة حكيت مع سمر وقلتلها طالع وهي كانت اتوتي في روحها للجامعة سكرت امعاها واخر كلمة قلتها الها انحبك وولعت سيارتي وبنمشي رن فوني ولما شفت القيته اتصال بدون رقم دغري عرفتهم رقتلي رقية فصلوني كنت ناسيهم وناسي شغلهم كنت حاس المدة اسبوع اني شخص عادي كيف باقي الناس لخرى بس كنت مجبور انرد عالاتصال ورديت ?
نا:نعم
هو:التذاكر في المقعد الخلفي للسيارة خذها واتجه الى المطار فورا
نا:حسنا
هو سكر ونا شفت ورايا والقيتهن كانت تذكرة التركيا خذيتها وتوجهت للمطار طبعا ماكنت قادر انرن علي سمر وانقوللها بنسافر لان ممنوع اي حد يعرف تحركاتي?
اول ما وصلت غادي وصلت في الوقت المحدد بزبط القيتهم اينادو علي رحلة تركيا دغري طلعت للطيارة واول ماركبت تفاجئت بالشخص اللي كان راكب جنبي في مقعد الطيارة
نا:حتى انت مسافر التركيا
جابر:جاني اتصال اليوم ان فيه اجتماع مهم غادي
نا:يعني حتى نا اجتماع
جابر:اكيدة
نا ضحكت:يعني بنحظرو اجتماع مع بعضنا ?
جابر بحت فيا:شكلها هكي
هزيت براسي ومسكت تليفوني وقعدت انبحت فيه معش فيه سمر معش نقدر انكلمها غادي عارف ان اول مانوصل معش فيه وقت لا للمكالمات لا الاي شيئ يادوبك اتحصل وقت للنوم وخلاص واصلا كان ممنوع انك تتصل بأي حد وانت في مهمة ?
كل تفكيري كان أن كم بنغيب عليها مدة طويلة او قصيرة اكيدة بنرايفلها ?واكثر شيئ كنت انفكر فيه هو شن بنقوللها لما انروح ?
كنت من قبل نمشي وانغيب عارف ان مافيش حد حيفقدني او ايدورني بس توا فيه من حيفقدني فيه من مسيبة ورايا ونابروحي حنرايفله
احمد قعد فيه من شاغل باله قعد فيه من ايرايف وايخاف عليه ?
نا عودتها علي وجودي كنت لازم ماانكثرش مالمكالمات بس نا بروحي مش متحكم في مشاعري مش قادر انوقف عالدوة امعاها وعن حبها الشيئ هذا تلقائي بدون ماانحس
كيف بيمشن هالايام بلاها كيف بنصبر بدون مانسمع صوتها ونرقد عليه بدون مااتكون اول صوت نسمعه اول مانوعى
جاني شعور الفراق اني امفارقها مش اشوي وبنرد
طول الرحلة ونا انفكر فيها وعقلي امعاها نذكر في ملامحها ضحكتها عيونها نسمع في اسمي من فمها كيف طالع صوتها الحنون الدافي كنت انفكر في كل شيئ مغمض عيوني ونذكر فيها مرة نبتسم ومرة انتنهد لعند لما جابر قالي وصلنا
نزلنا مالطيارة القينا سيارة ترجى فينا ركبنا فيها وشالونا شور مكان الاجتماع
خشيت نا وجابر وكانت هذي اول مرة نحظر اجتماع مع جابر وقمعزت في كرسي جنب كرسية
طبعا في الاجتماع يحكو عن اوضاع البلدان وعاللي صاير في الوطن العربي وعن مخططات وحاجات يتبعنهم هما والصالحهم هما
لما تقعد امعاهم تكتشف ان اي شيئ ايصير في اي بلاد عندهم فيه يد بس من هم ماتعرفش
المهم كنت انشارك في الحديث وكل ماانشارك جابر ايشوفلي زين
والشيئ اللي خلاه يستغرب مني اكثر ان كل موضوع ينحكى يطلبو رأيي فيه واينادولي بأسم الجوكر وجابر كل مانحكي يقعد ايشفولي وماقدرتش انحدد نظراته ليا هل اعجاب او حقد او خوف ماكان امبينهن بزبط شنو
استمر الاجتماع 5 ساعات متواصله وبعدها طلعت وطلع امعايا جابر
جابر:كنت عارف انك مهم في المنظمة بس مش للدرجة هذي
نا:كيف مش للدرجة هذي
جابر:في كل موضوع يطلبو في رايك دليل انك شخص مهم ورايك مهم عندهم
نا:هذا من بعض ماعندكم ?
جابر:جوكر حافظ علي مكانك هنا وردبالك تخسره انت ذكي وفي وقت اقصير وفي عمر اصغير وصلت للمكانات هذينا مامرش عليا واحد دار هكي من قبل يعني بعد اللي شفته جوا مش بعيد بعد 20 سنة انت تمسك المنظمة
نا بحتت فيه زين كلمته كانت كبيرة وصدمة ليا اوكي كنت نبي مكان كبير بس مش درجة رئيسها
جابر:ماتستغربش وماتستهينش بروحك انت ذكي وبذكائك قادر انك اتحكم في اي شيئ وفوق الذكاء عندك قوة يعني مايصعب عليك شيئ
نا ابتسمت:كلامك حفزني
جابر حط يده علي كتفي:اهم شيئ اقتل هذا وشيرلي علي قلبي ?
نا بحتت فيه تبحيتة فات الاوان عالنصيحة
جابر:جوكر انت مازال في بداية طريقك لو من اولها استسلمت للحب حتخسر حتخسر واجد خليك طير حر ومااتخليش عندك نقطة ضعف في الحياه
نا هزيت براسي بمعنى تمام وقعدنا نمشو
جابر زاد عليا الضغط بكلامه وصحى الجوكر اللي من فترة سكتته في داخلي وبدا الصراع من جديد بين احمد والجوكر
الجوكر كان مقتنع كامل الاقتناع بكلام جابر ورافض رفض تام اي حد دخله احمد الحياته وبدايتها من تسنيم الحمزة الحنان العبد المهيمن المعز ونهايتها بسمر العدو اللدود للجوكر ?
أما أحمد ماكان راضي ولا مقتنع بكلام جابر لان مش راضي يفقد انسانيته ولو فقد قلبه حيفقد انسانيته وحيكون وحش عايش في بحر دم وبس
شعورين مختلفين كامل الاختلاف
#أحد_يريد_والاخر_يرفض
حيرني جابر قعدت نمشي امعاه ونا ساكت وجوا مني صراعين بحرب كبيرة مش عارف شن نهايتها
خذينا تاكسي وطلعنا علي مطعم تعشينا وقعدنا فيه اشوية وبعدين طلعنا عالفندق وكل واحد فينا خذا دار
واول ما وصلت عشان ننسى كل اللي نا فيه وماانفكر في شيئ ونبعد عالصراع اللي في داخلي رقدت ?
/
/
ومن ثاني يوم الصبح بدن الاجتماعات السرية المكثفة
وقعدنا 5 ايام كلهن ضغط واجتماعات واتخاذ قرارات في شؤون ناس وفي شؤون دول
وكانن في اجتماعات ايخصن الأمور الشخصية الاعضاء المنظمة
يعني بإختصار التحكم في حياتهم لان ماكان اي حد ماللي يشتغلو في المنظمة قادر ان يختار شيئ بروحه
طبعا كان من ضمن القرارت اللي طلعن موافقة زواج عبد المهيمن من تسنيم بعد ماتم التأكد ان عبد المهيمن مايعرفش حتى 1% من اللي قتل باته او عنده فكره عالمنظمة نهائي وكان تفكيرهم زي ماقلت بزبط لما ايكون عبد المهيمن متجوز تسنيم حيقدرو بهكي يعرفو تحركاته اكثر ويعرفو لو فيه يوم شك في شيئ ?
فرحت العبد المهيمن واحزنت في نفس الوقت لان قاعد مصيرهم ومصير حياتهم في ايدين ناس هما مايعرفرهمش ولا عندهم بيهم اي دخل ونرجع وانرد ان خراب حياة الكل سببه جابر ?
مش عارف بس بالنسبة ليا كان هو سبب في كل شيئ ايصير ?
/
/
5 ايام كانن متعبات بكل كان النوم 4 ساعات مش اكثر من هكي
اليوم السادس في الليل روحنا وروحت مع جابر للفيلا واول ماوصلنا
جابر:تبي اتبات هنا
نا:لالا بس بنقول التسنيم انك وافقت
جابر:هي في بينها وبينه حاجة
نا:مش بزبط بس شكله في اعجاب هكي
جابر حسيته مااعجبه الموضوع بس كان مظطر ايوافق اصلا المنظمة وافقت?
خشينا مع بعضنا هو رقى الداره ونا مشيت شور دار تسنيم ودقيت وهي فتحت
تسنيم بصوت عالي:احمد
نا:تي اسكتي هلك مرقدين
تسنيم:باهي خش
نا:لالا بنروح جاي بنقولك خبر ايفرحك
تسنيم:شنو
نا:باتك وافق علي عبد المهيمن
تسنيم;تكذب
نا:عمري كذبت عليك
تسنيم بفرحة:واخيرا ?
نا خبطتها علي راسها:تحشمي ينعن شكلك خوك اللي قدامك مش اشوال بطاطا
تسنيم:اسفة بس انفعلت اشوي
نا;توا بنمشي وانفعلي براحتك تصبحي علي خير
تسنيم:وانت بخير
طلعت منها وفتحت تليفوني وجني عرم رسائل من سمر ماتحملتش انشوف رسائلها ورقمها وماانرنش عليها ضعفت زي كل مرة ورنيت واول ما ردت
نا:وحق ربي رايفت عليك
سمر:من امعاي ??
نا:سمر
سمر:نعم
نا:بلا جو قتلك رايفت عليك
سمر:تعرف ان لكي 6 ايام مختفي ولا نندري عليك لا حي ولا ميت
نا:وحق الله كنت في شغل ونا والشايب
سمر:تي باهي ليش مارنيت عليا طمنتني عليك
نا:انقولك كنت مع الشايب كيف بنكلمك وبعدين نا بعد اخر مكالمة كانت امعاك هو كلمني وقالي فيه بضاعة للشركة ممسوكة عالحدود عدي شوفها مشيت دغري ولما جيت غادي قالولي ردوها التركيا كلمته قلتها له قالي عدي للمطار لاحقك بالتذاكر غادي ونا وصلت وهو ورايا ووصلنا التركيا كملناها كلها جري عالبضاعة ونحسابو منصوب علينا وفي الاخير كيف قدرنا انخششوهها وغادي كنت طول الوقت امعاه وفي شغل والله ماكنت عندي حتى دقيقة فاضية انكلمك فيها
سمر قعدت ساكته
نا:حبيبي والله ماتزعلي انتي عارفة كيف متعود عليك وعالمكالمات امعاك والله طول الوقت عقلي امعاك وانقول اكيدة مشغولة عليا واكيدة زاعلة مني غصبن عني لو عندي حتى ثانية وحدة فاضية راه كلمتك
سمر:انا انشغلت عليك بس
نا:عارف واسف سامحيني مش بقصدي والله
سمر:باهي معش اتعاودها
نا:حاضر بس والله رايفتلك ورايفت علي صوتك وضحكتك وكل شيئ فيك
سمر:عارفة ☺
نا:باهي انتي مارايفتيليش
سمر:نا انشغلت عليك
نا:يعني مارايفتيليش
سمر:أحمد?
نا:قلب وعيون وروح أحمد انتي ?
وكملنتها نحكي امعاها لعند ماوصلت للشقة وخشيت ونا نحكي امعاها والليل كله كملناه دوة
كنت مرايف عليها بككل نبيها غير تحكي ونا نسمعها وبس ?
وزي كل مرة رقدنا عالخط ونحن نحكو ?
/
/
صباح يوم جديد
وعيت زي روتين الايام اللي فاتن اول شيئ كلمت سمر وبعدين صبيت دوشت ولبست وطلعت بس هالمرة كان مشواري شور عبد المهيمن وصلت للشقة وقعدت انرن عالجرس وفتحلي وشكله كاين راقد
عبد المهيمن وعين مغمضة وعين مفتوحة
عبد المهيمن:صبح يافتاح
نا:غير قول صباح الخير قبل
عبد المهيمن:صباح الخير لكن كنك جاي قبل الشحاته وبنتها?
نا:اتشفط عليا تمام بس اول حاجة يابرو مش بدري انت اللي شكلك متأخر علي شغلك توا الساعة 8:30
عبد المهيمن بصدمة:احلف حي علما تأخرت بكككل
نا:وثاني حاجة جاي بنقولك جابر وافق عالخطبة
عبد المهيمن:تكذب
نا:تي شن قصتك انت وتسنيم في شن كاذب عليكم من قبل ازح
عبد المهيمن:يرا ماتزعلش والله من الفرحة بس
نا:باهي تحشم خوها راني?
عبد المهيمن:وخوي حتى نا ولا انسيت
نا:مش ناسي والف مبروك ياهيما اهو بتحلق معز وتجوز واتخلوني نا بس عزابي
عبد المهيمن:حتى انت مااتصمطهش اهو حب وحبيت وبنت الحلال القيتها توكل وانوي بس
نا:ان شاءلله
نا:تبي مني حاجة توا بنمشي للشركة
عبد المهيمن:خليك افطر امعايا
نا:لا سبقتك وتأخرت عالشركة
عبد المهيمن:انوصل الكلام الامي لانها ترجى في الرد وانشوفها شنو اترد عليا وانقولك شن بندير
نا:تمام سلام توا وطلعت
سيبت عبدالمهيمن في فرحته ولحظته الجميلة اللي تمنيت روحي مكانه فيها مع سمر ?
/
/
وصلت للشركة ودغري كلمت سمر هدرزنا اشوية وبعدين هي طلعت للجامعة ونا شفت الشغل اللي عندي
/
/
عبد المهيمن كلم اخت امه اللي هو يعتبر فيها خالته وحكالها اللي صار وان العرب ردو عليه
ام عبد المهيمن كان مازال علي فكر ارباطها اسبوعين
قالتله يرجاها اتفك وتمشي هي تطلبله لان كان هذا الحلم اللي ايتمناه الحاج ميلود ان ايجوز عبد المهيمن وايتهنى عليه وعبد المهيمن وافق وكان فرحان بككل بان بياخذ تسنيم وان امه هي اللي بتطلبها له?
/
/
مرن هالأسبوعين بسلام وجو سمح بكل بيني وبين سمر وكل مرة انتعلقو ببعضنا اكثر بس مازال مااعترفتلي بحبها ?
جا يوم فكت ارباط ام عبد المهيمن وكانو كعادات الليبين ملتمين في حوش الحاج ميلود غادي واولهم عبد المهيمن لان واخيرا بعد 4 شهو و10 ايام بيشوف امه
كلمني معز وقالي انجي غادي الحوش الحاج ميلود عشان انكونو مع عبد المهيمن لان اكيد بيتأثر في يوم زي هذا
وماكذبتش خبر اول ماكلمني دغري مشيت غادي وفعلا القينا عبد المهيمن في حالة بكى وقصة وخصوصا لما خش علي امه صوت بكاه كنا نسمعو فيه في الشارع كأنه اليوم الحاج ميلود كيف مات
كان موقف مأثر مأثر بكل خصوصا عليا لاني قاتله بإيديا ?
/
/
قعدنا مع عبد المهيمن لعند الليل لين الكل روحو ولما جينا بنروحو عبد المهيمن كان جوه مش تمام واصر ان انباتو امعاه معز ماقدرش مراته في الحوش بروحها تعذر من عبد المهيمن وعدى ونا انحرجت انسيبه وقعدت امعاه
سمر طول الليل وهي اترن عليا متعودة كل يوم نحكو بس اليوم هذا ماقدرتش دزيتلها رسالة نا مع صاحبي نفضى انكلمك دزتلي تمام ومعش رنت
/
/
الحوش كان فاضي ومافيش حد الا نا وعبد المهين خشت علينا امه سلمت عليها وعزيتها والباين انها كانت كويسة وماتفرقش شيئ عن الحاج ميلود كانت جايبتلنا سحور اصر عليها عبد المهيمن اتقمعز تسحر امعانا وقمعزت وطول القعدة وهما يحكو غير عالحاج ميلود ونا كأنهم يضربو في بامواس في قلبي ?
ومن كثر تأنيب الضمير حسيت روحي بنصبي وانقوللهم اسكتو خلاص نا اللي قاتله ?
بعد اسحرنا صبت امه بتشيل السفرة حلفلها عبد المهيمن اتخش اتريح وهو حيلمها خشت هي رقدت وصبى عبد المهيمن بالصفرة ونا صبيت وراه
غسلنا العوايز ولمينا حوسة المطبخ وطلعنا ونحن طالعين خطمنا علي دار غريبة ومسكرة بطريقة غريبة قفل ومفتاح ليا زمان علي دار تسكر هكي الدار واضح ان الها زمان ماانفتحتش
نا:شنو هذي دار ولا مخزن في نص الحوش ولا حوشكم كيف تفصيلته
عبد المهيمن:هذي دار باتي الخاصة اللي ماحدش ايخشلها فيها كتب واجد وكل اوراقه الخاصة بمساعدة الناس وكل شيئ ايخصه فيها وممنوع علي اي حد ايخشلها
نا:اها (وحسيت ان راس الخيط اللي اندور فيه ونبي نمسكه حنلقاه في الدار هذي)
خشيت نا وعبد المهيمن للمربوعة بنرقدو نا قعدت انتقلب وماجاني نوم كيف نرقد في حوش الراجل اللي قاتله ?
وفي نفس الوقت انفكر في الدار واللي فيها وهل اللي اندور فيه نلقاه فيها
ونا حاير من تفكير التفكير جتني رسالة من سمر
(كان مازلت بطول بنرقد)
ماقدرتش انخليها ترقد من غير مانحكي امعاها صبيت من جنب عبد المهيمن وطلعت برا السيارتي ورنيت عليها
سمر:كنت بنرقد
نا:معليش بس صاحبي صايرله موضوع هكي وقاعد امعاه
سمر:نا بس انشغلت عليك لما رنيت كم مرة ومارديتش ولما قتلي امعاي صاحبي زدت انشغلت اخرى وماقدرتس نرقد لين نحكي امعاك ونطمن عليك
نا:حيرتيني امعاك ياسمر
سمر:في شنو حيرتك
نا:معش فهمت احساسك تجاهي ابدا ديما مشغولة وبتطمني عليا ومااتحبينيش نقعد متضايق واتحبي اتخلي جوي تمام وفي نفس الوقت مازال مش حاسة شيئ تجاهي مع ان لنا توا قريب شهر مع بعضنا
سمر:كيف انت مليت
نا:لا مامليتش لكن احترت بس
سمر:خلاص اول ما انتلاقو انقولك اللي صاير امعايا
نا:معناها خلينا انتلاقو بكرا
سمر:تمام بكرا في نفس الكافي الساعة 5
نا:تمام وتوا خليني انخش شور صاحبي قتلني الصقع في السيارة
سمر:تمام
نا:حنكلمك اول مانوعي
سمر:تمام تصبح علي خير
نا:وانتي بخير وديري بالك علي روحك
سمر:حاضر وحتي انت
نا:حاضر وانحبك
سمر:سلام وسكرت
ونا خشيت جوا واول ماخشيت جت عيني عالدار المسكرة وقعدت انبحت فيها وكل اللي في عقلي اني بنخشلها وبس قربت مالباب ومسكت القفل
#يتبع
حي عليك يا احمد وانت لا تشعف لا اتريب ?
توا قولكن لو يطلع عليه عبد المهيمن او امه شن بيكون موقفه وشن حيصير ?
ولو نفذ من هالموقف وقابل سمر شنو يطلع اللي صاير امعاها وبتحكيه له ?
وقولكن هل حتم خطبة عبد المهيمن التسنيم ولا لا ?
كله حنعرفوه في الحلقة الجاية ☺
اسفة لو فيه لخبطة في الأسماء وأكيد رأيكم ايهمني?
گـتـابـتـي Koka Saleh